البارت 43
ضحيه لمن لايرحم
بقلم زهراء الحسناوي
،،،،،،،،،،،،،،،،،
السلام عليكم بنات
اعتذر ع التاخير نت ماكو
راح اسرع الاحداث حتى اختمها بااقرب وقت
قرائه ممتعه
،،،،،،،،،،،،،،،،،،
عرفتلها
وگمت ما زاعل اليرحون
ولا عالباب اضل متاني ليليه
من شفت الحلم ينوخذ مو ع اللون
بعد بطلت اظم احلام ورديه
الناس اختلفت وضهرك اتچي وين؟
اذا ماتلگه حايط تگعد بفيه
لهسه وماعرف عايش وياهم ليش؟
ويذوب الثلج بس ينچوي شويه
حتى جروحي من عدهم خذتهن شوگ
ابد ماحسستهم بيها منيه
من سألوني صح گالو انطوك جروح؟
لا گلت للشماته انطوني عيديه
شايف من تجيك الطعنه من احباب؟
هيج جروحك تحس بيها روحيه 💔
،،،،،،،،،،،،،،
زينب،، ماگدرت اوگف على رجليه گعدت بالگاع ومديتهن احس روحي فضت ماي
شگد مرت عليه مواقف صعبه بحياتي
بس مثل هلموقف ماشفت
اتمنيت الگاع تنفتح وتبلعني من فشلتي من حماي
حرت الملم بروحي وبرجليه اباوعله ارتبك مايعرف
شيسوي يركض منا ويرجع مناا مدوهن
على صايحه اجت عمتي ماحجت شي من شافت وضعي بس كالتله خابر اختك خل ترد اخذها انت وياها للمستشفئ
حسسن،، مناااا لمن تردد مييته الطفلله
ام لواء، واانتي محضره غراضج مال الولاده؟؟
زينب،، بهت حيلي الالم قوه مابيه احجي هزيت راسي بمعنى اي رفعت ايدي اشرت ع الدرج صاير گبالي
كتله بصوت ناصي
اصعد الغرفتي جيب الجنطه
دليته بمكانها صعد ركض سوه الدرج شبختين
دقيقه ونزل بيده الجنطه وبطانيه وعبايه شايلهن اخذ الجنطه والبطانيه للسياره
والعبايه حطها على متوني
رغم ذيج الوجعه بس فشلت منه واستحي انهض جدامه وهدومي غرگانه
اشرتله يطلع حتى اكوم
طلع من باب المطبخ سمعت بس صوت السياره اشتغل وصوتها صار قريب عرفته دناها للباب حتى مااتعب بالمشي ردت اكوم ماكدرت حسيت الطفله راح توكع
صاح بيه حسن
حسن،، دگوومي يااخويه اختتي انتي كوومي لاتستحين
زينب،، بجيت من الخوف مد ايده كومني وعدل عباتي اول ماوگفت گلت هذا هو وگعت بنتي احس روحي راح اجيب بنص المطبخ من خوفي سديت رجليه ولزمت بطني بثنين اديه رفعتها خطيت خطواتي وياه على كيف
شفت السياره يم الباب بس مسافه تقريبا ثلث امتار
مشيت واحس الماي يوكع مني
من وصلت فتحلي باب السياره التفتت
شفت خيط رفيع بالكاع ماي من المطبخ للسياره
ارتعب گلبي من الخوف بصوت يرجف عيوني على اثر الماي صحت
حسسسن
حسن،، اصعددي لاتباوعين
زينب،، شفته فارش البطانيه ع الكشن صعدت ورجيت راسي سندته لوره
اول ماصعدت شخط السياره البيت اهلي بدون مااگله نزل يركض فلش باب اهلي من الدك طلعت امي مرعوبه من شافتني فاتت تركض ثواني وطلعت لازمه عبايتها وجواريبها بيدها
صعدت يمي لزمت ايدها عصرتها
ام احمد،، ياالله بنييتي كوولي ياالله
زينب،، زادت الالام الطلوگ بس ابد ماحجيت ولاصحت شگد الوجعه قويه بس شلت ايدي عضيتها استحيت من حسن
اون ودموعي تجري حسن اتخبل طاير بين السما والگاع واذا سياره صارت جدامه يعني صاحبها شبع شتايم وغلط
من كميه الوجع حسيت روحي انتهيت بس فاتحه عيوني ولازمه ايد امي بقوه
اسمع امي تحاجيني مااكدر افتح حلگي
حسن عدل الجامه يباوعلي بخوف
حسن،، ززيينبب زييينب
باوعيللي شووو زززينب
وصلنه مااضل شييي اتحملي شوويه بعد اخوج ونوصل واطلعين طيبه اانتي وبنييتج
زينب،، هزيت راسي بمعنئ اي بس دموعي تجري كاتمه صوتي گوه
وصلنه للمستشفى نزل حسن خبصهم طلعت الممرضه وياها ولد جابو سديه لان مااكدر اكوم
امي نزلت الممرضه كالت اتمددي راح نشيلج بالباطنيه مالتج نحطج ع السديه وصدك مددت حسن دخل للسياره من يم راسي رفع الطرف شالني وامي والممرضه حطوني ع السديه
اخذوني بوجهي الصاله الولاده
ماقبلن امي تفوت وياي دخلت وحدي خوف ورعب والم فضيع
اول ماشافتني الدكتوره كالت طاگ ماي الراس
واصله مفوله هسه نحطلج مغذي وانشاءالله الله يسهلج
وفعلا الممرضات شدلي كانونه وحطلي مغذي
بدت الالام تزود صار الالم ماينحمل
بس ذكر الله مانزل من الساني
الوب وصيح رحممتتك رربي
الدكتوره گالت ماما اددفعي راح تخنگين الطفله
والله مااعرف اشلون اطلگ گتلها واني ابجي اشللون؟؟
وكفت على صفحه علمتني والثانيه وياها
بالف ياالله يالله جبت واخيرا
احس روحي نسحبت مني سبحان الله
صدگ اذا سموها الوجعه المنسيه بحيث اول ماينسحب الطفل من احشاء الام تحس براحه عجيبه وتنسه نهائيا انت قبل دقايق جنت تصارع الموت
درت وجهي اباوع للمرضات شايلات الطفله گالباتها على بطنها بديهن لاحس ولانفس ولاصوت
انخمش گلبي واني اباوعلهن يفركن بضهرها بشكل دوائر
من التعب همست مااتت؟؟
محد جاوبتني مخبوصات بيها
جابن جهاز بي مثل الصونده دخلنه بحلگها صار يطلع ماي من حلگها دقيقه كامله اباوعلهن انهد حيلي
ردتلي روحي من شفتها حركت اصابعها
استقرت حركتها الدكتوره ضربتها على مؤخرتها بخفه بجت الطفله
احس صوت بجيها نغمه اداعب روحي ومسمعي
رفعت عيوني للسما كتله اشكرك يارحيم ياالله
انوب رادنها تسكت ماتسكت جرتها بجيه فحطانه
حتى الدكتوره گالتله ولج الميته قبل شويه هبطتينه وهسه بس نريد نسكتج
حطنها على صدري عبالك انطوني مفتاح الدنيا بيدي
احتضنتها اخاف تفلت مني وهنه بدن ينضفني
اخذنها مني نضفنها ولبسنها الممرضه صاحت ل امي بشرتهم بولادتي دخلت امي يمي تمسح بدموعها باستني براسي وبنتي بيدها
شويه ودخلت الممرضع الدخلتني للصاله بالبدايه تضحك وتحجي ويه الممرضات اجت يمي
اكلج هذا الصاك البره رجلج؟؟
ام احمد،، لايمه حماها
الممرضه،، هنيالج عندج مثله حمه
وزعلنه كلنه عشرات حلاوة ولادتج الحمدالله على سلامتج عيني
زينب،، اجت الابنيه بيدها الجنطه اخذت الطلفه من امي ودنگت طلعتلي ملابس
نزعتني شمرت ملابسي الولدت بيهن بالسطل ولبستني غيرهن
كالت راح ناخذج الغرفة الاستراحه ساعتين ثلاثه ياالله نطلعج بس لازم تسوون بيان ولادة للطفل
امي ظلت صافنه ماحجت اخذوني للاستراحه
امي ساعدتني حتى ارضعها كتلها يمه شترضع شو ماكو حليب؟؟
ام احمد،، خليها ترضع بنيتي يقوه فجها وتفتح القنوات مال الصدر لان هذا الصمغ كلش يفيدها ماعليج بيها هي تسحبه وفعلا خليتها على صدري
شعور غريب دنگت بستها براسها انتبهت اكو شخط احمر خفييف كلش فوگ عينها
گتلها يمه شنو هذا الشخط؟؟
اجت يمي باوعت بوجه الطفله
ام احمد،، كلشي مابيها بنيتي بعدها لحمه حمره شويه وتختفي
يمه اني طالعه الحماج افهمه على بيان الولاده لان لازم جنسيتج وجنسبة زلمتج وعقد الزواج حتى يسجلوها وانتم ماعاقدين محكمه
زينب،، عافتني وطلعت شويه ورجعت گالت حماج يكول اني راح ادبرها واطلعها على جنسيتي من المستشفى انگول ابوها مسافر وجنسيته عنده والعقد الزواج ماخذه وياه لو مانندل وين مودي
اجت الممرضه گالت تكدرون اطلعون جابتلي عربانه دفع حطتني بيها ودفعتني لبره وبنتي امي شالتها حطتها جوه عباتها
اول ماطلعت من صالة الولاده صار بوجهي حسن شافني اتسعت ضحكته اتقرب مني
حسن،، الحمدالله على سلامتج ام فخريه
زينب،، ابتسمت بتعب اتقرب يم امي يريد يشوف الطفله
طلعتها امي من جوه العبايه اخذها منها باس راسها وكبر بااذنها التفتلي
حسن،، اتفقنه انسميها فخريه؟؟
زينب،، بس ابتسمت وعفست وجهي كتله لاااحباب
حسن،، خوش چا جاسميه احلى
زينب،، امي ضحكت كتله لااا
حسن،، لاجاسميه ولافخريه جااشنسميهاا؟؟
ولج اسم حمزيه يخبل ومامطروق سابقا
زينب،، امي تضحك وهو هم ضحك
حسن،، يجي ابوها ويسميها اسم على ذوقه
لان انتي مامقتنعه بالاسماء الحلوه الاقترحتهن
زينب،، بعدها طلعنه للسياره بالطريق
اتصل بلواء وفتح حاكيه
اول ماسمعت صوته غمضت عيوني حيل
اتمنيته يمي بهاي اللحظه
حسن،، گاله ابشرك ابو فخرييه بنتك تخبللل
زينب،، لواء،، فرحته ماسايعته ارتبك ساعه يساله عليه وساعه ع الطفله حسن كاله زينين وذوله راح ارجعهم لهلهم مااخذهم البيتنه
لواء كاله عفيه خل تروح يم امها يومين واجي انشاءالله
اخر شي گاله انطيني زينب احجي وياها
مدلي الموبايل حسن اشرتله براسي گتله مااكدر
حسن،، بويه ماتگدر من تجي اشبع سوالف
ياالله ابو فخريه في امان الله
زينب،، لواء بس يضحك حسيته يتمنى يكون يمنه من فرحته
وصلنه البيتنه نزلتني امي وخلت الطفله يم حسن بحضنه كالتله بس ادخل امها للبيت واخذها منك
وفعلا دخلت لكيت مريم اتلكتني اختي مثل الحمامه
تبوس بيه محضراتلي فراش وسله للطفل خاصه لطفل النفاس مدري منين جايباتها
اتمددت بفراشي وامي طلعت جابت الطفله واجت
كالت حماج ماقبل يدخل للبيت الله ينطي العافيه خوش زلمه معدل
اخواتي كعدن يمي فرحانات يباوعن للطفله عبالك كائن غريب بيناتهم مريم كل شويه تبوسها تكول خدها ناعم يخبل
ساعه واندك الباب راحت امي تشوف منو
شويه ورجعت شايله مسواگ اشكال والوان ومن ضمن المسواگ دجاج
ام احمد،، حماج جابهن واجه والله فشله منه
كتله فوت خاله ماقبل
زينب،، مستحيل اكو كلام يوصف حسن بالدايه جنت افكره مجنون بس بعدين عرفت واكتشفت اعقل وارزن شخص بيهم هو حسن بس هو مجروح منهم
اندعيت من الله يدمل جرحه وينسئ ويعيش حياته
خطيه حتى الدجاجات ذابحهن وجايبهن
بسرعه امي راحت نضفتهن وطبختلي تشريبه بدون بهارات كالت احسن حتى مايصير ابو صفار بالطفله
حسيت ميته من الجوع عبالك بطني فارغه لان الطفل جان تارسها من جبت فرغت تريد اكل
بحيث امي ثردتلي بالتشريب اكل وايدي ترجف جوعانه
شبعت وره ساعه حسيت روحي جعت وهم وكلتني كتلها يمه شبببيه اني؟؟
ام احمد،، مابيج شي بنيتي
بطنج فرغت مابيها طفل تحسيها فارغه تردين اكل يسد جوعتج كم يوم وترجعين طبيعيه
زينب،، بعدها نمت من التعب بليل اجه حسن جايب موبايلي وياه متصل بي لواء طالب منه يصعد الغرفتنه ومدلي بمكان موبايلي دائما اخلي بهذا المكان
منطي الموبايل ل امي ورايح
ربع ساعه اتصل لواء طولت الدگه يالله جاوبت
لواء،، الو زنوبه الحمدالله على سلامتج
زينب،، همست الله يسلمك
لواء،، ومحمد اتمنئ طير اطير واجي يمكم بشريني اشلونج انتي خو مابيج شي؟؟
زينب،، لا مابيه زينه
لواء،، بنيتنه اشلونها؟؟
حسن يگول بنتك تخبل
كتله طالعه على ابوها اكيد
زينب،، كتله اي كلش طالعه عليك
احجي من وره خشمي مبينه زعلانه بذيج الحلاه والطنگوره لازمتني
طگها ضحكه بصوت عالي
لواء،، نسوان ماتصيرلجن جاره ابد
وينج وين الزعل؟؟
وبعدين شو احسج مامقتنعه تشبهني اشوفج تستهزئين؟؟
زينب،، گتله وين حلاتك خابص روحك؟؟
احسسه من صوته فرح لان جاي احجي وياه بحيث بس يضحك فرحان
لواء،، بويه ادري موحلو الحلاه للنسوان
اكيد طالعه على امها اتخبل
زينب،، لواء تره لسه الطفله بدون اسم
گالو اله جناسينه وعقد الزواج
لواء،، والله اني عاجبني اسميها فاطمه احب هذا الاسم
زينب،، كتله بكيفك هذا هو فطومه فطومه
لواء،، من اطلعين الاربعين نروح نعقد محكمه حتى نسجل فطم
ها بويه مقتنعه؟؟
زينب،، كتله اي بكيفك
لواء،، ياالله بويه انه رايح يومين ثلاثه بااذن الله ارد
شتحتاجين اتصلي ب حسن منا لمن اجي
زينب،، نهئ المكالمه بعدها مرت يومين عادي ماكو شي
خطيه امي ابتلت بيه بليل تسهر للصبح ويه الطفله لان تنام بالنهار وبليل تكعد
امي تكول تنطر انفاسها مااعرف شنو يعني
بس عود لان طفله انفاس ماتنام تضل تبجي
ثالث يوم امي سبحتها الثالث واني يوميه اسبح بس الثالث لازم تسبحين سبحة الثالث مااعرف هاي عادات قديمه عد اهلنه
َمن سبحنه الطفله انتبهت الشخط البعينها مبين كلش مومثل اول يوم جان مجرد اثر خفيف
هسه لا عبالك كارصتها دوده مبينه
كتلها يمه شو هاي البعين بنتي جاي تبين اكثر؟؟
ام احمد،، عوفيها يمه شجلبتي بيها يمكن هاي وحمه
انتي متنسيه بشي ماماكلته؟؟
زينب،، بالبدايه ماتذكرت بس بعدين كتلها اي اشتهيت الشوندر ومااكلته
ام احمد،، جا هي هاي شوندره بعينها
وانتي مالكيتي غير تتنسين بي وتحكين عينج؟؟
زينب،، والله يمه تدرين مااحبه من زمان بس شفتهم ياكلون شو صار بنفسي
ام احمد،، انشاءالله تروح لتخافين بعدها طفله وجها يتوسع وتصعد الوحمه تصير براسها لو يم اذنها
زينب،، شويه اطمنت من كلام امي لان كالت هيج
رابع يوم رجع لواء بس مااجه يمنه ادري مايفوتون البيت اهلي انتبهتلهم لاهو ولاحسن من الباب ينطون المسواگ ويرحون
اتصل بيه كال اني اجيت ومااكدر اجي يمج تعرفين شنو السبب
يومين واجي اخذج
كتله لا تعبانه خليني اطلع العاشر واجي كال ميخالف مااختلفنه
يوم عن يوم الاثر بعين بنتي يبرز اكثر
بيوم العاشر اتصل بيه كال العصر ادزلج حسن يجي ياخذج كافي طك كلبي اريد اشوف بنتي
وفعلا لميت ملابسي وغراض بنتي اجه حسن
كمت ابجي من طلعت من بيت اهلي
ماادري بذني الكم يوم ياهو اليندسني ابجي على ابسط شغله عيوني تجري مرت عمي اتكول لان نفسه الهرمونات مامستقره
من صعدت بالسياره حسن كال اشلونج ام فخريه
اني بس ابجي
حسن،،، ياربي دخيلك عليمن هلبجي؟؟
زينب،، مااكدر احجي مخليه بنتي بحضني ودموعي تجري
حسن،، عليمن تبجين يابويه؟؟
هسه نروح تتلگانه عمه نذيره وعمه حنان الحبابات وياهن جدو الطرن
يخلوج تنسين حتى اهلج
زينب،، ابتسمت من بين دموعي گتله تره اسمها فطومه ابوها سماها
حسن،، هو بكيف ابوها بس تعقدون اني اخذ الاوراق مالتها واسميها فخريه عاجبني هذا الاسم
زينب،، كتله والله ولااخليك من هسه خوفتني
هو بس يضحك
وصلنه للبيت نزل حسن ونزل غراضي واني بيدي
بنتي اول مادخلت اتلگتنه نذيره وحنان
ابد ماسلمن رغم گلت السلام عليكم بس محد جاوبت
تركتهن وصعدت الغرفتي اول مادخلت شفته متمدد نهض من مكانه هلمره بدون عكازات بس يعرج
ماذاب ثگله على رجله المتصوبه
سلمت علي رد ابرود ولاجن هذا لواء الخبصني خبص بالمكالمات واني يم اهلي
اخذ الطفله باسها وحطها بحضنه يباوعلها بس عادي كانه مافرحان بشوفتها مثل ماجان مبينلي بالمكالمات مالته
لواء،، شنو هاي بعينها؟؟
زينب،، ماادري من جبتها هي هيج امي تگول وحمه
سكت ماحجه
انتبهت للغرفه شفته مشتري كاروك وبي فراش صغير علئ گد الكاروك شالها وهي نايمه حطها بفراشها
حسيت بي شي بس ماحجيت تركته براحته
عافني وطلع لا سلام ولاكلام ولااصلا اكو لهفه مال واحد صار شهر ماشايف مرته
اخذت ملابسي اريد احطهن بالكنتور فتحت الباب مال الكنتور شفت نقط جوزي ع الخشب مثل الدهن
يابسات يعني قديمات استغربت شنو ذني؟؟
كملت الملابس وجاي اعزل بالغرفه على كيفي
درت وجهي شفت المكان بين الحايط والكنتور اكو قطعه لاطشه بالحايط مثل لون الچاي
ونازل منها خطوط عبالك واحد جايب جاي ولاطشه بالحايط
ضليت صافنه شنو ذني؟؟
زين هسه المنو احجي؟؟
گلت من يصعد لواء اسأله عليهن
وفعلا من اجه سالته كال ماادري
بليل هو جاب عشه جاهز صعده الي
واني بس نزلت فورت ماي البنتي مال الحليب
وصعدت ماكو احد ماشفتهن جوه مدري وين رايحات
من نمنه مايحجي وياي داير وجها عني
نسيت كلشي ومديت ايدي حضنته مشتاقه يلمني الحضنه
لزم كف ايدي بعدني عنه
لواء،، زينب اريد انام وخري عني
زينب،، انهضمت ماجاي افهم شبي
اريد بس يمدلي ايده انام عليها
تالي فشلني ونام
مرت الايام هذا وضع لواء على ابسط شي يصيح ويگلب البيت عليه يفشلني جدامهن
15يوم نفسه عمتي گالت كافي انزلي اشتغلي
موعمليه وخاتله لاشغل ولاعمل
وصدگ نزلت انطتني نذيره معجانه مليانه طحين اهواي
گالت اعجنيها كلها يوم عليج ويوم على حنان
عجنتها وخبزتها سندت الخبز كلش اهواي مال اربع ايام تقريبا
جابت نذيره علاليگ كل سفطه مال خبز تحطهن بعلاگه جمدت نصهن بالمجمده وطلعت علاگه وحده
ناكل بيها
اربع ايام هنه ماخابزات ياكلو بالخبزته اني
بيوم الخامس شفت حنان تعجن بالمطبخ والله يمكن طاسه مال طحين وحده كلللش قليله يمكن ماتكفينه يوم واحد
عرفت سالفتهن خاف حنان تخبز بين يوم ويوم
خلني اني اخبز الاكثر حتى يجمدنه وتصير نوبتها كل اربع ايام تخبزلها عشر گرص خبز
حجيت اللواء زمخ بيه يكلي المهم شايله نوبه وياج
احسه اهواي تغير مواشلون ماجان
بنتي يوم عن يوم عينها تنفخ اكثر كتله لواء خل نعرضها على طبيب
لواء،، يومين وناخذها
زينب،، وفعلا يومين اخذنها للدكتور من شافها گال هاي وحمه دمويه تضخ دم ويوم عن يوم تكبر وراح يجي فتره تكبر وتسد عينها تسببلها تهدل بالجفن
كلام الدكتور صدمني
هو يحجي واني ابجي
كال لتخافون الطب اطور ومن يصير عمرها سنتين جيبوها اضربها ابره بداخل الوحمه حتى بعد مايوصل الها دم وتكبر وبعدها نسويلها عمليتين نشيل بيهن جزء جزء وبعدها عملية ترقيع
وبعدها ثلاث عمليات تجميل
الدكتور يحجي واني متت بجي ابوس بيها طفله راح تفتح عينها على الم العمليات والمستشفيات دخيلك ربي
الدكتور،، بالايام الجايه راح يتضخم حجمها
حاولي تلفين ادين بنتج بكفوف تلبسيها حتى ماتجرح عينها وتنزف الوحمه
لو من تگمطيها لفيها عدل حتى ماينحلن اديها وتجرح روحها
زينب،، يحجي واهز راسي مابيه انطق حرف اخذنه بنيتي وردينه للبيت
لواء ابد ماحجه بس ينفخ جگاير
من رجعنه للبيت عمتي اسمعها تساله عليها وهو يجاوبها
ابد ماشفت واحد منهم اتقرب للطفله وباسها لو حطها بحضنه غير حسن
مالهم شغل ابنتي ابد
بس النهار كله لازمين جهال حسين مايهدوهم ابد
قبل الاربعين بكم يوم اجت ام سجاد
بس وحدها فرحت بجيتها من سامعه بيه جايبه رايحه مشتريه ملابس لفطومه كتلها شتسوين بيهن مواشتريتي الجهاز مالتها كله؟؟
ام سجاد،، روحي بملابس الاطفال
يوم عيدد واعرس وليدي وافرح ابزره يمكن مااخلي شي بالسوگ يعتب عليه
زينب،، بليل ردت احجيلها ع الدهن البلكنتور والاثر الي موجود ع الحايط بس سكتت لان مره من حسن حجه وياها رزلته ماقبلت
بيوم الاربعين مالتي سبحت وهي سبحت فطومه
وكحلتها بكحله حجر وخلتلها حمره لخدودها وشفايفها
كتلها ليش؟؟
ام سجاد،، الكحل يقوي العين ويكثف رموش الطفل
والحمره حتى شفايفها تضل حمره
زينب،، شالتها تبوس بيها مقهوره على عينها كلش كبرت الوحمه صارت بحجم نواية المشمش
ثاني يوم راحت ام سجاد البيتها
واني لزمت نوبه وياهن على اساس جنت كاعده وطلع الاربعين
وهنه والله من يوم ال 15لزمني نوبه خبز وطبخ
لواء يشوف بعينه ويسكت مايحجي عبالك اخرس
وره الاربعين بيومين
كتله انت موكتلي وره اربعين الطفله نعقد محكمه حتى نسجلها؟
خطيه تضل بدون جنسيه
لواء،، موهسه من يصير مجال
زينب،، صار يأجل بالموعد يوميه باجر وعگبه
حنان صارت تلبس وتكشخ وترتب بروحها النهار كله تفتر جدام لواء
تريده ينتبه الها
انوب صارت تسوي عركات بالبيت وعمتي تسكت ماتفتح حلگها ابد
وصلت بيها الحاله تضرب اطفالها وهمه توهم عمرهم 6شهور تضربهم وتصيح اني محد بحالي
خدامه بهذا البيت
لو ادري ضاله يم اهلي اشرفلي
مره سمعت عمتي تحجي ويه لواء
اتگله ليش ماتفوت يم مرتك الثانيه حرام عليك تاركها
هو سمعها اتخبل كالها ابد لاتحجين هيج من البدايه اتفقت وياكم بس اعقد عليها حتى اضمن جهال اخوي يربون عدنه
امه من شافته سكتت ماحجت بس حنان سمعته وجها انطعن احمر من القهر
تركتهم ورحت للمطبخ هي واگفه
ردات تطلع وكفت بصفي
حنان،، اني. الج والله لحرگ گلبج بس اصبري
زينب،، تركتني وطلعت
صعدت الغرفتي لواء ضايج حجيتله على سالفه حنان زمخ بيه بصوت عالي
لواء،، سواللفجن حلنهاا بينجن لاادخلني ماالي خلگ
زينب،، صدگ متت قهر ماعندي غيره بعد الله سبحانه وتعالى اشكيله
بليل نمت حسيت بي سحبني الحضنه
دفعت ايده
لواء،، تعاي يمي
زينب،، لواء اريد انام
لان صدك مقهوره منه مرات تحسه يكرهني من تصرفاته تحسه يريد يذبحني وماطايق وجودي ومرات لا اشوفه لواء القديم يتمنى يلمني الحضنه
حجايه منه وحجايه مني صارت عركه بيناتنه
مااحس غير راشدي فر خدي
ضليت لازمه خدي صافنه بوجها
من هذا اليوم شفت لواء ثاني بشخصيه وتصرفات عمري ماشفتهن حتى العلاقه الحميميه بيناتنه كزوجين بالغصب والضرب والاهانه
تعبت نفسيتي احس روحي تعبت من الكل
غير كلامهن اليسمني بكل لحضه
العصر نيمت فطومه ونزلت اخبز لان عجنت من وكت
نزلت اخبز وهنه كاعدات صرت اتعب بشكل موطبيعي النهار كله افتر والدنيا صارت حاره اروح اخبز اموت من الحر لان اتاخر بالوكفه ع التنور اخبز 100كرصه تقريبا
كملت ميته تعبت سفطت الخبز ودخلت للمطبخ خليته ع الكاونتر بالگدر الخاص مال الخبز
صعدت الغرفتي على كيف خاف الگاها گاعده
فتحت الباب ودخلت
مطفيه الضوه اسمع شخير هبط گلبي
فتحت الضوه ورحتلها اركض
جمدت بمكاني من شفتها من الدم مالها وجه
مااعرف منين تنزف من حلگها لو اذنها كلها تنگط دم
،،،،،،،،،،،،،،،،،،،،،،،،،
يُحزنني أن أنتهي منك "
أن أحاول نسيانك أن تفرغ ذاكرتي منك تماماً ،أن يُصبح قلبي خفيفاً وحيداً كَفراشةٍ تخلّصت من شرنقتها، بل يُحزنني أكثر أن ترفضك يدي اليُمنى التي لطالما كتَبَتْ لك دائماً دون تردُّد .....
#رحلت عنك ولكن تركت لك كل أسباب النجاة .....
غصون
دگ التلفون اتصل ع الماسنجر جاوبته
اسمعه وساكته بس يرعد على شنو ماادري
ذياب،، انلصمتييي؟؟
ماتحجيين؟؟
ويين جنتتيي خااتله وياامن؟؟
غصون،، مااتحملت كتله عيب عليك اتكول ويامن خاتله
مرتك اني وشاربك المفروض ماتعاملني بهذا الاسلوب
وقبل مااسمع جوابه سديته وطفيت الشبكه
اباوع اديه يرجفن اول مره احجي هيج وياه
بيومها مانمت خايفه وبنفس الوقت متفاجئه بروحي
اشللون اني هيج حجيت وياه؟؟
ثاني يوم ابوي گال خل نكمل درسنه
ضليت صافنه مااعرف اجاوب وبنفس الوقت خايفه من يرجع متأكده راح يحاسبني
ابوي حط الكتب كدامه كال
ابو مثنئ،، اليوم درسنه فنون الرد
فن الرد لازم تجمعين بين القوه والهدوء
كل ماتحافضين على هدوئج راح تحافضين على قوتج وتعرفين تجاوبين تكون عندج سرعه البديها
احسن ما واحد يغثج تضلين صافنه بوجها ماعندج جواب
بنتي اكو بداخل كل انسان عضله اسمها عضله الرد
لازم ادربيها
ابسط شي اوكفي كدام المرايه
احجي ويه نفسج وجاوبي بردود قويه
دربي السانج وطوري نفسج
غصون،، اهواااي كعد ابوي يشرحلي ويعلمني اشلون ارد ع الشخص بقوه وبكل ثقه بدون خوف
بالي كله وتركيزي ويه كلام ابوي
تركت ذياب وعصبيته على صفحه لان اريد اتعلم اريد اواجه مااريد ابقئ خاتله وخايفه
اخر كلام ابوي كان
ابو مثنئ،، من الفشل يتعلم الانسان الدرس
كل تجربة بحياتج هي سطر من سطور الحياه
وكلشي مسجل يم الله عز وجل
صيري انتي المؤلفه لكتاب حياتج ودائما اختاري الجمل والكلمات المناسبه للكلام
لتتعصبين وتتهورين وتضيعين حقج بالرد
وبعدين تتندمين
دائما حافضي على هدوئج
كلما يشوفج الشخص المستفز هادئه راح يضوج ويحاول يستفزج حتى تسنزفين كل طاقتج
بس انتي صيري احسن منه وطنشي ؟
غصون،، كملنه الدرس
حط كدامي مجموعه كتب
كتاب بحار الانوار وكتاب تحف العقول
كتاب الثقه بالنفس التامه
وبعد كم كتاب ويه العندي الانطاهن الي قبل فتره
احس روحي اكتسبت اهواي معلومات ومستعده اطور من نفسي
ابوي گال بليل اخذج لعيالج فشله من عمتج
كتله ميخالف واصلا كل البقيتهن يم اهلي اربع ايام
بليل اخذت الكتب سلمت على اهلي وطلعت
وصلني ابوي للباب ماراح لمن تاكد دخلت للبيت
اتلگتني عمتي وساره سلمن عليه
رحت وديت الكتب لغرفتي نزعت عباتي ورجعت يمهن
ساره،، يمه اني راح اتصل ب رضا يجي ياخذني خطيه تاركته صار كم يوم
غصون،، عمتي كالتلها خابري عافتنه وراحت الغرفتها جرتني ساره من گذلتي
ساره،، ولج شكوو شبيج انتي وذياب يرعد من امس لليوم امي خابرته روحه بخشمه صار يحجي عليها كالها ممنوع تخليها تروح واني ماموجود وامي زعلت وياه شكو اكو شي صاير بينكم؟؟
غصون،، حجيتلها الصار
ساره،، والله انتي التجيبين السالفه الروحج تدرين بي اشلون متخبل هاي الفتره وانوب شافج ماتجاوبين
اكيد حط بالسالفه الف أنه
غصون،، شويه وراحت ساره اجه رجلها اخذها
دخلت الغرفتي
بمجرد مافتحت الجهاز اجتني الرسائل منه
لان قافلته من البارحه
ماكو شتمه مامشتمنياها ماكو شي ماحاجي وكل كلامه يتوعدلي بس يرجع
تركت الموبايل وكمت وگفت كدام المرايه
صرت احجي بصوت مسموع كانه اكو شخصيتين البلمرايه الضعيفه الي راح اتركها وراي والواكفه هاي غصون الجديده
متاكده هذا التغير راح يخليني اقوئ
لان الخوف مايجذب غير المشاكل
لان اني الوصلت نفسي لهنا بسبب خوفي وشخصيتي الضعيفه
انشاءالله راح يكون تغيري نقطة بدايه لسقوطي
اتعلمت من ابوي اوگع وارجع اوگف من جديد
راح اكون جيش النفسي ادافع عن حقي ومااسمح الشخص يهيني مهما يكون لان بنادم ماعنده غيره كرامته واحترامه
واذا فقد الكرامه والاحترام معناها خسر كلشي وراح يضل طول عمره عايش بذل
اكثر من عشرين يوم اني حاطه راسي بالكتب اقره ليل نهار وشكو كلمه قويه او رد قوي
اسجله بدفتر حتى اتذكره
ذياب ابد ماحجيت وياه وغلقت الجهاز نهائيا ملتهيه اقره
نور وعذراء ابد ماوصلن يمكن لان ذياب ماموجود مااجن
اطلع اشتغل ويه عمتي مااصدگ اخلص وارجع ركض الزم كتابي
ابوي مرتين اتصل بيه على رقم عمتي كان يتعمد يحجي وياي بثقافه صرت اجاوبه بنفس الاسلوب
من يسمعني يفرح وكلمه وحده بلسانه عفيه بنيتي
بيوم الراد يرجع ذياب عمتي طبخت وعزمت ساره وعذراء بس من اجن اجت عذراء اجت نور وياها
كملنه الغده كل وحده سوت شغله عمتي طبخت الدولمه وعذراء سوت محلبي وساره تمن ومرگ واني الخفايف زلاطه وترتيبات وست نور كاعده ابد مااتحركت كل شويه وگالت اضافيري
خبصتنه بيهن ماتدري
اني من انقهر اطيرهن برمشه عين
عذراء راحت هي وساره وره عمتي الغرفتها وبقت نور كاعده
كمت من مكاني ولابحالها ولااندلها وين الله حاطها
احس ثقتي بنفسي صارت قويه كلش
وكفت جاي اغسل بالاخضورات اجت هي وگفت يمي تريد تغسل
رادت تدفعني ماوخرت
نور،، هييي ماتوخرين
غصون،، التفتت الها بكل هدوء
كتلها اولا يا محترمه يامثقفه عدلي اسلوبج
مو تصيحين هيي مثل الهمج
عندي اسم كولي من رخصتج وخري
اعكسي تربيتج شويه
اباوعلها عيونها صارت بگصتها بس اني صح خايفه واحس رجفه بجيسمي لان اول مره احجي هيج
لكن مابينت الها خوفي
نور،، هاي ويامن تحجين هيج؟؟
كلج جررد فصلليه احترمي نفسج ولمي السانج
غصون،، على صوتنه اجن البنات وعمتي يركضن اباوعلها ترجف اعصابها تريد تضربني واني استفزها ابرودي وهدوئي
كتلها فصليه بس اهلي مربيني عدل
كامت تگمز تريد تسحلني وساره وعمتي واكفات كدامي وعذراء تصيح طالعلها صوت الادبسزز
نور،، وحده ادبسز ماعدها اخلاق عوفنها عود صايره تسولف والله لوتفتحن دماغها تلگن بي حذاء
غصون،، ابتسمت بكل هدوء اتذكرت رد من الردود شفته وكتبته
جاوبتها
حتى تعرفين انتي دائما ابالي
قصدي ع الحذاء لان قارنتها بي
غدت حمره دم
عذراء لازمه نور وعمتي زمخت بينه
گالت عيب شنو هذا الحجي
وانتي نور عود انتي الصيدلانيه هيج اسلوبج؟؟
نور سكتت بس اعصابها ترجف يمكن لو اوگع بيدها تاكلني
عفتهن ورجعت الغرفتي لحگتني ساره
اول مافتحت الباب ضحكت بوجها
ساره،،، يممه يمعزاايه احجي وين موديه غصون الفقيره؟؟
غصون، تحجي ولازمتني تباوع وراي
ضحكت كتلها ليش البشر يخلي واحد فقير؟؟
ساره،، عفيه عليج ابد لتسكتيلها حتى قبل لاتندگ بيج تفكر الف مره
غصون،، ضلينه نحجي شويه وعافتني ساره طلعت يمهن
للساعه 2ونص اجه ذياب
اسمع صوته بالمطبخ يسلم عليهن
ماانكر خفت بس شجعت روحي وطلعت
رحت يمهم شفت يسلم عليهن نور لازمه ذراعه محاوطتها
رفع عينه باوعلي خزرني بگلبي گلت بسم الله توك اجيت وتتخازر
ماسلمت علي احسه وراي ضل صافن لان اتجاهلته تركته ورحت احط الخضورات بالسله
شفته عبر من يمي صعد الغرفته ادري بي ضاج لان ماسلمت علي
شويه ونزل مبدل لابسه دشداشه
ماباوعلي ابد
دخل يمهن واني بديت انقل بالاكل ولااباوعله واصلا احسبه ماموجود
احس بي يراقبني بس ماانطيت فرصه النفسي اباوعله
حتى من التمينه ع الاكل صرت اضحك ويه ساره
نور تحاول تحجي وياه وتساله على سفرته اشلون جانت وهو مغلس عنها
تالي عافنه ونهض گال اني تعبان ونعسان اريد انام
نور احتقن وجها لان ماحسبلها حساب عافها وصعد الغرفته
تالي گالت العذراء خل نرجع للبيت غير مره نجي لهنا
شويه وراحن عمتي گالت ابقن لليل بس نور رفضت
تالي اجرن تكسي من باب البيت اخذتهن. البيتهم
بعدها اني من راحن غسلت المواعين اني وساره ونضفنه المطبخ
ذياب ابد مانزل نايم فوگ بغرفته عمتي گالت خطيه تعبان خلو براحته شوكت مايگعد
بليل اجه رجل ساره اخذها
دخلت الغرفتي وره العشه حطيت رفيجاتي الكتب وگعدت اقره صرت بدونهن مااحس اليوم اله طعم بدون مااقره واكتسب معلومات
من تذكرت الموقف الصار ويه نور ضحكت
لان قبل جنت من واحد يرزلني
وره يومين يالله اتذكر الردود الطاحنه
واضل الوم بنفسي وياكلني الندم لان ماجاوبت جواب بي خير بوقت الي شخص رزلني وهاني
سمعت صوت حركه بالمطبخ عرفته هو ماطلعت
ضليت على گعدتي
ادري بي نزل يتعشه عمتي مثل هيج وكت ب10نايمه وشبعانه نوم
انفتح الباب دخل ذياب يباوعلي بعين غضب
رفعت راسي ورجعت دنگت لميت كتبي بكل هدوئ
تركتهن على صفحه
اجه ثنه ركبته وكعد كدامي
احسه گوه كاتم غضبه عني بس ماسمحت لهذا الشي يخوفني بالعكس مدنگه بيدي القلم والورقه اشخبط بيهن
انسحبت مني الورقه ورجع سحب القلم شمره
ذياب،، عبالج ناسي سالفتج تسدين التليفون بوجهي
غصون،، رفعت عيني باوعتله عيونه دم
ماحسيت غير جرني من اذني بقوه
قربني منه عاصر اذني
حجه بحده
ذياب،، مره الثانيه اذا عديها حلگج ادوسه بالقندره
واذا ماسلمتي اليوم ماكاتل روحي على سلامج
افتهمتي؟؟؟
غصون،، الموقف موهين تحس روحك طفل كدامه جاي يهينك بدون مايحسب المشاعرك احساب
غصب عني اختنگت و الدمعه انجمعت بطرف عيني
باوعت بعيونه
كتله هين بعد وبعد
وكل اهانه مسجلتها الك بورقه
حتى بيوم الانطيك ضهري واروح
من اباوع للورقه مايلين گلبي وارجعلك
همس يم اذني
ذياب،، هاي اذا خليتج تروحين
تعيشين اهنا وتموتين اهنا
دائما خلي هذا الشي ابالج
غصون،، ترك اذني عافني وطلع
ردت ابجي دموعي ذبحتني
مسحتهن اتحداهن مااريدهن ينزلن من جديد
مر اسبوع واني لاالي شغل بي وهو كذلك
اخلص شغلي وارجع اقره
وره كم يوم اجت عذراء
سمعتها تحجي ويه عمتي
اتگلها عمي يگول خل يحددون موعد العرس
ام ذياب،، يمه اني صايره عرس
واحنه اصلا متفقين ويه عمج بعد شهر ونص
عذراء،، الخشاب وجاهز غرفته وجاهزه
بعد بس تجهيزات العشه والنواعم
خل يفضها يايمه
غصون،، مااهتميت اخذت الجاي العمتي وهي هم صبيتلها فشله هسه عمتي اتكول مامحترمه بناتي
حطيت الجاي كدامهن وردت اطلع
اسمع ام ذياب تريد بس تاجل العرس
وعذراء اتكلها ماعليج خل يعرسون ويفضوها اذا
صارت طويه تصير بيها جر وعر
دخل ذياب بدون مايباوعلي حجه ويه عذراء
ذياب،، وصلي العمج الجواب كليله بعد 15 يوم العرس
باجر ادزلها فلوس خل تجهز روحها
غصون،، تركتهم وطلعت رجعت الغرفتي
اتحدئ عيوني مايبجن ولااسمح الكلبي ينقهر
من هذا اليوم بدت التجهيزات للعرس
واكثر شي عذراء استلمت المسؤوليه
هي تروح تشتري وتجهز ويه نور
ذياب دزلهن الافلوس ثاني يوم
وهنه ماصدگن وره مااستلمن فلوس راحن اشترن
15يوم احنه مامرتاحين ملتهين بالهوسه
وحتى محد يگول ضايجه لومقهوره لان راح يتزوج
صرت اشتغل وياهم واضحك ويه عمتي وساره
يشوفني اضحك بس لويشوفون گلبي
يبجي دم
كل مايسوي شي بدل مااقترب خطوه
ابتعد عنه الف خطوه لوره
قبل العرس ب اربع ايام عمتي گالت
ييمه لاترحين حتى ماتنقهرين ضلي اهنا وانه هم اروح للحنه ساعه وارد
كتلها لاعمه اروح وياكم واصلا ماضايجه عليمن اضوج
ام ذياب،، جا خل تاخذج ساره اشتريلج شي تلبسي
غصون،، لاعمه مايحتاج
اباوع ساره ميته قهر
ندستها كتلها اشبيج مغندبه؟
ساره،، مامقتنعه
وانتي واخوي اثنينكم مخابيل
لو حالين مشاكلكم بعقل جان ماوصلتو لهنا
غصون،، ماجاوبت سكتت
بليل ساره انطتني موبايلها ماخذه سكرينات لمجموعه مال فساتين كله فضيحه
ومااحب البس هيج شي
احب اللبس يكون مستور
من ضمن الفساتين اكو فستان للمحجبات حلو مرتب
بيجي كتلها هذا اشتري
حاولت تخليني اختار غيره رفضت
كتلها هذا عجبني
وفعلا ثاني يوم راحت بس هيه مارحت وياها اشترته واجت
حفتلي ساره بلبيت
كالت روحي وياي للصالون
كتلها لا ميحتاج بس نضفي وجهي
كل مايقترب يوم ذياب يصير نار كبره بس يصيح على ابسط شي
قبل الحنه بيوم عمتي گالت يمه والله مارايده روحتج للحنه
روحي يم اهلج منا لمن تخلص الزفه
جاي نحجي دخل ذياب مبين سمع كلام امه
ردت احرگ روحه حتى ابينله تره انت لاشي عندي
كتلها عمه شعندي رايحه لهلي؟
خليني اروح وياكم اتونس ويه البنات
اتمنيت اشوف وجها من حجيت بس مالتفتتله ابد
نص الليل الساعه ب 12تقريبا
جنت اقره كتاب مكارم الاخلاق ومندمجه
ردت اروح للحمام سديت كتابي وطلعت
تفاجئت بي كاعد بالمطبخ يشرب جكاير
الجكاره بيده باوعلي ودنگ
رحت للحمام كملت وردت اطلع
فتحت الباب انصدمت بي كدامي
دفعني ودخل
يتتتتبع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!