بقلمي : زينب صلـاح 🧡
لـ روايـة ﴿ دروب الإندِثار ﴾
في الـ part 47 ♡♡
لا تنسون التصويت + متابعة للحساب + التعليق بين الفقرات ☘️
يمَدري شلون طبيتي بحَنايا الرُوح
انتِ التايهَات الما محَسبلهن.
•••••••••••••••••••••••••••♕•
مسـࢪة•
تلمست حيطان الغُرفة والدموع بعيني
چان المفروض مَن زمان احنه بيهن وهاي!
هاي الحيطان المفروض تكون شاهدة على
كُل لحظة حُب نعيشها
چنت متحمسة اعيش بهاي الغُرفة ويا قسور حبيب رَوحـي
كُلشي سويته بنفسي الاثاث الترتيب بَـس
مسرة هذيچ تختلف عن الحالية
مسرة قبل تعيش اليوم بيومه فرحانة وسعيدة
عايشة الحياة بالطول والعرض بدون خوف
بينما مسرة الحالية تخاف لو شافت ظلها
تفز مَن اقل حركة ما عندها ثقة بأي شخص
عايشة يومها بتوتر وقلق ودائمًا تفكر شحَـيصير بعد دقائق !!
والاهم مسرة العاشقة لـ قسور اختفت وضاعت بخوفها
بَـس هسه وبعد العلاج وكلام الدكتورة
صار لازم اواجه خوفي واتعايش ويا
قسورة يستاهل احاول علموده دا اشوفه
هواي يحاول علمودي وهواي يضحي
غمضت عيوني وعضيت شفتي احاول
اسيطر على ردات فعلي واني أحَس بيّ
يحضني مَن ورا ساند راسه على كتفي
قسورة- نورتي بيتچ حبيبة گلبي
ميل راسه وبحركة لا أرادية ميلت راسي
حتى اگدر اشوفه ابتسم وهمس
قسورة- علاج رَوحـي أنتِ
تقرب اكثر
قسورة- مسرات العُقاب اميرة گلبي
غمضت عيوني بَـس ما سوه شي !!
فتحت وهوَ اخذ ايدي يدخلني للغُرفة
قسورة- على ايدچ ما دخلتلها
- وين چنت تنام؟
- يم اخواني بالصالة افرش وانام ما انطاني گلبي ادخل لبيتنا بدونچ
ابتسمت وهوَ همس
- لحظة !
اكو رُكن سويته بيّ مُسجل اغاني
راح فتحه وبقة فترة ما اعرف شنو يسوي
فترة يلـه ثبت على وحدة وبدت المُسيقى
باوعلي وضحك
تقدم بخطوات بطيئة تملك خُصري بين ايدي
وبدأ يتمايل ويايَّ على النغمات لحد ما بلشت كلمات الاغنية ترن بالمكان
"مهما يحاولوا يطفوا الشمس، مهما يزيدوا علينا الهمس
مهما يحاولوا يطفوا الشمس، مهما يزيدوا علينا الهمس
مهما يقولوا مهما يعيدوا، إنت في قلبي إنت وبس
مهما يحاولوا يطفوا الشمس، مهما يزيدوا علينا الهمس
مهما يحاولوا يطفوا الشمس، مهما يزيدوا علينا الهمس
مهما يقولوا مهما يعيدوا، إنت في قلبي إنت وبس"
همس اخر جُملة وشفايفه على خدي
قسورة- "إنت في قلبي إنت وبس"
ابتعد مسافة ولزم اطراف اصابعي
فرني داير ما داير نفسي وسحبني لازك
جسمي بجسمه والكلمات بعدها ترن
محركة مشاعرنا وحُبنا
رفع ايده واخذ وجهي بين ايدي مبوسه
ويردد بكلمات الاغنية
"بيني وبينك حب كبير، أكبر ما يفكروا بكثير
ده اللي ما بيني وبينك كان في السماء متقدر
لازم كنت ححبك مهما لقانا تأخر"
رفعت نفسي على اطراف اصابعي موسعة
عيوني وجامدة بدون ردة فعل
مَن ختم كلام الاغنية بطبع شايفه على شفايفي
صار يقبلني بطريقة مُحترفة يمرر ايدي على
ايديا ويضغط عليهن بقوة ، ابتعد يلهث
همس ضد شفايفي
قسورة- مالتچ اني قسورچ يا روحه
ورجع يُقبلني ساحبني لعالم ثاني
لدرجة بعد فترة لگيت نفسي على السرير
بين ايدي منومني على صدره اليصعد وينزل بقوة
قسورة- الدكتورة گالت
رفعت عيني اباوعله وهوَ كمل
قسورة- طلبت مني اخطي هيچ خطوة ونكسر اول حاجز مو علاقة كاملة بَـس بستچ
مرر ايده على زندي
- تقبلتيني مسرتي !! مَن بستچ ما نفرتي مني لو تعرفين شگد فرحان بهذا التغيير
- بقيت فاتحة عيوني حتى اشوفك أنتَ
- لاحظتچ
ابتسمت فرحانة بهذا الانجاز
گام طلع حبشكلات وشغل فلم واجه يمي
صرنا نتابع ونحلل الاحداث ابد ما ضايقني
بقى متحفظ ويايَّ على گد تعليمات الدكتورة
بحيث اذا الزم ايده يلزمني واذا ابتعد يسكت
ويسوي الامر طبيعي
لثاني يوم نمت مَن التعب مال السهر
گعدت غيرت ملابسي وطلعت للمطبخ
ضحكت مَن شفته مجهز الريوك وكاتب
بورقة صغيرة
- صحة وعافية مسرتي
اتصلت على كام وثبتت التلفون گدامي
حطيت جبن ومربى على التوست وهوَ
فتح خط
زفر الدخان ومسح على شواربه وابتسم
- هيچ اتعود على الدلال !
قسورة- شعندي غيرچ احبل اجيب تدللي
ضحكت ماخذه قضمه مَن التوست متلذذة
وهوَ كُل ما الها ابتسامته تتوسع
- يمتى ترجع قسور
- اخلص شغلي وارجعلچ روح قسور أنتِ
- مو تتأخر حَ أحاول اطبخلك مَن ايدي اليوم
قسورة- لا تتعبين ايديچ الترفة اجيب جاهز
هزيت راسي مرتشفه شوي شاي
- لااا حابه اني اطبخ
قسورة- سوي التردينه بَـس خلي سارة يمچ خاف لا سامح الله يصير قدر وأنتِ وحدچ
- هوَ اريد سارة تعلمني واني اطبق
راد يحجي ونزل التلفون على رجله وصارت
الشاشة ظلمه وبَـس اسمع صوته هوَ
وشخص يحجون بَـس ما فهمت بالضبط
على شنو
ما اشوفه غير رفع الشاشه وغلق الاتصال
بدون ما يحجي حرف
حركت اكتفي متفهمه وضعه
خاف دخل شخص يمه وما يگدر يحجي
كملت وغسلت مواعيني وركض طلعت
لـ سارة فتحت الباب ادور عليها بعيوني
"مُنقذتي" !
شفتها بالصالة تقلم بامية وواضح نية
الغدا بَـس لحظة عمو هُمام الاعرفه ما يحبها
- سارتي
جاوبتني بدون ما ترفع راسها
- رجاءًا هاي الكلمة عليها حقوق زوجي
ضحكت متقدمة يمها
- امي حبيبتي لعد وين عمو؟
سارة- التحق الفجر
- اهاااا عرفت ليش مسوية بامية اليوم !
ضحكت
سارة- احبها ومحرومة منها لان الافندي تلعب نفسه منها
تحمحمت مبتسمة بتوسع
باوعتلي رافعة تك حاجب! ، حطت السكين
بالصينية
سارة- شنو تريدن؟
- اريد اطبخ لقسور واريد تجين ويايَّ تعلميني
سارة- تدللين عيني كم مسرة عندي
حضنتها بقوة
- بَـس اني وممنوع يكون عندچ غيري
بادلتني وحرك ايدها على راسي
سارة- شنو اكلته المُفضلة استاذ قسورة؟
- ما سألته بَـس مرة سمعته يگول لـ عمة اخرب واتكهرب على المقلوبة
غمتني
سارة- ديلـه ولي لبيتچ هسه اجي
گمت دازتلها بوسة بالهوى
وقفت رجلي ودرت اباوعلها مَن گالت بكُل جدية
سارة- بعد شهر المدارس وكليم دا يمشي بالاجراءات مالتچ أنتِ ودموع
- بَـس اني ما اريد
سارة- حَـتداومون اول متوسط سوا
- ما اريد سارة
سارة- وأنتِ ما حَـتعترضين واذا صار واعترضتي..
گامت شايله الصينية وضافت بتهديد
- يحرم عليَّ ليوم الدين احط لساني على لسانچ
- اخاف !
سارة- گلتيها ويا قسورة وهسه أنتو بخير لان حاولتي والمدرسة مُستقبلچ ولازم تحاولين علمودها
- افكر
سارة- اتمنى جوابچ يكون ايجابي اتمنى
تنهدت طالعة ورجعت للبيت فكرة تاخذني
والخ ترجعني لحد ما دخلت سارة وبلشنـا
نطبخ او هي تعلمني واني اطبق وحاطه
دفتر اكتب بيّ الطريقة اول بأول علمود لا
لا انسى مرة ثانية!
باوعت للسـاعة قرب يجي باست سارة خدي
- عاشت ايدچ بنيتي يلـه اني ارجع
- لحظة امي
ركضت اصبلها لان تتأخر وتبقى جوعانه
لان خلصت الوقت ويايَّ واكيد ما طبخت
- خلي البامية على باچر ما تلحگين تطبخين
سارة- وهوَ هيچ
راحت واني ركضت سبحت وغيرت ملابسي
مشطت ومديت السُفرة اباوع الساعة عبرت
وهوَ ماكوو !! لبست جُبتي وطلعت لـ بيت
عمو كليم
دخلت مستقبلتني عمة نجلاء والكُل گاعد
على السفرة
- اعتذر لان اجيت بهذا الوقت
كليم- تعاي بابا گومي رنيمه صبي لأختچ
جاوبته بسُرعة
- لاا لا اني طابخة ومجهزة الاكل بَـس عمو قسورة ماكو! مو تأخر بالي بقى يمه
مسحت دمعتي النزلت
كليم- عليش البچي بابا هسه اخابر واشوف تعاي گعدي
گعدت على نار وهوَ مَن اتصال لـ اتصال واخر واحد عدل گعدته وحجه بقلق
كليم- شوكت هذا الكلام؟ مَن انعل ابو هيچ شغلللللل شمووووصي اني !! لا تعتذر ما يفيدني اعتذااارك لك ابني موصيك لو لاااا شلون تنسى! بسيطة اجي ونتحاسب
شمر التلفون وصعد فوك بدون كلام
- قسورة بيّ شي !!
لـيث- گولي يا الله ! يعني قسورة بيّ شي وهاي ردة فعل خالي
رنيم- كافي موتي نفسچ
- خايفة عللللليّ
نجلاء- ولچ يمه اهدي فرفحتي شسالفة ! ها هذا ابو ريم خوية طمنه البنية خايفة
نزل عمو لابس زي الشغل واعصابه تفور
كليم- ما بيّ شي بابا بَـس سوا شغل مانعه مَن عنده وعصبني احل الموضوع واجيبه واجي
طلع وبقيت بمكاني الوب
اخر شي ما تحملت طلعت برا امشي وعيني
على الباب ادعي يدخل ويملي عيني بطلته
حتى سارة اجت وبقت عيني عليَّ مَن بعيد
محد تقربلي لان يعرفون علاج حالتي الوحيد
"شوفة قسوري"
ساعة وثنين وتلاثه وماكو !! گعدت حاضنه
جسمي اليرجف خوف وقلة اكل !!
دموعي جفت وبقت بَـس شفايفي ترجف
انفتح الباب
طفرت عيوني تتعقب السيارة ضحكت مَن
شفتها سيارته
بَـس يا فرحة ما تمت
نزل كُله دم !! وحالته؟ اوف يا حالته عثت
بـ گلبي خراب
مهدود حيله والتعب اليّ بعيونه واضح
نزل عمو يرجف مَن الاعصاب واول شي
سوا ووگف عقلي لزم قسورة وشبعه راشديات
يرفع ايده وينزلها على خده بكُل قوته ويعيط بصوت جهوري يرجف
كليم- مووووووتي على ايدددك ابن نجلااااء لك تجلطني أنتَ تموتني على أيددددك ناوي عليَّ مطييي ابن *** مَن انعل ساسك لابو الجابك عليَّ
دفعه يرجف ، كُل هذا صار واني جامدة بدون
ردة فعل !! محد تدخل اساسًا غير عمة الحضنت عمو تبوس بكتفه
نجلاء- لا خوية مو هيچ فدوة اروحلك
دفعها وزمخ
- الزم اممممممك لـيث
سحبها لـيث المصدوم وعمو رجع رفع قسورة
مَن ياقته وضربه بقوة وجعت گلبي
كليم- لييييش لك ليشششش دمرت نفسك وتعبكككككك ولكك شسوي بَـس فهمني شسوي واحمييييك شللللون اطلعكك منهاااا لـ ....
دفع قسورة ولزم صدره اليصعد وينزل
قسورة- خالي !
- انعل شيب خالك امشي ما اريد اشوف وجهك
الكُل ركض خايفين عليّ لان وجهة صار
اصفر وقسورة الچان ساكت طول الوقت
انرعب مَن شاف عمو بهاي الحالة
بَـس رجع دفعه رافض منه اي مُســاعدة
كليم- تعاي اخذي ما اريد اشوفه
تقربت مَن قسورة الچان جامد بخوف على
عمو ! لزمت ايده ساحبته بـ اتجاه البيت
- تعال خلي يهدأ وتحجون
ادفع بيّ لحد ما صعدته فوك كاتمة انفاسي
مَن ريحة الدم التفوح مَن جسمه وملابسه
ما اعرف هوَ شلون متحمل !
دخلته للحمام وگعدته وهوَ بعده شارد وكُل كم دقيقة يهمس "خالي"
نزعته القميص وشمرته هامسه
- لعد وين ملابس شغلك؟
جاوبني بشرود
قسورة- بالمكتب
- وين چنت؟ شنو هاي حالتك قسور؟
دور عيونه على طولي
- اخذت حقچ
وگفت ايدي عن الحركة وحسيت بگلبي انصعق
جوابه چان كفيل يخليني متسمرة بمكاني
لا گادره احجي ولا انطي أي ردة فعل
گام وحضن وجهي بـ أيدي المليانه دم واليّ
دمرتني مقرفتني ويمكن هوَ ما چان منتبه
قسورة- حرام عليَّ انعد مَن الزلم واني ما ماخذ حق مرتي !
سند جبينه على جبيني
قسورة- طلعت كل وجع انوجعتي منهُم اضعاف وعدتچ اخذ حقچ ووفيت
ابتعد منطيني ظهره يمسح على رقبته
- ما يهمني الراح يصير بگد زعل خالي وتعبه
دار يباوعلي ينتظر مني جواب او أي شي
بَـس حلگي تخيط ما اگدر انطق بكلمة وحدة
قسورة- طلعي مسرة اريد اسبح
بدون ما اناقش مشيت طالعة
حطيت ايدي على گلبي ونزلت دموعي تتسابق !
رحت غسلت وجهي ارجف وجهزت الاكل
واني بعدني احاول انطق بحرف واحد ما
دا اگدر
درت وجهي مَن حسيت بنظرات تخترقني
وفعلًا چان واگف بباب المطبخ يتأملني
تقدمت حاضنته وسانده راسي على صدره
بادلني بدون ما يحجي وهذا الچنت احتاجه
- طبختلك
قسورة- امم شميت الريحة الطيبة
- تاكُل مو؟
ابتعدت اريد جواب ، ابتسم
- ما جوعان بَـس اكل شوي علمودچ
- يلـه تعال
- اشوف خالي وارجع
تركته براحته وهوَ طلع قريب الخمس دقائق
رجع عقدت حواجبي مَن شفت خده احمر دم
وعيونه مدمعات ومحتقن بيهن الدم !!
تقربت ممرره ايدي على خده
- منو؟
قسورة- امي!
رفع عينه وطلع صوته مهزوز
قسورة- تگلي راح تموت اخوي معقولة اني اتقصد اجرح خالي وأذي؟
- كلكُم معصبين لا تاخذ بكلام عمة
قسورة- گلبي نار وما دخلتني ما خلتني اشوفه مسرة راح اموت بَـس اريد اطمئن عليّ
- هسه اشوفه واجيك
قسورة- والله؟ اي اي روحي وتعاي طمنيني
لبست حجاب وطلعت اركض للبيت
بَـس دخلت اجت عمة الظاهر عبالها قسورة
رجع لان اجت اعصاب ومخنزرة وبَـس
شافتني هدأت شوي
دخلت للصالة خطية الولد لـيث وايهم گاعدين
يقيسون بضغطه
ايهم- صدك تحجي خالي؟ بينك وبين الجلطة شعره
رنيم- كليممم خلي نروح للمُستشفى
تبچي وتفرفح وهوَ يبتسملها يريدها تهدأ
رُغم چان تعبان وما بيّ حيل حتى ينطق
ابتعدوا الولد عنه ورنيم گعدت يمه تناشغ
وبنته مَن شافتهُم هيچ اخذتلها الجهة الثانية وگعدت تبچي
كليم- زين اني بنياتي حبيباتي ليش الدموع مو والله تهدن حيلي
ريم- بيك واوا
كليم- لا ريمتي تعاي بحضني باباتي حبيبتي
حضن ريم لـ صدره ورفع ايده يمسح دموع
رنيم ويححي وياها بهدوء
كليم- كافي مو زين عليچ اني بخير
رنيم- مو زين وجهك اصفر وضغطك مفول حَـتضربك جلطة وتعوفنييي مثل بابا مثله
كليم- استغفر الله تعاي كافي
حضنهن وهوَ يريد واحد يواسي گعد يواسيهن
ويهدأ بيهن واجت عينه بعيني
كليم- شلونه قسورة؟
- خايف عليك
كليم- روحي صيحيله
ابتسمت وركض للبيت دخلت فحطانه
وهوَ مَن شافني هيچ طفر مرعوب وفاتح
عيونه بذعر
قسورة- شبيچچ خالي بيّ شييي؟
دفعته ماخذ كلاص الماي اشربه
- عمو يريدك
قسورة- ها؟ يعني يريدني؟ گولي والله !
- اي اي گال اصيحلك
ابتسم واخذ ايدي ننزل واشوفه مبتسم
دخلنا للبيت وأحسه خجلان
ترك ايدي مسح على رقبته يباوع على عمو
اليّ ابتسم بقلة حيلة على حالة قسورة
كليم- تعال
تقدم بتردد وگعد على الارض يم رجلي
نزل عمو جسمه شوي ومسح على خده
وعقد حواجبه
كليم- أذيتك وليدي؟
- لا
كليم- احترك گليبي عليك وعلى مُستقبلك ما چان القصد امد ايدي واضربك والله اعذرني ابني حبيبي
حضن وجه قسورة وباس خده والثاني ما
قصر بَـس شاف عمو لين ويا گعد بصفة وحضنه بقوة
باوعلي مبتسم كأنو سوا انجاز مو عمو صالحه
لـيث- سويتولنا اكشن خالي بلاش بَـس خالي خرب يومك شلون تضرب راشديات
كليم- تجرب
لـيث- لا مشكور ما تقصر هوَ أنتَ تضرب قسورة واني خدي لحد الان يوجعني
ايهم- حيييييل تتذكر خالي مَن ضربك راشدي لان فشخت ابن الجيران قسورة تتذكر
قسورة- اي بوقتها بقى اسبوع لازم خده وصافن
لـيث- والله يوجع اسكت خدر وجهي مَن تذكرت
باوعتله رنيم
- چنت تضربهُم؟ اتذكر أنتَ ما تتعامل بالضرب !
كليم- لحد الان ما اتعامل بالضرب هذا ايهم لحد هذا يومچ صوتي ما رافعه عليّ لان ماشي عدل وقسورة هاي اول مرة اليوم والمطي هذا چان كل يوم جايبلي مصيبة ولسانه طويل اخذله راشدي وتاب بعد ما سوالي مشاكل ويا الناس
لـيث- والعباااااس بالحق لعد اسكتلهُم يغلطون عليَّ
كليم- اويلي منك ابو الحق
ايهم- الله يحفظك النا يابه
كلها گالت امين وعمو ابتسم اكثر مَن حجت عمة
نجلاء- اي والله لو ابوهُم عايش الله يرحمة ما چان تعب بتربيتهُم لهاي الدرجة
قسورة- الحنين اموت عليك
كليم- خابرولي هُمام
خابره ايهم وعمو رجع راسه سانده على الحايط
رنيم- كليم !!
- ها بابا
رنيم- خلي نروح مستشفى الله يخليك لا يصيرلك شي
قسورة- شبيك؟
لـيث- ضغطه مفول
قسورة- گوم يابه گوم حبيبي ناخذك ينزل ضغطك ونرجع
كليم- وتاااالي ! گلت ما بيَّ شي لحد يلح
سكتوا وايهم ما حصل عمو هُمام
محد رجع لبيته كلنا بقينا هنا والعيون
على عمو كليم خايفين يصيرله شي فجأة
محد فارگه يسولفون ويا ويتذكرون ايام قبل
شوي فك وضحك ويا الولد ورجع الدم بوجهة اكثر
مَن رد عمو هُمام وبلغه يرجع بأسرع وقت
مَن صعد عمو ويا رنيم يرتاح رجعنا للبيت
وللمرة الما اعرف شگد رجعت حررت الاكُل
لان الاستاذ بعد ما تصالح ويا عمو نفتحت شهيته
صبيت وگعدنا ماكُل !
اخذ اول خاشوگه وگال
قسورة- اممم لو هيچ الطبخ لو لحد يطبخ
- گول والله !!
- والامام علي غير يشك شك عاشت ايدچ
اكلت شوي وصدُك طالع طيب!
قسورة- فنانة هي گوة! نفس الدراسة عندي كله خمسينات رحتي امتحنتي زط بط مُعدلچ أحسن مَن خواتچ
كممت حلگي ضاحكه وهوَ ضاف
- هسه حتى بالطبخ مُدة وتتفوقين عليهن
تحفيزه طيرني مَن الفرح وصارت هوايتي الثانية
الطبخ ! صرت على النت او مَن خلال سارة اتعلم
واجي اطبق
وما احجيلكُم عن تحفيزات قسورة التطيرني مَن
الفرح وتطيني داعم اقوة حتى استمر ..
ㅤㅤㅤ
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••
رنيـم•
ㅤㅤㅤ
الظلام حاط المكان وفقط بعض الزوايا
مشتغله بيها الشموع ومنثور على الارض
ورد وردي !
سويت رُكن بيّ كيكة مكتوب عليها بخط لطيف
"مبروك معرفة جنس الجنين"!
ويمها شمعة مُعطره لونها وردي وبوكس
بيّ حذاء بنوتات وردي مُغلف اريده هوَ
يفتحه
وواحد ثاني هدية عيد ميلاده
تقربت مَن الشُبـاك واتسعت ابتسامتي
دخل هوَ وخالو وبقوا فترة مَن الزمن يسولفون
اكيد بخصوص موضوع قسورة !
خالو أمس رجع وخبصنا خبص ولعب بقسورة لعب
لان تصرف بدون علمهُم وبقى يركض ويا كليم
ما لحگنه نشوفه حتى !
تسالموا ودخل ركضت قافله الباب وشفت
نفسي لأخر مرة گدام المرايا
فُستان ابيض قصير وواسع وبوند وردي على
راسي بمكياج خفيف وحجل يرن برجلي !
عضيت شفتي مَن تحرك مقبض الباب
وبعدين طرق الباب
كليم- رنيمي ام عيون حلوة !
جاوبته مَن ورا الباب
- كليم غمض
- ليش يا حلوة
- غمض فدوة !
كليم- تم جوهرتي
فتحت الباب وشفته فعلًا مغمض وعلى وجهة
ابتسامة حلوة مُريحة
- لا تفتح منا لمن أگُلك
هز راسه واني لزمت ايده ودخلنا قافلة الباب ورايا
باوعت حولي كُلشي تمام وجاهز بَـس گلبي
يرجف مَن التوتر ما اعرف ليش
- اءء افتح
فتح عينه بهدوء واول شي سوا القى نظره
عليَّ مَن فوك لـ جوه بتأمُل لأدق تفاصيلي
بعدين رفع عينه على الغُرفة وضحك براحة
كليم- هاي شنو !
حطيت ايديَّ ورا ظهري احرك بجسمي
- كُل عام وأنتَ بخير حـبـيبـي !
حضن وجهي
كليم- احله حبيبي اسمعها شو عيديها
- حبيبي وابو طفلي وابويا الرَوحـي
كليم- يروحلچ فدوة أنتِ وطفلچ
نزل راسه واخذ شفتي بايسني
يتفنن تاركني اغادر هذا العالم لثواني !
ابتعد يضحك ويأشر على الزينه
- ليش كله وردي؟ مو لوني المُفضل ترا !!
- اعرف تعال
سحبته للرُكن وبَـس قرأ العبارة شفت عيونه
تنملي دموع باوعلي ما مصدك قدمتله البوكس ، اخذه يرجف ما مسيطر يفتحه
رفع اصابعه حاطهن على شفايفه يحركهن بعشوائية
وهوَ يتأمل حذاء البنية بشرود
- كليم !
- مؤنسة ثالثة ! شنو مسوي ورب العالمين دا ينعم عليَّ بهاي النعمات الحلوة؟
لزمت ايده ورفعتها بايستها
- ربيت طفلة يتيمة حبيتها واحتويتها اخذوها الما يخافون الله وأذوها بَـس أنتَ ما تركتها ورجعتها وعوضتها اضعاف الخسرته برأيك هذا شي مو كافي؟ أنتَ عوضي الاحبه دعوة بابا المُستجابة
كليم- ما مسوي شي هذا واجبي وغصبًا عليَّ اسوي واني الممنون
- أحُـبك
عض شفته يحاول يسيطر على مشاعره !
بَـس وين يگدر نزل گاعد على ركباته وشبع
بطني بوس وهوَ يطلق ضحكات عالية ومتواصلة
كليم- اويليييي بابا يمتى تنوريني ما اطيق الصبر بعد
- اهووو حَـياخذن مكاني بنـاتك !
كليم- ولا ألف بنية تاخذ مكانچ كلهن يرحن فدوة الچ بَـس وداعتچ محبتهن مَن محبتچ لان أنتِ امهن
- اووويي تعال ابوسك
دنگت مبوسته وسحبته حتى يوگف وهوَ يضحك
سحبت هديته مقدمتها اله بخجل
- مو مَن مقامك بَـس احتاريت شنو اجيبلك
- ما يحتاج وجودچ هدية
- افتحها
سحب الشريط وحطه على المز وبعدين
فتحه
بقى صافن عليها ومبتسم ، حكيت طرف
حاجبي بتوتر واني أأشر على الساعة
- مو هنا الفكرة دورها
رفع حواجبه وطلعها مَن علبتها ودارها
ضحك يمسح على شواربه
الساعة نحتت وراها عن واحد مُختص
طبعًا بمُساعدة لـيث
"احُـبك كليمي"
كليم- ساعديني البسها
نزع الچان لابسها واني لبستها اله
سحبني مَن راسي وحط شفايفه على
جبيني بدون ما يبوسني بَـس أحَس
شفايفه ترچف
- كليم يموت عليچ صغيرونته
حاوط وجهي جسمه يرجف
اباوعله بعيوني شلون يحاول يحجي ويتغزل بَـس الكلمات ما دا تسعفه
هز راسه بقلة حيلة وضحك ، نزل طُبع
بوسة سطحية على شفايفي وهمس
كليم- عوضتيني عن الدنيا والبيها
سحبت نفسي منه مَن شفته يبوسني
وصار الموضوع يروح لغير اشياء بعيدة
عن خططي !
- قطع الكيكة كليممم
تقبل وصار يقطعها وهوَ مبتسم
خله النا بصحن وشال الباقي بعد ما خرب
الكلام المكتوب عليها ما اعرف ليش هـيچ
سوا؟
كليم- رايح انزلها الهُم واجيج علمود بعد ما ننزل
- حطلي بعد قُطعه واخذها
- ابد لا تفكرين بالموضوع لعد ليش منزلها اني غير اعرف بيچ تقضين عليها وتدمرين نفسچ
- مشتهيه كليمم !
كليم- وحدة صغيرة !
- تمام
رجع قطعلي وحدة صغيرة فعلًا ونزل
فتحت فلم رُومانسي وعطرت الغرفة
حضرتله الحمام خاف يسبح
وگعدت انتظره ماسحه على بطني بحُب
- يمتى تجين ماما مشتاقة اشوف وجهچ الحلو بَـس ان شاء الله ما تطلع عيونچ مثلي
كليم- شرط عيونها مثلچ غيرها ما مقبول
رفعت راسي وهوَ سد الباب ودخل
- تتعب كليم ! يتنمرون عليها
كليم- نخليها تحب نفسها بحيث ما تتأثر مَن تنمرهُم
تقرب اكثر ومرر ابهامه على خدي
كليم- الخلل منچ چان مَن يتنمرون لان أنتِ ما عرفتي تحبين نفسچ ولا تدافعين عنها وبنتنا اني اربيها واخليها تاخذ حقها وفوگه حبة مسّك
تنهدت اباوعله بزعل
كليم- شو گومي خلي اتأمل هذا الجمال
گمت واني اضحك مفتره حول نفسي
كليم- ما مشتريلچ هيچ شي اني !
- صحح بيوم رحنا للدكتورة مرينا على السوق واخذته ، حلو؟
كليم- أنتِ محليته
تنهد وسحبني لـ صدره
كليم- عوفي كلشي رنيمه محتاجج صارلچ فترة نافرتني
- اء اسفـة
كليم- لا تگليلي اسفة گليلي اني الك
اباوعله يتنفس سريع ووضعه مخربط باوعت لـ اجواء الغُرفة كُلشي يساعد على الحُب !
واضح خُططي حَـتُهمل ونمشي ورا خُطط كليم
- الك اليوم وكُل يوم حبيبي
وبهيچ صرت اسيرته وعشنا ليلة حلوة بعد
ما ابتعدنا هواي اقتربنا اكثر بسبب هاي النتفه
الموجودة ببطني
صارت سبب حتى ترجع تجمعنا اني وابوها
مثل ما چانت سبب ببُعدنا
فزيت الصُبح على طرقات الباب
گمت مفزوعها اغطي بجسمي واباوع داير ما دايري !
هاي شصاير بالغُرفة عزا منفجرة بيها قُنبلة
ماكو شي على حاله مخربطه
نضرب الباب بقوة واجاني صوتها الغاضب
- مامااااا
ابتسمت واخيرًا بدأت تنطقها
سحبت فُستاني البسه وگمت فتحت الباب
حاضنه دبدوبها ومبرطمه خازرتني
- روح امچ ريمتي تعاي حبيبي
شلتها مبوسه خدودها
ريم- الللله كيكة !
نزلت مَن ايدي وركضت تريد تاكُل
اي الافندي كليم ماخلانه ناكُل ولا نسوي اي شي
غير العاجبه هوَ واكيد فهمتوني ماكو داعي
للاحراجات والتوضيح التفصيلي اكثر !
سحبتها
- ما يصير مَن الصبح
ريم- شويه شويه حبابه ماماااا
تطفر وتأشر وعيونها تلمع واني ضعيفة گدام هاي اللطافة
اخذت شوي بالشوكة موكلتها وشلت الباقي
للثلاجة
- كافي ماما مو زين عليچ
- اغيد احبها حبابة
- خليها العصر اسويلچ عصير وياها وعد
بصعوبة قنعت والتهت تلعب بالورد والنفاخ
- ماما ريمه اني ادخل اسبح واجي لا تلعبين بأشياء مؤذية تمام؟
هزت راسها تضرب النفاخ وتضحك
حبيبتي السنة ان شاء الله تسجل اول
كليم حيل خايف عليها لان عندها لدغة ببعض الحروف وكُلش فقيرة وحساسه
لذلك قرر يخليها اهلي ويوصي عليها هناك ومع هذا بعده خايف عليها وعلى مُستقبلها
سبحت بسُرعة وطلعت اخاف تأذي نفسها
بَـس حبيبتي فدوة لروحها مؤدبة حيل وهادئة
لگيتها على نفس وضعها تضرب بالنفاخ وتلعب
مشطت ولبست مستور واخذتها نازلين جوا
بَـس دخلنا صحنه سوا
- صباحوووو
ضحكوا وجاوبوا الكُل موجود عدا كليم وخالو
موضوع قسورة مُبهم محد يقبل يحجي بيّ
حتى مسرة تعرف بَـس واعدة قسورة ما تحجي
تركناهُم على راحتهُم وكلنا ثقة خالو وكليم يحلونها
مر اليوم بهدوء لليل اجوا بهتت والدموع
تجمعت بعيوني مَن شفته بأيده كانونه
دخلوا خالو وضُباط للاستقبال وهوَ وجهة
اصفر ولا مَن أيد ولا رجل !!
ركضوا الولد متخبلين وبالاخص قسورة فصل
عن الدنيا گلب الاستقبال گلاب مَن خوفه
لحد ما طرده خالو وسمعنا لان قريبين
هُمام- اذا ما تسد حلگك اسده وبطريقتي اني تكفى الشر وولي عن وجهي لان حالة كليم هاي أنتَ سببها لك راااااح ينجلط وأنتَ بعدك تهوبز
- خالو !
خزرنه
هُمام- جوا يلـه عيب منا الناس
سحبني البنات مدخلاتني وبيبي تبچي
تكسر الخاطر لان بَـس كليم باقيلها صعبة
عليها
همست لدموع
- اخذي ريم ولهيها لا تشوف ابوها هيچ
دموع- تمام بَـس لا تبچين كافي
- لا تخافين عليَّ حبيبتي اني زينـه
اخذت ريم وصعدت لغرفتها
شوي وطلعوا اصدقائهُم واني ركضت
أحَس گلبي يدك ببلعومي !
شمرت نفسي حاضنته وهوَ النفس بصعوبة يسحبه
- كليم حبيبي
ما جاوبني ابتعدت وابتسملي بتعد
حاوطت وجهة
- صير زين يمه گلبي يمه
عيونه تسولف بَـس هوَ تعبان
دخل خالو هوَ والولد بَـس محد حجه شي
بيبي تمسح على راسه وتبوسه والبقية كلهُم گاعدين
محد تقرب
- كليم !
رمش بعيونه يريدني احجي
- صير زين ما عندي غيرك اني وبناتنا
هُمام- لا يا حيوانه لعد اني وين رحت !
رمشت اباوعله وهوَ هز راسه وگال
هُمام- اعرف قبلك هي حامل ببنيه
- خالووووو
هُمام- لچ زماله
- اهووو سارة حاجيي لا يضوج كليم
هُمام- غمه التغمچ أنتِ وسارة
سارة- متأكد؟
هُمام- تروحلچ فدوة رنيم
فتحت عيوني اباوع على كليم وجاوبه
لـيث- عفية زلم شواربها وهي وتتسرسح مَن كلمة
هُمام- انچب
لـيث- محاجيك اني؟ بَـس ابو المثل گالها اليّ بعبه صخل يمعمع
هوَ گال هيچ وما اشوفه غير طفر خالو
لزمه وكفخه تكفخ
والشي الوحيد الرجعني للحياة ضحكت
حبيبي ابو بناتي كليمي "ابويا الرَوحـي"
كليم- رنيمه
فزيت اباوعله وهوَ ابتسم
- زين اني باباتي
ضغطت على كف ايده
- ابقى زين دوم اني اسند نفسي عليك
هز راسه يتأملني بحُب
چانت ولا زالت نظراته هي هي ما تغيرات
نظرات الحنية والحُب الابوي قبل لا يكون
حُب بين اي زوج وزوجة
دائمًا دعيت ربي يعوضني والحمدُ لله مَن
چان كليم العوض
كلهُم مشغولين بسوالف خالو ولـيث
اخذها فُرصة وسحب ايدي طابع عليها
بوسة وبعدين حُضنها لصدره ميل راسه
وابتسم ! همسلي
-"رأيتُ الشِعرَ في عَينَيك يكتُبنِي فَصارَ الحُب
قَافِيتِي و أوَزانِي"
ضحكتله وحركت شفايفي بـ معنى
"أحُبـك"
غمض عيونه وكأنوا دا يگول "اعرف"
رجعت عيوني عليهُم وگلبي يرفرف مثل
الطير والكلام يعيد نفسه بعقلي
اعشق كليم مَن يتغزل وشرط غزل فصيح
تذكرت مَن اول مرة سواها بالمُستشفى
وصديته ما متقبلته وبوقتها كسرت گلبه !
اخذت ايده مبوستها
- ابويا الرَوحـي عوضي بدنيتي
- فداچ بنياتي ام عيون حلوة فداچ
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••
مسـرة•
دخل للبيت واشوف الحزن بعيونه
تعب عمو كليم اكل روحه خصوصًا مَن
شافه بحالته قبل شوي أيده ما يگدر
يرفعها والكانونة مشكله بأيده !
گعد حاط راسه بين ايدي
تقربت ومررت ايدي على راسه رفع راسه
عيونه حزينه ويباوع مثل الاطفال كسر خاطري
قسورة- اذا صارله شي ما أسامح نفسيّ
- حَـيصير زين
قسورة- ما ردت هيچ يصير بَـس ما گدرت اغمض عيوني وابلع الصار
- عمو ما ضايچ لان اخذت حقك عمو ضاج مَن الطريقة الاخذت بيها حقك
قسورة- ماكو غيرها يستحقونها حيوانات مثلهُم تستحق الاسوء
دفع ايدي يفرك وجهة
قسورة- سديييي الموضوع ما اريد اتذكر
نزع قميصه وشمره ونزل على الارض يلعب
شناو ! گعدت على السرير واخذني الواهس أحسب
اخر شي وصلت ١٠٠ شمر نفسه على الارض
يباوعلي مبتسم واني اصفك
- واوووو أنتَ بطل
- هههه بطلچ مسرات رَوحـي
لمعت فكرة بعقلي وحجيت بدون ما افكر
- قسورة خلي اصعد على ظهرك وسوي
- نچبي لچ
- حبببببباب لااا تكسررر واهسييي
قسورة- نسوان تالي وكت
- هاي شبيك ! نمونه هسه گول ما اگدر وهاي العضلات نفخ وفضها
قسورة- لا يا عايقة تعاي تعاي اراويچ النفخ
ضحكت متونسة ورحت تمددت على ظهره حاضنته
قسورة- شگد الرقم !
- مية
قسورة- جهد واني توني مسوي قللي
- خمسين
- بعد
- خمسيييين
قسورة- وگرص هاهيه خمسين امري لـ الله
بدأ يصعد وينزل واني مسنكره مَن الضحك
فرحانة ومتونسة وهوَ يجر النفس جر
لان تعب ، بَـس وصلت خمسين شمر نفسه
وعاط
قسورة- نزللللي يا بوية يا بوية نكسر ظهري
ضربته على ظهره ونزلت مربعة يمه
- مو ثگيله اني
- لا وين بَـس صار عندي سوفان
- موووو ثگيلللله
قسورة- شبيچ صايره مگروصه
- ما مااا
هزيته وگعد لازم ظهره وعاقچ وجهة !
يمثل هوَ موجوع وحَـيموت مَن الوجع
بَـس حتى يغثني
برطمت اباوع بعيونه ، السرسري ضحك
سحبني وتقرب بايسني
مرر أيده يحط خصلات شعره ورا أذني
ويهمس
قسورة- اموت عليچ !
غمضت وهوَ شوي شوي سحبني شايلني
بين أيدي !
مددني على السرير واعتلاني بقيت ارجف
جوا وهوَ نزل يبوسني ويشمني بقوة
قسورة- اني حبيبچ قسور !
- لا لا لااا
قسورة- إلى متى؟ مسرة تعباااااان ومحتاجچ
- ما اگدر قسور
قسورة- تگدرين خلي نجرب بَـس اروحلچ فدوة خلي عيونچ مفتوحة
جبرت نفسي بَـس أحَس رَوحـي تطلع بكُل
لمسة مني أحَس لمساته مَن جمر ! كُل لمسة
تلسعني وتحرك رَوحـي ، اريد اشرد واضم
نفسي اريد اصرخ واگله لا ما اتحمل والله
بعد ما تكمل اموت مسرة تموت
بلعت وسكتت خجلانة مَن نفسي
امنع زوجي مني لان غيره گدر يدنسني !
اتخيله هُما ما گدرت امنع نفسي مَن أنُ
اشوف شكله بشكلهُم القذر
بقيت موسعة عيوني لدرجة أحَس بأي لحظة
فص عيني يطلع ويوگع ! ابتعد مني مبتسم
حضن وجهي يحجي بحماس وفرحة
فرحة مطفية بداخلي !
- مسرتي گدرتي تتقبليني
اتقبله ! بَـس اني ما تقبلته اني ميته !
جمود ملامحي سحب فرحته وانتفض
لبس ملابسه يرجف جسمه مثل السعفة
ينتفض نفض
تقرب ساحبني بحضنه دموعه تارسه عينه
قسورة- لا مسرة لا هيچ تسوي بَـس ابقي ويايَّ حبيبتي
عيوني على گد ما بقوا مفتوحات بوسع لوقت طويل
عجزت اغمضهن ! انرعب وصار يعيط حاضني لصدره
قسورة- الله ياااااخذني ميت ولا مأذيچ توبة حبيبتي توبة اتقرب والله ما اسويها بَـس حاجيني طمنيني الله يخليچ گلبيييي راح يوگف
شوي شوي حسيت جفن عيني ينغلق
والدنيا تصير ظلمه وبَـس صوت عيطته يرن بمسامعي
ما چنت افهم شنو يگول بَـس هوَ يعيط بصوت وجسمي ينخض بمحاولة منه حتى
يگعدني !!
حسيت بشي بارد يدخل وريدي ورجعت اغفى
بعد فترة ما اعرف شگد فتحت عيوني
ضايعة وخايفة دورت عيني بغُرفة المُستشفى
لحد ما وگعت عيني عليَّ مقرفض نفسه
مثل الطفل على القنفة ونايم
نزلت دموعي بتأنيب ضمير ! اخذ حقة
كزوج ودفع ثمنه بهبطة على حالتي
بقت عيني عليّ ودموعي تنزل بصمت
رفعت راسي على فتحة الباب مَن دخلت
المُمرضة
- گعدت الحلوة
اباوعله فز على صوتها باوعلي ونزل راسه
سوت شغلها وطلعت
بقينا ساكتين وهوَ ابد ما رفع راسه عليَّ
لحد ما خلص المُغذي فتحوه وطلعنا
ساعدني وما حجه والطريق كُله ذابينه صامت
- قسورة
- اشش ماكو داعي نحجي انسي الصار غلطه وما تتكرر
- اسفة !
- لا تعتذرين اني الاعتذر جبرتچ وضغطت عليچ أذيتچ وحملتچ فوك طاقتچ بَـس والله ما چان قصدي
سندت راسي على الجام ودموعي تصُب
الكسر بروحي ما يتصلح لا والله ما يتصلح !
وصلنا للبيت ، اخذت نفس عميق ونزلت
چان هدوء تعجبت اصلًا استغربت ولا وحدة
مَن خواتي ويايَّ ! درت عيوني عليّ وهوَ جاوب
- ما يعرفن بَـس خالي وهُمام شافوني مَن طلعتچ
- أحسن رنيم حامل وسارة ما ناقصها تنهبط
هز راسه ودخلنا للبيت هادئ وكأيب
ومَن هذا اليوم انبنى حاجز بيناتنا ما گدرنا نكسره
صار هوَ بجهة واني بجهة ولو نمنا كُل واحد
بينا ظهره للثاني وحتى على السُفرة راسنا على الارض
صرت كارهه للوضع بَـس ما بأيدي شي اقدمه
غير التزم الصمت مثله واسلك للموضوع
بَـس صار شي غير كُل مسار حياتنا واتجهنا
لطريق ابد ما حاسبين حسابه ولا مفكرين بيّ حتى !
ㅤㅤㅤ
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••
سـاࢪة•
قربت البلوزة مَن أنفي وشميتها
بعدتها اتأمل حجمها الصغير الحلو ونزلت دموعي !
مَن رحت ويا رنيم اشتريته بدون ما تنتبه
شگد اتمنى البسها لأبني اني وهُمام
فزيت مرعوبة وصرت احتار امسح دموعي
لو اضمها ، وهوَ وگف مصدوم يباوعلي
طفرت مَن مكاني اريد اضمها وهوَ استعجل
بخطواته وسحب ايدي بَـس بقيتها ورا ظهري
هُمام- شنو هاي؟ شو جيبي اشوف!
- شبيك هُمام شنو ما عندي خصوصية؟
هُمام- خصوصية تنزل دموعچ لا ما عندچ
سحب أيدي بقوة واخذها لاحظت ملامحة
شلون بدأت ترتخي وهوَ يباوع للبلوز
رفع عينه يتأملني ، زفر نفس بعدم ارتيـاح
سحبني حاضني وطبع بوسة على راسي
هُمام- ليش تعذبين بنفسچ
- اريد طفل هُمام
صرت اناشغ انهاريت حرفيًا وهوَ ما گال شي
غير يمسح على راسي ويشدني لحُضنه
ويطبع بوسات على شعري ويشمه بشوغه
اخذني للسرير گعد وگعدني على رجله
لزم خدودي بين ايدي وصار يمسح دموعي
هُمام- سكتي علمود اراويچ شغلة
مسحت دموعي واني اناشغ
- شنو؟
ابتسملي وسحب التلفون اباوعله دخل
على مُحادثة بالواتساب وصار ينزل هواي
بعدين استقر على صورة دخل عليها
وكبرها ، عقدت حواجبي واني اتأمل صورة
طفل صغير ما يتعدا عُمره غير كم شهر
- منو هذا؟
- بنية
- بنت منو؟
هُمام- صديقي
اخذت الصورة اتأملها وضحكت
- فدوووة هُمام تخبل !
- حبيتيها؟
- اي تجنن
هُمام- تردينها؟
بهتت ملامحي اباوعله ، شنو اريدها؟
واهلها لعد؟
رفع ايده يمسح على خدودي ويبتسم
هُمام- قبل شهرين تعرض ابوها وامها لحادث تسبب بوفاتهُم وهسه الطفلة بدار الايتام مَن يوم العرفت واني اريد اجيبها نربيها هي تعوضنا واحنه نعوضها بَـس چنت متردد مَن ناحية كلامي يجرحچ بَـس هسه وبعد ما شفتچ بهاي الحالة اني مُصر نربيها
رفعت التلفون اباوعلها ودموعي تنزل
- شنو اسمها؟
هُمام- ملاك
- ار.. اريدها هُمام عادي يعني ناخذها
- كلش عادي
- هسه هسه نروح يلـه گوم
ضحك وگرص خدي
- ركدي لچ غير لازم اجراءت وهواي امور نمشي بيها
- استعجل ها باوع نسويلها غُرفة ولازم هاي لازم نشتري اغراض الها سرير وملابس وبـ
ارجف واحجي أحَس رَوحـي صارت بهاي الطفلة
قاطعني مَن سحبني وباسني بقوة ابتعــد
يلهث ومبتسم
هُمام- باچر نطلع نجهز تدللين
حضنته وأحَس رَوحـي تفرفح مَن الفرح
هاي الطفلة حَـتعوضني عن فراغ الامومة
الدا أحَس بيّ ومتأكدة اني حَ اعوضها عن مكان امها ومستحيل أحسيها هي مو بنتي
- روح مَن هسه بلش الله يخليك حبيبي
هُمام- روح حبيبچ صار
گام يرتب ملابسه وطلعنا مَن الغُرفة
شفت دموع گاعده هي وريم يتابعن مُسلسل كارتوني
عبرناهن طالعين للحديقة وگلبي يرجف
دگاته عبرت الدگات العادية وصرت أحَس
بيّ ينبض ببلعومي مَن گد الحماس
طلع واني رجعت للبيت وتفكيري سرح للبعيد !
شوي رنيم هي وبطنها ومسرة المكتأبة
ولا عاجبتني اخر ايام هي وقسورة عبالك
قطعوا عن الحياة بشكل كامل ومحد يعرف
شنو السبب الوصلهُم لهاي الحالة وهُما متكتمين
رنيم- شبيچ؟
- شبيه؟
رنيم- بَـس حلگچ حَـينشگ على گد ما مبتسمة
غطيت وجهي وضحكت
رفعت راسي اسردلهن الصار واني اضحك
وابچي مَن الفرح حضنني تلاثتهن يبچن مَن
الفرح واني والله مَن سعادتي لو يطلبون رَوحـي
هسه انطيها بدون ما اسأل عن الـسبب
مر اسبـوع واني كل يوم اسأل عنها ويگلي
"دا امشي بالاجراءات" واسكت واگعد على نار !
البنات مسرة ودموع بلشن دوام وكليم أصر يدخلن مدرسة اهلية
وكذلك بنته وحاطلهن خط وحماية وعينه
عليهن وكُلش حذر وياهن وخصوصًا مسرة
چانت تخاف وتتحسس مَن الطلعة
قلقتني مسرة لان دا اشوف عليها اعراض حمل !
هواي تنام وتشتهي اكلات غريبة وتلعب نفسها
مَن اقل الروائح بَـس شلون وهي ما بيناتهُم
علاقة طبيعية ويا قسورة ! معقولة صار؟
وهمت نفسي أنُ ماكو شي لان هي اكيد
حَـتجي تسولفلي اذا صار وياها شي
بيوم گاعدين ومسوين عصرونه
كُل العائلة چانت موجودة مَن الچبير للصغير
دائمًا نسويها ونجتمع چانت احله فقرة بالنسبة للكُل
اباوع لـ كليم يقطع الفواكه وينطي مرة لأمه
ومرة لرنيم وام قسورة وبنته بحضنه يوكلها
حنيته تتوزع على الكُل واعنيها خصوصًا
مَن رفع الصحن الثاني الكمله وصاح
كليم- تعاي بابا دمعة اخذي هذا الچ أنتِ ومسرة
دموع تمووووت عليّ تحبه بشكل مو طبيعي
ويستاهل هذا الحُب للصراحة انسان مثله
يستاهل كُلشي حلو !
كليم- اكلوا ابني عوفوا تلفوناتكُم شحجيت اني !
ايهم- صار بوية
لـيث- يابه اغار والكعبةةةة وكلني بأيدك ما اكل وحدي شنو حاط ريم ورنيم وتوكلهن وانيييي
قسورة- ووجعي ادري طفل ويوكلك !
لـيث- تغار مني معليك
قسورة- نچب
كليم- عوفوا تعال حبيبي
مد لسانه لـ قسورة وراح تمدد حاط راسه
على رجل كليم وفعلًا وكله ! ويمسح على
راسه ويسولف ويا على الدراسة لان السنة
سنة تخرجه !
هُمام- صافنه !
- حلو حُب كليم الهُم رُغم فرق العمر قليل
هُمام- صح بَـس هوَ رباهُم وتعب عليهُم ولد هذول مو ولد اخته
- ملاحظة هذا الشي
هُمام- ايهم ولـيث ما يصيحوله غير يابه لو بوية نادرًا ما يگلوله خالي
- بَـس قسورة
- اي يستحي منه
ابتسمت اتأملهُم وفزيت لازمه ايد هُمام
مَن صار عياط بره الباب
صوت شخص قوي يتجادل ويا الحماية
الحطهُم كليم بالجديد على البوابة !!
كلها ركضت تفهم شنو السالفة واولهُم كليم
اليّ اول ما فتح الباب عاط
- شكووووووو !
صار هدوء وما هي إلا لحظات واشوف قسورة
عبرهم وركض طلعنا نباوع خايفين
فتحت عيوني مَن شفته نايم على جُنيد
وضربه بوكس قوي
سحبه هُمام دافعة وكليم واگف يتفرج بهدوء
جُنيد گعد على حيله يمسح الدم مَن حلگه
وعيونه مغورگه يباوع على كليم
نظرتله بحقد وشماته ، هذا الكلب تجرأ وضرب خواتي
اي شي يصير بيّ قليل
جُنيد- خالي !
كليم- شعندك هنا؟
جُنيد- بَـس احجي ويـاك ابوس أيدك
كليم- ما عندي حجي ويـاك واذا اشوفك قريب مَن بيتي بنفسي اكسر رجليك سامع ! دخلوا يلـه
دخلنا وصار هوَ اخر واحد ، ركض حضن
كليم مَن ورا يبچي مثل الطفل ويبوس
بكتفه
جُنيد- الله عليك لا تعوفني وحدي كلكُم عفتوني هذا ايهم صديق عُمري ما باوع بوجهي وحتى المكتب تركه خالي ابوس رجلك تنطيني فرصة والله ما عندي غيرك ومن يوم الزعلت والدنيا سوده بعيني
دفعه كليم عاقد حواجبه وسد الباب لان
صرنا فرجه لأمة مُحمد
كليم- واني مَن يوم العرفت بيك ماد ايدك على مرتي وبنية بحسبة بنتي وأنتَ ما تعنيني شي الفرصة اليّ تحجي عنها يا ابن اختي اني انطيتك اضعافها مَن يوم العرفت بيك حاط عينك على مرتي وگلت هسه ينعدل باچر ينسى وقبلت تدخلت بيتي بَـس بنفسك وبسوايتك الاخيرة قطعت أي صلة رحم تجمعنا سوا
نزل ماخذ ايد كليم يبوس بيها
جُنيد- عاقبني كلشي اقبل أي عقاب اقبل بيّ بَـس لا تعوفني والله ضايع بدونك خالي حبيبي اعرفك حنين لييييش تقسى ويايَّ ليشش اعتبرني واحد من ولد خالتي نجلاء وغلطت عاقبني مثل ما تعاقبهُم
دار وجهة كليم رافض يباوعله واعرف بيّ
حن اله لذلك ما باوعله خاف يلين ويسامح
جُنيد- ابوس ايدك حاجيني خالي لا تكسر بخاطرييي
كليم- روح منا ، هُمام تعال طلعه
حضن كليم رافض يعوفه شگد حاقده عليّ
بَـس انكسر خاطري يبچي ويناشغ مثل الطفل وهُمام يريد يسحبه ماكو
هُمام- كافي بويه شنو صغير وتبچي هيچ
جُنيد- عوفني هُمام عوفني ما اروح والله
كليم- جُنيددددد
جُنيد- لا تصير قاسي انطينييي فرصة والله اتغير والقرآن اتغير واصلح نفسي
دفعه
كليم- عسى ما تعيش بجهنم وترافق الشياطين ما عاد يهمني
هُمام- كافي خيي
گعد على ركباته يبچي
رنيم ترجف واگفه بعيد وتبچي حتى ايهم
چانت نظراته حنينة اتجاهة وما گدر يتحمل
تقرب يريد يگومه وجُنيد حضنه يناشغ
جُنيد- گله يسامحني ايهم گله
ايهم- ميخالف بَـس گوم حبيبي
جُنيد- ليش عفتوني وحدي
كليم- اخذه طلعه برا بيتي خلي يكمل مسرحيته
گام يرجف ويمسح بدموعه
جُنيد- لو ايهم غلطان غلطتي تعاقبه هيچ
كليم- ما يغلط لان تربيتي
جُنيد- امي چانت تسولفلي عنك دائمًا وتگلي ماكو مثل گلب خالك كليم وحنيته بَـس هسه دا اشوف العكس ويمكن لان اني يمكن لان ما حبيتني وكرهتني لان نافستك على رنيم
كليم- اسمها لا تنطقه على لسانك لا اقطعه
جُنيد- ورحمة ابوي جوا التراب ما مفكر بيها بَـس كثرت بالشرب وتصرفت هيچ
كليم- وهذا سبب يخليني ما اطيقك
جُنيد- اول مرة ! علمني احتويني لا تدفعني بعيد عنكُم
ايهم- خالي !
كليم- لا تدخل واذا تريد تصف ويا اخذه وامشي اطلع برا
نزل راسه ايهم ساكت وجُنيد مَن سيء إلى اسوء
نزل راسه هوَ الثاني وبَـس دموعه تنزل
يشهك مثل الطفل ويمسح دموعة بين دقيقة
والثانية ، اخر شي رفع راسه عيونه خابطه
جُنيد- ابوس ايدك لا تكسرني !
كليم- اطلع برا
باوع على ايهم
جُنيد- ترجع للمكتب؟
وقبل لا يجاوبه نتر كليم
كليم- لا واذا فكر يرجع لا يدخل بيتي
جُنيد- المكتب دا يخسر خالي اني احتاج وجود ايهم ويايَّ ما دا الحك
كليم- مَن سوء اعمالك تحمل
ذب نفس بـ استسلام ودار وطلع
هُمام- صددددك تحجي ما تشوف حالته دخيل رب قساوتك يا اخي
كليم- خلي يتربى
ايهم دخل للبيت مزعوج والمه تطشرت
هُمام چان مقرر يبلغهُم علمود الطفلة وبعد الصار سكت
ثاني يوم گاعدين بالليل ونخبص تلفون هُمام
اخذه وطلع ما اهتميت للصراحة اعرف شغله
بَـس مَن صار صوت صريخ ركضت ايدي
على گلبي وما اشوف غير زلمنه كلها طلعت تركض كلمن بسيارته
باوعت على ام كليم وعمة نجلاء منتهيات
ورنيم ما تقل عنهن بشي !
تقربت حاضنتها اريد افهم وهي تبچي وترجف
مسرة وگفت قريب مني تمسح على أيد
رنيم وجاوبت تساؤلات عيوني
مسرة- مغتالين جُنيد
فتحت عيوني ولطمت على صدري
- عزااااا وهسه شلونه؟
مسرة- ما اعرف بَـس حسب ما فهمت مَن كلامهُم قبل شوي بسبب قضية چانت داتوصله تهديدات وهوَ لان ما عنده احد بقى ساكت
- امس گال "لا تعوفوني وحدي" چان يقصد هذا الشي ! لو كليم محتوي بوقتها اتوقع چان حجه
رنيم- كليم يموت اذا صار شي لـ جُنيد حَـيبقى يلوم نفسه طول العمر
- لا ان شاء الله ماكو شي
گعدنا على نار ومسرة خابرت قسورة
وصدمنا مَن گال طاعنينه بالسچين تلث طعنات
وحدة ببطنه ووحدة بظهره ووحدة بخاصرته
والحمد لله چانت بعيده عن كليته وما تضررت
بقوا ويا بالمستشفى محد عافه
وبعد اسبوع خرجوا وكليم جابهُم هنا
رحبنا بيهُم وتحمدنا اله بالسلامة وهز راسه ڪ اجابة وبقى ساكت
خواته حَـيموتن عليّ ورغم حالته بقى حاضنهن وساكت
امه بالضيم تبچي بدل الدموع دم مَن القهر
استقروا بالغرف الجوا وجُنيد بالاستقبال
الولد كلها يمه
رحت اريد ابلغ هُمام يجيب غدا جاهز افضل
بَـس جذبني كلامهُم ويا جُنيد
كليم- مَن اجيت ليش ما گتلي؟
جُنيد- چنت راح تساعدني بَـس تفكير اني اجيتك مصلحة مو لان احبك فعلًا
هُمام- وتبقى ساكت خايف على تفكير كليم؟ لو صايرلك شي؟ لو داخلين على امك وخواتك ومأذينهن؟
جُنيد- ما فكرت ما چنت افكر
كليم- تبقون هنا منا لمن احل الموضوع
جُنيد- سامحتني؟
صار هدوء لفترة طويلة يلـه جاوب
كليم- ضربت عزيزة گلبي جُنيد
جُنيد- اسف بَـس والقرآن مو بوعيي
كليم- مَن تسامحك هي اني اسامحك
فزيت على فتحة الباب ، خزرني وسد الباب ورا
هُمام- شموگفچ هنا؟
- لا تعيط ابو النسوان
- راح اكفخچ شتردين
- روح جيب غدا للكُل
هز ايده وطلع ولا ساعة ولا ساعتين فشلني !
نتصل وماكو قلقنا وكليم بقى يلوب الرجال
ما يعرف منين يتلگاها والمشكلة اتصل على
المركز وبلغوا هُمام اليوم ما وصل نهائيًا
ركضت على صوت الباب
اباوعله نزل وافتر للباب الثاني وگف عقلي
مَن نزل شايل طفلة ملفوفة بلحاف وردي
تقدم عليَّ بسُرعة تجمعت الدموع بعيوني
رافضة اصدك هاي القطعة الحلوة بنتي حَـتصير !!
اخذتها وهي تناغي وتحرك ايديها بعشوائية
فصلت عن العالم وبقيت ما اشوف غيرها
هي وحركاتها الاخذت عقلي وگلبي
اخذت اصبعي وقربته مَن حلگها ترضع بيّ
فزيت وشهگت بلوعة ارجف رفعت عيني
لـ هُمام الچانت عيونه خابطه
- جوعانه شوف هُمام
هُمام- جنطتها بالسيارة واكلها موجود
- جيبها الله يخليك
ما صرت اشوف بعيني غيرها دخلت للبيت
وأحَس عيون الكُل عليَّ ، ما اهتميت
هُمام هوَ جاب الممية والحليب وسوالها
وانطانياها ارضعها
اباوعلها ترضع وتغفي لحد ما سبلت ايديها
ونامت بحضني
تقرب هُمام حاضن اكتافي
- گومي نوميها جوه حبيبتي
- خليها بحضني
هُمام- تقلقين راحتها نوميها جوه
گمت حطيتها وبقيت حاطه ايدي جوا خدي
واتأملها رفضت اطلع يمهم رفضت اكُل
اريد اتأملها وبَـس !
ㅤㅤㅤ
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••
مسـࢪة•
منظر سارة ويا الطفلة خلاني انهار وادخل
بنوبة بُكاء حادة
مو بَـس اني الكُل بچه بَـس ما انتبهت لان
چانت مركزة بالطفلة بشكل مو طبيعي بحيث
فصلت عن العالم وما بقى غيرها هي وياها
حسيت بشخص يطبطب على كتفي
باوعتله چان متردد ومَن شاف نظراتي اله
بسُرعة بعد ايده ونزل راسه
قسورة- لا تبچين
- خطية سارة
- رب العالمين عوضها الحمدُ لله
گالها ودار يريد يروح وبعدين رجع باوعلي
تحسر وكمل طريقة راجع للبيت
دخلت ورا وهوَ كالعادة دخل للغرفة واخذ
زاوية المكتب يقرأ كتاب !
گعدت على السرير اهز برجلي بعشوائية
قسورة- رجلچ
وگفت عن هزها
- هـاا
قسورة- رجلچ تشتت انتباهي لا تهزينها
سكتت وهوَ سكت ، فجأة حسيت بغثياني
المُعتاد ركض للحمام استفرغ كُلشي ماكلته
حسيت بأيده تمسح على ظهري وهوَ يگول
قسورة- وبعدين ويا هذا الوضع؟
- ما بيَّ شي
- كل يوم على هذا الوضع وما بيچ شي ! مسرة لا تخبليني رايح احجز والعصر نروح وكلام ثاني مااا اريد
عافني وطلع اعصابه ترجف ، گمت غسلت
ورجعت لفراشي متمدده وما حسيت على نفسي غير نايمه نومة تخبل
قطعها قسورة مَن هزني على كيف وگال
- بعد ساعة الموعد يلـه گعدي
گمت متكسره غسلت بالحمام وطلعت لگيته
مجهز ملابسي وهوَ مبدل بدون ما اناقش
اخذتهُم ولبستهُم وگفت گدام المرايا الف حجابي
وهوَ ورايا يمشط شواربه ويرتب قميصه
اخذ العطر حطله وبعدين باوعلي
قسورة- حطيت الملابسچ اني تردين بعد !
- حطلي
تقرب حطلي وراح يلبس حذائه
طلعنا مَن البيت بعد ما بلغ عمو كليم
مَن وصلنا اختنگت مَن شفت كمية الناس
باوعتله مدمعة
قسورة- شبيچ؟
- هواي ناس اخاف
- اني يمچ ما اطلع
ارتاحيت بعد كلامه واشوف المُراجعت وحدة تدخل والخ تطلع لحد ما وصل دوري
تخبلت مَن عرفتهما يدخل ويايَّ بنُص العيادة
دگيت رجل اذا ما يدخل ما ادخل ابچي رافضه
هوَ ارتباك مَن الانظار الصارت علينا ومَن
وضعي التهستر !
طلعت الدكتورة تستفسر
- شدا يصير هنا؟
جاوبته السكرتيرة
- المريضة رافضة تدخل بدون زوجها
باوعت على شكلي وشلون ابچي وابتسمت
- ماكو مشكلة تفضل استاذ رافق زوجتك
چلبت بأيده وهوَ مسايرني
دخلنا سألت كم سؤال وطلبت كم تحليل
طلعنا سويناهن ورجعنا الها وجهة استبشر
وبدون ما تگول شي طلبت مني انام على
السرير الموجود بالغرفة
شوي وجمدت اعضائي ويا ضربات قوية
مَن الجهاز
عيوني تجمعت بيهن الدموع وهي تگول
الدكتورة- هاي ضربات قلب طفلكُم الصار عمره شهر واسبوع
رفعت عيني على ملامح وجهة قسورة
المحتله عليهن الصدمة
ما گدر ينطق بَـس رجفة ايده وضحت كُلشي
طلعنا مصدومين مَن العيادة
چان كُل توقعي اكو مشكلة بمُعدتي او جرثومة
مسببتلي هذا النحول والقيء !!
رجعنا ودخلنا لـ بيتنا هوَ راح للمكتب اعرفه
شارد وباله مو ويا الكتاب بَـس ما يريد يحجي
وهذا الوضع چان مُمتاز لان اني همات ما اعرف
شنو احجي واستغلت الموضوع ورحت حطيت
راسي على المخدة ونمت بسُرعة
فزيت بعد وقت طويل واول مشهد صادفني قسورة وهوَ ساجد على سُجادة الصلاة
وبَـس اكتافه تهتز بالبُكاء
منظره بهاي الحالة نزل دموعي
چنت اظن وحدي اعاني بَـس قسورة چان
يعاني اضعاف مُعاناتي
رفع راسه وعيونه صارت بعيوني
سحب السبحة وصار يسبح وراسه نازل
واكتافه گد ما تعبان نازلات
گمت مَن مكاني وگعدت مقابيله توقفت
ايده عن سحب الخرزات وعقد حواجبه
مستغرب حركتي !
ما ترددت وبكامل أرادتي تقربت حاضنته
بقوة اشد على جسمه
لحظات طالت لدقائق يلـه حَـست بأيدي
تلتف حول جسمي وتحتويني
بقينا هيچ لحد ما صار ضوء الفجر يطل
ويدخل مَن الشبابيك لغُرفتنا
ابتعدت وهوَ گام لف سُجادته وسفطها مرجعها لمكانها
بقيت بمكاني اتبع خطواته لحد ما دار يباوعلي
فتحلي أيدي وبدون تردُد دخلته حُضنه
قسورة- اريد فرصة لعلاقتنا مو علمودي علمود هذا الطفل اليّ ببطنچ ما اريده يجي للدنيا ويشوف امه وابو كل واحد بجهة وتتأزم نفسيته بسبب توتر علاقتنا
بعدني محاوط خدودي
قسورة- اخذيها مني كلمة رجال ما اريد منچ اي حق زوجي غير بالليل تحطين راسچ على صدري هاي عندي تسوا الدنيا وما بيها
- اني احبك
- اعرف واني اموت عليچ
سحبني حاضني ومن هاي اللحظة بدأت
علاقتنا تتطور للأحسن صح قسورة رافض
يتقربلي وانيما مستعدة لهاي العلاقة
بَـس مثل ما گال بنهاية كُل يوم احط راسي
على صدره وانام نومة عميقة خالية مَن أي
كوابيس !
ㅤㅤㅤ
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••
رنيـم•
بعد عدة شهور !!
وجع وجع هذا كُلشي دا أحَس بيّ مو هامني السرعة الدا يسوق بيها كليم
كُلشي اريده هسه وبهاي اللحظة اخلص
مَن هذا الوجع
اضغط على ايد سارة واعيط
- حَـموووووووت كليممممم
كليم- وصلنا بابا بنياتي الحلوة وصلنا
- تعبتتت فدوووة بابا دا اتوججججع
صف السيارة ونزل شايلني يرجف يرجف
مَن الخوف اخذوني منه
ومُباشرةً دخلوني لصالة الولادة وهنا بلشت
مرحلة جديدة مَن الوجع
شفت الموت بعيني صار بيني وبين الموت
شعره لخد ما فزز رَوحـي صوت صرخات
طفلة !
شفته وابتسمت
- بنتي هاي بنتي
بعدها ما حسيت شي غير اروح لغير عالم
فزيت بعد مُدة على منظر لطيف ويفتح النفس
اباوعله شايلها بين ايدي ودافن راسه برقبتها
كليم- بنيتي اروح فدوة لعيونچ الحلوة امي أنتِ يا حلوة شنو هالريحة الطيبة
ابتسمت على كلامه ، بعد راسه يتأملها
كليم- رُقيتي باباتي ريحة الجنة
دار عيونه عليَّ وضحك
كليم- الحمدُ لله على سلامتچ نظر عيني
تقرب طُبع بوسة على راسي وخله
"رُقية" بحُضني ! بستها وشميت ريحتها
الطيبة ، وهوَ گعد قريب مني
رفع ايدي وصار يبوسها ويشمها
كليم- أم بناتي طفلتي الصغير
- بعد تكتفي بيهُم ما اجيب اجيت اموت
كليم- نكتفي ولا يهمچ عزيزتي بَـس لا تجيبين سيرة الموت !
رجعة اشم ريحتها
- ريحتهاا تمووووت
ضحك ونزل جسمه ساند راسه على راسي
تقرب بايس شفايفي بحُب ورقة شمني
بقوة وهوَ يبتعد
ضحكت عيونه قبل شفايفه وهوَ يگول
كليم- بدأت رحلة عشق جديد يا صغيرة
وهنا نگدر نسد بابنا ونگول الحمدُ لله الذي انعم علينا بنعمهِ ولم يحرمنا منها
مسرة رب العالمين انعم عليها بـ "علي الدُر"
الملأ حياتها وحياة قسورة والطفل اغلب
وقته عند عمة نجلاء لان مسرة تدرس
والحمدُ لله نجحت هي ودموع للصف الثاني متوسط
سارة يا سارة عندها ملاك لا تصعد ولا تنزل
خالو يحترك حرك لان اغلب وقتها الها
وهوَ يريدها وهي تريد ملاك وهاي حياتهُم
مثل الفار والبزون
وملاك اسم على مُسمى بَـس واحد يباوعلها
يحبها لا أراديًا
ايهم خطب دموع بَـس سارة رفضت وكليم رفض
وبلغه اول ما تنجح مَن السادس يخطبها اله وبعد تخرجها يتزوجون بَـس هسه لا
بعدها صغيرة
جُنيد خطب مَن فترة والله يوفقه بحياته
كُلنا حياتنا ماشيه حلوة الحمدُ لله ومرتاحين
خسرنا هواي شغلات بَـس رب العالمين عوضنا
عنها بهواي اشياء ثانية
♕♕
ختامها مسّك 🥺🤎🤎🤎🤎✨✨
بالنهاية احبكُم بگد رحمة الله
وشكر خاص لكُل بنوته دعمتني وكان الها
لمسة مُميزة بهاي الرواية
لولا وجودكُم ما وصلت اليوم الرواية
١٠٠ الف قراءة
قليلة للبعض هواااي بالنسبة اليَّ
القادم افضل ان شاء الله 🫂
تعالوا للتلي اكو مفاجأة ضغيرونه مُمكن اليوم او باچر نسولف بيها
zainab_salah0
بالنهاية كلمة بحق الرواية 🤎
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!