بقلمي : زينب صلـاح 🧡
لـ روايـة ﴿ دروب الإندِثار ﴾
في الـ part 32 ♡♡
لا تنسون التصويت + متابعة للحساب + التعليق بين الفقرات ☘️
شغيرك يا حسن ظَني؟
ليش كُل هاي
القساوة الكاها منك
يا بعَد هذا وهَذني.
•••••••••••••••••••••••••••♕•
حطيت لگلاص على الميز وأيدي الثانية على صدري
اهدأ يا قلَـبي ليش هيچ تنبض اهدأ
رفعت عيوني مدمعة ما گدرت اسيطر
على مشاعري !! باوعتلي رنيم بفرح
واحنه توصلنا اصوات الزلم والضجة الصايرة بره
بَـسبب أنُ هُمام وفه بوعدة وسَد عين الشمس بالرتب والشيوخ الجابها
طرقات خفيفة على الباب واتبعها دخول كليم مبتسم وهوَ يگول
كليم- مخبل سواها وورطني بالزلم ما اعرف وين اگعدهُم
رنيم- لا تحجي على خالووو
كليم- فدوة يروحلچ خالچ وصاحبه
باس راسها مگزگز عليها مَن غطت وجها
خجلانه
منه ومَن كلامه الجدًا جريء !!..
باوعلي وگال
كليم- خوية هُمام اعتذر گدام الزلم كلها واعترف الخطأ والصوج منه
ووعد وعد زلم اذا رضيتي الخميس الحنة والجُمعة ان شاء الله العرس لان ما سويتوا وفرحتوا فـ أنتِ شتگولين؟ وها يريد يسمع الجواب منچ بحضوري انا والسَيد
بقيت ساكته خجلانه
جاوبت عني رنيم وهي تضحك
- خلي يجي وبشره الموافقة مضمونه
كليم- هههههه اوف
طلع وهي اجت حضنتني تبوس بوجهي فرحانه رغم ما تعرف قراري بَـس تگول توافقين غصبًا ما عليچ !!
صاح كليم مَن بره وهوَ يفتح الباب
- هُمام يريد يدخل
رنيم- تعال خالو
دخل منزل راسه ومَن تأكد ماكو غيري اني ورنيم رفع راسه ماخذ راحته
باوعلي مبتسم واخ يا أناقته التجنن وهوَ لابس رسمي تقدم وباس راسي وأيدي ما مهتم لـ وجود رنيم وسوالفها وحركاتها
هُمام- وعدت ووفيت وتعرفين ابو الهَمم ما يوم خنث بوعد وخصوصًا الچ
هذا السَيد يسمعني وابو ريم موجود ويشهد الله عليَّ كل كلمة حَ اگولها اني گدها وما اتراجع عنها للموت حلوة المسَيح
چان يحجي بصوت علمود الكُل يسمع بَـس مَن گال "حلوة المسَيح" همسها بيني وبينه واكيد رنيم هم سمعت وضحكت السفيهة
وهوَ رجع يكمل برزانه
هُمام- جايج ومشتريچ وحرمة غيرچ ما تلوگلي ولا حَ افكر بغيرچ اليوم اني جبت مشية زلم لخاطر عيونچ اعترف زعلتچ وبچيتچ وجعل ايدي بالكسر ضربتچ ومتندم ندم العُمر بَـس اريد اصلح وارجعچ لان شفت حياتي بدونچ ما تسوى ووعد اعوضچ عن كلشي نقصچ بوجودي وعدمه
بَـس اذا گلتي لا ما أريدك وكرهتك وعد هسه اطلك ادوس على نفسي وحُبي ووجعي بفراگچ واطلك المهُم راحتچ أنتِ
رفع أيده يمسح بدموعي مبتسم واگدر اشوف قلق بعيونه
هُمام- تردين وقت تفكرين؟
هزيت راسي بـ لا
هُمام- اطلع وتحاجين السَيد براحتچ وبشروطچ اي شي تردينه اني حاضر
- لا
هُمام- ماي بابا
جابت رنيم ماي شربني وهديت شوي
السَيد- بنيتي انطيني جوابچ اذا تگدرين؟
باوعتله توتر وتعرق دار وجهه وبسُرعة نزل راسه جوه الحنفية يغسل
مسح على شعره وفتح الربطة ما يباوعلي
تقربت خايفة يرتفع ضغطه!
- هُمام
- يا هلي أمريني
لزمت أيده واصلًا ما مُمكن اشوف نفَـسي بدونه بالمُستقبل!!
- أريد قُربك ، اعوف الدنيا واختارك
حط ايده على عيونه وبيده الثانية سحبني الصَدره راحت رنيم تبشرهن لان گاعدات بالصالة
ضحكت واني اسمع عمة نجلاء ضربتنا بهلهولة اصلية ههههه
السَيد- واضح قرارچ مو بنتي؟
- اي اني اريد زوجي وما عندي غير شرط واحد
السَيد- گولي بنتي؟
باوعت لـ عيونه التتأملني بحُب
- يوعدني ما يتركني للموت ويحافظ عليَّ
ضحكوا والسَيد گال مبين يعرف هُمام
السَيد- لا هاي اني اگلج يوفي بيها وهوَ ممنون
اشر على عيونه
هُمام- احطچ بعيوني واسدهن عليچ
ترخصوا الشيخ وكليم وراحوا وهوَ بقى يعدل بنفسه بَـس الابتسامة مرسومة على ثغرة
والدم رجع لـ وجهة ، باوع لـ رنيم وگال
هُمام- جيبيلي عطر
عقدت حواجبي مستغربة لان هُمام ما يحب يستخدم أي عطر؟
طلعت رنيم وهوَ بحركة سريعة حاوط خصري وسحبني اله وقبل لا افهم شي باسني قريب شفتي ودنگ هامس بـ اذني
- جهزي نفسچ بعَد كم يوم تكونين حرمة ابو الهَمم قلبًا وقالبًا
عافني صافنة وطلع ، فزيت على أيدين رنيم وهي تهزني
رنيم- خالو وين؟
- راح
- وين؟ مو راد عطر!!
- ما ما اعرف امشي
ضحكت بصوت وفهمت أنُ راد يبقى وحده ويايَّ وما حَب يحرجها
بَـس دخلت للصالة رجعت عمة ضربتنا بهلهولة وحضنتني وهي تضحك
نجلاء- الف الف مبروك
- يوم للولد حبيبتي عمة
- الله يسمع منچ وازوجهُم يوم المُنى
البنات صاروا هُما يقدمون الچاي والماي ما قبلوا ادخل بشي
چانو فرحانات حيل بالعرس الـ حَ يصير
واني فرحتي اضعاف وچانت المُخططات
لهذا اليوم غير ، بَـس ما چنت اعرف هاليوم
حَ يتسجل اسوء يوم بتاريخ حياتي ورُبما
حياة العائلة بشكل عام
وحَيبقى نقطة سوداء ما مُمكن تتلون ابدًا
وهنا چان تحول بحياتي فضيع
ونگدر نگول بداية التعاسة الحقيقية لـ قُصتي
فزينا على اصوات الضيوف وهُما يغادرون
صرنا نباوع مَن شُبـاك المطبخ اليّ يطُل على
الاستقبال ، تغيرت الوجوه بدخول جُنيد
اول شي استفقدته رنيم الچانت معاني
الاندهاش والارتباك واضح وبسُرعة وجهة انخطف لونه !!..
مَن ودعوا اخر ضيف وفرغ البيت وما كان موجود غير اهل البيت وهُمام اكيد موجود بعده
طلعنا ، لزمت أيد رنيم اهديها
وهوَ بكُل صلافة حط عينه بعَين كليم وگال
جُنيد- اريد احجي وياها على أنفراد
كليم- تعال نحجي سوه قبل هذا الشي
دفع أيده وصاح
جُنيد- مااا عندي أي كلام ويـاك اريد احجي وياها هي
هُمام- هدي ابو الشباب ، شنو لعبة وتحجي وياها على انفراد؟ زوجها گدامك وخالها مالهُم احترام؟
جُنيد- ليش ما دا تفهمونييي؟!!!
سحبه كليم ما اعرف شنو همس بـ أذانه بحيث هوَ انهار يبچي وحاضن كليم اليّ بقى يربت على كتفه يحاول يهدي
ايهم- جُنيد خلي نطلع نسولف اني ويـاك
جُنيد- اريد احجي وياها خالي فدوة اروحلك
كليم- ما يصير وحدكم ابني لازم بحضوري او على الاقل حضور خالها
مسح وجهة
جُنيد- مو مشكلة المهم احجي وياها
باوع كليم على جهتنا وعقد حواجبه لان
رنيم چانت بَـس تبچي وترجف خايفة تصير مُشكلة
كليم- ها بابا تجين؟
رنيم- بكيفك
كليم- تعاي بابا
جُنيد دخل للاستقبال وهي راحت لازمة
بأيد كليم دخلوا والباب انسَد وراهُم
الكُل دخلوا جوه واني تقدمت مَن هُمام
- ليش ما دخلت وياهُم؟
هُمام- كليم موجود ما عليها شي لان هذا جُنيد هواي يچفص بالكلام وما اعتقد اتحمله
- رنيم دا تخاف مَن المشاكل
ورث جگارته
- حقها عيوني أنتِ ليش هوَ منو يحب المشاكل وخصوصًا هي وضعها خاص وتريد حياة هادئه بعَد العاشته
- هُمام
- عيونه
- باوع اني ما مرتاحة اكو شي خانگني هيچ أحَس اكو ثگل على صَدري
- شو وين؟
گالها ومَد أيده يتلمس فتحت عيوني ودفعته
خازرته الخبيث لگاها فرصة
هُمام- هاي شبيچ؟ غير اشوف وين يوجعچ
- هوَ هيچ شبيك استهترت
- ليش اليشوف عيونچ يبقى عاقل؟
- هههه لا هُمام جديات اني ما مرتاحة
- مَن شنو حبيبي؟
- ما اعرف بَـس ما مرتاحة
- يمكن بسبب الصار والكتم والتراكمات لا تفكرين بشي سيء
هزيت راسي بَـس ما مقتنعة
فزيت شاهگه مَن سمعنا صوت شي تفلش بالحايط وقبل لا يتحرك هُمام خطوة طلع جُنيد ينفض مَن الغضب وما يشوف گدامه
ركضنا للاستقبال ، چانت رنيم واگعه على
الارض تبچي وكليم لامها لـ حضنه
تهز راسها برفض وتحجي بشكل سريع
رنيم- مو ذنبي الصار اني مووو ذنبي كليم ليش هيچ يگول
راح هُمام سحبها منه حضن وجهه وغسللها بحيث بلل ملابسها وهي
الشهگة ما تروح منها
حضنها لصدره مقهور على وضعها
هُمام- كليم الزم ابن اختك ولا تخليني اني اتصرف ويا لان حَ اخسره هواي
كليم- ما اگدر الومه وبنفَـس الوقت ما اگدر اسكت
محتار وحيرتي ما تتسولف
هُمام- اذا ما تگدر اني اگدر واكسر راسه بعَد اذا تقربلها وبچاها
سكت كليم الرجال خجلان حيل
رفعت راسها تحجي وتبچي
رنيم- خالو يگُلي بحظچ وبختچ وما تتهنين لان بنيتي حياتچ على كسر گلبي
اني مو حمل دُعاء البيَّ كافيني
هُمام- خيولي دُعائه وتحسباته لراس الشارع ما توصل
يلـه نروح للبيت ترتاحين وهم تشوفين هدية النجاح
مسحت دموعها ورفعت راسها تباوعله
- هدية؟ اليَّ؟
هُمام- شعندي غيرچ؟ اكيد الچ بابا كم رنيم عندي اني
- الله تحمست اشوفهاا خالووو
هُمام- هههه يفديچ خالچ خوش؟
ضحكت وگدر ينسيها الموضوع بَـس كليم چان اله رأي ثاني
كليم- تشوف هديتك مَن ترجع عازمها اني واليوم مفتوح الها شنو تطلب يتم
لو تطلب "القمر" انزله الها
دفنت راسها بصدر هُمام خجلانه وهوَ بَـس يخزر بـ كليم عبالك غريب ويتغزل بيها ولا كأنو زوجته
كليم- يلـه بابا روحي ويا خالچ جهزي نفسچ بين ما اكمل شغلة وارجع
طلع وهُمام طلع ورا ، لزمت ايدي
رنيم- شنو البس سارة؟ هاي اول طلعة اليَّ اني وكليم فدوة تعاي ويايَّ اختاريلي فستان ذوقچ يعجبني
- هههه تنفسي ولچ تمام مو مشكلة اجي وياچ
بَـس لبسنا الجُبة والشال فوك ملابس البيت واخذنا هُمام للبيت
مَن فترة هوَ حول الاستقبال غرفة للبنات وجابلهن كنتور وكل وحدة سرير خاص بيهن !! صارت تطلع وتشمر على السرير تريدني اختار
مَن بين الفساتين جذبني واحد لونه رُماني طوخ بحَيث مايل للسواد مخصر ومال مُحجبات
سحبته وقبل لا اسأل گالت
رنيم- هذا كليم اشتراه اليَّ قبل اسبوع گال مريت ويا اصدقائي للمول ومن شفته تخيلته الچ
غطت عيونها تضحك بخجل
- لبسي يجنن واكيد حَيفرح مَن يشوفچ لابسه شي هوَ هدى الچ
- وبعَد؟ الشال والحذاء اوووف دخت
- روحي لبسي امي واني اجهزلچ الباقي
دمعت عيونها واجت حضنتني بادلتها
رنيم- أنتِ اكثر انسانة تستحق تكون ام أنتِ امنا اني ومسرة ودموع
- افديچن برَوحـي ، اش كافي دراما روحي لبسي قبل لا يجي علمود هم ارتبلچ وجهچ اكيد ما اطلعين ويا زوجج هيچ
ركضت تبدل واني شفت اغراضها طلعتلها اكسسوارات فضية وشال ابيض وكعب ابيض شفاف وجنطة فضية
ورجعت الملابس الباقية للكنتور وطلعت المكياج الحَ نحتاجة
رجعت فرحانة تضحك ومتونسة دعيتلها مَن كُل گلبي تبقى بهاي السعادة
ما چنت اعرف سعادة مؤقته والقَدر كاتبلها اتجاه مُختلف وصعوبات اكثر اخ لو چنت اعرف چنت ضميتها بنُص گلبي وقفلت عليها ولا شفتها تعيش العاشته
رتبتلها وكملتها والمكياج ابد ما خليته واضح شي بسيط وفعلًا
طلعت اميرة تجنن تنتظر اميرها يجي ..
سمعنا صوت هُمام مَن جوه يطلب ننزل
كليم ينتظر ، الرجال بَـس باوعلها ما گدر
يشيل نظره مَن عندها بحيث سافر
بخياله
وهُمام نزل غزل بيها خلاها تضيع بين ملابسها
هُمام- اميرة لو شنو؟ يروح فدوة ونذر خالچ لهذا الطول
رنيم- خوش؟ نسيت تگول
هُمام- هههههههههاي يفديچ خالچ خوش؟
رنيم- خوش
باسها براسها وحط ايدها بأيد كليم
هُمام- أمانتك هاي رجعها مثل ما اخذتها
كليم- بعيوني احطها
طلعوا وأحَس گلبي صار دمام مَن دار عليَّ "هُمام" وبعيونه وكاحه وخُبث
ما يعرف سارة اقوة مَن أنُ توگع بمصيدة فخة وتبين خوفها ما بالحيف !!
گعدت على الكرويته حاطه رجل فوك رجل
رفع حاجبه مبتسم
هُمام- اموت على الوكحات
- هُمااام
گعد بصفي
هُمام- عيونه حلوة المسَيح
- أنتَ هم تستحي؟
- لا حبيبي غير أنتِ زوجتي ستر وغطى مَن شنو استحي؟
- لا بشكل عام حبيبي
- هاا؟ گلتي حبيبي؟
- وعُمري
- اويلي عليك ابو الهَمم
- تحبني؟
- رَوحـي فداچ تعاي
طفرت مَن راد يلزمني وهوَ منتهي؟!!
رفع ايده وصار يسب عمامي واحد واحد
عافني وطلع للحمام ضحكت وگعدت
انتظره
مَن رجع گعد بصفي بَـس عود شنو؟
زعلان ولازم اراضي
- زعلت؟
- سارة گومي مني لا ارفسچ
- شنو صرت حصان؟
- استغفررررررالله تجفص تجفص وتريدني اسكت
- ريلاكس بيبي
ما حسيت غير سحبني مگعدني بحضنه وجعص راسي بين أيدي
وصار يبوسني غصب وبالقوة واني مسنكرة مَن الضحك عليّ ، ابتعد يلعث
هُمام- اويلي عليك ابو الهَمم مو شفايف غضب
لفني بَين ايدي وراسي صار على صدره
- احبّـك
رفعت راسي شفته مبتسم
- ما دا اشوف رجال بعيني غيرك صرت اليَّ كُلشي وان شاء الله ربي يقدرني واكون الك كُلشي
- أحِبُكَ حُبَيْنِ حُبَ الهَـوىٰ
وحُبْــاً لأنَكَ أهْـل لـِذَاك
- جعل محد غيرك يحبني هُمامي خوش؟
- ههههههاي تعاي لچ اليوم اطلع القضى والمُضى
وفعلًا موتني ساعة يبوس ساعة يقرص
ساعة يكركرني ببطني واسنكر ضحك
وما يعوفني
لحد ما اغص ، اخر شي اتصلوا عليّ بالشغل ولازم يروح وصلني لـ بيت كليم وراح لشغله واعدني مَن باچر نبلش نجهز للعرس والحنة
ㅤㅤㅤ
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••
رنيــم•
- اگدر افتحه؟
- فتحي بابا
نزلت الجامه وصار الهواء المُنعش يضرب
بوجهي استنشقت بعمق ومديت ايدي
ضحكت مَن شغله مولد ما اتذكر شنو كان لان چنت مشغولة بالمنظر
فجأة تكأبت واني اتذكر الصار ويا جُنيد
غمضت عيوني ناوية اطرد الافكار مَن
راسي بَـس الصار رجعت اتذكر كلامة بكُل
حرف !!
..
وگف گدامي عيوني لا أراديًا نزلت على ايدي الچانت ترجف بشكل غريب !!
رفعت عيوني لـ كليم مكسور خاطري على حالته وتوتره ، مسح وجهه بأيدي الترجف وگال
جُنيد- ما اعرف شنو احجي گلبي مكسور والله الليل ما انام من الوجع بَـس فهميني ليش؟ بشنو أذيتچ حتى تجازيني بهذا الشكل؟
رفع راسه لـ كليم وگال
جُنيد- اعتذر اعرف زوجتك وخطأ هذا الكلام بَـس افهمني اني هم حقي
كليم- عاذرك لذلك دا اخليك تحجي وياها بَـس بدون تجاوز جُنيد لان بوقتها تشوف وجهي الثاني
رنيم- اني اسفه بَـس الامور تطورت بهذا الشكل
جُنيد- وگلبييي؟ هيچ لعبة تعشميني وبعدين تكسريني؟ ولچ اني سنين ادور عليچ وياهو يسألني ابقى صافن ما اعرف شگول لان ما چنت اعرف غييير اسمچ ما خليت شارع يعتب عليَّ وما دورتچ بيّ
عيونه جمر گد ما دموعه ما تقبل تنزل
جُنيد- وسنيني الضيعتها ادور عليچ هيچ تروح بالهين؟
طلع تلفونه وداره عليَّ
جُنيد- شوفي هاي قبل سنتين مثل المخبل افتر بعز الشتاء
رجعت للبيت وتمرضت اسبوع مَن المطر والبرد وكُل هذا بَـس تحسنت حالتي شوي رجعت ادووووور استاااهل اني استااااهل
سحبه كليم حاضنه لان انهار كُلش واني الشهگة شكلت ببلعومي !! صاح يناشغ وراسه ضامه بكتف كليم
جُنيد- خالي لك خاااالي رَوحـي دا توجعني
كليم- اش ابني حبيبي
جُنيد- شلون اتحمل صعبة والله صعبة البنت الاحبها تصير زوجة خالي والله گلبي ما يتحمل
- اني اسفه
باوعلي منطط عيونه وصاح بحرگة گلب
جُنيد- اششش ما حَ اسامحچ وحوبتي وكسرت گلبي ما حَ تتخطاچ
وصدگيني عقابچ يم الله چبير وگال الله عز وجل «وَتَحْسَبُونَهُ هَيِّناً وَهُوَ عِنْدَ اللَّهِ عَظِيمٌ»
كليم- جُنيدد
عفافني وطلع مخليني بصدمتي ووجع رَوحـي ويمكن فعلًا لان بنيت سعادتي على حساب
شخص مكسور
چان الثمن غالي وچان جُنيد عنده حق
وعقابي چان اكبرر مما اتصور واكبر مما
مُمكن يمر على عقلي
فزيت مَن صفنتي على أيده الاخذت أيدي وصار يحرك بـ أبهامه
على ظهر أيدي ويمدلي الطاقة
ابتسم وعيونه مثبته بالطريق گال
بهدوء وسلاسه
كليم- "فاتن وجهكِ .. لكن في الهوى
ليس تكفي فتنةُ الوجه الجميلِ"
- هههه من وين تجيب هذا الكلام؟
- مُدمن نزار قباني وصرت كُل ما اقرأ شي اله أحَس كاتبه الچ خصيصًا
رفع أيدي وطبع عليها قُبلة
- احبچ ابوية وامي أنتِ
صفنت بيّ وگلبي حسيته بقى ينبض بشكل مو طبيعي
عيوني شردت بتفاصيله ، نسيت نفسي وفصلت عن العالم وبحركة نابعة مَن كُل گلبي وبدون ما افكر بشي تقربت منه وطبعت بوسه بخده
ابتسم ورمش ، عصر أيدي ضاحك
كليم- ترديني اسوي حادث؟
- هي بوسه نمونه
- مو بوسه عادية هاي اخذت عقلي
ضحكت حابه سوالفه ، صف السيارة ونزلنا للمول أيده محتضنه كف أيدي بتملُك
اني مو قصير طولي حلو ١٦٥ بَـس مع
ذلك اليّ يشوفني يمه عبالك نملة لان
ما شاء الله هوَ ضخم حيل مضيعني وعبالك بنته !!
گعدنا بمطعم مُرطبات طلبلي وهوَ اكتفه
بشرب الماي
صار يحفزني اقدم ثالث خارجي علمود اكمل الاعداية وادخل جامعة واحقق حلمي ، اخذت شوي مَن الموطه ومديتها اله
- ضوگها فدوة
- ما احبها بابا
- لخاطري لخاطري والله طيبة
ضحك واخذها بسُرعة كشول وجهه ودار عني
- ترا طيبة
كليم- ما احبها
- حبها حبها
ضحك عارفني دا اقلده
قرص خدي وهمس يهز راسه بقلة حيلة
- ملعونة شلون اني بالبنيات الحلوة؟
- تدللهُم
- اضمهُم وسط عيوني
- دا احبك هيچ
كليم- حبيني استاهل تحبيني
دنگت راسي خجلانه شو صرت خفيفية ايع
بَـس خلصنه اخذني نمشي ويشتريلي اي
شي يصير گدام عيونه ويگول
كليم- اعتبرينا دا نجهز للعرس
ويسكتني لان ما اعرف شنو اجاوب !!
اخر شي گعدني وگال
كليم- هسه اجي لا تتحركين مَن مكانچ
- اخاف !!
- عيني عليچ لا تخافين
ابتسمت وكلامه طمني ، راح واني عيوني
تزرز بالمكان خايفة شوي!
المكان ضجة هواية ناس
تقريبًا نُص ساعة ورجع
ضحكت مكممة حلگي مَن شفت شايل باقة
ورد احمر حجمها كبير وبيده هدية
حضنته ما مهتمه لشخص واخذت الورد
اشم بريحته تجنننن
كليم- وين الورد بالضبط
- كليمممم تجنننن تجنننن
- وعد كل يوم يوصلچ ورد على هاي الفرحة
- حبيته باوع مثل لون فُستاني
- هههه تفضلي آميرتي
- هاي هم اليَّ؟
- اكيد معقولة يمر نجاحچ مرور الكرام؟
اخذت الهدية منه ورجعت اگعد بمكاني
بدون ما اترك الورد الأُغرمت بيّ
باوعتله بـ معنى "افتحها؟" وهوَ هز راسه موافق فتحت المُغلف بهدوء وايدين ترجف
شقت الابتسامة طريقها لـ شفافي مَن شفت عُلبة تلفون الايفون احدث شي موجود بالسوق حاليًا
بَـس مو هذا السبب الخلاني ابتسم
بل ذاكرته وتفكيره بـ أدق تفاصيلي !!
- ما نسيت؟
- شلون انسى شي عجبچ؟
- نفس تلفونك!
- لان عجبچ ، يكفي تفرحين مو مهم اي شي غير ضحكتچ بالنسبة اليَّ
ضحكت مَن گلبي
- شنو رأيك تكون اول صورة بيّ النا ذُكرى؟
هز راسه موافق ، تركت الورد على الطاولة ولزمت ايده تمشينا للمراية الموجودة
ايده صارت على كتفي واني التقطت النا صورة سوه بهذا اليوم المُميز جدًا
باوعتلها وأحَس عندي جناحات وحَ اطير مَن الفرح
- تجننن كليم
ما رد ، رفعت راسي واشوفه يتأملني متت مَن الخجل
كليم- يلـه حبيبي علمود تاكلين بعدين نكمل
- اريد اصورر ويا الورد !! روح أنتَ اطلب واني اصور اصلًا أنتَ تعرف شنو احب
كليم- ميخالف بَـس لا تغيرين مكانچ ولا تروحين بعَيد خليچ گدام عيوني
هزيت راسي موافقة وهوَ راح
رجعت اخذت الورد وصرت اخذ اكثر مَن
صورة للذكرى وفعلًا حَ تبقى ذكرى اله مو اليّ !!
بهذا اليوم حتى الاكل صورته وهوَ يضحك
على سوالفي !!
وبطريق الرجعة اخذ أيدي وباسها بعُمق
شغل اغنية چانت رُومانسية واتذكرها لان صورت هاي اللحظة "اضعف گدامك" لـ هيثم يوسف
صف السيارة ونزلنا وهوَ بيده اغراضي
بنفس الوقت طلع خالو معصب بَـس مَن شافني وشاف فرحتي ابتسم وحضن اكتافي
هُمام- الوجه يضحك؟!
- كُلش تونست هسه اراويك الصور
هُمام- ماشي
بوسته ولوحت لـ كليم ودخلت
وگفت صافعة جبيني ورجعت متذكرة نسيت الورد بَـس استوقفتني عصبية
خالو مَن كليم؟
هُمام- تعرف الوضع واتصل عليك اگلك ارجع خطر عليكم تگلي ويايَّ ما يگدر يسوي شي؟؟؟؟
كليم- اكو حراسه هم هُمام وتعرف عذاب ما حَيخطي خطوة غبية بهذا التجمَع كُله
هُمام- لو صايرلها شي صدگني قبل لا احاسبه احاسبك أنتَ
كليم- ما يصيرلها شي وهي تحت جناحي اطمئن
هُمام- عذاب خطر وتهديده حَينفذه وهالمرة گلبي ما مطمئن خلي نقلل طلعلتنا وحتى السفرة الواعد بيها البنات أجلها
كليم- ان شاء الله خير ابو الهَمم
عذاب؟؟ حاولت ابين طبيعية وطلعت ثنينهُم قطعوا الحديث
ابتسمت واشرت على السيارة
- نسيت الورد مالتي
كليم- تعاي اخذي حبيبي
رحت هوَ فتح السيارة وطلعه اخذته ورجعت وباقي الاكياس چانن بأيد خالو
دخلت وأحَس
گلبي نبضاته الف وفرحة اليوم طارت
صاحلي خالو ورحت دخلت بحضنه
صرت اراوي التصوير وهوَ يضحك
ويتفاعل ويايَّ وانطاني هديتي
چانت عبارة عن قلادة ذهب بـ اسمي
ما حسيت على نفسي غير رايحة بسابع نومة وهيچ مرت الخـمس أيام بتجهيزات سارة إلى أن اجه يوم الحُنة واني احاول اتناسى السمعته واخلي ثقتي بـ كليم وخالو
ㅤㅤㅤ
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••
سـارة•
أحَس گلبي ينبض ببلعومي !!
رفعت راسي على دخوله ومتت بجمال البس العربي عليّ اول مرة اشوفه لابس دشداشه وشمّاغ؟؟
گعد يمي وكُل شوي يمسح جبينه المتعرق
اخذ مَن الحُنة القدمتها اله رنيم وصار يحنيني
رفع راسه وابتسم عيونه تلمع
هُمام- هوَ كلمن لبس احمر طلع حلو هيچ؟ لچ حلوة المسَيح بهذلتي حالي
- احبّك
بهتت صافن بوجهي وايده توقفت عزااا الصلف بدون ما يهتم للضيوف سحبني وباسني بخدي
بَـس شنو؟ بوسه ام الطگه ومَن بعدها صاح المستهتر
هُمام- أفيششش مو خد حلقوم
- المستهتر ابو الدكتورات
- شو گولي احبّك بعَد وحق حيدر الكرار اعذب شفافچ گدامهم
ضحكت على سوالفه وهوَ ما تأخر هم طلع لان الحُنة مالته صارت ببيته يعني بنُص الشارع گدام بيت كليم
بين ضحكة ورقص ومُوسيقى صاحن البنات
"دا يرگصون چوبي بنااات تعالن شوفن"
واني عفت الخجل على جهة وركضنا لغُرفتنا انا والبنات نباوعلهُم مَن الشباك
چانوا كلهُم لابسين زي عربي حتى ولد عمة نجلاء والغريب حتى جُنيد موجود؟!
مترأس الچوبي هوَ بدشداشته السمائيه وشماغه لونه اوف وايت واطرافه بيها تطريز ذهبي
شحلات رگصه والضحكه مرسومه على وجهة وبصفه كليم
هذول طلعوا اسطى بالرگص بَـس يمنا عود شوفونا احنه ضُباط وثگال حاليًا الدا اشوفه ما بي اي ثُگل
نزلنا نكمل حفلتنا بعَد ما صاحت بينا عمة ننزل وعيب
لليل كُلش يلـه خلصنا وسحبني البنات
رنيم- روحي ارتاحي باچر وراچ يوم طويل
وفعلًا صعدت للغرفة توني حطيت راسي على المُخدة واجاني اشعار
فتحته وابتسامة فرح شقت شفايفي
هُمام-"ساعات وتكونين نايمة على ذراعي وشعرچ مفروش على صَدري
احبچ ام عَيون شهل ابو الهَمم هايم بتفاصيلچ"
غمضت عيوني ونمت والفرحة مرسومه على ملامح وجهي
گعدت الصُبح على هوسة البنات
رنيم- يلـه سااارة ماكو وقت حَتتأخرين
گعدت افرك بعيوني دا اريد استوعب شنو اكو اليوم؟
عرسي؟!! فتحت عيوني مصحصحة وگعدت على رُكباتي
- ترحين ويايَّ مو؟
رنيم- ما اعرف سارة بَـس شلون اعوف خالو وحدة خطية خاف يحتاج شي؟
مسرة- اني اني اروووح فدووووة
- نچبي مجرة ، وأنتِ رنيم والله حتى العُرس ألغي اذا ما ترحين ويايَّ وبعَد أنتِ بكيفچ
رنيم- هففف ما اعرف اشوف وضعي گومي سبحي أنتِ هسه
طلعن يركضن ما اعرف وين واني بدون ما افكر مرتين واعرف كُلش زين هوَ حَ يگدر يحل الموضوع !!
اتصلت عليّ وحيل تأخر يلـه جاوبني صوته رايح مَن النعاس
هُمام- شهلائي
- هُمام اگعد اگعد
- خير يا ستار شصاير؟
- باوع اني اريد اروح للصالون ولازم ويايَّ مُرافقة واريد رنيم وهي ما تقبل تروح علمودك فـ شنو اريدك تقنعها تجي ويايَّ
- ههههه يفديها خالها
- هسه شنو؟
- معليچ يمي هسه اتصل واقنعها الچ ليش كم شهلاء عندي؟
- بَـس اني ومَن تريد تفكر بغيري افجر عقلك خوش
- خوش ونُص واني الممنون
- ههههه يلـه باي
- جهزيلي نفسچ اليوم م...
سديته بوجه الفاسد ابد ما عنده اخلاق ركضت للحمام سبحت وكملت بسرعة ونشفت شعري وبدلت ملابسي
بَـس طلعت صارت رنيم بوجهي مجهزة نفسها
رنيم- واسطاتچ ثگيله
- ههههههه
اشرلنا لـيث على السيارة الـحَ تاخُذنا بَـس من صعدنا جمدنا
چان السايق جُنيد وحتى هوَ مصدوم مَن وجود رنيم هي بسُرعة گالت
- هسه اجي
نزلت تركض اباوعلها راحت لـ كليم تحجي وياه وهوَ كُل تركيزه وياها اخر شي باسها براسها واشرلها تروح ورجعت تركض للسيارة
طول ما تحجي ويا كليم
جُنيد يذب حسرات وعيونه عليهُم
صعدت منزله راسها وساكته حتى النفَس قطعته
وحسب ما فهمت راحت بلغته واخذت الموافقة منه يلـه اجت وكُلش حَبيت تصرفها واعتقد كليم مو بَـس حبه لا الفخر ينبع مَن عيونه هسه ، رُغم صغر سنها بَـس ما صعدت ويا جُنيد بدون ما تبلغه شگد حلو وكُل هاي تربيته وتعلومه هوَ
صف السيارة بعَد مُدة طويلة گدام الصالون وگال
جُنيد- خويه اني باقي هنا اي شي تحتاجونه اتصلوا عليَّ لا تطلعون وحدكُم الوضع مو امان
- مشكور ما تقصر
نزلنا واباوعلها ترجف وتزرزر بالمكان قلقتني اخر شي انصدمت مَن گالت
رنيم- سمعت خالو يگول الكليم عذاب داز تهديدات
- عزااا
- اني كُلش خايفة وما مرتاحة سارة ابد ما مرتاحة حاسه حَ يصير شي!!
- اذكري الله ان شاء الله ماكو شي
سكتت ودخلنا للصالون احنه حاجزين مَن قبل بسُرعة استلموني ورنيم بصعوبة قنعتها ترتب نفسها
رفعت عينها على البنية وکالت
رنيم- اريد عدسات
- ابد كليم ما يقبل ومحذرچ
- مو حلو هيچ
جاوبتها العاملة وهي ترتب بالمكياج
- بالعكس كُلش مُميزة عيونچ تظلمين نفسچ بالعدسات
سكتت خاضعة للواقع والعاملات بلشن بينا شغل وبقى بَـس الشعر ومتنا مَن الجوع
رنيم- حَ اتصل على كليم هوَ يبلغه!
هزيت راسي وهي راحت شوي بعيد تتصل بَـس رجعت شنو وجهة احمر
مَن الخجل
- ها؟
- حَيبلغ جُنيد بَـس شلون اني ما اريد اطلعله وحدي
- لا تصعبين الامور رنيم لازم أنتِ وجُنيد تتقبلون الوضع وتعتادون بالمقسوم
فترة واتصل جُنيد على تلفوني تنهدت وطلعت
بقى بالي يمها اريدها ترجع حيل تأخرت
استأذنت مَن العاملة وگمت طلعت اباوعله يمسح بدموعه وبَـس شافني طلع وهي دارت عليَّ وجهة اصفر
رنيم- يگول عذريني على تصرفي اخر مرة اعتذر وگال هوَ حَيبتعد وما يزعجني واي كلمة منه طلعت بساعة غضب وما قاصدها
بَـس سارة كسر خاطري خطية
- الله يجبر حاله وكسرته تعاي ندخل
رجعنا وهي تصفن اني اكلت شوي صح جوعانه بَـس مَن التوتر
ما اگدر اكل هواية رجعت كملت تسريحة الشعر ورحنا بالغرفة لبسنا بدلتي چانت حيل ثگيلة وتصميمها راقي
ورنيم كالعادة ذوق كليم فُستان چويتي يشبه فساتين الاميرات جزئه العلوي يلمع وحمالاته رفيعات كُلش ومَن جوه بي نفشه بسيطه وياه كعب شفاف ولبست فوگاه جُبتها والشال بَـس ما ضبته علمود لا تخرب التسريحه
لبستني الكبوس وهُمام خبصنا بالاتصالات لان منتظر بره
طلعنا وايدي ترجف وماكو كُلشي ما اشوف
شهگت مَن ايد حاوطت كف أيدي واخذني للسيارة
ويتعارك ويا كليم يريد رنيم ويانه وكليم يگله حير بمرتك انطيني مرتي واذلف
سوالفهُم حلوة بَـس بالاخير هُمام صعد رنيم ويانه وكليم استسلم لان الله يخلي زوجي عنده صوت دلالات فضحنا بنُص الشارع
صعد المستهتر مالتي والاغاني سطرتنا يسوق ويطگ اصبع
هُمام- شهلاااائي رفع الكبوس السيارة مُظلله
رفعته مختنگه وهوَ صاح
- اشتعلووووووو اليوم العب لعب وحق حيدر الكرار
وجهي بوخ ورنيم خربت ضحك ، مَن جاب المشيه گال "وافقي وافرشلچ شوارع بغداد ورد" وسواها
گدامنا سيارة وواحد يشمر الورد باوعلي مبتسم واخذ ايدي باسها
هُمام- بعَد خالچ وطوافية ركصي جعل محد غيرچ يركص
هوَ يطگلها اصبع بين فترة وفترة وهي تهز كتف حيل تونسنا لحد ما وصلنا للقاعة وانخبص خبص نزلي ايدچ غطي وجه راسچ لا ترفعينا مللني
واخيرًا دخلت للغرفة وهوَ طلع رتبن مكياجي وعدلن بدلتي وتسريحتي ورجع دخل يعض بشفته گدام العاملات السرسري الفاسد
ما عنده خجل ابد ابد بَـس اموت بسوالفة السرسرية
ويا الاغنية طلعنا نمشي والمُرقعات والاضواء بحَيث متت بالترتيب
گعدنا بمكانا المُخصص وهوَ كُل شوي يريد يگوم يرگص اخر شي ما تحمل
ذب الستره ونزل هوَ ورنيم يرگصون بنُص القاعة والله صفيناز ما تلحگه طلع خوش يرگص
اخر شي المُنظمة گلتله صار وقت ترگص أنتَ وعروستك اجه لبس سترته يعدل بنفسه
- زين مَن تذكرتني
- اموت اني اموت بجمالچ حلوة المسَيح
اخذني بنُص القاعة وخففوا الاضواء
سند جبينه على جبيني
ايدي مستقرات على خصري وگال
هُمام- ما مصدك نفسي وأمنيتي تتحقق
- فرحان؟
- قليلة هاي الكلمة ما توصف احساسي وأنتِ هسه بفُستان العرس گدامي وصرتي اليَّ
- احبّك
- ميت بتفاصيلچ ام عَيون شهل
سكتت ما اعرف شنو احجي نزل باس خدي قريب شفتي وهمَس ويا انتهاء الاغنية
- جاهزة؟
عقدت حواجبي ما فاهمة ، شهگت مَن رفعني يفر بيَّ وسط القاعة
والمُفرقعات تضرب داير ما دايرنا والورد صار ينزل مَن فوك على راسنا ضحكت فرحانة بالاجواء الكُلش تمووووت نزلني وطبع قُبلة على جبيني تشرح كُل مشاعره بهاي اللحظة
رجعني المكاني وطلع ، صار الوقت يضيع بين الرقص والاغاني
والفعاليات چان العُرس يجنن وما بي اي نقوصات لحد ما گالوا يردون يدخلون الكُل لبس
وحتى اني رنيم تقربت تلبسني الكبوس تحت استغرابي لحد ما صدمتني مَن گالت
- كليم حَ يسلمچ لـ خالو
رفعت راسي عيوني مدمعة وهي تضحك فرحانة
ساعدتني اگوم ومسرة ودموع يركضن ورايَّ وكل شوي گايلات
"احنه نعيش وياچ"
ورنيم تجاوبهن "اي أمي قابل وين تبقون"
لان اني منتهية مَن التوتر وجسمي مو بَـس
يرجف لا ينفض نفض ، وگفتني قريب مَن الباب وما اشوف شي بَـس اسمع خطواتهُم عقدت حواجبي من شفت كليم رفع كف أيده ورنيم حطت قطعة ستن بيضاء على أيده واخذت أيدي حطتها على أيده
رفع كف أيده وگال يقدمني شوي على هُمام
كليم- الله الشاهد مَن يوم لگيتهن وحسبتهن حالهن حال ريم وهسه بأعتبارك اني دا اسلمك وحدة مَن بناتي واعرفك زلمة كفو حَتحافظ عليها وتخليها بعيونك
بَـس مع ذلك اسمع مني اذا اجت بيوم وگالت هُمام زعلني هُمام بچاني يشهد الله انسى أنتَ صديقي وحسابي وياك يكون ثگيل مو تگول ما گلت وهاي گدام شهود
هُمام- لا توصي حريص بعيوني احطها واقفل عليها
كليم- توكلي بابا ويا زوجج وان شاء الله زواج الدهر
- شُكرًا ابو ريم
كليم- حالچ حال بنياتي ماكو داعي للشُكر هذا للغريب بينما اني اخوچ ان شاء الله
- ونعم منـك ابد ما تقصر
ربت على صَدره بأيده لثانية وقدمني الـ هُمام
الحاوط كف ايدي وطلعنا وهوَ يساعدني
لان البدلة ثگيله ومُتعبة
بلعت ريگ مَن صرنا وحدنا داخل السيارة
گلبي صار طبل خصوصًا اول ما رفع الكبوس
وگال
هُمام- تنفسي حبيبي السيارة مُظللة لا تتقيدين
- كُلش حَـبيت موقف كليم
هُمام- كُل مواقفة وحدة اكبر مَن الثانية مشهودتله مو جديدة
- الله يحفظة لعائلته
ابتسم وهز راسه
- اريد اصور وين تلفونـك
- هذا گدامچ بابا
اخذته وهوَ طول الطريق لازم أيدي ورنيم وصتني اصور واوثق علمود يشوفنهن باچر واني همات احب الذكريات
فزيت مَن شفته مو طريق الـبيت
- هُمام مو گُتلك ما اريد فندق؟
- اي حبيبي اعرف بَـس هاي الزفة ونتوكل نصور وبعدها نرجع للـبيت
نزلنا بعَد ما تأكد ستالاف مرة مَن أنُ ما مبين شي مني
ودخلنا چانت بنية مصورة تنتظرنا لان
هُمام سبق وحاجز عندها هوَ بقى يتفاهم
على اللقطات وهاي السوالف وعاملة دخلتني ترتبتي خاف اكو شي مخربط بتسريحتي او مكياجي
دخل ابو الدكتورات وعلى شفايفه ابتسامه خبيثة والله عرفته مختار افسق اللقطات وما خاب ظني
لان بكُل لقطة ابقى ادك واللطم يلـه اقبل
وهوَ متونس واني الواگعه بيها وخطية
المصورة همات وجهة صار احمر مَن الخجل
والضحك على فصلاتنا
- هُماااام هاي هم لقطة تخززززي
- عسل عسل شو تعاي
سحبني دافن راسه برقبتي وبحجة التصوير شبع بوس وشم
خزرته مَن ابتعد واهزله راسي بمعنى بسيطة
المصورة- بقت اخر لقطة
هُمام- جوي واجوائي
- لا كُلش استهترت مُستحيل ما اقبل هُمام اني ارفض
هُمام- معليچ أنتِ كُلشي تحت سيطرتي
سحبني وبحركة سريعة ايد حاوطت خصري والثانية ووحدة سيطر بيها على رقبتي وخدي وباسني
بيني وبينكم اللقطة چانت حلوة بَـس تخزي لان گدام المصورة اليّ بَـس خلصت طلعت تركض
طلعنا واني خلصت الطريق ارزل بيّ وهوَ
يا جبل ما يهزك ريح يضحك ومتونس
وتالي على ضحكته صرت اضحك ودخلني بجوه
مَن وصلنا چانت المنطقة تعج اصدقائه كلهم بعدهم بَـس دخلني مَن الباب وطلع الهُم يهوسوله وصوتهُم هرج المنطقة هرج
اخذتني رنيم للغرفة وأحسها طايرة مَن
الفرح بزواجنا
انصدمت مَن الغرفة كُلها مغيرها وابد ما
گال؟ متت بيها نازكة نازكة كُلش گعدتني
رنيم- جهزت كُلشي اني سبحي وبدلي واخذي راحتچ لان اعتقد خالو يتأخر شويَّ ويا اصدقائه
- تمام
عافتني وطلعت واني مَن صدُك چنت احتاج اسبح وازيح تعب اليوم
اخذت جنطة صغيرة مال المكياچ گلت بعَد السبح ارتب وجهي وفعلًا كملت وطلعت بَـس انصدمت هُمام لحد الان ما جاي؟!!
وگفت رجلي على البايات الاخيرة واني
اسمع صوت نتر بالكلام
وبَـس تقدمت جمدت خطواتي وصار صوتهُم واضح ، چانوا بالحديقة كليم وهُمام ويمهُم رنيم اگدر اشوفهم مَن الشُباك بَـس هُما لا لان چان المطبخ ظلمه
رنيم- خالو كُل ما تتأخر يتعقد الموضوع اكثر اني مادا اگدر اضم عنها اكثر وهي بالنهاية حَتعرف بوضعها إلى متى تبقى ساكت
هُمام- ما اعرف بَـس حاليًا ما حَ اگدر احجيلها وادمر ايام زواجنا
كليم- صح بَـس ضروري تبلغها احسن من ما تعرف مَن غيرك
هُمام- وشلون تعرف إلا اذا واحد بينا حجالها لان محد يعرف بالموضوع غيرنا احنه وقسورة
رنيم- لا تباوعلي هيچ خالو اني اريدك أنتَ تبلغها اكيد ما حَ احجي
هُمام- سارة عندي بألف طفل كل الموضوع ما هامني بَـس خايف عليها مَن ردة فعلها خصوصًا هي چان حلمها تصير أم
رفعيت أيدي على گلبي وانخفض تنفُسي مَن تقرب كليم وربت على كتفه وگال كلام كفيل يقتل كُل فرح بداخلي
كليم- أنتَ تشاء وانا اشاء واللهُ يفعل ما يشاء رب العالمين ما كاتبلها نصيب تكون أم بَـس عوضها بخواتها الحمد لله
وگعدت على ركباتي اشهك النفَس واسمع باب الشارع يندك
وبنفَس الوقت انفتح باب المطبخ وصار بوجهي هُمام البهت وعيونه جحضت صافن بوضعي
ثنيناتنا درنا على كلام قسورة
قسورة- امي تگول جيب ريم انومها تعبت اليوم
كليم- شنو؟ ريم مو عندي رنيم؟
رنيم- مو هنا
قسورة- ولا ببيتنا !! خالي شنو السالفة؟؟
بنفَس الوقت رن تلفون كليم يعلن عن وصول رسالة
چان رسالة عبارة عن صورة عدمت اخر ثبات كليم وخلته يوكع على ركباته
صورة چانت لـ ريم وهي نايمة بحضن عذاب؟!!!!
مُصيبتي بكفة ووجود طفلة بريئة بيد
عذاب بكفة وضربتين على الراس
يوجعن حَيـل يوجعن ..
..
وتستمر الحكاية.. 🚬♣
قناة التلي zainab_salah0
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!