رواية دروب الإِندِثـار الفصل الرابع 4 - بقلم زينب صـلـاح 🤎

بقلمي : زينب صلـاح 🧡

لـ روايـة ﴿ دروب الإندِثار ﴾

في الـ part 3 ♡♡

لا تنسون التصويت + متابعة للحساب + التعليق بين الفقرات ☘️

نتلاگة واضمك
بالمكان الميت بدونك
نتلاگة وتدمع عيني وعيونك 🧡

•••••••••••••••••••••••••••♕•

فزيت ؏ قطرات ماي تتناثر على وجهي ، شهگت فازه اباوع داير ما دايري احاول استوعب الموضوع واني وين بالضبط؟

اباوع لـ مسرة ودموع يشهگن وعيونهن تصب بسرعة طفرن حضنني ، صفنت مصدومة واني اتذكر شكل سارة المشوه من الضرب ولسعات الجگاير بجسم شُبه عاري...

بعدتهن وحجيت بهمس..
- منو جابني هنا انتن وين چنتن وسارة وين؟

دموع- باعي احنه من اجينا من الشغل تأخرنا لان داده سُعاد گالت بما انُ رنيم ما تطلع تاخذن حصتها وانتن تبيعنها واحنه لان انتِ تعبانة وافقنا ما ردنا مشاكل قسمت سارة حصتج بيناتنا وطلعنا وبالرجعة سارة ضربت بواحد وغلطت عليه..

مسـرة•

رجعنا للمكان هلكانين تعب وبطنا تصرخ من الجوع بس كل هذا فدوة لـ رنيم ، تونا دخلنا وما اشوف غير سارة نضربت بواحد وصاحت..

- وعمممهه ما تشوووف

اباوعله يحط سارة بكفة ؏ ضخامته ، عيونه نطت ورد عليها..

- عدلي لسانج لا اشلعه الج من ساسه

- شو ما اعدله شتسوي؟

- اذلج واشوه جمالج

ما احس غير تفت بنص وجهه وگالت..
- اذا رجال سويها

مسح وجهة ونرسمت ؏ شفايفة ابتسامة مرعبة كلش اني ودموع بلعنا العافية ، دار ؏ رجال وراه وگال..

- اخذ الوراها واحبسهن ما اريد اسمع صوتهن

ما اشوفه غير لف ايده ؏ شعر سارة بحركة سريعة وسحبها وراه صوتنا راح من الصريخ وما نسمع بس صوت عياطها المفجوع الي هز المكان هز..

مسرة- رنيم انتِ وين جنتي؟

مسحت دموعي وطفرت من مكاني طالعة من الغرفة وبدون ما افكر اقتحمت غرفة داده سُعاد واشوفة گاعد رجل ؏ رجل بس شافني نزلها واخذلي نظرة من الطول للطول..

رنيم- اختي وين؟

عذاب- اخذوها زلمي يعالجونها

باوعتله بـ استحقار ، رفع حاجبه بتحدي رجعت اباوع لـ داده سُعاد وحجيت..

- اختي اذا صار عليها شي احرك الاخضر واليابس بدون ما افكر بشي والله

سُعاد- اوووه الحولة تهدد

عذاب- سُعاد لسانج ، وانتِ اختج راح ترجع بس يعالجونها

هزيت راسي وردت اطلع صاح..
- رنيم؟

باوعتله مستغربة ذكرى لاسمي..

- اختح طولت لسانها وهذا اقل عقاب بحقها واني اذا عفيت عنها فهو لخاطر عيونج الحلوة

لعبت نفسي وملامح الاشمئزاز وضحت ؏ وجهي عفته وطلعت بدون جواب گعدنا اني ومسرة ودموع گدام الباب ننتظر رجوعها..

وكل ما ارفع راسي اشوفه واگف بالشباك وعينه عليّ مركز بكل قوته ، همست دموع..

- منو هذا؟

مسرة- واحد من زلم سُعاد اكيد

رنيم- لا لا اكبر من هيج لان سُعاد تخاف منه كُلش وتحترمه وتسمع كلمته

مسرة- خاف واحد من الي تشتغل عدهم يعني بالتالي احنه تابعين اله عزاااا

دموع- شكووو شبيج؟؟

مسرة- عزا عزا انتِ مو گلتي تحسين عينه عليج رنيم خاف صدُك!!!!

حسيت الدم جمد بجسمي منين طلعلي هذا؟!! ومن جهة شوفة عمو كليم الي خلت ڪلبي يرجف احس روحي فراشة ؏ حواف النار واجنحتي لسعتها النيران وگاعدة اتلوه بدون حوله ولا قوة..

دموع- بيج شي رنيم؟؟

- شفته!

مسرة- منو؟ شبيج منو شفتي؟؟

- عمو اقصد عـ عمو كليم

شهگت مسرة وضربت ؏ صدرها ودموع وسعت عيونها مصدومة ،..

دموع- عليج الله؟ وين شفتي هو هو شافج عرفج جاوبييي

- لا لا جنت لابسه النقاب ما عرفني واني من شفته شردت حتى ما حاجيته

مسرة- عزا عزا حاجاج؟ شنو گال شصار سولفي رنيم يبس ڪلبي صخام الصخمني شجابه عليج من جديد شيريددد هذاا

سولفتلهن الي صار وهنه كل وحدة بقت تنطي تحليل اخر شي مسرة گالت..

- بعد ما تروحين تبيعين هناك نتبادل المكانات اني وياج

- لاا

- نچبي خاف حنيتي اله ونسيتي الي سواه بيج هذا السافل ترديننن اذكرج

- لا تغلطين واحترمي نفسسج ما نسيت وما احتاج تذكريني وبعدين اني مو ضعيفة واخاف منه واهرب

گمت اريد ابتعد قبل لا نتجادل ما حسيت غير كلماتها الي فززت جروحي..

مسرة- حنيتي لذباحج رنيم للشخص الي باعج علمود اهله

درت عليها خازرتها والدموع بعيوني..

- لا تحجين كلام اكبر منج

- ليش كذب مو هو الي باعج لـ سُعاد ويمكن هسه اجه يدور ؏ لعبته وانتِ عاجبج الوضع

دموع- كافييي لججج لا تمسلتين

مسرة- الي يحجي الحق صار يمسلت بنظركم؟ عجيب!!

رنيم- ؏ الاقل الي باعني ابن عم ابوي مو ابوي نفسه ست مسرة

وسعت عيونها وما احس غير دفعتني ووكعت ؏ الارض وايدها صارت ؏ الحرق شطت وصوتي طلع بدون وعي..

دموع- بيج شي رنيم؟

مسرة- اسفة والنبي اسفة اذيتج!!

توني اريد اجاوبها واشوفها نرفعت من شعرها اباوع لهذا الي اسمه عذاب يعت بشعرها ويهسهس..

- شلون تضربينها؟؟

گمت اسحب بيها لان اقرف المسه..
- عوفهااا لا تدخل عوف اختي

- ضربتجججج

- مااا دخلكك عوفهااا شتريد مناا انتَ شتريددد

نتر مسرة الي خنست هي ودموع وره ظهري..

عذاب- ما اريد شي

- لا تدخل بينا لعد وروحح

كز ؏ سنونه..
- رايح بس مؤقتًا راجعلج

خزرته واحس روحي مثل الطير المكصوصه جناحه وعاجز جسمي كله يرجف قبل لا يروح صحت..

- اختي وين؟

- جايه بالطريق

ابتعدت اڪعد وحدي وعيني ؏ الباب مسرة ما تقربت ولا حاجتني بس عينها عليّ ، لحظات ودخلت سارة تستند ؏ الحايط ووجهة ملفوف كله ما مبين منه شي بس عيونه..

رحت اركض سندتها من جهة ومن الخ مسرة ورحنا للغرفة نومتها ؏ السرير وغطيتها وهي ما نطقت بشي..

- دموع روحي جيبلها شي تاكل

سارة- ما اريــد

كالتها ودارت مطيتنا ظهرها وجهة ؏ الحايط بدون ما تنطق شي ثاني ، مع ذلك ما لحيت عليها وتفهمت موقفها..

؏ وگفتنا دخلت داده سُعاد اطك بالعلج ومتخصرة..

سُعاد- التهيتن اليوم بعرامتجن وما سلمتني الوارد

طلعن دموع ومسرة فلوسهن وانطنها وهي باوعت لسارة..

- وهاي؟

دموع- من تگعد نجيبهن الج

- اذا تأخرتن تنامن بدون عشه

عافتنا وطلعت ، رفعت مسرة ايديها وغمتها..

- خفيتي ان شاء الله

دموع- اسكتي كافي مشاكل اليوم والله تعبت

رحت بوستها..
- اكو اكل سويت روحي سبحي واكلي وتعالي نامي ورتاحي

ركضت ما گالت لا..

مسرة- رنيم!

ما جاوبتها عفتها ورحت لفراشي طلعت الكتاب مالتي من جوه المندر ، ابتسمت واني اتذكر شلون وصل هذا الكتاب..

جان عُمري 11 سنة وبوقتها شتاء والدنيا تمطر وترعد احس السمه راح توڪع ؏ راسي ، اصرت سُعاد اطلع وابيع حصتي وما ارجع اذا ما ابيعها كلها وإلا انام بالمخزن..

تحملت ولبست النقاب والجُبة واخذت حصتي وركضت اطلع اگعد بمكاني المُعتاد ، حطيت كارتونه وگعدت ؏ الرصيف حاطة ايدي ؏ خدي وصافنه بالرايح والجاي..

- ڪلنس بسرعة

رفعت راسي واشوف شاب حاط ايده ؏ انفه الي ينزف بسرعة طلعت كيس كلينس وفتحته اله اخذ كم وحدة وحطها ؏ انفه رافع راسة دقايق يله سكت النزيف..

باوعلي وگال..

- ممنونج اني

- العفو عمو

طلع فلوس وانطاني واخذ الكيس كله ، باوع للجو وگال..

- رجعي للبيت عيناي راح تمطر

- ابيعهن وارجع

- تؤ راح تمطر رجعي مو زين عليج

احتاريت شنو اگول وهو من سكتت اتفهم الموضوع جانت بيده شمسيه حطها يمي وگال..

- ما شايل مبلغ اگدر اخذهن منج كلهن وبيتنا بعيد ما اگدر ارجع فـ خلي هاي يمج خاف تمطر

- شكرًا عمو

هز راسه وعيني صارت ؏ الكتاب الي شايلة ، جنت احب اقرأ عمو كليم عودني اعشق الكُتب وكلشي يخصها..

- تردينه؟

- لا لا عمو شكرًا

مد الكتاب إلي وگال..
- خلي ذكرى مني الج واعتبرها هدية ؏ مساعدتج الي

ابتسمت واخذته بلهفة..
- شكرًا شكرًا

ضحك ولوح بـ ايده وراح ومن بعدها استمر يمر يشوفني ويروح اسمه جان غريب عليّ نوعًا ما مو سامعه بي من قبل 'جُنيـد' تعودت اشوفه كل يوم لحد عُمر الـ13 فجأة اختفى وطلع من حياتي وما عرفت عنه غير بقى أثر حلو بحياتي البائسة وبعدها صرت ابيع بغير مكان..

مسحت ؏ غلاف الكتاب وابتسمت جان بعنوان جدًا مميز وحلو «ولنا في الحلال لقاء» قرأته آلاف المرات لحد ما حفظت قصته وعن شنو تحجي..

- رنيم؟

رفعت عيني وخزرتها حطيت الكتاب جوه المخده وتمددت رجعت گالت..

مسرة- والله العظيم اسفة ما جان قصدي اجرحج بالكلام ولا تنسين انتِ ما قصرتي

گمت ونترت الغطه..
- وليش سويت هيج مو من بعد ما ظليتي تمسلتين بالكلام

- اعرف اعرف بس والله من حبي وخوفي عليج لان اعرف شگد هو مأذيج وشنو مريتي بي حتى تخطيتي صدمة بيعته الج ما تتذكرين شلون اجيتي هنا وشنو صار بيج؟

- ما حاجه تذكريني لان اني ما ناسية

سارة- عن منو تحجون؟

ثنينه باوعنالها وهي بلگوة تحجي من سكتنا رجعت گالت بحدة..

- منو رنيم؟!

رنيم- شفت عمو ڪليم

فزت مرعوبة بسرعة رحت لزمتها وهي حضنت ايديه وگالت بصعوبة..

- سوالج شي؟ أذاج؟ احجيييي لا تسكتييين!!

- لا والنبي لا هو ما عرفني لان جنت لابسه نُقاب وهم ما حجيت وياه عفته ورجعت

ذبت نفس براحة وگال بعيون مدمعة..
- اخاف ياخذج منه رنيم اخاف يأذيج ذول ظلام دامس يسحبج ويغرگج بحنانه وحبه بعدين تضيعين بهذا الظلام ويعوفج وحدج يترك ايدج بنص الطريق اياج توڪعين بهذا الخطأ مرة ثانية

رنيم- اعرف سارة ماكو داعي تحجين هيج

هزت راسها وعافتني ورجع دارت ونامت او تمثل النوم تهرب من اسألتنا...

سـارة•

لفيت نفسي بالغطه واسمع خواتي يداهرن ويتعاركن بيناتهن ما اعرف ؏ شنو وبالي مو يمهن بالي ؏ الي صار بغرفة المخزن..

من دفعني داخل المخزن وانتبهت ؏ عيونه حُمر وايده تفتح بحزام البنطلون تخبللللت تخيلته يغتصبني وينهي مُستقبلي وشرفي الي حافظت عليّ طول فترة التگدي بالشوارع..

لان بيع الكلنس والماي كان اشبه بالتگدي لان نحاول بكل الطرق نبيعهن ونرجع من وقت لان الشمس لا تُطاق اضافة لعذاب سُعاد اذا ما بعنا كله..

صرخت بي واني الزك نفسي ؏ الحايط..
- شدتسووووي؟!!

حط سبابته ؏ شفايفه وهمس..
- اششش اذبحج حسج ما اسمعه

اول لسعة من الحزام خلت صوتي يوصل للسماء لان مهما بلغ ضرب سُعاد النا فهو لا شيء يمه لان يبقى رجال وايده اقوى..

ضربته تلت الاخرى وصرخة اعلى من الي قبلها ، بُكاء ونحيب اضطريت بعض الدقائق اخضع واتوسل حتى يكُف عن تعذيبي وما اكتفى حتى بعد انقطاع الحزام  ظهري..

شمره ونتزل ؏ وجهي بصفعات خدرته وبسبب المحبس الي بـ ايده شوه معظم وجهي وهذا الي عرفته من اللسعات الحارقة لخدودي وبعدها ما اكتفى ولا اظن راح يكتفي..

بجمرات جگارته البُنية اكملها بحرق وجهي بيها قبل لا يرفس بطني برجله الركلة الي كانت القطرة الي فيضت الكاس وبعدها اغمى عليّ..

ما فكيت عيني إلا واني بالسيارة جروحي مضمدة ومعتني بيها وبطريق العودة لـ مكان جحيمي..

ما غمضتلي عين للصبح وگعدن خواتي وراحن للشغل..

گمت سبحت واحس الماي يلسع جروحي بس مع ذلك تحملت ، داخل هذا المكان المقرف مجبورين نتحمل علمود نصمد اكثر ونسند نفسنا وحدة ؏ الثانية..

گعدت امشط بشعري وفكري سارح بالفضاء تعبت من التفكير ، دخلت سُعاد كالعادة بملابس قصيرة فاضحه تسبب الغثيان والمكياج المبالغ وعلجها ما يوكع من حلگها..

عرفت ؏ شنو اجت لذلك ما انطيتها فرصة سحبت لفلوس وحطيتها بأيدها..

سُعاد- شاطرة سارة شاطرة

سكتت ما اجاوبها ورجعت ؏ السرير ما مهتمه لوجودها..

سُعاد- تعرفين شنو رغبة الباشا بهذا المكان؟

- ما يهمني

ضحكت يصوت عالللي..
- يهمج يهمج ونص إلا يصيب عقلج الجنون من تعرفين

نغزني گلبي من كلامها ولسبب ما رفضت اعرف وطلبت منها تطلع لان الموضوع ما يهمني ، قبل لا تطلع باوعتلي بنظرة ماگدرت افسرها وگالت..

- الندم يا الندم راح ياكل روحج وما تلگيله علاج

طلعت وعافتني اضرب اخماس بـ اسداس لساعات طويلة
رفعت عيني من دخلن التلاثه وجهن مخطوف وبالاخص رنيم وجهة اصفر وجسمها يختض مثل السعفة..

سارة- شكو شبيجن شبيج رنيم؟

رفعت ايدها الترجف بيدها محفظة رجالية وهمست بنفس الوقت عيونها صبت..

- ووڪع محفظته گدامي صـ صورتي بيها من واني طفلة

••••••••••••••••••••••••••

فارشه الكتب وگاعدة ادرس او احاول لان احتاج مساعدة وعمو كليم من نزل لحد الان ما اجه ومرت اكثر من ساعة واني اخاف انزل..

جوع وعطش وخوف من باجر اروح للمدرسة واتفشل گدام الطالبات لان ما دارسة صار المغرب وانا من الريوك ، دفعت الكتب ودخلت للحمام توضيت ورجعت اصلي..

كفيت السُجادة وگعدت مهضومة من الحياة الي جاي اعيشها وين جنت وين صرت صح عمو كليم ما مقصر ويايه وجدو وبيبي يحبوني بس جُمان الحية وزوجها أذوني..

حطيت راسي ؏ المخدة وسرحت بالفضاء شوي شوي وبدت عيني تنسد والنعاس يغلبني لحد ما نمت بدون ما احس ؏ نفسي..

- رنيمي بابا گعدي داشوف

فتحت عيوني ؏ كيف اباوعله گاعد بصفي يمسح ؏ راسي..

- گومي حبيبتي

گعدت افرك بعيوني وهو راح فتح الكيس من الصينية
جان جايب وياه اكل جاهز حطه ؏ الارض وگال..

- روحي غسلي وتعالي اكلي

طفرت اركض لان بطني ظلت اطلع اصوات من الجوع ، غسلت وگعدت بصفة اكل وما سئلت ؏ شي لان واضح معصب وضايج وسارح حتى ما اكل شي..

استحيت اگُله يدرسني وهو هم ما انتبه لهذا الشي لان فكرى مو وياي وباله مو صافي ، شال هو الاكل ونزل بي واني جمعت كتبي بالجنطة ولبستها..

ويه فتحي للباب هو دخل رفع حواجبه وگال..
- وين؟

- اروح لغرفتي انام

- لا اليوم هنا نامي

دخل وقفل الباب بدون ما يحط عينه بعيني اخذ جنطتي وحطها ؏ صفحه ، واتجه للكنتور يطلع فرش ومده ؏ الارض ، يتحرك بهدوء وبدون كلام تممد وحط ايده ؏ عيونه وگال..

- روحي غسلي وتعالي طفي لضوه ونامي ؏ السرير

- ليش عمو

- بدون ليش بناتي بابا سوي الي گتلج عليّ

وصدك ما ناقشته اعرف عمو عليم مضوجة ومعصبة لذلك سويت الي يريده بدون ما انطق بحرف..

الصبح گعدت متوترة وقلقانه وعيوني ؏ جنطتي حتى هو انتبه..

كليم- شبيج بابا صاير شي؟

- لا عمو بس بعدني نعسانه

- يـله ميخالف من ترجعين نامي

سوالي لفة وخلاها بالجنطة ومطاريتي خله بيها ماي معتدل البرودة ما يقبل اشرب بارد يگول يأذي اسناني وبلعومي وخاف اتمرض كلشي يسوي الي بعناية ودقة..

وصلني للمدرسة وانطاني مصرف وراح..

جان اسوء يوم دراسي يمر بحياتي من الاساس اني مستواي متراجع من بعد وفاة بابا وهسه زاد ما نقص اباوع لدفتري ماخذة تلاثه من عشرة نزلت دموعي بخجل وقهر..

ما اشتريت شي ولا اكلت وحتى الماي بقى نفس ما هو تعكر مزاجي ونهضمت ، طلعت من المدرسة ادور ؏ سيارة عمو من شفته احس شفت بابا منتظرني هرولت بفرح ناحيته..

- يا هلا يا هلا بحبيبة عمها

ابتسمت اعرفه ما يحب ياخذ مكان بابا..
- هلاو

فتحلي الباب ، صعدت بس مو مثل كل مرة الغي وما اخلي راسة يرتاح حتى هو انتبه..

- شبيها الحلوة اليوم؟

- ماكو شي عمو

- امم حلو احجيلي عن يومج شنو سويتي ويامن لعبتي

- ما سويت شي

باوعلي بطرف عينه ما مصدك بس سكت يحرك براسه ، صف السيارة گدام الباب بسرعة اخذت جنطتي ونزلت طايرة خاف يعرف..

توني وصلت للصالة واجاني صوته..
- رنيييييم

وگفت وجهي باهت الحية جُمان تباوعلي بشماته وبيبي خطية حضنت جسمي الها ، دخل بهيبتة وطوله يوزع نظراته علينا اخر شي گال..

- انطيني جنطتج

- لا عمو

خزرني..
- شگلت اني؟ انطيني الجنطة وامشي للغرفة گدامي

بيبي- عوفها يمه ما تشوفها خايفة وتتراجف شبيك وياها

كليم- رحمة للحمزة وحزامة لحد يدخل وانتِ بابا سوي الي گتلج عليّ ولا تغثيني تره تعباااان

انطيته الجنطة وركضت للغرفة قبل لا ادخل صاح..
- لغرفتتتي

غيرت الاتجاه ودخلت للغرفة مالته ، دخل بيده الجنطة گعد ؏ السرير وفتحها اول مال طلع اللفة..

- حلوو

وبعدين المطارة مالتي والمصرف..
- هاي ليش كلشي ما ماكلة وشاربه؟

- مو مو

- تعاي باباتي تعاي

تقدمتله سحب راسي وباسه..
- لا تخافين مني أأذي روحي وما اخلي الهوه يمس شعرج

بدون ما احجي طلعت الدفتر وراويته انفجرت بالبچي من عبس شفايفة وحجيت مهضومة..

- والله عمو حاولت ادرس بس ما اعرف لان كل مرة بيبي ادرسي لو انتَ وامس تأخرت يـله اجيت حيل خفت واستحيت اگُلك درسني وانت تعبان وهم انتَ حذرتني ما انزل ما گدرت اخلي بيبي درسني

اباوعله عيونه صارت حمر وجسمه يرجف دمارات گصته نطت ، كُلش خفت من شكل ، حمحم ومسح ؏ وجهه وگال وهو يرجع الدفتر..

- روحي ، روحي بدلي واكلي وناميلج ساعة العصر نطلع للنجف

كمزت وتناسيت كلشي..
- نرررووح لـ بابااااا

- ههه اي

حضنته ما مهتمه لتحذيراته وتعودت ما يبادلني لان يستحرم ، ابتعدت واشوف نظراته تعاتبني..

- عمووو

- حرام بابا كم مرة اگلج حرام ما يصير

- ليييش

- انا مُحرم عليج بناتي ما يصير انا مو.. استغفرالله

تنهد وكمل..
- اني وابوج اولاد عم يعني اني احل عليج شرعًا حالي حال الغريب

- شلون يعني؟

عيونه انترست حيرة ابتسم وحك شعره بتوتر منتبهه لـ ادق تفاصيله الي يسويها..

- مو مهم بابا من تكبرين اشرحلج هسه روحي سوي الي گتلج عليّ

- عموو ما زعلان مو فدوة لا تزعل

- لا بابا ؏ شنو ازعل شاطرة تعوضينها اني معصب من نفسي شلون هملتج امس ، يلـه روحي

رحت لغرفتي سبحت وبدلت ونزلت جوه بس شفت جُمان الحية ركضت مثل البرق يم بيبي خاف تستفرد بيه وتسويلها مشكلة وتخرب روحتنا..

شاورت لـ بيبي بهمس..
- راح اروح اشوف بابا عمو حياخذني

ضحكت بيبي وباستني ، كلش حنينة ولطيفة ما اعرف عمو عليم لمنو يشبه حتى جدو حباب وعمو كليم يجنن بس هو طالع منهم يختلف..

كملنا الغده وعمو فتح الموضوع مال روحتنا للنجف عمو عليم والحية مالتا گلبوا وجههم وعافوا الاكل وگاموا..

كليم- استغفرالله اللهم طولج يا روح

جدو- اخوك يا ابني ميخالف

- اخو يتبع كلام مرته ما اريد خلي يكفيني شره

بيبي- لا يسمعك يمه وتصير مشكلة كافي لخاطري

- اي يوم اي سكتت

گام وكمل..
- يلـه بابا گومي نامي ساعة وارتاحي ورانا طريق طويل ومتعب

كان هذا اخر طريق يجمعنا اني وعمو مع بعض لـ بابا من بعدها كلشي اختلف ، وكأنو الناس كانت حاطة ؏ وجهة اقنعه ووعت وصار كُلشي بالعلن..

..

وتستمر الحكاية.. 🚬♣

الانستا راح افتح بي اسك لأي سؤال اجاوبكم!
احبكم 💙