رواية دروب الإِندِثـار الفصل السابع عشر 17 - بقلم زينب صـلـاح 🤎

بقلمي : زينب صلـاح 🧡

لـ روايـة ﴿ دروب الإندِثار ﴾

في الـ part 14 ♡♡

لا تنسون التصويت + متابعة للحساب + التعليق بين الفقرات ☘️

‏- بيَتَك وَين؟
- بحضنها ♥️.

•••••••••••••••••••••••••••♕•

اجه صوت مره وهي تصيح..
نجلاء- جايه جايه

رفرف گلبي وحَـسيت رَوحي تفرفح دموعي صارت عشرة عشرة فلتت مني شهگه زرفت صدري فززتهم صاروا يباوعولي بقلق رفعت ايدي امسح ؏ گلبي اريد شوي نبضي يهدأ بس زاد ما خف!

شعوري ما اگدر اوصفه وخصوصًا بعد ما فتحت الباب عمه نجلاء وخذتلها صفنه بوجهي من لحظة إدراك! ضربت خدودها وصاحت بلوعة..

نجلاء- يمههه رنيم يمهه بنيتي

سحبتني لصدرها تحضن بيه وتبوس ، بعدتني تباوع بعيوني ورجعتني لحضنها تبچي ، گالت بونين جُملـة رنت بمسامعي وتفسيرها هز گلبي..

نجلاء- يالكسرتي ظهر السَبـع!

شي بداخلي ما اگدر اوصفـه! خوف ، قلق ، توتر ما اعرف شنو هو بالضبط رغم فرحانه رجعت لناسـي بس خايفـه من مستقبلي المجهول بوجود عذاب حُر طليق..

هُمام- يمعودات جوه جوه مو هنااا الرجال تعبان

دفعنا ودخل ساند عمو كليم ، عمة نجلاء راحتله تمسح بدموعها بسرعة حاوط كتفها وهي باسته بخده وگالت..

نجلاء- بالمبارك عليك رجعتها گرت عينك خويه

ابتسملها بدون جواب لان تعبان مو مال يوگف هواي ولا يحجي امس مضروب رصاصه وهسه واكف ؏ رجلي الله يساعده لازمله راحه..

اتلفت واباوع اريد المح خواتي وعمة كأنو عرفت ؏ شنو ادور ، گالت..

نجلاء- فوك يلعبن ويه ريم

- بيبي وجدو شلونهم؟

واحد صفن بوجه الثاني ، اجت عمه نجلاء وحاوطت كتفي وسحبتني وياها جوه ما حَـبيت الح بس جـنت بگد ما متحمسه بگد ما قلقانه من ردة فعلهم خايفة يلوموني ؏ موت ابنهم خايفة كارهيني كلش قالقني المستقبل..

دخلت ، سديت عيوني وزفرت انفاسي! البيت بي هواي ذكريات بكل زاوية عندي ذكرى ، هنا بچيت هنا ضحكت هنا لعبت ويه عمو كليم هنا جدو قرالي قصص هنا ربيت وكبرت بيد عمو كليم وبابا..

هالـبيت ذكرياته بگد ما عتيقه وحَزينـه بيها فرح!

صفنت بوجه بيبي الچانـت گاعدة ؏ كُرسي مُتحرك وبس شافتني شهگت ، صـح أذتني بس احبها ڪُلش احبها
ركضت دخلت بحضنها ابچي وهي حاضنتني وتبوس بيـه...

ام كليم- رجعت بنيتك يوم رجعت الخلتك ما تنام ليلك گرت عينك يا ابن بطني

گعد عمو قريب منها رفع ايدها وباسها مبتسم ، اني بقيت حاطه راسي بحضنها وهي تمسح بيدها الحنونة ؏ راسي وتهمس..

ام كليم- البنيات الحلوات

رفعـت عيني گلبي يدك من سمعت اصواتهن جايه من الدرج ، جان هُمام واگف قريب مبتسملي ورافع حاجبه..

اول وحدة نزلت سـارة شايله بيدها طفلة وگفت متجمدة بمكانها وفاتحة عيونها ؏ وسعها ومسـرة ودموع صدمتهن ما تقل عنها
بلعت ريك من اختل توازنها وبسرعة تقرب منها هُمام اخذ الطفلـة وگال..

هُمام- اهدي عينـي

دفعت ايده الجانت ؏ خصرها وركضت الي ضحكت بصوت وهي تبوس بوجهي وتحضن بيه ودموع ومسرة وياها صرنا كلنا بحضنها لامتنا ؏ گلبها وتبچي ، رفعت ايدي امسح دموعها..

- هاي اني رجعـت بعد لا تبچين

سـارة- حيل ما بقه عندي والرب افكر بيج عقلي حسيت حـينفجر بسبب تفكيري وقلقي

- كل بالي يمكم والله امي

ضمتني لـصدرها بقوة تشم بيه
ومسرة باستني بخدي
ودموع لازمه ايـدي بقوة عبالك راح اشرد منهم
رفعت عينـي ؏ صوت صديق عمو وهو يگول..

هُمام- جرحك بعده جديد اي حركة منها تنفتح لخياطات

ام كليم- يا خياطات؟ شبيك يمه؟

تأفأف عمو وگال..
كليم- انطيني بنتي هُمام

تنهـد بلا حيلة وحط الطفلة بحضنه
بسرعة تعلقت برگبته بوسها وهي هم باسته
گزگزت عليها تخبل!

نجلاء- ابو ريم فهمنا خياطات شنو؟

غلس عمو وجاوب هُمام..
- البارحة تصاوب والعنيد ما قبل إلا يطلع اليوم

بيبي ضلت تنوح وتبچي وهو يحاول يهديها لحد ما نتر بعصبية..

كليم- مو گاعد گدامج ما بيه شي صدك تحجين يوم!!

ام كليم- لو صايرلك شي وين انطي وجهي وأنتَ وحيدي

كليم- خلص حجيه ما بيه شي بس اريد ارتاح

گام شايل بنته ومدلي ايده..
كليم- يلا بابا تعالي

فهيت بوجهة خجلانه ، اني مو طفلة مثل قبل واگدر ادخل وياه غرفته صرت اعرف وافهم وفهمت سبب عدم لمسه الي وقُربه مني من جنت صغيرة قبل ويگول مُحرم عليج!

كليم- رنيـم!!

فزيت من صفنتي اباوعله..
- ها عمو

كليم- تعبان ما اگدر اوگف هواي

تنهدت ولزمت ايده بس مشينا خطوتين صار مقابيلنا صديقه..

هُمام- اني هنا گـوا*د؟؟

كليم- حشى مَنك اكيد يليق بيك مكان اكبر

هُمام- كليم!!

كليم- مو هسه هُمام وتعرف نيتي شنو! لذلك وخر من طريقي

تنهـد بقلة حيله وابتعد
احنه صعدنا ، جان كلامهم غريب
كلشي ما فهمت منه!

بس دخلنا لـ غرفته صحت بحماس..
- انطينياهااا عمووو

ضحك بخفه ونزل بجسمه ينطينياها بس شلتها شبعتها بوس بخدودها وهي هادئه تباوعلي ببراءة وعيونها يمووووتن!

اخذتها گاعده ؏ سرير والعب بيها..
- شنو هالخديدات راح اكلهُمممم

عضيتها بخدها خفيف ودغدغتها بسرعة ضحكت بصوت ناعم
رفعت راسي اله جان بعده واگف..

- عمووو تجنن تجننن راح اكُلها

كليم- عيونج الحلوة بنياتي

ضحكت بفـرح شوي وفزيت گايمه من مكاني..
- تعال مدد وارتاح عمو

ما گال شي بس تنهـد بحسـرة وتقدم تمدد وغطيته گاعده ؏ طرف السرير وبيدي ريم كل شوي وشافطه خدها بوسه تجنن وڪُلش هادئه..

- شگد عمرها؟

- اربع سنوات

تفاجأت..
- لعد ليش ما تحجي؟

- تحجي ، ريمه بابا تعالي

عافت حضني وراحتلـه تمددت حاطه راسها ؏ صدره وجسمها ؏ السرير ، مرر ايده بشعرها الناعم وگال..

كليم- شنو سويتي اليوم بابا؟

رمشت بعيونها واني اترقب كلامها..
ريم- يم ساغه العب

ضحگت..
- عندها لدغه بالراء

كليم- اي بس هي هادئه ما تحجي هواي عكسج انتِ من چنتي صغيرة هواي تحبين تحجين وتستكشفين عندج فضول قوي

نزلت راسي بخجل ، اكيد نفخت راسه..
كليم- وهاي الصفة بيج اموت عليها فـلا تسكتين سمعيني صوتج

- عمووو

كليم- هههه اسف بابا اعرف جاي اخجلج وما متعودة بس مو بيدي والله طاك گليبي عليج مو ثمان سنوات عبالك قرون ما اعرف شلون خلصن وهسه انتِ گدامي

- الحمد لله ، قَـدر الله وما شاء فعَل!

سكتنا شوي لا اني اعرف شنو احجي ولا هو وبنتـه غفت ؏ صدره ، سألت بعد فترة بفضول!

- زوجتك وين؟

انطعن وجهة وتغيرت ملامحه للغضب للحظة خفت وتمنيت ما سأله بس عكس ملامحه جاوب..

- طلگتها

شهگت..
- عزاا ليش؟ انتَ تحبها!!

التزم الصمت وما جاوب واني خجلت الح اكثر بس الفضول موتني اريد اعرف ليش انفصل عنها وهو يحبها!!

صافنه بشرود وهو نفـس الحالة ما اعرف بشنو يفكر بس واضح مزعوج او متوجع لان حواجبه معقوده ونظراته بارده
مشتاقه لجدو بس خجلت اسأله او اگله اريد اطلع بعدني ما متعوده ؏ الوضع!

كليم- رنيم!

- ها عمو

صفن بوجعي بحيرة وهمس..
كليم- ابوي انطاج عمره

شهگت بقهر وبسرعه حسيت بحرارة دموعي ؏ خدي رفع ايده ومسحهن..
كليم- جان مشتاقلج وكل يوم ادخل للبيت يسألني اذت لگيت طرف خيط يوصلني الج

- مشتاقتله حيل ما توقعت ما اشوفه

تنهد..
- بس يلتئم جرحي شوي اخذج ونروح نزور وهم تزورين قبر ابوج وامج

- صير زين والله كريم

ندك الباب وانفتح چانت عمة نجلاء ، ابتسمت بوجهه البشوش وگالت..

نجلاء- گوم نام جوه خويه خاف يجيك خطار

كليم- عاشت ايدج ام قسورة بس صيحيلي هُمام خلي يساعدني شو احس نفسي دخت وعيوني ما جاي اشوف بيها

ركضت عمة خطية واني تقربت منه..
- عمو شبي..!!

قطعت كلامي فاتحة حلگي بصدمة واني اشوف دم ؏ صدره..

- عمو دمممم دم

كليم- اشش بابا ما بيه شي

اثناء كلامنا دخل صديقة هُمام بسرعة طفرت احجي بتوتر..
- عمو دمم فدوة سوي شي

بهت بوجهي للحظة بس بعدين مسح ؏ راسي..
هُمام- اخذي ريم وطلعي ما لازم تشوف ابوها هيج خطية تخاف وانتِ لا يبقى بالج ما بي شي كليم

سويت الي طلبة بقلة حيلة وطلعت شايله ريم جان الكل واگف بالصالة ، عمة نجلاء اخذت ريم ودتها بغرفة من الغرف واني دخلت بحضن سارة..

- خايفة عليّ

سارة- اشش هسه يصير زين

بقينا واگفين فترة وعمة نجلاء ويانا ، تقريبًا نص ساعة بس مو نص ساعة صارت سنة اريده يطلع يطمني..

بس انفتح الباب ركضت عليّ وهو ضحكلي وقبل لا اسأل شي جاوب..

هُمام- ما بي شي والله من الحركة الزايده نزف جرحه هسه عقمته اله ولفيته عدل ونام

باوع لعمة وكمل..
هُمام- بس يگعد خلي ياكل وياخذ علاجه وخلي ينزل جوه يستقر هاي الفترة صعدة الدرج ونزلته مو زين عليّ وبنته لا يشيلها هم مو زين عليّ

نجلاء- ان شاء الله خويه مشكور ما قصرت

هُمام- ؏ راسي ام قسورة

عافنا وراح واني احـس نفسي بعدني خجلانه وما متعودة ، تقربت عمة نجلاء تمسح ؏ كتفي وگالت بأبتسامة..

نجلاء- غرفتج مقفولة والمفتاح عند كليم روحي نامي يم اخواتج واخذي من ملابسهن وارتاحي شوي لو جوعانه؟

- ما اشتهي هسه عمة اكُل ويه عمو من يگعد

هزت راسها وجهة نظرها لـ سارة..
نجلاء- يمه نومت ريم يمجن ديرن بالجن عليها

سارة- بعيوني عمة لا يبقى بالج

نجلاء- الله يرضى عليجن وينور طريقجن ، نازله يم امي اني
ㅤㅤㅤ
ㅤㅤㅤ
••••••••••••••••••••••••••••••
ㅤㅤㅤ
مسـرة•

بس نزلت عمة نجلاء سحبناها للغرفة واول ما گعدت نطقت بفضول..

- احجي شصـار وياج كل هذيج الفترة؟

بس گلت هيج حطيت ايديها ؏ وجهه وصارت تبچي بهدوء نفطر گلبي عليها
سـارة سحبتها لحضنها تلومني بنظراتها
بس اني ما جنت اعرف هاي ردة فعلها لو اعرف ما اسأل!!

مرت دقائق وصارت تسرد كُلشي مرت بيه ويه عذاب خوفها منه من يشرب ويفقد وشگد نفسيتها تعـبت تخاف يفقد ويلوثها بقذارته جان واضح بصوتها الرعب والقلق العايشه بي..

نفسيتهـا تعبانـة حيل!!

وهي تحجي غفت تعبانه اكيد المرت بي مو سهل!
طلعت من حلگ الموت هي وعمو كليم الله ستَر ورجعهم النا سالمين
صح عمو تأذه بس هيج ولا اكثر لان اهله يضيعون بدونه هُما اولاد عمة نجلاء ما يخطون خطوة اذا مو بعلمه..

تمددت سـارة واحنه بصفها همست بأذني..
سـارة- روحي جيبي ريم يمنه خطية خاف تگعد وتخاف

صدك گمت شلتها بحذر خاف تفز ، گزگزت عليها من چلبت ايدها بصدر الدشداشه
نومتها بنصنا اني وسارة ورحنا بسابع نومه..

فزيت بعد فترة ؏ ضربات خفيفة بخدي
ابتسمت واني اشوف عيونها لوساع
اشرت ؏ الباب معبسة بشفايفها..

ريم- مسغة اغيد بابا (مسرة اريد بابا)

بست خدها ولفيت الشال ؏ راسي وطلعت شايلتها اول مرة نزلت جوة ما جان اكو احد بالصالة وغرفة بيبي وعمة نجلاء مسدودة تنهدت واتجهت للمطبخ ووگفت جامده..

جان گاعد ؏ ميز الطعام ولابس بجامه عريضه حيل وفانيله بس ويدخن وشعره مخربط
بس حس بوجودنا رفع راسه ، باوعلي بعيونه الصايرات حُمر..

قسورة- دخلي شبيج صفنتي!

- ريم تريد ابوها واستحيت اوديها اله

قسورة- نايم خالي وتعبان جيبيها يمي

رحت انطيتها اله اخذها يبوس بخدودها بس واضح عليّ التعـب
ردت اطلع رجع گال..

قسورة- ويـن؟

- يم خواتي

قسورة- گاعدات؟

- لا!

قسورة- لعد ابقي هنا ضايج وخاف ريم تتنحس ما اعرف للاطفال هواي اني

هزيت راسي وگعدت بس بعيد عنه..

قسورة- رنيم شلونها؟

عبست ورجفت شفايفي..
- تعبانه حيل نفسيتها تعبانه من تصرفات هذاك الحيوان

عيونه نزلت ؏ شفايفي للحظات ورفعهن..
قسورة- استغفرالله ، فترة وتتحسن احنا كلنا وياها

حجت ريم بزعل..
ريم- اغيد بابا

قسورة- بابا نايم ريمه

ريمه- اغيد يمه!

قسورة- من يگعد نروح يمه هسه شنو رأيج نروح نشتري؟

ضحكت تهز راسها بـ اي رفع عينه وگال..
قسورة- يلا لبسي خلي نروح نشتري

- اني؟

قسورة- لا ابوي استغفرالله شبيج عيني منو غيرج موجود هنا!

- اني ما اطلع وياك وحدنا

قسورة- ريم ويانا ولا تخافين مو ذوقي عيني ما تجي عليج

دخـنت بقهر من كلامه ، جان دنيا العصر تقريبًا بالخمسة والجو زين نوعًا ما
لبست جُبتي وشالي وطلعت وياه ريم بحضني وهو يسوق بسيارته لحد ما وگفنا گدام اسواق..

قسورة- يلا نزلي

نزلت وياه وفزيت من لزم ايدي وشال ريم بالثانية رفعت راسي اباوعله وگلت بحده..

- اترك اييدي

قسورة- صوتج خاف تضيعين وانتِ ما تندلين المكان ابقي هيج

تنهدت بقلة حيلة بس شخصيتي الثانية الملطلطة عجبها الوضع!

دفعني گدامه بخفه..
قسورة- يلا اشتري

- ما اريد

قسورة- ممنوع الرفض اخذي الج والخواتج

- ما اريد ليش تلح!

تأفأف ضايج ، انطاني ريم وصار هو يملي خمس علايك بالحلويات ؏ ذوقه دفع لفلوس وطلعنا صار يفر بينا بالسيارة ما رجع للبيت لحد ما شوي صار المُغرب اتجه للبيت..

فتحت ككو لـ ريم وصارت تاكل ما احس غير حطته بوجهي ودمرتني..

ريم- اكُلي!

باوعلي مبتسم وهو يصف السيارة واني خجلت من نظراته فزيت ؏ ايده جامده بمكاني من مرر اصبعه الابهام ؏ شفايفي ومسح الككو وبعدين حطه بحلگه شهگت متفاجأة من تصرفه..

قسورة- طـيب حـاعتمد هذا الككو

نزل مخليني وحدي مصدومة عزاا هذا شسوه؟ الحقير يتحرش بيه ، باوعتله من فتح الباب وگال..

قسورة- اي ست منتظره نفتح باباج؟

رفعت اصبعي بوجهة..
- اول واخر مرة تعيد هيج تصرف غبي ويايه فاهم؟

لزم اصبعي وعصره بقوة خازرني ، آنيت بوجع..
قسورة- وانتِ اول واخر مرة ترفعين اصبعج بوجهي هالمرة راح اكتفي بهذا الشي المرة الثانية اكسره

كل هذا وريم تباوعلنا ببراءة ما مفتهمه شي ، اخذها مني وزمخ..

قسورة- نزلييي

نزلت خازرته وكارهه كل تصرفاته وياي..

قسورة- عيونج لا ومحمد وآل بيته افگسهن

- بريء منك محمد وآل بيته

گلتها وركضت جوه وهو يصيح..
قسورة- بسيطة توكعين بين ايدي لو ما توكعين

مديتله لساني ودخلت احس نفسي منتصرة
بس انصدمت واني اشوف الكُل گاعدين بالصالة حتى عمو كليم! وباين عليهم القلق
بس انتبهت سارة عليّ گامت وعيونها حُمر وقبل لا انطق بشي اشتعل خدي نار آثر الراشدي..

صاح بصوت من وراي..
قسورة- هااااي ليششش؟

سارة- انتَ لا تدخل رجاءًا وانتِ ولج شلون اطلعين ويه رجال غريبب وبدون ما تگولين شلون ما فكرتي من تگعد سارة وما تلگاني شيصيررررر بيهااا

- نسيتتت

رجعت تريد تضربني وسحبني قسورة وره ظهره وگال..
قسورة- اني طلبت منها تجي لان ما اگدر اسوق وريم وحدها وياي

سارة- واني جاي احسب اختي انتَ لا تدخل

قسورة- شو ادخل ونص واريد اشوفج تمدين ايدج عليها

سـارة- شتسوي مثلًا ها؟

قسورة- اكسر ايددددج مرادد ما اريددد

كليم- كاااااافي شنووو زعاطيط ما تحترموننن

اباوعله حاط ايده ؏ صدره ويحجي متوجع ، گام وحجه..
كليم- سارة عوفي اختج وانتَ اگعد گدامي داشوف

دفعني علمود اگعد وفعلًا گعدت بين رنيم ودموع لان كلش ضجت من تصرف سارة
صح اني غلطانه من طلعت بدون ما ابلـغ احد بس مو من حقها تضربني گدام الكل وتصغرني بعينهم چان اكو الف طريقة غير هالطريقة..

كليم- انتَ شلون تاخذ البنات بدون ما تنطيني خبر؟

قسورة- وشنو تخاف عليهن من عندي؟

خزره ونتر..
كليم- مع الاسف اذا صدك هذا تفكيرك! لا ما اخاف عليهن من عندك بس اخاف عليكم وانتَ تعرف الوضع شنو

قسورة- واني اعرف اتصرف مو صغير ومن اخذتهن ويايه اكيد اعرف الوضع امان وماخذ احتياطاتي

كليم- عذاب مو سهل لا تستهان بي!

قسورة- خلص بعد ما اطلع ريـم ويايه اطمئن ما يصير شي لبنتك بسببي

نطط عيونه عمو بتفاجئ..
كليم- ليش تعكس كلامي ؏ الرغم تعرف قصدي؟

قسورة- هذا الواقع خالي خايف عليهن من عندي يلا اني اترخص واليوم ما ارجع للبيت

شال مفتاح السيارة ومحفظته وسلاحه يريد يطلع صاح وراه..

كليم- رجعت لطياح الحظ والعربده قسورة؟

قسورة- شي يخصني

بعد ما طلع هذا الجواب البارد إللا مُبالي من عنده خله وطلع ، گام عمو وضرب الحايط برجله بسرعة طفـرله ليث..

ليث- يابه جرحك ما يصير هيج

كليم- يجلطني هذا الولد المتهور يلا يرتاح

گام ايهم وبلگوه قنعوا واخذوا للاستقبال ينومونه بفراشه ، بس چان حيل مقهور من كلام قسورة واسلوبه ويايه..

مر اسبـوع واني ما احجي ويه سارة وهي هم ما تحاجيني ، من ثاني يوم بعد إلي صار الخطار ما وگف من البيت قرايبهم واصدقاء عمو كلها اجت بحيث من الصبح لليل ؏ وگفه وحدة نساعد عمة نجلاء
وقسورة بعد ما رجع للبيت ما اعرف وين يبات بس هذا الشي استفـز عمو واكثر شي قهرة ما يرد ؏ اتصالاته رغم اصدقائه بالشغل يگلوله قسورة يداوم طبيعي وما بي شي..

اخـر يوم من فضت الناس بالليل تقريبًا الساعة 10 گاعدين نتعشه تأخرنا بسبب الخطار لان بالعادة العشاء يكون بعد الصلاة بنصف ساعة اقل شي هذا روتين عندهم..

انفتح الباب وسمعنا صوت سيارة تدخل للگراج عمو كليم رفع راسه صافن عارف منو راح يدخل من هـذا الباب وفعلًا دخل قسورة بملابس غير عن الي طلع بيهم من البيت!

قسورة- السلام عليكم

محد جاوب! والكل رجع ياكل طبيعي عدا عمو الي گام رادف بهدوء..

كليم- الحمد لله ، ليث ساعدني اصعد فوك

گام ليث من مكانه محاوط عمو كليم وصعدوا فوك بينما قسورة ظَل ساكت وملامحة ما مبين عليهن اي شعور..

تقرب اخذ ايد امه يبوسها بس دفعته وگالت..
نجلاء- گوم عني

قسورة- امي لا تسوين هيج وانتِ تعرفين من اعصب من شي ما اعرف اتصرف واتهور وبعدي هاي الفترة كلها علمود لا ازعل خالي بكلمة

نجلاء- وما زعلته انتَ هسه؟ شكبرها معزتكم عنده وخوفه عليكم يستاهل هيج تصرف منك؟! گوم قسورة گوم عني عذرك اقبح من ذنبك

قسورة- اني اراضي لا يبقى بالج

نجلاء- ذيج الساعة من اشوفه راضي عليك اني يوكع مني الزعل بس هسه لا تحاجيني واخوي متگدر خاطره منك

وصدك ابتعد عنها لان جانت حاده بالكلام وياه وحتى ما باوعتله ، مرر نظره علينا وگال..

قسورة- شلونكم؟

جاوبنا بـ زينين ، بقى واگف مثل المحتار
ايهم خلص وگام غسل وصعد لغرفته بدون ما ينطق شي ويه اخو ورنيم همست..

رنيم- الحمد لله ، رايحه اشوف عمو ريم تجين وياي؟

ريم- اي

شالتها وصعدت فوك فترة وصعد قسورة بس چان واضح عليّ التعب والحيرة

•••••••••••••••••••••••••••

رنيـم•

دگيت الباب ودخلت من اجاني صوته يطلب مني ادخل ريم نزلت من ايدي وركضت بحضنه وهو ما قصر لمها بحضنه يبوس بوجها..

ريم- اغيد نغوح للالعاب بابا

كليم- تدلل لبنيات بس اطيب اخذج من عيوني انتِ ورنيم

ضحكت تباوعلي شمرتلها بوسه بالهوى وهي سوت نفس الشي ودفنت راسها بصدر ابوها تريد تنام لان متعودة تنام هيج وقت..

بقى يمسح ؏ راسها ويباوعلي ذب حسره وگال بصوت هامس..

كليم- اكو علبة هناك جيبيها بابا

گمت جبتها اله ، ريم نامت بسرعة
حطها ؏ السرير بصفه وغطاها زين
فتح العلبة وگال رافع مفتاح بأيده.

كليم- مفتاح غرفتج

ابتسمت ماخذته..
- ردت اسألك بس ما جان اكو وقت

كليم- امم گالت ام قسورة رايده ادخليلها بس اني جنت اريد ادخليلها بوجودي واكو هواي شغلات اريد اراويهن الج

- اگدر اروح اشوفها؟

كليم- نروح سوه

گالها ومد ايده ضحك ولزمتها يعاملني عبالك رنيم الطفلة قبل ثمان سنوات احسه مو مقتنع انُ اني كبرت وصرت شابه..

فتحت الباب بـ ابتسامة اتسعت بفرح واني اشوفها مثلها هي هي غرفتي قبل ثمان سنوات لفراش السرير الكنتور الصبغ بس الواضح مجددها بالكامل بس نفس الاشياء مشتري..

من غير النظـافة الريحة البيها تحسيك بالراحة وانتَ تستنشقها ، حسيت بمشاعر غريبة وعيوني تجمع بيها الدمع من گال وهو واگف وراي..

كليم- كل اسبـوع جنت ادخل انظفها بأيدي ما چنت اقبل احد يلمسها غيري وبكل سنة اشتري ملابس تناسب عمرج خوفًا انُ الگاج وما يكون كلشي جاهز الج وبكل عام من عيد ميلادج او مناسبة جنت اشتريلج هدية واضمها الج حتى من عرفت تحجبتي ؏ الرغم ما موجودة اشتريتلج سيت شالات وغلفتهم ولحد الان موجودين بالكنتور من غير بقية هداياج هههه حتى

گال وهو يتقرب مني..
كليم- حتى من جنت اشتري لعبة او فد شي لـ ريم اجيب منها ثنين

ضحكت وهو راح فتح الكنتور وصار يطلع هدايا مغلفة شي كبيرة شي صغيرة ويحطهم ؏ السرير حتى لعابات طلع ، تعجبت ؏ كمية الحنان الي عنده وحقدت ؏ نفسـي لان بيوم دعيت عليّ بسوء وكرهته..

غمضت عيوني كارهه شعوري واني اتذكر قُبح دُعائي عليّ بينما هو جان مظلوم مثلي واكثر وما يستاهل غير الخير!!

فزيت ؏ ايده وهي تمسح دموعي النزلت بدون إدراك مني!!

كليم- ما اريد دموعج تنزل حالف من الگاج ما اخلي بس الضحكه ؏ وچهج الحلو

- اني اسفة

كليم- اني الي لازم اعتذر مو انتِ ، اني الضيعتج وضعت وراج لذلك اسف سامحيني لان ما گدرت احميج من اهلي واحافظ عليج

- عمو اني..

كليم- شنو بابا؟

- دعيت عليك عمو دعيت عليك دعاوي بشعة وخايفة تتحقق

كليم- واذا تحققت فـ معناها اني استاهل

- لا عمو اني وانتَ مظلومين احنه الاثنين ما نستاهل الي صار بينا

ضحك وگال..
كليم- الحمد لله ، بس الي يمج عَتب!

- اعـرف!

كليم- معقولـة بابا معقولـة تصدگين أأذيج او اكون بعتج بعد كُل حُبي الج ولوعتي عليج بعد كُل تصرفاتي وياج تصدگين اني ابيعج او اكون سبب بأذيتج او ترويعج وحزنج تعقلينها ابچي عيونچ؟!

- ما صدگت بس سمعتك بـ أذني وانتَ تگول لعمو عليم 'بيعها من ارجع للبيت ما اريد اشوفها وهم ما اريد انشغل بهيج امور تافهه وراي زواج'

فتح عيونه وگال يهز راسه برفض..
كليم- لا لا لا وداعت بنتي وعافيتي وداعت معزتج انتِ وابوج ما گلت هيجججج اني

- بس اني سمعت بـ أذني من خابرك

هز راسه متخبل ، سحبني مگعدني ؏ كرسي بزاوية الغرفة وگعد ؏ ركباته گدامي محتضن ايدي داخل ايدي..

كليم- رنيمه سولفيلي كلشي صار بهذيج الفترة تتذكرين مو؟

هزيت راسي ، صرت اسردله وهو يهز راسه مركز بكل تفاصيل كلامي
عمو كليم انسان جدًا ذكي شگد ما اگول عنه ذكي اكون ظالمته! وهدوئه ضاف اله نوع خاص من الذكاء هالصفتين بي يجنن..

اخر شي من خلصت صفن بالفراغ مثل الي يجمع الاحداث بهذيج الفترة لحد ما فتح عيونه وصاح..

كليم- لاااا يااااا عاااار

- شكو عمو؟

- المكالمة صحيحة ان..

قاطعته..
- يعني صدك انتَ طلبت منه يبيعني؟

- انچبي بابا وخليني اكمل يعني بعد كل هذا وعقلج ما ناوي يستوعب اني ما بعتج؟

نزلت راسي خجلانه وهو رجع يسترسل بكلامه..
- صحيحة المكالمة وكلامي هذا بالضبط جان بس اني قصدي ؏ السيارة وبالمكالمة اني ما وضحت قصدي لذلك هو استفاد من عدم توضيح قصدي بكلمة بيعها وضحك ؏ عقلج بيها يعني عرف يلعبها اعتقد جانت ضربة حظ اله لان بكل الاحوال رايد يبيعج بس علمود يضمن عدم رجعتج الي وهروبج من هذاك المكان لعب هيج لعبة يعني كلامي ما جان راح يقدم ولا يأخر غير انُ انتِ ما تحقدين عليّ كل هاي السنوات وهذا خطأي الاكبر!

تنهدت بحسرة وهو رفع ايدي وباسها..
كليم- بس بعد ماكو شي تخافين منه وانتِ بحمايتي خاف قبل حاطج بعيوني هسه انتِ بوسط گلبي واضحي برَوحـي في سبيل سلامتج

كلماته حركت شي بداخلي ما اعرف شلون اوصفه بس كل الي سويته نزلت راسي بخجل لـ ايده وهي حاضنه ايدي..
رفع راسي بيده الثانية وگال..

كليم- تثقين بيه مو؟

- اكثر من رَوحـي واوعدك منا ورايح ما اصدك شي عنك لحد ما اشوف بعيوني

كليم- وهذا الاريده لا اقل ولا اكثر وتأكدي ما راح اخليج تنخذلين واكون گد ثقتج واكثر ولو الدنيا كلها وگفت بوجهج اني اوگف بظهرج واسندج

- اعرف لان بابا مُستحيل يأمني عند اي شخص

ابتسم مرتاح جان كلامي اله يرجعله ثقته بحمايتي لان حسب الي فهمته من كلامه وتعامله وياي خايف ما يگون گد المسؤولية اتجاهي ويقصر!

تنهد ذاب حسـرة فطرت گلبي ، عيونه بيها حجي بس متردد يحجي! مسح ؏ راسي بتوتر وهرب نظراته مني
جمع كل طاقته يلا نطق!

كليم- رنيم بابا انتِ تعرفين امج عندها اهل؟

بقيت صافنة ادور سؤاله براسي! اهل؟ يعني شنو اني الاعرفه ماما وحيدة اهلها وهُما ميتين بس ما اعرف شي ثاني هذا الي سولفه الي بابا..

- اي جدو وبيبي بس متوفين!

كليم- وعندج خال وخالة!

عيونه تترقب ردة فعلي
نزلت دموعي وهمست احاول استوعب..

- شنو خال وخالة؟ عمو ماما ما عندها اخوان ولو عندها ليش اني ما اعرفهم وليش بدال ما اعيش عندهم عشت عندك صدُك تحجي انتَ!!!

گام مني يمسح بوجهة وگال كلامه وهو منطيني ظهره كأنو ما يريد يشوف ردة فعلي
كلامه الي سوه گلبي جمر وحسيت الصدمة احتلتني..

كليم- امج ما ماتت اثناء الولادة مثل ما تعرفين بل بحادث هي واخوها!

..

وتستمر الحكاية.. 🚬♣

قناة التلي zainab_salah0