بيت جبر الفصل الثامن وستون 68 - بقلم هُدىٰ آذار

مَســاء الخير
ورجعنــا وياكُم بـ بارت جديد من قُصة
بيَت جبُر
للكاتبة : هُدىٰ آذار
لاتنســـون التصويت والتعليق بين الفقرات
قِراءة مُمتعة.
____________________

ايلول

بعدنـي ما متلقية بشكِل كامِل واحسـة جاي يتساخف او السالفة مُجرّد مزحـة فتحت الموبايل خابرتـة ماكو، مرة ثانيـة ماكو، الثالثة الموبايل انغلق

هـذا صدُك يحجي عود!!!!! الله يلعنك علي الله يلعنكك ويلعن اليوم الي تعرفت بي عليك
شمرت الموبايل ع الجُربايـة بقهر ودموعي صار تنزل بسرعة

منين اتلكاهة اني منينن وشلون احصلة بس لو يجاوبني بابا جوة يريد جواب ما عاولتـة يهدئ شوية

حطيت ادية ع وجهي وصرت ابجي بحرگة
احس تعبت وطاقتي أُستنزفت بعَد هاهيّ
اجاري منو واحجي وي منو اذا كُلها متسمعني !!!

بهـل اثناء سمعِت صوت صايح جوة، استغربت شكو مسحت دموعي بـسرعة ونزلت لجوة الصوت صار واضِح ازيد صوت بابا وماما من غُرفتهُم طالِع

تقدمت ودكيت الباب
ايلول
مـامـا شكووو

فتحّت أُمـي الباب وجانت دتصرخ وتحجي
ام ايلول
انتَ انسان اناني، مَريض بيك داء العَظمة

ابو ايلول
ايّ اني انسان اناني وبية داء العظمة شتردين بعَد
هاي كُلة بس لان اريد اعيشكم عيشة بيها حظ انتِ و اولادج

ام ايلول
هيجي عيشة حِلوة مـا تنراد انتَ دتخرب عيشتنـااا دتخربهاااا، بنتك ما الك عِلاقة بحياتهاااا ايلول وهيَ مُراهقة وصغيرة ما تحكمنـا بحياتهـا بعمري وبحياتي مسمعتك تكُلها وين رحتي و وين اجيتي هسة من تـالي تريد تحكُمها عوف البنت وي زوجهـا مرتاحينن عوفهـااا شتريد منها تريد تتزوج الها واحد نفسك واصل ومُثقف بس بينـة وبينها ما مهتم الهااااا

رحِت يمها وصرت احاول اهديها واسكتها بس هيَ جانت منهارررة وتصرخ بـ اعلى صوتهـا

ابو ايلول
اني اخرب حيـاة بنتي لو اني الي داريدلها حيـاة تستحقها
بنتج اذا ضلت وي هل هَمجي هذا تموتتتت ودامني اني عايش ماراح اخلي ايّ شي يستمر بينهُم

هـاااا وينة وينة شووو ماكووو ضمن وجودة وراح موووو شكلج يمتى يجي

يحاجيني ويحجي بعَصبية مو شلـون ماجان، باوعتلة واني ابجي ولازمة ماما واحاجي

ايلول
بـابا انتَ ويـن وعلي ويـن بابا علي متعذب هل فترة متعذببب حتى للبيت مديرجع علمود اميـر وانتَ دتحجي هيج

ابو ايلول
لعد شمنتظرين منة بابا هوَ هيج هاي طبيعة عملة ولج بـ اصعب ظروفج عافج طلقة بكلبج اكو اصعب من هيج ؟
١٠ ايام مافرغلة ساعـة ماكلف روحة يجي بهل ساعة هاي يشوفج ويجي

ايلول
بابا ساعة شنـووو اذا هوَ كُل ساع متنقل بين بغداد بين نجف بين الكوت بين البصّرة ويريدلة خيط امل وبعدين علي ما مقصّر يومية ديراسلني

ابو ايلول
امداج ايّ والله كون ترضين بهيج قِسمة عآيبة، لج بابا هذا واحد مهتلفففف مهتلفففف

ايلول
بابا علي مو مهتلف مو مهتلف علي يحبني وعلي هَسة زوجي ومُستحيلل اعوفـة تفهمني مُستحيللل اعوفـة

ابو ايلول
منا لليل اذا ماجـة وتفاهم وياي وحطينا بنود واتفاقيات تحُرميـن عليّ دتفهمينيييي!! اني عندي اشغـال باجُر من الصُبح اريد اسافرر

ايلول
بابا يجي ويحجي ويـاك صاررر بس كافي الله يخليكُم كافي لا تتعاركون والله احس كلبي ديذبحني من الالم كافيي
كافي ماما حبابة كافي اهدي

راحت للمطبخ شربت مَي وهيَ تشكيلي على بابا، حاولت اهديها شوية ماريد مشاكِل تصير بينها وبينـة في حين اني كلبي نـار

شوية وبابا طلع وهيَ طبت لغُرفتها نامت
كعدت بالصالـة وخابرت علي موبايلة رجع انفتح بس مايرد

بالساعة ضبُط اني بس كاعدة واراسل واخابر، حتى ع جهـازة العسكري ماصار يرِد
كتبتلة السالفة كُلها الي صـارت وكتلة انُ ضروري تجي لانُ باجر يردون يسافرون

مؤشر القراءة ثنين يعني رايحاتلة بس ما قاريهن للرسائل

ضّليت كاعدة بمكاني وانتظر رّد مثلة نفس المخبلة
اهز بنفسي و دموعي بوجهي وصافنة شراح يصيـر

طّب بابا علية تقريبًا الساعة بـ ٤ واني ع نفس كعدتي
ابو ايلول
هـا مارد ؟ راح مو هههههههههههههه يابة والله العظيم عرفتة عرفتة مابي خير مابي خيررررر بس انتِ اخ انتِ

ايلول
بابااااا بليل يجي حباب كافي لتضغط علية

ابو ايلول
اريد اشوف لتضغط علية وين تريد توصلج راح اسكُت واشوف شيصيررر بس اني الي حَد يا ايلول واذا صارت صدُك ماشوف ايّ واحد كدامي والي براسي اسوي واذا عاندتيني حتى انتِ ماريدج بعد

انتِ موصغيرة عمرج ٢٠ سنـة وعقلج براسج وتعرفين الصح من الغلط

كال هَيج بكُل برود وخلة وطب للغُرفة واني عيوني تبجي وتلاحگة بهدوء ..

أيست من عَلي وأيست من رّدة انتهى الامل كُلة وماعندي خيار غير فَرس

لبست فوك ملابسي صاية ولبست حجابي وخليت وطلعت، دكيت الباب فتحليـا حُسام سئلني شبيج كتلة مابية شي

طّبيت لغُرفة فَرس لكيتهـا نايمة، فتحت الاضوية واجيتهـا باوعت موبايلها مفتوح ع مُحادثتهـا هيَ وامير وعيونهـا مورمات وحُمرر

نزلت دمعتي على وضعهـا وحسيت بكُره وذنب فَضيع ساعتهـا
مسحت دموعي بهدوء وكعدت يمهـا

ايلول
فَرس فَرس تكعدين

فَرس
ها ها شكو

كعدت بسرعة مفزوعـة، استغربت شلون كعدت فَرس بعادتها نومها حيل حيل ثكيل وبالكوة تفِز

فَرس
ايلول اكو اخبار عن اميـررررر كوليلي بشريني حبابة

هزيت راسي بـ لا وحطيت ادية ع وجهي وصرت ابجي بحرگة

فَرس باستغراب
ايلول شنـو صاير شكو

ماجاوبتها ولا وخرت ايدي من وجهي ضليت ابجي بحرگة گلب و اطلقت عنان شهقاتي الي كانن مكتومات بالبيت

فَرس
ايلول حبيبتي شكووو صاير شي بينج وبين علي شـصاير كوليلي

ايلول
هوَ شنو الصاير بينة حتى يصير بيني وبينة شي يزعلني، اني ويـا مديصير بينة غير شي

فَرس اني تعبتتت تعبتتت والله تعبت
ادري انُ امير موبس ابن عم علي ادري انُ هوَ بعتبار صديقة واخـو واني كُلش زين مطلعة بعلاقتهُم ويجوز حتى هوَ متأذي امير مِمّا انتِ متأذية حتى

و اني، اني بنفسي كتلة روح علي ومن اول يوم كتلة لتخاف اني بخير يمي كلهُم بس امير يحتاجك، اني الي كتلة رجع روح فّرس الها موبس علمودج انتِ اوكي اني اعزج واحبج واريد اشوفج دائمًا بخير وماشوفج بهيج حالة لان كُل ماشوفج هيج احس روحي اموت بمكانج، بس بنفس الوقت استاذ امير ميستاهل الا الخير ومُستحيل انسى هواي مواقف مسويهن الي

بَس، بَس اني شذنبيييي شذنبيييي فّرس
لج اني كلبي متكطع مو بحال اهتمام ولا بحال حُب وغرام وضحك ومدري شنو هوَ احنة حالنة وينة وين هاي السوالف متكوليلي

وادري بي متأذي ومتوجع وماريد اصلاً يسوي نفس قبِل وياي اني ماقبل والله ونفسيتي هم متقبل والوضع الي احنة بي ميقبل

بس علي خرقهّا فَرس خرقهّااااا
يعني هسة اني ححجيها بس مو تاخذيها بغير معنى، تدرين كُلش زين مُستحيل اغار على علي منج، بَسسسس فَرس دالاحظة يخابرج ويطمن عليج اكثر مني !!!!

لج اراسل بي اني اتوسلـة مايجاوب!!!
تالي وقت رسايلي تصيـر جرايد وعلي يرد بوحدة بثنين !!

ب بداية علاقتنا وهَم ماصار هشي، من الاول موعدني ع الكلبة محترگ والمهتم هسة ماكووو ماكووووو

فَرس
ايلول لتاخذين بهيج صورة تدرين كُلش زيـن علي شكد يحبج ومُستحيللل نكدر نشكك بهالشي ولا تكولين علي تراجع بحُبة لو بشي علي مُستحيل يسوي هيج

بس صدكيني تعبان وحقة امير عزيز عندة وانتِ كلتيها يعز ويحب امير اكثر مِمّا اني اعز امير واحبة بنهاية هُمّ اصدقاااء الروح وحدة

ايلول
لـج هل وضع استمر ١٠ ايام قدرتة وماحجيت خو اني ستوني طالعة من حلگ الموت ويعبرني يومية بالليل يطمن علية بصورة سريعة ويخلي ويروح وحتى لو كاتبتلة اشياء فوك يجاهلهن اصلاً هوَ هذا الي جان يرد ع رسايلي وحدة وحدة ادزلة رسالة يدزلي عَشررررة عَشررررة

شفتيني حجيت شفتيني كلت؟ والله حتى مرات بيني وبين نفسي اضوج، نفسي تنفُر نفسي راسًا !!
اكول ايلول صدك تحجين تدورين هل سوالف بهل وقت هذا ؟

بَس هسة فَرس كُلشي اختلف، بابا راكُب راسة على علي يكُلي هسة طلعت حقيقتة وميناسبج اطلقي منة وسافري ويانـة وعوفي كُل شي، يكُلي ما آمن اعوفج هنا يمة و اروح

وتدرين بماما مترضى على علي وتشوف بابا والي يجيبهم مثال للعلاقات السيئة من ورة علاقتهُم سويـة فَ المشاكل ثاگبة ب بينهُم ويردون يسافرون باجُر

اخر شي ماما قنعتـة وشافني شكد مُصرة كلي اليوم يجي واعقد عليّ بنود و اتفاقيات ومدري شنـو يلا أمن واروح

فَرس
ايّ هم زين من اقتنع ابوج اذا طنكر علينـا شلوننن بينا
زين وهسة شنو سَالفة وين الخّلل ؟

ايلول
لج بعليييي بعليييي اليـوم خابرتة الصُبح اكُلة فَرس حتجي اريد اجي وياهة شيكُلي ؟؟؟
يكُلي ترحين للسكن، دام امير مو هنـا تحُرمين علية مدري شنو حتى ماعرُف معناهة شنوو

فَرس
هاي هوَ هيج كلج!!

ايلول
والله فَرس

فَرس
خاف يشاقة؟؟

ايلول
ميشاقة حلف ميشاقة وخلة وسدة بوجهي وهاي من بعد شنو عود من بعد ما خابرتة ع رقمة العسكري لان ع العادي ولا يجاوب اخُر شي كمت اخابرة شسوة ؟ غلق موبايلة فَرس غلق موبايلة

فَرس
تشاقين هاي صدُك عود علي هيج يسوي
هوَ اليوم عندة مُهمة ع حسب مكال

ايلول
يمتى كَلج؟

فَرس
البارحة بليل

ايلول
هههههههههههه واني البارحة بليل اراسلة ماكوووو! من ٦ اخر شي كلي انتبهي ع نفسج وخلاني اموت عليّ من الخوف واراسل واخابر ومـاكووو اخرشي اجاني بـ ١١ بكُل برود يكُلي مابية شي وخلّة وراح هذا صدُك يحجي عود !!

فَرس
اني خابرتة ايلول هيج تقريب الـ ١٠ كَلي ماكو اخبار وباجُر عدي مُهمة
زيـن والله مادري هَسة شلون ارجعي حاولي اتصلي عليّ
ابوج كُلشي يسوي ايلول ونبي ينخاف منـة قاسي وميهمة

ايلول
ما ادري ! لج حط عينة بعيني ويكُلي اذا سويتيهـا صدُك اخلي و اعوفج للابد انتِ جبيرة وبراسج عقل وفعلاً يسويها ادري بي
شوفي هاي كدامج حخابـرة

خابرتـة لحد ما انقطع الاتصـال وحدة وهوَ مارد

ايلول
زيـن فَرس بهل حالة شسوي اني شسوي !!

فَرس
والله مادري ايلول حتى الوقت تاخر المفروض هَسة هوَ جاي بالطريق حتى يوصل

ايلول
خابري منج خل نشوف بلة

فَرس
يعني هوَ مايرد عليج يرد علية؟

ايلول
من بعد الداشوف ايّ هوَ هيج والله هيج بس صدكينييي اذا سواهة والله والله بعد وجهة ماشوفـة
لج البارحة كلبي محترك كلبي محتركككك وهوَ ميرد علية !!

فَرس
قابل بقصد ايلول بس والنبي لانُ امير موصي عليَّ يحسني امانة مو اكثر

ايلول
فَرس خابري

فَرس
حبابة لا عوفي وحاولي منج

ايلول
فَرس كتلج خابري حبابة خابري

كلتلهـا هيج باوعتلي بنظرة خايفـة، سّحبت الموبايل منهـا ورحِت ع رقمـة

باوعت اخر الرسائِل البارحة بليل، بالوقت نفسة الي جِنت اراسلة بي ومايرد هههه

احس كلبي اشتعّل بنـارررر والتهمتة لهِم، خابرت عليّ واني امسح بدموعي، جِنت متاكدة مراح يرُد لان مُستحيل كُل هل مُخابرات ومايرد

دك دك دك ماكو، شويـة وع اخُر دگة رد
علي
الـو هـا فَرس خوما عدكم شي

من رد علية حَسيت الكاع كام تفتر بية فّر، صرت اباوع لـ فَرس وصافنة وفَرس تباوعلي بنظرات مرتبكة وماتعرف تتصرف حَتى

ماسويت شي غير انّي حطيت الموبايل ع الجرباية وخليت وطلعت بـسرعة

امشي ودموعي تنـزل بهدوء، حَتى الصدمة احس ما مستوعبتها، معقولة كلام بابا صحيح ؟ معقولة علي بعَد مايريدني ؟ معقولة قّل حُبة ؟ خاف مايريدني بعَد ايّ يجوز حملني مسؤولية الي صار وبعد ميحبني بس يستحي يكول

امشي واحجي ودموعي تنزل، حسيت بـ حُسام حجة وياي مَدري شنو بس ماجنت منتبهة لايّ شي

خليت ورحت لبيتنـا صعدت كُبل لغُرفتي، صرت كاعدة وابجي بس هل مّرة بهـدوء قاتِم، وكإني مستقبلة صَدمة خيانـة ..

جانن عيوني مطفيّات، لدرجة انّي كوة فاتحتهن، ضايعات بين السقُف والارض اباوعلهِن بالـ مراية بهت حَتى لونهن وكإنهُ ماكو شي يرجعلهن بريقهِن، احس جفوني صارت ثكيلة وصـارن يرجفن وينسدن وحدهن وكانهُ ديقاومن الي شافنة بكُل مابيهن، كُل ملامحي صارت شاحبة وشفايفي يبسّن وصارن يرجفّن، وكإنّي كنت مترددة حتى اطلُق التنهيدة موبَس الاحرُف، بلحظة ذاتهـا خابرني علي باوعت وحطيت موبايلي صامِت بكُل هدوء واستمريت بـ دموعي ..

فتحّت موبايلي من بعَد ساعـة من كعدتي لكيتة مراسلني
علي
هـذا ابوج ما الة حّل شلون يعني حَتى من بعد كِلشي لاحكني !!!
ايلول ما اكدر اجي ابد ما اكدررر اجي ولا الحك انّي اجي
كليلة علي يكول بعدين انة اخابرة واتفاهم ويـا عود
باجر روحي يّم فرس لمّن يسافرون والولد يجـون يأخذوجن انتِ روحي للسكن و فَرس تروح للبيت
وايّ واحد يكِلج تعاي مدري شني كولي لا فهمتيني ؟
وانة بعدين اتفاهم ويـاج هسة ماكدر..

باوعت لـ اخر رسايل احس روحي انصفعت من الصَدمة
هذا شبي صدُك يحجي

ما أعرف بأي قوّة كدرت أصابعي المرتجفة تكتب، بَس خفقان كلبي ونبضة هو اللي ساقها للكتابة، وكأنّ اديني ما جانت إلا أداة يجبرها الوجع حَتى تبوح

ايلول
ههههه هاي تاليتك ياعلي هيج تخليني وحدي وتروح ! كول ماريدج وفضني ليش مستحي كول

ورة خمس دقايق رّد

علي
خرب عقلج ايلول خرررررب عقلج، لج انة ويـن وانتِ وين سوالفج مال زعاطيط والله مال زعاطيط شاهد الله اعلية
هسوالف هاي انة بغنى عنها ومو فارغِلهن ابد مو ذاك علي اليكعد يقنعج اعلى كِلشي مو ذاك

ايلول
ايّ حقككك نلت الي تريدة وثبتت وجودك فَ كمت تتصرف بكيفك حالك حال ايّ رجال بدنيااااال جنت ادري جنت ادري بس مادري شلون وثقت مادريييي

لا مو مادري انتَ الي غريتني بتصرُفاتك انتَ الخليتني اثق بيك هيج بس هسة كُلشي تغير لانها فترة نزوة لا اكثرررر

علي
نزوة شني لج احترمييي نفسج واعرفي شتحجين، بس شكلج ماجاي تعرفين شسوين وراح تضلين تمسلتين فوك راسي ليش انة ماريد احجي وياج ومبتعد لان انة جد جدي مشتعل ومو فارغ لهسوالف ذني الكتلج عليّ تسوي بالحرف الواحد وبعدين نتفاهم

مارديت على رسالـتة، احس كلبي محترك محترككك ومو شلون ماجانن

عفت الموبايل ونزلت ع صوت بابا وهوَ يصيحلي
ابو ايلول
راح يجي لو شنـو ؟

ايلول
بابا مايكدر يجي عندة شغُل مُهِم كال اني اخابرة واتفاهم ويـا

ابو ايلول
هـا شكتلج اني شكتلج ولج تعلميني بي لهذا العربنجي المهتلففف المعيدي ولج ذبج ذبجج ارتخى بعَد هاهي

يكلك شيسون مثلاً هيَ وصارت الي شيسون بعد شيكدرون ولج هذا مومال ضلة مومال تضلين ويـا

والله العظيم ترجعيلي ترجعيلي وبركبتج ولد على شرط وتضلين تاكلين اصابعج من الندم لا والله اشو حتى اصابعج ميكفنج

طلعت امي من الغُرفة على صايحة واول ما كمّل حجت

ام ايلول
انتَ شتريد من بنتك شتريد الله اكبرر عليك ايلول بعُمر المُراهقة بعُمر الطيش ما تحكمنـا بيها هَسة من كُبرت تريد تتحكم بيها

ابو ايلول
اذا بنتج عقِل ماكو براسها ماكو براسها عقِل تفتر ورة واحد عربنچي معيدي
وبعدين داكُلج اني امشي وراج ورا هَسة تكومين اسويلج ڤيزتج ادبرها شلون ماجان ومن باجُر ترحيـن ويانة و ورقة طلاقج تجي للعراق يلة بعَد ما اضل وراج اني

ايلول
بابا انتَ شتحجي الله يخليك شتحجي اني ما اطلع ما اروح من العراق

ابو ايلول
كولي ماعوف علي لا تكولين ماطلع من العراق كولي اموت على علي، مستعبدني علي احجي هيج

ام ايلول
هـاي من وجهة نظرك هيج ليش يابة علي مستبعدها اشو علي بيت بـ اسمها بال ٣٠٠ مليون حطة بـ اسمها مهر ماصاير ولا يصير دفعلها هم لو دكتور يجي ويطلبها هم مايدفع هلكد الولد مدللها دلال اشو مرتين تعرض للموت علمودهـا وين تلكي بعد اكثر من هيج حُب ؟

ابو ايلول
هم كالت حُب وهم كالت بطيخ
هوَ شنووو حُب شنوووو
الحُب ولاشي ولاشي

ام ايلول
هاي بالنسبة الك ولاشي، ومن وراك اقتنعت وفنيت حياتي كُلها بسببك، الحُب كُل شي وهوّ سبب عيشك بهل حيـاة و ايلول مُستحيل تلكي نفس علي مُستحيل

ابو ايلول
وانتِ حضرتج جاي تحرضيها علية لوجاي تستذكرين حياتج واغلاطها ؟

ام ايلول
اني ماريد حياة بنتي تكون مثل حياتي اريد حياتها تكون احلى مني وهيَ مراح تلكي هاي الحيـاة إلا وي علي
شلون يعني الناس ماتصير عدهُم ظروف الولد عندة ظرف عاد عوفـة شنو هاي

ابو ايلول
اكُلج عاد انتِ انطمي وماريد اسمع صوتج عاد مو انتِ الي تقررين حياتج

ام ايلول
لا تكول انطمييييي احترمي يحيىٰ

ابو ايلول
مالي خُلك احاجيج، يلة ايلول يلة كومي بدلي بسرعة مالي خُلك

ايلول
بابا ماروح استوعبني الله يخليك ماروح

ابو ايلول
شوفي ايلول لحد الان اني هادي ويـاج كومي بالعين واغاتي والاااااا

كمت من مكاني و وكفت بوجهة واني احس شكوو جُزء بجسمي منهـارررر
ايلول
شسوي يعني تضربني نفس ماسويتتت ذيج المّرة

ابو ايلول
لا اكسر خشمج هذا العالي واتبرى منج
قسمًا بالله وجهج بعد ماشوفة، واحسبج ميتـة وما عندي بنية اسمها ايلول
فَ احسلج كومي يلة ايلول

ايلول
بابا انتَ تفهمني لولااا، تفهمنييي لوشنوووووو داكُلك ماروح ماروح مارووووووح

ابو ايلول
مترحينننننننن هاي اخر حجاية الج انتِ متأكدة منهة

هزيت راسي بـ ايّ ب اصرار

ابو ايلول
كومي اطلعي من البيَت

من كال هَيج باوعتلة بـ استغراب
ابو ايلول
كوممممممي اطلعي ماريد اشوف وجهججج كومي خَل علي يلفيج يلة، بَسسسس والله العظيم والله العظيم لو يكلولي ميتـة هم اسمع واضحگ وماهتم والله العظيم

ايلول
بابا انتَ صدُك تحجي صدُك تحجي يعني فوك الي بية دتزودهـا علية

ابو ايلول
لا والله اني دللتج زايد امشي روحي اطلعي واذا مارجعنيلي مذلولة ما اتسمى يحيى

ام ايلول
انتَ صدُك تحجي لو شنووووو

ايلول
اوكفي ماما اوكفي

كمِت وكفت واني اباوع بتعجُب واحس كياني كُلة مهتز
ايلول
انتَ صدُك تحجي لو تشاقة بابا

ابو ايلول
ما اتشاقة وجهج ماريددد اشوفة امشي اطلعييييي عاد اموتج واموت كلبي منج احسّن مِمّا كُل ساع جاببتلي شغلة وخليج انتِ خليج وي علي خل يفيدج

ايلول
بهالسهولة ؟

ابو ايلول
بهالسهولة واكثر بعَد يلة ماريد اشوفج كِدامي حَتى

ايلول
اشششش ماما ماريدج ايّ شي تحجين
تقربت يمهـا وابتسمت وحجيت بهمِس
اني بخير تمام علي يمي وفَرس يمي المُهم انتِ اتجنبي بدون مشاكِل ..

ادري بـ اُمي اخر همها ابوية وحيل متحب تسوي مشاكِل ويـا وعايفتة على راحتـة مهمّا سوة، علاقتهُم مبنية على سمُعتهُم فقط وهلمرة اول مرة اشوفها هلكد و واصلة لهل مرحلة هاي بسببي ويـا ف حاولت اهدئها رُغم البراكين الي موجودة بداخلي

خّليت وطلعت واني احس بكلبي خـاوووي
خـاوي من الوجع والالم والطعنات الصرت استقبلها من كُل مكان

بـسرعة وبدون ايّ تردُد او تفكير بـ اتخاذ قرارات
لبست جُبتي فوك ملابسي ولبست شـالي
حَطيت ذهبي و فلوسي بجنطتي ولبست نظارة بس حَتى اخفي البجي الي موجود بوجهي

صعَدت امي وراي بعد ما تعاركت وي بابا طمنتهـا ب انُ مراح يصيرلي شي وماعندي شي
متدري ب ايّ مُشكلة بيني وبين علي ومتدري ب الصاير اصلاً

خليت ونزلت بـسرعة كاعد على موبايلة بالصالة بالجذِب ما انطاني نظرة

بهاي اللحظات حَسيت روحي اريد اجيب اكثر ناس حُزن بهاي الدنيـا واريدهُم يقارنون كسرتهُم وي كسرتي، لو كانت كسرتهُم كدي شيردون اطيهُم

جنت احس ب احساس بشِع! وبشعور غريب مو شلونن ماجان خنگة خنگة لاول مـرة بحياتي كُلها صايرتلي

اول ماطلعت اجت عيني ع يم الباب، كُل مـرة سيارتي بـ انتظاري

اتذكرت من يجي يوكف هنـا من يجي للموصل، تدكرت من احنـة هناكَ وكلي بفد يوم سيارتج ليـش مركونة هيج ويـن تحتاجيها انتِ ؟

كتلة كُلشي يصيـر مُمكِن احتاجها بفد يوم يُمكِن اريدها بـ وقت مُستعجل، جان يجاوبني بكُل اصرار لا اني يمج بكُل ساعة بكُل لحظة بس تحجين بس تكولين اني اجي، ماريد اديج يتعبن ولا اريدج تعانين بالطريق، بكُل مرة يكُلي ( جا اني المن موجود )

حّدما قنعني انّي ابيع سيارتي واشتري ذهّب مكانهـا وبعدين يشتريلي احسّن منهـا، هذا كُلة اني مجنت غبية جنت ادري كُلش زين هوَ يريد يبعدني من السيارة وميريد تكون سيـارة عندي بس جنت افكُر انُ ليش لا ؟

دامـة هلكد يحبني ودامة هلكد وياي ماراح اعز شي عليّ !!

وفجأة وكإني بحلم وفزيت
لكيت روحي مُستنزفة بكُل مابيـة، خالية من كُلشي امتلكة قبِل
لا سيـارة، لاشخصية، لامبادئ ولا اهل حَتى!
علي خلاني اكون شخصيـة ثانية تمامًا خلاني احب شغلات ولا احبها وخلاني اكره شغلات جنت قبل احبهـا وما عيش بدونها ابددد

اول تـالي اني هيج يصير بية؟ اني الي جنت اتنمر واضحك ع الناس الي يحبون شخُص يغيرهُم ودومني اكول الي يحب يحبك بكُل حالاتك هيج صار بيـة؟

زيـن شلون غطسِت لهذا العُمق من دون ماحِس
احس روحي جنت نايمة صحيت لكيت روحي ماحاوية ايّ شي
حتى هوَ الي جنت احسة فوز صرت خاسرتـة

ياحسافة بَس ياحسافة على كُل عُمري الي كضيتة وياك
كلت هيج بصوت عـالي وخّليت ومشيت

مسافة حيل جبيـرة بيني وبين الشارع العـام امشي واحس خطواتي ثگيلة وكإني مرة عجوز گوة تمشي

گطعت معظم المسافـة وصرت قّريبة ع الشارع تقريبًا، احس حتى النفس بوقتهـا ضاق بيـة

اخ يـاربي دخيلك اريدك تبردلي كلبي وتكـون وياي، مايخفى عليك حـال بارب بس اني تعبت والله تعبت، لدرجة انّي احس داخلي مكسرر تكسيرر دخيلك يارب كون ويـاي كونن ويـاي

حّجيت هيج ونزعت النظارة امسح دموعي الي غركن وجهي كُليتـة بهاي الاثنـاء صاح الاذان

اللهُ اكبر اللهُ اكبر
اللهُ اكبررر اللهُ اكبررر ...

صوت الأذان احسة وصل لاعماقي گبل أذني، حسّيت سرت رّجفة غريبة بنفسي، حسّيت وكإنهُ الله ديجاوبني على دمعاتي، ولِاحظة حسيت كُل الهموم انهزت و ثگلت من ورة صدري ..

حسّيت ب برد الهوى غير معنى، صار نسمة رحمة، حسّت غيوم السما صارت ستر، وصوت الأذان حضن كل وجَعي.

بذيج الحظة زفت تفسي بثگُل وحسيت الهوى طب جواي ع كد ما داخلي بُرد

درت وجهـي واني اكمِل طريقي اجت جارجر من يمي مَد راسـة وگال
- يحلوة اذا الدنيـا مزعلتج اني ارضيح ترة

ايلول
يعني شتسويلي مثلاً تراضيني ؟

-
مطعم؟ مكان؟ ايّ شي ب بالج كولي

ايلول
هاي الفلوس روح بيهن للحلاق خّل يرتبلك لحيتك وبلكت يمليلك الفراغات

-
اه وطلعت دمها خفيف هههههه

ايلول
دمشي امشي منـا لا اسويك مضحكة لأُمة مُحمَد والله
شلون واحد تربية سِز بلا اخلاق

خليت ومشيت شكَد بلاااا اخلاق شلون الي خُلك

صرت ع الشـارِع العام وصرت واكفة انتظُر تكسي، وكفتلي سيـارة تكسي تعبانة حَيل ورجال شوية جبير يطلع بال ٤٠ سنة كلت احسن شي اركب ويـا

صعدت ويـا جان فاتح الجامة مال السيارة الي يمي والهوى يضرب وجهي بهدوء

السايُق
عمي ويـن تردين ترحين ؟

ضليت صافنة ع الطريق بس بالي ويـا، وين اروح؟
صار كدامي معرض من سيارات
ماكدر اتصرف شي بدون سيـارة لازم سيارة جوة ايدي
ماكدر اروح وحدي وارجع وحدي

وبِما انُ المعاض الب يمنـة مياخدون ع البطااقة كتلة بشكِل مُباشر
اربيل- معارض اربيـل ..

الهدوء عّم المكان من بعَد كلامي ماباوعت لنظراتة ولا شفت ردة فعلة حَتى، صرت اباوع للجامة واباوع للناس، شلون تجي شلون تروح

اكو الي يمشي وضايج، واكو الي يمشي وفرحان
وكإن الحياة تكُلي انُ يوم افرحج ويوم اضوجج
لان اني بنفسي هم جنت امشي بهل طرُق بيوم من الايام فرحانة

كُلشي تكوم بعيوني وكُلشي ضل يتردد براسي والمشاهد انعادت، دموعي رجعت تنزل بهدوء
احس بداخلي اكو بُركااااان مال نـار محد يطفيها ولا احد يكدر يطفيها بُركان كادرة تخمُد شكو شي كدامي يصيـر

همست بـ يارب وسط كُل دموعي الهادئة ودرت وجهي للجامة بمُحاولة اخفائهن

السايُق
الدنيا قاسية مو عمو

ايلول
حَيل عمو حَيل

السايُق
بس انتوا هسة ش شفتوا منها والله عجيب

ايلول
هههه عمو مرات سنة وحدة او يوم واحد مو سنة قادر على انُ يراويك الي ما مراويتـة لاحد وقادرة انها تكبرك ميت سّنة

حط عينة ع ايدي ورجع باوعلي

السايُق
هذا اكيد زوجج ويـاج مو، ميخالف عمي ميخالف روحي لاهلج وهُمّ الاهل اليكسرولج راسة هماتين

ايلول
ههههه واذا اكُلك اهلي هّم

السايُق
شبيهُم اهلج بس لا اهلج هم ويا اعليج

ايلول
مو هيج عمو بس شي خابُط بشي ومحد ديفهمني ابد واني الداطيح بيهـا محد غيري ومحد يحس ب احساسي وشعوري ابد

السايُق
الاهل يابوية اهل لو مهمّا سووا واني اذا تحاجيني الي راح اكلج جذب واحد يريد مصلحتك كد الاهل خصوصًا البنية ولو اني ماعايشها بس احسنها غير والله الاب مايكدر اعلى زعل بنيتة

ايلول
عمو اني بابا هوَ الي طردني هذا كُلة لان دافعت لزوجي، صحيح زوجي غلطان ويجوز كلامة الي حجا الية عليّ طلع صحيح بس اني شنو ذنبي يعاملني بهل قساوة

السايُق
تؤتؤتؤ شوفي يبوية الاهل عدهُم نظرة مُستقبلية للاشياء والي يكولونة فعلاً يصير، بس جان المفروض ابوج يساندج ويكون ويـاج

ايلول
لاعمو هوَ طردني

السايُق
وانتِ طلعتي يابوية راسًا من طردج يجوز ساعة عصبية الابهات كلشي يطلع منها

ايلول
عمو مو ساعة عَصبية ولاشي كلي حتى لو تموتين اسمع واضحك وادير وجهي وماهتم ونزلت كدامة حتى ماباوعلي بنظرة

السايُق
اخ اني كلبي يوجعني اعلى هيج سوالف عجّل هذا شنو من كلب عدة هو بزر، بزرك طالع من لِب كلبك شلون تتحمل
بوية انتِ مبينة بزر خير شنو ابوج مادارس مايفتهم

ايلول
هههه عمو ابوية دكتور، وهم هسة اذا اكُلك يجوز تعُرفة

السايُق
يايابة دكتور وهيج
سُبحانك يربي الك بيها حِكمّة وارادة
بس اني لو جان عدي بنية وهذا طريق المنية
خاف تكولين يبالغ لوشي
يعمي احطها بكلبي

ايلول
مو كُل أب أب، الله يحُفظك اني متاكدة لو جان عدك بنية جنت حتكون اعظم اب مبين من شكلك وحنيتك

السايُق
والله يابوية اني صارلي ٢٠ سنة محروم من البزر

ايلول
يعني حتى ولد ماعندك!!! ظنيت دتكول ماعندي بنية انُ بنية ماعندك بس ولد عندك

السايُق
اوف اوف يابوية، هوّ هم كُل واحد وهّمة، انة هسة التاحجي ويـاج كلبي ملوع تلوع، واتمنى لو اشم ريحة البزرة

ايلول
زيـن عمو رحت داويت يم دكتور

السايُق
يعمي والله رحت لمن شيب راسي بس ماكو، ماكو فايدة ولا نتيجة والحل الوحيد تسويلك اطفال انانيب

ايلول
ايّ عمو وليش ماحاولت ؟ ترة اني سامعة هواي تنجح وياهُم

السايُق
والله يعمي ادري وكالولي اعليها بس تعاي اكلج وانتِ هم بنيتي ان شاء الله هيَ الوضعية شلونها؟
اني عايش وي ابوي وامي ومرتي ونسوان اخواني وبزرهُم، اخواني ثنين راحوا فدة الوطن شهداء بداعش طبولنا للقرية واكتلوهُم

وهل عافوا وراحهُم بزرهُم ونسوانهُم وكلهم بركبتي، وانة هل معيل الهم يعمي، اطلع من صباح الله لليل يادوب اجيبلي ١٥-٢٠ الف هاي غير عطلات السيارة والمنا ومنا التطلعلك وين احطهن ذني

هم عدي ذولة ايتام وماريد احسسهم بنقص و والله اني لو تضل اعلية ماريد عمي بس هيَ المرة كاتلتني تريد وتكلي دامني ب ثلاثين وعدي امل نحاول

هيَ تحب جهال من زمان تكوت اعليهم ومدارية ولد اخوي مو شلون ماجان بس نفسها بالزرة تكلي اريد منك

ايلول
اكيد عن حُب مو عمي

ضحگ بخجل
السايُق
ايه ايه، ومع هذا اني كتلهة والله كتلها روحي تزوجي اذا تردين لا تظلمين روحج وياي بس مارضت

ايلول
زيـن عمو هيَ ب بيش العملية

السايُق
يعمي من ٧-٨ ملايين مكلفة

من كالي هيج للحظة ردت اكُلة ايّ زين بس تذكرت الي حجاليا واتذكرت وضعة وفعليًا بالنسبة الة هالشي صعُب

ضليت افكر بموضوعـة باوعت الة بالمراية الرجال من اهل الله صدُك مبين على وجهة الطيب والصدُق مبين

وسيارتة تعبانة لدرجة موطبيعية بحيث اتعجب شلون يكدر يشتغل بيهـا

السايُق
عمي انتِ وين تردين ترحين هسة ماخليتيني اخذج للبيت وياي هناك وي البنات واني بيدي اصالحج وي ابيج بعدج شابة حديثة يبوية والدنيا ما تتأمن والله والناس تقشمر ويوكعوك لميت توهَة

ايلول
لا تخاف علية عمو اني شايلة مسؤولية نفسي من و اني وصغيرة ممتعودة ع احد يسويلي اموري كُلشي اسوي بنفسي فَ ماراح يصيرلي شي

شويـة وخابر اهلة اسمعة يكول لمرتة بهمِس
السايُق
اكلج منال امي كليلها فد ساعة ونُص اني اجي، حاولي وياهة انتِ تبدليلها واذا ماقبلت اني اجي ماطول

من سَد الموبايل كتلة
ايلول
عمو انتَ خاف عندك التزامات واني ازعجتك

السايُق
والله يابوية اني هذا وقت روحتي للبيت بس ظنيت ترحين لهنانة ف كلت اخذج بس من شفتج وشفت وضعج كلت ماعوفها وحدهي الدنيا ما تتأمن

ايلول
عمو والله خـاف أاخرك تعوفني وتروح اني اكمل

السايُق
عمي هيَ شنية غير وصلنـا لاربيل هاي ماضل شي

ايلول
مو بالبيت اخاف عندك شي

السايُق
والله يعمي هاي من استشهدوا اخواني القنبن ومع الاسف اني جنت اطلع اجيب اكل عود اجيت لكيتهم مكتليهم وكدام امي وامي من صدمة هم انشلت وهم انعمت

وامي هسة متعلقة بية هواي كلشي اني اسويلهيا، ومرة مُعقدة وتعرفين احتياجاتها هم كون اشتغل اني وكل ساع اروحلهم كل ساعتين هجي شي

ايلول
مو يمها زوجتك ونسوان اخوك لو غير بيت انتوا؟

السايُق
لو سوية عمي احنة بس تعاي اكلج بنات الناس خو مو خدم عدنة وامي مرة تخاف من الله وهم يبوية مرة ثنين ثلاثة البني آدم يمل ولو هنّ والله درة مال الله بس اني تعز امي عليّ ماريد واحد يتافف بوجهة

من كالي هيج ابتسمت ابتسامة عَريضة ودمعتي نزلت
ايلول
ياااا عمو شكد انتَ حباب والله شوف اذا ما الله عوضك عن كُلشي سويتة ودسوي بالاحسن بـ مليار مرة

السايُق
والله يعمي هيَ بس دعوة امي من صباحيات تسوة عدي كلشي، شايفة من تكلي الله يهيئلك ولد الحلال ويسهل امورك ويسرها والله كلشي صعب يصير سهل

هوَ واحد شمحصل بهاي الدنيا رضا ربك رضا اهلك وارضي حبايبك الداير مدايرك مريتك اخوانك نسوانهم ليش لا يبوية

ايلول
عمو انتَ والله حباب وتستاهل احسن حياة بدنيا ومتاكدة لو عندك بنات جان صارن اسعد بنات بدنيا

كتلها هيج بخنگة وبجيت، ماتحمل كمية الصدق وكمية الفطارية والشفافية الي جاي اشوفها بهذا الانسان البسيط كدامي ماحس بروحي مختلطة ب ايّ احد بهيج مستوى وبهيج صدُق وقرب من الله

السايُق
يا يبوية لا تبجين لاتبجين

ايلول
عمو اني كلبي رهيف ماتحمل

السايُق
ههههههه مبين اعليج يبوية مبين والله تستاهلين كل الخير بس يبوية الحياة ماتكمل ابد وهل تشوفيني اني يجوز انتِ شفتيني هيج وكلتي لو عندك بنات يكونن اسعد بنات بس لان ماكوشي يجي عدل اني ماعدي

ايلول
عمو لو عندك بنية شجنت سميتها؟

السايُق
اسميها جوهرة لؤلؤة مآسة هيج اعلى كد ماتكون عزيزة عليّ والله فنّ اليدنالها حتى ماطيها بس اذا هيَ حبتة بعد ماكدر اوكف بقسمتة بس المُهم يكون ابن ناس وعالم

هوَ يحجي واني احس بفراغ بداخلي غريببببببب
درت وجهي للجامـة وكلت بيني وبين نفسي

هَسـة واحد اذا انطا فلوس مال عملية شراح يخسّر مثلاً ؟
مادري بس فجأة صار عِندي تفكير مُباشرتًا تجاه هل موضوع

من عُمري سنة تقريبًا بابا فاتحلي حساب بالبنك وكُل فتـرة جانوا هوَ وامي يحطولي فلوس، وبـ اعياد ميلادي وبمُناسباتي خوالي الي عايشين بـرة او اخواني يحطولي مبالغ كُلش زيـنة، والمهّر الي انطانيا علي بابا كلي كُلة تحطينة بالبنك وشكو شي تردي من عندي اني وامـج تاخذينـة

واساسًا اني رحت لمعارض اربيل لان اكدر اخُذ منهُم من بطاقتي فَ ماحتاج يكونن فلوس جوة ايدي هَسة وادري الي جوة ايدي مراح يكفني

باوعت للجُنطة مالتي عندي فلوس قليلة، بَس عندي الذهب مال سيـارتي، علي من باع سيارتي كلي نُص حطيهن بالبنك ونُص سوي ذهّب

مع انُ ردت احط كلهن بالبنك بس كلي تحتاجين تخلين جوة ايدج خاف فجأة تحتاجين شي، اما بالنسبة للذهب الهدايا فَ جان حاطة بالغُرفة مالتـة اني انطيتهيا لان ادري بروحي اضيعهن وبسبب تنقلي وبسبب السكّن ماكدر احطهن بمكان وهوَ يمشي ويصيح فشلة ذني هدايا لا ينباعن ولا يضيعن كون يضلن يمج دائِمًا

شفت الذهب الي اذكرة بال ٣٠ مليون بس ماذكر كُل قُطعة شكد سعرها، اتذكرت علي دزلي الوصل كلي تحتاجي رحت طلعتـة بسرعة

كلادة + اسوار ثنيناتهِم فخمات بـ ١٥ مليون
اول ثنين هنّ قريتهن باوعت وصُفنت

ترة ماراح تخسرين شي لو فرحتي ؟
هيَ شبيها الحياة ايلول !
الله بعظمتـة يسعدنا فَ ليش احنة منسعِد بعُض

بدون تردُد طلعتهِن وسديت الجنطة

ايلول
عمو لو احد ساعدك بالعملية تقبل ؟

السايُق
شنو توديني لابوج لو شنو

ايلول
لا عمو بابا اختصاص غير بس جنت اقصد، مُساعدة مالية

السايُق
لا عمو ابد صدك جذب هاي ماتصـير عمي انتِ لا تاخذين بغير نظرة اني من حجيتلج لا ردت استعطِف ولاشي الله شاهِد بس يكولون مرات اليشوف مصيبة الناس تهون اعليّ مُصيبتة، واني كعدت احجيلج هجي والله مو لشي ثاني
الايد التنمد مو لله هاي تخيب
فَ احنة متعلمين مانمد ادينة الا لله

من طريقة كلامة يبين انُ هوَ انسان أبّي وعندة عِزة نفس وكرامة موطبيعية لدرجة انُ مانطاني مجال حَتى اكمِل وهذا الشي جان متوقع

سكتت عفت الموضوع بس اني جنت مُصرّة عليّ
شوي وكتلة اذا عندك علاكة خَطية خّلة ونزل، وكف السيارة بالخدمي يم المحل اباوعلة طلع فلوسة حاطهن ب لاستيكة بيهن الاف و ارباعـة اطا ربع الرجال رجعة عليّ لان جان مبين تعبان رجع انطا الالف اخذة منة

باوعتلة شفتة جابلي كيكتين وعصير بحيث صارن ب الف
ابتسمت ابتسامتي المقلوبة وباوعتلة بحزِن

يارب والله هيج ناس تستحق انهّا تعيش احسن عيشة!
بهاي سالفتة بينلي شكد فعلي جان صحيح وابد ما تندمت ولا ترددت عليّ

اجة وهوَ يطينياهن ويكلي بردي كلبج يعمي ماكوشي يسوة
والله ياعمو لوبيدي انطيك كُلشي حلو بهاي الدنيا وماخليك تعاني ابد ومُستحيل انسى هل انسان وارجعلة ارجعلة بس مو بهذا الوقت ..

حسيتة ملاك من الله نزل الي وبنفس الوقت حسيت الله سخرني الة، وسُبحان الله شمـا تعمل تِجازى وشمـا تسوي خير يرجعلك اضعاف

حطيتهن بـ علاگة سودة وحطيتهن ب جيب مال الكِشن الي ورة سئلتة اذا ياخذ تكسي بعد بس كلي لا راسًا لاهلي هم يلة

وصلنـا للمعارض جلب ب انُ ينزل وياي كتلة عمو لتخاف علية ماعندي شي، الي صدمني ب انُ هوَ مارضة ياخذ مني كروة ابددد ولمن لحيت عليّ خّلة وراح صدمني ب اخلاقة وصدمني بـ طيبتة يعني هوّ محتاج شلون كدر يسوي هيج ؟ لو ما مسوية الي سويتة جان ضليت اكُل روحي من القهّر!
همزين اخذت رقمة، جنت هواي متحمسة ع انّي اكُلة وافرحة ..

طبيت للمعارِض اتاكدت انُ ياخذون ع الـ بطاقة اشتريت وحدة بمُساعدتهُم وياي وكملت بنفس اللحظة المُكاتبة والاجراءات كُلها

صارت الساعة بـ ٩ تقريبًا الجو باررررد ثلج والدنيا تمطُر بهدوء صعدت بالسيـارة وتوجهت للموصل

مرت تقريبًا بحدود الساعة واكيد هسة هوَ وصل للبيت، فَ اطمنت وخابرتـة رنة ثنين رّد

السايُق
ها عمي خوما محتاجة شي اجيج !!

ابتسمت ابتسامة عّميقة وكتلة
ايلول
عمو راح تطلع تلكة بسيارتك علاگة سودة بيها ذهب بحق ١٥ مليون لا تبيعهن ب اقل وراح ادزلك الوصول الك روح عمو سوي بيهن عملية الانابيب ورتب حالكُم وماريدك تخابرني الا وانتَ تبشرني ب انُ صاير عندكم طفل ..

السايُق
شنو؟؟؟؟ شنو تاتحچين انتِ؟ ذهبچ؟؟ لااا. لا عمو! هاي شلون سويتيها؟ ليش سويتي هيچي؟ ليش تحرجيني لهل درجة؟؟ آني شگلتلج؟ آني متعمدت أوجعچ بسوالفي؟ آني من گلت لج عن أمي وأخواني، گلت لج حتى نتشارك بهمومنـا مو بحس المساعدة اني ماقبل ابددد هسة تكليلي انتِ وين رايح اني والله

صوته گام يعلـى، بيه رجفة حزن وغضب بنفس الوقت، تحسه متناقض بين كبريائك ووجعه:
لا.. لا عمو.. عيـب! عيـب آخذ منچ! هاي فلوسچ.. تعبچ.. ذخرچ.. زينة عمرچ! آني منو حتى تجين تضحين بهل شكل؟

وبعدين انتِ منو الي تشوفينـة تنقهرين عليّ وتطي ابد يعمي لا تأمنين كليلي على مكانج هسة اجيج واذا ماكتيلي والله اروح لمنطقتج الاخذتج منها واسئل اعليكم اني مارضة مارضة

ايلول
عمو انتَ شتحجي اصلاً اهلي مسافرين واني بعد ماجي وهذا رزقك عمو رزقك، مو اني المنطيتة الك الله سخرني الك حَتى افرحك بي

جان ناكِر بشكل موطبيعي وضل يحجي وماجان قابل ابد ابددد ضليت بالنُص ساعة اني اسوق واحاجي وبهل اثناء يخابرني فَرس وامي وارفضهن

من بعَد نُص ساعة متواصلة حجيتلة ع وضعي وسولفتلة ب انّي ممحتاجة والي صار رزقة ومو مني من الله ..

اجاني صوتة المكسور والي بي فرحة وهوَ يكول
السايُق
اني طول عمري چنت أگول الله موجود.. والله ماينسانه.. بس عمري مافگرت الله يوديلي ملاك مثلج.. واني أشوف انسانة بدمها خير لهل حد.

انخنگ صوته، ماعرف يگمل، وسمعت ونة طلعت من حنجرتـه، وگام يبچي بجي رجال مكسور، بجي واحد شايل جبال على ظهره وأول مرة يگدر ينزلهم
السايُق
آني ميّت من جواي عمو.. بس ما أحب أحد يشوف ضعفي.. شلون اني رجل وأمشي أباوع عيون الناس وأگول ساعدوني.. شلون بس ربج يرزق واني اليوم مكتوبلي رزق

إيلول
عمو انتَ صُبرت والله يجازي كُل واحد صبور واليوم جان جزاتك وعوضك، الخير مو مساعدة وذلة.. الخير ستر من رب العالمين. وإذا الله خلى بإيدي أساعدك، هذا مو فضل منـي، هذا فضل من رب العالمين إليّ ولك. لا تعتبرها فلوس ذهب.. اعتبرها دمعة دعاء من أمك، صارت بيد غيرك ورجعتلك.

انهار أكثر، وصوته صار يتقطع ولا كانما ذاك الرجال. الي رُغم الوجع جان يبتسم لا صار يبجي وينشج بالبجي
الله.. الله يجازيچ يا بنتي.. الله يجازيچ.. والله دعوت أمي چانت تدور بحياتي، واليوم شفتها بوجهچ.

وظل يبچي وهو يحاول يخفي صوته، بس نبرة الرجولة الموجوعة فضحت كلشي..

مُستحيل انسى الدُعاء الي دعى الي ولا الكِلمات الي جانت نابعة من اعماق كلبة تِجاهي احس طيرتني لغير عـالم

ماجان يمي شحِن
سديت الموبايل وطمنت امي علية، مانطيت تفاصيل عن انّي وين وشلـون بس كتلها ماعندي شي سئلتها اذا علي مخابرها جاوبتني ب لا بس خابر ابوج و ابوج مارد عليّ كتلها ان شاء الله خير وسديتة منهـا

وصلت للسيـطرة سديت موبلتايلي كلت بعدين اطمن فَرس، وكفوني مجموعة من الضباط مبينين تعين جديد جانوا صغار

اتذكرت علي من جنـة نوصل لسيطرة ويكُلي ديري وجهج واضل اتعارك ويا ب انُ وجهي موعيب وهوَ يرجع ويكُلي وجهج موعيب وجهج حّسنة ماريد احد يشوفها غيري وجان يحاول مايتاخر يدخل من القسم الثالث المُهيئ الهُم وبسرعة بسرعة يعبُر ..

استهزئت بيني وبين نفسي وكلت هسة ياترى لو يدري راح يغار ويضوج؟ يضوج ب انُ هوَ ماصان تغيري الي تغيرتة علمودة او ع نفسة الي عاملتني بهل بشاعة

فزيت من افكاري وهوَ يسئلني
- شنو ستوج مشتريتها

جاوبت بحِدية
ايلول
ايّ بس ترة المُكاتبة والمُلكية والاجازة كُلهن يمي ليش دتاخروني مدافهم؟؟؟

- اجراءات عيوني

ايلول
هيَ شنو الاجراءات تـرة صارلي شكد واكفة!! دققوا وي الناس الي فعلاً تستاهل تدقيق مو وياي اني الي كُلشي كدامكم و اصولي !!!

بهل اثنـاء اجة شخُص حاط نجمتين ع كتفة شكلة ابدددد مو غَريب علية احس شايفتة ب اكثر من مرّة بس ويـن مادري

- شكو شصاير ؟

باوع الي ب استغراب وكال
- عفوًا حضرتج مو زوجة النقيب علي ؟

ايلول
بلي

- اهلاً وسهلاً بيج عُذرًا على الازعاج، بس بدون زحمة مدام واتمنى ما تعتبري تدخُل مني بس الوضع بنسبة لحضرتكم بعدة قّلِق و خطُر ف اذا تسمحيلي اخلي دورية ترافقج لايّ مكان تحبي لان بنهاية تعرفين انُ احنة ك قطاع عسكري حمايتنا وحماية عوائلنـا مُهِمة لان مُمكِن تُستخدم ضدنا او ضد الدولة بِوقتٌ مـا

ايلول
شُكرًا الك وشُكرًا لاهتمامك ما محتاجة شي ماتقصُر ..

حجيت هيج وخليت ورحِت، اتذكرتة جنت اشوفة بسالفتي وي العصابة الي صارت بـ اربيل

توجهت لـ كركوك وبهل اثناء خابرت فّرس رفضتة لان جنت مالي خلُك احجي ابدد، فتحت الرسائل كاتبتلي كومـة ومنهن

فَرس
ياغبية السكنننن يوم الجُمعة ينفتح واليوم خَميس

من قريت الرسالة احس انصدمت! ايّ والله اني شلون نسيت الاحد الدوام والجُمعة يفتحوا هُمّ نزلوا

زين هّسة شلون بهاي الحـالة؟

احتاريت وماعرفت شسوي، وبنفس الوقت بدة الطريق يظلُم علية واخذت طريق السريع من كركوك لـ بغداد ..

كلت خلي اكمِل طريقي و اوصل لبغداد ومن بعدها عود اضل هناك واشوفلي حّل

ماجان اكو مجال عندي للتفكير، احس عقلي مخبوص وياخذ قرارات بسرعة بسرعة

فتحت الجامة واني اشتم الهوى ومخلية موبايلي صامِت وصافنة ومركزة وي الطّريق

صفنت على روحي، ويـن جنت و ويـن صرت احس كُلشي انكلب علية بين يوم وليلة

حَسيت روحي نفس الي جنت بحلم وفزيت، فزيت منة مرعوبة وكإني غير شخُص تمامًا مايدري شصارلة وشنو التغيرات الي صارت عليّ

فزيت واني شخُص ثاني، لكيتني شخُص خالي من كُل اشيائة الي جان يمتلكهِن قبل

علي خّسرني خّسرني هوووواي اشيـاء وشلون رضيت اني مادري، هواي جنت اتنمر ع هيج علاقات ودائمًا ما اكول الي يحبك خلي يحبك نفس ما انتَ بنهاية لا هوَ مجبور يغير نفسة علمودك ولا انتَ مجبور تغير نفسك علمودة

بس علي خلاني اغير نفسي بطريقة موطبيعية، بحيث ايّ شخُص جان يباوعلي يصفن معقولة انتِ ايلول؟

لبس شخصية حياة كُلشي خلاني اغيرة بنفسي
حتى عادات واشياء كمت اسويهن واني قبل اصلاً ممقتنعة بيهن

ابسط شي بيعة السيـارة هوَ جان يكُلي انتِ هسة متحتاجيها واني يمج وفعلاً جان مُجرّد ما احاجي ع شي يعوف الي بيدة ويجيني لو مهمّا جان مشغول فَ من يكُلي تنازلي عن شي ماجنت اشوفها كدامـة شي جبير وجنت اقبّل بس حتى ماشوف زعّل بعيونة لان ادري شلون مستعد يكلب الدنيا علية لو شاف عيوني زعلن

حسيت روحي غبية ومُستغفلة وما اعرُف حتى اتصرف، بس بلحظتها تذكرت اهتمامة ومُبالغتة الزايدة بية
مُستحيل اكول تمثيل هيَ فعلاً جانت نابعة من كلبة
بس اني متاكدة انُ هيَ نقصت لان بكُل بساطة هيَ هاي طبيعة البشر وعلي نفس الشي حب وتعلّق وفجأة مّل واتنازل بـ ابسط عاصفة مّرت علينا ..

دموعي تنزل بهدوء ومنتجية ع الكشن واسوق بـ ايد وحدة، ردت افتح شي يخليني ابطل تفكير اول ماطبيت للموسيقى انفتحت

ظلمتوا بالوصِف لمن وصفتوا
حَبيبي شكد حلو بس مانصفتوا

سديت الموبايل بسرعة وحطيتة ب قوة ع الكشِن
ياربي ماريدددد ايّ شي يذكرني بي ايّ شي ماريددد

ماكو ثواني وشفت موبايلي كام يرن باوعت علي
لا خاف بعَد وقت ؟ ههههههههه
مخابرني مُكالمتين وهاهيّ وهسة بلش يسوي دور المهتم
اكيد كايلية اهل السيطرة اكيددد

مارديت عليّ وهوَ ضل يتصل اكثر من ٦ مرات لحد ما ينقطع الـ اتصال وحدة، اخرشي حطيتة صامت الموبايل شفت فَرس تراسلني بالها يمي رديت عليها
بـ ماعندي شي لتخافين انتبهي ع نفسج
كتبتلي راسًا
فَرس
عليييي كلب الدنيا ايلول

ايلول
شتحسين فَرس ؟ طُزز ميهمني ولا راح يهمني ..

داريد اسد الموبايل امي خابرت رديت
احس موبايلي من كُل ناحية كام يدُك والدنيا احتركت
بين فَرس وبين علي وبين ماما

امي جانت مستغربة كُل ظنها علي يدري بكُل شي اسوي كلتلي وينج كلب الدنيا علية كتلها لتردين عليّ اساسًا، استغربت امي وكلتلي شصاير كتلها زعلانة منة لتقلقين ماصاير شي ضلت تبررلة وتكلي لتصيرين انانية ومحتار ب ابن عمة ومدري شنـو
كتلها اكيد المُهم لتنطي حجاية عني وبعدين نحجي

ضلت تكلي هسة توكفين يم فندق او تخلين علي يجيج وضعج ما بتحمل ولسوقين ضلت تلح علية كتلها ان شاء الله وسديت الموبايل ..

وهلمرة خّليتـة صامِت تمامًا حتى اتخلص من كُل شي

حاطة بـ بالي ما اوكف ابدًا منا لمن اوصل لبغداد
اول مـرة اسوق بليل وبطرّق خارجية هيج بس ماجنت مهتمة ولاخايفة من شي

واخذت الطريق طول على عرض اني صافنة ب الي صارلي ساعة اذكر علي وساعة اذكر بابا وارجع ابجي ..

دموعي مانشفن ولا لحظة، حّسيت روحي اكثر انسانة مكسورة بالدنيا وبهالساعة هاي هيَ اني

اول مرة اتعرض لهيج خُذلان واول مرة امُر بهيج موقف يخليني هلكد يبين انُ اني مو مُهمة ..

شفت موبايلي ينفتح وينسد ينفتح وينسد باوعتلة اشعارات علي
علي
اندمج والله والله اندممممج يا ايلول

هه حَتى ماريد افتح رسائلة عفتهن وتجاهلت الوضعية

الساعـة ب ٢ ضبُط وصلت لبغداد اختاريت فندُق زين واحنة من زمان نجي يمهُم وخليت ونزلت

سويت كُل الاجراءات وصعدت للغرفة

جنت موبَس ميتة جنت هلكااااانة تعَب اول ماطبيت للغُرفة كُبل طبيت سبحت غسلت ملابسي وطلعت صليت المُغرب لان مامصليتهـا وكُبل حطيت راسي ع المخدة

احس راسي مصدع بشكل موطبيعي فتحت الموبايل لكيتة مُغلق من نُص طريق وانغلق مابي شحن حطيتة ع الشحِن واجيت

طمنت ماما انُ اني بخير لكيتها منتظرتني كاعدة وخايفة حَيل اول ماراسلتها رزلتني رزالة من هاي الزينة تكُلي شلون تخلين بالنة هيج عليج علي من جهة واني من جهة كتلها مجنت ادري جنت اسوق، كلتلي باجُر نسافر وصيتها تكون وي بابا طبيعية ومتهتم لايّ شي لان حتى لو حجت ماراح تسوي شي مُجرد تكره نفسها ..

رحت لـ فرس راسلتها انُ اني ماعندي شي بدون ماقرة حتى مسجاتها ع كد ماجانن عيوني يلزكن من التعّب والنُعاس ..

اجيت لـ مُحادثات علي لكيتـة محتار شيحجي

علي
١انتِ ويـن رايحة ويـن طالعة وحدج صدِك تحجين لو شنيييي هسة يخابروني من ورة السيطرة يكلولي زوجتك هيج وهيج تحِب نودي وراها دورية لج انتِ صدككككك تحجييننننن
-الي يشوفج هسة شيكوللللل شيكولللل من بعد كل هل مصايب وطالعة وحدهي بنص الليل طرق خارجية وين رجلها عنها وينننننننن
-اعصابي انهارتتتتتت وينج ليشششش مجاي تجاوبيننننن
-لا ابوج يجاوب لا انتِ تجاوبين لا امج تعرفج وين لا فَرس تعرف وين مني الي يدري بس اريد افتهم منييييييي
- ليش جاي ترفضي ماتردين ماتردييييين
- خرببببب على طريق بغداد كركوك شسوينننننن بنص الليل ولج شسوينننن هسة غير ترد غيررر ترد

اتصالات كومـة و رسايل كومة فاتح الموقع الي ب بينة بس موبايلي مُغلق ف حتى الموقع منلغي، مَدري شلون هوَ دائِمًا يفتح موقع من يمة يصير ع جهازي بحيث وين ما اكون هوَ يجيني بدون ميسئلني اني ويـن

علي
ايلول هسة انة شدري بلة؟ داعمتج سيارة مسوية حادث هسة وزعت رقم سيارة اعلى كل السيطرات والله العظيم اذا الزمج يا ايلول اموتج ب ايدي، ب ايدي تموتينننننننن
الا اندمج اعلى السويتي بية
حركة كلبي هاي اطلعها بيج لولااااا ....
اردشوف شلون اقتنعتي تطلعين بهل ليل وبهل صلافة هـاي شلونننن، انة شني هنا بس اردفهم انة شني هنا شحاجيتج شكتلجج كليليييي شكتلجج
موكتلج باجر ترحين وي فرسسس لولااا
بس انتِ الي تردي تردي هاهيّ
عناد بعلي تردين تحركين كلب علي، احلف بيمن عناد بية هجي لا اكثر ولا اقل
والصوج موبيج الصوج بـ ابوج الي متيهج ايّ والله بت تطلع بنص الليالي وحدهي ؟؟؟؟؟؟ بعدين بعدين اطلعها من عيونكم واحد واحد والله العظيم بعدين حتى ابوج وحتى انتِ راح تدفعون الثمن، حَتى انتِ يا ايلول ..

اقرة بالرسائل واحسني صحيت بكُل مابية
هذا صدُك يحجي ؟ فوك مـا كُل الي سوى مستمر؟
حتى مسئلني ليش طلعتي وشكو !!!
جَد واحد اناني وميهتم غير لنفسة

بعدني ممكملة رسايل خابر، رفضت
خابر مرة لخ رفضت
انفتح الموقع بسرعة، لغيتـة وكمت كعدت ع حيلي

مادري شلون كدرن ادية الي يرجفن يعينني حَتى اكتب، بس رجفة كلبي ونارة جانت تجبرها حَتى اكتب ..

ايلول
لو تموتتتت ماراح تلگاني وحَتى لو لگيتني مارجَع وياك ابدد انتَ انسان اناني، اناني وما تهتم غير بنفسك ودليل هسة ماسئلتني ع ايّ شي صار بس اهتميت ع سمعتك يم اصدقائك وشلون اطلع بنُص الليل وشيكولون عليك، اني حيل متندمة لان حبيتك متندمة لان انطيتك عُمري متندمة عليك ياعلي حّسافة بَسسس حّسافة ..

كتبتلة هيج وخليت وحضرتة مُباشرتًا، ادري بي مستعد كُلشي يسوي وماراح يكدر يسوي شي دام موبايلي مُغلق

غلقت موبايلي بسرعة ولملمت روحي وكعدت ابجي
من بعد الي صار أايس انُ مُمكِن اني وعلي نرجع، خلاص وصلنـا لـ اخر مرحلة من عدم الاحترام واللامُبالاة بالثاني وحُب النفس

ماكدرت انام ولا كدرت اهدئ واسكت روحي، حييت روحي مشتعلة نار من كُل جهة فتحت الشباك وطلعت برة ع البلكونة اريد بس اشتم هوى اريد بس احس نفسي عايشة ..

كأن صدري بهاي الليلة جان مختنك من ثُقل الغصّة، كلبي جان يضرب بعنف وكأنّه يريد يطلع من مكانة. رُغم انُ كل شيء حواليَّ صامت الا اني جنت اصرخ من داخلي بكُل قوة، مثل نار الجانت تاكلني وما تنطفي. حتى الهواء اللي حاولت اتنفسة من الشباك صار ما يشبع رِئاتي، وكأن الدنيا صارت ضيقة علية رغم وسعها. الليل صار طويل وبارد، وكل دقيقة تمر علية جانت مثل سنة، وجنت اكول بيني وبين نفسي ما أدري شلون أعدّي هالليلة المشؤومة من غير ما يصير بية شي..

مانمت الا من ورة الاذان مال الصُبح احس روحي انهاريت تعب وبعد ماكدر ابد، قفلت الباب وامنت كُلشي ونمت

ماكعدت الا ثاني يوم الساعـة ب ٤ العصر احس روحي مكسرة من التعّب ومن النوم

كمت صليت وكعدت احاول استوعب كُل شي ديصير وياي خفت افتح الموبايل لا يعرُف موقعي بس كلت خلي افتحة حتى اطمن ع أُمي

اول مافتحَت الموبايل لكيتة خابصني خبُص هم هوَ وهم فَرس، تطمنت ع ماما كالت بعدهُم بالطيران بعدني داحجي وياهة ماحِس الا موبايلي مدري شصارلة كام يصيرلة نفس الماسح الضوئي وبدة يصدر اصوات طن طن طن

انطفة بـ ايدي واريد افتحـة ماكدر، مُجرد شاشة سودة وماسح يصعد وينزل ع الشاشة والموبايل يصدر صوت ..

عرفتة راح يجي وجنت متأكدة من جيتـة، رحت جبت ملابسي واجيت بعدني دالبس بالجُبة وما مسحبتها ماحس الا انفتح الباب علية

ما مُضى الا شكم دقيقة هذااااا شلون وصلني بهسررعة هاي !!!

لابس ملابسة العسكرية وعيونة تجدح نـارررر، اول ماشافني عيونة تجولت علية وعلى دشداشتي وركع الباب بكُل قوتـة وطب

تقدمت الة بعصبية وهوَ يتقدم الي بخطوات بطيئة منظرة ثابت رُغم انُ عيونـة يكولن غير شي تمامًا ..

ايلول
شجـابك هنااااااااااا وشتريد مني اجيتتت هـاااا ؟؟؟

علي
وصلت بيج لهل مرحلة مو؟ ليش دمرتي علاقتنا هجي؟ ليش كرهتيني بيج ايلول ليششش؟

جان يحجي بـ اسلوب هادي، بس كلامة جان خشِن بي حِدية موشلون ماجان

ايلول
اني الي خربتتتت اني مووو؟؟ انتَ الي خربت علي انتَ
علاقتنا انتهتتتت انتهتتتت واذا اكو مُسبب فَ هوَ انتَ

علي
صحيح انة المُسبب هوَ شني المو انة؟ انة السبب ب امير انسجن وانة اختاريت غلط وانة مابية خير وانة حيوان ومافتهم لان مشيت ورة كلبي، كلة من وراي و ومن ما ورة كلبي المابي خير هوَ لو بي خير جان ما وصلج لهاي المرحلة بس عبنّة مابييييي خير هجي صار بينة
يلة اطلعي منتظرج انة بـرة

يحجي بـ اسلوب بارد رُغم كُل شي، اول مرة يحجي وياي بهذا الاسلوب، حَتى عتب ماعاتبني !!
ضل يباوع للغُرفة طفة الضوة وشغلة جان يتاكد اذا اكو كامرات موجودة

دموعي تنزل ودايرة وجهي وابدل واحجي
ايلول
مامشي وياك لايّ مكان، بس خاف ماتدري ..

جنت منتظرة اجابة بس الي سمعتة صوت الباب وهوَ ينسد حيل، كمية الكره الي صارت بداخلي جانت مو طبيعية، لبست جبتي وشالي، مسحت دموعي ولبست نظارتي حَتى اخفي دموعي ولبست جنطتي وطلعت

لكيتة واكف يم الباب، مشيت كدامة بسرعة وبدون ماهتم الة حَتى، مشة كدامي بسرعتة الثابتة وراح يم الرسبشن(الاستعلامات)

شفتة طلع فلوس تقدمت وطلعت الفلوس حطيتهن ع الميز قبلة
عفوًا بس هويتي

باوعلي بلحظتها بنظرة تذبح ذبحح، ادري بي كُلش زين نقطة ضعفـة اسوي هل حركة يموت ولا يشوفني اسويها
ضل لازم الفلوس ويباوعلي وخازني موشلون ماجان
بحيث حَتى الولد اهل الاستعلامات انتبهوا ..

انطوني الهوية وخليت وطلعت وهوَ طلع وراي

علي
ااااااااااخ لو ما انتِ ايلول
اااااااااااخ جان شسويت بيج
ولج خاااايف اعليج خايف لا اجرحج
ادري بروحيييي لو احجي اجرحج وأذيج ادرررري
بس ياحسافة مو انتِ ال يا حسافة اني ال ياحسافة
يااااا حسافة اهتم لا اجرحج وانتِ هجي ياااا حسافة بس

كالها وهوَ يصفگ ب ادي استهزئت ورحت لسيارتي، حسيتة انصدم

علي
منيلج هاي ؟

ايلول
ديربالك تتتحكم بيـة فهمتتت؟؟؟

علي
سئلتج سؤال تجاوبيني عليّ وبدون حجي زايددددد منيلج هاي ؟؟؟؟

ايلول
اشتريتها

علي
اربيل رقمها ؟؟؟؟؟؟ شوداج لقندررررة لو انتِ اساسًا طالعة ل اربيل علمود تشترين سيارة !!!!!

ايلول
رحت لمعارض اربيـل نفس قبل وحدي اعتمد نفسي على نفسي لا حَسبالك ماراح اكدر اسوي شي بدونك

علي
هههههه حلوووووو حلووووووو اكيد تقريبًا ب ٩ انتِ ب المعارض بحساب حضرتج بال ١٠:٣٠ انتِ بسيطرة عاشت ايدج عاشت ايدج تكسيات، معارض، سيطرة، فندق
لج اطلع اكبر حيوووووووووان وكلب لو رجعت وياج
مانسالج هااااي السوالف ابددددد
كُبل للسكن كُبلللل قبل لا اخذ رووووووحج بـ ايديييي

يحجي بـ اسلوب قاسي وكلامة بدة يعتلي وصوتة صار عَصبي بس قاتِم هوَ يحجي ودموعي ينزلن عشرة عشرة

ايلول
انتَ فعلاً حيواااان و اناني هم

علي
هوَ انة لو ما حيوان جان ماحبيت وحدة مثلج وما خليتتتج تتمادين هلكد بالكلام ويـاي

وخرت نظارتي وصرت اباوعلة بتغويش ع كَد ما كومة دموع مكتومة بعيوني

باوع لعيوني وحَسيتة ارتخى لِلحظة باعد بين شفايفة وكإنما جان يريد يكول شي

ايلول
احقر انسان شفتة بحياتي، اكرهكككك...

حجيت هيج وخليت وصعدت بسيارة بسرعة، ادية ترجف واحس كلبي ذبحني ذبح من الالم وكمت ماستوعب شي ابددد

شغلت السيارة وضليت واكفة بمكاني لابسة نظارتي وابجي باوعت الة مالكيتة موجود اصلاً سيارتة مموجودة

الساعة ب ٤ اكيد متبعني وشايفني هذا ميخفى عليّ شي ومتاكدة واصل للمنطقة و اول مافتحت حدد الموقع واجة

حاولت اهدي نفسي وما ابين ضُعفي هديت روحي ومسحت دموعي وطلعت، لكيتة واكف بـرة ويدخن اول ماشافني كُطف الجكارة ودعسها برجلة وراح لسيـارتة ..

جنت امشي وهوَ يمشي وراي بالطريق، عبرنا من سيطرتين الصويرة والعزيزية وبثنينهن جان يصيـر كدامي ومن اعبُر اني محد يحاجيني رأسًا اعبُر طبيعي ..

وصلنـة لسيطرة الكوت وجان بيها ٣ مداخِل وجانت حيل مزدحمة علي دخّل من الـ دخول الثالث واشرلي اجي ورا، عناد بي رحت للي يمـة

ضليت بهذا السايد و وراي سيارات وهوَ يباوعلي وعيونة تريد تفترسني .
راح كدامي ونزل اباوعلهُم طكولة تحية وصاروا يحجون ويـا، وصلت ليمهُم رأسًا كلولي تفضلي .

باوعتلة وهوَ يباوعلي ويريد يموتني، ادري حطيتة بـ موقف مُحرج صرت اعرف تفكيرك واعرف شلون يسولف هسة يضل يكول الناس كلها تعرفنة وهسة شيكولون وليش ما مصعّد مرتة ويا وليش ما طبت مرتـة ويا .

عيونـة صارن بكُصتة طلعنا من سيطرة وصرنـا موازين لبعُض يباوعلي بنطرات توعِدد وغضب موطبيعي وكانهُ بالكوة خافي او يحاول يخفي ..

وصلنـة للسكن وهوَ وراي نزلت بس جُنطتي ونزلت، اجة وراي وهوَ يكلي بـ اسلوب حاد
علي
عدج جنط ؟؟؟

ايلول
ماجايبة شي وماكو داعي تضل وراي ماريد شَي

حجيت هيـج وخليت وطبيت سلمت ع عمو الحـارِس واجة علي وراي خليت وطبيت واسمعة يكُلة اكو بنات شنو ماشنو

جانن اكو بنات بس قليلات مو كُلش هواي، طبيت للغُرفة والمُصيبة لا اني ولا فَرس مخلين ملابس ابدددد كُلشي ماعندي والدنيا شِتا وحَيل بـاردة ..

نزلت غطة من فوك وخّليت ونزلت تغطيت ورجعت نمت من كميـة العَجز الي عِندي ..

كعدت ع صوت فَرس وهيَ تصحي بيـة
نزيت وحّسيت روحي بـ حلم بس فجأة لكيتهـا فعلاً كاعدة يمي

انصدمت ب وجودهـا وبنفس الوقت حَيل حَيل فرحت
فَرس
لج اجاني غَيث الصُبح جابني واجة وهَسة اجة علي كلي اخذيلها ملابس جبتلج هاي الجنطة بما انُ انتِ ما شاء الله ولاشي جايبـة ليششش هيج ايلول ليش هيجي سويتي بينـة والنبي والنبي البارحة متنـة متنـة شصار بينـة

يعني فوكاهة موبايلج انغلق كلنة خلاص هسة تسوي حادث وعلي تخبل عليج تخبل

ايلول
فَرس من الاخير اذا تردين تدافعيلة لا تحجين وياي ابددد ماريد اسمعج تدافعيـن عنة ابددد

فَرس
لتصيريننننن مخبلة بالاخير ترة درّة ابوج طاردج ولعبببب جولة جولة لعب وانصدم، ومن درّة اهلج سافروا انصدم اكثر ما تشوفينة هِدة شوية عليج

ايلول
هههه لا مزحم نفسة هدة شوية علية فَرس حبابة حبابة لا تحجيـن هيج ولا تدافعيلة ابد مُستحيل اسامح علي ع الي سوى مُستحيلللل لو مهمَا صار واذا تردين تأذيني احجيلي بي

من شافت حالتي وشافتني شلون متأذية حّيل سكتت عني ضّلت تحجيلي شويـة ع الوضِع جانت جايبة وياهة عّشـة تعشينـا سوية وماطول ل ١٠ خابرها علي

جانت تتمنى تبات ويـايّ بس كلتلي ما يرضون خّلت وراحت وضليت وحَدي

بدت تمضي الايام واني حاضرة علي وما اسمع ايّ خبر عنة وحَتى فَرس من جانت تحاول تحجي عنة ماخليها ابدًا، و حتى مزاج للطلعـة مابية حّيل اطلع مُجرّد اروح للدوام احضرلي مُحاضرة واخلي واطلع وفَرس كالعادة مالنة خُلك ابدًا للدوام ..

مرت اول ٥ ايام من الدوام وبدة بريق الأمل يرجع ينبع بينة لمن عرفناه انُ علي لاكي اهل الاثنيـن مافهمت تفاصيل هوايّ بس فَرس جانت حيل حيل فرحانة، عائلة من العوائل طالبة ١٠٠ والثانين طالبين ٥٠

فَرس جانت اسعد انسانة بذيج اللحظة ولاول مّرة ومن بعَد ٢٠ يوم تقريبًا شفت الضحكة واخيرًا انرسمت على وجهة

صادّف يوم خميس والي عُرفتة انُ اليوم الظهر اميـر يطلع ومسوين وليمـة حّيل جبيرة بمُناسبة طلعتـة

فَرس وشَمس هواي حرمصلي حَتى اجي خصوصًا فَرس كلتلي اريدج تكونين موجودة بس اني رُفضت رفُض قاطع ..

بيومها بليل جنت اراقب الستوريات مالاتهُم ان كان مال شَمس وفَرس للتحضيرات او ستوريات الولد سُراج وسَجاد لطلعتة

وجنت اشوف من بين ستوري وستوري علي وهوَ موجود ويضحگ ومبين فرحان

حّسيت بساعتها اكو شي بداخلي مكسور كسرّة جبيرة، هوَ شلــون گلبة ينطي ما يتواصل وياي هلكد ؟
علي الي جان يموت اذا ساعـة مايحاجيني هَسة هيج صار ؟

ماكدرت امنع روحي من البجي ابَد، احس روحي بهذا اليوم جنت مختنگة بكُل مابية، لا بالسكن مرتاحة وي هاي البنيـة ولا بداخلي مرتاحة واحس كُل الاماكن نافرتني ومارايدتني

جنت احس بروحي تايهة ضايعة مادري بروحي ويـن مارين
لا اهلي صاروا يردوني ولا علي صار يريدني ولا فَرس يمي ولا الي مكاني الي مرتاحة بي ..

طلعت بسيارة الدنيـا المُغرب اتمشي بالشوارع ودموعي تجري

حَسيت بهذا اليوم روحي تايهة، ضايعة، كأن كل شيء حولي صار غريب حَتى علية. الأماكن الي جِنت أحبها صارت تضيق بيّة، وكأنها ترفض وجودي. أحس الوحدة تلفني من كل جهة، والناس القريبة مني صارت بعيدة. كلبي موجوع من اللي صار، ومن اللي ما صار، من علي ومن بابا ومن كُل شي بهاي الدنيا، كلهم موجودين بحياتهم، وهم فرحانين، وأني وحيدة هنـا محَد فكر بية حَتى. أحس أن العالم كله ما عاد يتسع لي، ولا عندي مكان آمن أرتاح بيه. ضايعة بين كل شيء، ما أعرف وين أنتمي، ولا وين أروح، ولا منو يريدني. كل خطوة اخطيها أحسها ثگيلة، وكل لحظة تمر تزيد شعوري بالضياع والوحدة ..

مادري شلون رجّلية اخذني لاكثر مكان جنة نكعِد بي ب اخر الايام، نزلت يم سّدة الكوت وكعدت اباوع للنهّر
شفت مكانـة الي جنة نوكف بي رجلية اخذني الة

علي
جاي اشوف ثنين انهار يمي
الفرات وعيونج اويلي عليك علاوي

اتذكرت لهفتـة قّبل واحس روحي تخبلت
هوَ شلوننننن جان يحبني وهيج صار يعاملني شلوننننن؟

مُستحيللل اضل ويـا مُستحيللل، هاهيّ اني وعلي انتهينـاااا اخر أمل جان يجمعنـاا انكطع والي كطعة هوَ واني الي كملتـة ..

ما صرت اتحمل ابقى بنفس المكان، رحت لسيارتي بسرعة ورفعت رجلي على البنزين وطلعت بالسيارة ع سريع واني احاول اهرُب من كُل ركُن بي ذُكرى النـا هنا. الغصة جنت احس بيهـا ببلعومي بشكِل حيل ثگيل، كأنها تنتفخ وتمدد نفسها بكل أنحاء صدري، تمنعني من التنفس، وتخنك كل إحساسي. كل شي حواليني صار ضاغط، حتى الهواء اللي حولي حسيت انه يحاصرني ويضغط على صدري.

صرت اتجول بين الشوارع بدون ماحِس وبدون ما اوعى ع نفسي، ساعات واني افتر بالاماكن ودموعي تنزل وما منتبهة لايّ احد

الضعف اللي بيّ جنت أكرهة، وكُل جزء بية جان رافُض يسمع وجان يستنكر الوضع وارجع اكول لنفسي، أيلول معقولة إنتِ تبچين وهو يضحك ليش تسمحين لروحج تنذلين بهاي الطريقة ؟ ليش حتى توصلين لهالمرحلة هاي؟ ليش ترضين هالانكسار اساسًا..
بس رغم كل شي، جنت متأكدة إن هذي آخر ليلة أتحمل بيها، آخر مرة أكون بهالشكل، ومن بعد هالليلة جنت واثقة انُ كليي راح يبرد وراح أتعلم أكون أقوى من كُل الي جرحني.

رجعت للسكن من بعـد اجتياز الف حادث، الساعة بـ ١٠:٣٠الحرّس جدد شفت ليلي يومية يجونة حماعة تقريبًا وحتى ماعرفهُم ردت اطُب منعوني

- تخابرين ولي امرج يلة، وباجُر نرفع كتاب عليج بالعمادة وين اكو وحدة تجي ساعة بـ ١٠:٣٠ بليل احنة ساعة ب ٧ نسد السكن بتعليمات الجديدة

ايلول
ليش هوَ اني عندي ولي امر حتى تخابرون ولي امري والله بطرانين انتوا

حَجيت هيج وخَليت ورحت لسيارة
لاول مرة اكره اهلي لاول مرة اكره الحُرية لاول مرة اكره انهُم عايفيني اتلطلط هيج بالدنياا لوحدي
كُلشي صار مشئوم بالنسبة الي وكُلشي صار سيء

للحظة وحدة اجتِ ب بالي افكار شيطانية، خلاص المن عايشة انتِ ومنو منتظر وجودج اساسًا ؟؟

هذا موبايلج اكو واحد خابررررر اكو واحدددد كال انتِ وينننن اكو واحد اهتمممم، محَد مهتم انتِ والماكوو سوى انتِ والماكوو سوى ..

احجي وي نفسي بعّصبية ودموعي تتطافر وراسي احسة راح يطير من الالم، اما كلبي فَ آلامة صارت عادية بالنسبة للباقي..

شفت اجوا الحرّس تجاهي مدري شرادوا يحجون خليت وحركت السيـارة بسرععة

صرت اطُب بين الافرع ومادري بروحي ولا اعرف ويـن اني اساسًا

جان ودي اموت نفسي واخلص من حياتي بـ ايّ طريقة، بس شلون ماجنت اعرُف وبنفس الوقت، ماجنت اريد أذي احد غير نَفسي ..

طّبيت بفرع اظلم بي محلات والمحلات معزلة هوّ طويل ونهايتة تودي للشـارع العام جنت داعبُر من يمة وفجأة سيارتي انطفت بانزين

ضّليت واكفـة ومحتارة شسوي، انطتني تنبـيه من فترة زينة بس اني ماجنت بوعيي حَتى اوكف يم بانزين خانة

ضّليت واكفة ومحتارة شسوي وبنفس الوقت خايفة انّي انزل بهاي الظلمة واكمل طريقي واعوف السيـارة

ماجنت مهتمة هواي ولا خايفة ب انّي اضل بالسيارة وبنفس مكاني، ضليت بالسيارة كاعدة وصافنة وشوية حَسيت روحي دخت مادخت دوخة نُعاس وانمّا دوخة اقوى ولِلحظّة وحدة حسيت كُلشي صار اسود بعيوني وماكمت احس بشي ...

صحّيت ع صوت ضرب وكإنما احد ديضرب براسي فزيت من نومتي الي نايمتها ع الستيرن انتبهت اكو احد ديضرُب بالجامـة حيل

حاولت افتح عيوني بس ماجنت اكدر، كُل ما افتحهن يرجعن ينسدن وحدهن، رجعت فتحت عيوني بقوة حّتى اشوف واركز منـو وجان انصدم بوجود يُتبععععع......
توقعاتكُم وارائكُم بـ الي صار ؟
اريد الكُل ينطيني رئية ..

البـارت الجاي - يوم الاحد
دُمتم بخير ...