رواية دروب الإِندِثـار الفصل السادس عشر 16 - بقلم زينب صـلـاح 🤎

بقلمي : زينب صلـاح 🧡

لـ روايـة ﴿ دروب الإندِثار ﴾

في الـ part 13 ♡♡

لا تنسون التصويت + متابعة للحساب + التعليق بين الفقرات  ☘️

عندما يحب الناس شخصًا يقولون :
"الدنيا بچفة وأنت بچفة"
ولكن أنت بالنسبة لي بالكفتين .

•••••••••••••••••••••••••••♕•

حسيت برَوحي توجعني شي برَوحي جاي يتعذب واني اشوفه غارك بدمه وفاقد ، مات قبل لا اشبع منه وازيل شوقي واشكيله الي عشته اريد اعتذر ؏ كُل لحظة شكيت بي شك سوء
بس قبل لا اسوي كل هذا هو راح وعافني!!!

رفعت ايدي الترجف غارگه بدمه فستاني الابيض صار عبارة عن لون احمر!!!  فزيت ؏ شخص يتفقدني بذعر..

هُمام- بيج شي حبيبتي بنيتي؟!

- دم دمم مات

هزني من اكتافي بقوة بس اني جنت فاقدة صرت ما احس بشي من الي حولي والرؤية صارت شوي شوي تتلاشى حتى وگعت بظـلام دامَـس!!

ㅤㅤㅤ
ㅤㅤㅤ
ㅤㅤㅤ

هُـمـام•

اصعب موقف مريت بي بحياتي هذا ، من يكون الانسان مضطر يضحي بشخص علمود ينقذ شخص ثاني بين خيارين يا الموت يا الموت بين فرصة وحدة مالها ثاني!

تكلفت بمُهمة وجانت سرية (راح نتخطى التفاصيل لان محد قبل ينطيها)..

اسم ؏ مُسمى مُهمة سرية لا لصديق ولا الاخ تنحجي وشگد ما اگول اني وكليم اخوة درت هاي المُهنة بعيدًا عنه وبدون ما افصح عن شي وكل غياباتي جنت انطي اعذار واهيه رغم هو يعرف الف وادور بس طبعة ما يلح بالسؤال..

من الاخير مو فضولي يسأل مرة حصل جواب كان بها ما حصل يغلس..

المُهمة جانت تخص شبكة متنوعة بكافة الاجرام كُل الانواع يتعاملون بيها جان دخولي بيناتهم جاسوس رغم هُما يعرفون اني ضابط
بس بين قوسين «ضابط فاسد» علمود اقنعهم بصدق نيتي!!

بعد اشهر من الشغل والتعب والاختبارات يلا صارت بيناتنا ثقة وصداقة وطيدة بزلمة الراس الكبير بيهم عذاب لدرجة صار يحجيلي اسراره والخ..

مواضيعه جانت عبارة عن طفلة بعمر الـ ١٧ سنة يحبها ويريد يزوجها بالبداية ما جان ينطيني تفاصيل واني ما اهتميت صح احترك دمي لان طفلة شنو ذنبها تتحمل واحد مريض مثله بس بالنهاية ما بيدي شي حاليًا لحد ما نفك المنظمة مالتهم كلها واكيد بهيج ؤاح اساعدها تخلص منه..

بيوم صدمني من حجه عن كليم ، شنو العلاقة؟ شنو جاب كليم عليه بوقتها جان شارب استدرجته بالكلام لحد ما وضحت الحقيقة المُرة وانُ الطفلة الي بين ايدي بنت اختي!!

جنت راح اقتله وادخل اخذها وانعل ابو المُهمة بس فكرت بيها هيج راح اعرض حياتها الخطر هي والبنات الي وياها ، صرت بين نارين رجعت وحجيت الي اعرفه للقائد مالتنا طلبت حتى توسلت بي نداهم البيت واخذها بس رفض ردت احجي لكليم رفض رفض قاطع لان الكل صار يعرف نقطة ضعف كليم هي رنيم..

جنت اشوف اخوي يتلوع بين ايدي عليها وما اگدر احجي ، ولا اني اگدر اسوي شي غير اصبر رَوحـي بالچگاير واگول اكو نور بنهاية النفق وراح اگدر انقذها وكليم راح يعذرني..

بس الامور اطورت بغير طريقة من اجن البنات والكلام وبعدها اختفى حتى مني قلقني الموضوع خاف عرف بوضعي بس لو عارف ما يتركوني عايش لحظة وحدة!!

لحد ما بعد اشهر تواصل وياي رحت وتقابلنا جانت ايام رمضان..

عذاب- اعذرني هُمام بس صارت امور واضطريت اختفي فترة

- خيرك؟

عذاب- هذا الضابط الي وياك كليم

- شبي؟

عذاب- جاي يدور عليّ وردت اختفي فترة خاف كلشي يصير ردت اضمن البنت اول بعدين كُلشي سهل

رجف گلبي بس حاولت ابين طبيعي..
- تزوجتها؟؟

ضحك وجاوبني..
عذاب- لا بس قريبًا ان شاء الله

- شنو بالك عذاب اگدر اعرف؟

عذاب- اي ليش لا

گام حط شرب بكلاص وانطانيا..
- تعرف ما اشرب

عذاب- لخاطري ولو!!

- اعذرني صح ساقط وكُلشي اسوي بس هذا السَم ما اشربه

ضحك بصوت وجاوبني..
عذاب- علمود جسمك مو؟

- لعد شلون هههههه

هز راسه وگال..
عذاب- رنيم ما جاي تخضع بأي طريقة والصراحة اني مليت من الانتظار وقلقان لا عمها العار يوصلنا ؏ اي لحظةة لذلك قررت اخطفه

- شلوون؟

عذاب- خليها يمي شلون بس اريدها تخضع واعرف هذا النذل نقطة ضعفها

- وبعدين يعرفك اكيد هم ما راح تخلص؟

عذاب- ومنو گال يبقى عايش بعد ما اخذ الي اريده؟

جاوبته ابين ما مهتم بس داخلي يغلي مثل البركان..
- تسوي فضَل وتخلصني منه

عذاب- شنو مسويلك وهيج تكرهه؟

- يعرقل شغلي تعرفه هه ضابط شريف واله سُمعة

عذاب- امم وصلتلي الاخبار يگولون محبوب عند الكل

- عداي طبعًا

- هههههه اي اي

مرت فترة واستأذنت وطرت للمقر وسولفت للقائد كلشي بهاي اللحظة اضطرينا نحجي كلشي لـ كليم وما اسولف عن نظرات الكسر والخذلان النظهن اليّ..

بعد ما اتفقنا ؏ الخطة وطلع ركضت وراه..

- كليمممم

وگف وطلع چگايره دخن وحده وذب دخانها ، عيونه حُمر وايده اللازم بيها چگارته ترجف بشكل مو طبيعي للحظة خفت لا يوگع ويصيرله شي! بس عكس كل الي اشوفه من اضطراب جسدي حجه بثبات رَوحي..

كليم- حسافه بيك كل كلمة خويه گلتها الك

- لااا كليم لااا افهمني اني...

كليم- اشش ما اريد اسمع اي تبرير لان كل تبريرات الكون ما راح اطفي جزء بسيط من النيران الي جاي تاكلي رَوحي هسه

- بس اني اخوك واستحق تسمعني!!

كليم- گتلك حسافه بيك هاي الكلمة بس..

ذب الچگاره وسحگها بقوة ونتر..
كليم- الموضوع خطر ويمكن ما اطلع منه سلامات رنيم امانتك اعرفك تفديها بروحك دير بـالك عليها وعوضها هي وخواتها البنات لا تفرق بينهن ، وعائلتي!

غص بكلامه بلك ريك وهمس صوته يرجف..
كليم- بنتي لا تحسسونها باليتم ديروا بالكم عليها

هذا جان اخر حديث بيني وبين كليم حتى بيوم التجهيز للمُهمة وحط نفسه طُعم لـ عذاب ما قبل يحجي ويايه والذبحني يوصي بقسورة ؏ عائلته لحد ما راح هو يوصي بي عليهم..

حضن الكل وما حضني ، وجعني الفراق وسط الزعل!

بالوقت المُحدد داهمنا المكان والحمد لله ما جان اكو خسائر لحد ما دخلت للمكان وشفتها هي وياه غرگانين بدمهم قسورة ركض لـ كليم واني سحبتها اليّ اهزها اريدها تنتبه لوجودي!

هُمام- بيج شي حبيبتي بنيتي؟!

رنيم- دم دمم مات

اشوفها تذبل بين ايدي لحد ما وگعت لا تحرك ايد ولا رجل رفعت عيني وانصعقت من منظر كليم ، جان كُله عبارة عن دم!! صحتتت بصوت احس بلعومي تجرح...

- قسوووورة شبييييي؟

قسورة- نبضه نبضه ضعيييف وين صارت سياااااااارة الاسععااااااااااااااف

صارت ضجه واحد يركض منا واحد يركض منا لحد ما وصلت سيارة الاسعاف ونقلوا وقسورة راح وياه ما عافه ، شلتها بين ايدي بخفة الريشه عبالك طفلة بعمر السبع سنوات وزنها خفيف وضعيفة حيللل!!

حطيتها بالكرسي الي بصف السايق وركبت طاير وره سيارة الاسعاف عيوني تحرگني والهضيمة عذاب فص ملـح وذاب ماكو! بين كُل الي قبضنا عليهم وبين كُل الجثث ماله أثر گدر يشرد منه النذل
بس شلون؟ راح اتخبل شلون گدر يشرد بدون ما نلمح أثر اله؟!!!! عقلي راح يوگف..

بس وصلت شلتها وركضت بيها للطوارئ عين عليها وعين وره قسورة ردت اروح وراه بلحظتها بس خفت ياخذها عذاب ونكون طلعنا بخسارة وكلشي ما سوينه..

ظليت بين نارين!
ㅤㅤㅤ

••••••••••••••••••••••••••••••

ㅤㅤㅤ
رنيـم•

فتحت عيوني ؏ ريحت الديتول القوية! احس راسي راح يطگ
صفنت وبدت الاحداث تنسرد بعقلي شوي شوي لحد ما استوعبت منظر عمو كليم!!

دفعت الغطى ونزعت الكانونة بقوة ما مهتمه للدم الي صار يجري ؏ الارض! بس وگفت ؏ رجلي حسيت بدوخة بسرعة سندت نفسي ؏ الحايط وغمضت عيوني بقوة احاول اتعود..

لدقائق يلا گدرت امشي بس طلعت صار بوجهي الرجال الي شفته قبل لا يُغمى عليّ فتح عيونه بذعر من شاف الدم لزمني من كتفي وسحبني للداخل مگعدني ؏ السرير..

هُمام- الله الله هاي ليش هيج مسويه بنفسج

- عمو عمو ماتتتت

هُمام- اسم الله بيش مفاوله عليّ كلشي ما بي ذاك هو زين ويسأل عنج

ضحكت..
- والله؟ اخذني اله فدوة!

هُمام- هههه والله بس شنو انطوا علاج ورجع نام من يگعد اخذج اله

عقدت حواجبي بشك حسيت جاي يسايرني ، نترت ايدي منه بعد ما لفاها وكملها رفع عينه اليّ مستغرب ردة فعلي..

- اخذني لعمو اني مو طفلة وتضحك عليّ

هُمام- يعني اني چذاب رحم الله والديج

همست بخجل!
- مو قصدي

دار اخذ كيس وما اهتم لكلامي طلع منه ملابس وحطهن يمي وگال..

هُمام- گومي بدلي علمود اخذج تشوفين كليم واطلعج للبيت

- ما اطلع بدون عمو كليم

هُمام- تره اصدقائي والممر متروس زلم راح ادوس ؏ نفسي واخذج بس علمود تطمئنين عليّ ويرتاح بالــج واخذج ترتاحين انتِ هم تعبانه

گمت متجاهلته ، دخلت للحمام واني حالفة اذا مو ويه عمو ما اطلع ، لفيت شالي عدل وطلعت ابتسم من شافني واجه مد ايده الي يريد الزمها..

- حــرام!

دنك اخذ ايدي وگال وهو يمشي..
هُمام- لا مو حرام بعدين اشرحلج بنتي

- شتصير من عمو؟

هُمام- صديقه

- لعد حــرام!

هُمام- مو حـرام

- ليش؟

هُمام- اششش وصلنا نزلي راسج وامشي اياج ترفعين راسج

سمعت واحد منهم صاح..
- حي الله ابو الهَمم

هُمام- ههه حياك خيي

- اجينه نطمئن ؏ ابو ريم شلون صار؟

رفعت راسي فاتحه عيوني ابو ريم شنو؟ بسرعة عصر ايدي خازرني نزلت راسي دايخه يعني صـار عنده بنت واسمها قريب من اسمي حيللل!!

جاوبه..
هُمام- زين الرصاصه مكانها مو خطر

حجه وياهم شوي ومن خلال كلامهم فهمت عذاب شارد! حَسيت بطني لوتني من الخوف ، سحبني وراه استأذن من الدكتورة وطلب من الممرضه ترافقني اله ، سألتها..

رنيم- يصير يرافقه شخص؟

- اي عيني شخص واحد

هُمام- ليش تسألين رنيم

- لان راح ابقى يمه ، يلا خلي نروح

عفته اتبع الممرضة درت اباوعله فاتح عيونه بس انتبهلي خزرني وهز راسه بمعنى 'اني الج'.
درت اكمل طريقي احاول اتجاهله..

حَسيت گلبي مثل الطير يفرفح لشوفته ، فتحت الممرضة الباب وسمحتلي ادخل وگال بتحذير قبل لا تطلع..

- بدون بچي وياريت ما اتعبين المريض لان راح نضطر انطلعج بره

هزيت راسي الها ودخلت اقدم رجل وأخر رجل لحد ما وگفت رجف گلبي واني اشوف الاجهزة داير ما دايره وهو مغمض عيونه ووجهه شاحب ، شهگت بصوت بسرعة رفع ايدي مكممه حلگي اخاف ازعجه..

سحبت الكرسي بهدوء وقربته ؏ السرير وگعدت سحبت ايده وبستها بشوغه شهگت ودموعي توگع ؏ خدي رجعتها ؏ السرير حاطه راسي عليها ابچي بلوعه وارجف بلگوه طلع مني الكلام!

- كسروا رنيمك بـابـا كسروا بنتـك يـا رَوحـي جنت اغالـط نفسي بكل مرة اتذكر انتَ بعتني بس كُلشي جان ضد الحقيقة يا بابا كُلشي ردتك بكُل ليلة نمت بيها متوجعه ومقهورة بابا شوهوا جسم رنيمك بالحروق اصرخ باسمك من انوجع اهلوس بأسمك من انام ابچي واگول اسمك اواسي نفسي بيّ بابا اگعد ولا تعوفني خايفة من العالم كله ، تعرف شنو ههههه تعرف شنو يشرح وضعي هسه كلمة وحدة وهي 'الامان' اول مرة بعد ثمان سنوات فراق احس بهذا الشعور لاول مرة احس اگدر انام واغفى مرتاحة بظهري كليمي ابوي الرَوحـي يا رَوحـي انتَ بسرعة صير زين بابا حتى تحميني يگولون عذاب شرد واني خايفه يرجع ياخذني منك اااه يا لوعة فرگاك اصعب من لوعة فراك ابوي يا هلي كُلهم انتَ

انهاريت بكل ما عندي من قوة ابچي واشهگ نسيت كلام الممرضة نسيت كُلشي بس جنت محتاجه احجي وابچي احتاجيت اذب همومي بشكل دموع عسى ولعل ارتاح شوي!

بس ما جنت متوقعة رد منه لحد ما اجاني صوته الجهوري المُرتجف!

كليم- يا لوعة فراكج اصعب من فراك ابوي يا بناتي كُلهم يا حيل كليم انتِ!

رفعت راسي حيلي يرجف! ضحكت ما مستوعبه وجوده وكلامه! عيونه حُمر والدمع يوكع بسلاسه ؏ المخده فقدت نسيت اني منو هو منو احنه وين نسيت كُلشي..

نهضت نفسي وصرت ابوس بوجهه وارفع ايده ابوسها وارجع ابوس خدوده وجبينه وهو تعالت صوت ضحكاته الحلوة..

كليم- بهداي بناتي

- مشتاقهههه كووومة بابا

كليم- روح ابوج تعاي

سحبني ؏ كيفه حاضني صار راسي ؏ صدره من جهة گلبــه ، سمعت ضربات گلبه مثل الدمام تتراقص داخل قفصه الصدري! وشفايفه توزع بوسات متفرقه ؏ راسي للحظة خجلت لان جان عاري وتذكرت شنو سويت بلحظة فرح..

حسيت حراره تطلع من وجهي ابتعدت شوي شوي منزله عيوني اتلافى نظراته..

كليم- شبيج؟ ضوجتج؟ أذيتج بابا؟

باوعتله بخجل وعضيت ؏ شفتي ما اعرف شنو اجاوبه اخذ لحظات حتى اعتلت ابتسامة معرفه ؏ وجهه وگال..

كليم- عذريني رنيمه بس ما مصدك انتِ بين ايدي واخيرًا

- اني هم ما مصدكه ولا جان اكو توقع واحد بالمية بيوم راح ارجع اشوفك ، جان حلم! حلم كُلش جميل صعب يتحقق بس تحقق ولقيتك ويا فرحة لُقياك ابوي الرَوحـي

كليم- امي وابوي انتِ كبرتي وصرتي تعرفين تحجين كلام يصهر گلب ابوج! كُلشي متغير بيج بابا كُلشي تغير بيج بعيد عني عدا هالجوهرتين!

رفع ايــده يتلمس اجفان عيوني! همـس ببحه..
كليم- نزليلي حالف ابوس عيونج واعتذر منهم ؏ كُل وجع مر بيهن ؏ كُل دمعة نزلت منهم بخلافي.

دنگت اخذ راسي وباس عيوني بلوعة وهمـس..
كليم- عذرني يا جوهرات كليم وعد اعوض التعب بفرح وعد اب لبنته وعـــد!

شهگت مبتعده من انفتح الباب بقوة جان 'هُمام' قلص عيونه يباوعلنا بشك ، حمحم وتقرب من السرير بس عمو كليم شاح بوجهه بزعل استغربت الوضع..

هُمام- خوفتني عليك!

كليم- خوش

هُمام- كافي زعَل خيي افهمني جان امر ما اگدر اخالفة وتعرف العقوبة شنو!

كليم- اريد اطلع هُمام دبرها

هُمام- بس بعدك..

كليم- چؤ من اطلع اتحسن اكثر رجعوني لبيتي

هُمام- هسه اخلص اوراقك بس تره الشباب بره يردون يسلمون عليك!

گالها وثنينهم باوعولي ، عبست بضوجه وگلت..
- راح ادخل بالحمام انتظر

گمت بعد ما عمو هز راسه الي شوي وصارت ضجه وسلام تقريبًا نص ساعة اني بالحمام انتظر يلا سمعتهم يتسالمون وراح يطلعون تنفست براحة وبس عَمّ الهدوء طلعت انفخ بملل..

- تعبتتت عموو

كليم- تعاي بابا

رحت گعدت ؏ الكرسي وحطيت راسي ؏ كتفه بتعب دمعت عيوني حجيت وطلع صوتي يرجف!

- ما اريد اروح وياك للبيت!

كليم- ليش؟

- عمو عليم..

رفع ايده بسرعه ساد حلگي وگال بهدوء..
- ماكو مات بعد ما يگدر يأذيج

رفع راسي شاهگه..
- انتَ قتـ..!!

كليم- لااا حادث سوه ومات

ابتسمت مرتاحه ورجعت راسي ؏ كتفه..
- لعد اروح وياك تنومني مثل قبل وتسولفلي قصص وتسويلي اكل وتهتم بيه بس خاف بنتك تغار؟!!! بس اني راح احبها هوااااي وما راح اخليها تغار مني ابدًا

كليم- تدلل بناتي تدلل

ضحكت بخجل وسكتت شارده! وين جنت وين صرت منو جان يتوقع ارجع لعمو كليم؟ همست بضياع..

- هواي عندي اسئلة عمو

كليم- واني هواي عندي عتب رنيمه

هزيت راسي بدون ما اباوعله!
- من نرجع للبيت ونرتاح كُلشي نحجي مو؟

كليم- طبعًا

- خواتي شلونهن؟

كليم- زينات بس مشتاقاتلج

- اني اكثر اريد نروح بسرعة اطمئن عليهن اكيد قلقانات هسه

شوي ودخل هُمام بس ما ابتعدت ، اخذله صفنه مرتبة علينه فرك وجهه وما اعرف شنو يحجي بهمس بس اسمعه يستغفر بصوت اخر شي گال..

هُمام- اني مو گــوا* كليم!!

كليم- بلي انتَ كذلك

تقربت هامسه بذانه..
- شبي هذا الغول؟!

خرب عمو من الضحك ، ضحكت ؏ ضحكته وبس باوعت لـ هُمام نتر..

هُمام- بعد بعد بوسي بحلگه گدامي شو انتِ زايعتها كُللللش

كليم- هههه اكل وحل

- هسه انتَ شكو واگف فوك راسنا مثل شمعة الفگر ما تطلع

فتح عيونـه وعمو حط ايده ؏ حلگي وگال..
كليم- عيب بناتي شنو هذا الكلام؟ اعتذري

- ما گلت شي اني

كليم- عيب تتجاوزين ؏ الاكبر منج بابا

- هو يتحرش شسويله

تنهد مزعوج من عنـادي! يمكن ما جان متوقعني بهذا الشكل لان رنيم الي رباها جانت طفلة مُطيعة هادئــه جدًا عكس رنيم البنت الي ربتها الشوارع والتحرشات وغيرها..

هُمام- يله گوم خلي اساعدك تلبس وانتِ غضب طلعي لو تردين تباوعين ما انصدم صلفة لان!

كليم- عوفها هُمام

نفخت طالعة اهمس بغضب..
- الغول الاصفر ابو ريحة الخايس

رفعت راسي عاضه ؏ شفتي بفشله ، جانوا ضباط ثنين واگفين گبال الغرفة ومبتسمين! اكيد سمعـوا الي گلته ، تجاهلتهم وگعدت ؏ الكرسي انتظر فترة مرت يلا طلعوا..

جان هُمام ساند عمو بسرعة ركضت ساندته من الجهة الثانية..

- عمو انتَ زين مو؟

كليم- اي بابا

- ما عندك وجع؟

هُمام- تره رصاصة مضروب مو ابره عقلج يستوعب هذا السؤال؟

- انتَ شدخلك؟

كليم- اششش كافي هُمام عوفها وانتِ بابا عيب عيب تردين بوجه الاكبر منج!!

- خلي يعوفني هو

زفر ضايج خزرت هُمام الي رجع خازرني وضام شفته جوه كاتم ضحكته الغبي ، هو صح وسيم واشگر كُلش حلو بس غثيث حيلللل ايع ما حَـبيته..

گعدوا گدام بالسيارة واني وره بس ماده راسي عليهم وكُل شوي اسئله 'انتَ زين عمو؟' وهو يجاوبني بـ أي او يكتفي بهز راسه لازم ايدي وكُل شوي يرفعها يبوسها بحنان ويحطها ؏ صدره..

دمعت عيوني مشتاقه لحنانه واهتمامه وحُبه مستحيل شخص ثاني يگدر ينطيني كُل هاي العاطفة بدون مُقابل! حتى عذاب جان يريد يتملكني مو حُب بلا هوس بـ امتلاك شي مو اله وما راح يكون بيوم اله!

صف السيارة وهمس..
هُمام- وصلنا

نزلت اباوع كُلشي متغير ، ثمان سنوات جانت كافية تغير كُلشي البيوت ، الطرق ، الناس وحتى القلــــوب فزيت من صفنتي ؏ صوته..

كليم- بناتي!

ركضت لازمه ايده عصرها بخفه وسألني واحنه متجهين للبيت..
كليم- جاهزه بابا!

- خايفة

قبل لا يرد عمو گال هُمام بصوت جهوري وجدي..
هُمام- هاي الكلمـة ممنوع تمر بمنطوقِــج بظهرج زلم بابا تكسر اكبر راس يفكر يندك بيج

دك الباب بقوة وكمل عمو كليم..
كليم- بعـد ماكو خوف اكو امان رنيمه

..

وتستمر الحكاية.. 🚬♣

قناة التلي zainab_salah0