رواية دروب الإِندِثـار الفصل الرابع والعشرون 24 - بقلم زينب صـلـاح 🤎

بقلمي : زينب صلـاح 🧡

لـ روايـة ﴿ دروب الإندِثار ﴾

في الـ part 21 ♡♡

لا تنسون التصويت + متابعة للحساب + التعليق بين الفقرات ☘️

كاظم إسماعيل يڪول:
صّدفة أجينا و صّدفة رحنا
و العمر كُله صدَف
و گطرة گطرة وما درينـا
ينشف المِاي و نشـَف .
‏
•••••••••••••••••••••••••••♕•

شهگه تفزز جسمي بين الثانية والأُخرى
رائحة دماء ابطال نقية تتسلل لأنفي
صرخات ام ملچومه بـمنظر اولادها ، ربحها الوحيـد من دُنيا ظالمـة
ويه كُل رمشة عين يمر منظرهم گدامي
عبارة عن اجساد بلا روح !!
وصوت الرمي ما يفارق مسامعي
ويه كُل حركة ريّـح يفز جسمي بخوف ..

تأنيب الضمير ينهش بروحي
واحس النفس يجرحني
دگات گلبي عن بُعد امتار تُسمع !..

رفعت ايدي المُغطات بدمهم
دم ابوي الروحي
دم خالي الما شبعت منه
دم شباب بأول عُمرهم كُلشي ما شافوا من
الدنيا ..

چنت اتمنى حلم واصحى
يا ريت يكون مُجرد كابوس وانتهى !!

لكن هذا واقع
فاجعتي واقع
فاجعتنا واقع ، لامفر منه!!!!

عذاب هدد ووفى! راد ياخذهم مني كُل اعزازي
ويمكن اخذهم؟ يمكن فقدتهم
يمكن اكون خسرت گدام طغيانه !! واكون سبب
بفقدان ام لابنائها ، وتيتيم طفلة صغيرة
من ابوها ؟!!

عضيت شفتي وعصرت ملابسي اتذكر المنظر!!
بوقت طلعت وشفت قسورة محتار يركض لمنو بيهم؟ وشفتهم بطولهم الحلو متوسدين الارض..

ركضت ناسية نفسي بدون حجاب متجاهلة العالم كله ، صرخت لحد ما تجرحت بلاعيمي !!
لطمت ؏ وجهي لحد ما زلغته بـ اظافري !!
حطيت راس عمو بحضني
وبيدي لازمه ايد خالو الباردة ...

- لاااا لاااا اروح فدوة لطولكم لاااا توني شفتكمم ما شبعت منكم وين رايحين وعايفيني ويننن ولججح يمه خلص گلبي لحگيني مو حمل فراك وحق صبر زينب مو حمل فراك
عموو حبيبي عمو افتح عيونك وعد ارجع وياااك للبيت وشتريد تسوي سوي ما ازعل منك وما اجرحك بكلامي بعد بس لا تعوفني يلااا خالو يلااا گوم محتاجتك لا تعوفني انتَ وعدتني ما تعوفني ساااااارة گليله يگعد يحاجيني ساررررة

روحي طلعت واني اشوف منظرهم
عمة نجلاء گاعده بين ايهم وليث وتون..
نجلاء- ولكككك يمهههه الحك اخوتك راح يروحون من ايدك ربييي لا تفجعني بيهمم لا تفجعني بيهم گوم خويه گوم وليداتك سابحين بدمهم وانتَ نايم گوم يبو طول الحلو ما تلوگلك النومممه هاااي

سارة تمسح ؏ شعر خالو وتهمس عبالك بعالم ثاني..
- هُمام اسفه والله بعد ما ازعلك بس لا تعوفني شلون تعوفني وانتَ منطيني وعد؟! اعرفك رجال گد كلمتك ما تعوفني
گلبي بارد والله گلبي بارد اعرفك ما تعوفني هُمام !! لا تفجعني بيك ما عندنا سنـد غيرك ، ليش جسمك ثلج؟ بردان حبيبي بردان احطك بروحي وادفيك بس لا تترك ايدي والله اموت ما اتحمل هُمام عيوني رجعت تغوش خايفة ارجع انعمي خايفة من الظلام يغلف رَوحـي بدونك!!

قسورة- دخلننن جوه بسرعةةةة

رفعنا بغضب شمرنا بالبيت وصاروا ينقلونهُم بسيارات الاسعاف واحد وراه الثاني ، اخر شي قبل لا يروح قسورة صاحت بيّ عمة..

نجلاء- بغلاتي عليك يمههه بغلاتي تتصل واطمني لا تخلي گلبي النار عليهم

هز راسه وطار بسيارت وراهم وهو غارك بدمهم !!
گدام الباب صارت بركة دماء
....

فزيت ؏ ايد تهز بكتفي !!

نجلاء- گومي دخلي يم خواتج خايفات

- لعد سارة وين؟

نجلاء- فاصلة احاجيها ما ترد

بچيت..
- عمة ما اتصل قسورة؟

رفعت حجابها تمس دموعها..
- لا يمهه ماكو خبر واني حد صبري لطلوع الشمس اذا ما بلغني اخذ عباتي واروح وراهم

دخلت عايفتني !! رفعت راسي للسماء
چانت دنيا الفجر اكو ضوء خفيف
رجـف جسمي ويه صوت الجوامـع..
- الله اكبر الله اكبر

بچيت بقلة حيلة بَـس بدون جزع !!..
عندي ثقة برب العالمين راح يرجعهم اليَّ
صح متلوعة ووجع گلبي ما يتسولف
لكن ثقتي بـاللّٰه كبيرة ..

گمت للمغسلة توضيت ودخلت بيبي ؏ گعدتها بالكرسي ما تقبل تدخل لغرفتها تحن وتون ؏ عمو كليم والولد..

ابتسمت وانشرح صدري من اتذكرت اليوم صار جُمعة !!
ركضت مثل الطفلة إلي مكتشفة اكتشاف خطير وصحت..

- عمة عمة بس تطلع الشمس اقري سورة الكافرون عشر مرات وطلبي حاجتج عمو كليم علمنياها فدوة خلينا كلنا نسويها ونطلب يرجعولنا سالمين

نجلاء- گايمه يمه گايمه

ام كليم- حتى اني يمه نجلاء ساعديني اتوضأ

وصدُك كلنا گعدنا نصلي ونقرأ قرآن الهم
ساعة بعد ساعة ننتظر خبر منهُم
يريح بالنا ويطمئن قلوبنا ، بس ماكو ..

شالت عمة عبايتها وگالت..
- رايحه اني بعد ماكو صبر

ركضنا وراها
هي فتحت الباب وصار قسورة بوجهه
عيونه حُمر ومحاوطتهن هالات سود
ملابسه كُلهن دم ومحني الظهر ..

قسورة- وين؟

نجلاء- هيججج تخلي گلبي النار ؏ وليداتي يمه؟

قسورة- چنت اتونس اني؟ امي ما تشوفين حالتي وهاي اجيت حتى اغير ملابسي وارجع

- طمني الله يخليك

قسورة- زينين

گالها ودخل بس كلامه مو مقنع ابد ، لزمته عمة نجلاء وگالت..
- حط ايدك ؏ راسي واحلف ما بيهم شي

- امي !!

- احلف قسـورة

گعد ؏ الكرويته حاط ايده ؏ راسه وگال
بصوت واهن..
- ايهم وخالي زينين بس..

سارة- بَـس! بَـس شنوو؟

قسورة- هُمام وليث اصابتهم خطرة ولحد الان ماكو استجابة

نجلاء- يمممه وليدي يمه ابو ضحكة الحلوة راح يروح من ايييدي ولككك يمممههه

••••••••••••••••••••••••••••••

مسرة•

نزل للارض اخذ امه بين احضانه!
اول مرة اشوف قسورة بهذا الشكل ، منهار
مكسور الظهر
سارة وگعدت ؏ رجليها وتردد بين شفايفها بوهن ..

سارة- ما تعوفني ما تعوفني

رنيم گعدت يمها ورغم منهاره وخالها بين
الحياة والموت ..

قوة نفسها ، متعودين اذا تنهار سارة تنجبر رنيم
تسندنا واذا انهارت رنيم سارة تنجبر تسندنا ..!

گوم امه دخلها للغرفة يطمن بيها ويوعدها
بس يگعد لـيث ياخذها تشوفه هو وايهم وهي
تتوسل بي هسه ياخذها اخر شي انطاها علاج
يلا نامت
وسوه نفس الشي ويه بيبته وطلع ساد الباب !!

باوعلنا تعبان وگال..
قسورة- عينجن ؏ امي والحجية لا تغفلن عنهن تحسبًا لأي شي

رنيم- قسورة اريد اشوفهم

گعد گدامها ركبه ونص..
- وعد بس يگعدون اخذجن

عافنا وصعد فوك ، همست رنيم بتعب..
- امشن نصعد فوك
يلـه سارة عينيني تعبانه والله

گامت ساندينها دخلتها رنيم للغرفة ونومتها
سحبت دموع يمها وگالت..
رنيم- يلـه انتِ همات نامي يمها خاف تگعد محتاجه شي
أنتِ موجودة

دموع- وأنتِ وين رايحة؟

نزلت راسها بحزن..
رنيم- ريم وحدها بغرفة عمو رايحه يمها
مسرة نامي يمهن وارتاحن تعبتن هواي حبيباتي

عافتنا وطلعت ، دموع نامت بصف سارة وحضنتها دافنه راسها بصدرها كالعادة !!..
عضيت شفتي وطلعت عيني ؏ باب غرفته
طلع بنفس اللحظة وصفن بوجهي بس تعبان حيل وما عنده طاقة ..

من زمان ما حاجين من ايام ابتعدت عنه شگد حاول يراضيني وبكلُ مرة چـنت اصده وارفض
وهو ما ملّ بالعكس يزيد اصراره ان كان بالواقع او عن طريق التلفون يتواصل ويايه ويتلقى التجاهل او البلوك..

نزل راسه وراد ينزل..
- قسورة!!

التفت متفاجئ عباله راح اصده !! تقربت
مترددة وگلت بنبرة مُطمئنة..

- اخوك راح يصير زين متأكدة

قسورة- ان شاء الله

- كلهم راح يرجعون مثل قبل واحسن

هز راسه بـ اي ساكت
طال الصمت لا هو حاجي ولا اني !!

انحرجت من الموقف وردت اروح
لزم ايدي وگال بوهن..

قسورة- أنتِ شلونج؟

- زينه

- روحي نامي التعب واضح بعيونج

- انتَ هم تعبان

- عادي تهون! رايح اني وكونن مطمئنات اكو شرطة بره البيت محد يگدر يدخل وهم راح اشوف حراسه للاحتياط خاف تنسحب الدوره بلغيهم لا يبقى بالهم

- ماشي

تحسس ايدي بـ اطراف اصابعه وراح!!
دخلت لغرفة عمو كليم وبقيت صافنه
تشم بقميصه وتبچي كاتمه صوتها ، خايفة تگعد
ريم !! گعدت بصفها وسحبتها لصدري..

رنيم- كسرت گلبه مسره قهرته واتجاوزت بكلامي وياه نظراته ما
دا تروح من راسي تأنيب الضمير موتني

- قسورة گال زين وان شاء الله فترة ويرجع وتتحسن علاقتكم

- اصلًا بعد ما ازعله وما اروح ابقى يمه

نمنا بعد تعب المنظر والموقف !! من گعدت ما لگيت لا رنيم ولا ريم عرفتهم نازلات
دخلت للحمام سبحت ومشطت ورحت لغرفة البنات همات ما لگيتهن ..

نزلت واسمع صوت قسورة
چانن متجمعات ؏ عمة وهي لازمه التلفون وتضحك رحت يمهن واشوفه متصل كام وهو يم ايهم الي يحاجي امه بصعوبة بسبب وجع الاصابة !!..

قسورة- وهاي طمنتج ؏ ايهم ولـيث بس يكعد هم اتصل عليج امي بس لا تبچين واتعبين نفسج

رنيم- قسورة اريد اشوف عمو

قسورة- صار

تحرك من مكانه وحجه ويه ايهم بلغه وطلع بس صارت يمه ضجه قوية وصوت صرخات ..

قسورة- شصاااير؟

- الرائـد هُمام تعرض لاغتيال
ㅤㅤㅤ
ㅤㅤㅤ
••••••••••••••••••••••••••••••

في مكان اخر ...

- لماااااااااااار

سديت اذاناتي بقوة من علو صوتها وعرفت سبب صرختها
صنعت البراءة گدام ماما الچانت ترمقني بنظرات تحذيرية !! وگفت فوك راسي خازرتني ومتخصرة ..

ميار- وين حلوياتي لمار وين؟

ام جُنيد- وكل هالصوت علمود الحلويات لو اخوج هنا تصرخين هيج؟

ضربت رجلها ؏ الارض بقهر وجاوبت..
- مامااا كُل ما يحيبلي جُنيد حلويات هالحيوانه تاكُل حصتي وحصتها

لمار- نچبي لا تغلطين ماما حاجيهاااا

- الهايشه تاكُل الاخضر واليابس الدُببببه

طفرت عليها سحبتها من شعرها وهي همات ما قصرت وما مكترثين لكلام امي ، نقطة ضعفي سمني انقهر من احد يعايرني بيّ
رغم مو كُلش سمينه وزني حلو بس صارت بيه عُقدة من چنت بالمدرسة وتركتها بسبب التنمر وطلعتلي ميار بالبيت !!

جُنيد- عفية عفية

فزينا تاركين بعض ؏ صوته وهو يصفق بـ أيده وخازرنا ، رتبت شعري المُشعث وگتله واني اشير بسبابتي ؏ ميار ..

- دا تتنمر عليّ جُنيد

لمار- وهي اكلت حلوياتي جُنيد

جُنيد- كم مرة اگول ممنوع لمار كم مرة؟ جيبي تلفونج وحاسباتج وتعاي وراي

اباوعلها الدمعة صارت بطرف عينها وماما ما نطقت تاركته هو يحاسبنا ، راحت اخذت تلفونها وصعدت لـغرفته
عرفته ڪ عقاب راح يسحب التلفون منها لفترة مُعينة لان مثل ما اني نقطة ضعفي الاكل ميار نقطة ضعفها الالكترونيات ..

ابتسمت بـ انتصار بس صدمني من طلع ورجع جايب وياه حلويات بس لـميار !!

- لعد واني جُنيد؟

جُنيد- ماكو لا عبالج العقاب بس الها ، امي اني صاعد ارتاح شوي

- اخذ راحتك ماما

صعد لـغرفته يرتاح وصارت ميار تغور بيه
وتحاول تحرگ گلبي وهي تاكل الحلويات
گمت للمطبخ سويت كيكية وقصصتها وعندنا ببسي
ورحت للغرفة اباوع لـميار بطرف عيني !!

درته ؏ مسلسلتي وصرت اتابع واني اكل
مندمجة لـليل هيج لحد ما صاحت بينا ماما
ننزل نتعشه ، اخذت المواعين ويايه ونزلت غسلت ورحت للسُفرة چان جُنيد موجود ..

گال..
- اتصاوب صارله يومين بالمستشفى

رفعت عيني اتابع ردة فعل امي
چانت هادئة !! تاكل ببرود ما عبالك جُنيد
گال شي ، من شاف ردة فعلها رجع گال ..

- يستاهل هذا الحقد يا الحنينة؟ امي اخوج يستاهل تحقدين عليّ بسبب ابوج؟ الصار صار وأنتِ تزوجتي وصار عندج اطفال وحياة حلوة وما ناقصج شي وابوي الله يرحمه ما كسر خاطرج بكلمة صح زواجكم اجبار بَـس عشتوا مرتاحين

ام جُنيد- ما حاقده

- وانقطاعج عن اهلج كل هاي السنوات؟ ابوج توفى ما حضرتي فاتحته امج تشللت ما رحتى شفتيها اخوج امي خالي كليم اتصاوب ووصل للموت وحياته بخطر وانتِ هادئة هيج

- حالفة يمين ما ادخل هذاك البيت

- واذا اگلج بيدي اخذج للمستشفى؟

سكتت ما تجاوب رجع گال..
- حتى ولد خالتي متصاوبين

رفعت عينها متفاجأة وبفضول گالت..
ام جُنيد- ليش شنو صاير؟

- بنت ابن عمج رُسن رجعها صارله فترة سولفتلج ولبنيه متورطه برجال مهووس يريدها بكُل الطرق وبكافة الاشكال ومستعد يقتل الكُل في سبيل يرجعها اله
قبل يومين خالي والولد گاعدين بره يتعللون ومغتالينهم خارطينهم خرط ورايحين

بچت امي حاطه ايدها؏ حلگها..
ام جُنيد- وشلونهم

تنهد بحزن..
- خالي وايهم استقر وضعهم بَـس لـيث وضعه خطر بعده وصديق خالي امس رجعوا اغتالوا داخل العناية ووضعة مو زين الدكتور گال حضروا نفسكم وكونوا مستعدين لأسوء الاحتمالات

گامت عايفه اكلها وگالت..
- هسه تاخذني

ابتسم مأشر ؏ عيونه ..
- من عيني هاي گبل هاي ام جُنيد

راحت امي تلـبس وهو اكتفى بشرب الچاي..
ميار- واحنه يمتى نتعرف ؏ اهلنا جُنيد؟

جُنيد- من الله يهدي امي اريد كُلشي يكون برضاها

لمار- زين خالنا شلون شكله؟

ابتسم وطلع تلفون دخل ؏ صفحته بالفيس وگال..
- هذا

ميار- عزااااا حلو

جُنيد- ههههه طاح حظج

لمار- جُنيدي تحمست اتعرف عليّ شُكله لطيف حيل وهمات من كلامك عنه مبين حباب

جُنيد- من تتعرفون عليّ راح تحبونه هوايه

طلعت ماما من غرفتها تحط العباية ؏ راسها بسرعة طلعوا هي وجُنيد بعد ما امطرونا بسيل من التنبيهات حول ممنوع فتح الباب لأي كان والـخ من هذا الكلام الاعتيادي...

تساعدنا اني وميار بغسل المواعين بعد ما كملنا
اكلنا ، رحت سبحت وگعدت تمشطلي ..

- برأيج شلون راح يكونون بيت خالو كليم؟

ميار- ما اعرف بس كلام جُنيد عنهم لـطيف ودائمًا يمدح بيهم وخصوصًا خالو

- خاف يريد يحنن گلبها عليّ

ميار- چؤ ما اعتقد لان ماما سبق وگالت خالكم حنين بس چانت زعلانه منه لان ما ادخل بموضوعها

- ما اعرف لان ماما ما تقبل تحجي وجُنيد همات

ميار- اذا التقينا بيّ بيوم نسأل خالو

راحت ميار نامت واني همات وللفجر سمعت صوتهم جوه نزلت اباوع وجه ماما تعبان
جُنيد حط سبابته ؏ شفايفه بمعنى لا تحجين وماما راحت لغرفتها..

- شصاير؟

جُنيد- باجر احجيلج هسه تعبان اريد انام ساعتين وراي شغل

هزيت راسي موافقة وهو راح ينام ، توضيت وصليت وميار نايمه ما تدري بالدنيا !!.. نمت وللصُبـح گعدنا كالعادة روتين الشغل ما يخلص وحذرت ميار ما تسأل ماما بخصوص الموضوع ..

الظهر رجع جُنيد تغده وصعد لغرفته..

ميار- يـله بسرعة اخذي الچاي وخلي نصعد

اخذتله چاي وصعدنا بس دگينا الباب فتحه يضحك..
جُنيد- چـنت منتظركم حلواتي

ميار- شلونك ابو الشباب

جُنيد- ههههه ام لسان تعالنا گعدن

- جُنيدي سولـف الفضول يقرأ الففففف

•••••••••••••••
جُنيد...

نمشي بـممرات اباوع لـ عيون امي ادور بالوجوه وايدها ترجف شگد تحاول تسيط ؏ نفسها بس ما تگدر ، اعرف خالي شنو يعنيلها
وشگد تحبه رغم البُعد ورفضها للقاء اي واحد من عائلتها چانت دائمًا تسولفلي عنه
وعن شهامته ووقاره رغم صُغر سنه تحجيلي
عن شجاعته وذكائه وشگد هو حنين وهادئ
حَبيته قبل لا التقي بيّ
كلامها چان يحفزني ؏ شوفته ومن بعد ما
شفته گلت امي قصرت بوصف هذا الانسان الكريم للكُل البخيل ؏ نفسه ، الرحيم ؏ الكُل ومُتعصب ؏ نفسه !!

بكل يوم چنت التقي بيّ واتكلم وياه
چان يزداد احترامي واعجابي اله واتخذه قدوه
اليّ واريد اكون مثله مُستقبلًا لدرجة حسدت اولاد خالتي نجلاء ؏ مقربتهم منه !!
و؏ قضاء وقت اكثر وياه ،
انسان عجز الوصِف عن وصفه.

من بعيد لمحني قسورة وفتح عيونه متعجب وجودنا وصارت عيونه تتنقل بين امي وبيني !!..
بَـس وصلنا إدارك الموضوع وباس راس امي وگال ..

قسورة- شلونج خالتي

ابتسمت امي وهزت راسها بـ زينه وتتلفت بعيونها..

- خالي گعد؟

قسورة- اي وهسه يمه الدكتور بس يطلع دخلوا

گعدت امي ؏ كرسي يصير گدام باب الغرفة
تقرب قسورة وگال بصوت ناصي.

- شعجب اقتنعت؟

- ما اعرف والله حجيت وياها بس ما چنت اظن تقنع بسرعة

- هههه مُمكن انتهى زعلها واجه الوقت الي تسامح بيّ خالي تعرف جُنيد
خالي مظلوم من الكُل شگد عشت وياه دوم اشوفـه ينطي حُب وحنان واحترام امور مادية ومعنوية للكُل واني واحد منهم بس ولا مرة شفته اخذ من شخص شي ولا المح بعيونه انتظر لمثل هالشي ومن اشوفه هيج احس بفخر رجال مثل خالي رباني شگد احب ابوي بس ما احبه بگد خالي اخواني گدامي سابحين بدمهم بس رجفت عليّ اكثر منهم

اباوعله دمعت عيونه بسرعه عصرهن بـأصابيعه داير وجهه يسيطر ؏ نفسه
ذبيت نفس بحزن ؏ كلامه ، ربتت ؏ كتفه..

- لو يسمع كلامك تعرف شگد راح يفرح؟ مو تگول ولا مرة اخذ تعرف انُ كلامك كافي حتى ينطيك وما ياخذ بس هالكلام ويكتفي بيّ

- ولا مرة محاجي بهذا الشكل ما اتجرأ

- جرب خويه جرب يستاهل خالي يسمع كلمة حلوة منك

تنهد ساكت ، طلع الدكتور وگال..
- حالة المريض للان جدًا زينه والافضل يبقى كم يوم بعد حتى نطمئن ؏ صحته اكثـر بس الواضح مريضنا عنيد لان اصر يطلع اتمنى تقنعونه لمصلحته..

قسورة- صار دكتور ، يصير ندخل نشوفه؟

- اي نعم لكن بدون ما اتعبونه مو زين عليّ ابني

جُنيد- مشكور دكتور ما قصرت ، يلـه امي

تنهدت گايمه متردده تشوفه بعد سنوات
الانقطاع !! فتحنا الباب داخلين
چان مغمض عيونه وفتحهن من سمع صوت الباب
ابتسم من شافني اني وقسورة ..

- جبتلك ضيف تستقبله لا؟

جاوب بصعوبه..
كليم- أنتَ وضيفك ؏ راسي

سويت مجال لـ امي وهي تخطي بتردد
خالي بس شافها فتح عيونه ما مصدك ؟!
تحرك متوجع وقسورة ركض ساعده يگعد
گال صوته يرجف ..

كليم- عـ عـلياء !!

رفعت عبايتها ؏ عيونها تبچي وتشهك تگطع
گلبي ؏ منظرها وخالي تخردل ما يعرف شيسوي
فتح ايدي وگال..

- يفديج اخوج لا تبچين تعاي لـحضني

مشت حاضنته وهو لمها بحضنها هي تبچي
وهو يبچي ؏ بچيها بس دافن راسها بكتفها
علمود لا نشوفه ..

علياء- عمت عيني ما تلوگلك هاي النومه خويه

تمسح ؏ كتفه وكل ما تريد تبتعد تشوف وجهه
يرفض !! لحد ما سيطر ؏ نفسه وابتعد
منزل راسه يمسح عيونه ويحجي ..

- كلشي ما بيه صرت زين بشوفتج

علياء- يا رَوح اختك يا عُمر اختك شصاير بيك متغير وكبران كبرك الوكت الاغبر قبل عمرك من فدوة رحت لعمرك

كليم- حنينتي

باس راسها متنهد وبعده مهضوم..
علياء- اعذرني گطعت بس تدري أنتَ شنو بگلبي

- اعرف وعاذرج وأنتِ عذريني لان ما گدرت اساعدك

- لان عزيز عليَّ زعلت وإلا أنتَ شنو بيدك؟ بعدك صغير وابوي ما ياخذ بكلامك

- صدگيني ما رحتي من بالي ولا لحظة ودائمًا اسمع اخبارج من جُنيد وردت ادخَل بس گلت شنو ذنب اطفالج يتشتتون بين اب وام مُطلقين وجُنيد گال علاقتج بزوجج زينه

- الله يرحمه ما قصر بشي

- تعاي

حضنها مبتسم يباوعلي..
كليم- اطلب واتمنى

جُنيد- سلامتك خالي بس سلامتك

••••••••••••••••••••••••••••••

لمار- شگد حنون بس جُنيد شنو سبب رفض ماما؟

باوعلي اني وميار محتار خربط شعره وگال..
- جدي الله يرحمه جبرها لـ امي ؏ ابوي ورغم رفضها صار الزواج واحم بذاك الوقت چانت تحب شخص ورفضه جدي وهيج اطورت الاحداث من زواجها لحد الان ما زارتهم امي ولا حجت وياهم

ميار- يعني ماما ما چانت تحب بابا؟

جُنيد- چان اكو بينهم مودة ورحمة وتفاهم طول عمرهم سوه ما زعلوا من بعض وهذا السبب الي خله امي تستمر ويه ابوي مرتاحة

لمار- شلون تعرف كل هذا الكلام؟

جُنيد- جزء من امي عرفته وجزء خالي حجالي

صفنا متفاجأين لان بعمرنا ما شفنا بابا وماما متزاعلين او ما متفاهمين چانوا مثاليين النا دللونا وحبونا وما ساءوا النا بتصرف او موقف سيء
يبقى ويانا ذكرى..

جُنيد- الكلام يموت بهاي اللحظة ما تفاتحن امي بشي ولا تزعجنها متفقين

لمار- متفقين جُنيدي

قرص خدنا وكام فتح الكنتور انطانا كل وحدة علاگة حلويات وانطه لـ ميار تلفونها واللابتوب
حضنا وتشكرنا منه وطلعنا فرحانين بـ ابسط شي يقدمه النا جُنيد الي ما خلانا بيوم نحس بفقدان بابا الله يرحمه ..

..

وتستمر الحكاية.. 🚬♣

قناة التلي zainab_salah0

روحوا للقناة صوتوا ثبتتلكم الاستفتاء ضروري 🧡