بيت جبر الفصل السبعون 70 - بقلم هُدىٰ آذار

مَســاء الخير
ورجعنــا وياكُم بـ بارت جديد من قُصة
بيَت جبُر
للكاتبة : هُدىٰ آذار
لاتنســـون التصويت والتعليق بين الفقرات
قِراءة مُمتعة.
____________________

ايلول

مرة من الايام جنت نـايمة بتعب مو طبيعي، كعدت ع صوت علي وهوَ يهز بـ متني وينادي ب اسمي

فتحت عيوني علي كِدامي، لازم سـلاح و كاعد كدامي، عيونـة حُمر و ايدة قابُضها

نزيت وحسبِت روحـي بوسَط حلِم
فتحِت عيوني بتفاجُئ وكمت كعدت ع حيلي وهوَ كام نُفض نَفسة و وكف كدامي وهوَ عاقِج عيونـة و وجهة ويباوعلي بنظرات شرآنية

حَطيت الغطا ع صدري حَتى يسترني وحجيت بـ صايح و إنفعـال
ايلول
شتريـدد، وشدتسوي هنـا اساسًا !!!

حجة وياي بـ انفعال حَيل غريب، نزل روحة لمُستواي وحِنى ظهرة وهوَ يحُط عيونـة بعيوني ويوجه المسدس نحوي كَ بديل لاصبعة

علي
كلبي الاطيتچيا كسرتي وحطمتي انتِ كسرتيني وحطمتيني، كرهتيني بشي اسمة علي وكرهتيني بشي اسمة ايلول صار ٥ تيـام ( ايام ) احاول اوصلج موصية امير وفَرس حتى ميطببوني ولا يخلوني اشوفج. والموبايل خو؟ ولا تردين اعليَّ سادة اعلية كِلشي ليش بوية شسويتلج انة ها كليلي شسويتلج هذا كِلة لان مليتتتت

ايلول
انتَ كلتها انتَ مليتتتت بعد شكوووو جاي هنااا شكووو

علي
مليتتت لانّي انساننننن لانّي بشررررر لانّي شخُص ما اتهنى بحُبة من يوم العاشِة لسة، ليمتى اضل احارب ليمتى حاربتـج وشبعت مغمّة وقهر مِنج نوب استفحلني ابوج نوب اهلي اخذوا ديمة مِني ارد افتهم انة شنوووووو ايّ مو حتى الحديد يطك وينكسرررر ليَمتى ليَمتىىىىىىىى

كمت وكفت كدامـة واحس رجفة سارت بجسمي، بَس معَ هذا ماريد ابينلة ضُعفي

ايلول
انتَ قبل جنت صدُك علي بس هسة؟
هسة اني غسلت ايدي منككك مِن عفتني وكتلي روحي اقاسم

علي
يابَشررر يابَشررر انتِ الي براسج عقل لو شني بس فهميني
يا بَشررررر طِحت بعاگة انة، ولج ابن عمي واخوي انسجنننن مؤبد من الله واكبر اعليج

المن اصيرن لامي التبجييي اعليّ ليل ونهـار لو اعلى أُمة لو اعلى فَرس الـ حالتها صارت تحت التحِت لو اواسي روحي انة الاحس روحي ضعت بدونة وانة السبب بتحطيمة

ولج هينـة هينـة عندج انتِ امير انسجن! حقكم حقكم والعباس حقكم حاطين آمالكُم بعلي وضامنين علي يطلعة بس محَد يدري علي شيصيـر بي بكِل ثانيـة تمُر

عمي الولد انسجنننننن إلا شويـة، جان كضة حياتة بالسجِن، الدقيقة الوحدة انة جنت احسبهـا مسؤولية لازم اتلاحگها حَتى اطلعها

شردت انة شردتتتتت؟ كلت شي بدينـا سوية ننهي سوية
وعرفت روحي لو صرتي يمي راح اضعف

ايلول
ههههههههه ليش لهل دَرجة هـاي انتَ ضعيف ؟؟؟

علي
انـة مو ضعيف بس ماردت ايَ شي يشتت تركيزي ضليت اشتغل ليل نهار حَتى بس الكي طّرف الخيط وانتوا محد بيكُم يدري محد بيكُم يقدر شني لگوة ناس متاجرين ب اسمائهُم وبكلشي محد يدري بيكُم شعانيت وشصار بيـة

انة ردت نفرح سويـة ردت بس هجي ماردت شي ثاني وانة جنت واثق من روحي واثق بس احتاج فُسحة احتاج هدوء احتاج راحـة شوي لا هاهيّ

علي
عوفي هَسة كِل المواضيع واسمعيني زين

كال هَيج وهوَ يرجع خطوات الي، نظراتة مال شخُص ماناوي على خير ابد
استبقت مشية ورجعت لوررة بخطوات متسارعة
احِس للحظة اختل توازني كُلة بوجودة

انطخيت بالحايط باوعتلة وبلعمِت وحجيت بتلعثُم
ايلول
شنـو عود دتخوفني لو شنو؟؟؟ جـاي ولازم سلاحك شتريد عود تُكتلني مثلاً ؟

غمض عيونـة بعَصبية ورجع فتحهن وهو يزفر نَفسة بصعوبة
علي
ايلول احجيلي كلشي صـار بينج وبين هالكلب هذا اعصابي بعد ماتتحمل ابدددد

ايلول
ماكُلك وانتَ ماخصك اساسًا

علي
هوَ هذا المتوقع
اسمعيييييي ايلول ليلي ماجاي انامة روحي جاي تطلع بكل لحظة ودماغي يريد يستوعب وكلبي يريد يهدى ف كليلي وريحيني كليلي الي صار بالتفصيل وكاااااافي تشردين مني كاااافي

ايلول
ماراح اكُلك على ايّ شي وهسة تطلع منـاااااااااا

كلت هيج وحاولت اوخر بَس هوَ راسًا لزم ايدي ورجعها ع الحايط بسرعة

ايلول
انتَ شبيك مخبل لوشنووووو

علي
ايلول قسمًا بالله اذا ما لكيت جواب يصيـر شي كل احنة نتندم اعليّ

ايلول
يعني شتسوي شتسوي اريد افهم تُكتلني ؟؟؟
يلة اُكتلني اُكتلني وخلصني من هل عيشة هـاي
واذا تريد جيبة اني اكتُل نفسي واخلص من هل حيـااة

كلت هَيج ودموعي صـارن ينزلن وايدة مثبتتني بكُل قـوة

علي
لا ماكتلج الج اكتل روحي واخليج تاكلين بروحج من القهَر
ايلول انة اليوم جاي ومـاناوي اعلى الخيّر والله
انة كلبي محترِك تعرفـين شنو كلبي محترِك؟؟؟؟؟

ايلول
ماكُلك ولا اريد اكول

علي
هسة انتِ ليش تبجين ليششش شدخل الدموع بالنُص ؟؟ عوفي دموعج واحجييي احجيييي و ريحي كلبييييي و اطفيلي نـاررررة الجاي تحرگني

علي بصوت متكسّر بين صياح وشحرّجة
ايلول آنة ماجنت أتصوّر يجي يوم أشوفچ ببيت رجال غيري
لج - رّص اسنـانة سوية وغمض عيونـة بقوة وضرب الحايط بكفة بقوة لدرجة اكو غُبـار جان بالحايط بلش يتناثَر -
لـج ما اتحمل ما اتحمللللل هاي الفكرة يا ظالمة خافي ربج خاااافي ربج وريحيلي كلبي وكليليييييي

ايلول
انتَ جّد متستحيييي وخر عني يعني شنووو مُمكِنن يكون صايررر؟؟

ماكدرت ما ارجِف من منظرة الي كدامـي وعيوني ضلت تدمع وتدور طريق منـا ومنـا حَتى تنهزم بي، مستعدة احاجي واصيح والعب جولة بس مو بهذا القُرب ماكدررر احس روحي انتهيت وهوَ هيج متقرُب يمي ويحاجيني بهل عّصبية هاي ..

اباوع لجَبينـة صار كُلة عرگ بوسط موجة البرد الي احنـة بيها، رُفع شعرة الي جات نـازل وباوعلي وهوَ يحاول يهدئ نفسة بس صوتة العَصبي مُستحيل يكدر يطُمثة ..

علي
لتجربين تلعبين وياي لعبة الثقة، ايلول، انة مِن الناس الي إذا غارو يتهدم الكون بيهُم انة ماريدن شي منِج بس كليلييي وسولفيلي بالتفصيل الي صـاررر بَس انة شرايد شرايدد

حاولت ابعِد عنة و اوخر مِنة بس حركاتي مجانت كافية حَتى تزتزحة مِن مكانة ولو لشوية
ايلول
انتَ مو بعقلك، احلف انك مو علي اللي أعرفه، هذا مو انت!!

خّف صوتـة فجأة بس عيونة بدت تحجي وهوَ يحاوِل يقرب وجهة الي ويحجي بحِدة
علي
مو علي؟ -يضرب صدره بـ ايدة بقُوة -
هذا علي، علي اللي حارب الدنيا علمودج، علي الي حَتى رتبتة رادت تروح من وراج، علي الي حارب اهلة واهلج وروحج اعلمودج، علي اللي نسي نفسـة بس ما نساچ انتِ .

-علة صوتـة بشكِل اعلى بعَد وكمل بصوت غاضِب ومبحوح-

علي
تدرين شنو شعور الرجـال لمن يشوف مَرتـة يم واحد بـ بيتة؟؟ بغض النظر عن الوضع الي هُمّ بي !!! ان شاء الله ما تكونين بس مُجرد بنفس بيتة وتحت نفس السگُف انتوا تدريييييين شيحسسس لولااااا؟؟؟
يحس الدم صار نار بجسده، والعقل يريد ينفجر، و ودة يكسر كِل الدنيـااااا بس حَتى يتخلصص من شعورة السيء الي بداخلة وعبالج يتخلص لااا ما يتخلص يضل يفور فور
احجيلي ايلول احجيلييييي لخاطررر النبي

ايلول
انتَ مو متريدني بعد مو مليت مني والله لوووو تموت ياعلي لوووووو تموتتتتت ماكلك شنـوووو صار وروح ضل بنـارك نفس ما انحرگِت اني، انتَ هم تنحرگ ...

لزمني مِن ايدي بقـوة ورص اسنانة اكثر وحجة بعصبية هامسة وهوَ يحط عينـة بعينيي ويحجيي بـ عَصبية

علي
لتخليني اسوي شي نندم اعليّ كِلنا احجيييييييي عقلي راح ينفجررررر

من لزم ايدي حَسيت روحي توجعت ودموعي ماصرت اسيطر عليهِن صرت اباوعلة بنظرات كُره وابجي، درت وجهي لـ ايدي وصحت اخ

قبضة ايدة جـانت حيل قوية ع ايدي لدرجة حَسيت عضامي راح يتكسرن، من سمع الـ اخ الي مني بسرعة عافني ورجع لـورة

استغليت الفُرصة وطلعت بـسرعة واني ابجي واصيح
ايلول
فَرسسسس ويـنج فَرسسس

حَسيت بي طلع كِدامي واني ادور بالصالة عليهُم وهُمّ ماكو

علي
لا تحاوليـن تدورين ماهُمّ

درت وجهـي واني معصبة واحجي بحرگة وهوَ مدري شيسوي بالمُسدس وعينـة عليَّ بذبول

ايلول
الله يلعنكُم كلكُم
انتَ انساننننننن ظالِم انساننننن ماعندك ايّ رحمة بكلبك اناني ومتفكرررر غير بروحك

علي
كملتي ؟

جان يحجي بصوت هادئ جدًا، بس كل كلمة بيها غصّة
الصوت كان حآد، خالي من كل نغمة عرفتها بيه قبل.
وجه السلاح نحوي، احس روحي انصعقت بحركتة هاي... مو من خوف، من وجع، من تساؤول بـ شنو صارله حتى يوصل لهالمرحلة؟

نظرتله بثبات خايف، ولِلحظة وحدة غيّر اتجاه السلاح وحّطة بنُص گلبـة ..

باوعلي، وجهه مبيّن عليه تعب موطبيعي،
صوته نزل، مبحوح، حزين أكثر من كونه غاضب

علي
لأنّي حيوان...
إي، لأنّي حيوان ماعرف أأذيج، فـ أأذي نفسي بدل ما أأذيج.
لأنّي ماكدر أجبرج تجاوبين، ماكدر أصرخ أكثر، ولا اكدر اشوف الدموع بعيونـج
كلشي بداخلي ينهار، وأنة بعدني جاي اختنگ وتضيگ روحي اعلى هل سؤال هـذا
انة ماجاي اشاقة والله چيلة بنُص كلبي وانهي كِلشي يَ ايلول، اذا مارتاح كلبي فَ يموت احسن الة ..

لساني ماكدر ينطُق بكِلمة ضليت ساكتة و واكفة بمكاني مصنمّة حركة وحدة ما تحركِت

علي
انة سمعِت منة، بس ارد اسمع منج انتِ
هجي الكِلمة الي تريحلي گلبي تستصعُبيها ؟
شوفيني، شوفيني زين، گولي بس كلمة، كلمة وحده تريحني،
بس كولي ما صار شي.

جاوبتـة ب برود
ايلول
هلكد ما عندك ثِقة بية؟

علي
موبيج، بالوياج ماعندي ثقة

ضليت ساكتة و اباوعلة ودموعي تنزل بهدوء ..

علي
يعني ماراح تكوليـن؟

انتظرني احجي ماحجيت

علي
عبالج ما سويهـا لو عبالج ارد اخليج تحجين وبَس ؟
ترة انة مخبل ايلول، شكد ما شفتي مني فَ هوَ قليل انة جاي اموت بنـاري ومنتظر كِلمة بَس تبرديلي كلبي بيهـا شردتج من عندة مُستحيل تكون خالية شفتج بالكامرات كِلششش زين شلون تتلفتين وتمشين بخوف مُستحيل تكدرين تقنعيني ما صار شي ومُستحيل تكدرين تفهميني ضربتة هاي الي براسة شنو!!!! يكلي ضربتني بدون سَبب وانة ماصدكككك ماصدككككك، و المُشكلة ماكدر اسويلة شي ومابيدي دليل ماكدر فَ احجيلي يلة

ايلول
مـا احجي ايّ شي ...

كتلة هيج واني امسح دموعي ماحسيت بي إلا وهوَ يسحب الاقسام من السلاح، ويرفع حاجبه ويقربه اكثر من كلبة،
صوت الأجزاء المعدنية وطختة بـ صدرة جان حَيل واضح ..

علي
والله والله والله ماجاي اشاقـة والله انة بـ اكثر حالاتي إزاء ومُستحيل اخسر كِلشي لان ماعندي شي بـ ايدي اصلاً

مِن شفتـة هيج يحجي بـ اصرار احِس للحظة نفسي ضُعّف وخفِت، باوعتلة وكتلة واني صوتـي يرجِف من البجي

ايلول
مـاصارررر شي ماصاررررر شي لا تصيـررر مخبل علييييي

علي
احجيلي كِل الي صـار بسرعة

ايلول
مِن بعد ما سديتة منكُم وهـذا المخبل صعد بسيارة فتحت الباب وشردت بـسرعة ورحت عَ الشارع العـام وهوَ اجـة

نزل سلاحة وصـار يباوعلي بتمعُن واني احجي
صُفنت
علي
كمليييي شبيج

ايلول
لتصيححح علي

علي
خرب ابـووووو .. استغفرالله كملي بسسس كملي

ايلول
ايّ ومن بعدهي اجـة هوَ مادري بطريق احِس روحي أُغمى علية فزيت وهوَ راد يطببني كتلة مـاريد وردت اطلع ماقِبل

كلي انتِ صرتي دخيلتي مدري شنوو شمعرفني اني بهسوالف شمعرفنييي راد يمنعني ...

علي
شلـون راد يمنعج؟ شسوة!!!

ايلول
ما تدنى الي عليييي بَس راد يمنعني ب انُ اطلع بنُص الليل، ولانّي معصُبة ضربتـة حَيل وهم ردت اطلع لان خفت تدري بيـة شكد اخاف مِن العشاير وخليت وطلعت اركُض خايفـة
هذا الي صار ماصاررررر شي ثاني

علي
مِتأكدة ما سوالج شي ايلول!!! ما لزم ايدج او سوة حركة خايسة حَتى ما تطلعين!!!!

ايلول
علييييي ما سوة شي ماسوة شي وبعدين اني حَتى ماضليت بـ بيتّة ب اول ثواني فَزيت وبسـرعة كمت

علي
استغفرالله استغفرالله ..

ايلول
ما شاءَ الله ع الثقة اهنيككككككك عليها
وهَسة خو عرفت يلة تفضل روح ..

كلت هَيج وخليت وطبيت للغرفة الثانية،

علي بصوت عـالي
انة عندي كامل الثقة بيج، عدي استعداد احطج بـ ١٠٠ ازِلمة ادري بيج كد روحج وكدود همين بس انة ما ضامن الناس ما ضامن الناسسسسسس ليش ماتفهمينننننن

فتح الباب علية واني دايرة وجهي واحاول اهدي نفسي وامسح دموعي

درت وجهي الة وجاوبتـة بعَصبية
ايلول
انتَ لووو بيك خير جان ما خليتني هيـج بهذا الوضع بس انتَ الصوج بيككك

فتح عيونـة بصدمة وراسًا بانت على وِجهة العَصبية
اشر على روحة وگال بزمُخ
علي
هَسة انة طلعتتتتت مابية خَير؟؟؟؟؟ هذا الوصلتيلة؟؟؟

ايلول
ايّ مابيكككك خير

دار وِجهة بشكل سَريع وهوَ يقبُض ايدة، تحسة نفس الي يريد يجرُم بشي بَس ما يمة شي وكوة لازم روحة، رجع التفت الي وهوَ يحاجيني

علي
ايلول ليش تخلينيييي اسوي جَريمة، انتِ تدرين بية زيننننن ما اكدر اأذيج ليششش تستغلينننن هالشي ليشش؟؟
ليش هوَ انة ادري بيج طالعة بنُص الليالي ولج حَتى القسم رافعين اعليج كتاب اكو وحدة ترجع بـ ١٠ مدري بيش الساعة وين جنتي ارد افتهم ويـننننن

ايلول
ويـن جنت هههههههههههههههه جنت ب بيت زوجي معزومة ع العَزيمـة الي جانت عندهُم وهوَ فرحان بيها

علي
انة فرحان انة؟؟؟؟ ولج عمت عيني لو ارتاحيتلي ثانيـة وحدة صح يجوز من شكلي بين شويـة اعليَّ فرحـة بس بداخلي ترا نـارررر ومشعولة، ما مُضى وكت كد هل وكتتت سيء اعلية وكِلة بسببج

ايلول بصايح وبجي
لا تنكُر فرحتك لا تنكُررررر، مُستحيل اسامحك ياعليييي مُستحيل انسى الي سببتليا بهذيج الليلة، مُستحيل انسى شلـون حَسيت الشوارع كُلهة وشما كانن كبار ما كدرن يخلصني مِن الضيق الي جنت بي
ما اسامحك ولا انسىى شلون خليت دمعتي ما تنشف لحظة وحدة ما اسامحككك ابـد ع اليوم الي عيشتنيااا

انتَ تحاسبني لان اطلع بليل بس متكول ليش طلعتي متكول جنت افتر بشوارع نفس المخبلة، ميتتتت مَرة ردت اسوي حادِث روح شوف سيارتي وشوف المُخالفات الي المرور سجلهن علية، هذا كُلة بسبب منوووو بسبب منو؟؟؟ بسببك انتَ ..

انتَ الوصلتني الهل مَرحلة هـاي انتَ الي دمرتني ..

خفتت كِلماتي بـ اخُر الجُملة، شهگت ب بجيي بس حاولت اقوي روحي مسحت دموعي ورجعت باوعتلة بعَصبية

ايلول
وِجهك ماريد اشوفـة ماريدددد اشوفك ابددد

علي
كافي تكولين وجهك ماريد اشوفة شلون يعني ماتردين تشوفينـة شلونننننننن ترة انتِ مرتي ايلول مرتي تفهمييييين شني يعني مرتيييي

ايلول
هههههههههه مقتنع؟؟؟؟ مرتك بالوقت الي يعجبك بَس !!!
من باجُر ابلش اسوي مُعاملة الطلاق و وجهك ماشوفة مَرة ثانيـة بعَد ولا الك دخل بحياتي ولا الي دخل بحياتك
اني اسامح هـووووواي علي بس لمن انجرح بوقت اني مجروحة بدال متوكف وياي فَ اني بساعتها تعذرني ...

علي
استغفرالله استغفرالله ليششش تذبين كِل اللوم اعلية ليششش، ليشش متكولين شني ردة فعلة من يخابرة صَديقة ويكِلة مرتك طلعت من سيطرة والوضع خطُر؟؟ ليشششش متكولين شصار بي لمّن شافج بالفندق لوحدج ومايدري شيصير مايصير لو لمّن اخابرج بنُص الليل وانتِ ولا عبالكككك توهدنت بنُص السيطرات لنص المُستشفيات والفشلة مابيننننن الكِلللل احس راسي صاررر بالارض !! هّم استوة صار حادث هجي وهم عايفها وحدهي !!!

ايلول
لانّ هوَ هذا الواقع وتستاهل ع كِل شي صارلك وتستاهِل تحس بالابشع هَم وانتَ فعليًا عايفني ماكووووشي غلط ليش تتحسس وانتَ فعلاً مسوي هل اشياء ؟؟
لو تريد تبين روحك انتَ مِثالي كدام الكُل مو مُهم شعورج والي يصيرلج المُهم سُمعتي كدام ناس

علي
خرررررة بـ ابو الناس انتِ ليش ماتفهيمينييي ليششش لج انة اهتم للناس لو اهتم الج ولخطورة المووضع الي صارلج!!! ايلول انتِ ويـن تحجيلي وانة وينن احجيييي

ايلول
ايّ لانّك انتَ اناني انانيييي تفكر بس بنفسك بس متفكر بـية متكول ليش سوت هيج تكول بس سوت هَيج
ولا عبالك كُلة بسببك سويتت هيج

علي
انة شمدريني شمدريني اشتم كُفة ايدي

ايلول
طبعًا ليش هوَ انتَ ترد علية؟؟؟

علي
لج ايلول شايـفة بذيج الفترة شصار بية قسمًا بالله اراهن اتعس انسان بالظروف السيئة واطلع انة اكثر، ولج الجِبل ما يشيل هلكدددد هموم حرت مابيـن انتِ مابين اهلي ولومهُم مابين امير وتحديد ماصيرة مابين فَرس المسكينـة الي روحها طلعت اعلى فراگ اميـر حرت انة

حرت يعني والله عجيب هوَ انة بذيج الفترة هم ينعتب اعلية عود؟؟؟ دربي ما اندلة وحق الله يوميٰة انة طالع وادورلي اعلى راس خَيط ما خليت مشكلة ما سويتهـا وي كِل الناس وروحيييي ماجنت اطيقها وماجنت اكدرر اتحمللل واحد

ايلول
بَس اني مووو ايّ واحد وهذا مو مُبررر

علي
انتِ تعرفيننن كِلش زين انّي لمن اضوج ضوجة عادية ابتعد منج حَتى لا اضوجج بحجييي لان ادري كلش زيـن شكد انة امخرط لمن اعصُب خوماااا بهجي وضع ترديني ٢٤ ساعة ويـاج !!

ايلول اخوي هذا تعرفين شني اخوي
اخويييي حطوا بالمؤبدد شسوي شسوييييي
ولج انة جدي رجال شكبرة شكدة، صاحِب فضل اعلينا مو شلون ماجان ربانا بـ ايدة وكبرنا وتعب اعلينا وكفت كدامة ودخنت وصحت بوجهة
جدي تعرفين شني جديييي؟؟؟

انتِ جاية تعتبين اعلية؟ ولج انة جنت بدون روح بدونننن روح ولا وعي امشي ومادري بروحيي تدرين لو لا ؟

تخيلي انتِ بس تخيلي فَرس يصيرلها الي صـار بـ امير راح تكونين ويـاي لو تكرهين روحج؟؟

ايلول
جنت راح الوذ بيـك مو ابتعد منك

علي
كِلشي يختلف ايلول انة رّجال وانتِ مرة والعواطِف وكِلشي تختلف وانة ماعايفج ب اسوء ظروفنا انة ويـاج بس انة هاهيّ احس هذااا جان غير روحي ما استوعبتها من بعَد الي صار ماستوعبت شي

عجيب يعني انسان لو حجر انة
قابل حجر وكون تعـال اتحمل واسكت!!!!
هم ماكدرت ماكدرتتتتتت

صرخُت بوجهة حَيل وحجيت بصوت يرجِف
ايلول
خلي هاي الاعذار التفاهة الك، ما مقبول ايّ شي مِنك بعَد واني اكرهك سمعت اكرهك ..

دموعي جانن بخدودي بس بعدني واكفة بقوة مُصطنعة

للحظة حَسيتة جِمد بمكانه لحظة، نظراتة بِدت تذبل، وضل ساكت ثواني طويلة قبل ما يتقدم خطوة، وصوته حجة بهدوء خطير

علي
تحجيهـا بهّزل وتسليك بينما هيَ تكتلني مِن جوة
تدرين شني معناها هاي الكلمة عليّ؟

ايلول
اي أعرف شنو معناها، وأكولها وعيني بعينك،
أكرهك لأنك وجعتني، أكرهك لأنك خليتني أحسّ نفسي ولا شي،
أكرهك لأنك خلتني أختنك من حُبك! اكرهك لان حسستني ب انّي انسانة ضعيفة ومُستغفلّة

علي
ايلول لا تكوليـن هجي شني ضعيفة شني مُستغفلة احنة بينة هسوالف هاي ؟؟ شني يعني بس انتِ ضعفتي انة ماضعفت؟ ليش تخجلين تراويني ضُعفج هاي شوفيني كدامج شوفي حالتي اخجل منها ماخجل دامج انتِ الكدامي ماخجللل

ايلول
ماريد شَي ولا تتقرب من يمي اصلاً ماحبك بعَد حُبك مات ..

علي
ايلول، تعالي، بس لحظة، خلّي أشرح، خليني أهدّج، خل نوكل سوة دقيقة بدون صياح...

كـال هَيج بصوت هامِس وهوَ يتقدم الي ويحاوطني بحُضنة

بعدت بسرعة عنة قبل لا يقوي قبُضتة و دفعتة من صدرة ورحِت

ايلول
لا تلمسني!!! لا تلمسني، خلاص!
كلشي بيك صار يخوف، حتى حضنك صار يخوف، حتى صوتك، حتى نظرتك! كُلشي بيككك ما مقبول

علي
يعني بعد حتى حضني صار مرفوض؟
كلشي بيه صار غلط؟ حتى وجودي صار يخنگج؟
لهل دَرجة انة صرت ما مرغوب هجي ؟

ايلول
إي يخنكني!! لأنّه انتَ صرت وجعي، مو أماني،
صرت الشي اللي من أشوفه أتذكر وجعي مو حبّي،
صرت كلشي ماكنت أتخيله يصير منك يا علي.

حاول يمِد ايدة مَرة ثانيـة ويُحضني حيل
علي
ايلول، انة مو قصدي أوجعج، أنة بس انوجعت، والله مادري ابوج مسوي هجي لو ادري ماجنت اسمح وانة اجيت اخذتج بنفسي ما جتت اظن هجي يصيـر والله ولو ادري ماجان خليتج تصيرين بهل موقف

صرخت بـ صوت عـالي حَيل وجانت دموعي تتطافر
ايلول
علي وخررررر قُربك ما اتحملة وخُرررر

ماجان يسمعني ولا جان يُرضة يعوفني ابد ضل حاضني حَيل وراسة حاطة عَ راسي

علي
اشششش كافي لا تزُرفيـن گلبي بدموعج ..

ايلول
علي جاي اكُلك وخر عني وخر

علي
كافي ايلول لا تبجيننننن كافي

ايلول
علي وخررر قُربك ما أتحمّله، وخــــــــرررر عني!!

بس هو ما جان يسمع، ولا جان ناوي يعوفني، حضنـي بقوّة،
إيده ملفوفة حولي كأنه يخاف إذا فلتها تنكسر الدنيا.
حسيت صَدره يضرب على صدري، أنفاسه حارة، وصوت نبضه أقرب من روحي.

علي بهمس
خّل نهدى سوة كافي

صرخت وحاولت ادفعة حَتى يوخر
ايلول
علي جاي أكلّك وخر عني، وخرررر...

بس هو ظل متشبّث بي، وخرني من حُضنة وضل لازمني حَيل ايد مطوقة خُصري وايد ثانية ع خدي ومخلي وجهة مُقابل وجهي ويباوعلي بعيون كلها وجع، وصوتة نزل مثل الرجفة

علي
كافي ايلول لا تبچيننننن كافي،
ترى والله كل دمعة منج تحركني وتموتني بمكـاني، كافي تدرين بية شكد احبج انة ..

ايلول
انتَ متحبني استوعببببب

علي
انتِ الي استوعبي، استوعبي حُبي و ولعي و هوسي بيج استوعبييييي وكافي تتحركين ماعوفج الا تهدين

حاولت أقاومه بكل الطرق، أدفّه، أصرخ، أسحب نفسي من حضنه،
بس كل مرة إيده تلزمني بهدوء، مو عنف، بس إصرار،
إصرار يشبه الغرق، كأنه يريد يخليني أهدى حتى لو رُغمًا عني.

اكثر من رُبع ساعة وهوَ يقاومني احس تعبت من انّي اقاومـة وضليت اهمس الة بتعب حَتى يعوفني بس هوَ ولا كانهُ يسمعني.
همس بأذني، بصوت مبحبوح
علي
بس سمعيني لحظة، ما أريد أوجعج، بس خاف عليج،
خاف علیج لدرجة جاي اختنك من الخوف اعليج، كافي ماريد اشوفج بهاي الحالة والله

ايلول
ما انتَ خليتني طول هل فترة بهالحالة

علي
ماجنت ادري ايلول ماجنت ادري هجي
شتدرين بية اكدر اعلى دموعج؟ حاجيني !
لو ادري بيج باجية ولو لمرة والله احرگ السَبب الي مبچيج حَتى لو انة جنت

كافي حبيبتي كافي ايلولة تدرين بية شكد احبج وتدرين بهل حُب مُستحيل يقل يزيد ما ينكص

ايلول
لا نقُص علي لتكول ما نقُص كلشييي راح

علي
ولج صدك تحجين وعلي فلا ينقص مستفحل اعلية حُبج منين ماندار الكاج انة بس كل واحد بينـة يمر بفترة صعبة

وانة انسان تعب ايلول، سَنة ونُص انة واكف اعلى حيلي مع انُ الظروف المرت اعلية مو هينات، ولج ٢٩ سنة ما مرت اعلية سَنة نفس هل سنتين وصعوبتهـا والله احس روحي كبرت ١٠ سنين

قـوة قبُضتة اكثر وصار يهمس ويتنهد بنفس اللحظة
علي
احبج، احبج بكِل مابية ..

بقيت هيچ ثواني، ساكته بحضنه،
وجسمي مرتخـي شوية رغم إصراري أبتعد،
بس بسرعة تذكرت وجعي، تذكرت شلون وصلنا لهل مكان،
فتذمّرت بخفّة ودفعت صدره براحتي.

ايلول بصوت واهن
علي... لا تخليني أضعف وخر ماريدك اني بعَد

نزل إيده ببطء، ما حچى،
بس بقى يباوعني بعينين مضيّعات، بين الخوف والخذلان،
واني بعدني أتنهّد وأنشف دموعي ب ايدي ..

علي
انتِ تدرين، اخخخ لو بس تدرين شكد هالكلمة توجع...

حاول يرفع ايدة بـ مَرة ثانيـة بٍس اني درت وجهي ورجعت دورة ..

ايلول
اذا تحبني كافيييي وخر علي ماريدك
تعبت اني تعبت مدتشوف وضعي!!!

علي
تمام
تمام، ما أجي،
بس اريدج تذكرين، اني بعدي أحبج،
حتى لو كلشي بداخلي انكسر، بعدني أحبج.

درت وجهـي عّنة، حسيت بي تقرب انداريت ورجعت لورة

علي رجاءً روووووح

تنهد ومِسح وجهة وگـال
علي
ماريد اصغط اعليج، ونفسيتي مو احسن من نفسيتج ابد
رايح استرجع روحي واجيج
كوني بخير لذاك اليـوم وانة يمج بكل وكت خليها ب بالج ..

كَال هيـج وخلة وراح بخطوات ثگيلة، كل خطوة بيها وجع وسكوت ما بي تفسير.
أول ما راح... حسّيت الهوا انكطع ويا خروجه،
كأن الغرفة فرغت مو من صوته، لا، من روحه.

جسمي بعده يحس بحرارته،
إيدي بعدها ترتجف من أثر لمسته،
وكلبي جان يدُك مو خوف، لا، شي أغرب...
خليط بين ندم، وحزن، وارتياح مؤلم.

غَمضت عيوني، حسّيت أنفاسي تطلع بصعوبة،
كأن صدري ممتلي غصّات مو قادرة تطلع،
وداخل راسي ألف صوت، واحد يسبّة، وواحد يشتاقلة، وواحد يگلي ليش خفتي تندمتي هذا الي يستاهلة ..

چنت محتاجة يبتعد، بس من ابتعد حسّيت فراغ،
مو فراغ المكان، فراغ النفس، كأن بتر جزء منّي وراح وياه.

أشوف الباب اللي طلع منه، وأحچي ويا نفسي بهمس
ليش كل شي ويّاه لازم يكونلة طعم الألم؟
ليش حتى لما يهدأ، يترك وراه عاصفة بداخلي؟

ضمّيت الغطا عليّ،
وانسدت الدموع بعيوني، مو لأن خلصت،
بس لأن كل دمعة بعدها ما تفيد، كُلشي تِعب، وأنا تِعبت أكثر..

طلعت من الغُرفة، اكو كاميرات بالصالـة، البيت جبير حَيل ما مؤثث ب ايّ شي باوعت للكاميرات سيارة علي موجودة واكُف ومنتجي ع السيـارة ويدخن

ضليت واكفة، ما عرفت أتحرك، حسّيت أنفاسي ثگيلة،
عيوني علـيه، اباوعلة احِس كل التعب والخذلان والوجع اللي ما گدر يحچي بيه موجود بي بَس مع هذا ماكدر امنع روحي من انّي اكرهة، يجوز مو كره كد ما انه شعـور غَريب مُستحيل يتفسر..

صرت كدام الشاشة واكفة وصافنة اباوع ايدة ترتجف شوي،
وكل نَفَس ياخذه بيه تنهيدة، كأن يريد يطفي النار اللي جوّاه مو الجكارة.

علي مو نفس علي اللي عرفته، ملامحه خافتة،
كأنه يحاول يقنع نفسه إن بعده قوي، بس التعب فضحة.

كل مرة يرمي الجكارة يگعد يرجع يشعل وحدة ثانية،
وكل مرة ينفث الدخان، يغمض عيونه كأنه يريد ينسى اشياء.

باوع على باب البيت، كأنه ينتظر تطلع، كأنه بعده يريد يسمع ايّ شي، للحظة راد يفتح الباب بس قُبض ايدة وسحبها ورجع لورة ..

فتح السيـارة وكعد بيها بدون ما يفتحها حَتى ..

ما اكدر نكُر حُبة الي حُبة اني اشوفة، بَس هذا كُلة قبِل موهَسة، ومُستحيل اكدر انسى الي سوى بيـة ...

ماكو لحظات واجوي فَرس وامير طلعوا متفقيـن سوى، رزلت فَرس بس كلتلي مانطانة مَجال ابد وهوَ الي لّح على اميـر ..

اليوم الثاني رحت للقسم مالتي منعنوني من انّي ادخُل بالاسم، رحِت للعميد حاولت احاجي ماقبل ودخلني بـسين وجين، لحِسن الحَظ انُ امير اجة بوقتها من شافني تذكرني العَميد و وافق من بعد مُعاناة

گضينـاه اليوم اني وفَرس بالجامعة، احس روحي تغيرت وهذا الشي جان واضح يم الكُل، اني انسانة عفوية لابعد حّد واضحك ع كُلشي ٢٤ ساعة حَتى ع حزني مستعدة اضحك و ولاكانهُ اكـو شي صاير، بَس بهاي الايام احس انضافت الي جِدية كافية حتى تبين الاختلافية الي صارت بشخصيتي ..

رجعت من دوام تعبـانة راسًا نمت، كعدت ع صوت موبايلي وهوَ يدُك باوعت رقُم غريب والساعة بـ ٤ العصُر

ايلول
الو

المندوب
اهلاً مدام، اني بالباب واكف اكو هَدية لحضرتج

ايلول
من منو؟

المندوب
ماعرف صراحة ياريت تجين حَتى اروح ..

استغربت واجـوا ب بالي هواي اشخاص
مُمكِن علي مُمكِن فَرس و مُمكِن حتى يكون بابا ديراضيني

لبست وطلعت ورِد احمـر وعلبـة اخذتهن وطَبيت

اشتميت الورد احس عُطر علي اجاني، مادري ليش بس حّسني كليي انُ الـة هاي الهَدية

شقت اكو علبة صغيـرة على الورد فتحتها اكو سنسال بي حرُف A ذَهبي

جان شكِلها حيل حلـو وناعمة ونازكة، رجعت فتحت العلبة الثانية بيهـا نساتل كت كـات
مو بَس عُرفت تاكدت انُ هوَ علي، باوعت وتنهدت
فتحت الكارت الي موجود وبلشت اقـرة

علي
مهمّا حسيتيني انّي بعيد ف انة قريب من يمچ، احبج هواي ماعوفج ابد، ماعندي غيرج تحمليني واتحملج المُهم ماتعوفيني ولا انة اعوفج..

احس ماكوشي يفرحني مِنة بعّد
كُلشي صار يسوي صار ما الة قَيمة يمي

احس فُقدت الشغف بكُلشي، رجعت لفراشي وفتحت الحظر بالواتساب عّنة واعتقد هاي جـانت اول مراحِل التخطي
ميهمني وجودك ولا اشرد مِن عندة ..

ايلول
لا تتأمل زايد احنـة انتهينا ..

ماكو ثواني ورّد
علي
هاي يمج انتهت، يمي ما انتهت

ايلول
انتَ كلتها يمي انتهت فَ خلاص ماريد شي ولا دزلي شي وماريد استقبل منك شي ثاني

علي
مستعد اخليج تحبيني من جديد حَتى لو انتهت من طرفج

ايلول
هههه شكد واثق من نفسك لعَد
انتَ جنت تدري بية شكد اكره الحُب وشكد اكره الزلم وشكد ماعندي ثقة واني ثقيت بيك وجّلَ من لا يخطأ كُلشي انتهى بينـة لا تحاول بعَد ..

علي
تدرين انة هسة بكِل بساطة اكدر اجيبج يمي ؟ انتِ مرتي ايلول مرتي، بس ماريد استعمل هل اسلوب وياج لان بكِل بساطة انتِ ايلولة ..

انة مارايدج رايد حُبج، اكدر اسوي كِلشي بالهمجية بس انة طالب رضاج وشاريج واعتذر اعلى كِلشي مُضى يجوز اعتذاري ميفيد بس صدكيني حالتي ما جانت احسن من حالتج

ضّل يحجي واني اباوع لرسائلة وماحس بيهن ايّ طعم احسهن باهتات بعيوني ولانفس قبِل

ضل يكتب جرايد مال كلام، معَ انُ هوَ مو من طبعة يكتب كد ما يخابر بس كتب كومـة وقتها ونفس الكلام رديت عليّ بـ

ايلول
ماعندي ايّ شعور تِجاهك، حَتى اول مرة جنت احس اكو شعور اكثر مِن هاي المرة، صدكني ياعلي كرهتك لا مو كرهتك، هاهيّ انتزع شعوري كدامك وانتهى الامر ...

من كلت هَيج ضل ساكت ماحجة شي ومن بعد ساعة تمامًا دز

علي
اول مرة احس كلبي هلكد انكسر ..

احس كلبي عُصرني من سمعتة هَيج يحجي بس اني جِنت متعمدة احجي حَتى ينهي كُل الآمـال لانُ امرنـا صار شُبه مُستحيل ..

مارديت ع سالتة شوية ودز ؟ هم مارديت
علي
لهدرجة وصلنـا ؟ صدك والله ايلول

ايلول
كتلك اني انتهينـا ماصرت اعنيلك شي بعَد ..

اول ماقُرا الرسـالة خابر مارديت، خابر اكثر مِن مرة واني ارفُض

اخرشي دزلي فويس
علي
ايلول شبيج ليش هجي اريد افتهم ليششش ولج كلبي مردتي مرد لاول مرة احس بهـذا الشعور ليششش تلعبين ب اعصابي هلكد ليششش؟؟

ايلول
لانُ ماريد استوعب انُ اني بعد ماريدك ..

كتبت هيج ودموعي صارن يطافرن مثل المَطر وكلبي احسة كام يجويني من كد الالم

علي
ايلول لا تصـيرين هجي لا تلعبين اعلية ديري بالج تخيليني لعبة ابين اديج ديري بالج تذليني بهاي الطريقة لا تحركين كلبي لا تسوين هجي تدريـن بية احبج .

ايلول
انتَ دتقنع روحك بحُبي انتّ ماتحبني وحَتى لو تحبني دامك تصرفت هل تصرف انتَ مِتت بعيوني وانتهى الموضوع..

علي
هيَ بكيفج ماكو شي انتهى ماكـوووو شي انتهى جاي تفهميننن؟

عفت وسَديت الموبايل احس اعصابي منهـارة وماتحمل ايّ شي، اليوم الثاني اجتني فَرس تسولفلي ع علي

فَرس
متخبُل تدرين شنو متخبُل حتى ويانة ميكعُد والكُل ملاحُظ ورادت بيبيتهُم تحاجيج تدرين بس امير كال الها لتضغطين عليها عوفيـها

ايلول
فَرس رجاءً لا تجيبيلي طارية حبابة عوفي

فَرس
ايلول يعني شنو خلاص هاهيّ؟

ايلول
ايّ هاهي ماكو بعَد ايّ شي يُربطنا

فَرس
لعد ليش دتبجين! اني شايفة الي ميريد الشخُص موهيج يبجي

ايلول
اول ايام طَبيعي من بعـدها محيكون بية شي ..

بنفس اليـوم رحت لمُحاميـة مكتبها موجود كتلها انُ اني اريد اتطلك وباقل مجهود كون لان مالي خُلك لا محاكم ولاشي

سوتلي ورقة وكملتها وكالت نخلي الشُرطة توديهـا لبيتة

ايلول
زين واذا ماقبل يوقع؟

المُحامية
يجرجر بالمحاكم والله نرفع عليّ دعوة ماعليج حبيبتي دامج تدفعين انتِ اني اسويلج كُلشي

ايلول
ست موهيج ماريدة يجرجر بنهاية هوَ ابن عالم وناس وانسان معروف ..

المُحامية
ميخالف انتِ مو تردي يطلكج مايصير الا بهطريقة ياعيني لازم يجرجر يلة

كلت بكلبي علي يجرجرج ما تجرجري وخليت وطلعت ..

اليوم الثاني اني بالمُحاضرة وادري انُ هل وقت يرحـون يسلموها الة

خابرني مارديت، خابرني مرة ثانية مارديت بدة يراسل
علي
لـج ماترديييييين علية ايلول ماترديييين

مارديت ولا فتحت مُراسلاتة ولا هوَ اجـة بعَد ..
كملنـا مُحاضرات فَرس كلتلي خلي نروح نشوفلنة مكان معزول، معَ انُ اكو هواي اماكن بيها ناس قليلة، بس اصرت نروح لمكان مابي احد

كعدنـا بمكان وحدنة بعدني هستوني كعدت شفت علي اجـة كدامي، باوعت لفَرس وصُفنت عليها

ايلول
انتِ مقتنعة؟

فَرس
لا تصيرين مدري شلونج اسمعييييي وشوفي شيحجي

كمت وكفت وكتلها بعَصبية

ايلول
تردين تصيرين ويا علية كوليلي حَتى بعد ما امشي وياج حَتى!!!

من كلتلها هَيج ماجاوبتني بنفس الوقت علي تقدم لاتجاهي حجة بحدية
علي
فَرس عوفينـا براحتنا شوية

راحت فَرس راسًا ردت اروح لزم ايدي باوعتلة بعصبية
ايلول
ايدي دير بالـك هيج تلزمها

علي
جنتِ تكليلي كِلشي تغير اني ومعزتك وحُبنـا بس ماجنت اصدك لحد ما شفت نظراتج هاي، شهل نظرات هاي !!! اول مرة اشوفج هجيييي اول مرة اشوف هل نظرات القاسية بعيونج ولج ليش ؟؟؟

داخلي جان يرجف بس منظري ضل ثابت
ايلول
عوف ايدي لا تتندم عوف ايدي

علي
انة متندمم مِن زمانننننننن مو من هَسة انة متندم
بس كليلي شهل گوة مـال العين العدجياهة؟؟؟
شلون تقدمين اعلى الطلاگ بدون ما تاخذين رأيي حَتى

ايلول
تطلگني احسن الك حياتي ماريدك تدخُل الها فاهم انتَ ؟؟؟

علي
لا مافاهم ولو تموتين ما افهمج طلاگ ما اطلگ جاي تفهمين ؟؟؟

ايلول
تحِب تجرجر بالمحاكم مثلاً ؟؟؟

علي
منين جايبة هاي الحجاية؟ من هاي الاستغفرالله الرايحتلها؟
كلنة كلبي بـ ايدج بس مومال شخصيتي تهديها انتِ لو هاي ديري بالج تفكرين بهاي السوالف لان ساعتها مراح تخسرين حُب علي كد ما تخسرين وجود علي
طلاگ ماطلگ، و تجاوز ديري بالج تجاوزين اعليـة ما اسمحلج بعَد ب ايّ تجاوز، اما هاي ف راح تخليج ميز مال فلوس ف يُفضل تكعدين وتسكتين لان ايّ نتيجة ماراح تلكين ..

كال هيج وخّلة وراح احس روحييي متت من القهَر رحت لفَرس رزلتها رزالة معدلة وخليت ورحت للاقسام

للعصُر خابرتني المُحامية وكلتلي ضروري تجين كتلها ان شاء الله بس مارحت، اليوم الثاني من دوامي من بعد ما كملنـا مُحاضرة استاذ امير صاحني استغربت ورحِت ويـا

امير
الي صار شي مرفوض يـا ايلول انصدمنا كل احنة بي خصوصًا علي من خابرة زَعيم انُ هجي كتاب واصل حَتى اعصابة ماكدر يتمالكهِن انة مو ويا بس بنفس الوكت مو ضدج واعرف كلش زين ب الي تمرين بي وما اقلل من شعورج

مع انّي ادري بيكم انتوا الاثنين شكد تحبون بعُض، وادري اكثر انُ حُب علي يفوق حتى حُبج بس مع هذا صارت هفوة والهفوات تصير بكِل العلاقات يا ايلول

الي اريدج تعرفينة شي واحد، انُ احنـة اولاد ناس معروفة مو ياهو انّ جان، فَ لو فكرتي تخطين فكرة المحاكم هيَ فكرة بحد ذاتها اعلان خِصام وكره

واعتقد حتى لو رادت تنتهي العلاقات ف تنتهي بالاحترام كلش احسن من المزاود والكره

شمهما تسوين ماراح تاثرين على علي، وصلتنا ترة كل الاخبار و وصلتنا انُ انتِ دافعة ٣ ملايين الها، بغض النظر عن انُ هيَ ماكلتج علمود مبلغ بسيط بس بفلوسج ماراح تكدرين تسويلة شي ابدًا

بس مُمكِن تسوين لكلبة اشياء..
انتِ راح تدفعين فلوس بس ماراح تكسبين شي ..
لتفقدين علي بهالطريقة الشَنعة ايلول
خير العلاقات انتهائها بالحُسنى
مو بهالطريقة هاي ..

جنتِ اقل شي مُمكِن تسوي تجين وتحاجيني انة، مو اعلى اساس انة اخوج الجبيـر؟ بنهاية احنة اهل هاي السوالف عيب تسوى ولو درة بيها جَدي ماراح يُرضى وراح يزعل تـرة هواي ..

كال هَيج بنبرة زعّل تقريبًا ماكدرت احجي شي احس روحي تفشلت وماعرفت شجاوب

كتلة ان شاء الله وسكتت جنت حَيل مستحيـة
رحت للقاعة لكيت فَرس كاعدة

ايلول
صخنت من الفَشلة

فَرس
هيَ هاي سواية؟

ايلول
اسُكتي فَرس ميجي الا بهطريقة شسويلة

فَرس
والله عيب ايلول والله عيب، هسة انتِ اذا احجي تكولين تصيرين ويـا علية عمي موهيج والله موهيج بس ترة كُلش عيب بنهاية علي ما اساء الج بطريقة موحلوة علي هواي اشياء سواهن الج مايستحق هيج مُعاملة ع فكرة!!!

ايلول
هوَ الي جبرني هوَ لتعصبيني فَرسسس قابل اني رايدة هالشي!!!!

حجيت هَيج وخليت وكمت كد ماجنت معصُبة، كامت فَرس وياي تحاول تحجيلي وتهدئني ما تدري انّي قافلة فردور ع هذا الموضوع..

رجعت للبيت واليوم كُلة علي ماراسل، فَرس كلتلي انُ علي حَيل معصُب وضايج مع انّي بداخلي جنت مهتمة بس احس روحي احاول امثل دور الما مهتم ..

خابرتني المُحامية رحتلها كتلها اريد اسحب القَضية كُلها، هيَ طلبت مني ٣ ملايين وانطيتها مُقدمة مليون ونُص ماقبلت وكعدت تحجي على علي ومدري شنو كتلها ابد ماريد ورجعيلي فلوسي ماقبلت

المُحامية
اني اشتغلتلج فَ مارجع ولا رُبع مو ذنبي انتِ تنازلتي

ايلول
حبيبي انتِ تضحكين علية لو شنو درجعيلي فلوسي احسن شهل سوالف هـاي والله حلوة

فعلتلها شخصية ايلول القَديمة كلتلها هيج بصايح هيَ هم كامت وكام تصيح

المُحامية
والله هذا الي عندي اني مارجع ولا رُبع..

جاي نحجي وماحس الا طَب علي بزية العسكري انصدمت من وجودة وضليت احاول استوعب وجودة هنـا

علي
السلام عليكُم

المُحامية
وعليكُم السلام اهلاً وسهلاً استاذ

علي
وياج الي تردين تجرجري بالسجون

باوعتلي بصدمة واني باوعتلها وسكتت

علي
ايّ نعم زوجهـا ..
انة سمعت كلامكم عن طَريق الصدفة طبعًا وبلا زَحمة رجعيلها فلوسها حالاً و ولا رُبع تكطعيـن منها مليون ونص انطتج، مليون ونص ترجعيلها

ايلول
ترة اكدر ادافع عن روحي

علي
ترة محد كلج احجي ؟

ايلول
عليييييي

خزرني وكال بحدية
علي
صوتج ليعلى اعلية، هوَ هاي سلبيات اليتزوجلة وحدة اصغر من عدة ب ٩/١٠ سنوات عمرها ١٩ سنة تعلمت اعلى دلال الزايد ونوب كل زعلة وتعال طلكني
ع العموم ست رِحاب رجعيلها فلوسها وبطلي نصُب واحتيال اعلى الناس

المُحامية
اني شدخلني ترة احنة منفقين ومن بعد الاتفاق ماكو اتفاق

علي
على عيني وراسي اتفاقج بس احنة القضية ما استمرينـا بيهة
ولا رُبع الج اصلاً

المُحامية
ترة البارحة كُلة اني اشتغل بسالفة

علي
هيَ شنية ؟ هوَ كتاب سويتي وخليتي القاضي يوقع اعليّ و وديتي دورية شُرطة المفوضية الهُم ياخذون ٢٥ اكو اكثر ؟
ماطيج غيـر ١٠٠ الف ولو ال ١٠٠ الف هواي اعليج
لان الظاهر انتِ ماقارية بالقران الله شكال اعلى الطلاگ

المُحامية
ارجعلكُم بس مليون والنُص هذا حق شغلي اني ما مجدية منكُم

ايلول
هاهيّ

علي
اسكتي انتِ مو هاهيّ رجعيلها مليون واربعمية شني جاية تقطينـا انتِ؟ تردين تستغفلينا عود لو شني ؟ بطليهن هاي السوالف احنة راعين هجي مجالس ونعرف الامـور ذني رجعي مليون واربعمية رجاءً بـدون اعتراض

المُحامية
حضرتك ع ايّ اساس وجاي تأمرني !!!! ترة ماكو هيج قانون احنة متفقين

علي
ست رِحاب، اني نَقيب ، وتدرين زين شنو يعني نَقيب بالجيش العراقي، يعني أعرف القانون حرفًا حرف، وأعرف وين تنحسب الخطوة غلَط، ووين تتحول لمخالفة جنائية.

باوعلها بعين قوية وهو يسحب من جيبه دفتر صغير وبطاقة التعريف، خلاها عالطاولة قدامها.

علي
المادة ٤٥٦ من قانون العقوبات العراقي،
تنص إن "كل من استحصل على مال الغير بالاحتيال يعاقب بالحبس أو الغرامة".
وانتِ استلمتِ مبلغ لقاء خدمة قانونية ما اكتملت، وجاي ترفضين ترجّعين المبلغ،
يعني تصرفچ يدخل ضمن الاحتيال المادي الصريح.

المُحامية وهي تبلغ ريگها بخوف
استاذ، لا تكبّرها، احنا نكدر نحلها ودّي، مو لهالدرجة.

علي ابتسم بسخرية خفيفة
اني ما جاي أكبرها، اني جاي أوضّح بس.
الفرق بين "شغل قانوني" و"نصب مقنّع" شَعرة وحدة، وانتِ كاطعتها وانة ماجاي احجي عن حالة زوجتي بس لا شفتلج هواي حالات ومبالغ ضخمة ما شاء الله .
وإذا بعدج مُصرة، نكدر نستدعيج رسمي،
ونخلي نقابة المحامين تحقق، لأن تصرفچ مخالف لآداب المهنة حسب المادة (٦٢) من نظام المحاماة.

المُحامية بدت تصير عصبية بس مرتبكة
وهسة انتَ شنو تريد مافهمت جاي بمكتبي وتشمر شنو ا...

علي قاطعهـا ببرود حاد
أريد حق الناس، مو تعبچ، حق الناس أولاً.
ترجعين مليون واربعمية وهاي الاربعمية مُجاملة مني طبعًا حتى لا تصير اشكال شرعًا، هسه كدامي، قبل لا تتحول المسألة من كلام لمُخالفة رسمية.

باوعتله بخوف، عيونها راحت من علي إلية، رجعت عليه، شافت نظراته الجدية وانه ما بي مجال نقاش.

المُحامية بصوت خاف
خلاص، خليها تاخذ الفلوس.

مدت ايدها للمكتب وطلعت الفلوس

علي بهدوء بس بلهجة قاطعة
زين، وهسه اكتبي ورقة استلام موّقعة، حتى لا ترجعي تبچين وراهن وتدّعين شغلات.

المُحامية كتبت الورقة بإيد ترجف
تفضل استاذ.

علي أخذ الورقة، تأكد منها، وسوة بيها نفس ظرف وحط بيها الفلوس

عيونـة التقن سوية اباوعلة بي جمود موطبيعي واحسة اكتفى بـ نظرة باردة وجامدة بَس ..

علي
وفري فلوسج لاشياء اهم وعوفي سوالف الاطفال حبيبتي
كالها بحِدية ومدلي ايدة حَتى اطلع كدامة

درت وجهي وطلعت قرب من يمي من ورة احس حَتى ريحة الهوى صارت دخان من ورة ريحتـة

ماجنت اعرف اذا المفروض مني اشكرة او اسبة واتعارك ويـا
بس الشي الوحيد اللي حسيت بيه، إنّه رغم كلشي، بعده يعرف شلون يحميني، حتى لو وصلت لمرحلة ماريدة وجنت ضدة ..

درت وجهي اول ما طلعنـة من مكتبها وكتلة بعصبية هامسة
ايلول
حضرتك تمشي وراية وتراقبني !!

ايدة اعتلت لحجابي مَد ايدة وعدليا من كدام
علي
جديدة اعلية؟

خزرتة وخليت ورحِت رافقني حدما صعدت سيارتي بهدوء وخلة وراح ..

اليـوم الي ورا راسلني شلونج شخبارج واني اجاوب بكُل برود، يحاول يحجي يحاول يفتح مواضيع الا انّي جنت باردة ..

من بعد هل حادثة ظنيت ماراح يُرضى ابد، ما ظنيتة هلكد يرجع نفس قبل ونفس الحجي ونفس الاسلوب محد جان متغير غيري ..

اليوم الي بعدة كان يوم 14 شباط، المطر نازل خفيف، والجو كله ريحة شتا وحنين
الجامعة هادئة أكثر من المعتاد، الكُل مشغول بعيد الحُب واجوائة..

جنت كاعدة بمكاني المُعتاد بالكافتيريا، اشرب كهوة واكلب بموبايلي، شويـة واجتني البنية الي تشتغُل بالنادي
-
أيلول، مو؟
هايّ الج ..

باوعت للبنت وبعدين للصندوق الاحمَر والورد الطبيعي الي جان بيدها، اكو بطاقة صغيرة مكتوب بيها بخط مرتب

اليوم، العشا عليّ. لا ترفضين هاي المرة.

كلبي رجف لحظة، عرفت الخط، وعرفت عناد صاحبه.
فتحت الهدية ببرود متعمد، كأن ما بيها شي يهم، بس عيوني جانت تقرأ كل تفصيل داخلها حلقة فُضية، عطري المفضل، ومفتاح صغير لمطعم يعرف تمامًا إني تحبه.

رفعت حاجبي، وابتسمت بسخرية
وصليله شكري، وكوليلة... هو يحب الخسارة الظاهر.

رجعت لزمت كوبي، بس إيدي جانت ترجف من جوّا، مو من برّا.

- يعني ارجعها ؟ متحسين حرام خطية والله

ايلول
والله مو حرام، حرام انّي اقبلها شُكرًا والله شُكرًا الج انتِ ..

راحت هيَ عرفتة انُ هوَ موجود بمكان مُعين ف قبل لتطلع خليت وطلعت بـسرعة .

طولاليوم اشوفة يكتب ويمسح يكتب ويمسح اخر شي بليل دز

علي
ردت اكول كسرتيلي كلبي بس گضتني الزَحمة زِلمة مشورب انة، جنت اظن انُ مُمكِن اليوم يتصلح كلشي وجنت انتظر هل يوم يوم يوم بس كلشي كسرتي كالعادة ..
موديلي فيديوهات لـ مطعم ومرتبة بطريقة حيل حلوة وصورة الة وهوَ جان مبتسم وكاعد يم ترتيب

احس لِلحظة كرهت نفسي بس ما تنازلت
ايلول
كتلك مراح اكدر انطيك شي بعد بي ماصدكتني

شافها ومارد ابد ضنيت نفس كُل مرة ورة مُدة يرد بس فردور هل مرة مارد، يومين كاملات هوَ ماكو

جنت مفتقدتة حيل و ودي اراسل، خصوصًا اخر رسالة احس حيل جرحتة بيها بس كلبي احسة ميطيني اراسلة ابد ..

بليل جنت كاعدة وحدي اكلب بالموبايل وافكر شي وبلحظة وحدة اجاني اشعار منة ..

علي
يمكن ما أستاهل تحنين، ويمكن فعلاً ضوجتج، بس كلشي يصير ما أگدر أعوفج. حتى وأني متأذي، بعدني أحبج بنفس الوجع. احبج ايلولي ..

قريت الرسالة وحاولت ما تبتسم، بس النبضة اللي ضربت كلبي فضحتها.
حاولت اكمل يومي كأن ما صار شي،
بس الحقيقة إن كل حرف كتبه ظلّ يدور بعقلي مثل نغمة ما تنتهي.

مرّت الأيّام ومن بعدها الاسابيع ومن بعدها الاشهُر
والمسافة بيناتنا ما عادت تنقاس بالأمتار، وانمّا بالسكوت.

علي ظلّ نفس علي،
نفس الصبح اللي يبدأ برسالة،
ونفس المساء اللي يخلص بـ شلونج؟ أكلتي؟ نامي زيـن، ديري بالج على روحج ..

جان يدور عن أيّ فتحة ضوء يدخل منها لعالمي الي جنت متوقعقة بي على نفسي، بس اني جنت اسد النوافذ كلّها.

جنت ارد عليه بهدوء قاتل،
وكلماتي باردة كأنها مكتوبة عَ ورق ثلج،
"تمام"، "بخير"، "مشغولة"
مع انُ هنّ كلمات قصيرة بس جنت الاحظ انهّن نفس السيوف الي تطعنة فجأة

يحاول يفتح مواضيع بسيطة،
يحچي عن شغله، عن تعب الدوام، عن الزحمة، عن الجامعة،
واني ارُد بابتسامة صغيرة وانهي كل محاولة،
وهوَ جان يعرف إنها مو ابتسامة رضا،
كد ماهيَ ابتسامة كافي بعد، ما أريد أكمل.

بس رغم كُل شي ما توقّف،
حتى لمن ارُد عليه بجفاف، ظلّ يراسلني دومة،

احس روحي رجعت لـ ايلول القَديمة الي ترفُض العلاقات وما تتقبلها ابد وتكره شي اسمة رِجال وجدية حيل بهل مواضيع، كلبي وانكسر شريد بعَد اجرُب مرة ثانية؟ لا مُستحيل ..

جان يجي للجامعة أحيانًا، يوكف بعيد يشوفني اطلع من المحاضرة، عيونه تدور علية وسط الوجوه، وإذا صارت عيونه بعيوني لحظة، انزل راسي وامشي بدون كلام ..

وجان بكُل مرة يشوفني بيها يبتسم هو ابتسامة حزينة،
يحاول يخفي بيها شتات الحنين، يتنفس من بعيد وبلحظتها كتبلي..
بَس لو تدرين شكد أحن، وشكد بعدني أنتظر تصيحيني .

مُمكِن ابين باردة، بس جوّاي جانت عاصفة.
كل مرة اشوفة بيها، ينهض الفضول بكلبي،
يا ترى شيريد؟ ليش بعده مصر؟ ليش ما تغير؟
بس جنت اسكت وأكتم وأتظاهر..

لحد ما إجى يوم، كان الممر بالجامعة مزدحم،
صوته ناداني من بعيد، "أيلول!
التفتت، وجانت نبرته بيها شوق وعتب،
تقدملب بخطوات مترددة، عيونه تبحث عن ايّ ملامح اشتياق بوجهي الة.

علي
لحد هسه بعدج نفسچ؟ نفس البرود، نفس النظرة؟

سكتت، نظرتله بنظرة مستقيمة، بلا دموع ولا حجي ويكُل برود ..

أيلول
الفرُق الوحيد، إنك بعدك تحچي وأني بعدني ما أسمع.

بقت عيونه علية لحظة طويلة،
كأن الزمن كله واكف بين نظراتنـا،

حَسيت عِندة هـواي حجي راد يحجي بس استوقفة كلامي هـواي حسيتة راد يحجي وبنفس الوقت راد يعصُب بس سكت
وبكل الأحوال، مشى...

واني ظليت واكفة، واحاول استوعب الديصيـر ..

من هاي اللحظة حَسيت علي بـدة يتغير كُليًا وحتى لمن يحاجيني يحاجيني ب برود، دائمًا هوَ يسال ويبارد ويهتم بس بصورة جامـدة

حَتى فَرس جانت تحجي عليّ وتحجي عن انُ الي بالبيت الكُل يشتكي مِن تغيُرة وعصبيتة الفَضيعة الصاير بيها ..

قُربت امتحاناتنة وما ضل شي ونكمل، وبوقتها اني جِنت صافنة ياترى شلون راح اواجهُم؟ والكُل يدري اني بالبيت مو بالسكن

واذا رحت لخـالة إيمان بيا عُذر راح اروح ؟ واذا رحت تلقائيًا حيحجون لـ بابا وفوك ما انهُ هوَ مايحاجيني راح يجرحني اكثر واكثر..

كمية الـ حيرة والـ تشتت الي جِنت بيهن موطبيعيات وجنت محتارة وماعرُف شنـو اسوي حَتى ..

ماجان بيدي شي غير انّي اجاري الوضعيـة واكول الهُم ب الي صار بالتفصيل ..

كملت الامتحانات ورحت للموصل حجيت لخالة بس خليتها توعدني متوصلها لبابا ابد، من عُرفت خالة ضلت احجي عليـة وتحاول تقنع بية انُ ارجع لعلي

اول ما وصلت للموصل، اندزلي فيديو لـ سيارتي واني دامشي و هوَ وراي!

ياربي شكد مهوسس

للحظة كلت هيج وابتسمت، ونوب اتذكرت الي صار وعبست وجهي ...

حجـة وياي شوية، واكالعادة اجاوبة بكُل برود ..
يوم من الايام جِنت كاعدة بليل الساعة بـ ٧ اني وخالتي بصفي، وصلتني رسالة مِنة
علي
حيل محتاج اشوفج

كلبت الموبايل بيدي، وجان ردي واضح من أول لحظة
ايلول
ما أريد.

إيمان
خالة ليش تكليلة لا ولد رايد يشوفج والله خطية

ايلول
خالة انتِ ماتدرين

علي
بس محتاجج؟

إيمان
كومي ماما كومي بدلي وشوفي حرام عليج ترة شيسويلج بعَد ؟

ضلت تلح عليَّ وبكلبي احس اكو فضول واكو اشتياق رُغم كُلشي

علي
ايلول ما نتأخر انة واكف ابابكم

بدون ما اكُلة تمام رحت لبست وطلعت ..
صعدت بالسيـارة وضليت اباوع لكدامي

علي
هلا ايلول

رديت عليه ببرود محسوب
ايلول
هلا. شنو تريد؟

ما جاوب. بَس حسيتة جان يباوعلي، احس نظراتة قلقني باوعتلة وجهة متوزع عليّ التعب

بعد لحظات، همس بصوت وكأنه يطلع من مكان بعيد
علي
مشتاقلج هواي احس روحي تايه بدونج ..

الكلمة احسها نبتت بـ صدري بطريقة ما توقعتها ما كانت طلب، ما كانت اعتذار، كانت تصريح عن حالتة بشكل مُباشِر.

حرك السيارة وبدة يحجي
علي
ايلول كافي والله تعبت من غيابج، ليش تردين تذليني هجي؟ اذا تردين تندميني ع السويتة ترة تندمت، واذا تردين تحركين كلبي نفس ماحركت كلبج ترة كلبي انحرك وصـار رماد بس ضل ينبُض ب اسمج، ايلول كلشي بية رايدج مشتاقلج هووووواي لدرجة احس الشوگ بين ضلوعي صايرلج

صوتُه جان مكسور، بس بعده حاول يلزم نفسه.
كلبي صار يدك بسرعة غَريبة بس احس تلعثمِت وماعرفت شلون اجاوبة بـ : لا ماريدك بعَد ..
احس كُلشي جواي يهمس ب لا تصدكين بعَد ..

علي
جاوبيني ايلولة جاوبيني حبيبتي كليلي شي برديلي كلبي شجاج؟

ايلول
جوابي نفسة اني مارجعلك ابد، اصلاً حَتى شعوري تِجاهك مات مو بالغصُب هيَ علي

احجي واحس رجفة طفيفة سارت بجسمي اريدة ما يتأمل ويتخطاني ومن بعدها اني اكدر اتخطى غير هالشي مُستحيل اكدر انسى اذا ماشوفة ينساني ماراح اكدر انسى بهسهولة ..

باوعلي بـ نظرات تعبـانة وعيون ذابلة
علي
هَسة هذا اخر قرار عدجيا ؟ نهائيًا بعد ماكو !

هزيت راسي ب ايّ

علي
حطي عينج ب عيني واحجيلي كليلي حَتى بعد ماجي ايلول احجي

باوعتلة واني احس جسمي كُلة صـار يرجف بس للحظة قويت روحي ونُطقت
ايلول
ايّ ماريدك بعَد ..

ضل يباوعلي وداس بانزين بـسرعة هائلة، بحَيث السيارة توقفت بسرعة جنونية، للحظة ضل صافن علية وعيونـة صارت نـار ومانطق غير شي واحد بعصبية

علي
خرة ب ابووووو الحُب، وانعل ابو الي يحِب ذلة والله ذلة لو اعرف اشلعـة واكتل روحي ولا اخلي ينبُض بعَد ..

استدار بسرعة اصلاً احنة ماعبرنا هواي. ضليت ساكتة وهوَ سكت ومحد حجة شي ابددد ..

وصلت للبيت نزلت بـسرعة بدون كلام بدون ايّ شي بس صوت انفاسة العصبية جانت مسموعة

بيومهـا جان عندي أمل يراسلني رُغم كُلشي صار بس انصدمت لمّن شفتـة ماراسلني ابد، عرفت من ساعتهـا انُ علاقتنة انتهت وعلي بعَد ما موجود ..

مَرّت الأسابيع ثگيلة، أيام متكررة مثل بعضها، ماكو بيها شي غير صمتي وهدوء الغرفة.
ما أعرف شلون مرّ أول أسبوع، بعده الثاني، والثالث، وبعد كل يوم جنت أحس نفسي أتجمد أكثر، كأن الحياة داخلية بدت تتوقف شوي شوي.

حياتي كضيتهـا بالغُرفة بعيدة عن الكُل، لا اضحك وي ولد خالتي ولا اختلط بنسوانهُم وشخصيتي صارت جدية ومُملة واكضي اغلب وقتي بالنوم بَ س..

يوم من الأيام، إجت فَرس لبيتهُم ورحت الها اني
جنة كاعدين بالمطبخ، وعيونها تدور بدقة، تحاول تلگط أيّ شي بوجهي.
وبعد ما شربت أول رشفة من العصير، نزلت نظراتها وقالت بهدوء كأنها تمهّد الشي

ايلول
احجي شنو بداخلج

فَرس
إيلول، آني قبل لا أحچي، أريدج تهدين، ما أريد أشوف دمع بعيونج، اتفقنه؟

نظرتلها بخوف من المجهول
ها فَرس، شنو؟ شكو؟"

تنفست بعمق وقالت بصوت ناعم
فَرس
علي مو زين...

جنت أعرف، كلبي جان يحسني بهالشي مَرة علي كلي بحِجة شقّة

علي
تدرين شلون تعرفيني موزين؟ من تشوفين اكو خنكة بكلبج، لان انة كلبج فَ كل ما تحسين روحج موزين تلكيني انة موزين هم..

جان يضحك ويحجيها، وبهاي الفترة شكد ما اموري سيئة جنت احسة نفسي، ماجنت مستبعدتها بس أول ما سمعتها تطلع من فمها، كأن كلمة "مو زين" دخلت صدري مثل سهم.

إيلول
شنو بيه؟

فَرس
من ورا ما صارت بينكم هاي السالفة، تغير كليًا، ما يحچي ويا أحد، لا يضحك، لا ينام طبيعي، طول الوقت بالبيت عابس، حاير، بس يطلع للشغل ويرجع.
وحتى الأكل ما جاي ياكله مثل قبل، وبس ساكت ويدخن تعاركوا ويا اكثر من مرة ب امل مُمكِن يبطل تدخين بس ماجان يهتم، يسكت ويكعد بالحديقة وحده، يظّل يدخن سكتة.

ظليت أسمعها ودموعي تنزل شوي شوي، جسمي كله ارتخى، حتى نفسي اختنك للحظة.

فَرس
إيلول، البارحة اميـر شافة بالباب واكف وصافُن، ولازم جكارتة ومطفيها قبل حتى ليفتحها حَتى! ، سألَه شبيه، رد عليه بجملة وحدة، أكدر أتحمل وجع الطلق بس مو وجع الخذلان...

تجمدت، ما ظل عندي صوت، بس كل نبضة بصدري جانت تصيح "ليش؟ ليش هيچ صار بينا؟ وليش وصلنـا لهل مرحلة؟

رفعت عيوني لفَرس بصعوبة وكلت بهدوء
ايلول
ماكدر ارجع نفسيتي ما تتقبل فَرس ماكدر .
وهوَ نهاهة بعد ف بعد شنو؟

فَرس
ما أنكر، بس يمكن هوَ بعده ينتظر بس كلمة منج، كلمة تردّله الحياة.

سكتنا ثنينة ، والجو صار أثگل من كُل الكلام.
نظرت للفراغ، وگلت بصوت خافت ما بيه دمعة ولا قهر، بس بيه تعب
حتى لو بعده يحبني، ما يفيد، لأن الحب من يوصل لهالمرحلة يصير خوف مو شعور، فَ هوَ راح يتعـود فَرس وراح ينسى ..

ترجيتها ب انهّا متجيب للموضوع طاري ابد وخصوصًا علي متجيبلي طارية بعَد ..

رُغم كلبي يعصرني من الالم عليّ بس خلاص لازم نبدي نتعود ع الوضع ..

ما جان يوصلني أي رسالة طول فترة العطلة ...
بالرغم من إنُ الموضوع كله جان يزعجني، بس جزء بداخلي ينتظرة يرجع وجزء مرتاح
وأكو جزء ثالث يصرخ من داخلي ما أريد، خلاص، انتهى، ما أرجع أضعف لة مُستحيل ..

انتهينـا من العُطلة وبلشنـا دوام بـ بداية ٢٠٢٠، الامور جانت متوترة والاوضاع متكركُبة بالعراق بسبب طالب الحوزة الايراني الي بالنجف الي انصاب بكورونـا ..

بلشنـا نلبس جفوف وكمامات ونمارس دوامنـا، جنت المح مرات علي من بعيد رُغم انه يحاول ما يخليني اشوفـة ابدًا

اخر عشر ايام قبل الامتحانات صرت اشوفة بشكل واضح وصار يوكف كدامي ويباوعلي من بعيـد
كُل يوم نفس الرّنة ويومية اشوفة كِدامي

ب اخُر يوم جان هوَ موجود بي ورة شويـة من المُحاضرة دزلي فويس، استغربت واحس ب احساس غريب، صارلنـة هوووواي ما متراسلين ابد ولا سامعة صوتة حَتى

ماكدرت انتظُر، استأذنت من دكتور وطلعت حَتى اسمع

علي
جَرح الگلب من فرگاك خَزن
محَد مِثلي بمحبوبة تِمحّن
هَم هذا نصيبي وانجبُر بي
لا اني اتوب ولا الله يهدي ..

احس كلبي انعصر ودمعتي كُبل نزلت
وبسرعة وبدون وعي جاوبتـة ب

ايلول
اسم الله عليك..

شافها ومارد علية، اليوم الي ورا ماشفتة ابد، استغربت وظنيت يمـة شغُل، انتظرت لليوم الثاني هم ماكو، الثالث ماكـو خفت وبلشت اشك وبنفس الوقت ماكدر اكول لـ فَرس واسئلة عنها وتاكلني وتشربني ..

وبيوم من الايام فّرس ماداومت، انصدمت ماكلتلي ليـش خابرتها شوية وردت

ايلول
شكو فَرس ليش ممداومـة؟؟

فَرس
ايلول، علي انصاب بـ كورونا، صارلة ٤ ايام مديشيل راسة من الفراش وحالتة حَيل خطررررة واليوم اكتشف انُ هوَ مُصاب هسة المَسحة مالتة طلع وهَسة راح يحجرونـة كُلنة
يُتبععع.....

_______

شَمس ..

اليوم الثانـي داومت بالجامعة و اول ماجيت نمت من تعَب جان يوم خميس

كعدت من النـوم فتحت موبايلي طبيت للانستا لكيت سُراج منزل ستوري، مصور قَبر زَينب من بعيـد وكاتب ( رُّبما في حياة أُخرى ) .

والله احِس اعصابي استنزفهـا هذا صدُك يحجي؟؟ يحُط الحلقة بـ ايدي ويكُلي احبج ونوب يرجع هيج يكتب ! جان احترم وجودي عـاددد !

كتبتلة
الله يجمعكُم سويـة يارب بالاخرى

ضليت كاعدة ولازمة الموبايل ومنتظرتة يرُد واهز برجلي
دقايق ورّد

سُراج
ستوري قَديم ..

حطيتلة لايك رأسًا
هذا شبي ديستغبيني لوشنوو!! عَ اساس مادري اليوم جان هوَ بالنجف !

سديت الموبايل وكمت بدلت وغسلت ونزلت

الكُل نايم عدا سُراج و سَجاد وغيث وسيوف موجودة، اجيت كعدت وما اهتميت لا السُراج ولا النظراتـة الي

بهل اثنـاء طب زَعيم جان بالجِم و سَبب جانت نايمة فَ خلة وصعد نـام

رحت للمطبخ سويتلي اكل وكعدت اكل، لزمت موبايلي وصرت اشوف مقطع لباب الحـارة واكل شوية واجة سُراج وكعد كدامي

قلبت عيوني بتملمُل وجان مبين علية انّي ضجت

سُراج
مو جاي اراسلج وموبايلج بيدج ماتردين

حطيت الماعـون ب ايدي وردت اشيلة واكوم لزم ب ايدي قبل لا اكوم

سُراج
اكعدي شبيج خل احاجيج

شَمس بعصبية هامسة
شتريد مني سُراج؟

سُراج
ارد احاجيج شني هل احترامات للاكبر منج عمي

شَمس
ماريد احترُم اذا تظن انُ الاحترام بهيج سالفة، اريد اكوم

سُراج
شمِس اكعدي شبيج !!

شَمس
استغفرالله

تنهدت بتملمُل وكعدت بمكاني

شَمس
شتريد اريد افتهم؟

سُراج
اريد افهمج ع الي صار، شمِس ترة الـ صورة قديمة حَيل والله

شَمس
سُراج انتَ دتستغفلني لو شنو ترة ادري بيـك اليوم جنت بالنجف وبعدين اني ميخُصني

سُراج
لتكولين ميخصج شلون ما يخصج الموضوع؟ طبعًا يخصج دام يخصني انة، بس الموضوع ومابي انُ

شَمس
انُ شنووو، شنو تبريرك بلة؟

سُراج
هسة اطيني مجال احجي شبيج اكلتيني وشربتيني كافي شبيج

حجة هَيج بحدية سكتت واني منتظرة تبريرة

سُراج
افتحي موبايلج وشوفي المُراسلة

فتحت الموبايل رحت للـ مُحادثة دازلي نفس الصورة من الارشيف وهوَ حاطها قبل ٥ اشهُر تقريبًا

سُراج
ما عدي صورة وحطيت هاي لا اكثر ولا اقل، مو قصدي استهين بمشاعرج لمن حطيتها بس جد ماجنت منتبه..

شَمس
وانتَ عود ليش الا تنشُر!!

سُراج
مُجرّد رّحمـة لا اكثر

سكتت ماحجيت شي بس احس روحي نـار وتغلي، ايدي اليسار جانت ع الطاولة، حَط ايدة ع ايدي سحبت ايدي بهدوء بس ضل مجلب بيهـا

سُراج بنبرة هادئة
شمِس زينب ماكدر أنكرها، ماگدر أگلج هيَ ماتعنيلي، چانت صفحة بحياتي وانسدت، بس مو معناها بعدني عايش بيها. أني عايش وياج، وأحچي وياج، وأضحك وياج، بس مو كلشي أكدر أمسحه بثانية.

شَمس
يعني شنو تريدني أفتهم من هل سالفة؟ أعيش ويا واحد بعده يحب على غيري؟

تنفس بعُمق وباوعلي
سُراج
لا، أبد. أريدج تفتهمين إنُّ الإنسان إذا فقد شي مهم، ما يعني بعده يريده، بس يعني تأذى منه. وأنة تأذّيت، وزينب صارت وجع مو حُب بالنسبة الي، وبديت اقتنع اكثر لمّن بـدت ما تتراودلي ب احلامهـا ولمن تتراودلي تطلب مني انساهة واعيش ..

شَمس
بس الوجع يظل اسمها، يظل بيه شي ما يتنمسح، حتى لو چنتَ وياي. لذالك اني مايرد هل علاقة هـاي ..

سُراج
الفرق إنُّ أنة هسه من أتأذّى أجي أحچي وياج، مو وياها. من أضوج، أشتاق لصوتج الج انتِ . من أنشر شي، ما أقصد أوجّعج، بس أحيانًا الماضي يطلع غصُب شمِس..

وبعدين شمِس ترة زينب الهـا سّنة كاملة، ومنو الي توقع سُراج ينسى زَينب ؟ منو؟ انة بنفسي هم ماجنت متوقع

بس ارادة ربـج جان غير، الله كتب كِلشي ورتبة النـا، وسوة ظروفنـا بنفس الاوقات حَتى نكون عوض لبعضنـا..

شَمس
سُراج، أني مو ضدّ ماضيك، بس ضد إنُّ يظل يلحگنة، وارجع واكول لو تشوف روحك بعدك فَ لتحاول تدخُل بعلاقة وياي. لو ردت أعيش وياك فَ راح اعيش ع اساس انّي الوحيدة الي ببالك، مو ظل أحد وياي.

سُراج
شمِس جا انة المن اخذتلي سنة وهَسة رحت لايران ٣ اشهر غير اعلمود اضبط اموري يلة اجي! انة هاهيّ جاي ومقتنع وناسي ومستراح، جاي لان كلبي وعقلي رايدين هالشي مو عقلي يكلي شي و كلبي شي ثاني!
انة اخذتلي ٣ اشهر ب ايران انة احاول اتخلص من كلشي بالماضي وما خطيت خطوة الا وانة متاكد
وأنـة اوعدج، ظلّي الوحيد هوَ انتِ ..

احس روحي ما مقتنعة كليًا، بس إحساسي بدة يلين شوي، وكأنّي صدّگت جزء من كلامة بس بعده جرحها مفتوح

شَمس
وخر ايدك سُراج لايجي واحد

اخذ ايدي ومَدهـا و ضحك
سُراج
ايدج اكبر من ايد علاوي بشكم سنتم يربج

شَمس
اوووووه سُراج وخر لا تتنمر علية

سُراج
لا ماجاي اتنمر بس جاي احس بطراوة موطبيعي

كال هَيج وهوَ لازم ايدي ويمسد بيها ويباوعلي، احسني ارتبكت مو شلون ماجان ولِلحظة حسيت روحي بحلم هاي شنو ومنو كاعد سويـة وشلون وصلنا لهل محطة هـاي بالضبُط ..

سُراج
تدرين شني احسن شي واحد مُمكِن يعيشة يعقد وبعدين يحب، عـاد يحب بالحلال والحرام مُباح يمة وهذا لذة الحُب

من گال هَيج احسة خجلني، سكتت و سحبت ايدي بـ خّجل وخليت وكمت بسرعة

يُمة اختنكت هوَ يصير اني ممستوعبة كمية قُربنا لو شنـو

طّبيت للصالة لكيت سَجاد و سيوف كاعدين سوية

شَمس
هاعيني هااا شدسوينننن

سَجاد
انجبي ولج شجاي انسوي جاي نحجي شني مايصير نحجي

شَمس
طبعًا مايصير وبعدين انتِ شعندج هنا ماتصعدين مو زَعيم كلج اصعدي

سيوف
ها مو شيسمونة

ضحكت ع توترهـا وكتلها

شَمس
اشاقة وياج حبيبتي ضلي ضلي

طّب سُراج وراي وكعد ع التخُم، باوعت سَجاد اسمر يجوز اسمر واحد بيهُم مِن بعد زَعيم، الولد طاگتة شَمِس خوش طگة وسيوف بيضـة بشكل رهيبببببب

شَمس
باع الفرق بيناتكُم حط ايدك وايدها شو بلـة

مَد ايدة سَجاد و سيوف مدت ايدها بصفها

سَجاد
حارگتني الشمِس حرگ حَتى يصير عدي فلوس وجدها يقبل يطيهـا

من كال هَيج ابتسمنـا كلنة عليّ

شَمس
اوف والله مّلل مانطلع فد مكان

سُراج
الساعة ١١ راح تصير وين تردين ترحين

شَمس
مادري نروح لايّ مكان حَتى لو بالسيارة

سيوف
ايّ والله ياريت

سَجاد
يلة خل نمشي شعدنـا

سُراج
يلة بدلن وتعالن بس كون ها خمس دقايق انتن متحضرات، انة هاي اروح بالدشداشة

سَجاد
وانة هم ماعدي شي
وانتن شعدجن بوية هيَ عِبا وشال لا تملطخن حلگجن ولا تصخمن عيونجن بسررررعة كون

شَمس
ايّ يلة يلة

صعدنـا اني و سيوف بسرعة لبسنـا حجاباتنا وعبينـة

سيوف
يلة ولج

شَمس
اصبريييي بس خل اخلي مُرطب شي دروحي انزلي حَتى لا يحجون كليلهم هسة جاية

نزلت سيوف واني حطيت مُرطب شوية ونزلت
سُراج جان واكف ب باب المطبخ و سيوف و سَجاد طالعين

سُراج
حلگج يتلامع منا وجاي اشووووفة

من كال هجي حطيت ايدي على شفتي وخفتت شوية
شَمس
لا ترة هاي مو حُمرة مُرطب

سُراج
مترهميننننن اذا ما تتملطخين اعلى گولة سَجاد

ضحگت بخُفة وصرت اطبطب بين شفايفي

فجأة صارت اكو ابتسامة بوجهة وعيونـة تحولت لشفايفي ارتبكت و نزلت صرت كدامـة

شَمس
يلة نطلع؟

هز راسة بـ ايّ، خلينا وطلعنا

باوعت سيوف واكفة وحاطة العبا ع نُص وجهة وتحجي وي سَجاد وسَجاد الضحكة بـ حلگة ومَدري شيكول الهـا

سُراج
ها ها شجاي يصيـر بدون لطلطة

سَجاد
ولك انتَ ابو اللطلطة وجاي تحاسبني لا تسكتني ترة الي بكلبي جبير اعليك

سُراج
اسكت ولك اسكت

اتفقنـا نروح كل واحد بسيارتة بس نضل موجودين سوى
فَ راحـوا سَجاد و سيوف بسيارة سَجاد
واحنة رُكبنـا بسيارة سُراج

الجـو بارد وحيل حلو، فتح الشبابيك و كام يمشي كِدام سَجاد بسُرعة مُعتدلة

شويـة وشغل أُغنية
صالحت بيك ايامي
سامحت بيك الزّمـن
نستني بيك الآمي
ونسيت معاك الشجن

شـوية وايدة صـارت ع ايدي والاغنيـة مفتوحة واحس بكُل كلمة جان اكو مقصد بيهـا الي

سُراج
هذي الـج

ماكدرت اخفي ابتسامتي وللحظة اكو فرحة بداخلي انرسمّت وشعور غامر احسة .

الهوا البارد داخل من الشباك، عطورنـا تضاربت سوية وهذا الشي صار مبين ..
ضل ساكت وعيونـة مابين يدورهن علية ومابيهن ع الطريق، والاُغنية بعدهي مشتغلة

صالحت بيك أيامي
سامحت بيك الزمن

سُراج
هذي الجملة مال سامحت بيك الزمن هيَ اكثر شي حقيقي موجود

شَمس
حتصير شاعر علينة..

سُراج من بعد ضحكة خفيفة
إي بس صدگ، من عرفتج حسّيت الدنيا رجعت بيهة حياة وطعم دنيا، حتى وقت الضوج، يخلص لمن أحچي وياج.

شَمس
تخوفني والله، تحچي كلام چبير كلش.

سُراج بابتسامة واثقة وعيونه تميل عليها
هو الكلام لمن يطلع من القلب، يطلع چبير.

سكتت، وفركن اصابيعي من التوتر. الهوا يمر، والأغنية بعدها تمشي.
رجع مَد ايدة واخذ ايدي بـ ايدة

التفت عالطريق وركز بقيادة السيارة، بس ابتسامتنا بعدهه ما راحت.
يگطع الصمت صوت الأغنية الثانية،
" بيني وبينك حُب كبير"
هاي الأُغنيـة حَيل احبها كعدت اغني ويـاهة بصوت ناصي و اندمجت ويـاهة

شوية قاطعني صوت سُراج
سُراج
تدرين صوتج حلو؟

ضحكت بخجّل وباوعتلة
شَمس
ايّ متدريييييي، ناوية اصير مُطربة اصلاً

سُراج
حَتى اكسر اديج ورجليج

ضحكت وكتلة
شَمس
ديلا هسة انتَ بكيفككك.

سُراج بضحكة خفيفة
هَسة عوفي هل رطينة هاي واسمعيني، اذا غنيتيلي هجي بكل مَرة ماعوفج شكلتي

التفتت الة وباوعت لعيونة بلحظة،
شَمس
والله بعدين تمل، مثلك مثل الباقين.

سُراج بصوت واثق وهادئ
أنة مو "مثل الباقين"، وتعرفيني كِلش زين فَ ديربالج تلعبين بالنار يصغيرونة ..

يضحك، ورجع يشغل مقطع ثاني، بس قبل لا تبدي الأغنية، حجة بهدوء ..

سُراج
شمِس، بعدين راح اكلج شي، مو هسه. بس خل الوقت يصير مناسب.

التفتت الة بـ استغراب
شَمس
شنو يعني؟

سُراج
يعني، بعدين ..

سكتت وانداريت للشـباج مبتسمة وصافنة
ياترى الحَياة ويـن راح تودينـا ؟ ليا وِجهة بالضبُط ...

نزلنـا اكلنا ذُرة كُل احنـة وجنة متونسين ونضحك رجعنا للبيت الساعة بـ ١ تقريبًا بحيث اني جنت ميتة نُعاس وتعَب بنفس الوقت

نمت وكعدت ثاني يوم الجُمعـة سبحت سبح الجُمعة ولبست ثوب شتوي مخصر وطويل ولبست فوكا روبي الشتوي وشـالي ونزلت كالعادة جَدو مبلش بـ حديث الكِساء يُقرآ الهُم

باوعت لسُراج، سُراج باوع لـ جسمي وخزرني
دنكت عيونـي على جسمي بـ استغراب من نظراتة، انتبهت انُ هوَ ديقصد الفُستان ماهتميت وخليت وكعدت

شويـة وموبايلي كام يدز اشعارات فتحتهن هوَ
سُراج
هاي شبيج انة مو جاي اشرلج
روحيييي بدلي شمِس هاي شلابسة

شَمس
تـرة لابسة روب شبيك سُراج

سُراج
ميخالف يفلت منج لو تسدين الروب لو ترحيـن تبدلين غير هالحجي مارضى بي انة تـرة

شَمس
عـاد لتتحكم سُراج ماحب هيج اسلوب اني

سُراج
ماجاي اتحكم بس جاي اكْلج روحي بدلي شجاي اكلج انة قبل؟

شَمس
مابية حيل شويـة واكوم

سُراج بحدة وعيونه متعلكة بية
شمِس، مو سوالف ضعف ولا تحكم، بس ما أحب أحد يباوع الج بطريقة موحلوة. أنة مو ما اعرف اخواني شني بس بنفس الوقت ماحب البنية الما تنتبه ل لبسها

شَمس تنفخ بضوجة
بس سُراج، لابسة عليّ روب

سُراج
يمكن بعينج عادي، بس بعين غيرج لا. أنة ما أتحمل واحد يشوف شلون ما انة أشوف.
حتى لو نبرة عابرة ما مقصدوة

شَمس
لا تصير غيور، الناس كلها أهل بيت.

سُراج
غيرتي مو لأن ما أثق، بس لأن كلشي بيج يخصني، حتى النظرة. انة رجال شرقي ترة فَ الي يصير الي يتعذب لان غيرتي تحرگ

شَمس
اممممم يعني هَسة انتَ تغار؟

سُراج بصوت هادي بس نبرته قوية
إي، أغار، وما أستحي أگلجياهة. أغار من الهوا إذا لفّچ بزيادة.

باوعتلة بنظرات خوف وسكتت

سُراج
ما أريد أخوفج، أريدچ تعرفين إنُّ الغيرة مو كره، الغيرة خوف... خوف أخسرج، خوف تشاركين حتّى بلحظة مو إلي.

ماكدرت اكلة لا ع اسلوبـة ورحت صعدت للفوگ بدلت ملابسي ونزلت اول ماشافني ابتسم

كمل جدو حَديث الكساء وكملنـا بهدوء بس نظراتنا جانت تحجي ..

بَدَت الأيام تِمضي واحنه نعيش تفاصيلنا بهدوء، لا صار اعتراف، ولا حاجة للكلام المُباشر. بس كُلشي چان واضح بطريقة نظرات، ابتسامات، وانتظار.

چان يحِس بية تقريبًا بدون حَتى ما احجي، إذا تعبَت يوم، يعرف هوَ قبل لا اني اعرف. إذا اختفيت شوية بغُرفتي ، يسأل مُباشرتًا "وينج؟" وكأنه وجودي صار بالنسبة الة شي اساسي..

ما چان رومانسي بالكلام، بس بتصرفاتة بكل شي جانت واضحة حَيل بدون حتى لا يعترف ..

يهتم شلون اشر كهوتي، جان يعرف إنّي ما احب الشكر هواي، ويعرف الساعة اللي امل بيها من الدراسة فيرسل شي يضحكني.
ومن جنت احجي عن موضوع بسيط، يذكره بعد أيام، وكأنه كل كلمة تنحفر بذاكرتة بدون ماينسى ايّ حدث يخُصني

وبدون ما ادري لكيت روحي غاطسـة بحُب سُراج وتعاملة وياي ..

صرت انتظرة من يجي ياخذني من الجامعة، وادور عليه بعيوني من بين الوجوه.
حتى صوت خطواته صار مألوف، وإذا ضحك هناك، اعرف إنّه هو قبل ما اشوفة.

بس رغم كل هذا، ما چنت احچي، چنت اخاف من الكلمة تطلع وتخرّب الهدوء الحلو اللي بينهم.
كلشي يخوفني، بس بنفس الوقت، كلشي بيه يطمني.
صرت احب وجوده، واحس روحي ارتاح من اشوفة ويكون وياي،
وصرت اعرف إنّه اهتمامه مو بس عادة... وإنما هو شعور..

أيـام حلوة، ومواقِف بعَد أحلى عشنـاهة،
كأن الزمن قرر يوكف شوي حتى يخلينـا نرتاح.

ضحك، سوالف، ونظرات تتلاقى من غير قصد.
كل يوم بيهم يصير بيه شي بسيط، بس يترك أثر حلو بداخلنا.

وصار اهتمامه عادة وكدام الكُل صار يسألني:
– أكلتِ؟
– شربتِ مي؟
– نمتِ زين؟
واني صرت ما اسوي شي من غَير ميكُلي سوي ع كد ما تعلمت عليّ يذكرني بكُل سوالفي لان بكُل بساطة تعودت عليّ .

كل لحظة تمُر، جنت اكتشف نفسي أكثر، واكتشف إنّه مو إعجاب عابر...
هو بدا يصير طبع بحياتها، مثل النفس، مثل شي ما ينترك.

جنت اكعد افكر بيه قبل لا انام، وبديت اتخيلة بكل شي... بصوت الأغاني، بصبح الجامعة، وبكل مشهد بسيط من يومها.
بس رغم هذا، بعدني ساكتة، اضحك واغار واخاف، بس ما تنطق.
وهو يظل يراعيني، يفهمني بنظرة، ويهتم بية من غير ما يطلب شي بالمقابل.

صارت الأيام تمشي واحنة اثنين، ماكو كلمة اسمها "حُب" بعد،
بس كل شي حوالينـا يحچي عنة

كملت المرحّلة الثانية وعدت الايام بـ شكل حيل حلو وهادئ ..

إجا يوم الذكرى السنية البابا، سنة كاملة مرّت عَ رحيل أبوية، بس الوجع بعده طري، مثل البارحة.
البيت ساكت، وبيبي چانت تقرأ قرآن، وأنا احاول أشغل نفسي بأي شي، بس كل لحظة جانت تذكرتي بي ..

بدلت هدومي وگعدت بالحديقة، الجو مغيم، والريحة باردة، نفس ريحة اليوم اللي فقدناه بيه.
ما گلت لأحد بمكاني ويـن، بس سُراج عرف. يمكن حسّ، أو يمكن هو متعود يلاحظ كلشي بيّه.

ما طول، إلا وسمعت صوت خطواتة تتقدم نحوي، وبعد شوي شفته داخل، شايل بيده وردة بيضة.
وكف مقابيلي وكال بهدوء
سُراج
كِلت أجي أقراله الفاتحة وياج.

ما جاوبت، بس عيوني دمعت.
چان صوته ناسي وهو يكعُد يمي
سُراج
تدرين، من نحچي عن الميت نذكر غيابه، بس من نحبه نذكر حضوره بينه، وانتِ دائمًز تحجيلي عنه، كأنه بعده يعيش بجواچ.

سكتت، وكأنه كل كلمة بيه تواسي الوجع اللي ما چان ينحچي.
ظلينا ساكتين، بس سكوته چان أهدأ من أي كلام، وإيده بهدوء لمست إيدي.
ماسحبتها ولا سويت شي بس ضليت اباوعلة بهدوء وساكتة ..

التفت عليّ، وابتسم ابتسامة خفيفة
ماريدج تضوجيـن شمسي، انة وياج دائمًا صدكي ..
قربني من كتفي الة وهوَ يبتسم بوجهي حط راسي على كِتفة بهدوء وحاوط ظهري ب ايدة..

بذيچ اللحظة، حسّيت إنّه مو بس جان وياي، لا...
چان يحمل عني نص الحزن، وكأنه دَرَى إنّي ما أريد أظل وحدي اليوم.

رفعت عيوني عليه، وبكلبي انكال شي ما طلع بصوت،
بس چان كافي أفهمه...

شَمس
كسرني غيابة سُراج، كسرني..

ضليت احجيلة عَن بابا ودموعي جانت تنزل بهدوء، حضني بهدوء وكالي بـ حُب

سُراج
انة ويـاج واتحدى الحياة التكسرج

من گال هَيج ابتسمت بهدوء وكتلة مُباشرتًا وبدون وعي
شّمس
سُراج لا تعوفني

سُراج
شمِس تتزوجيني ؟
يُتبع.....
_____________

البـارت الجاي يوم الاثنين، والي بعدة يوم الجُمعة ونختم..
بارتات حتكون مُطولة جدًا
الي يريد يشوف المُقتطفات يشوف حساب التلي
hudathar
دُمتم بخير