رواية دجن الضليع الفصل الثالث وأربعون 43 - بقلم رهف علي

نبدأ بذكر الله ﷽💛✨

قبل القراءة مُتابعه للحساب akyta_98
للتواصل ع حساب الانستا akyta_98

يا غيمة.. بس مو من مطر..
ذوبيلي يا لَطخة شَكر..💗!

¤¤¤¤¤¤¤¤¤¤¤¤¤¤¤¤¤¤¤

سيلينا : فزيت من نومي وانا مصدومه
اسمع اشياء غريبه عجيبه دخيلك ربي شنو هذا !!!
بقيت اتلفت لكيت بصفي دابـــــــــــر
رجعت افتريت من الجهات ماكو احد
صح اضاءه الغرفه خفيفه بس يبين
اذا اكو احد يمي او لا
فزيت مرعوبه ع صوت طفل يبجي
هنا رجليه ماتن من الخوف جسمي صار
يرجف من الرعب اريد التفت ع دابر حتى اكعده
بس ماكدر من الخوف الي خفته
بالكوه يلا تحركت قربت ايدي من يم دابر
وندسته من كتفه هو فز سريع
سألني شبيج احجي وانا اأشر آله بس مافهمني
ولا شافني بوضوح لان الإضاءة خافته
تقرب مني وانا عبالك الأمان لزمته وحجيت بصوت يرجف

_دابر جاي تسمع ؟؟؟
_ فرك عيونه اثر النوم واردف ، شنو اسمع ؟
_ ابتلعت ريقي وهمست، صوت
_ صوت شنو ؟
_ طفل !
_ شبيج سيلي وين اكو طفل هسه شوفي الساعه بنص اليل
_ تقربت من يمه وضميت نفسي بحضنه وحضنته
بقوه خايفه احجي ويا وارجف
اكول اله سمعت صوت طفل والله هو
يكول ماكو
من شاف خوفي قربني الحضنه وحضني
بقوه يهدي بيه حتى ما اخاف صار يقرا ع راسي
آيات قرانيه ويسمي ب اسم الله
ماحسيت ع نفسي الا وانا نايمه بحضنه

والعجيب بالموضوع هي مرت الايام وانا اسمع هذا الصوت صوت الطفل اسمعه يبجي ومن ادور
عليه ما الكا شكد ادور اكول يمكن اكو طفل اي وصلت لهل درجه لان
اسمعه بكل مكان
مرات اطلع برى اركص اشوف خاف شامرين طفل
يم بابنا وتاركينه او ضايع طفل ويبجي
بس مااااكوووو !!!
صرت اخاف هواي خاصه انا الوحدي
دابـــــــــــــــر يروح الشغله الصبح يرجع ساعه 2 بعدها يتغده ويرتاح ويرجع يطلع الشغله الثاني ما يرجع الا بنص اليل
كل هذا الوقت انا الوحدي او مرات اروح ال اهلي
ابقى يمهم إلى أن ارجع باليل
الخوف الي عشته رهيب عشت بقلق وتعب
زاد عندي اضعاااف

تعبت وانتكست حالتي صرت اتخيل شغلات اقوه مو بس اسمع صوت الطفل لاااا صرت اشوف
اشياء اكثر من هيج بمره من المرات
جاي ارتب الغرفه مالتي
انا غرفتي مال النوم بيها مرايات بكل مكان لهذا واكفه وكدامي مرايا جنت مدنكه اشيل الملابس الي واكعه
ع الارض رفعت راسي وجمدت بمكاني
من الخوف بقيت واكفه وانا ارجف صرت مثل السعفه
لا بيه اركض ولا بيه اصرخ خرسيت وانا
اشوف الي ورايه
جانت مره لابسه كلها اسود واكفه ورايه وبعدها خطفت
سريع من ورايه هنا ماعرف شنو اسوي
الموقف حيل يخوف مرهب إلى درجه
لوحدي بالبيت والي شفنه شي حيل صعب
من بعدها صرخت بصوت عالي ولتفتت اريد اشوف
اذا بعدها بالغرفه او لا بس ماااكو !!!
ماكو اي احد

صرت اتلفت بالغرفه مثل المخبله وانا ارجف
من الصدمه اريد اكذب عيوني ما اريد
احس هل شي حقيقي
ركضت للكنتور اخذت الصايه والشال
مالتي وطلعت ركض من البيت
خايفه ومرعوبه بعد ما تأكدت سديت باب
الشارع بعدها ركضت البيت اهلي همَ قريبين علينا
سحبت نفس قوي اهدي نفسي وبعدها دكيت الباب
من بعد ما دخلت وسلمت عليهم

مابينت الهم اي شي اخاف اكول شي نوب يطلعوني
مخبله ما اريد اكون مخبله صدك وقتها
خفت معقوله توصل بيه المواصيل
واكون بمستشفى الأمراض العقليه بسبب هل شي ؟
ماحجيت وبقيت ساكته
كلت بس يرجع دابر اتصل عليه يجي ياخذني
اما بوقت ما انا الوحدي بالبيت ما اكون متواجده
هذا أفضل حل واحسن حل اسوي حتى ما اخاف ..

وهيج بقيت ايام ع هل حاله
صرت بوقت النهار من دابر مو بالبيت اكون ع اهب استعداد البيت تراك وملابسي العباه والشال يمي
بس يصير شي البسهن سريع واركض البيت اهلي
كل هل شي وهم ما يعرفون شنو جاي يصير وياي
ولا انا حاجيه الهم شي متخوفه من كلمه مخبله

من ساء الوضع صرت حتى احس بشخص يمشي
بصفي بحيث مره جنت كاعده وحسيت بخيال ورايه
ومره انا واصعد احس واحد يصعد ورايه،
والأكثر وحده لابسه اسود ومامبين منها شي تركض وتخطف من ورايه
اشوفها من اكون كدام مرايا
هاي الحالات تكررت عندي
بوقتها اتصلت ع دهليز وحجيت الها عن كل الي صار
وصرت اشكي الها وانا خايفه ومرعوبه
بوقتها جان ردها الي
( سيلي خاف تتخيلين او رجع الج مرض الأحلام من جنتي قبل تتخيلين دابر يمج وهسه هم نفس الشي )
بوقتها رجعت افكار معقوله صحيح كلامها
بس الدكتور كال هاي الأحلام اذا انتِ تتمنين تعيشيهن وما تحققيهن يجن ع شكل احلام واقعيه اما هسه
هذا الشي لا مستحيل لان انا اصلا ما احب هيج شي
واخاف من هل شي ..

بيوم طكت روحي إلى أن كعدت دابر كدامي
وحجيت اله كل شي والصدمني اكثر جوووابه !!!

دابـــــــــــــــر: تتذكرين بيوم الي جنتي بالطابق الثاني وصحت عليج ؟
سيلينا : اي اتذكر بوقتها جنت اني فوك وصحت ب اسمي رديت عليك وانتَ كلت الي شنو تريدين مني صحتيني وبوقتها انا ما صحكت ولا حجيت وياك
ليش تذكرت هل شي هسه ؟

دابـــــــــــــــر: لان فعلاً انا سمعت صوتج تصيحيني
سيلينا : شلووووون ؟
دابـــــــــــــــر: بوقتها جنت اتابع مباراه من جبتي الاركيله الي وصعدتي وراها ب شوي سمعتج تصيحين ب اسمي اكثر من مره وترى صوتج اعرفه
عاد انا رديت بس ما رجعتي جاوبتيني
إلى أن صحت ب اسمج ورديتي بس بوقتها
انتِ ما صحتيني

سيلينا : اعاين عليه وانا مصدومه،  يعني شنو دابر ؟
دابـــــــــــــــر: سيلينا يعني انا هم مثلج جاي اشوف اشياء واسمع اشياء حتى صوت الطفل هم سمعته
سيلينا : فتحت عيوني مصدومه ، تحجي صدددك
عزه دابر شنو نسسسوي هسسه
دابـــــــــــــــر: اشوف شنو اسوي ونحلها بلكت نشوف حل ..

استمر هل وضع وانا ودابر ع طول سوه
انا استمر اقرا قران بالبيت افتح ادعيه
بس الوضع هو هو ما تغير
واحنه بالكوه يلا لكينا بيت وكعدنا بي ما نكدر نطلع
بسرعه
دابر وانا صرنا نشوف اشياء حيل تخوف
بحيث هو يكعد يكول الي
( سيلي احس واحد يمشي وياي حتى من انام احسه
بصفي حتى الطابق الفوك هم هيج )
تخبلنا فد مره
اخر شي قررنا نطلع من هذا البيت
بس هل مره قررنا نشتري قطعه ارض
واحنه بيدنا نبنيها احسن هل شي
حتى خاف هم نشتري بيت جاهز ويطلع نفس هذا

بقى دابر يفتر ع قطع ارض إلى أن لكه
قطعه ارض كلش غاليه بحيث المتر مالتها
غالي وبمكان زين واله سمعه حلوه
بوقتها شد عزمه وقرر ياخذها بس احتاج مبلغ بسيط واخذه ك دين من ابويه
بوقتها اول ما استلم الارض دك الأساس وبلشوا يبنون بي وهو كل ما يرجع من شغله يروح يشوف البيت
وشنو يحتاج

وصل الخبر ل اهله انُ دابـــــــــــــــر ماخذ فلوس
من ابو زوجته وصاروا يحجون عليه ع ابو انُ هو دابر صار الهم وشلون ينزل نفسه ياخذ ومن هل حجي
عاد بوقتها اهلي ردوا عليهم ( دابر ابنا ويمون علينا وحلالنا هو حلاله )
بوقتها اخرسوا بس واضح عليهم الغيره
صدك بوقتها طش الخبر دابر راح يطلع البيت ثاني
وو وكلام هواي
البناء اخذ منه وقت هواي بحيث
مرت سنه ونص يلا كدرنا نكمل البيت وكدرنا ننتقل بي
طبعا هاي السنه ونص من ضمنها الشغلات الي
عشناها بهذا البيت المرعب الي عشنا بي

طبعا بوقتها عرفنا البيت مسكون حجينه وسألنا هواي
كالوا هذا البيت اي واحد يسكن بي يطلع مايطولون بي هواي حتى يبيعوا بفلس ونص بس حتى يتخلصون
منه ومن شره والحد الان محد يعرف عنه شي
وشنو الي بداخله وليش هيج يصير بيهم
واحنه هم حالنا حال الباقين بعنا البيت بفلس ونص بس نريد نتخلص منه .

كمل البيت وانتقلنا ماتهنينا  ابد بالبيوت الي كعدنا بيهن لهذا هسه هذاا بيتنا الجديد
متأملين بي الخير ع ربي يسعدنا بي وما

انتقلنا البيتنا الجديد تحديداً بتاريخ ما انسى ابد
2019/4/12 هذا اليوم مانسيته ابد
لان بدايه حياه جديده بعيد عن كل الي فات
نبدي حياه حلوه خاليه من كل شخص يأذينه

بدأت حياتنا حلوه وامورنا مشت بخير
وماكو اي شي يعيقنا
واستمرت بالهدوء
بيومها جنت كاعده بصفه جانت باديه لعبه
تراهنا انا ويا اذا الي اشجعه الفريق يفوز يسوي إلي اريده انا واذا هو فاز الفريق الي يشجعه اسوي الي يريده هوَ
العبه حماس وصارت المباراه احلى وهو يصيح وانا اصيح إلى أن صاروا تعادل
بوقتها جنت زعلانه منه وتاركته ف اعرف شنو يريد مني دعيت يفوز الفريق الي اشجعه بس ب اخر
لحظه فازز الفريق الي يشعجه هو
وصار يصيح بصوت عالي حتى انا فززني ..
كَلبت وجهي وردت اغلس شنو يصير لو اطفر بجلدي احسن

وكفت و ع كيفي تسحبت من المكان حتى انهزم
ماحسيت الا انسحبت ملابسي من رقبتي
وكفت كأن مجرم القوا القبض عليه بقوت جريمته
لتفتت عليه وانا مغمضه عيوني فتحت تك عين
لكيته واكف كدامي لازمني ورافع تك حاجب
ابتسمت بهدوء وانا اتعدل ب وكفتي

سيلينا : اووو شبيك عوفني شكو لازمني بهاي الطريقه والله عيب عبالك طفله عندك
دابـــــــــــــــر : ع وين ياحلوه
سيلينا : اردفت بعدم مبالاه، ع غرفتي
دابـــــــــــــــر : والرهان ؟
سيلينا : يا رهان شنو هذا ينوكل ينشرب اشو ما اتذكر هيج شي
دابـــــــــــــــر : اردف بحده وهو رافع حاجبه،  سيلي !
سيلينا : ضحكت ، يلا خلصني شنو تريد ؟
دابـــــــــــــــر: اي هيج من الأول وهسه لازم اكول الي اريده وتنفذي بحرف الواحد
سيلينا : اي شنو ؟
دابـــــــــــــــر : تقرب الها وهمس ب اذنها بمكر
سيلينا: فتحت عيوني ع وسعهن من طلبه ونظراته الماكره هزيت راسي ب نفي قاطع،  لااااااا
دابـــــــــــــــر : اي
سيلينا : لا
دابـــــــــــــــر : اي
سيلينا : لا يعني لا
دابـــــــــــــــر : اي يعني اي
سيلينا : هستوه راد يسوي الشرط جان يندك الباب
ضحكت بقوه وهو خزرني راح يفتحه وهو عاض ع اصابعه ومتحلف بيه بسيطه ما بسيطه

ورى شويه رجعت كال اجوي اخواني استغربت
شجابهم بعد كل هاي الفتره !!!!!
ياربي معقوله اجوي وجايبين مشاكل وياهم
هوو احنه ما صدكنا حياتنا مشت تمام
رحت سويت الضايفه ودخلت سلمت وقدمت الهم وطلعت مابقيت اساساً مانسيت الي سوو بينا
بس يبقون إخوانه نشوف شنو يريدون
اسمع بس صوتهم وماعرف شنو الي يريدوا
وراها بساعه طلعوا دابر سد الباب ورجع دخل بس شنو
وجهة مكَلوب

هاا شنوو يريدون ؟

دابـــــــــــــــر : جاين بعد سنه ونص يريدون نتراضى ديكولون الاظفر مايطلع من اللحم شفتي هل شي !

سيلينا : بقيت صافنه شنوو سبب هل شي معقوله
يريدون يبلونا ياربي دخيلك ، زين وانتَ شنو سويت ؟

دابـــــــــــــــر : ماقبلت ..

سيلينا : رد عليه ب ببرود وتركنا وراح استغربت من تصرفه ليش هيج يتصرف ياربي اوووف
مرت الايام وأخوانه ماخلوا احد ما توسطوا يمه حتى يقتنع دابر ويتصالحون بس دابر راكب راسه ومايقبل
معاند اخر شي راحوا البابا اعتذروا منه وطلبوا
يحجي ويه دابر عاد بابا بيومها
اجه وكعدنا اثنينا وحجه ويانا ..

ابو سيلينا: بابا انتَ لشوكت تبقى هيج بلا اخوتك ؟ ترى هاي الدنيا ما ترحم غلطوا صحيح بس كفروا عن غلطهم من اجوي وطلبوا السماح منك ماطول عرفوا بغلطهم سامحهم وارجعوا مثل قبل بس خلوا حدود ماكو مشكله انتَ ب بيتك وهم بيتهم ماترجعون تعيشون سوه احسن حتى ماترجع المشاكل بس تكدر
تحجي وياهم بدون زعل الي صار صار وفات عليه سنه ونص لشوكت تبقون هيج يا بابا ...

سيلينا : كلام بابا خله دابر يقتنع ومن بعد الناس الي
صارت طرف صلح يلا قبل دابر يرجع علاقته ب إخوانه
هم من عرفوا دابر اقتنع عاد اجوي كلهم الا زوجه سعود ما اجتي بقوا يمنه ساعه وراحوا
وراها بشهر خطبوا ل اخو دابر الصغير سعد
عاد دابر ماقصر وياي ابد
لزمني وحجه وياي

دابـــــــــــــــر: الزمي هذن الفلوس اريدج تتطلعين احلى وحده بيهن وماريد ينقص عليج اي شي
من ملابس وصالون بحيث اريد يتعجبون هي هاي زوجه دابـــــــــــــــر لاتنقصين عليج ب اي شي
اريدج تبينين الهم منو انتِ تمام حبيبي

سيلينا : بوقتها صدك ماقصرت ويه نفسي
اشتريت فستان فوك الركبه بدون تعلاكات لون أخضر
صبغت شعري وسويت تنظيف كامل للبشره والجسم
بحيث عدت صياغه نفسي من جديد وشمرت كل التعب
طلبت من ام الصالون تخلي مكياج وتركز ع عيوني
وهي هم ماقصرت بحيث من خلصت
حسيت صدك نفسي احلى وحده راح اطلع بينهن
رحنا للحنه
ودابر طول الطريق يتغزل بيه كل شوي وكايل الي
خلي يولي العرس خلينا نرجع للبيت وانا اضحك
عليه وصلنا هو دخلني وراح يم إخوانه
عاد اول ما دخلت ركضت للغرفه شمرت العباه الي لابستها عدلت نفسي وطلعت
كلهن بقن فاتحات حلكهن مصدومات ماعبالهن هاي انا سيلينا حتى اقاربهم ماعرفوني الا ما عرفتهم ع نفسي لان صار هواي ماشايفيني
كلها دكول سيلي متغيره وصايره احلى من قبل
بداخلي كلت هو غير لان مبتعده عنكم صرت احلى ونفسيتي احسن

رحت يم الدي جي وشغلت اغنيه اجمل اثنين انا وحبيبي ، دابـــــــــــــــر دائما يشغلها بحيث يخليني غصب عني اكوم واركص تسوي واهس وتخلي الي مايركص يركص دخلت بالوسط
وركصت ركص ما صاير انا واركص اغني ويه الاغنيه
صدك بوقتها خليتهم يفتحون حلكهم مصدومين
ماعبالهم هاي انا نفسي سيلي

خلصت الحنه ورجعنا للبيت بس شنو كلش فرحانه
وغيرت نفسيتي حتى دابـــــــــــــــر يضحك عليه

دابـــــــــــــــر: ها ولج لازم شبعتي ركص
سيلينا : اسكت يمعود رجليه صارن يوجعني من الركص
دابـــــــــــــــر: اي عيني حقج هسه يطكنج بعين
سيلينا: يمعود المهم غضت الأعداء
هو ضحك وصلنا للبيت سبحت وشمرت التعب كله
هستوني كعدت ع السرير و رجليه صارن يوجعني بزايد
يبوو هسه طلع التعب بيهن بحيث طول اليوم
انا اون منهن حل أذني وانا جنت لابسه كعب
نشل حالي بالالم دابر يمي دلكهن الي بس نفس الشي
بالكوه يلا نمت ..

ماكو كم يوم وصرت اضوج من بيتنا بحيث
من اطلع البيت اهلي ارتاح ومن ارجع البيتي اضوج
واحس حالتي النفسيه تتعب بزايد
تعبت فد مره بس ماحجيت ل اي احد ماطلعت سالفه كل ما نكعد  ب بيت هيج يصير بينا والله حرام
ضغطت ع نفسي بس ماطايقه البيت
ابد مرت ع هل حاله شهرين كاملات
عاد صار عرس ابن خالتي بالناصريه
واجاني من الله ع الاقل اطلع من البيت بلكت نفسيتي تتحسن لان مو طايقه نفسي ابد
والله عاد رحنا انا ودابر للناصريه
وقضينا العرس هناك أجواء حلوه وكلها افرح
وهذا الشي حيل غيرت من نفسيتي
حتى انتبهت أقارب من امريكا اجو ع هذا العرس
بس ما خليت ب بالي هل شي

بعدها رجعنا اول ما دخلت للبيت رجعت نفسيتي
اسوء حاولت اتغاضى عن هذا الشي
عسى ولعل يروح
ف باليل نايمه ع السرير واقلب ب جهاز دابـــــــــــــــر حافظه الرمز مالته لهذا فتحته عادي
دخلت ع الانستا مالته ماعرف شلون رحت وصارت كدامي محادثه بينه وبين حساب دخلت عليه وفتحت عيوني ع وسعهن مصدومه لكيت رسائل هووواي رسائل ومن ضمن هاي الرسائل وكأن هذا اخر رساله
مكتوب بيها ..

_ دابـــــــــــــــر شبيك طلكَ سيلينا واني اسحبك يمي ب أمريكا والله تعيش احسن عيشه وشنو تريد انطي الك عيوني الاثنين الك بس وافق ...

________________

ريـــــفـــــان ::-

نزلت اديه وابتعدت عنه سألته بعد فهم واستغراب
_ غهباغ منو هاي ؟
_ زوجتي ...

رد عليه وعيونه داخل عيوني بقيت جامده بمكاني
مامستوعبه الي كاله الي رجعت سألته مره ثانيه

_ منو هاي ؟ والكارثه رد عليه بنفس الجواب
وجان بارد وكأن شي عادي
لفتت نظري شكلها الي انصدم عقدت حاجبي ورجعت نظري عليه ضحكت ، تشاقه وياي مو ؟
ما اصدك انتَ تغجع تسويها مغه ثانيه غهباغ !!!
بس جان ساكت هي مجرد ثواني كل هذا الحوار دار بينا ثواني شهكت بقوه اريد استوعب
خليت ايدي ع وجهي وصرت ابجي بصوت عالي

ماحسيت الا سحب اديه من وجهي وسحبني الصدره
دفعته بقوه بس ما يندفع واني ابجي اريده يتركني اريده يبعد عني هاي المره الثانيه هيج يسوي
وياي ليش هيج ياربي ..
صحت عليه بصوت عالي ..
وخخخخغ مني انت واحد خاااااين خبيث حغاااام عليك هيج تسوي بيه وخخخخخغ

بعدني احجي واصيح فجأه سمعته يضحك بصوت عالي ..

رهبار :- لج اشاقه وياج ليش هيج عقلج صغير هوَ انا جنت بنص الموت ياعرس ياصخام هوَ احنه صرنا عرس عرسوا علينا وطايح حظ حظنا

ريفان : بعدت عنه وانا صافنه بوجهة وهو يبسم بوجهي
دموعي تنزل بهدوء بس ساكته ، تحجي صدك ؟

رهبار : وعيونج

ريفان : بهت وجهي خلاني صدك اصدك بقيت فاتحه عيوني مصدومه وهو تقرب مني يبتسم

رهبار : اردف ، رفه بويه اشاقه وعيونج الحلوات
لاتصفنين هيج سكت بعدها اردف ، ترى ادوهن بعيونج

ريفان : خزرته وضربته ع صدره بقوه ، ليششش هيج تسوي بييييه هااا زين ما وكف كلبي لو واكف شقااك هذا بشنو غاح يفيدك فهمني

رهبار : بسج بويه بسج بنيتي و هذا راسج ابويه

ريفان : سحب راسي لصدره تمسكت بي بقوه
سحبت نفس براحه ، غهباغ والله كلبي غاد يوكف
امانه لاتسويها بعد تغه اموت

رهبار : بعيد الشر عنج ياروحي ..
ريفان : بعدت عنه ، منو هاي ؟
رهبار : عاين عليها هز راسه واردف ، تعاي بويه ..
ريفان : هي تقدمت بس شكلها خجلانه
وكفت بصف رهبار

رهبار : بويه رفه هاي سوريا ساعدتنا هواي والها الفضل من بعد ربي ع طلعتنا من الموت
راح تبقى ويانا هنا الى ان أأمن عليها بمكان يلا اكدر اتركها

ريفان : هزيت راسي ب اي وعيوني انتقلت عليها
بس هي حامل رجعت لتفتت عليه وبعيوني الف سؤال
هو فهم عليه أشر الي بعدين ، رجعت نظري عليها
واردفت ، اهلاً بيج

سوريا : اهلين فيكي ..

ريفان : فتحت عيوني يا هاي سوريا مو عراقيه
اني توقعت بس اسمها سوريا ماعبالي هي من سوريا
دخلنا جوه
سأل عن عمتي وايلان كتله هسه يجن
بقى كاعد واني الحد هسه صافنه بوجهة
الحد هسه ما مصدكه هو بعده عايش
بعدني بصفنتي وهو عينه عليه وجان تدخل
العاصفه عمتي وايلان
هنَ هم مامصدكات الهسه بعده عايش
بحيث بقن يمه وما تركنه يبوسن بي
ويحضنن بي حقهن هو هل وحيد الهن
ومن بعد سنه وشهر رجع الهن
اني ودي اسوي هيج وما اتركه ابد
اتمنى ابقى ويا طول الوقت

فاطمه : مسحت دموعها واردفت ،  احجيلي يمه وين جنت ليش كل هذا الوقت وشنو الي صار

ريفان : شفته انقلب وجهة ومسح وجهة سحب نفس
وبده يحجي النا كل شي صار ويا
صدك بوقتها انصدمت ماتوقعت هيج يصير بي
نوب حتى القائد الي عليهم طلع بايعهم
ل داع١١ حجه النا شلون بقوا اسرى يمهم
هواي اشياء صارت وياهم واحنه نبجي
دموعنا ماوكفت ابد
حتى بجينا ع سوريا خطيه البنت تعذبت هواي
الله يساعدها ويساعد كل البنات الي سبوهن
الله يكون وياهن وينقذهن ..

عمتي ما انتبهت ع سوريا ابد ولا شافتها
التهت ويه رهبار ومن انتبهت عليها قلبت وجها وخزرت البنت ورجعت ع رهبار

فاطمه : هااي منوو نوب ؟
رهبار : عقد حواجبه واردف ، هي هاي البنت سوريا
فاطمه : اااااي وان شاء الله تبقى هنا ؟
رهبار : وين المشكله
فاطمه : صاحت ، شنووووو مستحيل تبقى ب بيتي
شعرفني من وين انتوا إلى متى تبقون هيج
ابوك راح جابلي وحده ماعرف منين أصلها
وبقت تحت اعتراضي وعدم قبولي
هسسه نوب انتَ رهباااار لا تخبلني
رهبار : انا شحجيت يمه !!!!!! الي كلته يصير

ريفان : هي ماعجبها الوضع ابد بس ماحجت ماتريد
من اول يوم تسوي مشكله ولوو هي لو بيدها تلزمني
اني وياها وتتطردنا من البيت وتخلص منا

رهبار : رفه رتبيلها الغرفه حتى تكعد وترتاح بيها
ريفان : تمام ، رحت اني وايلان وياي رتبنا الغرفه
و وديناها حتى ترتاح خاصه الوقت تأخر
من بعد العشه كل واحد راح الغرفته
الا اني بقيت احوس بغرفتي اريد اروح اله اريد اكعد ويا مشتاقه اله هواي و ماشبعت منه
صارلي ما احس سنه احسها عشر سنين
كاعده بفراشي واكل ب اظافري اروح لو ما اروح
بس خاف نايم لو مايريدني ازعجه هاي شلون شغله
اخر شي قررت اروح واشوفه بعيوني اطمن وارتاح
بعدها ارجع الغرفتي اي هذا احسن حل ..

لبست الشبشب الابيض برجلي وطلعت من الغرفه
امشي بخطوات هادئه حتى محد يسمعني
ومايحسون بيه
هي غرفته يم غرفتي فتحت باب غرفته بهدوء
سريع اجه بوجهي بروده الغرفه والعطر مالته
سنحت ع الجو لو ما عيب جان جبت المخده مالتي والغطه اخليهن كدام الغرفه وانام الهل درجه وصلت بيه
الغرفه ظلمه وبيها اضاءه خافته
يعني نايم ! بس اريد اشوفه ع الاقل
دخلت وسديت الباب ورايه ع كيف حتى ما يفز
وتمشيت بخطوات بطيئه إلى أن وصلت للسرير مالته
من الجهة الي نايم بيها عاينت عليه نايم بعمق
ابتسمت يا ربي شكد مشتاقه اله اتمنى اكعد بس اتفرج
عليه وبدون ما امل منه واعوض هاي الفتره كلها يمه

ماعرف شجاني قربت ايدي حتى الزم وجهة
هستوني خليت ايدي ع وجهة
ماحسيت الا انسحبت بقوه و وكعت ع السرير وشي
حاد صار بخصري شهكت مفزوعه وخايفه لان هل شي احسه نبت بخصري بجيت هم من الالم وهم من الخوف
ليش هيج سوه شنو ماعرفني هاي اني
بالكوه الكلام طلع مني ..

غهباغ عفية هاي اني غيفان ..

حسيت بي يتنفس بقوه كأن صحى اول ما سمع صوتي
فز مني وراح شغل الضوه ورجعلي فتح عيونه
ع وسعهن شافني كدامه انصدم يمكن ما توقعني هاي اني يمكن عباله غير
هو اجه عليه سريع من شافني ابجي
لزمني من ايدي ورفعني...

رهبار : الله الله خما اذيتج ، صار بيج شي هاا
احجي بويه لاتوكفين كلبي ..

ريفان : هزيت راسي بنفي من شفت خوفه عرفت هو ما متقصد يأذيني بس احس خصري انزرف
نزلت عيوني لكيت سجينه واكعه ع السرير والمسكه مالتها مزخرفه سوده هو سحبها سريع وحطها بالدرج
وسده اجه كعد يمي مسح ع وجهة بقوه
وسحب نفس ..

رهبار : اعتذر منج بس ما عبالي انتِ
ريفان : لزمت ايده وعيوني بعيونه ، احجيلي
رهبار : ماكدر
ريفان : شنو ؟
رهبار : ماكدر اتخطى ولا اكدر انسى
ريفان : شنو صار
رهبار : جماعتي راحوا كدام عيوني ماكدر انسى اي شي من الي صار علي ، أمجد ، حسن وغيرهم هواي
كلهم راح استشهدوا وبركبتهم عوائل
الأسرى الي يمهم كلهم ماتوا تحدت اثر التعذيب
وبيهم قتلوهم الأصوات ماتتطلع من راسي
المشاهد ما اكدر اتخطاهن اليل ما اكدر انامه
تعودنا سلاحنا جوه راسنا ع اي صوت نفز لازم نحافظ ع نفسنا قبل لا يغدرون بينا ويذبحونا
هسه من دخلتي انتِ سمعت صوت بس ما عبالي انا ب بيتي اول ما حسيت بوجود شخص يمي سحبت السجينه سريع بدون تفكير بهل حاله اخاف عليكم من نفسي الهل درجه وصلت بيه اخاف من نفسي ع الاشخاص الي حياتي بدونهم عدم ، انتِ امي ، اختي
بويه انا جاي اتعذب اكثر واكثر تمنيت استشهد
ويه جماعتي تمنيت أنال الشهاده ..

ريفان : يحجي وهو واضح عليه التعب والحزن
عيونه تحتهن سواد اديه بشرته كله متغير
مو رهبار الاولي
حط راسه بحضني وصار يحجيلي عن كل شي مر
بيهم من تعب وجوع من سهر وشغل وتفكير بنفسهم وبينه من خوفهم من الفشل من هواي اشياء
حطيت ايدي بشعره وصرت العب بي بهدوء وادلك راسه حسيت صوته انقطع و انفاسه انتظمت
عرفته نام ..
سحبت نفس بقوه وعرفت بوقتها رهبار تعب نفسياً اكثر من جسدياً وهل شي حيل صعب شوكت راح يتأقلم ويرجع مثل قبل ما اعرف ..

ثاني يوم الصبح رهبار طلع بعد ماتريك حتى يمشي
بموضوع سوريا
وعمتي فاطمه بقت تزن براس سوريا خطيه
بهذلتها الى ان اني اخذتها وكعدت وياها نسولف
هي حبابه وحيل فقيره بس ماعرف شنو قصتها
بالضبط غير بس هي هم جانت اسيره يم داع١١
الى ان اجه رهبار العصر بس شنو تعبان وهلكان
احنه بعدنا ما انطينه خبر للعشيره بان هو عايش
لهذا من رجع اتصلنا وبلغنا الكل حتى يعرفون
وهم راح يجون كلهم ثاني يوم

كاعدين بالصاله انتبهت ع رهبار صافن وباله مو يمنا وحاط الجكاره ب ايده جان يفز وكان تذكر شي
لتفت علينا وسألنا ..
رهبار : حسن وحسين وينهم رجعوا ؟

طبعا رهبار مايعرف اولاد عمه التؤم الي التحقوا ويا استشهدوا لهذا لازم نبلغه بس خايفين من رده فعله
من يعرف هم استشهدوا بنفس الي أعلنوا بي استشهاده وياهم ، بقينا ساكتين
رجع عاط بينا بصوت عالي ..

رهبار : مو جاي ااااااحجي سألت رجعوووا؟
فاطمه : يمه..
رهبار : كولي
فاطمه : ردت بخوف ، بيوم الي جابوا خبر استشهادك اسم الله عليك
رهبار : اااي كملي
فاطمه : نزلت راسها ب اسف ، ولد عمك ااستشهدوا بنفس اليوم اثنينهم وجابوا خبركم انتوا الثلاثه
هم دخلوهم بتوابيت وانتَ كالوا صار أشلاء وما الك جثه يايمه ..

ريفان : هي كالت هيج لو بقى جامد بمكانه بس صافن
عليها شلون تحجي بس تنفسه صار يصعد وينزل
بقينا خايفين من رد الفعل مالته بس هو ما سوه
شي اخذ سويج السياره وطلع من البيت
احنه بقينا بمكانه ولاوحده تحركت ..
مر الوقت وهو مارجع كلش خفت عليه
صار اليل وهو ماكو بقيت كاعده بغرفتي يم الشباك انتظره صارت الساعه 3 باليل جان اسمع صوت السياره اي هذا هو طفرت فازه انتظرته يصعد حتى اروح
اله واسأله عن حاله واطمن عليه
شوي وسمعت خطواته ع الدرج
طلعت صار بوجهي بس عيونه حمر وملابسه كلهن تراب
انقهرت حيل ع حالته
صحته بس مارد عليه دخل الغرفته اني دخلت ورى
وهو ماحجه ابد كعد ع السرير ويعاين بفراغ
رحت كعدت يمه خليت ايدي ع ايده اريد احجي

قبل لا احجي هو حط راسه بحضني وحضني من بطني ودفن راسه بحضني
فزيت ع الي سوه وبقيت جامده ثواني وسمعت صوته
يبجي رهبار يبجي !!!
ع البجي مالته بجيت اني ويا الموقف كلش صعب
رهبار اخر مره بجه بوفاه بابا الله يرحمه
بيومها جنت صغيره وصعدت ورى لكيته يبجي هو بوقتها حط اديه الاثنين كدامه وكال الي
الجمله الي الحد الان ادك براسي وما نسيتها
( بهذن الادين دفنت أبويه جوه التراب )
ما انقطع عن البجي ومستمر يبجي بخنكه وراها ب شوي بعد عني سحب ملابسه ودخل للحمام بدون اي كلمه ماعرفت اعوفه لو ابقى ماعرف شنو يريد
وشنو يرتاح بي

بقيت كاعده وهو بنص ساعه طلع من الحمام
سابح ومغير ملابسه المتربه
تمدد ع السرير ..

رهبار : اكدر اطلب منج طلب
ريفان : عيوني الك
رهبار : تكدرين تبقين هنا يمي بالغرفه انام بحضنج ما اسوي شي واذا خايفه مني تكدرين تتطلعين
ريفان : بقيت ساكته مصدومه بهذا الطلب
هو من سكوتي عرف رفضي انطاني ظهره
رهبار : تكدرين تتطلعين
ريفان : سحبت نفس وتقربت من الجهة الي ناطيني ظهره بيها كعدت وسندت ظهري ع التاج
ندسته من كتفه واردفت ، غهباغ !
هو لتفتت شافني فتحت اديه،  تعال ..
هو بدون ما يحجي لتفت بكامل جسمه حط راسه ع بطني وحضني بقوه من خصري حسيت
عظامي وحده دخلت بالثانيه

_ وين جنت ؟
_ بالنجف
_ غحت الهم مو
_ ممم
_ اغتاحيت من شفتهم
_ لا، تعذبت اكثر
_ هاي الدنيا فانيه اولها واخغها احنه وغاهم
_ ممم
_ تنام
_ تعبان
_ اغتاح اني يمك
_ لاتعوفيني
_ ماعوفك للموت ..

احتضني بقوه سحب نفس ونام ..
بقيت كاعده ورى ما نام اني هم حسيت بالنعاس
ونمت ، ثاني يوم كعدت مالكيته اكيد طالع علمود شغله
سوريا مر الصبح واحنه مخبوصين نشتغل لان راح
يجون علمود سلامه رهبار هو ما طول ورجع
سبح ونزل طلع برى يستقبل الناس
وقبل لا يطلع انطانه خبر اي شخص يسأل سوريا منو نجاوبه زوجه صديقه يومين ويجي ياخذها
واحنه بس نهز براسنه
مر اليوم تعب ب تعب
واجتي عمتي ام رفل من شافت رهبار كدامها حضنته وصارت تنعي ع ولدها حسن وحسين
هو من شافها هيج عيونه صارت حمر واديه قابض
عليهن بقوه
اخر شي كالت اله .

ام رفل : اخخخ يمه راحوا ولدي ، يمه انا بعد ما الي مكان هنا راح اخذ ولدي الاثنين الي باقين واطلع خارج العراق يم اخواتهم هناك ع الاقل أأمن من هنا
كلها حروب يكفي اخذت هاي الحرب مني اثنين يسدون عين الشمس بس ماكدر اكثر ، وبكل فتره اجي للعراق أزور ولدي الي راح اتركهم بالنجف امانه كل ما تصير الكم فرصه زوروهم لاتقطعون بيهم ترى ولدي حنينين ويحبوكم هواي

ريفان : كلنا بجينا ع كلامها جانت تحجي وتبجي
و ولدها يمها حاضنيها يسكتون بيها
بعدها ودعت الكل وراحت هاجرت من العراق
الدوله الي اخذت ولدها منها تركتها ...

العماره بهذا الوقت اكتضت بالموصليين والاجئين
والمخيمات ورهبار صار يمشي بمعامله سوريا
خلال ماتمشي هاي المعامله هو قرر يسافر التركيا
حتى يسوي العمليه ل رجله جانت حيل تلفانه وتحتاج عمليه سافر هو و صديقه ماقبل وحده من عندنا تروح
كال بعد ما ارجع اودي سوريا لدولتها هناك
سوريا يمنا وعمتي فاطمه ماتركتها ولا تركتني
عبالك خدم عندها عاد رهبار اخر شي اخذنا الفندق
اني وسوريا حتى ابقى يمها و ع هويه رهبار كدرنا ندخل وهو راح ثاني يوم رتب النا الشقه
ورجع أخذنا بيها بقينا هناك وهي وياي ورهبار يمنه
بس شنو اول ما دخلت للشقه ردت انهزم من الخوف واني اتذكر الي صار بيه ..
وهي خطيه سوريا
ولدت ولد يجنن سمته ع اسم رهبار لان هو ساعدها
وخلصها من الي هي بي
عرفت قصتها وشنو بيها بوقتها بجيت بجي ماصاير
حسيت هذا الطفل حالته مثل حالتي بس ع الاقل يعرف امه مو مثلي لا أعرف امي ولا بابا الحقيقين
دعيت من ربي مايكون مثلي وعيش مرتاح
بعد ما مرت هل فتره رجع رهبار اخذ سوريا وسافر بيها السوريا أمن عليها ورجع  وهنا انقفل ملف سوريا الله يسعدها ويحميها وين ما جانت ..

رجعت للبيت ومرت 3 أشهر ورهبار رجع قدم ع شغله ورجع يشتغل
بكل يوم يروح لدوامه أقرأ قران وابقى ادعي
حتى يرجع بالسلامه نشوان ماحجيت ويا بعد
حتى كتله بعد ماكدر وهاي الصداقه اذا قبل بيها رهبار عادي وذا ما قبل ما اسوي اي شي ميريده
هو اقتنع وسكت ما علق ع اي شي

ورى كم يوم رهبار ملتحق ف بليل طلعت اريد اجيب مي ف مشيت من غرفه ايلان ردت اعتبرها بس توقفت
ع صوتها ماعرف شنو جبرني اوكف واتقرب من الباب
مالتها وهاي اول مره اسويها
تقربت من الباب وحطيت راسي ع الباب جان اسمع صوتها تحجي فتحت عيوني ع وسعها واني اسمع
كلامها الي تحجي بهت وجهي وكلبي صار يدك بقوه
معقوله !!!
عفتها ورجعت للغرفه بس شنو ارجف وخايفه
بقيت كاعده للفجر واني افكر بالصار معقوله ؟ مامصدكه
ماعرف شوكت غفيت

فزيت الصبح ع صوت عياط وصراخ عالي نزلت ركض
خايفه لا رهبار بي شي لان هو ملتحق كلت بس
لا صار بي شي
لكيت عمتي وايلان كدامها
ما اسمع الا صوت ايلان تصيح بصوت عالي ل امها

ايلان : ماما والله ريفان هي مواعدته وهو جاي علمودها ..

بقيت صافنه مصدومه شنو مواعده منو وشنو هل كلام الي كالته ؟ ماحسيت الا عمتي فاطمه اجتي جرتني
من شعري وسحلتني جانت اكو صونه يابسه بالحديقه
لزمتها كطعتها ع جسمي تكطع بحيث
روحي فرفحت صعدت للسماء وردت
اصرخ اريد احد يبعدها عني بس مااكو احد ايلان
واكفه بعيد وماتقربت مني عيني صارت بعينها
لكيتها تضحك !!!!!
مااتركتني الا ان انتهيت بين اديها اخر شي
سحبتني من ايدي وشمرتني برى بالحديقه رجعت دخلت للبيت
واني بقيت برى زين الحراس وينهم ماكو !
الدنيا ظهر والشمس تضرب براسي
جسمي الهزيل يوجعني وبالكوه واكفه ع طولي
الالم هشم جسمي
طلعت فاطمه ورى دقيقه شمرت بوجهي
الجنطه مالتي وفلوس والجهاز مالتي
لزمتني من ايدي وشمرتني برى البيت
عاطت بوجهي واني واكفه بالشارع بوسط هل حر
فاطمه: الزمي هذن الفلوسسس كروه وهذن ملابسج واطلعي من حياتنا وكفينا شرج روحي ازن* مثل امج وعيشي حياتج ولا تجينا مره ثاانيه ابتلينا بيج من نفكناااج من الشارع وربينااااج ..
دخلت للبيت وسدت الباب بوجهي !!!
هسه ياريفان وين تروحي المنو ؟ منو يلفيج من الشوارع وصرت وحيده ؟

______________

للحكايا بقايا ♡

مشتاااااقيييين 😍💗💗

اذا ماشششفت تفاعل منكم رهيب ما انزل باارتوتات سبرايز حسب تفاعلكم انزل رايده منكم تفاعل
تصويت تعليقات ع الفقرات لاتفشلوناا عُمري انتواا 😚💗

للتواصل ع حساب الانستا akyta_98
مُتابعه للحساب قلبي akyta_98

.