رواية دروب الإِندِثـار الفصل الخامس والثلاثون 35 - بقلم زينب صـلـاح 🤎

بقلمي : زينب صلـاح 🧡

لـ روايـة ﴿ دروب الإندِثار ﴾

في الـ part 31 ♡♡

لا تنسون التصويت + متابعة للحساب + التعليق بين الفقرات ☘️

‏بس بالليل
يلتم كل عتب
روحي وأغنيلك
أغني وعيني تبچيلك
أغني وشوگي ياخذني
بجدم حافي لمواويلك .

•••••••••••••••••••••••••••♕•

گاعده ارجف عيوني جمر بصعوبة كاتمة
دموعي الدا تحاول تتحرر مَن عَيوني !!
صافنه بأيداي المحطوطه على القُرآن واصابي
البيناتهن هيلات ..

وصلني صَوت السَـيد وهوَ يگول
- إذا قبلتي قولي "نعم وأنتَ وكيلي"!!

صوتي طلع يرجف واني انطي الموافقة
وسأل كليم نفَـس الشي وهمات انطاه الموافقة!
تعالت صوت الهلاهل واسمع صوت الزلم
وهيَّ تباركله بالاستقبال

دخلتي سارة مگعدتني على الكوشة الجهزتها
بنفسها وتعبت بيها رُغم زعلها مَن خالو
ما تركتني وحدي بهذا اليوم وداست على
نفسها ودخلت للبيت إليّ حلفت ما تدخله
إلا تسترد كرامتها

ابتسمت وعَيوني على فُستاني الطلبة كليم
خصيصًا اليَّ !!
لونه ازرق "چويتي" هوَ يحب هذا اللون
وكعب شفاف يلمع اشبه بكعب سندريلا!
وزينت خصلات شعري بتاج بسيط تاركه
شعري براحته على طول ظهري والمكياج
كان خفيف وبسيط ما بيّ اي مُبالغة

رفعت عيني مَن گالت عمة علياء
- تسترن حبايب العريس يريد يدخل

صارت ركضه يلبسن وهوَ دخل بعَد ما بلغته
عمة يدخل شايل بيده بنته لابسه نفَـس
لون فستاني انصعقت بَـس مو منه لا مَن
البسبسه والكلام الصار وخصوصًا مَن
خوات هيام "طليقته"!
وبيده الثانية باقة ورد ازرق وابيض

عرف وانتبه لوجهي البهَت ويعرفني ما اعرف ارد
ولا اعرف اسوي شي وحَ اقهر نفَـسي بَـس
لذلك تقدم برزانه حط بنته بحضني رفع
كف ايدي باسها

كليم- سمحيلي مدامتي

گمت بعَد ما طلب !! حجه بصوت مسموع
كليم- ما الگه احسن منچ أُم لـ بنتي تقبلين تكونين امها

ابتسمت عيوني مدمعة باوعتلها صافنه
بوجهي وتضحك ببراءة !!
هزيت راسي بالقبول ، تقرب طابع بوسة
على جبيني
كليم- هي بنتچ وأنتِ بنتي وزوجتي ورفيقة الدرب بأذن الله

نزلت عيونة تتأمل تفاصيلي !!
حاوطني الحياء مَن نظراته الجريئة
ضحك ومسح جبينه
كليم- هاي شطالعة؟

- حلوة؟

- تيهتي طريق السَبـع بفتنتچ جوهرتي

سكتت خجلانه والنفس ضاق ما دا اعرف
اتنفس بسبب نظراته
تقدمت عمة تنطي الحلقات سحب أيدي
ولبسني الحلقة وباس ايدي مغمض عَيونه
بحنان

ايدي رجفت واحوالي تخربطت !!..
بلعت ريگ وحاولت البسه الحلقة بَـس ما
گدرت بسبب رجفتي ضحك وهوَ لبسها وبعَدها
قدمتله عمة الذهب ولبسنيا
وصعقني بفعلته گدام الكُل
نزل راسه وطبَع قُبلة مكان السلسلة على
رقبتي

صرت ارجف وبداخلي الطم والكلام صار
ببلاش وهوَ مطنش الوضع
اباوع بيبي تمسح دموعها وتباوعلنا مبتسمة
على فرحة ابنها

كليم- اريد ارقص ويا اميرتي ، مُمكن مو حلوتي؟

رمشت مَن جاوب نفسه بسُرعة ويا نغمات الاغنية بصوت إليسا "عبالي حبيبي"..

كليم- اكيد مُمكن!

اخذ أيدي وگومني سحبني برقة فارش
كفوف أيدي على صَدره وأيدي طوقت
خصري !!
سنَد جبينة على جبيني يدندن ويا نغمات
الأغنية يقبل خدي بكُل فرصة من بين الكلمات واندماجنا سوه چنت ميته مَن الخجل بسبب
الانظار المتوجه علينا

رفعت عيوني لـ عيونه الچانت تتأملني بكُل
حُب وشغف
- كليم

- جوهرته

ابتسمت وحاولت ابعد عنه بكُل الطرق
مو لان رافضة القُرب لا بالعكس
بَـس الخجل سيطر عليَّ وصرت ادور
حجة حتى ابعد

- أنتَ اكلت مَن كيكتنا

كممت حلگي اضحك مَن گال بشقاوة
كليم- بعدني ما ماكلچ باباتي

اشرت على الكيكة وگلت
- دا اقصُد هاي الكيكة الحقيقية مو اني

- اممم لا شنو رأيچ توكليني؟

- وأنتَ توكلني ومسرة تصورنا

كليم- حتى هاي تصوير ما طلع عقد هذا

عبست ودرت وجهي وهوَ رجع يحارشني بكلامه الجريء الاول مرة اسمعه منه
كليم- حتى بالحمام اصور علمودچ بَـس لا تعبسين هيچ تهدين حيلي

- ههههه

- اغدي فدوة لضحكاتچ آميرتي الصغيرة

وصدُك سحبني ووكلني ووكلته ومسرة انطيتها اكثر مُهمة تعشقها واليّ هي التصوير
بحيث ابدعت باللقطات وحتى كليم تنرفز منها على گد ما كُل شوي وصايحه لان يخرب اللقطة لو ما يسويها مثل ما تريد هي بَـس اهم شي الصور طلعت حلووة وعجبتني

كرص خدي وهزلي براسه بمعنى "راضية"؟

- كُلش كليم كُلش

باس جبيني وابتعد يباوعلي بنظراته حلوة
چنت سارحه بيّ وهوَ سارح بيّ ما اعرف شنو راد يگول
وفزيت مذعورة على صوت الزلم بره ، چان عالي اكيد عركة او فد مشكلة

ترخص وطلع وانصدمت مَن طلعت عمة
علياء تركض هي والبنات رحت وبعدت البردة مَن النافذة ، شهگت مكممة حلگي واني
اشوف جُنيد مو بوعية يلوب بحضن امه
وما يردد غير اسمي
كليم واگف قريب منه وجهة مطعون وما
يعرف شلون يتصرف بهيچ وضع

وصدمة عُمري مَن فهمت هوَ مو بوعية
لان "سكران" !!!!

سارة- مو ذنبچ ابد لا تفكرين هيچ لا تدمرين يومچ هذا بفعلته!

باوعتلها مدمعة
- بَـس خطية!

- الله يصبره وينسي أنتِ مو نصيبة لا اعتراض على حكمة رب العالمين

گعدت مكسورة الواهس وشوي
الناس وكليم راح يوصل عمة علياء والبنات
وجُنيد للبيت بينما خالو وولد عمة نجلاء
تكفلوا بالضيوف وودعوهُم لحد اخر نفر

رفعت راسي على فتحة الباب دخلت وحدة مَن خوات هيام "طليقة كليم" تقربت
وبدون سابق أنذار گرصتني مَن زندي
شهگت أحَس مكان الگرصه مَن قوتها
خدر !!

- ما تاخذين مكان اختي اول وتالي الاخذتي يرجع الاصحابه

قبل لا أردها نعتت مَن ايدها وما شفت غير
أيد سارة الاستقرت على وجهة
فتحت عيونها وصاحت

- ضربتيني؟

سارة- واكسر راس كُل عار مثلچ تفكر تجرح اختي بكلمة او فعل

رادت تضرب سارة بَـس بسُرعة عوجت ايدها ودفعتها طاردتها مَن البيت بكُبرة !!

دخل خالو مستغرب وبقى صافن على
سارة لان چانت تنفض غضب وابد ما
باوعتله كأنو مو موجود !!
ما اعرف بَـس حسيته حاجاها علمود
يلفت نظرها اله

هُمام- شبيچ؟ صار شي؟

جمدت من اتجاهلته وتقربت مبوستني
سارة- رايحه اني ديري بالچ على نفسچ ولا تبقين فاهية!
اي شخص يفكر يجرحچ مسحي بيّ الارض واني بظهرچ محد يتجرأ يأذيچ وهاي الحية بعَد ما توصلچ واذا وصلت اعرف شلون اتصرف وياها

- تمام

رادت تطلع بسُرعة عارض طريقها مانعها
هُمام- مو احاجيچ؟

سارة- ياريت تبعد اريد اعبر

هُمام- واني دا احجي وياچ وما اطلعين لحد ما تجاوبين

سارة- عناد هوَ؟

هُمام- فهمي مثل ما تردين !! وبعدين شنو هذا الاستهتار أنتِ شلون طالعة بهاي الزينة؟

سارة- يهمك؟ وأن كان يهمك أنتَ كُلك ما تهمني ورأيك هوَ والعدم سوه اوكِ؟

فتحت عيوني وهوَ خالو صفن بيها مَن حطت اصبع السبابه على صدره ودفعته
ناوية تطلع؟
ما احس غير دفعها وقفل الباب حاط المفتاح بجيبة

هُمام- العالم عدم واني وحدي محتل عالمچ

سارة- احلام العصر اگعُد منها اوكِ بيبي وياريت تستعجل بالطلاق لان ما عاد عندي صبر حتى اتحرر منك

بكُل خُبث تقدم وانحنى شوي يوصل
طولها
هُمام- ومنو الاعترف بالمستشفى هوَ مهووس بتفاصيل ابو الهَمم؟

باوعتلي وبعيونها عتاب !! بَـس همات
ما انطته فرصة وجاوبته بنبرة بارد
جافة لأبعَد الحدود خلت خالو يستغرب كمية هذا البرود وعدم الاهتمام

سارة- ماتت سارة المهووسة بتفاصيلك والگدامك سارة جديدة ما بگلبها غير خواتها

لزم فكها
هُمام- تحبيني

سارة- اقنع نفسك! بيوم رَوحـي التحبك بيّ ادفنها ، رَوحـي ما تحب اليتركها بنُص الطريق ويبتر جناحاتها رَوحـي ما تحب هُمام أنتَ ماضي واني الماضي ادفنه

تقربت ونقرت على صدره
سارة- يعني أنتَ ميت دفنتك بگلبي ونهيتك واسهل شي بقوانيني التخطي
واني مو بَـس تخطيتك اني مسحتك مَن حياتي

هُمام- حلم تحلمينا اطلع مَن حياتچ

- وحلم تحلمه أنتَ ادخل الحياتك

رفعت أيدي ساده عيوني مَن شفته حاوط خدودها وباسها بعَد ما خلته يفقد مَن تصرفاتها
شهگت مباوعه مَن صوت الراشدي الطبعته على وجهة

سارة- ثمن كُل اقتراب منك راشدي وكُل ما تتجرأ بـ افعالك تدفع ثمن اكبر

هُمام- واني اليوم مقرر ادفع ثمن شي چبير

شالها على كتفة وهي تضرب بيّ بقوتها
تريده ينزلها وهوَ ما مهتم
دار شامرلي المفاتيح وگال بهدوء متجاهل صوت سارة وكلامها حتى سب سبته !!..

هُمام- هذا المفتاح خاف يجي كليم

وراح صاعد بيها للغرفة رُغم رفض سارة وكُل اعتراضاتها ؟!!

وگفت صافنه بالصار؟ دخلت للاستقبال
واشوف مسرة ودموع نايمات بملابسهن
وما يعرفن بالدنيا
جذبني صوت تلفوني ، رحت فتحته ..

كليم "گاعده؟"

- اي

- فتحي الباب

مسحت على وجهي متوترة! اباوع ايدي
ترجف
وأحَس وجهي صخن وحرارة
تطلع من عيوني محتارة شلون اطلع بهذا الشكل گدامه ولاول مرة؟
ابتسمت واني اتذكر اصالة مَن تگول بـ أغنيتها
"بتوتر أصل أنا خوافة"!!
اي والله مو بَـس خوافة اكبر جبانه اني

رحت وخطواتي ترجف فتحت الباب بعيون مُغلقة
فززني صَوت ضحكاته الهادئة
وحَـسيت بنفسي ادخل احضانه بعَد
ما هوَ سحبني محتويني داخل اذرعته
حيث يتواجد الامان

لزم فكي ورفع راسي عيونه بعيوني
ابتسامته اللطيفة لا أراديًا تسللت
لـ ثغري مبتسمة !!
تقرب وثبتت شفايفة على جبيني
يقبلني بحنان فائض ، ويهمس بشُكر

- سُبحانـكَ ربيّ يا مَن زرعت الحنان بقلبها لـ قلَـبي ، شُكرًا وحمدًا أبدا

- كليم

- أبوية أنتِ أمريني

سُـكتت الخجل مستحوذ عليَّ
فهمني كالعادة بدون ما اضطر اشرح
اخذ أيدي
ومشى بيَّ للحديقة وين المرجوحة
گعد وگعدني بصفه

حط أيده على صَدره وگال
كليم- هذا بيتچ تعاي يا بعَدهُم كلهُم

حط راسي على صَدره وسحب نفَـس
مَن شعري
حاوط جسمي بأيدي ، وگال

- شلون اجواء العقد عجبتچ؟ اكو شي ناقص چان؟

- كُلشي مثالي وعجبني

- الحمدُ لله ، چنت قلقان ما يعجبچ ذوقي وتنزعجين مَن شي لان استعجلنا شوي بالعقد

- لطـالما عجبني ذوقك واكثر شي عجبني الفُستان باوع

گمت اضحك وافتر حول نفَـسي وهوَ
يباوعلي بحُب
كممت حلگي
- حَـسيت نفَـسي مَن اميرات دزني

كليم- أنتِ اميرة كليم

رجعت گعدت قريب منه
كليم- الله يقدرني وابقى ازرع البسمه والفَرح بوجهچ

- آمين

سُكتت بَـس بنفَسي اسأل عن جُنيد واقلق
يفهم خطأ
وإلا اني مَن يوم حلم بابا وتوصيته على
كليم طلعت جُنيد مَن عقلي وگلبي وما بيهن غير كليم

حاوط خدودي وسُبحان الله كأنو قرأ
افكاري مَن گال
كليم- سألي بناتي

- شلون عرفت عندي سـُؤال؟

كليم- حافظچ مَن الجدم للراس

ابتسمت فرحانة وأحَس اي بنية تحب يكون شريك حياتها يفهمها بدون ما تنطق بشي؟
وهذا الشي أحَس حَ يساعدنا بالمُستقبل اني ويا

- جُنيد؟

تنهد
كليم- كسر ظهري وفرحتي والله حالته دمرتني شلون اساعده ما دا اعرف

- هوَ متعود يشرب؟

- لا لا هاي اول مرة صدمني صدمة عُمري

- كليم اريد اسولفلك بَـس ما تفهم خطأ

- أنتِ الوحيدة الما تخطأين سولفي بابا

- دا أحَس بتأنيب الضمير اتجاهة وأحَس اليَّ أيد بحالته رغم ورحمة بابا اني ما متقصدة
اتمنى أنتَ تساعده وتوگف وياه لحد ما يطلع مَن هاي حالته ويتناسى مُمكن ما يريدك مُمكن ينفر منك بَـس أنتَ قلبك نظيف وانسان واعي ما حَ تشيل عليّ وتزعل واني الله شاهد غير اخ وابن اخت زوجي ما اشوفه

رفع حواجبه مبتسم
كليم- زوج؟

- ليش أنتَ مو زوجي؟

- اني كُلشي الچ مو بَـس زوج جوهرتي شو تعاي حالف ابوسهم

اخذ وجهي وباس عيوني ضحكت باعدته
- عمة تگول بوسة العين فراق ، شنو تريد تفارقني؟

كليم- خُزعبلات لا تأمنين بيها لان اني ما اگدر اذا ما ابوسهن تعودي

- واذا طلعت مو خُزعبلات؟

- ما يهم لان بَـس الموت يبعدني عنچ

- هههههه

ضاعت نظراته بعيوني وهَمس يدندن بكلمات أُغنية قديمة كُلش
-" بلاش تبوسني في عنيا
دي البوسات في العين تفرق
يمكن في يوم ترجع ليا
والقلب حلمُ يتحقق "

حضنته خجلانه اباوعله لان نظراته كُلش
جريئة غير عن العادة
ورغم حُبه ونظراته المو گادر يسيطر عليهن إلا أنُ ما زعجني بشي وكان حذر بتصرُفاته وافعاله ويايَّ حتى ما انفر منه واتعود عليّ واتقبله

بَـس ما چنت ادري كُل هذا مؤقت وبوسة العين حَ أدفع ثمنها غالي وزياده !!

- هسه شنو؟

كليم- شنو حبيبي؟

- بخصوص جُنيد؟

كليم- بدون ما توصين اطمئني ما اعوفه لحد ما يرجع مثل قبل واحسن

سُكتت وخليت الموضوع بين أيدي ومتأكدة حَ يكون قدر المسؤولية
وجُنيد حَ يتخطى الموضوع بفضل الله ثُم كليم

ايدي تتحرك على خدودي بنعومة للحظة
غلبني النوم مَن بعَد يوم مُتعب
لاگيه الامان بين احضانه ، ما اعرف يمكن دقائق چانت وفزيت مرعوبة على صرخة هزت الـبيت
چانت صرخة امي "ســاࢪة"!!
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••

سـارة••

دفعني داخل الغُرفة وغلقها ما يقبل اطلع
اسلوبه المُتعجرف نرفزني
رحت احاول افتح الباب بَـس چان مقفول باوعتله متنرفزة ومتأكدة واضح هذا الشي بوجهي لان بالعادة ينطعن يصير احمر دم مَن اعصب

- افتح الباب !!

هُمام- گعدي

تقدمت دافعته مَن صدره جسمي يرجف
- افتح البااااااب اني مو لعبة عندك سامع؟

مرر أيده على شعري يبرم خصلة حول اصبعة
- أنتِ لعابتي

دفعت أيده متنرفزة كارهه افعاله يمتى ما يريد يبعدني ويمتى ما يريد يقربني
اني مُستحيل اقبل بهيچ شي
ولا حَ اتقبله هوَ وافعاله المو منطقية

گعدت أحَس بجسمي يرجف خفت تجيني
النوبة !!
ما اريدها تجيني گدامة ما اريده يشوف ضعفي هوَ اخر انسان حاليًا يستحق يشوف ضعفي ، تقرب مادلي گلاص بيّ ماي اخذته بدون رفض لان چنت احتاج اهدأ واعتقد هوَ فهم حالتي

هُمام- اهدأي عيني مو زين عليچ

- طلعني ما اريد ابقى يمك

هُمام- شنو بيَّ أبزز

ضربته ؏ صدره كارهته
- نسيت شنو گتلي مرة مَن گتلك حَ تكرهني؟ "راح اخيب املچ" چنت تقصد حَ تخيب املي وما تعوفني ولا تكرهني بَـس أنتَ سويت الاسوء

عيوني عبارة عن جمرات لان كاتمة دموعي وغضبي
- أنتَ كرهتني وكَرهتني بنفسي تركتني بنُص الطريق ضايعه وحَدي اخ منك ومن كسرك كم مرة بعَد حَتكسرني هُمام؟ مَن وعيت وللحظة هاي اني دائمًا انخذل بَـس ولا يوم فكرت أنُ أنتَ تخذلني

گمت مبتعده عنه ومخليته ورا ظهري
- خلصت العُمر لچمات والدنيا تلطش بيَّ ووحدي اواجهة ومَن دخلت حياتي فكرتَك العوض بَـس؟!.. طلعت اكبر لچمة ووجع

درت اباوعله يتأملني بحَزن
- اني ما استاهل تصرفُك اني ما چنت استاهل الصار بيَّ ولا حتى موقفك الأخذته منيّ

تقرب ملتقط كفوف أيدي وگال
- سمعيني! خلي اشرحلچ اعرف مقصر وتصرفي خطأ بَـس سمعي تبريري عسى ولعل تفهمين

چنت احتاج اسمع لان تعبت مَن كمية الافكار الكُل ليلة تسرق النوم
مَن عيوني !! هزيت راسي بـ أي ، اخذني ساندني ورجع گعدني على السرير وهوَ گعد على ركباته
گدامي وأيديا لازالت اسيرت أيدي الضخمة

بدأ يسولفلي شعوره واسباب تصرفاته
- سارة اتمنى تفهميني وتخلين نفسچ بمكاني اني وداعت عيونچ الشَهل
عقلي طار ما گمت اشوف بعيوني مَن سولفتيلي ضليت اضرب اخماس بأسداس اريد استوعب
ضربتچ وشوفي

رفع ايده صدُك چانت مورمه شوي وبيها جروح ، رجع يكمل
- لو ما كليم اكسرها دمرني الموضوع وكُل ما اصفن اگول "چانت تستاهل احضنها بذاك الوضع مو اضربها" وخلصتها ياريت وياريت بَـس بشنو تنفع والله شربة الماي اغص بيها لان مأذيچ بوقت أنتِ احتاجيتي الاحتواء مني

- كسرتني

- اعرف ومستعد اسوي كُلشي في سبيل اصلح افعالي !!..
سارة اني ميت بيچ ، ابو الهَمم ذايب بعيونچ الشَهل

عيونه تلمع وهوَ يعترف چانت عيونه تحجي قبل لسانه ، ما انطيت ردة فعل وبقيت صافنة
يمكن فعلًا "الكلام الصح بالوقت الخطأ"

- سارة الموضوع وما في أنتِ نقطة ضعفي ومَن سولفتيلي ما فكرت بشي غير اعذبهم
وعذبتهُم بَـس ما مرتاح لان أنتِ بعيدة عني كافي بُعد رجعيلي ضايع
بدونچ ، غلطت بَـس والله استاهل فرصة ثانية لا تظلميني اني زلمتچ وأنتِ حرمتي حبيبة گلبي لا اني ارتاح ولا أنتِ بهذا البُعد

درت وجهي ساحبة أيدي استمع لحسراته
- اني ما أريد

هُمام- شنو؟ سارة لا تسوين هيچ لا تقسين عليّ

- ما دا اگدر اتقبلك حاليًا كُلشي جديد واني تعبانه

- بَـس ابقي هنا ونصلح كُلشي سوه؟

- لا اريد استقل وحدي ومثل ما گلت نتطلك

طفر يحجي بحرگة گلب
هُمام- تخبلتي أنتِ؟ لچ بابا كلمة طلعت بساعة غضب ولان ضميتي عني زعلت وردت اعاقبچ قابل اني اقبل بالبُعد؟ سارة كافي رَوحـي طلعت وحق حيدر الكرار

- ما أريدك

حضن وجهي بأيدي يحاول يحجي بهدوء
- تحبيني أنتِ ليش هيچ تسوين؟

- احبّك! بَـس مو معناها اذل نفَسي وكرامتي علمودك

- تعوفيني؟ تعرفين ما اگدر اعيش بدونچ شلون تعوفيني؟

سُكتت بدون جواب صار يشيل نفسه ويرگعها بالگاع وهوَ يشوف رفضي !!
واني فعلًا ما دا اگدر انسى هوَ عافني بلحظة اني جنت محتاجة يحتويني مو مُبالغة بَـس
بعَد الاحتواء العشته وياه وشعور الامان بـ اتفه التفاصيل يتركني بموضوع مؤذي مثل هذا صعب اتقبله

حاوط خدودي وتقرب بايسني صديت بوجهي للجهة الثانية
- عاجبك اتجاوز ويــاك؟ لا تتقربلي هيچ!!

هُمام- تجاوزي بَـس لا تعامليني بهذا الاسلوب ابو الهَمم يموت الف موته بنظراتچ هاي

- افتح الباب اريد اطلع

هز راسه ما مقتنع بأي تصرُف يبدر منيّ
دفعني على السرير وصار فوگي
خزرته دافعته مَن صدره جسمي يرجف بسبب القُرب تقرب دافن راسه برقبتي
ينثر قُبلات هادئه عكس انفاسه الثائرة

صحت ابعده بَـس هوَ رفض بتكميم حلگي
مستمر بأفعاله ، غصب عني وداعة حُبي
اله صرت اشوفه اريان !!.. بلعت العافية
وصرت ارفس بمكاني
كُل لحظات الاعتداء صارت مثل السناريو
تدفق لـ ذاكرتي

ابتعد مذهول وبَـس بعد ايده صرخت متكورة على نفسي واناشغ گلبي متگطع
مَن وجع اللحظة
صار يمرر ايده على راسي ويهمس بحَس ثگيل كُل تعب الدنيا بيّ

هُمام- اسف بابا اسف سامحيني وداعة لوعتي عليچ احبچ

بچيت بقوة ساده عيوني رافضه اشوفه
اسمع الباب يندگ بقوة وصوت رنيم
تحجي بقلق ، بَـس النُعاس سيطر عليَّ وهربت مَن واقعي للنوم وحتى بنومي ما مرتاحة بسبب الكوابيس
ㅤㅤㅤ
ㅤㅤㅤ
ㅤㅤㅤ
ㅤㅤㅤ

ㅤㅤㅤ

••••••••••••••••••••••••••••••

رنيـم•

رجعت ابلع بريگي اليابس واباوع داخل الغرفة مَن فتح الباب خالو
عقدت حواجبي مستغربة ، شكله چان تعبان حيل وبلگوه واگف على رجلي تقدمت بسُرعة اخذني بحضنه

- شبيها سارة؟

- نفسيتها تعبانة مَن الماضي تركيها خليها نايمة

- خفت عبالي صارلها شي

- اش ماكو شي ، ههه شنو هذا الجمال؟ مُبارك الچ يا رَوح خالچ

غير الموضوع ونجح يسلب تفكيري بسارة
لان الخجل حاوطني
صَـح الفُستان مو فاضح وبسيط جدًا وحتى المكياج اختاريته شي هادئ ومو مُبالغ بَـس خجلت لان اول مرة يشوفني هيچ

- كليم جوه

- اه؟ وشلون عايفته؟

- اجيت مَن سمعت صوت سارة

هُمام- اممم يلـه ننزل

نزلنه وهوَ راح حضن كليم وباركله
اباوعله ما حرجه وسأل على الصوت
شگد احب
علاقتهُم ، مگعديني وسطهُم ويسولفون وخالو شوي وترخص يروح يرتاح وصدُك هوَ چان تعبان والتعب واضح بملامح وجهة !!

كليم- كُلشي بخير؟

- اي بَـس سارة شوي تعبانه وواضح راح اتعب خالو وللصراحة..

تقربت احجي بصوت ناصي وهوَ مبتسم على حركتي
- يستاهل لان السوا خطأ

فتحت عيوني اريد استوعب الحركة السواها
دنى منيّ واستقرت شفايفه على خدي وبقى مطول بدون ما يبوسني بَـس مُجرد حاط شفايفه وانفاسه تحرق بشرتي وشواربه تچكچك بخدي ابتعدت مسافة قليلة احك بمكان شواربه

كليم- ترفه بسُرعة تتحسسين

- ها؟؟

- يصير ابوسچ؟ مَن خدچ؟!

حَـسيت نفَـسي نعست ، سديت عيوني
وهوَ اخذ سكوتي علامة قبول ورجع
يبوس بخدي وايده محاوطه خصري بعدته احجي مثل السكࢪانه !!

- لا بَـس شوي ما يصير كليييم

- ههههه زوجج عادي

- خـ خطيبي

- زوجج بابا جوهرتي حبيبي شنو نعستي؟

- اممم

- تعاي انومچ واروح

ما گلت لا وهوَ سحبني وخلاني انام على ايده يقرأ آيات ويحرك ايده
بعشوائية ساعة على خدي ساعة على زنودي لحد ما اخذني النوم فعلًا

فزيت بعَد فترة طويلة على صوت
السيارات وصوت الاطفال وهُما
يلعبون
بالشارع !! مددت جسمي اباوع
ما موجود اكيد طلع بالليل بعَد ما نمت

گمت متكسرة وجسمي متشنج
بَـس طلعت
صار بوجهي خالو ، ضحك وفتحلي أيدي بَـس صرت قريبة منه سحبني داخل حضنه طبع قُبلة على جبيني وگال

هُمام- جهزت الريوك لعيونچ حلوة خالچ يله استعجلي وگعدي خواتچ

راد يروح وگفته متسائله
- سارة شلونها؟

- بعدها نايمة صاعد اش....

رفع راسه ويايَّ قاطع حديثه مَن شفناها نازله
ايدها على راسها وگعدت بنُص الدرج ، ركض الها قلقان واني وياه

هُمام- بيچ شي حبيبي؟

رفعت راسها خازرته بدون ما تجاوب
هُمام- راسچ يأذيچ؟

سارة- شعليك؟

هُمام- اذا معليَّ بحرمتي عليَّ بمنو؟

سارة- زوجتك حاليًا وطليقتك مُستقبلًا ان شاء الله شو گول امين

هُمام- عود افكر يلـه تعاي اكلي

شالها وهي ترافس بحضنه تريده ينزلها وهوَ معاند !! مخابيل مو بعقلهُم
رحت اخذت ملابس وتوجهت للحمام سبحت يلـه شوي فك التشنج الصاب جسمي بسبب النومة لان مو مريحة

طلعت لافه المنشفة على راسي وركضت للمطبخ ميته مَن الجوع فكرت بعدين امشط
- انيييي جوعاااانةة

جمدت مكممه حلگي واني اشوفه گاعد بصف خالو ويباوعلي مبتسم
سحب كرسي بصفه وگال
كليم- يخسى الجوع تعاي بناتي

ارتبكت وخصوصًا ما متعودة !!.. ولابسه دشداشة قصيرة ورُبع ردن والمنشفة رافعتها لفوك بحيث صدر الدشداشة دلع ورقبتي كُلها واضحة

گعدت بصفه ما مرتاحة بَـس هوَ گدر يكسر حاجز الخجل لان تعامل ويا الامر طبيعي وكالعادة
صبلي الچاي دافي ويسويلي لفات صغار
وكُل شوي يتقرب يهمسلي

كليم- اكلي مَن امس بدون اكل

- دا اكُل

- الف عافية ومَن عافيتي على عافيتچ

هُمام- افتهمنا تزقنب

ضحك كليم متونس لان خالو يغار وواضح عليّ كُلش
وصدُك سكت لان خالو مغثوث مَن موضوع سارة المو معبرته وتتعامل كأنو ما موجود

كليم- اريد امشطلچ

- هاا

- بروح ابوچ الطيب امنيتي امشطلچ لا ترفضين وها اسويلچ ظفيرة فرنسية

كممت حلگي
- دا تسويلي اغرائات شنو؟

كليم- شنسوي بعَد نريد رضاچ

هُمام- امشوا انقلعوا مَن گدامي كليم ورحمة العزاز راح ادفرك

كليم- شتريد؟

هُمام- ولك راح توگع على وجهك عليها گدامي ابن الخوش ناس ادري ما عندي غيرة

هز ايده كليم وسحبني گايم
كليم- ابقى على سوالفك حَتموت نفسك

عافهُم وسحبني للصالة وطلب مني اجيبله مشط
ركضت جبته ورجعت گعد هوَ على الكرويته واني بين رجلي ، فتح المنشفة وتنهد بايس راسي

كليم- اموت واحيى هنا جوهرتي

- كليم!!

- يغدي فدوة لخجلج

- احم.. سويلي مثل جدولة ريم صارت بنفسي

- ماكو شي يبقى بنفسچ واني اشم الهوى

ابتسمت على حنيته وهوَ عبالك يدلك براسي
مو دا يمشط !! يفرق خصلة خصلة خاف يأذيني وبالصدفة چانت اكو مراية گدامي هوَ ما منتبه عليها ، چانت عيونه تشع حُب وبهدوء علمود لا أحَس يرفع شعري ويبوس اطرافه

درت اباوعله مبتسمه لان لزمته بالجرم المشهود
- عادي لا تتقيد وعبالك اضوج

كليم- ما اريد اضغط عليچ بتصرفات وتنفرين مني

هزيت راسي
- باللحظة القبلت بيها بيـك اني تقبلتك كليم! واريد اتعود عليك اكثر مَن ناحية أنتَ زوجي ونتعامل على هذا الاساس

حاوط خدودي
كليم- يعني ما تضوجين اذا المسچ؟ او ابوسچ؟ واذا تغزلت بيچ ما يزعجچ الموضوع

نزلت راسي وأحَس خدودي حَ تنفجر
مَن
كمية الاحراج؟ رفع راسي وعيونة تنتظر جوابي بلهفة حُب ، ياربي مَن شنو مخلوق هذا الانسان بحَيث كُل حنية العالم مجمعة بعيونة
عقدت حواجبي مكتشفة شغلة

- كليم

- شريكة الرَوح گولي!

- أنتَ عيونـك ليش صغار كُللش ناعمات؟!

عافني ورفع راسه يضحك بقوة بحيث عيونه دمعت وهوَ ما يقبل يسكت
واسمع خالو صاح مَن برا

هُمام- اتزوجت واستهترت كلييييييم

كلام خالو خلاه يدخل بهستيرية ضحك اكبر واني مَن شفته هيچ صرت اضحك مكممة حلگي
غصيت بضحكتي مَن سحب وجهي وصار يبوس بيّ

- شنو هذا الاكتشاف رنيمه؟

- والله شو توني انتبهت

- غضب غضب اموت بسوالفچ يلـه دوري اكمل شعرچ صغيرونتي

صار يظفرلي شعري ومَن صدُك ما تقيد بعَد ويايَّ
توه خلص ويريد يحجي وفزينا على صوت خالو هرج البيت هرج طلعنا نركض واشوفه داخل بهستيرية غضب وكُلشي گدامه يفلشه
وسارة !! گاعدة على الميز تشرب چاي وتباوعله ببرود "يا جبل ما يهزك ريّح" !!

راح كليم يهدي بيّ واني تقربت منها
- شبي؟

سارة- ما اعرف

ضجت مَن اسلوبها حيل
- شنو ما اعرف؟ شنو گلتيله وعصب؟

- گتله اريد اعيش بمُشتمل وحَدي وهوَ عصب مو ذنبي

- صايرة قاسية سارة

عفتها تباوعلي ورحت يم خالو اشوف ايدي لان جارحهن وكليم يحاجي يريده يهدأ لان جسمه كُله يرجف

كليم- اهدأ حبيبي خوفت البنات اهدأ وكلشي حَيكون بخير

دفع كليم مخنزر بوجهة
هُمام- أنتَ لگيتلها المُشتمل مو؟

كليم- نختني وما گدرت اردها

هُمام- روح مَن وجهي كليم اعصابي فايرة وما أريد اغلط بحقك
والكُل يسمعني مُشتمل ماكوووو طلعة مَن هذا البيت ماكووو والمو عاجبة يضرب راسه بالحايط والعندي حجيته واليكسر كلمتي اكسر راسه

دفع كليم وگام طالع مَن البيت كُله !!
گعد يحجي ويا سارة وهي قافلة اخر شي أيس منها ودعني وطلع لشغلة وطمني هوَ حَيحجي ويا خالو ويهدي

ومرت الأيّام بهذا الشكل ، كليم كُل يوم حرفيًا كُل يوم يجي مرتين او تلاثه يشوفني ويتفقد اذا ناقصني شي او محتاجة شي
وابد ما تجاوز حدوده ويايَّ بشي غير لمسة الأيد وبوسة الخد وحتى بسوالفه چان حذر

سارة وخالو صايرين مثل توم وجيري ما يرهمون بمكان لو هوَ يغثها لو هي وتگب العركه للستار وبطلاع الرَوح تهدأ الاوضاع چان
بالبداية يصالح وهي ما تنطي مجال وهسه
صار يعاملها بالمثل وهي متخبلة عليّ

مرة گاعدين بالصالة نباوع للمُسلسل وهوَ اجه مَن بره چان طالع بَـس شنو
رجع مثل البركان دخل ورگع السويچ
مال السيــارة بالحايط ونتر

هُمام- ناوية تجلطيني؟ لچ شكووووو توصين لـيث على احتياجاتچ واني موجود

باوعتله ببرود ورجعت عينها على الشاشة
سارة- وأنتَ منو؟

- زوجج غصبًا ما عليچ رضيتي اولا

- اقنع نفسك بيبي

طفح الكيل بيعا ورغم اسلوبها الغثيث خفت عليها مَن تقدم وسحبها مَن ايدها عليّ
- سارة لچ اخ سارة بلگوة صابر وساكت لا تزودينها

سارة- لا تصبر

- أنتِ التتأذين

- ههههه متأكد !!

دفعها رايحة روحه وفاقد اخر ذرة صبر
ضرب الحايط بكُل قوته اني مَن يمي توجعت
شحال أيده؟
باوعتلها ما قابله على تصرفاتها وهي بكُل برود
رجعت تكرز واتابع المُسلسل مغلسة على الوضع

ㅤㅤㅤ
ㅤㅤㅤ
ㅤㅤㅤ
..... ومرة دخل للمطبخ واحنه نطبخ للغداء
سحبها بهدوء وگعدها وگعد گدامها
باس كفوف أيديها وشمهن بقوة ناطق

هُمام- سارة احبچ ومشتريچ ليش تعذبيني وتعاقبيني على شي مو بيدي؟؟

- وأنتَ عاقبتني على شي لا ذنبي ولا بيدي!

-چنت مو بوعييّ وتعرفيني لو عصبت افقد

نترت أيده مكتفتهن لـ صدرها
-گتلك مرة غلط واحد منك امسحك مَن حياتي وأنتَ شنو سويت؟ تركتني بأكثر لحظة محتاجتك بيها
ضربتني وهنتني گدام الكُل وگدام عينك تجيني النوبة بدال ما ادير بالك عليّ تگُلي "نتطلگ" ؟! ليش منو گالك سارة حَتموت بعَد ما تعوفها هه روح بابا روح طلگ ما تهز شعرة مَن راسي ولا گلبي يرجف على فراقك

گامت وعافته وهوَ عاط بقهر
- ماكو هيچ قانون سارة وحق حيدر الكرار ماكووو وصابر وساكت علمود لا غضبي يأذيچ

- القانون الما يعجبني اغيره ، واكتب قانوني بنفسي أنتَ بعدك ما تعرف سارة منو

وبهيچ ونفَس كُل نهاية نقاش اترمه وتطلع مَن المكان البيّ هوَ وتركه يحترك وحده

ㅤㅤㅤ
ㅤㅤㅤ
........ وهيچ مر شهر مَن عقدي اني وكليم واليوم عازمية ببيته
تأكدت مَن الحجاب عدل كون ما طالعة شعرة وفستاني الوردي اليشبه فساتين اميرات دزني كُل هذا ذوق كليم يلبسني
هيچ ومن اسأله يگول

"الاميرة ما تلبس غير ملابس اميرات"

گدر بفترة قصيرة يعلقني بيّ اكثر مما اني
متعلقة وما يكمل يومي إلا بشوفته او برسالة
منه اذا چان مستعجل على الشغل وما يگدر يمر

طلعنا متوجهين للبيت واستقبلونا ذاك الاستقبال الحلو
وبيبي طايرة بيَّ !! يمكن لان شافة كليم
مرتاح وفرحان بقُربي منه بعَد ما اخذ نصيبة مَن التعب بالسنوات الماضيّة

گاعده بصفة وبيبي مَن الجهة الثانية تقرب وهمس
كليم- شنو مَن جمال اخذ گليبي؟!

- حلوة؟

- بكُل لحظة بكُل حالة مَن حالاتچ أنتِ حلوة والاجمل بعيوني

تنهدت اباوعله بخجل ما اعرف ارد
دار مسح وجهة وضحك متوتر

- بيك شي؟

- يلعن تفكيري

- شبيك كليم؟

لزم أيدي
كليم- تجين لغرفتي؟

- اي عادي

- يله تعاي

شبك اصابعة بـ اصابع ايدي وگمنا ، العيون كُلها صارت علينا متت خجل وهوَ ما اهتم اخذني صاعدين لغرفته
بَـس دخلنا عافني ودخل للحمام !! طلع بعَد فترة تقرب وباس خدودي بقوة

كليم- مشتاقلچ وعَيون امي

- مو كُل يوم نشوف بعض؟

هز راسه وتمتم بشي ما سمعته اخذت ايده وتقربت بأيدي الثانية امسح على خده
- بيك شي؟ أحسك مو طبيعي؟

- رنيمه اريد اسوي شي بَـس اخاف تكرهيني

- شنو؟

- لا انسي

- بداعتي گول

هرب عيونه
- ابوسچ !!

ضحكت بغباء ومن صدُك ما چنت فاهمه قصده هنا
- مو بستني؟ بَـس عادي بوسني ما اضوج

بقى يباوع بعيوني ، تقرب حاوط خدودي بأيدي واني ما اعرف شنو من ثقة بنفسي چانت عندي وبجرأة اباوع لعيونه
هناك وحَسيت الوقت توقف والاصوات تلاشت وبَـس صوت نبضات قلَـبي مسموعه

شفايفه استقرت على شفايفي وباسني حَـسيت نفسي دخت!
وحركته سلبت كُل قواي ، شواربه تچكچك وتحسست منها بَـس منين اجيب القوة وادفعه حَس على نفسه مَن جسمي ذبل بين ايدي

شالني مگعدني بحضنه وهوَ گاعد على السرير
كليم- رنيمه حبيبي بشنو حاسه؟

حطيت راسي دافنته برقبته رافضة احجي ، ميته مَن الخجل اول مرة يسويها واني احساسي ما اعرف شنو بَـس بطني تلويني
وما اعرف بَـس الاعرفه حَـبيت القُرب

كليم- اسف بعَد ما تنعاد لا تعوفيني رنيمه

وجعني گلبي مَن حجه بغصة خايف اعوفه رغم هذا حقه ، رفعت راسي
وگلبي هاي المرة تحكم بيَّ ، مررت أيدي على خده بسُرعة غمض متحسر بسته بخده وجسمي نحلان

- أنتَ همات لا تعوفني

كليم- ما زعلتي

- لا اني زوجتك

ابتسم ساند راسه على راسي
- أنتِ اميرتي ، رنيمه؟

- هـاا

- "حبّـكِ خارطتي ما عادت
خارطةُ العالم تعنيني" ..

شهگت مبتعدة مَن اقتحم الغُرفة لـيث يصرخ بصوت الدلالات
لـيث- نزلوا النتائججج ... ااءءءء

وگف بمكانه يوزع ابتسامات بسُرعة ابتعدت عن كليم
اعدل بنفسي

كليم- أنتَ زمال؟ اكو بشر طبيعي يدخل بهذا الشكل الهمجي للغرفة؟

لـيث- اي اني

خزره كليم متنرفز وهوَ تقدم عليَّ يحرك حواجبه
لـيث- نزلوا النتائج مرة خالي

- والله

كليم- طلعتهن؟

لـيث- اي تعاي شوفي اسمچ

ركض واگفه بصفه وكليم مَن الجهة الثانية نقرأ بالاسماء لحد ما صرخت فرحانة وكليم لمني لحُضنه

كليم- رفعة راس الجوهرة

- ما مصدگه ههههه

چان بوقتها مُعدلي 97 وسارة 85 ودموع 86 بَـس الصدمة الچبيرة مسرة
ما چنه متوقعين تاخذ هيچ مُعدل هي صَـح درست وتعبت بَـس ولا چان بالحُسبان تاخذ 88 حتى اعلى مَن دموع وسارة

بحَيث خلصت العزيمة رافعة خشمها وما تتحاجه
بَـس حقها لو اني طافرة طفرتها بهيچ مُعدل ما امشي على الارض احطلي جناحات واطير

لـيث- اعترفي مجرة غاشه مو؟

مسرة- مجرة بعينك البُلبُل الفتان

لـيث- والله زمن مجرة تصيحلي البُلبُل الفتان
وكله بسبب واحد اخ لو الزمه

قسورة- شتسوي؟

لـيث- ابوسه ، تعال ابوسك اخوي الچبير تاج راسي حزام خصري

هوَ گال "حزام خصري" لو البيت ضج بالضحك حتى قسورة ضحك ما گدر يبقى خازره
لـيث روح هذا البيت بحَيث بدونه الگعده مو حلوة بَـس نخاف نعترفله لا ينغر وبعد شيفكنا من عنده

دار قسورة گدام الكُل وقرص خد مسرة
قسورة- هي شاطرة ودرست وجابت مُعدل على گد استحقاق تعبها

لـيث- سمعت ايهم

ايهم- شاطرة شاطرة صح

قسورة- أنتو الجوز اتوبون مني لا اگوملكُم

لـيث- الله الك لـيث المُضطهد هسه شگلت اني دا احجي ويا ايهم

ايهم- واني أيدتك وگلت شاطرة لا تصير نفسية

مسرة- عوفهم ثنينهُم لوگيه خو هذا البُلبُل الفتان لوگي تربيع

لـيث- ولا تستقر كواكب

قسورة- هسه اشمرك بواحد منهن واخلص عوفها لك

مسرة- عموووو حاجي لـيث دا يتنمر على اسمي تروحله فدوة خووووش

ضحكنا وكلمتها الاخيرة ذكرتني بـخالو ، عقدت حواجبي مستغربة اختفاء خالو وسارة مَن هاي الگعدة؟
تسحبت مَن مكاني بدون ما يحس عليَّ احد !! وطلعت للحديقة لان ما اعتقد خالو يدخل داخل البيت وفعلًا مثل ما توقعت لگيتهُم بالحديقة

هوَ اعصاب وهي برود الكون كُلـه نازل عليها ، لدرجة خفت نفَس ذاك اليوم يتخربط علينا ويرتفع ضغطه

هُمام- بَـس فهميني عيوني أنتِ شنو التردينه بالضبط؟؟

بقت ساكته ، مسح وجهة متنرفز وگال ينهي النقاش بطريقة حاده مَن بعَد صبر شهر كامل

هُمام- باچر جاي وجايب مشيه ويايَّ كلمة وحدة تحدد مصيرنا لان اني اليوم اكتفيت ونزلت نفسي اكثر مَن اللازم
باچر يا تگولين موافقة وافرشلچ بغداد ورد واسويلچ احله زفة يا تگولين ما موافقة وحيدر الكرار بنفس اللحظة اطلك وتحلمين تشوفين خيالي بعَد

عافها وطلع ساد الباب بقوة ، دموعها نزلت بهدوء على خدها
دارت وصارت عيونها عليَّ بسُرعة مسحت دموعها متوترة مَن وجودي وشوفة ضعفها
هزيت راسي بيأس وتركتها تراجع نفسها

گعدت بمكاني شاردة وما فزيت إلا على أيد كليم وهوَ يمررها على أيدي
كليم- شبيچ رنيمه؟

- سمعت خالو وسارة...

صرت احجيله كُلشي سمعته وهوَ طول ما اني احجي يهز راسه ، بَـس خلصت گال

كليم- ما اعرف شنو الصار بيناتهُم بالضبط بَـس افضل شي يتخذه هُمام حاليًا لان كُلش تعب
كم مرة يوگع هناك ضغطه مفول وما يقبل احجي ، سارة استنزفت كل طاقته واذا استمرت مو بعيد تضربه جلطة لان حسب ما افتهمت خالج متعلق بيها بشكل مُخيف

عقدت حواجبي
- قصدك الافضل يتطلقون؟

- لا بابا هذا مو حل أكيد
المقصود مَن كلامي البُعد لـفترة لان الاثنين نفسيتهُم تعبانة ويحتاجون راحة وكُل ما تقربوا مَن بعض حَيكسرون شي بداخل انفسهُم ومَن بعدها يوصلون مرحلة انتهاء المشاعر لان الانسان هم اله طاقة مُحددة

- صَح دا الاحظ هذا الشي وخصوصًا سارة لان مقهورة مَن خالو دا تحاول تكسر گلبه ومَن يبتعد تبچي وتزعل واعتقد خالو نفَس الشي

- لـذلك البُعد مرات يكون سبب للرجوع

- صح

ابتسملي واخذ ايدي بين ايده ورجعنا نتابع سوالف لـيث وحرشته ويا البيت كُله حرفيًا حتى عمة نجلاء ما خلصت منه
واخر شي لزك لـ بيبي ازوجج الدكتور مالتنا شايب يخبل وبيبي وگعتله ضرب بالعكازه
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••

سـارة•

گاعده وفكري سارح اباوع مَن الشُباك للشارع
للناس المارة
لهدوء الليل
بحـبيب گلبي

فزيت اباوع بتركيز مَن طلع مَن البيت جگارته بشفايفه وگعد بصف الباب
وكأنو يعرف وجودي ثبت نظره على الشُباك
دنك طلع تلفونه ما اعرف شنو كتب شوي ووصلتني رسالـة

-"البيت ما يسوه شي بدونچ
.. طفل ضايع ويدور وجهة امه بوجوه الماره"

نزلت دموعي وما گدرت اجاوب ، مَن بين صفنتي ودموعي وصلتني رسالة منه على شكل رابط !! اغنية لـ حسين البصري "حن الحمام لهله"

فتحت الرابط وأحَس الكلمات وگعت على الجرح وتشرح حالنا احنه الاثنين

"حن الحمام لهله وتذكر دياره
مرني حبيب الگلب واحسبها تسيارة
تانيت جيتك عُمر
واصبرت كل الصـبر
ما ينسيّ اللي بالقلِب
والله موجــود تذكـاره" !!

اسمع وابچي فزت مسرة على صوتي واجت مذعوره
حضنتني خايفة مَن وضعي

مسرة- شبيچ سارة؟؟

- تعبت والله تعبت ما اعرف شنو مَن مُصيبة منتظرتني بَـس والله مشتاقتله

- رجعي

حاوطت خدودي
- عمو هُمام يستاهل ترجعيله يحبچ هواية وسندچ بدون مُقابل ساعدچ من عمامچ بدون ما يعرف السبب برأيي ما حَتلگين مثل حنيته عليچ

- احبه

مسرة- وهوَ يموت عليچ لاحظته ذاك الشهر مَن تعبرين گدامه يباوعلچ ويتحسر عيونه تشرح حُبه الچ

سكتت ما حچيت لان اعرف كُل هذا الشي مو غافلة عنه مددت بمكاني انتظر باچر يجي
باچر اكتب مصيري ويا للأبد !! يا اخلص عُمري أيدي بأيده يا اخلصه وحَدي وبدونه؟..

..

وتستمر الحكاية.. 🚬♣

قناة التلي zainab_salah0 قناة التلي موضحة بيها سبب غيابي
وراح اشرحلكم شي مُختصر هنا "انا طالبة جامعة وهواية ضغط عليّ والله اوصل للبيت بـ 3 الظهر فما عندي وقت ارجع التزم وياكُم مثل قبل بين يوم ويوم لذلك كُل خميس بارت طويل مثل هذا"