رواية بيت حبوبه
الفصل السادس6
بقلم دانيا
وقفنا جنب الديوان بنادي لعمو زاهر الجو كان صاني كأنو الديوان م فيهو ناس بعد شويه بقينا نسمع صوت همهمات متقطعه جايه من جوا كأنو صوت زول عاوز يتكلم بس غالبو الكلام بقينا نعاين لبعض في استغراب وتوتر ضحى مسكتني من يدي بيدها الكانت بارده زي التلج بسبب الخوف قالت لي بصوت منخفض ورح نرجع قمنا ماشين مشي الخوف مشي الزول الحاسي كأنو في حاجه ح تجي تسحبو للخلف في اي لحظه ومن وصلنا الحوش الكبير جرينا جري دخلنا المطبخ بدون فرامل لمن تقى ومكارم اتهجمن قالن لينا بسم الله مالكن في شنو ؟
ضحى بتحاول تلتقط انفاسها عشان تقوليهن الحصل انا قاطعتها وقلت ليهن عمو زاهر ناديناهو م رد لينا لكن في صوت غريب جوا الديوان ومافي واحد فيهم اتكلم مكارم قامت على حيلها قالت لينا بسم الله مالهم كمان ؟ طلعنا من المطبخ مشينا البرندا محل حبوبه نايمه مكارم قالت لينا اوعكن تتكلمن تجيبن لحبوبه الجلطه ساي .... فجأه سمعنا صوت الغنم بتصرخ حبوبه صحت قالت لينا بصوت ناعس " كلمن زاهر يشوف الغنم ديل مالهن " في قلبي قلت ليها ياحبوبه زاهر زاتو مالو خلي الغنم .
مكارم مرقت برا طلعنا وراها قالت لينا الغنم دي بتكورك شديد كدا م عافيه ياداب جسمي بقى يرجف وحسيت بالخوف زياده والدنيا لليل لو نهار كان اتصرفنا ،، قالت لينا وحدة تقعد مع حبوبه واتنين يجو معاي الديوان عمو زاهر دا بكون نام من تعب الطريق بس عشان كدا م سمع صوتكن ضحى قالت بري انا م بقدر امش امشن انتن هي رجعت جوا ونحن مشينا على الديوان برضو ناديناهو م سمعنا قلت لمكارم كدي ورح خشم الباب نشوفو بالجد نايم ،، عاينت لي قالت لي رغم إنو م صاح لكن ورح .
بقيت ماسكه في طرحتها وتقى ماسكه في يدي جينا وقفنا جنب الباب للحظه حسيت الدم جمد في عروقي من المنظر .... لمن قبلت وغطيت وشي بطرحة مكارم وفجأة بقينا نصرخ بإسم عمو زاهر لمن شفناهو ممد في الأرض وغارق في دمو رفع راسه بصعوبه عاين لينا ورفع يدو بقينا نتلفت بنفتش في الضيف مافي ليهو اثر مكارم جرت على عمو زاهر كان في سكين واقعه جنبو ضحى جات قالت لينا مالكم بتصرخو حبوبه م قدرت تقوم بس م عرفت تعمل شنو عاينت لعمو زاهر براها لمن رجعت ورا وهو شغال لينا الغنم الغنم .
فجأة ناس الحله لمو مالكم مالكم لقوا عمو زاهر واقع رفعوهو واثناء ماهم مجتمعين قدام الديوان سمعنا صوت زول قال الحاصل شنو كنا بنبكي على عمو زاهر الكان تعبان وم قادر يتكلم حتى تاني اتكرر السؤال زحو ياناس الحاصل شنو؟ صوت خالي محمد المابغبانا جاء دنقر على عمو زاهر وعصر ليهو الجرح بقطعه بعد شويه في ولدين من الحله قالوا اتفضل جبنا البصير .... جاء داخل البصير شايل اوداتو معاهو وخالي محمد قال للناس فضوا المكان عشان البصير يعرف يشتغل .
طلعنا برا والناس كلهم بقوا قاعدين في حوش الديوان جاء واحد من اهل الحي نادا خالو محمد قال ليهو مسكنا زول في طرف الحله سارق الغنم حقتكم ويمكن يكون نفس الزول الطعن زاهر والله اعلم .... جبنا الغنم معانا لكن الزول سلمناهو بيت المختار ،، مشينا على حبوبه ونحن حالتنا بالبلاء وم عارفين نكلمها كيف او نقولوا ليها شنو ،، لقيناها نزلت من السرير وجايه تحبي قربت للديوان جرينا عليها خالي محمد جاء رفعها دخلها جوا نحن اول مره نطمئن ونفرح لوجود خالي محمد بيننا حسينا بالأمان .
حبوبه بالها مشغول وم متطمنه لمنظرنا وحالتنا بقت تسأل الحاصل شنو؟ خالي محمد قال ليها روقي ياامي دا الضيف طعن زاهر في بطنو لكن الطعنه م عميقه الحمد لله جبنا ليهو البصير .... وقليل الحياء دا سرق الغنم بس اهل الحله مسكوهو انا بكره الصباح بمشي ليهو في بيت المختار وبندمو على الحاجه دي عاين لينا وقال لينا انتوا هسي م تخافو رتبو اموركم ونومو انا بهتم بالمواضيع دي وقام طلع مشى على الديوان قال للناس يكتر خيركم م قصرتو بعدا بتقدروا تمشوا تأخدوا راحتكم ،، البصير نظف الجرح وخيطوا ووصف لعمو زاهر علاجات وطلع مشى .
الليل داك كله م قدرنا ننوم الصباح اصبح صلينا وكل واحده شارده في منظر امس اول مرة اشوف لي زول غارق في دمو
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!