رواية دروب الإِندِثـار الفصل السابع والأربعون 47 - بقلم زينب صـلـاح 🤎

بقلمي : زينب صلـاح 🧡

لـ روايـة ﴿ دروب الإندِثار ﴾

في الـ part 43 ♡♡

لا تنسون التصويت + متابعة للحساب + التعليق بين الفقرات ☘️

‏كُلشِي ياخذني عليك
الصفنة واشواگي وحسرتي
كلهن يذكرني بيَك
وانه حالف ما اجِيك

•••••••••••••••••••••••••••♕•

غلقت التلفون بعد مُكالمة طويلة ويا رنيم
ما ودعتنا إلا بعد ما صاحلها كليم ووعدتنا
باجر يرجعون
لان مثل ما مشتاقين الها هي ميته شوق النا

مسرة- قسورة يريد خلال هذا الشهر نحدد موعد زواجنا

- أنتِ مقتنعة؟ اذا ما مقتنعة گولي واني ابلغ هُمام يحجي ويا

مسرة- مقتنعة

ابتسمت الها ورفعت ايدي امرر اصابعي بين خصلات شعرها الحلو
- خلص ما دامچ مقتنعة توكلوا وربي يقدم الخير الكُم

تقربت دافنه نفسها بحُضني
- بنيتي الحلوة

مسرة- احبچ هواية

دموع- واني واني

ضحكت على سوالفها وشلون شاركت مسرة حُضني
مسرة- احبكُم كلكُم أنتو عائلتي الفتحة عيني عليها محظوظة بيكُم وبوجودكُم بحياتي

- ماي عيوني وسبب حياة سارة افديكُم بروحي

ساد الهدوء لفترة مَن الزمن
- مسرة

- ها؟

- ما ناوية تسولفين شنو صار وياچ أنتِ وقسورة مَن طلعتوا

بعدت نفسها تباوعلي اني ودموع بضياع
ارتبكت وهربت عيونها
تهربت مَن سؤالي ما چنت عارفه خافت مني
خاف الغي الزواج واوگف بوجهُم لذلك فضلت
تكتم بداخلها بدل ما تشاركني مخاوفها

قبل لا افكر اسألها اكثر سمعت باب
المطبخ ينفتح ويجيني صوته وهو يصيح
بصوت مرتاح
هُمام- وينها سارتي؟

استغربي وكمت عايفتهن ودخلت للمطبخ
بقيت متجمدة بمكاني وهوَ يضحك
سحبني مَن خُصري وطبع بوسة على خدي
وقدملي باقة الورد

حبيت مُبادرته بهيچ شي لدرجة عيوني غرگة بالدموع
ما ابالغ بَـس هُمام مَن بداية زواجنا لحد
الان هوَ ما بيوم ذكرني بهدية بسيطة
يمكن مو جوة ولا يهتم لهيچ اشياء بَـس
احنه ڪ نساء نحب هيچ مُبادرات وتطيرنه
بالهوى لو فد شخص قدملنه شي بسيط

حُضنته اعبرله عن فرحتي
وفاجأني مَن حاوك جسمي بين ايدي
وگال
هُمام- عذريني مقصر وياچ بَـس ما اشوف طريقي والله المصايب الفوگ راسنه عمت عيوني

- وجودك كافي بحياتي

- يموت عليچ ابو الهَمم شهلائي

اخذت ايده حاطتها على مكان گلبي الصار
ينبض بقوة لدرجة حسيته حَـيطلع مَن
مكانه مَن گد قوته !!!

- كلامك شوف شدا يسوي بگلبي هُمام اني فرحانه لان رجعنه سوه

بوسني بخدودي وكفوف ايدي
هُمام- وراح تبقين فرحانه طول عُمرچ وما اقصر عليچ بشي ابد

رجعت لحُضنه وكُل شوي اشم الورد
- حَ احُطه بڤازه علمود لا يذبل

ابتعدت عنه وبنفس اللحظة دك تلفونه
ضحك وطلع بالحديقة يجاوب
أحَس گلبي نغزني واتبعت خطواته اباوعله
مَن الشُبـاك يضحك ويسولف منطلق
يحك رقبته بخجل هوَ يورث جگارته ويجاوب الطرف الثاني
ميار؟ اكيد هي !! منو غيرها مُمكن تحجي
ويا هُمام او تخلي يطلع وما يسمعني

نسيت الورد ونسيت الدنيا اباوعله تأخر
ما حاس على نفسه !!
بقيت اگرص بنفسي واتنفس علمود لا
اسوي شي غلط بَـس وين اگدر وين اصبر
واني اشوفه يضحك لغيري
هُمام ملكي وحدي مُستحيل اقبل يسوي
اشياء ويايَّ ويسويها ويا غيري

بدون تفكير فتحت الباب وصحت بصوت
- هُماااااام

التفتح يباوعلي وهز راسه بمعنى "شكو"؟
- تعال محتاجتك

ما اعرف شنو حجه بالتلفون واجاني يتمشه
وگف گدامي ينتظر احجي واني نار الغيره
اكلتني ونسيت افكر بچذبه !!

هُمام- بشنو صافنه؟ شنو ردتي حبيبي؟

باوعت لتلفونه ورجع اباوع بعيونه
- ها

هُمام- ههههه ويايَّ يا حلوة

- الورد! اي اي الورد اريدله ڤازه وصايره فوك وما الوحها

هز راسه يضحك ودخل للمطبخ بسهولة
جابها
هُمام- بعد مدامتي اكو شي؟

- عندك شغل؟ چنت تخابر منو؟

تحمحم وغلس يسحبني يمه
هُمام- شنو رأيچ نحط الورد قبل لا يذبل

تقربت ضايعة باليّ مو ويايَّ
لدرجة هوَ وحدة السوه وحطه بنُص الطبلة
باس راسي وطلع اسمعه يسلم على البنات
مَن اختفه صوته رحت اركض ورا للغرفة
دخلت فجأة وعقدت حواجبي مَن شفته
چان يضحك ويباوع بالتلفون
شمره على الميز وسحب المنشفه وگال

هُمام- رايح اسبح

هزيت راسي وهوَ دخل حاولت شگد اتجاهل شعوري
بتفتيش تلفونه بَـس ما گدرت أحَس
متت مَن الخنگه ووجع گلبي بمُجرد شعوري
بوحدة ثانية تكون سبب بضحكته

گمت ماخذه التلفون وهنا وگف عقلي تمامًا
مغير كلمة السر؟! فتحت عيوني وفصلت
عن العالم ، هوَ چان حاط مواليدي ليش غيرهن؟
بلعت ريك وحاولت مرة ثانية اغالط نفسي
بَـس مع الاسف هذا الواقع وهاي الحقيقة المُرة

بقيت اعبث بيّ والح وجن جنوني لان ما
ينفتح لحد ما اجاني صوته
هُمام- سارة !!!

رفعت راسي كُلي ارجف
- ليش مغير الباسورد؟

هُمام- وليش تلفوني بيدچ؟

- ما يصير الزمه؟ افتحه؟ ما چنت تمنعني قبل ليش هسه تغير كُلشي؟

جاوبني بجواب صعق گلبي
- قبل ما عندي زوجة ثانية مُمكن تشوفين مُحادثتي وياها وتنزعجين

تقرب ساحب تلفونه وضاف
- ولان ما اريد ضوجتچ سويت هيچ

باس خدي وراح يغير ملابسه؟ هوَ ليش سبح؟
- ليش سبحت؟

باوعلي فاتح عيونه واشر على راسه بمعنى "عقلچ بيّ شي؟"
هُمام- صار اليسبح عنده شي؟

- وين چنت؟

زمخ بوجهي مخوفني من ردة فعله
هُمام- تحقيقققق هوَ؟ چنت عند ميار ارتاحيتي هسه؟ اششش ما يحقلچ تبچين ولا تنقهرين لان هذا الردتي أنتِ والبنيه عندها حق يمي ودا اقوم بواجبي لا اكثر

عافني جامدة بمكاني وراح للكنتور سحب
جنطة الشغل من فوك وبقى يطلع احتياجاته
كلامه صح اني ما يحقلي ازعل !!
تقدمت لازمه ايده موقفته عن الدا يسوي

- وين؟

هُمام- شغلي صار اسبوع هناك واسبوع هنا

- يمتى تروح؟

- الفجر اطلع

رجع يشوف احتياجاته
- هُمام اني اسويها اگعد

تنهد وعاف الجنطة ، راح فتح الشُبـاك
ورث جگارته وبقى يدخن عاقد حواجبه
يباوعلي بنظرات ما فهمتها
كملتها وحطيتها على جهة ، تقدمت بتردد
فتحت ايدي وگعدت على رجله حاوطت رقبته

- شلون اصبر على بُعدك؟

هُمام- مثل ما صابره على زواجي مَن غيرچ

أحَس بهتت مَن جوابه !! دا احاول اتناسى
كلامه قبل شوي وهوَ مُصر يذكرني
دار وجهة يستغفر واعصابه مشدودة رجع
سحبني حاضني

هُمام- اعتذر

ابتعدت
- دا اخاف هُمام

- ليش؟

- أحَس حَـتكسر گلبي! عليك الله لا تسويها تعرف ماعندي اهل وحاسبتك كل دنيتي لا تهدم عالمي

مَن احاجي وما يجاوبني اموت الف موته
حضنته ساده عيوني بقوة اتنفس عطره
حسرتي وجعت گلبي شلون اتحمل لو فعلًا
كسر گلبي؟!

- باچر يرجعون شلون تروح وما تشوف رنيم؟

هُمام- شغلي مجبور ان شاء الله مَن ارجع نعزمهم

- تمام

بقيت اليوم كُله ويا ما فارقته لحظة وحاولت
بجهد ابعده عن التلفون ويبقى بَـس ويايَّ
تناسيت وعشت ويا لحظات حلوة في سبيل
ما اخرب هذا اليوم تناسيت امر التلفون
ㅤㅤㅤ
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••

مسـرة•

- دمعة اني بالحديقة يم قسورة بلغي سارة

دموع- ماشي

عفتها وطلعت للحديقة بعد ما خابرني مبلغني هوَ منتظرني هنا
اباوع الحديقة فارغة توني ارفع التلفون
وعطت خايفة مَن حسيت بشخص يحضني مَن ورا

ضحك يدورني عليّ ويبوس خدودي
قسورة- مسرات رَوحـي

- خوفتني شوف گلبي عزا

- شو اشوف

يلزم جسمي الادبسز على اساس يشوف گلبي
بَـس هوَ تفكير غير اخلاقي
ضربت كتفه خازرته
- قليل ادب

قسورة- ربيني

- عوزي بعد اربي واحد مثل العمود

- هااااا مسرات هاااا خير!!

- عزا شبيك؟

- خلصنا مَن الطير المهلس وهسه عمود بطلي هاي السوالف لا اني اربيچ

شهگت
- قصدك اني ما مرباية؟

قسورة- منو گال؟

- أنتَ!

- يمتى؟

- قبلللل شويييي

قسورة- دخيلك يا علي شو ما اتذكررر

- ليش تعيط بوجهييي روح يا قسور يا ابن نجلاء أنتَ طالق طالق طالق

كمم حلگه يحجي مصدوم
قسورة- يعني هسه اني مُطلق ولازم الزم عده!

- اي يلـه روح لأمك

عض شفته بتلاعب وگرص خصري
- أنتِ امي

- بسيطة إلا اسولف لعمة نجلاء

- ما تبات بحلگچ سالفة

- لا يبقى يحكني

لمعت عيونه بطريقة ادبسز وقبل لا اعيط
او احذره ما أحَس إلا لزك بشفايفي شلعهن
شلع وخلاني ارافس مَن الخجل ومَن الوجع
عفية زلم چنهُم ما شايفين !!

ابتعد فحطان ويهمس
- اويلي مو بوسة ضيم

- أنتَ طالـ...

رجع يبوسني بقوة لدرجة أحَس بصدئ الدم
بحلگي وشفايفي انفخن
المخبل يبوس مثل الشافطه يشفطني شفط

ضربته عايطه
- اوووووي قسورة لك شفايفيييي

- ولد الناس لعبة بأيدچ واتطلگين يمتى ما عجبج

- سرسري

قسورة- وتموتين عليَّ

باوعتله بطرف عيني وتمشيت عايفته
ركض ورايَّ وحُضني يتمشى ويايَّ بهدوء
رفعت عيني عليّ
- ما حَـتسولفلي؟

- شنو؟

- منو هذاك الرجال وشنو يريد منك ترا خايفة ومَن يومها الكوابيس ما دا تفارقني

توقف اخذ ايدي بايسهن
قسورة- يخص شغلي القضية المستلمها يردوني اتركها

- اتركها خايفة يسوولك شي

- مُستحيل اعوفها قبل لا اكملها هذا شغلي مسرات شلون اعوفه؟ والامان بيد الله لا يبقى بالچ

- واذا صارلك شي؟ اموت اني ليش ما دا تفهمني

حضن وجهي بين ايدي وسند راسه على راسي
قسورة- يومي قبل يومچ حبيبي لا تفكرين ماخذ احتياطاتي

- دير بالك على نفسك قسور

- يروحلچ فدوة قسور

سحبني بحُضنه شگد حاولت اغير رأيه
بَـس رفض وغير الموضوع لـ زواجنا واكيد
هوَ مجهز كُلشي ومنتظر نحدد موعد مُعين

قسورة- نهاية الشهر شنو رأيچ؟

- ما اعرف اني أنتَ حدد

- خلص نهاية هذا الشهر علمود ارتب اموري واخذ اجازه بَـس..

- شنو؟

حمحم يعدل گعدته
قسورة- ما اگدر اخذچ ونسافر مسرات تعرفين الوضع مو تمام بَـس وعد مَن اخلص مَن هاي القضة نسافر وين ما تردين

حضنته سانده راسي على صدره
- مو مهم نسافر المُهم اكون يمك

- وتضوجين اذا ابوسچ! شلون الزم نفسي وهالشفايف ما تنطق إلا عسل

ضحك ورفعت عيني بعينه اباوعله
ضحك مثل الخجل وهز راسه
- شبيچ؟

- احبك

صفن ياخذله لحظة إدراك! بلع ريك ومسح
شواربه يباوعلي ويدور
تقربت بايسه خده وهالمرة اني رفعت ايدي
امسح شواربه الاحبهن واحب قصتهن

- مسراتك تحبك واكثر شي مهووسه بيّ شواربك التجنن

تقرب وهمس
- بوسيهن.. احم شواربي بوسيهن

ما ترددت لحظة وتقدمت طابعة بوسه
على شواربه واسمع تنهيداته بعدها ، تقرب
دافن راسه برقبتي من جوه الشال يطبع
بوساته على رقبتي
گرصت ايده وهمست صوتي يرجف

- ولك احنه بالحديقة

صارت اكتافه تهتز بدون صوت بَـس عرفته
دا يضحك واني عيوني تزرزر منا ومنا
خاف يطلعلنا شخص ويشوفنا بهذا الوضع
اليّ يخزي

ابتعد يعدل ملابس واخذ ايدي بين ايده
باسها وتمشينه راجعين للبيت
- شعجب اليوم مو بالشغل

قسورة- رحت واجيت

اختصر الجواب وعرفته ما يريد يحجي
سكتت ما لحيت
- باجر ترجع رنيم حيل مشتاقتلها

- اممم اني هم

- مشتاق لـ رنيم؟

قسورة- لا شسالفة بَـس مفتقد خالي مكانه فارغ

- صح

قسورة- تعاي اراويچ غرفتنا

ابتسمت متحمسة وفعلًا فتح البيت ودخلنا
اشر فوك
قسورة- الطابق الفوك النا كامل بيّ صحيات وصالة ومطبخ وغرف ثنين وحدة النا وحدة لأطفالنا بالمُستقبل

- وهنا

قسورة- هذا الطابق خاص بـ اخواني بيّ صحيات وصالة وتلث غرف نوم

- تحمست خلي نصعد

اخذ ايدي وصعدنا انبهرت بالبناء والالوان
قسورة- باچر اخلص شغلي مَن وقت ونطلع نشتري أثاث على ذوقچ أنتِ

- شعجب ما سويته أنتَ؟

- بيتچ هذا حبيبي وأنتِ گاعده بيّ اكثر مني واني ما اهتم ولا اعرف لهيچ سوالف

- احبببببببك

ضحك حاضني ودخلنا لغرفتنا
- الله تجنن قسورة حيل واسعة!

- اممم عدال غرفتين سويتها شوفي مفكر هناك بالزاوية هذيچ نسويلنا مكتبة وميز وكرسي همات تفيدچ بالدراسة وهنا نحطلنا تخم والسرير بهذيچ الجهة والكنتور هنا

- مفكر بكُلشي

قسورة- انطيچ رأيي وأنتِ بعد شوفي شلون ترتبينها

- اريييد مرجوحة

- هههههه خالي راح يجيب كم وحدة بالحديقة وگال اشد وحدة على الشجرة البره

- الله قسوررررر حَ اعيط مَن الفرحة

تقرب عيونه تباوعلي بوكاحة
- واني اگول نطلع لان دا افقد سيطرتي على نفسي وشيطاني دا يوسوسلي بأشياء اخليچ تصيحين الغوث منها

- فاااااااااااسق

- العايقة صوتها يرن رن اشششش اذا عليتي صوتچ املخ شفايفچ بوس وعلي

دفعته طالعة امثل زعلانه واني گلبي
يرگص مَن الخجل والخوف مَن كلامه
الجريء !!!!
طلعت اركض لبيت عمو هُمام واسمعه يصيح

قسورة- جهزي نفسچ مجرة

درت فاتحة عيوني وهوَ يضحك السخيف
- مجرة توگع على راسك كون گول امين

- وگعت وگعت

عرفت قصده درت وجهي راجعه واني اضحك
بلعت ضحكتي مَن فتح عمو الباب وصار
بوجهي رافع حاجبة
- هلاو

هُمام- هلا دخلي دخلي ابتلاء أنتو

- هاي شبيك ويايَّ عمو؟

- دخلي بابا دخلي وروحي غسلي

استغربت وبوجهي للحمام ، بقيت مصدومة
اباوع للمراية صرت الطم وابچي مَن الفشلة
الله يفشلك قسورة مثل ما خليتني بهذا الموقف ويا عمو هُمام
شفتي مشگوگه واكو دم يابس عليها
واللئيم قسورة ما نبهني واعرفه متعمددد

على وضعي ودخلت سارة منططه عيونها
ضربتني على ايدي وعاطت
سارة- طاح حظچ على هالسالفة يا حمارة

- معليَّ اني معليَّ هذا قسورة

سارة- ولچ گرصيها لا اطيح حظچ ادبسز بعدكُم ما متزوجيننننن

- اي اي اسفة والله بعد ما ابقى ويا

غمتني وطلعت ودخلت دموع السفيهة تتمضحك
خزرتها ، خلت وطلعت بدون ما تگول شي
غسلت وحطيت مُرطب على شفايفي
وطلعت اتختل مَن عمو هُمام بَـس غير
الحظ يجي ويايَّ لااا اول شخص شفته هوَ

غلست ودخلت للمطبخ وطبعًا ما خلصت مَن بسامير سارة طول اليوم
ㅤㅤㅤ
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••

رنيـم•

طايرة مثل الفراشة گد ما سعيدة ومرتاحة
اختيار كليم چان افضل اختيار اختاره بحياتي كُلها
راجعين مَن النجف لان اول ما رجعنا مَن اربيل
طلع لـ اربيل ومَن سألته جاوبني

- واعد صاحبي لو ربي تمملنا على خير اول ما نرجع مَن سفرنا نروح نزورا

وهسه هاي رجعتنا مَن النجف للبيت اباوع للدنيا بدت تصير غروب
حاضنه ايده بحُضني وهوَ يسوق بأيده الثانية

كليم- نعستي بابا؟

- لا بَـس تعبت مَن السيارة

- راح نوصل تحملي بعد شوي

تنهدت ساكته ما اشوفه إلا صف السيارة ونزل
- شكو كليم؟

دار مَن جهتي مبتسم رجعلي الكرسي وهوَ يجاوبني
- نامي ارتاحي حبيبتي مَن نوصل اگعدچ

رفع رجلي ونزعني حذائي
سد الباب ورجع بمكانه واني التعب اخذني
نمت بسرعة بَـس بين النايمة والگاعده اسمعه يحجي بالتلفون

كليم- لا تخبصني لويث ، ههههه فد ساعة واوصل ابني ههههه يلعن ابليسك والله ما غيري مُضطهد ابو لسان ، سده لك دا اسوق مَن اجي نسولف ، الغالية لا اني ما اشتهي بَـس خاف رنيمه جوعانه حسبي حسابها

سداه يضحك
مغطت جسمي اباوعله
كليم- صح النوم بنياتي

- چنت تحجي ويا لـيث

كليم- اي لان تأخرنا اتصلوا

ميلت جسمي عليّ سانده راسي على كتفه
دوخة النومه بعدها براسي مسطورة سطر
تثأبت
كليم- آميرتي

رفعت راسي اباوعله مبتسمة مثل الثوله
كليم- صغيرتي الميت بيها

- اني همات احبك

رفع ايدي وطُبع عليها بوسة
بقى طول الطريق ساكت عقدت حواجبي
زعلان مني؟ هوَ بَـس مَن يزعل يبقى هيچ
ساكت بَـس ما اتذكر زعلته اني! بلعت ريك

- أنتَ زعلان مني؟

باوعلي لمحة سريعة ورجع عينه على الطريق
كليم- اني؟ لا حبيبتي

- لعد ليش ساكت؟ مدا تحجي ويايَّ؟

كليم- لا بنياتي بَـس فد سالفة شاغله بالي

صار يحاول يطلع مواضيع ويسولف ويايَّ بَـس همات فترة ورجع شرد وسكت
عرفت الموضوع ما يخصني وبعد ما لحيت
عليّ وشاركته الهدوء وبَـس ايدي تلعب بأصابعه
وساعة اطلع الحلقة وارجعها

- أنتَ ليش ما تلبس اربع حلقات؟

- وليش حتى البس اربعة؟

- علمود محد تتقربلك وعبالهن متزوج اربعة ويقطعن الامل

ضحك مَن كُل گلبه ويهز راسه يأسان
- دا احجي بشكُل جدي

كليم- محد يهمني غيرچ يا صغيرة

- اممم همات عندكُم ضابطات وهيچ ويشتغلن وياك هففف لا تضحك جاوبني

هز راسه وجاوبني مسايرني
كليم- اي بابا اكو

- يشتغلن ويـاك؟

كليم- يعني

- ما فهمت

- يعني حسب الشغل مرات اي ومرات لا بَـس اغلب شغلي مو وياهن

- حلوات؟

- مو احله منچ هذا شي اكيد

حسيت بحرارة تغزوا خدودي واني اتلمس اصابعه
- بَـس حلوات !!

كليم- ليش اكو بنية مو حلوة؟ ماكو كُل البنات حلوات وكُل بنية عندها ما يميزها عن غيرها

- وشنو يميزني اني؟

- كلچ مُميزة بالنسبة اليَّ

- الله عليك سولفليييي

كليم- عيونچ اموت عليهن مثلًا بالتقاطع لو بَـس شايف عيونچ چان عرفتچ مُستحيل اضيع بيهن
اضيع الدنيا وما اضيع عيونچ ، اسلوبچ مو يم عمرچ وهذا الشي مريحني هواي وشايل حمل عن ظهري

- شلون يعني

صرنا قريبين على البيت وجاوبني
- المقصد أنُ عمرچ عمر مراهقة بَـس أنتِ ما دا تتصرفين ڪ مراهقة وانما بوعي وحذر لطيف هذا الشي حابه ومتولع بيّ

- أنتَ السبب

- اني؟

- تربيتك اكيد اكون هيچ

ضحك وكرص خدي ، وصرت اشوف مَن
بعيد بيتنا
تحمست وصرت اضحك طايرة مَن الفرح
لان مشتاقه للكُل بدون استثناء ، بَـس
ضرب هورن انفتح الباب وطل لـيث يضحك
للهوى الطاير وهوَ يعيط

لـيث- توه نور البيت والعباس ابو فاضل

بَـس دخلنا وسد الباب استلم كليم حُضن
وبوس لزك بيّ مو قابل يعوفه وكليم يموت
عليّ بحيث مبادله برحابة وبدون ما ينزعج

ركضت حاضنه خواتي تلاثتهن سوه
وعمة تهلهل وتطش چُكليت
رحت اسلم عليهُم واباوعله بنته بحُضنه
ولازم امه يبوس براسها وساعة بأيدها
تقربت بست ايدها بسُرعة سحبت راسي
وطبعت بوسة قوية على خدي

ام كليم- مهنايين يارب دوم السعادة واشوف حضنك متروس باطفالكم

باس ايدها
كليم- فدوة لدعوتچ حجية

دخلنا جوه وابد ما تركت خواتي وسارة كُل شوي تبوس راسي لو خدي
ناقصني وجود خالو !! كليم التهه ويا بنته
وامه
شوي وگامت عمة هي والبنات يمدن السُفرة
ورفضن رفض قاطع اساعدهن لذلك غيرت مكاني وگعدت بصفه
وفاجأني مَن حاوط جسمي لـ صدره

خجلت مَن ولد عمة نجلاء وبيبي اليّ
ابتسمت على حركته
بَـس هوَ غلس وعبر الموضوع عادي
مديت ايدي وگرصت خدها لـ ريم

- شلونها الحلوة

ريم- ذينه

ضحكت على لفظتها ومديت جسمي بايسه خدها
مَن ابتعدت لگيته يتأملنه بـ ابتسامة
مسح على راسي وهمس

كليم- جوعانه؟

- شويه ومشتاقة لطبخ البيت

تنهد
كليم- اني تعبان بَـس اريد اسبح وانام مَن تخلصين صعدي

- اريد ابقى يم خواتي

كليم- اريد انام بابا وما اگدر بدونچ

رفعت اكتافي
- اخذ ريم فدوة كليم

ذب حسرة وشال بنته بدون ما يجاوبني ترخص منهُم وصعد
طلعت عمة تدوره بعيونها

نجلاء- يااا لعد وين كليم؟

- تعبان يريد ينام

گعدنا كُلنا ، اكلت شوي وابتعد لان شبعانه
تقربت سارة مني
سارة- شعندچ باقيه؟ لحگي زوجج امي

- اريد ابقى يمچن مشتاقتلچن

ابتسمت
- والله احنه اكثر بَـس صار لازم تفهمين أنتِ هسه امرأة ومتزوجة ومسؤولة مَن زوجج والمفروض تلحگينه احنه ما طايرين عيب تبقين هنا

- تمام صاعده وباچر الصُبح اجي يمچن

هزت راسي واني ترخصت وصعدت فوك
فتحت الباب على كيف بَـس بسُرعة فز
رفع راسه وبَـس شافني ابتسم ، چان منوم
بنته على صدره وواضح سابح ومكمل

شالها وطلع موديها لغرفته استغليت عدم
وجوده وبسُرعة دخلت للحمام سبحت وبدلت وطلعت
چان گاعد على السرير ويمه المشط
ضحكت وركضت گاعده گدامه بوس خدي وشعري
وبلش يجففه وبعدين يسرحه
كمل وسحبني بحُضنه ونمنه نومه عميقة
ㅤㅤㅤ
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••

مسـرة•

مر الاسبوع مثل البرق عليَّ مو حاسة بيّ
طايرة مثل الفراشة واني اسوي بـ أثاث
بيتي وعلى ذوقي والحلو قسورة ابد ما يتدخل
ومخليني على راحتي ومَن اريد اخذ رأيه
بشي يجاوبني

قسورة- بيتچ هذا اختاري على ذوقچ

وفعلًا چان كُلشي على ذوقي بَـس الالوان
اخذناها حيادية لان لو بقت عليَّ اخذها
لون بنفسجي لان احبه !! صار لون غرفتنا بُني وابيض تموووووت ودخلت عليها الذهبي بالستائر والتيبلام الاشياء النواعم صارت ذهبي
وطلع التنسيق يشك شك انبهرت بيّ
وفعلًا سوينه بيها زاوية مكتب لدراستي ولقراءة الكتُب لان حسب كلامه هوَ يحب ودائمًا يقرأ

الصالة فرشتها رصاصي وخليت التخم بلون الرصاصي والماروني والستائر ابيض يموت

بقى تجهيزي وهاي الاشياء نبلش بيها مَن باچر ويا سارة الما قبلت تطلع منا لمن يرجع عمو هُمام
الصادف اليوم نزوله وسارة چانت حيل فرحانة
تجهز الاكل اليّ يحبه لان گللها اوصل الصبح

بقت واگفه بباب المطبخ وعينها على الباب الخارجي
تنتظر جيته
ومرت الساعة والساعتين والثلاثه وعبر
وقت الغده ، دارت تباوعلي والغصة واضحه ببلعومها

سارة- تغدي أنتِ واختچ امي اني انتظر هُمام

اكلنا بَـس شوي وبقينا حاطين ايدينا على
خدنا وصافنين بيها شلون تلوب وتتصل
والدمعة بطرف عينها

دموع- برأيچ ليش تأخر؟

- ما اعرف

طلعنا على صوت البوابة تنفتح
نزل يضحك مَن طلعتله رنيم تركض مَن
بيت كليم ، شالها بحُضنه يبوس بيها
ويضحك

سارة- الله يساعدك

لمحها بطرف عينه ورد
هُمام- هلا

بهَتت تباوعله وهوَ اخذها سوالف وضحك
ويا كليم ورنيم
سارة- حَ اجهزلك اكيد جوعان!

هُمام- اكلت لا تتعبين نفسچ

سارة- وين؟

باوع على عمو كليم وحمحم يجاوبها
هُمام- رحت اشوف ميار خاف محتاجة شي وتغديت هناك

كُلنا انظارنا صارت على سارة الصار وجهة
اصفر وعيونها انملن دموع رافضات ينزلن
انتبهت على ايدها الرجفت وحتى تخفي
رجفتها حطتهن ورا ظهرها
نزلت راسها ورجع رفعته وظهرت ابتسامة
مُزيفة وهي تگول وواضحة الغصة بصوتها

سارة- الف عافية

انسحبت ظهرها محني ومكسورة خاطر
رجفت شفتي ومنظر سارة الاول مرة اشوفها
بيّ حطمني سارة القوية انحنى ظهرها بسبب
الانسان التحبه وتموت لأجله !!

شهگت وتقدمت مفرفحه
- صااااارلها مَن الصُبح تجهز بالغدا علمودك طبخت كُلشي تحبه وطايرة بالبيت مثل الفراشة ومنتظرتك على أحر مَن الجمر باااوع الساعة صار العصرر وأنتَ ببساطة تجاوبها هيچ وتكسرهاا

سحبني قسورة بحُضنه بعد ما صرت اشهك
مقهورة عليها وما طايقة عمو هُمام باوعت
لـ قسورة وحجيت واني اشهك واغص بشهگتي

- لحد الان ما اكلت منتظرته وشوف هوَ شلون يحاجيها قسورة هاي سارة هاي اميييي

قسورة- اششش حبيبتي

رنيم- چنت منتظره رجعت ومشتاقتلك بَـس هسه تندمت

دموع- عمو كليم عادي ابقى عندكُم مو؟

كليم- احم هلا بيچ بابا

- اني همات اجي وياچ تعاي ناخذ اغراضنا

بقى عمو هُمام يبلعم وتوتر مَن الصار
وعمو كليم الخزراته لو تقتل چان مات عمو
هُمام گد ما خزره وهزله راسه بمعنى "بسيطة"

اخذت كم شغلة مُهمة وصعدت داگه الباب ودخلت بعد ما سمحتلي
عيونها حُمر وجسمها يرجف شنو مَن حُب
مخليها صابرة على الدا يصير لحد الان !!!

- رايحين اني ودموع لبيت عمو كليم

اجت حضنت وجهي
- ليش امي؟

-اذا أنتِ تتحملين تصرُفات عمو هُمام اكثر اني مو گادره اتحمل ولا اريد اقلل ادب ويا ولخاطرچ مو لشي ثاني

دموع- كرهته

سارة- اششش عيب امي عيب شنو هذا الكلام

- هذا الكلام بسيط يم كلامه وجرحه الچ گدام الكُل

دموع- صح ما اگدر ابقى بعيده عنچ بَـس رايحه هناك لان فعلًا كرهته

سارة- ارتاحوا واني اجي ارجعكُم

دموع- ما ارجع بعد

راحت دموع بدون ما تنتظر جواب مَن سارة
واني قبل لا اروح ضفت
- ولا اني ارجع بعد اصلًا زواجي ما بقى عليّ شي وماكو داعي ارجع

طلعنا عايفين سارة ورانا بَـس غصب والله
لان تصرُفات عمو لا تُطاق وياها وهي تعبانه
والقالقني عليها عندها صرع وعلى اي
ساعة توگع ومنو يفيدني؟ عمو هُمام؟

طلعت الدمعة بعيني چانوا واگفين بالباب
وواضح عمو كليم معصب وينتر بوجهة نتر
ومَن شافني سكت يستغفر

هُمام- دخلن بابا صدك تحجن؟

ابتسمت بقهر وجاوبته
- تعرف من چنه عند سُعاد سارة تتعرض للضرب والأذية في سبيل ما نتأذه احنه وتتحمل كُلشي علمودنا وهسه دا اشوف نفس الشي أنتَ بدال ما تضربها دا تكسرها بكلامك وماكو فرق أنتَ مثلهُم ما تفرق عنهُم شي

مسحت دموعي وكملت
- هي تقبل مَن حُبها الك بَـس احنه ما نقبل ولا حَـنقبل على سارة الدا تسوي أنتَ

عفتهُم ومشي شوي وحسيت بشخص يلزم
أيدي رفعت عيوني على قسورة اليّ رفع
أيده وصار يمسح دموعي بلُطف

قسورة- تصير هيچ امور عادي !!

- مو ويا سارة كافي اليّ بيها

هز راسه وبقى طول اليوم ويايَّ شگد حاول
يغير مزاجي التعكر بَـس ما گدرت
رنيم بقت زعلانه مَن خالها رُغم چانت
مشتاقتله ومتحمسة تشوفه شگد ما
انكسر واهسها
وانكسر واهسنا بكسرة خاطر سـاࢪة
ㅤㅤㅤ
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••

هُمـام•

جگاره ورا جگاره منتظر كليم يخلص رزالته
انفتح وما يقبل يسكت واعرف حقه وحقهُم
بَـس محد دا يفهم بشنو افكر اني
قابل زعل سارة هين عليَّ؟ لا بالله انمرد
مرد عليها

كليم- أنتَ ما تستحي مَن تجيب طاري بنت اختي الطلگتها وتحجي بهاي الاريحية؟ يابه مرتك مريضة تريد تموتها أنتَ بَـس فهمني شنو بعقلك مطيييي!!

- سارة اذا ما تطلع منها كلمة الطلاك ما تفك ياخه مني وتزوجني بدل الوحدة تلاثه حُرمتي واعرفها

- يعني؟

- مجبور اوهمها بهاي الاشياء وحق علي ابا الحسنين مجبور اكسر خاطرها علمود نبقى سوه وما تطلعلي بعد فترة تعال تزوج ونعيد نفس السناريو اني رجال ما دا اتقبل غيرها وهي العنااااااد يمشي بدمها على هذا الموضوع

كليم- وابقى ضام عن رنيم؟ تعرف ما احب اكذب عليها ليش تجبرني؟

- هااا عرفت وجعك

هزيت ايدي ، بطران اني وين وهوَ وين يفكر
رنيم بَـس تعرف تروح تغردلها وسارة مَن
تعرف توگفلي تك رجل تعال تزوج
مخبل واخليها تعرف قبل لا احقق مُبتغاي
لا والله اذا ما اخليها تغرد مَن الغيرة وتصيح
توبه اذا زوجتك ما اطلع ابو الهَمم

كليم- ما عاجبك كون؟

- لا

كليم- عساك لا انعحبت ما يهمني اهم شي رنيم ما تعرف مَن غيري

- ارجفففف بعد ارجفففف عليها كليم وليرحم والديك ولي مَن وجهي

كليم- إلا اسولفلها

- حتى اشگ حلگك

- العار

عافني وراح ضايج هزيت ايدي هوَ اني
ناقصني كليم يزعل وتكمل
دخلت للبيت مَن باب المطبخ وشفتها گاعده
تاكُل بهدوء واصلًا ما دارت رُغم سويت حركة

- احمم اريد غده

باوعتلي بطرف عينها تعرف شلون تنرفزني
اشرت بلا مُبالاة وجاوبت

سارة- هذاك صُب لنفسك

رفعت حاجبي وبقيت ساكت اخر شي
اخذت خاشوگه وسحبت الكرسي گاعد
يمها وبلشت اكل وياها
ما اشوفها غير عافت خاشوگتها وگامت
تاركتني وحدي ، فركت وجهي مقهور منها وعليها

ما حبيت اضغط عليها بَـس مو بيدي لذلك
عفت مكاني ولحگتها لگيتها تسبح وصوت
الماي واصلني شوي وطلعت بالبرنص
غير تبطل تحرگني بهيچ سوالف لا هي تزيد
مَن ما نتحاجه وتمردني مرد

- سارة

باوعتلي وهزت راسها بمعنى "شكو؟"
تقربت منها اباوع بعيونها حمر وواضح
هالكة نفسها بالبچي وهلكتني مَن عرفت
هالدموع اني سببها !!

- تعرفين احبچ مو؟

هزت راسها موافقة كلام وهذا الشي خلاني
اتقرب واحاوط خدودها بين ايدي واكمل

- وكُلشي صار فهو بسبب اختياراتچ وقراراتچ

غمضت عيونها وكأنوا الكلام وجعها بَـس
هاي الحقيقة مع الاسف
سحبتها شوي شوي بحضني ما ردت اخوفها
مني وتنفر وهذا الشي جاب نتيجة لان
سارة عصبية واني عصبي واي كلمة غلط
مني او منها نأذي بعض

گعدتها وسحبت المشط مَن ايدها وگعدت
اسرح شعرها واحاول اسولف وياها بهدوء

- ما يهلي وروح العزاز ما يهلي زعلچ ووجع گلبچ بَـس مجبور ومن ايدچ

سارة- مجبور تحبها؟

- مجبور اعدل وياها اضحك واسولف وامر وألبي احتياجاتها مجبور اذا اتصلت اجاوب واحجي حتى لو ما عندي واهس خايف اغضب ربي بيها علمودچ أنتِ وبسببچ أنتِ

- گُتلك كُلشي اقبل بيّ إلا حُبك ما اسمح نتشاركه اني وياها

- ما حابها

سارة- هذا مُجرد كلام !! بَـس سوالفك وياها وضحكك وراحتك وأنتَ تخابرها كفيلات بمرور الوقت يخلنها تدخل گلبك

ابتسمت يعني واصل المُبتغاي! تنهدت بدون جواب

سارة- دا تكسر گلبي مَن تسكت

- ولو حجيت الكسر يكون اضعاف خليني ساكت

رفعت عينها تباوعلي ، حالة الضياع بعيونها
تخبلني چانت اريد اگعد اسولفلها بَـس
اعرف طگه ونص عقل ماكو تتخبل عليَّ
وتوگف تك رجل علمود تزوجني وهالمرة
ما اتحمل ولا اصبر وما تكون ردة فعلي
نفس اول مرة خايف عليها مَن نفسيّ

- تنامين بحضني؟

دفعتني وگامت
سارة- ما اريد مشاكل هُمام بموافقتي أنتَ متزوج واني متقبله الموضوع الله يخليك لا تعاملني بأسلوب سيء وتحاول تهيني گدام الكُل

- اعتذر

- احاول اتناسى الموضوع بَـس لا تضغط عليَّ وابتعد ما عندي طاقة ادخل بحديث وياك

عافتني وطلعت شفايفها ترجف ، فركت
وجهي وهمست
- عيني يا ابا الحسن تعبت والله

هزيت ايدي ونزلت ما تريدني اضغط عليها
بنت المسيح ما تعرف اذا افصل اگعد اقسملها
فتحت باب الغرفة الثانية بدون ما ادگه
صرخت تغطي بنفسها

سارة- هُمااااااااام اطلع اطلع

- اشش لچ

- اطلللع خلي ابدل

- شحال لو ما كل ليلة بحضني؟ تقنعيني خجلانة؟ عمومًا تبدلين والگاچ مزروعة بالمطبخ

طبگت الباب وطلعت صبيت مَن جديد اريد
اشوف شلون تبقى بدون اكل
رتبته على الميز وهي دخلت عاقدة حواجبها
وعيونها تباوع بتعالي الحيوانه

- گعدي

- ترااا شبعاانه الاكل مو اجبار!

- تگعدين لو اگعدچ بطريقتي؟

تأفأفت تهمس بَـس سمعتها
سارة- امري لـ الله

- غصبًا ما عليچ ويلـه گدامي خلصي ماعونچ اريد اكل لا تعبيني

- مو ماكل؟

- وجعتتتتت

ردت افصم ظهرها مَن رددت جوه انفاسها
سارة- جوع الربوع ابو الدكتورات يموت على النسوان

خزرتها بسرعة نزلت راسها وبلشت تاكل
مبينه جوعانه !!
واني ما گدرت اقاوم وخصوصًا طبخها
شي خيال يفتح النفس ، واكل المطعم
ما عجبني هواي وما اكلت إلا شي قليل

- اخذتي علاجج؟

- لا

- خلصي واخذي اليوم توترتي هواي لا يصيرلچ شي

سارة- الفضل الك

- فصلي كافي انسي الموضوع لو اليوم ناويتها عليَّ

- سكتت

گمت شبعان صعدت جبت علاجها وهمزين
بيّ نسبة منوم يخليها تنام وترتاح مَن تفكيرها
نزلت والگاها ترطن وحدها عليَّ منزلتني
دوسة ونص الحمد لله توني اعرف نفسي
واحد قليل ادب وما عنده اخلاق لهاي الدرجة

سارة- الصلف ابو النسوان يرجف رجف عليهن يا دكتورات يا حلوات يدورهن بالحظ يا نصيب

- لااا لچ اخر وحدة اختيارچ ما اسمحلچ تحطينها براسي

خزرتني ونترت
- وأنتَ صفگتلها !!

فتحتلها العلاج بعد ما تأكدت مخلصة
- غير مرتي حبيبتي رايدتها وما احب اخلي شي بنفسچ

- لااااا تستفزنييييي

- نطقيها وخلصي

- مااااا

- طبچ عرج اخذي علاجج وولي نطمري لان بديتي تخربطين

اخذت العلاج وصعدت تزاگط خرب حظها ضحكتني
اخذت تلفوني وطلعت اشم هوى
شوي واجاني اتصال مَن صديقي اخذتني السوالف ويا والضحك ما حاس على نفسيّ

هناك وارفع راسي وجمدت اباوعلها واگفه
بالشبـاك وعيونها تتبعني
هالمرة ما چنت متقصد وكتاب الله كل ضنيّ
نامت لان علاجها ينوم
شلون ما كان سلمت وودعته ومَن شافتني
نزلت التلفون ابتعدت

- مو گد هذا الحملّ يا الله ساعدني

غيرت طريقي على بيت كليم ما عندي بعد
اي طاقة للموضوع
رحبوا بيّ وكالعادة كليم ما يگعدني إلا ويا العائلة
بَـس البنات مَن شافوني طلعن بدون سلام

كليم- شصاير؟

- خايف تصيرلها نوبة الصرع وبنفس الوقت ما اگدر اگلها اني طلگتها وضايع

- البنات من اجوا لحد الان الدمعة بطرف عينهُم هُمام ما يهون عليَّ زعلهُم ادخل واشرحلهُم وما دام الموضوع لصالح سارة صدگني يوگفن وياك

- ما عندي طاقة

تنهد وصاح
كليم- رنيمه حسبوا حساب هُمام

- اشش توني كلت ويا سارة وما اشتهي

كليم- على واهسنا معليك

رفعت عيوني عليهن مَن دخلن يحطن السفرة بَـس ما يباوعن عليَّ
كليم- ليش السفرة صغيرة؟

رنيم- اني وخواتي ناكُل بالمطبخ

هزيت ايدي واني راسي مصدع
- ما يحتاج بابا گعدي أنتِ وخواتچ يلـه حبيبي اني اترخص

عفت البيت وطلعت ما مهتم لصوت كليم
ما ناقصني هم وواضح شاداتها ويايَّ
ويا خوفي اقسى عليهن لذلك فضلت ما
ابقى

ويا طلعتي صادفني لـيث
اخذته ورا البيت علمود احجي ويا براحتي
لـيث- صاير شي خالي؟

- هاي الرسائل اريد تدزها اليّ بالليل كلش كون بعد الوحدة

- شنو هي؟

دزيتله الرسالة اباوعله فتح عيونه
لـيث- خالي كليم يشگني شگ لو عرف

- ما يعرف

لـيث- وعلي يشگني

- كأنوا أنتَ عاجبك تنشگ؟

ضحك السخيف وجاوب
- لا وعلي ما اريد

- استغفرالله لـيث ركز ابني ضروري تدز الرسالة

لـيث- خالي ثگيل الكلام لا تسويلك مصيبة!

- تعلمني أنتَ؟ سوي الگتلك عليّ انتظرك واذا ما سويته اني اشگك

فهمته شلون لازم يغير الصورة وبعض التفاصيل علمود تكمل السالفة
عفته ورجعت للبيت تحسرت واني أحَس
بكأبة البيت وبرودته
اتجهت للغرفة وشفتها نايمة !! مددت بمكاني وفتحت التلفون على گروب الولد
وهذا السخيف قسورة وين مسرة عنه؟
شنو هذا الاستهتار بالمنشورات المحولهن

كتبتله
- احذفهن لا تعرف لمنو احولهن وهي تحولك لربك بدون سؤال

رجعت للگروب واشوفهن نحذفن ضحكت
ورجع على الخاص مَن دزلي
قسورة- لا استر عليَّ الله يستر عليك

- شكبرك تصير وتعوف سوالف السرسرة هاي؟

قسورة- بَـس تحجي المسرة عندي صور قديمة الك والله ادزهن لمرتك اخليها تشوف تاريخك المُظلم

- وتعرف شسوي؟ ***

دزلي ضحك طايح الحظ وطفر
ضحكت على سوالفة وشمرت التلفون ناسي موضوع الرسالة ولـيث مَن التعب
نسيت حتى اهلي ونمت

هنـاك وبين النايم والگاعد حسيت بأصوات صريخ
بعيدة
فتحت عيوني والاصوات شوي شوي بدت تتوضح
هذا صوت رنيم تصرخ !! هذا مو حلم !! اباوع على
جهتي سارة ماكو؟؟

..

وتستمر الحكاية.. 🚬♣

قناة التلي zainab_salah0