رواية ضّأّبِطّ بِهِيِّبِتّةّ ❤وِعٌشٍگلَةّ طّفِّلَةّ الفصل السابع والعشرون 27 - بقلم 🍃..شـمـس

رجعت للبيت گالت امي امشي بدلي بسرعه العصر يجون گتلها صدگ تحجين يمه گالت وليش اشاقه وياج گتلها مازوج اني الزواج مو جبر گالت غصبن

عليج اريد ازوجج دنخلص من المشاكل اشويه تره تعبتينه گتلها تردين ازوجيني مو تردين اتخلصين مني اني اخلصج مني راح ازوج بس مو احمد لا اخو

صديقتي مريم مصطفئ ابو الخط من زمان رايدني واليوم طلب ايدي مو تردين تخلصين مني گولي البابا علمود باجر يجي يخطبني گالت مصطفئ

خوش ولد گتله المهم احسن من ابن اخوج الي يقبل يزوج اخته هاي اذا محمد استسلم وماسوه مشاكل وگلب الدنيه عليكم وهو حالف يسبحني بدمي اذا ازوجت

غيره گالت انجبي ومشي شيگدر يسوي هلمخبل گتلها اي انتي خوفج من المخبل لا من العاقل لان المخبل كلشي يسوي بدون تردد صعدت الغرفتي

ماعرف شنو الي سويته وليش هيج سويت بس
اعرف انو لازم اخلص من احمد هلكلب واعرف انو محمد ماراح يسمح لهلزواج هذا القرار بس علمود اخلص من احمد

ثاني يوم داومت وگلت المريم اني موافقه خل يجي اخوج اذا يريد وبعده علئ قراره كلش فرحت هيه  والبنات هم فرحن بس اني لا اي فرحه ماكو بوجهي

لان مو هاذا الشخص الي افرح بي وساعتي وياه
ويگدر يحبني مثل حب محمد ضل الخوف ماكل گلبي اذا عرف اشلون والله يذبحني اني اعرفه

شنو واعرف تصرفاته وعصبيته رجعنه للبيت وثاني يوم عطله ماما گالت ابوج وخوانج وافقوا وگالوا اهم شي تزوج لو جلب ميخالف المهم نخلص منها ومنه

ومن مشاكله كلش انقهرت ونهضمت معقوله اني هلگد رخيصه ويردون اهلي بس يخلصون مني ومستعدين ينطوني الجلب من الشارع بس المهم

ماضل گدام عيونهم سكتت بس ادموعي حجت ما سكتت جان صوتها عالي جانت اتگول وينك محمد الحگلي راح ياخذون بت گلبك غيرك راح يحصد زرعك

غيرك راح يشم وردتك ويذبلها محمد راح البس الابيض لغيرك راح يفل ضفيرتي بيده راح يشمها
راح يلمسني راح يحجي وياي راح يغازلني راح وراح

مجرد تفكير بغيره راح اموت اذا اتحول هلتفكير الئ واقع شنو راح يصير بيه خابرتني مريم گالت العصر راح نجي سديته منها وگعدت احجي ويه نفسي

مستعجلين علئ جنازتي يردون بس تطلع يردون بس اندفن اني سامعه مقوله اتگول عجل بدفن الميت احس هاي المقوله راح تنطبق عليه لان صدگ اني

ميته مجرد نفس يصعد وينزل ويردون يطلعوني من البيت بسرعه ويدفنوني بحضن الغريب وينك محمد صبر ماضل باروح حتئ العافيه نسلبت راحتي وياك

انت بس مو غيرك انت يبن گلبي. نزلت گتلهم وصعدت للعصر اجو اني گضيتها بس بجي ونحيب حتئ عيوني ورمت وذبلت اجتني رفل گومتني

وغسلتلي وگعدت اجهز بيه لان اني حتئ بهلشي ممفكره ولا مباوعه بالمرايه علئ نفسي نسيت تفاصيل وجهي اصلا. گاعده وجهز بيه واني

گاعده ع كرسي گدام المرايه اباوع علئ نفسي منو هاي وليش هيج ذبلانه شنو هذا السواد جوه العين شنو هلاثار مال الجروح گتلها رفل شگاعده اسووين

گالت دجهزج للمشيه مالتج گتلها رفل ماكو فرح بوجهي ماكو ابتسامه مال عروس فرحانه بعرسها وبخطبتها گتلها رفل محمد رفل شراح يسوي اذا

عرف غيره اليوم يشوفني ويريد يخطبني رفل والله يذبحني رفل اني شلون سويت هيج ليش كسرت گلبه ليش طعنته ليش خنته ليش قبلت بغيره احجي

وابجي اتهدي بيه وتمسح بدموعها هديت اشويه اعصابي كلش تلفانه حتئ من اعصب جسمي يخدر وبعد ماگدر اتحرك ولا احجي احس روحي مشلوله

لا حوله ولا قوه گعدت جهزتني وكملت واني بس صافنه بلمرايه علئ شكلي ماجنت اشوف عروس  زينه وكشخه. لا جنت اشوف بنيه مكسوره ضعيفه

ذبلانه بملامح جامده اي شي حي ماكو بوجهي خلت شال علئ راسي ونزلتني نزلت احس الطريق اشگد قصير بسرعه وصلت لان الشي الموزين والي مينراد

بسرعه يصير ويفض ويمشي نزلت شفت نسوان اثنين گاعدات حتئ علئ شكلهن مانتبهت بس اشوف سواد العبي گعدت يمهن بس بالي لا مو وياهن

وفكري بعيد حيل عالم غريب مابي بشر بس محمد وبتول واحد گدام الثاني وعين بعين بس الف حاجز بينه جان محمد يشيل بهاي لحواجز بس شگد ميشيل تصير حواجز اكثر احس نفسي

عباره عن جثه وگاعده بوسطهم جنت اسمع صوتهم يحجون بس الحجي مو واضح عندي اباوع علئ امي وجها مبتسم وسولف ورفل تباوع عليه ودمعتها

بطارف عينها احسها مكسور گلبها عليه وتريد تحجي بس متگدر ماعرف اشوكت اجو وشوكت طلعوا ولا اعرف شسوي بس احس برفل اتوديني

هيج وجيبني هيج صعدتني لغرفتي ونمت هلمره غير كل الليالي نمت بدون بجي ونحيب وعتاب لان احس نفسي ماگدر اتحرك ولا اگدر اسوي شي

اتمنيت اكون اني بحلم وافز منه واروح بنص اهلي طفله تلعب وتگمز وتضحك والكل يشيلها ويلعبها ويبوس بيها بس للاسف هذا واقعي نمت گعدت ثاني

يوم باوعت للساعه 12 الضهر اني شگد نايمه اشگد جانت الاذيه والقهر والحزن متملكني بس النوم جان خلاصي الوحيد من مشاكلي جنت اتعجب علئ

نفسي شلون انام بس من التعب جسمي ينحل نزلت جوه شفت الكل گاعدين ويسولفون ويضحكون وگفت بالباب ونتجيت عليها ماجان عندي قدره

اوگف علئ رجليه. جنت اباوع عليهم والضحكه ماليه وجهم  اگول محد مهتم بيه وبحزني محد حاس مو حسد لا والله بس ليش همه هيج واني هيج ليش

الي يردوا ايصيرلهم برمشة عين واني هيج يصير بيه. فززني صوت ابويه گال تعاي بنتي گعدي شبيج مشيت خطوتين داروح عليه حسيت هاي الخطوتين

شطولهن الدنيا گامت تفتر بيه عيوني گامت تگلب ماگدرت اصيطر علئ روحي وگعت بحضن علاوي بعد مادري شصاربس اشوفهم كلهم التموا عليه

ويصيحون عليه اني عيوني تگلب اغمض وافتح بيهن النوب شالني مرتضئ وطلع بيه للسياره ركبني وطلع امي وابويه وياي اني اشوفهم يحجون

ويصحون بيه بس اني لا بدنيا ولا بدين بعدين اغمئ عليه ماحسيت الا اني بالمستشفئ والدكتور يمي وامي وابويه ومرتضئ صحيت الدكتور يفحص

بيه گال ها بنتي شلون صرتي بشنو اتحسين گتله الحمدلله بس جسمي كلش يوجعني مابيه اگوم الحيلي گال هسه ننطيج ابره مسكن ونشالله

علئ العلاج اصيرين احسن باوعت لايدي معلگيلي مغذي گال الدكتور صاير عندج فقر دم وسؤء تغضيه وانهيار عصبي داخلي اباوع لابويه كلش خايف وقلق

عليه امي گاعده علكرسي ولا يمي ولا باوعت عليه اخ يمه اخ شنو السويته الج وهيج اسوين وياي راح الدكتور بابا گعد يم امي اجه مرتضئ گعد يمي ولزم

ايدي گال توته حبيبتي شبيج شنو صاير وياج ليش هيج حالتج احجيلي اليوم خطوبتج المفروض اتفرحين مو اتنامين مستشفئ

ضليت اباوع عليه وحجي بداخلي وين جنت اخويه حزام ضهري طول عمري جنت احسبك صديقي مو اخويه جنه احلئ ثنين جنت متطلع اذا مو تاخذني

وياك وتگودني مت ايدي ونمشي جنت اذا واحد من اخواني يضربني تكتله وتاخذلي حقي منه جنت قبل ماحجي تفهمني من عيونك شنو الصار وغيرك عليه

يمكن البعد اينسي الانسان علاقاته بالناس وهواي شغلات حلوة ومرة اباوع عليه ودموعي تصب حضني وگال متنزل ادموعج واخوج بضهرج