رواية ضحيه_ام_جلاد الفصل التاسع عشر 19 - بقلم أم احمد

ضحيه_ام_جلاد
ام احمد
الجزء الثاني
البارت التاسع عشر
مجنت اعرف ان هذا الي يمر كله من عمري ولاجنت محسبه ليش اني جاي اتحمل واتحمل وعلمود منو؟ وشنو ليش اتحمل!  غزوان بالنسبه اله جنت جسد ياخذه وكت مايشتهيني وراها يخاف عل مشاعر سماح وره شهر ضبظ من روحتي لغزوان للغرفه وراها عاهدت بعد مااروح عليه خلي هو يجيني وجدام الكل ليش يخلي موضوع سكته مامقبوله منه بذاك اليوم خفت لااكون حامل يبو ضجت شنو كلما اكون وياه احمل ضليت الوب مااريد احمل جنت اشوف ابني بعده صغير من غير فليحه جانت بين عليها تعب وبدت تكمش صدرها هوايه جنت احبها ال فليحه ومااريده يصير عليها شي من غير هيه جانت بصفي اهنا بدت ام امير تسيطر عل كلشي وكل منافذ البيت تامر وتنهي بكلشي اني ابد ماتقارشت وياها خوفا منها لان اعرف غزوان يحبها وراح يكون وياها من غير فارق العمر بينا غيرت اغلب اثاث البيت وغيرت ديكورات وجابت وحده ويه ام عباس بالمطبخ ام حميد مرا اربعينيه بس يمه منها سمره طوخ وعيونها جاحظه من اشوفها اذكر ال گدعات الي يطلعن بالمسلسلات المصريه صح مرا مالها صوت بس ضخامتها وشكلها خوفني منها وهمات ام امير جابت وحده لخ ارمله ام حسنين تنظف الها الطابق الفوگ وتعتني بالملابس والكوي ام حسنين سمينه ومدعبله بس شاطره تهف منا ومنا صار البيت كله خدم اني جنت انظف غرفتي وزنوبا وفليحه ينظفون غرفهم اما غرفه غزوان ان جنت ادخل كل اسبوع انظفها جنت استغرب من هاي ابنيه قسمه ملاحگتني بكل مكان صح هيه مامأذيتني بس ظهورها فجاة بحياتي وملازمتها الي جنت استغربه كلما اطلع للبستان وياي اگلها ومن ادزها شغله بعيده عني تنحر وتسوي روحها ماتفتهم اني ماخليت بالي وياها وعفتها مرافقه الي بحياتي طبعا اني اخذت خبرتي بالبس ومكياج من بت عمي عواد وهاي بت بغداد لهذا ذوقي ولبسي جان يختلف عنهم بااشواط رغم ان سماح بت شيوخ وخير بس لبسها وشيتها كله الوان صارخه وغريبه من اشوفها تخلي مكياج بداخلي اضحك بس ماابين الها ولبسها كله لمع اما اني جنت اروح انتقي الوان هاديه ومتناسقه واعرف شنو مناسب الجسمي والبشرتي ومنها اتعلمت مني زنوبا وجانت تگلي اني انيقه واهتم بروحي صح سماح طولها وجسمها وعيونها كلها احسن مني بس اني اعرف شلون اسوي روحي احلى منها بقاطات من نكعد عل اكل الاحظ عيونها عليه وشلون تخاف لا غزوان ينتبه الي جنت اعرف هيه تباع عليه وان غزوان يباع عليه من جوا الجوا ويداري مشاعرها ويخاف من غيرتها وخو هم مجان ناقص مشاكل جان عصبي هوايه ومشاكله بالشغل تخليه عل اتفها اسباب يسب ويغلط علينا محد يخلص من لسانه وقباحته اكثر شي جان ويه امير لان امير بدوره جان عنودي وسكوتي ويغيض عمه من جوه الجوه اكثر من مره يريد يضربه بس امه تخلصه وتعرف شلون تهدي موضوع جنت انطي الحق بداخلي لاامير بس بداخلي ماابينه لااحد مرات اشوف بالبستان مقهور اضل اكعد اسولف وياه طبعا قسمه مثل ظلي جانت وجنت من اريد احجي ويه امير ادزها بعيد حته الولد يحجي الي بگلبه   (ولا جنت اعرف هاي ابنيه هيه جاسوسه عليه الا بعدين وبعد فوات امر) رغم اني جنت اتنجب ضرتي بس هيه ظلت خالتني بالها وتخاف اشد الخوف ليروح غزوان يحن عليه ومن يدخل الغرفتي ويشوف ابنه تضل تصطگ صك وتتعارك ويه خدامات وتوتر الجو بالبيت حتى يطلع غزوان من غرفتي واني هم صرت اطلع علاوي خارج غرفتي حتى لايضطر غزوان ويدخل الغرفتي اختصار للمشاكل وهوسات
مرت ايام ركض ركض واني هم طلعت مو حامل حمدت الله وشكرته حته لاتصير مشكله الي ويه ام امير وهمات ابني بعده صغير الي جان يقلقلني هوايه هو صحة فليحه بتدهور مستمر وهمات غزوان الي جان مثل بركان دومه بعصبيه وحته صار كله ينام وحده بعيد عن سماح واولادها لان هيه ماتسكت لحظه وحده وهو مايتحملها عاد ماادري جان من يفقد يضربها او لا واتعجب عل رجال مزوج اثنين وينام وحده بالغرفه اني هم مااريد بعد اروح اله يريد هو يندل غرفتي .
مر عل زواج غزوان من سماح سنه اني استغربت انها ماحبلت ولاراجعت حكما علمود يصير عدها طفل كل هاي فترة اني ولامرا طخ لساني بلسانها ولا حجينا ولا تعاركنا عبالك هيه بديره واني بديره بس هيه نظراتها الي تخوف واني مجنبتها وملتهيه ويه علاوي الي بدا يمشي ويخطي وصرت اركض عليه منا ومنا اخاف عليه لايتاذه .
كلش زين اذكر هذا اليوم الي رجع بيه غزوان وكف بنص صاله وصاح عل زنوبا وگلها اني انطيتج البيت شيخ كاظم خلال شهر همه ياخذوج اهنا جانت صدمه جبيره النه كلنا اني وفليحه وزنوبا ظلينا مصدومين منو هذا شيخ كاظم وهاي زنوبا جان حبيبة اخوها هيج راسنا وشال انطاها بسرعه بس الظاهر ان نسوان جانت مثل بضاعه اوهدايا كلما تصير مشكله جبيرة يحلوها انهم ينطون مرا اما فصليه او هديه وتنحل مشاكل الي بينهم الي افتهمت ان غزوان داخل مشروع ويه شيخ كاظم وبعدين صايره مشاكل ابينهم جبيرة بس شيخ كاظم جان مو هين ولحمه مر وماسكت واطورت مشكله ابينهم وطبعا شيخ كاظم جان معروف باانتماء لااحد منظمات الحزبيه وهو اله ايد طويله ماتقل اهميته عن غزوان وحل الكل مشاكل ولاتصير حرب عالميه ابينهم لان جهة غزوان مسلحه وجبيرة وجهة شيخ كاظم همات نفس الشي واي خلاف ابينهم يصير الدم ابينهم للرگاب فدخلوا الناس ابينهم واقترحوا ان يتصاهرون ابينهم ويوحدون قواهم گام شيخ كاظم طلب ايد اخت غزوان مجان يكدر غزوان يرفض وهيج صارت زنوبا حل للخلاف وراح تزوج شيخ كاظم وطبعا انگلب البيت بالبجي وفليحه ظلت تلطم لان شيخ كاظم مزوج مرتين وهو يجي يطلع اكبر من غزوان بعشر سنين من غير بعدين من اجه وشفناه حشه خلقه الله اسمر طوخ وكرشه يمشي قبله وشكله مبين مال مجرمين هذا الي خله زنوبا تنهار بالبجي وتظل لاتطلع تاكل ولاتطلع من يصيحها غزوان ظليت هل فتره اخفف عنها واواسيها بس مصيبتها جبيره بدينا انحضر الزواجها ونطلع ونشتري الها بالغراض وملابس كله بحزن ودموع صحة فليحه تراجعت هوايه وهيه تشوف بنتها هيج تاخذ قسمه وسبب ابنها واحد يحجي الحق حتى ام امير مارضت وظلت مقهورة عل زنوبا الي كله عمرها14 سنه واتحدد يوم العرس وقبلها الحنه رحنا اشترينا ملابس النه وللعروس وكعدناها ال زنوبا وحنيناها اني اشتريت فستان لونه چويتي وقصير فوگ الرگبه وصدره شويه دلع ومكسم عليه وطبعا الحذاء نفس اللون وكعب واني جنت بيضه وشويه جسمي مو ضعيف الكل اتفاجأ بيه وبجمالي وشلون شعري فتحت وسرحته بدت الحفله وركص والبيت انترس بشر وغزوان سمح المرت ابوه تجي هيه وبناتها واجوي كلهن وحته بنات ام فهد اجوي وجنت اول مرا اشوفهن ابد مشايفتهن كلهن حلوات بس سماح تنفض منهن نفض اجت فليحه وعرفتني بيهن واتعجبن عليه كلهن خلصت الحفله بسلام والكل راح عل بيته والي صار بعدين خلاني اكعد عل كابوس مرعب غير مجره حياتي
  رجع غزوان من برا وجان بركان من غضب لان احد ناقل اله حجي ان امير شايفيه بالخماره جان يرعد وگلبها الدنيا گلاب نزلت سماح تريد تفتهم شكو الما افتهمت مشكله ظلت تخرمش بخدوده بعدين بدال متهدي موقف ذبت ملامه كلها برسه لان هو بطل من مدرسه وخلاه صايع بالشوارع انوب كبت ابينهم وعياطهم ليجوه خطيه فليحه مكدرت تصعد عليهم ردت اصعد مخلتني فليحه وشويه اجه امير اني مخليته يصعد وكتله عل غزوان عرف بيك تسكر شو هذا بدال ميخاف انوب صعد ليفوك يريد ينقذ امه من عمه لان بعدين عرفته ان هو يضربها بس هيه تظل ساكته ومتحجي حتى لحد يشمت بيها وخضم هوسه هاي كلها غزوان ضربه لاامير وطرده من البيت نزل امير وجه كله دم ويريد يطلع من البيت وامه جانت مكفوش شعرهاومجلبه بيه بس هو دفع امه وطلع ظلت هيه بالگاع تبجي جانت عيونه طامسه من راشديات اني رحت اريد اگومها من گاع لان متت قهر عليها واهنا اول مطخيتها
-وخري عني ام رياجيل گح…
اني ابتعدت عنها وخفت منها واتعجبت ليش هيجي تحجي ويايه گامت عل حيلها جان شكلها مرعب شعرها منكوش وكحلها سايح وعيونها وارمات
-الا افضحج ام… ..
نزل غزوان من فوك عل عياطها وصياحها راسنا عاط بيها تسكت وتصعد البيتها وجرها من ايدها يصعد بيها ظلت فليحه وزنوبا يردون يخلصوها من يديه مفاد بعدين گالت بدال مجاي عليه شوف العجميه شتخور وراك بالبساتين وانت نايم عل اذانك كل مرا يجيني ابني ويكلي تركض ورايه وتحاول ويايه واني اخاف اگلك  هيه گالت الكلام هو لطمها عل راسها  وطلع منها الدم كامت زنوبا وصرخت وهو التاف عليه عيونه حمر ويريدن يطلعن من مكانهن جرني الغرفته ودخلني وسد الباب اني من خوفه اتجبنت رجليه وكعت بالكاع ابجي حسيت روحي تريد تطلع من مكانها وردت اطلع اروح عل غرفتي لكيته قافل عليه الباب سمعت صوت علاوي يبجي وزنوبا تسكت بيه صحت عل زنوبا ان تسكته ال علاوي وتشربه حليب وتدخله تنومه بالغرفه عرفت غزوان راح يرجع وراح يموتني عبالك تهمه ثبت عليه ظليت الوب اروح واجي يلا رجع غزوان عليه واول مدخل اجه عليه من فتح الباب فزيت وخفت ورحت النهاية الغرفه دخل ورجع قفل الباب نزع الحزام مالته الي يحط بيه السلاح ونزع عگاله ولاكانما اني وياه بالغرفه راح علك جگاره وباع عليه وهو ينفث الدخان مالته تعالي احجي وياج جنت ارجف منه من خوف اعرف بيه وبطشه اجيت ليمه
-ليش خايفه انت
-اني ممسويه شي والله وهيه مااعرف ليش هيج حجت
-اني ادري بيها تغار منج بس الي تكول شي مو سهل (يحجي وهو يكزز عل سنونه كز من عصبيه)
-نزلت عل ايديه وكتله اسال الكل عني
-اي طبعا مراح هل مرا اسرع عليج (اندكت الباب وراح فتحها دخلت قسمه وهيه بعينها النوم وترجف من الخوف منه )
صاح بيها تحجي كلشي اني بهاي اللحظه عرفت هاي ابنيه ليش لازكه بيه وعرفت هو مسلطها عليه تراقبني وهيه كل 

تشوفني احجي ويه امير واني راح تگله كلشي وتثبت عليه التهمه هاي افكار كلها نزلت عليه بلحظه دخول قسمه للغرفه اني راسنا كعدت بالكاع ابجي
-شنو طال عمرك شسويت اني
- كولي الي شتعرفين من ناز تطلع للبستان ويامن تكعد وتحجي
اجحي كلشي ولاتخافين
-طال عمرك هيه متحجي ويه كل احد بس مرات تگف وتحجي ويه ابن اخوك
-شيحجون احجي
-طال عمرك هيه جانت تدزني هوايه وتطرد بيه من تكعد تحجي وياه (جنت اسمعها واني عيوني گامت تسورب واختنكت اريد اشم هوا اعرف بعد انحكم عليه وهو هسه عنده الدليل وحكم عليه بعد واي حجي مني مراح يغير النتيجه ولا راح يصدك بيه بعدين
-روحي قسمه وسدي الباب وراج (گام طفه الجكارة وهو يفتح بجف ايديه ويسدها اتقرب عليه)  اني راسنا رجعت ليوره وگتله والعباس ماعندي شي وياه اني جنت احجي ومن اشوفه ضايج واظل اواسيه احسبه مثل اخويه الصغير واعطف عليه (اشرلي ابايديه اسكت ومايسمع مني كلمه زياده )
-ذيج مرا طلعتي من دون علمي ورحتي عل بيت عمج ومن رجعت حته مكلفتي نفسج تكولين الي وظلت تدك بگلبي بس گلت مااسرع وخليت عليج ابنيه تراقبج مكفاج رجعت عل ابن اخوي فهد تتحارشين بيه
-لا ابد ولايوم نظرت اله بغير شكل اني مستحيل اخونك
اتقدم عليه وكومني من الكاع وهو يتلمس بشعري جنت ميته خوف منه وفجاءة انكلب عليه وكفشني وگلي تريدين اصدك بيج  بعد كلب بت الكلب ولطخني بالحايط ليش هيجي تجازيني احترمتج وخليتج ادميه تجيني وتباعين عل غيري ومنو عل ابن اخويه من انلطيت بالحايط دخت وكعت وهو ظل يضربني برجليه وكومني واني دايخه ومااشوف زين بعيني تعرفين شراح اسوي بيج راح ارجعج عل بيت عمج واگلهم عليج وابنج بعد متشوفيه ابد افتهمتي
فدوة والله ممسويه شي ارحمني سوي كلشي بس لاتحرمني من ابني والله اموت اصير خدامه الك بس لاتحرمني منه وسحلني سحل من شعري وطلعني برا غرفته جنت اطخطخ بالغراض وهو يسحل بيه طلعني من غرفه واحس فروة راسي راح تنشلع من مكانه من شافتنه فلحيه عاطت وراسنا خربت و عافني وراح عل امه واني اتجيت بالحايط دايخه اريد اشوف بعيني مااكدر وكع راسي بالگاع واني اشوف غزوان يشيل امه وطلع بيها برا
من فتحت عيني جنت بعدني مكاني بس مااعرف شكد مر عليه من وكت كمت عل حيلي كوه ورحت عل غرفتي اشوف ابني شفت زنوبا حاضنته ونايمه اخذته بحضني فكرت ماكو شي غير اني انهزم اخذ ابني وانهزم منه قبل ميرجع ويطردني من البيت ويحرمني من ابني غسلت وجهي ولميت شعري لبست عباتي واخذت الذهب مالتي وابني شلته وطلعت من البيت عل سريع محد اعترض طريقي من حرس بس واحد عرض عليه يوصلني وين مااريد وافقت واني ميته خوف گتله عل بيت عمي رجال مجذب خبر صعدني وطلعنا عل بيت عمي كلي خوف ورعب من الي راح يصير ورايه واعرف غزوان من يعرف اخذت علاوي مراح يسكت

ام احمد