رواية دخيله بنت الشيوخ الفصل السابع عشر 17 - بقلم اوسار

بارت 2
#دخيله_بنت_الشيوخ
مالك دخل بيه مو انت التخليت عني وشمرتني للوحوش ينهشون بيه ورحت تزوجت وعشت حياتك
للاسف ماعندك شجاعة امك وابوك

اوكفي اوكفي تردينه ننهزم مثل امي وينعاد نفس السيناريو ثم خوالج هددوني بكتلج جان خوفي اكثر

اسيل ..
ماكتلك ننهزم جان اكو قانون .. البلد مو تايه وانه زوجتك حملتني ذنب ابوي .. يله هسه ماعندي وكت خلي اروح اجيب لامي واختي غده من رخصتك

عفته ومشيت بدربي والدموع تطاير من عيوني شكد صعبه عليه جان زوجي وبليله ويوم يصير غريب ..
بعد مااتطلكنه مريت بحاله صعبه كلها اللتمتت عليه موتت عمتي وسقطت جنيني .. وتسلط خالي وولده علينه وخلونه بحسرة النفس مريت بحالات اكتئاب وحاله نفسيه ومرات مااسيطر على نفسي .. تجيني حالات اتهستر ماتحملت كل الي صار .. مو قويه الهالدرجه واتحمل .. جان رافد ابن عمي  ينطيني ادويه ومهدئات هو طبيب بس مو دائما يمنه هو ابغداد جان يجي بين فتره وفتره ..
ابوي جان وهو بسجنه ينطيهم اوامر تحدد مصيرنه اجه فد يوم خالي الشيخ جاسم النه وكال اريد ميس
الباسم
ميس ماتريده وظلت تبجي بس مابيدنه شي كلنه هم قررو بعد .. لاسوينه حفله ولاشي احنه اصلا مو بحال حفلات ..
مجرد عقدوا سيد وهي هيه ..
وراها اجه وجابلهه تليفون ومنها راسلت بي ايلول..
بعد فتره ..
وراها بكم يوم اجت ميس كالت باسم اخذ التليفون
ليش ولج خاف شاف عندج الفيس
لا اصلا انه امسحه من يجي بس ذاك اليوم من رحت البيتهم شافته بيدي خالتي وسالتني منو جايبه الج كتلهه باسم اشو اليوم كلي جيبي
يعني امه كلتله اخذه منها
اي اكيد هي تكرهني
اذا من هسه هيج يسمع كلام امه .. الله يساعدج ميوس
ولج اكرها اموت منه ماجاي اشتهي بعيشة الله
لازم تحاولين تحبينه تره هذا زواج عمر شون تكولين هيج
ولج انت ماتدرين شيسوي بيه من اروح يمه
شيسوي 😳ولج
يأذيني اسيل يأذيني يظل يلزم بيه وبجسمي مااطيقه مااتحمل هسه انه ويني وين العرس والله اريد اكمل دراسه
احنه هذا حظنا ازيد مني انه ولج عيوني راحت من الدراسه بالسادس حتى اطلع .. معدل وتالي هذا حالي مطلكه غصب عني
اووف احنه لشكد راح نبقى هيج
انه لازم اكل لامي خلي خالي يسرع بزواجكم . كبل لا يسويلج شي هذا ابيسم ويشمرج
لاعفيه مااريد اتزوج هسه ومن يجي بعد مااكعد يمه
بوحدي اخلي امي يمنه
خاف يعصب عليج
خلي يعصب ولايسوي بيه هيج
بقيت صافنه ميوس شويه دلوعه ورقيقه ماتتحمل اي شي ماادري شون راح تعيش وياهم

شبيج صافنه اسيل تفكرين بي
منو هو
ايلول
ههه اي هو هسه هم يفكر بيه نساني وعايش حياته بس دارت سنويه مال عمتي الله وفقه وتزوج ..
شلون حبيتي بسرعه ولاجاي اكدر احب باسم ماينبلع بس هو ايلول وين وباسم وين ..
تحبينه حبيبتي بس كون هو يصير وياج زين ..
ان شاءالله
عفتها ورحت لامي لكيتهه  بالمطبخ طبيت كتله يمه اريد احاجيج
شنو خير
يمه هذا باسم من يجي يشوف ميوس كعدي يمه
ليش ولج شصاير
احسن احسه مو راحه ..
شون اكعد يمه تره فشله شيكول عليه هم يردون ياخذون راحتهم
يمه ميس جاي تشكي منه
اختج تدلع خطيبها قابل غريب
اي حتى لو بس اكو حدود
ليش هو شسوالهه هسه .. شكلتلج هي
تكول يسويلهه شغلات محلوه ..
اخ منجن بنات اخر وكت ولاينعرفلجن
يمه شنو ماينعرفلنه قابل هي يوميه بحظن واحد ومتعلمه ع هالشغلات خلي يتادب عيب
يمه يمه منج صايره لسان ولج شنو يوميه بحضن واحد .. مو عيب هالحجي ولي من كدامي ولي

نترت بيه وطلعت هي فوكها بعد اخاف ع اختي من هذا الحيوان ..
وراها باسبوعين ..  صار عرس ميس الصبح كبل لاتطلع للصالون كضيناهه .. مناحه ..و بجي متت قهر عليهه يربي غصب ولاذرة حب بكلبها اله .. واحنه ماعدنه احد ياخذ حقنا .. لااخو ولاعم ولااحد .. ورافد كله ببغداد ..
انه ماكدرت اروح للعرس نفسيتي تعبانه بس امي راحت وياهه .. من الصالون اخذوها لبيتهم .. بقى بالي يمها ..
وتليفونات ماعدنه حرمها علينه خالي .. بس تليفون امي ... واخذته وياهه ..
للصبح كلبي نار عليها .. اعرف هذا وحش خاف يأذيهه. .
طب رافد للبيت ساعه 10الصبح .. فرحت بلكي ينطينه تليفونه .. نخابر امي نسأل عن ميوس .. عبالك مو عرسها وهيج خايفه »عليها لان جانت تسولفلي على عنفه وياهه فخفت عليها ..
رحت لروان .. بالغرفه كتلها فدوه روان روحي كولي الرافد يخابر امي احاجيهه اسألهه عن ميوس
يوو ماا
ولج ليش مو هي اختج ليش تعاندين كومي
روحي انت كليله انه شعليه ...
مو تدرين بيه استحي منه .. ليش تصيرين خبيثه
ما ما
رحت جريتهه من كفشتها وصفكتها راشدي ظلت تبجي شسوي الهه عنيده كلش وانه اعصاب صايره ابد مااتحمل
رحت للهول رافد ماكو طاب لغرفته .. بقيت كاعده ع التخم انتظره.. بعد ساعه تقريبت شفت باب غرفته انفتحت وكفت ع حيلي .. طلع مبدل .. ظل يباوعلي وانه اباوعله وادنك .. كانه قرأ افكاري كال تردين شي ظليت ارجف انه استحي منه كبل جانوا اهلي يكلولي انت الرافد

ظليت استحي منه حتى من جان يجي ينطيني العلاج اموت من الخجل .. عبالك غريب كوه نطقت وجاوبته كتله اي اريد تليفونك اخابر امي
كال اي هاج اخذي ..
شكرا شويه وارجعه
اي اخذي راحتج انه بالحديقه ..
اخذت التليفون ودكيت ع امي .. دك ردت كتلهه الو هاا يمه شلونج شلونها ميس ..
هله يمه شونكم بالبيت زينين
اي زينين
هاا يمته اجه رافد 
كبل شوي ..ماكتيلي ميس شونهه ..
شلونهه بعد انه من ارجع احجيلج هسه مااكدر للعصر واجي خوش روان شونهه ..
ها زينه تعاي لاتطولين .. يمه
اي العصر اجي ..
خوش الله وياج مع السلامه ..
بقى الموبايل بيدي وافكر بايلول ادك عليه واسمع اخباره
لا ومال شنو هو عاش حياته خل اعوفه احسن ..
ياربي هم استحي اوديله الموبايل الرافد رحت الروان كالبه الخلقه ومبوزه .. احاجيهه ماترد وبعدهه تبجي وتتوعدني اله اكول لامي .. عليج سويتلهه ننني
ورحت امري لله .دورت عليه .لكيته بالممر واكف كبال
المرايه اكو ويعدل بملابسه .. وديتله التليفون بدون مااحجي .. كال ها خابرتيهم تطمنتي عليهم
اي ومدنكه
اني هم رايح الهم .. عدهم عزيمه وعزموني
زين جيب امي وياك
اي اجيبهه اذا رادت تردون شي محتاجين شي
لا سلامتك ..
يله لعد في امان الله
راح وانه رحت الروان .. بعدهه تبجي ابدي اكلهه شكد دلوعه انت كتلها 
اصبري صبري خل تجي امي اله اكلها عليج
حتى تتعلمين تطيعيني انه اختج الجبيره
اي اختي الدبيره ننننننيي
بالله هي شحجي وياهه الزعطوطه ..
عفتهه ورحت اسويلنه لكمه ناكلها وافكر بحجي امي مايطمن خطيه شبيه ميس .. بس مااذيهه بسيم الوحش
سويت النه غدا وروان ام كفشه مطنكره .. ماتغدت انه من التفكير يادوب اكلت كم لكمه ..
للعصر انه كلبي نار عليهم ومكابله الشباج الي يطل ع الباب الرؤيس وواكفه لحد ماا سمعت صوت سياره وطب رافد فتح الباب .. وراح يطبب السياره طلعت تلگيتهم بالحديقه .. نزلت امي من السياره ورحتلها ماسلمت عليها بس كتلهه هااشونهه ميوس
عسه وخري عني خل ارتاح
عافتني وطبت جوه ..
رحت وراها .. نزعت عبايتهه وكعدت ع القنفه بالهول معدت يم رجلينها بالكاع هاا يمه احجيلي شصار وي ميس
طب رافد واجه كعد يم امي هو كله يكول الها يمه وامه ابد ولايذكرها شكد تدز عليه ولايروح الها
امي تكول ربته وعمره سنتين .. وبعدهه ب5سنين اجيت انه ..
كمت رحت للغرفه وشفت روان طلعت وراحت بم امي ورافد وكعدت تخرط حجي عليه .. واسمع رافد يضحك على حجيهه هو ميانه وي ميس وروان بس انه لا هو ثكيل وياي وانه هم ..
ظليت اتاني امي تجي للغرفه .. حتى تحجيلي عن ميس اجت وانه تلكيتهه كالت خو انت ماتنطيني درب ..
كعدت ع الجربايه .وجرت نفس. جان تكول .. ماادري البارحه ظلت تنزف ووصاحتني رحت يمهه ظلت تنحب وتبجي وتكلي تاذيت كلش بالكوه توسلت بخالج ومرته نوديهه يكولون تردين تفشلينه  ..وكوه  وديناهه للمستشفى بالليل كالوا مجروحه ..
خرب يمه هذا وحش شبي شكد حيوان غير على كيفه وياهه ..
هي اختج دلوعه ويمكن مقاومته وهيج صار
لا هو حيوان ووحش حرامات محسوب ع البشر
لاتدافعين لاختج هي هم مدري شلونها
لا مدري شونهه ولا هم يحزنون مو تزوجنه ماصار هالشي بس هي من جانت تحجيلي ع حركاته انه خفت عليهه منه
انت من تشوفينهه .. هديهه وحاولي .. تفهمينهه تتقبل وضعها تره جلبت بيه تكول اخاف ابقي يمي

حقها بعد روحي الله يعينها ع رجلها مدري اكول الله يعينهه ع مرت خالي مدري ع خالي نفسه

مابيهه غير العافيه والزواج ستر الهه
ليش هي شبيهه ومامستوره شنو مصلخه بالشوارع ..
لو شنو بالضبط

انت صايره ماتنجرعين كللش ولي من كدامي وحسني الفاظج ولاتحجين هيجي وياي

جنت حاسه راح يأذيهه بقه كلبي عليهه .. وبس افكر خطيه جانت هواي قريبه الي حتى ماادري شون اتواصل وياهه .. وامي ماتقبل .. اخابرها تكول عروسه ولاتشيشينهه عوفيهه .. خليهه كاعده بيت رجلها ..
بعدها عزمناهم وشفتهه ذبلانه وشصاير بيها ختلنه بالغرفه وكعدت تحجيلي ع ظيمها وتشوفني شون مسوي اثار بيها .. وحجتلي ع خالتي وخالي شون يعاملونها وهي بعدهه عروس واعرف ميس انه ماتتحمل كلش ..
اثناء ماخالتهه عدنه بس تشكي عليهه عد امي ..
ماتكعد من الصبح والمواعين تفركهم ماتنضفهم والهدوم يبقن بالسله يوم كامل وغرفتها وصخه ومو سباعيه وطبخها مو شي  ومن هالحجي اتنهدت وكلت بس الله يساعدهه عليج يالبومه حتى البومه احسن منج .. ليش هي البومه شبيهه ويشبهونهه بيج اصلا مامأذيه احد مو مثلج ظليت ادعي عليها بكلبي بس مايفيد والدعوه ترجع ع صاحبها
خلصنه غده والعصر يردون يروحون .. خلصت روحها بالبجي مابدهه تروح .. وتفاركنه ..

مرت ايام ع زواجها والايام صارت شهر .. وشهرين
وبيوم كاعدين بالبيت وعصريه .. اندكت الباب بقوه .. طلعت امي واجت ووياهه ميس .. بس بداشداشتها وشالهه وحافيه وحالتهه حاله وجهها كله مزورك ..
خيرج شبيج ..وصدفه جان رافد هنا .. وع صوتها طلع من غرفته .. كعدت بالكاع تدك وتبجي ..
والله راح اموت مااتحمل اعيش وياهم ولكم شوفوا جسمي من الكتل ورم
ظلينه نهدي بيهه ماكو .. ماتهدا وظلت تحجي محد يرحمني هناك خالتي من الفجر توعيني بالصونده تكلي كومي يالخا.....ه الوصخه .. الله بلاني بيج
اگللها حرام عليج هيج تعامليني انه بشر
تكلي سكتي موزين منه احنه خذيناج وسترنه عليج عمتج ناهبه واختج مطلكه .. وابوج بالسجن منو يكلبجن شوفي خواتج اذا ماعنسن منو يكلبهن
اكوم اشتغل مثل الحمار وهي بناتهه وباقي جناينهه مرتاحات
انوب عليه باسم يحجي وي اشكال بنات ويجي عليه .. .. بالليل يفترسني يموتني

رادت تحجي عن رجلها وخصوصياتهم كدام رافد سديت حلكها سكتتها وشبكتني ظلت تبجي بهستيريا

رافد عصب وكللهه ارتاحي اني راح ابدل واروح اخذ الج حقج وشحده الي يمد ايده عليج ..
اخذتها غسلتلهه ونطيتها كلاص ماي .. تشرب وتشهك كالت كلهن التمن عليه شبعني كتل ولج لان هي بتهم وكحه .. وانه ماتحملتهه ذاك اليوم شخطت الثلاجه مال الغرفه وباسم كتلني ع مودهه واليوم اجت للغرفه تبحوش وتلعب وطيحت الريحه مال باسم وكسرتها وهم حصلتلي كتله .. كمت طردتها .. التمن عليه كتلني ولج مو اول مره انكتل .. ومن اكول الباسم يكلي تستاهلين اكول الخالي يكلي كعدي وسكتي موزين زوجناج ابنه وانت ماتسوين فلس بسبب عمتج الناهبه واختج المطلكه وابوج الكاتل ..
وج احس جسمي مو الي صار ملك باسم بالليل يلعب بيه لعب وكون اسكت وبالنهار لخالتي وبناتهه وجناينهه حتى جهالهم يكتلوني ع اقل شي طك وكتل  كرهت الحياة بسببهم
اريد اموت اريد اموت .. مااتحمل بعد شردت من البيت ..
خذيتها للغرفه .. وابجي وياهه ليش هالظلم ياربي
نومتها ع الجربايه وهي تشهك وتبجي ..
اجت امي للغرفه تصيح .. ولج مصيبه صابتج شارده من البيت هسه شيفكني من خالج شيفكني ولج شفنه اشكال .. من عيالنه شبيجن انتن ماتتحملن شبيجن

جاوبتهه يمه موتوني مااتحمل مااتحمل بعد ارحموا بحالي انه هم بشر
ثواني وونسمع صايح بالبيت صوت خالي ع صوت رافد .. وباسم وكف كلوبنا خالي بصياحه ..
وللحكايه بقيه ..