رواية دروب الإِندِثـار الفصل العاشر 10 - بقلم زينب صـلـاح 🤎

بقلمي : زينب صلـاح 🧡

لـ روايـة ﴿ دروب الإندِثار ﴾

في الـ part 8 ♡♡

لا تنسون التصويت + متابعة للحساب + التعليق بين الفقرات ☘️

‏الشّوق بَحرٌ وَفي عينَيك مَرساي.

•••••••••••••••••••••••••••♕•

دفعت ثمن هواي اشياء اني مالي ذنب بيها!
خواتي دفعن ثمن رفضي
زين منو راح يدفع ثمن أذيتنا وكسر خاطرنا؟!

مو الله بعظمته يگول بكتابه الكريم
(فأما اليتيم فلا تقهر)!

هُما مو بس قهرونا
لا كسرونا اغتصبوا براءتنا بكل دم بارد
اطفال جاي يموتون بضميرنا ويقتلون
طفولتنا ، بيا ذنب كُل هذا يصير بينا؟

انا وخواتي وغيرنا هواااااايه كسرهم بعد اعظم من كسرنا
الله واكبر ايتام بيا ذنب احنه يصير بينا هيج لكن احنه نفضل نكون مظلومين ؏ انُ نكون ظالمين وهناك رب عظيم راح ياخذ حقنا اضعاف منهم ومنا لذاك الوقت ما اگول غير حسبي الله ونعم الوكيل..

گلبي وجعه فضيع حتى دموعي الجانت تخفف من وجعه جفت بس اشهك بروح مفرفحه وعيني ؏ الشاشة إلي طفت ، سديت عيوني بقوة واني استمع لصوت فتح الباب وخطوات تتقرب مني لحد كا استقرت گدامي وثبتت..

حسيت بأيده تمررت ؏ خدي يمسح دموعي الناشفة ؏ خدي فتحت عيوني بهدوء واحس جسمي بي رجفة ما اعرف شنو سببها..

دار وجهة يزفر نفس بضوجة وگال..
- هيج احسن؟ تخليني اعاملج بهاي الطريقة!!

بقيت صافنة بوجهة بدون ردة فعل او اجابة وهو عيونه تتنقل ؏ ملامح وجهي عض شفته وهمس..

- صرخي سوي اي شي لا تبقين ساكته!!

بجسم واهن گمت اسحب بنفسي ورحت تمددت ؏ السرير فاصلة من الدنيا صافنة بالفراغ !!
حسيت بشي بارد يلامس رجلي وصوته وهو يگول..

- رجليج مجروحات طلعت الكزاز وهسه جاي اعقمهن

ما جاوبته رجع گال..
- جاي تحسين بوجع؟

هم ما حجيت لفهن بالشاش وسمعته صاح..
- تالاااا تعاي نظفي الغرفة

بعدها سديت عيوني وما حسيت بشي ، بعد فترة گعدت ؏ نغزات بـ ايدي ورجال متوسط بالعمر يركبلي الكانونة وهو عيونه متروسة قلق ، بس شافني گعدت تقرب..

- رنيمي حبيبي بشنو تحسين؟

درت وجهي عنه وما حجيت تعبانة من روحي
طلع الرجال وهو طلع وياه ، شوي ورجع بيده
صينية اكل حطها وگعد يريد يوكلني ، هم درت
وجهي رافضة..

- لا تسوين هيج بنفسج حبيبتي لازم تاكلين ضغطج مصفر

ابتسمت بسخرية..
- احسن علمود اموت واخلص منك

كز ؏ اسنانه..
- لا تگولين هيج

- اخذ الاكل واطلع بره ما اريد اشوف خلقتك

- ما تريدين تشوفين اختج؟ اكلي واخذج الها ها!!

صفنت مبتسمة..
- بيا وجه اروحلها وانتَ وصلتها لهاي الحالة بسببي؟

- مالج ذنب

- صح بس اني سبب ، اكل ما راح اكل حتى لو جبت خواتي هنا لو بابا رسن يطلع من قبره ويگلي اكلي هم ما راح اكل
أذيتني بأختي واني راح أأذيك بيه! السن بالسن والبادي اظلم يا وحــش

بقى صافن ما يعرف شنو يحجي عاف الصينية وطلع بدون ما ينطق شي ، رجعت دموعي تجددت اخخ يـا سـارة شنو جاي تحسين هسه شلونج ويا تُرى كرهتيني وحقدتي عليه؟ حقج بس مالي ذنب والله حالي من حالج لا حولة الي ولا قوة..

مرت الايام وهو يتوسل بس احط لگمه بحلگي جسمي نحل وبقيت جلد ؏ عظم ايدي ما اگدر ارفعها وعايشة ؏ المغذي ، من يشوف حالتي هيج يتخبل بالزايد..

يعيط ويكسر واخر شي يجي يتوسل اكل وهم ارفض حالة صار اسوء من حالي ومحتار ما يعرف يتصرف ورغم وضعي اتشمت بي لان يستاهل الاكثر وحـش مثله يستاهل الي يصير بي..

فجأة بيوم من الايام دخلن خواتي عليّ يحظنن ويبوسن بيه وحتى سارة الحالها صعب من شافتني تخبلت واني بوقتها ربي ذب عليه دموع اريد اسكت ما اگدر بس ابچي واهرب بعيوني منها خجلانه..

وهو واگف بالباب گال بنتر..
- قنعنها تاكل

كل ظنه بجيتهن راح اتحسن بس شوفت سارة ووضعها خله حالتي تنتكس ودوم مو بوعيي حتى لو أريد اكل ما اگدر تعبت وصرت طريحة الفراش لا ايد ولا رجل..

بيوم دخل عليّ عيونه حُمر وشعره مخربط وبلگوة يسحب بنفسه جانت ريحة الشرب تفوح منه خفـت بل متت من الخوف لان لو مجرد فكر بالموضوع اني ما عندي قوة ادافع عن نفسي..

الخوف البعيوني يقرأ مليووون وجان واضح واني اترقب حركاته لحد ما سحب الكرسي وگعد گدامي صفن بوجهي يتنقل بعيونه وابتسم مستهزء..

- شارب صح بس لا تخافين واعي لنفسي ، حاولي تنسين هذيج الليلة بس جانت جرة أذن

گح بقوة وكمل بهمس..
- ولا لحظة رنيم؟ ولا لحظة فكرتي تحبيني تغيريني ونعيش حياة حلوة واسعدج واسعد خواتج؟ ولج حتى شغلي وكلشي ما تحبينه گتلج اعوفه شنوووو هذا الاصرار ؏ كرهج؟

نزلت دموعي بصمت وبس شهگتي واضحة..
- اششش لا تبجين ، بس گليلي شنو تردين علمود ترجعين مثل قبل؟

حجيت بتردد واعرف طلبي مرفوض..
- تعوفنا نروح الحُب مو جبر

- ووووين ترحين الملجأ وعمج الگ*** حط عليّ وضيع الاول والتالي

- أرض الله واسعة

ضرب وجهة ونتر..
- ارض الله الواسعة مليانه ذيابه تنهش لحمج هل هاي الذيابه أأمن مني عليج؟!!!!

سكتت بدون جواب وهو خله وطلع بهذيج الليل أيست يتركني لو اموت واصير جثة گدامه مستعد يدفني بأيده ولا يتركني لذلك قررت من يجن خواتي احاجيهن ونحاول نشرد لان مستحيل اتقبل واحد مثله..

بيوم گمت من فراشي اسحب نفس بلگوه اريد اشم هوى شوي اختنگت ومن فتحت الباب الحمد لله جان ما مقفول نزلت امشي ؏ كيف ، جذبني صوت عياطه العالي واسم عمو المتكرر بين كلامه تسحبت لحد ما وصلت قريب وصار الصوت واضح..

عذاب- خراااا بيك وبهيج معلوماتتت لك هاي لو درت بالحقيقة تركض بأيديها ورجليها لعمها الگ***

صفنت مثل الثوله يا حقيقة؟؟ شوي ورجع صوت غريب نطق بهدوء عكس غضب عذاب..

- هي لبنيه وين راح تعرف؟ انتَ ليش صاير اعصاب ولسانك زفر

- اسكت هُمام اسكت رحمة لربك اني جنت مطمئن ما عندها غيري تلجأ اله وهسه صعقتي بهذا الخبر

هُمام- ارجع واگُلك معصب ؏ الخالي بلاش لان لبنية منين راح تعرف هيج خبر وبس اني وانتَ نعرفه؟

- كليم ما جاي يركد ولك صارله ثمن سنوات يدور عليها وهسه من لزم طرف خيط عنها تريده يعوفه!! اني الي مخبلني اذا اجه بالوقت الحالي وگللها تعاي ومو اني البعتج اخوي غدرني وباعج تركض ورااااه وهي مغمضه عيونهااا

حسيت كلامه صاعقة ونزلت ؏ گلبي! اريد رجلي تثبت من الرجيف ماكو وعيوني صارت تتسابق منو تنزل دمع اكثر؟ ما فهمت عدل بس معقولة صح الكلام وعمو مو هو الي باعني؟

بس شلووووون واني سمعته بأذني وهو يگله بيعها عقلي ما جاي يستوعب ، من سمعت صوتهم يريد يطلعون وواحد جاي يودع الثاني ما اعرف منين اجتني قوة وركضت اصعد للغرفة صرت اطكطك بأصابعي وافكر شلون تنحل شلوووون؟؟؟

مسحت دموعي وبنفس الثانيه انفتح الباب
هو صفن بواجهي واني صفنت بوجهه
عقد حواجبه وگال..

- باجيه؟

- لا

- عيونج حُمر! ليش باجيه؟!!

گالها بشك يقلص عيونه ويتفحصني انرعبت انُ يعرف اني سمعته نترت احاول اضيع السالفة..

-ويهمك؟ بجيت او لا يهمك؟

- طبعًا يهمني گولي شبيج

گعدت ؏ طرف السرير وهو بعدها نظراته الي مو طبيعية ، سحب الكرسي وگعد مقابيلي..

- احجي رنيم؟

- مليت من هذا السجن اختنگت تعبت نفسيتي ما عندي طاقة اتحمل اكثر

- كله بيدج تتحررين منه او تبقين سجينتي لطول العمر

باوعت للباب وما اعرف ردة فعل ساره شلون راح تكون من تعرف الي راح اسوي..

باوعتله وهمست..
- اوافق بس بشروط

ابتسم فرحان وهز راسه..
- شنو هنَّ؟

- خواتي تعوفهن يروحن بحال سبيلهن عذاب

- ما ترديهن يبقن يمج؟

- لاا سارة بعد السويته بيها ما راح تبقى هنا وراح تشرد

نزلت راسي وكملت اريده يقتنع..
- واذا بقت تحجي براسي واقتنع اشرد وياها

اباوعله صفن وكأنوا اقتنع لا بل كلش اقتنع بالموضوع
هز راسه وگال..
- وبعد؟

- ما نتزوج بسرعة خلي نتعرف ؏ بعض اول وما اريد تتقربلي بطريقة مو حلوة

- نتزوج وما اتقربلج لا تخافين كلشي اريده منج بنفس راضية اريد تحبيني بالاول وبعدين كلشي سهل

عضيت شفتي خايفة وهزيت راسي برفض..
عذاب- رنيم وعد ما المسج

- خلص ما اريد شي منك اطلع بره

- رنيم؟

- گلت ما اريددددد اطلع

- خلص اهدي موافق الي تردينه

- والله؟

ابتسم وهز راسه ، گام وگال..
- راح اخلي الشباب يوصلوهن

گمت فازه..
- خليها باجر وهم قبل لا توديهن جيبهن اودعهن الله يخليك

- صار

عافني وطلع واني گعدت بمكاني الطم ؏ وجهي بصمت وانحب ؏ حظي الي راح يوديني بستين داهية..

ㅤㅤㅤ
ㅤㅤㅤ
••••••••••••••••••••••••••♡•
ㅤㅤㅤ
ㅤㅤㅤ

ســارة•

كل هذا الغنى والراحة ما موالمتني لان اكراه مو بحب لان بأذية مو براحة ، غمضت عيوني ووجعتني روحي واني اتذكر لحظة الي دخلو عليّ وجردوني من ملابسي جنت لا حولة ولا قوة..

ضعيفة يم ضخامتهم صح ما اغتصبو*ني بالمعنى الحرفي لكن شوفتهم الي بدون قطعة ملابس لمساتهم القذرة قبلاتهم الي نشروهن ؏ جسمي طلعن روحي..

رجعوني لهذيج الايام نفس الكسر نفس الضعف
حسيت بروحي تغادر جسمي واعية لـ افعالهم بس جسمي ما يعيني رغم كلش
دافعت عن نفسي بس شنو تسوي قوتي يم قوتهم؟

صريخي وطبقات صوتي الي تعبت ما جابن بنتيجة لحد ما اندك الباب بقوة گاموا لبسوا ملابسهم يضحكون ويحجون كلام مقرف..

- الزعيم بس يشعلنا ما يخلينا نكمل الشغلة ونريح نفسنا ونريح الحلوة

- ههههه ؏ الجايات

واحد منهم غمزلي وگال..
- بالمرة الجاية يكون تطبيق حقيقي لا تزعلين يا حلوة

كلمات جانت كفيلة تخليني اكره روحي كلمات خلت سارة القوية هشه اي شي يكسرها وخايفة من ظلها كل مرة ارادد واغلط هسه حتى من شفت حال رنيم بس خزرته ونزلت راسي اخاف يخليهم صدك يسوونها..

بعد ما رممت نفسي رجعوا هدموني!

فزت دموع كعادتها من اجينه لهنا وصرنا بغرفة وحدة تلهث وتباوع داير ما دايرها بذعر ومن تشوفني تركض تدخل بحضني تبجي وتهمس..

دموع- خايفة خايفة

- اشش يمج اني لا تخافين

دموع- لا سارة لا مو مثل كل مرة اكو شعور بشع بداخلي راح يصير شي

رفعت عيني لمسرة الي ملت عيونها خوف واني رجعت اطبطب ؏ كتف دموع لحد ما نامت ، اباوع لمسرة گعدت بزاوية الغرفة ضامه رجليها لصدرها وتبجي حتى مسرة ام لسان خايفة..

دخيلك ربي قويني خليني اكون سند لخواتي ما عاد عندي طاقة اتحمل بيها الي جاي يصير صعب حيلللل صعبب..

نزلت من السرير ورحت يمها اخذها لصدري وهي بسرعة حضنتني تهمس..

مسرة- احساس دموع دائمًا يصيب سارة

- جانت تتحلم لا تبقين تفكرين

- خايفة ؏ رنيم هذا الحيوان خلاها براسه

سكتت لان اني مرعوبة ؏ رنيم الي گدر يسوي بيه هيج صعبة عليّ ياخذ مُبتغاه من بنية حلوة وعاجبته؟ اكيد لا اسهل منها ماكو..

سارة- يله گومي خلي نام ولباجر الله كريم

اخذتها ونمت بنصهن حاضنتهن لگلبي وبروحي حسرة ونقص لمكان رنيم اريدها بس لا حولة ولا قوة  ما بيدي شي اسوي..

غفيت وحسرة تاخذني وحسرة تجيبني ، فزينا ما اعرف الوقت ؏ ضرب قوي ؏ الباب طفرت من مكاني الم شعري ورحت فتحته
صار بوجهي عاقد حواجبه ونتر..

عذاب- جهزن نفسجن يلاا

- وين؟

حط سبابته ؏ شفايفه وگال..
- بدون اسئلة نفذي لا تعصبيني

دخلت خايفة لبسنا وخلصنا وطلعنا وهو واگف بمكانه من شافنا مشى واحنه ورا الطريق ياخذنا لغرفة رنيم تنهدت براحة..

بس دخلنا ركضت علينا تبوس بينا ودموعها عشرة عشرة استغربت حالتها وقبل لا انطق گال هو بكلمات شلعت روحي شلع..

- ودعيهن الج خمس دقايق واجي

فتحت عيني ومسرة ودموع بس صوت شهگتهن طلع وهي بس تبجي ، لزمتها من اكتافها وهزيتها..

- شجااااي يحجيييي؟؟؟

رنيم- اششش اشش سوي الي راح اگوله اخذي هاج هاي الرسالة توضحلج كلشي وهاي انطيها العمو كليم

- شجاي تخربطين فهميني

- عمو عمو راح يطلعني منا بس هو يگدر ينقذني روحن التجئن اله ماكو مكان امان عليجن گده

- نفسسسه الباعججج شگاعد تخربطين انتِ تخبلتييي لو تموتين ما اعوفج واروح

مسرة- ما نعوفج هنا امشي ويانا

جان حالها بالويل وتلوب ، ضربت ؏ خدودها وعاطت بجزع..

رنيم- كاااافي عوفني وروحن اذا تبقن هنا ما اگدر اشرد وجودجن عايقني كُلش! فدوة اخذي الرسالة واقريها والثانية سلميها العمو هو راح يساعدنا ثقي بيه ولو لمرة وحدة

حضنتها لگلبي واجن البنات حضننها وكلنا دموعنا تصب نفتح الباب ودخل واحس روحي راحت بسكته ضميت الورقات بصدري ، رغم توضيحها الي فرفحت روحي من طلعونا بره وشمرونا بالسيارة..

ردت افتحها واتراجع ابقى يمها العمر كله ولا اعوفها هنا بس البيبان نقفلت ومشت بينا ، حسيت الجامه نفطرت من ضربي عليها وبلعومي تشخط من الصريخ وحال دموع ومسرة اخس من حالي..

السيارة تمشي وعيني على البيت لحد ما اختفى من انظاري اخذت خواتي لحضني وبچينا بقهر مهضومين من الوكت الي سوه بينا هيج ووصلنا لهاي الحالة!!

اخذت الطريق كله بچي بس مو مثل طريق الرجعه صااار كلش طويل عبالك يتعمد يأخرنا ، خفت ياخذونا ويسوون بينا غير شي لميتهن لحضني بقوة وعيوني ؏ الطريق جنت مستعدة اقتل علمودهن ولا يمسون شعره من راسهن..

قريب المغرب ذبونا بنفس المكان الاخذونا منه وراحوا ، رجعت بخطواتي للملجأ اتأكد من كلام رنيم وطلع فعلًا مقفول بسناسل وحاطين قطعة ممنوع احد يدخله..

وين الگه انا؟

بعدني فكرة تاخذني والخ تجيبني وهمست مسرة بتعب..

مسرة- نروح للتقاطع الي تبيع بي رنيم هو هناك يتواجد اعتقد!

- ما اعرف ما اعرف لحظة اقرأ الرسالة

گعدنا ؏ لبلوكات الي بصف الحايط وفتحت الورقة المكتوب عليها اسمي

سارونتي امي انتِ اني هواي احبج اذا جاي تقرين رسالتي معناها انتِ وخواتي صرتن بأمان وگدرت احقق مُبتغاي وهسه گلبي ارتاح اني اسفة ؏ الي صار بيج لو مفكرة بهذا الحل من البداية جان محد گدر يمس شعرة من راسج بس هسه اگدر اغمض عيني براحة راح تكونن بأيادي أمينة عمو ما راح يعوفجن اي سارة اي عمو مو هو الي باعني سمعت عذاب يحجي ويه شخص يگله لو تعرف عمها صارلة ثمن سنوات يدور عليها ومو هو البايعها تروحله ظلمته وظلمت نفسي بكرهه هو الوحيد الي راح يسندجن وهو الوحيد الگادر يساعدني من الي اني بي ما اضم عليج خايفة ومرعوبة من وحدتي بس اصبر نفسي ؏ امل التقي بيجن وبعمو ديري بالج ؏ نفسج انتِ والبنات ولا تثقين فقط بعمو فقط بعمو سارة لا تعيدين خطأي

نزلت ايدي وانهاريت ابچي صار الليل ودموع من بين دموعها همست..

دموع- اكيد ما موجود هسه دنيا الليل

مسرة- سارة وين نروح اخاف سمعي صوت الچلاب

-لحظة!

حطيت بلوكه ؏ بلوكه وهمست..
- خلي نطفر وندخل جوه

مسرة- وشلون نطلع بعدين

- ما اعرف محتاااارة

مسرة- نروح يم التقاطع اذا اكو شرطي نخلي يتصل عليه

صفنت بحيرة وهزيت راسي موافقة ، من وصلنا جان المكان فارغ نزلت راسي بخيبة امل!
جانت اكو خرابه قريبة منا ما جان عندي حل غير انُ نبقى بيها منا للصبح واشوف حل سفطت الكراتين وگعدت وخليت راس كل وحده منهم ؏ رجل وبيدي لازمه خشبه..

بچيت بوقتها لحد ما جفت دموعي اباوعلهن يتلون من الجوع ولازمات بطنهن بس ما يحجن وحتى لو حجن شنو اگدر اسوي واني لا حولة ولا قوة لحد ما غفن وهن جوعانات وملامح التعب مرسومة ؏ وجهن من غير قهرنا ؏ رنيم..

بستهن براسهن وسندت راسي ؏ الحايط اترقب المكان جنت هلكانه تعب بس صمدت طول الليل ؏ نفس الگعدة انتظر الصبح يطلع وانتظرت اسمع صوت الستوتات والسيارات والناس يلـه گعدتهن..

انتظرت شويه يصحن ورتبت شالهن اضم شعرهن صرت اخاف عليهن من الهوى الي يلمس بشرتهن مو انوب بشر!!

طلعنا متجهين للتقاطع وصدك جان اكو دوريات وشرطة هواي اعتقد ؏ موضوع الملجأ كل هذا التجمع من بين صفنتي بيهم فزت مسرة وگالت وهي تأشر ؏ واحد من الضباط..

مسرة- هذا قسووورة هذا

- قسورة منو؟

مسرة- ابن اخته لعم رنيم من حققوا ويايه جان موجود اعرفه

شديت ؏ ايدها بخزرة وگلبي گرصني من لهفة عيونها بس حاولت افسرها بغير طريقة..

- ابقن هنا رايحه احاجي واجي

هزن راسهن ، واني درت متجهة اله بكل خطوة احس گلبي يريد يطلع من مكانه ما اعرف السبب بس صرت قريبة منه باوع للضباط وخزرني لان جان شعري طالع والمكان متروس ضباط..

قسورة- محتاجة شي خويه؟

- اي اريد الضابط كليم موجود

اخذولهم صفنه واحد بوجه الثاني وهو عقد حواجبه واشر اجي وراه اخذني ؏ جهة وگال..

- منين تعرفينه وشنو رايده؟

- يمي امانة اله

- امانة؟ امانة شنو؟

خفت وتذكرت كلام رنيم من گالت بالرسالة لا تثقين فقط بعمو..

سارة- وصلني اله ما اگدر احجي هذا الشي لغيره

باوعلي من فوك لجوه وضحك بطريقة مستفزة..
- خوش طريقة تتقربن بيها جديدة ؏ الساحة هاي؟

خزرته وجان بدلي اضربه واريح گلبي بي الحيوان خليت عيني بعينه وهمست بدون تردد..

- اني رايحه وخلي هو يدورني لان اني جايه ارجعله امانته الضاعت

بس گلت هيج بهت وجهة واجاني صوت بي بحة ورجفه غريبة وهو ينطق من وراي..

كليم- رنيم؟؟

..

وتستمر الحكاية.. 🚬♣

الجُمعـة ان شاء الله بارت

الانستا راح افتح بي اسك لأي سؤال اجاوبكم!
احبكم 💙