بقلمي : زينب صلـاح 🧡
لـ روايـة ﴿ دروب الإندِثار ﴾
في الـ part 46 ♡♡
لا تنسون التصويت + متابعة للحساب + التعليق بين الفقرات ☘️
مِن سَولفت عَن الحّزن چّنت اقصُد احتاجَك .
•••••••••••••••••••••••••••♕•
بكلنس مُرطب صرت امسح وجهة وايديها
بعد ما تأكدت هي شبعت واخذت علاجها
تباوعلي وبعيونها كسرة بَـس ما گدرت إلا
ابقى على موقفي اتجاهة
چانت حَـتروح مَن ايدي وتدمرني نستني
وفكرت بَـس بنفسها ما فكرة شحَـيصير
بسارة مَن بعدها
- اطلعج بالحديقة تشمين هوى؟!
مسرة- وحدي؟
- لا نسوي عصرونيه ونگعُد اني والبنات
هزت راسها موافقة لبستها زين وشلتها
مگعدتها على الكُرسي ، صح ينكسر ظهري
مَن اشيلها بَـس فدوة الها اهم شي صحتها
تصير احسن!
بقيتها بالغرفة وطلعت يم دموع ورنيم
- هدن الوضع ويا مسرة وبالاخص أنتِ رنيم
رنيم- تمام
- جهزن الحديقة خلي نگعد نتونس وصيحن عمة نجلاء وبيبي
دموع- اني رايحه ابلغهُم
باوعت بطرف عيني عليها وهزيت ايدي
ضحكت رنيم وحجت
- ايهم ولا غيره واهم شي تبقى يمنا وگدام عينه
- بعدها صغيرة
رنيم- وايهم اكثر شخص ماخذ حذره مَن عُمرها ودا يتصرف على هذا الاساس
- ما اعيد غلطتي بيچ أنتِ ومسرة ويا دمعتي ما ازوجها لحد ما اشوفها خريجة
- ان شاء الله السنة يكملن سوا كليم دا يسوي الاجراءات
رجعت لـ مسرة الچانت گاعده بمكانها وشارده
اعتكفت على نفسها بشكل مو طبيعي بعد
الحادث ، اخذتها للحديقة ولگيت عمة ودموع
يرتبن ورنيم گاعده يم الحجية وبحُضنها
ريم التسولف وياها وتطلق ضحكات طفولية
تنعش الاجواء الكأيبة الاحنه بيها !!
تقربت عمة مبوسة مسرة
نجلاء- توا نور المكان بعد رَوحـي
اكتفت بـ ابتسامة باهته كرد! وعمة استقبلت
الموضوع برحابة صدر وگعدت تقطع
فواكهة بالصحن ودموع تقطع الكيك
ورنيم توزع علينا العصير
طبعًا مو هي لا تنطي لـ ريم وتجينه مثل
البطريق تگول
- تفضل
گرصت خدها
- اروح فدوة للمؤدب رمرم
غطت وجهة بخجل وركضت خانسة بحُضن رنيم
مسرة- ما احب التُفاح عمة
نجلاء- اشش ولا حرف زين لصحتچ
اخذت القطعة مَن ايد عمة بقلة حيلة واكلتها
رفعت عيني متفاجأة مَن شفت قسورة
چان شايل "أقمر"ومتوجه علينا وبكل هدوء
گعد على الارض يم رجليها
قسورة- أقمر مشتاقلچ!
تباوعله وتباوع على "أقمر"
كُلنا بحالة صدمة لان قسورة حيل يتجنب
مسرة والمكان الگاعده بيّ مسرة علمود لا
هي تجرحه بتصرف ولا هوَ ينقهر بسبب
حالتها التمر بيها
قسورة- تاخذينه؟
تحسر يتأملها مَن مدت ايدها على "أقمر"
وحركتها بلُطف على راسها
ضحكنا مَن اطلق مواء يجنن ونظراته على
مسرة كأنو يگلها اخذيني وفعلًا مدت ايديها
واحذته باسته تمسح على جسمه بحُب
قسورة يتأملها بَـس مو گادر يخفي حزنه
وكسره
الصار غيره ١٨٠ درجة بحيث احنه أهله ما
نعرفه صرنا گد ما تغير
قسورة- يصير نحجي على انفراد؟
باوعتلنا ودمعتها بطرف عينها
بسُرعة فهم وأشرلها على مكان شوي بعيد
عنه وگال
قسورة- هنا قريب ما نبتعد!
مسرة- تمام
گام مَن مكان وحرك كرسيها مبتعدين
نجلاء- الله يهديهُم ويحنن گلبها على قسورة
كُلنا گلنا "امين"
بقت عيني عليهُم هوَ يحجي وهي بَـس
منزله راسها وتمسح على "أقمر" بدون ما
تنطق حرف واحد
لحد ما اعرف شنو گاللها لدرجة رفعت راسها بفزه وصار تنفسها سريع
گعد گدامها مقرفص ولزم ايدها ورفض
تسحبها ومن حركة شفايفه عرفته همسلها
"احبچ"
هُمام- ان شاء الله جمعة خير
بعدت انظاري عنهُم على صوته
كليم بصفه تقدموا ماخذيلهُم مكان يمنا
كليم- شصاير؟
رنيم- دا يحجون او بالأحرى قسورة دا يحجي وهي ساكته
كليم- هذا هم شيء افضل مَن اللا شيء
هُمام- لا ترطن فصحى لك
كليم- غير لو اعرف شبيك مغثوث مني
هُمام- نچب
اباوعله فعلًا زعلان هز ايده كليم وضربه
على كتفه
كليم- يرحولك فدوة بَـس لا تغار
هُمام- ما اغاار لا تسفط بكيفك اهووو وخر
دفعه ضايج
رنيم- شبي خالو؟
كليم- جماعتي عزموني والافندي ضاج لان قبلت اروح
فتحت عيوني اباوعله مصدومة وهوَ عادي
عنده يباوعلنا بطرف عينه
غير مكانه وراح يتغزل بالحجية وهي تغطي
وجهة بشيلتها وتضحك خجلانه
كليم- سرسري
- اتفق وياك وبقوة
ضحك ومسح على راسه رافع عينه على
قسورة ومسرة الرجعوا گاعدين يمنا بَـس
خلقتهُم مگلوبه
كليم- ها خير؟
قسورة- تعبت
گام مبتعد وكليم لحگه
هُمام- شصاير بابا سولفي
مسرة- اني اخاف اطلع بَـس هوَ ما دا يفهم
هُمام- وين تطلعين؟
مسرة- د دكتورة نفسيــة
- اي ووين المُشكلة؟ اكثر شي تحتاجينه حاليًا هوَ مُعالجة نفسية وبخصوص طلعتچ بَـس لا ناويه تدفنين نفسچ بين اربع حيطان
مسرة- اخاف!
- اني بصعوبة قنعت قسورة واذا بقيتي رافضة صدگيني لا اني سارة ولا اعرفچ
مسرة- أنتِ گلتيله !!!
- اي عندج اعتراض؟ مسرة كُلشي اسوي فهوَ لمصلحتچ لا تبقين رافضة ومعتكفة
ساعدينه نساعدچ فدوة اروحلچ امي أنتِ
رنيم- الصار صعب بَـس قسورة مو ذنبه تعذبين بيّ خطية ما دا تشوفينه شصاير بيّ؟
هُمام- كلام خواتچ عين العقل وبخصوص أنتِ تخافين فـ مو مشكلة اني وكليم بنفسنا ناخذچ ونرجعچ بكل جلساتچ
نجلاء- وافقي ماما ساعدي نفسچ وساعدي زوجج والله انمرد مرد على حالتكُم
بقت بحالة هدوء وبدون جواب همست
مسرة- اخذيني لغُرفتي دموع
گامت دموع ماخذتها للبيت عرفتها تريد
تفكر وهذا تطور بالنسبة اليَّ
ㅤㅤㅤ
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••
رنيـم•
غمضت عيوني ولأول مرة بعلاقتنا
أحَس بهذا الشعور المو حلو
كليم انسان رومانسي وحنين دائمًا يحسسني بأنوثتي
ولا مرة حسيت غير أنُ اني أُنثى رقيقة
برقة الفراشة تحت ظله
بَـس هالمرة غير !!
دفعته دايره وجهي للجهة الثانية وبين
بـ معاني وجهي كمية انزعاجي
خصوصًا بعد ما رجع ينثر قُبلاته على طول
رقبتي ويهمس
كليم- شبيها جوهرتي
دفعته وحاولت اكون الطف
- وخر حباب
وفعلًا ابتعد واني لفيت جسمي بالملائه
عقدت حواجبي وكشولت وجهي
وللأسف انتبه ورفع حواجبه متعجب !!!
كليم- شبيچ؟
درت وجهي اريد اگوم
- ما بيّ شي
سحبني ولأول مرة يخزرني بهذا الغضب
كليم- طفل گدامچ؟ نطقي شبيچ مو طبيعية هاي الفترة!
- گلت ما بيّ شي ليش تلح؟
- حلو بعد معاني القرف اليّ بوجهچ صار اكو تجاوز!!
سحبني اكثر مخنزر بوجهي واني منا قرفانه
واجتني منه ريحة مو طيبة رجعت اكشول
وجهي وادفعه
- فدوة بَـس ابتعد شوي
كليم- لچ شبيييييچ؟!!
عطت بضوجه
- ريحتك مو طيبةةة وخررر
ترك ايدي عاقد حواجبه وصار يشم بنفسه
كليم- يا ريحة؟ شبيچ رنيم تخبلتي ما بيّ شي
- والله اكووو
گام يستغفر واخذ ملابسه ودخل للحمام
حضنت وجهي ابچي ، اعرف كسرت خاطره
بَـس والله اكو ريحة اني اعرفه نظيف وعن
بُعد مية متر تشمون عطر النظافة منه بَـس
هاي الفترة لعبانه نفسي حيل ودا اشم ريحة مو حلوة
وما دا اتقبله ولا اتقبل العلاقة التجمعنه
طلع بعد فترة باوعلي وغلس
رحت اني سبحت وطلعت وهوَ متمدد على
السرير يتصفح بالتلفون وهالمرة ما صاحلي
يسرح شعري يعني زعلان مني!
سويت كُلشي بنفسي رُغم الخمول وانعدام الشغف
العندي هاي الفترة
رجعت اتمدد بمكاني وجمدت مَن لفحتني
نفس الريحة
رفع عينه عليَّ وعقد حواجبه واني دمعت
عيوني
كليم- خير؟ عندج وجع؟
- هاا لـ لا
- شبيچ بابا؟
بچيت مغطيه وجهي وهوَ انتفض ساحبني
يريد يحضني وما اعرف شلون طلع مني
الكلام رُغم ما ردت هذا الشي
- لا فدوة وخر ريحتك تلعب النفس
صار هدوء ، رفعت راسي كاتمه نفسي
هوَ صافن يتدارك كلماتي
گام ساحب مخدته واخذ غطى مَن الكنتور
وطلع !! بقيت الليل كُله گاعده اطحن بروحي
للفجر طلعت لگيته يصلي بالصالة
گعدت على الكرويته انتظره يخلص
لان كليم مَن النوع اليّ هواية يتأخر بالصلاة
لا يبقى دُعاء لا شي ما يسوي
غمضت عيوني حاسه بطمئنينة
مَن رفع ايده بنية الدُعاء ولمع محبسة
بالظلام ووصلني صوته العذب
"اللهم إني أعوذ بك من الهمِّ والحزن، وعرفنا معنى الهمِّ والحزن، وما ذكره أهلُ العلم في ذلك؛ من قول بعضهم: بأنَّ الحزنَ هو الغمّ على الفائت، وبعضهم يقول: الحزن هو غمٌّ على ما فات، والحزن يُقابل السُّرور والفرح، تقول: فلانٌ حزينٌ، بصرف النَّظر عن كون ذلك يتَّصل بأمرٍ مضى، أو لا يتَّصل به، والفرق بينهما عرفناه"
بَـس خلص فتحت عيوني وهوَ مسح
وجهة
باوعلي ولچم گلبي مَن شفت الحزن بعيونه
واني سبب هذا الحزن مع الاسف
گمت مَن مكاني متوجهة اله
تمددت سانده راسي على رجله واباوعله
حاضنه بطني "بذرة حُبنا"
- اعرفك نظيف وريحتك طيبة بَـس اني ما اعرف شصايرلي!!
مد ايده وسحب المسبحة واسمعه يردد
متجاهل كلامي
كليم- استغفر الله استغفر الله..
- ما ترمم شي بَـس اني اسفة
كليم- گومي اخذي راحتچ ونامي
- والله ما اقصد
- ميخالف تگدرين تاخذين راحتچ
- وأنتَ؟
كليم- بَـس اخذ كم قطعة ملابس واستقر عند بنتي ما ازعجج بعد ارتاحي
فزيت گاعده على رُكباتي
- شنو؟ كليم لاااا
- صوتچ الناس نايمة!
- الله يخليك بَـس افهمني
خزرني ولف السبحة على ايده يأشر
عليَّ بكُل غضب
كليم- مَن يوم حادثتچ أنتِ وابن علياء وما طايقة وجودي اني لا طفل ولا جاهل عن تصرُفاتچ ولا جديدة عليَّ هرمونات الحمل واعرف اتعامل وياها لان سبق وعشتها ويا امها لريم بَـس توصل بيچ المواصيل تهينيني هنا حدچ
- لا والنبي لااا بشنو دا تفكر أنتَ!!
كليم- عشت وشفت امور تشيب الراس امرچ بسيط بنتي وها اذا مقررة بعقلچ الصغير هذا لشي فـ انطيني علم واني اتصرف لا هسه ولا بعدين اجبر حرمة على مُعاشرتي
أحَس گلبي وگف
- ورحمة بابا لا ورحمته لا بَـس باوعلي
لزم ايدي العلى خده وحجه ببرود
كليم- بعدي لا تلعب نفسچ مَن ريحتي
گمت ساحبه القُرآن وحاطه ايدي عليّ
واني بقمة انهياري حجيت ارجف مَن
برود نظراته
- وعزته وجلالته وداعة كُل حرف بهذا القُرآن وعساني لا فتحت عيني على يوم جديد اذا دا اسوي هيچ لان افكر بأبن اختك بَـس والله دا اشم ريحة وما اتحمل قُربك ما دا افهم نفسيّ مَن تكون قريب اريدك بعيد ومَن تكون بعيد اريدك قريب والله احبك والقُرآن احبك ورحمة بابا احبك
حطيت القُرآن على جهة وتقدمت دافعه
نفسيّ بحُضنه ولازمته مَن ياخته
اناشغ وابچي والشهگه تطلع مني بعد ما
تفتح صدري مَن قوتها
- لا تفكر بيّ بسوء لا تحطني بنفس الكفة ويا زوجتك السابقة اني تربيتك مُستحيل افكر اخونك حتى وأن كان بتفكيري
حسيت بـ أيده تمسح على راسه
كليم- اهدي بابا خلص گومي ارتاحي
- مصدگني مو؟
- اي
ابتعدت اناشغ
- گوم نومني
حاول يبتسم ورفع ايده يعدل خصلات شعري
كليم- روحي نامي اني اريد اقرأ قُرآن شوية واطلع للشغل
بقيت صافنه بعيونه
تنهد هز راسه وبضعُف همس
كليم- گومي واني لاحگچ
ضحكت بايسه خده دفعني
كليم- مووو هنا لچ
- هههه انتظرك تعال
گمت داخله للغُرفة وهوَ فترة ودخل
سحبت شيشية العطر وهمست
- تحملني كليمي تحملني والله بسبب ابنك
هز ايده متمدد واني فرغت نُص العطر
عليّ وهوَ كاتم نفسه وساكت ومتحمل
بقيتها بـ أيدي وتمددت حاطه راسي على
صدره وتمددت مرتاحة
كليم- ان شاء الله مرتاحة ست رنيم؟
- الله اسكت اسكت خلي انام
اسمعه يستغفر بقلة حيلة
واني مُجرد وقت قليل وسحبني النوم
ما فزيت إلا على صوت طگطگه بالغُرفة
ومبين اعصاب ووجهة مطعون
- كليم !!
شمر سلاحه وبدأ ينزع ملابس الشغل
اخذ المنشفة ودخل للحمام
بدون ما يجاوب !! معقولة بعده زعلان؟
بقيت اكُل بنفسي لحد ما طلع وهمس
كليم- رنيمه ملابس بابا
ابتسمت وگمت برحابه اطلعله على ذوقي
- بيت مو؟
كليم- اي بابا
طلعتله وهوَ غير ملابسه وتعطر ترس نفسه
وفتح ايدي
ضحكت راكضه حاضنته ، طُبع بوسة على
رقبتي وابتعد يمسح على خدودي
كليم- ام جُنيد جوه هي والبنات بدلي ونزلي واي كلام تسمعينه ما اريدچ تضوجين واذا الچ حق تاخذينه مَن هالشارب
- ليش اجت؟
- علمود ابنها
- عادي تسولفلي الصار؟
كليم- جُنيد بالسجن وجايه علمود اطلعه
هزيت راسي مبتعده
كليم- شنو تردين أنتِ؟
- ما يهمني سوي التشوفه صح
نزل هوَ واني بدلت ولحگته
اسمع هوسة جوه وحتى خالو والبنات
خواتي موجودات واسمع عمة علياء
تحجي موجهة كلامها لـ ايهم
علياء- مو صاحبك هوَ ليش ساكت
ايهم- وانتهت صُحبتنا بيوم شفته ماد ايده على بنات ومتقرب وشارب الحرام اترخص اني خالي
طلع ايهم ومَن شافني واگفه ابتسملي
دخلت وصار هدوء تردد اسلم خاف تصدني!
بَـس ما حَـبيت اقلل احترامها گدام كليم
وفاجأتني مَن حصنتني هامسه
علياء- شلونچ ماما صحة طفلچ شلونه؟
- بخير عمة
علياء- مسحيها بوجهي والله فشلانه حتى اباوعلچ
لزمت ايدها مطبطبة عليها
- حبيبتي عمة وجهچ ابيض أمر مكتوب وصار لا تضوجين نفسچ
علياء- فدوة اروحلچ
البنات چانت عيونهن حُمر
لمار سلمت عادي بَـس ميار مَن ورا خشمها
وعادي طُز ما تهمني ولا فكرت بيها
گعدت يم كليم بالگوة كاتمه انفاسي بصعوبة
بَـس انكسر خاطري على عمة علياء
حيل مكسورة على ابنها ودمعتها ما
نشفت مَن خدها
ام كليم- ولك يمه ليش تزعل اختك طلع ابنها وفضها
كليم- واليرحم والديچ حجية سكتي
علياء- خوية فدوة اروحلك غلط اعرف والله واني اخلي يجي يبوس رجلك بَـس طلعه مو مال سجن
كليم- ما راح يبقى بالسجن العمر كله بَـس هسه خلي هناك يتأدب
لمار- خالو فدوة
- تعالن حبيباتي
ابتعدت شوي مسويتلهن مكان وهنَّ گعدن
وحدة على يساره ووحدة على يمينه
حاضنهن لـ صدره ويبوس براسهن وايديهن
كليم- اخوچن اذا ما يتعاقب ويگعد وحده ويفهم غلطه راح يكرره وحتى لا ندخل طريق ما منه رجعه الافضل يتعاقب هسه
ميار- اخاف يتأذه بالسجن خالو
كليم- لا تخافين ما يصيبه شي
اباوع لـ عمة ما قنعت ونزلت راسها تبچي
كليم- صدك تحجين ام جُنيد؟
علياء- ابني هذا خوية ابني وما يهونلي يبقى بالسجن كل هاي المدة
كليم- خلي يتأدب ويصير رجال عوفيني اتعامل ويا
مسحت وجهة هازه راسها
علياء- يلـه نترخص احنه امشن يمه
كليم- وين؟
علياء- ارجع لبيتي
كليم- ابقوا للعشاء ومَن تخلصون ارجعكُم
علياء- ما اشتهي خوية فدوة اروحلك لا تضغط عليَّ يلـه يمه امشن
أشر كليم على لـيث
- گوم وصل خالتك
لـيث- صار بوية
اخذها لـيث وطلع هنا تدخل خالو
هُمام- طلع الولد خلي يرجع لأهله كافي الموضوع صارله اسبوع والحمد لله رنيم والطفل ما بيهُم شي
ام كليم- اي يمه حاجي خلي يحن على اخته
نجلاء- علياء ما عندها غير ابنها شايلها هي وبيتها وبناتها خوية لا تصير قاسي
اخذ نفس وزفره
كليم- خابر الولد وطلعوا بَـس وصلوله ما اريد اشوف خلقته
عافنه صاعد فوك وصدُك خالو اتصل
وبلغهُم يطلعونه
عفتهُم متبعته ، دخلت للغرفة لگيته مدد
وحاط ايده على عيونه بدون كلام سحبت
العطر احطله وهوَ صار يتقبل الموضوع
ومتفهم وضعي لذلك بقى ساكت
تقربت طابعه بوسة على صدره
- حبيبي!
كليم- ما اريد احجي بنياتي
- اني اعرف شگد أنتَ تحب جُنيد واعرف دا تتعامل بهاي القسوة حتى تعاقبه مو لان تكرهه بالعكس مَن حُبك اله
بقى ساكت رجعت امسح على صدره واكمل
- وبرأيي جُنيد يعرف هذا الشي ومتندم
كليم- فترة اخذج ونسافر
- وين؟
- ما اعرف المُهم نبتعد شوي ونبقى وحدنا
غير الموضوع ما يريد يحجي هذا هوَ كليم
لو قفل يقفل بشكل قاطع وما يحجي بيّ
تقربت طابعة بوسة على صدره
- ابقى يمك لمن تنام او اروح
- براحتچ
عبست مَن جوابة لان بكُل مرة يجاوبني
"نوميني وروحي !!"
تنهدت بقهر ما أحب تعامله الجاف يحسسني
بشعور مو حلو
تمددت سانده راسي على صدره
- انومك واروح !
ما جاوب بكُل بساطة سكت رغُم اعرف
مَن نفسه هوَ گاعد
فترة بهذا الشعور المؤذي انتظمت انفاسه
رفعت جسمي اباوعله ونزلت دموعي ما
اعرف اني صايرة حساسة زيادة عن الزوم
لو هوَ الموقف فعلًا مؤذي وخصوصًا بعد مُعاملة
كليم الرقيقة والحذرة ويايَّ
غريب هذا الرجال شگد ما حنون هوَ قاسي!
گمت مَن مكاني مسحت دموعي وطفيت
الاضوية وطلعت
مررت ايدي على بطني المو راضية تكبر
رُغم الدكتور تگول عليچ تلث اشهر وحيل
استغربت لان لحد الان ما اعرف بنفسي حامل
رحت لبيت خالو
عقدت حواجبي واني اسمع صوت همسات
سارة الچان واضح !!
- لك ابو النسوان وخر لا يجن البنات ويشوفنه
ما سمعته يجاوبها وصار عندي فضول غبي
اعرف شدا يصير؟! مشيت بخطوات هادئة
فتحت عيوني جامدة چانوا بوضع جريء
مَن جهة الدرج حتى اخجل اشرح الوضع
ارتبكت ورجعت اريد اطلع وضربت الباب
اباوعلهُم فزوا فزة لو بغير وضع اگعد ابچي مَن الضحك
- اسفة اسفة كملوا.. اءء شدا احجي اني باي باي
عفتهُم وطلعت اركض ما راده على سارة
البقت تصيح ورايا بَـس والله خجلت اباوع
لوجهُم بعد ما شفتهُم بهذا الوضع
تسللت للحديقة الخلفية الجو حلو بداية
موسم
هرمونات الحمل متعبتني حيل
لان دا احب اتواجد ويا الكُل عدا كليم لدرجة
كليم ما چان يغار هسه احسه يموت مَن
الغيرة
اخذني الوقت گاعده بمكاني
درت وجهي اباوع على الحركة الصارت ورايَّ
ابتسمت مَن شفت قسورة وخطية هوَ مَن
شافني وگف شوي وبعدين تقدم
الظاهر مثلي دا يريد يگعد وحده ، سحب
كرسي وگعد صافن
- شلونك؟
باوعلي وقوس شفايفة بمعنى "ما اعرف"
بَـس هوَ مو زين واضح مَن عيونه الصايرات بحفرة وداير ما دايرهن سواد
- حجيت ويا مسرة؟
حمحم وجاوب
- لا منتظرها تقرر ما اريد اضغط عليها
- أنتَ ليش مبتعد عنها؟
رفع عيونه المدمعات وتنهد
قسورة- اخجل احط عيني بعينها والصار بيها بسببي
- مو أنتَ السبب يمتى تبطِل تلوم نفسك؟ مسرة حالها حال اي أُنثى مرت بتجربة سيئة جدًا تحتاج وقت ووقت حيل طويل ترمم جزء منها على الاقل بَـس بهذا الوقت هي تحتاجك أنتَ وبس
ابتسم
قسورة- خالي ودا يحجي
ضحكت مكممة حلگي
- انتقلت عدوته بَـس عليك الله مو احله عدوه؟
هز راسه يبتسم واني مُجرد كلمة ربطتني بيّ
حسيت بشعور حلو يتسلل لروحي عبالك
انعشني!
- جديات قسورة حاول تحجي ويا مسرة وتتقرب منها ما تعرف احنه ڪ نساء شنو نفكر مَن تعاملونه هيچ بعد حادثة مثل هاي
عدل گعدته مهتم
- شنو قصدچ؟
- باوع مسرة ما مشاركتني بشي مثل هذا كون مطمئن بَـس احنه نفهم شعور بعض نعرف بشنو نفكر واني لو صاير بيّ مثلها وكليم ابتعد چنت افكر هوَ لعبانه نفسه مني وما متقبلني كزوجة بعد الصار
فتح عيونه وانتفض
قسورة- لا ووليد الكعبة الشريفة ما مار براسي هيچ تفكير رنيم والحُسين الشهيد اني بَـس خجلان وتعبان واخاف نتواجه
- روح قسورة روح قبل لا تخسرها اشرحلها وحط ايدك بأيدها وطلعوا مَن هذا الابتلاء سوه والله يقدملكُم الخير بكُل خطوة
قسورة- هسه؟
- خير البر عاجلًا توكل
گام وابتعد كم خطوة ورجع يباوعلي
وبتردد تقدم بايس راسي
قسورة- الله يحفظچ لخالي ويارب تگومين بخير وسلامة أنتِ والطفل رب العالمين ما رزقني بـ اخت چنت دائمًا اتمنى اخت ادللها بَـس عوضني عنها بيچ أنتِ وسارة ودموع
ابتسمت
- هههه ترا ما اعرف ارد على الكلام الحلو خلص شكرًا روح
ابتسم وراح متجه لـ بيت سارة
ابتسمت مرتاحة واتمنى فعلًا يطلعون مَن
هاي المحنة سوا وهُما أيد بـ أيد
فزيت شاهگه مَن حسيت بشخص يحضني
مَن ورا ويدفن راسه برقبتي بَـس سكنت
رَوحـي مَن عرفته "ابويا الرَوحي" وحبيبي
لحد هاي اللحظة اني كاتبته بالتلفون بهذا اللقب
ولحد الان اكو لحظات أحسه ابويا مو زوجي
ولحد الان ازعل منه مثل زعل البنت مَن ابوها
ضرب نفسه أذني وهوَ يهمس
كليم- بكل موقف اتأكد أنتِ اكثر قرار صح اتخذته بحياتي بكل يوم اشكر ربي الزرعچ بگلبي وحببني بيچ
باوعتله بطرف عيني وبقيت ساكته
كليم- زعلانه مني يا رَوحـي
تجمعت الدموع بعيني
- احاجيك ما تحاجيني ليش بطلت تحبني
كليم- احبچ شلون ما احبچ رَوحـي مزروعة بروحچ وحق الله
- بَـس تغيرت
كليم- لان چنت معصب وما ردت اراويچ نفسي واني عصبي اريد ابقى محافظ على صورتي واني هادئ وحباب بعيونچ
- بتجاهلك؟
- غصب عني شنو اسوي وتسامحيني
- ما زعلانه اني
كليم- تگولين هيچ بَـس اني اعرف العكس
ابتسمتله
- والله ما زعلانه بَـس اريدك ترجع كليم الاعرفه
كليم- عيوني الچ
حضني وبادلته ولاحظت هوَ مغرك نفسه
بالعطر لان لفحني وچان قوي
كليم- لازم تتغذين وتاخذين علاج وتنامين
گومني وبدأت فقرتي الاعشقهاااااا صار
يعتني بيّ مثل الاطفال يوكلني ويهتم بيّ
صح اعاني مَن الريحة
بَـس هوَ تقبل الموضوع واكتشفت شغلة
بالايام وهي "غيرة كليم"
اي اي صار يغار مَن خالو يموت غيره
لان احب عطر خالو واتقبله وهوَ اشوفه
ميت لدرجة راح اشترى نفس العطر وحطه
ومن تقرب ما تقبلته خطية وجهة بهت
وخصوصًا خالو ما تاركه بحاله يغور بيّ
كليم- تراااا نفس عطر هُمام شنو الفرق؟
- أنتَ أنتَ الفرق
كليم- يمتى تولدين شلعتي گليبي والله
- بعد هواي كليم وديني لبيت سارة
خزرني
كليم- حتى تگعدين تشمشمين بـ هُمام؟
تحسرت
- الريحة تجنن
هز ايده وأشر على شيشية العطر
كليم- هذيچ نفسها رشي منها وشمي ماكو روحه
وهاي مُعاناتي صار بعد نوبة بُكاء ودلع يلـه
يقبل اروح لان يغار !!
وبنفس الوقت علمود لا اشوف خالو ويبقى
يلح عليّ ويغوره بيّ ويتعاركون
بَـس شنو ! عركة ام الخمس دقائق ورا الدقيقة
السادسة نلگاهُم يسولفون ويضحكون عادي
ㅤㅤㅤ
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••
مسـرة•
بهاي الفترة اكتشفت موهبتي المدفونة
بكل حيلي احاول اتعب نفسي واشغل عقلي
حتى لا افكر
لان التفكير بدأ ياكُل بـ عقلي والوسواس
يدمرني ويسحبني للتفكير بالانتحار
الجربته مرة وچان شعوره مو حلو وبوقتها
لأول مرة أحَس رب العالمين زعلان مني
الحياكة.. اخذت كُل وقتي اطلع على اليوتيوب
اتبع الخطوات لدرجة اضبط اي شي
اول شي حكته لفاف اسود ابتسمت بروح
ذايبة مَن التعاسة وما حسيته يلوك غير على رقبته !!
طلعته مَن جوه المخده وشميته بقوة
ترسته مَن عطره
الشي الوحيد اليّ مصبرني على هذا البُعد
ما تجرأت اقدمه مثل ما دا اتجرأ واباوع بعيونه
اني على قناعه الذنب مو بيّ ولا بيَّ بَـس
هذيچ اللحظة وشكلي گدامي بهذاك
الوضع المُقرف دا يخليني خجلانه حيل
مَن نفسي وضُعفي
رجعته بمكانه خايفه يدخل شخص للغرفة
وهوَ بأيدي
وسحبت الخيط احيك كفوف لـ سارة
حَـبيت اقدملها هيچ شي بسيط وافرحها
بنفس اللحظة سمعت الباب تنطرق
بهدوء وتردُد
عقدت حواجبي وصحت
- تعاي سارة
انفتح الباب بَـس ما چانت سارة !!
بلعت ريك وأحَس انصعقت مَن شفته يدخل
ويسد الباب ورا شتت انظري مَن گعد
على طرف السرير يلوب يريد يحجي
بَـس ما يعرف شلون يبلش وبأي طريقة
مثلي تمامًا ضايع
- مسرتي
اخذت نفس عميق وزفرته ارجف
غمضت عيوني احاول اسيطر على رجفتي
خصوصًا بعد ما تقرب مني وصرت أحَس
بنفسه يضرب رقبتي وقُربه محاوطني كُلي
- احتاجچ مسراتي قسورة دا يموت بدونچ
عضيت شفتي اقاوم شعور العجز الأحَس
بيّ وهو يطبع بوسات على خدي ورقبتي
اخ لو يعرف شسوا بيَّ ولأي ماضي رجعني
بَـس لو يعرف قُربه شنو حيى مَن مشاعر بداخلي
شهگة غرگان فلتت مني
- ابوس ايدك توخر عني
قسورة- تموتيني مَن تتخيليني مثلهُم سچين وتغرسينها بگلبي مَن تقارنين بيهُم
دفعته هازه راسي برفض
- لا تتقربلي تتعبني والله تتعبني
قسورة- ما اريد الدا تفكرين بيّ اني بَـس احتاج انام خليني انام قريب منچ تعبت مَن نفسي مسرتي ساعديني حبيبتي لا تعوفيني
حسيت بدموعي تنزل واني اشوفه بهذا
الضعُف !!
اول مرة اشوفه هيچ تعبني تعبه بَـس اني
ما دا اتقبل اعيش علاقة واعيش حياتي
عادي بعد الصار اني مو بهاي القوة مع الاسف
- قسور
فز وشفته لمعة حُب بعيونه الماكلها التعب
وهوَ يجاوبني
- فزة روحه لـ قسور
- تـ تبقي مسافة بيناتنا وما ما تلزمني ابد
قسورة- متفقين
سحبت الغطى وشلت ادوات الحياكة
اباوعله مدد عني بمسافة واني سويت مثله
صار وجهي بوجهة بلعت ريك مَن ابتسم
وذب نفسي مرتاح نوعًا ما ، غمضت عيوني
قاطعة هذا التواصل البصري الاستصعب استمر بيّ
بقيت فترة بهذا الوضع امثل النوم بَـس هوَ
بالحقيقة مجافيني ، تجرأت افتح عيوني
چان نايم بسابع حلم مديت ايدي ترجف
ومررتها بهدوء على خده وتلمست شواربه
الاحبهن
همست
- المفروض هسه احنه دا نعيش اجمل فترات حياتنا
عضيت شفتي وبچيت بصمت
- حَ ابقى ادعي عليهُم طول عُمري عسى ما تتخطاهُم كسرتي وكسرتك
سحبت ايدي وانطيته ظهري صافنه بالفراغ
حسيت بالنوم يسحبني محاوطني واني اصفن
ولأول مرة انام بهذا الشكل بشعور الامان
فتحت عيوني وشهگت فازه مَن مكاني
صفنت بيّ گاعد ويتأملني
قسورة- صباح الخير
درت وجهي للشُبـاك ، صاير الصُبح نمت
كُل هذا الوقت بدون ما تتقطع نومتي بسبب
الكوابيس عجيب !!
قسورة- مسرتي !
- ها ها ويـاك صباح النور
- أنتِ زينه؟ ضجتي مني؟
- ما تحلمت قسورة
عدل گعدته يستمعلي واني كملت
- كل يوم اتعب مَن الكوابيس ويجافيني النوم بَـس ليلة البارحة ما تحلمت
ابتسم
- هذا شي زين مو؟
ضحكت
- اي اي اول مرة انام مرتاحة هيچ
فتحت عيوني مَن تقرب فجأة وحضني لصدره
بقيت باهته بَـس استوعبت دفعته بقوة
خزرته ارجف وگمت مَن مكاني وعطت بيّ
- گتلللللك لاااا تلزمنييي لااااا تلزمنيييي تأذيننني تطلع روحيييي
يريد يسيطر عليَّ ورجعت دفعته بعدني توني
گاعده مَن النوم وفاجأني بحركته وحسيت جسمي
يون عليَّ مَن لمسته
- اطلللع براااا
قسورة- بَـس افهمچ حبيبتي اهدي
- اطللللع
دخلت سارة هي وعمو هُمام مبهوتين
بَـس شافوا قسورة انصدموا وبينت ملامح
التعجُب عليهُم
هُمام- شتسوي هنا !
فرك وجهة يرجف واني بحضن سارة دموعي تنزل
جاوب عمو وعينه عليَّ خايف
قسورة- چنت هنا امس اجيت وبقيت هنا
هُمام- أنتِ زينه بابا؟
- اي
سارة- لعد شبيچ امي فززتي گلوبنا
بچيت حاضنه نفسي
- لزمني گتله لا تلزمني ولزمني تأذيت بسببه هوَ السبب
قسورة- لا لا ما أذيتچ باوعيلي مسرة لحظة هُمام عوفني باوعيلي حبيبتي اني بَـس فرحت لان أنتِ مرتاحة وحضنتچ
- بَـس انييي حذرتك
قسورة- اسف ما تنعاد والله ما الزمچ بعد
هُمام- تعال حبيبي عوفها تهدأ
سحبه عمو هُمام برا وسارة التفتت تباوعلي
سارة- كافي امي تعبتي للرجال وتعبتي نفسچ
- تأذيت حسيت ايده مَن نار لمساته چوتني
سارة- قسورة هذا حبيبچ
- اعرف بَـس ما دا اتقبل
- لذلك لازم تبلشين أنتِ ويا تعالجون نفسكُم مَن هاي الاثار
سكتت ارجف وهي طلبت مني ابدل واطلع
هدأت يلـه گمت اغير ملابسي بَـس لاحظت
شغلة !! الفاف الحكته طالع مَن جوه المخده؟ عزا قسورة شافه يعني ياربي
غميت نفسي گلبي محترك وطلعت
شفتهُم يحجون ويا وهوَ بَـس يهز راسه
ومن دخلت سكتوا
يباوعلي وينزل راسه ، گعدت وصرت مقابيلة
- دمعة وين؟
سارة- أمس بقيت تباوع كارتون هي وريم ونامت هناك
هزيت راسي وابتسمت مَن مدلي عمو لفة
وحط كلاص الحليب والچاي گدامي
هُمام- عافيات باباتي اكلي غذي نفسچ
- شكرًا عمو
هُمام- تدلل الحلوة
سارة- هُمااااام
هُمام- ههههه لچ حيوانه تغارين مَن اختچ
سارة- قسورة اخذ مرتك بدأت تسرق املاكي
هُمام- بَـس أنتِ حلوتي ، حلوة المسيح مالتي
قسورة چان ظهره عليها بَـس اني گدامها
شفتها مَن دزتله بوسة وهوَ هز راسه متوعد الها
حضنت كلاصي بين أيديا استمد حرورته
لـ جسمي البرد
رفعت عيني مَن شفته ينزع سترته ويتقربلي
قسورة- بَـس احطها على اكتافچ لا تخافين
هزيت راسي موافقة وهوَ حطاها ورجع
گعد بمكانه
رجعت سارة گاعده وبلشنا بالريوك اني وقسورة داخلين بصمت رهيب
ونستمع لـ فصلات سارة ويا عمو هُمام
سارة- اكل اكل ابو النسوان
هُمام- هي بَـس عقيق وميار والضابط الويانا والمُحامية
سارة- نسيت اهم وحدة
هُمام- منو؟
- طليقتك الچنت متزوجها قبلي
هُمام- هاااا اي رحم الله والديچ صدك نسيتها
همس قسورة
- حقها تصيحلك ابو النسوان
هُمام- تراااا قبلهاااا قبلهااااا
سارة- ميار عقيق المُحامية الضابط مووووو قبلي
هُمام- ميار اختيارچ
- اتفق ويا عمو
سارة- وعم عامة كون التعمعم ضلوعچ الخوينسة
ضحكت ورفعت عيني الصارت بعيونه
ابتسملي وقربلي لفة
قسورة- اكلي
- شبعت
قسورة- مَن ايدي لا ترديني
اخذتها وهمست
- شُكرًا قسور
قسورة- نبض گلبه لـ قسور الف عافية هني ومري
بقت سارة تتجادل هي وعمو ومبين الوضع
متأزم بسبب وحدة جديدة "المُحامية"
لان چانت تحجي منفعله وهوَ ابرد منه ماكو
بحيث يخليها تنفجر بالزايد
احب علاقتهُم هي اعصاب وغيرة وهوَ
سبورت وبارد نوعًا ما
شگد ما تعصب يشمرلها كلمة يخليها تخرب ضحك
وتضيع السالفة وتنسى وتطير هيبة العصبية
خلصنا وانسحبوا عمو وسارة
اعرف يريدون يتركونا على انفراد
طقطقت اصابعي مرتبكة وما مرتاحة
هذا الوضع كرهته
اني ما اريد اعيش هيچ شعور ويا قسور
- قسور !
- نظر عينه
ابتسمت
- اعتذر على الصار قبل شوي
قسورة- اهم شي راحتچ اذا ترتاحين هيچ ما عندي مُشكلة
- حسيت بالامان ليلة البارحة بوجودك
دمعت عيونه بسُرعة مسحهن قبل لا يبچي
ضحك وهز راسه طالب مني اكمل بأشارته هاي
- احتاج هذا الشعور ، قسور !
قسورة- أمريني حبيبتي أمريني
- اني موافقة نروح نعالج
گام مَن مكانه يرجف يرجف خفت يصير
عليّ شي
گمت ويا اباوعله غاص بعبرته ما يريد يضعف
گدامي اكثر مَن ضعفه هذا ، غمضت رافضة
رغبتي بلمسه لان اعرف تبعياته شنو !!
باوعلي بنظرات حُب تجنن وميل راسه
قسورة- بَـس ابوس خدچ الله يخليچ
تراجعت هازه راسي برفض
قسورة- ما أأذيچ بسرعة ابتعد
- اتأذه
قسورة- ورحمة ابوي وعيوني امي وجرح گلبي عليچ ما تتأذين ابتعد بسرعة
اخذت نفس عميق وهمسه
- بسرعة متفقين؟
قسورة- ههه اكيد اكيد متفقين
حسيت بجسمي يتشنج وقبضت على ايدي
بقوة ، غمضت عيوني وفعلًا بنفس اللحظة
الحسيت بـ شفايفه تنطبع على خدي ابتعد
وحجه بسُرعة متحمس وواضح الفرح بعيونه
قسورة- رايح احجز موعد
طلع يركض مشيت اباوعله مَن الشُبـاك
ابتسامة تسللت لـ ثغري
مَن لاگه لـيث بطريقة شاله فره وباس راسه
وصعد سيارته طالع مَن البيت تارك لـيث
يصيح ورا عن وضعه
سارة- نگول خير؟
درت على صوتها وهزيت راسي
- اريد قسورة احتاج الامان الحسيت بيّ بوجودة شعور امس يستاهل اتحمل وانطي فرصة لعلاقتنا ما حَ اتخطى بسهولة وحَ اتعب ومُمكن انهار للحظات بَـس متأكدة قسور حَـيعوضني
سارة- عفية امي بنيتي القوية
حضنتني مبوسة راسي وهاي چانت اصعب خطوة اخذها
ومَن بعدها بلشت رحلة عذابي ويا الجلسات !!
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••
سـاࢪة•
اول يوم "جلسة علاج قسورة ومسرات" !
گاعدين منتظرين برا العيادة مالت الدكتورة
الطلبت تكون اول جلسة مُشتركة بيناتهُم
چنت اني وهُمام وكليم مرافقينهُم
خوف وقلق بعيونهُم توسل نسندهُم بهاي الفترة !!
دخل كليم
وطلع وجهة مطعون اشر للداخل
- تعاي شوفي اختچ
طفرت وبَـس دخلت يبس گلبي على منظرها وهي تبچي
اخذتها بحُضني وباوعت على قسورة الچان
سارح بالفضاء وواضح هوَ الثاني داخل
مود انهيار بطريقته
كليم حاضن كتفه ويسولف ويا بَـس ما يرد
هنا چانت مُعاناتنا بهاي الفترة
مسرات چانت بعد كُل جلسة تنهار وتبچي
تشرح اليّ يوجعها وتصرخ بعالي صوتها
بينما قسورة يتقوقع على نفسه بطِل يبچي
بطِل ينهار صار اقسى نظراته بارده ما ترق
غير بشوفة مسرة
صار يروح للجم بشكل مُكثف لدرجة جسمه
مَن گد العضلات يريد ينفجر صار ضخم
بشكل مُخيف
خمس جلسات مرت وهوَ يزيد صلابة
خمس جلسات ومسرة تقبلت فكرة لمساته
صارت تتقبله نوعًا ما
يلمس ايدها فقط مو اكثر وهذا يُعتبر انجاز
مرات ادخل للغرفة اطمئن عليها بالليل
اشوفه نايم يمها وهي غافيه ومرتاحة وهذا
ايضًا انجاز كبير بوضعها هي ويا !
الجلسة السـادسة
طلعنا على اساس نروح وياهُم بَـس فاجأنه
مَن طلب بكل هدوء مَن مسرة
قسورة- عادي نروح بَـس اني وياچ؟ جُزء مَن العلاج نتخطى مخاوفنا سوا؟
ابتسمت موافقة
مسرة- اي
حضن هُمام كتفي مبتسم والكُل طاير بيهُم
اخذها وطلع وكلمن راح لـ بيته بَـس رنيم
دخلت ورايا تركض ببطونها البلش يظهر شوي
رنيم- اميي
- حبيبتي بنيتي
- باوعي اني حجزت عند الدكتورة حتى اعرف جنس الجنين
- صدُك؟
رنيم- اي اي بَـس اني مَن اعرف ما اريد ابلغ كليم لان عيد ميلاده بعد يومين مَن الموعد وحابه اسويلنا اجواء وكذا فهمتيني
- حلو ، يمتى الموعد؟
ابتسمت
رنيم- العصر
غطت وجهة خجلانه وفرحانه حضنتها
- هسه ابلغ هُمام يشغل كليم واخلي لـيث ياخذنا شلوني وياچ؟!
رنيم- اموت عليچ
- امي أنتِ روحي جهزي نفسچ
رحت بلغت هُمام وما گال شي بالعكس
تحمس للموضوع واكيد شرط نبلغه بجنس
الجنين مو لشي بَـس حتى بعدين يزعج
كليم ويگله عرفت قبلك ويغوره زوجي واعرفه
للعصر كملنه والطريق كُله لـيث مشغل
طرب ويرگص
غريب هذا الولد مسوي اجواء لنفسه
وساعد نفسه بنفسه ، طگ اصبع وگال
لـيث- مرت خالي الورد اذا بنية مَن هسه محجوزه
رنيم- المن؟
لـيث- اليَّ ليش مو بعينچ ولچ؟
- على ما تكبر طاخ عُمرك خمسين خو ما ننطي لبنيه لشايب
لـيث- شايب بعينچ المسيحية
- تشيعت وما خلصانه منكُم
لـيث- لا تدخلين وتخليني اغردلچ
غميته وسكتت وهوَ رجع يگول
لـيث- ها مرت خالي متفقين؟ بنتچ اليَّ !
هزت ايدها وجاوبته
رنيم- اخذك على گد عقلك شسوي
لـيث- بدون تجااااوز الفاهية
رنيم- اي اي خوش الك بَـس اسكت
لـيث- غصبًا ما عليچ
دمعت
رنيم- والله إلا اسولف لـ كليم عليك
لـيث- تحسست! خلص اخذها بموافقتكُم
بعد ما جاوبته زعلت خزرته وهوَ ما طوخها
لان هرمونات رنيم هاي الفترة كارثية
صايره ما تتحمل اي شي وعندها استعداد
تگعد تبچي يوم كامل بدون ما تمل وتضوج
نزلنا للدكتورة ولـيث بقى برا ينتظر
بقينا ساعة تقريبًا يلـه وصل سرانه وصاحوا بأسمها
دخلنا والدكتورة طلبت مَن رنيم تتمدد على السرير وتطلع بطنها وفعلًا سوت هيج
حطت مادة على بطنها وصارت تحرك الجهاز مبتسمه
- شنو تتمنا الماما الصغيرة يكون عندها؟
رنيم- اهم شي تمام الخُلقة
- والبابا نفس الرأي؟
ابتسمت
رنيم- كليم؟ لا كليم يحب البنات
ضحكت الدكتورة ورجعت كرسيها شوي
ونزعت القفازات
ميلت راسها بلُطف لـ رنيم وحجت بهدوء
- تگدرين تبشرينه چايته بنوته تجنن
ضحكت رنيم مكممة حلگها واني طرت من الفرح
رنيم- بـ بنية؟
- وصحتها تمام التمام عاشت ايدج معتنية بيها زين
رنيم تبچي وتضحك مَن الفرح
كتبتلها فيتامينات ونصحتها ببعض الاشياء وطلعنا
لـيث عرس بنص السيارة رگص واغني
فرحححح طار مَن الفرح حتى بچي بچه
لـيث- يستاهل خالي يفرح فدوة اروحله
- الله يتمملهُم على خير
درت اباوع على رنيم سارحه ومبتسمه
- نمر للسوق ناخذ احتياجاتچ لليوم؟
رنيم- اي اي سارة هواية عندي نقوصات
- تاخذنا لـيث؟
لـيث- خادم اني تدللون
ضحكت
- خادم ربك
وصدك اخذنا وابد ما تذمر بالعكس چان
يختار ملابس ومَن ترفض رنيم يجاوبها
لـيث- مو الچ لبنت خالي ومرتي لا تدخلين
ضحكت رنيم وسكتت لان شيخلصها مَن
لسان لـيث ! اخذت احتياجاتها لهاي الليلة
وچانت حيل فرحانة بهذا اليوم
استعجلنا بالرجعة لان بالنا يم قسورة ومسرة
حطيت ايدي على بطني وما گدرت غير
أنُ اتمنى طفل اليَّ
شعور الامومة كل يوم يتفاقم بداخلي
وتصادفنا وياهُم بـ الباب
نزلت عيني عليها وگلبي يرجف خاف متخربطة
لو صاير وياها شي بعد هاي الجلسة !!
حسيت گلبي رجف بفرح مَن نزل وحاوط
ايدها وتقربوا النا
بنفس الوقت اجوا مَن الحديقة الخلفية كليم وهُمام
كليم- بشري بابا صحتچ أنتِ والطفل شلونها؟
دموع- بنية لو ولد؟؟؟؟
هزت راسها وهمست تداري عيونها عن عيونه
لان كليم يگدر يكشفها مَن نظراتها اله
رنيم- ما واضح للان گالت على المُراجعة الثانية
كليم- الف الحمد لله المُهم صحتكُم
سحبني هُمام وهمس بفضول
- شنو بشري؟
- بنية
فتح عيونه وضحك بصوت بسُرعة العيون
صارت علينا
كليم- شبيك؟
هُمام- اني ومرتي نضحك ما يصير؟
هز ايده كليم واني قرصت ايده خازرته يسكت لا ننكشف
فجأة طلع صوت قسورة
- الدكتورة اقترحت علينا شي اليوم
كليم- خير ابني؟
ابتسم وباوع بعيون مسرة الحاولت جاهدة
تداري عيونها عنه بخجل ، رجع يباوعلنا
قسورة- طلبت منه نعيش سوه
هز راسه وكمل
قسورة- مسرات اليوم تنور بيتها بكامل إرادتها
..
وتستمر الحكاية.. 🚬♣
قناة التلي zainab_salah0
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!