رواية دجن الضليع الفصل العشرون 20 - بقلم رهف علي

نبدأ بذكر الله ﷽💛✨

قلبي التصويت 🦋
متابعه للحساب لُطفاً akyta_98

حِبر بلماي شيلمهن عناويني !؟

_______♡_______

سيلينا : الصوت جان حيل عالي وصاح بصوت
هرج المكان بحيث كلها سكتت
واحنه هم سكتنا نريد نعرف منو هذا وشبي هيج
صاح ااااووووكفوووووووا بطريقه غريبه
وخوفنا بنفس الوقت

كلها خنست ابتلعت ريقي وانا صافنه
فجأه سمعت صوتهم يسألوا ، شكوو ؟؟

هو رد عليهم بصوت قوي وكأن واثق بكلامه
اردف ..

_بنـــــت عـــــمي أريـــــدها وانـــــا ناهـــــي عليـــــها
ما الكـــــم مـــــره يـــــمنا تـــــعذرونا بويـــــه ..

سيلينا : بقيت بس صافنه ما مستوعبه
الي كاله فجأه ضجت الأصوات وتعالت ناس تصيح
وناس تهدي الوضع يريدون يسكتون الشاب الي دخل حامي ويريد بس يتعارك

إلى أن هدأت الضجه وبعدها صار الكلام
والنسوان يمي بس يحجن
هاي تعلي وهاي تكبس
وانا باقيه بصفنتي مصدومه ما اريد اصحى من هذا الحلم اي حتى لو كان حلم بس هذا امل
جديد انضاف الي يعني لو صحيح هذا ابن عمها
ونهى عليها معناتها الخطوبه ما راح أتم

بقيت كاعده وما افهم كلامهم لان مره يصيحون
ومره يسكتون
اخر شي بعد جدال دام ل اكثر من نص ساعه
دخل واحد للمطبخ يصيح...

ييييمه ..

راحت ام العروس تريد تعرف شصار
بعدها رجعت عافسه وجها ومقهوره
تقدمت يمنا واردفت بقهر  ..

ام العروس ، نعتذر منكم الواضح هاي الخطوبه ماراح تصير ابن عمها جاي هسه وناهي ع بنتي

سيلينا : بقيت واكفه ارمش بعيوني معقوله الي دكوله
يعني هسه ماكو خطوبه ولا زواج يعني دابر
هسه هو ما راح الغيري
الضحه وصلت لاذاني
والفرحه ترست كلبي بمجرد ما نطقت هاي الحروف
خلتني اعيش من جديد
كان جنت ميته وهسه رجعت عشت مره ثانيه
احس الكاع ما لازمتني
اريد اطير شعور حيل حلو يجننن رهيب
اول مره تحس بي
شي اريده وماراح الغيري هذا
اكبر شي صار بحياتي أعجز اتخطى مثله

تفركشت الخطبه وطلعنا من البيت
كلها عافسه وجها الا انا فرحانه حيل
صدك مامصدكه وخايفه يطلع حلم
بس الي جاي اشوفه واقع وجاي احس بي
ياربي دخيلك اول مره تضبط وياي شغله
واريدها ما تصير وصدك ما صارت

كل واحد راح البيته واحنه رجعنا البيتنا
بس ما شفت دابر ابد
بس ماما عينها عليه كل شويه
تعاين وتهز براسها اعرفها معناها دكول
لاتتاملين ع هذا الأمل الصغير
لان ما نعرف شنو يصير بعدين
بس ميخالف المهم هو هسه ما متزوج

مرت الايام وحالتي صارت تسوء اكثر من قبل
هذا الأمل نقتل عندي من عاينت هو ما مهتم الي فعلا
وهو اصلا ما شايفني ك زوجه اله
لا الحد هاي الحظه معتبرني البنت الصغيره
الي ما تصلح تكون زوجه اله
حرفيا ادمرت نفسي اكثر واكثر
لهذا ماكدرت اتحمل الوضع خاصه هو هم
مستمر بحياته وكل يوم يشوف وحده شكل حتى
يأسس حياتها وانا حياتي صارت بالحضيض

كالعاده كاعده بغرفتي وانا ابجي
اريد حل لنفسي اريد ارتاح
دابر صار مثل الغيمه السوده الي اقتحمت
حياتي لازمه الجهاز ب ايدي
وكل شوي اعاين ع رقمه لهسه حاظرني

صرخت بصوت عالي وانا اضرب راسي
بقوه بقبضه ايدي

ليشش ميقتنع ليشششش جزعني ليش مايشوفني
كامله ليششش والله احبه وما اتخيل حياتي
بدونه احس لو راح الغيري اموت
ومستحيل اكدر اتخطى هذا الوضع

انا وابجي صابتني حاله اختناق حيل
قويه بحيث حتى النفس ما كدرت اتنفسه
انقطع عني الهوى
وروحي بدأت تنسحب مني
شوي شوي خليت ايدي ع رقبتي اريد بس اتنفس
ماكو حالتي صارت اشبه للغركان ويريد الهوى حتى يعيش

فجأه انفتح الباب وماعرف منو اصلاً يمي
بس اسمع أصوات وذبذبات غير مفهومه
و ضوضاء مُرعبه وكأن روحي طلعت من جسدي
ماعرف بوقتها شنو فكرت بس كل الي اريده
هو الهوى وبسس
وكعت وماعرف شنو صار بس بقيت اصارع
الموت شفته بعيوني
وعجزت اتخطى هذا الموقف حيل صعب عليه

ماعرف منو رفعني وشالني اصلاً
بس بعد فتره حسيت ب شي ينحط ه خشمي
وحلكي وهنااااا كدرت اسحب الهوى ااااااااي
هذا الهوووى كدرت اسحبه
غمضت عيوني وماعرف شنو صار بعد بس كل الي
اعرفه ان روحي ردت الي من جديد ...

بعد مرور فتره من الوقت
كعدت اول ما فتحت عيوني اجه بعيني اضاءة الغرفه
بيضه وريحه ديتول قويه
عرفت بنفسي بالمستشفى بس حيل تعبانه
لتفتت لكيت ماما وبابا واخويه موجودين من شافوني
كعدت اجوي يركضون عليه خايفين
كلش انقهرت من هذا الوضع شسويت بيهم انا
بس الي صار خارج عن سيطرتي
بقوا يسألوني عن صحتي ويببوسون بيه
خطيه كلش قلقين عليه انا من شفتهم هيج بجيت
وهم حاروا شلون يسكتوني

بعد فتره اجه الدكتور وكال تكدرون اطلعوها
بس ماعرف شنو كال البابا لان شكله حيل خايف
رجعنا للبيت وماحجوا شي بالعكس حاولوا
يغيرون الي جو
وكل ما اسألهم شكال الدكتور يردون عليه
ان وكعتي بسبب التعب
وانا هم سكتت بالي كله يم مُلاذي الي شاغل بالي

بس هل مره ما عدت صارت حالتي اسوء بهواي
يوم بعد يوم انهار وعشت بدوامه حيل كبيره
ومرعبه احلام تراودني وانا صاحيه
اتخيل اشياء وانا صاحيه

تعبت من هذا الوضع لهذا صرت ألجأ العالمي الخاص
انا كونته بنفسي صرت ألجأ للعالم الي انسعد
بي واكون مرتاحه اكدر أمارس بي كل الي
احبه وكل الي أسعى اله وانا مو كادره
أخذه بالحقيقيه لهذا عشت بعالم اسمه

عالـــــم دابـــــر الخيالـــــي ..

بحيث صرت أسس حياه بخيالي
ماموجوده بالواقع اصلاً دابر خلاني مجنونه مو
عاقله اي انا من حبيت ، ماحبيت بهدوء وعقل لا حبيت ب جنون ومن كل عقلي

حاروا اهلي بيه كل شي هملت صحتي ، دراستي ، عائلتي كل شي هملته اذا اكعد وياهم اركز دقايق بعدها اسرح بغير عالم
اذا اكعد ادرس ، ادرس لمده دقيقه ويروح بالي
بعالم دابر من أصحى ع الواقع يخيب ضني واتكئب
والوم بنفسي شلون هيج صرت وسويت
احاول ارجع اركز ع عالمي بس يرجع يرجعني لغير عالم

حبيت عالم دابر بحيث حتى كونت علاقه ويا
وانا بخيالي خليته يحبني وانا زاد حبي اله أضعاف
أضعاف وبجنون حتى افرح ويطير عقلي من اعاين هاي الأحداث تصير وياي لكن للأسف كلها مو بالواقع وإنما هذا عقلي الباطني الي يألف هذا
السيناريو ويخليني احلم احلام واقعيه وانا مفتحه عيوني ..

طبعا دابر وكأن ما صار شي ويا رجع طبيعي
يتواصل ويانا ويجي النا ما اهتم لان تفركشت خطوبته هنا تأكدت هو الحد الان ما حب ولا وحده .
وكل الي راد يتقدم الهن لغرض الزواج لا اكثر ولا اقل
يعني مو حب بيها لا فقط راد يكون عائله زوجيه
مثاليه ويأسس حياه طبيعيه وزوجه تلبي طلباته
هذا الي استنتجته من كل الي صار

بس مع ذلك صرت بالهلاك وبالنازل

صرت اختنك ويضيق تنفسي ومرات يغمى عليه
ذبلت وحاروا بيه من مستشفى لمستشفى ثاني
من دكتور ل دكتور ثاني
يسوون تحاليل الي مايطلع بيها شي يعني مو مريضه
جسدياً ابد وإنما داخلي هو المريض

بابا خطيه صار يكَابلني ويكعد يبجي
من يشوف حالتي هيج بالنازل ومابيده اي شي
يسوي يبجي لان مابيده اي حل
واي دكتور نروح اله يكولون مابيها شي

بعمره اتذكر جنت نايمه وتعبانه وحالتي حاله
حسيت الباب نفتح وصوت خطوات تتقدم اتجاهي
عرفته بابا لان صار كل يوم يجي لغرفتي
يطمن عليه يلا يروح هل مره حسيت بي كعد ع السرير
وحط ايده ع شعري يمسح بخفه
انا روحي تلوب عليه من يسوي هيج احسه
صدك مقهور من كل كلبه عليه ويريد يدفع عمره كله حتى ارجع طبيعيه

مسح ع شعري بهدوء وسحب نفس بقوه
لزم ايدي ورفعها حسيت بي باسها وهمس الي ويحه صوته شلعت كلبي من مكانه ..

ابو زياد : مو كافي يا بابا والله وانا اعاين عليج بهاي الحاله ينحني ظهري خاصه ما عرف شنو علتج وشنو مرضج والله ما اعرف انا وليلي كله
الوب عليج اخاف لا يوم اصحى ع خبر سيء
كدام عيني وجاي تذبلين صدكيني روحي تذبل وياج
ما اتحمل كومي بابا كومي ردي اوكفي ع طولج يا بعد طولي ردي سيلي حبيبه ابوها الي تضحك للهوى
هاي الحاله مو الج بعدج صغيره
لاتكسرين ظهري بيج

انـــــتِ غصـــــن ابوهـــــا لاتكـــــسرين غصـــــني بنيتـــــي ..

سيلينا : هنا ماكدرت الزم نفسي فتحت عيوني وبجيت هو عاين عليه سحبني وحضني الصدره
بجيت بتعب وانا روحي رايحه
دومه يكول الي غصن ابوها وانا احبه من يكول الي هذا اللقب احس صدك انا غصن اله هو يطبطب ع ظهري وحاضني بقوه ماتركني الا ان غفيت بحضنه وما حسيت ع نفسي من التعب

كثرت زياراتنا للدكاتره وبكل دكتور نروح اله دابر
يجي ويانه ماعرف شعنده اصلا يجي ويانه وانا
كل حالتي بسببه 
من نطلع من الدكتور يكعدون يشروحون حالتي
وكل واحد يحجي شكل وهو يناشقهم
وانا انطيها وضع الصامت

بس ع الاغلب لان ماعندي اخ كبير لهل سبب
دابر صار بمثابة ابن الأكبر الهم يساعدهم
ويروح ويانا وين ما نروح

ماخلوا لا سيد يعتب علينا ولا دكتور يعتب علينا
كلهم زرناهم وكلهم يكولون لا بيها سحر ولا مريضه

بمره طالعين من الدكتور وهو جان ويانه
وبابا وماما هم ف انا امشي بصف ماما وهو وبابا يمشون كدامنا
هو جان لازم تحاليل مالتي ب ايده
ف ماما كالت بصوت شبه الواضح

ام زياد :  مرضـــــها ويمشي وياهـــــا

انا بقيت ساكته لان فعلا كلامها صحيح
هو كان سمع لان رجع التفت علينا كال وياي ؟
ماما سكتت وهو رجع يحجي ويه بابا
بعدها استمر الوضع يسوء
إلى أن شخصوا حالتي واكالوا
ل اهلي انُ..

بنـــــتكم مريـــــضه نفســـــياً ضروري تعالجـــــوها قبـــــل لا تـــــأذي نفـــــسها ..

لهسه اتذكر اهلي شلون بهت وجهم اول ما كالو الهم هذا الخبر انصعقوا انُ ليش هاي حالتي وشنو سببها
وهم موفرين كل شي الي ما احتاج شي حتى
اتمرض نفسيا وهم ما يعرفون علتي وين بالضبط ...

ابتعدت كل البعد عن دابر كل ما يروح ويانه انا
ما اعاين عليه ولا حتى ابين اله
انا بحاجته ولا كان هوو اذاني
بس بعد ما اكون بغرفه لوحدي انقلب والحال مثل ما هو قبل ..

لولو صارت تجي للبيت تبجي عليه وترجع
هي نجحت وانا رسبت بهاي السنه
وريفان ااخ يا ريفان تبهذلنا بسببها ما أكول غير
بس الله يساعدها الف مره .

اتذكرت مره قبل وفاه خالتي ام دابر
بوقتها احنه رحنا الهم ف دابر جان هستوه طالع
من البيت راح يم جماعته ف العطر باقي عالق بالمكان
ف انا شميت الهوى بقوه واردفت

الله خاله هذا العطر كلش طيب ..

هي ضحكت واردفت ( اي يمه هذا عطر دابر )

انا هنا ماعرف شبيه تخربطت رديت عليها
بضحكه حتى ما اخليهم يشكون وطلبت منها الاسم
هي من اهل الله وما تعرف أي شي
بالأسماء لهذا كالت هذيج الغرفه وروحي اقري الاسم
رحت طايره اول ما دخلت ما كدرت اتأخر سريع شفت العطور وانا اشمهن الا ان لكيته أخذت اله صوره
ورجعت طلعت يمهن بس اتندمت لان ما افتريت بالغرفه مالته هي فرصه وضاعت مني

بوقتها من رجعت اصريت الا اشتري من نفس العطر
وفعلا رحت واشتريت من نفس عطره
بحيث صرت اخلي العطر ع المخده مالتي يلا انام
احسه يمي لهل درجه وصلت بيه
لهل مرحله خبلني وتخبلت ع نفسي ..

رجعت من ذاكرتي ع صوت رساله
استغربت رفعت الجهاز وفتحت الرساله
بقيت فاتحه عيوني واعاين عليها بصدمها
شنوو هاااي  ؟؟؟؟؟

__________♡________

دهليز : دموعي عشره عشره ع خدودي
ماجنت مفكره ب اي شي غير بس شلون اكدر اتخلص منهم شلون ما يتم هذا الزواج
لهذا اول طريقه فكرت بيها هي هاي
وكتلو ..

لهيمي خلينا ننهزم هسااع ...

ما هجست الا صوت صياحوا واصل لآخر دنيا
نهد عليه شلون اكول الو هيج كلام
اردف بعصبيتوا وكلامو القوي

اللهيم : شششششلووون ؟؟؟ لج دهليززز شنو
هذا الكلام الي كلتي هسسسسه ؟؟؟ من كل
عقلج تفكرين تخطين هيج خطوه ؟؟؟

دهليز : بجيت ، حباب بس افهمني ترى راح نروح بيهاا

سحب نفس قوي وهو يحاول يهدي نفسه حتى ما يثور اكثر ويصرخ عليها وهي بهاي الحاله

اللهيم : ولج بويه جاي تسمعين الكلام الي كلتي ؟ انا هيج معلمج تفقدين الأمل وتلجأين لحلول مو معقوله وغبيه بنفس الوقت ليش تردين تخربين
علينا كل هذا الوقت وتخلين الكل يوكف ضدنا
مايصير هذا الحل كلش مو بصالحنا وغبي كلش غبي

دهليز : شهكت ، بسسس !!

اللهيم : اردف بعتب ، بلا بس بلا شي ماتوقعتج هيج ولج ليش

دهليز : صحت بصوتي المتشحرج بالبجي وكتلو ، بسسس انتَ ماتعرف الوضع الي صاااار هساااع
ماااتعرف شنو جاي يصير وشنووو راح يسووون بينااا

اللهيم : اردف بقلق ، شبيج بويه شصاير

دهليز : لههيمي اجووي عمامي هسساع موجودين
وسمعتهم يردون يزوجونا بدال السنه شهر لو شهرين بس حتى يرضى الاستاذ بشار
ويكسر خشمي بعدها يفك نهوتو ويطلكني،  اردفت وانا اشهك بالبجي وبالكوه تتطلع الكلمه ..

هجستوا سكت لدقايق طويله وانا بس ابجي مستمره
إلى أن سمعتوا يكول الي وعرفتوا من صوتو واضح مكسور بس يكابر  ..

اللهيم : ما ياخذج بويه انا موجود شحده ينولج
ولج بويه بطلي بجي راحت روحي ويه كل دمعه منج

دهليز : واذا.. صارت فهمني شنو نسوي خلينا نهرب ااترجااك راح ياخذوني منك وانا اذا اخذوك مني
انتهههي اموووت

اللهيم : سحب نفس بقوه وكأن يريد يخفي غليانه وحركان اعصابه اردف بهدوء يحاول يهديها ..
هم ارجع واكول تفكيرج غبي واكبر خطأ نرتكبه لو طاوعتج ساعتها راح نخسر هوااي وأولهم اهلنا الي
واكفين ويانا وساندينا لهاي الحظه

ولج بويه انا رايد اسويلج عرس تحجي بي كل الديره
رايد اسويلج كل الي بخاطرج واحلامج
وكدام الناس وانا ما خايف من شي
كدام كل شخص عارض وسعى حتى يهدم حياتنا ويفرقنا و اولهم عمامج وبشار
رايد اخلي كل بنيه تتمنى تكون بمكانج
حتى تحس بالاحساس الي ناوي اعيشه الج
مثل الاميرات
ليش تهدمين كل هذا بالهروب ترى هذا مو حل
بالعكس هذا يزيد الوضع سوء

اذا بالبدايه جنا فرحانين بس بعد يوم لو شهر لو سنه
نتندم ويزورنا الحنين والاشتياق الاهلنا وناسنا
وساعتها ما راح نلكه اي واحد واكف ويانه غير بس انا وانتِ نسند بعض ..

دهليز : عجل شنسوي ؟ حجيت بقله حيله وكلامه شبه الي خلاني اقتنع بغبائي وتفكيري المتسرع

اللهيم : جا بويه انا شكلتج مو كلتج ابقى أكرر المحاوله
إلى أن هو يمل ويكول أخذها ما أريدها شلعتوا كلبي حتى وجهكم ما اريد اشوفه ..

دهليز : ضحكت شلون يقلد بشار بكلامه،  صدك من حجيت ويا حسيت براحه

اللهيم : أي هاي الضحكه الي اريد اوصل الها ويتغير مزاجج للاحسن حبيبي..

دهليز : همست ، بس انتَ تكدر تغير مزاجي

اللهيم : وانا بالخدمه كل الوقت تعاي هلا بيج عيوني الج كليبي

دهليز : مرت الايام واستمرت المعاناه هي هي
وما كدرنا نسوي اي شي غير بس اللهيم كثف مجهودو
وبكل مره صار يتردد حتى بشار يفك هل نهوه
بس هذاك اذن من طين وأذن من عجين ما يهجس شي
إلى أن مرت فتره كلش طويله

ونصدمنا بخبر ريفان الي حطمنا كلنا وصرنا
كلش حذرين وياها بس وين انكسرت كسره
كلش قويه الله يساعدها ويساعدنا احنه ال ثلاثه ..

مرت فتره حيل طويله إلى أن انصدمت ب اهلي من كعدوا يقنعون بيه حتى اتزوجوا شهر شهرين ونطلك
وكتها وكفت وكلت الهم بعصبيه وجسمي
كله يرجف رجيف ما صاير ..

والله احرك روحي وما اقبل بي ..

بعدها انتقلنا انا و سيلي واختها ل سيلي
لمدرسه اهليه وريفان لا لان صارت وياها
ظروف اقوه مني ومنها لهذا ما انتقلت ويانه
وبقت متواصله ويه سيلي بس بالبيت ..
هنا صاروا الكل يضغط عليه حتى أوافق
ع بشار واتزوج لان طول هاي السنتين
انا مربوطه بالنهوه
واللهيم طول هاي السنتين هو يدز علينا
ناس تا يفك بشار النهوه ونتزوج
وانا طول هاي السنتين ادمرت بيهن
اللهيم وكيناز يصبرون بيه وهو حالتو مو احسن من حالتي

إلى أن اجه اليوم الي صدك طكت حوصلتي بي
وانفجرت بوجهم بوقت الي
صار الضغط عليه من كل مكان ..
وكفت بوجه اخوتي وصحت بصوت عالي
وانا ارجف وابجي بسببهم يردون يخربون حياتي بهذا الزواج اردف وانا عيوني بعيونهم ..

انـــــا احـــــب اللهيـــــم ومـــــا اتـــــزوج غـــــيرو لو تنـــــطبك الســـــماء ع الارض غـــــيرو ما اخـــــذذذ سمعتـــــووووا ...

__________♡__________

ريفان : بقيت جامده بمكاني وانا اسمع صوت
استبرق عالي تصرخ
حسيت رجليه صاروا ما يعينوني ع الوكفه
لتفتت ع ماما وسألتها

شنو ماما شبيها ليش تصغح؟؟ ( تصرخ )

الحجيه : هزت راسها وهي ما تعرف شنو السبب اردفت ب استغراب ، والله يا يمه ما اعرف

ريفان : اعاين ع عمتي صعدت ركض فوك تريد تروح عليهم وانا بقيت بمكاني خايفه
ماما ماتكدر تصعد بس تصيح من جوه ع رهبار
وديلان هم صعدت ويه امها
اسمع صوتهمم هذيج تصرخ وعمتي ادك بالباب تصيح عليه حتى يفتحه وصوتهم واصل لآخر الدنيا يجيب التايه

اسمها دكول اله ..

فاطمه : وووولك صخام راحت البنت يمه دخيلك عوووفها شجاي تسوي الهاااا

ريفان : هو ما يرد بس استبرق تصيح ساعديني عمه ..
من يمي بجيت اخر شي سمعنا صوت صياحه هز البيت هز

رهبار : رووحي يييمه لا أحد يوكف هنااااا جووووه يلااا

ريفان : عمتي ما سمعت كلامه وبقت ادك بالباب حتى يفتحه الها اخر شي ماعرف شصار بس نزلت عمتي
وهي خايفه ع استبرق
دخلت الغرفتها وايلان نزلوها بنص الحديث ماعرف
شبيها بس هي هم خايفه من صراخ رهبار

بقيت واكفه بمكاني الا ان ماما سحبتني ودخلتني الغرفتها ..

الحجيه : تعاي يمه هناا يمي

ريفان : اردفت بخوف ، ماما شبيها هيج تبجي؟

الحجيه : هزت راسها واردفت ، سوالف كبار ما عليج بيهم تعاي

ريفان : بس ... بس انا خفت

الحجيه : تعاي منين تخافين ولج تعاي شو يمي

ريفان : رحت ركض عليها ارتميت بحضنها وحضنتها
بقوه خايفه لا يصير شي خايفه لا نوب ينزل عليه يضربني مثل ما جاي يضرب استبرق فوك
واضح من عصبيته هسه شكله يخوف
والله اذا اجه عليه انا انتهي بين اديه
اكيد يقضي عليه ويطلع حركه كلبه بيه

بقيت يم ماما طول اليل وانا ما نايمه كل شوي
افز خاف يدخل الغرفه ويسحلني ويخبزني
مثل ما خبز استبرق

ضربت ع راسي حتى ابطل خوف وهمست بيني وبين نفسي
انا شعليه حتى يجي يضغبني شكد
غبيه غيفان

حتى بسبب الخوف الي عشت بي نسيت قهري وحركه كلبي بسببه اول ما رجعت تذكرت زواجه
نملت عيوني دموع ، ما سمحت النفسي ابجي
لو انقهر غمضت عيوني وجبرت نفسي حتى انام
إلى أن فعلا نمت ..

ثاني يوم كعدت الصبح صعدت فوك سريع حتى ما اشوفهم كدامي دخلت الغرفتي وسديت الباب
غسلت و غيرت ملابسي
وكفت شوي سحبت شهيق وزفير بعدها نزلت
اعاين ماكو بعدهم فوك مانازلين
شوي وسمعنا صوت عمتي تصبح عليهم
لتفتت لكيتهم جاي ينزلون من الدرج

من عاينتهم سوا حسيت الغصه صارت ببلعومي
شلون ياربي اذا ابقى بهل حاله كل يوم اموت
ما اتحمل شغلت عندي وضع الصامت
وماحجيت ولا كلمه كعدت بصف ماما حتى نتريك
و الوضع هاىء

زين امس شصار حتى صراخهم واصل لاخر الدنيا ؟؟
اشو هسة الوضع طبيعي ولا كأن صاير شي
استغربت

بقيت ساكته بس انصدمت وانا اعاين ع ادين استبرق
هي لابسه اكمام طويله بس من مدت ايدها تاخذ الكوب
طلع معصم ايدها بس كدمات لون ازرق
بقيت فاتحه حلكي هاي شنوو ؟؟ ليش اديها
هيج يعني أمس ضربهااا وهي عرووووسس !!!!!

بلعت ريقي ماعرف ليش خفت من الوضع
ع الرغم مو يمي الموضوع
بس فكره انُ اعاين شخص يتعنف لا هنا
اخاف

حسيت ع رهبار نظراته عليه بس ردت اوهم نفسي
هذا مجرد وهم لهذا ردت اتأكد من هذا الشي
رفعت راسي وعيني صارت بعينه رجف جسمي
من نظراته يعني توقعي جان صح عيونه عليه
من اول ما كعدنا وما شالههن مني هذا شلون هيج يسوي وكدامهم

كلشش توترت حتى بمكان ما اخلي الكوب
عدل خليته مايل و وكع وكفت سريع
جبت وصله حتى امسحه واسمع عمتي
تحجي عليه ادردم لان وكعته واضح خربت عليهم
فطورهم الحلو الي يسد النفس

هي تحجي فجأه خرسها صوت رهبار
وهو يحجي ببحه خشنه بس كميه الهدوء الي بصوته غريبه ..

رهبار : يمه ما صار شي بلا حجي بدون فائده

ريفان : رفعت راسي لكيته يعاين عليه بهدوء
ويحجي ويه امه زين انا شعليه تعاين عليه غير تعاين ل امك اوو نوب نظراته ماعرف شنو افسرهن
بس كان سرحان بيه هذا الي فهمته من كل الي صار

اصلا انا نفسيتي تعبانه ولكيت هل شغله من الله اجتني لهذا ترخصت منهم وتركتهم

مر اليوم بالهوسه هواي ناس اجوي
تباركوا الهم
وانا اشتغل ع الصامت بس احجي شي تخوني
ادموعي واحير شلون اسكت ..

طلعت برى ردت اشغل الماطور جان ينفتح باب الشارع
بقيت جامده بمكاني لا اخذ ولا انطي
خاصه من صار كدامي رجال يطلع بعمر رهبار
وانا منا لا لابسه شي ع راسي
ولا ملابسي عريضه جنت لابسه
تراكسود وهذا صار كدامي يبووو
حسيت روحي ماعت من الخجل
شلون موقف نحطيت بي
هو خطيه نزل راسه واردف

_ اعتذر منج ما عرف هنا احد موجود

ريفان : ماحجيت شي طكطكت نعالاتي
ونهزمت اريد اختفي من الاحراج وحظي الفكر
الي خله رهبار يطلع من باب الديوانيه وشافني انا و والرجال ورايه جمدت من الخوف
طكني بخزره خلاني اخاف من خيالي
يبووو شيخلصني منه اليوم يلعب بيه طوبه

تقرب عليه سريع لزمني من ايدي وسحبني للجهة الثانيه حتى هذاك ميشوفني بس ايدي حسيتها
راح تنكسر كثر ما ضغط عليها
حتى صوت ما طلعت بقيت ساكته بي ايدي موتتني
جعصها جعص
نزل راسه عليه واردف وهو كاز ع اسنانه بعصبيه..

رهبار : ادخـــــلي جـــــوه وحـــــساابج وياي بعـــــدين

ريفان : يماااا هذا شنو راح يسوي بيه
هو  ترك ايدي وانا طكيتها بركضه
داخل البيت وسديت الباب بش شنو ارجف رجف
كلبي يدك سريع شلون موقف تافه نحطيت بي
بعدني حاطه ايدي ع كلبي وسمعت صوت ايلان

ايلان : ب استغراب ، شبيج ؟؟

ريفان : هزيت راسي بمعنى لا مابيه ورجعت اكمل شغلي بقيت اشتغل وانا ساكته بس افكر شنو راح يسوي بيه معقوله مثل ما سوا بااستبرق ؟

خلص اليوم وصار اليل يلا فك الخطار
كاعدين كلنا سوا وانا تذكرت راح يعاقبني
طفرت اول وحده وكلت الهم تصبحون ع خير وانهزمت شنو ما رايده روحي هو عاين عليه وخزرني
لان عرف جاي انهزم منه
سويت نفسي ما منتبهة عليه وطفرت للغرفه
سديت الباب ورحت بفراشي
شكد حاولت انام بس ماكدرت
بقيت كاعده اشخبط بالدفتر
ماعرف شكد مر من الوقت وانا الغبيه ما قفلت باب
الغرفه ماحسيت الا الباب انفتح ..

ودخل رهبار ..

هنا بقيت جامده بمكاني هسه شلون اهرب منه
مستحيل اكدر الا اخذ العقاب يلا اخلص
بقيت بمكاني وهو صار كدامي ماحسيت الا
فكي صار بين اديه وعيونه بعيوني خازرني
بقوه وصاك ع اسنانه اردف بعصبيه ...

رهبار : شطلعج بررررى ؟؟؟

ريفان : اردفت من بين شفايفي بكلمات متقطعه بسبب ضغطه ع فكي ، ب...بس ردت اشغل .. ال م ماطور

عاط بصوت عالي ...

رهبار : هسسسه من احركج انتِ والماطور احد يلومني لاااا والله محد ادري وين جاااان عقلج من طلعتي بهذا البس وهذا الشعر المحلول لل**** وشاففففج
بهذا الشششكل ووووووين عقلج

ريفان : اذاني بلزمته نزلت دموعي وهمست ، م..ماجنت اعرف راح راح يدخل و..واحد

رهبار : عاط ، اااااااي مو غبيييييييه

ريفان : حباب .. جاي تأذيني

هو انا كلت هيج لو حسيته صار هادىء وعيونه نزلت ع شفايفي حسيته بلع ريقه وطول بنظرته نزل راسه وصار قريب من وجهي مايفصرلنه الا الرمش
انفاسي علت ودكات كلبي زادت اكثر
حسيت راح يسمعهن غمضت عيوني من حسيت بحروره انفاسه صارت بوجهي
بس صوت الباب خلا يفز وانا افز ويا ابتعد عني وطلع

بقيت بمكاني بس ارمش بعيوني من سمعت صوت
استبرق برى رجعت للوعي وبجيت وين جان
عقلي من سمحت المشاعري تجذبني اله وووين
ضرب راسي اكثر من مره الا ان
نمت وانا ما حاسه بنفسي ودموعي ع خدي ..

مرت الايام والحال ع ما هو عليه دائما نسمع صوت
استبرق تبجي فوك وماعرف شنو السبب
ومن اسأل ماما دكول ماعليج منا الها هم زوجين ماندخل بيهم بس فاطمه تبقى تلوب عليهم
وثاني يوم يكونون طبيعين ..
لهذا صرت ما احجي بس اخاف أكثر اتوقع ب اي لحظه
ينزل يضربني مثل ما يضربها ..

رجع التحق وصار يروح للشغل وهنا
بلشت الحرب بيني وبينهن بحيث
صارت مو بس فاطمه لا حتى استبرق اثنينهن صفن بصف واحد وتعاونن عليه
صرت خادمه الهن واذا حاولت افتح حلكي يهددني
يسون الي شي ويخلن رهبار يضربني
لو يذبحني لهل سبب جنت اخاف
وحقي انا بنت وماما ماتكدر الهن خاصه هي اخر فتره حيل تعبت ومابيها حيل بس تواسيني
وتصبر عليه جانت دكول الي دائما هذا الكلام تخليني اطمن وادعي الله يعجل بي حتى ارتاح
جانت دكول الي ..

الحجيه : اصبري يا يمه صدكيني انتِ مظلومه بهاي الدنيا وتاذيتي هواي وتلقبت ب القاب هواي
مالج ذنب بيهن بس صدكيني يا يمه هاي الدنيا اليوم ضدج الباجر راح تصير وياج
اصبري وخلي ملجأج بس الله لا تتكلين ع بني آدم
لان شما يكون هو بني أدم ومايحب احد يكون احسن منه ودائما تجي الحمه من الرجلين
لهذا خلي عينج بعين ربج وتوكلي عليه
وديري بالج توثقين ب احد هاي الدنيا
ماترحم ولا تكونين ضعيفه لان يستغلون اي شخص ضعيف والله يا يمه يعز عليه اكولها الج
بس انا ما دايمه الج انا حاسه يومي قرب
وخايفه عليج من ناس الحرام
خليج قويه واتذكري الله يحبج لان بلاج بهذا البلاء اليكسر الظهر هو جهل هويتج
وراح يجي يوم الي تاخذين جزاء كل هذا التعب
وترتاحين وتعيشين حياه تحلم بيها كل بنت بهاي الدنيا...

ريفان : كلامها شكد ما صعب وقهرني بس بنفس الوقت
خلاني اطمح لهذا اليوم واكون طماعه بي
صرت اتخيل هيج حياتي تكون حلوه
واعيش مرتاحه من حقي ليش شنو فرقي عن باقي البنات الي عايشات حياتي معقوله فرقي لان ماعندي اهل حقيقيين ؟ اي صح هو هذا الفرق

سحبت نفس وزفرته الحاله صارت ماتعجب
استبرق وفاطمه واكفاتلي فد وكفه
من يروح رهبار للدوام هن يسووني خدامه
تصعدني لغرفتها وتخليني انظفها من وصاختها
وهي حيل وصخه بخيث ملابس رهبار
الكاهن مطشرات و وصخات حتى ما تكويهن
اله ، الكه كلاصات جوه السرير
اكوابه جاي ، اغلفه حلويات جانت الغرفه عباره عن مزبله شكد ما هي الغرفه تجننن وحلوه بس هي مخربتها بوصاختها ماتنظف ابد ورهبار من يكون موجود تصير نادره وماكو منها بس من يروح لا تصير العكس
ذلني ذل وخلني حسره عليه اضحك
تبهذلت هواي وماما كسرت ظهري اكثر من تعبت
خاصه هي من تشوفيني هيج تنقهر وتبجي عليه
دكول الي ..

_ شبيجي عليج يا يمه كله صوجي انا ، انا الي طلبت من يامن يتبناج ياريتي ماسويتها ع الاقل يمكن هسه
انتِ ويه عائله تحبج وتصونج ، شنو شفتي مني غير بس الاذيه يايمه اعذريني خايفه دمعتج تجويني

ريفان : بوقتها بجيت بجي ما صاير وانا احضنها ماريدها دكول هيج ماريد اعاين ع الندم بعيونها
هاي ماما الي ربتني الام الي تربي مو الي تولد
بوقتها كلت الها وانا اشهك بالبجي ..

انتِ امي سواء قبل او بعد وبحياتي ما اعتبر وحده غيرج ام الي انا امي انتِ وبس ..

مرت الايام الى ان بيوم سيء كعدت ونزلت الماما
ماعرف ليش حسيت كلبي انقبض
بوقتها ما اهتميت ل اي احد دخلت لغرفتها لكيتها واكعه لا ايد ولا رجل
انفجعت بيها وصرخت التموا علينا ورهبار بوقتها جان
نازل اخذوها وصاروا بيها للمستشفى
بوقتها دكيت ولطمت ماما اكيد بيها شي
ومحد يكول الي تعبت والساعه احسها دهر
نتصل برهبار ومايرد إلى أن انفتح الباب ودخل رهبار وماما مو ويا بس شنو وجها فجأه احس بين عليه
التعب بوقتها عرفت حجم المصيبه الي احنه بيها

ركضت اله وسألته عن حالها ونزل عليه الخبر مثل الصاعقه كال  ادعولها حالتها تعبانه
وراح اخذ فلوس وطلع من البيت وكعت واغمى عليه
احس راح يصير شي مو زين
خايفه كلش خايفه هاي ماما وهي اخر أيامها دائمآ توصي بيه وادير بالي ع نفسي
وكل ما أسألها دكول ماكو شي ماعرفت هي ضامه هيج وكعه تكسر الظهر ..

ثانيه يوم صار الها وهي بالمستشفى كل شوي نتصل لو مايرد لو يرد يكول بعدها
بس صوته حيل تعبان

وبنفس اليوم بالتحديد تاريخ 5_2_2010 الي اعتبره اكثر تاريخ سيء وكسران الظهري من بعد تاريخ وفاه بابا بهذيج الساعه الي اجانه الاتصال
وهدم حياتي كلها بكلمه وحده بس
وحده ودمرني دمار حطمي ونهى حياتي من الأساس
_ شـــــلونها ماما ؟
_ تـــــوفـــــت ...

_________♡________

للحكايا بقايا ♡

          حســـــابي الانـــــستا قـــــلبي 🦋