رواية دروب الإِندِثـار الفصل الحادي والعشرون 21 - بقلم زينب صـلـاح 🤎

بقلمي : زينب صلـاح 🧡

لـ روايـة ﴿ دروب الإندِثار ﴾

في الـ part 18 ♡♡

لا تنسون التصويت + متابعة للحساب + التعليق بين الفقرات ☘️

‏الديرة البيها عطرچ ، ديرتنا ⊰

•••••••••••••••••••••••••••♕•

شالها خالو صعدها فوك للغرفة علمود ترتاح واني بقيت بالصالة! ما تأخر دقائق ورجع مبتسم گعد بصفي واخذني لحضنه..

باس جبيني وگال..
هُمام- محتاجه شي بابا احد مضوجج مزعلج ببيت كليم؟

- لا كلهم زينين

هُمام- متأكدة؟

- اي والله

هُمام- لا تضمين عني شي قبل لا اكون خالج اعتبريني صديقج او صندوق اسرارج كلشي احجي بدون تردد وتأكدي اني بظهرج مهما كانت مشكلتج

- شكرًا خالو وعد كُلشي احجيلك

هُمام- ووعد مني اي شي تحجينه ما يطلع مني بس تأكدي راح احله الج كوني ؏ ثقة

- واثقة بيك هوااي لان شفت حنانك وصرت اعرفك وتعودت عليك

هُمام- لعد ليش ما تباتين عندي؟ دائمًا اشوف التردد بعيونج

ابتعد اباوع بعيونه متردده من شافني هيج گال..
هُمام- اني حاليًا صديقج مو خالج احجي الي تفكرين بي بدون تقييد راح افهمج

ابتسمت مطمئنه وجاوبته..
- احبك هوااي مثل عمو كليم بس خالو اني ما احس بالامان بمكان ما بي عمو كليم! تعرف شغلة..

عضيت شفتي خجلاني واسترسلت واني منزلة راسي..

- طول فترة التحاقه وعدم وجوده بالبيت ما چنت احس بالامان! چنت اتعب يلا انام بالليل اخاف لان هو ما موجود چان يكفيني احساسي بوجوده بالبيت بس من يلتحق اتعب

رفعت راسي ببطئ
صافن يباوعلي و؏ وجهة نظرات غريبة
بلعت ريگ ، گال بهدوء!

هُمام- تحبينـه؟

- اي مثل بابا

طالة صفنته ، تحمحم وسحبني لصدره يمسح ؏ راسي وگال...

هُمام- رنيم؟

- هاا خالو

هُمام- طمنيني ريحي گلبي وگليلي شنو المرت بي سارة؟

بعدت راسي عاقده حواجبي..
- خليها هي تحجيلك

هُمام- ما جاي تقبل تتهرب واني تعبت من التفكير راسي موتني

- ما اگدر خالو هي تحجيلك

- گلتلج راح تحجيلي؟

- اي بس يعني مترددة وهيج بس اكيد تحجيلك تعرف مشاعرها اتجاهك اكيد من تكون مستعدة وجاهزة راح تسولفلك

هز راسه مغمض عيونه ، مبين عليّ التعب! فتح ايده وگال..

هُمام- تعاي حبيبتي

رحت حطيت راسي ؏ صدره وهو حضني طولنا ؏ هذا الحال لا هو حجه شي ولا اني عرفت افتح وياه موضوع! لحد ما اندك الباب ودخل عمـو يستفسر ؏ وضع ساࢪة حاليًا..

باوعلي..
كليم- نروح؟

هُمام- خليها كليم

كليم- والله مو لـشي! بس انتَ تعبانه ولبنية هم تعبانه ارتاحوا واحنه باجر ورانا شغل اجيبهن هنا ونطلع لشغلنا

هز راسه موافق وخصوصًا من شافني ساكته وما نطقت برفض! دخلنا للبيت وعقدت حواجبي مستغربة واني اشوف قسورة لازم ايد مسرة وهُما واگفين بالحديقة..

بس شافتني نترت ايده واجتني تركض..
مسرة- شلون صارت سارة؟

- زينه باجر الصُبـح نروح يمها هسه تعبانه خليها اليوم ترتاح

مسرة- اهم شي تكون زينه

- دموع وين؟

- تلعب هي وريم فوك بالغرفة

تقرب قسورة من عمو كليم وگال..
قسورة- نحجي بره؟

هز راسه عمو بـ اي وطلعوا
واحنه صعدنا فوك..

طمنت دموع وبوست ريم ورحت ؏ الشُبـاك الي يطل ؏ الشارع بعدت البرده شوي واباوعلهم يحجون سوه بس اكثر شي قسورة چان يحجي بحرگة گلب! وگفت يمي مسرة وگالت..

مسرة- بعدهم للان مَمتصالحين؟

- اعتقد!

ابتسمت من شفت قسورة تقرب باس كتفة وراسه وحضنه شوي يـلا عمو رفع ايده وبادله يربت ؏ ظهره بخفة ايده..

اتصالحوا يعني

درت باوعت لـ دموع ملتهية ويه ريم ورجعت عيني ؏ مسرة..

- شنو چنتي تسوين انتِ وقسورة بالحديقة؟

مسرة- اني چنت گاعده وهو اجه يستفسر ؏ وضع سارة

- وليش چان لازم ايدج؟

ارتبكت وجاوبت..
- مو چنت اريد اروح وهو لزمني يريد يحجي وانتو اجيتوا

- ابتعدي عن قسورة مسرة

باوعتلي وافتهمت من نظراتها كأنو تگلي " ليش؟ " فـ جاوبتها..
- گلبي مو مرتاح وقسورة انسان صعب حَسـب الي شفته منه خلال هاي الفترة! محد اله سلطة عليّ لو أذاج وكسر گلبج من منو راح تاخذين حقج بقوتج الضئيلة هاي؟ حتى عمو كليم هو يرد بوجهة شفتي ذاك اليوم! اني ما اريد گلبج ينكسر

مسرة- اي افهم واصلًا اني مبتعده

- ابتعدتي لان أذاج اي لا تباوعين هالشكـل لاحظت بعد ما تخربطتي صرتي تتهربين منه ما اعرف شنـو سوالج ولا راح اجبرج تحجيلي بس تأكدي مُستقبلًا راح يسوي اضعاف

مسرة- ما اريده اني بس ما اعرف بكل مرة اشوف نفسي يمه ، رنيم شنو اسوي؟

- ابتعدي هذا افضل حل الج

گلتها وطلعت من الغرفة بدون ما اسمع جوابها دخلت لغرفتي بدلت وحطيت راسي ؏ المخده تعبانه بسبب الهبطات بسرعة غفيت..

بين النايمة والگاعدة حَـسيت بـ أيد تتمرر ؏ شعـري خدودي رجفت بخوف بس عرفته من عطرت
عطره فاضحه لان مُميز واگدر اميزه لان قريب منـي!

حاولت ابقى نايمه وما احسسه گعدت لحد ما گال وهو ايده ما توقفت عن لمس خدودي او شعري..

كليم- شسويتي بحالي؟

ارتبكت من تقرب وباس خدي واسترسل..
كليم- يلعن ابو مشاعري أنتِ بنتي بس شلون بيه دا اتعب بناتي

رچف گلبي من گال وهو يشهگ بصوت مكتوب..
كليم- احارب منو بابا احارب منو علمود احميج مني ومن الي بداخلي شلون شسوي بروحي داموت اني وحق حيدر الكرار داموات الف موته باليوم

سگت فتره واسترسل..
- گضيت كل عُمري اختار ومحد يختارني افني واموت وادفن الي بداخلي الج ولا اشوف نظرة استصغار بعيونج الحلوة

طلع! بكل سهولة طلع وعافني اتخبط بكلامه فزيت فاتحة عيوني بوسعهن اباوع للباب!
هو عبالة رنيم قبل الي تنام وما تحس ؏ نفسها لو انفجر البيت ما يعرف رنيم حاليًا تفز من رمشة العين بسبب عيشتها الماضية!! لذلك اخذ راحته بالكلام!

قضيت الليل كله اون والنوم طار من عيني وبدون اكل من المصايب حتى نسيت يمتى اخر مرة اكلت؟

فسرت كلامه بس چذبته ما ردت اصدك اخاف اصدك ويتغير كلشي!!!!! خايفة اخسره مرة ثانية!!

لحد ما صار الصُبـح طلعت گعدت البنات واني شارده غسلنا وبدلنا ويه طلعتي من الغرفة طلع هوَ! بلعت ريگ وحاولت بقدر الامكان ابين طبيعية بس ماااااا اگدر صعب والله صعب!!

اجه باسني براسي ومرر عيونه ؏ كامل وجهي
اي هسه فهمت سبب نظراته!

كليم- ما نايمه؟

- نمت

- عيونج مورمة! صاير شي؟

يحجي كأنما ما مسوي شي امس؟! شكيت للحظة انُ اني اختلقت الي سمعته وممكن چان كابوس اي ايي كابوس اكيد مستحيل عمو يسوي هيج!

جاوبته بهدوء..
- ما صاير شي يمكن لان نمت هواي

- اذا هيج نوم العافية رنيمه يلا صيحي خواتچ اوصلچن

طلع نازل قبلي واني اخذت البنات ونزلنا
اخذنا لبيت خالو ، صح بيته مقابيل بيت عمو كليم بس يخافون علينا ما يخلونا وحدنا نروح ونرجع وهالشي ممنوع!!

دك الباب وبنفس اللحظة فتحة خالو ضحك وسحبني لحضنه يبوس بخدودي..

هُمام- نور البيت

- بوجودك خالو

هُمام- ام لسان

- هههه ساࢪة زينة؟

هُمام- اي اي ورجع نظرها يلا دخلن وقفلن الباب وممنوع ينفتح لشخص

- تمام الله وياكُم

طلعوا وفعلًا قفلت الباب الخارجي ودخلت قفلت باب المطبخ ورحنا يم ساࢪة چانت فرحانه بينا صعدنا وياها لغرفة خالو نظفناها وكوينا قمصانا لان سارة ما تگدر بس مگعدينها يمنا ونسولف..

بعدها نزلنا نظفنا الجوه وشغلت التلفزيون لـ مسرة ودموع لان متابعات مُسلسل ورحنا اني وسارة للمطبخ نسوي غده..

كل شوي وصايحه بيه لان اشرد وما اسمعها شنو تگول لحد ما ملت واجت طفت النار عن الاكل وسحبتني مگدتني گدامها..

سارة- احجي!

شهگت..
- سارة صارت شغلة

- اشش اهدي لا ترجفين واحجي بهدوء

- عـ عـ ـمو!

- شبي؟

بچيت وصرت احجيلها السمعته منه واني ارجف خايفة واخر شي ختمتها..

- ساااࢪة ما اريد اخسره ڪ عم واب اني ما اشوفه غير بهيج نظرة شلون اتحمل اني شلونن وشنو اتحمل صدمتي بمشاعرة لو بيوم من الايام ررراح اكسر گلبه

سارة- چنت شاكه من تصرفاته بس حاليًا اني بصدمة ما اعرف

- راح اكسر گلبه سارة

- ما اعتقد يعترفلج لان يعرف راح يخسرج وانتِ مشي الامر طبيعي

- اليوم راح اكسر گلبه

حجيتها وگمت شغلت النار جوه الجدر ، لحگتني واگفه بصفي!

سارة- شنو قصدج؟

- بعد ما اروح وياه راح ابلغه انُ اريد اعيش ويه خالو

- ينقهر رنيم خطية

- هذا افضل حل

بقت سارة طولت الوقت تحذر بيه اغير قراري بس اني صممت عليّ! لحد العصر رجعوا سلموا وگعدوا بالصالة واحنه يمهم..

بالبداية حجوا عن صحة سارة بعدها شوي وگال..

كليم- يلا بابا نرجع تعبان

تعبان؟ وراح اتعبه بالزايددد باوعتله وهو كأنو عرف من بقيت گاعده تحمحم وگال..

كليم- احم يلـه رنيمه

- ما اروح

صفن مبتسم وكلها صافنه عليّ لان بس سارة تعرف بقراري..

كليم- يلـه ميخالف يومين واجي اخذج

- لا لا تجي

كليم- ما فهمت؟

دنگت راسي وجاوبت واحس صوتي يختفي تدريجيًا..
- اريد استقر ببيت خالو منا وجاي

صار هدوء! ما تجرأت ارفع راسي واشوف ردة فعله بس اجاني صوته الحاد وهو يگول بثقة..

كليم- يومين واجي عليج ارتاحي وفكري زين

طلع وفزيت من طبگ الباب الخارجي بقوة رفعت راسي واستقرت عيوني بعيون خالو الي مقلصهن ويباوعلي بشَـك
گام متوجه للاستقبال وهمس ببرود..

هُمام- لحگيني

باوعت لـ سارة ولحگته سديت الباب وگعدت بصفه..

هُمام- اول شي البيت بيتج وان ما وسعج احطج بعيوني كلامي ما اريد تاخذينه بغير طريق مال ما اريدج وما اريد اتحمل مسؤوليتج والخ من الكلام الفارغ واضح

- اي

هُمام- التناقض بين كلام امس واليوم واضح مو؟ لذلـك اريد اجابة واضحة ومُقنعة منج مفهوم؟

- اي

هُمام- حلو ، ليش غيرتي رأيج؟

جاوبته ورجفة صوتي واضحة..
- مو هنا قريبة من سارة و همات يـ ...

قاطعني..
- بدون لف رنيم بدون لف ودوران اريد اجابة واضحة وسهلـة تختصر الوقت لان اني ما اعوفج لحد ما اخذ الاريده

- ما اگددر

- مو گتلج لا تعتبريني خالج؟ مو بلغت اني صديقج سولفيلي مشكلتج ووعد احلها ليش خايفة تفكــرين ممكن اضرج؟

- لا بَـس صَعبة!

- سولفيلي رنيم

بچيت حاطه راسي ؏ صدره وهو احتواني يمسح ؏ راسي ، شهگت حاجيه..

- مشاعري تختلف عن مشاعره وخايفففة

رفع راسي..
هُمام- تحبينه؟

بچيت اكثر..
- لااا لاا هو هو وما اريد اكسر گلببببه

- ما تردين ترجعين مو؟

- لا

- صار ما ترجعين

مشاعري فوضى ما اعرف شنو الصَـح وشنو الخطأ وخايفة اكون سبب بتدمير صداقة عمو كليم بـ خالـو واني ما اريد هذا الشي!

لليل جابلنا خالو حبشكلات وشغللنا فلم وگعدنا نتابع هو گاعد واني من جهة وسارة من الجهة الثانية ومسرة ودموع گاعدات گدامنا وظهرهن النا..

بنص الفلم وعباله ما اسمعه يگللها بهمس..

هُمام- شنو هذا اللبس گدام كليم

سارة- شبي؟

هُمام- سارة ومُحمد اشگج شگ اذا بعد اطلعين هيج گدام كائن من يكون مفهوم

سارة- هاي شبيك تره ملابسي ما بيهم شي

هُمام- رب البيهم هذول هُما الداخليات سود مبينات والدشداشة قصيرة مطلعة رجليج من غير الغضب شعرج فالته للرايح والجاي مگرن اني؟

اباوعلها صارت حمرة من الخجل لان يحجي بالخط العرض من شافها سكتت كمل..
هُمام- هسه بس نصعد اذا ما شككتها عليج ما يسموني ابو الهَمم

سارة- يااا

هُمام- وجعا نصي صوتج

عضيت شفتي كاتمة ضحكتي سوالفهم حلوة وهي شوي وطفرت صاعده فوك ماكو دقيقتين ولحگها خربت من الضحك عليهم
خلصنا الفلم ونمنا او جبرت نفسي انام بعد الافكار المُضطربة الي اقتحمت نومي!
ㅤㅤㅤ
ㅤㅤㅤ
••••••••••••••••••••••••••••••
ㅤㅤㅤ
سـاࢪة•

قفلت الباب لان اعرف بي راح ينفذ كلامه ابتسمت من طرق الباب ؏ كيف ونتر..

هُمام- بطلي زعططه وفتحي الباب

جاوبته واني ابدل..
- تضرب؟

- تنكسر ايدي اذا ضربتج بس اشك دشداشتج يلـه فتحي

ضحكت وفتحت الباب باوعلي من فوك ليجوه وتخصر..

هُمام- گدام خلق الله عريانه وبغرفتج گدام زوجج مستوره شو انتِ عكس الناس

درت وجهي ومشيت اتمدد بمكاني وجاوبته..
- مجرد زواج ؏ الورق فترة وينتهي

قفل الباب وراه..
هُمام- منو گال؟

- اني

- احلام العصر بطليها

بقيت صافنه بوجهة تجاهلني نزع تشيرته وشمره وتمدد ؏ وجهة نايم وگال..

هُمام- هسه أنتِ مريضة وما جاي اضغط عليج بس مثل ما اني محترمج غصبًا عليح تحترمين لبس طايح حظه فقط داخل الغرفة اذا شفتح گدام واحد من الولد هيج حسابج ثگيل يصير وهاي اني حذرتج لا تگولين

- حقك ما چنت منتبهة

ابتسم وكمل..
- شعرج غطي يمرد گلبي من اشوف غيري يشوفه

- ما اوعدك هُمام لان اني ما متعودة واخاف انسى لو شي بس اگلك احاول يبقى الموضوع بالي واذا نسيت ذكرني وتدلل

- راسج شلون صار؟

- وجع خفيف

هُمام- وعيونج تشوفين زين؟

- لا مرات فجأة يغوشن

- قللي التلفون والتلفزيون ؏ ما اراجع بيج دكتور اخصائي

هزيت راسي بـ اي وهو سد عيونه اعرف بي بعده گاعد وهذا الي موترني وما جاي اعرف انام! گال وهو بعده مغمض عيونه..

هُمام- نامي رغد ما اتقربلج

سكتت بس انفاسي عالية..
هُمام- ما تثقين بي حقج بعدج ما تعرفين بس يمين عظيم وداعة رنيم الي ما عندي اعز منها مُجرد فكرة اتقرب منج ما جاي تمر عقلي ، نـامي

غمضت عيوني وصدُك بسرعة غفيت وفزيت الفجر ؏ صوت المؤذن شفته ماكو شوي ودخل فرش سُجادته وصلى! بقيت اباوعله لحد ما خلص..

- تقبل الله

- منا ومنكم صالح الاعمال بابا

تفاجئت من شفته سحب فراش من فوك الكنتور ومده ؏ الارض ونام ، حَـسيت الدمعة صارت بطرف عيني!

حط ايده ؏ عيونه وگال رغم اني ما سألت!

هُمام- طول الليل تتحركين بعدم راحة وتكوبسين وترددين لا تلمسني ، هذا افضل حل علمود لا اضايقج

حطيت ايدي ؏ حلگي امنع صوت شهگتي
عبالـه اقصده؟ عباله هو الشخص السيء
الي يزور احلامي! اني بس يمه احس بالامان
بس خوفي جان اذا عرف اني مو عذراء
اذا عرف الحقيقة؟
خايفة من ردة فعله الي ممكن تهدمني!!!!

گمت باعده الغطى وتمشيت بخطوات گعدت ؏ فراشه وبتردد سحبت الغطى منه اتشارك وياه وگلبي دگاته الف! بعد ايده فاتح عيونه متفاجئ ، تمددت سانده راسي ؏ صدره حاضنته وهو بعده جامد بمكانه..

- الاشخاص الي بـ احلامي سيئين اما انتَ بالنسبة الي الامان

تحرك ضامني لـ صدره وباس راسي..
هُمام- عبالي مني ما حَـبيت اضايقج

- بعد لا تعوفني هيج هُمام

- صار

- افكر لو التحقت شلون بيه اني اخاف اذا أنتَ ما موجود

- ما اخليج تحسين بغيابي وعد

تنهدت ساكته وشوي شوي حَـسيت بالنعاس يداهم عيوني لحد ما غفيت مو حاسة بشي غير لمسات ايده الي تتوزع ؏ طول ايدي وظهري وشفايفة الي بين فترة وفترة تنطبع ؏ راسي ببوسة عميقة..

فزيت الصُبـح ؏ صوت تكسير مواعين عالي! طفرت نازله بخوف وجمدت من المنظر! عزااا هاي شصاير هنا؟

باوعلي هو ورنيم وضحكوا..

- شداتسوون؟

رنيم- داسوي ريوك بأمان اللـه واجاني خالو ؏ اساس يساعدني وهاي النتيجة

هُمام- ام لسان مو أنتِ سحبتيهن مني ووكعن؟

رنيم- بس أنتَ ما تعرف وحتخرب ريوگناااا

- اششش هُمام مو عندك شغل؟

هُمام- اي

- اي روح بدل بين ما نرتب هاي الفوضى

شال رنيم ووگفها يمي ودفعنا..
هُمام- الگزاز يجرحجن طلعن بين ما انظف المكان ورجعن سون الريوك

بقينا واگفين نضحك ؏ منظره وهو ينظف المكان وكل شوي يهز راسه النا بمعنى بسيطة ، خلص راح غسل ايدي واجه كرص خد رنيم وصعد للغرفة يلبس ملابس الشغل..

رنيم- اول ما شفته فد چان غثيث بنظري وما اطيقه ههههه

- هُمام؟؟

رنيم- اي بالمُستشفى من تصاوب عمو جان يستفز بيه واني بسرعة ارد ما جنت اعرف من حُبه الي واشتياقه يسوي هيج علمود يخليني انتبه اله واحجي وياه

- حنين هُمام كُلش حنين رنيم

ابتسمت..
رنيم- اعرف شفت حنانه الج من تتخربطين وحتى اني من يشوفني يحتار شنو يسوي في سبيل اضحك

سوينا الريوك ومسرة ودموع نايمات لان امس سهرن ؏ الفلم وهنَّ ما متعودات!
اجه هُمام اكل شوي وشرب الچاي وطلع مستعجل اباوع ؏ رنيم عينها ؏ الباب تريد تلمح كليم بس خابت امالها من سد الباب هُمام وسمعنا صوت السيارة تحركت..

- رجعي رنيم أنتِ ما مرتاحة لان مو بيته

رنيم- ما اگدر سارة صعبة اعرف هو هم صعبة عليّ يحب البنت الي رباها واعرف بهربي منه راح يزيد عذابه بس اني ما اگدر

حجيت بتردد..
- تتوقعين كليم يسويلج ش....

بسرعة قاطعتني مذعورة..
رنيم- لااااا لا لا والله مو هيج افكر اصلًا مستحيل افكر بعمو تفكير دنيء لان عمو مستحيل يسويها كل خوفي انُ.. انُ اجرحه اكثر لان اني عرفته عمي وراح يبقى هيج وما اريد اكسر گلبه اخر شخص افكر اكسر گلبه وأذي عمو

- وتبقين هيج حالتج ذبلانه؟ وما ندري بحالته الرجال يمكن اسوء من حالتج وخصوصًا هو ما يعرف سبب تغيرج هذا وممكن يفكر بغير شي

اباوعلها سكتت وبعيونها حزن ، تقربت بست خدها وحجيت..
- رايحه اگعد البنات يلا اكلي

رحت گعدتهن بلگوة سحبتهن من لفراش ، غسلن وتريگن وگعدنا نقرأ شوي قبل لا نسوي غده تقريبًا الساعة 11 الظهر اسمع صوت تلفوني يرن فوك عفتهن وصعدت ابتسمت من شفت اسمه..

- الو

هُمام- ساااااارة الباااب مقفوللل جاوبييي

- شكو

هُمام- خرببب ولجججج البااااااب مقفففففول

- اي اي من طلعت قفلتهن

- صعدن بغرفتييي استعجللللي واكو سلااااح جوه السرير اخذذذي يلـه بنيتي سوي الاگوللل عليّ جاااي اني جااي

- شنو صاير

هُمام- سارة استعجلي عذاب برة

ويه كلام علك صوت الرمي يمه ونقفل الخط! خوفي عليّ موتني بس چان كل همي يم خواتي رفعت المندر وسحبت السلاح! بس ما اعرف استخدمه؟!!

نزلت اركض وجمدت بمكاني من شفته گاعد وگدامه البنات!! وثنين زلم واگفين وراه موجهين السلاح عليهن! گلتها قبل وارجع اگولها علمودهن مستعدة اقتل وادخل سجن ومستعدة اموت!

ما اعرف استخدم السلاح بس ما اعرف مين اجتني الجرأة ورفعته موجهته عليّ والزلم الوراه وجهوا اسلحتهم عليّ..

ما اعرف هُمام مات او بعده عايش ولا اعرف راح يلحگون او لا بس كل الاعرفه خواتي بخطر وبالاخص رنيم ولازم احميهن ولو كان الثمن روحي.

ايدي ترجف وصرخاتهن تهز البيت صوت الرمي بالتلفون صار بأذني اخر نظرة من هُمام قبل لا يطلع اجت بالي ودعته بعيوني واني ما ادري..

غمضت عيوني وضغطت راميه..

كل الاعرفه نكتم صوت خواتي وصوت الطلقة بس الوضح بالمكان وعم الهدوء من بعدها ما تجرأت افتح عيوني!  

..

وتستمر الحكاية.. 🚬♣

قناة التلي zainab_salah0