تكملة البارت
ضحيه لمن لايرحم
بقلم زهراء الحسناوي
،،،،،،،،،،،،،،،،
مشتاكلك والليل وحشه
ودمعتي التنزل ثكيله
وصوتها من تطيح عالي
وحتى محد يدري بيها
اركض اتلكاها بيدي
لمن تمر علبالي
زينب،، احس ملك الموت گعد يمي روحي انقبضت منه
جلئ صوته راد يحجي ماانطيته مجال ردت انهض لزم ذراعي التفتتله مخنزره بوجها
كتله هد ايدي قبل ماالم عليك الوادم
لواء،، لميهم مرتي واريد احجي وياها
زينب،، جريت ايدي لازمها بقوه
حلگي صار يرجف اعصابي ترعش ماتحمل يلزمني
كتله بحده هد ايدي لاوروح اخوي وهاي اول مره احلف بي
هسه افرج عليك امة محمد
ودير بالك تكول مرتي لان مااتشرف بيكم
احجي واحس كل جزء بيه يختض
كارها لزمته الي
نهض من مكانه جر ايدي
نترتها منه ماگدرت
ام سجاد،، خويه عوفها الوادم تتنوع مووكتها هسه
لواء،، لا وكتها لازم تسمعني
زينب،، وخر عني لاافضحك
اباوع الوادم تتنوعلنه مو اهواي لان مكان مخصص لاستراحة اهل العمليات كم واحد واكفين طلعو بره
من شافونه اشتد الحجي بيناتنه وام سجاد وحسن يحاولون ويه لواء يتركني
سحبت ايدي منه حيل
لواء،، زينب خلينه نكعد بمكان نحجي
حسن،، خويه موكتها تره احنه بمستشفئ الوادم تباوعلنه
لواء،، لا وكتها لان ماتنطيني مجال ادافع عن نفسي
جاي احلفلها ماادري ولا اتذكر شي
زينب،، تتذكر ماتتذكر مشكلتك هاي
وخر عني
لواء،، مااعوفج اذا مانكعد ونحجي
زينب،، حسن حاجز غرفه خاصه لفاطمه من دخلنه ام سجاد اخذت غراضنه للغرفه تصميم المستشفى ممر طويل بنهايتة غرفة العمليات وبالجهتين غرف للمرضئ لان المستشفى خاص
جرني يسحل بيه للغرفه الحاجزيها دخلنه وام سجاد وحسن لحگونه لان اني وياه مثل نار وبانزين على ساعه ننفجر
مديت ايدي لزمت راسي احس راح اوگع
كتله هدني بس جان مايسمع لازمني عبالك يخاف انهزم
رفعت راسي اباوع بعيونه يريد يبجي
ام سجاد،، استهدو بالرحمن خاله انطي مجال يحجي بلكت تتفاهمون
زينب،، وبشنو يفيد الحجي!؟؟
حسن،، اهدي زينب
اتركها لواء راح تفضحونه جدام العالم حيرو ابتكم هسه وبعدين اتفاهمو
لواء،، هسه اريد احجي
زينب،، يباوع بعيوني صافنه بوجها ومشاعر الحقد كلها انجمعت بروحي
لواء،، زينب وداعة الحسين ماادري بروحي ابد
كل السويته متفاجئ بي مثل المنوم مغناطيسيا
الله يشهد احس واحد براسي يقره يدفعني اسوي الغلط
زينب،، وشنو المطلوب مني؟؟
لواء، ترجعيلي
زينب،، ارجعلك؟؟
لواء،، شنو التطلبي اسوي بس ارجعي
زينب،، ارجعلك بس بشرط
يباوع بوجهي يريدني اكمل كلامي
لواء،، كل شروطج مقبوله انفذهن واني الممنون
زينب،، اول شرط تردلي ابوي المات بحرگته
وثاني شرط تردلي اخوي الكتلته جدام عيني
وثالث شرط تردلي بنتي السجلتها بااسم مرتك
ورابع شرط تردلي عافيتي السلبتها مني
وغيرهن وغيرهن اهواااي ماينعدن طعناتك
احجي وهو صافن بوجهي حجه بصوت مبينه بي بحة وعبره مختنگه
لواء،، ذني شروط تعجيزيه زينب
زينب،، دامك تعرفهن شروط تعجيزيه
جا خل اگلك سالفه
وداعة النايمة جوه بالعمليات
الحرمتني من ريحتها
مارجعلك لويصوغوك ذهب
اشلون ارجع انام يمك على مخده وحده وانت جتال اخوي؟؟
وهسه وخر عني ماكو حجي بيناتنه
لواء،، تخسرين بنتج؟؟
زينب،، انهضمت لان الموقف صعب غصب عني نزلت دمعتي بس احجي بحرگه گلب
گتله روحي خسرتها بسببك
احجي واضرب على صدري
روحي خسرتها بسببك هو شنو الخليته حتى اخسرره؟؟
احس راح افقد
گلبي اذاني حسن لزم اخو يريده يسكت وام سجاد دفعتني تريدني انصي صوتي لان من الحرگه والعصبيه بعد مااشوف جدامي
اندگ الباب اجه المضمد حجه ويه حسن لان صوتنه واضح
بس يمكن لواء ماشاف جدامه حل غير نحجي بهذا الوقت
اخذه حسن وطلع واني كعدت تعبانه حلگي واديه يرعشن
دنگت سندت راسي بيدي مديت ايدي الثانيه حطيتها على مكان البطاريه احسها من كد مادكات گلبي سريعه صار نفسي صعب
اخذت نفس واردد بااسم ياالله رحمتك
ام سجاد تركتني وكامت لحگتهم
متاكده لو ما احنه بمستشفى جان ماسكت
وره ساعه طلعت فطومه نايمه وعينها ملفوفه بشاش ابيض نهضت اسحل بروحي
دخلو لواء وحسن وام سجاد اجو الجهتها لزمت السديه بجيت كتله دكتور ليش بعدها مغمضه؟؟
حسن،، غير بعدها تحت تاثير التخدير؟
زينب تعاي اكعدي لاتوگعين
زينب،، ماكعدت لازمه بسديتها دخلوها للغرفه الحاجزها الها خاصه
دخل الدكتور طمني علئ وضعها گال شويه وتصحى عمليتها الحمدالله ناجحه بعدالها وحده قلع
والثانيه ترقيع
شلنه الجزء الاكبر وبعد بس القليل سهلت انشاءالله
ارتاح گلبي اباوعلها اشلون نايمه بگلبي اكلها
كون اخذج يبنيتي واشرد من كلشي
كعدت يم راسها انتضرها تفتح
لواء وحسن يحجون ويه الدكتور وام سجاد يمي هم اتلوب على فاطمه
طلع الدكتور
بس گالهم اثنين يباتون ويه المريضه
رفعت راسي وجهت كلامي الحسن
كتله خيي ابو فلاح اني ابات يمها
لواء،، واني هم ابات
زينب،، مااهتميت الكلامه ولاحتى باوعتله
دنگت اباوع الفاطمه كتلها خاله ام سجاد انتي باتي وياي لان طفله مااكدرلها وحدي وكلبي تعبان
عاد انتي يمها
ام سجاد،، هذا هو اني وياج انبات يمها
زينب،، بدت فطومه تتحرك بس صحت بدت تبجي تريد ترفع ايدها تفرك عينها لزمت اديها امنعها
ساعه هي تبجي ماسكتت كال الدكتور انطيناها مسكن بس هي خايفه وتبجي مابيها شي
كاعده يمها واگلها ماعندج حض مثل امج بعدج زغيره وراح تشربين القهر من هسه بثنين اديج
گوه سكتها حسن ولواء يم رجليها يحجي وياها يريدها تسكت
امد ايدي الزمها تسحب ايدها مني تخليني نار تشتعل بگلبي
جاب حسن غده مااتغديت گلبي شايط على بنيتي مااشتهي اكل ام سجاد سوتلي لفه كالت اكليها لاتوگعين من الهبوط
لواء طلع اخذتها اكلتها يالله حسيت وضعي استقر
كل شويه يطلع ويرجع تحسه يريد يحجي
لليل كالهم المضمد لازم اطلعون خلو بس اثنين يم الطفله
قبل لايرحون حسن گال شيصير بس رمشيلي تلگيني يمج
قبل لايروح جاب اكل وترمز جاي يالله راح يمشي ويوصي اليشوفه يكول هو ابوها مولواء
ام سجاد تغفه وتكعد واني ابد ماغمضتلي عين
اتمددت يم رجللين فطومه ع السديه
كل ماتفز الزم ايدها اخاف تلجم عينها
ثاني يوم من الصبح رجع حسن وياه لواء الدكتور كال تكدرون اطلعوها وره الظهر وضعها تمام حجالنه عن علاجها
من راح كتلها خاله ام سجاد خل اخذها وياي والله گلبي يضل يمها
لواء،، تعاي انتي يمها
زينب،، عرفته يريد يلوي ذارعي بفاطمه
سكتت ماجاوبته
لزمت ايد ام سجاد كتلها خاله امانة الله بنيتي
اتمنيت يكول اخذيها وياج وينكسر گلبه بس هو اتعمد مايخليها يمي يريدني اني ارجع لظلمهم برجليه
كتبلنه خروج الدكتور وطلعنه اني وام سجاد صعدنه ويه حسن بسيارته وفاطمه بحضن عمتها
المصيبه بنتي واتخاف مني
صعب من تشوف انسان تحسه الك وحدك بس مايريدك
رجعوني للبيت رادو يرحون لزمت باب السياره احجي ويه ام سجاد وحسن وابوس برجلين فطيم
كتلها بنيتي خاله بنيتي مااوصيكم
ام. سجاد،، يمه تره هي بتنه لاتخافين عليها
زينب،، اخذوها وراحو اسمني معلعل گلبي بسبب فاطمه
ابوها عباله من يسوي هي راح اخضع وارجع مايدري ادوس على گلبي برجلي ولا اهين كرامتي
يومين اني متخربطه عليها صخنت فد مره عمي احتار بيه كل شويه ويجيب علاج شكل
نايمه بفراشي الصخونه كاتلتني
عدلت كعدتي وزحفت يم الكنتور عدنه كنتور قديم ابو بابين بس اسمه كنتور مكسر
فتحت الباب طلعت علاگه
من رحت للزياره ويه عمي عجبني قراصات مال اطفال
اشتريتهن لفطومه وضميتهن يمي
وهم من تصير قرايه بالمنطقه لطم مال نسوان للسيده رقيه عليها السلام اكو نسوان الماعدها ذريه تنذر للطفله رقيه قراصات اذا صار عدها طفل توزعهن بالمجلس
كل ماتروح مريم وزينه للقرايات يوزعون قراصات يجيبنهن لفطومه اضمهن
طلعتهن من العلاگه بوستهن وابجي
اتمنى امشطلها والبسهن الها
واتمنى مثل أي ام من تروح للسوگ يعجبها لبس مال اطفال تشتري لبتها اتمنيت اشتريلها لبس
والبسها وافرح بيها حالي حال اي ام
ابد ماحسيت بطعم الامومه
اكثر وقت حسيت بهذا الاحساس واني حامل بيها وبس
وره يومين اتحسن وضعي بس ابد ماقطعت اتصالي بحسن الصبح ارمشله وهو يتصل وبليل كذلك اساله عنها يكول زينه يم ابوها
وره اسبوع اجه عمي گال لگينه بيتين واحد قريب ع الثاني بيت جدام بيت خوش بناء واسعارهن بنفس افلوسنه يعني ما نحتاج نكمل المبلغ
كمل المشتره مال البيوت وگال لازم نروح انظفهن
اني محد يعتب عليه لان مريظه
راحت بس امي وعمتي ومريم وغصون
يرحن الصبح يرجعن العصر ثلث ايام خلصن تنظيف
وصار لازم نلم غراضنه ونشيل
امي كل شغله لوحاجه تلمها تبجي وياها
لمينه كل غراضنه وهنه اصلا قليلات كلهن خرايب
بليلة النريد نشيل بليل
كعدنه كلنه جدامنه الصينيه بيها العشه محد ياكل
غراضنه كلهن جامعيهن ابقجات وصراير لاميهن
مگابلين الاكل وصافنين بس دموعنه تجري
اباوع بيتنه تعبان بس عندي يسوه قصر ال منهل
هذا بيتنه الربينه بي من الزغر
درت وجهي
ذاك ابوي يقري مريم بذاك المجان
وهذا احمد نايم اهنا يصيح وين الاكل
اهنا كعدنه اتعشينه كلنه سوه
واهنا ضحكنه واهنا بجينه
واهنا واهنا واهنا وكلهن ذكريات يكسرن الروح
بكل مكان ابيتنه النه بي ذكريات ويه الراحو وتركونه معلعلين
ثاني يوم الصبح اجن سيارتين حمل كبار عمي مأجرهن نقلنه غراضنه كلهن
كعدت بالباب اباوعلهم وهمه ينقلون نهضت من مكاني رحت وره الحوش
حتى بهذا المجان الي ذكرئ اتذكر احمد يركض خايف ولواء يركض وراه
رجعت امشي بتعب اتمنيت گلبي يسكت وارتاح
دنيا خلصتها تعب بتعب
اتمنيت اظل ابطن امي ولاهلعيشه
اباوع ل امي وگفت اباب الحوش حاطه شيلتها على حلگها التفتت للحوش وصاحت
ام احمد،، وداعة الله يدار الاعزاز
انتقلنه للبيت الجديد وماكو كل فرحه كل واحد تشوفه يشتغل بدون صوت
احنه بنص نهار كملنه ترتيب اغراضنه ومريم اخذت زينه البيت عمي يعزلن وياهم لان غراضهم اهواي
اباوع بالبيت ماناقصنه بس ابوي واحمد
المكان جديد علينه بليل محد نام كلها تفتر حتى عمي هو وعمتي نص اليل اجو يمنه يكولون مانعرف انام
اتاخروو يالله رجعو البيتهم
فطومه اتصل بحسن يطمني عنها وضعها زين
لواء من سامع بينه انتقلنه يكول حسن خلص اليوم يصيح وعصبي
مرت الايام واتعودنه على وضعنه الجديد
وره شهرين الساعه ب 12الظهر تقريبا
اتصل حسن عرفت منه ابن لواء ميت
لان الدكتور كالهم مايكمل يموت لان دماغه بي تلف
بگلبي گلت دخيلك يالله هذا الثاني
مريم نقلها عمي لمدرسه قريبه علينه بس بنات
ايام واحنه مصرفنه على عمي حتى امي تصيح الله يساعده شايل بيتين اله يوم يطگ ويموت ونتبهذل بدونه
تالي طلعت فلوس احمد المجمعهن ودزت على عمي
كالتله ذني تعب وليدي اريدك تبنيلي بيهن محل بداخل الحوش بس وجها للشارع استرزق منه اني اكعد بي ابيع واطلع مصرفنه لان انت تعبت
بالبدايه عمي ماقبل بس امي لحت علي وفعلا بنينه المحل وعمي من عنده كمل فلوس الاغراض اشتره مواد غذائبه وحاجات اطفال شهر امي كعدت بالمحل
تبيع والحمدالله يوم اكو ويوم ماكو بس احسن من اهواي ناس ماعدهم لگمه ياكلون
بعد مرور سنتين سنه2018
مريم نجحت للسادس اعدادي اعتمدت على نفسها
محد يقريها تكعد وحدها تقره اختي مسكينه
حتى لبس مثل البنات ماتلبس لان وضعنه مايسمح نشتريلها كل الي بنفسها للمدرسه
كاعده اتريك الصبح اكعد ويه مريم اني وياها نتريك هي تروح للدوام واني اضل انضف لو الهي روحي بشي
حسن خلال السنتين ماتركني دائما يتصل
مره وحده جابلي فاطمه يومين ضلت يمي شبعت بجي ماتريدني احس گلبها راد يسكت من بواجيها تالي اتصلت بي كتله تعال اخذها تريد ابوها
لواء رغم محاولاته يرجعني ماگدر بس جان يعاقبني ابعدي عن بنتي يريدني اتعب واستسلم وارجعله
بس عندي عذاب بعد بنتي ولا ذله العيشه وياهم
واكفه ع الطباخ اسوي غده اجت مريم طايره تركض
هاي البت شمهما تكبر عقلها طفولي
صارت اضخم واطول مني وبعدها تتعارك ويه امير ع النستله لو شغله بسيطه
كتلها على كيفج شبيج
وكفت يمي تلهث تريد تاخذ نفس
حطت ايدها ع السنگ والثانيه على گلبها
مريم،، سالفه س سالفه
زينب،، كتلها دخذي نفس واحجي
تباوعلي والسالفه بحلگها اختي واعرفها
اذا سمعت بشغله اتحداها تضمها ساعه
مرات اكلها ولج لاتسولفين من واحد يحجيلج سر
اتكول زينب مااكدر لان السالفه اذا مااحجيها تضل تفتر ابلعومي لمن احجيها يالله ارتاح
كتلها احجي شكو
مريم،، هسه جنت يم عمامي وسمعت سالفه من عمي
زينب،، راح اهبدج على راسج احجي ولج.
مريم،، بنت نذيره مهزومه من البيت
زينب،، ضليت صافنه كتلها غفران؟؟
مريم،، ياا لا مو هاي ذيج الثانيه المعرسه
كاعدين عيالها الصبح مالا گينها ماخذه ذهبها
وافلوسها ومهزومه صارلها يومين مهزومه بس عيالها فاضحيها بالمنطقه
زينب،، رغم مااحب لانذيره ولابناتها بس جريت اذن مريم كتلها حرام مايصير هيج تحجين انتي بنيه وهلشي مايجوز
ابتعدت عني تفرك ب اذنها
مريم،، موصوجج عود ردت افرحج لان سمعت بيها شارده ويه واحد
زينب،، شلت النعال اريد اضربها انهزمت من جدامي
تضحك
بكلبي كلت دخيل الله مااخذ عرضها يجوز جذب ماكو هيج حجي
تالي من اتصل حسن مايضم عني شي
اتصل صاير نار خطيه يفرفح على نذيره وتربيتها
كال نكست روسنه بالطين بتها
مره عد رجلها وتنهزم ويه صاحبها وين صايره هاي؟؟
الافتهمته من حسن المهزومه وياه جنه واحد سكير مابي حض وهم متزوج ومطلگ
گابه الطلايب بين اهل رجل جنه وبين ال منهل
تالي عمتها فاضحتها وشاهرتها جدام الوادم والجيران ومسولفه كلشي كايله اصلا احنه اخذناها حامل سترنه عليها مانعرف الولد الحبلت بي ل ابني لو لا سوالف ماتتسولف حاجيتهن عمة جنه بحيث فاضحتهم بالمنطقه
اتاكدت من حسن الخبر صحيح
وجنت متاكده نهاية ال منهل على ايد جنه
لان التزني بالحرام كلشي اتوقع منها
انهزمت ومحاسبت حساب لا لهلها ولا لعيالها ولا لجدها وسمعته بين الناس
جنه ضربت جدها الضربه القاضيه وعملتها سببت بطيحه عگال شيخ منهل
دمرتهم جنه دمار الوادم ماعدهم سالفه غير عملة جنه
من يسولفون بسالفتها روحي تكشني
اشلون الها نفس تنهزم وماتحسب حساب لسمعتها لو سمعة اجدادها الربوها
وارجع اتذكر منظرها بالبستان وهي تسوي الحرام
اكول التسوي هيج كلشي سهل عدها
رجلها طلگها غيابي
اطفال ماعدها سمعت بيها مرتين طرحت
الوادم شيخت رجال معروف واله صيته ومكانته والكل تحلف بااخلاقه
اما منهل ضربه السكر وعمه عينه بسبب حفيدته
لواء مامخلي مكان مامدورها بي يريد يكتلها ويطم عارها بس مالگاها ابد فص ملح وذاب
اتفاجئت بحسن خابرني گال زينب راح اسافر
مااتحمل الفضيحه لان جنه ربت عدنه محسوبه علينه الوادم اكلت وجوهنه بسببها
حجزت راح اسافر لتركيا ماارجع استقر اهناك
صدك بجيت احس اخوي الراح يعوفني ويروح
حسن لو شكتب مااكدر اوصفه
مواقفه الحلوه تشهدله
وفعلا سافر حسن ونفسيتي تعبت كلش
لان جنت اتصل بي اطمن على فطومه لو هو يدزلي صورها
لواء شگد حاول يرجعني بس رفضت
لان نفسيتي بعد ماتتقبله لاهو ولااهله
فطومه لواء سوالها العملية الثانيه لعينها
وجانت هاي اخر عملية مال قلع الورم
بس ماگالي عرفت من حسن هو مسوي العملية
شگد بجيت بيومها لان ردت اكون يمها
بنتي طفله بس ماتحبني لان ماتشوفني اهواي تحسني غريبه عنها
بسنة 2019
بليل كاعده وكالعاده اتصل بحسن بين يوم ويوم ع الواتساب اطمن على اخباره
مرات يگلي اذا اجيبج لتركيا كم شهر كل امراضج تروح لان مجرد وجود منهل ونذيره بالعراق تحس بالخنگه
اضحك على سوالفه ولامره سمعته گال على منهل ابوي دائماً يسمي بأسمه
وره يومين سمعنه بواحد من جيرانه بالريف ميت
عمي گال اخذج انتي وامج وام مثنئ للفاتحه لان فشله مانروح ذوله جيرانه عشرت عمر وهم بكل فواتحنه همه قايمين بالواجب
فعلا رحنه اني وامي وعمتي
لطمنه وقرينه الفاتحه وگعدنه بين ماعمي يقره الفاتحه يم الزلم ونرد لبيتنه
اجن كم مرة من جاراتنه سلمن علينه وكعدن
يسالن على وضعنه
كعدنه على صفحه التمن الحبايب داير مدايرنه جيران عشرت عمر ومن زمان ماجايين للمنطقه
فكعدنه مجموعه مال نسوان
وحده منهن گالت والله يخاله يزينب حوبتج
دمرت بيت منهل دمار
لاخلتلهم صيت ولاسمعه بين الوادم
بتهم لسه يدورون عليها مالگوها هل صارلها ثلاث سنوات مالها اثر
يوم يسمعون بيها بالبصرة ويوم بالشمال
يرحون يدورون مايلگوها
اخر شي سمعنه يكولون شارده للاهواز
واحد من اولاد عمها يدور عليها لان الولد كبرت وصارت شباب وهذا عرضهم يتعيرون بي
سكتت ماحجيت
حجت الثانيه گالت ماسمعتي بشريجتج شبيها؟؟
كتلها شبيها؟؟
المره،، تشكي من صدرها اخذوها يحللون
طلع عدها سرطان الثدي
وبعد يومين عمليتها يقلعو الها
زينب،، كزبر جلدي دخيل الله
حنان يوميه توگع بمصيبه
بسبب سوء اعمالها
وحده من النسوان گالت
هاي سوء عاقبه الها شگد اتگابلت ويه زينب المسكينه تالي ربج بالمرصاد يوميه نازل عليها بلاء شكل
وحده منهن گالت جا ونذيره؟؟
المره،، شبيها نذيره؟؟
المره،، سمعت صايبتها صدفيه ماكله جسمها
محتارين بيها يوم للاطباء ويوم للساده
وهسه من شافو ماكو نتيجة توجهو لهل الاعشاب
زينب،، جاوبتها وحده من النسوان كالتلها
المره،، خية سالفه بيني وبينجن
الصدفيه جايتها بسبب نجاسة لازمتها بيدها
زينب،، مافهمت ضليت صافنه سالتها المره كالتها
يااا وشنو هاي السالفه انوب؟؟
المره،، والله سمعت لازمه خرزة بيدها والخرز مال السحر مونضيفه ف وره فتره جلدها متگشر
وهسه لوتسوفيها بس وجها كلشي مابي
بس لوتشوفين جسمها تتسودنين يخوف
مبين من اديها خيه رحنه نشوفها
اجت يمنه اديها مگشرات يخوفن
زينب،، بسرعه تذكرت الحلف مالتهن هاي شارة كلام الله الحلفن بي باطل عبالهن الحلف هين
وخاصتا اذا الحلف باطل راح تنكسر ارگابهن بسببه
طلعنه من الفاتحه عمي ينتضرنه بره
عمتي حجتله سكت ماحجه واصلا من يسمعنه نجيب طاري احد مايحجي يسكت
رجعنه للبيت افكر بكلام النسوان
ابد ماتشمتت بحال ال منهل بس
رفعت راسي لله عز وجل همست اشكرك ياربي
اخذت حقي كامل مكمل فدوه لوجهك يالله
فعلا دعوتي مانزلت للگاع وظرب الظالمين بالظالمين
ضرب جنه ب ال منهم الشخص الدمرهم منهم وبيهم
حاشه تضيع حوبة فقير يم الله
الحوبه تبطي بس ماتخطي ابد
خلتهم كيدهم في نحرهم
يوميه طلابه ويوميه مصيبه جديده
حتى الوادم صارت تسميهم بيت اهل الطلايب
وره كم يوم من اتصل حسن عرفت حنان مسوية العمليه وليل مع نهار تصيح من الالم
حسن يعرف الاخبار من لواء
يگلي يضربوها ابر الكيمياوي
تنتهي تصيح كون اموت ولاهلوجع
سبحان مرات اصفن وافكر
اكول شسوت بيه حنان اله رجعه الها اظعافه
حرگت گلبي ابنتي لان عرفتها هي الدزتلي صورة الجنسيه وسبب طيحتي هي
بالمقابل الله سبحانه وتعالى حرگ گلبها اخذ اطفالها اثنينهم
اخذت صحتي وحطولي بطاريه بسبب القهر
ربي اخذ عافيتها وبعثلها الخبيث الجسمها
اما نذيره بعد سواية بتها مالها حتى عين تطلع للشارع بسبب حجي الوادم على تربيتة بناتها
بسنه 2020رجع حسن لان إصابات كورونه زادت
وحتى من ضهرت الاعراض بالدول قبل العراق جنت اتصل بي لان اخاف ينصاب هذا اخوي الماجابته امي
دائما اوصي خيي لاتطلع بدون كمامه وكفوف
ودائما عقم اديك
صرت كلش اخاف علي وهو كذلك يكلي احجري نفسج وابتعدي عن اهلج لان اذا انصابيتي تموتين لان گلبج تعبان
مرات يتصل يضل يضحك يكول خاف تصيبني كورونا واموت بالغربه محد يندل گبري
عاد ارجع للعراق اشرفلي اگابل منهل ولا اموت ومحد بحالي
وفعلا رجع بس اجر مشتمل بنفس الاولايه الاحنه بيها بس بعيد شويه عن بيتنه
فطومه اتعودت على غيابها وهي اصلا ماتريدني
كبرت وحاليا عمرها 6سنوات بس لحد الان ماسوالها عملية التجميل لان الدكتور كال خل تكبر شويه لان تعبت بااخر عمليه الثالثه كانت ترقيع
حتى يرقعون عينها اخذولها جلد من افخاذ رجليها
قبل فتره جابها حسن إلي طلعتله للباب اريد اخذها من زمان ماشايفتها روحي ترتفع للسمه من اشوفها عكسها من تشوفني تختل مني ماتريد تجي يمي
بس حسن مقنعها
كوه خلاها يمي تريد ترجع وياه تالي حلفلها ياخذها لمدينة العاب اذا ضلت يومين يمي
دخلتها للبيت اول يوم شارده مني تعبتني مااتحمل بس ابجي بس مريم كسبتها تلعبها باللعاب لو تنطبها موبايل لوتعلمها ترسم شويه شويه اتعلمت على مريم
رادت تروح للحمام نزعتها مريومها ضليت صافنه على رجليها لزمت بالحايط احس الگاع افترت بيه
رجليها مشوهات من منطقة الفخذ
ماخذين جلد على شكل مربعات
ثلاث مربعات من رجليها ثنينهن
المكان الماخذين منه صاير ابيض شحم مثل المجوي
گتلها بصوت يرجف انتي نفس امج كل الصار بيه صار بيج
حجيتها وبجيت ضلت الطفله تباوعلي
مريم غمزتلي بمعنى اطلعي لاتخوفيها بدموعج
تركتهن وطلعت شكل رجليها مايروح من بالي
لحد هذا يومنه اني باسم لواء مايقبل يحررني منه
شگد ناس توسطت وراحتله حتى يطلگ
جان جوابه خلوها معلگه هيج بدون طلاگ
اشلون ارجعله وهو جتال اخوي؟؟
مااشوف بي غير انسان مجرم دمرني ودمر عائلتي هو وأهله
بس بالمقابل اجتهم الضربه من الله عز وجل خلتهم مايندلون دربهم من الصگعه
حنان لسه علئ ذمته بس سمعت واحد ماله غرض بالثاني لان تخاف على رواحها لا تحبل ويرجع المرض ينتشر بجسمها
لواء لحد هذا اليوم متمسك بيه مايقبل يطلگ
يگول بس ارجعيلي نعقد محكمه وانقل فاطمه بأسمج يسوي هيجَ حتى ارجعله
كل ضنه عقد المحكمه ونقل فاطمه ل اسمي راح يشفعله عندي
ادري جان مسحور وموبيده بس موبيدي اني هم نفسي بعد ماتتقبله
منو تگدر اتنام بفراش واحد بصف جتال اخوها؟؟
من شافني رافضه فكره رجوعي اله قرر ينطيني فاطمه بس هي هلمره الجانت رافضتني
يوميه سيناريو حياتي العشتها ابيت الشيخ ينعاد عليه
اذكر سوالفهم وحده وحده
واكثر موقف من اذكره ابجي بدون وعي
من اكلت اكل الجلاب
شبعت تعب
وظيم
وقهر
وجوع
عد بيت منهل
من اذكر اشلون قبل مااروح فصليه جنت اتمنى اعيش ابيتهم
بس من اتحققت امنيتي وشبعت ذل ومهانه عدهم كرهتهم وكرهت عيشتهم صرت اترحم ل ايام قبل
من تمطر الدنيا ومانكدر انام من صوت گطرات المطر التوگع بالجدوره
اكتشفت انو المظاهر خدعتني
ناس بيوتهم حلوه ووجوهم حلوه
بس گلوبهم بشعه من گد السواد المالي ارواحهم
بحيث. جمال شكلهم طاغي على حقارة افعالهم
حاليا ماكاسر خاطري غير امي
تعبت ويانه العيشه صعبه بس الحمدالله على كل حال
نايمين مرتاحين ماكو مشاكل تنتضرنه من نكعد
بالنسبه الي من سويت عملية زراعة البطاريه
گالولي 6سنوات وارجعي نبدلها الج
سمعت انو تبديلها اصعب من شدها
مااتحملت وصرت ابحث باليوتيوب عن مقاطع تبديل البطاريه
شفت مقطع بنيه تموت اكثر شي هذا المقطع خوفني
شديتها بداية 2017 وبعدلها سنتين ومن هسه خايفه
مريم دخلت كلية ادارة واقتصاد
عمي تعب وياها كلش شيجيب لغصون يجيبلها مايفرقها عن بنته
راد يخطبها لمثنئ بس مثنئ ماقبل گال مريم حالها من حال غصون
حتى مريم فرحت لان مااتشوف بمثنئ غير الاخ وبس
اما حسن لحد هذا الوقت بدون زواج دائما اگله شوفلك بنت حلال بدل مابيدك تغسل ملابس وتطبخ الروحك
يضحك يگلي خليني هيج احسن لان انتم سويتولي عقده من الزواج
دائما ادعيله ربي يريح باله مااعرف لو ماهو شنو راح يكون حالي؟؟
مواقفه مشرفه اخ ونعم الاخ
لايوم حسيته من ال منهل
ولايوم حسسني اني فصليه عدهم
اخيرا
اتمنى تندعولي ربي يحنن گلب بنتي وترجع الحضني
اتمنى اشوف لهفتها الي بعيونها
اتمنى اسمع كلمه يمه بلسانها
اشكر كل الي تعاطف وياي واندعالي
دائما اقره تعليقاتكم الحلوه واتشجع اكمل لان موسهله تنعاد عليه الاحداث
ماكنت متوقعه الگه هيج تعاطف من كل الناس
اشكر ست زهراء الحسناوي الي وصلت صوتنه وقصتنه للناس واتمنى من كل گلبي تنتهي هاي الاعراف والتقاليد من عشائرنه الي مازالو لحد هذا اليوم مطبقين بعض الامور مثل الفصليه والنهوه
بالنسبه لبيت منهل دائما عندي ايمان قوي بعداله الله سبحانه وتعالى
قال تعالى:
(واصبر لحكم ربك فإنك بأعيوننا...)
خطاب رباني يشعرك بمكانتك عند الله سبحانه وتعالى الأية هذه كفيلة بأن تُزيح عنك رهق الحياة ومعاناتها ..
فكل من صبر لحكم الله كان من الذين خصهم الله بالنظر إليهم ...
فماضرنا ونحنُ نصبر لحكمه...!!
النهاااااية......
زهراء الحسناوي
هاي العداله الالهيه الحجيتلكم عنها
موشرط يعرف لواء بسحر نذيره وحنان
يكفي الله سبحانه وتعالى يعرف وشايفهم
نفذ بيهم الحكم العادل رجعهم للصفر وبعد الحبل جرار مانعرف بالمستقبل شنو ضاملهم من بلاء ومصايب
انتضروني بعد يومين انزل نهاية غصون لان تعبت من الكاتبه اليحبني ينتظر لان ماضل غير بارت لواثنين
تحياتي للجميع 🌹🌹
تابعو الكاتبه الورده حنين العلي
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!