رواية دروب الإِندِثـار الفصل الثاني والخمسون 52 - بقلم زينب صـلـاح 🤎

بقلمي : زينب صلـاح 🧡

لـ روايـة ﴿ دروب الإندِثار ﴾

في الأضافي ♡♡

لا تنسون التصويت + متابعة للحساب + التعليق بين الفقرات ☘️

••••••••••••••••••••••••••••••

دخلت للغُرفة واسمعها تگُله
ملاك- بابا الهلو "الحلو"

وهوَ يجاوبها
هُمام- روح ابوچ ملاكه

تمشيت ومديت راسي لغُرفة التبديل الخاصة بيها
طبعًا شافتها باليوتيوب ونطت مَن البچي تريد مثلها
وهُمام يقصر على روحه وما يقصر عليها
ثاني يوم سوالها وحدة خاصة

اباوعله مگعدها على الكُرسي وواگف وراها
يمشط شعرها وهي تحط مكياج لوجها
طبعًا "مكياج العاب"
هُمام حذر عليها حيل ولو بچت يفرفح

ملاك- بابيي الهلو

ضحك مَن گلبه ونزل باس راسها
ملاك- ثويلي تثريحة عروثه "سويلي تسريحة عروسة"

هُمام- هذا شغل امچ ملاكي اني ما اعرف

- ماما تدول عيب

هُمام- أذن عيب

- اريد تثريحة ثندريلا

هُمام- تروحلچ فدوة سندريلا بابا

- دا تخونوني !

دار يباوعلي وهي كممت حلگها وحجت بخباثه
ملاك- بابا يدول احبش اكثر من امش

هُمام- والعباس ماكو هيچ اختلافية

- ها ابو الهَمم؟

شلتها وهي حضنت راسي تبوسني بخدي
ملاك- هبيبتي ماما عوفي بابا ما يحبش

هُمام- اني كلب لان امشطلچ لچ ساااارة لا تباوعين هيچ

ملاك- يدول اتو احله من ماما

هُمام- لچ ملااااااك بنت الكلب

ملاك- نو صراخ بابا نوو

هُمام- لا تچذبين بابا مو تعبت مَن نوم الارض بنت الكلب بيش مقصر وتختلفين عليَّ

- اكو احله مني هُمام؟

هُمام- لا وابو فاضل لا بنتچ تريد تخرب بيناتنا علمود تنام يمچ وتشحتني بنت السگط تخطيطها تخطيط جهنمي

- بنتي ما تچذب مو ماما

ملاك- ثح هبيبتي

هُمام- نسوان محد يگدرلچن اروح لصاحبي احسن

مشى خطوتين وهي عاطت
ملاك- باباااااا تليممممم

هُمام- ما اخذچ ولي

ملاك- هبيبي الهلو اهدنيييي

باوعلها بنص عين واجه وهوَ ممنون شالها وطلعوا
يسبها وهي تضحك وتبوس خده
اعرف اي اي بنتي اختلافية ووكحة بَـس اموت
على وكاحتها خصوصًا تسوي هيچ لان تغار
مَن ابوها عليَّ وتموت بچي لو شافته نايم يمي

لبست اني همات وطلعت وراهُم
باب البيت مفتوح دخلت واسمع صوت الاطفال
ضاج البيت مَن وراهُم بَـس على گولت كليم "احب الاصوات على قلبي"
وفعلًا نحس الدنيا بعدها بخير مَن نسمع صوتهُم البريء

سلمت وگعدت يم رنيم الچانت تدرس بـ ريم
حبيبتي بَـس شافتني ركضت تحضني
ريم- خالة حاجي ماما تعبت مَن الدغاسة

- خليها ترتاح رنيم

رنيم- عندها امتحان

كليم- يابه ما طاير اني بالليل ادرسها روحي بابا لعبي

ركضت تلعب ويا الجهال ورنيم سفطت الكتُب ضايجة
رنيم- كليممم اريدها هسه تخلص وبالليل اراجعلها

كليم- بالليل تدرس وباچر الصُبح بالطريق راجعيلها

هُمام- سهليها تسهل خالو

ابتسمت وهزت راسها موافقة وهي تسند
راسها على رجل هُمام لان هي گاعدة على
الارض وهوَ على التخُم قريب منها
رفعت عيني على الباب مَن دخل قسورة
وهوَ شايل "علي الدُر" وورا مسرة

عيونها غائرة بتعب وجوا عيونها اسود
علي نزل مَن حضن ابو وراح يلعب ويا الاطفال
حبيبي توا يتعلم يمشي ويوگع
وقسورة اخذله مكان يم كليم ومنزل راسه بين رجلي
مسرة گعدت يمي وهم هادئة ، رجعوا مَن الدكتورة
وكالعادة حالة مسرة بعد كل جلسة تتدهور وتتعب

قسورة- بعد ما اخذها للدكتورة دا تتعب

- تروح

رفع عينه عليَّ
قسورة- دا تتعب باوعيلها !

- علي يحتاج ام زينه تربي ومسرة اذا ما تعالجت مَن ماضيها ما حَـتعرف تربي ابنها

قسورة- على حساب صحتها؟

- فترة وتتحسن

دار وجهة يستغفر وهي هادئة
- تردين تنامين؟

مسرة- حاسة نفسي دا اريد استفرغ

- تعاي

اخذتها للحمام وفعلًا استفرغت تبچي
حضنتها اغسللها ورنيم ودموع واگفات ورانا
سندتها واخذتها للغرفة
اباوعلها لمت رجليها لصدرها وضمت راسها
تبچي منهارة وتعبانه وقبل لا نحجي همست

مسرة- ببداية تعارفنا اني وقسورة واول ما عشنا ببيت عمو كليم هوَ تحرش بيّ تحرُش جسدي وچان يجبرني بالقوة

رفعت راسها تناشغ
مسرة- هسه دا احلم بهاي الاشياء وبلغت الدكتورة تگول يحتاج تكملين علاجج بعيد عنه وعن اي شي يذكرچ بيّ
شلوون سارة شلون ابتعد عنه وعن ابني شلون اعوف علي الدُر والله اموت

مررت ايدي على خدها
- اذا هذا الشي يرجعچ احسن الهُم خاطري وتحملي

- ما اتحمل سارة ما اتحمل تمر ثانية بدون ما املي عيوني بشوفتهُم اني اعترف مقصرة وما منطيه حق قسورة ولا اني أم مثالية بَـس يومي ما يكمل بدونهُم

عقدت حواجبي بقهر على حالتها ورنيم تقربت تمسح على ظهرها
رنيم- احجي اليوم ويا قسورة وشوفي رأيه

هزت راسها موافقة وشوي وصاحلها قسورة وراحوا لبيتهُم واحنه رجعنه لبيتنا
ملاك نامت على كتف هُمام واخذها نومها بغُرفتها ونزل
چنت واگفه اشوف نقوصات المطبخ علمود يروح يجيبلي
شهگت مَن حضني مَن ورا ودفن راسه برقبتي
ميلت راسي مبتسمة ، رفع راسه وهمس قريب مَن إذني

- بنتچ ماخذتچ مني شهلائي

- يمك حبيبي

طبع بوسة ورا إذني
- چؤ مشتاقلچ سارة حيل مشتاقلچ

درت محاوطه رقبته
- اسفه بَـس ما منتبهه

دفعني على الحايط ونزل بايسني حضنته
بقوة مبادلته رفع جسمي مخليني احاوط
خصره برجلي وتمشى للغرفة الجوه
دفعته اضحك ونزلت اباوعله ضاج وعقد حواجبه

- سارة !!

- مو وقتها حبيبي والمطبخ فارغ احتاج مسواك

هز ايده متنرفز
لزمتها وتقربت بايسه خده
- بالليل اعوضك

- تخلصينه ويا ملاك

- والله انومها مَن وقت

- نشوف

تقرب باس خدي وگال
- طالع يم كليم كتبي احتياجاتچ ودزها اليَّ على الواتساب

طلع واني كتبت كُلشي احتاجه ووصيته يجيب عشاء مَن برا
وفعلًا كملت شغل البيت ولعبت ويا ملاك
علمود تتعب وبسرعة تنام وفعلًا رجعت نامت
ركض ركض رحت للحمام اسبح وطلعت
ارتب الغرفة واسولنا اجواء جهزت العصاير والحلويات والكرزات
وشغلت فلم بالشاشة على سينمانا ووقفته

لبست بدلة نوم لونها ماروني على طول جسمي
لان خاف ملاك تگعد ما اتقيد وياها نوعًا ما مستوره ومُريحة باللبس
نزلت اركض مَن سمعت صوت الباب اباوعله
عيونه لمعت وهوَ يتأملني
وللصدفة الحلوة چان شايل ورد لونه احمر
حاوط خصري بأيده واني رفعت نفسي
طابعة بوسة على حنچه

- الله يساعدك عُمري

هُمام- اي والله الله يساعدني شلون اتحمل هالحلاوة حلوة المسيح

ضحكت ودفعته
- روح اسبح واسترخي بين ما اجيب الاكل واحط الورد بمزهرية

هز راسه وراح واني سويت كُلشي وصعدت
بالاول تفقدت ملاك ولگيتها نايمة مثل الملائكة
بستها ورحت للغرفة ابتسمت وهوَ بادلني
ينشف بشعره وبَـس بالبجامة
گعدت انتظره وهوَ ما تأخر بَـس ساعة بقى يمشط بشواربه ويتعطر

- هففف كاااافي

هُمام- مستعجلة على رزقچ

- اريد اكُل

تقرب گاعد يمي وسحبني لصدره باس راسي
واستنشق شعري بقوة
شغلت الفلم وكالعادة اني افهي واركز بالفلم وانسى اكُل بَـس هوَ يجيب ويحط بحلگي
همسلي يبعد شعري عن رقبتي واني مندمجة بالاحداث
- الفلم مطول

- اممم

هُمام- واني صبري نفذ

- اي حبيبي ا...

شهگت مَن شالني وحرفيًا شمرني على
السرير
هُمام- مو مال رومانسية أنتِ

- بَـس الفلم..

- اششش تعاي شطالعة أنتِ اليوم

عض شفته وبدت وكاحة هُمام
هملته اخر فترة بسبب وجود ملاك بحياتي
ولو ما ينبهني اليوم يمكن ابقى غافلة
ضربت صدره خازرته
هُمام- مشتاقلچ تحملي

اباوع لرقبتي صايره خارطة اسنانه أثرهُم واضح !!
واگف يمي بزي الشغل واني احاول اخفي
الأثار بَـس عبث شمرت الفرشة وتأفأفت ضايجة

هُمام- عادي بابا غير زوجج قابل صاحبچ

- عيب هُمام والله اخجل اذا شافنهن البنات

رفع كف أيدي وباسه
- طبيعي حلوتي لا تفكرين هواي واني اسف ان شاء الله ما تتكرر بَـس أمس مَن شوقي فقدت عليچ

باوعتله بطرف عيني ، ضحك وكرص خدي بايس اصابعه
بنفس الوقت انطرق الباب بطفولية عافتي وراح فتحه
لان ما تلوح اليده حتى تفتحه اباوعلها
شعرها مكوش وعيونها غائرة مال نوم وبَـس شافتنا ضحكت

ملاك- هبيبيني ثباح الهير

شالها مشبعها بوس
- صباحي أنتِ ولسانچ المكسور روح ابوچ

جرت ابوها ترجعله بوساته واشرتلي اتقرب
وهمات باستني وعيوني سرحت على جسمي
ملاك- واوا

حكيت رقبتي وشلتها بايسه خدها
- ماكو شي ماما هاي لان حكيتها هيچ صار

بسرعة اقتنعت لان طفلة وهوَ ودعنه وطلع هوَ وكليم وقسورة للشغل
واني رجعت نمت بعد ما وديت ملاك ببيت كليم
ميته نعاس لان بسبب الافندي ما نمت ما اعرف شلون هوَ
مقاوم هيچ لا وراح لدوامه بكُل نشاط
ورا فترى حسيت بشخص يحضني فتحت
عيوني چان هُمام بَـس لمحته دفنت نفسي بحُضنه ورجعت اغفى ما حاسه على نفسي
ㅤㅤㅤ
ㅤㅤㅤ
ㅤㅤㅤ

ㅤㅤㅤ
••••••••••••••••••••••••••••••

مسـرة•

رفعت راسي مَن حسيت بدخولة للغرفة
متجاهل وجودي تمامًا !!
غمضت عيوني وزفرت نفسي بتعب وحيل مهدود
رجعت اتبع حركاته داخل الغرفة

- قسورة !

باوعلي بدون ما ينطق بشي
- تعال اگعد خلي نسولف

تقدم وگعد على حافة السرير يباوعلي
منتظر مني احجي
- اريد اسولفلك شغلة بَـس ما اريد تزعل

قسورة- شصاير؟

غمضت عيوني وضميري أنبني
- ماكو شي انسى

تقرب اكثر واكد بنبرة حادة
- احجي مسرة

مديت جسمي واخذت كلاص الماي صكيته
مرة وحدة ورجعته واباوعله ينتظر احجي
- تتذكر اول ما اجيناكُم؟

عقد حواجبه وهز راسه
- مَن چـنت تعاملني بأسلوب مو حلو وعلى مرتين تقربتلي!

زادة عقدة حواجبه حدة
- هاي الاشياء دا تلاحقني هسه بأحلامي وكُل ما اشوفك

بلع ريق وعيونه رقت وطغى الندم بيهن
قسورة- بَـس أنتِ نسيتي !! كملنا حياتنا بعدها وحبيتيني !!

- الصار ويايَّ رجعلي كُلشي سيء عشته اني اسفة بَـس مو بيدي

قسورة- شنو المطلوب؟

- حاجيت الدكتورة واقترحت شي بَـس اني ما اريده

- شنو هوَ؟

- ابتعد عنك وحتى .. عن علي الدُر

فتح عيونه ونتر
- لاااا اكيد

- أني ما اريد بَـس سارة تگول لمصلحتچ

قسورة- لااا مسرة لا

گام وسحب التشيرت مالته لابسه وطلع مَن الغرفة
ركضت للشباك اباوعله اخذ السيارة وطلع
مررت ايدي على راسي بتعب
اني تعبانة اريد ارتاح مليت من حياتي والدا
يصير بيها
قسورة اخر مرة تقربلي بيها وكان سبب بولادة
قُرة عيني علي الدُر بعدها ما تجرأ يتقربلي
يخاف يصير بيَّ شي مَن الخوف بَـس إلى متى؟

اني ما اريد اخسرة واريد اصير زينة تعبت
مشيت لغرفة علي الدُر
شفته نايم بسريره ببراءة ما يدري شگد هذا
العالم قذر ومن يكبر حَـيلوث براءته الحلوة

صفنت مقررة اخطي خطوة بعلاقتنا
اريد اجرب اني تعبت صح الدكتور مانعتني
بَـس هذا قراري وخلص
شلت علي الدُر وطلعت لبيت عمة نجلاء
خطية بَـس شافتنا طارت مَن الفرحة
اخذته هي واني رجعت طالبة منها يبقى الليلة يمها

رجعت ماخذه نفس عميق وفتحت كنتوري
مررت ايدي على سيتات النوم الما لامست جسمي
مَن يوم اشتريتها بجهازي ما لبستها
بسبب الصار !!

اخذت سيت ابيض ورحت للحمام
كملت وطلعت شسورت شعري ورتبت وجهي
اخذت تلفوني متصله عليّ
هواي رن يله اجاني صوته التعبان

- ها مسرات

- تجي؟

- تتعبين بشوفتي

- ارتاح بوجودك هسه اني خايفة وحدي

- راجع

سده واني گعدت بمكاني اطگطگ اصابيعي
وارجف مثل السعفة خايفة ومرعوبة مَن الفكرة
ما طول مَن رجع اتبعته بنظراتي وهوَ يدخل بسيارته
واخذله فترة يسولف ويا ايهم
او الاصح ايهم يسولف وهوَ يهز راسه
لحد ما ترخص ودخل للبيت

وجهت انظاري للباب وصرت اسمع صوت
نبض گلبي القوي
بلعت ريق مَن دخل واتسعت عيونه يباوعلي
عيونه تأملت كلشي بيَّ لدرجة وگف بمكانه
وما گدر يتحرك ويخطي خطوة وحدة !!
سد الباب وانتبهت على ايده ترجف بقوة
رمش بعيون ذبلانه ودار وجهة ماشي للمكتب
نزل اغراضه ويريد يفتح الساعة ما يگدر
تجرأت وتقربت منه ومجرد لمست ايده
رجع خطوات عني يباوعلي ويهز براسه لا

- قسور !!

نتر ايده بقوة لان ما گدر يفتح الساعة
قسورة- هسه بَـس اغير ملابسي واروح انام يم علاوي

مشى للكنتور يطلع ملابسه
- وديته يم عمة نجلاء

- هسه اجيبه

- اريد نبقى وحدنا

دار وضرب الملابس على الارض
- شتردين مسرة شترديييين؟

رجعت اتقرب منه ، ابسمت مَن شفته معبس
ويباوعلي بزعل عبالك علاوي گدامي مو قسورة
- اريدك

راد يحجي بسرعة رفعت ايدي وسديت حلگه
رفعت جسمي على اطراف اصابعي وبست خده
ابتعدت واشوفه مغمض وجفن عينه يتحرك بسرعة
وشفايفه ترتجف جوا قبضة ايدي
لفيت ايدي على رقبته وحضنته بقوة دافنه
راسي برقبته واسحب عطرة مثل الغرگان
طبعت بوسة هناك
- محتاجتك

- ما اگدر فدوة اروحلچ رحمي بحالي وحسي بيَّ تعبااااان

- نحاول اريد نحاول ونتخطى سوا

- ينعااد كلشي نفس هذيچ المرة توگعين بيدي واموت والله اموت

دفعني وگعد على السرير حاط راسه بين
ايدي ويهز بجسمه
رفعت ايدي امسح دموعي كاتمه شهگاتي
خصوصًا مَن گال بقهر يشرحلي موقفه
- عبالچ ما اريدچ؟ لا وابو راس الحار ميت عليچ ورايد قُربچ اكثر من اي شي بهاي الدنيا بَـس كل ما اتذكر حالتچ بعد ما تقربتلچ هذيچ المرة امسح شكو فكرة بهذا الموضوع

رفع عيونه حُمر جمرات مَن الكتم والغضب
- لا تبچين ينهد حيلي والقرآن بَـس لا تبچين خادمچ اني افهمچ وتفهميني مسحي دموعچ

- الدكتورة تگول ابتعدي بَـس گلبي يگول اقتربي وابني علاقتچ مَن جديد شنو اسوي قسووور

- ما اگدر وعيونچ

گام مقترب مني رفع ايدي مسح دموعي
ونزل طبع بوسة على راسي واخذ ملابسه
من الارض وراح للحمام يسبح

گعدت بمكاني مخذولة مَن الدنيا كُلها
فترة وطلع بدون ما يباوعلي بنظرة طلع
مَن الغرفة كلها
فترة مضت مو طويلة وسمعت صوت ضحكات
علي !! تأكدت هوَ رافض رفض قطعي الموضوع

غيرت ملابسي ورحت للغرفة اباوعله يكركر بيّ والثاني فحطان مَن الضحك
يلزم وجهة قسورة ويبوس خده مخلي يگزگز عليّ
ضحكت بقوة مَن فاجأة براشدي
لزم خدة قسورة وانتبهلي مخليني اكتم ضحكتي

قسورة- ابنچ يعنف بيَّ تقبلينها؟

تقدمت گاعده يمهم
- شلون اقبلها ليش ماما علاوي عيب !!

برز شفايفة وباوعلي بلطافة
حبيبي بعده ما ينطق بَـس يعبر بملامحه
اخذته بحُضني وبسته مباوعه لـ قسورة
- اطلب منك طلب؟

قسورة- غير الموضوع قبل شوي تدللين خادم اني

- ترجع تنام بالغرفة

تأفأف لان هوَ صارله فترة شارد ينام يم علاوي
بسبب هلوساتي الدا تصير مَن العلاج مرات
ما يتحمل فـبقى ينام هنا واني چان الوضع
عاجبني وساكته

- قسورة شبيييك؟

- ما بيَّ

- ترجع؟

- لا خليني هنا مرتاح

- بَـس اني مو مرتاحة !! اذا ما رجعت اني..

فز مقاطعني بعصبية
- لاااااا تهدددين

حضنت راس علاوي الفز وبچه مَن صوته
باوعتله بنظرات تأنيب واخذت ابني وطلعت
للغرفة بدون ما احجي ويا بحرف
لعبته ووكلته وبدلتله وهوَ نام بسرعة مَن
التعب
مددت يمه اطبطب على ظهره وتوها عيني
تغمض وانفتح باب الغرفة
باوعتله بطرف عيني ما عاجبني وغمضت

انكتم نفسي مَن دحس نفسه ورايَّ حضني
وأحَس انفاسه تضرب برگبتي حاره
قسورة- صبري عليَّ احتاج وقت اتقبل الموضوع

- تعبانه لا تأذيني اكثر

- يندار تعبچ بيَّ مسرات رَوحـي

مَن عندها ورجع ينام بالغرفة صرت اتعمد
البس بدلات نوم گدامه ، يتأثر بَـس يقاوم
الدكتورة مَن شاركتها بالموضوع نصحتني
استمر اذا هذا الشي رايدته ومستعده الــه

بيوم تأخر بالشغل لليل وجان الجو شتا وباردة ثلج
علاوي نام مَن وقت واني صارلي واهس
العناية بالبشرة والجسم دخلت للحمام
وما خليت شي يعتب عليَّ طلعت لبست دشداشة قصيرة ونص ردن شسورت شعري وحطيت مكياج قليل
ضحكت مَن اتصلن خواتي كام فتحته واني ادخل للمطبخ ويا عيطت رنيم

- اوووي شنو هذا الجمال مسرات

ضحكت مجاوبتها
- ملل وين اروح

سارة- اني شلون وياچ ماما

اسمع ملاك تبچي وسارة محتارة بيها
- شبيها؟

- تريد ابوها وهوَ لحد الان ماكو

رنيم- سألت كليم يگول عندهُم شغل تردين اودي ياخذها هي تحبه

سارة- خاف عيب؟

رنيم- لا عادي

گامت تتحرك وتركض واني عين عليها وعين على الطاوة جاي اقلي بيها فنگر
اسمعها تگله
رنيم- كليم روح جيب ملاك يمك

كليم- شبيها؟

- تريد خالو وهوَ مو هنا عاد أنتَ تحبك خطية تعبت سارة

كليم- صار بوية خلي تجهزها وأنتِ جهزي البنات وبلغي مسرة على علاوي خلي اطلعهم شوي

- عموووو علاوي نايم

كليم- يله غير مرة اطلعه

صدك على الخط ويجهزن بالجهال
- دمعة وين؟

سارة- نايمة

شوي وصار هدوء لان عمو كليم اخذهُم وطلع
تنهدت سارة بتعب وسألت
- شلون الاوضاع يمچ مسرة؟

- نفسها بعده ما يقبل ينفتح الموضوع

رنيم- يا عنادكُم! إلى متى تبقون هيچ؟

- ما اعرف بَـس ابقى احاول ويا ونشوف وين نوصل

سارة- تسوين مثل ما وصيتچ؟

جاوبتها ساخرة
- عوزي بعد بَـس امشي بدون ملابس علمود يتأثر

ضحكت رنيم بقوة هي وسارة
سارة- استخدمنا اقوى سلاح نملكه والعينتين ما يقبل يتأثر ويتزحزح

رنيم- مو عليچ بالله؟ بَـس اشك هسه يتأثر

- قطعت الامل

حجيتها وخليت الصحن مال الفنگر على الميز
وفتحت قوطيت الببسي بعد ما حطيت بهارت ومايونيز على الفنگر وگعدت اكُل
اكلت وبقينا نسولف بسوالف عادية لحد ما گالت سارة
- رجعوا اروح اني خاف هُمام يحتاج شي

اني هم سديته ورجعت المواعين بمكانها
وغسلت
بَـس درت وجهي عطت لازمه گلبي مَن شفته
مايل على الباب ومكتف ايدي يباوعلي
- طلع صوت اجه يوگف گلبي!!

قسورة- ماكو الله يساعدك؟

ابتسمت وتقربت منه حاضنته
- الله يساعدك جهزتلك الحمام

بقى يتأملني لفترة طويلة لدرجة قلقني
نزل وجمد الدم براسي مَن اخذ شفايفي
يبوسهن بكُل رقة
يتفنن ببوسته مدوخني وماخذني لغير عالم
بهتت مَن تجرأ بلمساته مخليني اوسع عيوني
وافقد السيطرة على جسمي
ابتعد ورجع طبع بوسة سطحية على شفايفي وراح !!

هيچ بكُل بساطة ضيعني وراح !! بلعت ريك
سحبت الكُرسي وگعدت اصفن مصدومة
طردت افكاري لان شُبه اقتنعت هوَ ما
حَـيخطي اي خطوة بتطور علاقتنا الزوجية

دخلت للغرفة وهوَ طلع ابتسم وغمزلي
عزا هذا شبي !!
اتبع خطواته بقلق ورجع صدمني مَن تقرب
حاضني ودافن راسه برگبتي يطبع بوساته
- شبيك قسور؟

- ريحتچ اووف

- هاي شبيك اليوم أنتَ

- صوتچ ما اسمعه ترا مو غشيم واعرف تتعمدين تلبسبن وتدلعين گدامي اني مو حجر مليت

- ادلع نفسي

- احاول اصدگچ

دفعته وشهگت مَن فرني بحركه سريعة
وصار ظهري على صدره وهوَ يبوس برگبتي بجنون
وايدي طليقة حُرة تتلمس جسمي بجرأة
عضيت شفتي وغمضت عيوني مَن عض شحمة إذني وسحبها ببطئ

همس مذوبني
قسورة- اليوم يسقط سلاح قوتي وانهزم گدام أنوثتچ

دارني دافعني على السرير وأحَس بگلبي بقاله شوي ويطلع
يضرب بقوة داخل قفصي الصدري مسببلي حالة مَن الجنون
رجع يعتليني وبوساته صارت اقوى واكثر جُرأة
وبين لحظات الحُب لگيت نفسي متجردة مَن كُلشي
ولاول مرة اشوفه قسورة ما اشوفه شخص ثاني
عشت ويا اللحظة وبكُل لمسة اعرفه هذا قسور حبيبي

عيني على شُبـاك الغرفة التضرب بيّ قطرات المطر بقوة
نفس ضربات گلبي واني بين ايدي وايده تمسح على زندي
وشفايفه كُل شوي بايسه راسي
قسورة- سمعيني صوتچ !

- قسور ما اريد اطفال اني هاي السنة ثالث وبكلوريا و...

رفع راسي مَن فكي وخله عيونه بعيوني
- اخذت احتياطي ببالي الموضوع

ابتسمت بخجل مَن وضعنا
رجع يمرر اصابعه على خدي وگال برجفة
قسورة- طمنين گلبي راح يوگف !

- زينة اني

- بمعزت خواتچ؟

- بكُل لحظة عشتها بين ايدك چنت اعرف أنتَ قسورة

غمض عيونه وذب نفس قوي يجذبني بحُضنه
حاضني بقوة
رفعت راسي بفزة مَن سمعت صوت علاوي يبچي
رجعني وگام هوَ يطمني
- اني ارجع نومته وارجع

بَـس طلع گمت اركض للحمام سبحت
وگلبي يوجعتي شگد حاولت اتجاهل شعوري بَـس صعب!
شغلت الدوش علمود الصوت وكممت حلگي
سامحة لدموعي تنزل محررة كم التراكمات العلى صدري
اتأذة واتلوع بَـس مستعدة ارجع اعيدها
ولو انعاد الزمن ارجع اعيدها واتقبله
كافي إلى متى اني ابقى رافضته
منا لمن اخسرة؟ شنو استفاد بعدها غير يزيد وجع گلبي!

لفيت البرنص على جسمي لان ما اخذت ملابس ويايَّ
وطلعت لگيته گاعد وحاط راسه بين ايدي
وصافن
انقبض گلبي ، خاف سمعني ابچي؟
رفع راسه وابتسم مخليني اذب نفس براحة
اجه حاوط خدودي مبوس راسي وهمس
قسورة- مسراتي

ما جاوبت وهوَ اتسعت ابتسامته براحة
حضني لـ صدره مخليني اسمع صوت دگات گلبه القوية
- علاوي؟

- نام

- تسبح؟

- اي بَـس أنتِ لا تنامين انتظريني

هزيت راسي وهوَ راح للحمام واني حاولت
اتجاهل كُلشي واركز على سعادتي اني وقسورة
سرحت شعري ولبست دشداشة نفس النزعتها تقريبًا
وگعد على السرير انتظره
شوي وطلع بَـس بالبجامة يفتر

خلص واجه تمدد حاط راسه بحضني يباوعلي
ابتسمت حاطه ايدي على راسه احركها على شعره
سحبها طابع بوسة عليها بقوة وشمها ذاب نفس
- چنت خايف عليچ ، حسيت گلبي راح يوگف بأي لحظة

حطيت ايدي على شفايفه
- اسم الله حبيبي

قسورة- لا تعوفيني بعد ابقي قريبة مني تعبان اني والله الصار اخذ كل حيلي وبقيت امثل القوة بَـس حتى اسندچ واحافظ عليچ مَن نفسچ حتى لا تأذين نفسچ

- اريد نعيش كُلشي مَن جديد قسور

لمعت عيونه بحُب
قسورة- قبل ما گدرت اخذچ شهر عسل بالعطلة مالتچ نروح ها؟

- وين؟

- اي مكان بنفسچ اني ارتبها

بقت عيوني تفتح وتنسد وحدها
هوَ مَن شافني تعبت ونعست مدد بمكانه
وسحبني منومني على صدره يمسح
على شعري وبين النايمة والگاعدة أحَس ببوسات تنطبع على راسي
لحد ما اخذني النوم وبعد ما حسيت بشي
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••

سـارة•

كالعادة ما اگدر انام اذا مو الافندي يشرف للبيت
اضافة لـ ملاك ويا كليم والدنيا ليل ومطر
وين عيوني تاخذ نوم بهذا الوضع وبالي يمهم

گمت على صوت السيارت اباوعلهُم دخلوا والتلفون بيدي
ودعت البنات وهوَ دخل عاگد النونة عرفت
صاير شي وبهذا الوضع هُمام يصير خطر
على البشرية لان بَـس واحد يگله اوف يسبه ويسب عشيرته

- الله يساعدك

- هلا

غلست مَن جاوب مَن ورا خشمه وراح
جهزتله اكل بدون ما اسأل وهوَ فترة ونزل
هُمام- وين ملاك؟

- بقت تبچي عليك وكليم اخذها طلعها

عاط بصوت فاجأني
- بدوووون علمي؟ أنتِ ليششش هيچ ثولة وما عندچ اي احترام شلون تقبلين تطلع بهذا الجو بله صار عليهُم شي!

- ويا كليم !

- واذا وياااااااااا كليممممممم مَن انعل ***

غمضت عيوني وحز بخاطري مَن نزل بـ اهلي
مسبات وهوَ يعرف اهلي شنو يعنولي وشنو مَن جرح ينفتح بگلبي عليهُم بَـس اذا تذكرتهُم مو مسابات بلا سبب؟

وزاد قهري مَن سيطرته لان يعرف ما عندي مكان اروحله اذا ازعل
لذلك هوَ مسيطر
حطيت ايدي على گلبي بقهر مَن الوجع وعبرته
رجع سجبني ضاربني بصدره
- وين موليه؟

- كافي هُمام

هزني لدرجة حسيت ايدي نخلعت
هُمام- شنووووو هذا البرود؟؟

- كافي أذيتني

عقدت حواجبي بألآم مَن زاد الضغط على ايدي
وعيونه مخنزرة بوجهي ، دفعني على أثر صوت السيارة وطلع
صعدت بدون ما انتظر وگعدت بالحمام عيوني تصُب
چنت لابسه قلادة هوَ جابها اليّ هدية ينحط بيها صورتين
صورة لـ ماما وبابا ، نزعتها اباوعلهُم وزاد قهري

طول الليل على نفس الگعده وعيوني ما وگفت لحظة
انسطر راسي سطر كرهت ضعفي واني اشوف اصابعي تتعوج
دگ الباب ونتر ولا كأنوا مسوي شي
- طلعي اريد ادخل

گمت جسمي مكسر ، طلعت اجر اذيل خيبتي
وعلى أي لحظة مستعدة للنوبة
لزمني رافض اروح ورفع راسي يتأمل وجهي
هُمام- شسويتلچ وكل هذا البچي؟

- سبيت اهلي وأذيتني شوف

رفعت ايدي اراوي اصابعة الطابعة على بشرتي بكل وحشية
تأمل المنظر وعيونه شرحت شگد ندمان
بَـس بشنو يفيد ، لاحظ اصابعي وتقرب يريد يحتويني
- النوبة سارة

دفعته رافضة مساعدته رحت تمددت على السرير وسحبته الغطى حاطته بحلگي
وغمضت عيوني بخوف مَن وحدتي بهيچ وضع
بَـس ما عافني شوي وحسيته يحتويني
دقائق وشاغت روحي مَن وجع نوبة الصرع
تهد حيلي لو اجتني والله تهد حيلي

نمت بدون ما أحَس على نفسي
وگعدت عليّ يسويلي كمادات ، دفعت ايده وگمت گاعده
راسي موتني الوجع عفته ورحت للحمام
استفرغ انشلعت مُعدتي لان كُلشي ما ماكله

غسلت وطلعت اخذ ملابس وقبل لا ادخل
اسبح متجاهلة وجوده رحت لغرفة ملاك
حبيبتي نايمة مثل الملائكة اسم على مُسمى
رجعت سبحت وجددت طاقتي احاول اطرد
اي تفكير سلبي خاف ترجع النوبة ويتضاعف الوجع

نزلت المنشفة على راسي اسويلي شي اكله
وهوَ يفتر ورايَّ بدون ما يحجي اعرفه
معترف بخطأه بَـس ما يعرف بأي طريقة
يوضح ويعتذر
گعدت اكل وهوَ مگابلني وصافن وجگاره تطفه والخ تشتعل خنگنييييي

بَـس خلصت گال
- عادي نحجي؟

- لا مو عادي

بهت يباوعلي
- شغلي صار عندي ضغوطات و..

- وگلت اطلع هاي الضغوطات بسارة بكل الاحوال هي ما عندها احد تروحله تنچب وتسكت!

گام متوتر مَن كلامي وتقربلي يحلف
- وداعت بنتي مجرد هيچ تفكير ما مر بعقلي
حبيبتي تعرفين مَن اعصب ما اعرف امي وابوي ودائمًا ابتعد عنچ مَن اكون عصبي بَـس هاي المرة نسيت نفسي والله وعيونچ

تقرب اكثر ماخذ ايدي يبوسها
- لو شنو ما اسوي واعتذر ما اوفي حقچ اني غلطان واعتذر وخادم لعيونچ الحلوة بَـس لا تباوعيلي هيچ

فلتت ايدي منه على صوت ملوكه تبچي
صعدتلها واني اغلي مَن القهر
سوالفه هاي ما يبطلها دائمًا يغثني والله شنو
شغلي ! واني حايط نصيص لازم اسمع اهانته واشكره
بَـس هاي المرة لازم احطله حد كافي مليت منه ومن شغله وعصبيته

ضحكت على هوستها وشعرها
شلتها ابوس بخدودها اوف هاي حسنة حياتي الوحيدة
رب العالمين انعم عليَّ بوجودها بعد ما انحرمت مَن الضنه
ملاك- باباااااا

درت اباوعله اجه اخذها مني وباسها وشماها بكل قوته
- روح ابوچ ملاكه

- بابا تفلونك

ضحك على طريقة نطقها للكلمة وطلع تلفونه يريد ينطي الها
تقربت اريد اخذها بَـس شدد عليها وحاوط
خصري ساحبني عليّ اكثر
- وين؟

- اريد اسبحها واوكلها التلفون بعدين

هُمام- اني هم اريد اسبح

- ما تسبح منو لازمك؟

- سبحيني

خزرته ماخذتها منه
- لازم اضحك لو افرح هسه اني؟ سوالفك هاي ما تمشي عليَّ خوش؟

طلعت واسمعه يسب بنفسه ومعصب
اليجي من ايده الله يزيده
اني اعرف هُمام اذا ما احط حدود ويا على
هاي الامور يصعد على راسي ولسانه ياخذ
بالغلط والتجاوز أما اذا مَن هسه حطيت حدود
وبينتله موقفي حَـيحاول يبطل ويتندم وتبقى دائمًا براسه
وهوَ گال قبل شوي مَن اعصب ابتعد عنچ لان يعرف
ارفض معاملته السيئة بَـس هالمرة فقط اعصابه وصارت بوجهي بَـس هذا ما يعني اسامحه بسهولة

- ولچ ماما گعدي

تطبش بالماي وتضحك
طلعتها نشفتها ولفيتها بالمنشفة هي وراسها خاف تتمرض
صعدت لغرفتها وفتحت الكنتور
- شنلبس اليوم؟

- ودي ماما ودي

- وردي وردي تتدللين ملاكي

طلعتلها فُستان وردي وويا ستريج مشبك ابيض
وحذاء ابيض ، مشطتلها وشلتها نازلين
اباوعله الاستاذ گاعد بالصالة صافن ورجله تنهز مبين يفكر
بَـس انتبهلنا عدل گعدته وضحك وهي تنزلت
مَن ايدي وركضتله تفتر گدامه
- هلوة بابا

لزم ايدها وفرها مثل الاميرات وبعدين طُبع
بوسة على كف ايدها وگال بحُب وعيونه تلمع
- يغديلچ فدوة ابوچ تخبلين

- ماما ثوتلي

باوعلي مبتسم غلست عليّ ومديت ايدي الها
- يله نروح لبيت بابا كليم خلي يشوفچ

عافت ابوها واجتني لازمه اصبع ايدي
طلعنا لبيت كليم وأحَس بوجوده ورانا
غلست وكملت طريقي داخلين للبيت
عافتني اسلم على عمة نجلاء وكمزت بحضن كليم السوا روحه متفاجئ
كليم- آه منو هاي الهلوة شنو هذا الجمال

ملاك- هتى بابا دال اني هلوة

گالتها تلف بشعرها حول اصبعها بدلال
نزل باس خدها
- اي والله مو بَـس هلوة تجننين

- بابا هم دال ادنن

كليم- اويلي عليك هُمام

- لوكية وين؟

كليم- رُقية يم امها

دارت تباوعلي بعونها الكبار
ملاك- نلوح ماما ثفت بابا تليم تافي

ضحك على كلامها لمكسر
- لازم الكُل يشوفها ويگلها أنتِ هلوة علمود تقتنع

كليم- ولا بيها مَن نرجسية هُمام ابد

- نقل اطباعه الها وهي ناقصها سوالف

كليم- الله يحفظها الكُم ، ابو الهَمم وين؟

- يا بالبيت يا بالحديقة

راح طلع يشوفه واني اخذت ملاك وصعدنا لغُرفة رنيم
دگيت الباب ودخلت اباوعلها تركض
تبدل لـ ريم ورُقية وحالتها بالويل
بَـس شافتني دمعت
رنيم- سارة تعاي ساعديني

- على كيفچ امي على شنو مستعجلة

رنيم- عمة خطية وحدها واني گعدت متأخرة وهذن وگفن فوك راسي إلا نبدل واني ما دا الحك

ملوكه تفتر بالغرفة تستكشف واني اخذت رُقية ابدللها
لان ريم متعودة على رنيم وتستحي مني
ما تأخرنا بسُرعة خلصنا ونزلنا خلتهن يم كليم
وركضت للمطبخ
اباوعله مثل عادته شم ريم مَن نحرها بقوة رُغم كبرت بَـس هوَ متعود
ورُقية حاطها على صدرة ، رحت للمطبخ
باب الصالة صار گدامي وصدح صوت لطمية
اباوعله يردد بيها ويبوس بيد رُقية وعلى وجهة ابتسامة ابوية حنونة

" انا عزيزة ابوها رُقية
بنت اليگعد ويحب اديه
تهضمني اشوف تدوسه الحوافر
حضنه لبناته مو الاعوجيه"

همست رنيم وهي سارحه بيهُم اكثر مني
- طفلة عُمرها سنة ما تنام اذا ما تسمع هاي اللطمية بصوت كليم

- حلوة تربيته

- حلو وجوده بحياتنا ، وحياتي بالاكثر

رجعت تكمل شغلها واللطمية ترن بكُل البيت
شوي واخذ البنات وطلع عرفته رجع يم هُمام
لـ لليل رجعت للبيت
بَـس استغربت مسرة هي وقسورة مختفين؟
رفعت التلفون واتصلت عليها هواي ما ترد !!
مشيت اريد اروح اشوفها وهي اتصلت
- وينچ أنتِ؟

مسرة- دا نقضي وقت اني وقسورة وعلاوي

- قلقتيني عبالي بيچ شي

- لا امي بَـس دا احاول احسن علاقتنا لذلك استغليت فرصة عطلة قسورة

ودعتها مَن اطمئنيت عليها
ورجعت يم ملاك نتابع كارتون انتظرها تتعب وتنام وحدها
وفعلًا بلشت تغفي شوي شوي وراحت بسابع نومة
گمت رايحة لغرفتي بَـس دخلت اختنگت
مسويها مدخنة الافندي
اباوعله گام طفى جگارته وفتح الشُبـاك
حتى تتهوى الغرفة
اخذت بجامة النوم ورحت للحمام سويت
روتيني وبدلت وطلعت
معطر الغرفة ومهويها وگاعد ينتظر عباله ابقى يمه

اخذت مشطي والسيروم اريد اطلع
هُمام- وين؟

- للغرفة الجوا اخذ راحتك أنتَ

ما شفت ردة فعله لان طلعت بسرعة
رحت للغرفة الجوا مشطت وتمددت صافنة
شوي ودخل للغرفة رفعت راسي اباوعله
مثل المؤدب سد الباب وتقدم نايم بالجهة الثانية مَن السرير

- ها؟

هُمام- اخاف وحدي

خزرته سوالفه يريد يمشيهن عليَّ !!
- هُمام اطلع اريد ابقى وحدي

- نامي سارة وخليني انام باچر عندي دوام

- اي اصعد نام فوك ما اريدك يمي

- تعبان وتعرفين عيني ما تغمض إلا يمچ لا تزيدين تعبي

- اني اطلع

گمت ورجع سحبني
هُمام- نامي ولچ ما اتقرب بَـس هيچ اتمدد

- ما اريد اطلع يا اني اطلع

ذب حسرة وگام طالع فعلًا
لفيت نفسي بالغطة احاول اتعود على مكاني
عسى ولعل اكدر انام !!
بَس وين والافكار تاخذني وتجيبني
ما دا اكدر اتخطى تصرفاته ويايَ والاتعس مسبته الاهلي
اهلي الما كدرت اشبع منهم
نزلت دموعي بضعف وما جان عندي مكان الجأله سوا "الله"

توضيت وفرشت سُجادتي بَس رفعيت ايدي للدُعاء
شهكت سامحة لدموعي تتحرر
- مكسورة منه يا رب بَس ما اريد أذيته اني مسامحته واتمنى أنتَ تسامحه وتعفوا عنه وترحم اهلي برحمتك الواسعة وتوفقني وتجمعني بيهم بعد موتي

اخذت القُران قريت شوي وسديته متصدقة
شكد حسيت براحة بعد هاي الخلوة اني وكلمات ربي
كمت صاعدة اطمن على ملاك بَس تفاجات ما موجودة بغرفتها
دخلت لغرفتنا بهدوء
رقت نظراتي بحنان من شفته حاطها بحضنه والممية بيده
هو ساند ضهرة على السرير وهي بحضنه بسابع نومه ثنينهُم
واضح كعدت تبجي وحتى ما يزعجني هوَ اعتنى بيها
اقتربت وما كدرت امنع نفسي من تمرير ايدي على شعره
ونزلت شوي طابعة بوسة على راسه وواضح مَن التعب ما حس

طلعت ونزلت جوا احاول اضيع وقتي بالتنضيف والشغل
غيرت البيت من فوك ليجوه
بَس حتى اشتت ذهني وانسى افكر بالصار لان اتأذة حيل
سويت ريوك خفيف واعرف وقت كعدته يمتى بسرعة جهزت الطاولة
رفعت عيوني على صوت نزلته يضرب الارض ضرب برجلة
وكف للحظة يستوعب وجودي وكمل طريقة
غمضت عيوني بقوة مَن تقرب حاضن خدودي وطبع بوسة
على جبيني وهمس بدون ما يبتعد
- اخليج تسامحيني وانسيج الصار وبعد ما يتكرر وعد زلم وابو الهَمم ما يوم وعد وخلف وأنتِ تعرفين شنو وعدي

بلعت ريك حلكي يابس وابتعدت بدون ما احجي
انتظر فعل لهذا الكلام وأثبات واعرفه كد كلامه
كعد يتريك واني شاركته بصمت لحد ما سمعت صوت ملاك
كعدت تبجي صعدت نزلتها وهي معبسة بعده النوم بعيونها
وبَس شافت ابوها ضحكت الملعونة
راحت بحضنه واني صرت اوكلها وهي بحضنه
بَس متحذرة خاف ادمر ملابس شغلة

انطانياها وكام بَس هي صارت روحها بي
- باباااااا

هُمام- شبيج بابا ليش البجي

- الووح وياك

ضحك وشالها مَن ايدي بايس خدها
- مَن ارجع اطلعچ بنيتي الحلوة

- هثه هثه

- سارة؟ عندي شغل والله وضروري هسه اطلع

اخذتها منه وهمست
- روح اني اقنعها

بَـس هي شمرت نفسها مَن حضني تبچي
بصعوبة سيطرت عليها وما وگعت لو ما هُمام
ممكن چانت حَـتتأذة ، رجع اخذها وهي تون مَن الصريخ والبچي
گعدت متنحسه وضايجة وبَـس تبچي
- ملاكي بنيتي ليش البچي حبيبة ابوها

- وياك اهدني هباب

- والشغل بابا والشغل اني مو اگلچ ارجع واطلعچ

- ماااااا هثه وياك هباب هبيبي احبش اني

- واني احبچ بعد رَوحـي

باوعلي مقهور وهي تبچي وهوَ لازم يطلع مستعجل
- واني ضامتلچ هدية بَـس اذا رحتي ويا بابا انطيها لـ رُقية

سكتت تمسح دموعها وتباوعلي ببراءة
- ثنو؟

- ما اگول روحي ويا ابوچ يلـه اني زعلت

درت وجهي امثل زعلانه واسمعه ما اعرف شنو يهمسلها
باوعتلهُم بطرف عيني هي ضحكت وهوَ ضحك على ضحكتها
مدتلي ايديها عود شيليني وفرحانة
- احبش ماما هديني

اخذتها مثل ما أمرت وهوَ طلع مستعجل
يركض ما يشوف گدامه
تذكرت عمة نجلاء مرة گالت "الرجال مَن يريد يطلع مَن البيت لا تعرضيله فال مو زين"
غمضت عيوني اطرد افكاري ويا سدت البوابة مَن طلع همست
- تحرسك الزهرة ام الحسن حبيبي

صعدت سبحتها وبدلتلها تلح تريد تعرف شنو الهدية
اخ لو تعرف چذبت عليها ، خليتها تلعب بالغرفة وطلعت
اتصلت على رنيم وحجيت بسرعة
- رنيم غلفيلي اي لعبة عندچ وجيبيها

- شصاير

- چذبت على ملاك لان بقت تبچي تريد تروح ويا هُمام وهسه محتارة شنو انطيها اذا عرفت تخزيني والله

ضحكت بصوت وگالت
- هسه اجيچ

سديته ورجعت امشطلها
- ماماااا

- روح امچ أنتِ

- هدية

- امشطلچ وانطيچ الهدية بنوتي

ضحكت متونسة وهاي الضحكة تنعش رَوحـي
كملتلها وعطرتها ونزلت جوا ويا دخول رنيم
چانت وحدة مَن ايديها ورا
بدون ما تلاحظ اخذتها بأيد وانطتني علبة مغلفة بدون ما تشوف
باستها وشمتها بقوة وهي تدلع عليها
- أمة

رنيم- احنه مو اتفقنه تگوليلي رنيم؟ شنو عمة بعدني صغيرة

- بابا يدول رليم أمة

رنيم- اي صح بَـس گوليلي رنيم

- فد لوتي يعلمها تگلچ عمة خاف تصيحلچ خالة

رنيم- لا خالة ولا عمة اني رنيم وبَـس مو ملوكتي؟

- ثح رليم

- ساااارة حَ أكُلهاااا

ضحكت على سوالف رنيم وياها وطلعتلها الهدية
- شوفييي شنو هنااا؟

نشغت بطفولية وعاطت
- هددددية

اخذتها تفتح بيها وعيونها تلمع
لحد ما طلعت لعابة باربي حضنتها تضحك
وشمرت نفسها عليَّ تبوسني
نزلت مَن ايدي تركض تروح تلعب بـ العابها
- ما اعرف بدونچ شسوي

رنيم- شسويت اني اللعابة كليم جابها وبعده ما منطيها لوحدة مَن البنات حاجيته ما گال شي وهوَ غلفها اني بَـس چبتها الچ

- شعجب جايب بَـس وحدة؟

- بيني وبينچ الكلام جاب تلاثه بَـس مر على بيت عمة علياء وشايفتها لمار وعاجبتها شايل ثنين ومنطيهن وحدة لـ لمار والثانية لـ ميار

هزيت راسي وغلست ما احب اي موضوع بيّ ميار
خلص اليوم بالروتين بين التنظيف والطبخ والغسل لحد ما اجه هُمام اخذ ملاك وطلع
ورجع مغلس ومتجاهل الموضوع ومتجاهلني !!
وحتى بالليل ما وصل للغرفة اخذ ملاك
وصعد لغرفتنا بدون ما ينطق ويايَّ بحرف واحد
واني اتخبل مَن هاي حركاته

لـ الليل كُلش بين النايمة والگاعدة حسيت بـ أنفاس تضرب رقبتي
وجسمي نرفع عن مستوى السرير وصار بالهوى
شهگت وعطت لافه ايدي على رقبته بخوف
- عزااا وين موديني

هُمام- العايقة صوتچ لا تگعد ملاك واشگچ شگ

- ينرادلك طن اخلاق ابو لسان الزفر

هُمام- بوسي وهوَ يصير نظيف

كشولت وجهي بقرف متقصدة لان اعرفه
يتخبل اذا يحس تلعب نفسي منه
نزلني وحصرني على الحايط وحرفيًا حسيت
انفاسي نقطعت مَن البوسة ، بوسة غضب وانتقام
ما بيها مكان للرُومانسية ملخ شفايفي تملخ

ابتعد يلهث واعصاب
- تلعب نفسچ؟

درت وجهي بدون ما اجاوبه اريد احرك گلبه واغثه مثل ما غثني
قبض على فكي ودار وجهي ناحيته يباوع بعيوني
- ام عيون تلعب نفسچ مني؟

- خلي افكر

هُمام- والعباس ويكرم اسمه اذا ما تجاوبين اشگچ هسه

ابتسمت منتصرة ورفعت جسمي على اطراف اصابع رجلي وبسته بشفايفه وابتعدت
- احبك بَـس بعدني زعلانه

- هوَ جاي اراضيچ

اخذ ايدي وفتح الباب ساحبني ورا
فتحت عيوني اتأمل الصالة محولها سينما حرفيًا
ظلام والشموع بكل مكان والريحة تجنن
فارش فراش وحاط فوگا غطوتي الحمرة
هي ومخادها وعليها باقة ورد احمر
وصينية حلويات واكلات سريعة مثل ما احب
وقريب منهن علاگات هداية هواااااي

گعدنا بمكانه
شغل موسيقى هادئة بتلفونه وسحب ايدي يبوسها
- اسف حبيبي ما چان قصدي اجرحچ الصار كله خارج عن وعيي ومع ذلك اني غلطان لان أنتِ مو سبب غضبي فما چان لازم اطلعه بيچ

- اهلي خط احمر

- تاج راسي والله غالين ومعزتهُم على معزتچ ومقامچ بگلبي
نسويلهُم ثواب ونوزعه على روحهُم وهيچ اكفر عن غلطي شوي ووعد السنة ختمة القرآن بأسمهُم

ابتسمت رافعه ايدي امسح على خده وهوَ يتأملني
- مسامحتك مَن اول يوم سامحتك بَـس ما گدرت اهضم السويته وقهري لذلك ابتعدت

- اعرف وحقچ ابد ما ضايج متفهم ردة فعلچ

- تعترف بغلطك وتحاول ترضيني عندي تسوى الدنيا وما بيها

ابتسم واخذ ايدي طُبع عليها بوسة وشمها حيل
سحبني لحُضنه مخلي ظهري على صدرة
وسحب باقة الورد حطها بحُضني شميتها ريحتها تجنن
هُمام- ريحتچ اطيب منها

ابتسمت وبقيت اتأمله فرحانه بيّ
سحب باقي العلاليك وطلع علبة فتحها
چانت قلادة وسوار عليهُم اسمي "ذهب"
- شدعوة هُمام ليش تكلف نفسك

- ما يغلن عليچ شهلائي

طلعهن وبعد شعري يلبسني القلادة وبالاخير طُبع بوسة على رقبتي وين السلسلة
وسوا نفس الشي مَن لبسني السوار
طلع العلاگه الثانية بيها شسوار شعر چان عاجبني حيل وأريده
شهگت بفرحة اطلعة مَن كارتونه
- هُماميييي هذا الشسوار العاجبني گتلك عليّ هذاك اليوم

مرر ايده على شعري يتأمل فرحتي
- موصي مَن زمان وأمَس وصلني

عضيت شفتي بحماس لونه اسود يجنن
مرر ايده يحرر شفايفي وهمس قريب أذني
- لا تعضين مصبر روحي بألف يا علي لا تغريني

- حبيبي شُكرًا

تقربت بايسة خده بقوة
وهوَ سحب العلاگه الثالثة وهمس
- فتحيها أنتِ

فتحتها چانت بوكس كبير مليان سوالف بنات
مكياج عناية بشرة جسم وشعر وعطورات وكلها اشياء غالية
هُمام- ما عرفت شنو تحبين طلبت مَن رنيم تختار الچ

بقن كم علاگه صغار حطهن على جهة
- هذول لـ ملوكه حلوتي أنتِ انطيهن الها

- لا حبيبي أنتَ انطيهن خلي تعرف أنتَ جبتلها

هز راسه وباس خدي
- رايحه احط الورد بالماي لا يذبل

هزلي راسه واني ركضت حطيته بڤازه
وحطيته على الطاولة بوسط المطبخ انطى منظر حلو
گلت باچر اصعده بغرفتنا
رجعت بحُضنه وهوَ لماني اله يشم راسي
- اسف حلوتي

رفعت راسي اباوعله عيونه مدمعة
- على شنو؟

فزيت مَن شفت دمعة فرت مَن عينه وحاول يخفيها عني
حاوطت وجهة بقلق امسح على عيونه
- هُمام حبيبي

- تأذيتي بسببي اجتچ النوبة بسببي قهرتچ وكسرت خاطرچ

حط شفايفه اليّ يرجفن على جبيني وكمل
- ارتفعت حرارتچ وتعذبتي بسببي حلفت ما تتأذين وما گدرت اوفي

- حبيبي باوعلي

رفعت راسه احاول اباوع بعيونه الخجلان يحطهن بعيوني
- سامحتك ما چان قصدك أنتَ ودا تحاول تصلح بيناتنا واهتميت لزعلي واعترفت بغلطك واحتويتني اني احبك ومسامحتك والله العظيم لا تسوي هيچ

حاوط خصري وصعد جسمي على جسمه ودفن راسه برقبتي
- خليني هيچ

مررت ايدي على راسه ورقبته
- ابقى العُمر كُله هيچ حبيبي

زفر انفاسه بتعب وطبع بوسه هناك
ابتسمت وبقيت امرر ايدي على راسه لحد
ما هوَ ابتعد بإرادته وابتسملي بحُب
ربع وصعدني بحُضنه ولف الغطوه علينا وشغل الفلم
ويسحب الاكل ويوكلني واحنه نتابع
احب هاي الفقرة بيناتنا احب دائمًا اسويها
لان بَـس بهذا الوقت نكون بَـس اني وياه وحدنا
بـ اجواء كُلها حُب ورومانسية وهدوء

مَن خلص الفلم
مددنا بمكانه رفع الغطوة على جسمي يدثرني
وبعيونه رغبة اعرف نهايتها شنو
غمضت عيوني حاسه بـ انفاسه قريبة
وهمساته تاخذني لغير عالم
- خلي عيونچ بعيوني حلوتي

فتحت عيوني ارجف وهمست ومَن قُربه طخت شفايفه بـ شفايفي
- بارده

بلع ريق وقرب جسمه مني وحاوطني بأيدي
رفع ايدي يعبث بخصلات شعري وشفايفي
قريبة مني
لا هوَ بايسني ولا هوَ مبتعد وراحم قلَـبي مَن هذا القُرب المُهلك
نبتت أظافري بجلد أيدي مَن لصق شفايفه بـ شفايفي بدون ما يبوسني
دفعت نفسي عليّ اكثر وهالمرة اني بادرت
بسته ورفعت أيديا محاوطه رقبته

هُمام- يغدي تراب هُمام ببوساتچ حلوة المسيح

غمضت عيوني مستسلمه لمشاعري
بَـس ما طولت مَن تذكرت احنه وين
دفعته عني اغطي نفسي
- ندخل للغرفة مو هنا هُمام

- اشش تعاي

رجعت ادفعه ارجف وعيني على الدرج
- هُمام ملاك تنزل عزااا ورنيم مفتاح البيت عندها خاف تدخل فجأة

هُمام- محد يجي سكتي سارة وتعاي

عدل بدل ماكو قفل هنا يعني هنا شگد حجيت
يسكتني مَن يبوسني وما گدرت اقاوم مشاعري
استسلمت وتقبلت رغبته بيَّ برغبة اقوة
وانتهت الليلة بشكل حلو مُحبب لرَوحـي
وراسي مسنود على صدره اليصعد ويهبط
بشكل سريع
دثرني بالغطة ولمني بحُضنه اكثر وقبل لا اغفه همست بتعب
- ملابسي خاف ملاك تنزل

حسيت بيّ مَن رجع لبسني وسحبني
حضني ونمنا بمكانه بوسط بعثرة مشاعرنا
بوسط نومتي فزيت على سوالف وضوء
قوي يضرب بعيوني
رمشت بثگل لحد ما عيوني اتقبلت الضوء واعتادت
اباوعله على نومته وملاك صاعده على صدره وتحرك رجليها منا ومنا
ملاك- ماما بيها واو؟

هُمام- اي گرصتها بگه

- هطية

- اي بابا مسكينة امچ بَـس هي عاجبها

فتحت عيونها تستوعب كلامه بَـس ما فهمت
تحركت وخزرته مَن باوعلي مبتسم بخُبث
عفية رجال لا يكل ولا يمل
يموت على سوالف السرسرة وشكو شي عيب
نزلت مَن صدرة واجت بحُضني
- بابا دابلي هدية ثوفي

سحبت العلاليگ وطلعت لعابات وصبغ اظافر واكسسوارات مال اطفال
تراويني فرحانة وهوَ نص جسمه سانده على
الكرويته وحاط ايدي ورا راسه يتأملنا
- تروح للشغل؟

- اي بَـس اتصل اخذت ساعة زمنية على ما اجهز نفسي

- روح اسبح وبدل على ما اسوي الريوك

هز راسه وگام صاعد فوك
جهزت الاكل ومَن شفته نزل بعد فترة
أمنت ملاك يمه ورحت اسبح
استعجلت خاف يريد يطلع ويتأخر بسببي
لگيته يوگلها وهوَ بَـس يشرب چاي
- ما ماكل؟

- اي حبيبي ما اشتهي چاي كافي

- بَـس مو زين عليك!

- اذا جعت هناك اكل لا يبقى بالچ

عفته براحته وهوَ بَـس خلص الچاي گام
عدل نفسه واهم شي شواربه على المراية
تقدم شم ملاك بقوة وسحبني مَن خصري بايس خدي
هُمام- انعل ابو الشغل اليبعدني عنكم

ضحكت وهوَ لازمنه بوس وشم
هُمام- والله ما بنفسي اروح واعوفكم

- روح حبيبي خلص شغلك وارجع احنه هنا ننتظرك وها حَ أجهزلك سمچ على الغده

- اويلي يابه

ودعنا وطلع واني شفت بعد وقت گلت اروح يم رنيم
وخابرت مسرة تجي اشوفها
البارحة دمعة بقت ببيت كليم
اكيد خطة هُمام هاي علمود نبقى وحدنه
لان اذا هي هنا مُستحيل نسوي هيچ اجواء ونبقى بالصالة
بنص الگعدة وهمستلي رنيم
- ترا بيبي عازمة عمة علياء وحَـتجي هسه واكيد البنات وياها

- لعد اني اروح

مسرة- تولي شعليچ بيها سارة

- ما عليَّ بَـس هُمام محلفني ما ابقى اذا ميار تتواجد لان يعرف تسممني بالكلام وما اريد ازعله مني بسبب هيچ موضوع

مسرة- لعد اني همات اطفر وياچ وما ابقى

دموع- اي مسرات تعالي لبيتنا اليوم نتغدا سوا حتى قسورة صيحيله

باوعتلي سارة وعجبتها الفكرة
- اي والله واليوم حَ أسوي سمچ شوي

مسرة- ما اگول لا والله اجي

ضحكنا وگمت ودعتهُم وللصدفة الغير متوقعة قابلتهن بالباب
علياء- واخيرًا شفناچ لو ما الصدف ما نشوفچ

سلمت واكلتني اكل بالسلام شگد طيبة هالمرة
ولحت ادخل وابقى وفد خجلت ارفض
وبقى تفكيري بـ هُمام خاف يعرف ويضوج
گلت ابقى عشر دقائق واتحجج بالغداء وارجع لبيتي
ركضت ملاك تصعد بحُضني ويا ما رفعت عيني گالت ميار
- ما گلتيلها أنتِ مو امها الحقيقية

شديت حضني على بنتي وعمة علياء خزرتها وگرصتها حتى تسكُت
- ملاك بنتي واني امها

ميار- ضحكي على نفسچ لا مَن صلبچ ولا مَن صلب هُمام شلون متحملچ ما اعرف

رنيم- متحمل لان يحبها وسبق وشفنا تجربتچ الفاشلة ويا وشفنا منو اختار ، عذريني عمة بَـس خواتي خط احمر لا تتقرب منهن ولا تأذيهن

ميار- خالو يقبل بـ أسلوبچ الرخيص هذا ويا ضيوفه

رنيم- اذا چان الضيف قليل أدب وما محترم نفسه يقبل

مسرة- ههه الصراحة ما اشوف رخص هنا غيرچ

ميار- العايبة تحجي أنتِ المفروض تطمين راسچ وما تحجين مَن عارچ

عمة علياء طول الوقت تزلغ بخدودها وتضربها تريدها تسكت
مسرة مَن قهرها هجمت عليها تريد تضربها
بَـس رنيم دفعتها وخلت دموع تطلعها
شلت بنتي اريد اطلع ووگفتني بكلامها
شگد صلفة ومستمرة بصلافتها
ميار- وحدة اتعس مَن الثانية ولا وحدة بيكُم ما بقى واحد ما لاعب عليها والعندنا ميتين عليچن ما اعرف شنو المُميز بيچن وحدة عقيمة والخ ما معروفين اهلها ووحدة ثاني يوم زواجها اغتصبوها وذبوها خرگه على زوجها ووحدة هه تزوجها خالي يطمطم عارها

درت عليها ويا صوت الراشدي النزل على خدها مَن عمة نجلاء وامها ضربتها موتتها
ولمار بَـس تبچي ما قابله على اختها وسوالفها
- هسه عرفت ليش رب العالمين زرع بيچ مرض القلب لان أنتِ انسانة مريضة وگلبچ اسود وملينة سم ودا تبثين سمچ علينا وتركبين بينا تهم مو النا بَـس حتى تحسين نفسچ افضل منه بَـس لو تموتين ما توصلين لأظفر مَن أظافرنا

بلحظة وحدة فتحت عيونها وهجمت عليَّ
اريد اشوف دربي ماكو
ومو لان ما اگدر ادافع عن نفسي سمحتلها
تضربني كُل هذا الضرب لا بَـس بنتي چانت بيدي
ومتت واني اسمعها تصرخ بخوف بَـس ما دا اگدر اشوفها
بسبب ميار اللازمه شعري وتفر راسي لدرجة حسيت رگبتي طگت
ما چانت اليّ نية اترك بنتي بَـس بسبب قوة الضرب فلتت مَن ايدي
وبعدها صار هدوء
رجف جسمي مَن شفتها على الارض لا حس ولا نفس
والدم يطلع مَن جوا راسها عبالك نافورة
بعدها فصلت عن الدنيا وما اتذكر شنو صار غير نوبة الصرع اجتني اضعاف مُضاعفة عن كل مرة
ㅤㅤㅤ
ㅤㅤㅤ

...

"دروب الإندثار" 🌪🤎