رواية دجن الضليع الفصل الحادي وثلاثون 31 - بقلم رهف علي

نبدأ بذكر الله ﷽💛✨

متابعه للحساب قلبي akyta_98
للتواصل ع حساب الانستا akyta_98

أمراةَ ينبت على اطراف ظلها الورد .🥀!

_____________________

سيلينا : صرخت بفزع وانا خايفه
بقوه ايده لأمها وضربني ع عيني حسيت عيني انطفت
وصار ينزل منها شي صابني الهلع
ماعرف شنو اسوي الالم موتني وروحي صارت
تفرفح حاطه اديه ع عيني واصرخ صراخ
ولا واحد بيهم اجه وكال هاس شبيها
وهو يصيح عليه بسس اشوووفهاا وانا
ما اقبل اوخر ايدي
ابجي واصيح ياربي الموقف الي صرت بي
ماعرف شلون اوصفه وكل ما احجي بي
ارجع اعيد الالم نفسه
اول مره بحياتي هيج انضرب
انا مره وحده بابا ضربني بسببه بس
مو بهاي الطريقه اما دابر هسه
من ضربني والألم الي حسيت
بي يفوق الخيال
بعدت ايدي وانا اعاين عليها مليانه دم
نوب من شفت الدم صرخت بالزايد
افتر بالغرفه وهو يفتر ورايه
اخر شي عطت بي ، اطلللع بررررررى ،
عافني وطلع
يضربني ويريد يداوويني هذااا شلون
بي وين صااايره

بهاي الحظه كلش كرهته بحيث
حتى روحي كرهتها وانقهرت لان راح وصدكهم
وانا ماصدكني جا وين حبه ؟؟؟
وين احبج وين انتِ مالتي وين انا ما أذيج ؟
اشو من اولها وبعدني ماصارلي هواي
متزوجين وضربني بعد شبقى لغيره !!

بقيت افتر بالغرفه كل شوي اكعد وارجع
اكوم افتر اريد الالم يخف حتى ابعد ايدي عنها واشوفها شلون صارت واعالجها
مرت ساعه كامله اخر شي كعدت تعبت
وحسيت عيني تبنجد يمكن كثر الالم
تخدرت بعدت ايدي عنها بهدوء حتى ما ترجع
توجعني نزلت ايدي وعاينت عليها ب ايدي الثانيه
المفتوحه لكيتها مليانه دم زين هذا الدم منين
اجه جسمي رجف كلت اكيد راح تعمى عيني
ع هذا الدم كمت مشيت بهدوء خايفه لا
ترجع توجعني لهل درجه عبالي المشي بسرعه
يرجع الالم وصلت للمرايا عاينت ع نفسي
وشهكت هااااي شنووو يااربي
ردت ابجي بس تحركني نوب طلعت كلنس مرطب
وامسح الدم الي دائرها واخاف اتقرب منها
مورمه كلش وعيني ما تبين نوب صايره اللوان
وحتى فتحه عيني ما تبين
والدم ينزف منها سحبت نفس وزفرته
هاي وين وصلتي سيلينا شنو بعد راح تشوفين
منهم استغفر الله

وكفت رحت للسرير اريد انام حتى يخف الألم
خليت راسي ع المخده وانا كلش مقهوره
بقيت اعيد الموقف كدامي وكل ما اعيده ابجي انقهر اكثر إلى أن حسيت باب الغرفه انفتح عرفته هوَ
ماسويت شي وبقيت ع نومتي وكعد كدامي بس
انا مغمضه عيوني حسيت
ب ايده ع راسي صار انا عبالك انتلت
سريع بعدت ايده عني وصرخت بي ، وووووخررر
هو بعدها ل ايده وبقى بمكانه ما اتحرك ..

شوي وسمعته يبجي !!!!  انا منا مقهوره
لان ضربني ونوب هسه انقهرت عليه
لان بجه احبه وماردت يصير هذا الشي
بس هو ما سمع مني شيفيد البجي بشنو يفيد
راد يحجي وياي وانا معانده ومنا عيني اذتني بزايد
راد يتقرب ورجعت صرخت بي ..
" اااااطلع من الغرفه ماااا اريد اشوووفك ابد "
هو ما طلع بقة بالغرفه بس اسمع صوت
انفاسه لتفتت للجهه الثانيه وهمست " ماعرف للحيطان الها أذان " ادري بي سمعني
وتقصدت احجي هيج
ورى فتره غفيت وانا ما حست من الألم...

ثاني يوم كعدت لكيت دابر ماكو
يعني طالع للشغل وهل مره مو مثل كل مره
اهتم بي من يطلع خلي يحس بيه شوي
ردت اعدل نفسي كدام للمرايا وانصدمت بشكلها
شلون صاير الزراك طاغي عليها وألوان ثانيه
بحيث خفت منها
بعدت عن المرايا ولبست شالي وطلعت
ماريد اخليهم يلزمون عليه لزمه ها ماتشتغل وتتعيقل علينا لهذا كلت اكمل شغلي وارجع للغرفه
وطز بيهم ..

اول ما طلعت صارت زوجه حمايه كدامي
ابتسمت بشماته وردت..
" روحي نامي مو زين ع عيونج " انا الله شاهد عليه
ما اكرها واحبها بس هي تتصرف هيج وياي
من ذاتها ولا مأذيتها بشي
وبرغم هي صاحبه 5 اطفال وزوجها حالته الماديه مو زينه وشايلتهم ع راسي ودابر هم يصرف عليهم
بس مع هذا ما يقدرون ناكرين للمعروف

هم 5 اخوان ويه دابر يصيرون 6
انا وزوجه حماي
وحمواتي 2 وحده بعمري والثانيه مواليد 99
الصغيره ماتسمع لهذا لازم كل شهر ياخذون من كل اخوانها مبلغ علمودها وعلمود علاجها
يعني كل شهر يدفعون 100 الف
اخو الكبير كالوا اله ادفع خاصه انتَ اكبر واحد بينه
هو اعترض لان جان المبلغ الي يدفعه لازم 150
خاصه مو بس لاخته لا لمسواك البيت
هو من شاف هيج اعترض وعزل اكله وحد
لذلك عاد كلها قطعوا وصاروا يجيبون النفسهم اكل
الا دابر بوقتها حالته الماديه صارت احسن
وبدأ بشغله الجديد لذلك حالته صارت
احسن من إخوانه وتمكن ما قطع مسواك البيت
وبقى مستمر يجيب

بس برغم هذا من يرجع من دوامه ما يلكه غده
لهذاا انا صرت اسوي بس الي واله والبنات حماي الصغار
وكل واحد يلتفت لنفسه انا هم ما مستعده اسوي
لكل هل عائله وما احد يقدر
لهذا بس الي ول دابر اسوي اكل
كل واحد يحير بنفسه احسن
همَ هم صاروا يا يجيبون جاهز يا كل واحد يريد
يطبخ النفسه ..
مشى هذا النظام وكلها مشت عليه ..

بوقتها انا زعلانه من دابر وهو راح زياره
3 ايام ومنا بعدهم ساحبين الاجهزه منه
انا انتهيت لا اكل بقى بالثلاجة الجوه
برغم دابر اشتره مسواك قبل لا يروح
ولا اكدر اتصل ع اهلي حتى يجيبون الي
اكل وهاي حماتي صارت تخبث وياي
بزايد وتخلينا نشتغل وانا منا ضغطي صفر
وماكدر اطلع اشتري ماريد ارجع انضرب ويتشمتون بيه مره ثانيه ولا بيه اطلب منهم لان كلش
مالي نفس بيهم بسس اتهامهم الباطل الي
وبقيت هيج 3 ايام اهس انهلكت تعبت
عبالك عايشه بسجن حتى السجن
اهون منه ع الاقل ينطون اكل مو مثل هذول

اول ما رجع دابر من الزياره دخل للغرفه بوقتها
جنت شامره نفسي ع السرير وحالتي حاله
ضغطي مصفر هو شافني هيج شمر الي بيده
واجه ملهوف عليه شكد جنت زعلانه منه
بس خوفه عليه كسر شوي من هذا الزعل
احس بعيونه دموع
بعدت ايده عني كلته ضغطي مصفر
هوو راح جاب علاج وشربني

دابر : اصبري اجيب الج اكل واجي

سيلينا : هزيت راسي مالي حيل احجي
واعرف هسه الثلاجه فارغه ماحجيت
طلع شوي وسمعت صوته العالي
عرفت لان خلصانه الثلاجه اكل وهم ما جايبين
شي دخل للغرفه عيونه بكصته سحب
سويت السياره وطلع وراها اقل من الساعه
رجع جايب ويا اكل جاهز
غصبني اكل وانا منا جوعانه
صرت اكل والدموع تنزل ماعرف شحسيت
بوقتها انا جنت عايشه بالخير ودائما ادلل ع اهلي
سواء من اتمرض لو من اكل هسه
احس هذا الدلال كله طلع من عيوني
هو من شافني هيج اتخبل
يسألني شبيج وانا بس ابجي غصيت بالأكل

هو بعده عني وسحبني لحضنه
كأن جنت محتاجه هذا الحضن شديت عليه
وبجيت تعبت هاي ماصار سنه وهيج سووه
لو اكثر جان شنو عشت ما اعرف
ما تحملت وحجيت اله كل شي اسمعه يستغفر
ويمسح ع راسي
باسني من راسي وصار يعتذر مني ع كل شي صار
من ضربه من عدم فهمه الي وتسرعه
بعيونه ندم وبصوته حزن عميق
سكتت ما حجيت صارلنا ايام ع هل وضع
وهو تعهد ما يمد ايده عليه ولا حتى يسوي شي
بدون ما يفهم
ومن راح زياره جايب الي هديه وراضاني

بيومها العصر من شاف الوضع هيج
ماعجبه راح اشتره ثلاجه وحطها بالغرفه
وكل شي اشتره اكل ، فواكه ، عصاير ، حتى ماي حط بيها جهزها من كل شي حتى بعد ما يصير
بيه مثل ما صار
انا هم للصراحه ارتاحيت هيج افضل الي
همَ من شافوا اشتره ثلاجه سووه عركه
كشبرها شكدها وصاروا يحجون ع دابر
شلون تمشي وراها لهل درجه وماعرف شنو من
هل حجي بس هو ما اهتم بيهم
وطنشهم بكل مره من يجي يشتري الي
بس مع ذالك ما قطع مصروف البيت
وبكل مره يتسوك الهم مسواك ومواد غذائيه
يعني ماتركهم ولا انا منعته عنهم
هذول اهله  حرام عليه اقطعه عنهم

كعددت من النوم عاينت الساعه ب 12 دابر نايمه
غطيته وكمت اريد اشرب ماي من الثلاجه
فتحتها مابيها ماي مخلص
يعني لازم اطلع اهوو وانا منا كتلني العجز والنوم بعيني
لبست روب سميك فوك ملابسي وخليت
شال ع راسي وطلعت كلت خاف اصادف واحد من حموييني برى
وصلت للمطبخ شربت ماي وردت ارجع
بس سمعت صوت برى ..

تمشيت ع أطراف اصابعي وانا الرعب
يمشي بجسمي بس فضولي موتني اريد
اعرف شكو طلعت برى يم الحديقه وصلت
صرت اطكطك من الخوف
فتحت عيوني ع وسعهن وانا اشوف
الي ديصير كدامي شنو هااي ؟؟؟؟!

____________________

دهليز : صرت زوجتو !!!!!
مامصدكه يعني انا هساع زوجتوووو !!!

كيناز : ضحكت عليها لج ايي زوجو وهساع
كومي يازوجتووو

دهليز : التفتت عليها وانا عيوني مليانه دموع همست الها ، وين ؟؟

كيناز : لج كومي الرجال فضحنا ماتسمعي برى
أديب يكول فضحني كل شوي ويكول اريد مرتي

دهليز : ابتسمت واهجس كلبي راح يطلع من صدري ،
وين وين غير يجي هين

كيناز : دحكوا هاي البطرانه لج يريد ينفرد بيج
عيني يكول أريدها لوحدي مو الكل وياي

دهليز : فد خجلت اووف هذا ع شنو ناوي
ما اعرف وكفت ع طولي ومشيت كلهم صاحوا..

_ وووويييين !!!

كيناز : عيني زوجهااا يريدها لوحدووو..

_ لاااااااا وااااحنه

كيناز : زوجها انا شعليه ..

دهليز : منزله راسي واضحك كلها اعترضت يردون
يدحكون ويجي بنصهم انا اعرفه نوب يفضحنا
كدام الكل ويروي شوكه مثل ماكال
لهذا راد لوحدنا والله انا من هين وخجلانه
عاد شلون اذا صرنا الوحدنا

كيناز : يلا عيني عوفنا الرجال دينتظر

دهليز : سحبتني من ايدي واخذتني المكان بس انا ويا
رادت تفتح الباب وكفتهاا

كيناز : ها شبيج

دهليز : دحكي ، رفعت اديه ترجف ، هاي شبيه انا

كيناز : ول ع كيفج مراح ياكلج

دهليز : عفيه صارلنه اكثر من سنه ما مدحكتوا
هسساع شلون ادخل الو الوحدنا اهجس مو بس
جسمي يرجف حتى بطني مغصتني

كيناز : اششش هاي من اللهفه هساع بس ادحكين الو
تنسين نفسج اختي واعرفج

دهليز : بدون ما اجاوبها فتحت الباب ودفعتني وسدته
اهجس بس دكات كلبي مسموعه هين هدوء قاتل
رفعت راسي ولكيتو واكف وصافن عليه
انا تجمدت بمكاني حييييييل صارلي جثيررر
ما مدحكتلواا بدون خوف
واخيرااا التقيناااا..

⁩ - ماذا لَو نَلتَقي خَلف نَجمةً
بَعيدًا عَن هذا العالَم
أُقَبل عَينيكَ وأُعانِقُكَ للأبَد ؟.‏⁩

دحكتوا شلون اجه يمشي بهدوء
ماتحملت ركضت الو وحضنتوا وهو حضني بقوه
هين فاضت دموعي وصرت اشهك بالبجي
لزمني من وجهي ويبوس بي
عيوني انفسي خدودي شفايفي ماخفى مكان ما باسه
وهو يهمس الي ...

اللهيـــــم : نسمه روحي يابعد خيط النفس كله ..

دهليز : ل..لهيمي ... حبيبي

اللهيم : ابوي انتِ ، روحي ، عمري كله ريت روحي
التعذبت بدل روحج

دهليز : ماينطيني مجال وهو متمسك بيه بكل قوتو
حط راسو برقبتي ويبوس بيه بهدوء ويستنشق
بقوه كأن هساع يلا ردت روحو
وانا بس ابجي مغمضه عيوني دكات كلبي تزيد
ومو حاسه بنفسي
اريد اشبع منو شكد ما اكدر وهو هم
طوق خصري ب ايدو
وسحبني الداخل صدروا
رفعت اديه ومسكته من سترتو
ماريد ابعد عنو ابد هين تمنيت نفسي ميته وانا
اسعد شخص ع هاي الكره الارضيه

اللهيـــــم : اااااخ الله
الف شكر وحمد الك يارب
الف شكر رجعت الي الهوى الي اتنفسه
الف شكر رجعت نسمتي وضوه عيوني
الف شكر من ماقصرت وياي
الف شكر من ما خاب ظني
الف شكر من صارت ب اسمي ومحد عنده شي وياي
الف شكر حبيبتي وروحي رجعت الحضني

دهليز : هاي الدقايق اتمنتها سنين طويله وماتخلص عندي

اللهيـــــم: شو حبيبي شو اشوف عيونج الحلوات

دهليز : يحاول يبعدني عن حضنو وانا تمسكت بي
ما اقبل

اللهيـــــم: ابوي انتِ بس اعاين بعيونج

دهليز : هزيت راسي اله ب لا

اللهيـــــم: مشتاكلج بكد الوجوه المالها داعي بحياتي

دهليز : لهيمي

اللهيـــــم: خيط النفس

دهليز : ماتعوفني بعد

اللهيـــــم: شايفه هذا الموت ؟؟

دهليز : اي

اللهيـــــم: الموت اذا اخذج مني اروح وراج وما افكر
ولو لحظه وحده حتى الموت مايخلصج مني
هاهي ابتليتي بيه وتورطتي بحبي.

دهليز : وانا ابجي ارد عليه ، احلى ورطه بحياتي
ريتههن كلهن مثل هاي الورطه

اللهيـــــم: وهسه ماناويه تخليني اعاين بوجه حبيبتي

دهليز : الله يخليك عوفني مامصدكه الهساع
رايده اصدك خليني بحضنك

اللهيـــــم: الحضن وصاحبه يرحون فدوه الك حبيبي

دهليز : اسم الله علييك لاتحجججي هيج

اللهيـــــم: ههههههه اعصابج نسمتي هاي انا اشش

دهليز : بقيت بحضنه اهجس حتى نعست
ع وكفتنا حتى ما كعدنا كل ذكريات السيئه
اجت ببالي كل شي وكل يوم تعذبت ببعده عني
بجيت ، تدري جثير انا تعذبت ببعدك عني ..

اللهيـــــم : سحب نفس بقوه ، ادري وانا اكثر تعذبت

دهليز : يوميه اصبر نفسي بهذا اليوم تااخلي حياتي تمشي يوميه اكول راح يجي هذا اليوم بسس .
تأخرت هوااي ليش ، نزلت دموعي وانا اتذكر شكد انتظرته وهو ما اجه ولا طلبني

اللهيـــــم: شكلتي النفسج من فكرتي هيج هاا لج بويه
انااا مشتعل بنارني وانتِ زودتيها عليه

دهليز : ااااي كلت بعد مايردني ما يحبني مو لهيمي الاولي تغير من تز....
ماخلاني اكمل بعدني عن حضنه و ب اديه رفع راسي
والتهم شفايفي بين شفايفه
ضعت وراد يغمى عليه اول لمسه حلال بينه
اول مره يبوسني صبرنا ع الحلال وحصلنا
وبعمره ما تقرب مني يخاف الله تاماضيع منو
لا قبل ولا هساع ..
الدنيا افترت بيه لزمتو من سترتو وانا اريد
أعين نفسي تا ما اوكع سندت جسمي عليه
تخردلت وتهت بي هو ما انطاني مجال
لا حتى أعين نفسي ولا حتى اسحب النفس الي ضاع مني
بعد مني وخلى جبينه ع جبيني واحنه نسحب
النفس بقوه
كأن سباق هلكنا سوه
نسحبو للنفس بقوه
لازمني من وجناتي ويهمس الي وانفاسه متقطعه حالته مو احسن من حالتي  ..

اللهيـــــم: لو ما اريدج ماجان تحملت هاي السنه ونص
حتى اجي اطلبج من اهلج
لو ما اريدج ماجان عشت بالمستشفيات وحالتي من سيء للأسوء
لو ما اريدج  ماجان عاركت اهلي لان تزوجتي وهم مالهم ذنب
لو ما اريدج ماجان اخذتج حتى بعد ما انفصلتي
لج بويه لو ما اريد ماجأن تركت العراق واهلي
حتى ما اعاين عرسج وردت ارجع
وانتِ الي وانتِ بحضني وانتِ ومالتي
حلفت الارض الي اخذتج مني ما ارجع الها
الا وانتِ حلالي وبحضني
وهاي انا وفيت بوعدي الج وكتلج لو عندج عشر اطفال
تصيرين زوجتي يعني تصيرين غصبن عن
اليرضى والمايرضى دهليز لل اللهيم
واللهيم الدهليز
هذا الشي مايصير غير واذا القدر فرقنااا
نرجع نلم شملنااا لو بعد سنين طويله
وغصب عنه وهاي هسه انا وياج من بعد فراق سنه
ونص رجعنه سوه ياويل الي يفرقنا
الموت بنفسه ما يفرقنا ...

دهليز : دموعي تنزل وانا اسمعو شيحجي
رديت عليه وانا ابجي ،، ز..زين ليش تركتني طول هل
أشهر وما تقدمت الي..

اللهيـــــم: وعيونج الحلوات موبيدي كالوا الا تتطلع
العده يلا تتقدم الها ومن طلعت ردت اتقدم
كيناز كالت مو هسه لان تعبانه واكيد راح ترفض
بسبب تعبها هي كارهة نفسها مو بس حياتها
هنا انا اشتعلت بناري بكل يوم اريد اجي ومايخلوني
يكلولي بصفتك منو وتروح الها
ردت بس فرصه وحده والله ما الزمج ولا اطخج
بس احجي وياج واطمنج
لان اعرفج هسه بشنو تفكرين
تفكرين انا تركتج وما بحالج دكولين
عندي طفل وبعد ما يريدني
انا هذا عرفت راح تفكرين بي
بس يا ابوي وداعه النفس الي اتنفسه وانتِ بي
انا ما متخلي عنج ولو لحظه وحده لا بتفكيري ولا
بواقعي يا دهليز الهنديه ياا ماكو...

دهليز : اريد اشكروا ع هذا كلامو بس ماعرف شلون بدون ما اهجس رفعت رجلي وبسته من خده وانا خجلانه
ردت ابتعد بس هو طوقو الخصري

اللهيـــــم: مو بهل سهوله تبتعدين انا مشتعله ناري
وحاير شلون اطفيها بدون ما اخوفج مني او اصدمج
مني

دهليز : راد يرجع يتقرب وسمعنه صوت كيناز

كيناز : عيني عرسانه طولتوا هم يلا تاطلعون

دهليز : بعدها ما مخلصه واللهيم عاط بيها

اللهيـــــم: اذا مااارحتي منااا احركج ول انااا شحجييييت قبل شووووي

دهليز : ضحكت ومشت وهو رجع عليه عاقد حاجبو
شبيك ؟

اللهيـــــم: كلت الها طير الطاير ما أريده وهي تعرف
وتعاند تعرفني اضوج

دهليز : عادي شبيك ، هجستو عصب عبن قاطعتوا
عاد هو سحبني من ايدي كعد وكعدني بحضنو ردت ابعد خجلانه منو بس ما قبل
رفع ايدي ولبسني الحلقه وانا صافنه بي
شلون عيونو الحلوه تعاين بتركيز عليه
يلبسني بالذهب وانا صافنه بي وهو مارفع راسو
يعرفني صافنه بي وما يدحك بوجهي
اهجس ضجت
ندستو من كتفوو ، الوووو
مايرد ، رجعت ندستوو، ول ياااابه ااالو شنو
ماتسمع والله هساع اعضك
هم مارد عليه بطرف شفايفو ابتسامه ومايرد
عليه انا هين ما تحملت
نزلت راسي وعضيتو بكل قوتي من رقبتو
وهو عاط بيه بعدت اضحك ..

اللهيـــــم : اااااخ بويه انتِ الي تحارشتي
جاا اتحملي الي يرجالج

دهليز : صار فوكايه وانا بس اضحك
اهجس دخلت بنوبه ضحك
صفن بوجهي

اللهيـــــم: احبج

دهليز : همست، شكد تحبني وليش

اللهيـــــم: الحب مانعرف شكثر ولو عرفنه
اساساً انا ما اعرف شكثر بس الي اعرفه
اموت لو صار الج شي تعرفين شي يعني اموت
يعني اتخلى عن كل هاي الدينا حتى الاكيج
بعالم الثاني
اما اذا تسأليني ليش حبيتج، اذا عرفت ليش حبيتج معناها بعمري كله ما حبيتج
لان ياحبيبتي الحب ما اله سبب
طب فشش فجأة تلكين نفسج واكعه بالحب
ماتعرفين يمتى وليش
الحب ما اله قوانين ما اله اي حدود
احنه نرسمهن لو نريد
ولا تسأليني ليش حبيتني لان انا بنفسي
ما أعرف ليش ولا راح اعرف ...
وهسه يامحفوظه البكه والسلامه بشنو صافنه
الحلوه

دهليز : بخلوتي الزرقاء ..

اللهيـــــم: الله يلعن الشيطان شلون يوازيني

دهليز : بعد عني وعدل نفسو وكف وهو يدحك بيه
رجع عليه يعدل بيه ويضحك وانا مثل الفاهيه
ادحك بوجهو

اللهيـــــم: والله ماريد اروح هسه ودي اخذج

دهليز : حبيبي اتخرج بعدها نتزوج وانا هم اريد ارجع
ادرس لو ما تخليني 

اللهيـــــم: شلووون شلووون ما اتحمل احسبي حسابج هل شهر نتزوج وبعدين شلون ما اخليج تتدرسين بعيوني اخليج مو بس ارجعج للدراسه

دهليز : ياروحي انتَ سوي الي تريده مايفرق عندي المهم انا وانتَ سوه ، هساع انتَ شنو قررت الدراستك تكمل هين مو ؟ عبن انا سمعتك تركت

اللهيـــــم:  ول يابه فديت الي تفكر بينه ، ااخ لولو وربي كرهت كراستي وحياتي نقلب وكلشي تركت وراي حتى الدراسه

دهليز : لا فدوه ارجع للدراسه

اللهيـــــم: ان شاء الله حبيبي يلا تعاي هاي اختج
خبصتنه خبص

دهليز : ضحكت عليه هو كال هيج وهم ما طلع وهم تاركينه ع راحتنا يعرفون بينا
رجعت أخذنا صور يلا فتح الباب
صارت بوجهنا كيناز وماما وامو
يضحكن

كيناز : واخيرااا

اللهيـــــم: هاا خير قاطعه الحظات السعيده شتردين

كيناز : اريد اختي

اللهيـــــم: شو اسكتي ، اكول عمه ..

ام عمر : كول يمه

اللهيـــــم: هسه هي مو صارت مرتي لو انا غلطان

ام عمر : اي يمه

اللهيـــــم: جا هاهي ماعندكم شي يمهم انا هسه
ماخذها وطالع شتسوون بيها بعد اشو
زوجتي و باسمي ..

دهليز : كلها صارت تضحك عليه شكلو جثير
فرحان وانا صرت هلكدوتني كدامهم نوب
حاطني جوه ذراعوا
وما يستحي اووف ماطلع الا بعد ما دفعوا دفع
انتهت الحفله والتعب اهجسوا عسل ع كلبي
ما همني عبن فرحتي اكبر
دخلوا اخوتي وابوي باركولي
من بعد ما غيرت ومسحت كل الي بوجهي عبن
أخجل كدامهم البس هيج
لبس ومكياج

من بعد هذا التعب كعدت ع السرير
وابني بحضني نايم
انفتح الباب ودخلت ماما ، ها ماما ..

ام عمر : يمه انتِ تعبانه جيبي ابنج يمي ينام

دهليز : لا حبيبتي ماعندي شي ولا تعبانه نامي انتِ وارتاحي

ام عمر : الله يريح كلبج ع طول وينطيج السعاده

دهليز : حبيبيتي ماما بوستها وهي انطتني جهازها
عبن اللهيم موصيها
راد يجيب الجهاز جديد الي بس ناسي بالبيت
من فرحتو وهساع مايريد يفوت
الفرحه الي صارت اليوم وهو ما متصل ..
والله انتظرتوا دقايق واتصل
فتحت الخط وانا فرحانه ...
شلون يعني اليوم ماناوي تتركني لهيمي
واضح اليوم للصبح..

فجأه اجاني صوتو يصيح ويغلط
ومعصب فد مره انخطف لوني وانا
روحي رايحه اول مره اسمع حسوا
يتصايح بهاي الطريقه ويغلط
ل...لهيمي ش..بيك ؟!!! ...
انصدمت اكثر بكلامو ، لاااا

___________________

ريفان
الظرف من يوصلك مو كلشي گايل
البچي ، الرجفة و النومة بلا زاد
هذني شلون احطهن بالرسايل ؟!

اعاين ع الرساله وانا ناار وجت بصدري
عيوني انملت بالدموع
رجفه جسمي وقهرت كلبي ما اتخطاهن
بحياتي كلها
صرت اتنفس بقوه وانا اقره كل حرف موجود
بالرساله ..

رهبـــــار : هاي المره الثانيه الي تفشليني كدام روحي
بس هل مره مو بس فشلتيني لا هل مره
كسرتيني ، لاتتوقعين امررهها مرور الكرام
لو يمر دهر انتِ الي وتبقين الي ..

ريفان : دموعي صارت تنزل بسرعه
اريد اسيطر ع نفسي بس ماكدرت
الواضح هو كلش مقهور بسبب تصرفي
وشكلي كسرته واذيته هواي
بس هو هسه جرب احساسي من اجه هو وزوجته
بي انا من سويت هيج
مو حتى ارد اله الفعل لا والله بس ردت ارتاح
ردت اخلص من هذا التعب والقهر ما ردت
اجرحه او اذذي انا رهبار عندي يختلف غير
عن الكل ما انسى اي شي سوه الي
هو احتواني بوقت الي ماكو احد الي
وصار الكل بالكل لهذا معزته عندي تسوه الكل ..
رديت عليه حتى احسسه مثل ما هو
كسرني انا كسرته حتى يبتعد ويحاول ينساني ..

" انتَ الي كسرت رفتك بيوم الي تزوجت واجيت
انتَ وياها وصدمتني بيها حس بالي حسيته انا "

حذفت كل شي يخصه وحظرته ماريد اي
شي يبقى منه لا رساله لا مكالمه لا اي شي
ايدي ترجف وانا احذف صح ما انطاني
كلبي بالبدايه بس احسسن حتى انسى
ويروح من حيااتي وما يتعرض الي
مره ثااانيه ...

رجعت شمرت الجهاز ع الميز وكعدت ع السرير
هستوني كعدت وانفتح الباب وانا بعدني ابجي
واشهك بالبجي زين هسه شلون راح ابرر
اله واكول اله ع شنو ابجي
اجه مخطوف لونه وخايفه عليه يسألني ..

تُليد : شبيج حبيبتي ليش كل هذا البجي فهميني

ريفان : هزيت راسي وانا اسكت بنفسي ، مابيه شي لاتخاف

تُليد : شلووون مابيج شي لاتخبليني كولي

ريفان : نزلت راسي ، بجيت ع ماما لان مو وياي هي بهذا اليوم ..
كعد بصفي ولزم اديه وهو يحجي وياي بحنان
يحاول يخفف عليه حزني حتى ما انقهر اكثر وابطل
بجي

تُليد : تبجين واني وياج؟ امج راحت الدار حقها
الله يرحمها تعبت اني دكتور واعرف شلون تعبت من عرفت سبب وفاتها لو باقيه جان تعذبت
انتِ تريدين تتعذب ؟ شفتي حتى انتِ
ماتريدن تتعذب خاصه انتِ تحبيها
الله هو الي انطانه هاي الامانه ولابد لكل
شخص يسلمها بالوقت الي مكتوب اله
لا اني ولا انتِ ولا اي بشر بهاي الدنيا اله الحق
بروحه ولا يعلم شوكت يتوفى مو بس احنه
لا حتى الأنبياء شفتي توفوا حالهم من حال البشر
لان هم بشر مثلنا
حتى الرسول محمد( صل الله عليه وآله وسلم )
شفتي ماكو احد يبقى
لهذا ياحبيبتي هم السابقون ونحنُ اللاحقون
خلي عندج قوه الإيمان بالله..

ريفان : شكد خجلت من نفسي وانا اسمعه يحجي
بهاي الطريقه صعبت عليه وحسيت بنفسي
كلش حقيره منا وعدت نفسي رهبار صفحه وانطوت من حياتي انا هسه بنت اليوم حياتي الي مضت انتهت
ما اذكر منها الا كل الخير سواء من رهبار لماما لبابا
الله يرحمهم حتى فاطمه وايلان واستبرق
مراح اذكر اي سوء الهم مسلمتهم بيد الله
هو ياخذ حقي منهم
اما تُليد هو حياتي القادمه ولازم اكون كد هاي الحياه
الي منحها الي الله واكون عادله وما اخونه حتى بفكري
ابتسمت بوجهة ورديت عليه ..

تعرف طغيقه ( طريقه ) كلامك كلش حلوه
وانا حسيت بالغاحه( بالراحه ) حتى تقبلت
الموضوع وغضيت ( رضيت ) بحكم الله
فعلا اليوم هم الباجغ احنه
لهذا ما لازم اعتغض ع حكم الله
الحمد الله ع كل حال

تُليد : عفيه بزوجتي الحلوه وهسه شنو ما ناويه
دكومين بعد هذا الكلام حتى تغيرين لبسج وترتاحين ؟

ريفان: انمغصت بطني من تذكرت ورايه شي اكبر
مني وانُ هو راح يتقرب مني
ياربي فدواتك ساعدني وخليني اجتاز هذا اليوم حتى ارتاح
وكفت ورحت للحمام
دخلت وقفلت الباب شكد مابيدي طولت بس
هو عنده طوله خلك مو طبيعيه
ماكدرت أطول اكثر بالحمام لهذا
طلعت وانا كاتلني الخجل
هو ابتسم بوجهي

تُليد : بالعافيه حبيبي يلا روحي كعدي لبين ما اسبح
واجيج جسمي متكسر وحتاج انشاط

ريفان : بلعت العافيه بسبب كلامه ابتسمت اله مجامله
ورحت طلعت من الغرفه وكعدت بالصاله
هو سويت كبير مو صغير
كعدت ارجف كدامي الاكل هو شوي وطلع
اجه ينشف بشعره ويحجي وياي ويضحك ، بالعافيه..

تُليد : الله يعافيج عمري ، يلا خلينا ناكل

ريفان : امم ، اي
كعدنا ناكل وهو كدامي اكل بهدوء وبطني صارت توجعني احاول اكون طبيعيه بس ماكدر واضحه رجفه جسمي وهو يحاول يلطف الجو

تُليد : يلا عيوني هاج هاي اكلي سندي كلبج اليوم تعبتي هواي نوب توكعين عليه

ريفان : ماغيد والله شبعت

تُليد : ع الاقل بس هاي يلا ريفان

ريفان : اخذت قطعه البيتزا واكلتها صح طيبه وهو مامقصر طالب هواي شغلات مشاوي بيتزا
صاج ع مقبلات ع مشروبات وحبشكلات كلها
بس ما الي نفس للأكل..
هو خلص سحب ايدي ودخلنا للغرفه هنااا
حسيت بالخطر ودق ناقوص الخطر براسي
ماكدرت اعارضه ولا اسوي اي شي
كعدني ع السرير بهدوء وهو بصفي
صار ينطق بحقي كلمات غزليه
يحاول يهديني بيهن ويخفف عني التوتر
بس انا ماعرف شبيه صرت ارجف خوف
رجفت قبضت ايدي بقوه حتى ما اعترض ولا اسوي
اي شي ضده ولا امنعه لان هذا حقه
وماريد امنعه من حقه ..

تُليد : اهدي حبيبي اهدي عمري مستحيل
ااذيج انتِ حبيبتي حبيبتي اني شكثر جنتِ ببالي
ودخلتي براسي من اول يوم شفتج
وهاي صرتي من قسمتي الحمد الله

ريفان : حسيت ايده صارت اجرىء هنا ما كدرت
اتحمل لهذا شوي دفعته من صدره وانا عيوني مليانه
دموع بس استغربت من حط راسه ع كتفي
وصار يتنفس بقوه وصار يأن انصدمت هذا شبي
ليش هاي حالته معقوله اذيته بس انا دفعته بخفه
مو بقوه خفت متت خوف ..
شبيك ..تُليد عفيه شبيك ليش هيج حالتك ؟
سألته بس هو حط ايده ع صدره وهمس الي بصعوبه..

تُليد : ع...علاجه بالجنطه ج.جيبي

ريفان : بعدته عني بخفه حتى ما أاذي اكثر وركضت
ع الجنطه فتحتها وصرت انفش
بيها اريد العلاج ادور عليه وانا كلبي يدك بسرعه
من شنو يشكي وليش هاي حالته
معقوله مريض وانا ماعندي علم
لو هو حاول يخفي المرض مالته حتى ما اشفق عليه
لكيت العلاج سحبت مي من الثلاجه ورحت اله اركض
لكيته ع نفس حالته
فتحت البطل مال الماي بسرعه ونصه وكع ع الارض
خليت الحبه بحلكه وشربته المي
وهو يتألم انقهرت ع حالته ودمعت عيوني ليش
هيج ماجان بس شي ياربي بس لا يموت اسم الله عليه

بقيت كاعده يمه وانا امسح ع صدره بهدوء
و ع كيفي حتى ما يتأذى وهو مغمض عيونه
وشاد ع ايدي بقوه بس قوته تعادل لزمه الايد العاديه
خارت قوته بوكعته هاي ويحاول يوكف ع طوله
بس مايكدر مرت تقريبا نص ساعه إلى أن حسيته
فتح عيونه وتنفسه صار شوي احسن
عاين بعيوني وهمس الي ب ابتسامه ..

تُليد : خوفتج مو

ريفان : هزيت راسي ، شبيك ؟ ليش هاي حالتك

تُليد : غمض عيونه ب اسف واردف ، انا مريض

ريفان : ب..بشنو ؟

تُليد : بالقلب ..

ريفان : فتحت عيوني مصدومه ، شنوووو

تُليد : انصدمتي حقج

ريفان : اي ، ليش ماكتلي ليش

تُليد : ابتسم ، ماردت اخوج

ريفان : بسس جان كلت حتى ما اأذيك

تُليد : انتِ بالعكس ما اذيتيني بس اني اليوم تعبت هواي وهسه طلع هذا التعب ع حظي

ريفان : زين ليش ما كلت الي

تُليد : ماردت

ريفان : ليش

تُليد : حتى ما تشفقين عليه وتقبلين

ريفان : ليشش هيج حغام هيج تفككغ بيه مستحيل اشفق عليك

تُليد : بعد هو احساس

ريفان : هسه شلون صغت

تٌليد : يعني شوي احسن

ريفان : تعال هنا نام حتى تغتاح ، هو ماكال لا
جان فعلا تعبان ويبتسم حتى ما يخوفني
سندته وخليته ينام عدل
بعدها غطيته هو سريع نام يمكن بدأ مفعول العلاج
انا لتفتت للجهة الثانيه ونمت بطرف السرير وتغطيت
وكعدت افكر
هو ماوكع بسببي بس مع هذا اليوم وخلص بدون
مايقرب الي ونفذت زين الايام الجايه شلون
ماكو اي عذر الج ياريفان المشكله
انا خايفه من هذا التقارب بس اخليها ع الله
ونشوف تاليها وين تصفى

ثاني يوم الصبح كعدنا مم سألته ع صحته
كال زين الحمد الله ارتاحيت
عاد جهزنا اغراضنا وهو حاجز النا شهر عسل
لسوريا وصلنا للمطار وأمه جانت هي وابن عمه
وعمه ينتظرونا هناك حتى هم يودعونا وهم يباركون النا
عمتي اول ما شافته عيونه جانت مليانه دموع
كأن ما مصدكه ابنها اتزوج وكون نفسه
وأسس عائله بحيث حضنته وبجت وهي تبارك اله
وحتى عمه وابن عمه هم نفس الشي
إلى أن تقرب الي وحضنتني شفت بحضنها ماما
بجيت ما تحملت حنيتها وحنانها كلش جنت محتاجتهن
بحياتي وانا حسيت براحه ويه هاي العائله
تمنيت الله يديمهم الي ع طول لان والصراحه
ماتتعوض

كملنا وصعدنا للطياره مر الوقت إلى أن وصلنا
جانت هاي اول مره الي اسافر خارج العراق
لهذا كلش حبيت هذا الشعور
هو سبق وحاجز النا بفندق
ومجهز كل شي لهذا ما تعبنا اخذنا تكسي وسريع وصلنا
للفندق
من التعب بس سبحنا ونمنا ...

ورى فتره كعدت وانا امط بجسمي
انتبهت ع تُليد كاعد ع الكرسي كدام السرير ويعاين عليه خفت شبي هذا هزيت راسي شبيك ؟؟
هو جان صافن عليه وكأن هو بغير عالم عاقد
حاجبه وترني وخوفني

تُليد : عندي شي اريد احجي وياج بي

ريفان : ابتلعت ريقي ، ش..شنو هوَ ؟
انصدمت صدمه حياتي ماتوقعت يصير
هيج شي ابد !!!!!!!!

__________________

للحكايا بقايا ♡

بنات الي دكول جزء ريفان قليل اطلع الها من
الجهاز تمام ؟ لان حرفيا داكتب عنها هواي
وانتو ماتحسون تقرون البارت بثواني
واني اتعب بي ساعات شوي راعوا ...
حتى البارتات داكتبهن طويله قرب ال 5k كلمه
خليكم صريحين البارت طويل 💛

                    حسابي الانستا 🦋