رواية دجن الضليع الفصل الأربعون 40 - بقلم رهف علي

نبدأ بذكر الله ﷽💛✨

مُتابعه للحساب قبل القراءة حُب akyta_98
للتواصل ع حساب الانستا akyta_98
لاتنسسسسون التصووويت بنجمه عيوني ♡

أشكو إلى الله ما ألقاه من كلَفٍ
ولَوْعَةٍ أحرَقَتْ نيرانها كبدي !.

_________________

ريفان : تمسكت ب ايده بقوه سحبت نفس
ودخلنا للبيت شي بداخلي يكول الي سويتي
خطأ وشي ثاني يكول الي سويتي صح
صرت لين البينين ماعرف شنو اسوي
ولا اختار بس الي اعرفه رهبار امشي ورى
واني مغمضه بكل مره اجرب واختار شي عكس ارداتي
يصير شي ما متوقع هل مره امشي بفالي والي
كاتبه الله يصير يعني وين اروح لو ما بقيت يمه ؟
وين معقوله ابقى بالشقه الوحدي وبعد كل
الي صار ؟ مستحيل
ويه كل خطوه اخطيها دكات كلبي تزيد
ما تنقص
فتحوا الباب النا ودخلنا عبالك امشي ع كزاز
خايفه لا تتدخل برجلي
لتفت عليه رهبار واردف بضحكه ..

رهبار : شبيج يابوي وجهج مخطوف جا انا مو يمج ولازم ايدج

ريفان : ابتسمت وهزيت راسي ب نفي
اول ما دخلنا صارت بوجهي عمتي فاطمه ، حيييل صارلي هوااي ماشايفتها مامتغيره هي هي
نفس شكلها صح كبرانه بس ما مبين عليها
اخر مره شفتها من طلعت من البيت واني ببدله
عرسي
توقعت راح تعصب او تصرخ شلون اجيت مره ثانيه
لهذا البيت
استغربت لتفتت براسي لرهبار لكيته يعاين عليها بنظرات ما فهمتها وهي تعاين عليه
من شافني ابتسم رجعت نظري عليها تقربت يمي بهدوء
واردفت ..

فاطمه : اهلا بيج

ريفان : من نبره كلامها عرفتها ما طايقتني بالبيت
يعني بعدها نفس الشي ونفس الكره تكرهني
غمضت عيوني ب اسف بعدها فتحتهن ورديت عليها ، اهلا بيج انتِ
هي ما ردت عافتني ومشت
يعني معناها رهبار منطيها خبر بجيتنا لان ما انصدمت
ابد بالعكس شكلها يوحي هي تعرف وما نصدمت
ثواني وطلع ايلان من الغرفه عاينت عليها
من شافتني تقربت يمي بخطوات سريعه
انا ارتديت للخلف وايدي بعدها ب ايد رهبار
توقعت راح تهجم عليه
بس استغربت !!!

تقربت مني بسرعه وحضنتني وهي تبجي !!!!!

ايلان : ووولج شلووونج يا الله شكد مشتاقه الج
ليش هيج اختفيتي فد مره حرام عليج ع الاقل
طمنينه عنج شلون هيج تختفين
يعني انتِ اختي حسيت فقدت روحي من رحتي

ريفان : بقيت فاتحه عيوني مصدومه هاي ايلان نفسها !! لو مغيريها من شوكت هي تحبني وتهتم الي
لا نوب تفتقدني شبيها هاي معقوله !
حتى ما حضنتها بقيت منزله اديه هي ابتعد مني
من حست بصدمتي وكفت كدامي وضحكت ...

ايلان : حقج مصدومه والله ما الومج بس صدك
من خسرتج ورحتي ابتعدتي يلا حسيت بقيمتج
حسيت خسرت اختي والله كلش مشتاقه الج
ريفان..

ريفان : ابتسمت الها بمجامله ومارديت لان جد ما اعرف
بشنو ارد ابد موقفها حيل صدمني عبالك وحده غريبه
عاد رهبار هو ااي قطع هذا الموقف بينه ..

رهبار : خليج هيج وياها لاتسين انتن اخوات
الي يصير بوحده يصير بالثانيه لاتخلن الحقد يدخل
بينجن ويخربجن

ايلان : اردفت بنفي قاطع ، لاااا مستحيل والله يا رهبار
الماضي راح وانا تعلمت منه هواي اشياء
حتى هسه ندمانه ع كل شي سويته بيها
ندمانه بيوم جنت ضدها حسيت بنفسي كلش حقيره
ومن راحت شكت تمنيت ترجع حتى بس اعوضها ع
كل شي صار بيها قبل وكل شي سويته بيها
تمنيت يوم وأحد ترجع بس للاسف اختفت
اكثر من سنتين وانتَ ماتنطينه أخبارها من نسألك
لهذا بقت حسره بكلبي ع ريفان
الحمد الله هسه رجعت وراح اعوضها ع كل شي
صار بيها قبل من يمنه ...

ريفان : بقيت صافنه ومصدومه هاي من صدك
تحجي من كل عقلها احس نفسي ببرنامج الصدمه
حرفيا مصدومه بكميه الكلام الي
كالته حاولت ابين الوضع
طبيعي لهذا ابتسمت بوجها وهزيت راسي بمعنى اي
بس بداخلي تجاها اكو خوف
كلت انتظر واشوف اذا صحيح تعدلت وصارت زينه وياي
معناها كلامها صحيح هي ندمانه واذا بعدها
هي هي معناها الخبيث يبقى خبيث وما يتغير

صعدت اغراضي للغرفه مالتي القديمه
باقيه ع نفس مكانها ما متغير بيها اي شي
استغربت شعجب كلت هسه اكيد فاطمه
حركتها ورايه خليت الجنطه بمكانها وبقيت
كاعده بمكاني ماتحركت بعدني ما متعوده ع الوضع
يعني بلحظه جنت متزوجه وماشيه حياتي طبيعيه ولحظه الثانيه رجعت حياتي النفس الشي قبل
الزواج هل شي صدمه بالنسبه الي
وصابني الخلل حتى بفكري ومشاعري..
تُليد الي تركه بداخلي فراغ حيل كبير
اعترف حياتي صارت فارغه لان مواقفه هواي وياي
ما ينسن وجان حيل حنين عليه
بس بلحظه اختفى كل هذا وانا مو ناكره حتى انسى
كل شي حلو سوه بحياتي
يكفي انتشلني من الدمار الي جنت بي ..

الي زاد استغرابي البيت هادىء
يعني مابي اطفال ، زين رهبار وين أطفاله؟؟؟؟
بقى هل شي يراودني اذا هو صارلها هواي
متزوج اكيد عنده اطفال هسه
ع الاقل واحد زين معقوله انطى أطفاله ل امهم
يعني هسه هم بعيدين عليه شلون كدر يتحمل
يبتعد عنهم كل هذا البعد غريب !
ماكو اب يترك أطفاله ب دوله ثانيه
لازم صاير شي او حاطهم بالحاضنه لان
محد يهتم بيهم

بقيت كاعده بمكاني والأفكار تنهش براسي
اريد اعرف شنو الي صار
الفضول قتلني
ورى ساعه اندك الباب ، اردفت ، تفضل !
انفتح الباب ودخلت ايلان تضحك ..

ايلان: يلا حبيبتي كومي تغدي رهبار دزني عليج مخصوص
ريفان : شكغاً بس ما اشتهي شي ، هي تقدمت سحبتني من ايدي وكومتني
ايلان : اشوو كومي ولج لا تتدللين لازم تكعدين ويانه
يلا عفية كلش فرحانه بجيتج لاتنزعين هل فرحه
ريفان : سكتت ومشيت وياها
نزلت جوه جان رهبار كاعد ع راس الميز مال الطعام وأمه بصفه هو رفع راسه واشر الي بصفه
رحت كعدت بهدوء بدون ما احجي
عاد بدوا ياكلون
ايلان شكد حاولت تنطي وتأخذ وياي بس اني حنت
حديه وياها ع كد السؤال اجاوب وهي مامهتمه تحاول
تكسبني ب اي طريقه
وتحاول تخليني أكون لطيفه وياها
ماعندي شي وياها اني صح الي سوته قبل
شي صعب بس هذا نابع من امها هي الي علمتها ع هذا
الشي لوو ما معلمتها جان اني وياها هسه علاقتنا
اقوه من الأخوات بس بعد صوجها

بعد ما كملنا كلها راحت لغرفتها بقينا بس اني ورهبار
كلت اسأله احسن ..
كمت وكعدت بصفه هو من شافني ابتسم

رهبار : ها بويه مرتاحه
ريفان : اردفت بهمس ، اي
رهبار : عايني بعيوني
ريفان : خليت عيوني بعيونه وهو استرسل بكلامه
رهبار : اي شي يضايقج تعالي الي كولي
لاتكتمين بداخلج صدكيني اطلع حقج من عيون اكبر واحد حتى لو جانت امي انا تهميني انتِ ماريد كائن من يكون يتقرب منج او يضوجج احسبي حساب
هذاك الوقت اكلبه كلاب ع راسه
ارجع واكول كائن من يكون
ريفان : لزمت ايده بقوه وضغطت عليها اردفت وانا الفرحه غامره بداخل صدري ، ماتعغف شلون هذا كلامك يعنيلي كلش كافي عليه من انتَ واكف بظهغي
صدكني هاي تسوه الدنيا عندي وما بيها

رهبار : تقرب منها ، هل شي لاشي كدامج
انتِ يحق الج كل شي بداخلي مشاعري
احساسي حنيتي انفاسي قوتي وصبري
كلبي وروحي وكل شي بداخلي انتِ أحق وحده بيهن
صدكيني جنت ولا زلت وما راح اكون غير بيهن
بس الج

ريفان : انتَ نعمه من الله الي نعمه البنت خسغت الكل بحياتها خسغت عائلتها ومستقبلها انتَ نعمه الي
الله ..

رهبار : انتِ نعمه الله الي اخاف الله بيها

ريفان : قويت نفسي وهمست ، غهباغ
رهبار : عيونه
ريفان : خجلت ، غيتهن سالمات ، عادي أسألك
رهبار : يحق الج بويه
ريفان : اطفالك وين ؟
حسيته صفن بوجهي بعدها اردف ..

رهبار : اي اطفال؟
ريفان : اطفالك من نرجس ..
رهبار : بس انا ماعندي اطفال منهاا

ريفان : الصدمه احتلت عقلي بقيت صافنه وهو ضحك بصوت عالي وتقرب مني انفاسه صارت بوجهي
هو عاين عليه بمكر بعدها اردف ..

رهبار : انـــــا بس الج رفـــــته الكلبي

ريفان : عافني ومشى بقيت جامده بمكاني يعني شنو !!!! يعني رهبار مااااعنده اطفاااال من استبرق
دخيلك ربي دخيلك يعني هو هسسسسه
الوحده يعني اقصد يعني ماعنده اي شي يربطه
بينه وبين طليقته يعني حتى مايرجعون سوه ابد !!!
بلا شعور عضيت ع شفتي من الفرحه
شعور بداخلي ماكدر استوعبه شي بداخلي ماكدر اسيطر عليه اللهفة والفرحه عارمه بداخلي ...
بيومها ماكدرت حتى اتحمل هاي الفرحه
بقيت طول اليوم فرحانه
وماهتميت حتى الفاطمه

مرن كم يوم الوضع هادئ ورهبار شنو اريده يجيبه
الي بحيث قبل لا احجي الشي الكاه كدامي
عيشني اسبوع احلى من حياتي
ب أكملها حنين وياي إلى درجه إلى أقصى حد
اخر يوم اجه عليه وجان واضح ع شكله حيل
مهموم خوفني ..

رهبار : رفه بويه ..

ريفان : عيونها ، ابتسم الي بتعب بعدها اردف وهو يخلي ايده ع ايدي ..

رهبار : جاي تشوفين الأوضاع ف انا لازم التحق

ريفان : فز كلبي من كال التحق الوضع هو كلش يخوف
حتى الاخبار ما اطمن ابد داع١١ مدمر العراق
شلون يروح ، دمعت عيوني ، لا فدوووه وين تغوح ماتشوف شلون صايغه الدنيا بس قتل

رهبار : جا بويه اذا انا مارحت وغيري ما راح منو الي ينقذ هذا الشعب ؟ منو الي يحمي الي انسبو وهم بأرضهم ، لازم اروح ولا تنسين انا منو وأبن منو
ماصير جبان واكعد اتختل بالبيت

ريفان : ضغطت ع ايده واني اتمنى يفهم الي بداخلي
هو سحب راسي الصدره ومسح ع شعر اردف بحنيه

رهبار : اعرف شنو الي بداخلج انا مايفوتني شي
كتلج قبل وارجع اكولها الج هسه انا حافظ كل تفصيله صغيره بيج حافظج حفظ من جدمج الراسج
حتى اقل شعور تحسي انا حاس بي ..

ريفان : بجيت بقله حيله ، خ..خايفه عليك الله يخليك والله اخاف افهمني

رهبار : الي كاتبه الله يصير شمدرينا ما احنه ب بيتنا
ونموت بدون لاطلق ولا قصف
شمدرينا ؟ خلي حملج ع ربج وتوكلي وانا حتى اروح
وبالي مطمن يمج

ريفان : بقيت حضنته بقوه ما أريده يروح احس كلبي
صار يوجعني حاسه هاي روحه ما تبشر بخير
وكف ع طوله كدامي وهسه يلا انتبهت هو لابس
ملابسه العسكريه ومتجهز حالف ذقنه وشعره
ومتعطر هسسه يلا انتبهت ل اناقته حتى وهو
رايح الشغل يهتم ب أدق تفصيله بي
وكفت ع طولي كدامه

رهبار : خاف استشهد ..

ريفان : ما خليته يكمل سريع خليت ايدي ع حلكه واني اهز براسي بمعنى لا وابجي
هو سحب ايدي وباسها من باطنها وابتسم الي
بحب ..

رهبار : هشش ابوي انتِ اسمعيني، خاف استشهد
وما تسمح الي الفرصه اكولها مره ثانيه
كلش تبقى بخاطري لان ماكلتها صدكيني كل يوم وانا ع فراشي اكول خاف اموت وهل بنت باقيه
بخاطري شكد تمنيتج وشكد طلبتج من ربي ومن كل شخص قريب عليه بس القدر مصر يبعدج عني
ماعرف ليش يمكن يريد يعاقبني ع اغلاطي
الي غلطتهن مع هذا انا راضي وحامده وشاكره
ع كل نعمه ينعمها عليه بس هسه انا قبل لا اروح
حاب اكولها الج ..
بس قبلها ، انا امنتج يم الله هو السند الج
ريفان ..

ريفان : هو يحجي وأنا ابجي رديت من بين دموعي ، ها

رهبار : احـــــبج ياهـــــدب عيـــــني ..

ريفان : بقيت ابجي بحركه هو تقرب باسني من راسي
ويسحب نفس بقوه اريد احجي انطق ما اكدر

رهبار : ادعيلنا ، استودعج با الله

ريفان : تركني وراح !!!! انهاريت بالبجي ماكدرت اتحمل ماكدرت ابقى انتظر ركضت ورى اريد
اكول اله اني هم احبه بس ما لكيتها
رجعت خايفه عليه وميته قهر
صرت ادعي اله ولكل الي ويا يرجعون
بالسلامه

زادت الاوضاع سوء وزاد التوتر ، فاطمه ملتهية عني
لان ابنها بخطر ما احتكت بيه
هو موصيها قبل لا يروح وحاجي وياها
الفترات الي نحجي ويا حيل قصير
بحيث لو تعبر الدقيقه لو ماتعبر
من يتصل ع جهاز امه يحجي وياها ويه ايلان
بس اني ما تخليني احجي ويا
وهو يعرف بيها لهذا يتصل ورى ثواني ع
جهازي مايطول دقيقه اسمه صوت
القصف انهبط وهو يسد الجهاز
حتى ما اسمع اعرفه وبعدها تمر اسبوعين واحنه
ماسامعين صوته اموت الف موته
وابقى بس ابجي ع سجاتي وادعي
الله يحفظهم من كل سوء
تعبت واحس روحي غابت ومتت
حرفيا احس الدمار مر ع حياتي وصفيت
لاشي اني اعترف اني بدون رهبار لا شيء

اختفى رهبار شهرين ومانعرف اخبار اي واحد
لاعنه ولا عن ولد عمو همَ اثنينهم هم التحقوا وياه
اخوان رفل هم امهم كعدت ولطمت عليهم
لان اختفوا هم الثلاثه فص ملح وذاب
لا اتصال لا مكالمه لا اي شي يوميه
زوجه عمي ام رفل تجي يمه ( رفل الي اشتغلت وياها بالتقاطعات من جنت صغيره )
من زوجه عمي تجي يمنا نكَلبها مناحه بس نبجي
وندعي يوم ورى يوم إلى أن صارن شهرين
صارت معركه الجسر بالانبار واحنه لازمين
كلوبنا خايفين لا هم بيها
بيومها تركتهن ورحت الغرفتي
ادعي عسى ولعل ربي يستجاب دعاء مني وتكون
أبواب السماء مفتوحه !

كاعده والقلق محاوطني وكفت ع طولي
من سمعت صوت هوسه جوه انفزعت والبسمة
ارتسمت ع شفايفي صرخت ، ااااكيد رجع
اكككيد. نزلت اركض
لكيت زلم هواي برى واكفين واغلبها مسلحه
ولابسين لبس عسكري
الحزن مخيم عليهم تقرب واحد كدام
امه واردف بحزن ..
_ انتِ امه وابنج شهم والنعم منه بطل ويستحق القب بجداره صح الي صار بي ما يستاهله
بس لازم تفرحين اله
_ ش...شتقصد ؟
_ اعتذر ع إبلاغ بس.. الضابط رهبار يامن استشهد هو وأولاد عمه ...

دخلوا أثنين توابيت عليهن العلم العراقي !!
صرخنا مفزوعين ملخنا نفسنا
تقرب علينا نفسه الضابط الي بلغنا بخبر استشهادهم
تقرب من عمتي فاطمه واردف بحزن ..

الضابط : ماكدرنا نحصل جثه الضابط رهبار
اثر الانفجار ... هواي ضحايا راحت وكانوا عباره عن
قطع اجسادهم ماكدرنا ، بس اولاد عمه الضباط كدرنا ناخذ جثثهم لان قريبين ع الموقع
وبلحظتها استشهدوا ، البقاء ل الله الله يرحمهم شهداء وفخر للعراق ..

2016 ...

الايام الي كانت من اتعس ايام تمر ع العراق
وتحديداً بعض المحافظات الي كانت محط
اطماع انذال سلبوا وقتلوا وسبوا نساء واطفال
كبار وصغار رجال ورجال كبار في السن
إلى منهم انظم والي بيهم انقتل بذنب طاهر
والي بيهم هربوا ! تاركين كل شي خلفهم
أرضهم ناسهم طفولتهم تاركين خلفهم محافظتهم وطنهم الصغير الي ساكنين في ..
بسبب طمع وغدر اشخاص لا رحمه تجول في داخلهم
متلبسين قناع الدين و داخلهم عتم
خسارات كبيره لم تحددها الإعلام بصوره صحيحه
هرب ، شرود، تحطيم من دفع ثمنها ؟ الوطن ..

الجو بوقتها كان قارص البروده الأوضاع
متشددين عليها إلى درجه كبيره سوء الأوضاع
والازمه الي اقتحمت العراق كانت بصوره
غريبه مندسين ع خونه ع غدر
الوضع صار كلش صعب نحاول نطوقه وما نخلي
يتعدى الحدود لكن كان أكبر منه
مواجه اشخاص بدون عتاد اكثر منه
بحد ذاتها خساره كبيره
لهذا كان الافضل اما انصر او الشهاده ..

طلعت باكيت الجكاير من جيبي سحبت الجكاره
ورثتها سحبت نفس عميق وصلت النصهاا
بعدها زفرت الدخان وانا اعاين ع الخريطه الي
كدامي الجنود متهابين ومستعدين نفسياا قبل ما يكون
استعدادهم جسدياً صح الخوف
مخيم ع ملامح وجهم لكن اقويااء ظهروا شجاعتهم
قلصت عيوني واردفت ..

_ شلونها المعنويات ؟؟

اردفوا بصوت واحد متمسكين ..

_ عاااال العاااال سيدي

ابتسمت واربتت ع كتف الجندي
فخر العراق انتوا علم وحزام ..

سحبت نفس بعدها اردفت ..

الي راح نواجهم عندهم حيل ومكر وغداع الي اريده
منكم تكونون اقوه منهم واشجع لاتنسون
الي أخذوا منا مو قليل انا وياكم وقبلكم قبل لا أكون
وراكم لو اعرف انطي روحي فداء ولا تتاذون
بدل عني قبل لا أكون قائد الكم انا صديق وأخ اكبر الكم لازم نكون ايد وحده مايهزمناا شي....

اردفوا بصوت واحد .. ماا يهزمنااا شي

هزيت راسي بقول كفو منكم اولاد الملحه..

تجهزوا الكل حتى نكون في اهب الاستعداد
طلبنا وفد ودعم من المحافظات اما من عندنا
طلعت بعض الأصناف منهم بالجيش العراقي وقسم من مكافحه الإرهاب توجهنا للانبار
الأوضاع ماتسر عدوا ولا صديق
رغم بروده الجو بس حراره مشاعرنا ولهفتنا للنصر
كانت أكبر واقوه

دخلنا للانبار وبدأ هناك الوضع يتازم اكثر واكثر
بقينا نطالب بالنصر ع الانذال الحد الشهر ال 6 احنه
بالانبار ماطلعنا منها ولا حتى نزلنا
خلال هل الاشهر ماشايفين لا اهلنا ولا ناسنا
طول فتره الالتحاق جانت الشبكات ضعيفه لو نحصل اتصال لو ما نحصل واذا حصلنا لازم مكان شوي عالي
حتى نكدر نحصل ونتصل ع اهلنا نطمن عليهم ويطمنون عنه
بوقت الي نصعد المكان عالي حتى نحصل ع شبكه
جانت الاشتباكات قويه وأصوات الطلق والقصف
بكل مكان بحيث نتشاهد بس علمود نكدر نتصل
ومرات تجر ايام وتعبر الاسبوع واسبوعين واحنه
مانعرف اي شي عن اهلنا ولا يعرفون اي شي عنه
عايشين ميتين مايعرفون الحد ما نتصل عليهم

صارت المعركه من ضمن الي خضناها
معركه الجسر بين الجيش العراقي وداع١١
راحت ضحايا هواي وخسرنا شباب بعمر الورد
انطينا شهداء بعدهم اول التحاق الهم والي
بعده هسه عريس والبعده جديد ع هذا الشغل
الابطال خسرنا كل يوم نخسر منهم
كل يوم نسلم روح الباريها وهي ملطخه بالدم
ع ايد الانجاس بهاي المعارك حتى الثوار المواطنين
خسرنا منهم اكثر

بنص المعركه الجسر الي صارت كانوا عندي اشخاص
كلش عزيزين ع كلبي ولازم كلبي بيدي
بس لا صاير بيهم شي هم بغير طرف وانا بغير
طرف من صارت المعركه انفجرت عبوه وصارت
الناس وذر وذر ماصرنا نميز هذا من ذاك
وحتى ماعرف إذا هل اشخاص الي ادور
عليهم ويا هل جثث لو لا
شكد دورت بس مالكيتهم
كعدت وانا اتنفس بقوه صدك حسيت
بنفسي خسرتهم انبهت وجهي وعقلي صار يضرب
اخماس ب اسداس
أملي ب الله حيل كبير دعيت يحميهم وين ما كانوا
ماردت اخسرهم هذول قطعه من كلبي
الي خسرنا والي شفنا شي مو هين وحيل
صعب بس مجبورين نتحمل ...

كاعدين ب احد الكرفانات الشمس خيمت علينا وقطرات
العرق تنزل من جبينا العتدات تقريبا خلص
وباقين انا والجنود يمي و ع راسنا قائد برتبه اعلى من رتبتي بوقتها ماخذين احتياط وكنت انا وياهم متأهبين
لأي حركه تصير قريبه منه نستعد
بوقتها القائد تقرب يمي وحجه وياي ..

القائد : الجنود بحمايتك انا اقضي كم شغله بالمقر وارجع ..

كنت متأكد راح يرجع وراح يزودنا بالعتاد
لهذا اطمنت وبقينا انا والجنود الي اعتبرهم اصدقاء االي بقينا كاعدين بالكرفاناات لمده ساعه تقريباً
وما نسمع الا أصوات سيارات قريبه
منه بالأول توقعت جماعتنا بس بعدين من حسيت
بالخطر عرفت هذول مو النا
وكفت ع طولي وتقربت اعاين منو
ما اشوف الا
سيارات داعشيه محمله ب أرقام عراقيه
بوقتها عرفت القائد لعب لعبته ونهزم بدون ما يتحمل
اي اغلاط وفر بنفسه حتى يحمي نفسه من اي
خطر يصيبه وقدمنا احنه ع طبق من ذهب
سيارات هواي وماعندنا عتاد كافي حتى نقاتل
بي حاولنا بكل الاشكال حتى مانخليهم يتقربون
بس هم كدروا يقتحمونا بكثرتهم و ب أسلحتهم
كدروا يدخلون علينا وصرنا أسرى الهم
انا وياي 3 من اصدقائي يعني صرنا 4 تحت رحمتهم
الي هم عديمين الرحمه ...

سحبونا للسيارات كل هذا الي صار وانا
عيني ع أصدقائي خايف عليهم اكثر من ما خايف ع
نفسي هذول انا وياهم ع الحلوه والمره
قاتلنا سوه واجتازينا طريق طويل سوه
دخلونا للسيارات وعاينت اكو غيرنا أسرى تقريبا 7 اشخاص وكلها ضباط برتب من ملازم وشيل ايدك
صرنا 11 شخص
قيدوا ادينا ومشت السيارات كل هذا واحنه ما نحجي
غير بس بالعيون إشارات بينه واحد يفهم ع الثاني
رغم الخوف الي كنت اشوفه بداخلهم لكن
قوتهم أكبر
مشت بينا السياره وكدامنا سيارات و ورانا سيارات
محاوطينا كأن غنيمه ويخافون لا يفقدوها
من خلال كلامهم كانوا بمختلف اللهجات
من دول مختلفه بس الي قهرني وكأن السجينه
انحطت بكلبي اكو بيهم عراقيين !!! شلون يخونون
ب بلدهم ماعرف شلون عندهم هاي القابليه
يقتلون بدم بارد !!
ومنهم اجانب بس ع الاقل الأجانب ارحم من العرب
لان عندهم عقيده ع اساسها يحاربون
عكس جماعتنا مليانين حقد وغل وحقاره
قيدونا كلنا ماخلوا واحد ما قيدوا وصاروا يمشون
بصحراء الانبار وين ؟ ما اعرف ..
ابد ما صعدوا ع خط السريع بس يمشون بشوارع ترابيه
ولا سيطره عبرنا منها حافظين الطريق حفظ
بحيث صحراء ويمشون بيها
بعدها صرنا نمشي بطريق وعر مره عالي ومره ناصي
ماحسينا الا توقفن السيارات استغربنا !
عيونا تنتقل من واحد الواحد
فتحوا أبواب السيارات وصاروا يطلعون بينا واحد ورى الثاني اعاين الطريق مدحرج يعني مانكدر نمشي بي
ينزل للاسفل وكله حجاار

ماحسيت الا اجتني من ورى دفعه قويه ونشمرت
ع هذا الوادي ماكدرت اسيطر ع نفسي واديه مقيده
وكعت وانا اتنقل من مكان للمكان الثاني
مو بس انا كلها شمروها كان هل شي عندهم عادي
وسهل مو كأن احنه بشر بين اديه
حاقدين علينا حقد أعمى
شكد حاولت اوكف ع طولي بس ماكدرت
ماحسيت الا انضرب راسي بصخره ، بعدها
ما حسيت ب اي شي !!! ...

ماصحيت الا وانا بغرفه تلفتت من كل الجهات
لكيت نفسي بغرفه صغيره حاطيني ع سرير
ورابطين اديه بيدي مغذي وراسي ياذيني كلش
خليت ايدي ع راسي ملفوف
حركت عيوني بالغرفه اكو ميز صغير حاطين
عليه ابر ، ادويه ، مغذيات
راحت عيوني ع الكرسي الي قريب من السرير
استغربت لكيت وحده كاعده عليه
وحاطه راسها ع طرف السرير الي انا نايم عليه
حركت نفسي هي فزت وكعدت جانت غافيه
عاينت بعيوني الثواني بعدها ابتسمت بتعب
واردفت ..

_ كيف صار راسك بعدوا عم بيوجعك ؟

من لهجتها عرفتها سوريا ماحجيت وياها بس
ناظرتها هي وكفت وطلعت من الغرفه
عشر دقايق ورجعت وياها واحد عرفته من التنظيم
لان شكله يوحي لهذا الشي كاتلهم الوصخ والقذاره
دخلوا ورى مجموعه سحبوني بدون كلام
ونقلوني الغرفه ثانيه غرفه
أقذر من القذارة الحيوان مايكدر يعيش بيها
وصخه وريحه النتانه والعفونه تفوح منها
خلوني بيها وتركوني وطلعوا بس واضح ع هاي الغرفه
جانوا اكو بيها ناس قبلي
واضح ع الآثار الدم ! اكو قبلي جايبيهم هنا
ومعذبيهم تلفتت بالغرفه انا مو من النوع الي ينفذ
صبره بسرعه بس بهاي الغرفه حسيت بمعاناة الاشخاص الي تعذبوا قبلي

بعدها بساعه دخل واحد للغرفه وسحبني اخذني
الغرفه ثانيه اول ما دخلت الها عرفت راح يحققون
وياي ويسحبون مني معلومات تخص الجيش
الغرفه مسويها نفس غرف التحقيق الي نحقق
بيها يعني مسوين أجواء الهم هذول ال****
بلش بالأول يحجي وياي بالمسايسه
حتى انطي معلومات وشفرات وكل اجوبتي جانت ماعرف ، جنت ارد عليه بهدوء وعيوني داخل عيونه
هو يشيل روحه ويركعها بالكاع شلون انا بارد
ويا وما اتجاوب مل مني وماحسيت الا بوكس
فر وجهي فر
نزل عليه ب كل أنواع الضرب ماخلى وجهي صاحي
وكل هذا ما انطيته معلومه وحده يستفاد منها المشكله
هو عراقي ولهجته مصلاويه هذا الي يقهر منك وبيك ويدمرك !
من كثر الضرب وكعت ع الكاع صاح بصوت عالي
عليهم من برى دخلوا سحبوني ورجعوني النفس الغرفه
القذره
ورى ساعه فتحوا الباب وشمروا واحد من الضباط يمي بس شنو منتهي نهي ضاربي لما فاقد بين ايدهم
حالته حاله يرثى الها

استمر الوضع هيج ايام وليالي يدخلون علينا انا والاسرى الي وياي بالغرفه يشمرون علينا ماي حار ومره بارد ماخلوا شي ما سوو بينا
جوع جوعونه عطش موتونا من العطش بحيث
يجيبون النا ماي ب بطل صغير ويشمروا علينا مثل الحيوانات كل واحد ياخذ منه رشفه بس يبلل بي ريكه
ويخلص هاي يبقونا ايام وليالي بدون اكل وماي
من غير الضرب والتعذيب الي ناكله منهم
بحث أجسادنا شكد معلميهن ع الجوع والعطش والتعذيب بس مع هذا انتهينااا
تعبنااا ومابقى النا اي حيله كلنا راح نموت حي ع الصلاه
من يسحبون منه ضباط يحققون وياهم مرات لو يرجع ضابط لو ما يرجع وين يودوهم مانعرف
بس انا اعرف كثر التعذيب الي يعذبوا يموتون
وماعرف وين يودون جثثهم يحركوها يموعوها بالتيزاب يتركوها للحيوانات، ما اعرف ..

مرت الايام واجت الايام واحنه يمهم اهلنا
مانعرف عنهم اي شي يمكن هسه عبالهم ميتين
رخوا الحبل النا وصاروا يشغلونا يمهم
واحنه بس نريد منفذ ماكو مطوقين المكان
مايسمحون الطير يطير كلش متشددين

صرت انتبه ع شخص هواي بتختل جان منظم
لتنظيم داع١١ ب ارادته وجديد
شكيت بي بس ردت اتأكد لان هاي الشغلات
مو غريبه عليه وعرفت عنده شي بس كلت خلي الزمه
واتأكد منه
جان يسوي كل شي يريدوا منه بس بحذر
بمره شفته راح للحمام ولحكته
شفته طلع من الحذاء مالته جهاز صغير صرصور نسمي
اتصل وصار يحجي بهمس
ابتسمت بطرف شفتي وعرفت منو هذا
سحبت نفس وبقيت واكف بالباب
هم خاف احد يلزمه وهم حتى اشوف الوضع يمه
هو خلص المكالمه ورجع الجهاز بالحذاء مالته
ولتفت يريد يطلع لكاني بوجهة
فزز وانخطف لونه
حاولت اسحب منه كلام بس هو جان متخوف
وماقبل الحد ما زمخت بوجهة وهددته يلا قبل وكال منو هو كتله انا عرفتك بالجيش العراقي
ترى انا ضابط بالجيش العراقي وهنا أسير
طلع عميل سري يوصل كل الأخبار للجيش
عن داع١١ اطمنت عليه تقربت ربتت ع كتفه
واردفت ، الله يحفظك بويه ..
هو ابتسم ورجع المكانه

بهاي الفتره قوت علاقتي بالممرضه السوريه
الي اول ماصحيت شفتها
جانت توصل الي اخبار عنهم وعرفت
هي هم سبيا عندهم اسيره
انتبهت عليها هواي تتقيء وروحها 24 ساعه لايبه
بيومها سألتها شبيج ؟؟؟ هي جانت خايفه وتبجي
ردت عليه ، حامل ، بقيت صافن بوجها
غمضت عيوني ب اسف حامل وانتِ ولا مره شفت تتطلعين للبعيد ! هي استرسلت بكلامها وهي تبجي ..

_ والله مافي شي ب أيدي انا حالي من حالكون
اسيره هون بياخذني الأمير هون وبيقضي معي حاجتوا بعدها بيرجعوني لهون وبيشمروني
هم باعوني إلو وماحدا غيروا بيتقرب مني
انا ملكوو للامير هون وهاد الي عم بيعزبني
لكون فريسه سهله عندو
ادمرت وهلأ عرفت بنفسي حامل مافيني اعمل
شييييي مااافيييني ...
انا هون اعمل الي عليي وبهرب كتير اشخاص
وانا هربت كتير اشخاص بس اوصف الهون المكان الصح وبعدها بلهي الي وائفين فوء راسي
وبعدها اسمح الهون يهربو اما انااا
مافيني اهرب مره عملتها وحرئني الأمير
خفت لهيك فنيت حياتي بمساعده الأسرى هون
مشان الله يساعدني شي يوم وينقذني
منوو. لان تعبت اناا ..

_ سحبت نفس قوي انا اعرف الكذاب من الصادق
من وجهة واعرف ملامحه اذا ادل ع الصدق او لا
وهي جانت صادقه بكلامها واضح هواي
تعذبت اردفت الها بهدوء ،
لاتخافين بويه انا ان شاء الله اطلع من هذا المكان
مثل ما الله دزج للهربتيهم انا الله دزني الج
حتى انقذج بما انُ انتِ تعرفين الأماكن الصحيحه
معناها راح تكدرين تساعدينا نطلع منا
ونوصل للجيش العراقي قبل لا ينفذون مهمتهم
ويقضون علينا تمام بويه

_ بعيوني هدول الاتنين مشان الله ساعدني اهرب من هون انا تعبت

_ سهله بويه سهله بس انتِ شنو اسمج ؟

_ انا اسمي ســـــوريا

سحبت نفس قوي وأنا اهز براسي ، اطمني اختي انتِ
واطلعج من هذا المكان لو ع كص ركبتي
تطلعين بسلامه وتردين ل اهلج والبلدج سوريا

سوريا : انا بشكرك كتير والله ما بنسى ألك هاد المعروف طول ما انا عايشه ..

_ تدللين بويه يجرالج الي تريدي ..

مرت الايام واجت ايام واحنه نخطط حتى ننهزم من
هذا المكان سحبنا المعلومات الي نريد نحصلها
عن التنظيم وتساعدنا انا والعميل السري الي
متخفي وياهم كدرنا نجمع اكبر معلومات عنهم
وهذا يساعدنا حتى نهدم هذا المكان ونتخلص منه ..

بقينا أسرى للتنظيم سنه وشهر واحنه أسرى
من تعذيب جوع،وعطش شفنا أشكال وألوان
قتل تعذيب الأسرى سبي النساء
اغتصاب ، والأكثر الضباط الي يقتلوهم
وقتلهم اما نحر او يموعونهم بالتيزاب
عذاب نفسي صار بينه
يعني لو طلعنا منا سالمين وعايشين
ماعتقد راح نبقى ع نفسيتنا راح نواجه
عواقب وأثار ع الي شفنا هنا بهذا المكان
صح الله لطف بينا وبقدره ما قتلونا
بس متنا تعذيب جسديًا نفسيًا

كاعدين من التعب والتعذيب جان يتقرب
مني العميل السري حجه وياي بهمس تعال ورايه
رحت ورى دخلنا للحمام
لتفتت عليه ، كول ؟

هو ابتلع ريقه واردف

علي : ترى الجيش العراقي راح يضرب التنظيم
هسه وصلتني الخبريه ولازم نطلع من هذا المكان ب اسرع وقت ممكن

هزيت راسي ورديت عليه ، جا خوش بويه
خلينا نجهز نفسنا انا اعرف الطريق خلال
هاس الفتره حفظته وحتى سوريا البنت الي ويانه
تعرف أماكن محد يعرفها نكدر نطلع
قبل لا يضربون التنظيم

علي : أي سيدي لازم نطلع بس البنت امان ؟

_ اي ابني امان انا ما اخطي خطوه ما محسب الها
وهي مالها ذنب اسيره حالها من حالنا

علي : خلينا نتفق الفجر نطلع قبل لا يبدون القصف

_ هاهي متفقين ..

اتفقت وياها بصلاه الفجر قبل طلوع الشمس
احنه نطلع من نفس المكان الي
تهرب بي الممرضه سوريا منه الأسرى
عاد والله طول اليل احنه حاطين ارواحتنا بيدنا
طلعت الممرضه تتطقس المكان وترجع تجيب النا
معلومات عنهم
شكم مره رادت تنلزم بس هي تلوفها عليهم بخصوص الأمير وهم يسكتون
بطنها كبرت و وصلت اشهرها الاخيره
حتى تتعب وبكل مره تتدعي هذا الطفل يموت
لان ابن حرام بس مابيده كل شي سوته وبقى عايش
هذا الطفل ماراد يموت الله اله بيها اراده..

صار الفجر واحنه جهزنا نفسنا
ما اشوف الا 7 اشخاص من غيري وغير الممرضه
والاسرى الي يمنه طلعوا عملاء سرييين بداخل
التنظيم يعني مو بس علي
طلعوا اكثر منه بداخل داع١١ لان خلص شغلهم
رادوا يطعلون قبل لا يقصفون المكان
والله مشينا واحنه متنكرين بلباسهم
بس شنو كل شوي ملتفتين لا يطلع النا واحد
وتخرب الخطه مالتنا ونروح بالرجلين
جنه حذرين الى درجه ما تنوصف
نمشي ونتختل نريد نطلع من هذا المكان قبل
الموعد الي منطي النا الجيش العراقي
مشينا والممرضه ادلينا ع المكان السري الي تعرفه
هناك و وصلنا بطلعان الروح
فتحنا المكان السري
وطلعت كل الاسررى الي وياي
وبقت انا وهي ...

_ يلااا اطلعي ..

سوريا: مين أنتَ ؟
_ انا الفهـــــد
سوريا : كيف وصلتوا لهون ؟
_ انـــــغدرناا

سوريا : اردفت وهي خايفه،  بس انا خايفه منكون
يعني ازا طلعنا ماراح تاخدون ع السجن ماا !!

الفهد : مستحيل ليش خايفه منا انتِ بأمانتي الحد ما اوصلج البر الأمان

سوريا : بتحميني ؟

الفهد : برمش عيني بويه ..

سوريا : انتَ متلون ماا ؟ بالجيش !

لتفتت وانا اسمع الصوت سحبت نفس واردفت
وعيوني بعيونها ومترقب الوضع ..

_ انا الضـــــابط رهبـــــار يامـــــن بالجـــــيش العـــــراقي الـــــملقب بالفهـــــد ..

_______________

للحكايا بقايا ♡

شلوووووون البارتوت طمنوني ؟ قفله لطيفه مو 😉🤤💕

اذا ما صوتوا ما انزل بارتوت لو مدري شيصير
ولكم صوووووتووو اشمر روحي من الجسر ؟☻️🦦💔

حسابي الانستا للتواصل .. akyta_98