رواية دروب الإِندِثـار الفصل الخامس والعشرون 25 - بقلم زينب صـلـاح 🤎

بقلمي : زينب صلـاح 🧡

لـ روايـة ﴿ دروب الإندِثار ﴾

في الـ part 22 ♡♡

لا تنسون التصويت + متابعة للحساب + التعليق بين الفقرات ☘️

‏
"توصل للزعل ونمدها
الچفوف
وتوصل للكرامة ونِبتر الإيد"

•••••••••••••••••••••••••••♕•

رنيم•

الفقد مؤلم ، شعور الفقد مؤلم ، خطر الفقد مؤلم ..

من بعد جُملـة هزت قوانا أُغلق الخط !!
مر يوم كامل وقسورة ما يجاوب ؏ المكالمات
ومن بعد الحاح اغلق الخط وصار خارج
التغطية
صارت روحي تلوب لا هي بالسماء ولا بالارض..

احير بشعور الكلمات وافكاري
لو احير بسارة الي فقدت بصرها
وبس تبچي
تصرخ من وجع راسها وفقدان بصرها
تفرفح گدامي ؏ خالي ..

حـسيت هاي ايام ثقيلة ؏ گلبي وما عاد اگدر
اتحمل واصبر اكثر
شتحمل بعد ليش اكو ازيد من الـصار؟
اگدر اتحمل اكثر من هيج ، امتحانك صعب ربي
عيني بيدكَ التي لا يقوى عليها احد يـا اللّٰه..

بروح خاويه مررت ايدي ؏ راس سارة النامت
بعد مرحلة من الصريخ والوجع والتعب !!..

رفعت راسي واحس بجمرات دموعي تسيل ؏ خدي واني اردد..
- الامان الامان يا صاحب قَلـبي والزمان

حطيت راسها ؏ المخده وگمت مغطيتها زين
طلعت من الغرفة ونزلت جوه
چانت عمة بالمطبخ بس شافت وجهي اجت حضنتني وهي تمرر ايدها ؏ ظهري..

نجلاء- كافي ماما هلكتي نفسج بين خواتج ونسيتي روحج هم الها حق عليج

- فداهن رَوحـي عمة فداهن بس يبقن وياي وگدام عيني ما رايده شي من الدنيا كلها غيرهن

- ومن تتمرضين منو يحتار بيج فهميني؟ روحي ماما نامي شوي

- عمة خابرتي قسورة؟

- ما يجاوب هالولد تعبني والله

- رجعي اتصلي

سحبت التلفون واتصلت ، ضحكت..
نجلاء- يرن يرن هاج

اخذته ايدي وحيلي كله يرجف ، فزت رَوحـي من اجاني صوته..
قسورة- ها امي؟

- الي عندك عتب وراح اشكيك لعمو بس اشوفه

جاوب مرتبك..
- ليش ليش صاير شي؟

- شلون ينطيك گلبك تخلينا بدون خبر؟ تعرف سمعنا ليش خليتنا ؏ نار؟ سارة تخربطت ورجعت انعمت بسبب السمعنا

تحسر..
- والله محتار وين اروح وين اجي وحدي من المركز للمستشفى ومن غرفة لغرفة ما عندي وقت اشرب ماي وداعت امي الغالية

- اذا امك غالة احلفك بغلاتها تجي تاخذني اشوفهم اني وسارة ولا ترفض اختي راح تروح من ايدي الله يخليك أنتَ مو گلت اني اخوج واني هسه جاي انخه اخوي

قسورة- جهزن نفسجن مسافة الطريق

ابتسمت فرحانه ناولت عمة التلفون وصعدت فوك هزيت سارة ؏ كيف بسرعة فزت..

سارة- هُمام بي شي؟؟؟؟؟

- اشش گومي نجهز نفسنا قسورة راح يجي ياخذنا نشوفهم

ابتسمت..
سارة- صـدُك ؟!

- والله

ساعدتها وگمت بدلت اني بس دايخه حيل احس ؏ اي لحظة اوكع !! نزلنا جوه عمه هم لابسه عبايتها ومنتظرة لحد ما دك هورن طلعنا...

چان بالباب حراس اثنين حجه وياهم قسورة
ووصاهم ؏ اهل الـبيت وانطلق ساكت
بس واضح التعب ؏ ملامحه ، ربتت عمة ؏ كتفه..

نجلاء- لـيث شلون صار؟

تنهد بحسره..
قسورة- ماكو اي تحسن للان

مسحت عمه دموعها تحاول تسيطر ؏ نفسها
وما اتعب قسوره اكثر لان حيله مهدود وهالك
من التعب
همس ببحه..

قسورة- لا تبچين امي متأكد راح يصير زين

- الله يسمع منك

رفع عينه بالمرايه وگال..
- شلونچن؟

- زينات

قسورة- فد مرة نمر ؏ دكتورة سارة تشوف عيونها

سارة- ما يحتاج

جاوبت بجفاء ، تحسر وكمل الطريق لحد ما وصلنا
نمشي وراه متلهفين ما اشوفه غير ركض
چانت اكو هوسه يم باب غرفة من الغرف ركض حاط ايده ؏ سلاحه البلكراب ...

قسورة- جُنيد شصايررر؟

- هُمام گعد

ضحكت سارة فرحانه تعصر بيدي
بس اني عقلي جمد اباوع للگدامي !!
جُنيد نفسه جُنيد؟
گلبي رجف من تقربت ووضح شكله ..

نفسه !!

رفع عينه سلم وصارت عينه بعيني وعقد حواجبه هو ما يعرفني لان چنت مُنقبه بس اكيد استغرب نظراتي اله !! نتر قسورة يباوعلي...

- رنيممم

رفع راسه جُنيد فاز يباوعلي ويرجع ينصي
اريد اعرف اتصرف ماكو هزيت راسي دايخه
گعدني قسورة وعمة تگول ..

نجلاء- صارلها يومين لا نوم ولا اكل ؏ گد شربة الماي اكيد تتخربط

رجعت رفعت راسي لـ جُنيد ضايعه ما احس
غير قسورة لزم حنكي ونزل راسي..
قسورة- كافي عـيب

نزلت راسي ساكته
رجع استرسل ..

قسورة- نروح لـ خالي يلـه

سندت نفسي ؏ عمة ولازمه سارة ونمشي
فتح قسورة الباب
دخلت عمة تبچي وتحضن بيّ وهو عينه عليَّ
مد ايده وگال..

كليم- تعاي

مشيت ضايعه ، سحبني مگعدني قريب منه..
كليم- شبيج؟

نزلت دموعي بحرارة ؏ خدي سحبني لـصدره وگال..
كليم- شبيها؟ منو وياها؟

قسورة- ماكو شي خالي لان تعبانه من الصار

بعدني يمسح ؏ وجهي ويحجي بقلق..
- رنيمه صح هذا الكلام لو بيج شي؟ احد مزعلج؟

بنفس اللحظة دخل جُنيد يحجي مستعجل..
جُنيد- خالي اني رايح للبيت محتاجيني

بچيت بقوة وهو تخربطت اوضاعه وصاح..
كليم- منووووو وياهاااا؟

نجلاء- اهدأ خويه محد وداعتك بس هي تعبانه تعاي ماما

رادت تسحبني رفضت حاضنه عمو..
- لا تعوفني عمو

كليم- يمج بناتي يمج اشش وجعتي گليبي بدموعج

جُنيد- رايح اني خالي

شديت ؏ حضنه خايفة خايفة من نفسي وافكاري
وهو جاوبه بدون نفس..

كليم- الله ويــاك

مرر ايده ؏ راسي وگال موجه الكلام الهم..
- خلونا وحدنا

طلعوا وهو استمرّ يحرك ايده بحنان ؏ راسي
واني افكاري وجعت راسي ..

- جُنيد مسويلج شي؟

جمدت وحتى النفس قطعته ، شلون انتبه ؟!!
ابتعدت اباوعله بتوتر وهو ؏ وجهه ابتسامة هادئة
مملوءة بالحُب والسكون
رفع ايده عدل حجابي ودخل شعري الطالع ..

- من دخل بچيتي ومن رجع حجه رجفتي طول ما هو موجود بالغرفة
أنتِ متوترة وتتراجفين !! اذا مسويلج شي گولي واني اكسر ظهره الج ، زعجج بكلمة او تصرف ؟؟

نزلت راسي دايخة وهزيت راسي بـ لا
رجع گال ..

- قبل لا اعرف ڪ بنتي الربيتها ترا اني ضابط تحقيق واگدر افسر تصرفاتج ونظرات عيونج
واعرف چذابه واكو شي تحاولين تتسترين عليّ

- ماكو شي

- اكو واعرفه من جُنيد

توترت خايفة..
- ما سوالي شي ورحمة بابا

- إذًا !!

درت راسي ضايجة ما اريد احجي مرر
اصابعه بخفة ؏ حنكي ورفع راسي ..

كليم- شنو هذا حالج؟

- تعبت الصار تعبني عمو ما عندي طاقة بعد شوفتكم هدت حيلي لو صار شي لواحد بيكم اموت اني والله اموت

مسح دموعي..
- قدر الله وما شاء فعل بناتي

- عذ...

رفع ايده ساد حلگي..
- حرام تنطقين اسم واحد مثله لا تلوثين نفسج بيّ

- ما راح يعوفني عمو

- مو بكيفه غصبًا عنه ينساج انسي اني بس يوگع بين ايدي

غمضت عيني متنهدة بتعب ، دخلت الممرضة
وگالت..
- ممكن تتفضلين بره اريد اعقم الجروح

- راح اشوف خالو وارجع للبيت

كليم- باجر يمج اني لا تخافين

تقربت بست راسه وهو مبتسم
طلعت بعدهم بره بس عمة ماكو
راحت تشوف اولادها يمكن..

اخذنا قسورة لغرفة خالو وبالطريق سارة همست..
سارة- منو وياج؟

- محد

- رنيممم

- والله شبيج مُجرد تعب الايام طلع عليَّ من شفت وضع عمو

سكتت بس ما مقتنعة ، فتح الباب واشرلنا ندخل
دخلت سانده سارة چان گاعد
بس شارد بنظراته ، فز باوعلنا
ساكت والتعب واضح عليّ !! صدره كله ملفوف
وما يگدر يتحرك..

- خالو !!

گعدت سارة ؏ طرف السرير وهو عيونه
ما فارقتها همستلها..

- ديري بالج لا تلچمين جرحه

هزت راسها بـ اي ، اقتربت وبست راسه..
- خوفتني عليك

- ز زيــن

گح بتعب واني ابتعد مقهورة ؏ حالته !!
تلمست ايده سارة ورفعتها بايستها وهي تشهك
سارة- هديت حيلي هُمام

سحب ايده..
هُمام- خوش

بهتت سارة من ردة فعله واني اباوعلهم مقهورة
صح خطأت سارة واتجاوزت بس ردة فعله
مؤذيه وهي تعبت من اتصاوب لحد الان هي تعبانه !!..

سارة- اعرف ضايج مني واني اسفه عرفت قيمتك من حَـسيت بخطر خسارتك !!
هُمــاام رجعت ما اشوف مشتاقه اشوفك بس عيوني ما اشوف بيهن صارلي يومين لان بچيت هواي عليك

طول كلامها هو صافن عليها ومن خلصت ما جاوبها احس قهرني موتني قهر ، بس باوعلي خزرته ضايجه بَـس يا جبل ما يهزك ريح
دار يباوعلها بلا مُبالاة وهي حالها يكسر الگلب ..

سارة- دا تعاقبني بسكوتك؟ هُمام جاوبني لا تبقى ساكت !!

هُمام- ليش منو أنتِ حتى اعاقبج؟

- شنو قصدك؟

- قصدي ما تهميني حتى اتعب نفسي واعاقبج

فتحت عيونها الي ادور بالغرفة ضايعة!
تشنج وجهه وايديها بحضنها يرجف
والدمعة صارت بطرف عينها بلگوة مصبرة روحها..

ابتسمت وگامت من مكانها ، مسحت وجهه
ورفعت راسها تسحب نفس
كل هاي وعينه ما شالها من عندها
هزت راسها موافقة وگالت بهدوء ..

سارة- تعودت ؏ الخذلان سهمك هذا زيادة عدد وبَـس

رفعت ايدها وضافت..
- يلـه نروح رنيم

اخذت ايدها وطلعنا بس ما گدرت اروح
والحجي بگلبي بقيتها يم قسورة ورجعت
فتحت الغرفة ودخلت اشهگ ، فز بقلق ؏
حالتي !!

- صار اربع ايام سارة لا نوم ولا اكل ولا شرب عايشة بقدرة قادر عيونها انعمن ؏ گد ما بچت عليك
اختي تتلوع گدامي عليك وخايفة يصيرلها شي چبتها واجيت كُلي امل ترتاح من تجي تشوفك وتحجي وياك بس أنتَ زدت أذيتها وعذابها رغم تشوف حالتها الصحية موووو زينننه

شهگت مفرفحة امسح دموعي
قلق من شاف حالتي هيج ..

- عبالك هينه واحنه نشوفك سابحين بدمكم گدامنا؟ عبالك سهلة علينا نشوف الاشخاص الي ساندين ظهرنا عليهم غرگانين بدمهم وما بيدنا حيلة؟ شگد قلوبكم قاسية شگدددد !! اذا صار شي لـسارة لا أنتَ خالي ولا اعرفك وتحرم عليَّ اخليك تشوف وجهي لو تسمع صوتي ليوم الدين وهناك اشكيكم واحد واحد لربي

هُمام- اهدي بابا تعاي

- ما اريد اشوف وجهك ولا احجي وياك الي يأذي خواتي يأذيني

طلعت ما مهتمه الصوته التعبان وهو يصيح وراي..
قسورة- شصاير؟

- ماكو رجعنا للبيت ساعة سوده الطلبت بيها تجيبنا

اخذنا قلقان ومر ؏ غرفة لـيث شفنا من الزجاج الحاجز نايم والاجهزة تحيط بجسمه
وعمة طلعت بس تبچي وقسورة يهدي بيها ، سارة ما نطقت بشي وردة فعلها چانت باردة
قلقتني عليها حيل !!..

رجعنا طمئنا البنات والحجية ورحنا نمنا
ما گعدنا لحد ما عمة كعدتنا نتعشى گالت سارة بهدوء..

سارة- يلـه گومن ناكُل ومن نخلص ندرس هواي هملنا دراستنا هاي الفترة وما بقى شي ؏ الامتحانات

صفنت بوجهة متعجبة بس ما حَـبيت الح
وياها وتضوج صدك نزلنا اكلنا وساعدنا عمة
وعرفنا باجر يرجعون عمو كليم وايهم لان وضعهم افضل من خالو وليث..

صعدنا ندرس ونساعد بعض وخصوصًا سارة لان ما تشوف نشرحلها شفهي..

مسرة- ما تنحل ما تنحل صعبة

دموع- عمو كليم لو هنا يحلها

مسرة- ومنين نجيبه هسه احنه؟

دموع- خلي نعوفه وباجر من يجي يساعدنا

سارة- الرجال مريض عيب عوفنا وخلن ؏ المسائل الما تعرفن تحلنها علامة من يتحسن وضعه يشرحلنا

دموع- سارة كافي اليوم تعبت باچر نكمل

- اي سارة كافي اني هم تعبت وما دا استوعب ادرُس

سارة- تمام گومن شغللنا فلم بس تسولفلي شنو يصير هااا

ضحكت مسرة تصيح..
- يدلل الحلو نشرحلج بدقة وتفصيل

دموع- اروووح فدوة للحنون امييي

سارة- ههههه يلـه وتعالن لحضني مشتاقتلچن

شغلت مسرة فلم بعنوان the maze runner
ومن گد ما الفلم مشوق وحلو تابعنا بحماس ناسين كُل همومنا وما نعرف يمتى رجعنا انام
فزينا ؏ صوت بره وهوسه طفرت من مكاني فتحت الشُبـاك واشوف زلم كُلها بزي عسكري تارسه البيت والشارع ويساعدون بعمو وايهم يدخلونهم للاستقبال
هناك واتجمد بوجود خالو وياهم..

- بنااات رجعوا يلـه گعدن

دموع- بس شوي

- لا دمعه يله گعدي بنااات مسرة سارة

مسرة- گعدناااا وليي

كفختها واخذت ملابسي ورحت للحمام سبحت بسرعة وطلعت اركض مشطت ؏ السريع وظفرت شعري ولبست شالي ونزلت تاركتهن يتعاركن ؏ الحمام ومسرة تساعد سارة
لان عيب نعوف عمة وحدها بهذا الكم الهائل من الضيوف..

نجلاء- الله جابج ما الحك وحدي بسرعة ماما طلعي لستكاين وحطي بيهم شكر

ساعدتها والبنات نزلن يساعدنا بس سارة گاعده يمنا وبحضنها ريم
صارت صينية چاي تروح والخ ترجع فارغة ؏ فد وگفه للظهر ودخل قسورة..

- الناس باقين ؏ الغده رايح اجيب جاهز اني لان ما تلحگن بس حضرن نفسج عيب نتأخر

طلع بدون ما يسمع من عندنا واحنه استعجلنا نسوي الزلاطه ونجهز المواعين علمود من يجي ما يتأخر وهو وحده خطية يركض صارله ايام
عمة ما قبلت نسوي شي بعد خلتنا نگعد وهي تسوي الزلاطه ؏ ايدها ..

باوعت الـسارة..
نجلاء- شلونها عيونج ماما؟

سارة- زينه عمة شوي شوي ديرجع نظري هسه اشوف بس مغوش

نجلاء- الحمد لله هاي لان ما بچيتي بعد ونفسيتج تعدلت شوي

ضحكت سارة مستهزئه..
- لـيش هو منو يستاهل نبچي له؟

- شصاير؟

سكتت سارة بدون جواب وعمة تفهمت سكوتها رجعت تثرم واسترسلت..
- تصير هيچ مشاكل مبين الرجال والمره يا ماما عاديه

سارة- احنه مو زوجين عاديين هو اتزوجني حتى يساعدني واجه الوقت اردله مُساعدته وكل شخص يكون بطريقة

باوعتلي عمة متفاجئة لان ما تعرف شنو صار !!
كملنا بهدوء ووزعنا الاغراض ودخل قسورة
الاكل الجاهز ما چانوا هواي ضيوف بس اصدقائهم
المُقربين يجون شي عشر نفرات تقريبًا ..

مد علاگه صغيرة..
- هاي قطرات خلي بكُل عين تلث قطرات ولفيهن بشاش يوم كامل

باوعتله فرحانه واخذت منه وفعلًا تركت
دموع ومسرة يساعدن عمة واخذت سارة الشايله
بيدها ريم
خليتها تتمدد بالصالة وحطيتلها قطرات ولفيت عيونها بشاش..

سارة- قسورة متحسن اسلوبه كُلش شعجب؟

- ما اعرف ، الله يهدي

- يا خوفي الي بالي!!

- مسرة قصدج؟

- رنيم والله اذبحها لـمسرة اذا تفكر مُجرد تفكير بـقسورة ، اخخ شگد حذرتها هيج
غبية اني ما شايفة تذب نفسها بالنار بدون تفكير !!

- حتى اني ما قابلـه وحجـيت وياها بس الحُب مو بالكـيف

سارة- من شوكت هذا الكلام رنيم؟ اذا هيج ليش تحاسبين كليم ؏ مشاعره؟

- احم مو مو احنه وضعنا يختلف

- ماكو اختلف بالعكس وضعج اسهل بهواي لان كليم انسان مو مؤذي
بَـس قسورة اذا تقرب من مسرة راح يدمرها يمسح ضحكتها ويقتل مشاعرها ويغتصب براءتها النقيـة .

- سارة اني مو ضد مشاعره لـعمو اني ضد الفكرة لان اني خلصت حياتي اعرف هالشخص ڪ عم وفجأة يعترف بهيج شي من بعد صدمات عذاب وكُل العشته صعبة والله !!

- نحجي بعدين عود بهذا كلامج ، هواااي عندي علامات استفهام واعرفج من رجفة ايدج
كذابة وضامه شي وهالجُنيـد تعرفينه بَـس احتاج گعدة هاديه وياج وغصب عنج تحجين مو نفس عذاب توكعين نفسج بمصايب وتعاي سارة ساعديني بعد ما يوكع الفاس بالراس

- اني احتاج احجي اصلًا

- مُمتاز

- رايحه اساعدهم ارتاحي أنتِ

هزت راسها بـ اي واني رجعت للمطبخ
قسورة طاب طالع وعينه على مسرة
ومن اباوعلها الثولة ما منتبهه
هناك واتفاجئ بوجود جُنيد ينقل الاكُل وياه !!..

ابتلعت ريقي من صارت عينه بعيني ووگف
صافن بعيوني ابتسم ودنگ راسه رايح
رمشت احس بحرارة تطلع من وجهي ، نفسه!!
نفس هدوئه وابتسامته نفس رزانته ..

حُب الطفولة !!

تجاهلت گلبي الي يدگ بقوة وخفت يفضحني
اكثر مما اني مفضوحه !!
راحت عمة ترتاح وطلبت من دموع ومسرة يروحن يرتاحن واني اغسل المواعين ..

ذبيت الشال وسرفنت ردانات التراك وگعدت
اغسل واني سارحه بـ افكاري !!
عمو من جهة الانسان الي افدي بروحي
ومن جهة وجود جُنيد ومشاعري القديمة اله؟؟

فزيت ؏ فتحت الباب!! نزل راسه بسرعة من لمحني
واني ايدي ترجف بلگوة نزلت الردن ولبست الشال گال هو بخجل...

جُنيد- عذري قلة تركيزي ما چان قصدي اخوفج

- ما ما صار شي!

رفع عينه اليَّ ، تقدم خطوات بطيئة
ركز بوجهي وگال ..

- تعرفيني؟

ارتبكت..
- لا لا من وين يعني اعرفك

درت وجهي اريد اشرد من مشاعري
ومن نفسي وخوفي بس استوقفتني جُملته
الي اتسللت لمسامعي برويّة..

جُنيد- بَـس اني اعرفج يا قارئة الكـتُب الصغيرة

التفتت فازة عيوني يحرگني ابتسم
تقدم اكثر وما صار يفصل بيناتنا شي ..

جُنيد- لطالما چان عندي فضول لشكل الطفلة المختبأة خلف النُقاب !! وتصورتها بكافة الاشكال لكن ..

رفع ايده بهدوء خايف من ردة فعلي ، واني
ما اعرف شنو صارلي جمدت وما حاولت ادفعه
من اتجرء ومرر اصبعه يتحسس خدي ..

- سبحانه الذي خلقكِ بـ ابهى صورة ، جمالج عبر احلامي والخيال !!..

بعدني مو مستوعبه وفزيت مرعوبة ؏ صرخه
اجت من باب المطبخ الخارجي ..

- هاااااي شديصير هناا؟؟؟؟

..

وتستمر الحكاية.. 🚬♣

التنزيل ثابت بين يوم ويوم 🧡

قناة التلي zainab_salah0