رواية بيت جبر الفصل الثاني وأربعون 42 - بقلم هُدىٰ آذار

مَســاء الخير
ورجعنــا وياكُم بـ بارت جديد من قُصة
بيَت جبُر
للكاتبة : هُدىٰ آذار
لاتنســـون التصويت والتعليق بين الفقرات
قِراءة مُمتعة.
____________________

رَحمـة

شويـة واجتني رسـالة من رقُم مجهول
-  كتلج انتِ الي وما تصيرين لغيـري اذا صار العقِد اسويهـا بحر دماية والله ..

من قريت الرِسالـة احس نفسي انصدمت، شنو بحر دماية شنو ما تصيرين لغيري هذا منو !

حتى ماكدر اكول غَيث لان غَيث ستوة جان جاي يراسلني، طبيت ع الاسِم ماكو اسِم

كتبت حروفي بـ خوف وصدمة وتفاجُئ
رَحمة
منــو ؟

رأسًا اندزتلي رِسالــة
- ليش اكو غيري يعني !!!!

من كال هجي صُفنت، معقولة مُصطفى !!!!
مُصطفى مِن بعَد ما تزوج هاجَر وكف ياخة مِني مُستحيل هوَ !!

رجعت كتبت بـ اصرار
رَحمة
منـو انتَ تكلي لو احظرك؟

- مُصطفى انة

من گال مُصطفى انصدمتتتت
معقولة !! هوَ غيـر تزوج وراح شهل لطلطة هاب
رَحمة
انتَ مخبل لوشنــو ؟ يعني طلگت مرتك رجعت علية !

مُصطفى
ليش هوَ انة نسيتج؟ لا نسيتج ولا طلعتج من راسـي وبعدين شنـي تاخدين غَيث المخبل !
غَيث ما يستاهلج انة استاهلج رَحمة

رَحمة
انتَ اكيد بيك شي مُستحيل تكون انسان صاحي

مُصطفى
فعلاً من يوم الي شفتج بي لحد هسة انة مو انسان طبيعي، ولسة مانسيتج على فكرة

تذكرت من شـاف بـ ايدي البهاگ وكتلة بية بهاگ شلـون خلة وراح وهسة راجع بكِل صلافة ؟
شكد قرفت ..

رَحمة
لا تجي مـَرة ثانية وما الك علاقة بحياتي اتزوج غَيث اتزوج غير واحد انتَ ما مخول تسطي على حياتي بهذا الشكِل فهمت ؟؟

مُصطفى
لا مافهمت، ولا توجهين الي كِلمة فهمت لان انتِ شكلج بعدج ما تعرفيني انة منوو زيـن، وانة كتلج رايدج يعني رايدج وهسة راح اكلج راح اخذج يعني راح اخذج واريـد كوا. يوكف بوجهي حٍتى اطلع حليب امـة منة

وبعديـن تعاي انتِ ما لكيتي غير هذا الخبِل ؟ نوبّ حتى من بعد ما صِحى ضل خِل ومكضيها ديانة براسنـة عود

رَحمة
ترة غَيث ابن عمك ونفس ما ادري علاقتكُم جانت قويـة فَ شلون تكول عنة مخبل ومدري شنو؟؟ جـان استحيت على نفسك شوية ! يا عَديم الاخلاق والتربية ! على الاقل غَيث ما يلعب ب اعراض النـاس ومايرضى بالحرام ومن راد اجة من الباب مو كعد يتملعب ويچَحبِن كلام براسي !

كتبتلة هَجي بعصبية وخليت وحظرتة، صدك انسان بلا اخلاق تربيتـة بخارج بيتهُم مبينة مأثرة عليّ

عفتـة وكمت صبيت اكل لامـي رجعت ع موبايلي مـرة ثانية اتفقد اذا غَيث كاتب شـي، لكيت رسالة من رقُم مجهول

ياربي هذا صدِك بدون اخلاق !!!

فتحت المُحادثة داز صوتيات، فتحت الصوتيات وصرت اتسمع لصوتة وهوَ يصيح ويغلــط بعالي صوتة.

مُصطفى
النعــال احطة بحلگج اذا مــرة الثانية كلتي عديم الاخلاق والتربية، ولج تحجين عَ الاخلاق والتربية وحضرتج جنتِ بغرفتـة ٢٤ ساعة هسة كمتي تبيعين شرفيات براسي، ردت المج من الزبالة الي انتِ بيها صح لان انعجبت بيج وردت اوصلج وافهمج انُ ماكوشي صعب اعلية واكسر خشمج واخذلي مـرة ثانية تونسني بس انتِ مو وجِـه نعمة جنج ميتـة اعلى المخبل وكاتلة روحج اعليّ ف روحي ما الي دخل بس ما اتسمى مُصطفى اذا اخلي عرسكم يتم، واذا ما اخلي بحـر مال دم ما اتسمى مُصطفى انة ويلا لا بالقندرة هيَ بگعة ..

من سمعتــة هجي يكول احس الغَضب تسلسل لاعماقي
شنـو هل حُثالة هذا !! شنـو ما الة واحد يوكفة عند حدة ! عبالة راح اسكتلة لو شنـو !
كِل مـرة انة اسكتلة لان مايتجاوز لهاي الدرجة بس هل مـرة هاي مُستحيل اسكتلة على كلامة الي حجآ

ادري كِلش زين ادا اسكت راح يتمـادة وبنفس الوقت داركة انُ السالفة ما تنضم فَ لو ضميتها انة راح تطلع بعدين بَس بضدي

الساعـة بـ ٨ بليل، امـي اخذت علاجهـا ونامت واني كاعدة وحدي بالاستقبـال، افكر شنـو اسوي واندعي يكون الي اسـوي صحيح وما اغلط بشي

اخذت نَفس وغمضت عيوني الي مليانات دموع بسبب كلامة الجارح الي، بس مهمّا صار ومهمّا اكو دموع القـوة ما اتنازل عنها

صار براسي اميـر، صُفنت شوية ما اعتقِد اكو أچَدر من امير بهاي السالفة ويحلها بهدوء وثقافة متأكدة،
زَعيـم هم بصفتة هوَ ايد الشيخ اليمين لازم يجي واحجيلهُم ثنينهُم وهُمَّ الي يقررون

ارقامهُم كلهم يمي خاف يصير شي كذا هُمة موصيني واني هم  حاطتهن، راسلت اميـر بدون تردُد وثقة
رَحمة
السلام عليكُم امير، مُمكِن احاجيك بدون مايدري غَيث انُ اني جاي احاجيك

انتظرت شويـة ورد علية
امير
وعليكُم السلام اهلاً رحمة
اكيددد كولي خوما عندج شي ؟ تحتاجين اجيج ؟

رَحمة
ردت احجيلك شي جاي يصير وياية وبصراحة سكتت عنة بالبداية بس احس بسكوتي ارتبكت غلط واريدك تحجي وي زَعيم بي وتحطون حد للجـاي يصير واني لو ما معتبرتك اخوي ما اجي ولا احجيلك

امير
اكيد رَحمة خادم انة، انتِ بس احجي وركبتي سدادة الج
بس صُدقــًا خوفتيني شنـي احد مضوجج بفد شي من عدنة احجيلي لان عقلي كام يضرب منا ومنا ..

بديت احجيلـة الي صـار بالضبُط من وداني للبيت وضل قافل السيـارة و لمن اجة لبيتنـا وكِلشي حجيتلة والحمدلله انُ اني جنت حافظة كِل المُحادثات وكِلشي

هوَ ضل يستفسر مني على كِل سالفة صارت بس بدون ما يبدي رأية جان بس يستفسر

حجيتلة كِل السالفة وكتلة بالنهاية
رَحمة
اني خفت لا السالفة توصـل للشيخ وماردت تصير فتنة بس الظاهر كِلش استقوى وزاد عن حدة وطلع من حدودة واني ماحب احد يستضعفني بهل طـريقة، اتمنى غَيث ما يدري بالسالفة لان تدري غَيث شلـون مُتعصب وهجومي وماريد يصيـر شي لا سامح الله يخلينا كل احنة نتندم عليّ ف اتمنى انتَ وزَعيم خصوصًا الي تحلون السالفة واني ماريد غير يفُك ياخـة مني واذا كلش وكلش اطلع من البيت لان هوَ بالنهاية الن عمكم وماريد تصير مشاكل بينكم بسببي

امير
اولاً اني حاس بالخجّل كون هذا الانسان تربطني بي صِلة قرابـة، ثانيًا انتِ ما سويتي غير الصح ب انّج سولفتي الي صاير كِلة وثالثًا هذا بيتج وتكعدين بي مُعززة مُكرمة ومحد يمسج بـ ايّ شي ولا تتوقعين هجي قرار يطلع من الشيخ جبُر، الشيخ جبُر عادل ويعرف شلـون يتصرف
فَ انة هسة راح احجي لزَعيم ونحجي وي الشيخ واحنة نتصرف ويـا و اوعدج قبل لا اسوي كِلشي انُ بعد ما يتعرضلج ابد وانة اوصيج السالفة ماتوصل لغَيث لان اذا وصلت مصيبة وشيفُكنا بعــد

رَحمة
رحم الله والديك امير ماتقصر والله، ولا تخاف ما توصل ابد من ناحيتي

امير
واتمنى هذا الشي ما يكون عائِق لسالفتج وي غَيث، رَحمة غَيث رايدج بالحلال وكِلش شاريج وانة شكد ما اعز اخوي فَ اعزج هم وانتِ بنية معدلة وما يستاهلج غير المعدل اكثر منج و والله لو غَيث القديم جاي ومحاجيني اعليج ماجان رضيت، بس هسة غيث انسان جديد وبدة يكون روحـة من اجديد وغَيث رجال اعليّ المعتمد هسة بس بالنهاية القرار قرارج اكيد ولو حسيتي روحج تستاهلين الاحسَن ف اكيد هوَ لازم يتقبل هذا الشي وكلمن ونصيبة بعد ..

رَحمة
ان شاء الله خيـر خوية ..

نهيت الحديث ويا وضليت صافنة بالسگُف هوَ غيث رجال فعلاً رجال لو ردت اقارن بينة وبين مُصطفى راح الاكي غَيث متقبل عيوبي اكثر مما متقبلني اما هذا ف من شاف عيوبي ما تقبلني من الاساس، بنفس الوقت غَيث مُمكِن يكون فارس احلام كِل بنت ويمُكِن لو بنت مكاني جان قبلت بنفس اللحظة، غَيث ما عليّ عيوب ابدًا

السالفة بية اني، اني ما استحقة، هوَ هواي عليّة، عندي الثقة التامـة بنفسي بي مو كدامة ابد هوَ يستحق الاحسَن اني متأكدة

فتحت مُحادثتنـا وغطست بـ كلامة
- مو مُهم مرضج
- انة رايدج شريكة وصار اعليج
- مرضج ماراح ياثر اعلينة
وو...

لكيت روحي مبتسمة بدون مادري وعيت من افكـاري كمت اريد اسويلي شي شي لامي اكيد هسة روحها مسلوحة من العِلاج لكيت اكـو بُرتقالة وحدة سويتلهيا عَصير ورحت كعدتهـا انطيتهيا حتى تشربـة

ام علي
الله يرضى اعليج يبعد روحي
انة راضية عليج يرحمة حَتى لو متت انة هم راح اموت وانة راضية عنج

رَحمة
اسم الله عليج يُمة من عمري على عُمرج بجـاه الحسين لا تكولين هجي حبيبّة

ام علي
لا يَ يمة شما اكول هجي هيَ هاي الدنيـا ما تتأمن واعلى غفلة نودع ونروح هناكَ يمة هيَ دار البقـاء

رَحمة
يُمة لا تحجين هجي شنو انتِ ماتفكرين بية

ام علي
انة جنت قبل افكر بيج واكولن مني الهة وشلون، بس هسة انة مطمنة يُمة، الله يحنن گلبج اعلى غَيث يُمة والله غَيث خوش رجال

رَحمة
يُمة ماكدر اظلمة وياي هوَ شاب ويستاهل الاحسَن والله

ام علي
يمة جا انتِ شمالج شعايزج ماتكليلي

رَحمة
وجسمي يُمة؟

ام علي
يُمة هوَ راضي بيج شعليج بعد

رَحمة
شلون شعلية يمة شلون
هسة كافي عوفج هيَ تنحل وحدهي
نامي ارتاحي لا تحجـين وتعبين روحج
اني راح اكوم اسبح

طبيـت سبحت وطلعت كملت كِلشي، الساعة بـ ١٠ تقريبًا ماعدي شي اسوي مديت سجادتي وصرت اصلي واقرة ادعيـة

المُعجزات مـا تحدث بس للانبياء، المُعجزات تحدث النـة هم، اني على ثقة تامـة ب انُ الانسان الي يتقرب من رب العالمين ما يخسر ابد، وحياتة تكون وردية ويحس بـ راحة واطمئنان مو طبيعي، الذنوب واتباع الهوى مـا تودينة لشي حلو، بالعكس نصير نفسية ومزاجنة يتعكر وحتى الاشياء الي نريدها تتعكر وما تصيـر، عكس القُرب من رب العالميـن يورث النـة راحة وتساهيل بحياتنا مو طبيعية ..
الانبيـاء جانت تصير الهُم المُعجزات لانهُم جانوا ساجدين لـ الله ٢٤ ساعة، عايفين كل شي مُمكِن يلهيهم ويبعدهم عنة ومكرسين وقتهُم الة ولعبادتة ويحصلون المُعجزات
فَ احنـة البشر هم نحصل هل مُعجزات لو تقربنا لـ الله

وحتى الكلام اني اؤمن انُ الله ماحاجة بس موسى ومُحمد(ص) اني متأكدة انُ الله يحجي وي البشرية القريبين الة هم
اتذكر من جـنت امُر بسـالفة واتعب من عندها يكفيني انُ اسد الغرفة عليّ واكعد اصلي رُكعتين واكعد ع السجادة، حَتى لو ما جان عندي حجي يكفيني انّي اكعد ع السجادة واحس الله يسمعني حتى لو ما احجي

ومن اكمل جنت افتح القُرآن واكلة ياربي بردلي كلبي بكلمة، وما فد يوم فتحت القرآن الا وما ربي محاجيني بـ آية بنفس الشي الي اني اريدة ..

بالنهاية حياتنـا مابيها هواي، خيرنـا يعيش ٦٠/٧٠ سنـة لو واحد يفكر بيهن ويحسبلهن فَ ما يسون نضيع دنيتنا واخرتنا بسببهن و واحد ياخدها وسيلة قُرب من الله احسن الة .

ضليت كاعدة بمكاني من بعَد ماصليت وسبحت تسبيحاتي وصافنة وافكر بموضوع غَيث، صارت الساعة بـ ١١ كمت صليت صلاة الليل وكعدت اقرة سورة ص

كملت وسجَدت مرة ثانية  وكلت
يـــارب لو جان غَيث من نصيبي قربة الي، ولو جان مالنة نصيب ببعض بعــدة عني

شلت راسي من التُربة سمعت صوت اشعـار ، موبايل جان يمي سحبت موبايلي جاي اشوف مني شفت غَيث
دازلي صورة سـجادة وتُربة وكاتب جوة

غَيث
ستوني كملت صلاة الليل، اندعيت الله لو جنتي من نصيبي يسهلي كِلشي، ولو ما جنتي من نصيبي يكتبج من نصيبي لان ماعتقد الكي احسن منج ..

قريت الرسـالة وابتسمت ابتسامة عميقة
حَسيتهـا علامة جبيرة بنسبة الي، بَس بعدني اريد اتاكد اكثر

ماجاوبت خليت الموبايل مفتوح وكمت لميت سجادتي واجيت كعدت بالگاع وكتلة

رَحمـة
انتَ متأكد غَيث من اختيارك؟ انتَ ما مضطر تتحملني اني و عيوبي ومَـرضي، انتَ تستحق الاحسن غَيث ..

غَيث
لو أخذتج، فَ راح اكون ماخذ اغلى شي بكِل هاي الدنيا

رَحمة
ومَرضي غَيث ؟ والله ماكدر اوصفلك الي بـ بالي وبداخلي بسبب الحدود الي بينة والخجَل والحدود بس اكو شغلات ماراح اكدر بيهن بالنهاية اني بهاگ وجَسدي ... احتاريت شلـون اكدر اوصف الي بگلبي الة وسكتت بعدهي جرئت نفسي و كتبت
انتَ شـاب ومن حقك كِلشي وجد تستحق بنيـة زينة غَيث ..

غَيث
تــرة انة مو اول ماشفتج طحت بحُبج حتى نكول الج حگ اعلية، انة عشت وياج وعاشرتج وشفت مواقفج واخلاقج وتاكدت من روحي ومن قرارهـا يلة اجيت وكتلج، هاي انتِ العاقلة التقرة كتُب عود رّحمة، وهسة انة المفروض انظرلج كَ جسد لو شني ؟
يعني انة ما معقولة عقلي ينحصر بس بهاي السوالف، انة شايفج بصورة عامة مُناسبة الي فَ هل ١٠٪؜ العلاقة الي تقصديها ماراح تأثر علينـا !

وبعدين انتِ شبيج ؟ ميت مرة كتلج ما هيَ الا غيوم ضاگت بالسِمــا و توسعت بيج، ماجاي اشوف نقص انة جاي اشوف ابداع للخـالق وجاي اشوف شي مُمَيز وحلـو وعَجيب انتِ شلون تكدرين تشوفينـة كَ مرض مو كَ تميُز مع انُ ادري بيج عندج ثقة بروحج وحابة روحج بس هاي ترديها حِجة خـاف اعليّ كليلي اذا ماعاجبج انة والله مابيها شَي قابل اغصبج اعلية ؟

بكِل حرف اقرا يخلي فرحـة بگلبي موطبيعية واحس داخلي انغُمر بالسعـادة

سكَتت لان ماجنت اعرف شـرد وهوَ هم سكت، بس ثنينة فاتحين المُحادثة مبين ..

ورة رُبـع ساعة تقريبًا دز

غَيث
انة هم ماريد ازود بالحجي ويـاج رَحمة وبنفس الوكت انة احس انُ ضغطت عليج وحصرتج لمُدة محدودة هيَ جانت علمود شيخ فاضل وجنت حاب هوَ يعقدلنا لا اكثر بس هوَ واعدني يجي مـرة ثانية

ف راح اعوفج براحتج وفكـري وبالوقت الي يعجبج ردولنـا الجواب وهم انة راح احجي اهلي ما يضغطون اعليج وشوكت مـا تكونين مجهزة جوابج احنة موجودين

رَحمة
ان شاء الله

غَيث
اما بالنسبة للشغِل فَ انة ماشوف الة داعـي ولا اتقبلة ابد واتمنى ما تحسينـة تقييد كد ما انهُ حُفظ وحُرص
وانة موجود والي تردي ماراح اقصر عنـج بي ادري بيج عدج عِزة نفس وكرامة بس انة ما منخي اعليج رَحمة ..

رَحمة
شكرًا الك بس اني مامحتاجة مُساعدة احد

غَيث
ادريج كد روحج

سد المُحادثة ويـاي جنت احس اكوشي تغيـر بداخلي تِجاهة واكو ابتسامة يجوز مو واضحة على وجهي بَس جـانت واضحة جواي

نمت براحـة وكعدت ع النـوم الصُبح من وكت احب ابدي يومي بـ السبح لان احس هو الشي الوحيد الي يطيني طاقة ويزيلي كِل تعبي

سحبت وبدلت ولبست شـالي وعباتي وطلعت اسگي الوردات وجنت فرحانـة بيهن لان جانن كبرانات بشكل حيل ملحوظ

بهل اثنـاء خُطفت سيـارة اميـر وجانت راكبها غَيث نزل جامة السيـارة وباوعلي بنظرة خاطِفة تلاگن عيونة لاقل من ١٠ ثواني وخلت وراحَت السيـارة ..

مبين جان يفتر بالبُستان لان جاي من ذيجّ الجِهة الخلفيــة
طَبيت للبيت وضليت كاعدة للعصر تقريبًا راسلتني روآن وجانت تبجي مدري شبيها اخذت امي ورحنـة الهُم

لكيت بس سيوف وروان و سّبب ونسوان عمهُم بالبيت وميدرن شنـو الصاير لسُراج وشَمس

ضلينـة ندعيلهُم وييسُر امورهُم لليل تقريبًا عرفنـة انُ وضع شَمس جان بخطر

ضجت عليهـا كِلش، وكعدت وحدي وصرت اندعي ربي يكومهـا بالسلامة بس مادري ليش جان كلبي مرتاح من ناحيتها وحاسة انهّا راح تكوم وتصير زينة

ضلينـة يمهِنّ لان وحدهن ومحد وياهن لليل تقريبًا اجـة غَيث وابـو وعَمـة

لبست حجابي وحَطيت عباتي ع كتافي جنة كاعدين بالصالـة طبوا هُمة و روان راحت تلكتهُم

طبوا سلمــوا اجت عيون غَيث علية ..

كعدوا يمنـة وصاروا يحجون ع شَمس واني كاعدة ومدنـگة مستحَية

شويـة وكلنة نروح لان اكيد تعبانين فَ ودانـا غَيث للبيـت

اليوم الثاني كعدت من الـنوم ردت اروح اسگي الزرع شفت اكو علاگات كدام الباب كومـة

فتحتهن جانت مليانات مسواگ و اشكال و الوان، اجت عيني ع ورقة محطوطة بـ وحدة من العلاليك اخذتها جان مكتوب بيها

غَيث
هـذا من جَدي، جَدي وصاني اجيبلكميا ترة مو انة خاف تكولين

طببت الغراض ادري بيهِن من عندة بس جاي يكول هجي رحت للموبايل وراسلتـة

رَحمة
غَيث ترة صدك ماكو داعي لا تزحم نفسك مانريد شـي

غَيث
ترة جدي كال مو انة، تردين روحي احجي وي جدي انة شدخلني

رَحمة
ها يعني متاكد جدك مو انتَ

غَيث
صدكيني، باجر جلسة امج انة اخذجن ان شاء الله اذا طلعوا سُراج وشَمس بسلامة واذا ماطلعوا ف انة اجيكم، ف بكل الاحوال انة اخذكُم

رَحمة
ماكو داعي تزحم نفسك غَيث

حط لايك على رسالتي وراح يعني حتى موعد الكيمياوي مال امي حافظة اجـة اليوم الثاني واجـة هوَ اخذنـاه من رجعنـا گال محَد بالبيت روحوا يم البنات صدگ والله رحنـة يمهم امي نامت واني ضليت يم سَبب و سيوف

سَبب
يمعودة شوكت ناوية توافقين بمُحرم تدريـن غَيث جان هناكَ محتاجي بس رجع علمودج؟ بحيث انة جنت اكول شعندة هذا نفس ماراح اخذهم راسًا رجع وخبص الدنيا شغل عندي الصبح شغل عندي الصبح اثاري علمودج والله زين شتردين بعد احسن من هجي والله غَيث ميتعوض ..

من گالت هجي انصدمت عود صدك جاي علمودي
سكتت وكتلها والله مـادري سَبب محـتارة

كعدت تحجي وياي عليّ ومادري شنـو كتلها ان شاء الله خَير والله كريم ..

مضت الايام وبعد مارجعوا راسلني امير، طبعًا اني استغربت لان امير غَلس ع السالفة كُليًا بس بنفس الوقت مُصطفى ابد ما زعجني

امير
السلام عليكُم رَحمة، دام غَيث مو بالبيت تكدرين تجينة علمو الموضوع ؟

رَحمة
وعليكُم السلام امير، ماريدك تكبر الموضوع حباب وهو هم عافني وبنفس الوقت انتم ستوكم طالعين من محنة وتعبانين فَ ماريد اتعبكم اكثر

امير
لا خوية الشيخ رايدج، واصلاً هي السالفة محلولة بس يعني يريدج الشيخ هَسة اذا تكدرين حتى اوديلج سَجاد

رَحمة
هسة جاية اني ماكو داعي

امير
لا حضري روحج علما يجيج

كتلة ان شاء الله رحت بدلت كلت لامي رايحة لبيت الشيخ شوية واجيج، اجـة سَجاد اخذني ليهُم

اول ماطبينـا كال
سَجاد
كُبل للديوان رَحمة

انداريتلة
رَحمة
منـو هناكَ سَجاد

سَجاد
بس ابوي وعمامي واحنة

رَحمة
خاف مُصطفى موجود؟

سَجاد
لا يمعودة نكسر رجلة دطبي طبي

توترت بالبداية بَس حاولت اقوي نفسي واطُب
كلت السـلام عليكُم كِلها ردت السلام
تنوعت ابـو مُصطفى جـان موجود
من شفتة انصدمت صراحة

توترت وتنوعت لاميـر

امير
لا تخـافين مانريد نعيد السالفة

جبُر
اكعدي بوية اكعدي لا تستحين ذولة ابهاتـج وهذولة اخوتج

كعدت على جِهة بس جنت حيَل متوترة، الولد جانوا كاعدين على جهة كلهُم عدا غَيث ويم الشيخ كاعدين ولدة واني صرت كدامهُم على الجهة الثانيـة

جبُر
انة ادري بيج هسة انتِ خجلانة وتستحين بس بصراحة الي المفروض يخجل ويستحي هوَ احنة اعلى هجي خلفة عايبة، المفروض احنة نجيج لبيتج وانة ردت اجي حگ الله بس امير كالي بوية امها ماتدري بالسالفة

محسِن
بوية انة اعتذر منج وحگج اعلى راسي على السوة هذا العـار و والله جدة كسرلة راسة تكسر وان شاء الله بعد مايگرب لصوبج حتى وحگج اعلى عينة وعلى راسنا

رَحمة
لا عمي محشوم واني من حجيت لامير ماردت هجي الله شاهد، بس الساكت عن الحق شيطان اخرس واني سابقًا زَعيم موصيني ايّ شي يصير احجيلة وما اسكت وهمة مثل اخواني الله شاهد وسكتت ماردت السالفة تتعظم بس بعديـن حسيتها كبرت ف ماكدرت ابلعها واسكت

زَعيم
لا والله انة من سولفلي امير عِتبت اعليج، جان المفروض من اول مرة من اول سالفة تجين وتكليلي وانة اتصرف لان انة قبل كايلج انتِ بوصايتي وبامانتي فَ عتبت اعليج والله

رَحمة
خوية زعيم اني ماردت السالفة تكبر الله شاهد

جبُر
لا بوية حجيها عين العقل والبت واعية وفاهمة ورادتها بالتي هيَ احسن المهم بوية الولد بعد ما يگرب لصوبج ابد واتمنى هاي السالفة هم ما ما تأثر على علاقتنـا العائلية سوى

رَحمة
لا شيخ انتوا اهلي الله شاهد، وعمي محسِن الله لا يصغرك ان شاء الله واعذرني انة اذا سببتلك مشكلة

محسِن
لاعمي الخلل موبيج الخلل بية انة الماعرفت اربي ولا هذولة اولاد عمة هم من حِلة شو ما لعبوا شاطي باطي هجي

زَعيم
ميخالف عمي ميخالف ان شاء الله صارت بعينـة

رَحمة
يلة اني اترخص شيخ

كمت كـام الشيخ وياي
جبُر
يلة بوية امشينا نطلع سوية، واحد خل يكوم يوصلنا والباقين يضلون يم عمامكم

علي
انة جاي شيخنـا

كام علي ومحد كام ابد من مكانة مبين جان متقصد من كال لحد يطلع

طلع كدامي واني ورا وعلي ورانـا

جبُر
يلة بوية روح شغل السيارة بينما تجيك

علي
حاضر شيخ

وكف بنص الحوش وگالي

جبُر
بويـة بشري شصار اعلى سالفتج وي غَيث ؟

من گالي سكتت وماعرفت شجاوب

جبُر
تـرة غَيث شاريج يَ رحمة ورجال ونعم الرجال و انة لو ما اسوفة كدج ويستاهلج ما افرط بيج لان انتِ بحسبة بناتي الله شاهد وانة وياج اعليّ خليها ب بالج، وحاسبج حساب شَمس وسيوف وحالج حالهن والله

جاوبتة بخَجل
ادري شيخ ان شاءالله خَير

جبُر
يلة رديلنا الجواب من وكت لا تتعززين اعلينا عاد الولد افادة احترگ من الانتظار

ابتسمت واني مدنگة بخجل
مَد ايدة على جيبـة وطلع فلوس منة

رَحمة
لا شيخ والله ماخذ

جبُر
هاي شني بوية ليش تحلفين

رَحمة
لا شيخ الله يخليك والله ماريد

جبُر
بوية جا انتِ استنكفي من الغريب مو اعلى ابيج، انة بحساب ابيج بوية وادري بالعلاج مال امـج غالي ف اخذي ولا ترديني يلة

رَحمة
شيخ والله ماريد ماكدر

جبُر
هاي شني هاي رَحمة بوية اخذي وضميهن يلة لا تخليني ماد ايدي اكثر

ملامحة بيهن صرامة وبنفس الوكت حنية وماكدرت اتجاهل الصرامة الي موجودة او اعاندها اخذتهن من عندة كالي بصوتة الحنين

جبُر
بوية هاي الفلوس كلها لله مو النـا ولازم ننفقهة اعلى غيرنا فٍ لا تستنكفين مني انة ابوج وهمين هاي الفلوس كِلها من الله مو مني وتستحين وتخجلين

رَحمة
الله يوفقك شيخ ما تقصير

جبُر
يلة بوية درب السلامة

خلـة وراح وعلي واكف وعينة بموبايلة اتقدمت الة شافني صعَد بسيارة واني صعدت ورا

اول ماصعدت عاط شو

علي
ولج رحمة ليش ماجيتيني من اول مرة وكتيلي هذا هجي وهجي والله جان سحكتلج اعلى راسة
اعذريني ترة هاي السالفة خانگتني خنگ وانة ما متعود اسكت اعلى الحگ، انة جوة گوة سكتت احترامًا لعمي وجَدي لا اكثر

رَحمة
هي السالفة صارت وراحت علي مايحتاج نكبر المواضيع

علي
لا خل يولي هل ساقط هذا يروح لغَيث فدوة والله
انة سحگت اعلى راسة وعلي وهددتة بـ وظيفتة كتلة اقل تصرف اقدم اعليك كل الادلة واخليهم يسحبون وظيفتك منك وخوش ربيتلجيا فَ انتِ بعد لا تخافين ميتعداج

بس مرات العرگ دسادس فَ لو صدِگ وصدِگ وصارت بس اطيني خَبر والله الا العب بي جولة واعلمة الرجولة شلون تكون

يحجي وعصبي ومنفعل ماكدرت ما اضحگ ع كلامة مادري ضحكة فرح او ضحكة ع لهجتة الجنوبية وغيرتة الحلوة
كتلة ان شاء الله ورحَت لبيتنـا

سويت اكل كالعادة وكملت كِلشي وجنت كاعدة اصلي الليل وافكـر بالموضوع، تمددت ع السجادة بتعب من بعد تفكير طويل
وبدون مادري نمت
فجأة لّن اشوف مُصطفى وهوَ جايني بالحلم
بس ابـد ماجان نفس شكلة الي اني شايفتة بي
..... يُتبععع
_____________

شَمس

كام من مكانة وتقرب كعد يمي بس خلة مسافة بيناتنة

سُراج
هـواي حجي اريد احجي وياج واكو يعجبج واكو لا واكو تحصيل حاصل من هل كلام فَ ياريت تسمعيني زيـن

اولاً انتِ جبيـرة وعُمرج ١٩ سنة راح تطبين للعشرينات وانة عمري ٢٦ سنـة يعني اكبر منج بـ ٧ سنوات تقريبًا فَ انة اشوفها زَحمة تجين تتمادين وياي وتعلين صوتج اعلية يم اهلي بصراحة انة ماتقبلها

بعـدة ما مكمل كلامة جاوبتة

شَمس
تـرة ما فد يوم الي اني اجيتك بي وخاصمتك على شي دومك انتَ الي تبدي وياي والفاظك مَدري شلونهن

سُراج
هَسة سالفة الفاظي مدري شلونهن خليهن اعلى حِدة يعني انة شكايلج سابج مثلاً اكلج يطبج مَرض قابل انة سيد موسوي ودُعائي مُستجاب لو هيَ كِلمة اعتباطية هسة هاي سيوف شابعة من عدنة حجي وعادي ليش لان احنة ميانة وي بعُض لو سَجاد عادي تتقبلين منة كِلشي بس سُراج حرررررام يكلج اعلى عينج حاجِب

شَمس
ايّ لان اسلوب سَجاد مونفسك فَ استقبل من سَجاد بس ماستقبل منك

باوعتلة اتنفس بعّصبية ودنك ورجع باوعلي
حط عينة بعيني وخزرني

سُراج
شلــون احنة وي سَجاد ماراح نخلص ؟؟؟

شَمس
انتَ ليش ضايج اساسًا من علاقتنا

سُراج
هاي ثانيًا ست شَمس بس انتِ ماخليتيني اكمل اولاً حتى احجيلج ب ثانيًا بس ولا يهمج انة احجيلجياهة
علاقتج وميانتج الزايدة وي سَجاد غيريها

شَمس
ماعتقد الك عِلاقة ترة ؟

سُراج
شَمس سوي الي اكِلج عليّ بــدون لسانج الطويل هذا ولج والله حتى شكلج ميرهملة اللسان الطويل وجهج بريء مو يم لسانج اساسًا، وطبعًا انة ادري هذا اللسان بس وياي هجي، هذا يم غيري ينگط عَسل اسم الله عليج

شَمس
دامك تتعامل وياي هيج حَضل هيج اتعامل ويـاك
شلون البلوك مال اليوم، ترة والله من سويت هيج فد استصغرتك وتندمت لان راسلتك وتطمنت عليك اساسًا !!

سُراج
انة اكول لو تسكتين احَسن راسلتي وكلت ما شاء الله شهل مُبادرة الجميلة، ومعَ انّي جنت ضايج عجبتني مُبادرتج وقدرتها بداخلي ادخل فجأة الكاج حاذفة مال ديربالك ع نفسك احاجيج متردين رُغم متصلة جنتِ ومن رحنـة احاجيج علكيفي اكلج موزين عليج ولا عبالك جاي احجي الها ولمصلحتها تنگزيـن بوجهي

شَمس
ايّ انتَ هم ماصدكت يم الكُل تكلي يطبج مَرض

سُراج
اذا انتِ غايضتني شتردين اكلج بلة ليش حذفتي رسالتج هـا ؟؟

من كال هَيج سكتت وصُفنت بوجهة

سُراج
احجي

شَمس
لان .. لان ...
سكتت لان ماعندي شي احجي

سُراج
شوفي ماعندج مُبرر شلون ذيج المرة هم بدون ايّ سبب لغيتي متابعتي وعود انة محترمج ومتابعني

شَمس
لا والله مسوي فَضل علية ومتابعني مثلاً ؟؟

سُراج
ايّ طبعًا انة ما متابع بنات ومتابعج ومن شفت قلة ادبج خليت وحظرتج

شَمس
ديلة موهَسة اني قابل ميتـة عَ المُتابعة مالتك
وبعدين ليش تكول ما متابع بنات ومتابعج ترة متابِع صَفاء

سُراج
وانتِ شعليج ؟

شَمس
ماعلية ترررة بَس انتَ دتكول ما متابع بنات مزكي نفسك
وهوَ يجوز صدك ممتابع بنات بس الخاص مالتك متروسس بنات

سُراج
انجبي الي يسمعج يكول داك حنج وياهِن ترة انة مالي خِلك نسوان شَمس وحتى نفسي ما تطيني من بعَد زينب ا..

شَمس
تررررة مايخصني اني ليش تحجيلي مثلاً !!

كتلة هَيج بتعصُب باوعلي بعصبية وكام

سُراج
انتِ مومال واحد يحاجيج والله، واطلع اكلب ابن كلب اذا اكعد يمج وواحاول اتفاهم بعَد

شَمس
ديربالك ميتـة عليك اني

سُراج
صوتتتتج مارررريد اسمعة فهمتي

شَمس
افتهم وكت ماريد مو انتَ تفهمني

سُراج
ياربي يارررررررررررربي صَبرك

كال هيج وخلّة وطلع شكد مُستفزززز يجي كدامي ويكلي اني من بعَد زينب مافكر بالبنات ومدري شنو هَسة ع اساس اني كاتلة روحي عليك !!! لو شنو مثلاً ؟؟

جنت منفسة من الغَضب احس حرگها لروحي من جوة
كمت اردد بصوت مسموع
حَقيــر، مغرور، شايف نفسسسسة الله ياخدة

احجي واكِل من القهَر، اني من انقهر اكل هـواي
كملت ماعوني كمت اريد اصُب بعَد صار بوجهي

ثنينة عَبسنة، رحت ع اليمين اريدة يعبُر اجة يمين
باوعت بتململ ورحت يسار اجة ع اليسـار
عطت
شَمس
وخرررر اريد اعبرررررر

سُراج
اعبري اعبررررري وفضينـا كش برة شنـي من بَشر

شَمس
والله اذا تكول هيجي علية مرة ثانية

كتلة هَيج واني اشرلة بالخاشوگة بعصبية والماعون بيدي
نزل راسة الي وباوعلي من فوك لجوة باستهزاء
قصدة يقلد ع طولي

سُراج
شلون زعاطيط الله ذاب علينـاا

شَمس
سُراااااااااج

ماهتم وخلّة وصعـد برودة حيموتني حيموتني
رحت صَبيت واجيت نزل وبيدة السويج

باوعتلة بغضب
سُراج
عيونج لا تتنوعيلي هجي شَمس

كلت بصوت هامس دروح وخليت وكعدت ع التخم اكل وهوَ خلة وطلع
شكد نرجسي ومغرور وبارد
هَسة بالبيت عدنـة امير هم بارد وكتوم بس امير ابد مو نرجسيي ولا يم هالسوالف الا هوَ عندة روحة مثالي وما يغلط ابـد

عَصبني حيل نوب يجي كدامي ويكلي من بعـد زينب يعني شسويلك واذا من بعَد زينب عجيب

اكلت اكلي ورحِت صعدت لفوك سبحت وطلعت من الحمـام اعتنيت بروحي وبجسمي ومَدري شنـو احس طاقتي الانوثية اعتلت بعد ما عدملياهة سُراج طبعًا

اني تعودت البس بالبيت دشاديش نفسهِن بس من انام ابدل البس تراك، لبست ثوب اسود من الخُصر وفوك مخصر ومن جوة كلوشة وبنهاية بي كشكش بسيط ابيض ودُكم بيض من جهة الصَدر والردان اسود كلوش لحد الـ عكِس

طلعت صُبغ اظافر وصبغت اضافري احمَر حطيت كحُل شويـة و حُمرة خفيفة ولبست شـالي باهمـال وخَليت ونزلت

لكيتهُم كلهُم كاعديـن جوة

جبُر
هـا جَدي شني وين تردين تطلعين

شَمس
يا جدو والله كسرت خاطري حَسيتني اني وصخة
هيج بدلت واجيت

ضحگ هوَ وفتح ايـدة اجيت گعدت بحضنة
باوعلي وباسني من خَدي
ادري بي جـاي يحاول يعوض فقدان ابوية بيـة

ابتسمت عليّ ودرت وجهي الهُم ملتهين يحجـون سوية وعلي وزَعيم گابة بيناتهُم مَدري ع شنو يتشارطون

وباوعت لسُراج عيونة اجت ع ايدي باوعت لايدي وابتسمت
رفعت ايدي وراويتـة لجَدو

شَمس
جدو حلوات اظافري

جبُر
حلوات بوية حلوات يخبلن بس شعدج مصبغة يمنع الوضوء

شَمس
جدو هسة شوية وامسحة

جبُر
جا المن صبغتي

شَمس
هيج اريد اتونس شوية

ضحگت وهوَ ضحگ

صالحة
دعوفها تريد تتزوگ البت

جبُر
كِل ما اشوف شَمس ماشوف بس المرحوم بيها
اتذكر ايامج هم بيها
سبحان الله هلكد مـاكو شبه

شَمس
بيبي يعني صدُك انتِ هيجي جنتي ؟؟

صالحة
ايّ والله يبييي نفس الهيئة وكلشي حتى نفس الجسم

شَمس
جدو وانتَ جنت تشبه منو بشبابك من الولد هَسة؟

جبُر
سُــراج نسخة مني

باوعت عليّ جان يباوعلنة ابتسم من گال جدو هَيج ورجع باوعلي اختفت ابتسامتة رأسًا

تجاهلتـة وضليت اسولف وي جدو وبيبي وعمامي نزلت سيوف هم ضلينـة نسولف

قرب المُغرب كمنـا اني وسّبب نُطبخ لان سيوف ولا طكة بالطبُخ

كعدنـا نشتغُل ونسولف ونضحك شوية وطَب سُراج وبيدة علاوي

سُراج
علاوي يريدج سَبب

سَبب
يحبيبي تعال تعال

راح طلع بس ضل واكف بـ باب المطبخ و وجهة لبرة، ضل علاوي يبجي كتلهـا روحي اخذي المطبخ حار عليّ خـاف

راحت هيَ وصرت اكلُب بالكدُر واشوفة منطي ظهرة الي فجـأة دار وجهة شـاف محَد يمي سَبب راحت وسيوف طبت اجـة باتجاهي

وكف كدامي
سُراج
ترة والله واكفة والله شبيج شَمس شني زعطوطة طفلة مخبلة وعقل ماكو واكول ميخالف شبيج

فتحت عيوني بوسعهن على كلامة
شَمس
هاي شبيك ليش هيج دتحاجيني

سُراج
تـرة ولد شباب ويـاج بالبيت شني لابسة هذا واديج طالعة ومصبغة ب احمر شني معناهة هل حركة عود !!

من كال شنو معنى هل حركة احس خنگني خنگ
شَمس
ترة محد يباوعلي بهل نظرررة هـاي كُلهم محترمين ارواحهُم ومحترميني اذا اكو خلل بنظرك ف الخلل يمك راجع نفسك انتَ موتجي علية!!!

كتلة هَيج بعصبية باوعلي وصُفن
ضليت اباوعلة بعَصبية
هوَ خلـة وراح ماحجة شي

ضليت احجي عليّ بكلبي
يعني وصلت ويـا لهل مواصيل
يكُلي شنو قصدج بهل حركات !!

والله لعبت نفسي من عندة وطلع كُل ايام زيناتة بالعملية بهل يومين احس ثابني اكتئاب بساعتهـا

اجتي سَبب كملنـا الاكل ورحنـا نصلي رحت صعدت لفوك مسحت الصُبغ وتوضيت وصليت

بعدها رجعت صبغت كلت خاف يكول سمعت كلامي

خليت ونزلت لكيت غَيث وسجَاد جايين من الشغًُل، هُمة من يكملون من المحل بهيج وقت يصلون بالجامع ويجـون

نزلنة اني وسيوف سوى لان ثنينـة جنة فوگ باوع لسيوف واكلها اكِل بعيونـة، باوعتلهُم وابتسمت

ضل واكف كدامنـة ويباوع الهة، اول ما نزلنـة رمش بعيونة ورجع باوعلي وباوعلها بمكر

سَجاد
شني هل جمـال عمي

اباوع لسيوف باوعتلي وبوجهة صـار زعل
نزلت ومريت من يمـة وكلت بصوت عـالي

شَمس
احاجيج يَ بنتي واسمعج يَ جنتي

من كلت هَيج كُل الي جان كاعد ضحگ، بس ضحگة سَجاد تعالت حيل

سَجاد
مو اكلكم صايرة جنوبية قُح

زَعيم
انجب انتَ شهل لطلطة الزايدة احترمنـا كاعدين ترة

زَعيم خطية ولا منطي مَجال لسجاد شوية كُل مايحجيلة كلمة وي سيوف يجي ع كولة سَجاد يكول سجينة خاصرة
امير بطبعة ما يدخل بالعكس يبتسم من يشوفهُم وهُمة اصلاً بحدود يعني لا يتختلون ولاشي كُلة كدامنـة
و غَيث ما يدخل لان اخو الجبير زَعيم يدخل واحس رأي غَيث نفس زَعيم

باوعت لسُراج، الوحيد الي مايضحك
صرت احب اشوف ردات فعلـة من اكون اضحك وي واحد منهُم
وكالعادة ولا مــرة شفتة يضحك او مبتسم لمن السالفة تصير يمي

ضليت اكلب بالكدر وصافنة بسُراج الي مادري شنـو فلمة، اتذكرت علي وكلامة لبيبي وصُفنت
عود معقولة صدُك سُراج يغــار علية؟
يوووه شَمس دسكتي اسكتي غير هوَ يموت على زَينب وهوَ بنفسة يكلي ما افكر بغير زَينب

سديت الموضوع بعقلي وكملت صّبينـة وكعدنـا ناكُل كملنـا وسيوف كامت تسوي  جاي واحنة رجعنـا ع نفس كعدتنـا

كام سَجاد وهُمة مشغوليـن يحجون ماسمعنة الا ع صوت سيوف وهيَ تصيح، اجت كدامنا وهيَ تريد تبجي

سيوف
جدييييي يكلي ابتسمي وانتِ تشتغلين يااااا خدامة ترضاهة ؟؟؟؟؟

من گالت هيجي ضحگت وهمة ضحگوا وصاحوا
سَجاددددد

اجة سَجاد وهوَ يضحگ ولازم كلاص الماي يشرب والضحكة مالتة تارسة وجهة

جبُر
شكُبرك بعد تصير ماتستحي اعلى روحك

سَجاد
هسة انة شكلت كلتلها ابتسمي وانتِ تشتغلين يالخدامة شني هسة مايصير نضحك شوية

جبُر
احترم نفسك احترم نفسك شكبرك بعَد تصير

سَجاد
اهوو يلة عمي بعد ماحجي وياهة، كل للخدامة ختسويلنـة جاي

سيوف
جددددددييييي

كالت هَيج وهيَ ع وشك البجي فعلاً و وجهة صار احمر، شال المقعد زَعيم وبدون ما يدري رگعة بيها

وخر المقعد منة لونة بيجي و سيوف لابسة دشداشة بيجية

سَجاد
خرب انّ سيوف جنج هاي

هوَ سوة هيجي واني ماتحملت انجطلت من الضحگ وسويت هبوط للگاع براسي وسيوف طگتها ب بجية وكاموا يعيطون عليّ

راحت سيوف للمطبخ واني شلت راسي جدو يدكدك على ظهري لان عيوني صـارن حمر ع كد ماضحكت
رفعت راسي لكيتة كاعد كدامي بفخر ويضحك

سَجاد
ها شلوني

زَعيم
وصمخ حتى صمخ والعباس اذا زعلتها بعد اكوملك كافي عاد شبيك زعطوط

امير
لا صدك كافي سَجاد البت حساسة شبيك حاط راسك وي راسهـا

سَجاد
اهو هسة شسويت اريد اضحك شَمس

كال هَيج وباوع لسُراج ماعرفت شنـو معنى حركتة هاي
سُراج باوعلة تك حاجب وخزرة

اجت سيوف جايبة الجـاي انطتهُم واحد واحد وصلت لسَجاد باوعتلة بمكر وعبرتة

سَجاد
هيوووو هيوووو انة انة انطيني

قدمت لسُراج الي كاعد يمة سُراج خلة وانطا استكانـة واخذ واحد ثاني

سُراج
بس اسكتوا لخاطر الله

باوعت لـ سَجاد غُمزلي ضحگت باوعت لسُراج يباوعلة ويباوعلي بصدمة

سَجاد
باررررررد شني من جاي هَذا

سيوف
اذا مايعجبك انتَ كوم سوي
عاوز ايد رجل

سُراج
هاي الجمل سامعها الظاهر ماجايبتها منج

كالها وهوَ يباوعلي ماهتميت سكتت اجت سيوف كعدت يمي صُرنـا نحجي سوية

زّعيم خابروا مَدري منـو كمل الاتصال وكال
مروان ال دحـام عازمنـا باجر عَ العَشا كل احنة

اهـووو والله ماحب اروح صحيح بهل ايام بيبي تجينـة وهوَ هم مرة اجة وسلم علينة بس ماطيق وجودهُم ابد وكُل ما اذكرهُم اذكر بابا وماما وفقدانهُم

مُضى هل يوم واجـة اليوم الثاني الكُل اتجهز حَتى نروح الهُم، اني جنت تعبـانة حَيل لانُ الدورة جايتني والالم مينطاق جنت احجي وي بيبي اذا عدها بروڤين لان هيَ هم نفس سُراج عدها ادوية هواي يمها النة،  كامت وصاحت سُراج

سُراج جان بالصالة بس سمعها اجـة للغرفة مالحكت حتى اكُلها اسكتي ماريد

صالحة
يُمة عندك بروڤين لبت عمك

من كالت هيج ودي الكاع تنشگ وبلعني من الفَشلة

سُراج
لا يُمة منيلي بروڤين شسوي بي

صالحة
ولك يُمة جا متوجعة روح جيبلها

من كالت هَيج نُقطة دم ماضلت بية كلت لو متحملة الوجع ولا جاية لبيبي

سُراج
حاضر يُمة هسة بس نطلع نمُر ع صيدلية اشتريلها

خلة وطلع مبين حَيل خجل باوعت لبيبي اول ماطلع وكتلهة

شَمس
بيبي صدُك تحجيـن والله استحيتتت

صالحة
ديلة يُمة هسة هيَ شنية وتستحين منها عادب

شَمس
بيبي والله فشلتيني

صالحة
اهووو يشميسة شكد تلحين هسة هوَ شمدري المن تردي

شَمس
لااااا ميدري المن اذا سُراج ميدري منو يدري

صالحة
دروحي بدلي خل نروح روحي يُمة وعوفي الحجي
تعاي تعاي موتلبسين جبة البسي عِبا يُمة

شَمس
بيبي ماريد شعدي عباية البس

صالحة
بيبي جدج كالي خل تلبس عباية طالعين احنة للولاية فشلة وماراد هوَ يحاجيج تدرين بي مايكلج لا بس صاحبك الحلو هم لا تاكلة كلة البسي عِبا انتِ هسة ليش تتعايرين شحاطة فوك راسج ماتكليلي

شَمس
اوف اوكي بيبي

خَليت وطلعت وجان وجهي مگلوب، لاگاني سُراج باوعلي خليت وصعدت من الخجَل، شكول عليج يبيبي

جهزت روحي بالكوة، مشطت حواجبي وحطيت مسكارا ومُرطب ولبست العباية ونزلت لكيتهُم كلهُم ملتمين ويتفقون شلون يتوزعون بالسيارات

الي احبة بيهم يفضلون اللمة عَ الفخخفة يعني اذا جانت عندهُم طلعة الشباب لنفس المكان يرحون كلهُم بسيارة وحدة حتى لو يندحسون يكولون نتونس سوية

باوعلي سُراج واحسـة انصدم بية اني خليت وكعدت ع اول التخُم من الالم الي داحس بي

ع اساس زَعيم جدي وعمامي وبيببي ويـا
و علي ياخذنـة اني وسَبب و سيوف و واحد من الولد
والباقين بسيـارة ثانية

سُراج
سَجاد انتَ روح وي علي والبنات وشَمس تجي وياي انة وامير

سَجاد بهمس
احلى خلط اوراق بالتاريخ

جبُر
ليش جَدي

سُراج
جَدي تريد تنزل للصيدلية عدها علاج

جبُر
شبيج جَدي شكو صدك والله وجهج مصوفر كركُمة

سُراج
لا جدي علاجها ارد اجيبلهيا

جبُر
يلة جا اطلعوا كدامنـة حتى توصلون ويانا

سُراج
يلة شَمس يلة امير خنتوكل

طلعنـا اني و امير بسيارة امير لان سُراج بعدة ما مشتري سيـارة

كعدت ورا مُباشرتًا جنت كُلش مالي خُلك وهزيلة حَيل اني متعودة اول يوم عزاء يكون بنسبة الي ع كد الوجع والاذية و وجهي يصوفرر

وكفنة يم صيدلية راح هوَ يجيبلي وامير يحاجيني

امير
وجهج اصفر واحسج مو على بعضج شنو سالفة شَمس خوما عندج شي

شّمس
ها لأ والله ماعندي شي بس هيج تعبـانة

امير
خاف عندج نقُص بالحديد ؟ لو فقر دم

شَمس
لا ماعتقد

ضل يحاجيني امير باوعت سُراج طب للمحل الي يم الصيدلية اجة باتجاهنـا فتح بابي وانطاني علاگة ومي وكيكة
وهمس بصوت ناصي

سُراج
اشربي هذا ابو الـ ٤٠٠ هَسة شوية ويخُف الوجع

الخجل الي جان يمي موطبيعي استحيت وهزيت راسي ب ايّ وهوَ صعد اتجهوا للطريق واني اخذتلي حباية وامير يحجي وي سُراج انُ خل تجيك للمُستشفى وسويلها تحاليل وسُراج يكلة ان شاء الله

الطريق صـار فرّة علينا شوية وتيهنـا بالبداية وهُمَّ وصلوا قبلنـا، وصلنا من بعد فرّة شويونة نزلنـا واني جنت مستحية حَيل

نزلت من جهة سُراج نزع نظارتـة وحطها ب ايدة جانوا الكُل لابسين دشاديش، انداريت من جهة الثانيـة لامير ورحتلة

شَمس
استحيي امير

ضحگ امير وگال
امير
لا تستحين امشي وياي هوَ بس مروان

باوعت لسُراج يباوعلنة راح مشـة دگ الباب واحنة واكفين او بالاحرى اني واكفة ورة اميـر

سُراج سوة مكان لامير يوكف بالبداية احترامًا الة لان هوَ اكبر من عندة وصار بنفس مستواي باوعلي وگال بهمس

سُراج
جنتِ تكدرين تحجين وياي اني بس انتِ اختاريتي تلفين وتمشين مسافة بس حتى الي تحجين ويـا مايكون سُراج

من كال هّيج صُفنت بوجهة وماعرفت شنو ارد

سُراج
هه

دار وجهة وهوَ يستهزء فتح الباب النة مروان، سلم ع امير و امير اندارلي وهوَ يضحك

امير
بنت عمتك تستحي تطُب

ابتسم مروان وسلم ع سُراج واندارلي وكال

مروان
هلا ب بنت عمتي

ابتسمت الة بخجل وكتلة بصوت خافت
اهلاً بيك

طبينـا لجوة البيت ما شاء الله شكد حلو ومنظم تلگتنة روآن حضنتني حَيل

اني وروان علاقتنة حَيل حلوة، ب موتة بابا هواي وكفت وياي وحَتى لمن رجعت لمروان ما انتهت وضلينـا نحجي سوية سلمت ع سُراج وبوستـة وسلمت ع امير وطبينـة جانوا كلهُم كاعدين

فضيلة
هلا يبعد طولي هلا بشموسة

ابتسمت الها ورحت سلمت عليها كعدتني يمها و اني عيني ع بيبي صالحة وبيبي صالحة تباوعلي بنظرة وكانهُ تكلي ضلي يمهـا خطية

هيَ حبابة وحنونة بس ماتجي لحنية ومحبة بيبي صالحة ابد، بيبي صالحة من صوتي تعرفني شبية وب ايام مرضتي كاعدة ومكابلتني وقبل لا اون هيَ تون، كضت الليالي كُلها تقرة قُران يم راسي ومُستحيل اكدر اقارن بينهن

تعشينـا وكملنـا وضلينـا كاعدين محَد اجة يمنـا غير بيبي حتى أُمـة ماشفناهة الي عرفنة انُ هيَ دتمُر بوضع صِحي

كملنـا وطلعنـا لشُقة روان ضلت تراوينياهة ومَدري شنو ضلت تحرمُص النـة انُ نضل وياهة سيوف كلتلها جدي ميقبل اكيد حجت وياي كتلها لا استحي ضلت تلح اضل كلتلي هوَ ابـن عمتج شنو يعني

مع انُ حجيت وياهة شكد بس هيَ ضلت مُصرة صاحولنـة حَتى نجي لان جنـة نريد نرروح راحت روان لجدو وكلتلة

روان
جَدي حباب خلي شَمس تضل يمنا وحدي اني واضوج فد يومين ثلاثة وترجع

جبُر
يابوية يومين كلاثة ولج وين اكدر اعلى فراكهة

روان
لا جدي حباب اريد نتونس سويـة

فضيلة
ايّ شيخ خليها يمنة انة هم اريد اشوفها شني مالي حگ اعلى بت بتي

جبُر
لا حجية موهجي بس خاف هيَ تتضايق ما متعودة شي

مروان
لا اعليمن البيت بيتها وروان هم وحدهي
و تضوج، خليها يمنة وبَس تضوج انة اجيبها الكم

جبُر
هـا جدي تبقين

باوعتلة وباوعت لروان تسويلي حبابة حبابة ضلي

شّمس
بس ماجايبة ملابس

روان
ياااااا شَمس جا هيَ ع الملابس انة هنانة

جبُر
ضلي يم بيت جدج بوية ويمتى ما تضوجيـن خابرينـا لو خلي ابن خالج يزتج يمنة

ماجنت راضيـة هواي بس احس روحي انجبرت وهم ماردت اكسر بخاطر روان

كاموا هُمَّ رحت لبيبي صالحة حضنتها

صالحة
يا ولج ما متعودة اعلى فراكج شو

شَمس
بيبي ماطول باجُر اجي

التفت ع سُراج لكيتة مزعوج وعلي وامير وسَجاد يحجون ويـا مَدري شنو ومروان يحجي وي زَعيم و جدو

صاحني جـدو طلع فلوس وهوَ يكول
جبُر
خاف تحتاجين جدي

مروان
لااااااا شيخ ماقبل انة، بت عمتي ترة هيَ وب بيتي مامقبولة هسالفة

جبُر
خاب جا واذا بت عمتك غير هيَ بتي ميل ميل ( وخر )

مروان
لا والعباس ماقبل ابد ضمهن شني سالفة

يبو استحيت وهُمَّ يحجون هيج وهمين حَبيت موقف مروان من منع جَدو نهائي انُ ينطي

مروان
الي تريدة من عيوني بس تطلب وانة اجيبلهيا احنة يمها

باسني جَدو وراحـوا كعدنا بغرفة بيبي بالبداية نوب اجـة مروان كعد صاروا يحجون بصورة عامة ومروان كعد يسالني ع دراستي وهواي اشيـاء بحياتي

كملنا بيبي نامت طلعنا اني و روان برة بالحَديقة نسولف شوية واجة مروان جان جايبلنا كومة اشيـاء كعدنا ناكل شوية وراسلت سيوف الي

سيوف
سُراج لعب جوووووولة وضل يكول شلون تبات يمهُم وجَدي تعارك ويا وعلكت بينهُم، بيبي صالحة تكول خل باجُر تجي لا توهدنة وي هذا المسودن

روان
ليش عود سُراج شعليّ

شَمس
شمدريني شوووو بس يخوزرررر

روان
جان كلنة مُعجب بيج بس سُراج هواي وفي لزينب

شَمس
اي والله اني هم اكول شحال لو مو كُل ساع ونشرلها بس شعندة وياي مادري

روان
يمعودة هوَ نفسية من زمااااان سُراج يطيجياهة وجه بوجه
ماعليج بي هَسة باجُر اخلي مروان ياخذج عود هسة خلينا نتونس

شَمس
روان تكدرين تسولفيلي ع سُراج وحُبة لشَمس هواي ب بالي اسمع قُصتهم !

روان
الله لا ذكريني والله احلى قُصة حُب صـارت، احنة من وعينا للدنيا جَدي يصيح سُراج لزينب وزينب لسُراج واذا تردين الصراحة سُراج جـان مكيف بهاي السالفة وجان سُراج ادبسز كُل ما نغفل نلگا واكف هوَ وزينب وحدهُم، جان يعشگها يعشگها شّمس لدرجة ماتتخيليها

ومن طلع قبولة بالنجف فد تحطم وراد مايروح اساسًا بس جَدي لح عليّ وراح وطول هل فترة زينب سودة اعلية ضلت بس تبجي عليّ وهوَ ميت عليها

تـالي اول مارجع خُطبها وتزوجوا وسودة علية ما تهنى بيها اقل السنتين وراحت منة، ما تشوفينـة هّسة ذاك اليوم مرد كلبي من ناشر بالنجف ويكول كل الي يحبون يرتاحون لو راحوا لحبيبهُم شلون الي حبيبهُم مَيت ويومية ينشرلها شكِل

مادري ليش كمت اتخيلهُم، وبداخلي حَسيت اكو شعور حلو شعور ميتوصف ابد شنو هوَ بس جان شي بداخلي ضايج

سدينـا الموضوع و كعدت تسولفلي قُصتها من البداية وتحمست اسمعها من عندها بس بالي كُلة جان يم سُراج

لـ ١١ تقريبًا احنة حاطين جرجف وكاعدين بالحديقة نسولف وناكل

اجانا مروان كال طبن جـوة الدنيا ليل اريد اقفُل صدك والله طبينـا لجوة كتلهم اني انام يم بيبي بس مروان ماقبل كال اصعدن بالغرفة

صدك والله صعدنـا بالغُرفة نزعت جُبتي وحجابي وروان كالت انزل اسويلة جـاي واجي لان صاحني

كعدت بمكاني فتحت الباب شفت سُراج مراسلني ع الانستكرام +٩ معناهة اكثر من ٩ رسائل انصدمت وفتحت الرسائل

سُراج
شَمس انتِ ويـــن ضالة يم هذا ؟؟
وشلون تكوليـن ايّ !
هسة صاروا بيت دحام عادي تطبيلهُم واحنة جبناج بالتواسيل
كلة من ورة جَدي، جَدي الي انطاج مجال
اني هسة يمكم تتحججين بشي وتجين ارجعج
وينج؟؟؟؟
ماتردين !!!
هاي تجاهُل لو شيسمونة
متاكد جاي تشوفين جاي اراسلج بس كالعادة الخُبث يمشي بدمج، ايّ شي يأذي ويزعج سُراج مستعدة تسوي وتدرين كلشششش زين ماحب هسوالف انة
انة من سَجاد اخوي اتنرفز نوب من هذا ؟؟؟
كال شني كال، كال ابن عمتي
وينج هَسة متردييييييين
خررررب يومج شَمس حركتيني حرك شكول عليج

ضليت صافنة ع الرسـائل وحَتى ماعرف شرد
معقولة عود صدُك يغــار علية !
لا هاي مو غيـرة هذا يريد يتحكم بيــة اني متأكدة وإلا شنـو يغار علية ويحجيلي بزينب، لو يغـار علية ويغلط علية ويعاركني ٢٤ ساعة؟ لو ينطيج حَظر ع اقل شي تسوي
وبعدين الكُل يدري شكد هوَ يحِب شمس لحد هسة فَ مُستحيل سُراج يكون يحبني ويغـار علية هذا ما بكلبة غير الحقد
مُستحيل شَمس مُستحيل زيلي من بالج هل افكار
احس كلبي قِسى عليّ وراسًا كتبتلة

شَمس
عَسى مــا اضل هنانة ١٠ ايام انتَ مالك دخل ومروان ابـن خالي واصلاً الولد لطيف وياي حَيل احسن مِمّا اضل يمك تضل بس تتعارك وياي وتنگُر بكلبي

خليتة يُقرة الرسالـة ويكتب، وباثناء كتابتة انطيتـة بلوك
خيولي يريدني سمعًا وطاعـة الة

ماكو خلال ثواني خابرني ع الواتساب رحت حظرتة، خابرني ع الخط ضفتة للقائمة السوداء
احس كلبي جـان مُحتام عليّ وفد لعبانة نفسي من تصرفاتة المومنطقية، من ناحيـة يحب ومستعز بكل ذكريات زينب ومن ناحيـة يتصرف هل تصرفات ومن ناحية يتعـارك وياي دوم !

عفتـة واجتني روان وهيَ شايلة الموبايل دتخابُر

روان
ايّ عيني ايّ
شموسة هـذا سُراج يريد يحاجيج

اني هسة اجيج بس انطي ملابس مروان
اخذت دشادشة من الكنتور وطلعت

باوعت للموبايل لسـة مفتوح
جاوبتة بـ عدم صبُر

شّمس
شتريد بس اريد اعرف شتريد حتى اوقاتي الحلوة ما تريدني اعيشها والله عجيب تـرة انتَ

سُراج
اششششش حجاية وحدة ما تحجيـن باجُر تجيـن وغصبًا ما عليج وانة اجي هماتيـن وبساعتها انة اعلمج شلــون تسوين هجي وياي

شَمس
انتَ لا رجلي ولا خطيبي ولا اخوي حتى تتحكم بيـة
احتار بروحك وعوفني !!!

حجيت هّيج وسديت الموبايل من العَصبية احس روحي فـارت بسببة
اني اعلمة والله على عنــادة الا اضل بسيطة

اجتي روان كلتلي شيريد كتلها هَيج كعدنا نكمل ع سالفتها حَدما نعست ونمت

كعدت اليوم الثاني روان ماجانت يمي

خابرتهـا حَتى تصعدلي اجتني انطتني دشداشة من عندها اسود لبستها ونزلنـة ناكل امة ابـد ماشفتها بالبيت
شفت مرتـة الثانية اجت هماتيـن

جنة كاعديـن ع الريوگ صدمنـا مروان وهوَ يكول
نروح للنجف

شَمس
لعد اني ارجع اذا هاي

روان
لا هوَ انة علمودج علمود اونسج شوية نروح هم للكبور وهم نزور ونجي

روان
ايّ شمس حبابة روحي ويانـة
تاخذنا لقبُر عمو مروان؟

مروان
اي تدلل

شّمس
تمام بس حخابُر جدو اكُلة

كملت اكل وطلعت خابرت سيوف كتلها تنطي لجدو كتلة كلي روحي بوية تونسي ضل يسالني مرتاحة عندج شي كتلة والله ماعدنة شي وين نمتي مدري شنو كتلة يم مروان وسادين الغرفة هوَ هم اتطمن وكلي براحتج تونسي ماضغط عليج
كالي سيوف تريدج، انطانياهة كلتلي اصبري خل اصعد

سيوف
ولـج شَمس والله سُراج اذا يدري يلعب جولة

شَمس
سيوف ترة اني مو عَبـدة الة ولا بكيفة هيَ دام جدي كال ايّ ف منو هوَ ويمنعني؟؟

مادري شنو مسوي بحيث سيوف جانت هلكد خايفة، سديتة منها روان كال يلة اتحضروا من وكت راح طب لامـة مارضت تروح ويانة ومرتة الثانية هم كالولها كالت مابية حَيل

رحنـة اني و روان والحجية وهوَ
جنت متخيلة جـانب من مروان غير عن هذا صراحة طلع انسان راقي ومُحترم بجواتـة

رحنـة للنجف ومررني ع قبر بابا ومشينـا هم لقبر امي لان هوَ جان يندلة كملنا ورحنـة للامام علي زرنـا وكملنا ورحنـا لمطعم

كُل هذا واني انتهيت حَيل تعبت والبروفين جنت ناسيتة بالبيت وماكدرت احجي شَي وضليت طول الطريق ميتة من الوجع

بالرجعة بيبي خابرتني من علي وكالتلي مشتاقتلج والله بس تجون تعاي ماكدرت اكول الها لا كلت الهُم كالي مروان بسيطة من نوصل اوصلج يمهُم

جان عندي شك انُ بيبي بسبب سُراج بس ماكدرت اكول الها لا خاف تطلع هيَ مشتاقتلي صدُك وماجنت اكدر احجي وياها يمهُم

بالرجعة تخربطت وضليت بـس اتقيئ بالطريق احس بطني فوك الالم كام تخبُط، روحي راحت من الطّريق  بحيث الطريق صار علية سنـوات وهم ضلينـة واكفين شكد وكُلش استحيت اكول اريد بروڤين

وصلنـا لبيت جدو الساعة بـ ١٢ ونُص تقريبًا، مروان ضل يحرمصلي اضل يمهُم او ياخذني للمُستشفى بس اني جنت رافضة، نزلت ونزل مروان وياية وجانت عندي دوخة قوية

باوعلي مروان بتفحُص لملامحي وكالي
مروان
انتِ بخير شّمس

شّمس
لا دايخة حيل

غمضت عيوني وحطيت ايدي ع راسي، لزمني من ايدي وكال علكيفج

بهل اثنـاء انفتحت الباب باوعت كدامي سُراج، باوع الي ونوب لمروان انظارة راسًا دارهة الي لمن شافني دايخة هَيج

سُراج
شَمس شبيج !!

مروان
دايخة شوية تخربطت من طريق كتلها اخذها للمُستشفى ماقبلت

اخذ بـ ايدي سُراج جاوبت مروان بصوت خافت

شَمس
لا صدك مابية شي بس نعسانة لا تخاف روحوا انتوا

مروان
اكيد شّمس

سُراج
لا تخاف عليها انة يمهة

مروان
يلة جا احنة رايحين اي شي تحتاجوا خابرونـة

راحوا هُمة واني احس روحي اريد اوكع، لزم ادية سُراج وسد الباب بعَصبية وگال

سُراج
الا تروح للنجف كتلتها للنجف هجي مشتااااااقة للنجف
ارتاحيتي هَسة ارتاحيتي

من كال هيج حسيت كمية انانية موطبيعية بكلامة بعدت اديّ عني وكتلة

شَمس
والله اكرهك

عفتة وخليت وطبيت كوة وهوَ يمشي وراي ويحجي

سُراج
طبعًا تكرهيني طبعًا من يمتى تحبيني انتِ ماتكليلي
جنتي تفضلين الكل علية هسة حتى مروان صار احسن مني

هوَ يحجي واني احس روحي بغير عالم كوة امشي لاكاني سَجاد ب باب المطبخ باوعلي وكلي

سَجاد
شبيج شَمس

حسيت نقذني من اجـة مَديتلة ايدي لان حسيت روحي ع فجأة اوكع وماردت اضل تحت رحمتـة

شَمس
سّجاد حباب تعـال دايخة حيل

سَجاد
الله الله كولي يالله شبيج

لزمني من ايدي حَطيت راسي ع كتفة بتعب وبطني المها گطعني تگطع

سُراج
شبيك صاااافن روح جيب جهاز الضغط ع سريع من غُرفتي

سَجاد
اي تعال اسندهااا خل اروح شبيك تصيح

شَمس
سّجاد ماريد يمة حباب

سُراج
شَمس لا تخليني اعيططط بيج عاد

سَجاد
شتعيط بيهااااااا شبيك سُراج مخبل انتَ لوشني 

سُراج
سَجاددد صم حلكك وسوي الكتلك عليّ شبيك

سَجاد
والله مخبل مخبل

اخذنة منة حَسيت بي من رفعني وخلاني ع التخم حَطيت ايدي ع بطني كالي بهمس

سُراج
بطنج توجعج

هزيت رسي ب ايّ

سُراج
اخذتي بروفين اليوم ؟

هزيت راسي ب لا

سُراج
وينة ؟

كتلة بصوت خافت
ب بيت مروان ماخذتة

سُراج
استغفرالله شوف الذكاء

نزل سَجاد
سُراج
روح لايّ صيدلية مفتحة هسة جيبلي هذا العلاج وتعال بسرعة

سَجاد
يمعود منو مفتح هسة راح تثبر الوحدة

سُراج
سَجاد تلكي روح بسرعة لا تتأخر حباب طير

سَجاد
علاج شني هيَ شبيها غير افتهم

سُراج
ولك امشيييي هسة وكتك

سَجاد
سودة علية يبت عمي بسُراج ولا بيج والله

سُراج
لاااااا ياااااا كوا.. امشي ولكككك

بنُص وجعي وعدم ادراكي بكُل شي من سمعت حجي سّجاد ابتسمت بوجع حسيت بسراج من حط مال الضغُط بـ ايدي

سُراج
ضغطج مصفر شني السالفة هاي من طَريق بس انتِ كِل مرة ترحين وعادي

استحيت اكُلة من الدورة اني بالدورة ضغطي يصفُر وجسمي يبرد وينلعب بية جولة حتى اتقيئ

سُراج
كُل مرة هيج يصير وياج

هزيت راسي

سُراج
استغفرالله استغفرالله ومن نحجي واحد يلومنـا

حسيت بصوتة اختفى شوية واجة فتحت عيوني كوة لكيتـة جايب مُغذي مالح

سُراج
بيج بخت عنديا مالاتج وهذا ما مستخدمتة

شكلي مُغذي وراح للمطبخ ضليت مستلقية شوية الدوخة بدت تخُف بس بطني موتتني من الالـم

سُراج
هاج هاي حطيها على بطنج

فتحت عيوني لكيت حاط مـي ب نفس العلبة
استحيت كوووومة من عنـدة واستحيت من الموقف الي صرت بي

سُراج
هاج شبيج راح اطلع عنج و من جوة البطانية دفي بطنج بي وحتى لو لسعج عـادي هسة شوية ويخف الوجع مؤقت علما يجي سّجاد

حطيتـة ع بطني ب احراج موطبيعي شويـة و اجـة سَجاد حَسيتة هم افتهم السالفة شنـو احس روحي صرت فُرجة لاُمة مُحمَد والاحراج الي عندي صار الف

انطاني حباية سُراج وطلعوا هوَ وسّجاد برة شوية وحسيت روحي تعبت خليت ونمت ..

فَزيت ع ابرة تنسحب مني باوعت سُراج جاي يوخر الكانولا والمُغدي مني

سُراج
ها كعدتي اسم الله تصعدين فوك؟؟

حسيت روحي مكسرة بالنـومة كتلة
رايحة يم ببيبي

سُراج
يلة كومي

رحت يم بيبي نمت يمهُم للصُبح كعدت طلعت يمهُم جَدو لعب جولا يكُلي بعد ماترحين يمهُم وشو شيصيرلج ومدري شنو عرفت سُراج مدحي بعقلة ولا هُمة شعليهُم

جبُر
جدي انتِ ماتتحملين الجو اعليج تغير الماي تغير وتعبتي طريق ومدري شني هجي صار والله سُراج كالي بس ماصدكت

ياربي منك يا سُراج نوب ماكدر اكول السبب الحقيقي ضليت ساكتة ماكتلة شي خَطية هوَ هم مرعوب علية

اجـة سُراج من الدوام ماكالي شلونج بس جان يباوعلي ويتفحصني

باوعتلة ماجان ع طبيعتة طول اليوم وجان مبين ضايج ومتلافيني بشكل تام

انصدمت لمن عرفت من بيبي انُ دورة زينب بعدلهة ٣ ايام بالهِجري مو بالحكومي هُمَّ يسون

بدوا بالتحضيرات وسُراج جـان متغير ١٨٠ درجـة وروحة بخشمة واصلاً مايكعد ويانـة

صار عدنة لطُم نسوان وتعزية وعشا للزلم ومَدري شنو والدنيـا مكلوبة

خلصت بليل وجنت تعبانة حَيل سبحت واجيت لفراشي ردت انـام ماكدرت للساعة ب ١ واني كاعدة مادري ليـش حَسيت بسُراج كاعد لهسة وحَسيت اريد انزل واشوفة اذا هوَ موجود او لا ..

نزلت لجوة ما لكيتـة بالصالة بس انتبهت بـاب المطبخ البرة مفتوح، اتقدمت واني متاكدة انه سُراج باوعت شخُص كاعد ع الدجة او الصعَدة وداير وجهة

احنـة بيت جدو جوة اكو زرع وتصعد ٣ درجات للفوگ الي هوَ بيتنا عليّ ف هوَ جان كااعد عليها

تقدمت بهدوء سمعت صوت حجي وبجي بنفس الوقت، احس انمرد كلبي اول ماسمعت صوتة شلـون
ردت ارجع بس حَسيت روحي ما سمحتلي
اتقربت يمة حَيل باوعت لازم صـورة عُرسة

هيَ بالبدلة البيضة وهوَ لابس قاط وحاضنهـا من ورة وثنينهُم يضحكون

اندار الي رأسًا بفزع باوعلي وجـان مصدوم بي مانطة ايّ ردة فعل، عيونة حُمر و وجهة تعبان حيل
جانت اول مـرة اشوف سُراج بهاي الحالة

اشرلي حَتى اكعد كعدت يمـة واني عيوني محملات دموع على منظرة

سُراج
تدرين شكد مشتاقلها ؟

من كال هَيج رفعت راسي الة لكيتة جـاي يباوعلي حَسيت شي على گلبي ثگل وهوَ يكول هيج

مادري شلـون قويت نفسي وكتلة
شّمس
الله يرحمهـا سُراج راحت لدار حقها ما تكدر تعترض ع حُكم الله انتَ

سُراج
لا انة ماعترض على حُكم الله، بس اكولن لو الله ماخذني وياهة جان احسن، لو رايحة مو هَسة عاد بس اشبع منها او على الاقل شايفة ابنها وشابعة منها او ع الاقل ماراحت وهيَ زعلانة مني

شَمس
اذا مو بالدنيا بالاخرة مو انتَ هيج كلت لصديقك فَ ان شاء الله تلتقي بيها بالاخرة

سُراج
هههه اعتقد هذا الشي الوحيد الي مصبرني، انُ اكو اخرى واكو حياة ثانية، تخيلي شكد ماجنت امشي بطريق الله صرت امشي اكثر وصرت احاول بكل مابية اصير بالطريق الي يوديني للجنة لان انة اعرف بزينبي شكد نَقية ومتاكد راح تروح للجنة ومنتظر هل يوم الي راح التقي بيهـا ساعاتها راح احضنها واكلها ولج ليش ماجاي تجيني بالحلم ومن تجيني تبتعدين مني هجي نسيتيني ههههه

باوعتلة وهوَ يباوع لكدام ومبتسم مادري ليش بساعتها ردت اكلة اذا هلكد انتَ تحبها ليش دتتعامل وياي هّيج

ضليت اباوع للزرع وشلون الهوى جاي يحركهن، باوعت لايدة يمسح بـ اصبعة ع وجهة، مادري شلون اجـة ب بالي هل سؤال وكتلة

شّمس
هم يجي يوم ومُمكِن تحب غيـر زّينب وتكمل حياتك؟ 

كتلة هَيج باوعلي بصدمة، ضل يباوعلي وميعرف شيكول، للحظات بَس ورجع جاوبني

سُراج
مُستحيل زينب هيَ حُبي الاول والاخير وحَتى لو ردت اتزوج راح يكون تقليدي اما الحُب ؟ فَ مات وي موت زينب ..

من كال هَيج حسيت اكو شي بداخلي احترگ شنو وشلون ماجاي افتهم وشدخلني هم مادري ! بس الي ادري بي انُ هوَ مليان تناقُض واني صرت مليانة مشاعر مُتناقضة

ماحس الا دمعتي نزلت، باوع لوجهي بتفاجُئ عفتة وكمت بدون ما اكول شي، سمعت نادى بـ اسمي ماهتميت وخليت وطبيت بسرعة وبدون ما احس دمعتي نزلت حَطيت ايدي ع حلكي متفاجئة : هاي شبيج شَمس شدخلج !!! مدافهم حتى نفسي!!

مشيت بسرعة للغرفة، حَسيتة ورايّ ماهتميت كملت مشيي و وصلت لغرفتي وسديتهـا واني دموعي ينزلن بشكل حتى اني مصدومة من عندة، ما فد يوم حَسيت بـ اعجاب تِجاهة بس بعض تصرُفاتة وغيرتة وكلام علي حسّسني ب شي

دموعي ينزلن واني احاول اوقفهِن بهل اثنـاء اندزتلي رِسالة كُل ظني هوَ فتحتهـا وجان انصدم ب رسالة من محمّد
محمَد
مشتاقـلج شَمس

بدون احساس وبكلب مكسور كتبتلة
شَمس
اني هم محمَد

أحيانًا تصبح الحياة تُشبـه مسرحًا كبيرًا، نظنّ أننا عرفنا أدوار أبطاله، ثم نفاجأ بأنّ الخاتمة لم تكتب بعد. قد نظنّ أن القلب مُهيأ لشخصٍ واحد، بينما الأقدار تخبّئ لنا ما يُربكنا ويجعلنا نتساءل: هل ما نشعر به حُبّ حقيقي، أم وَهمٌ صنعته لحظة ضعف؟ في النهاية، لا أحد يعلم من سيكون البطل الذي يستحق البقاء... نحن فقط نمشي خلف ما يختاره لنا القدر، ولو ظننّا أننا اخترنا
اريد ارائكُم وتوقعاتكُم؟ لقُصة سُراج وشَمس او محمَد وشَمس
يُتبع......
_____________

فَرس

امير
بـلا زّحمة استاذة مسرّة بس راح اخذ زوجتي كم دقيقة

كال هّيج وهوَ يمد ايدة ويسحبني بلطُف باوعتلي من فوگ لجوة صرت واكفة وهيَ تباوعلي بنطرات متوترة وبنفس الوقت عصبية ع حقِد

مسرّة
ايّ استاذ بس ياريت تستعجلون لان عدنة مُحاضرة

امير
مُحاضرة من اول يوم ؟
هههه اذا هّيج براحتكُم أُستاذة احنة طالعين

لزم بـ ايدي زين ودارني ويـا حتى نطلع

مسرّة
أُستاذ امير بس اني احاسب ع الغياب والغياب بي نقُص درجات

ضل ماشي وبدون ما يدور وجهة گال

امير
احنـة ثنينة اساتذة ونعرف هاي السوالف ف احجيهن ع طالب مو علية

انصدمت وهوَ يحجي هَيج خلينـا وطلعنا واني احس روحي بُركان مال عَصبية

فّرس
شديصير اميـر

امير
حَبيبي ماصاير شي يستحق ترهقين تفكيرج عليّ امشي خل نروح نتريگ احسَن

نترت ايدي مِنة بعصبية وكتلة
فَرس
اميررررررر اني داحترگ وانتَ تگُلي ماكوشي يستاهل ترهقين تفكيرج عليّ شلون شلون!!! هاي نفسها مسرّة؟؟
وشعندها هنـا

مسح بوجهة وگالي
امير
ايّ هيَ نفسها هيَ استاذة جامعية وجانت متعينة ب بغداد وهسة اجت هنانة

فَرس
وليش ماكتلي

امير
ليش انة احصلج مدام فَرس وبعدين ليش نحجي عنها ؟ ترة مالنة علاقة بيها ثنيناتنة وهاي من ذيج المرّة انة ناطيها بـلوك

ومن شفتها سويت روحي ماعرفها وهوَ انة فعلاً ماعرفها وعيوني ما تشوف غيرج انتِ وحدج ف ياريت تعوفين كلشي وتركزين بينة احنـة

فَرس
الله ينطيني برودة اعصابك امير انتَ صدُك تحجي يعني هيج عادي واستمُر ؟؟

امير
جا شنسوي هـا ؟ جان بامكاني افشل نقلها ولِلحظة وسولي الشيطان وردت اسويها بس شلون اتلاعب بشكل غير قانوني هجي شلون

فَرس
ها وسوسلك الشيطان ؟؟

امير
فَرس حبيبي ترة هاي بيها اشكال حتى شرععًا ماكدرت اسوي شي

فَرس
والله مادري صدُك مادري اني ماعاول اخلص من سـارة واميرة تطلعلي مسرة نوب !!! اني حتخبل تعرُف شنو حتخبل

امير
بس اهدي حبيبتي
صدكيني عيوني ما تشوف غيرج

فَرس
حتى ذني صرت أشوفهن الاعيب وما اصدك بيهن

امير
هسة انة طلعت اتلاعب اعليج لو شني بالضبُط ؟

فَرس
امير تدري شنو اني راجعة للقاعة

ردت ارجع لزم بـ ايدي
امير
فَرس اوكفي امشي خل نروح نتريگ

فَرس
ماريد امير

امير
ماترجعيـن للقاعة امشي وياي فَرس

فَرس
اني اريد ارجع انتَ شعليك؟

امير
لا تكولين شعليك امشي حبيبتي خل نتريك سوية

فَرس
امير والله ضايجة ماريد جَد ماريد اكعد ولا اسوي شي ماروح للقاعة اريد اروح وحَدي

تنهد وگال
امير
تمام براحتج وين تردين ؟

فَرس
هيج هنا اكعِد

امير
مو بالشمس ب في عـاد

عفتة ومشيت اكو نفس المكان هادئ محد بي والكل عدهُم مُحاظرات كعدت بي وضليت صافنة
مادري منين تلگاهة وشلـون
بس جَد وجوددي وي امير مُضر الي ومُستحيل نكدر نتراهم
اني حيل اغار وهوَ بمكان يخليني اغار عليّ بشكل

جنت كاعدة وصافنـة ماحسيت الا ع امير كدامي وبيدة اكل

امير
تسمحيلي اشاركج افكارج يحلوة؟

فَرس
افكار سوداوية شسوي بيها ؟

امير
لو جهنمية هم اشاركج بيها بس سولفيلي شبيج ضايجة؟

سكتت كعد كدامـي وخلة الاكل بالنُص باوعتلة نزع السترة وعدل شعرة بطريقة مُثيرة تنهدت ع شكلة وهوَ كدامي هيج

امير
يلة احجيلي ايتُهـا الخُمرية شنو الزاعجة حتى اغيرلجيا

فَرس
ماتكدر

امير
احسبيني ايلول واحجي حتى لو علية هم ميخالف

فَرس
هيَ حتى لو ايلول مراح تنطيني حلول

امير
لا وعد انطيج بس احجي، شنو الماعاجبج حتى نغيرة

فّرس
شكلك كلة مو عاجبني

من حجيت هيج رفع راسة وباوعليي بـ استغراب
امير
شنو مافهمت

فّرس
وسيم فوك اللازم امير وجَد اني جاي اتعذب بهذا الشي عيون البنات كُلها عليك

امير
بس اني الج وحدج مو لوحدة ثانية

فَرس
اميـر اني اغار وكلبي يحركني اذا شفت وحدة باوعتلك بنظرة اعجاب وانتَ استاذ وبهيج موضع تصير هيج سوالف وجد كلبي ميتحمل ميتحمل

امير
يعني والله مادري بس تردين اكضي اغلبية وقتي ويـاج ؟ حتتى يشوفون انُ احنة مرتبطين وانة مابدلج بكنوز الدنيا

فَرس
موهيج امير، انتَ راح تضل تدرس والتدريس يتوجب عليك تسوي كُل هذي الاشياء الاحتكاك ب الطلاب و الجدية بعملك وحتى ما لازم تدخل حياتك الخاصة الة ابد واني ادري انتَ هيج بس هسة جاي تحاول تغير بس اني ماريد

امير
زين شنو الي يرضيج حبيبتي
شنو الي يهدئ كلبج كليلي واسوي

تنهدت و دنكت راسي
فَرس
ماحس اكو شي

حط ايدة ع ايدري وصـار يمسد بهدوء

امير
اكيد اكو شي احجيلي حبيبتي شنو الي يريح كلبج والله اني هم تعبت واريد اعيش وياج وبَس ماريد اضوجج ولا اريد ازعلج ولا اريد اخسرج حتى

ضليت ساكتة ومدنگة

امير
فَرس تنوعيلي

باوعتلة بعيوني الي مدمعـَة لزم ادية الثنين وگال بهدوء
امير
اذا استقيل هذا الشي راح يريح گلبج؟

من گال هَيج فتحت عيوني بصدمة
فَرس
تشاقة

امير
لا والله ما اتشاقة اني لكيتج وما مستعِد اخسرج ابـد وماريد أذيج ولا اريد واحد يأذيج، هوَ انة ماتحمل البعيد يأذيج نوب روحي تأذيج؟
جَد فَرس ترديـن اقدم استقالتي ؟ واقدم على ايّ مدرسة للبنين اداوم بيها

فَرس
امير مو هيج شدتحجي انتَ
ويـن الاستاذ الجامعي و ويـن الـ مُدرس
وبعدين انتَ دتريد تبدي عَ الدكتوراه لا تنسى

امير
كلها لعيونج تهون، وصدكي ما جاي احجي شي حتى استعطفج بي والله بس تكليلي اسويهة وبدون ميرفلي جِفن حَتى وداعت عيونج فَرسي

اتنهدت وابتسمت بهدوء

امير
ماريدج تضوجين خُمريتي والله كِلشي يروحلج فدوة صدكيني محد صـار بعيوني كدج ولا راح يصيـر

فَرس
ومسرّة؟

امير
مسرّة فعِل ماضي وانتِ ماضي

فَرس
هااااااااا

امير
ماضي مُستمر حبيبتي خل اكملج
شني ما ماخذة بالانكليزي الماضي المستمُر؟
فَ انتِ ماضيي المُستمر

فَرس
صاير خوش ترتب بالحجي

امير
انتَ حب والكلام وحدة يترتبلك انة مو شاطر بس انتِ الخليتيني هَيج يلة افتحي حلگج اكلي هاي

صـار يوكلني بالبيتزا وثنينة ساكتين
شوية وكتلة

فَرس
هم جنت تكتب لمسرّة شعر؟

امير
فَرس راح احجي بموضوعها واخر مرة احجي بموضوعها انة من سمعت بيها اتزوجت حلفت بعد ماحاجيها ولا احطها ب راسي بعَد لان صارت على ذمة رجال ثاني ونسيتها وعفتها بدون ايّ شعور والله بس حاليًا صدك كرهتها على تصرفاتها الاخيرة وياي

مسرّة اعرفها بـ ٤ كُلية بَس البت عجبتني رحت طلبتها ما طونياهة ماصارت القسمة وها اها بس احنة جنة طلاب ولا جنت اهديلها شعر ولا جنت اكتبلها شعر

شعــري كتبتة بَس الج وهديت اشعار لعيونج بَس
كتلج وارجع اكلج انتِ مصدر الهامي الوحيـــد

فَرس
يجوز هم دتضم علية نفس ماضميت علاقتكم؟

امير
اني ماضميت اني سكتت لان ماجان اكو داعي احجي !
تخيلي بنُص علاقتنة الحلوة اجيج واكلج جنت بعلاقة وي بنت قبلج ماحس اكو داعي ابد اني احبج فَرس وهـذا يكفي مايهمني لا ماضي ولا اشياء قَديمة اكو فرق بين انّ انتِ اجيتي سئلتيني وكتلج لا ما مرتبط قبلج وانة جاي اجذب وبين انّج ماسئلتيني ف ماحجيت لان ماجان اكو داعي

من گال هّيج سكتت ماحجيت شي
امير
تدرين جنت مكتئب بس شفت الحلقة بـ ايدج احس كلشي بية فرح والله

ابتسمت الة بزعل

ضرب ارنبة خشمي ب اصبعة علكيف وگالي
امير
وبعديـن شنو هذا البس ؟ شطالعة ؟

فَرس
شلابسة ترة مستور

امير
ادري مستور لو ما مستور اخليج بي دقيقة مثلاً ؟؟
بس طالعة حلوة وكلبي ما يطيني اخليج حلوة هجي

فَرس
احجي وي روحك انتَ

امير
صيري مبهذلة واصير مبهذل نفسج
ولو انتِ حتى لو مبهذلة هم تطلعين تخبلين

فَرس
بس الناتج ما يباوعولي ولد كد ما يباوعولك بنات

من كتلة هَيج علي ابتسامتة بسرعة فَضيعة وضل صافن بوجهي، معالم وجهة كُلهن تغيرت وصار وجهة غاضب وعَصبي ماتحملت منظرة وضحكت بصوت مسموع

امير
استغفرالله شبيج فَرس ليش تغثيني

فَرس
اشاقة شبيك

امير
تشاقي وياي بس موهجي
وبعدين هوَ منو اليتجرأ ويباوع لزوجة استاذ امير؟
اكسر ضلوعة غيـر

فَرس
امممم صحيح

امير
أيّتها الخمريّةُ، قد أسكرتني، لا تلوميني إن زعلتُ وغضبت.

ابتسمت الـة وكملنا اكل، كالعادة حركة امير المُعتادة يلفلي البُقة ويكلي حُطي بجنطتج

امير
معدتج معدة العصفور تشبع بسرعة وتجوع بسرعة حُطيهن بجنطتج وشوية واكلي خوش

ابتسمت الـة وكتلة تمام رحنـة سوية باتجاه القاعات رجعنـا لان هوَ طريقنـة شفناه الطلاب ستوها دتطلع باوعت طلعت ست مسرّة اجت عيني بعينها ونوب باوعت لاميـر وخلت وراحت

امير
ماعليج بيها روحي شوفي ايلول ويـن

طبيت لجوة وهوَ ضل واكف صحت لايلول وطلعنـا

امير
شحجت هـاي ؟

ايلول
ايع اسلوبها مُقزز اول ما طلعتوا صاحت شنـو اسمها هاي بسرعة نوب انطوها الطلاب اسم فَرس شتكول
اني راح اقدم هالشي يم العميد واشوف هل يصير نقدّم حياتنا الشخصية بالعلن
كلتلهـا ترة هُمة ما مقدميها بالعلن كالج اريد احجي وي زوجتي شوية تكُلي رجاءً لا تدخلين بشغلي
فد غَثيثة

فَرس
خاف صدك تحاجي العمادة؟

امير
هههههههههههههه شبيج حبيبتي شتريد تكول الهُم مثلاً كال لزوجتة شوية ؟
تـرة احنة الكادر معروف علينـا نميز ابنائنة وذوينـا وبعضنا البعض هم يميزهُم يعني اني اميز ذويي فُلان استاذ واستاذ فُلان يميز ذويي فَ موعلى كيفها هيَ متكدر تسوي شي وتدري هي انة سلطتي هنانة مو بس استاذ

خلة وراح امير سولفتلها ع الصار بينـة

ايلول
والله يا فرس اذا تردين نصيحتي استاذ امير يحبج فَ لا تخسري والله وبعدين منو ما يمة علاقة قبل ماتكليلي

فَرس
مُشكلتي الغيرة ايلول تدرين هسة احس روحي تعلكت عدهُم ياترى شديسون؟ خوما ديحجون خوما ديحنون والله احس عقلي تعب من كثر تقكير

ايلول
اذا تضلين هيج راح تعبين اكثر فَرس لازم تخلين بكلبج ثقة بي ولازم تؤمنين انُ امير يحبج وما مستعد يخسرج ابد
يعني شكد حلو من يكلج اعوف تدريس علمودج والله احس اذا كلتيلة هسة يعوف كلشي مستعد يسويها

فَرس
اوف بس بنفس الوقت اذا ضليت هيج راح اتعب

ايلول
ميخالف تتحملين وبنفس الوقت تثقين بي وهوّ يصبر عليج

مضى الوكت ورجعنـا للبيت، اليوم الثاني نزلوا الجدول
جانت اول مُحاضرة عدنة لست ميسرّة عدنة

اجت النـة و امير ضل يوصيني مال دخل بيها ابد صدك والله اجة اليوم الثاني وطبت ست مسرّة

مسرّة
يلة كوز نفس ما كتلكم
بس مو ورقي اني اكوم الي اريدة

فَرس
خرب شو مكتيلي

ايلول
شمدريني يمعودة هوَ اني فهمت من محاضرتها شي

كومت اميرة جاوبتها وراسًا كومتني بعدها
كلتلي بالسؤال ماعرفتك كتلها ماعرفة

مسرّة
ها وهيج بكل سهولة ماعرفة وهاهيّ
شكلت اني البارحة

فَرس
ماجنت موجودة اني

مسرَة
هذا مو ذنبي اني كلت بدرسي تجون قارين امتحن وعليهن درجات ترة

ضليت ساكتـة

مسرّة
تفضلي اطلعي برة

من كالتلي هيج احس موتتني من العَصبية خليت وطلعت ادري بي اول مُحاضرة ماعندة شي رحتلة بسرعة للعمادة وجنت ميتة من القهّر ودموعي مملية بعيوني

خابرتة كلي اني بغُرفة العميد جايج
اجاني للباب اول ماشافني انصدم

امير
شبيج فَرس شصايررر!

سولفتلة كُل الي صار وماتحملت دمعتي نزلت

امير
مارديتي عليها ب ايّ شي

فَرس
ابد هذا الي صـار

لزمني من ايدي ومشة بسرعة نحو غُرفة العميد

سولف للعميد كُلشي ومبين اساسًا عندة علم سابق ب الي صار
امير
يعنـي مافتهم دكتور هيَ هـاي حالة مثلاً ؟
اني ماقبل ابدًا تهين خطيبتي بهذا الشكل وبعيدًا عن كونها خطيبتي حتى طالب مايصير تهينة بالنهاية احنة مو ابتدائي احتة جامعة !

اليوم اني مامعقولة انقص درجات ع الحضور لو اطرد طالب لان ماعرف اشو احنة الي نحرمص للطلاب تحرمص ومانعاول حتى نوصلهُم للنجاح مو حَتى نلكيلنة حجة عليهُم ونعاملهُم بهل اسلوب!

العميد
اهدئ استاذ امير اني مُباشرتًا هسة بس تكمل مُحاضرة ادر عليها وافتهم منها هذا الشي ما مسومح ابدًا

امير
دكتور ياريت هسة تصيحها ماريد بعدين هسة بهاي اللحظة

العميد
أُستاذ امير اهدئ ماكو داعي لهل عصبية

امير
لا دكتور هيَ مشخصنتها حيل وي خطيبتي تجي هَسة وخل نتفاهم كدامك لازم تخلي حد لهاي التصرفات

خـابر العميد عليها انداريت واني اهمس لـ امير
علكيفك امير ماكو داعي هل عَصبية !

امير
لا الها داعي الها داعي

العميد
جاي اكلج هَسة تجين ست مسرّة
ايّ وان عندج مُحاضرة تفضلي
رجاءً بدون رفض ست مسرّة حالاً تجين

بهل اثنـاء احنة كعدنـة ماحس الا طبت ضلينـا كاعدين

باوعت بغضب وراسًا باوعتلي وكلنلي

مسرّة
قليلة ادب وماتفتهم!!
من كالت هَيج ماحس الا امير .... يُتبععع
( بـارت فرس قصير لان كلش طولت ب بارت شّمس وتاخر الوقت وانتوا خبصتوني خبُص على البارت، ان شاء الله اعوضكُم بالبارت الجاي )

هديـة ال 2m راح تجي استعدواااا🙈