رواية دجن الضليع الفصل السادس عشر 16 - بقلم رهف علي

نبدأ بذكر الله ﷽💛✨

لاتنسون التصوويت + تعليقاتكم ع الفقرات عُمري ♡

وبتنهيده دكول ، اااااااااااااااااي ..
ما عرَفت شلون أوديلَك وجَع روحي بقصيدة..

_________♡________

سيلينا ..

توقف الزمن عندي هي لحظات بس كأنها
سنين طويله جمدت بمكاني
وجسمي صار كأنه احجاره عيوني تتحرك ع البنات
برهبه وخوف تنتقل من البنت للثانيه
وكأن اريد اشوف مدى مصداقيه كلامهن
اذا فعلاً كلامها صح او لا

فجأة وكأن اجتاحتني عاصفه هوائيه بارده
خلت كُل خليه بجسمي تتحرك بخوف
رجفه اجتاحتني وكأني بموسم شتاء
عيوني نملن دموع قويت نفسي وهمست من بين
توتري وخوفي من جوابها

ههه ش..شنو تقصدين بكلامج ي..يعني
دابر ه..هذا نفسه الي ل..لابس اسود
هو اي اقصد هو مرتبط ويحب وحده و..وراح يتزوجها ؟؟

_ هزت راسها ب اي وتقربت ، شبيج حبيبتي
ليش جاي ترجفين؟

سيلينا : نفيت براسي سؤالها لزمت ايدها ااي لزمت زندي بيها ورجعت سألتها .. شوكت هذا الكلام ها
شوكت عرفتوا هو عنده علاقه ومرتبط وراح يتزوج

_ والله يا عيوني ما اعرف انا بس سمعت وهو هم تخرج وتعين وكالو حب وحده وراح يتزوجها ماكو داعي ينتظر ع زواجه ويطولون خليهم يسرعون بي

سيلينا : رجفت شفايفي وانا انطق ، يعني يعني يتزوجها

_ اي ، بس فهميني ليش هاي حالتج ترى خوفتيني والله تعاي نزلي يمكن تمرضتي

سيلينا : ماحجيت اي شي هي سحبتني من ايدي
ونزلتني وانا مثل الجثه بيدها تمشيني
جسمي بعده يرجف ورجف مو طبيعي
نزلتني جوه بس الهوسه كلش قويه
وبرى وجوه يركصون
حسيت راسي صدع
رايده بس انام
حتى اخلص
من الالم

صارت بوجهي ماما من شافتني ارتعبت لان
واضح حالتي مبينه وماكدر اضم
شي لان وجهي كاشفني

ام زياد : اسم الله ولج شبيها بنيتي

_ خاله ماعرف بس يمكن مريضه لان جسمها يرجف ..

ام زياد : سوده عليه يمه شو تعاي اخذج لغرفه
بعيده عن الصوت تنامين بيها لبين ماتخلص الحنه

سيلينا : اخذتني ماما وهم. صفوا الها مكان الغرفه
عاد هي اخذتني تمشي وتحجي وياي ..

ام زياد : شبيج ماما شجاج قبل شويه جنتي يا محلاج
تضحكين للهوى وفرحانه هسه شصار

سيلينا : هزيت راسي الها ب لا مابيه لان جد ماكدر احجي احس الكلام طار من راسي
وماعرف ارتب جمله ع بعضها

نمت ع السرير وهي طلعت بلكوه
تريد تبقى يمي وانا بلكوه مفتحه عيوني
سدت الباب وراها وانا غمضت عيوني
اريد انسى ما افكر
ب اي شي اريد ارتاح واريح كلبي الي جاي يدك
بقوه وخبصني خبص

صح جسمي يرجف وتعبانه بس ماعرف شلون
كدرت انام غفيت

ماعرف شكد مر من الوقت بس حسيت
ب الباب مال الغرفه ينفتح
سمعت الطكه ع اثرها فزيت فتحت عيوني
وانا هلكانه تعب

فركت عيوني وضحت عندي الرؤيه
بقيت جامده بمكاني وانا اعاين دابر
بنص الغرفه حتى رمش ماكدر ارمش

هو من شافني صار يعتذر ويبرر دخوله هنا ..

دابر : اعتذر بويه دخلت وانتِ نايمه بس
هاي غرفه قاسم وردت اخذ الشاحن مال جهاز
ماعرف اكو احد هنا موجود

سيلينا : هو يحجي وأنا بس جامده وراح فكري
للبعيد يعني هسه هو راح يصير ب اسم وحده ثانيه غيري انا

من عاينت عليه راح يطلع سريع وكفت ع طولي
وانا اهمس اله ..

سيلينا : لا ماكو داعي تعتذر ما صار شي
هو هز راسه تقدم جاي يمشي وسألته ماتحملت

صحيح انتَ مرتبط ؟

رفع راسه وعقد حاجبه بعدها جاوب ب ابتسامه هادئه
سلبت روحي ونطق الكلمه بسهوله بس حسيتها
سجينه بنص كلبي صارت

دابر : أي

سيلينا : بلعت الغصه واردفت ، راح تتزوجون مو

زفر انفاسه وجاوب

دابر : كل نهاية علاقه زواج ، ان شاء الله نتزوج

سيلينا : سكتت ما كملت ماعرف بس حسيت روحي راحت وهو جوابه مختصر بس كل كلمه
يوكع امل وينبني بداله الف حاجز
وحاجز يمنعه عني
وتصرفاته عاديه ما ادل ع هو يكن الي مشاعر.
تأكدت الف بالميه هذا حب بس من طرفي انا
وحيل جاي يعذبني

هو طلع وسد الباب ورى حتى ما عاين عليه جان يتلافه نظراته عني كعدت ع السرير ضايعه
منه وبسببه ماعرف وين اروح
بالي شارد أفكاري متشتته
سحبت نفس قوي حتى اقوي نفسي كررت عمليه
الشهيق والزفير حتى ارتاح
لان حرفيا حسيت روحي جاي تتطلع
الى ان حسيت نفسي كدرت
اجر نفس

رجعت نفسي ع السرير ونمت ع ظهري ورجليه ع الارض صاروا
وعيوني ع السقف أفكاري تصادمت
شنو اسوي هسه ارضى بالامر الواقع لو احاول اكسبه الي ؟ هو مايعرف بيه احبه يمكن لو عرف راح
يحبني ؟ هو يجوز هو عنده مشاعر اتجاهي وخايف يفصح عنها
زين اذا تزوج انا شنو يكون موقفي بعرسه؟
اشوفه لازم ايد وحده ثانيه بالبدلة البيضه
وهو واكف يمها واسمها بظهر جنسيته
ملكه وهو ملك الها
انا شنو موووووقفي !!!!!

اموت واخلص روحي ؟ لو شنو

لا بس انا مؤمنه ما اريد اغضب ربي بسببه
ماريد أضعف لهاي المرحله
بسبب انسانه اريد اكون قويه

اي انا قويه سيلي قويه ، همست هذا الكلام بخفه
ونزلت دموعي ماتحملت
رفعت اديه ع وجهي وصرت اشهك بالبجي
انجرحت من اكثر انسان احبه وهو جرحني بدون قصد وبدون ماينتبه الخلل مو منه هو الخلل مني انا
انا الضعيفه الي حبيت شخص ميحبني ومو ب باله اصلاً

ورى فتره هدأت احاول اتقبل الموضوع بس كلبي مو راضي يتقبل سحبت نفس بقوه وزفرت
وكفت ع طولي ورحت للمرايه
مسحت وجهي جنت حاطه مسكاره نوب مصخمه عيوني بيها
دورت ع شي كلنس امسح بي عيوني لكيت بالركن الغرفه ع الميز سحبت كفشه ورجعت للميز
حكيت وجهي حق عبالك اريد اطلع حركتي بي
بحيث من بعدت ايدي لكيت عيوني حمر دم
هي والمكان الي دائر مدائرها صاير احمر

زفرت انفاسي ب اسف ع حالي عدلت شعري وملابسي ورحت وكفت يم الباب
رسمت اكبر ابتسامه مزيفه ع ثغري وطلعت
اواجه حياتي

مرت االيوم ب اكمله وانا ابتسم احاول انسى حتى ما اخلي شخص يعرف الي بيه
ماما كل شويه تنتبه عليه حسيتها عرفت الي بيه
لان تعاين عليه بنظرات
وكأنها تعتذر عن الخراب الي صار بداخلي

انا ما اكدر اسوي شي غير بس ارد الها الابتسامه
في سبيل اطمنها ع حال بنتها المهلكه

مشى اليوم وخلصت الحنه هم مسوين هي حنه وهو عرس يعني يوم واحد لهذا ثاني يوم الفجر رجعنا للعمارة
مابقينا وانا ماردت ابقى بقيت الح الى ان طلعنا الفجر
ختى اخلص وارتاح لان هو قريب وكل ما اشوفه
ابقى اطحن بنفسي طحن اتعذب

مرت ايام الدراسه وانا ساكته حتى شكوه ماشكيت
البنات ابد بقيت صامده صح اكل بنفسي اكل من
جوه بس شنو الفايده من هذا الشي اذا حجيته
ما استفاد احس اتألم بزايد من اذكر الموضوع
وافصح عن الصار وياي مو شي فخر ابد

هو استمرت جياته لبيتنا ك زياره يزور بابا وماما
نوب صار كل ما يجي يحجي عن علاقته لماما
بما ان هو علاقته قويه بيها ف عادي عنده
يحجي الها شلون تحجي هيَ ويا وشلون
ماتضم عليه شي ومن هذا الحجي

انا اسمع صح بس ما ادخل حتى ما اصير بموقف
انا بغنى عنه
يعني انا اعرف لو ذكرها كدامي اكعد انحب كدامه
واتيه الأول والتالي
وأثبت ع نفسي بالجرم المشهود

بمره جنت نايمه وهستوني كعدت
جوعانه ونزلت حتى اكل شي
سمعت صوت بي ما اهتميت وانا منا النعاس
ع وجهي وعقلي طافي
لهذا رحت للمطبخ سويتلي لفه سريعه وأخذت كلاص ماي ورجعت هستوني صاعده ورجعت سمعت نفس الصوت

وكفت جامده بمكاني هذا دابر !!! شعجب جاينه بهذا الوقت لتفتت ع باب الديوانيه لكيته مفتوح ماما تقريبا صايره بوجهي بس مبين جزء منها مو كلها وهو مايبين منه بس صوته

بقيت واكفه وانا اسمع كلامه يحجي ويه ماما ..

ام زياد : يعني انتَ وهي علاقتكم شلونها متوافقين

دابر : شكلج يا عمه علاقتنا زينه والبنت
ورده مال الله تنحب

ام زياد : ع الخير يمه تتهنون سوا

سيلينا : نغزني كلبي و وجهي صار اصفر توترت ماحسيت الا ماما صارت بوجهي ووجها يدل ع ان هي كاشفتني هزت راسها وسوت نفسها مامنتبهة وسدت الباب حتى ما اسمع كلامه

بلعت الغصه وصعدت فوك اكمل النحيب مالتي
ثاني يوم من داومت تلكني البنات الا تحجين
ماكدرت ما احجي محتاجه

حجيت الهن كل شي وهن ماقصرن نزلنه وداسن عليه دوسه ونص ماخلن كلمه ماحجنها بحقه وانا ماسكتتهن
بالعكس اريد بي شي حافز يريح كلبي منه
اريد اكرهة وانسى كل شي يخصه

ريفان : كافي ياحبيبتي عيونج غاحن من البجي

دهليز : دحكي يول هذا شنو وتنوحين عليه
مايستاهلج صدكيني

سيلينا : ضحكت ، ولجن حسستني جنت بعلاقه ويا
وتركني

من حجيت هيج صفنن بوجهي

ريفان : ها

دهليز : ها

سيلينا : من كالن هيج ماكدرت اتحمل طكيتها بضحكه فحطتت بيها اريد اسكت ماكدر بقيت اكركر

ريفان : جعصناها انا ودهليز صارلنا ساعه نواسيها حتى بسببها نسينى هم مابينهم علاقه وهي تحبه بس من طرف واحد اتهمنا الرجال بالخيانه وهو مايعرف شي
ولا يعرف بحبها الاغم

سيلينا : هههههههه ولجن طاح حظجن عوفني
موتني

دهليز : تستاهلين ياعوبه ، كعدت من التعب وانا اهز ب ايدي

ريفان : ماتستاهلين ضيعنا حسناتنا ع الغجال بالسب ع خالي بلاش

سيلينا : سكتت لان بس احجي كلمه يصيحن
عضيت ع شفتي من اجت بالي الاغنيه
اول ما اجت بالي صرت ادندن بيها

ياعيني يام ادميعه
شفتي شلون حبنا يبيعه
شفتيني من حبيته
جان يخون ما حسيته

ادندن بيها وهن يخزرن بس ماهتميت حسيت
هذا المقطع يلتمس بداخلي غصن مكسور
بقيت ادك ب اصبعي ع الرحله وادندن
وهن بالبدايه جانن يخزرن بيه بعدين
انطربن وياي ..

مرت الايام وانا صرت اقوي نفسي مره بعد مره
ما اريد أضعف ابد ولا اريد
اكون ضعيفه تجاهة من يجي صرت اتهرب منه
لاسلام ولا كلام
كلمه ماريد منه اسمع ولا اريد اسمعه صوتي
لهل درجه وصلت لان بكل مره اشوفه واسمع صوته
انكس وحالتي تدهور وتسوء
لهذا اتجهت لهذا الأسلوب عسى ارتاح

مره كاعده اتفرج ع والعب بجهازي باللعبه
وفجأه اتصل جهازي برقم غريب
انصدمت هاي اول مره تصير وانا اصلاً رقمي محد يعرفه شلون رقم غريب يتصل عليه

لزمت وفصلت الخط ودزيت رساله ( منو حضرتك ؟ )
ماكو رد بس يتصل وانا انطي فصل مكالمه
اخر شي وصلت مني رساله خلتني ارمش بعيوني
من الصدمه ...
جان مكتوب بيها ..

__________♡__________

دهليز : بقيت واكفه كدامه وانا رمش ما رامشه
ادحك عليه وكلبي يرعد خوف ، توتر ، فرح ، قلق ، حب
كلهن اجتمعن بيه انا
هجست طيور الدنيا كلها بداخلي ترفرف

دكات كلبي يسمعهن البعيد
نزلت راسي من دحكت عيونه فاضحات الشوك الي بي
وعيوني الي فاضحاتني بشوكي اله

اردف هوَ ببحتو الحلوه والخلت حواسي
كلها تستغيث .

اللهيم : نسمه روحي

دهليز : همم ، همهمت ك رد اله وانا منزله راسي
محرجه وخجلانه منه وهو بهذا القرب مني
صاير كدامي صح ملازمني بس قربه يوترني

اللهيم : ااخ ربي شسويتي بيه يابعد ريتي
شو بويه ارفعي راسج وعايني بعيوني
خليني اروي شوكَي المتعبني

دهليز : رجف جسمي من جر حسره واردف بكلام
اخذ روحي ويا رفعت راسي وانا عيوني تتهرب منه
قوسه شفايفي
همست بلكوه ، انا انا هم مشتاكتلك لهيمي

اللهيم : عايني بعيوني ياعيوني انتِ

دهليز : خليت عيوني بعيونه وانا خجلانه وصابني الثول بس كدامه كل قوتي تروح
واصير ما افهم اي شي حتى الكلمه السهلة احسها
تصعب يمه

اللهيم : ريتني ما اشوف غير هاي العيون حلال ألي لآخر نفس بيه ..

دهليز : كل قطره دم بجسمي جمدت ، اردفت بتأتأه ،
ش..شن..و ؟؟

اللهيم : افهميها بويه ماتصير غيرج حلال الي لو تنطبكَ هاي السماء ع الارض

دهليز : بهذا كلامه خمد الف سؤال بخاطري الو ، سريع نزلت دموعي وصرت اشهك بالبجي هجست
فرفحت وهو حتار شلون يتعامل وياي حتى يسكتني
ويهديني اخرر شي كز ع اسنانه واردف بعصبيه
محبه ..

اللهيم : لا توجعيلي كلبي بدموعج انتهههي انا

دهليز : عيوني مليانه دموع وابتسمت ع كلامه همست بهدوء وانا ادحك عيونه الزرقاء بلون السماء

ريتني أموت اذا صرت لغيرك لهيمي ..

سريع رفع ايده وحطها كدام شفايفي بدون مايلمسها واردف برجفه ونظرات غاضبه عاتبه

اللهيم : اشششش اياج تكررين هل كلام ااياج
ماريد اسمعه مره ثانيه
عندي استعداد ابقى عايش ع امل انفاسج بهاي الدنيا ع ان ماتبقين بيها صدكيني انا انتهي عاشكج عشك بس الله اليعلم بي

لج بويه انتِ تعويذه داهمت حياتي ماخلتني اندل
دربي منين ضعت وحياتي لكيتها يمج
أحلامي انتِ خيالي انتِ حاضري ومستقبلي انتِ
اطفالي منج انتِ

مو زلمه ولا انعد ع الزلم لو ماسجلتج ب اسمي ..

دهليز : عجزت ارد عليه كلامه سحرني وخلاني
ما اندل دربي بقيت ادحك بعيونو وهمست بدون ما انتبه ع نفسي ..

عَيناك الزرقاء خُلوتي أحيا عُمري واموت بها .

فجأه هجست نفسي كلت هذا الكلام بسبب نظراته
وشكله اليوحي ويعلن اخر صبره واعلان استسلامه

اللهيم : انا اليوم شكلي راح اروح بيها ولج بويه اليوم ناويه ادخلينا بالحرام انا خايف لا المس ايدج وينحسب ذنب عليه والله يعاقبني بيج ويبعدج عني
مارايد غير بس تكونين حلالي واسوي بيج اليحلالي

دهليز : ابتسمت وانا خجلت منه وكلامه زاد خجلي
نزلت راسي بس فجأه صدمني ب دعُاء
خلاني ابجي بسببه طلع من كل كلبه
يطالب بيه بصدق نيه وصفاء وبرابطه ابديه
خلاني ادمع عيوني وانا ابتسم الو بفرحه

اللهيم : اللهم انك شاهد اللهم انك جابر كل خاطر
اشهد ع حبي الصادق لها واجبر خاطري بحلالك لي منها و ارزقني من رحمها سنداً لي ولها في سنين حياتنا القادمه يا الله ..

دهليز : كاعده وانا اتذكر الي صار وكلامه وياي وشلون
تعامله وخوفه عليه
حسيت ع ضربه اجتي بخصري فزيت لكيتها كيناز
ها شبيج ؟؟

كيناز : هسه تحجيلي كل شي وما تضمين عليه اي شي

دهليز : ب استغراب شنو احجي ولج ؟

كيناز : تدرين انا اليوم ليش اجيتكم

دهليز : غير مشتاكه النا عجل يحتاج الها علم

كيناز : شو انجبي انا اليوم اجيت علمودج

دهليز : ب استغراب شبيه انا ؟

كيناز : من الاخير بلا لف ودوران شنو بينج وبين اللهيم

دهليز : هجستها حصرتني بالزاوية بهذا سؤالها
وخلاتني اتصفن واتبلع هساع هاي شنو اجاوبها
واكول الها بهت لون وجهي وصفرت ملامحي وانا ادحك بيها شلون مترصده جوابي

كيناز : احجي يولو

دهليز : هزيت راسي ، لا لا ماكو

كيناز : ترى انا اختج لا تخافين مني حبيبتي احجيلي انا دحكت نظراتو تجاهج ونظراتج وارتباكج
من ادحكينو كدامج انا مو صغيره واعرف
شنو الي يدور حواليه بس بقيت ساكته ردت انتِ تجين وتحجين الي ب اعتباري اختج
وانصحج وأريد الج الخير

دهليز : نزلت راسي وانا اصابعي اهجسهم راح يتكسروا بأيدي عضيت شفايفي وهمست الها برجفه خوف

أحبو .

كيناز : والله عرفتج تحبينو عجل الميت ميتي واعرفه

دهليز : رفعت راسي الها وانا ادحك بيها
رايده امل منها ما تمنعني من هذا الحب بس دحكتها مبتسمه ب وجهي بعتب استبشرت بالخير
يعني بيها امل توكف وياي مو ضدي

اردفت بتسأل ، شبيج ؟

كيناز : تدرين انا اول ما تزوجتوا ل أديب وعشتو وياهم ودحكت عيشتهم حلوه تمنيتج تكونين ل اخو
ونصير ب بيت واحد وما يفرقنا احد
تمنيت هواي تكونين ألو وهو الج
صدكيني يدللج وما بيوم ينكص عليج ب شي
اعرفهم شهمين ما مثل غيرهم أمثال الي دمروني
بالسابق

دهليز : ضحكت ، يعني انتَ هساع ما معارضه

كيناز : طبطبت ع كتفها واردفت ، لا خيتي انتِ كتلج من قبل جنت رايدتج الو عبن اللهيم خوس اللهيم
ماينقاس الا بالذهب
وحتى انا هساع مثل ما ادحكج متاكده منه
خايف الله بيج وما مسوي اي مُخل ب الحلال
او ب اخلاقو عبن شهم
و عندي ثقه بي

دهليز : هزيت راسي وضحكت هجست الدنيا نفتحت أبوابها بوجهي هذا اول امل بنجاح علاقتي ب اللهيم
يعني هساع مشينا خطوه ،

همست الها ، تدرين كلامج شكد ريحني ، اردفت بضحكه

كيناز : عاد مو تسويها بلا ملح والمستحى يروح منج
افين حظج وحظو

دهليز : ول ول شهل كلام

كيناز : عجل شعبالج

دهليز : صدكيني ايدي ما يلزمها يخاف جثير يكول ما ريد احصل ذنب والله يعاقبني بيج وما احصلج

كيناز : و هذا العشم منو هذا الي جنت متوقعته منو

دهليز : كلام اختي حيل طمني
بحيث هي صارت الواسطه بيني وبينو
انا ويا مانتعارك عركه كره لا نتعارك عركه شوك ولهفه
عركه عتب وحب نحسب الايام يوم يوم
في سبيل نتشاوف سوا واليوم الي يتأخر بي
وما ادحكو انجن عليه وهو يكعد يرضي بيه
ويخلي اسرح بعالمو وجمال كلامو

بحيث هو خطيه صار يقصر بدراستو علمودي
بيوم الي اشتاكلوا وهو يشتاكلي
يضرب دوامو بعرض الحايط
وينزل لبيتو ونتشاوف حتى لو من بعيد البعيد لمده دقيقه والواسطه الي بينه هي كيناز
هي صارت الحارس مالتنا

هو أول ما عرف ان كيناز عرفت بعلاقتنا خجل منها
بي واجها وما ضم عليها ابد بالعكس
كان رجال وكد كلمته ما اتخلى ولا صار يتهرب من الموضوع
وهو الي فتح الموضوع ويا كيناز وكال الها انا نويت
اخطب دهليز واسجلها ب اسمي

بس هي رجعت كالت اله وثتبتت بكلامها
ان بعد الامتحانات الثالث يروح يتقدم الها
حتى تكون متفرغه واكيد ابويه يقبل ان شاء الله
ماراح يعترض ابد
لان عرف بيت ابو أديب شنو وشنو طبعهم
ينطينهم وهو مغمض

كلام اختي زاد عندي االامل بصوره حيل قويه
وحببني بالحياه
صرت ادرس بشراهة في سبيل اكمل الامتحانات
حتى يجي يطلبني من اهلي
ارتاح اتسجل ب اسمو

وهو هواي حذر بخصوص دراستي
يوميه يكول ادرسي حتى اجي اخطبج
وأنا ادرس

امتحنت وخلصت امتحانات بس جان عندي نوع
من الخوف بس ماتوقعت هذا الخوف
يكون حقيقي
بعد الامتحانات صارت النتائج وعلنوها
وطلعت راسبه هينا تحطمت كل آمالي
وكعدت دكيت ولطمت ماخليت شي بغرفتي اذا ماكسرتوا بحيث انجنيت
وهو شكد حاول يطمني بس انا عقلي وقفل
خاصه معناها راح اعيد السنه لان ما فاد وياي دور ثاني
قفلت الابواب بوجهي
كعدت انحب وابجي ع حظي

ايام صارت حيل تعيسه حابسه نفسي بالغرفه
وكاعده ميته قهر شلون انا ما نجحت يعني هسه
اللهيم مايكون الي
شلون هساع بهاي الحاله والله اموت إذا ما صار الي ولا انا ألو

اهلي رداو يخلوني اغير جو عاد اختي اتصلت بيهم. كالت جيبوها يمي اغير الها جو
صدك اخوي اخذني و وداني يم كيناز
بيومها عاندت ما اروح بس ماما حلفتني
وحلفت تزعل مني
لهذا استسلمت ورحت وانا كارهة نفسي
شلون راح اواجهوا وانا خيبت ضنو بيه

اول ما دخلت البيت سلمت عليهم وهم يعرفون بيه لهذا حاولوا يغيرون مزاجي بس انا اتصنع الفرحه
ماريد احسسهم مافاد كلامهم

عاد اختي سحبتني وكالت تعاي اشوفج شي فوك بالغرفه مالتي
صعدتني وانا امشي وراها مثل الآلي
دخلنا لغرفتها وهي كالت

كيناز : اجيب العصير مالتج واجي ابقي هنا

دهليز : هزيت راسي وكعدت ساكته شوي وانفتح الباب
رفعت راسي وجمدت بمكاني وانا ادحكو الليهم
دخل للغرفه وترك الباب ورى شوي مفتوح
انا وكفت مثل الفازه

نظراتو جانت تحجي كل شي من تعب وصبر جان يعاتبني بنظراتو متوني وشحل حالي شل
هجستوا يكول راح ننتظر سنه بعد بهذا الحال
حتى ما يكون الشخص عذر تا يقبلون نتزوج

نزلت راسي وانا دموعي بطرف عيني اول ما سمعت صوتو نزلت دموعي ب ألم ع وجناتي

اللهيم : بعتب ، ماتوقعتج هيج ضعيفه ولج
ليش هيج اذيتيني ع غيابج هنت عليج
تخليني انتظر طول هاي الفتره وانتِ عازله نفسج وما مخليتني اعاين عيونج السبتني
ها ولج شكد قاسيه

دهليز : ماكدرت اجاوبه وانا ابجي

همس بهدوء وهو يتقرب وكف كدامها ..

اللهيم : لولو

دهليز : رفعت راسي دحكتو بنظراتي المابيها امل وهو قابلني بنظرات عتب وحب

اللهيم : مريتي

دهليز : رجف جسمي من كلمته هجست شعر جسمي وكف صرت مثل الطفله كدامه وفقدت لعابته
اشهك بالبجي وهو كدامي

اللهيم : ليش هيج تأذيني ولج وتأذين نفسج
صدكيني انتِ مريتي وعد رجال وعد

دهليز : همست وصوتي بالكوه يطلع ، بس.. بسس انا رسبت وراح اعيد يعني ما ...ما نتزوج

اللهيم : سحب نفسه واردف ، رفعي راسج وخلي عينج بعيني

دهليز : رفعت راسي بلعت ريق وانا ادحكو شلون
يتأملني ب ابتسامتو الساحره رغم
حزنو وخوفو عليه

اللهيم : جهزي نفسج اليوم ..

دهليز : عقدت حاجبي ، لشنو ؟

اللهيم : اليوم اما ناويها بس ردت اكولها وانا اعاين عيونج واشوف فرحتها ولهفتها بعيوني

دهليز : ها .. همست برجفه اعتلت جسمي

اللهيم : اليوم انا جاي اتقدم ل احلى شي صار بحياتي
بكامل حبي ولهفتي وشوكي الها اتقدم ل أغلى انسانه بحياتي كلها بكامل وعودي بكامل مشاعري الصادقه
رايد اسجلها ب اسمي واخلي اسمها بظهر جنسيتي
لآخر يوم بحياتي

دهليز : فتحت عيوني ع سعهن اهجس انا بحلم مو بعلم ما رايده احد يصحيني من حلمي الحلو

همست ودموعي تنزل ، لهيمي

اللهيم : نسمه روحي

دهليز : اليوم

اللهيم : اليوم ابوي انتِ

دهليز : وعد

اللهيم : كد الوعد رجالها

دهليز : ماكدرت اسيطر ع نفسي
هجست الدنيا ما تتحمل فرحتي
رايده اطير بالسما وما انزل
من فرحتي

بقيت صافنه بوجهو وانا الفرحه تارسه روحي
وهو صافن عليه ويضحك
همست برجفه. ..

شبيك ؟

اللهيم : بيه انتِ

دهليز : ضغطت ع ايدي ماعرف شنو احجي

اللهيم : مستعده تكونين ب اسمي

دهليز : هزيت راسي ب اي وانا متوتره

اللهيم : جا بويه اليوم نسمع الاخبار الحلوه
وتكونين ب اسمي ش اريد من الله بعد

دهليز : ضحكت ماعرف شنو اكول فجأه دخلت
كيناز عضيت شفتي بتوتر وهم صاروا يتناقشون بينهم اخر شي اتفقوا اليوم يجون كلهم يطلبوني من اهلي
وفعلا انا مم التوتر رجعت للبيت وطول اليوم متوتره
خايفه ومرعوبه
الى ان مر اليوم بطولو ، وندك الباب العصر
دخلوهم اهلي من بعد الضيافه والترحيب

فتحو الموضوع وطلبوني انا اكمز من الفرحه
ماعرف شنو اسوي بس اهجس كلبي
صار يخفكَ بقوه وتايطلع من صدري
شعور ما اكدر اوصفو حيل مفرح وصعب بنفس الوقت

يعني هساع هو جوه وتايطلبني من اهلي
ما مصدكه دخيلك ياربي يعني هساع انا بحقيقه مو بحلم
واكفه كدامو للباب ساعه اروح شمال ساعه يمين
وانا اسمعو جوابو ل بابا وهو يكول
البنت بنتكم بس لازم ناخذ موافقتها ونبلغ عمامها ونردلكم الخبر

هينا هجست الفرحه زادت أضعاف أضعاف يعني هاي
بدايه الموافقه وراح اكون ب اسمو
ماعرف وين اوكفو من فرحتي

ورى ب شوي راحو وانا طرت فوك عبن الخجل ترسني
وماكدر أوجه ابوي واخواني خجلانه جثير
بعد العشا ابوي صاحني
بدأ يحجي يمهدلي الطريق

وانا اتحكرص بداخلي هساع ابويه غير يحجي
ويخلصني مو صرت ماي كدامه

اخر شي سمعتو كال ال .. ( ها يابه هساع انتِ شنو رأيج موافقه ؟ )

ردت اطير من الفرحه لما المستحى الي انا بيه
جان عليت صوتي وصرخت بكل فرحتي موووووافقه ياااابه

عضيت شفتي وانا اجيت انطق هاي الكلمه بحماس
بس خجلت منو همست والو وانا كلبي يركص
ركص من حماسو كتلو يابه الي تشوفو مناسب سوي
انتَ فصل وانا البس
وانا بداخلي اكول يابه غيرو ما اريد

بعدها طلعت من الغرفه وانا وجهي واج نار
طرت لغرفتي وانا فرحانه
وكعدت اتخيل لو صارت الخطوبه
شنو اسوي وشنو اخطط

ثاني يوم ابوي كال راح انطي خبر لعمامج
حتى يكون الهم خبر
ابوي راح الهم وانا بقيت اتصفن
اتذكرت موقف صار ويانه قبل فتره وكلمتو لهساع ببالي ماراحت من كال الي ..

اللهيم : شحلات الشيعي من يعشكَ السنه

دهليز : والعباس انا احبك لهيمي

بوقتها ضحك ضحكه طوليه واردف بفرحه

اللهيم : اوووف بويه كزكزت دخيلك يا ابو فاضل

دهليز : رجعت من ذاكرتي ع دخول ابويه
وهو عافس وجهو ماعرفت شنو الي بي بس كال راح يجون اخواني بعد شوي

ماعلقت شي ولا فكرت بشي انا بفرحتي هساع وماريد
اي شي يعكر مزاجي
ورى ساعه اجوي عمامي و كم ولد من ولد عمي وياهم
دخلو صارو يتناقشون واصواتهم عاديه ورى فتره
علت اصواتهم كلنا فزعنا شصاير
ركضنا نريد نعرف شنو الي صار
بس فجأة وكفت بخوف ورعب
والدم جمد بجسمي رعشه صابت جسمي
وانا اسمع الكلام الي دار
وصار بترس اذني

_ بنت عمي انا رايدها وماتروح الغريب واذا راحت أنا أنهي عليها ...

___________♡_________

ريفان : بعد سفر رهبار حسيت ب الايام تمشي بطيء
وما سعفتني ابد
صح هو يتواصل وياي
بس احس البعد حيل اذاني
ماكدر اتحمل بعده عني وكل ما يتصل
ابجي واكله ارجع وهو يضحك عليه
يكلي هيج تحبيني ولج وانا ازعل منه وهو يكعد يصالح بيه
بس وين انا و هو وين ادمرت ببعده وما الي بالدنيا
نفس

كملت شغل البيت وصار اليل وكل عاده
اتصل عليه وانا مجهزه نفسي اكيد
حتى اسهر ويا بس هو مايقبل ابقى لنص اليل
يكول تتعودين ومو زين عليج

من شفت اسمه ع الجهاز رف كلبي
سحبت الجهاز وفتحته وسحبت الكوشه
خليتها ب حضني
هسمت بفرحه

_ الو

_ هلا بالصوت الحلو هلا يابعد الروح

_ همست بخجل ، شلونك ؟

_ اخخ زين صرت بعد ما سمعت هل صوت الحلو

_ غهباغ

_ روحه

_ شوكت تجي

_ ليش ؟ همس ببحه حلوه هادئه

_ اشتاقيتلك هواي

_ جا انا شكول ميت شوك الج

_ مممم زين

_ وج بويه ارحمي بحالي لا تتنعوصين عليه

_ ياا هسه انا وين متنعوصه شبيك

_ لا سلامتج ابد مامتنعوصه،  اخ لو بس اكضج

_ همست بهدوء ، شتسوي ؟

_ رد بنفس الهمس ، اسوي سوايه تحجي بيها العرب كلها

_ رمشت بعيوني ، شنو هي ؟

_ رجع بنفس الهمس ، من اجي اعلمج شنو هي

_ ليش مو هسه

_ اخ ربي ويه فهاوتج راح تجيب اجلي
شتردين اعلمج عبر الأقمار الصناعية لو عبر
الضوء

_ اي شكو بيها علمني هسه وانتَ ع الخط

_ اخ ربي صبرني مو تعلومي يحتاج
تطبيق فعل مو بس قول

_ يعني مثل شنو ؟؟ غيغ تفهمني

_ ولج رفه بطلي ثول مو احبج اكثر

_ رديت ب انزعاج ، أو غهباغ سويتني ثوله

_ وغبيه هم

_ زعلت انا لو تحجي لو اغوح

_ تردين تعرفين شنو اطبق واعلمج؟

_ اي

_ جا اسمعيني

_ تحمست كتله سامعتك

رد بهدوء وبصوت هامس ببحه خشنه وصوت انفاسه مسموع خلاني انسحل من يمي سحل

_ اعلمج شلون أبو***

_ بعده ما مكمل وعطت من يمي ، لااااا غهباغ هاي سوالفك الفسفوغيه ماغيدها ( الفسفوريه ماريدها )

_ طكها بضحكه قويه واردف ، اموت ع خجلج
اكزكز عليه اخ بويه شيجب اليوم الي بالي
واسوي بيج الي بخاطري وازود ..

ريفان : من صار يحجي هيج انا اضرب بريك
وغلق الجهاز لان سوالفه فسفوريه مستهتره
كلها مخجله
نمت وانا الفرحه ماليه كلبي وانتظر رجوعه ع احر من الجمر

بلشت الايام تمر يوم بعد يوم وهم يبلغونه ع حال
ايلان جانوا يراجعون بيها
وبالعمليه مالتها مال القلب

يوم بعد يوم حسيت رهبار ماعرف شبي
متغير وصار ع طول يتهرب وينطي أعذار
من اعاتبه ليش مايتصل
وهو يخلق الف عذر في سبيل ما ازعل ويبرر موقفه
وأنا اسكت أكول يمكن تعبان وحقه

انطونه خبر الباجر راح يرجعون
عاد انا حسيت الدنيا انفتحت بوجهي
كضيت طول اليوم ع طوله. انا اسوي شكو اكله
هو يحبها لفيت كبه انا وماما وغيرها هواي اشياء
سويت جمدتها حتى ثاني يوم اجهزهن اله

صادف بليلتها ما اتصل بيه كلت عادي يمكن
مشغول ب جمع أغراضه عذرته وما حجيت شي
ماريد انكد عليه وانا فرحانه بشوفته

ثاني يوم من الفجر كعدت صليت
ونظفت البيت سويته يلمع لمع
خليت الغده ع النار وجهزته كل هذا والحماس
يقرأ ملايين

كملت كل شي وانا انتظر الدقايق تمشي
واحسها حيل بطيئه ..

واكفه اروح وأرجع دكات ڪَلبـَـʊ̤ احسهن
ديزيدن أكثر وأكثر شعور الفرح وصل لاقصى حد
ماعرف شنو اسوي ولا شنو أكول بس يكفي
هذا الاحساس الي جاي أحس بي بداخلي
اعرف صغيره ع هاي المشاعر
بس موو بيدي غلبتني وخلتني عايشتها غصب عني
الشعور ماممكن نسيطر عليه ڪَلبـَـنا هوَ المتحكم الاساسي اله هوَ ليفرض شنو يصير وشنو ميصير
وهسه هوَ حكم عليه وخلى حتى عقلي يستجاب اله
سحبني لهذا الطريق غصب ، اراده سحبني ..

واكفه اكل اظافيري من التوتر والحماس
ولفرحه العارمه مقتحمتني اليوم يجي وراح اكحل عيوني بشوفته صارله فتره بعيد ومشايفته احس بفراشات بداخلي يطيرن هذا الشعور يصير بكُل مره يكون يمي او كدامي وهسه الاشتياق اكثر واكثر

سمعت صوت السياره يعني وصلو ركضت واني اوكف بلباب انتظرهم يدخلون
احس دكات ڪَلبـَـʊ̤ زادن احس حتى الجيران راح يسمعوها وانفضح لضحكه شاكه حلكي
شوي ونفتح الباب ..

ابتسمت بفرح واني اشوفهم يدخلون ضحكت تقدمت ردت أسلم وكلني فرح بس توقفت مستغربه واني اشوف بنت دخلت وراهم وهيَ لضحكه ع شفايفها استغربت وحسيت بڪَلبـَـʊ̤ صارت بي نغزات ماعرف ليش

تجاهلت هذا الاحساس واني ابلع بريكي يمكن اني مفتهمه خطأ اي اي مفتهمه خطأ ابتسمت بخفه وسلمت عليهم بهدوء بعدها أردفت متسائله ..

ريفان : منو هاي ؟!

حسيت بڪَلبـَـʊ̤ رجف من شفت نظراتها اتجاهي
رفعت ايدي خليتها ع ڪَلبـَـʊ̤ واني انتظر الجواب
نهزيت هز واني اسمع جوابها بكُل سهوله وفرح وبكُل برود أردفت ..

فاطمه : زوجــتة .

_____________

للحكايا بقايا ♡

                حسابي الانستا قلبي 🤭🦋