رواية دخيله بنت الشيوخ الفصل السادس عشر 16 - بقلم اوسار

#دخيله_بنت_الشيوخ
#عشگ_ايلول
الجزء الثاني  ...
بارت 1
بقلم نور

أيلول ...
بعد مرور سنه من حادثة كتل امي طلبت من ابوي يخطبلي  انسام
ابوي كال  انه اخطب الك وحده تليك بيك
كتله انسام جانت امي رايدتهه الي لان هي ربتها ع ايدهه وانه ماقبلت بيهه هسه اريد اريح ضميري وارضي امي بگبرها .. ولو بشي قليل
بكيفك مااجبرك .. طول عمرك قراراتك انت تاخذهه
مثل امك راسك يابس
لايابه مو هيج بس ماكو شي يهمني بنفسي بعد
مامهتم لاي شي غير انتقم لامي
ومنين تنتقم حاكم الكتلهه بالسجن وهي اله سنه وماكو تنفيذ بالحكم لهسه
المهم انحكم بالاعدام وحتى اذا طلع اكتله بيدي ..
مصيره يموت مدام قاتل وبشر القاتل بالقتل ولو بعد حين
عوفه للقانون ماكو دليل على انه امك زانيه اكيد ينعدم والقضيه ماتتحول غسل عار .. ولاتوصخ ايدك بدمه ... وتروح بيهه تره انت محسوب عليه اريدك تعقل وهي عقايدنه وماشين عليهه تره الغلط غلط
انه كلبي محروك يابه المهم مو هذا موضوعنه خلي عليه موضوع  حاكم واخطبلي انسام ..
زين اخطبهه الك .. وامري لالله ...
بعدهه صارت الخطبه بسرعه باسبوع و وراهه تزوجنا جان يوم عرسي من اتعس الايام الي هي انسام ماجاي تنبلع .. كلش ثكيلةة دم وبالي يم اسيل
وتذكرت بيوم عرسنه شلون جنه فرحانين وبنفس الوكت خايفين .. دمرنا حياتنه بنفسنه للاسف
مرت الاشهر بسرعه  ويا انسام عاديه سكنه بالشقه الي بناهه الي ابوي .. مجرد ارجع للشقه اكل وانام وكل احتياطاتي اخذتها مااريد يصير طفل لان جاي احس حياتي بخطر ووولد عمي ماراح .. يتركوني بحالي جنت كلما اطلع واشوف جعفر .. اموت غيظ وكره اتجاهه .. واريد انتقم منه ..
مره جنت طالع وي جماعتي ندخن اركيله وكذا
صديقي محمد كال سمعت حميد شصار بي
لا ماسمعت شصايرله ..
ههههه طاكينه فصل 50مليون ..
لابربك ... وعدلت من كعدتي صدك جذب ليش الولد اعرفه ناس ماعدهم طللايب ..
اي ولك متعرف ع بنيه وشهرين علاقه وياهه تالي كايلتله .. تعال لبيتنه نتونس اهلي طالعين
مطببته للبيت ومدخلته للغرفه وثواني وجان يشوف زلم مسلحين طبوا عليه للغرفه. .. وشابعينه كتل ومودينه لاهله وراهه جايين عشيرتهه يردون فصل والله ياالله ..
معقوله اكو هيج شي
يمعود عوائل تتاجر بشرفها عمود الفصوله شبيك انت
اي بهالوكت صاروا بعض الناس يعبدون الفلوس اكثر من الله ..
الله يستر علينه
ان شاءالله

يلا انه اترخص اروح
هاا تخاف من الحكومه الجديده
لايمعود وراي كعده من الصبح عندي شغل ويا ابوي
اييي شكو عليك نهاركم كله طامسين تاخذون فصول من العالم
ههههه لك لا مو هيج ابوي عادل وحكيم  تره مو مثل بعض الشيوخ ..
اي ونعم منه شيخ تمار .. ع الراس ..

يله حمود انه اترخص .. لاتلهيني
مرخوص عيني الله وياك

طلعت من الكوفي .. ورحت لسيارتي بدت تمطر خفيف ..شغلت اغنية وائل .. مااصعبا نهاية غرامك
تكتبا بيديك وروحك تعذبا وميكون عندك حل
مااصعبا .. تكون النهايه شايفا ومانك قادر توقفا ومجبور انو تفل انو تفل ..
بديت ادندن وياهه واحس بكلمه بيهه بداخل روحي وكانه هالاغنيه مغنيهه الي
صعبه كلش حبيتهه وتخليت عنها ماكدرت استمر وياهه والهه هواي ماكو ممراسلتني
اما حياتي وي انسام مابيهه لهفه ابد
صار 6اشهر من متزوج
اطلع من الصبح وياا ابوي للظهر اتغده وانام .. والعصر او المغرب اطلع ويا جماعتي .. ولليل ومن ارجع مامشتاق الها ابد
عكس قبل جنت .. مااطلع العصر ابقى يم اسيل نضحك ونسولف ونشاقه .. مابقالي منها غير ذكريات وتليفونهه محتفظ بي .. وصورنه خليتهن كلهن ابيت امي القديم من اضوج او احن او اشتاق  اروح اشوفهن
وصلت للبيت طببت السياره للكراج وصعدت للشقه فوك .. اول مافتحت الباب .. الشقه هدوء .. كلش ..
صحت اسسيل ..! بالغلط اووف شوكت انساهه ..
،تالي ظليت اصيح انسام انسام .. وهي ماكو ..
ولاترد .. طبيت لغرفة النوم شفتها كاعده ع الجربايه ولازمه التليفون .. وكفت يم باب الغرفه  كتلها .. مو جاي اصيحلج شنو ماتسمعين ..
لا اسمع
لعد ليش ماجاوبتي
اسال نفسك انت باسم منو صحت بالاول. .
ضربت رجلي بالدولاب اليم الباب وبديت اصيح عليها انت شنو وتحكريني هيج ..
وانت ليش تصيحيني باسمها تره انه هم بشر وهم احس
هوووف .. دخلت للغرفه ابدل هدومي واحجي احنه ماراح نخلص من هالسالفه هي نسيت غلطت انت شنو بسرعه تزعلين بسرعه تطنكرين. 
سكتت ونامت ع الجربايه ونطتني ظهر ..
لاجاي اكدر اتأقلم وياهه ولا اعرف شريد ولااكدر اقنع روحي احبها واعيش حياتي ..
كملت لبسي وطلعت كعدت بالهول شغلت التلفزيون.. لزمت تليفوني واجه على بالي صديقنا حسن وشلون .. هي البنيه نصبت عليه .. وظليت افكر بخطه اريد اسوي بجعفر نفس الشي بس انقهر على ابوي .. وهو ابن اخو وراح تسيئ اله وللعشيره كلها وهم شون راح اجيب هي البنيه واخليهه توكع جعفر ..

هووف .. تنهدت .. انتجيت ع التخم وافكر احس حياتي صايره مخربطه ماجاي الكه نفسي وين احس روحي ضايع .. اباوع للتليفون .. احس روحي يمها اي يم اسيل وينج صار شكد ماموطوطه عليه ومامراسلتني ماادري شبيها .. وشحالهه .. وشصار وياهه ...
كمت طفيت التلفزيون والاضويه ورحت للغرفه . خليت التليفون ع الميز .. وجاي انزع البدي اسمع انسام تشهك  عرفت جاي تبجي ..
نزعت البدي وعلكته ورحت طبيت وياهه بالفراش ..
خليت ايدي جوه جتفهه ودرتهه عليه وجريتهه الحضني .. خلت ايدهه ع عيونها .. وتبجي
كتلهه كافي .. شنو صار هسه وكل هذا البجي ..

انت ماتحبني ليش تزوجتني وظلمتني وياك
لا ليش هذا الحجي بس انه المريت بي مو شويه انت لازم تعذريني
انه تعبت وياريت تطلكني مااتحمل كل مره تصيحني باسمها
رفعت راسها باتجاهي وكتلهه باعيني .. انسام
انت والزمن علي لو انت وياي ع الزمن

سكتت ومانطقت .. لزمتها من حنجها .. وكملت حجي ولج الي مريت بي انه مو شويه تعبت كلش .. امي انكتلت وانه عاجز ماكدرت اسوي شي ..
هزت براسهه وابتسمت ..والدمع بعينها بده ينشف ظليت ابوس بيهه وانه على هالحال جان تكول انت بس وكت حاجتك تجيني مو عوايدك تجي تصالحني
عفتهه درت ونطيتها ظهر كتلهه حتى حاجتي مااريدهه منج انسي وخلاص حضنتني من خصري وكالت بعدك تحبها
واذا بعد احبها بيني وبينها بحر من دم بيني وبينها بنادق واسلحه وقاتل ومقتول .. مايفيد الحب بعد ..
ظلت تحجي خليت المخده ع راسي ونمت ..
للصبح وعيت ع صوتها وهي كاعده يمي ع الفراش تكعدني يلا كوم تريك ..
كعدت تمطيت وكمت من الفراش  وشمرت الغطا بقوه كتلها مااريد منج شي .. حتى لاتعيريني بعدين ..
اخذت المنشفه ورحت للحمام .. حضرت كل شي وطلعت بدون مااباوعلها .. نزلت جوه .. طلعت بالكراج .. بينه مشترك احنه وبيت عمامي .. شفت عمي وولده .. صبحت عليهم .. ردت اصعد بسيارتي .. عمي ابو جعفر كال وين رايح غير اطلع للشغل ..

لا ياشغل ابوك اليوم تعبان البارحه طاح .. وودينا للمستشفى ..
شنو يمته هي .. وليش محد كلي
المهم ايلول الناس كلت وجهنه والحجي طلع والكل معارفنه عرفوا انت مو ابن اخوي الشيخ تمار لهيج انت لازم تشوفلك شغل احنه مانتحمل الناس وحجيهه
شتقصد عمي ماافتهمت
الناس جاي تسميك ابن الناهبه وبعد حجي مااكدر احجي انت لازم تبتعد منا .. احسن والحليم يكفيه اشاره
باوعت الجعفر جان يباوع علينه ومتحمس من شافني باوعتله دار وجهه ودخل للسياره رجعت باوعت العمي كتله هو منو كللهم الناس هذا الحجي
ليش نسيت من اجو خوالك هنا وكدام العالم وانفضحنا الحجي مايخلص واخوي غلط من غطا ع ..
يله انه تاخرت ..
راح وماسمعني ليش اليوم امس من اجو صار سنه وكسور بس اكو من يحشحش ويحجي بظهري ماكو غيره وانه هم مالي سند مالي عيشه عنا راح ابقى منبوذ
راح صعد ويا ابنه بالسياره بدون مايكمل حجي وياي
وانه ظليت مشتعل بناري ... راح ابقى عار مثل ابوي ومثل امي وامي فعلتها وصمة عار بكصتي لحد مااموت.. لو مامخلفتني .. ييمه احسن ..
رحت دكيت الباب .. ع بيت ابوي طلعتلي امي حمديه صباح الخير يمه
هلا بيك حبيب ادخل يمه ادخل
دخلت وكفت بالاستقبال كتلهه يمه صدك ابوي البارحه متخربط ..
اي يمه وصل سكره وضغطه كلش زين ماانجلط وماقبل يبقى بالمستشفى حتم حتم اله يطلع وهي كبل نص ساعه وصلوا
ليش ماجيتوا عليه
يمه ردت اصعدلك فوك اصيحلك ابو جعفر ماقبل كال احنه نودي احنه اخوته
ايييه يردون يقصوني من كل شي .سويلي طريق . اريد اروح اشوفه
طب يمه مخد نسوان ابوك بالمطبخ ومحد بالبيت غيرنه .. هو منو بقا شو خواتك وكلهن عرسن ..
رحت لغرفة ابوي ..
شفته متمدد ونايم ووتعبان .. شافني عدل روحه 
رحت تقربت منه كتله ارتاح لاتتحرك لاتتعب روحك..
ظل يباوعلي .. ويضحك بس عيونه حزينه .. كال هله بابن الغاليه .. عصر كلبي من القهر ..
كتله سلامتك شلونك ظل بالي عليك ليش انه اخر من يعلم بحالتك ..
ياابني .. البارحه ماجنت بوعيي وماادري شون صار كل هذا
ليش مابقيت بالمستشفى احسن الك هناك
نفس الشي ياابني فد شويه حتى نطلع ..
وين اروح وانت تعبان
ميخالف انه مابيه شي جان السكر صاعد وهسه تحسنت .. لازم اخلص جم شغله
شنو من شغل عندك ..
اريد اوفي بوعدي .. لامك اريد امن على مستقبلك ..
خواني ناوين عليك نيه كشره وانه مابيه حيل ولاعندي سند ولاولد واذا عاندتهم طلقه براسك ومايهمهم شي تره. .. اريد انطيك جم فلس وبيت ادورهم بسمك .. كبل لاعمامك يعرفون ..
نمشي بالاجرئات .. هزيت راسي كتله لابويه انه مو ابنك ومالي حق بيهن هذن كلهن حق بناتك وبس انه اكدر اعتمد على نفسي واشتغل .. واعين روحي لاتشيل هم
ازعل عليك والله اذا ترفض هذا وعدي لامك ولازم انفذه وانت مجبور تقبل ..
رفعت ايده وبستها كتله اجلها اليوم انت تعبان خليهه غير يوم .. بقيت اسولف ويا لحد مانام طلعت من يمه ورحت لشقتي .. ضايج احس الدنيا معانده وياي ..
طبيت شفت انسام كالعاده .. كاعده ع التلفزيون ..
شافتني تفاجئت .. لان صح مو بعادتي ارجع وكت
باوعتلها بنظره معاجبني وطبيت للغرفه اصلا مالي خلكها بدلت ملابسي.. كعدت ادخن واعاتب امي ع كلشي سوته .. هي ماتت وارتاحت وانه صارت بوجهي انظلمت وظلمت اسيل وياي .. اباوع للتليفون واسئلها وينج اسيل وينج ولج تعبت اريد شي منج
يسكن المي ..
مر الوكت هيج تعب وشعور بالظلم ماينوصف النظره من عمامي كتلتني .. بعدوني عن كل شي .. حتى عن محلات ابوي مال اثاث ماخلوني اشتغل بيها .. وابوي يكلولي تكتر عنهم تره مايهمهم كل شي ..
خذيت حجي ابوي بس مامقتنع على لحظه اثور وحقدي مايطفي اي شي علاقتي بانسام بارده مره زينه ومره لا وهيج ماشيه .. مره رجعت للبيت ماشفت انسام دكيت عليها تليفونها موجود دك يمي
كلت يمكن جوه ..
من اجت كتلها وين جنتي ..
جنت جوه يم عمتي وبعدين اجت رونق مرت جعفر ابن عمك ورحت وياهه للبيت كعدت يمها اسولف ضوجه
وشسوين رحتي وياهه ..  ليش ماكعدتوا .. ببيت ابوي تسولفين
هي لحت عليه ورحت ..
تقربت منها اصيح بوجهه ولج ذول اعدائي مااريدج توصلين يمهم
انت حاسب الناس كلها اعدائك انه شعليه
شنو شعليج مو مفروض انت مرتي
اكلك اريد اروح لامي اظل يمها جم يوم انه ضايجه كلش كلش
ودارت وجهه وراحت للغرفه رحت وراهه مفرفحه وتبجي
كتلها يعني حسره احجي وياج تتبجبجين ..
انت موتني لاترحمني ولاتخلي رحمة الله تنزل عليه
وهسه شسويتلج كتلج لاترحين هناك تره هم اخاف عليج كلشي يصير خاف يفرقونه ..
وهو شظال بينه حتى مايفرقونه ماتكلي ..
هاا هو هذا همج انت ما جاي تخليني احبج من تصرفاتج هي
نزلت جوه .. مليت من العرايك وياهه .. شغلت السياره وطلعت هايم ع وجهي تعبت وهالكلمه ماجاي توفي احساسي بالتعب ابد ..
مرت الايام هيج هم روتين وهم تعب شغل ماكو كاعد ابوي تحسنت حالته ومشينا بالاجرائات بدون علم عمامي وسجل بيت باسمي ومبلغ بالبنك هو جان مصر ع هالشي .. انه ماجنت مهتم ابد .. انتقلت الشيخه الهم ونفخوا روحهم زايد وصاروا مايتحاجون وابوي شال ايده من كل شي ..
مرت الايام وانسام حالتهه متخربطه بس تبجي وتصيح مااريدك وانه جنت اهدي بيها واحضنها تبعدني وتكول تحلم ووتشوف كوابيس وخطف بالبيت مثل الاشياء تخطف من كدامها

فد يوم رجعت للببيت شفت انسام متخربطه كلش ..
تتقيئ وحالتها حاله وتصيح بطني ماعرفت شبيها خابرت امي وامها وكالوا يمكن حامل .. للعصر وديناهه للدكتوره سوت الها تحليل حمل  وسونر كالت ماكو حمل ولاهي بيهه شي وكتبت الها علاج
اريد اوديهه للبيت ماتقبل ..  جلبت بامها وخذتهه وياهه ..
مرت الايام اروحلها تصدني وحالتهه من سيئ الى اسوء ..
مابقى طبيب ماوديناهه يكول مابيهه شي
اللتهاب بمعدتها .. وواحد يكولون تهيج القولون وكل واحد يكول شكل ..
اخر شي امها كالت اوديها لساده والعلويات ومن هالحجي .. وهذا جان اخر امل عدنا لان كلش تعبانه جانت .. وديتهم لمكان هي تعرفه وره ماطلعت ..
تلطم على وجهه نكول بتي مسويلهه سگوه ..
سگوه شنو نوع من انواع السحر ..
رجعتهم للبيت ونفس حالتهه انسام تعبانه كلش
رجعت للبيت .. حمل جبال واكثر ع متوني ابتليت بيها انه هالبنيه مدري هي ابتلت بيه ..
متاكد هم سووها بيت عمي زين هم يكروهني بسبب امي .. انسام شنو ذنبها 
بهالحال التعبان دخلت عليه امي تسأل عن انسام وهي تعبانه كوه تجر النفس لزمتهه من ايدهه وطببتها
كتلهه يمج شصعدج وانت مابيج 
ميخالف يمه اجيت اشوفك انت امانه عندي وشونها مريتك
كتلهه يمه ع حطة ايدج يكولون مسحوره ..
يايمه ..  هذا منو اليسحرها بعد الله لايوفقه
اكو غيرهم بيت حماج ..
يمه شيردون منها هالبت هي بس هي السالفه قديمه حاقدين والحقد عاميهم ماقابلين ع دخلت امك للبيت وابوك جملهه كللهم طلعوا من البيت وسجلك باسمه زاد حقدهم وورثوا لولدهم
ايي ادري هي فوك ظيم الدنيا هم عليه ...
شتكول لو تاخذهه تزور الايمه .. بلكن ترتاح وانت هم ترتاح تزور امك صارلك شكد مازايرهه
يمه صارلي 3اشهر وكلش مشتاقلهه ..
يله جا توكلوا وروح اخذ نسومه وروح
ترحين وياي ..
هاا ييمه ابوك تعبان مااكدر اعوفه
يمه صفيه وورازقيه .. مايقصرن ويا اصلا يتعاركن علي ..
هههه اي يله نروح انت هسه تريد اجيبلك لكمه تاكلهه
يمه جوعان
هسه اروح اصبلك غده ..
انه انزل وياج انت لاكلساع تصعدين وتتاذين
شعندي غيرك وليدي الماجابته بطني مالكه مثل حنيتك
يمه مقصر انه وياج سامحيني
يمه حكك والدنيا جارت عليك .. مااعتب انه عليك مااعتب
بوستها من ايديها وراسها .. ونزلنه انه وياهه جوه. .
صبتلي غده .. وتغديت ..
وراها خابرت عمتي .. وكتلها حضروا روحكم نطلع لكربلا ونجف ..
كالت خوش
بيوم الي نريد نطلع خذيت امي ورحنه عليهم جانت انسام هم تعبانه وحتى ماتباوع بوجهي تحسرت انقهرت عليها بس نذرت روحي بس ارجع انتقم من جعفر .. بطريقتي الخاصه لان ساحة الحرب وياهم كبرت جاي يحاولون يأذوني بمساعدة نسوانهم انه اعرف شون انتقم منهم
طلعنا .. ووطول الطريق انسام كلش تعبت .. كل شوي نوكف ترتاح وتغسل .. رغم الجو بي بروده .  وصلنا للنجف .. وللمقبره
زرت امي وبجيت ع كبرها شكد ماابجي ماارتاح ..
وزرنا الامير ودعينه  وطلعنا بنفس اليوم الكربلا جان احساس مختلف بداخلي .. متلهف اروح الكربلا ومستعجل ماادري ليش .. اهلي رادوا نبقى بالنجف بس انه ماقبلت .. العصر انطلقنا لكربلا ووصلنا قريب المغرب ..
اجرنه غرفتين  بفندق انسام ماقبلت تبقى وياي بنفس الغرفه .. اخذت غرفه .. لوحدي وهي وامها وامي بغرفه .. يوم ثاني الصبح كعدنا من وكت .. ورحنا هناك صلينه الفجر .. وزرنه طلع الصبح رحت كعدتهم ببين الحرمين ورحت جبت الهم  ريوك .. وكعدنه تريكنه .. جانت انسام نايمه بحضن امها نوب تبجي ونوب تغفي وتنام والناس تباوع وتسال شبيها
واحنه ع كعدتنه .. امي ندستني وكالت هذيج مو اسيل .. ظليت ادور بعيوني عليها وشفتها كاعده كبالي وجهه ضعفان وذبلان جوه عيونها اسود ..
وكاعده بوحدها ..  من داخلي فرحت بشوفتها ..
مثل المسكن الي .. واحس جروحي سكنت وهدأت
باوعت لامي وشاورتها كتلها نضرج قوي ..
مابقالي غير هالعوينات وتضحك واشرت لاسيل انتبهت واجت سلمت على امي وباوعتلي بنضرات كلها حزن شميت عطرها ارتاحيت عسى اشتمها طول العمر .. راحت كعدت بمكانها .. دقايق وجتي امها واختها الزغيره جان مبين عليهم التعب ولابسين اسود باسود تفاجئت .. شبيهم وابوها بعده ماانعدم .. خذت امها وراحت .. كلت لامي شويه واجي اخذتني رجليه وراهم . اندليت مكان الفندق النازلين بي رجعت لامي واخذتهم يرتاحون بالفندق لمجرد انه واسيل بنفس المكان احس مرتاح وابتسم لاقل شي صارلي شكد ماضاحك ..
كلت اروح وكت الغدا اوكف يم الفندق النازلين بي بلكت .. تنزل واشوفها واريح كلبي .. وصدك نزلت ووبوحدها .. رحتلها .. وكفت بدربها
شونج اسيل
عايشه ..
وتريد تروح من يمي
اوكفي احاجيج ادري عايشه بس شونج
شلك علاقه بيه هسه انت متزوج وانه متزوجه ومايصير نحجي حرام
شنووو متزوووجه انت تزوووجتي ... ؟؟؟
يتبع ..