رواية ضغن الهرماس الفصل السادس 6 - بقلم سارة الحسن

اني جنت واكفه ع بداية الدرج واباوع، حسيت ع أحد ورايه قدملي كوب الازبري وهمس يم أذني: -صدك من كال جساس بقوة عود الخيزران انتِ. آفروز: لـ كل فعل ردة فعل. ضحك بخفه وكال: -ضربتج الهم هل مرة صدك مثل ضربة عود الخيزران توجع حيل. أخذت الازبري من ايده مبتسمه، شربت شويه وميلت راسي بـ اتجاهه وغنيت بـ همس: -لا تضربني لا تضرب كسرت الخيزرانه كسرت الخيزرانه -صارلي سنة وست أشهر من ضربتك وجعانة من ضربتك وجعانة. ضربني ع راسي بـ

خفه وكال: -تتوقعين إذا حجيت هسه وكلت هاي اللعبة كلها من أفروز شراح يصير؟! آفروز: ماعندك دليل. رسول: كلامي كافي. آفروز: چؤ للأسف مو كافي لأن اني عندي دليل ع أنو هاي لعبة منك. انداريت عليه من طول بسكوته، ابتسمت وهو يباوعلي مصدوم وكال: -وينه دليلج؟! آفروز: شعليك وينه المهم عندي. رسول: ما تثقين بيه؟! آفروز: الدنيا مو أمان لازم آخذ احتياط لـ كلشي. رسول: صدك بلااااااء أنتِ.

ضحكت وانداريت عنه اباوع ع النار اللي بعدها مشتعلة، ناس ترفع وناس تكبس وآخر حجاية جانت لـ جدي جساس من كال: -خيبر ما اله مكان بعد بـ هل بيت. أريج: إذا طلع خيبر من هل بيت اني هم اطلع. جساس: بس جنازتج الراح تطلع من بيت جساس العايش. تركهم وطلع من البيت وخيبر من قوة ضربة عود الخيزران كاعد بـ الكاع يلوب وفقار حاضنه، وبقت أريج تدعي وتصيح. تقدم عليها جاسر وضربها راشدي بـقوة وصاح بيها:

-لـ هناااااا وكافيييييييي أريج سكتنالج بما فيه الكافية ومتعاطفين ويه وضعج بس خلص تجاوزتي حدودج هوايه وما بقالج اي عذر لتصرفاتج. نزلت دمعتها وباوعت لـ جاسر بحقد وفكها يرجف من العصبية وكالت: -إذا طلع خيبر من البيت اعتبروا نهايتكم وصلت حدها. عافته ودخلت لـ غرفتها، وفقار كوم خيبر ويا وصعدو لـ غرفتهم. كعد عمي أكثم طلع جكارة ورثها سحب نفس عميق منها وزفره، ضحك بخفه وكال: -خمس زلم كلها حياتها بـ أيد مرة شطلعت هاي.

صاح بي أبويه بـ نرفزة: -صوووووج ابووووووك صووووجمن صووووجمن. وكـ العادة تطشروا كلمن لـ مكان وفرغت الصالة. تقربت مني هزراف وكالت: -إذا نجحنه السنة لازم يسوولنه تمثال. آفروز: ننجح ننجح ماعليج. هزراف: امشي نكمل دراسة. آفروز: روحي كدامي هسه أجي. صعدت كدامي ورسول مكتف ايديه ويباوعلي، من بقينا وحدنه هز راسه وكال: -وهسه شنو؟! آفروز: يقين راح تتزوج وهاب وفضت راحت. رسول: وشلون؟!

آفروز: عمك جاسر راح يكوم يدور حق وما أعرف شنو من أهل وهاب، وأهل وهاب راح يحاولون يسدون السالفة وراح يزوجوهم يعني مو فد شي جديد هل شي يصير بكل مصيبة. رسول: والله إذا اكو مصيبة بـ هل دنيا فـ هو أنتِ. آفروز: أنتَ السبب بـ الصار مو لو اني متوهمة. غمزتله وهو ابتسم وتوجهه يريد يطلع وكال: -استغليتي رسول أبشع استغلال أهنيج بصراحة. عافني وطلع واني ضحكت ع حجايته، جانت لعبة صغيرة بس نتائجها جبيرة.

كل الصار وصلت الموضوع لـ رسول ع علاقة يقين ووهاب، وماكو ابن عم يقبلها بنت عمه مسوية علاقة ويسكت. ومن أجه وحجالي وكال راح يكول لعمي أو لجدي، اقترحت عليه ما يدخل ويصير بـ الوجه الأسود. لأن عمتي ذكية وراح اطمطم السالفة لـ يقين واطلعها منها، واتفقت ويا يخرب الشغلة مؤقتاً ونسوي درس لـ يقين.

أما اني جان ببالي درس لـ خيبر حتى يعرف بمنو يندك، ودرس لـ يقين اللي بـكل مرة تشهد ضدي يم جدي، وأخرب علاقة عمتي هناء وعمتي أريج الصايرات حزب ع آفروز. وبـكل بساطة المحادثات اللي بين يقين وخيبر اللي ندزت لـ وهاب جانت مزيفة، وأما شلون وصلت لـ وهاب من جهاز خيبر فـ بمساعدة رسول أكيد، هو اللي كدر ياخذ تلفونه ويدز كلشي وبعدها يحذف أي شي عليه ويرجعه لـ خيبر.

ومـن كلت لـ رسول عندي دليل عليك فـ كذب ما عندي أي دليل، لأن الأدلة اللي تثبت اني مسوية هل شي تثبت رسول شريكي والعكس هم صحيح، بس حجيت هيج حتى أخاف يفكر يغدرني أو يهددني بـيوم فـ راح تبقى بباله اني عندي دليل عليه، رغم مستحيل يسويها بس الاحتياط واجب. شغلة وحدة ما توقعتها واللي صدك حزت بخاطري من أريج فضحت يقين، مو يقين اللي تهمني بس اللي يهمني هود وموقفه من الصار وشلون راح تحز بكلبه هيج تطلع اخته وهو يثق بيهن ثقة عمياء.

رغم كذبت ودافعت عن يقين وحاولت ما أخليها بموقف تعترف هي جانت ع علاقة ويا، بس أريج اتبعت مقولة "يا ألعب يا أخرب الملعب" وخربته فعلاً. حتى لـو خيبر ما طلع من هل بيت عادي، المهم صار ع اسمه خط أحمر من الكل، وراح تبدي حرب جديدة بين هناء وأريج وراح أرتاح منهن فترة ويحيرن بـ مشاكلهن بعيد عن آفروز. نزلت للمطبخ سويت لفات طماطه الي ولـ هزراف، وأخذت بيبسي وصعدت، أحس صرفت طاقة واني أتفرج ع العركة اللي صارت.

شفت أمي كاعدة يم هزراف مدري شيحجن، من دخلت سكتن ابتسمت لـ أمي: -هلا بـ شمعة البيت هلا بـ عافية آفروز. ضحكن هي وهزراف وتقربت خليت الأكل اللي بـ ايدي ع جهه وحضنتها أبوس بـخدودها، سحبتني من ايدي كعدتني يمها وكالت: -الله يرضى عليج ماما. آفروز: أحبج علولي. عليا: عوفي الغزل هسه أريد احجي وياج. آفروز: احجي يـ نظر عيناي كُلني أذن صاغية الچ. ضحكت وضربتني بخفه وكالت: -شلون ويه سوالفج متبطليها. آفروز: أحبج مو بيدي.

عليا: زين اسمعيني بـخصوص لـ صار اليوم.... قاطعتها قبـل لا تكمل وجاوبتها: -مالي علاقة بـ الموضوع اني، وإذا ع كلام عمتي أريج فـ هاي مو أول مرة تتهميني بـشي. عليا: أعرف ماما أعرف بس أبوج ما عاجبه الوضع وكال ممكن نطلع من هل بيت فترة لـما تكملين امتحانات سادس. آفروز: وجدو راح يقبل؟! عليا: ما راح يقبل بس إذا أنتِ طلبتي منه هل شي ما راح يردلج طلب.

آفروز: إلا الطلعة من البيت تعرفي قافل محد يطلع إلا يموت هو والله يطوللنه بـعمره. عليا: أبوج راح يحجي ويا والله كريم. آفروز: والنعم بـ الله، وإذا رهمت وطلعنه ناخذ هزراف ويانه لأن متكدر تعيش بدوني. هزراف: ههههههه كولي أنتِ ماتكدرين تعيشين بدوني. آفروز: غير يكعد راحة الأوكسجين. بـاوعت أمي ع اللفات مال الطماطه وكالت: -جوعانات ماما أسويلجن أكل. آفروز: لا ماما شكراً. عليا: راح أنزل اني إذا تردن شي گولن ماما اني أسويلجن.

آفروز: تسلمين يـ قرة عيني. هزراف: شكراً خالة دانتعبج ويانه. عليا: أهم شي انتن ترتاحن بناتي الحلوات. تقربت باستني من راسي وباست هزراف وطلعت، أباوع ع هزراف مبتسمة بـ خجل ومدنكة راسه ندستها وحجت وياها بضحكة: -شبيج سايحة هي بوسة. ضربتني ع ايدي وكالت: -أنجبي آفروز والله خجلت هاي كل مرة تبوسني أبقى أسبوع أستحي أحط عيني بعينها. آفروز: ههههههههههههههه والله حايرة اني شلون راح تتزوجين وأنتِ من أمي وأمج تخجلين.

هزراف: ما أزوج كاعدة ع كلبج. رجعنه ندرس وطولنه لـ12 تقريباً، بعدها تعبنه وگمنا نريد ننام بس جوعانين ونزلنه نسوي أكل وكعدنه ناكل كالت هزراف: -ما رجع هود؟! آفروز: چؤ لسه ما رجع. هزراف: اتصلتي بي؟! آفروز: اتصلت بس مجاوبني داز رسالة شويه وأرجع. هزراف: راح تنتظرينه؟! آفروز: أكيد. كملنا أكل و هزراف صعدت نامت واني بـقيت كاعدة بـ المطبخ أنتظر هود اللي طلع من البيت وره المشكلة وما رجع بعد. مرت نص ساعة تقريباً يلا أجه،

ابتسم من شافني كاعدة وكال: -ليش كاعدة يـ عيون هود. گمت من مكاني أشرتله ع كرسي يكعد وجاوبته: -انتظرتك لـ نحتسي كوباً من القهوة بـ أواخر الليل ونتشارك الهموم معاً. هود: ههههههههه الله يا حفيدة نزار قباني. آفروز: يروحلي فدوة نزار قباني وعشيرته. هود: وياهم عشيرة جساس العايش هم. ضحكت وسويت گهوة النه، تقدمت خليت الكوب كدامه ابتسم وأخذه مني ساكت، كعدت مقابيله وحجيت ويا: -هود.

رفع عينه يباوعلي واختفت ابتسامته الكسرة جانت واضحة بـ عيونه، تنهدت وحجيت ويا: -آسفة نيابة عن كلشي مضوجك. هود: ويلوموني ليـش أحبج. آفروز: أعرف صعبة عليك ومو هينة بـس لا تقسى ع يقين خطية، كلها صارت ضدها أوقف أنت وياها تبقى أختك ومن الواجب تعلمها ع الصح بدل ما تعاقبها وتبتعد عنها، ومو صوجها أبداً صوج لـ جان يعرف وشجعها بدل لا ينصحها.

هود: كسرت ظهري يقين، جنت أمشي ورافع راسي بيهن ومتباهي ومتأكد هنه كد الثقة لـ منطيها الهن، شيردن أسويلهن بس حتى ما يحتاجن أحد ويلجأن لـ هيج طريق. دنك راسه وسحب نفس عميق وكمل كلامه بـكسرة: -تخيل موقفي من يجي وهاب يحجي ويايه وضحك وشقه وميانة وبس يروح من يمي يتصل بـ أختي يكللها جنت يم أخوج. رفـع عيونه يباوعلي وكال:

-ليش ما فكرت بيه ليش ما كالت أخوية خطية ما يستاهل هيج أخذلك وأكسره، هسه شلون راح أكدر أحط عيني بعين وهاب فهميني. آفروز: اعتبرها طفلة طايشة علمها ع هل أشياء واني متأكدة ما راح تعيدها بـعد. هود: ليش مر يوم واني ما حجيت وعلمت، قسماً بـ الله يا آفروز وصلت مرحلة وياهن كلتلهن إذا تحبين شخص تعالي كليلي واني أزوجج اله بس لا تسون شي تنزلن راسي بي شكللهن أكثر من هذا، أخ لو كو** فهميني منو يكول هيج لـ خواته.

جان يحجي بـ قهر وحقه ما ألومه صعبة ع كل شخص يتعرض لـ هيج ضربة من أخواته. حاولت أغيّر من نفسيته شوية؛ لأن أعرفه راح يبقى يقهر بنفسه. آفروز: زوجني لعد. ضيّق عيونه عليه وقال: وين اكو واحد ياخذ أخوه؟ آفروز: عيب عليك، مليانة أنوثة أني. هود: أنوثتج صناعة صينية. آفروز: صينية لو جوية ههههههههههه. هود: الجوية لو الزوراء ههههههه. آفروز: لا لا خاف السندباد ههههههههههههه. كفخني على رأسي؛ لأن ضحكت بصوت عالٍ

وقال: هسه تطلع عمتج تنوص على راسنا. قلّدت صوتها وحكيت: أووووي شبيكم، شَهَل إزعاج، ما تخلّون أحد ينام. هود: هود عماتي، صوتك فدوة. هو حكاها وإحنا انفجرنا من الضحك، عبالك صدق أريج داتحكي مو هود. بقينا قاعدين شوية لما كملنا القهوة. باوع هود للكوب وقال: من شربتينة هذا شِكبره، شراح ينومنا بعد؟ آفروز: هسه أنطيك حباية منوم وتنام رغد. هود: رغد منو؟ آفروز: بنت أم رغد. هود: منو هاي، شو ما أعرفها؟

آفروز: بيتهم سابع بيت بفرعنا على اليمنى، بنية حلوة مرتبة، فكر بيها يمكن اكو نصيب. هود: شنو مواصفاتها؟ آفروز: طويلة شوية، جسمها ساعة رملية، عيونها بنية، شعرها هم بني وحنطاوية فاتحة شلون هزراف، يعني تموت. وأعذرني ما أقدر أنطيك مواصفات أكثر؛ لأن حرام. أشرلي على زاوية المطبخ وقال: ذاك هو شوفي. اندريت أباوع على الزاوية ورجعت باوعتله وسألته: منو هو؟ هود: الحرام مالتج كاعد بالزاوية يلطم.

آفروز: ههههههههههه ترا بعد اكو تفاصيل عميقة ما حكيتها. هود: اسكتي لعد واستري علينا. آفروز: بس هم فكر بيها، نريد عرس. هود: انجحي من السادس وأسويلج عرس. آفروز: أغريني بعد، سويلي واهس أدرس. هود: سفرة للشمال وتلفون آخر موديل، بعد؟! آفروز: الله الله الله والنبي أنت كفووووو. هود: بس كون معدل يرفع الراس مو تايرات. آفروز: إن شاء الله بس لا تنساني بدعائك. هود: عيوني إلچ، شتحتاجين حاضر أني.

آفروز: باوع بابا كايل يريد يطلع من البيت. هود: ألمن كايل ومنو كال جدك يقبل؟ آفروز: كايل لماما وكالت إذا أني طلبت من جدو راح يقبل، وهي بس فترة المراجعة والامتحانات عود خايفين على مستقبلي. هود: حقهم وحقج إذا تطلعون، هو هذا البيت صاير عبارة عن مشاكل، بس يمكن جدك مستانس على الوضع ما يحب الهدوء. آفروز: ما أعرف أحس ما أريد أطلع، ما أريد أبتعد عنكم. هود: كلها فترة وترجعين، وأخذي هزراف وياج أنتن قرايتجن سوة.

آفروز: ما أعرف بعد هي تصفى. قام من مكانه وقال: يلا نوم تأخر الوقت. آفروز: روح كدامي شوية وأصعد. ابتسم وهز رأسه وقال: تصبحين على خير غاليتي. آفروز: روح غاليتك وأنت بألف خير. بقى واقف يباوعلي ثواني وتقرب طبع بوسة على رأسي وقال بابتسامة: ذنبها برقبتي عود. ضحكنا وعافني وطلع، وكان قصده ذنب البوسة هاي برقبته؛ لأن إحنا شكد علاقتنا قوية بس بحدود من هَل ناحية.

أخذت نفس عميق وبقيت قاعدة بمكاني، بعدها قمت طلعت للحديقة ومثل ما توقعت قاعدة ويحش جكاير. تقربت منه أخذت باكيت الجكاير من كدامه وكعدت بعيد عنه وحكيت وياه: ممنوع التدخين ببيت جساس. تنهد وبقى ساكت ثواني وقال: وهو شنو اللي يصبرنا على بيت جساس غير الجكارة؟ آفروز: ثريد باجة وفوقاه ليمون وطرشي ينسيك حتى جدك جساس مو بس مشاكل بيته. ضحك بخفة وقال: بس أنتِ فاهمة الحياة صح. آفروز: لا تضوج الدنيا ما تسوى.

فقار: صرت أستحي أخلي عيني بعين أحد منكم بسبب تصرفات أمي. آفروز: مو ذنبك إذا الدنيا ما أنصفتك. فقار: صار 5 سنين وأني ما مر يوم ما تعيرت بأمي، أم أبويا بالطابة والطالعة تعيرني أني ابن أريج، مرت أبويا بكل سالفة وكالت أنت ابن أريج أجي هنا مصايب أريج تفشل حتى ما تخليلي مجال أدافع عنها.

ضحك بقهر وكمل كلامه: حتى أبويا ما أقدر أميل وياه كد شعرة؛ لأن بس أميل كبل يكول أنت ابن أريج، صارت وصمة عار عليه أني ابن أريج وساكت ومتحمل وأكول أمي ويجي يوم وتنعدل بس الوضع هو هو مستحيل يتغير. بقيت ساكتة وأسمعله كمل الجكارة ومردها بيده ومدنق رأسه وساكت. قمت من مكاني خليت باكيت الجكارة كدامه ودرت وجهي أريد أمشي، استوقفني فقار من حكى بسرعة: ليش أجيتي؟ اندريت أباوعله وبقيت ساكته،

هز رأسه بخفة وقال: ليش أجيتي من تردين تروحين؟ آفروز: عبالي نحجي شوية بس أنت مالك واهس. فقار: ابقي شوية لا تروحين. آفروز: تأخر الوقت وكعدتنا وحدنا مو حلوة بهيج وقت. فقار: شوية وروحي. رجعت كعدت كدامه وسألته: شنو أصعب شي ممكن يتعرضله الإنسان؟ فقار: بالنسبة إليه الخذلان. آفروز: والأصعب إذا كان هذا الخذلان من أقرب الناس إلك. فقار: مثل خذلاني من أمي. آفروز: أمك هم أنخذلت وهم من أقرب الناس إلها.

فقار: هذا مو مبرر لتصرفاتها، أبويا شنو ذنبه هيج كسرته لو إحنا ولدها ليش ما وكفنا بعينها؟ آفروز: تعرف قصة أمك وليش صارت هيج؟ هز رأسه بلا وقال: ما أعرف. آفروز: تحب أحجيلك؟ ابتسم وقال: أحجيلي. آفروز: شوف راح أحجيلك السالفة من البداية وقصة عود الخيزران وشلون وصلت لأمك. فقار: تمام.

آفروز: باوع جدو كان يحب وحدة اسمها خيزران قبل من كان بعده شاب وكل يوم يروح يوكف كدام بيتها حتى يشوفها، ومن كبرت شوية قامت تطلع ويا أخواتها للزرع؛ لأن كانوا فلاحين هم وصار يروح وراها ويبقى هناك لما يخلصن ويرجعن، وبعد فترة صارت بيناتهم نظرات متبادلة وصار يتقرب منها ويحكي وياها لما تطورت علاقتهم. ابتسم وقال: أي وبعدين شصار؟ تربعت وحكيت بحماس: وبيووووم قاعدين بنص الزرع يحجون. قاطعني وقال: بس يحجون؟!

آفروز: هم بالزرع، لعد شيسوون يصلون؟! ضحك وقال: ما أدري هو جاي أسألك. آفروز: أي هو جدو كال كنا بس نسولف وشي ما أدري إذا صدق لو جذب. هز رأسه وقال: كملي وشصار بعد. آفروز: أي فـ هم مندمجين يدكون سوالف وما يحسون إلا أخو خيزران فوق راسهم. عقد حواجبه وصاح: لاااااااا كطع صلاتهم. آفروز: أحممم كانوا يحجون. فقار: أي أي هو قصدي قاطعهم، أي كملي شصار. آفروز: أي فـ شنو أخوها لازم جدو جساس ودك كتل بعود الخيزران مخليه غرقان بدمه.

هز رأسه بأسف وقال: چؤچؤ شكد قاسي هذا، زين وأخته ما دكها؟ آفروز: ما أعرف والله؛ لأن جدو جساس باقي شهر نايم بالفراش من الكتل اللي محصله. فقار: نحتاج أخو خيزران بهالوقت. آفروز: مات. عقد حاجبه وقال: شمدريج وشلون مات؟ آفروز: جايتك بسالفة. هز رأسه بمعنى كملي وأني رجعت انطلقت: أي ورا شهر من صحصح جدو جساس هم رجع يشوفها. فقار: رجعت ريمة لعادتها القديمة. آفروز: بالضبط، بس شنو حظه فگووووووور. طكها

بضحكة من كل كلبه وقال: هي فقر مو فگور. آفروز: المهم بالبداية من بعيد لبعيد يشوفها، من شاف الوضع أمان رجعوا يكعدون بالزرع. فقار: هذا ما يتوب. آفروز: أي وهم رجع شافهم أخو خيزران وهم حصل كتلة معدلة بعود الخيزران نومته بالفراش. فقار: وشلون مات أخو خيزران؟ آفروز: جايتك بسالفة. فقار: كملي خنشوف تاليها. آفروز: أي ورجع جدو صار زين وهم رجع يشوفها من بعيد لبعيد. فقار: ولج هذا صدق ما يتوب. آفروز: يحبها يحبها ما يكدر.

فقار: أي وتاليها شصار؟ آفروز: رجعوا كعدوا بالزرع. صفق أيد بأيد وقال: وهم راح يجيهم أخو خيزران وهم يدك جدك بعود الخيزران. آفروز: لا لا هَل مرة ما لزمهم بس خيزران كالتله تعال أخطبني خمو نبقى هيج. فقار: هاااا حلو وشسوى جدك؟ آفروز: راح خطبها بس أخو خيزران ما قبل. فقار: لااااااا صدق يحكي هذا؟ آفروز: أي والنبي وبقى يومية رايح خاطبها لما أخوها زوجها لابن عمها. ميل رأسه بحزن وقال: لااا انكسر كلبه لجدك مو؟ آفروز:

أي خطية عاد هو كال: اندكيت بعود الخيزران لخاطر خيزران وما حصلتها. فقار: زين ما فهمت شلون مات أخو خيزران. آفروز: حتى أني ما أعرف، هو من سولفلي كلت الله ياخذه وهو كال أخذه يعني مات بس شلون ما أعرف. صفن بوجهي ثواني وقال: وخبصتيني جايتك بسالفة وجايتك بسالفة وتالي طلعتي ما تعرفين شلون مات. آفروز: بس قصة حبهم ما خلصت ترا. فقار: ليش شكو بعد مو تزوجت خيزران؟

آفروز: أي ورا سنة مات زوجها خطية ورجع جدو يحبها ويتواعد وياها بالزرع. فقار: يا طلابة الزرع اللي ما تخلص. آفروز: أي خطية بس هَل مرة أبوها شافهم وكال لجدو: تجي تتزوجها غصبًا ما عليك. وأكيد جدو طار من الفرح، لأن هو أصلًا يحبها، بس حماها أخو زوجها ما قبل. قال: "أني أريدها، وإذا تتزوج غريب آخذ ابن أخويه منها ما أنطيها." عاد تزوجت حماها وتركت جدو خطية. فقار: حرامات، ما تستاهل الكتل الي حصله جدج.

آفروز: أي عاد هو بقى من ذاك الوقت لليوم يشيل عود الخيزران. فقار: وشلون كدر يتزوج وراها؟ آفروز: ها أي، كال أبويه غصبني، وما كدرت أرفض له طلب، وهم جان مأيس من خيزران. يكول حماها الي تزوجته لحد هسه عايش. فقار: وهي بعدها عايشة؟ آفروز: أي بعدها وعدها 13 طفل. صوفر وقال: شدددد، شكد مخلفة هاي؟ زين ما عرفتيهم شنو ولد بنات؟ آفروز: 9 ولد و4 بنات، وعدها ولد اثنين ميتين هم، وهسه هي بيبيّة، لأن ولدها كبار. فقار: وجدج بعده يحبها؟

آفروز: أي، يكول أحن إلها لأن أول حب بحياتي. فقار: بس ما عرفت أمي شدخلها؟! آفروز: أي يا عيني، أمك راحت وحبت ابن أخو خيزران، ومن أجه وطلبها من جدو عرفه، واعتبره ابن عدوه، وما قبل. فقار: أنتِ مو قلتي أخو خيزران مات؟ آفروز: أي ميت، بس عنده ولد وبنات هم. فقار: أي وبعد شصار؟ آفروز: بقوا 4 سنوات ابن أخوها لخيزران يجي يخطب عمتي أريج، وجدو يطرده ما يقبل، والسبب لأن أبوه حرمه من خيزرانتـه، هو رجعها بابنه وحرمه من عمتي أريج.

فقار: وشلون تزوجت أبويه لعد من هي تحب شخص ثاني 4 سنوات؟ آفروز: جبرها جدو تتزوجه، لأن هو ابن صديقه، وبقت تقريبًا أقل السنة هي معاندة ومتقبل تتزوجه، وشبعت كتل بعود الخيزران، وما قبلت إلا من هددها جدو يا يقتل ابن أخو خيزران يا عمتي تتزوج عمو حامد، عاد نجبرت تتزوج. فقار: ما معقولة جدي يسويها ويقتل شخص. آفروز: هاي ما نعرف بيها بعد، بس لو عمتي ما تعرف بجدو كلشي يكدر يسوي جان ما انجبرت وتزوجت.

فقار: وابن أخو خيزران وينه هسه؟ آفروز: ما أعرف شي عنه، بس أكيد هسه مزوج وعنده درزن جهال. رأسه وهو مقوس حلكه وقال: ومع ذلك هم مو مبرر مقنع لتصرفاتها. آفروز: الي حجيته مبرر لأمك بينك وبين نفسك وبس، صح انظلمت، بس بتصرفاتها ما بقت أي حق وياها، وبعملتها الصارت ما كسرت جدو بس لا، بالعكس كسرت جدو وعمو حامد وانتو وإخوانها. فقار: باجر راح آخذ إخواني وأرجع لبيتنا. آفروز: ما أعتقد أمك تقبل إخوانك يرحون.

فقار: ما يهمني بعد إذا قبلت أو لا، إذا هي قابلة لإهانة لنفسها، أني ما أقبلها على إخواني. آفروز: إهانتيش؟! فقار: الشخص ينهان إذا ما يعيش ببيته، صح هذا بيت جدي وخوالي، بس من توصل للصدق أني أبقى غريب بالنسبة لهم، دام عشيرتي تختلف عن عشيرتهم فـ أني غريب عليهم. أخذت نفس عميق وجاوبته: أودعك من هسه لعد يمكن ما ألحق عليك الصبح. ابتسم وقال: أي صبحج يبلش ورا 12 ظهر أنتِ. آفروز: أي شسوي، ما تحلى النومة إلا الصبح.

فقار: نوم العافية. قمت من مكاني وجاوبته: الله يعافيك، يلا محتاج شي بعد؟! فقار: شكرًا آفروز. آفروز: على شنو؟! فقار: لأن سمعتيني، ولأن حاولتي تغيرين من مزاجي، وصدق كدرتي تغيرين مزاجي، وشكرًا هواية. آفروز: هاي أعتبرها شكر مقابل الأكل والعصاير الجايبهن النه. ابتسم وقال: تدللــــين أنـتِ. آفروز: تصبــح على خيــر. قام من مكانه وقال: جاي وياج.

ما جاوبته، تمشيت كدامه وهو يمشي ورايه، دخلنه من باب المطبخ، جانت هناء كاعدة ولازمة راسها. باوعت علينه من دخلنه. فقار عافنه وطلع من المطبخ بدون ما يحجي شي. قالت هناء بشك: ويــن جنتــو؟! آفروز: بـ الحديقــة. هناء: وشكو بـ الحديقة بـ نصاص الليالي؟! آفروز: أسرار دولة هاي عمة. تقدمت على الثلاجة، طلعت بطل مي فتحته داشرب، ضربته بكف إيدها وكعدته بالكاع، بقيت صافنة عليها ممستوعبة تصرفها وصاحت بخفة: أسرار دوووولة موووو؟!

آفروز: شبيج عمة شنو مصخنة؟ هناء: أحجي شعندج وية فقــاااااار؟! آفروز: شدكوليـن أنتِ؟ هناء: الله أعلم، ختلات وكعدات بـ نصاص الليالي شيريد يكون يعني؟ آفروز: أخلاق بنتج هاي مو أني. حجيت هيج مو لأن داشكك بأخلاق يقين، لا بس حتى أغث هناء، وهي سكتت وبقت تباوعلي بحقد. عفتها وطلعت صعدت لغرفتي، لكيت هزراف بسابع نومة. أني هم دخلت لفراشي ونمت بسرعة. ثاني يوم كعدنه على هوسة، أريج متعاركة ويه فقار، لأن يريد ياخذ خيبر وظليل وياه.

نزلت وكفت على الدرج أباوعلهم، كوة فاتحة عيوني وممغسلة وجهي، بجامتي مرفوعة تك وتك وشعري صاير بي انفجار. أول ما شافتني أريج صاحت: اجت وجه الشوووووووم. فقار: كافي يمة كافي، إلى متى تلومين الناس بـ الدايصير ومتشوفين أفعالج؟ أريج: فقار والله أنتحر إذا أخذت أخوتك. فقار: أخوتي ما يبقون هنا بعد، كافي إهانات، يا ريت لو اكو شي يسوة. حجاها ودار وجهه على جهة، وسحب نفس من جكارة وزفره، وعمتي بقت صافنة على حجاية فقار وهمست بغصة:

قصدك أني ما أسوة فقار؟ ما جاوبها وصاح بصوت عالي: يلاااااا ظلييييييييل! أريج: أحجي وياك فقار جاوبني. اندار عليها وجاوبها ببرود: لو تحبينهم صدق ما خليتهم يتعرضون للإهانة، جان وزنتـي أفعالج لخاطرهم، وحفظتي مي وجههم، مو كل حجاية والثانية ونكالت الهم كلمة اللفية لمن لفية، وهمه عدهم بيت وأهل. أريج: أني أمكم فقار، ولك شلون تحجي ويايه هيج وأني كلشي دأسوي علمودكم؟

فقار: يعني يوم رحتي واتهمتي آفروز هاي علمودنه لو من فضحتـي يقين كدام أهلها هاي علمودنه؟ فهميني شسويتي علمودنه لو من رحتي بدم بارد وخنتــ.... بسرعة خلت إيدها على حلكه قاطعته يكمل كلامه وكامت تبجي وتحجي بصوت مخنوق: ما بقالي أحد بهل الدنيا غيركم، لا انتو هم تعوفوني! غمض عيونه فقار يصبر نفسه، أعرفه يحبها وما ينطي بيها، بس حجه هيج حتى عمتي اتوب وتبطل سوالفها. لزم إيدها الي على حلكه باسها وقال: كم يوم وأرجعهم يمج.

حضنته وهو بقى لامها بحضنه وماحجه شي بعد، وهي تبجي وتشكيله وتحجيله شلون هي صفت وحيدة وما عدها غيرهم وصارت المظلومة التكسر القلب. نزلت ظليل وخيبر ودعو أمهم وراحو ويه فقار، وأني بمكاني على الدرج وما أخذتلي صفنة مدري شنو الجابرني واكفة وأباوع لدرامتهم من الصبح. حسيت على أمي تحجي ويايه: روحي ماما غسلي وتعالي تريقي. نزلت من الدرج أمشي وأحك بشعري وأباوع بالوجوه ممستوعبة شدايصير وهذوله منو. ضحكت عمتي هاجر وقالت:

غسلو وجهها، هاي يمكن حلمانة وتمشي. سحبتني أمي من إيدي من كل عقلها، وكفتني يم المغسلة تريد تغسلي وأني هم غلست وبقيت ساكتة، وهي تشيل مي بإيدها وتشمر على وجهي، نوبه سبحتني. ضحكت وبستها من خدها: شبيج ترا صاحية أني، بس عمتي سوت خلل بعقلي شوية. مسحت خدها لإيدها وقالت: بطلي سوالفج ويلا غسلي وتعالي أكلي. آفروز: تآمرين يـ قرة عيني أنتِ.

ضحكت وعافتني ومشت وأني غسلت ورحت وراها للمطبخ، جانت كاعدة هزراف ورؤيا، كعدت يمهن وساكتين ناكل بهدوء. لما كملنه وعزلنه المواعين أني وهزراف، وصعدت هزراف جابت كتبنه وكعدنه بالصالة الجوة ندرس، البيت هدوء. أجت رؤيا هم شايلة كتبها وقالت: داتدرسن انكليزي؟ هزراف: أي مخليله يومية ساعتين الصبح. رؤيا: عادي أدرس وياجن؟! هزراف: أي تعــالي.

كعدت يمنه وعينها عليه، ماحجيت شي أني وبلشنه ندرس ووحدة تشرح للثانية، شحلاتنه أني ورؤيا الي يشوفنه بـ ذيج اللحظة يطكنه بـعين. بعد ساعات وأحنه على كعدتنه، وعمتي هاجر وأمي بـ المطبخ يسوون الغدة. بـ العادة غدانه يتأخر ورا الـ2 على ما يرجعون عمامي وجدو والبقية من دواماتهم. دخل رسول راجع من الدوام هو وسدرة، من شافنه ضحك وقال: هاي قابيل وهابيل شجامعهم اليوم؟ ضربته سدرة من ورا على ظهره ونترت بي:

لا تسوي فتنة خليهن الله هاديهن. رسول: مؤقت مؤقت هذا الهدوء. آفروز: وعليكم السلام. رسول: والسلام عليكم. سدرة: هو بقى شي ما كلبتو خلقته حتى السلام عكستو. رسول: هسه شبيج تكفزين لـ بالك جرادة شبيج علينه. عيبت عليه وصعدت لغرفتها، غمها رسول ورجع يباوع علينه وقال: شنو هذا الهدوء؟! آفروز: ما قبل العاصفة هذا. رؤيا: ليش هم تردين تسوين مشكلة؟! رسول: ههههههههههههه مو كلنه مؤقت. آفروز: عينك ما وكعت بالكاع.

تقرب مني سند إيديه على كرويتة ولزك وجهه بوجهي وجاوبني بابتسامة: ليش توكع بالكاع وكدامها هيج خلقة حلوة؟ آفروز: بشر شلكيت بوجهي؟ رسول: طالعة عندج شعراية زايدة بشواربج. آفروز: تريدها؟! سد بيها فراغات شواربك؟! رفع نفسه يضحك بصوت عالي وقال: أحب نذالتــج. طلعت عمتي جوري أم رسول من الغرفة شادة راسها وقالت لرسول بابتسامة: ها ماما أجيت؟ رسول: لا فد نص ساعة بعد وأجي. ضحكنه كلنه وهي هزت إيدها وراحت للمطبخ. طلعت عمتي أريج

من غرفتها باوعتلي وقالت: تعالي آفروز رايدتج بـ موضوع. قمت من مكاني تمشيت عليها، صاح ورايه رسول: إذا احتاجيني إمدادات بس عيطي. ضحكت وعمتي خزرته ودخلت للغرفة وأني وراها، سدت الباب وقالت: اكعدي أحجي وياج. آفروز: مرتاحة هيج، كولي عمة محتاجة شي؟ كعدت على جهة خلت رجل على رجل وقالت: شستفاديتـي من هاي الهوسة كلها؟! آفروز: يا هوسة! أريج: لعبتج الوصخة، واتهمتي خيبر، ويقين انفضحَت بين أهلها، وراح تصير مشاكل ويه أهل وهاب.

آفروز: وأنا شدخلني عمه؟! مو أنتِ اللي حاجية ويه وهاب وكايلج خيبر، شلون صرت أنا اللي اتهمته؟ أريج: أنتِ ذكية وتعرفين شنو أقصد. آفروز: بصراحة ما فاهمتج، وهم أرجع وأكول أنا مالي علاقة، ولا تدخليني بمشاكل ابنِج. أريج: فاهمتني وكلش زين، وأنا وأنتِ نعرف هم، كل اللي صار جان لعبة منج، وأعرف هم السبب اللي خلاج تتصرفين هيج، بس أريد أعرف ليش خيبر؟!

آفروز: وهم أرجع وأكول مالي علاقة أنا، وهيج سوالف سوالفجن مو سوالفي، ورجاءً لا تشوشين عقلي بمشاكلكم، لأن مرة ثانية راح أضطر أكول لجدو. درت وجهي أريد أطلع من يمها، لزمتني من إيدي بسرعة وكالت: أريج: شنو اللي تريدينه آفروز؟! آفروز: شبيج عمه، هو شمسوية أنا؟ ترا بلشت أضوج. أريج: راح أدمرج إذا بقيتي مخلية راسج براسي آفروز. تقربت منها وهمست بخفة بإذنها: آفروز: (إن كيدكن عظيم) شوفيني أعظم ما عندج، ما تخوفيني.

درت وجهي وطلعت، وتعمدت ما أحجي بصوت عالي، لأن أعرفها مو أمان، ويمكن مسويتلهَا لعبة وتريد تحجيني، بس أنا مو غبية. بعد الغدة ملتمين الكل بالصالة، كال أبوية موجهًا كلامه لجدو: أبو آفروز: حجي أنا قررت أطلع من البيت هل فترة. جاوبه جدو بهدوء: جد آفروز: احتفظ بقراراتك لنفسك. معاذ: الوضع زاد عن حده، وما متخلي عن بنتي أنا، حتى أشوف مستقبلها دايضيع، وأبقى ساكت. جساس: ما ضايع شي.

معاذ: والمشاكل اللي داتصير، كل حجاية وثانية كالوا آفروز، أدري شطلعت آفروز؟ بنية جافية خيرها وشرها، مكابلة كتبها من الصبح لليل، شمسوية وهيج شادين وياها؟ جساس: سد الموضوع معاذ، ماكو طلعة وخلص. معاذ: بهاي اعذرني، أنا قررت وخلص. جساس: ردة ماكو لهل بيت إذا طلعت. كام أبوية من مكانه ضايج، وكال لجدو بنرفزة: معاذ: مو باللازم لعد، نطلع طلعة أبدية. أكثم: كول يا الله معاذ، مو كل بناتنه ويه آفروز، لعد ما نخاف عليهن أحنه؟!

معاذ: ما يوم صارت مشكلة وكالوا رؤيا لو هزراف لو البقية، أول حجاية كالوا آفروز، أدري شطلعت آفروووووز، شطلعت يعني؟ محد يفكر ويكول بنية عدها مشاعر تتأثر تتحسس من كرهكم واتهاماتكم. جاسر: يا اتهامات معاذ؟ شو كل المصايب من جوة راسها. هود: يا مصيبة اللي طلعت منها يابة، يا مصيبة؟! جاسر: سد حلكك أنت. كام هود من مكانه ضايج، وصاح بيهم بغضب:

هود: طلعوا آفرووووز من راسكم، كافي عاد وصلت حدها، والقرآن أخذها وأهج، وما أخلي طير الطاير يعرف مكانه وين. طلع وركع الباب وراه، هز إيده عمي جاسر وكال: جاسر: حتى ابني صار يصيح عليه لخاطرها، ويكولون شمسوية. جساس: كلامكم ما بي داعي، ومحد يطلع من هل بيت وخلص. جنت كاعدة ع الدرج وأباوع لهوستهم، وهزراف كاعدة يمي، حسيت عليها لزمت إيدي، انداريت عليها وابتسمت وأشرتلها براسي نصعد فوك. كعدنه بغرفتنا، باوعتلي هزراف وكالت:

هزراف: لا تضوجين. آفروز: من شنو؟! هزراف: لأن هيج يحجون. آفروز: ما يهمني، دام ما مسوية شي أنا، خل يحجون. ابتسمت وكالت: هزراف: الج واهس ندرس لعد؟! آفروز: لا أريد أركص. هزراف: جديدة هاي. آفروز: أريد أركص ع جراحهم. هزراف: ههههههه ارقصي عيني ارقصي. آفروز: لا أشاقة، بس ما بيه حيل أدرس، راح أسمع شي لما يتعدل مزاجي. هزراف: تمام، راح أراجع أنا لما يتعدل مزاجج.

هزيت راسي وخليت سماعات بإذني وفتحت أغنية وغمضت عيوني، بعدني ما عايشة اللحظة ويه الأغنية، اتصل هارون عليه فيديو، فتحت خط أول ما شافني صاح بضحكة: هارون: لك أغااااااااتي روزي. آفروز: بعد عيوني هرهوووور. هارون: شلون أنا ويه السحارة؟ طكيتها بضحكة وجاوبته: آفروز: لك أغاااااتي مشتاقتلك. هارون: لا تجذبين بحالي أنتِ. آفروز: والنبي كلبي مشتعل عليك. سند التلفون مالته مثبته بمكان، وتقرب مبتسم وحجه بهدوء:

هارون: روحي أنتِ، وحق لا إله إلا الله أنا المشتعل كلبي عليج. آفروز: الله ياخذ الدراسة اللي مفاركتنه. هارون: بس هل فترة وراجع إن شاء الله. آفروز: إن شاء الله، لأن صدك مليت بدونك. هارون: أنتِ داتدرسين زين لو لا؟ كلبت عيوني بملل وجاوبته: آفروز: لا تجيب طاري الدراسة كدامي، أنا كل ما أتذكر أنت جبرتني أروح علمي أكرهك. هارون: أنجبي روزي، غير علمود مصلحتج، ترحين أدبي شبي يعني؟ رفعتله حواجبي وجاوبته بابتسامة عريضة:

آفروز: أروح قانوووون وأصير المحامية آفروز معاذ جساس العايش ع سن ورمح. هارون: مو أجي أخلي هذا الرمح بعينج. آفروز: شبيك والنبي أصير أطلق محامية بالدنيا. هارون: مو اتفقنه مجموعة طبية؟ آفروز: عوف الطبية، أريد أروح قانون، أريد أصير محامية. هارون: تنسجنين أنتِ والموكلين وحق الله. آفروز: يمعود شبييييييك، والنبي أصير محامية أسطوووورة. هارون: أسطورة كلكامش. آفروز: أتوقع اسمها ملحمة كلكامش.

هارون: الغباء هم موهبة، والملحمة شنو ما تعتبر أسطورة؟! آفروز: خلي التسميات مثل ما هي، لا تتلاعب بيها. هارون: المهم هسه شدي حيلج، ومن أرجع أنا هم راح أدرسج. آفروز: إن شاء الله إن شاء الله، هارون الفرموس. هارون: صيدلاني وشكبر اسمي وتكليلي فرموس، شكد ما عندج ذوق. آفروز: خليت الذوق إلك أغاااتي. بعده ما مجاوبني سمعت صوت ولد يمه يحجي ويا، هو اندار ع الولد بقوا يحجون، بعدها باوعلي وكال:

هارون: يلا حبيبتي رايح أنا، محتاجة شي؟ آفروز: خاف أنت محتاج؟! هارون: ههههه يلا باي نتفاهم بعدين. آفروز: تماااااااام باي. ودعته وغلقت منه، وبقيت هاي الفترة أدرس أنا وهزراف، حتى ع العشة ما نزلت، ما أريد أشوف وجوههم المسمومة. تقريبًا بـ11 بالليل اندكت باب غرفتنا، فتحته هزراف، صوت هود، كمت من مكاني بسرعة رحت عليه، من شافني أشرلي بيده أروحله، تقربت منه همسلي: هود: جيبي صاية وشال وانزلي جوة، أنتظرج بالسيارة. آفروز: ليش؟!

هود: تعالي وتعرفين. عافني ونزل، أنا هم أخذت صاية وشال ونزلت ورا للسيارة وحاضنة ملابسي، ضحك وكال: هود: البسي شكو حاضنتهن. حجيت لبستهن ورجعت سألته: آفروز: إذا عرفوا بينا طالعين بهل ليل يطيحون حظنه. هود: أعلى ما بخيلهم خل يركبوا. شغل أغاني وبقينا نفرفر بالسيارة ومهوسين، بعدها وكفنا يم محل مثلجات، باوعلي وكال: هود: تنزلين لو ناكل بالسيارة؟ آفروز: أنزل. هود: يلا لعد. نزلنا أنا وياه، كعدنا ع جهة معزولة، وهو راح جابلنا

واجه كعد مقابلي وكال: هود: تتذكرين من جنت أطلعج من المدرسة ونجي ناكل هنا؟ آفروز: وحصلتلك كم عود خيزران. هود: فدوة إلك يا عيون هود. آفروز: أكلك هود. هود: كولي يا بنكرياس هود. بعدني ما حجيت، صار فوك راسنا ولد وكال بضحكة: الولد: شعدكم دايحين بهل ليل؟ رفع راسه هود عليه، وطفَر من مكانه بسرعة، تحاضن هو والولد وضحك بصوت عالي فرحان بي وكال: هود: اشتعل جدك ع هل الغيبة هاي.

صارت عيني ع الولد يباوعلي مبتسم وحاضن هود، بقيت أباوعله وأحاول أتذكر إذا أعرفه أو لا. شكله مألوف عليه، شايفتَه قبل بس ما أتذكر وين، ابتعد عن هود وكال: الولد: اليوم رجعت وعرفتج راح تجي هنا واجيت. هود: الحمد لله ع السلامة، ليش ما كلت لعد؟ طبطب ع كتف هود وتجاهل سؤاله وكال: الولد: أهلك الولد شلونهم؟! هود: كلهم بخير الحمد لله. راد يحجي الولد وقاطعه صوت تلفون هود، ابتعد هود عن الولد وطلع تلفونه من جيبه، باوع ع المتصل

عليه ورجع باوعلي وكال: هود: هذا أبوك. آفروز: هاهي نعلسنا لعد. ضحك وجاوبه يحجي ويا بهدوء، وصار يتمشى قريب علينا، كعد الولد كدامي وكال: الولد: شلونج آفروز؟! عقدت حاجبي وأنا أباوعله وأحاول أتذكر شكله زين، هز راسه بخفة وكال: الولد: كتلج خليني ع بالج لا تنسيني. تذكرته واجت صورته بعقلي قبل 5 سنوات، من حجايته ونظراته، نفس النظرات اللي صعبت عليه أفسرها قبل، وهسه ما أعرف ليش سألته هل سؤال: آفروز: وأنت ما نسيتني؟!

يوشع: أنسى كل الناس إلا أنتِ.