بيت جبر الفصل الخامس وستون 65 - بقلم هُدىٰ آذار

مَســاء الخير
ورجعنــا وياكُم بـ بارت جديد من قُصة
بيَت جبُر
للكاتبة : هُدىٰ آذار
لاتنســـون التصويت والتعليق بين الفقرات
قِراءة مُمتعة.
____________________

بّس حبيت اذكركُم انُ
رِوايـة بيـــت جبُر تلتقُط إنفاسُهــا الاخيرة ..

روان

ماقبل ابـد اطلع ويـا ادري بي يخـاف اعلية وبنفس الوكت الدنيا الليل رحت يم الحجية جانت نايمة وهوَ طلع
شويـة وماسمعت غيرر صررررخة مروان الي رجت الدنيـا رج

هوَ اني سِمعتة صاح وهوَ انة طرت بـسرعة ليه

روان
يُمة مروان يُمة شصارررر بيك

طلعت من البيّت واتجهت للحديقة الخلفية الي يم الحمام، لكيت مروان واكع بالوجِل ولازم رِجلة

اول ما شافني من بعَيد صاح

مروان
روان لا تجيـن لا تدنين

دموعي صـارت تنزل خايفة عليّ شوكعة ياربي

مروان
رواااااان لا تدنين صوبي لا تدنيننن ميلي منـاا

رجعت خطوتيـن لورة وهوَ كام بالگوة، عبالك طايح من فوگ ليجوة هل طَيحة هاي !

تقدم للـ حمام وراد يفتح الباب، واشوفـة وهوَ يردد بكلبة بسم الله بسم الله ويتنوع بـ اصرار وعزيمة ويحاول يغطي عن رهبة الحَدث

رِجع حَط ايدة ع الباب وكإنهُ ينتل يوخر بـسرعة ويلزم ايدة بَ وجع

مروان
شجاااااااااي يصير بسم الله الرحمن الرحيم
سلامٌ قولٌ مِن ربٍ رحيم

روان
مروان حباب تعـال مروان والنبي ميتة من الخوف بعَد ماتحمل تعال مروان

گِمت ابجي بـ هستيرية ومروان مُصر يفتح الباب ويصيح عليَّ ع انّي اطُب

بهـل اثناء هايَ طلعت من البيت بزونـة سودة وعيونها خُصر صاحت بوجهي بدون ماشوفة جِفلت بسرعة ونزيت منهـا لمن شفتها

ماحَسيتها بزونة حسيتها وكانهُ شبح اسود وجايني، حَطيت ادية على عيوني وصحت بقـوة ب اسم مروان

اجـة هو بسرعة وصـار يوخر بالبزونة وهيَ مستمرة واكفة و تصرُخ علية

اخُر شي شالهـا وذبها برة وهوَ مصدوم
مروان
منيننن اجت ومن يمتى بزارين جاي تطُب لبيتنا وشجـاي يصيررررر

جلبت بـ دشداشتة وهوَ يريد يرجع للمكان نفسة
روان
مروان حباب لا مروان والنبي هَسة اموت اذا تروح خايفة مروان خايفة

مروان
روان بس خليني اشوف شجاي يصير تعاي طبي تعـاي ماعليج

روان
لا حباب مروان، فكر ب الي ب بطني اذا مو علمودي علمودة حباب

من سمعني هَجي كلت صُفن بوجهي وتنهَد
مروان
امشي طبي يلة حبيبتي امشي

اول ماطبينـة للمطبخ تحرك مدري شنو صحت بسرعة ودرت وجهي قُبضت ايدي ع دشداشة مروان ودموعي تنزل

مروان
بسم الله الرحمن الرحيم روان حبيبتي ماكوشي الله ويانـا امشي

روان
مروان انة خايفة ماريد ماكدر ماكدرر

مروان
روان انة ويـاج الزمي ايدي وامشي يلة بوية يلة

بالكوة وخرت راسي من حُضنة، احس كِل جزء بهذا البيت مسكون، خلينة ورحنـة لغُرفة الحَجية كعدت ع الجرباية وهيَ كعدت ع صوت بجيي وفتحة الباب

فضيلة
اسم الله يُمة اسم الله شمالكُم

مروان
روان كاااافي بجي بوية كاااافي

روان
مروان انة مرعوبة مرعوبة

مروان
حسبي الله ونعم الوكيل حسبي الله ونعم الوكيل، كومي روان كومي حجية كومن بدلن ما تضلن بهذا البيت دقيقة وحدة كومن خلنّي اخذجن

فضيلة
ولكم يمة شكو شصاير غير نفتهم

مروان
حجية دكومي كومي وافهمج بالطَريق

اجة يمي مروان لزم ايدي وكعد كدامي وهوَ يحاول يهديني بس انة جنت ميتـة من الخوف والرعُب

راد يغسل ماخليتة خفت حَيل، ماحجة شي رحنة لغرفتنـا بدل دشداشتة ولبست عباتي اجينة لكينـة الحجية مبدلة

خلينـا وطلعنـا ركبنـا بالسيارة
مروان
روان كافي دموع عـاد كافي

راد يحرك السيارة السيارة متتحرك، نزل شافها جيكها ماكو دموعي صارت تنزل ازيد واحس متت من الرعِب والخوف

حجيت للحجية الي صارلة ضلت تقرة المعوذات

مروان
خرب هسة غيـر اعرفها شبيهاااااا وكفت

زدت بالبجي اكثر وصرت احاجي بخوف وجسمي كِلة يرجف
روان
مروان حباب والله خفت خل اصيحن علي يجي خل اخابرة

مروان
روان علي شيسويلج شيسويلج

مروان
يجي ياخذنـا حباب

مروان
ممنوع الساعة بـ ٣ بليل شني ماعدج رجل وتخابرين اخوج، اصبري خل اشوفنها

راح حاول وياها يشوف ماكو السيارة تشتغل بس ماتمشي
ضليت اقـرة ايات قُرانية بس احس روحي تعبت وحتى طاقة بعد ماعندي

حطيت راسي ع الكشِن واحس حتى الرؤية صـارت محجوبة بالنسبة الي

مدت راسها الحجية من الجامة وصاحت
فضيلة
ولك يُمة يمروان مرتك تعال شوفهـا شبيها

اجة مروان بسرعة الي لمن شاف وضعي
جسمي نـار ودموعي على وجهي وخايفة وايدي ترجف ونبضي ضَعيف خـاف

كال خل نطب بس انة جنت رافضة نهائي، كتلة بصوت خافت خل اخابر علي مارضى كال يبطي يلة يجي، خابر من ناسهُم مدري منو كلة بسرعة تجيني

صدِك والله ماطول خمس دقايق والولد يمنة، اطا السويج كلة شوف السيـارة واحنة اخذنة سيارتة ومشينة

مروان
والله يسعاد فلا ارحمج لو اعرف موتج يصير اعلى ايدي هم ماراح اتردد وعلي لو مو كتلها حرام هم الا اكتلها وبيدي

فضيلة
ولك يُمة هوَ شصار احجيلي شصار

مروان
حجية الحمام البرة مدري شبي هوَ ما مقفول بس اول ماحطن ادية اعليَ وكانهُ كهرباء وتكهرب كِل جسمي

اول مـا حطيت ايدي شمرتني حَيل وصوت لا ارادي طلع من عدي، لا واير لا دنيا كِلشي ماكوووو راح اتخبل انة راح اتخبل

لو ما روان والله لو اعرف اموتن هم ماخليها للسالفة بس ماكدر ماكدر اخاف اعليجن انة

فضيلة
يمة دخيلك ربي تلكيها سبتنا سبي ب سحورتها يُمة، تلكين لازمة باب السحارة شلون طلك سعدية وعاش وي روان وحدهي زين يُمة انتِ شفتي بزون

روان
ايّ حجية والله شفتة بس نسيت اكول نسيت

فضيلة
هايّ وحدة من الاجن بالفاتحة يجوز حاطاتة ويجوز هيَ جاية وطابة وماندري بيها لان الباب جان مفتوح والزلم بذاك البيت

مروان
توقعي كِلشي يُمة توقعي كِلشي بس عبالج اعوفها لا بالله فلا اعوفنها
زين روان هسة مني كاعِد عدكم الدنيا فجرية فشلة شيكولون العالم اعلينة

روان
مروان يا عالم ذولة اهلي ترة اهلي شيردون يكولون
وسُراج يسهر اكيد لهذا الوكت كاعد هسة راح اخابرة واشوفة

مروان
خابري وطينيا خل اشوفة وينج وين الحجي انتِ دشوفي حالتج هسة، حجية هاي البت شلون بيها ؟ شلون احميها منهن هيَ والي ببطنها ؟

فضيلة
يمة هاي احنة ماكايلين وما سالمين منهن اذا نكول شيصير وعلي فلا نسلم من سحورتهن يخبلنهة الك وحتى طفل مايثبت ما اوصيكم غير بسالفة لحد يدري بحبالتها

مروان
لا محد يدري وانة اوصيجن وانتِ هم حبيبتي بوية روان وصي اهلج مايكولون لايّ احد وهم انة راح اشوفّلي بيت بعيد عن الانظار اخليجن بي اعلما شجم يوم اتوبها لهاي الـ ... الـ ...

خابر سُراج كالة كاعِد تعالوا وصلنـة للبيت طبينة وسُراج جان مستغرب من حالتي
مروان
يلة انة رايح بالجن اعلى روحجن

روان
مروان ويـن رايح حباب لا تروح ضل هنانة

فضيلة
ولكم يمة وين تروح وين تريد تروح من ايدنة هل واحد انتَ لينة

مروان
ابد والله لا تحاولن بهاي الليلة انة اكضيها للسالفة لازم روان لا تخافيـن ما اتاخر اعليجن انة

كمت وكفت كدامـة وصرت ابجي واحاجي بضعُف
روان
مروان حباب لا تروح حباب والله تموت والله لا تروح

مروان
سُراج دير بالك اعليها انة لازم اروح

مروان
اذا اسكت ممكن يصير الاسوء للصبح ف انة بعد ماسكت
ديري اعلى بالج اعلى روحج واعلى روحي الي ابطنج

تكرب يمي و دنك على راسي وباسـة وراح بسرعة بدون ما يسمعلي حَتى

روان
سُراج روح ورا لا تعوفة حباب روح ورا

راح سُراج ورا وكعدنا اني والحجية ثنيناتنة نبجي وخايفين اعليّ

رحت صعدت حَتى اكعد علي، دكيت الباب وانة ابجي وبالكوة عاينة روحي و واكفة فتح الباب علي جان بالشورت والفاينلة ونايم اول ماشافني اخترع وفرك عيونة

علي
روان هاي شصاير شكو حبيبتي

تكرب مني وهوَ خـايف علية كمت ابجي واكلة بصوت متقطع
مروان
ع علي روح ورة مروان حب ا اب روح ورا
وجريتهـا ابجي من الخوف

مالحكت احجيلة شصاير بسرعة طب لبس دشداشتة وحط مُسدسة بصفحتة وانة طابة واحجيلة بكِل الي صار

طلعنة من غرفتة حاضني ويمشي بـسرعة ويحجي

علي
حبيبتي مايصيرلة شي هاي انة لاحگهُم والله اموت انة ولا هوَ اعلمودج بس اهدي اذا موبيج فكري ب الي ب بطنج

راح دك باب الغرفة مـال بيبي وجدو كعد بيبيتي وكال الهـا تعاي لروان، وخلة وطلع

اجتِ بيبيتي مخترعة سولفتلها اعلى الصار اخترعت بعد ازيد حطتني بحضنهـا وضلت تقرة علية ايات قرانية

الرجفة سايرة بكِل جسمي وخـايفة مو شلون ماجان، صاح الاذان كعد الكِل حَتى يصلي زَعيم وسَبب وجدو وعمي وابوي وامير وغَيث

لمن شافوني بهجي حالة اخترعـوا سولفنالهُم بكِلشي صار صار والكِل جان مصدوم

جدي خابرهُم ردوا عليّ كالولة بالطريق جايين، من سمعت انُ هُمّ بخير اتطمنت وحسيت روحي شوية هدأت

وجهي صار احمر من البجي، وحالتي حَيل مبهذلة جابتلي سّبب ماي اول ماشربتـة ماتحملت روحي طلعت ضليت بس اتقيء بالحمام

بهاي الاثناء طبوا هُمّ و بيبي واكفتلي هيَ وسَبب وابوي بالباب

علي
ها شكو

صالحة
ولك يُمة اختك روحهـا طلعت سودة اعلية وين رحتوا وعفتوها تتلوع هجي

اجاني مروان طّب يمي وجسمي جان يرجِف وروحي احسها طالعة

مروان
هاي شـصاير بيج ولج وعلي كلبي طلع من شفتج هجي لا تخليني اكره حتى الحبالة

روان
مابية شي مروان مابية شي المُهم هسة انتَ بخير هذا المُهم

احتاجيت دشداشة لان ملابسي انمردت جابولي دشداشة لبستها وطلعت مروان جان واكفلي برة وكلهم كاعدين

اول ماشافني عيونـة جانت ذبلانة لزم ايدي وعدلي حجابي وكال بهمِس
مروان
كِلة من وراي بسببي هجي جـاي يصيرلج

هزيت راسي ب لا قاطعنة صوت جَدي وهوَ يصيحلي

جبُر
سودة اعلية يبوية شصاير بيج وجهج مصوفر جنج كُركمة تعاي يمي تعاي

تدنيت ليه علي تنوعلي وكرص خدي علكيف رحت يم جَدي كعدت وحطيت راسي على چتفة

سُراج
روان حبيبتي الدكتورة اطتج مال لعبان النفس جاي تاخذين لو شني ؟

مروان
ايّ اطتها اخذت بس ع العِشا

سُراج
زين وين علاجهـا

مروان
بالبيت

سُراج
جيبولهيا اطوهيا جا شلون هاي تضل التاكلة تنزلة

علي
انة رايح هسة اجيبلهيا واجي وين حاطتة حبيبتي

مروان
يلة انة رايح ويـاك اندلة انة

علي
لاخوية دليني وين انة اروحن ضل يم مرتك انتَ

مروان
لا كِلشي يصير جاي وياك خوية

علي
عمي شني الي يصير يطلعلي جني مثلاً اركعة ب قل هوَ الله احد اخلي يكمز كدامي دجيب المفتاح خوية ودليني اعليّ خل اركض اجيبة واجي للبت روحها فوعِرت

سُراج
ومررولي اعلى الصيدلة جيبولي مُغذي خل اشكللهيا بس طلقة علي، اخذ وياك غَيث

غَيث
ايّ يلة كايم

مروان
هسة خل اجي وياكم كِلشي يصير عمي

جبُر
هاي شبيك بوية اكعِد مجانك اكعِد شيصير مثلاً الحافظ الله

روان
مروان لا تروح حباب لا يصير بيك شي ضل

علي
لا يا طايحة الحظ هيَ هاي جزاتي تخافين اعليّ وماتخافين اعليَّ

صالحة
جا شلون غير رجلها وابو ابنها شلون ماتخاف اعليّ

جنت حاطة راسي على جتف جَدي وايدة على وجهي وبيبتي تقرالي ايات قرانية اعلية

حتى ماكتلهم شصار ولا اريد اعرف اعلى كد ماجنت تعبانة، راحوا هُمّ

فتحت عيوني بالكوة اريد اتاكد من مروان انُ ماراح لكيتة كاعد ويحجي بهمس وي زّعيم وامير وابوي وعمي وجدي وبيبيتي والحجية

اول ماشافني اتنوعلة سكِت وكالي بقلق
مروان
هـا بوية بيج شي

هزيت راسي ب لا

سُراج
كومي حبيبتي كومي، كومي نامي شوية مددي هاي الكعدة موزين للبطنج

جبُر
وديهـا لغرفتنا سُراج بويـة

مروان
انة جايهـا من رخصتك سُراج

اجاني فتحت عيوني اطيتـة ايدي سندني و رحت للغرفة حطني ع الجرباية وانة احسن روحي مسلوحة مني

لزم ايدي وكالي بصوت خافت رجولي كِلة قلق وخوف
مروان
روآني شبيج احجيلي شتحسين شني الي يوجعج

روان
مادري لعبان نفس وجوع وعطش بنفس الوكت

مروان
زين مشتهية شي اجيبلج شي احجيلي

روان
ماكدر مروان ماكدر هوَ الماي وماتحملتة تريدني نوب اتحمل اكل

مروان
زين روان انة كلبي ما يطيني اعوفنج وحدج بس استحي من اهلج راح اصيح للحجية ولبيبيتج وامج يمج وانة هنـا بس صيحيلي من ترديني

روان
بس انة ماريدك تروح لا تعوفني مروان

مروان
فشلة من اهلج روان

روان
مو فشلة حباب لا تعوفني

هز راسة بـ ايّ وباس ايدي وضل يمرر بـ ايدة اعلى كيف على بطني

مروان
لو الابن الي حلمِت بي طول هل ١٥ سنة هجي يتعبج، انة ماريدة

فتحت عيوني بفزع من گال هجي وكتلة بشعور مُندفع نابع من داخلي
روان
اشششش مروان لا تكول هجي عن ابنة حباب، الله يسهلها انة مابية شي والله بس لان كلشي صار اعلى بعضة

مروان
روان خايف اعليج افهميني خايف اعليج، انة ما باقيلي بهدنيا غيرج انتِ والحجية وانتِ موبس انتِ انتِ شايلة ثلث ارواح
روحج و روح ابنة وروحي وياكُم روآني
انة خايف اعلينة خايف وهاي اول مرة انة اخافن من شي

يحجي ويعبـر عن خوفة موبس بالحجي بالايد هم ملامحة كلهن يبينن مقدار خوفة اعلية

حاولت اصـيرن اقوى منة بشوية واشيل حِملة وكتلة
روان
لا تخاف انة بخير والله دام عينة بعين الله كِلشي راح يمضي

هز راسة بـ ايّ وباس راسي بقـوة، ضل كاعد يمي ويمسد اعلى ايدي ويحجي ويـاي حَتى يطمني

ما مضت ٢٠ دقيقة علي جاي، اندكت الباب طلع مروان طَب سُراج بَس

جانوا جايبيلي اكِل كال ضروري تاكلين حَتى تاخذين ادويتج خفت وكتلك اتقيء كلي راح اطيج ادوية مُباشرتًا ف مايصير شي

وكلني مروان بـ ايدة ماكدرت اثكل وهوَ هم كلي لتثكلين حتى لا تتقيئين وهم انة راح اطيج مُغذيات يشبعن جسمج والطفل، قـرة الوصفة وبناءً عليّها اطاني ادويتي وشكلي مُغذي

مروان
روان حبيبتي انة طالع انتِ نامي هسة ارتاحي

روان
سُراج، مروان يستحي يكول فشلة من اهلج حباب كلة خل يضل يمي والله خايفة

سُراج
حبيبتي منين نخافين غير كل احنة ويـاج ويمج وداير مدايرج لا تخافين مابيتنـا غير البركة والنور والخير، وانتَ خوية من شني تستحي البيت بيتك ضل يم مرتك خليها تهدى
القلق الزايد بهجي مرحلة موزين، هيَ بمرحلة حساسة خل يثبت الطفل ب بطنها لا سامح الله يصير غير شي

طلع وسَد البـاب، طلبت من مروان يجي ينـام يمي ماردت غير بس ارتاح واطمن، و وجودي ب بيت اهلي يطمني

نمت بحُضنـة كتلة شصار كلي بعدين لا تدوخين وتعبين روحج صدك والله ما مضت شوية ونمت بدون مادري من التعَب ...

طـلع مروان من الغُرفة ولكة الكِل اعلى نفس كعدتة

سُراج
نامت؟

مروان
ايّ، انة رايح هسة مال انطر لوجه الصبح ماكدر والله اريد اروح وادفع ثمن كِل واحد سوى هجي

جبُر
بوية دتعال تعال خل نفتهم شصار بالضبط انة مافتهمت ترة البت شدهتني والله

كعَد مروان وبدة يحجيلهُم بـ الي صار من جانت مروان موجودة

علي
جَدي من رحنـة اول ماطبينة شاهد الله انة كلبي انقبض شلون عايشين بي مادري

جبُر
زين احجولي رحتوا فتحتوا الباب

علي
بالبداية ضربة مروان، وضربة حَيل انرج الباب رج بس ولا انفتح والرجال رجع ليورة

مروان
عمي شني تحسـوا ما مقفول تحسوا مچيّم
بس هيَ عبن السالفة يمي انة ماكدر افتحة علي اول ما فتحة انفتح

علي
وريتة مانفتح ريحة العفن جانت وين واصلة
و اول مـا فتحنة ضوة شفنا بزون اسود ميت ومو موتة عادية موتة شنَعة ذبح وشنق وكلشي مستخدمين بي ومعبى ورق والورق كِلهن دم حتى ماتكدر تشوف شي

مروان
هيَ ماكـو غيرها هاي ماكو غيرها

علي
طبعًا ماكو غيرها رّب الي انة بيدي لازمها بـ مكان كلة دعارة تستغرب تسويلكم لا بالله، تلكياهة تسوي وترجع ليورة هسة بت الكلب

جبُر
الزم السانك انتَ الزم

علي
والله اريد اسحك اعلى راس ابوهـا اذا ماخلة مروان يربيها عدل واذا ما لزم بتة شني السالفة تايهة انة اختي اذا ماتت يفيدني مني وشكول وشحجي
روان انة عدي خط احمر وأذيتها من أذية روحي

مروان
لا انة هسة اروحن والله اهجم البيت فوك راسهم ثنينهم اكتلها بيدي والله عسما شني انسجن؟ طز المهم تموت واخلص من شرها

جبُر
تؤ موهجي بوية موهجي، شوفوا بوية تاخذون بحجيي وبكلامي لو تردون تصرفون وحدكم انة ابوكم واكبر منكم واعرِف بهاي السوالف

خل يطر الصُبح هوَ ماضل شي فد ساعة ساعتين اخذولكم كسرة وروحوا ترحـون كلكم موبس انتَ مروان يروح زَعيم ويرحون اخوانها و ولد عمها وياكم
حتى يعرفون السالفة ماصارت بس يم ال دحام صارت يم بيت جبر هم

بوية زَعيم وياي

زَعيم
ايّ شيخ اسمعنك

جبُر
تكل الهُم عمي واحد ثنين ثلاثة
اول شي احنة عيب نحجي حجي مال نسوان وما مرباين نجيب طاري نسوان بمضايفنة ونحجي وراهم بس يابة نسوانكم طلعت عن الطريچ نسوانكم فلتت

ثاني شي احنة اهل البنية وبتنـا عزيزة اعلينة وبتنة هجي وهجي وهجي جاي يصير وجاي يحاولن ياذيها بوية كضوا بتكم

ثالث شي تكلولنة ما نكدر الها نشوف السوالف هاي تستمر وها مالكم مجـال رفض ولاشي احنة مايمنة عداوة غيرها ولا مرة ولاثنين البني ادمة هاي مسويتها تردون تفكوها ب التي هيَ احسن اهلاً وسهلاً تكلولي لا بوية السالفة توصل لجَدي واذا وصلت السالفة لجَدي

كل الهم انة نيابة عنة واكل الكُم يجي يگوم الدنيا ويگعدها فوك راسكم، حَتى گيعانكم يگومكم منها، خاوة؟
ايّ بوية خاوة، جبُر معروف بـ حكمتة وعدلة بس اليعيل بي وببزرة يحرگ الدنيا اعلى راسة
صار جَدي ؟

زّعيم
صار شيخ احسب الكلام واصل بدون لا زيادة ولا نقصان

جبُر
عشت ابو يعگوب عشت، وانتم عليوي و سّجاد وغيث الي يروح ياهو ان جان، گمزة، عركة مدري شني ماريدها انة رايد ترحون تودولهم نفس التهديد

انشوف ردهُم بساعتها ان جان خير ننطر يوم يومين ونشوف اذا صدك تابت فَ ( ان الله غفور رحيم ) فَ منو احنة ومانغفر الها بالنهاية هيَ مرة
وان جان ردوكم بالشر لا بالله كلولهُم احنة مو جُبن من عدنة بس مانتحرك بدون جَدي انطرونـة ساعة مو اكثر من ساعة وجاين بيوتكم تنحرك اعلى راسكم
صار ؟

الكل
صـار شيخ ..

جبُر
هذا الكلام اذا سمعت ماصاير ازعل من ال مخالفة مو شلون ماجان عاد، بوية مروان انتَ تنحى من سالفة مو تقليل منك بس ذولة انة دواهُم والله احنة نريد نحلها بالتي هيَ احسن وانتَ عواطفك تغلبك وانة لو جنت بمكانك جان اكلك بوية انتَ اشتغل وانة اتنحى( اصير على صفحة) لان ادري بهجي موضع العواطف تغلبك يبوية

مروان
صـار شيخ هاهيّ

جبُر
يلة روحوا لمضاجعكم ناموا وارتاحوا شويـة، روح انتَ يم مرتك لا تخليها وحيدها لا تفز وتلكاك مو يمها وتتخبل

سُراج
يستحي منكم جَدي

جبُر
منين تستحي بوية البيت بيتكُم
قابل انتَ غريب منة

راح مروان يم روان ضل يمها وفعلاً ضلت بكل الليل تفزقز
بَس مروان عينـة ماخذت نوم ابد وماعاول يصير الصبح حَتى يروح ويفرغ غَضبة بيهم ..

طر الصُبح وكلهُم راحوا ونفس ما كال الشيخ جبُر وصلة زَعيم الهُم والجـواب جان

اخو سعـاد
مو جبُر ولا ابو جبُر الي يخوفنـا لم جلابك واطلع كال نعـال كال

اهل سـعاد معروفين انُ هُمّ عائلة فالتة وصايعـة سـعاد جانت هدية لمروان بـ حل نزاع عشائري بين اهلها وبين نـاس، ابوهم سكرجي وامهم ميتة وبس هُمّ ٤ اخوة
محتارين بالسكِر والعربدة والطربگة والعركات ومكملين مسيرة ابوهُم الفاضِلة ..

محد تحمل الغلط الي صـار وشي اشتبك بشي
وللحظة وحدة سمعوا صريخ سعاد وهيَ طابة اعليهُم وتصيح

سـعاد
وتكتلون اخوتي ب بيتي والله يمروان ال دحام الا اندمك الا اخليهة تكتل اروحها شلون ما امك كتلت روحها، ما تخلصون مني والله لا انتَ ولا هيَ ولا حتى طفل البطنها عبالك مادري ادري ادري الا اموتهم كدام عينك الااا

للحظة وحدة الكِل جان يباوع ومصدوم ومايكدر يحجي، سحّب مروان بعصبيـة السلاح من صفحة علي وبدون تردد راح وضربهـا طلقتين بـ نص صدرها

علي
مرروووووووووووان لااااااا ......
يُتبععععع، توقعاتكُم ؟
___________________
شَمس
كلت هَيج وعمو جان يحاول يلزمني واني اتقدم تِجاهة وايدي جانت ترجِف وشايلتـها بوجهة، تقدم اتجاهي وراد يحضني للحظة من كمية الخوف الي بـان على وِجهة عليٍّ

وللحظة وحـدة احِس كُل شي صـار اسود بعيوني وكفني عـمو حَسن ودارني الة وهوَ يهديني

حَسن
ولج عمي راح تموتين ولج اعلى كيفج

كعدني عَ التخُم واني منهـارة بجي وايدي ترجف اسمع اصوات علي وزَعيم ويـا يحجون يصيحون شكووو شصاير شسويتلها بَس هوَ ولا نفس

عيوني بلگاع وبنفس الوقت مغوشات بس جنت اشوفة وهوَ متقدم الي، رفعت عيوني بـ غضب وكتلة بعَصبية
شَمس
ماريدك وخُـر لا تدنى يمي

سُراج
خـل اتفاهّم ويـاج

حَسن
لا تتفاهم وياهة ولاشي عوفهـاااا ولك ميل عنها من دهر الدهرك ان شاء الله

وخـرة علي عَنة واسمع صوتـة وهوَ يستغفر وعمي كاعد يمي وحاط راسي على چتِفة ويحاجيني
حَسن
شصـاير وياج عَمي احجيلي شسوالج

شلت راسي وباوعت لعمـو وكتلة واني الكِلمة كوة تطلع مني كد ماجنت منهـارة
شّمس
عمو ديغصُبني البس الحلقة مالتـة وهوَ لابِس حلقتها !!!!!
كتلة تريدني البسها انزعهـا والبس حلقتي والبسها ماقِبل ولمن ماقبلت صار يغُصبني حَتى البسهااا

عمووو انسان اناني اناني، ما يهِمة مشاعر غيرة ميهمة بشنووو اهتم المُهم عندة بَس نفسة بَسس ..

يريدني إلة بـس مايقبل يتنازل عن ذكرى وِحدة من زينب

سُراج
وانتِ مني وتردين تنسيني زَينب ليششش تردين ذُكرياتهـا تروح من بالي ليشش

درت وجهي الة وكمت من مكاني بـ اضعف حالاتي وكتلة
شَمس
اني مو احد اني مو احدددد بالنسبة الك بس بطل تعاملني بهل جِدية الزايدة لا تحجين وي سَجاد ولا تلبسين ضيك يم الولد ولا تحجين وي احد بالكُلية والبسي حلقتي وانتَ ؟؟؟
انتَ بكُل بساطة تريد تضلك محافظ على ذُكرياتها
بَشرررر اني لوشنوووو

ضل ضافِن بوجهي وهوَ قابُض ادينة وحجاية ماحجة،

كام عمو حَسن وتوجه صوب سُراج وهوَ عصبي نار، عقج ملامحة علي وتقدم لسُراج بكِل عَصبية و وكف كدامـة ورفع اصبعة بوجهة

علي
بوية من رخصتك خليني انة احجي
شوف سُراج واسمعني كِلش زين، محترمك رُغم انتَ اخوي الصغير، وانة اخواني ان جان انتَ لو سَجاد عدي ابعِز الهوى، كضيتوا عمركم تغلطون واضمضملكم، وتجازفون واتحمل نتايج تهوركُم وما بفد يوم كتلكم اعلى اعينكُم حاجِب ولا بفد يوم كتلكم يم واحد الجاي تسونـة غلط ولا بفد لحظة اطيت بيكم يم احد

بس هذا كِلة لمن غلطكم يقتصر اعلى نفسكم لو غلطكُم يخسرني بس انة، بس مالت تاكِل خَرة زايــد وتلعب اعلى انسان ثاني لا يشهد الله العب بيك جولة

بت هاي لك حيوان الهـا مشاعرها والها كيانها والها رِقتها تجي انتَ تعاملهـا بكل نرجسية وغرور
سُراج تـرة هاي شمِس مو وحدة ثانية وتلعب اعليها
انة مارضى اعليهـا انة

خاف اعلى بالك محَد وراها ومگضيها تراهِق براسهـا لو تنسى زينب بيها قَسمًا

بعدة ما مكمِل علي صُرخ سُراج
سُراج
احترررررم نفسك واعرف شتحجيييي، انسى زينب بيها شني
ليش هيَ زينب تنسي ؟؟؟ لو مُمكِن احد ينسينياهة!!!

علي
وعلي هسة اجيب العدل والميت هنـانة روح روح انتَ وامراضك النفسية خلي زينب بفكرك بس ديربالك تلعب اعلى مشاعرها بعد، واذا تدنيت صوب شمِس هاي يم زّعيم ويم عمي كفيلك الله يسُراج ...

سُراج
شتـرررريد تسوي يعني شتريدددد تسوي ؟؟ وانتَ مني وجاي تحجيييي وتهددد !! شمِس هيَ مُجرد بت عمك وانة الي صلاحية اكثر منك اعليها هيَ حلالي تفتهم شني حلالي فَ ديروبالكم ديروبالكم تمشون هل اسلوب اعلية
انتَ ولا سَجاد ولا غيرك وغيرك وغيرك لا تحاولون تبينون انُ انتوا اقرب مني اعليها والتهوا بحياتكم وعفوفوني

حَسن
لك صير رجـال وخوشش آدمي ومحد يحجي اعليك
تلعب بمشاعِر هل طفلة ليش؟؟؟؟

زّعيم
بغض النظر عن كِلشي
مـا مَر فد يوم الا وانتَ مبجيها وموصلها لحالة هستيرية
وربكم يكول ( فأما اليتيم فلا تقهر )
عمي هاي البت امانـة عدكم وعدنة فَ الجاي يصير بيها مرجعة اعلينا احنـة وعمي بگبرة تلگا هَسة متعذِب
فَ لو ترحمون بحالة وبحالتها شوية وتبعدون هل انسـان عنها يكون كِلش احسن

علي
ايّ وعلي ماحجيت الا الصح واحنة الحگ من عدنـة واحنة العايلين عمي احنة ..

سُراج
مـا شاء الله الكِل صارررر شيخ براسي الكِل
شني الغلط شني ؟؟ الغلط انُ انة بعدني احب زينبب تردون اصيـر نفسكم يطلع الاربعين منـا اتزوج منـا هجي ماخذين الحياة لعب ولهووووو

زَعيم
ولك زينب اختي اختي مو غِريبة اعلية، بس مجتف لبو فاضِل العباس وانتوا مالكُم يمين اعلية وانة كد كلامي هَسة بس زَينب مو راضية بالجاي تسوي وي هـاي البت وحرام اعليك دنيا وآخرة والحرام بركبتي انة اذا ماطلع حرام

هُمّ يحجـون واني كعدت ع التخُم واسمع لكلامهُم وميتـة من البجي، شعوري جان شعور حيل سيء حيل ضعيف، شعور اشمئِزاز من نفسي ومن المكان الي اني بي
ماحِبة بـس هواي قلل مني وهواي كسر كلبي

يعاملني وكإني لعبـة ماعدها ايّ شعور وبس هوَ الي عندة شعور وبَس هوَ الي لازم الكُل يراعـي ويحِس بظروفَة

علي
شمِس بعـد ما تدنالها فهمِت؟؟؟

سُراج
مو انتَ الي تتحكم بية، لا تحدد بخيوط فهمِتتتت

حَسن
اسكتوا ثنينكم اسكتواااا لا تقضحونـا بنصاص الليالي شني زعاطيطط ارد افتهم
وانتَ لا تجاسّر اعلى اخوك الجبيـر ونفس ماكال انة اكولن، شمِس بعد لا تدنالها عوف المخلوگة بحـآلها

خلة وطلع بدون مايحجي ولا ايّ حرُف

اجـة عمو كعد يمي
حَسن
خل يولي يعمي خل يولي انتِ هم لا تاخذين اعليّ، بالنهاية هوَ رجال جان يحِب، والي يحِب بصعوبة يتناسى مرتـة

علي
خّل يولي شمِس خّل يولي مالج دَخل بي والله بعَد حتى لوِجهة لا تتنوعيـن خل يتأدب شويـة

حَسن
هوَ سالفتة وي زينب داچة شيسني ماندري

مسحت دموعـي وكلت بهدوء
شَمس
ماريدة ينسـاهة ولا الي دخّل بي الي اريدة بـس يعتقني لان صدِك اني تعبت وبعَد ماكدر

حَسن
حگج اعلية يعمي والله حگج اعلية

بـاس راسي غمضت عيوني ومسحت وِجهي
ضلوا يحجـون وياي بمحاولة منهُم حَتى يهدئوني
ردت الم الكزاز علي ماقِبل كلي روحي اصعدي

خَليت وصعدت لفوگ اعصابي منهـارة والمنظر الي اني بي ابد ماعجبني، اعصابي صرت ماتحكم بيها لدرجة كسرت الموجود وخليتهُم يحسون بية ويجـون، هذا المُوقف مُزري حَيل ويشعرني بخجل شديد منهُم ..

نمت ع سريري وصرت افكِر، هوَ يحبها فَ ليش يريدني اسوي كُل هذا، معقولة مُجرّد تحجي وي محمَد ؟

غلب التفكير قهري بالموضوع، وماحَسيت نفسي من بعد تفكير حيل طويل إلا واني نايمة

كعدت اليوم الثاني بدلت ونزلت لكيتهُم كلهُم ماعدين ع سُفرة الريوگ ماعدا الي جان گاعِد ع التخُم وحاط ايدة ع راسـة

صبحت عليهُم ونظراتة بدت تلتهمني التهام، تجاهلتـة ورحِت كعدت مقابيلة ع التخم، ضلوا يلحون انزل اكِل كتلهُم ماريد ماشتهي

امير
عوفوهـا انة اشتريلها كيكة وعصير من يم محّل
وراها امتحان ميصير تروح بدون اكِل

جبُر
جا جدي انتِ شبيج شو مدري شبيج حتى عيونج جنهن حُمر

راد عمو حَسن يحجي رأسًا رديت
شَمس
جدو ماعندي شي بس جنت سهرانة اقـرة

باوعت لعمو حَسن اريدة يسكت بس هوَ جان يباوع لسُراج ومعصب حَيل منـة

كمل اميـر وكال يـلا، ماحجة شي ابد
توقعتة يتصالِف نفس كُل مرة ويكول لا اني اخذج ويضل ثابت ع قرارة بغض النظر عن مشاعري..

رحنـا للدوام كد الصُداع الي جان يمي ماجاوبت كُلش زين رُغم قريت بطريقة مضبوطة وجنت ضامنة درجة حلوة

طلعت وجنت ضايجـة اكثر واكثر واحس نفسيتي على كدي، مابية حَيل مُحاضرات ولا بية حيل اشوف احد من طلاب قِسمي الي يتهامسون من وراي بطريقة واضحة ع سُراج شلون لزم ايدي

خليت ورحِت لقِسم العربي، جانت هاي اول مـرة الي اروح بس كلت اشوف البنات

بس انصدمت جـانت الممرات كُلهـا هادئة ومبيـن جان عندهُم مُحاضرة، راسلت البنات كللي فَد خمس عشر دقايق ونطلع فَ كلت خل انتظرهِن احسَن

شفت اكو ستول بـرة يم الحديقة الي مُقابلة للقاعات ف حطيت جنطتي وكعدت عليّ، وهيَ كعدة وهيَ وكعـة

اخخخ خرب يوميي، يعني هُمّ ليش حاطي برة اكيد مكسورر

بهل اثنـاء شفِت الاستاذ الي جان ع قاعـة اجاني يركُض

حَيدر
الله الله الله علكيفج خوما تأذيتي

نكثت روحي وكمت احس روحي مَيتـة من الخَجل

حَيدر
خـوما تأذيتي

رفعت راسي الة رجال اسمراني بلحية كثيفة سودة وعيون مكحِلة سودة صغيـرة، شكلة حَيل جنوبي جان

شَمس
لا مابيـة شي

حَيدر
انتِ مو بت عم أمير لو انة متوهِم؟

هَزيت براسي ب ايّ، هوَ شكم مرة يمشي وي اميـر وشايفنة بس اول مايشوفني بسرعة يدنگ لو يمشي ويعوفة

حَيدر
اهلاً وسهلاً، عدت ع خير ان شاء الله ..

كالها واخذ خطوتين لورة وهوَ يباوعلي بعدهي دار وَجهة وراح للقاعـة

بهاي اللحظة جان ودي اغُم نفسي على هيج طلعة تعبانة طلعتها، يعني لو ضالة بقِسمي مو جان احسن اخ من الفَشلة اخ ..

ضليت واكفة بمكاني وانكث من نفسي، طلع اميـر من القاعـة رحت يمة سئلني شلونج بالامتحان وكذا بهل اثنـاء طلعوا البنات

حَيدر
سلام عليكُم، يلة زميلي رافقني للعمادة ..

امير
يلة حبيبي جـاي اتمشى كِدامي

انطاني نظرة جانبيـة وكانما ديتفحصني وخلة وراح هوَ وامير

فَرس
هذا استاذ حَيدر ليش باوعلي هيج عود

شَمس
مو الج الي

فَرس
ييُمة الحمدلله، بس ليش ؟؟

شَمس
اني ادري غير كعدت ع هذا الستول و وكعت وهوَ شافني

فَرس
لابربج هههههههههههههههههه

ايلول
حرامات ماجنت يمج واتشمت بيج ههههههه

ضحكن واني جنت بقِمة بفشلتي رحِت وياهّن للنـادي كعدنا ناكِل ونسولف شوية

شويـة ودزلي سُراج شلونج بالامتحان مارديت عليّ اساسًا

كملت ورحِت لكُليتي بالطريق مريت من يم الطِب، شفت محمّد ابن مُجبِل هوَ وجماعتـة كاعدين

اول ماشفتهُم عيونة اجت علية كُبل غيرت طريقي للطـريق الثاني

كملت مُحاضراتي ورجعنـة للبيت اني واميـر
سئلوني اول مـا رجعت ع الامتحان كتلهُم موزيـنة
خليت وصعدت حَتى مـالي خلُك اكِل
بيبي حاولت تحاجيني بس اني تجاهلت الوضعيـة
بس هالشي جان خانكني من جوة بسبب الي حجتة علية ولني السالفة مويمي ابد

مضت الايام، والي سمعتـة انُ سُراج متعارك وي آل مجبِل بالكامل وكلهُم زعلانين منهم وناهين علاقتهُم

بيبي جانت حَيل ضايـجة بسبب هالشي وتمشي وتحجي
هوَ مايريدها اعليمن سوة كِل هسوالف مادري

وسُراج من يسمع يخلي ويطلع لان جان حَيل عصبي وروحة بخشمة ومايتحمل

اما اني ويـا فَ مانحجي ابد، وضليت متجاهلتـة طول الوقت وحتى هوَ اخذ مساحة مني حتى ميسئلني شلونج بالامتحان، مع انُ جان يجي لسيوف ويسئلها علية ب استمرار وبكل يوم

خلصت امتحان الشَهر الاول على خيـر
وشوية ارتاحيت من ضغوط الامتحانات

بـ ثاني يوم من اول ماخلصت امتحانات جنة بالمطبخ اني وسيوف نحجي ونطبخ، بـ ايام امتحاناتي خَطية سَبب كُلة عليها وامتحانات نُصف السنة قرُبت ف كلتلها بعد انتِ مالج علاقة بشي اني اسوي كُلشي

فَ جنـة نُطبخ ونسولِف شوية سمعنـا صوت صريخ سُراج تقربنـا اكثر حَتى نسمع

سُراج
انة ليش كتلها البسي حلقتج ليشششش

صالحة
اكلك يُمة ترة هيَ بنية والبنية نفس سِچة القطار كِل ساعّ يمر اعليها واحِد جا شني الناس تبطل

امير
لا والرجال حِجة بـ اسلوب حلو كال انة حال اناسبكُم والرآي رآيكُم

سُراج
وانتَ ماكلتلة عاقدة ماكلتلة

علي
هوَ انتوا وضعكم هم وضع عود ؟
هوَ انتوا نفسكم ما قانعين مو نوب هوَ
عايف البت معلگِة شني سالفة سُراج
وبعديـن حَيدر مـا يتعيب ترة لا بالخلاق ولا بالسُمعة ولا ب ايّ شي كامِل مكمل ما شاء الله

سُراج
عمييييي حَيدر خوش رجال ومحمَد بيت مجبِل خوش رجال وكلهم يستحقونهـا وانة ماستاهلها ماستاهلها موخوش انة موخوش

انة ماشايف اهل يوكفون ضد ابنهم بدال ما تكيفون وتكولون ايّ ماتطلع للغريب ولبني عمها احسن شو انتوا اعلى ابنكم ويـا الغريب

حَسن
هوَ ابنة لو بي خير ماجان فرطنـا بيها بس الابن مابي خيررررر

جبُر
تؤ حَسن موهجي بوية تعـال

سُراج
انعم الله اعليك بوية، ماريد جَدي طالِع

سمعنـا صوت خطواتة ركضنـا بسرعة اني وسيوف للطباخ
طلع هوَ بسرعة بسرعة مثل مهب الريح وركع باب المطبخ حَيل

سيوف
هاي شصايررر منو حَيدر

شَمس
عزة اوكفي خل استوعب هذا أُستاذ حَيدر خاطبني !

سولفتلها ع الموقِف الي صار بينـة
سيوف
حُب من اول وكعة

شَمس
والله جان موقِف مُخجِل صراحتًا
وهذا الثاني مسوي روحة يغار السايكو

سيوف
شنو سايكو

شَمس
مريض نفسي، شنو ماتدرين بسُراج مَريض نفسي

سيوف
انجبي ولج موهجي والله سُراج يحبج بس هوَ ميعرُف يعبر

شَمس
سُراج مايحبني سيوف سُراج لسة يفكر بـ زينب فَ حبابة سدي الموضوع

سيوف
مو بسهولة ينسى زينب بس بنفس الوكت ماتكدرين تنكرين اعجابة بيج عمي شنو والله السالفة اذا صارت يمج يموت ويشحَط

شَمس
ايّ كُلش سودة علية، هيج حُب اني ماريدة يمعـودة

الي عرفتة اميـر معتذر منة وكايلة انُ عاقدة ع سُراج بس حاجين ويـا متعمدين حَتى يغثوا، جدو ضل يلوم بـ عمو ليش هيج يحاجي سُراج وعمو يكُلة انتَ ماتدري بي ويحجي عليّ، طبعًا جدو مايدري بـ اخرشي صـار واني الي منعت عمو يحجي، لان حَسيت المشاكِل الي صارت بسببي كافية و وافية وماحبيت يخوضون عركة ثانيـة ..

حَسيت بنفس اليوم سُراج حاول يحجي ويـاي بس اني مانطيتـة مَجال ابدًا وضليت اتهرب منة، دزلي رِسالة بليل حَتى انزل شفت ومارديت

اليوم الثاني صارت سالفة ام مروان وسُراج جان مكابل روان وكاعِد لان حالتها حَيل سيئة جانت وكُل ساع و واكعة

اليوم الثاني بيبي كالت خلي نروح للبيت الهُم فَ جدو كال احنة هم كُل احنة نروح بدفنة فَ روحن كُلجن

مع انُ اني حَيل اخـاف وروان مسولفة من اجت عليهُم وشفنـا الي صار بس انجبرت اروح

اني من نوع حَيل اخاف من هاي السوالف وبدون شي اضل انزنز فَ مارتاحيت عدهُم ابد وضَليت قلقة واتلفت ومن فِتحنـا قُرآن وكام يُطفى وحدة بالبيت وموبايلي طُفة من الحرارة الي مجانت موجودة اصلاً حَسيت السالفة كُبرت

جسمي كُلة ضل يرجِف واعصابي احسها بعد ماتتحمل دقيقة تضل هنانة، رحت لبيبي وكلتلها، كلتلي انعلي الشيطان مَدري شنو ومنو الج بالبيت وبَس سُراج وسَجاد موجودين وطالعين فَ قنعتني ابقى

من رحنـة لذاك البيت حَسيت اكـو اشياء غَريبة كمت اني اتخيلهن من فُرط التفكير كلت لبيبي و جنت قافلة كتلها بيبي مُستحيل اضل هنـا، كلتلي خابري سُراج بسكوت وروحي، سُراج وسّجاد الوحيدين الي مارايحن للدفن علمودنـا خاف نحتاج شي

كتلها راح اخابر سَجاد عاطت بية كلتلي لا تهودينينة ويـا، حرمصتلها حَتى تخابرة هيَ مو اني خابرتـة كال الها هَسة اجي، كلت لسيوف تروح ويايّ باوعتلها بيبي وكالت لا ماروح مَدري ليش

اقل من النُص ساعة وسُراج اجـة، طلعتلة واني الخفقان عندي عابر حَدة ع كد ماجنت خايفة

صعدت بالسيـارة بهدوء بس صوت انفاسي جان مسموع، سديت الباب وحرك سيـارتة واني حاسة بنظراتة عليَّ

وصلنة لـراس الشارِع وحجة
سُراج
بيج شَي شمِس ؟

شَمس
لا مابية

سُراج
جـا شبيج وليش اجيتي اصلاً ؟

شَمس
ماريد مامرتاحة ابد وخايفـة

سُراج
خومـاكو شي ؟ صار شي !

شَمس
البيت كُلة مو نظامي نفتح قُرآن ينطفي بكُل موبايل من موبايلاتهن وموبايلي شحنة ٨٠ وضل يحمى يحمى وطُفة معَ انُ الجو بـارد !

سُراج
سمي بسم الرحمٰن ماكو شي هاي مُجرد خُرافات

شّمس
شنو خُرافات داكُلك هَيج صـار كدامي

سُراج
عمي لايصير بيج شَي اهدئي شّمس شبيج

درت وجهي بتوتر للجامـة احس اعصابي تلفت، ايد حاطتهة ع وجهي وايدي الثانية ترجِف بخُفة يم جكمجة السيـارة

شوية وحَسيت ايـدة صـارت ع ايدي انصدمت ودرت وجهي الة، ايدة تحضِن ايدي بتردُد

باوعلي بهِدوء ونظراتة بيهن قلق علية
سُراج
اهدي شَمس انة يمج ..

يحجي ويخلي اصابعة تلامِس ايدي، للحظة وحدة حَسيت ملامحة تغيرن و وجهة انلمة بتعابيـر مزعوجة الى حزينة
وخـر ايدة بشكِل مُفاجئ، كُل هاي السالفة ما عبرت دقيقة من سِرعة احداثهـا

اني موغَبية فهمتـة وفهمِت كُل تعابير وجهة
هوَ ديحاول بس الي بداخلة ديمنعـة

وخرت ايدي من ع جكمجة وباوعت للجامـة وماحجيت ولا حَرف، جنت اسمع صوت تنهيداتـة وساكتـة ماكلت ايّ شي
عكِس النـار الي جانت بداخلي

مشة بسـرعة موطبيعية، وصلنـة للبيت بـسرعة نزلت و سديت الباب وراي بقـوة

طَبيت للبيت البيت يصفُر وخالي مابي ايّ احد باوعت للفوگ وخفِت حَسيت روحي مترددة اصعَد ومترددة اخطي ايّ خطوة، سميت بـ اسم الرحمٰن وصعدت بـسرعة للغُرفة

ذَبيت العباية والجُبة ودموعي صـار تطافر من وحدهن
شَمس
حَقير، مريض نفسي، عندة شَمس لِعبة ابين اديّ، مُستحيل اسكتلة بعَد اذا تجرئ وسوى هيج فعِل وياي بعَد انتقم منـة

بهل اثنـاء انفتح باب الغُرفة، جفلِت ونزيت
شهگت بصوت عـالي واني اندار لكيتة واكف كدامي

سُراج
شمِس.. شبيج !

راد يحجي شي بس من شافني وشاف دموعي انصدم
تقدمت الة بعَصبية وكتلة بكُل استهزاء
شّمس
تدري انُ انتَ احقر انسان شفتة بحياتي

سُراج
انة حقيـر بس وياج

شَمس
حقارتك هاي لتطبقهـا يمي و وجهك بعَد ماريد اشوفة للابد للابد هلمرة صدُك كرهتك وصدُك استحقرتك، لا تشوفني ساكتـة معناهة اني ماعندي مشاعِر وماكدر احجي
اتلافاني سُراج اتلافاني
مُستحيل اخلي احتكاك يصير بينـة بعَد ب ايّ شي وهسة تفضل اطلع

كلت هَيج بكُل عصبية درت وجهي لزم ايدي بقـوة
درت وجهي وحجيت بعصبية

شَمس
ايدي ديربالك تلمسها ديربالك تلمسهـااااا وخر ايدك مني وخرررر

سُراج
ماقاصد أذيتـج ابد، بس انة متأذي اكثر الله شاهِد

شَمس
شدخلني بيك شدخلني وليش دتحجيلي اساسًا
سُراج اني ماحبكك ولا كاتلة نفسي عليك ومن دابجي مدابجي لانُ غيرانة، دابجي من ضعُف حالي الي بدون اب وبدون مأوى دابجي من الحيـاة الي جابرتني اعيششش يمك
هد ايدي هدهـا

نترت ايدي منـة بقوة وخليت ورحِت وطبيت للغُرفة
طَب وراي وهوَ يحجـي

سُراج
شني الي يريحج هَسة كليلي وانة اسويلجيا

مسحت دموعي ودرت وجهي الة وكتلة بـ اصرار
شَمس
تريد تسوي جَميل علية؟؟
عوفني، اول شي تفسخ خطوبتنـا ثاني شي تعوفني براحتي، اطُب منا اطلع منـاك اكعُد هنا اكعُد هناك لا الي دخل بيك ولا الك دخل بية منو طَب لحياتي وي منو راح اصيـر منو الي اجة وتقدملي هذني كُلهن ماتدخل بيهن ولا تسوي روحك انُ انتَ مهتم وغيران

تقدم الي بكِل هدوء، ملامحة جانت حزينة وهادئة بنفس الوقِت احسة عاجِز من كُلشي ماكدرت ارجع ازيد لان الجرباية حدتني

صـار گِدامي وعيونة بعيون بعُض طأطئ راسة ورجع باوعلي وهوَ ياخذ نفس

سُراج
بس انة فعلاً اغـارن اعليج، ومو شلون ماجان، روحي تحترگ حرِگ اعلى مِنهو مـا يدنالِچ

باوعت لعيونة وعيوني جـانت محملة ومليانة بالدموع
شَمس
انتَ انسان مَريض، تحب زينب ومُستحيل تنساهة بس ماتريدني اتدنى يم ايّ احد

سُراج
مسـألة وكِت شمِس، مسألة وكِت.

شَمس
وقتك هذا عوفـة الك ماريد ايّ شي منك و وخر من وجهي

سُراج
يجـوز هَسة اوخر من وجهج ايّ بـس مال كِل العُمر مُستحيـل

شَمس
ليش مُستحيل ليش ؟ عوفني سُراج عوفني اعتقني مالك دخّل بيـة

لسانة مُتردد بشي، موشي وإنمّا اشياء هـواي بس يصير يمي يتوتَر وشفايفة تصـير تحاول تنطُق بـ اشياء بس سُرعان مايحاول يتراجَع وكانهُ اكو شي يصدة عني

غمض عيونـة بتوتر، وجان يبلعم ويباوعلي
سُـراج
ما اعرف كِلشي عن الجاي يصيـر بس الي اعرفة انتِ الي مو لغيري هذا شعوري لو ردتي تعرفينـة شني هوَ .

حجـاهة وراح بـسرعة، تصرُفاتـة تحير وافعالة تموت، ادري بي يحِبها وادري مو بسهولة ينساهة واني مو ضِدة ابد، بس ليش هالغيرة وهل عربدة هـاي لمن احد يتقربلي وليش ديكُلي انتِ الي وهوَ يدري بروحـة مايكدر اساسًا !

تعبت من التفكير وخَليت ونمِت، كعدت العصُر تقريبًا نزلت جـوة جانوا كلهُم كاعدين باوعلي سُراج وعيونـة جانت تلاحكني حَدمـا كعدت يم جَدو

صـاروا يحجون واني ساهيـة بتفكيري
سُراج
انة راح اسافِر

الكُل انصدم بكلامة واني وحدة منهُم الي باوعتلة واني صافنة سَفر شنـو هذا ؟

جبُر
بوية سفرة شني دراسة؟

سُراج
لا جَدي هجي محتاج شويـة ارتاح وارستت روحي واجي

جبُر
جدي شمالك شترستت روحك مدري شني عرس اخوانك ما ضلة شي عينهُم ساعدهُم

علي
لا يعينة ولا يساعدنا اشعدنـا احنة، احَسن قرار ياخذة هوَ هذا خلّة جدي خلّة يروح شوية يتنفس كافي متقوقع اعلى نفسك هجي يا دوام يا بيت يا بيت يا دوام وحتى صيدلية عفتها هل ايام مكضيها تصفن وتتعارك وتسهر
اخذت اجـازة؟

سُراج
اخذت مال تراكُم انطوني ٣ اشهِر

علي
ايّ عمي روح روح

جبُر
وين ايّ عمي روح روح شني يضل ثلث اشهر انتَ من صدگّك

علي
جَدي عوفة لخاطر الله انتَ هم حاسُب سُراج من البَشرية حال الضيم يا حالة حتى جكاير صاير يشرب ينفخ ويرجع بيهن لورة ماتشوفة مطعون طعِن خاف ماتدري انتَ خلّة يروح يتونس شوية لمن يحِس روحة تونس يرجع..

جبُر
ويـن تريد تروح بوية ؟

سُراج
لايران جَدي

جبُر
لو تحس شوية يشيل منك ويريحلك كلبك وينسيك شوية فَ روح ليش ماتروح روح يبوية والله يريحلك گليبك

باوعتلـة وجهة جـان هادئ وبارد اكثر من قبِل بـ اضعاف
لِلحظة حَسيت نفسي انقهرت عليّ على سالفتـة وي زينب
بس من اتذكرت انُ اني ضحيتة رجعت اكرهّة من جديد

ماضل كاعِد شوية صِدمنا وهوَ يكول انُ بليل طيـارتي صعد بوكتهـا لم ملابـسة ونزل تعشة ويـانة وعيونة ما فارِكتني للحظة

طيارتة الساعة بـ ١٠ راح بدل ونزل جُنطة ودعهُم واحِد واحِد واني كاعدة ومسوية روحي ما مهتمة رُغم انُ بكلبي جان اكو شعور حَيل غريب وكإنها رغبة بانتزاع جدران روحي المالها جِدران بس من فُرط شعوري الثكيل الي جان بداخلي ..

كمل توديعهُم وجدو ضل يوصي على نفسة ومَدري شنو، كام سَجاد طلع جُنطة للسيـارة

مادري شنو صارلي بس احِس داخلي اختنگ بِما فيه ومـاصرت اتحمل بعَد اكثر اضل كاعدة، خليت وكمِت صعدت لفوگ

طبيت لغرفتنـا، تنفست بصوت عـالي وكانهُ ثُقل الدنيا كُلة جوة صدري جـان

ذبيت حِجابي وكعدت ع جرباية حطيت ايدي ع راسي وافكِر بهل اثنـاء انفتح الباب، مادري ليش حَسيتة هوَ فتحت البـاب سُراج كدامي

سُراج
شمِس بيج شي ؟

حَطيت شالي ع راسي وجاوبتـة ب ارتباك
شَمس
لا مابية شي

اتقدم باتجاهي وگـال

سُراج
انتبهي اعلى نفسج كِلش زين وعلى دراستج بعَد اكثر وانة اعتذر اعلى كِلشي سويتـة وياج يجوز تحسيني ب افعالي هاي عدواني بس لو ترجعين للحقيقة راح تلاگيني اكثر واحد يخاف اعليج بهذا البيت ..

شَمس
واكثر واحد ضرني بهذا البيت ..

سُراج
كِلشي راح يتصلح واذا ما اتصلح يتحطم
المُهم انتِ ما تتأدين

ابتسم بوجهي بـ هدوء، مافهمت اخر عِبارة الة ابد

سُراج
ماتردين تكولين شي ؟

هزيت راسي بـ لا
هز راسـة بـ ايّ ورجع خطوتيـن لورة، تنهد بعُمق وخّلة وراح

فتحت الشباك مـال غُرفتنا الي مُطل ع الطارمـا ومال البيَت شفت سُراج اجـة ودع زَعيم لان شكلة الوحيد الي ماراح يروح ويـا للمطار والباقين كلهُم راحوا

مادري ليـش بساعتها دموعي نزلت وحسيت بفراغ بروحي جبيـر

سُراج تـايه وجاي يتيهني ويـا، ميعرُف شيريد اساسًا وهوَ ديحاول ينسى زينب بية لا اكثر
انسي شّمس انسي انتِ تستحقين الاحَسن ..

مرت الايام وبديت التهي بـالدراسة، اليوم الثاني من سَفرة اجاني طلب ع الانستـكرام منة، مارديت بعدهي راسل لان جنت حاضرتة من الواتساب حجـة وياي شلونج شخبارج زينـة هاهيّ ماطول بالكلام ابد ..

ماقبلت ع طلبة وجنت اجاوب بـ برود واروح راسًا، ما جان تصرُف مُتعمد ع كد ماجان تصرُف نابِع من گلبي ع كد ماجان ماجنت فاقدة الشغف تِجاهة هـواي

ضّل بالـ ٥ ايام تقريبًا ع هـذا الحـال وحتى المُتابعة مـا شالها عكِس تصرُفاتـة القديمة جان يشيلهة رأسًا اذا مارديتهـا

يوم من الايام جنت نازلـة يمهُم وانصدمت من علي وهوّ يكول انُ سُراج حالتة حَيل تعبـانة جنت اسمع لكُل كِلمة يكولوها والي عرفتة انُ الجو جـان حيل بارد وصاير بي فايروس وحيل مأذي نشلة قوية كُلش

جدو كال لتبقوا وحدة روحوا يمـة غَيث وسَجاد جانـوا قريبين ع امتحانات نُص سنة وهم دوامات وعلي مو بكيفة يروح ويرجَع ويسافر و اميـر مايكدر يروح هم دوام وهم مشغول فَ راحوا زَعيم وبيبي وجدو كالوا هم يزورون وهم يجيبونة و يجي على اساس

راحـوا هناكَ وكالوا انُ سُراج جانت حالتـة صعبة شوية ع كد ماجان الفايروس قوي فَ بقوا يمة تقريبًا ٥ ايام

بالي يمـة وما معروف يمتى يجون وشلـون، جنت يومية اراسل بيبي اتطمن عليّ وهيَ تكلي موزيـن

يوم من الايام جِنت كاعدة بليل اكلُب بالموبايل الساعة بـ ١ تقريبًا، وصلني مسِج من عندة من بعَد اكثر من ٧ ايام هوَ كاطِع

سُراج
مشتاقلج ..

حَسيت ساعتهـا گلبي نُبض بنفس الوقِت جنت مصدومة، اباوع للرسـالة وساكتة ماعرُف شـرِد

سُراج
انتِ زينة؟

شَمس
انتَ شلون صرت مو مُهِم اني

سُراج
احاول اصيـر زين

شَمس
انتبه على نفسك هـواي واذا هاي ارجَع

سُراج
ان شاء الله شمِس

ماطول ويـاي شكم رسالة وخلة وراح
ضليت صافنة بالرِسالة وجنت احِس بشعور غَريب
اول مـرة يكلياهة و اول مـرة اصلاً يحجيلة كِلمة ودية هَيج

اليوم الي بعدة سالت بيبي عليّ كلتلي صار زين الحمدلله بس ميقبل يجي فَ قرروا يرجعـون ويعوفوا براحتة

باليوم الي بعدة بيوم جيتهُم من ايران
جنت بالقاعة، الدكتور يحچي والكلمات تطير من ذهني مثل طيور فالتة من قفص. فجأة تلفوني اهتزّ برسالة. ترددت أفتحه، بس فضولي غلبني.

سُراج
جا انتِ كاضيتها عله أمي يومية تتطمنين اعليَّ مِنها، وأنة ما تذكريني برسالة؟ تره أنة مو غريب، تكدرين تجين وتتطمنين عليَّ من امي .

احس تخربطت وبنفس الوقت انحرجت، ياربي شلون شايف الرسـالة من بيبي. عيوني على الشاشة، وأذني تحاول تلحگ شرح الدكتور. صارت الكلمات تتداخل صوت المحاضرة يختلط بصوت داخلي يقرأ رسالتة .

سُراج
شمِس، هاي المسافات الي بينة ابعديها

ابتسمت بمرارة. وأصابعي كتبت بسرعة
شَمس
المسافات انتَ خليتها، مو أني.

رجع جوابه مثل صفعة ناعمة
سُراج
يُمكِن. بس لو سألتج تقبلين بصداقتي قبِل جان قبلتي؟ جاوبيني بصراحة. اكيد لا
بس هل مرة انة رايد حَتى لو انتِ ماردتي على فِكرة

تجمدت وكلبي كام يدك، مشاعري متوزعة بين رفض وخوف وفرح غامض.

سُراج
ردي

تنفست، ما لكيت كلمة، كأن روحي معلقة وماعرف شرد حَتى

سُراج
انة ما أريد أوضح أكثر، بس كل اللي أعرفة انّي رايد صفحة جديدة بينا. صفحة بيها احترام، وبيها وگفة يمج لو تحتاجين. ما راح أطلب شي أكبر من اللي تكدرين تنطينيا

كلمات سُراج جانت مثل حبل يشد بيه روحي ويجرها لجهة ما أريد أمشيها. اني أعرف هو ديحاول يصلح علاقتنـا ويصعد بيها لشي اقوى بعد، بس اني ادري من قبِل انُ هو مجروح من قبل، وادري انُ جروحة بعد ما طابت وادري بي لسة يحبها.

ويمكن هالجروح هي اللي خلّت كلبة يلتفت إليّ. بس شلون اكدر أصدك مشاعره؟ شلون أفرق بين حبّ حقيقي وبين ظلّ حب قديم؟ شلون مُمكِن اقتنع انُ هوَ ماجاي ينسى زينب بية؟

كل ما يدز رسالة بهاي الايام أحس بيه غير، مرة يبين إنسان قوي وواكف طبيعي، ومرة يبين طفل تاه من حضن. وأني بين فرحة صغيرة إني قريبة من قلبه، وبين خوف أكبر من إنّي أكون مجرد علاج لجرحه.

هو بنفسه ضاع بين مشاعره، حبّه الميت بعده حي، اني مجرد ساحة معركة بين ذكريات قديمة ورغبات جديدة.

من الارتبـاك والتشتت الي صارلي كتبت اني بالمُحاضرة وسديت الموبايل

مافتحت موبايلي منـا لمن وصلت للبيت رديت عليّ رِغم انُ كلبي جان ينبُض يم المُحادثة

شَمس
اسفة جنت بالمُحاضرة وستوني رجعت للبيت

ماتوقعت يجاوب بهدوء وتوقعت يكون ساحِب نفسة ار ماسح رسايلة، وداخِل بصُراع الـ تردُد كالعادة
سُراج
عـادي مو مُشكِلة، اصلاً انة مارايد كلام كد مارايد افعـال وتغيير
شلونة دوامـج ؟

الجملة جانت عادية بس بيها ثقل. مثل باب انفتح بسلاسة، وأنا ما وعيت إلا وأني داخلة بي .

من هالليلة، بلش يسحب الكلام مني بطريقة غريبة. مو أسئلة مباشرة، لكن مثل خيط يمِدّة بـ ايدة، وأني من غير قصد أمد الخيط الثاني.

يسألني عن المادة الي عدنياهة باجُر، عن المحاضرة اللي فاتتني، وعن ابسط تفاصيل تخُص يومي ، وأني أجاوب، ومن جاوبي ينولد سؤال ثاني، وتنتهي بـ سوالف ما إلها علاقة بالجامعة.

مرّت الأيام، وبدة الموضوع يتغير كُليًا، وشمهما اكول بعَد ما ارد عليّ الكا مستدرجني بالكلام وكانهُ كان يفُرض نفسة ومحبتة علية بس يدون غصُب، صـار مهتم بدراستي بشكل جبير

وصـار يعرف كُلشي يخُصها، اول ما اكمل مُحاضرة عادية يسالني فهمتي، و اول ما اخلص امتحان يسالني جاوبتي اول ما ارجع للبيت يكُلي نامي و اول ماكعُد من النوم يكلي يلا بلشي، ومرات هوّ يقسملياهة من يمة وكون اجي واني مكملة حَتى انتقل للي بَعـدة، يومي صار عِبارة عن دراسة وعن سُراج
وشي بعد شي بدينـا ننتقل من اطار الدراسة لاطـار الحياة

وصار يتردد بـ انُ يسمعني كلمات حلوة، ابسطها
جنت طالع اليوم، تذكرتچ لأن شفت شي فُلان لانهُ يذكرني بيج

وأني... تدريجياً بديت أطيه تفاصيل أكثر. بالبداية كنت أجاوب رسمي، بس من شفت اهتمامة مو زائف، بديت أكتب براحة وتعمُق ..

صرت أحجيله عن دكاترتي اللي أتحملهم واللي ما أتحملهم، عن تعبي بالمختبر، عن موقف صار ويايّ بالبيت. مرات أرد بسرعة، مرات أتأخر، بس هوَ جان حاضر دائمًا وياي وكانهُ موجود ٢٤ ساعة الي ..

مر اسبوعين على هذا الوضِع تقريبًا، ومن بعَدة صار شي ثاني. بديت أنتظر رسالتة مثل ما ينتظر المريض دوا واني الي صرت اتحمس ع مكاتيبة واهتمامة الي.

ما بيوم غاب، حتى وهوَ حول سَفرتة لسَفرة عِلمية ودخل بورشة بـ مجال مُعين يخُص مجالة. إذا ما كتب بالنهار، يجي الليل برسالة طويلة، يسردلي يومه بالتفاصيل الصغيرة. وأني أبادلك، وأحجيله كأنه دفتر يومياتي.

شهر كامل مر، وكل يوم يثبّت جذوره أكثر. ما جاب طاري "الحب" ولا "الماضي"، بس حضوره جان كافي. حضوره مثل ظلّي، يرافقني حتى لو ما أشوفه.

مرات نضل نحچي ساعات، يبدأ الموضوع بالعقاقير وشكد هيَ مُزعِجة وينتهي بسوالف عن الطفولة، عن أشياء نخاف منها، عن أحلام نضحك عليها.

أذكر ليلة ظلينا نكتب لحد الفجر: هو يحچي عن شوارع إيران، عن الغربة وعن اشتياقـة النة وعن تورطة بالورشة ورِغبتة بالجية، وأني أحجيلة عن شباك غُرفتنـا الي ودي انُ يتنزل اكثر حتى اكدر اسيطر على كُل الوضع، لان طولي ماجان يساعدني اشوف كُلشي براحة، الا اصعد ع الكُرسي يلة الوح، وهوَ يضل يضحك عليَّ بسبب تفكيراتي

جان ضايفني ومنتظُر اوافق وطول هل مُدة اني مموافقة عليّ ويوم من الايام سئلني بـ ليش وكتلة بدون تردُد
اني ماقبٰل اكون بنت ثانيـة بحياة شخُص، وانتَ ضايف صَفا ك بنت وحيدة ف ماحِب اكون بنت ثانيـة ..

حجيتهـا برُغم تردد كلبي وماتوقعت انّي الكة نتيجة فورية لهاي الدرجة هـاي

سُرعان ما دزيتلـة هالرسالة سكتت لِلحظة ورجع كِتب
سُراج
يلة اقبلي المُتابعـة

شَمس
بس اني كتلك !
وسويتلة توجيه ع رسالتي

سُراج
تاكدي مـرة ثانية..

رحِت ع قائمة مُتابعتة لكيتة لاغي مُتابعة صَفا ودازلي مُتابعة
بيومهـا ابتسمت ابتسامة جانت من اعماق كلبي وافقت ع مُتابعتـة وسُرعان مـا وافقِت كتب

سُراج
تدلل شمسي

صدمني بـ كلمِتة هاي وبنفس الوقت جاوبتة بغيض
شَمس
لا تحُط يـاء التملُك وبنهاية اسمي شَمس مو شمِس يمتى تستوعب مادري

سُراج
بس انة ماشوفج شَمس اشوفج فعلاً ذيج الشمِس الي تنور الدنيـا وتضيئها

هوَ يكتب وكلبي يخفق بقـوة وكانهُ طبِل مو دقات كلب
صح جِنت مبتسمة بس ابتسامة ثگيلة، لأنّي أدري بعدني ما أگدر أعترف لنفسي إنّي جنت أحب هاللحظة هـاي من بعد كُل الي صار ..

بمرور شهر، صار شي أوضح. بديت أشاركه تفاصيل ما أنطيها لأي أحد. صرت أحچي الة إذا ضايجة، إذا فرحت، إذا جان مزاجي متعكّر من غير سبب. وهوى يستقبلني مثل صخرة صبورة، يسمع أكثر مما يحچي. وإذا يحچي، يحچي بكلمة موزونة، بس جانت تكفي ب انهّا تهديني.

وبمرور شهرين كاملين من سفره، صار طبيعي إنّه كل يوم نكون سوا بالكلام. ساعات نكتب، ساعات يطلُب نتصل بليل، وأحياناً بس نكتفي برسائِل وكلماتة البسيطة، اللي تحسسني إنّي بأمان.

ومن هالاعتياد، اكتشفت أني انتقلت من مرحلة ما أحبة إلى مرحلة أشعر بالفراغ إذا غاب. وهاي أخطر مسافة مُمكِن يوصللها كلب إنسان

ما جنت أتخيّل لحظة إني أكون قريبة منه. سُراج بالنسبة إلي جان ثُقل، جان جرح مفتوح أمشي حذره حتى لا ينزف عليّ.
جنت أموت من حضوره، وأرفض مجرّد فكرة إنه يدخل بحياتي. كلشي بيه جان يذكرني بوجع ما إلي علاقة بيه تحكُمة، غيرته، ونظراته على ايّ احد يحاول يتقرب مني حَتى لو اخو الي يعرُف شنو نيتة وياي .

جنت نافرة! كُليًا نافرة. خصوصًا بـ اخُر فترة حسيت بـ قرف منة وجنت أعتبر قُربة خط أحمر، وأحط بيني وبينه جدار صلب. وگلت لنفسي مرارًا ب انُ مُستحيل أرضى يكون إلي حصة من حياتة.

لكن هو... بذكاء غريب، مو باندفاع ولا بلهفة، عرف منين يدخل. ما طلب مكاني، بس صار ينسج وجوده بهدوء بين تفاصيل يومي. تدريجياً صار حضورة ما يثقلني بالعكس، صار خفيف مثل ظل، يرافقني بلا ما أستأذن.

وجنت كُل ما اذكُر موقف قَديم من الي سوى ويـاي يستنكُر الموضوع ويكول الماضي صـار بالماضي واحنة ولد اليوم هَسة ..

هو ما جاني كحبيب ولا كغريب... جاني كصديق، كرفيق يومي. يفتح بيبان صغيرة ما التفت إلها، وأني من غير وعي بديت أتركه يدخل. ما حسيت شلون سكن بقلبي، غير من لزمت تلفوني بليلة وما لكيت رسالة منه... وهواي حسّيت بفراغ ولكيتني باعثتلة الِف رِسالة والخوف منبعِث بداخلي عليّ ..

صار وجوده مثل عادة... مثل النفس. كلشي جان غصب، كلشي جان ضد الي رِدتة، بس الصورة النهائية؟ صورة أني راضية. مو لأني انبعت، بس لأني اكتشفت إنّ الجدار اللي بنيته ما كدر يوكِف ذكاءه وهدوءه.

وهسه، من أرجع أفكر شلون رفضته بهالشدة، وصرت بعدين أشوف الدنيا ناقصة بدونة ؟ ما ألكى جواب. غير إني أگول: هو عرف شلون يتقرب منّي من غير ما يخلّيني أشـرد وجانلي ذاك الفراغ الي شَمس مفتقدتة بحياتها ومحَد سدلهيـا ..

بدينا بـ امتحانات نُصف السنة وجانت اعصابي تلفانة، خصوصًا بضغُط انّي لازم احافظ على مستواي بدافع اكو ناس تنتظرني نفس جدو وبيبي الي موفرريلي الهدوء الي اريدة وسُراج الي يسهر وياي بالساعات حَتى يدرسني وبابا الي واعدتة بـ احد الليالي اشد حيلي وارفع راسة بية ..

الشي الوحيد الي جان يصبرني وجود سُراج، كُل ما اتنرفز واضوج اجي يمة وهوَ ينتشلني ويمتص كُل غضبي بـ ثدقايق بَس

كضينـا فترة الامتحانات سوية، اذا ماجان يشرحلي جان يشرُف على قرايتي وماجان يقبل يخليني اسهّر وحدي، امن انـام جان ينـام الا يطمن علية ..

كملنـا امتحانات وهوَ كمل ورشتـة، ونفس ما جنت متحمسة لجيتـة جنت خايفة شلون راح تكون ردة فعلنا لمن نلتقي اول مرة من بعَد كُل هل تغيرات والقُرب الي صرنة بي ؟

بدينـا تحضيرات لـ عرس علاوي واميـر وجان الكُل فرحان وبدون ايّ استثناء، جان ع اساس يجي اول مايكمل من ورشتة حَتى يكون ويانة بس صدمنة وهوَ يكول انُ الورشة تمددت ٥ ايام زايد

عن نفسي زعلت لان جان بداخلي انّي اشوفة لان جنت مشتاقتلة، اما امير ف راعة ظروفة بـس علي جان حَيل ضايج ب انُ شلون سُراج اخو مايكون ويـا وزعلة جان ثگيل لدرجة سد الموبايل بوجهة بساعتها ..

وبعد يوم من بعَد ما كملنا امتحانات، جنة دنحجي اني ويـا فَ كلي انزلي سوي گهوة سالتـة ليش كلي الجـو بارد ومال گهوة متحسين هيج؟

شهاني بيـهة كتلة ايّ والله كلي ضلي ويـاي ع الخط ضليت ويا ع الخط ونزلت نحجي واسوي بـ الگهوة، محد جان موجود بالبيت الكُل نايم لانُ الساعة بـ ١ بليل والكُل بهيج وقت ينـام
محد غيري اني وسُراج يسهر لهيج وقِت

فجأة حَسيتـة سكت سالتة عَن السبب كلي جاي اسوي شغلة، مافهمت منـة بس ماجنت اسمع غيـر صوت حركات ولِلحظة كملت كهوتي وانداريت وجان باب المطبخ ينفتح

مالحكت اصيـح ب اول صيحتي والگهوة توگع مني بسرعة الا واني اشوف سُراج كدامي لازم جنطة وبمتنة جنطة

ذب جنطتـة بـسرعة واجاني ع السريع حَط ايدة على حلگي حَتى يقاطع صرخاتي الصغيرة
يُتبععع ....
رئيكُم بـ انتقالة الاحداث ؟ وهل ياترى الجـاي راح يكمِل حلاوة الي راح ام للقدر رأيٌ آخر ؟
_______________

ايلول

علي
شايفة ركبتي ؟ اگصها گص اذا انتِ تتعدليـن وتمشين عدل

ايلول
طلكني، لحظة ماضل وياك والله انتَ واحد همجي مهتلف شلون رضيت بيك مادريييي

علي
هوَ لو ما عرسنا بعد اسبوع جان طلكتج بس المُشكلة لزمتيني خوش لزمة ودافع مليارات اعليج شني اليضمنلي ترجعيلياهن؟

ايلول
عليييييييييي وخر اريد انام وخررر مُستفزززز مليارات صارف علية مو اني فلة ب دُبي

علي
نامي من نامت اعليج سليمة شكول اعليج هسة انة شكتلج بس اريد افتهم كتلج كولي قُندرة كولي عِز الدين لتكولين عزوز شكتلج شكتلج

ايلول
لسانك عدلة احسن الك

علي
عمي انة واحد همجي رجعي ابن ريف معيدي شتكولين اعليَّ كولي بس انتِ العدلي روحج لا تخليني اموتج

ايلول
اذا ما الغي الخطوبة ما اتسمى ايلول كِلشي ماريد منك بعَد اكرهك هووووواي سمعت اكرهك

علي
طبني مَرضض كون، روحي الغيها انة هم نفسي لعبت بس خل اشوفج كايلة عزوز اويليييييييي يابة - وهوَ يعض اصابعة -
الا اكلج بسنوني اكِل

ايلول
حقيرررررر انتَ واحد حقيرررر

كتلة هّيج وسديت الموبايل بوجهة، يعني ابتليت جنت اخابرة واجة عزوز وكتلة هلا عزوز صار نفس الراديو مايسكت

حقير يكلي روحي الغيهـا والله حقير
بجيت وضليت اغلط عليّ، اعرف شلون احركلة كلبة صورتلة وجهي ودزيتلهـيا وغلقت الموبايل

شويـة وصاحتني ماما
ام ايلول
ماما علي يكول خل ترد علية ردي عليّ

مارديت عليّ وضليت سادة الموبايل وكاعدة وزعلانة بعدين مانطاني كلبي عليّ وفتحت الموبايل لكيتة حارك دنيا حرك بالمُكالمات

كتبتلهـا شتريد ؟

راسًا خابرني اخذتلي شوية ورديت

ايلول
نَعم

علي
نَعم الله ضلوعج صارلي ساعة اخابر حتى ابوج خابرتة ماتردين علية

ايلول
مـاريد واصلاً بعد ماحجي وياك

حجيتها بنبرة مخنوگة وردت ابجي

علي
تؤتؤتؤ انعل يومي وساعتي لا تبجين يبعد علي يروحلج علي فدوة والله العَظيم خل اولي ماعليج بيـة اعتذر وعلي حگج فوك راسي لا تبجين من فدوة اروحن لهل دموع لا تبجين

ايلول
علي والله قهرتني قهرتني

علي
ماتدرين بية مخبل مني يتحملني غيرج يبعد روحي وچلاويي كلهن، اعتذر وحگج فوك راسي لا تبجين يابعد الابهَر والتاجي و المدري شني هذني الثنين بگتهن من شمِس هيَ علمتني اعليهن كلتبي مهمات ف انة اكلج يابعدهن وعلي

ايلول
وخر زعلانة

علي
بيمن اراضيج تردين كليلي والله يجرالـج بس لا دموعج ينزلن

مسحت دموعي وصرت اسحّب بخشمي من الشهكة واكلة
ايلول
اني اعلمك هاي هسة وهيج تبجيني
من اجيك شلون

علي
لا وعلي فلا ابجيج بحيل الله، بس مرة يجوز ابجيج ارد اعرف دموعج هم مالحات نفسنة لو شكر نفسج

من گال هجي ضحكني، ماسيطرت ماضحك ع كلماتة وهوَ ضحك بخُفة

علي
ايّ ضحكي ضحكي، اصلاً انتِ الله ذابج اعلية حَتى يختبر صبري بيج بس شني يربج وعلي احلى ذبة بالتاريخ محمود مشكور ربي - وهوَ يبوس ايدة وكفاهة -

ايلول
مخبـل والله

ضلينـا نضحك ونسينـا السالفة، باجُر كال اجيج حتى تجيبين البدلات اخذتهن من اربيـل وكلهِن اشتريتهن حَتى بدلت العرس برغبة من علي، كال كل ما نضوج اريدج تلبسيها حتى نسترجع ايام عرسنـا

اجـة علي وقت الغدة سَلم ع بابا و ماما واخواني ونسوانهُم، باوعلي واستحى ادري بي، تدنيت وبستة من خدة اني
وخرت من يمة وهمس
علي
اشتعلوا اهلج

هوَ جان طاب للمطبخ بس هذا دار وجهة وراح

ام ايلول
يا ولك خالة الطريق منا

علي
ها خالة انعميت من العِشگ انعميت

طَب هوَ واني وماما نضحگ عليّ، ردنا نتغدة بالمطعم بـس اهلي ماخلوا يطلع كالولة اكعد ويانـة فَ جنة كُل احنة كاعدين ونحجي، وبابا جان حيل فرحانلي وعلي گوة گوة اخذ محبتة منهُم

كعد بابا يحجـي ع ايامي قبِل ويسولف علية ويوصي عليّ بية، جان ديسولف لعلي شكد اني مُغرمة بال العـاب وبلولو كاتي حصريًا

ابو ايلول
جنت كل يوم جُمعة اخذها للسرخجانة و اشتريلهـا ملاعيب وهيَ تبوسني وتكمز من الفَرحة

ابتسم علي وصار يباوعلي
علي
اشبعهـا الي تريدة عمي بس تفتح حلكها والباقي اعلية

من گال هَيج مرت سُهيل عطست

علي
وهاي بشهادة انة خوش نسيب الكُم

ضحكنـا كل احنة، وطلعنـا اني ويا توجهنـا لاربيل
اني جنت حاجزة البدلات بس تاكدت منهِن وشفتهن جيكتهن وجبتهن، بـ مول اربيـل جان اكو محَل مال العاب طب علي كال اريد اشتري لابن اخوي اشترة شكم شي واشترة دبدوب متوسط الحجم، تقريبًا بطول رجلية

ايلول
هذا هم لعلاوي شكبررررة بس حيل حلو يُمة حبيبي فدوة

علي
لا هذا لعمة علاوي مو لعلاوي، مو ابوج جان يجيبلج العاب وتبوسي انة هم جبتلج العاب وهم اريدج تبوسيني بس بوسة غير شريفة

كال هَيج وغمزلي خزرتة وكتمت ضحكتي لان ادري بي يتخبل علية اذا بنُص الشارع اضحك ضحكتي الشهيرة بت شهيرة على كولتة

جان شايل الدبدوب على ظهرة وبـ ايدة لازم العلاليك وب ايدة الثانية لازم ايدي ونمشي

علي
يايابة اذا واحد عرِف شافني

ايلول
تستحي مني ؟

علي
لا اغارن اعليج
اغار اذا واحد شافج
واغار اذا واحد شاف حُبي الج

ايلول
ما العالم هسة جاي يشوفوني شنو الفرق

علي
عاد ذولة ما يعرفونـة حَتى لو شافونا، يشوفونا بنظرة عابرة ويرحون، بس الي يعرفنا ممكن يضل يفكر بينة، وكل ما شافني يتذكرج وهجي انة اثور واموت واكسر دنيا
والله لوبيدي احبسج بقفص شلون البلبل وهو انتِ بلبل من فدوة لربج

ايلول
يُمة شكد همجي يُمة

علي
ايّ وعلي همجي بس بيج ياعيني، شَسوي وهدنيتيني تودهن

ابتسمت بوجهة واني اباوع لكل نظرات الحُب الي يطينياهة فرينا بوكتها اربيل فَر على هـواي شغلات كملنا تقريبًا العصر رحنة اكلنة بـ مطعم وكعدنة نحجي

علي
اكلج انة فلست غرفتي شبيها، امير يكلي بدلها بس انة عاجبتني شو

ايلول
اااااااااه علي صدُك تحجي تريد تخليني بهاي الغرفة مال المجرمين والله لو اموت

علي
شبيها وعلي تخبل، شايف من تكعدين الصبح وتشوفين كدامج خزنة السلاح اويلي

ايلول
علييييي والله لو اموت ماعلية انتَ شايف غُرفتي ؟ حتى الفراش وردي وجاي تريد تخلي غُرفتك غرفتنا عمي اني انطيك الفلوس بس لا تخليها هيج

علي
ايّ اصرفي اعلية بعد كلبي بس هاي العايزة، ولج اشاقة مو اعلى الفلوس والله بس انة غرفتي مرتاح بيها

ايلول
عليييييي انتَ راح تشاركني الي ترة بالغُرفة حتى ال٥٠٪؜ غلط نتشارك بالرأي المفروض الرأي الي وحدي بنهاية اني اعيش بيها اكثر منك ماتريدني ارتاح نوب حتى بغرفتي

علي
عمي يلة احجـي بس خوما ترديها وردي من هسة اكلج والله فلا اقبل انة رجال الي هيبتي وردي شني

ايلول
حباب علي حباب والله احبة حلو

علي
ها يعني خالتة ب بالج؟ انجبي ايلول وردي ماكو شعدنة وردي كوكب زُمردة مدري شسمة مارضى انة مارضى

برطمت شفايفي ودرت وجهي
ايلول
اوكي شتريد سوي مايهمني

علي
تؤ استغفرالله ايلول اسمعيني حبابة

ايلول
هسة شنو قابل يطبولك اخوانك مثلاً ؟

علي
لا بس ياخي الغرفة راحتي بيها انة ترة هواي اكضي وكتي بغرفتي واشتغل بيها هواي شني وردي والله تلوث بصري

ايلول
ماريد كتلك ماريد والله مازوجك اذا تبقي غرفتنا هجي مال مُجرمين

علي
وعلي راح اركعها بالچطل(شوكة) هسة اذا ضلت تحلف ماتزوجك عمي يلة انة عدي اقتراح
الغُرفة انتِ من ذوقج بس صالة ما تدنيلها لان كِل وكتي بيها ومكتبي وغراضي كلهن بيها

ايلول
هم خـوش فكرة يلة بس خوما تخليهن اسود وين اكو اسود و وردي

علي
عمي عسما بنزركي شعليج انتِ المُهم انة راضي

ايلول
علييييي لا حباب ننسقهِن سوية

علي
لا ممنوع ماتدخلين بية ولا اتدخل بيج

ايلول
لا من هسة حياتنـا مبينة تجنن ما شاء الله

علي
ب عنادج اكيد تصير تجنن

ايلول
وبخبالك هّم

باوعتلة صفح اندار منا ومنا محد كفخني على راسي ايدة جانت ع طاولة اخذتها وعَضيتها حيل

ايلول
مالحة

علي
حتى تغزر بيج يمچلوبة خرب عرضج اعلى هل چلابية هاي راح اخذ ابرة تگزز بس ارجع

ايلول
ما يفيد من يوم يومك جلب مسعور

من كتلة هيج باوعلي وضل صافن علية واني ضليت ضامة شِفتي واباوعلة

هد الخاشوكة من ايدة وكال الحمدلله، اذا كملتي يلة خل نروح

خرب يومج ايلول ليش تدوسين زايد ..

خلينـة ورحنة صعدنا بالسيارة اول ماطبينة كتلة بهدوء
ايلول
اسفة علي والله داشاقة وياك

علي ب انزعاج
لا والله ايلول خليتج تتمادين زايددد شو انة ماقبل هجي تكليلي وين الاحترامات جاااا

ايلول
لعد انت وين احتراماتك من تكلي مچلوبة

باوعلي وكال بعصبية
علي
ادبسز انة اكبر منج ب ٩ سنين شني مالهن هيبة يمج اذا كلتيلي هجي بعَد والله ي ايلول راسج يتكسررر سمعتي

ايلول
غلططط لا تغلط علي شنو راسج يتكسر شكد همجي

علي
شكلج ناوية تضلين بغلطج خل اسكت احسن

سكت هوَ بـ انزعاج واني سكتت بـ انزعاج شوية وخابرتتي فَرس كعدت احجيلها الي صار بالتفصيل جانت موصيتني ع كم شغلة من اربيل هم كتلهـا جبتلجياهن كلهن

علي يسمع ويستغفر ما عاجبة الوضع لان كضيت كُل الطريق اني وياهة نحجي

سديت الموبايل ونتيجت ع الكشن زين
علي
شبعتي سوالف ؟

ايلول
ايّ شبعت وانتَ شبعت من صوتي الحلو؟

باوعلي صفح ودار وجهة مبين زعلان
الشـارع فارغ ودنيا ليل تدنيت يمة وبستة من خدة و وخرت بسرعة

ايلول
هاي بوستك الي تطلُبنياهة بُمناسبة الالعاب

دار وجهة الي ولزم خَدة وضحگ
علي
صايرة ماتكعدين راحـة تلعبين وي نـار الغلط ترة هاااااااااا

باوعلي بنظرة ادبسزية خفت منة وكتلة
ايلول
لا والله اشاقة وياك شبيك هاي وينة وصلنة يلة حنوصل

علي
يلة خوش ماضل شي ان شاء الله خير هيَ اسبوع واحد انة اتحملت سنة ونص ماتحملي اسبوع؟؟؟؟

يحجي ويباوعلي باوعتلة بخـوف
ايلول
علي لا تخوفني حباب

من شاف الخوف بوجهي مبين ضحك
علي
اشاقة وياج حبيبتي والله اشاقة ايلولة لا تفكرين بشي موحلو، انتِ روحي اكو واحد ياذي روحة هجي اخبث وياج انة شنو احطج اعلى كلبي وبنص عيوني غير روحي انتِ

اخذ ايدي وباسها بحنية، ابتسمت الة واحسة طمني بكـلامة

رجعت للبيت وبدينا بالتجهيزات القوية، الثلاثاء حنتنا والخميس الزفة، احترامـًا لابو شَمس ولان السنة مالتة ما طالعة اتفقنا كُل شي يكون بطريق هادئة وعقلانية

وخصوصًا انُ وضعي حَيل حرج، بين اهلي مسافرين جانوا وبين انّي ب بيت خالتي من تصير عُطل، وعلي حيل مايعجبة الكعدة ب بيت خالتي وهم ثنينهُم ان كان علي او امير على عينهُم احنة بـ اقسام

باجر يوم حنتي وبين الفرحة وبين الـخوف شعوري حان مُتلخبط بس مُجرد ما اروح لعلي جان يمتص كُل الخـوف مني ويكعد يهدئ بيـة، اجة اليوم الثاني والي هوَ يوم الحنة

من عاداتهُم وتقاليدهُم انُ الولد عيب يطُب للحنة لانُ الحنـة هيَ للنسوان بَس واهل البنية يسوها احتفالاً بـ البنية
جابوا البنات يمي من الصُبح سُراج و سَجاد وخلوهن وراحوا وعلي وامير ماجوا ابدًا لان هم جانت عدهُم حِنة شبابية بيناتهُم بالمزرعة وعازمين بيهـا بَس الشباب اصدقائهُم وشكم واحد من معارفهُم

فرغنـا بيتنا بالكامِل و اخواني راحـوا وي سُراج وسّجاد مع انُ احنة ندري بتقاليدهُم عيب اهل الولد يحضرون بـ عرس بتهُم ويشاركون و يركصون وكذا بـس هُمّ اصروا عليهُم لان الحنة جانت بس شبابية وبيناتهُم واكثر شي جانت متقصرة ع اصدقاء علي بالجيش

جنـة مزيينين البيت بـ زينة تخبل، واحنة اساسًا عزمنـا بس موناس هواي هواي بحيث اقاربنا احنة واقاربهُم هُمّ اجوا كيتين (٢ سيارات كبار)

جنة مسويـن فعاليات حَيل حلوة واشياء مال لمّة بنات تجنن، كالعادة طبعًا مرت صَفاء وسُهيل هنّ الي سولي الميكب هم الي وهم لفرس ..

علي وامير جـانوا موصين شَمس ع انُ تسويلهُم تغطية كاملة لكُل الاحداث كُل وحدة ع حِدة

ماما وخالتي وام علي وام امير وبيبيتة ومرت عمة الثانية ع كَد مـا خلصت الحفلة وخلن وكعدن بالصالة

احنـة البنات ضلينة عالكين الديجي وجنة جايبين فرقة كاملة ويانة مـال ركُص

كضيناهة بين النضحك ونركُص ونطلع مواهبنـا مال الركُص و وحدة تعلم الثانية وبين الي نلعب لعبة اسئلة وساعة مُسابقات وقطعنا الكيك سوى وصورنـا ولعبنـا جرئة وصراحة وماخلينة شي يونِس ما سوينـا

تونسنا بشكِل موطبيعي وكُل الموجودين جانوا حبابات حَيل وكُل احنة اخذنـا على بعُضنا هواي، جانت احلى قـرار اخذنـا انُ الحنة مالتنة تكون بس بنات وخالية من الزلم، اخذنـا مساحتنا الخاصة بالرگص والفرفشة والضحك

وطبعًا ثنينة اني و فَرس جنـة لابسين فساتين بسيطة ومشلحّة بـس حلوة، واتفقنـا البدلات الباقي وبدالات العُرس ناخذ صور بيهن من يجـون بيوم العرِس وهم نسوي حّفلة بسيطة الصُبحية

طبعًا بالكوة قنعناهُم بهذا القرار لان كالوا احنة ننخبُص نضل ومانكدر من الليل نجي بحيث الصُبح احنة موجودين كون

كملنـا حنة البنات فتحت لكيت شكو لقطة خايسة شَمس دازتها لعلي وعلي كاعد يعدلي ويصفلي ويتوعدلي واني اضحك عليّ

بـليل دزلي تصـاوير الحِنة مالتهُم كاملة، مسويهـا بمزرعتهُم بطريقة حيل حلوة جايبين كراسي ومدري وطبلات ومرتبيـن الوضعية وعازمين اصدقائهُم وعالكيهـا علك بحيث لـ ٣ علي يلة رِجع للبيت

اليوم الثاني مشغوليـن جنة ثنينة بالعرِس وبنفس الوقت جنت حايرة بين الخوف والفرح. كلبي يدگ بسرعة، وافكر بكل خطوة جاية، بعيون الناس، وبالتغيير الجبير الي راح يصير بحياتي. شعور غريب يجمع بين التوتر والحلم الي جاي يتحقق. صحيح جنت خايفة، بس يكفي من اذكر إن النهاية راح اكون يم علي، وهذا بحد ذاته يطمني هواي .

وعلي، من جان يشوفني شكد ما جنت مرتبكة ماجان يقبل ابد ويكعد يحاجيني ويقنعني انُ هوَ وياي بكُل وقت ودائمًا ما يراضيني بكلامة الي يكون طالع من جوة گلبة
علي
إيلولة، لا تخافين ترى أنة يمج، وما أخلي الدنيا كلها تزعّلج. إنتِ هسه صرتي إليّ، وأنا أصيرلج سند مو تعب ، إذا تعبتي اخليج ترتاحين بضلوعي، وإذا خفتي أذكّرج بس اريدج تذكرين إنج بحضن آمِن

الطمأنينة الي جان يستمدهـا الي جانت تغلب الخـوف الي بية ورُغم اكو تفكيرات هواي بوضعنـا جنت داكول دام هوَ وياي كُل شي راح يهون ..

من الصُبح اجوي هُمّ يمنـا، امير جان مسوي مُفاجأة لفَرس فَ اخذها وراحوا مكان وحدهُم يصورون واني وعلي اكتفينـا بالبيت بالتزيين الي بـرة ناخُذ كُل صورنـا الحلوة بالبدلات

( اخُر بـارت بالقُصة حيكون بـارت اسمة " تسريبـات " راح اسرِب الكُم بي صور حصريًا من القُصة )

علي ماجان يضيع الفُرصة الي تِجي الة ساعة يخجلني وساعة يطيرني وساعة يفرحني بـ همساتة الجان يهمسلي بيهِن، جنت مجننتـة جنون خصوصًا شعري ابد ما لعبِت بي وضل على نفس اللون وعلي طـاير بي ويكلي ضارب وي بياضج بشكِل

فرحتنـا ثنينة جانت متنقاس بـ ولاشي بالدنيا كُلها، جانوا جاييـن هوَ واميـر و ع اساس سيارة الزّفة تطلع منا وتلحگ السيارات الي طلعن منهُم ويجن النـة ..

بنُص التصوير اجتِ مُكالمة لعلي، جان واكف على صفحة ويخابر واني اباوع للصور وي المصورة وفرحانة بيهِن، رحت يمة سئلتة جاوبني بـ ( طلعلي شغُل كُلش ضروري )

استغربت منة وكتلة انتَ صدُك تحجي ! بيوم العرِس طلع عندك شغُل ضروري ؟ كلي اجة مُفاجئ وهسة بالموصل اكملة وكُلشي يسري ع خيـر

كملنا الصور بس جان مبيـن انُ هوَ ضاج، ضوجني ويـا ازيد بس خّلة وراح لان جان مبين شكد مستعجِل

الزفّة العصر واحنـة كون نبلش بـ ٢ بالميكب وكُلشي اني خليت البنات يسولي لان اداعهِن حان بنسبة الي يجنن وخفيف ع الوجه ونفس الي احبة عكِس فَرس الي راحت صالـون

بدينـا نسوي الميكب ونغني ونركُص بلشنـا بـ ٢ كملنا بـ ٣ ضبُط بدون سترس(ضغُط) وبدون ايّ عوائق، الميكب جان يجننن وهل مرة كثرتلي بس فعلاً جان حلو، استلمتني مرت سُهيل للشعـر كالتلي حَتى ما يضايقج وبِما انُ طَريق طويل احسن شي تسوينـة مرفوع وفعلاً سوتلي تسريحة مرفوعة بس بطريقة حَيل حلوة

فُستـاني الابيض جان عبارة عن ضيگ من فوگ لجوة وبي ورِد مطرز بشكِل عشوائي ويجي نفس النفِش قُطعة ثانية البسها ع الخُصر والطَرحة مالتها كُلهة مطززة بـ ورد بشكِل حيل نازك ومن صَدِر والردان كُلة مفتوح الفُستان جـان

كملت كُل شي والزفـة بـ ٥ ضبُط هيّ يمنـا، نشوف بالكاميرات نزل علي وجان لابس زيَّ العسكري، هوَ من زمان كال اني بالعقِد لبست رسمي وبالحنة البس دشداشة وبالـ عرس مالتنة البس زيي العسكري، ومن الجهة الثانيـة نزل امير وهوّ لابس قاطة، كُل وحدة من بيتهـا طلعت بس بنفس الوقت صـار كُلشي

طب علي بالبداية و ويـا بيبيتة وامـة والهلاهل بدت تتعالى، اول ماشافني احـسة تلعثم، وحَتى الضحكة صـارت صعبة عليّ

جنت لازمة بوكي الورد وكاعدة واني مبتسمـة بهاي اللحظة بالذات اجتني لحظة ادراك انُ احنـة فعليًا راح نتزوج ومن بعَد كُل شي صـار!
بشعور لا ارادي دمعن عيوني وهوَ يتقدم نحويي وصوت الهلاهل رج الدنيـا رج

صـار يمي لزم ايدي وضل يباوعلي بتمعُن وحجة بهمِس
علي
سُبحــان مَن صورج بهاي الملامِح
وسُبحــان من زرع حُبج بكلبي لهاي الدرجة

باسني بـ راسي، وحط راسة براسي وتنفس علكيف
علي
انة بـ اسعد ايام حياتي، اوعدج راح اخليج سعيدة نفس ما خليتيني سعَيد بهاي اللحظة ..

ابتسمت بوجهة ونزلت دمعتي، مسح دمعتي و ايدة جانت كوة لازمهـا من انُ ترجِف

ضل يوصي بابا عليَّ وطبوا جدة وابو وعمة سلموا علية
وضلوا يحجـون وي بابا علية، بهل اثناء هايَّ لبسني علي البُركع، جان طويل وعريض ويغطي كُلي تقريبًا من دون ما يطلع ايّ جزء مني

ودعت بابا وماما ودموعي صـارت تنزل بـ غزارة وعلي كوة لازمني ومهدئني، ودعناهُم وطلعنـا

صعَد علي التضليل كُلة وكلي نزلي من وجهج نزلتة من وجهي وضليت ابجي وسيـارة فَرس وامير بعدهي ماطالعة جانت لان طلعت ورانا، هدئني علي وضل يضحكنـي بالطَريق

حط ايـدة بـ ايدي وراسي جـان على كِتفة وصـار يغني
علي
نـامي بعيني وبيَن رموشي
و وردات الحُب بيدك حوشي
مادام الليلة انتِ بجنبي
ما بِدي من الدنيا ايّ شي
نظراتك ذابت بشفافي
بعيونك طَيف الحُب غافي
اليوم انتِ ظيفة لعِندي
ولإجل الغالي يرخَص كلشي

باوعتلـة وابتسمت وتنفست براحة
باوعلي وعيونة اكلني بـ نظراتهن

علي
انتِ حلمي الي كلت مُستحيل يتحقق
بس جاهدت روحي وجاهدت ابوج وجاهدتج
وجاهدت كِلشي وكلت اخذة واخذتة
انتِ حلمي وهسة صار بين ادية
وشلون توصفين شعور انسان وهوَ ماخذ حلمة بين اديّ؟

ايلول
احبك علي لا تخذلني بـ فد يوم ديربالك

علي
اوعدج بشي؟ ماخذلج غير بيوم واحد
بموتي، ايّ انة اكلج راح اخذلج وراح اروح واعوفج
وعمت عيني لو بفد يوم خذلتج انة غير بهالطريقة هاي

ايلول
اسم الله عليك علي يومي قبلك

علي
هوَ لا اعتراض على حكُم الله بس غير اموتن وراج وبنفس اللحظة، وعلي ولا اخليج ترحين وتعوفيني لو تلكيني مخبل وافتر بالشوارع لو تلكيني بالسابعة

ايلول
يااااا علي شووو كافي بيوم عرسنـا ودنحجي بالموت صدُك تحجي

علي
وجودي بجانبج يخليني افكر بالموت
لان اخاف لا اموت وانة ماشابع منج
ياريت لو عرفتج ب اول حياتي
حرامات اجيتيني بعمر ال ٢٨
ويـن جنتِ عني بال ١٥/١٦ ساوينـا عايشين ب احلى ايام حياتنة و ايلولاتنة يفترن داير مدايرة

چنـة نحچي ونضحك، والجو كله فرح، وسياراتنا متقدمة صوب القيّارة. علي بالصدارة، سيارته طايرة مثل السهم، وهُمّ ورانا بس ع مسافة لان اجوي ورانـا.

فجأة، ومن غير أي إنذار، ارتطم شي ثقيل على سقف سيارتنا.
صوت الضربة رجف صدري، خفت ونزيت، ولزمت إيد علي برعب. الزجاج ما انكسر لأنه ضد الكسر، بس فوكنـا چان شي دائري غريب يضرب بالحديد.

علي ما تردد ولا لحظة... وكف السيارة بسرعة، فتح الباب ونزل بخطوة سريعة حتى يفتهم شنو اللي صار.

لكن بهاي اللحظة، ومن الجهة المقابلة، سيارة سودة اندفعت علينا بسرعة جنونية.
بلمح البصر، نزل واحد من شبابيكها، صوب السلاح، واطلق رصاصتين مباشرة على علي.

صرخت باسمه وأني اباوعلة من بعيـد، دمعتي سُبقتني، وسياراتهُم ورانا بَدَت تتحرك بعصبية، اتحركت السيارة لكدام ونزلت اني بسـرعة لعلي واني اردد

لا علي لااااا دتشاقة مووووو دتشاااااقة
حطيت رجِل بالكاع والرجِل الثانية بعدني ماحاطتها، رجعت السيارة بسرعة ونبتت طلقة من بعَيد بنُص كلبي

سمعت صايح من بعـيد بـ اسم علي، جسمي وكع عالأرض، وجهي صار بالتراب، والدم يلون ثوبي، الدنيا كلها صـارت ضباب، وصوتي جان ينطق بصورة هامسة بـ اسمة ... يُتبعععع
لو بحثتوا بطريقة ذكية راح تعرفـون هاي الحادثة تابعة لمنو وشلون بس ع العموم، كدرت اخفي بعض من المعلومات بصورة ذكية، الاحداث ١٠٠٪؜ صـارت بس ياترى منو هذا الي جان الة مصلحة بـ تخريب زواجهُم عليهُم؟ هذا الي راح نكتشفة بالبارت الجـاي
قراءة مُمتعة حبايبي ..