رواية دخيله بنت الشيوخ الفصل الرابع عشر 14 - بقلم اوسار

#دخيله_بنت_الشيوخ
#عشگ_ايلول
بارت 14قبل الاخير ....
بقلمي نوره Nora Naser

اسمع صوت ابوي يصيحني .. خليت على. راسي شال بسرعه كلبي من الدك راح يوكف اريد اعرف شصاير طلعت للطرمه صحت هايابه .. خمشني وسحلني سحل من هدومي وظل يكتل بيه عرفت كلشي انكشف بس ايلول وين وعمتي شراح يصير بيهه
خذاني سحل للسياره .. طببني بيهه وراح  وولد عمي يمي وحركت السياره ... وانه بس ابجي وماادري شسوي اله شويه يغمى عليه
وصلوني للبيت جان رافد وبعد ويا ابن خالي اسمه محمد واخو سعد .. صاح رافد على امي وطلعت امي وخواتي خذوني يردون  يطببوني للبيت. . وانه اتوسل برافد عفيه الله يخليك لاتخليهم يكتلونهم انت مثقف الله يخليك باوعلي ونضراته بيهه حزن مابيده يسوي شي ...
طبيت للبيت ادك والطم لزمتني امي من ايدي كالت ولج جنتي تدرين بيها هي عمتج
يمه شنو صار بس كليلي شلون عرفوا
ولج اليوم يذبحوج ذبح ولج ليش هيج سويتي بروحج ليش يامصيوبه ليش
يمه لاتكليلي يكتلون ايلول
ليش هيج اسيل ليش هيج ربيتج انه باعي ابوج اذا كال كليله ماادري بيهه هي عمتي كلالي مربيتني كليله مو امه هي ولج اخوي جاسم وابوج ناوين ع ذبحج
ظليت ادك واللطم متت خوف يمه شسوي بس كليلي يمه خاف يكتلون ايلول
شبكتني وظلت تبجي .تكول كله مني .. بقيت بالغرفه لحظات رعب ماتنوصف .. الي يذبحني مايلكه بيه قطرة دم
بهالاثناء دخل علينه ابوي .. بيده سجينه وايده كلها دم .. ويرجف ومتهستر .. يصيح ومحتار بروحه ومايدري شيسوي لحظات فزع وخوف حسيت هي السجينه راح تدخل بيه وقبلهه يمكن كتلت ايلول وعمتي .. غمضت  عيوني واستسلمت للموت بس انه ماسويت شي يستحق الموت .. ابوي راد يوصلي ماكدر طاح يم الباب وشالو الولد وامي ماكدرت تحرك ساكن شابكتني وكاعده دخل خالي جاسم .. دفر امي وجرها من ايدهه وهي تتوسل بي لاحبوبي خويه اروحلك فدوه .. لاتاذيهه فدوه الله يخليك جراها وطلعها بره .. وسد الباب وقفله ...
اجه تقرب مني .. ولزمني من شعري وظل يفر براسي كال ولج تدرين بيهه هي عمتج لولا
جنت ميته خوف واريد بس احمي نفسي
كتله لا خالو ماادري صدكني ماادري دفرني جم دفره ع ضهري وعلى بطني وانه اتكلب ميته من الالم ومتت خوف على ابني .. وفكري وكلبي يم ايلول
طلع وطبت امي اجت شبكتني وتبجي اول مره اشوف امي هيج حنينه عليه ... مرت الساعات عليه مثل الموت البطيئ اتوسل بامي يمه بس كليلي ايلول مات كتلوا تكلي ماادري .. حيري بروحج وراها هم اجه وابوي وتهديد  وكتل ودفر. هالليله ماراح تخلص ولايطلع عليها صبح وطلع الصبح وياريته ماطلع صبحت على نزف قوي
والم ابطني وبظهري .. امي ظلت تلوب عليه .. راحت عليهم تريدهم يودوني للمستشفى .. محد يقبل يوديني يكللوله خليها تموت ..
بعدين طب رافد علينه وكال لامي نضفي وجهه من الدم وخلي نوديها
امي نضفت وجهي ولبستني هدوم نضيفه واخذني رافد وبعد ويا باسم ابن ابن عم ابوي للمستشفى وهناك فقدت الجنين  الي جان يربطني بايلول
متت قهر ودمي ماوكف .. سالتني  الدكتوره ليش هيج متاذيه منو ماذيج امي كلتلها تعرضت الحادث بالبيت مابيهه شي
كالت اذا تردون تشتكون اسويلكم تقرير كلتلهه لا ما اريد
لازم نسكت مجبورين حتى نعيش ..
شي جنه خايفين منه لشهور صار بلحظه وماعرفنه منو الواشي .. ومنو الي كللهم ولو خالي جاسم ماينضم عليه شي وهو شيخ من زمان .. وامور المنطقه كلها بيده ..
طلعنه من المستشفى .. صعدنا بالسياره رافد وباسم ينتظرونه كوه صعدت من الالم
مااكدرت اسكت .. كتله رافد كلي كتلوا ايلول بس حاجيني حبوبي فدوه
ماادري اسيل ماادري ولااتدخل بهي السالفه ماجنت وياهم بعد ماجبتج مارجعت
يعني ماتسمعهم يحجون
لا مااخلي بالي يمهم ..
درت على باسم كتله وانت باسم ماتعرف شي
الي اعرفه عمتج انكتلت بعد رجلج ماادري
يعني عمتي ماتت
ماددري اسيل ماادري غير يجي خبرها ماادري ..
امي كالت ارتاحي يمه كافي رحمي روحج انت بيا حال هسه
يمه ياراحه التجيني هي مااتكليلي وج يمه راح اموت والله الموت الي راحه
شبكتني وتبجي ويا وتمس بذاني كله مني انه كله مني
وصلنه للبيت .. بعدهم ولد عمي موجودين هم واسلحتهم ..
طبيت واحس ثكل الدنيا كله على متوني .. وغير الالم الي يعصر گلبي .. وايلول وامه ماادري عنهم ظلت حسره بكلبي اعرف عنهم شي ومحد ينطيني نجده ...
دخلتني امي الغرفتي ظليت انحب وابجي واجن خواتي ميتات خوف .. وجوهن صفر . ميس ظلت تمسد ع شعري وروان لزمت ايدي وتبجي ..
احاجي ليلول بكلبي اكله سامحني ابنك راح حتى ماكملت فرحتك ..
مرت 3ايام ..  وانه مثل الطير المذبوحه ركبته ع النص فرفحت روحي على ايلول وعمتي
والبجي مافارك عيني حتى خواتي وامي يبجون  .محبوسين بغرفه وحده .. وواحد من الولد واكف قريب عليها لانطب ولانطلع
امي تكوم تسوي النه اكل وترجع عشنه بخوف ورعب امي ماتكدر تحجي وي احد اصلا مايتحاجون .
الصبح جنت بالغرفه واباوع للشباك بلكي يجي ايلول عليه واعرف منه خبر .. سمعت صوت سيارات ... وهوسه ومابين يمي شي الشباك بعيد عن الواجهه مال البيت ومو كل شي يبين ...
ماافتهمت شي اريد اعرف شصار طبت ميس تلطم ع وجها ولج ابوي خذوا الشرطه يمله الضابط انت متهم بجريمة قتل ..
صرخت ولطمت على وجهي ولج منو مات ولج منو كتلوا صخام ولك ايلوووول لاتعوفني
ولج سكتي لايسمعونج سكتي
يعني ايلول مات لو عمتي احجي كليلي احجي
طبت امي تبجي ركضت عليها ولج يمه منو مات كليلي منو
ولج عمتج هاله ماتت كتلهه ابوج بذيج الليله
وهسه اجو عليه الشرطه ياخذونه ..
يبووو ييمه يبووو
ولج هي اولها نهر الدم هذا ماراح يخلص هسه بده
وايلول يمه كليلي شونه هاا بس كليلي
ماادري عنه ماادري

ايلول ...
ليلة الحادثه جنت بالمطبخ يم اسيل .. وسمعت صوت سيارات وكفن يم الباب ..
رحت اشوف شنو .. فتحت الباب وجان يطبون عليه مثل الجيش .. و3نفرات لزموني اريد اتحرك ماكدر طببوني بالهول اسيل مادريت عنها .. امي طلعت بالهول  تصيح جان ياخدهه ابو اسيل وبيده سجينه وخذاهه للغرفه وسد الباب .. بقوا البقيه بره ملتمين عليه مايخلوني اتحرك .. وانه اصيح عليهم جبناء عوفوهه .. ولكم ماسوت شي هي تزوجت ماسوت الحرام ... سمعت اصوات ونين والم  .. بعدهه طلع ابو اسيل . وتركوني وراحوا رحت اركض الغرفة امي شفتها تنزف اريد اروح وراهم اشرتلي تعال
رحت خليت ايدي على جرحها وخليت راسها بحضني جان تكلي وهي متالمه وكوه تحجي
يمه هي جزاتي لازم هيج يصير من سنين تعبت يايمه تعبت والموت الي راحه ... اريد اللحك على ابوك عن عليه .. اشكر تمار الي على كل هي السنين وسلمني على احبابي ولاتاخذ بثاري خليني اموت مرتاحه
شلتهه وديتهه للمستشفى وهناك ماتت .. ماتت ووجعة گلبي سنين وانه بعيد عنها من اجتمعت وياهه ماتت ...يمكن انه جنت طايش وتسببت بموتها
وتزوجت اسيل وقربتها من اهلهه
ماتت ابين ايدي وباحضاني ..بعد ما جانت حياتها عذاب بعذاب ماتهنت بحياتها ولابشبابهه ولابعشگها .. ولاحتى حضت بابنها ودعتها بالنوح والبجي امي اتمنى ماقصرت وياج اتمنى اخليج بكلبي وادفنج بيه .. حتى بلكي ارتاح ماراح يروح دمج هدر ومو انه الي اسكت عن دمج وادريج بريئه ..
جنت ماادري منو هي امي بالضبط بس جان احساسي يميل الها هي .. امي وابوي مو عار لاا هذول امي وابوي وثارهم هسه بده بس لو اعرف منو كللهم اله افتح عليه ابواب جهنم ... حتى لو جانت اسيل ..

اجت الشرطه حققت بالموضوع وقدمت شكوه على ابو اسيل .. وخابرت ابوي اجه الي باسرع وكت هو وواخوانه بس شفتهم شمتانين عرفت نضراتهم بس ابوي عمري ماشفته بهالحاله مبين عليه الانكسار والحزن والدمعه بطارف عينه كملنه مراسم الدفن وسوينه الفاتحه ابيت ابوي .. الكل يعرفها هناك ..
ماجنت حزين وبس لا نار وتحرك بيه .. اريد انتقم اريد اخذ ثار اهلي انه هسه وحيد حتى زوجتي ماادري عنها .. وره الفاتحه جنت كاعد بشقتي و.. سمعت جايين كوامه من عشيرة خوالي .. رحت طبيت للبيت خذيت بندقيه كلاشنكوف واريد اخرطهم كلهم طلعت من البيت ورحت للديوان جانوا كلهم كاعدين هناك سحبت اقسام عليهم .. ردت اخرطهم خرط صار بوجهي ابوي وعمامي  وولد عمي ... منعوني منهم واخذوا البندقيه وطلعوني وانه اصيح عليهم .. واتوعد الهم ..
دخلوني بالشقه مالتي .. ومنعوني من الطلعه ....
مر الوكت وانه احرك جكاير وروحي تحترك حرك .. ماكفاهم ابوي ماشبعوا دم ..
بعدها بجم ساعه طب عليه ابوي .. وطلع الولد ..
وكفت كباله كتله ليش ماخليتني ابرد ناري بيهم
ياابني احنه نريد نهدي ع الوضع مو نزيده انت عزيز عليه ودم امك غالي عليه الله شاهد بس انه مااريد اجرجر العشيره وياي شتكول عليه الناس ودمهم بركبتي
كعدت ع الجربايه ودنكت راسي وابوي كمل كلامه
ياابني انه ماراح اخليهم يجيسون شعره من راسك كتلهم ايلول ابني وهاله انه ماادري بيهه بتكم ..
كالت اهلهه ماتو بالحرب ولفيتهه وربت ابني ايلول
انه مااريد مشاكل ومااضحي باحد اماا انت وعدت امك مااتخلى عنك ابد ..
حقك يابه انه ابنك بس بالاسم انه اكدر اخذ حقي بيدي لاتخاف ..
ها وبعد كالوا خلي يطلك بتنا
شنو والله لو تتثالث الدنيه مااطلكها
ياابني زواجكم هسه باطل انت شون تبقى وي وحده ابوها كتل امك
اسيل مالهه ذنب وهي حامل بابني
شمدريك مو هي الي وشت بامك
لايابه اسيل ماتسويهه .. اسيل تحبني مستحيل تدمر حياتي وحياتهه ..
لعد منو الي راح وخبرهم
ماادري ماادري بس اذا اعرفه منو ماراح ارحمه ابد ابد يابه وحاكم شنو وضعه
اذا كدر يسويهه قضية غسل عار ماراح ينعدم
بسيطه اله اخلي ينعدم .. مااطلع انه
انه باجر اروح للبصره
شسوي
اروح اخذ مرتي حقي
اكسر الشر واكعد خلي يهدأ الوضع يله
لا يابه هي مرتي واريد ارجعها ..

ايلول لااتتخبل اعقل
هو ظل عقل ماظل براسي. عقل وانه تسودنت ورايح اخذ مرتي واذا ماانطونياهه راح اتصرف بغير شكل لان ماعندي شي اخسره
تره مو بس انت ماعندك عقل انت محسوب على هاله وهم مامصدكين انت ابني .. ويمكن يكتلوك انت ماتخاف
واذا لم يكن من الموت بد فمن العار ان تعيش جبانا

هذا مو جبن ولاعار هذا حكمه وعقل حكم عقلك واكعد واسكت ومرتك طلكها ازوجك تاج راسها زواجكم باطل مادام بينكم دم
اسف العندي كلته اريد اطلع يابه من رخصتك ..
وين تروح
طالع للعماره ..
ماتخاف على روحك اكعد واسكت واخذ حجايتي ايلول واذا على سالفة مرتك انه احلها انه ادز الهم جماعه وارجعها الك ...
لايابه مايحتاج تدخل نفسك خليهه بيني وبين خوالي خذيت السويج وتركت ابوي ونزلت
شافتني امي حمديه كالت وين رايح ييمه
يمه رايح اجيب مرتي
يمه ماتخاف على روحك
ادعيلي يم گلب طيب
ماابطل انه من دعائي الك
هذا هو ماتقصرين .. 
حركت سيارتي ومشيت وافكر باسيل معقوله تسويهه اسيل مستحيل لا ماتسويهه اذا مو هي منو الي فتن وبسببه امي انكتلت ياربي راسي راح يطك ماجاي اتحمل حاس روحي مااكدر استمر منين اتلگاهه
وصلت .. للعماره ورحت لبيتي الي مأجره .. جان معفس عفس ... رحت للغرفه الي بيهه انكتلت امي ..
وبيها الدم بعده ع الزوليه .. كعدت ع الكاع .. وخليت راسي ع ركبي  واجر حسره كمت افت بالبيت واتذكر
واشوفها بكل مكان ...
غراضها .. ملابسها الطرشي الي مسويته وكل شي
نوب صار تليفون اسيل كدامي .. وغراضها وملابسها اوف شونج هسه اسيل وبيا حال انت هسه بس لو اعرف .. لازم اروح .. هسه مااتحمل بعد فراك امي واسيل سوه ..
طلعت من البيت حركت السياره وكبل البيتهم ومامهتم الشي غيرها .وصلت لبيتهم وابد مامتردد . دكيت الباب .. طلعلي واحد منهم .. تفاجأ من شافني حتى خاف وراح صاح الهم كلهم ..طبيت من الباب ومشيت خطوات .. اجو تسطروا كبالي هم واسلحتهم
وبينهم الشيخ جاسم مبين جان مرابط ابيت ابو اسيل كال شعندك جاي
كتله انه جايكم اعزل وماشايل سلاح اريد اخذ مريتي واروح ماعدي شي وياكم
ماعندك مره هنا ويله روح وطلكها احسن الك ..
تره اكدر اخذهه منكم بالقانون وحتى بالقوه انطونياهه هسه
تريد مرتك مو روح باسم جيبهه
اشر الواحد منهم يروح يجيبهه .. ثواني وجابهه كايدهه ويمشي .. باوعتلها كوه تمشي ووجهه من اثار الكتل خريطه صاير حاجيتها بروحي هايالحبيبه شمسوين بيج اله اخذ حيفج منهم .. واللتقت نظراتنا ودموعها تصب دمع والم ومبين مكسوره بحزن يمكن اكثر مني .. خذاهه خالهه من ايدهه وكعدهه جوه رجلي بدفع وحط السلاح براسها وسحب الاقسام وكال اذا تريدهه اخذهه جثه وولي منا .....
يتبع .
هلو بنات طبعا البارت جان كامل داكتب بالاسطر الاخيره وطفت الكهرباء والسحب عطلان وتاخرت مااجت واني نمت لذلك اتمنى تعذروني ...