بيت جبر الفصل الثالث وستون 63 - بقلم هُدىٰ آذار

مَســاء الخير
ورجعنــا وياكُم بـ بارت جديد من قُصة
بيَت جبُر
للكاتبة : هُدىٰ آذار
لاتنســـون التصويت والتعليق بين الفقرات
قِراءة مُمتعة.
____________________

شَمس

سُراج
شَمس اكلج شي ؟

هزيت راسي ب ايّ

سُراج
شَمس ترة انة اعزِج وهـواي هم، وما تصورين شكد اخاف اعليج وما اقبل بأذيتج، بس دايمًا كِلشي يصير عكِس وكِلشي يروح مابين عصبيتي ومابين غبائج المُفرِط

يجوز انتِ ماخذة هسة عني انّي انة ماخذ اعليج نظرة موحلوة وشايفج بشكِل موحلو، بس صدكي اني لازالني اتنوعلج بنظرة حِلوة مهمّا صـار

يجوز صـارت سوالف وبينتلج انُ انة انسان سيء بس لِكل فعل رّدة فعِل، والي صار ماجان إلا كَ ردة فعِل على الي سويتي وايّ احد بمكاني جـان راح يسوي هجي

شَمس
محد جان حيسوي الي سويتة انتَ بية ابد ..

كلت هذا الشي واني اطأطِئ راسي واذكر كلامة تِجاهي

سُراج
ليش بشنـو استنتجتي هالشي؟

شَمس
علي حاجاني بالمُستشفى وكلي اذا محمَد السبب صح واح ازعل منج بس ماراح اخذ راسـج عكسك بكُلشي سُراج، انتَ بيوم الي شفتني ما هديت ابد وضليت تحجي اشكال و الوان يجوز انطيك الحق لانك قريت بس بالبداية

زيـن والي بنهاية ماشفتة ماشفت برودي ماشفت نفري مِنة؟ لو هذا كُلة ماشفتة؟ لا شفتة بس انتَ اختاريت ما تشوفـة وضليت مُستمر تعاملني بنفس الوحشِية وتوجهلي نفس الاتهامات

سُراج
ماكدرت اتقبل المُحادثات ابد، شَمس انتِ عرضي تعرفين شني يعني عرضي ؟ طبيعي انّي ابدي ردة الفعِل هاي

شَمس
بس الموطبيعي انّك تضل حاقِد علية لفترة طويلة وتضل تأذيني بنفس الحّد

سُراج
مـادري جنت ضايج حَيل، اصلاً بيوم الي شفتج بي جاي تخابري قبلها انة جان حاسني كلبي من حركتج و تعابير وجهج، بس كلت مامعقولة ترجع و وهمت روحي
فَ من شفتج ماعرف شصـار بية
والله يشهد علية شكد تأذيت من هل موضوع انة، بنفس المقدار الله شاهِد

شَمس
ترة دتبالغ، محد تأذى غيري ومحَد ظلم غيرك

تنهَد وگال
سُراج
سدي الموضوع احسَن خلي نكمل

شَمس
لا عوفها ماريد

سُراج
ليش

شَمس
متأكدة اذا امتحن باجُر ماجيب درجة ف حكُلة يأجلي

سُراج
ترة انتِ مضبطة ثنين وهاي الثالثة خلصت ضلن ٣ سهلات

شَمس
لا ماريد مالي نفس بعَـد اقرة

سُراج
ترة امتحان غصبًا اعليج تقرين، ودام امتحانج اخر مُحاضرة ف وقت هـواي حَتى تراجعيـن بي

قنعني اكمِل رُغم اني انسدت نفسيتي كُلها، حَس بية انُ صافنة ف كلي انتبهيلي وعوفي كِلشي

فتنـة ب مود الدراسة كُلش فهمتهن من عندة بس احس يرادلهن بعَد مو مـال هَيج كلي الصُبح اخذ زمنية و اعيدلجياهن

بـ ٢ ونُص كملنـا رحت صعدت نمت حَيل نعسانة جنت، كعدت بـ ٦ بدلت ورتبت نفسي بسرعة وطلعت بالصالـة اراجع الملازم ماردت افتح الضوة ع البنات نايمات ..

ضليت اراجع بالصالـة افتر واقـرة، شوية ودكيت الباب ع سَجاد لان سَجاد مايكعد الا واحد يكعدة، الولد هم كعدوا كلهُم ماعدا سُراج ما طلع من غِرفتة

شويـة وطلع سُراج شافني تقدم الي
سُراج
صـباح الخير

شَمس
صباح النـور

سُراج
هـا ويـن وصلتي ؟

شَمس
راجعت الملزمتين وضلن ذنيج الاربعـة

سُراج
ماعتقد يطوني زمنيـة اليوم عدنة لجنة فَ روحي لهناك وياي لدوام اراجعلجياهن

شَمس
لا ميحتاج اني اراجعهن وحدي

سُراج
متكدريـن شطلع عقلج قابل لازم اثبتلج المعلومات اني

شَمس
ماريد استحي

سُراج
يابة بِدون عنـاد امشي خّل نكمل هل امتحان اعلى خير مال تراجعيهن وحدج مُستحيل لان شو جنج كِلش قافلة اعليها

شَمس
استحي يعني وين اروح

سُراج
ماعدي شي، عمليتنا بـ ١١ انتِ قّبـل الـ ١١ ترحين ان شاء الله

جنت كُلش خايفة ومتوترة بنفس الوقت خصوصًا امتحنت امتحانين وجنت زينة بيهن فَ ماريد اصير ب امتحان موزينة لان تجُرر ويـاي

نزلنة لجـوة تريگنـة وكملنـا امير كال يلا

سُراج
لا خوية تروح وياي اراجعلها ذني وعود انة اجيبهـا

جبُر
جا تاخذها للمُستشفى

سُراج
ايّ جدي ماعدي شي انة عملية وحدة بـ ١١ هيَ قبل ١١ تروح

سَجاد
صويلحة الحية والبطنج مالاتج توالِمن شو

صالحة
قِدرّة قـادِر يُمة

سُراج
بـس لو تسد حلگك جان العِراق كِلة يصيـر بخير

سَجاد
حجاية من عدي امشي العراق تك رجل

علي
خرررررررب انّ ااااااااخ

جبُر
خايب شمالك

علي
الفيل وكع اعلية جَدي

ضحكنـا كُل احنـة عليهُم، سُراج كلي يلة
طلعت كدامـة للمطبخ وهوَ وراي استوقفني صوتة وهوَ يكول
سُراج
ما تاخذيـن وياج العِبا؟

انداريت بتفاچُئ
شَمس
لا غيـر رايحة للجامعة شبيك؟

سُراج
لا مو وياي جماعتي وهجي فَ لو تلبسيها أفضَل

شَمس
سُراج ماروح راح اروح وي اميـر و وحدي اراجع شُكرًا الك

سُراج
شبسرعة غندبتي امشي عمي امشي يا حجاية رِدي لمكانِج

شَمس
ترة والله زايدة منك جُبتي حيـل عريضة بعد المن؟

سُراج
ايّ يلة يلة خوش امشي خل نطلع

عقجت كُل وجهي وملامحي وطلعت، شلون اني متوترة نوب يوترني ازيـد

جنت اراجع ب الي عندي حَدما وصلنـة للمُستشفى، نزل هوَ واني امشي ويـا، اباوعلة اول مانزل نزل بيـدة اللابكوت، لابِس قميص رسمي نيلي وبـدي بهـاري هم نيلي، جِسمة حيل حلو بطريقة رياضية وصِحية بحيث صح عندة عضلات بالايـد وبارزات هـواي بس مو اوڤر تضخيم وموحلوات لا جسمة جان حَيل متناسِق

لبست اللابكوت اول ما طبينـة للمُستشفى وراح بُصم واجـة امشي اني ويـا وكُل ساع جاي واحد مسلم عليّ او هوَ يسلِم عليهُم انّ جان ولد او بنيـة

طبينـة لغُرفة جـان بيها شباب ثنين، طب بس هوَ واني ضليت واكفة يم الباب صفِح مادري شحاجاهُم شوية وطلع يضحك

سُراج
يلة هَسة يطلعـون شفتتهُم حَتى نكعد براحتنـا
هزيتلة براسي كَ ايّ
طلعـوا هُمة من غير ما يباوعولي خلوا وراحـوا

كعدنا ع الكراسي الجانت موجودة وبدة يشرحلي، احس ترسخن بـ راسي وكُلش فهمتهن، معَ ذالك ضليت خـايفة منهن لان ادري الدكتور صعُب

بهـاي الاثنـاء وخلال مديشرح الي طبت وحدة بنية مرتبـة وأنيقة مبينة صغيـرة وبنفس الوقت حاطة ميكب قوي ولابسة لابكوت طِبي

أمل
صَباح الخير

سُراج وشَمس
صباح الخير

أمل
شنـو اليوم أُستاذ سُراج شو مبين مشغول

سُراج
ايّ جاي ادرس شَمس عِندها امتحـان ب ١١
شَمس بنت عمي
شَمس، أمل زميلتي

شَمس
اهلاً وسهلاً

أمل
اها، نايس تو ميت يو(سُعدت بلقائكِ) حبيبتي

تحجي بدلع فَضيع، ابتسمت الهـا وهيَ كعدت يمنـة وسُراج صار يكملي شرِح

أمل
شنو سُراج الظاهر حَتنسانـا وتلتهي ب بِنت عمك ههه

سُراج
اني عمليتي بـ ١١ ماعندي هَسة شي

أمل
ها اوكي، بس هيج ردت اكُلك مو تنشغل وياها وتنسى شغُلك ويانة

حجيهـا الي جانت تحجي، جانت تحجي بـ نبرة تملُكية هيج جان واضح عليهـا، انزعجت وكمت افُر بالقلم من الضوجة

سُراج
شُغلي فوك كِلشي، بس هسة هيَ تحتاجني اكثر
يلة شَمس خل نكمل ماضل وكِت

باوعلي بـ باوعتلة بشكِل تصنُع للطبيعي اشرلي شكو اشرتلة ماكو شي

أمل
زيـن اكُلك سُراج

اتنفس سُراج بعَدم صبُر وگـال وهوَ يندار الها
سُراج
ست أمل بَس لو تخليني اكمِل وبعديـن براحتج شنو تحبين تسئِلين برسِم الخِدمة انة

باوعت بـ إنزعاج وكالت لا براحتك وخلت وكامت

سُراج
استغفرالله العّظيم يعني واحد ماعدة احساس شلون يعني

شَمس
سُراج انتَ مشغول مبين اني خلي اروح واقرة وحدي

سُراج
كتلج ماعدي شي خل اكملِج

حجـة بنبرة حآدة

شَمس
ايّ خوش ليش تصيح

سُراج
ماجاي اصيح شبيـج

حَط عيونة بعيوني احس توترت ودنگت العب ب القلم

سُراج
لا تهتمين هيَ من النوع الي تحِب تبرِز نفسها

شَمس
مادري حَسيتها انزعجت لوجودي

سُراج
مو مُهِم رئيها المُهم تفهمين هَسة

هزيتلة راسـي وكملنـا شرِح، حَبيت انُ هوَ شلون فات وياي بالمود لهاي الدرجة، بحيث جان مهتم لدرجاتي اكثر مني، معَ انُ اني جِنت فاقدة الأمل وخايفة حَيل بالامتحان هوَ ضل يشجِع بيـة

كملنـا وطلعت واني خايـفة حَيل
سُراج
لا تخافـين انتِ قريتي كافي وزايد انة متاكد راح تجاوبين
حبيبي زيودي هـلا بيك

اجـة من جانبي ولد مَادري شلون بس بحركة حَيل سريـعة بادل بـ اماكِنة وخلّة نفسة من الجِهة الثانيـة

شَمس
مادري بـس اني احِس ابد ماراح اجاوب واضح والله سُراج

سُراج
لا تكوليـن هجي انتِ ضبطتي كِلشي وراح تجاوبيـن

صرنا بممَر ضيق وتُعبر منة ناس مرضى و الموظفين هم

صـار يمشي وحَط ايدة على چِتفي حَتى يمنع الناس ب انُ يحتكون بيـة، انظار شكم بنية صارت علينـا هوَ اصلاً واضِح انُ. هوَ محط انظار بالـ مُستشفى

طبعًا حلو ومرتب وسيـارة وماعندة مَرة اكيد حيفكرن هيج

فكرت بيني وبين نفسي هل تفكير لكيت روحي متكئِبة اكثر
حجة وي جماعتـة وطلعنـة حَتى يوصلني
فتح سـورة يس شويـة وتنهدت من فُرط التفكير الي اني بي

سُراج
كافي شَمس شنو سالفة صدِك تحجين طز بالامتحان تردين أجلجيا ؟ بس والله ترة انتِ قريتي بِمـا فيه بس اذا مُصرة هسة أجلة الج

شَمس
هوَ اني كُلة بسببي ع ابـو اكره المادة والاستاذ ومافهمها عفتها وراكمتها علية

سُراج
تنوعي هوَ هـذا العيب الي بيج اذا كرهتي انسان تلغين شكو شي ضروري بالحياة مرتبط ويا ما تهتميلة من الاساس
بينما انتِ المفروض تفصلين

شَمس
هسة شنو انتَ دتبسمرني لو تواسيني

سُراج
هههه لا جاي احجيلج اعلى اطباعـِج

شَمس
اووف اوفف

تأففت ودرت وجهي للجامة وعيوني مدمعـة من الخوف والتوتر

سُراج
نأجل الامتحان ؟ خل يولي

شَمس
صعُب ميقبل

سُراج
ماكو صعُب انة احاجي شعليج انتِ

شَمس
ماريد

سُراج
جا هاهيّ طبي امتحني وانة متاكد درجة حلوة تجيج

ضليت ساكتـة ودايرة وجهي للجامة

سُراج
شبيـج شّمس

مارديت

سُراج
شبيج شو حاجيني

شَمس
مابية سُراج مابية

سُراج
هسة ديري وجهج خلّ احاجيج شبيج

ردت امسح الدموع الي جانن محبوسات بعيوني ماحس الا نزلن ع خدودي، مسحتهن بـ انزعاج

سُراج
استغفرالله، يلة راح ادور السيارة ارجعج للبيت وبعديـن انة اتفاهم وي الدكتور

درت وجهي الـة بسرعة
شَمس
لا سُراج ماريد اريد امتحن ماعليك

بـاوع لعيوني بـ قلق
سُراج
شوفي خوفج اذا ضليتي هجي حتى اذا تعرفين ماجاوبين يعني حتى بجي كمتي تبجين صدك تحجين شَمس قحط امتحان عمي روحي امتحني حَتى لو زفتي بي انة اكولن لامير يحجي ويـا ويحسبلج الشهر الثاني في ثنين

شَمس
مادري سُراج مو خـايفة هذا الدكتور ما يتحاجة ابـد

سُراج
شتدرين بـ امير عندة علاقات بالكُل لا تخـافين مايكول لا
يلة كافي استهدي برحمٰن راح نوصّل

اخذت نَفس ومسحت الدموع الـي معبيات عيوني
فجأة سُفط السيارة يم محَل ونزل
شفتة جـاي وجان بيدة عَصير و كيكة
ابتسمت ابتسامة خفيفة
وحَسيت بـ فرحة طفيفة بداخلي

صعَد بالسيارة وانطانياهُ بابتسامة

سُراج
نَهي توتر نَهي خوف
يلا اكلي واسترخي

ابتسمت الة بخُفة ودنگت

سُراج
شني رآيج بسيارتي الجديدة مني احلى هاي لو ذيج

شَمس
اممم هـايّ حلوة

سُراج
اعجبج انة

صـار يحجي وياي ع سيارات ومَدري شنو ماحسيت الا واصلين للجامِعة، ماقبل كال اطُب ويـاج طب وياي فعلاً وشكد مـا نساني الامتحان بَس وصلت احس گلبي گام يدگ حَيل

سُراج
هاي قبل من جان عدي امتحان صعُب واخافن منة فنّج شسوي

شَمس
ايّ

سُراج
اكول يلة هيَ مليوصة مليوصة خل اطُب ارسب واطلع وأيس من روحي نهائي ومافكر بي لا اصير نوبّ افكر بالامتحان الثاني واهون اعلى روحي واكول يلة طُز حَتى لو انة مقصر لوشي بهاي الحالة انة امنع روحي من تفكير الجانبي وبنفس الوقت احمِل عقلي الباطني ب مسؤولية
والله العظيم مافد يوم سويت هجي الا وانة فول مارك وطالع
فَ انتِ هم سوي هجي كولي اعوضها بجاي وتعوضيها بهذا وذاك ان شاء الله

كتلة ان شاء الله وسكتت، احنـة طريقنة من يم الطِب نُعبر فَ جنة دنمشي لمحت محمّد ابن مُجبِل من بعيد كاعِد ع المسطبة، عيونـة اجت علينـا گام

دنگت عيوني وبنفس الوقت حَبيت اشوف ردة فعِل سُراج
وفجــأة وجـان انصدم بـ ايد سُراج وهيَ تحضِن ايدي من فوگ ويلزمهـا بقـوة

رفعت راسي بصَدمة، اباوع محمَد مصدوم وملامحة كُلهن تغيـرن وسُراج ولا عبالك يمشي وطَبيعي

همست بـ اسمة بعَصبية وحاولت اوخر ايدي منـة بس ايدة جانت مُصرة ع اللزمـة

احس بداخلي غليتتتت مِن العَصبية، هوَ شلـون هيج يسوي وشراح يكول علية الولد!!!!

تقدمنـا الة حَيل اجة سلم على سُراج بس الولد ملامحة كلهِن انكلبن، حَتى سلامة جان حيل بارِد مونفس كُل مـرة اذا جنت وي اميـر ونمر ونشوفة ياكل امير اكِل بالسلام

عيونـة جانت مصبوبة على ادينـا المتشابكة، واكو ملامح عَصبية واضحة على وجهة بس منظرة جـان هادئ

سُراج
من رخُصتك شَمس عندها امتحـان

محمّد بحِدية
براحتكُم .

تقدمنـا شكم خطوة واني احس انفجرت
حاولت اوخر ايـدي بنتر ماجنت اكدر

سُراج بهمس
شبيج تخبلتي انتظرييييي

شّمس
اني الي تخبلت لو انتَ؟؟
انتَ صدُك تحجي هسة شيكول علينـااااا

سُراج
شيكول خيكول يطبة مرض الحيوان شلون يتنوع

شَمس
هسة اذا وصلت السالفـة لجدو شراح يكول ؟؟؟؟

سُراج
شَمس امشي واسكتي عندج امتحان

شّمس
ترة تصرُفك كُلششش ما الة داعي

سُراج
مو انتِ تعلميني الداعي من الداعي

شَمس
دهد ايدي هَسة ماضل واحِد مـا شافنة

رَخى ايـدة راد يهدني شفنة محمَد جاي هوّ وحسين صديقة رجع لزم ايدي حَيل

نوب موبس هيج يمشي ويباوع ويخزر بالعـالم
ياربي ياربيي هَسة الي يشوفني شيحجيي

سكتت بس احِس اعصابي انهارت انهـارت، وصلنة لقاعتنـة كالي يلا

شَمس
بسيطة سُراج بسيطة والله الي تفاهُم ثاني

سُراج
ايباه خفِت
وصايرة تهدد ست شَمس
دروحي لامتحانج بابا روحي

باوعتلة بعّصبية ودي اكلة اكل خَليت وطبيت وكُلها تباوعلي
من بعـد ما كضيتها وحدي هسة اكيد يكولون هذا مرتبطة ويـا

طَبيت للقاعة وطبيت ب مود الامتحان ضليت اقـرة ايات قُرآنية وخـايفة، اجت الاسئلة قريتها احس صارت عندي دوخة

حاولت اركز وابدي بسؤال سؤال اكتشفت انُ شكو شي كالي سُراج عليّ وركز ع انُ يجي اجـة

طلعت من الامتحان اول وحدة واني غلطة وحدة ماعندي ابد جنت حَيل فرحانة، خصوصًا من بعد ما تاكدت من اجوبتي بهـل اثناء شفت سُراج مراسلني مِن الخط لانّه المكان الوحيد الي ما مسويتلة بلوك منة

سُراج
بس تطلعيـن من الامتحان طمنيني

خابرتـة رأسًا كد ماجنت فرحانة شوية ورّد
سُراج
ها يمعودة اجلتي ؟ يلة ميخالِف تعوضيهااا

شَمس
لااااااا مجاوبة وطلعت

سُراج
ولج لا تشاقين وياي ماصارلج نص ساعة

شَمس
والله العظيم جاوبت وطلعت شكو شي كتليا اجـة

سُراج
عفية عفية عفية بالبطلة كفوو
شكتلج انة

شَمس
كُلش فرحانة والله هههههههه

سُراج
هههههه يلة هديتي ويـن

شَمس
تدلل

سُراج
لا احنة ماعدنة نسوان تهدي، اشاقة

سديت الاتصـال من عندة بفرح خابرت البنات كعدنة سوة تونسنـة واكلنة علمّا اجة اميـر ورجعنا للبيت

ذبيت روحي كُبل نمت لان جنت حيل حيل تعبـانة ومانايمة وماجان عندي امتحان بعدهي بيوم
كعدت العَصُر بدلت ونزلت يمهُم لكيت محَد موجود الكُل طالِع

شـوية واجوي كلهُم ومنهُم سُراج، سئلني ع الامتحان وكتلة زينة جاوبت كُلشي

جبُر
جـا نوبّ كلشي اشرحلها ولك

سُراج
هيّ كد نفسها بس هيَ تقرة كلشي ماتعرف شلون تميز بين الي يجي وبين الي حاطي كَ مُجرد معلومة

امير
خوية كل احنة هيج من نتخرج يلة نعرُف هل سوالف، الطلاب مُستحيل تكدر تفصُل

سُراج
ايَ هيَ هاي مُشكلتها كُلشي تقـرا

بهـل اثنـاء بيبي اجاها اتصـال شوية وملامِح بيبي تغيرن وكامت تباوع النـة اني وسُراج

صالحة
لا دادة انتِ شتحجين غير هوَ أبني عمها

من كالت هيج اني كُبل استلمت وباوعت لـ سُراج
سُراج هم افتهم عدل گعدتة وصار يباوع لبيبي منتظرها تكمِل

صالحة
انتَ صدك اليوم لازم ايدهة بالجامعة وتمشي ؟؟؟

سُراج بصايح
ايّ وغصبًا اعليّ واعلى ابو واعلى اكبـرررر شارِب يطلع وراهُم
وهوّ شعليّ مثلاً ؟؟؟؟؟؟؟؟

من گـال هّيج الكُل صاح بي حَتى ينصي صوتـة، وبيبي كُبل سدت الموبايل من الفَشلة

حَسن
ولك سُرااااااج

جبُر
هاااي شصايرررر

صالحة
ولك انتَ صدِك تحجي تفشلني وي المرة هجي؟؟؟؟؟ من طاح حظك ايّ والله حظ تربيتكككك

كام سُراج من مكانة وعيونـة بگصتة صارن

سُراج
وهوَ شعليّ شعليّ اريد اوكلة خررررة وانعل ابو لابو الجابة واعلمة شلوننننن يتجاسر لهل درجة

كام وهوَ يريـد يطلع صاح بي جَدي حيل وراح علي يمنعـة يروح

جبُر
ولككك اوكف خل احجي وياكككك تعـال شصايررررر شني تمشي وايدك بـ ايدهة؟؟؟

سُراج
جَديييي ......

كال هّيج وباوعلي وسِكت

حَسن
شني جدي شنييييي ؟؟؟ هذا الحجي صحيححح

سُراج
ايّ صحيح هوّ شعليّ شعلي ؟؟؟؟؟؟؟؟؟؟؟؟
والله اريد اعلمـة شلون يتدخل بشي ما يخُصة
قليل ادب وجريء

جبُر
والله ماكو غيركُم قليل ادب انتَ وياهة
شعدك ماخذهة ولازم ايدهة ولككك؟؟؟
ومن يمتى انتوا هجييي ؟؟؟

كلهُم كاموا يباوعولي بنـظرات الاتهام ردت احجي ماكدر احس تجمدت من الخـوف اول مرة جدو يباوعلي بهيجي نظرات

سُراج
انة الي لزمت ايدهة هجي اعلى چيـادة، جنة جاي نمشي عادي وصلتها للقاعـة وشفتة اعلى چيـادة لزمت ايدهة شَمس مالها عِلاقة

حَسن
وهيّ هجي هيتـة تلزم ايدها ؟ شني حلال حرام
بوية شمِس انتِ صدِك تحجين جِذب انة ما مترجيها منج

سُراج
بوية جاي اكلك انة انة
هيَ مالها دخّل

شَمس
عمـو والله العظيم، فجأة لزم ايدي واني حَتى ماقبلت وردت اتعـارك ويـا

صالحة
والدليل هَسة تسولفين ويا وطبيعي ؟؟؟؟

سُراج
يُمة شبيـج انتِ صدِك تحجين!؟؟؟؟

من شفِت نبرة بيبي وشلـون حاجتني احس اختنگت حيل، لاول مـرة هيج تشكك بية وتحاجيني بهل نبـرة
جاوبتهـا بنبرة خافتة واقرب للبجي

شَمس
بس بيبي اني نسيت لان جنت طالعـة فرحانة من الامتحان مجاوبة

صالحة
ولج انتِ تنسين انتِ
انتِ تكعدين لسُراج رُكبة ونُص اعلى حگج من يمتى تسكتين هـا ؟؟؟
لو ردتي تسويها هم بچيـاد حمودي
خو كولي من البداية ماريدة وفضيها ليش تخلين أمل بكلب الولد وبعدين تحقريـن ويا هجي ؟

من گالت هَيج ماتحملت ودموعي نزلت وباوعتلهـا بصَدمة

علي
لا يُمة لا مايصير هذا الحجي لا

سُراج
انتِ صدِك تحجين يُمة!!!
ماجاي اعرفج انتِ مني
اول تالي هجي تحجين لشمِس لووووو لان هذا من طرفِج
يعني تبدي اعلينـا قابِل ؟؟؟؟

صالحة
انتَ اسكِت حِسّك(صوتك) ماريدن اسمعة تلعب اعلة ميـت حبِل مو سابينة وخابصنة زينب يا زينب شعدك هل ايام وي شمِس هاااا

جبُر
ام حَسـن كاااافي

من كالت هَيج ماتحملت اشوفها تباوعلي بهل قسـاوة اكثر من هّيج خليت وصعدت بسـرعة ودموعي تنزل

سُراج
لا يُمة لاااااا ابد ماترجيتها منج والعباس ابو فاضِل
بس انة تفاهمي مو ويـاج اذا ما اوكلة خرة لهل نسيواني هذا واعلمة شلون ينقل للنسوان فلا اتسمى سُراج

طـلع سُراج وجـان حَيل معصُب راحـوا الولد گوة يحاولون يهدئووا ويوگفونـة

بالمطبخ الولِد بـ اصوات ناصية ..

علي
لك شبيك لا تصيـر خبِل تعـال شلك غرض بي

سُراج
لك هدني لا تلزمني وعلي اليـوم الا اطلع حرگة دمي بي شفت شلون تحجي امي شفتتتتتتت

زَعيم
هسة انتَ شلك غرض بيهـا مالك غرض اعليك بجدي وابوك تعـال طُب

امير
سُراج لا تتهـور تعـال

سُراج
جاي اكلكم عوفوني والعباس اليوم ما اضيعلهيا

سَجاد
والعباس اذا ضيعتها مابيك خَير انتَ روح و وكلة خـرة اعلى نقِل النسوان هذا

زَعيم
ولك انتَ انجب و ميل منانة

سَجاد
جا شني هيَ لعبة يروح يحجي هذا الحجي
ترة هـاي معناهة جاي يمِس عرضكُم

زَعيم
اعلى اساس هوَ جان يصلي غير صدِك لازم ايدها

سُراج
انة اعلى چيـادة اعلى چيـادة زَعيمممم

زَعيم
وانتَ ليش اعلى چيـادة هـا ؟؟؟؟ شني هيَ غلب ومغالب شمسوي الولد ترة الولد جاي وبالحلال رايدهـا

غَيث
هاي هيَ حجاية الحگ انتَ ليش توكف بنصيبها يجوز يصير بينهُم نصيب مُستقبلاً ؟
اصلاً التصرف الي سويتـة ابدددد موحلو
انتوا ما طيتوا الرفُض تـرة فَ يجوز هوَ حط آمالة بهالسالفة فَ مال يجي فجأة ويلكي اديكم بـ ادين بعض طبعًا يستوقفها للسالفة يكلك انة شني طرطور هنا خو يرفضوني ويفضوهـا

زّعيم
هذا الكلام عين العقِل

علي
هيَ هم صدِك سُراج انتَ شني تزاودة قـابِل هوَ رايدها واحنة رافضي وتزاودة ؟؟

سُراج ضل ساكِت ويباوع الهُم بعَصبية ..

علي
احجي الصراحـة انتَ رايد شمِس ؟؟

زَعيم
شنننني ؟؟؟
سُراج وشَمِس ؟؟؟؟

سُراج
لاااااا ماكو هجي حجي منين جايب هالحجي انتَ

علي
جـا شني معنى هل حجي

جبُر
ولك سُراااااج

علي
ايّ جدددددي جاايين
شني معنى هل حجي ؟؟؟؟ تلطلط زايد ترة اذا ماتريد البت ليش توكف بقسمتها لو تريدهـا تكابلك وتكعِد ؟؟

علي
اكلك علي انتَ شدخلك؟؟
شني تريدددة بضبُط

زَعيم
اذا علي شدخلة ومحمد شدخلة وجدي شدخلة واحنة شدخلنة جا مني الة دخل ها؟؟؟

بهـاي الاثنـاء اجـة حَسن

حَسن
جدكم مو يصيحلكُم شبيكُم؟؟؟
تعـالوا بسرعة

علي
حاضِر بوية جايين

زَعيم
تعـال ولا تلاگُف احجي عدِل ولطخ السويتـة

عدل ياخة دشداشتة بـ انزعاج وغضب وكال وهوَ مامهتم
سُراج
انة ما مسوي شي غلط حَتى الطخة

زَعيم بهمِس
لا ومُصر بعَد ؟

اندار الهُم علي وغُمزلهُم وگال بهمِس
علي
يحِب بس مايعترف، صيروا ويا لا تثگبون اعليّ ..

جبُر
شمِسسسس وينـج

سُراج
هيَ أُمي خلتهـاااا تضل بحجيها

صالحة
وانتَ من يمتى تهتم لشمِس حضرتك هـاااا

علي
لا يُمة تـرة مايصير هذا الحجي مايصير

سُراج
يُمة والله العظيم اخر انسان اتوقعة يوگف ضدي هوّ انتِ يعني هجي اثر اعليج محمَد هجي؟؟؟

صالحة
فشلتوني والله فشلتوني ولك منطية حجـاية للناس انة منطيتهُم حجاية وكتلهم ان شاء الله تالي هجي شيكولون اعلية هـا شيكولون هاي لان من جانبي هجي لو من جانبكُم فلا تقبلون

جبُر
كافي كِلت شمِس تعـااااااااي

سمعت جَدو يصيح بـ اسمي واني ميتـة من البجي بسبب صاايح بيبي علية لهل درجـة هـاي حاولت امسح دموعي بـس وجهي جان احمَر نزلت وصرت كدامهُم

شَمس
هـا جدو

جبُر
اكعدي خل نحجي
وانتَ الاخر هم اكعِد لا تضل مكمزلي كِل ساعّ

كعدنـة كِل احنـة وجدو صار يحجي

جبُر
انتَ رايد بت عَمك ؟

مـِن گال هيجي احس انصدمت، رفعت راسـي بـ اندهاش وباوعت لـ سُراج الي مايقِل دهشة من عندي

جبُر بصوت عـالي
احجي ويـاي كلي رايدها ؟؟؟؟؟؟؟

سُراج
لا

جبُر
ولالـة التولول ضلوعك تولوِل جـااا ليش تتملعب هـااااا ؟؟؟
رجـال رايدهـا واجة طلبها اعلى سِنة الله والنبـي تتملعب هجي ليش ؟؟؟

سُراج
جَدي تـرة هوَ لا خطيبها ولا رجلها ولا قريبهـا ويتحكم بيها هوَ لو شايفهة وي واحِد غِريب هم مالة حگ يجي ويحجي ويـاهة مو نوبّ وي ابـن عمها

جبُر
ولكم الله اكبر الله اكبرررر
احجي ويـا هجي يكلي هجي
رجـال اجة خُطبها لو ما اجة احجي

سُراج
ايّ جدي اجة اجة

جبُر
وانطيناهُم احنـة رفُض، رفضتي انتِ شمِس ؟؟؟؟

جاوبت بـ لا

جبُر
اذًا هذهو، الولد حط براسة انُ اكو أمل واحنة مانطيناهم الرفض، انة شخصيًا شيخ جبُر مـا انطيت رفُض بوية، كلت الوكت مو مُناسِب هسة ابوها ستوة مَيت وما متخطية البِت وهذا حسب كلامهـا هيَ طبعًا، فَ تجون انتم تتمشون بين خلگ الله وحاطين اديكم ب ادين بعض شني ومن يمتى هـااااااي انتوا هجي ؟؟؟

هوّ يحجي ويباوعلنة بنفس العَصبيـة، دموعي نزلت بهدوء واحس روحي بموضوع حَيل موحلو ..

سُراج
جَدي من تحجي احجي وياي انة لا تحجي وياهة هيَ ترة هيَ ماراضية حالها من حالكُم

علي
انة ادري هيَ شعليها ابنكم مخبل

امير
يعني قابِل تتعارك ويـا شتدري بسُراج انتَ يا جدي يعني والله ما تتعتب البِت احجـوا ويا هوَ

سَجاد
انة ادري هوَ انة اخو وبطولة واذا عاط بيـة مايسكِت هوَ سُراج ينكدراة

سُراج
وانة جاي اكلكم احجوا وياي انة ترة والله عَجيب هيَ شدخلها شدخلها

خليت وكمِت وصعدت ابجي
كُلة من ورى كُلة من ورى ..

جبُر
ولك شحاجيك هسة شحاجيك

سُراج
شتحاجيني حاجي هوَ ابو النسوان يحطها بحلك النسوان ابن الـ هو لو بي حظ وحظ جان اجاني وحجة زلمة لزلمة بوية جا شني انتوا مو ما كتولي لا بس عبنّة ضعيف شخصية ونسيواني

صالحة
لا والله والله يعمي ولد جبُر كِل الزلم نسيوانين بس انتوا زلم حوك

سُراج
وغصبًا اعلى اليرضى والمايرضى

حَسن
صوتك لا تعلي بوجه امي

جبُر
انتِ شكلتلج مرت مجبِل

صالحة
شكلتلي والله استحيت نوبّ هذا يغلط وسمعتة اكيد
تكلي دادة جا انتوا املتوا الولد وكلتوا بعدين يصيـر خير ليش وابني عمها اليوم يفتر وياهة بالكلية ولازم ايدها

سُراج
هه سوتها يفتر وياهة بالكلية

حَسن
جااااا الناس تقول وتئول شتريد يحجوها نفس ماهيَ

حسين
وهَسة انت ماخفِت اعلى سُمعتها بالكلية تـرة والله زايدة منك يبوية زايدة

جبُر
لا وفوك كِلشي اكلة تريد بت عمك يكلي لا
ابـن الاوادام جا المن تتمطين ويـاهة

سُراج
استغفرالله حسستوني شمسوي انة

جبُر
لا يابوي صدِك جذبببببب لازم ايـدددددها شمسوي، بنص الكلية وحاط ايدها ولازِمها، حفيد جبُر ابن حَسن يفتر وي حفيدة جبُر بت حسنين ويفترون بالكلية، ويـن العِيب بالموضوع ويـن الفِشّل !!!

ولك انتَ لو عدك عقِل جا ماسويت هجي
لو عدك غيرة اعلى بت عمك جا ما أذيتها بهشكل هذا
موهسة كِلها تضل تحجي اعليها ويطلعوها طابة بعلاقة وياك
بعد شجم يـوم واحد يجيها شو شني ويسال اعليها شيكلولة؟ تفتر وي ابن عمها بالكلية ولازم ايدها هسة هذا طيرتـة بلة الباقين هم تطيرهُم

سُراج
طُززززز بالكِل بلا استثناء مو بحالهُم هيَ

جبُر
والله يعمي زيـن كونك رّجـال انتَ اخذها جـا

سُراج
جَدي شبيك شبيك سويتهـا بايرة شبيك

جبُر
ولك انة الشبية انة الشبية ؟؟؟؟؟

حَسن
مايفتهم وعلي مايفتهم اثول طلع

سُراج
لا تكول اثول بوية

حَسن
وغبي هم
ارد افتهم انتَ شني نيتك مادري لو حاجزها الك نكول حگة سوة هجي من الغيـرة يغار اعليهـا بس انتَ شني عذرك هـا شني ؟؟؟ شو لا تطيقها ولا تريدهـا والي يكلك تريدها تكلة لا بعد شني ؟

سُراج
هجي اعلى چيادة اعلى چيادة

حَسن
استغفرالله ولك بوية انتَ شبيك مُراهق واكعد افهمك بيك شبيك

سُراج
بوية انة فااااااااهِم فاهِممممم

حَسن
بس احنة ماجاي نفهمك وماجاي نفهم طفولية تصرُفك هذا

جبُر
هوَ ما مستوعب لويـن يودينا وعلي مجبِل ماعدة مانِع ينتقم شلون هوَ ضام اعليَّ شلون انة اخذت صالحة غلب مغالب اعليّ خصوصًا

سُراج
بي حظ خل يسويها وانة اعلمة والله اسحگ اكبر شـارِب

علي
وعلي اسحگ راس اليجيب طارينة لو طاريهـا شني هيَ تايهة؟

جبُر
عفية عفية بـ اولاد حِسن عَمي دولة وعلم دولة وعلم

سَجاد
احنة الدولة كِلها
انة وعليوي القانـون و سُراج الصحّة

زّعيم
هذا بعـدة مرحلة اولى وعدة روحة رئيس العراق

سَجاد
جا شني الـ حَيدر العبادي احسن مني مثلاً ؟؟

جبُر
لايابوي وين احسن منك ويـن جاي اكلكم اولاد حِسن دولة وعلم

علي
اعلى راسنـا شيخ اعلى راسنـا

حَسن
گرت عينك حِسن صدك مرت عينك

شَمس
جِنت فوگ ابجي وجنت حَيل مهضومـة من نَبرة جـدو و بيبي وياي

يعني اني شدخلني شدخلني، هاي ستونـة كلنة يا الله و اول مرة اني ويـا هيج نصير ونحجي بلُطف كُبل صارت هسالفة

كُلش ضجِت بوقتها خصوصًا من بيبي الي حاجتني بهيـج نبرّة

ضليت كاعدة بمكاني شويـة واجتني سيوف وسَبب
شوية ونزلـوا
راسلني سُراج ع الخَط

سُراج
وخري البلوك من الواتساب

وخرت البلوك لان جان بنفسي انُ ارزلة ع السوى
شَمس
هـا ارتاحيت من بعَد الي صاررر !

بسرعة شـاف الرِسالة
سُراج
شفايدة هل حجي متكليلي ؟
لا تضلين تنترين بوجهي شَمس ترة الي بية كافيني

شَمس
ايّ جدًا كافيك شفت شصار حبيتة؟؟

سُراج
لا ماحبيتـة وانة اعلمة لهـذا الحقير الا اعلمة شلـون يتملعب وياي هجي
وانتِ ماعليج كافي امي عصبت وحجت هجي لا تضلين تبجين وانزلي اكلي

شَمس
لتسوي روحك مهتم ماعليك بيـة

سُراج
شَمس شبيج

شَمس
مابية بس عوفني

سُراج
خوش براحتج..

راح هوَ و اني جِنت حيل ضايجـة مو شلون ماجان
محَد دز علية عكِس كُل مـرة جانوا يسبوني سبـاية جدو وبيبي وعمو حَسن، هل مَـرة ولا واحد حاجاني

حَسيت روحي صدك انكسرت بهـاي المَرة، شوية وسيوف صعدتلي اكِل وصعدت

سيـوف
هاج يلة اكلي شبيـج سادة حلگج

شّمس
محد سئل علية؟ شو حسسوني اني لازمة ايـدة شسالفة

سيوف
يوووه شَمس بيبي صالحة ضاجت هيَ تحب بيت اخوها وبيت اخوهـا كاتلين روحهُم اعليج وهيَ حتى مواعدتهُم

شَمس
بس اني ما أملتها سيوف

سيوف
ماعليج بيهة هيَ تُرضى بيبي ماتشيل على احد مونوب عليج

كعدنـة ناكِل اني ويـاهة
شوية وراسلني سُراج

سُراج
عدج امتحان باجُر؟

شَمس
لا

حَط اعجاب على رسالتي وراح، اني هم خليت ونمت لان جنت حَيل زعلانـة منهُم

كعدت اليـوم الثاني بدلت ونزلت صبحت عليهُم بـ برود وكعدت وهُمّ هم عكِس كل مرة ضلوا ساكتيـن

ما اكلت لمن شفت الوضعية هيج ولكمة ثنين وخَليت وكمِت
وطبعًا لاحظت حَتى وي سُراج هيج موبس ويـاي

هٌواي ضجت بسبب الي صـار ودموعي تكومن بعيوني
ضَليت منتظرة اميـر برة
الهوى عـالي وعيوني محملات دموع
اجة هوى بشكل كُلش عالي واحسة صار ع وجهي ودمعتي نزلت

مسحت دمعتي والتفتت حتى احمي نفسي من الـ هوى شفت سُراج جاي بـ اتجاهي

تقدم نحوي واني رجعت درت وجهي
سُراج
آسـِف شَمس

شَمس
سُراج روح حبـاب

سُراج
والله ما عبالي هجي يصيـر لا تزعلين هلگد امانة

شَمس
انتَ ماشايفهُم شلون يعاملوني ؟

سُراج
استغفرالله ..

تنهـد وماعرف شيحجي

سُراج
هسة انة احاجيهُم والله مو وضع هذا يعني انتِ شعليج صدِك

كال هَيج بعصبيـة وراد يرجع طلع اميـر

امير
هـا شكو

سُراج
ارد احاجيهُم شبيهُم وي البت

امير
دمشي امشي عوفهـا زّعيم يحاجيهُم مو انتَ

سُراج
امير شو وخر

امير
ولك خوية شبيك اسمع الحجاية لمرّة وحدة شجاك اصعد هيَ دنيا ثاگبة

سُراج
ايّ ادري ثاگبة شمسوي انة؟؟

امير
دمشي رحمة لربك
شمسوي كال امشي سُراج
هسة اليسمعك يكول مايميز الصح من الغلط
انتَ تعرف وتعرف الصار غلط بس ماتريد تعترِف

سُراج
امير والله مالي خِلك من صُبحيات الله

امير
ولا احد الة خِلك لذالك جاي اكلك روح
ومن نرجع نتفاهم يلة خوية يلة

باوعلي وتنهد

امير
ماعليك بشمِس يمي روح

سُراج
زيـن شّمس

امير
ولكككك وكتنـا راح امشي
يلة شَمس امشي هاج فتحي سيـارة

اطاني البصمة رحت فتحت السيـارة وكعدت
شفتة من بعَيد يحجـي وي سُراج وسُراج جان حَيل معصب
مبين جان ديحاول يقنعـة اخـر شي قنعة
قَبل لا يصعد باوع الي بنظرة حزينـة درت وجهي عنة

رحنـة للدوام ورجعنـا نفس الروتيـن بس جدو جـان يحجي وياي عادي اما بيبي ف جانت مغلسـة عليَّ

حتى ما اكلت خليت ورحِت نمت
للعصُـر كعدت على اصوات حَيل عـالية

طلعت من غُرفتـي وتقربت من يم الدرج سمعت صوت سُراج وهوَ يصيح

سُراج
انة اخذهـااااااا واريد اشوف ساقط ابن ساقط يحجي اعليها الا ادوس اعلى راسة وحق علي الكرارررررررر گواوووويد عديمين شخَصية، اللسان الي يجيب طاري شَمس اگصة واشمرة للچلاب كائِن من يكُن
يُتبع.........

___________________

روان

صباح يوم الثالث كعدت من النـوم وانة حالمة بالحجية مَيتـة كعدت مخروعـة وخايفة غسلت وفتحت موبايلي حَتى اخابر مروان

خابرتـة مارد راسلتة ماعندة انترنت، فتحت الفَيس هجي بدافع الفضول وجـان انصدم گدامي بـ منشور
اعلام قبيلـة آل دحام
بنشر صورة حِداد

اعلام قبيلـة آل دحـام
بِسْمِ اللهِ الرَّحْمٰنِ الرَّحِيم
﴿ يَا أَيَّتُهَا النَّفْسُ الْمُطْمَئِنَّةُ، ارْجِعِي إِلَى رَبِّكِ رَاضِيَةً مَرْضِيَّةً، فَادْخُلِي فِي عِبَادِي وَادْخُلِي جَنَّتِي ﴾
بقلوبٍ مؤمنة بقضاء الله وقدره، تنعى قبيلة آل دحّام فقيدتهم الغالية امرّة الشيخ دحّام (رحمها الله)، والدة الشيخ مروان آل دحّام، التي وافاها الأجل في صباح هذا اليوم.
وبهذا المصاب الجلل، تتقدّم قبيلة آل دحّام بأحرّ آيات التعازي والمواساة إلى الشيخ مروان وآل الفقيدة جميعًا، سائلين الله العلي القدير أن يتغمّدها بواسع رحمته، ويُسكنها فسيح جناته، ويلهم ذويها الصبر والسلوان.
إِنَّا لِلَّهِ وَإِنَّا إِلَيْهِ رَاجِعُون

من شفتهـا فتحت عيوني ع وسعهِن حَسيت روحي بعدني نايمة، اريد استوعب شي ماكدر استوعبـة بَس دموعي صـارن ينزلن من الخرعة والصدمة الي عشتهن

شنـو شلونننننن ليششش !!
نزلت بـسرعة واني بس اريد افتهملي شي، انصدمت بـ وجود الحجية يمنـة وامي صالحة وامي ومرت عمي والبنات كاعديـن يمهة

روان
هـاي شنوووو شصايرررر ليشششش ما مكعديني

فضيلة
يمة ليش يخرعوج يَ يُمة انة كتلهم لحد يكعدج يحبيبَة

باوعتلها تون وتبجي وتلطم اعلى ايدهـا رحِت يمهـا وانة احاجيها
روان
حجية شصـار شلونن ماتت شلون؟؟؟

فضيلة
ولـج يُمة مروان منيمها يمنـة وما عافها ولا لحظة ولج كعدنا لكينـاهة شانقة روحها بالغرفة طبينة اعليها لكيناهة ميتة

شهگت من گالت هَيج ودموعي تنزل حَيل

روان
جا والشيخ والشيخ

فضيلة
الشيخ يكول العمل جبيـر وسيطر اعليها العمل خبيث يُمة خبيث روحي من الله لا يطيج مرادج يسعاد والله يحرمج من النفس التتنفس عبنج فرگتينـا هجي

كالت هجي وهيَ تفتح دشداشة صدرهـا وتبجي

روان
ومروان حجية شكال مروان

فضيلة
ولج شكال مروان شكال حضنها ومجلب بيها، اميمتة بنهاية اميمتة صح موزينة بس اول وتالي اميمتـة اخذوه هسة الشرطة بالسجِن

روان
ليش حجية ليششش

صالحة
يُمة بعتبـارة هوَ وياهة بالبيت يكون مُتهم اكيد لا تخافين هَسة علاوي يطلعـة

من گالتلي هجي احس گلبي تعلگ يم مـروان كمزت بسرعة وادور على موبايلي

روان
موبايلي ويـن وينننن

سيوف
مانزلتي هسة اجيبلجيا

روان
بسرعة سيوف بسرعة

راحت سيوف جابتليـا واجتي واني عيوني ما نشفن من الدموع خابرت ع مروان بالبداية مارد خابرت ع علي شوية ورد

علي
هلا بابا

من يكول علي هلا بابا معناهة يمة احد
روان
علي مروان ويـن حباب

علي
ماكوشي لتخافون بعدين نحجي

روان
علي حباب بالي يمة احجي كِلي ايّ شي

علي
بعديـن
ايّ نعم حبيبي، ها يلا جايكُم
يلا يلا بعدين نحجي

سَد الموبايٰل وانة مافاهمة ايّ شي
ضلينـة كاعدين ونبجي ومانعرف شنسوي حَتى

مهمّا سوت وياي اشياء سيئة ومهمّا سبتني وأذتني بس ماكدر ما اتأثر بـ الي صار لان الي صـار حَيل مُرعب ومُفاجئ للي يعرفها والمايعرفهـا

بنهاية مرت دحآم الها صيتها بين الناس بتفخفخهـا وذهبهـا وطلعاتها ومشياتها، جانت اذا تروح واجبة لناس يعرفوهُم ما تطلع الا تطي ٣٠٠/٤٠٠ الف وتطلع
جانت تحِب تثبت روحهـا حَيل، وكِلش تهتم لنفسها بحيث الي يشوفها مُستحيل يصدك هيَ ام مروان، على كد ما معتنيـة بروحهـا ..

فَ موتتهـا بهاي الطَريقة جانت موتـة حَيل مؤذية

اجـة جَدي والولد بس اجوا ناس وياهُم كومـة طبوا للديوان، من شفت الناس تجي اعلينـا اهنا عرفت وتاكدت انُ مروان بعدة بالسجِن

گلبي صـار يمة وعيوني ما نشفن من الدمع ضليت بس ابجي وسَبب وسيوف وشمِس يحاولن يواسن بيـة

شويـة وطب زّعيم للمطبخ لابس دشداشة سودة وحاط جماغ اسود اعلى متونـة راد ياخذ الجاي

لان احنة معلمات اول مايجي واحد كُبل الجاي ينحط شوية يجون ياخذونة

زَعيم
البقية بحياتج

روان
زَعيم حباب مروان ويـن

زَعيم
بالسجن

روان
لِسة!!!!!

زَعيم
روان صعبة يطلع حتى كفالة ممنوعة، حاليًا محَد يحق الة يطلعة ابد لا كفالة ولا ايّ شي ننتظر تقرير الطب العدلي يـلة تثبت برآئتة

روان
والطب العدلي شلون يستنتجون خـاف يلغمطوها ويطلعون مروان الكاتلها

زَعيم
لا شلون هجي
يشوفون جسمهـا بيها آثار مقاومة يشوفون اعضائها هُمّ يعرفون بس السالفة شوية تطول الها يوم ثنين

روان
اااااه ومنـاا لذاك الوكت مروان يضل بالسجن

زَعيم
مادري روان مادري
علي كال انة اشوفهة وبعـد مادري
خل نحتـار هَسة بالناس والله كَريم

روان
وقراية نسوان شلون؟

زَعيم
شوف هاي بوية يا قراية نسوان غير البيت كِلة مطوق
هَسة خل يطلع رجلج منها بسلام الباقي هَين

روان
يا يُمة شلون بيـة يا يُمة
فوك موتت امة بهالطريقة فوك مـا هسة هوَ بسجِن
زَعيم حباب طلعوا حباب

حجيت هجي وانة ابجي وعيوني ماشوف بيهن كد الدموع بهل اثنـاء طبوا غَيث وسّجاد

سَجاد
شبيج روان كولي يالله

اجـة سَجاد تقدم صوبي حَسيت عيوني بعد ماشوفن بيهن و وكعت رأسًا اعلى راسي

حَسيت بـسجاد لمن شالني وحَسيت لمن جانوا ينادون بـ اسمي ويضربون اعلى خَدي بس احس جسمي ما يعيني حَتى اكوم ابد

ماجنت اشوف كدامي غيـر مروان، احس روحي وكلبي وعقلي يمة، جنت اهمِس بـ اسمة وماحس غير شفتـة وهوَ جان يبجي وكاعد وحدة

احس نفسي متت وفزيت بسـرعة من الحلم مخروعة تنوعت داير مدايري هِنّ وسّجاد

سَجاد
ولج روان شبيج

روان
وين مروان ويـن

كمت اعلى حيلي واني مصدومة واحس روحي بـس اريد مروان

سَجاد
مروان بالسجن روان اطي صبُر هسة شوية ويطلع شبيـج

جنت ابجي وما مقتنعـة بحجية واكلة الله يخليك وديني لمروان، وكإني بعـالم ثاني مابي غيرنـا

كوة هدئني سَجاد وكعدت بحضن يُمة صـالحة وابجي عليّ
كِلش خايفة عليّ كِلش، هـاي اسوء فترة مُمكِن تكون مـآرك عليّ وشلون بي شلون هسة هوَ كاعِد وحدة مـادري

ضَليت بس افكِر بي وابجي جابن مُلا تقرا اعليهـا والزلم جـانوا مسوين فاتحـة كاملة

لليل تقريبًا اجـة علي سئلتة على مروان گالي زيـن بس لباجر يلة يطلع التقرير الطبي يلة يطلع

روان
علي حبـاب خل يطلع اليوم بكفالة ب ايّ شي

علي
حبيبتي يعني انة منخي اعليّ مثلاً؟؟ اذا مو اعلمودج انتِ بس هاي سالفة مابيها تملعب ابددد، ولتخافين هيَ ليلة وحدة شني قابل مروان مايتحمل، هوَ السجِن للزلم

روان
بس علي شلون شلون هوَ اكيد كلبة مكسور هسة من سعدية وخبر حملها الجذب لـ مرضة امة وتعبة وياهة لمصايب نسوانة نوب امـة تموت والله بالي يمـة

حضن وجهي وباس راسي
علي
كافي حبيبتي صدِك تحجين شمسوية بعيونج الحلوة انتِ لاعبة بروحج جولة تـرة، كافي باجِر مروان يمج
يا منعولة اثاريـج تحبي هلكد ويمي تصيحين اريد اطلك شني تخافين من العّين

روان
علي انة ماشاقة والله اريد مروان والله

صَفية
يـا خايبة شمالج زعطوطة انتِ تردين مروان جا منين يجيبولجيـا ما تكليلي للصبح ويجيج

فضيلة
خايبة لا توگعين فوك الضيم ولج روينَة، كِلساع والمسكينة خرت و وگعت

صالحة
تعاي يُمة حبيبتي تعاي لحضني وين رايح مروان الصُبح يطلعلج تعاي يمي تعـاي

فتحتلي حضنتهـا وخرت عن حضن علي وانة اشهگ بالبجي ردت اروح لبيبي الي جـانت گاعدة بـ نهاية الصـالة ماتحملت و وكعت

احس دوخـة براسي موطبيعية، وماجاي اتحمل امشي شوية، معّ انُ وعيي جان موجود بس احس رجلية ما عانني حَتى اوكف زايد من كد الدوخة الي جـانت يمي

علي ضل يحجي عليَّ لان ما ماكلة شي غير شويون خُبزة اكلت، وكال لسيوف تصبلي

صبولي اكل وكعد علي يوكلني غصبًا ماعلية، وسُراج قاسلي ضغطي ٩/٦ حَيل هابُط

سُراج ضل يحجي علية ويكِلي زين من تمشين اعلى رجليج اعلى هجي ضغُط

راحوا بنُص الليل جابولي مُغذي مـالح وادوية ومدري شنـو

شدلي سُراج كانولة وعلي يم راسي گاعِد لازم ايدي لحظة ما تركني

المُغذي شوية خلاني استرخي وانام كد التعب الي جِنت بي

فزيت من نومي وانة انظق بـ اسم مروان تنوعت لروحي بغرفة جدي وبيبيتي والساعـة بـ ٣ الصُبح

كعدت ابجي على مروان، حاولت اتصل بي ماكو محَد يرد

عيني ماغُفت ولا جفت ابـد من الدمِع، وضليت منتظرة علي حَدمـا كعد، من شافني صُفن علية وضل يرزل بية لان مبين من شكِلي مانايمة

علي
عمي رايح اسوي المُستحيل اطلعلجيا واجي صدِك جذِب شلاعبـة بروحج انتِ ارد افتهم

روان
علي والله كلبي يمـة حباب شوفليـا

علي
يلة هسة اروحن واستعجلج بكلشي بس ماريدج تبجين كبل الظهرية هوَ يمج خوش

روان
هواي علي هواي

علي
حبيبتي اصبري شوية، امس كلة انتِ صابرتة ضلت اعلى هاي الشجم ساعـة؟

ضل علي يوصيني اعلى نفسي وكعدهُم كلهُم كعدوا وهوَ خلة وراح، ضليت اون وخايفة عليّ

كلهة تكلي لا تسوين هجي وهَسة يطلع بس انة احس ماكدر كلبي ما يخليني ابد لان ادري شكد مآلوم( متألم) هوَ هل ايام هذني وادري بحالتة شكد صعبة هَسة

ضليت انتظر علي وكِل ساع اخابرة وهوَ يفصل بي احس خبلني بالازيد وزيد بجيي اكثر

جَدي من شافني هَجي مال لزَعيم يخابـرة، صاحني اجي يمة حاول يحاجيني ويفهمني بس انة جنت قافلة

جبُر
ولج جدي شعليّ بس ارد افتهم شعليّ ولج روان شاف ماشاف تصعب اعليّ هايّ

روان
جـدي انتوا متدرون متدرون مروان بشنو مـآر هل ايام ماتدرون، الله يدري شنو حالتة

جبُر
جدي جا هوَ رجال يتحمل لا تخافين اعليّ مروان رجال قوي ويعديها هل محنة هاي بحيل الله واهل البيت بس انتِ كافي مردتي روحج مرد كافي يبعد روحي كافي هديتي حيلي

صـار يمسح بدموعي وانة ابجي اكثر رد علي ع زّعيم
زَعيم
هاي خبصتنا خبص يمعود ويـن صرتوا ؟؟

علي
تبجي لسة؟ صدك جذب عمي ماكدر احجي والله هسة اخابرها هسة

ووان
اطيني خل احاجي زّعيم حباب اطيني

اطانيا زَعيم حجيت ويـا
روان
ها علي حباب وين

علي
ولج حبيبتي كافي صدك تحجين ماردة روحج هجي هسة والله هسة استلمت تقرير الطبي ثبتت برائتة هسة ها اها بوجهي للمركز اطلعة واجيج

روان
كول والله

علي
والله العظيم هاج هسة اوديلج صورة ماكو ٤٠ دقيقة واحنة يمج

روان
هواي علي هواي

علي
رونة حبيبتي اجرلج طيارة واجيج لو شلون انتظري بوية انتظري

سـدة علي وكابلت الساعة وكعدت انتظر دقيقة دقيقة
صـارت نُص ساعـة تقريبًا تنوعت سيارة علي صارت بالباب
احس روحي فرفحت

كمت وكفت بسرعة وانة منتظرة مـروان ينزل، اول ماشفتة نزل فزيت

طرت بسرعة بـدون ماحسب حساب ايّ شي ولا اسمع اصواتهم الي وراي

فتح علي الباب وطبوا وانة يم باب المطبخ
دموعي جـانن ماليات وجهي ملي
والكانولا بـ ايدي
وشالي محطوط بـ اهمال علية

تنوعلي مروان من بعـيد
اتنوعلة التعب مالي عيونننننة ملي
مووو ذاك مروان ابـددد
اول مـرة بحياتي اشوف وجهة

ركضت بسـرعة الة سمعت علي مَدري شنو گالة، تنوعلي بـ استغراب وتقدملي بـسرعة

صرت يمـة تعلگت برگبتـة بسرعة وحضنتة، وكانهُ ماكو بهذا الكون غيري انة ويـا نسيت كِلشي داير مدايرنـا وضليت حاضنتة حَيل وابجي وبالمُقابل هوَ جان حاضني اقوى

ماجان ينسمع شي غيـر صوت الهوى وصوت تنهيداتة وصوت بجيي

وخرني عّنـة وهوَ يتنوع لوجهي بـ استغراب وتفحُص

مروان
هـاي شمسوية بروحج روان
هاي شني هاي المن ليش حاطة كانولة
علي كالي تريدك بس ماكالي هجي حالتج

روان ببجي
مروان خفت عليك خفت عليك هـواي والله

مرر ايـدة على وجهي بتعب وتنهـد تنهيدة عميقة وبيها رجفة جبيـرة
حاوط وجهي بـ ايدة وكالي بـ كلام كوة يطلع منة

مروان
هموم دنيا كِلها فوك راسي انة، لا تصيرين هم زايد اعلية كونيلي قوة استمدهـا روان

روان
ماكدر اشوفك هجي واصيـر زينة ماكدر مروان

ابتسم ابتسامة كادت تنعدِم ومتنشاف ومسح دموعي بـ ايدة

مروان
ماريدج تبجين ابد عيونج هذني لا ترهقيهن فصعونتي

حضني اعلى كيف و وخر اندارينـة محد جان موجود
طبينـة لجوة ضل واكف ماقبل يكعد كال وراي هواي اشيـاء
تنوعلي وگالي بتردد
مروان
ترحين ؟؟

روان
اكيددددد شلون اعوفك وحدك

حجيتهـا بصوت عـادي
ابتسم بهدوء وانداريت لكيت الكِل مبتسم وينفس الوكت الكِل مستغرب من عُمق علاقتنـا المحد يدري بيهـا رُّبما حتى احنـة .

رحت بدلت بـسرعة ورحنـة
زَعيم كال انة جاي وراكُم حتى يجيب سَبب ورَحمة وامي والبنات يمنـة

رحنـة للبيت محَد جان بي حَتى كوكي رايحـة للشركة الي جبناهة منهـا

امي صالحة ماقبلت اطب للغرفة ولا قبلت تخلي مروان يطُب الهـا معَ انُ حاول هواي بس ماجانت تقبل

صالحة
يمة لا تنداسون عوفوهـا الي بيكم كافيكم انتوا

مروان راح حَتى يسوي مراسيم الدفِن والولد كلهُم ويـا ماعافوا ثانية وحدة

احس البيت كِلة ياكلني واحس جدرانة خانگتني خنگ،

رَحمة
افتحـوا قران بكل غرفة من غرف البيَت واني راح اقرة بهاي الغُرفة بالذات

فتحنـة قُرآن بكل غرفة من غُرف البيت بس المُفاجئة انُ كِل ساع يصير شي، ساعة الموبايل يطفة وحدة ساعة يبين وكانهُ مخلص شحن، حتى موبايل شَمس الايفون حرارتـة صارت فول

شَمس
اني ماضل هنانة بعد والله اخاف بنات خل نخابرهُم يجـون والنبي كل شي بهل بيت موطبيعي

صالحة
يمة ولجن سمن بسم رحمن شجاجن

فضيلة
لا دادة صدِك حجيهن خل يجونـك خل نروح لذاك بيتنـة عمي اخيرلنة واحسن النة

صالحة
لاحجية خو يمنـة اعليمن

فضيلة
لا دادة احنة ناسنـا تجي شو شني خل نروح لذاك البيت واذا رادوا الزلم يجون هنـانة

خابرنـا سُراج وسَجاد اجوا اخذونـا لذاك البيت، من طبيت حَسيت روحي شويـة ارتاحيت، مُستحيل شعور ذاك البيت شكد يخنگ اعلى گولة يُمة صالحة الله اعلم شدافنات وشمسويات

سوينـة قراية نسوان ع حسب الاصول، والزلم سوهن بـذاك البيت، لليل تقريبًا رجعوا الكِل، رادن يبقن يمي هنّ بس اني ماخليتهن لان ادري بيهن ما مرتاحات ويخـافن

اجـة مروان بليل طب جـان لابِس دشداشة سودة وعگال اسود كال ليش وشلون رجعتوا حجينـالة ع الصـار

مروان
والله انتقم منهن وحدة وحدة
هنّ نسوان وانة رجـال بس وحق الله الا انتقم منهن اعلى السونة بية، انة مروان ال دحام هجي يصيـر بية بسبب نسوان انة ؟

صفك بـ ايدة وگال بحسرة
مروان
لا والله ياحيــف ياحيــف اعلى الزمن كون نسوان يلعبن بية هجي، بَس خل اتفرغلهن والله اراويهن انجوم الظهر بعيونهن

فضيلة
ولك يُمة انتَ مو كتلي بليل صارت شويـة زينة

مروان
حجية يا صارت شوية زينة حجية هه
ماريد اخوفجن اتسودنت اعلية بنص الليل حجية المَرة كام تنهش بروحهـا نهِش مرتين تكوم للمطبخ وانة وياهة والثالثة حطت سجينة اعلى ركبتها كوة اخذتهـا منهة، تـالي نيمتها گوة واطمنت اعليها وكلت خل اجي اطمن اعليج مادري شلون غفت عيوني مادري شلون نمت مادري

فضيلة
اذا صارلك يومين ماشايف طعم النوم ي يُمة

مروان
واذا حجية واذا اخ انة جاي اكِل بروحي اكِل من داخل انة لو يمها جان حسيت بيهـا جان سمعت صوتهـا اكيد اختنكت اكيد باللحظات الاخيرة حست اعلى روحهـا

روان
مروان هاي ارادة ربك، ربك كاتبلها بهل يوم تموت لا تلوم روحك

مروان
لا انة السبب انة لو ما عايفهـا جان ماصار بيهـا هشي

روان
بس انتَ خفت اعلى بيبيتك وحگك والله تصيـر ويامن شلون بس كلي انتَ

مروان
ااااااااااخ منظرهـا ماجاي يروح من بالي، اصفن اعلى عباس، اعلى احمَد لو اعليها هيَ ؟ شصابنـا احنة وشلون تفككنـا هجي شلون

تنوعت الحجيـة وگالت بحسرّة
فضيلة
هـاي اللعنة، لعنـة آل دحام

مروان
شني قصدج حجية

فضيلة
ولاشي يُمة كوم حط راسك ونـام كوم الي بيك مكفيك يبعد امك كوم

انة جنت جايبة شجم غرض النـا، طب مروان سبح واجينـة لغرفتنة الي هيَ غرفتة سابقًا

مـروان جـان مهموم بشكِل
حط راسة اعلى التـاج وكعد يفكر
مروان
ويـن جنة و ويـن صرنـا، كِلشي تغير كِلشي

روان
كِلشي مرتبط بية احس انة السبب بكِلشي

وخـر راسـة من ع التـاج وتنوعلي بـ انزعاج
مروان
لا تدخلين روحج بهالشي، انتِ مالج دخّل احنة مدري شصـابنا مدري من ايدنا، من ايدنـا والله من ايدنـا كِلشي صار من ايدنـا بس شبيدي اعليهُم انة شبيدي ؟
كِل واحد يروح ينچل نچلة بگلبي ويروح
مـادري اصفن اعلى ابني الطلع ماكو ؟
لو اصفن اعلى امي الراحت
لو اعلى اخواني ؟
روان انة تعبـان
يعِز اعلية اكول بَس والله انة تعبـان صدگ تعبـان

من گال هجي گالها بتعب واضح رحت يمـة حضنتـة وكتلة
روان
انة يمك مروان انة يمك والله ماعوفك ابد مهمّا صـار

مروان
ااااااااااااخ اااااخ روان اااااخ يانار گلبي

صـار يطلع الـ اخ بصوت بي رّجفـة وصار داحِس راسة بجتفي بقوة، وكانهُ راد يضم كِل تعبة بية

مروان
ودي اخذج انتِ والحجية ونكعد ب بيت صغيـر واشرد عن كِل الناس تعبت روان انة تعباااااااان، اقسُم بالله يعز اعلية بيني وبين نفسي اكول بس لاول مـرة اكول تعبت تعبت ..

ماجان يهونلي اشوف مروان بكميـة التعب هـاي، ولاول مـرة صرت انة ابادر بكِل الكلام الحلو والي مُمكِن يهدئة بس في سبيٰل شوية يهون اعليّ التعب

حط راسـة ع المخدة وصرت امسدلة براسـة، شوية وثگل نفسة ومبيـن نام كمت توضيت وصليت، اندعيت من ربي يهدي نار گلبة شوية عاد

مرت ٣ ايام ع الفاتحـة ومروان جان عِبارة عن جثة ويمشي، وانة يوم بعد يوم جسدي يتعب واصيـر تعبانة اكثر ..

خلصت الفاتحـة ومروان جان كاعد لا يمشي منا ولا منـا مُجرد ناس يجونة يطلع يمهُم وهُمّ هم يشوفوا ويشوفون حالتة ما يطولون يمـة ويرحـون رأسًا ..

مروان اساسًا عندة معارض مـال سيارات هذا غير موارِد گيعانة، وكلهن مسلمهن لنـاس ثقة، وجان يومية يروح بس بهل ايام عاف كِلشي وكام مايهتم لشي، حجيت ويـا يكلي نفسيتي تعبانة ومالي خِلك ابد، حجيت وي علي كال اذا حاجاني هوَ اخلي سَجاد يجيك يومية انة ماكدر لان ملتهي مونفس سَجاد

حاجيتة ماعارض وصدك والله سّجاد كام يدير بـالة اعليهن، امـا الناس فَ ما سكتوا ابد، الي يكول عشگ بيت جبُر ودمر روحة، والي يذب الصوج بية، والي يكول ضعُف شخصية منة هوَ الدمر روحة والحجي جان يزيد ما ينقص وجان اغلبـة يطلع من بيت سعاد ..

مروان راح لبيـت سُعـاد وحاجي وياهة حَتى هيَ ومحاجيهُم بـ صريح العِبارة على سحورتهـا ناكرة مسوية كايل الهـا مروان ابـد لا تنكرين ولا تحاولين تلغمطيـن السالفة ومهددهة وجاي ..

يـوم من الايام حبينة نتغدة شوية بـرة الحجية كالت مختنگين، فَ فرشنا فراش وطلعنا بالطارمة نتغدة، وفجأة حَسيـت معدتي گُلبت ونفسي كام تلعب، تجاهلت الوضعيـة بس شوية حسيت روحي اختنگت وبعـد ماگدر، كمت بسـرعة للحمام الي جـان برة

هـذا الحمام من طبينـة لِسة محد طبلة ولا واحد استخدمة لانّه بعيد عن البيت شويـة

اول مافتحتـة انصدمِت بـ ..... يُتبعععع
انتوا مـو جاهزين للرُعب ابدًا
ياترى شنـو هاي اللعنة الي صابت ال دحام
وشنو هوَ سببها او مُسببها ؟
هذا الي راح نكتشفة اني وياكُم بالبارتات القادمة
دُمتم بخير ..