دهاليز القدر الفصل السابع والعشرون 27 - بقلم نهى

دهاليز القدر
دهاليز القدر
للكاتبة
Nuha-d-h

زهراء
من سمعت صياح الزلم صار عالي
خفت خاف صاير شي
يمة بس لاشي يخص دوامي
اني اتعمدت ما حجيت لبابا ان عمار وصلني ومنعني من الدوام وتحججت بسالفة اني ما اكدر ادبرهة وعلاوي بعدة يرضع من صدري
لان بابا اذا يسمع بعمار حاجي هيج وياي احتمال يسويهة مسألت عناد وراح يعتبرة هذا تدخل من عندهم بشؤن بحياتي
بس اني اعرف عشيرة الشيخ سلمان واعرف اطباعهم واللي براسهم يسوونة لو على كص ارگابهم
واني خفت من المشاكل

زهراء كمزت من سمعت صوت عمار من حجة وية بابا
عمار
-عمي اريد اعرف شنو سبب رفضك الي
ابو زهراء-مااكدر ازوجكم بنتي ماعندي اعتراض عليك
بس لحد هسة ما ناسي اللي سويتوه ببنتي زهراء
اسف ما الكم عندي مرة
عمار وبقسوة -شوف عمي ما راح اصير نذل واهددكم واسحب ابن اخوي من حضن بنتكم
بس والله وحق الركب الراس على هذا
(وهويأشر على رگبتة)ويتّوعد بصوت قوي
بنتك ما تحل على زلمة غيري
واشوف زلمة يتقدم ويطلبهة للزواج
خليهة عندك معلكة لاتطول سما ولاارض
شوف عمي جيتك وعملت باصلي وطبلتهة منك وانت رفضت وعذرك كان ما مقبول
طول معرفتك وياي ماشفت مني بس الوجه الطيب
بس هَـا عمي لا تجبرني وتخليني اراويك وجهي الثاني والله لاسوي سواية لعدوك ما تتمناهة

ابو زهراءوبصياح-شنو قصدك تهددني لان ما انطيتك بتي
عمار-شلون تريد تفهمهة افهمهة بس الحليم تكفيه الاشارة وان شاء الله ياعمي انت حليم

والله مرت الايام اني بين صدمة وبين التفكير بعمارطالبني للزواج
ليش اني مو زوجة اخوه
ولو همة عندهم عادي الحمة ياخذ ارملة اخوه وكلش هواي عندهم هاي الحالة
بس كان كلامة وتهديدة لبابا يخوف
صحيح اني لازم اول وتالي اتزوج على گولت
زينب -خية بعدج صغيرة خو ماتكسرين روحج على هلولد هو هم ينرادلة اب ما راح تكدرين تربينة لوحدج

اي صحيح بديت اتقبل فكرة ان لازم اكو رجال يساعدني بتربية علاوي ابني ويسندني لان احنا بس بنات ووابوي مريض وما دايم النا
بس ماجنت مهيأة نفسي او متخلية ان الرجال راح يكون حماي عمار

عدت على سالفت عمار فترة
وافتهمت من بابا ان هو رفض عمار من اتقدملي للزواج

ابو زهراء -بابا هذولي ناس مستقوين وكلشي يردونة بالقوة ياخذونة ونوب فوك عملتهم ماساكتين لا ويردون يزوجج لعمار شنو من صلافة شايليين هذولي
اني ما حجيت شي
لان امري بيد ابوي
وعدت الايام
وفطمت علاوي من صدري وصار عمرة سنتين
وكان يجوني هواي خطابة واني من يمي ارفضهم
ورجعت للدوام
وام عمار لازالت تجينة عبالك الموقف مال ذاك اليوم ابد ماصاير ولاجنك عمار ابنهة اتعارك وية بابا
خطية وشفتهة مرة كاعدة بغرفتنا اني وزينة وهي تنام ويانة بالغرفة من تجينا
شفتهة شابگة علاوي وتلوليلة علمود ينام جانت تبجي وتحجي بصوت ناصي
ام عماروهي تشم بعلاوي تلولي بكلمات -دلولو

دللول

دللول يالولد يا ابني دللول

يمه عدوك عليل و ساكن الجول

يمه يحقلي لاصير دلي

ترى اطلق الدنيا وولي

يمه هب الهوى واصطكت الباب

ترى وحسبالي يا يمه خشت احباب

يمه اثاري الهوى والباب كذاب

يمة ماريد من قدرك غموس

ولا اريد من جيبك فلوس

يمه انا يحقلي اتصير الي هيبة وناموس

ترى اطلق الدينا واولي

يمه على ظليمتي من دون حلي

يابني يالولد يني

يمه ترى ابني واريد حگ رباي منه

زهراء كعدت اتسمع لصوتهة شلون تلولي لعلاوي وتبجي وكعدت ابجي واياهة
ويوم عن يوم اشوف ام عمار يزيد ‏تعلقها بعلاوي

بابا كان يتعامل وياهة باحترام لان يعرف بيهة تموت على علاوي وما يكدر يأذيهة ويكون سبب بابتعادهة عن علاوي لان هي مالهة ذنب بتصرف عمار وية بابا

جان من يجوني خطابة اني من يمي ارفضهم
لان تهديد عمار لحد هسة ببالي واخاف يسوي لبابا شي
ومرة من المرات تبارك جابتلي عريس وكعدت تنك على راسي وواني ارفض وحتى ما احجي لبابا وماما
لان خاف بابا يزوجني هو عادي عندة اذا اتقدملي واحد زين وبابا يطمن من ناحيتة اتوقعة گبل يزوجني

والله وفي يوم من الايام وجان يجي اليوم اللي جنت خايفة منة

ابو زهراء - بوية زهورة تعالي
زهراء واني جاي الف شعري كباية ليفوك وطايح خصل من شعري
ه
زهراء -نعم بابا
ابو زهراء-بوية اليوم اتقدملج ابن صاحبي معلم زوجتة متوفية وعندة ولد واحد وهمة ناس طيبين وسمعتهم زينة وانة رحت سألت على الولد وحمدولي باخلاقة هَـا بوية زهورة شكلتي

زهراء واني گلبي گام يرجف ما اعرف ليش ضجت
ودنكت راسي
زهراء -بكيفك بوية اللي تشوفة سويه
ابو زهراء -والله بوية انتي وردايتي ما اكدر انطيج لا واحد بس وداعتج لو ما الولد سائل عليه وطلع خوش ولد
ما افرط بيج ها بوية شكلتي نگول على بركة الله
زهراء بقبضة گلب مخنوكة-اي يابة توكل

عمار
سديت النقال بوجه زهراء لان تريد ‏ترجّع الفلوس اللي خليتهن الهة مصرف بقاط علاوي

اللي قهرني ان كلامهة كان صحيح بَـــاي حق وبصفتي شنو اصرف عليهة
صارت هواي مواقف اللي جبرتني وخلتني اخطي الخطوة واروح اطلب ايد زهراء للزواج بس مع الاسف ابوهة رفض وصارت المشاحنة بيني وبين ابو زهراء واخر شي كان تهديدي لابو زهراء ان هي الي ماتصير لغيري
من رفضني ابو زهراء احس النار اشتعلت بگلبي شعل
وراهة سمعت هواي اجوهة خطابة وهي ترفض طبعا هذا الحجي عمتي فوزية توصلة الي ما اعرف شيصير بية من اسمع اجوهة خطابة اظل مثل الواحد اللي يمشي على الجمر ومنتضر رحمة الله شوكت تنزل عليه جنت من اسمع بيهة رافضة احس ماي بارد ينزل على گلبي

ومرت الايام وصار عمر علاوي حبيبي سنيتين
وجان يجي اليوم اللي سمعت بي من عمتي فوزية ان زهراء انخطبت
طبعا قبلهة بكم يوم امي رجعت من بيت زهراء ووجهة اصفر وسألتهة بوكتهة شبيج يمة كالت مابيني شي ونوب صبحت امي ثاني يوم سكرهة مرتفع ونايمة بالفراش
‏عرفت بوكتها ان امي درت بخطوبة زهراء وماحجت
لكن لكن صحتهة انتكست لان هي حيل متعلقة بعلاوي

عمار وما ادراك ما عمار
اخخخخخ اخ احس اكو بركان بگلبي واريد اطفي ومحد راح يطفي غير الوعد اللي قطعتة لابو زهرء بذاك اليوم
والله لأگلب عاليه واطيهة واراويهم الامهات شتجيب

زهراء
صارت
خطوبتي بس حجي نسوان بقت بس مشية الزلم
واللي راح تصير بيوم الخميس
وخطية كسرت خاطري ام عمار من درت بالسالفة ظلت بس تبجي وتبوس بعلاوي وكأنما ياسر البارحة مات
واني
سولفت لتبارك بالمدرسة عن العريس الي تقدملي وخطية تبارك هلهلت كدام المعلمات واني كلش استحيت وخجلت والمعلمات عرفن بالسالفة وباركنلي بس ست فوزية وجهة صار ثكيل وحتى ما باركتلي اني هنا گلبي انقبض
وخلص وقت المدرسة واجة علينا السايق والمعلمات طلعن كبلي واني لميت كتبي ولبست جنطتي وخليت نقابي على وجهي ولبست عباتي
ورحت اركب بالسيارة

عمار من اتصلت علية عمتي فوزية
فوزية -عمة عمار الحك
عمار بخوف-شكو عمة شبيج
فوزية-عمة عمار
زهراء اليوم اجت للمدرسة وتگول انخطبت لمعلم يصير ابن صديق ابوهة. وابوهة وافق وهي هم وافقت الحك عمة والله امك اذا درت تموت لان راح ياخذون منهة ابن الغالي ياسر

احس نار تطلع من راسي كبل اتصلت على هشام
عمار-هشام جيب الولد وتعال بسرعة
هشام -هاخوية عركة لو فزعة
عمار -لاخوية راح اسطي على مدرسة واخطف معلمة

هشام
وهو فاتح حلكة -على كيفك عيلنا يامراد علم دار شنو سطو شنو راح تخطف ولك شخينا شارب شي

عمار -هشام ماعندي وكت لهذرتك اني طالع قبلك للمدرسة عمتي
هشام وبخوف -ولك هاي شني صارت صدك اوكف اوكف لاتروح انتظرني جايك
والله وصل هشام ووياه سيارتين بيهة ولدعمة

عمار شمر مفاتيح السيارة من فوك السيارة على هشام وكلة انت سوق
وصلنا للمدرسة واتصلت علية عمتي فوزية
فوزية -عمة عمار وين صرت ترة حلت المدرسة وزهراء اجه عليهة الخط وهسة هو منتضرهة بالباب
عمار -هَـاي انة عمة يمكم بالباب اي شفت السيارة مالتهة يالله مع السلامة
عمار - ولك هشام تحرك بسرعة
وخطية
هشام يضحك ويسوق -والله يا ولد سلمان من وراكم راح اعنس ومحد بعد راح ينطيني مرة من ورة سواياتكم

زهراء

طلعت جاي اركب بسيارة المعلمات
وقبل لااوصل طبكت علية سيارة
ونزل منهة عمار
وفتح الباب الخلفي مالت السيارة
شوفي يبنت الناس سمعيني زين هنة كلمتين
لاتعاندين وتفضحين نفسج گدام المعلمات ركبي برضات نفس لان انتي اول وتالي تركبين بالسيارة بالطيب بالقوة تركبين تركبين
زهراء
وبشهكة - لا عمار هاي مو سواية ابن شيوخ
عمار ولاول مرة يسمعهة تنطق اسمة على لسانهة
عمار -لا يازهرة جنج ماتعرفين ولد الشيوخ من ينثارون يگولبون عاليهة واطيهة
زهراء شفت روحي اني لوحدي ومحد راح يكدر يخلصني من عمار سواء رفضت اوقبلت بالحالتين عمار راح يسوي اللي براسة فاحسن شي اركب بكرامتي وما اجيب الحجاية لنفسي

يتبع