رواية دجن الضليع الفصل الخامس 5 - بقلم رهف علي

نبدأ بذكر الله ﷽💛✨

قبل القراءة مُتابعه للحساب لطفاً akyta_98
تصويتكم + تعليقاتكم الحلوه أشهباتي 🔥

الجُرعه _4_

عَودتني وعَـودتني وتاالي من تالي
تعذب بيه ليش ؟
ذنبي كلة صرت غلطه ونحكمت
بكلمه وحده !
هي هاي عندكم مفرده وحكم الايتام ؟!

#بقلمي_رهف_علي💛

♧♧♧♧♧♧♧♧♧

ريفان : ماعرف ليش اتنرفزت من كلاامه
عقدت حاجبي ونترت ايدي منه ومشيت عفته يصيح ورايه

( يااطفله تعالي )

عفته ولا ردت عليه يعني ماعرف شنو راد مني
بس تصرفاته جد ماعرف شبيها
وانا شبيه هيج نفرت منه ماعرف
رحت يم رفل واني دموع بعيوني سألتني شبيج
بس مارديت عليها ولا كلت الها شنو صار

عده اليوم وفات وتكررت حالات التحرش لرفل
اكثر شي صاروو ع طول يتحرشون بيها
لو يسمعوها كلام لو يضحكون عليها
هي تنقهر بعدها ترجع تشتغل
ام رفل ماتعرف بهذا التحرش الي ديصير
ولا حتى مااما متعرف شي

بس الى ان مره صار شي غير الحدث بـ اكمله ..

طالعين كالعاده جاي انبيع بالتقاطعات
ورفل ابتعدت مسافه عني اني التهيت بغير ناس
الى ان الشارع صار فارغ والسيارات قلت
وخلصت البضاعه الي بين ادينه
خلصت لبيدي ولتفتت اريد اروح لرفل بس ما لكيتها
بقيت جامده بمكاني رفل وينهااا !!!

ركضت ع الاطفال الي يشتغلون وياي وسألتهم بس محد عنده علم وينها صرنا اندور عليها
وينها ونصيح انا خفت بوقتها وماعرف شنو اسوي
بس بجيت صرت ابجي وادور عليها
الشوارع ناسها قليله ودنيا الظهر
بعز هذا الحر ركضت وعثرت بحجاره كدامي
و وكعت ع ركبتي صرخت بخوف واني احس بـ ألم صار برجليه

الكاع كلها حجار وحصو اديه تزلغت وصارت تنزف هي وركبتي وانا دموعي تنزل خايفه مالكيت رفل
من جهة ومن جهة ثانيه رجليه واديه تأذن من وكعتي ع الكاع

مشت وهناك جان اسمع صوت الاطفال الباقين يصيحون هااي رفل ركضنا كلنه عليهة
لكيت واحد لازمهة وهي تلوب بين اديه تحاول تبتعد عنه بس هو اقوه منها لازمها ويسحب بيها وهي مفرفحه من البجي وميعوفها
نحنَ شفنا هيج لو ركضنا عليه

شكو شي كدامنه شلنا وشمرنا عليه
حصو حجار كل شي كدامنه حتى اكو شاب بالشارع شافنه هيج اجه يركض هوَ شافنه الامنيه عليه عاف رفل ونهزم وكعت ع الكاع وتبجي

اني ركضت الها و ابجي ع بجيها من شافتني حضنتني بقوه وصارت تهتز جسمها كله يرجف
و اغمى عليها بين اديه حسيت روحي راحت
حسبالي هم راح تروح مثل بابا وما ترجع

صرت اصرخ صارو يشمرون ماي ع وجها الى ان بلشت تصحى اول ما شفتها فتحت عيونها حضنتها وصرت ابجي هي بالكوه كامت لزمت ايدي
وحجت وياي بتعت ..

( امشي ريفان نرجع للبيت هنا وحوش بشريه )

سحبتني ورجعنا للبيت بدون ما تحجي شي ثاني بس جسمها كله يرجف
اول ما وصلنا للبيت شافتها امها ومااما واصرن الا يعرفن شصار عاد انا ما لزمت نفسي وحجيت الهن
كل شي صار قبل وهسه
هن عرفن لو تخبلن صارن يدكن ع راسهه

ام رفل : صخخاااام الصخمج ولج بنتج رادو يعتدون عليها وانتِ مو داااريه شي شكووول لابوج اكله ما عرفت اصون الاماااانه اكله بنتك ماعرفت احافظ عليهااااا شنو اكول هاا اكله انااا مو كفووو
مو كفوووو ادير عائله وانااا اكبر جبااانه اريد افههههممم

رفل : اردفت بتعب ، كافي يمه كافي ترى كلش تعبانه
وماكدر حتى اوكف حبابه اريد انام

ام رفل : تعالي يمه تعالي ، حسبي الله ونعم الوكيل ع الي جان السبب حسبي الله

ريفان : سحبت رفل واخذتها تنومها لان صدك حالتها مو طبيعيه وبس ترجف
وانا ماما سحبتني خلتني اغسل واكل وانام بس هي هم شكلها خايفه عليه كلش

صار العصر كاعدين برى ماما وام رفل وانت بس رفل بعدها نايمه
وجانن يحجن حتى بعد ما نشتغل وخلاص هاي صارلنا تقريبا شهرين راح يصير غ شغلنا وتعرضنا
لتحرش هواي

بعدهن يحجن جان تتطلع عمتي فاطمه ..

فاطمه : خير شبيجن ؟

ام رفل : اسمعي فاطمه انا بنتي بعد مستحيل
تتطلع تشتغل وهاي انا اكولها الج

فاطمه : ليش عيني ؟

ام رفل : انا ما مستعده اخسر بنتي بسبب هذا الشغل
اليوم لو ما لطف الله جان راحت من بين اديه

ريفان : صارت تحجي هواي الا ان اقتنعت بس من دون نفس ومن ماما حجت بسيرتي تكهربت

الحجيه : ريفانه هم بعد ما تتطلع تشتغل

ريفان : هي كالت هيج لو صار صوتها يرج البيت رج
صارت تصيح ( الا تشتغل لا اطردها من البيت واخلي الناس تتصدق عليها وين ما ياخذوها ياخذوها لاتخليني اسوي شي يخليج تحلمين تشوفيها مره ثانيه )

صارت تحجي هواي هواي حجي الا ان سكتت ماما
وخلتها ما تحجي ولا حرف ورضت بالامر الواقع
وما منعتها اشتغل انا بوقتها ما جان عندي موقف
غير بس ردت رفل ما تشتغل لان صدك خفت عليها اليوم شكلها وهي تصرخ ما راح من بالي
لهذا ما اهتميت لنفسي اهتميت بس بيها هي وبس

بهذاك اليوم جان رهبار بالدوام ملتحق وبعده طالب كليه عسكريه يروح 45 يوم ويرجع اسبوع

طلعنا للشغل بوقتها ع شارع دجله نبيع ماي وكلينس
حركه السير قويه وحتى الناس
بيومها صارت تشتري هواي عاد نحن كيفنه وصرنا نجيب بهل بضاعه ونبيع
بوقتها جنت حاطه الماي والكلينس بصفي
وانا واكفه انتظر احد يصيحني حتى اودي اله طلبه

ما حسيت الا ايدي انجرت بقوه ونعتيت من مكاني
شهكت بقوه اثر الجره القويه حتى وكعت ورجعت وكفت خفت لان هذا الشي صدمني واول مره تصير وياي
رفعت راسي اريد اشوف منوو وهناااا انصدمت وانا اشوف ظهره وهو يجرني ورى همست بخوف ورجفه صابتني " غهبااااغ "

حسيت نهايتي قربت بهاي الحظه شلون هسه نزل هذا مو موعد نزوله شلون شافني هناا وهو شلون اجه ع هذا الطريق شلون وشلون
اريد انطق ما اكدر احس لساني تبنج ماعرف شنو اسوي وانا اشوف هاي الحاله والموقف الصعب الكدامي

سحبني بقوه ومشى واني اعثر ورى وارجع اكوم
ايدي حسيتها راح تنكسر لتفتت عليه لو حسيت
غضب الدنيا كله بي
عاين عليه بنظرات لوو جانت سلاح جان بوقتها رماني ومتت خزرني بقوه ضغط ع ايدي ولتفت يكمل طريقه

المسافه بيني وبين السياره مالته طويله وبعيده شششلون شششافني !!!؟
بحيث حركه السير هو موقفها
اصوات السيارات عالي وضجه كلش قويه
ابواق السيارات صارت قويه
كلها تنتظر سياره رهبار تمشي لان صاير بالنص وهو العائق مالتهم

هستونا وصلنا للسياره جان يصير واحد كدامه
رفع ايده وصار يحجي بنتر بوجه رهبار
لو رهبار تخبل

تقرب منه بسرعه وصاح بوجهة ..

رهبار : شبيك لك !!!!!

_ اناا لشبيه لو انتَ الي ماخذ الشارع ليكول شارع ابوك

خزره بقوه واردف

رهبار : هذا الكلام عليه انا ؟؟؟

_ جا ع منوو مادكول الناس كاتلها الحر موكفها بنص الطريق صارلك ساعه

ريفان : ما اشوف الا رهبار ترك ايدي وتقدم صار بوجه الولد ولزمه من ملابسه ونتر بي
وهذاك تخبل صار صياح بينهم والناس التمت
وهم يحاولون يبعدون بينهم
بس وين صار هوسه حيل جبيره
وبس اسمع صوت رهبار اكثر واحد عالي
بيهم و واضح

وانا الخوف اكل روحي اكل
واكفه بمكاني وارجف لابيه اروح اله
ولا بيه اعوفه واكفه بمكاني ودموعي تنزل
ورى وين يلا بعدوهم عن بعض

رجعلي وهوَ خازرني بقوه وصل يمي وجرني
بس شنو حسيته صاير وحش مو بشر
مو رهبار الحنون الي اعرفه
ايدي حسيتها راح تنكسر بيده كثر ما شاد عليها
بقوه

كز ع اسنانه بقوه واردف من بينهن ..

رهبار : شعندددج ما صعدتي لو واكفه تتفرجين ع صخام الوووجه يلا صعدي .. دفعها بالسياره وهوَ
يسد الباب وراها بقوه

ريفان : ماحجيت بقيت ساكته بس رهبه رهيبه
صعد بالسياره شغلها وصار يسوق بسرعه
ماحجه ولا اي شي
ضاغط ع مقود السياره ويتنفس بقوه
عاقد حواجبه كل شويه عيوني تروح عليه
بس من خوفي منه انزل راسي حتى مايشوفني

بس اريد ارجع للبيت حتى احتمي بـ ماما
اعرف راح يصير شي وراح يعاقبني وانا
ما الي ذنب

بعد مده وصلنا للشارع مالتنا اول ما شفت البيت حسيت الإفراج وصل الي
صار يدك ويبقي ايده مايرفعها الا ان فتحو الباب
هو دخل السياره كل هذا وهو ما حاجي اي شي
سدو الباب

اني نزلت من السياره ودخلت اركض ادور ع ماما
وهناك وجان يجي صوته القوي
وهو يصيح بصوت عالي هز البيت هز

رهبار : رررررررريفااااااان

ريفان : جمدت بمكاني نفتح الباب الي كدامي وطلعت ماما مبهوت وجها هي شافتني كدامها لو نصدمت مثلي
ضربت ع وجها وهمست

الحجيه : صخام الصخمج حليمه شبي ولج ليش هيج جاي يصيح ؟؟؟؟؟؟

ريفان : ماكدر احجي من الخوف الي ماكلته هي صفنت شوي بعدها فتحت عيونها ع وسعهن وهمست

الحجيه : شاافج مووو !!!

ريفان : هزيت الها راسي ب اي وبجيت
احس مالي طاقه وميته خوف
شوي وحسيته صار ورايه بقيت ارجف بمكاني
بس ما اكول غير الله يساعدك ريفان ع الي راح يصير

رهبار : تعاااااي لج حيووووانه

الحجيه : وهي خايفه ، شبيك يمه شبيك تصيح هيج شصار

رهبار : انااااااا الي اكول لوو انتِ حججيه

الحجيه : خير يمه شنو تقصد

رهبار : هسسسه تفهميني انتِ وهاي الزفت الي يمج
شعدهااااا برى ولكم راح تخبلوني شعدهااااأا تبيع بررررررى

الحجيه : بسس ب...

رهبار : رفع ايده بوجها وصاح بصوت ، كلمه وحده اذا كلتيها خطأ احسبي ماتعرفيني بعد

ريفان : ماما نزلت راسي وصارت تبجي وتمسح دموعها بالشيله مالتها لوو هو تخبل

ضغط ع ايده بقوه وهو خازرها
رهبار : احجي تردن تجيبن اجلي فهمني شعدها الزفت طالعه بنص الظهريه تبيييع بالتقاطعات فهميني
لا اكلب البيت عليكم
تفهمني لو اخلص روحي واخلكم مني

همست بصوت مكسور وهي تمسح بدموعها
الحجيه : شكلك يمه بس كل الي صار من جوه راس امك هي الي خلتها تشتغل وهي الي طلعتها بلظهاري حتى تشتغل وتعيش بهذا البيت بدون ما تتطردها

ريفان : ماما تحجي مستمره اباوع عيونه شوي ويطلعن من مكانهن صاح بصوت عالي
فزيت من مكاني بسببه

رهبار : شششششششلون !¡!! امي هي السبب هي الي خلتها تشتغل

الحجيه : اي يمه

ريفان : انا خاتله بظهر ماما ماسمعت الا صوتها القوي وهي تتدخل تحجي بكل قوه

فاطمه : شنو عيني شششنوووو تتهميني وكدام ابني وبنص بيتي وكدام عيووووني شلون تتهميني وانا ما الي ذنب فهميني شلون
لا وبكل عين وقحه جايه دكولين انا الي خليت هاي البنت تشتغل برى وتجيبلي فلوسس
ليش بله شناقصني انا

الحجيه : فتحت عيونها ع وسعهن واردفت، انتِ تحجين من كل عقلج ولج فطيمه منو الي شغلها فهميني منووو

فاطمه : انتِ الي شغلتيها وخليتيها تتطلع بالشوارع لان تريدين فلوس انتِ شكو جايه عليه وتتهميني باطل
خير حجيه شكو تشمرين بلاج عليه

رهبار : اردف بصوت قوي ، ولجججججن بسسس غضب الله عليه بسسس كافي
بس كللي تردني اموت هااا واكفات كدامي و وحده تتهم الثانيه بس فهمني
هاي الق*** من مطلعيهة برى بهل دنيا الغبره
علمود جم دينار ما استحيتن هااا

اريد افهم هاي الفلوس ما بعينجن ولج يييمه هاي الفلوس ما كفتجج هااا

فاطمه : ضربت ع صدرها بقوه وصاحت ، عززززه انتِ جاي تتهم امك وتعوف الحجيه هي الي سوتها ولك انا امممك

الحجيه : كولي يا الله ليش هيج
تجذبين ع بختج وكل هذا انتِ سويتي
حتى رفل وبيت مؤمن ما سلم من شرج
وصرت تتطغين عليهن ماكلتي عيب عليه
وكدام ابنج الي صار أطول منج

فاطمه : العيب عليج شكبرج تصيررين وتجذبين مو عليه انااا

رهبار : بسسس ولجن بسسس

ريفان : صار يصيح بصوت عالي ما خلى شي ما شاله وشمره ع الكاع سوا نصين
الأثاث كسره اخر شي هو واكف بصف الباب ضرب ايده
وكسر الجامه الدم مله المكان ملي
صار ينزف بقوه

رهبار : بسسس كولن احجن وحده امي الي جابتني للدنيا وعساها لا جابتني والثانيه الي ربتني
واثنينهن.... ولكم كولو شسوي ششسسسوي
هو الصوج مني انااا مو منجن انا االي غافل ومو داري
بشنو صاير

وانتِ لجج تعاااالي هناااا ..

ريفان : فجأة صاحني لزمت ماما من ورى بملابسها بقوه وصرت ابجي خايفه منه
وهو هرج البيت بصوته

رهبار : مووو جاي اكل ... واكلج تعاااي كدامي حيوااانه

الحجيه : مسحت دموعها ، ابني ع كيفك ضغك صعد شوف ايدك شلون تنزف ع الاقل خلينه نضمدها لايصير بيها شي

رهبار : وعسااااها عساني ميت حتى ترتاحون مني
حتى يبقى البيت الجن وتتصرفن بكيفجن
وانا هنااا طرطور موووو

فاطمه : ولك يييمه ايييدك

رهبار : بسسس عوفو الصخام وانتِ تعااالي

ريفان : طلعت من ورى ماما ومشيت بتجاها
وانا منزله راسي وخايفه منه
الى ان وصلت وصار كدامي
هستوني رفعت راسي وما حسيت الا راسي
انفر للجهة الثانيه
شهكت بصوت عاالي وخليت ايدي ع خدي مصدومه
ثواني يلا استوعبت الصار وصرت اناشغ بالبجي
الكف الي انطى الي يسوا عمري

رهبار : هذا حتى تبطلين تسوين شي وانا ما عندي علم مرررره الثانيه تجين للصخام الي عندج
وتحجين دكولين تعاااال صار هيج وهيج وجاي يجبرني
اشتغل بالمشعووول لوحدي والعالم تتفرج عليه
تعال ياغضب شوووف امك وامي شنو يسسسسون
وانتَ ما تتدري

لاااااااتخلني اتصرررف تصرف ما يعجبجججن
ارجع للبيت ادور الراحه الكه الدنيا مكلوبه
صرت حتى ما اطيق البيت من مشاكلجن
يوميه مشكله يوميه عركه
كافي صغااار انتن صوتجن يوصل لآخر الشارع

ريفان : ماكدرت احجي شي ولا بالي اي شي ولا حتى تبرير كل الي بالي هسه هو رهبار ضربني
رجع عاط بيه

رهبار : بسسسس كافي بجي بس فهميني جااا الي حجيت بي قبل وين رااح عقلج الي نايم بي المطي شوكت يشتغل

ريفان : شهكت ، غهباغ

رهبار : هوَ انتِ هذا الي فااااالحه بي شو اسكتي
اريد اعرف شكوو تشتغلنها عايززات فلوس وانتن بنص الخير هذا الحلال مو بعينجن
هاي البيوت والايجارات معارض السيارات وغيرها خير غاط راسكم شتردووون بعد عايشات بنص العز وعينجن ع الغير ومطلعات هاي الحماره برى
ماخفتن عليهااا لو لهل درجه مسربتااات

احذذذرجن هاي المره بختجن ما اعرف الاساسس منو المره الجايه ما تعدي ع خير وقد احذر من أنذر
وانتِ طلعه من البيت بعد ما تتطلعين من المدرسه للبيت ومن البيت للمدرسه غيرها ماكوو
اصبرلي

ريفان : عافنه وصعد فوك مادكول يصعد عادي
عبالك يصعد وهو يضرب ع الدرجات بقوه
كثر ما صوتهن عالي

فاطمه : ارتاااحيتن صار الي تردنه هو انتن هذا الي تريدنه بس صدكني ما راح تخلصن مني

ريفان : خلتنه بصفنتنه وعافتنه وراحت
استمرت السنه ومشت اروح وارجع البيت ما اروح للي مكان بس ماخلصت من عمتي فاطمه
طالعه طابه تصيح عليه بنت الز** الن** امج *** خلفتجت وشمرتج علينا
واستمرت بهذا الكلام وتضرب بيه شوكت ما تشوفني كدامها
وانا ابقى ساكته

بهاي الفتره رهبار رجع اشتدت عليه وصار يعلمني تصرفات اقوه مايخليني اخطي خطوه الا ما يعلمني عليها حسيت نفسي جندي عنده ويعلمني
ع تصرفاتهم

رهبار اتخرج هو و ولد عمه الاثنين وشدو الهم رتبه
وصار دوام رهبار ببغداد عشر ايام التحاق وعشر ايام نزول ولد عمه واحد ببغداد والثاني بالعمارة
من شاف تعامل فاطمه ويه امه واخته
وشلون كلام تحجي علينا
لزم اخذ امه واخته واخذ الهم بيت واستقروا
خاصه هو خلاص اتخرج وصار دوامه بالعمارة
وهيج كدرن يتخلصن من ضيم فاطمه
وبعد فتره سمعت رفل تزوجت حماها لاختها واستقرت وكالو بعدها نسافر يم اختها هناك بااستراليا
من يكملون ويرتبون وضعهم ..

بقيت بس انا الي بقت تكفخ بيه فاطمه
الشغل شمرته عليه ايلان ماتخليها اشيل حبه وحده من الكاع وماما ماتكدر تحجي لان تهددها بيه
لهذا بقت ماما تصبر بيه ع يوم يجي يوم حلو وتبدي حياه جديده حلوه الي لان مابيدها اي شي
من يجي رهبار تصير أنعم من الحرير ومن يروح
ترجع ع طبعها وياي وتقسى اكثر واكثر

بدت سنه دراسه جديده
وبيومها هستوني داومت
وتفاجأة
بطالبه جديده تقربت عليها وهيَ تحسها مرتبكه وهادئه
وكفت كدامها واردفت .

ريفان : مرحبا انا اسمي ريفان وانتِ شنو اسمج ؟

سيلينا : اسمي سيلينا طالبه نقل جديده هنا

ريفان : رفعت ايدي وخليتها بيدها همست بهدوء وانا ابتسم ، نصير صديقات ؟

سيلينا : هزت راسها بهدوء ، اكيد صديقات ..

♥︎♥︎♥︎♥︎♥︎

_ بابا نحنَ وين رايحين ؟

ابو زياد : لبيتنا الجديد بابا

_ يعني بيتنا ننتقل لبيت غير هذا ؟

ابو زياد : اي بابا بيت غير هذا ، يلا يا ام زياد جهزتو كل غراضكم ماعدهم نقص ناسين شي منا منا ؟

ام زياد : لا عيني كلشي جاهز

ابو زياد : نطلع ؟

ام زياد : اي عيني نطلع

بعد مرور من الوقت وصلو لمنطقه جدديده
نزلو من السياره ونزلو اغراضهم وياهم
دخلو البيت

سيلينا : بابا ومدرستي ؟

ابو زياد : انقلج لغير مدرسه

سيلينا : لاا بابا ليش تنقلني وصديقاتي الي بهاي المدرسه شلون اعوفهن

ابو زياد : حبيبتي تتعلمين وراح يصيرن عندج صديقات جديدات وأكثر هاي المدرسه كلش زينه
وبناتها هم راح تحبيهن

سيلينا : بس اريد مدرستي

ابو زياد : راح تتعلمين عليها وراح تحبيها يا بابا لازم تنطي فرصه قبل لا لاتحكمين ع اي شي
لازم تجربي وتشوفي اذا شفتي زين وحبيتي
هاهي واذا لا وقتها تكدرين تاخذين القرار المناسب الج
وبهاي الحاله يكون ضميرج مرتاح

سيلينا : هزيت راسي اله وانا مبتسمه
تمام بابا الي تشوفه انتِ مناسب اسوي ، احتضنها ، احبك انا كلش هواي

ابو زياد : باسها من خدها ، وانا احبج ياروح ابوج

فرح : بابا وانا

ابو زياد : شلون انا ويه الغيره تعالي بابا ما افرق بين اي واحد بينكم انا احبكم

سيلينا : ثاني يوم كعدتني ماما ورحت غسلت غيرت ملابسي ورجعت الها حتى تسرح شعري
كعدت بين رجليها وصارت وتسرحه الي

ام زياد : ماما مو تضوجين لان مدرسه جديده

سيلينا : لا ماما البارحه بابا حجه وياي وقنعني

ام زياد : عفيه عليج بنتي العاقله يلا كومي اتريكي حتى ما تتأخرين من اول يوم

سيلينا : اكلت شوي وطلعت للمدرسه وصلني بابا
وراح لشغله دخلت اول يوم الي اكيد متخوفه
بنات جدد معلمات جدد واكفه بالساحه الى ان صارو يدخلون الطلاب
الا انا بقيت واكفه

المعلمه : ها ماما ليش باقيه هنا وما دخلتي للصف

سيلينا : ست انا طالبه جديده وما اعرف شي

المعلمه : تعالي اخذج للصف مالتج

سيلينا : اخذتني للصف ودخلتني كعدتني وراحت ورى شوي اجتي طالبه عرفتني ع نفسها وطلبت نصير صديقات صح انا هادئه بس هي عكسي تماماً

ريفان : ليش هيج هادئه تعالي هسه تجي المعلمه كعدي بالرحله

سيلينا : هزيت الها براسي ورحت كعدت بالرحله الي وراها شوي ودخلت المعلمه صارت ترتب بالكعده مالتنه
لان مخربطين
شوي و وصلت يمي ..

المعلمه : كومي بنتي كعدي ويه ريفان

سيلينا : كمت من مكاني وكعدت بصف ريفان
بس هاي البنت ولا تسكت كل شوي وملتفته عليه تحجي وياي الا ان المعلمه صاحت عليها يلا سكتت

ريفان : هسه شلون انتِ كلش هادئه ماتوالميني هيج
بس يلا تصيرين مثلي ، ضحكت ع شكلها شلون تباوع عليه بدا الدرس الثاني ودخلت المعلمه جان يندك الباب

المعلمه : تفضل

- ست هاي طالبه نقل جديده

المعلمه: اليوم شنو سالفه النقل الجديد قبل شوي هم شفت طالبه جديده منقوله لهذا الصف من غير مدرسه
زين هاي الطالبه نقل من غير صف لو من غير مدرسه ؟؟

- لا ست هاي الطالبه نقل من غير مدرسه حتى من غير محافظه

المعلمه : شو دخليها وينها

- تعالي حبيبتي ادخلي

ريفان : ورى شوي دخلت طالبه حلوه وراسها بالأرض مارفعته ماعرف ليش واديها بدين بعض وتضغط عليهن بقوه واحسها متوتره

المعلمه : اهلا حبيبتي ادخلي كعدي ويه هذن البنات

ريفان : زفرت انفاسي ، شنو هاي شو كل الطالبات الهادئات صارن يمي شنو هاااي
سوينا الها مجال وكعدت بصفنه
صرنا 3 طالبات برحله وحده ..

المعلمه : شنو اسمج ومن وين جايه كالو من غير محافظه

- اسمي دهليز من محافظه الانبار ..

المعلمه : اهلا وسهلا حبيبتي

ريفان : لتفتت عليها ، الله اسمج كلش حلو دهليز وانا ريفان وهاي اسمها سيلينا

اردفت ب ابتسامه هادئه

دهليز : اهلا وانا دهليز

ريفان : بلشت تبدي أيامنا عاديه دراسه بدراسه
دهليز وسيلينا حيل هادئات وانا اتعب وياهن احجي
وهن يرد بكلمه لو كلمتين بس بعدها اتغيرت حياتي وياهن

سيلينا : انا كلش ما احب اتقرب من احد وتزعجني الصداقات صديقاتي محددات ونادراً ماتكون
عندي علاقه دهليز هادئه مثلي الا ريفان

اباوع دائما ع ريفان شلون تحاول حتى تخليني صديقتها بكل ما عدها وانا ما أرغب بهذا الشي
الا ان بيوم من الايام صار شي خلاني اتقبلها غصب عني

ريفان : هسه شنو ما ناويات تلعبن وياي

سيلينا : لا

دهليز : وانا هم لا

سيلينا : شكد حاولت رادت بس ما قبلنا عاد هي سوت نفسها زعلانه وعافتنه ونحن بقينا كاعدات بمكانا
ما نحس الا اكو غيم فوك راسنه
رفعت راسي وشفت مجموعه بنات
واكفات وحاطات ايدهن ع خصرهن يردن يكومنه من مكانه ونحنَ عاندنا

الا ان جرنه من شعرنا وصارن يضربن بينه هنَ هواي
ونحنَ يلا اثنين ماكدرنا عليهن
شوي وشفت ريفان اجتي تركض علينا
وصارت تضرب بيهن حتى يبعدن علينه
عاد نحنَ صار عددنا لا بأس بي
وكفنا وصرنا نتعارك وحده تجر شعر الثانيه

دهليز : ولج عوفي شعري شلعتي من جذورو

ريفان : ولجج دهليززز الفاهية ضربيهاااا

دهليز : وانا احاول أجروا الشعري منها بس مو كادره
اووي ولج عوفي شعري ، لزمت جريت شعرها

ريفان : ضحكت بصوت ، اي عفيه ، ورجعت ع شعر هاي العوبه كدامي
اجر بيها وهي تجر بشعري

سيلينا : ورى فتره اجني المعلمات بعدونا عن بعض واخذونا للاداره عاقبونه بيومها
بحيث طلعنا للساحه تلاثتنا شكلنا مخربط
كعدنا ع الكاع وصرنا نضحك ع بعض
وحده تضحك ع الثانيه

ريفان : دهليزز الفاهية

دهليز : عجل انتِ شنوو ريفانه المسعوره

سيلينا : دهليز انا شعري بيد البنت واضحك عليج تصيحين اووي شعري عوفي شلعتي من جذورو
ام جذورو انتِ ساحلتها للهجه سحل

دهليز : يمثبورات انا احب لهجتي وانتن هسع
غصب عنجن تحجن مثلي

ريفان : امشي لج تحلمين

دهليز : بعيوني يولو الا اخليجن تحجن مثلي ما اتسمى دهليز عجل انا احجي انباري وانتن غير لهجه غيرو لهجتجن يولو

ريفان : عقد حاجبي وانا احجي مثلها ، يولو لهجوو

دهليز : ضربتها ع راسها، يولو تقلدين ع لهجتنا
ترى حلوه

ريفان : ضحكت عليها ، لج اشاقه اصلاً حبيتها

سيلينا : وانا بعد حبيتها

دهليز : عجل تحجن مثلي

سيلينا : علمينا

دهليز : بعيوني يمصكوعات

ريفان : ابتسمت ع شكلهن
مديت ايدي وخليتها كدامهن
وهمست ، عجل بهاي المناسبه صديقات ؟؟؟

هنَ حطن اديهن فوك اديه واردفن بضحكه ..

سيلينا ، دهليز : صديقات و للأبد ...

____________________

للحكايا بقايا 🫂🫀

دمتو بخير قلبي ...