بقلمي : زينب صلـاح 🧡
لـ روايـة ﴿ دروب الإندِثار ﴾
في الـ part 42 ♡♡
لا تنسون التصويت + متابعة للحساب + التعليق بين الفقرات ☘️
" انا احَبك مِن طَرف واحَد صحيح
بَس امُوت عَليِك مِن كُل الجَهات ".
- جبار رشيد
•••••••••••••••••••••••••••♕•
2/14 يوم العرس
- فتحي عيونچ حبيبتي
بعد ما همستلي بيها أُم الصالون سامحتلي
اشوف الشكل النهائي الوصلت اله
فتحت عيوني وشوي شوي اتسعت ابتسامتي
مبهورة بشغلها ولمساتها الحلوة المُميزة
همست اعبر الها عن رأيي بشغلها
- شغل مُميز
ضحكت وهي تربت على اكتافي
- وبنوته مُميزة بهاي العيون الحلوات
- لو عدسات مو احسن
سارة- كليم شنو گال؟
- ما مرتاحه بشكلي
جاوبتني أُم الصالون
- اني لو عندي هاي العيون اخلي الما منتبه ينتبه على جمالهن وأنتِ محتاره شلون تخفينهن عمي والله بخت
سارة- ينطي جوز للما عنده سنون سُبحانـك ربيّ
ابتسمت ساكته قابله بالأمر الواقع كليم مَن
وصلنا الطريق كُله يحذر ما احط عدسات
لان فاهم شنو براسي والبنات الموجودات
بالصالون انبهرن بيهن وسارة رافضه لان
كليم حلفها ما تخليني احط عدسات
يمكن هوَ يحب عيوني اكثر مني
لدرجة ما يمر يوم وما يبوسهن !!
وهي تساعدني البس البدلة سألتها
- شلونها علاقتچ أنتِ وخالو؟
ابتسمت بطرف شفتها وجاوبت
سارة- مثل الغريبين المجبورين يعيشون سوه
- وتبقون هيچ؟
سارة- ما يباوع بوجهي رنيم الغرفة اذا اصعدلها ياخذ مخدته وغطاه وينزل ينام بالصالة
- لازم تخلينا يسامحچ قبل لا احم يتزوج فعلًا هوَ وميار
غمضت عيونها بنفاذ صبر
سارة- دا احاول بَـس هوَ يصدني ما طايقني
- ميار تعيش ببيت مُنفصل لـ...
قاطعتني بذعر
سارة- لااا اكيدد يبقون گدام عيوني مُستحيل اقبل بهذا الشي
- اهدي سارة
- اذا ابتعدوا اخسره بشكل كامل ، رنيم ما عندي غير هُمام اني اذا خسرته انهار اموت
- خالو يموت عليچ
- هه واضح
سكتت مقهورة على وضعهُم وخفت على سارة
لو عرفت خالو مقرر يگعد ميار وحدها شنو
ردة فعلها؟
نسيت الموضوع مَن گالت وهي تضحك
سارة- ما اشوفچ خايفة
دمعت عيوني
- بلي خايفة بَـس اعرف كليم ما حَـيجبرني على شي ما اريده ولا يأذيني
- اطمئني لعد
شوي وصاحولنا ينتظرونا بره ، ساعدتي سارة
وبَـس عبرنا الصالون حاوطني شخص ومَن
عُطره ومحبس ايده المُميز عرفته هذا كليمي
ساعدني اصعد اني والبدلة مالت الاميرات
وبدون ما احجي لازم تعرفون ذوق منو؟!!
صعد قريب مني ورفع الكبوس مَن راسي
ابتسم وضحك بصوت حلو
تقرب وطبع بوسة على جبيني وگال بهيام
- ما شاء الله جميلة بشكل اخذ ما تبقى مَن عقلي وگلبي
- وعيوني
كليم- يموتن اليوم للصُبح اباوع بيهن ممنوع النوم
حسيت بحرارة تكتسح خدودي
گرص خدي خفيف وشغل السيارة منطلق
للقاعة كُلشي چان مثالي ، شوي ووگفت
السيارات وقبل لا اسأل عن السبب كممت
حلگي اضحك
واني اشوف قسورة طلع يردح بنُص الشارع
هوَ ومجموعة مَن الشباب نُص لابسين عسكري
ونُص رسمي
كليم- لااا يا ساق* هاي اني محذرة وهيچ لو ما محذره شلون؟
- هههه خليهُم متونسين
رفع حاجبه
- عاجبج الوضع صغيرتي؟
هزيت راسي بـ اي
كليم- تونسي لعد
بقينا نباوعلهُم ونضحك وحتى كليم شگد دگوا السيارة يردونه يطلع وياهُم ما نزل ولا
جاوب اتصالاتهُم علمود لا ينحرج وهُما محد
فتح باب السيارة احترامًا اله ولوجودي وياه
شوي ودگلهُم هورن بسرعة رجعوا كُل واحد
لسيارته وانطلقنا نكمل طريقنا للقاعــة
رُفع كف ايدي وعلى طول الطريق يبوس
بيها وماخذ راحته لان السيارة مُظللة
ومحد يشوف
كليم- اليوم اول يوم مَن عُمري يا ثالث فرحتي
- ثالث؟ لعد منو الاولى والثانية؟
- الاولى ولادة ريم والثانية يوم لگيتچ وهاي الثالثة أنتِ عروستي وحُب حياتي
كل عُمري الفات وأنتِ ماكو چذب عُمري بلش بيچ بيوم دخلتي حياتي وتوقف مَن اختفيتي ورجع برجعتچ
- نيالي بيـك
- ويا حظي بيوم الحبيتيني
هالمرة اني اخذت ايده وبستها وصرت امسح
الحُمرة منها وهمست
- بيوم اختطاف ريم اكتشفت اني شگد احبك
- وكليم يموت عليچ
صف السيـارة ، تقرب طُبع بوسة على جبيني
ولبسني الكبوس وصار يغطيني بحذر
ساعدني انزل ووصلني للبنات يلـه راح
ㅤㅤㅤ
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••
سـارة•
رتبتها وهي ترجف مثل السعفة شگد ما خايفة
وعيونها غائره بالدموع ، شارده بالتفكير
بالها مو ويايَّ واني ارتب تسريحته ومكياجها
- رنيم!
فزت تباوعلي وهي تبلع بريگها
- ها هاا
- ليش ترجفين امي؟
رنيم- خايفة سارة مشاعري مخربطة كُلش ما اريد اكمل واريد بنفس الوقت محتاجة وجوده بَـس خايفة مَن المُمكن يصير بيناتنا هاي الليلة
مررت ايدي على ايديها احاول ابث شوية
طمأنينة بداخلها عسى ولعل ترتاح ويخف
التفكير !!
- وصفيلي كليم
- شلون؟
- وصفي اليَّ حسب نظرتچ
شتت عيونها للحظات وهمست
- لطـيف حنون وكُلش طيب اي شي يحبه او تربطه بيّ صلة قرابه يداري ويحطه بعيونه
هادئ مو انفعالي يحب بكُل المشاعر العنده
ويداري اليَّ يحبهُم بل يحطهُم بعيونه
ابتسمت وهي سُكتت
- برأيچ هذا الرجُل الوصفتي بهاي الكلمات مُمكن يجبرچ على شي او يأذيچ بقصد او بدون قصد؟
- لا
- الموضوع وراچ وراچ الى متى الهروب منه امي؟ كوني واثقة بشريك حياتچ كوني واثقة مَن كليم وتركي كُلشي عليّ
رنيم- هيچ رأيچ؟
- اكيد لا تخافين
شفت الدم يرجع لوجهة ومسرة اجت بلغتنا
كليم راح يدخل علمود دخوليتهُم للقاعة سوه
شجعتها ببعض الكلمات وطلعت يلـه هوَ
دخل عرگان ويرجف ، ابتسمت على حالتهُم
الاخ وضعه اسوء منها
گعدت بالمكان المُخصص النا وجمدت عيوني عليها
هاي ميار؟ اريد ارمش اريد اغير مكان
نظراتي ماكووو !! زينتها وجمالها هذا
يشوفه هُمام؟ زوجته هيَّ !! اني شلون بيَّ
گلبي شلون يتحمل؟
رفعت عينها تضحك ويا اختها وشافتني
اتسعت ابتسامتها
ما اعرف شنو همست الهن وتقدمت الـيَّ
نزلت عيوني وحاولت ادورهن بكُل مكان
تمنيت تفهم ما اريد احجي وياها بَـس لا
وگفت يميّ وهمست
ميار- شلونج سارة؟
- عايشة
ميار- نگدر نحجي؟
هزيت راسي وگمت وياها چانت اكو طاولة وكراسي فارغات
گعدنه بالبداية بقينا ساكتين هي تفكر
شلون وبأي طريقة تفتح ويايَّ الموضوع
واني عقلي حَـينفجر مَن كمية التفكير
ميار- تعرفين منو اكثر شخص احبه بهاي الدنيا وما يوم حلفت بيّ چذب؟
رفعت راسي واكتفيت بنظراتي الها لذلك
ابتسمت وضافت
- جُنيد ، صح احب امي واحب لمار بَـس جُنيد غير هذا اخويا وابويا وصديقي وكُل عائلتي
- يعني؟
- وداعت جُنيد عندي احبچ واحترمچ واقدرچ وما اريد الچ ضرار وهذا مو بَـس
كلام بالمُستقبل حَ أثبت الچ صحة كلامي
- اريد تثبتين هذا الشي هسه
ميار- شلون؟
- هُمام يريد يعزل بيت وحدكُم
غصيت بكلماتي ، اخذت منها لگلاص وشربت الماي احاول اتنفس واكمل
- رفضي ميار ثبتي نيتچ صافية اتجاهي ورفضي تاخذينه واطلعين بيت وحدكُم
ميار- وعد ومعزة جُنيد عندي ارفض
گمت اعدل فُستاني وحجيت
- اذا ما رُفضتي اعتبره بداية حرب وصدگيني ما بيوم دخلت حرب وطلعت خسرانه
خليني صديقة لان اذا اختاريتيني عدوة محد غيرچ يخسر ، وهذا كلامي اعتبري تهديد او نصيحة مو مُهم
المُهم تمشين بيّ وما تشوفين وجهي الثاني لان مو مَن مصلحتچ
عفتها بدون ما اسمع ردها
خليها تفكر زين بأي خطوة مُمكن تتخذها
لان فعلًا اذا شفتها تشكل خطر على علاقتي بـ هُمام
اخرب الاول والتالي واتنازل عن سعادته
واختار سعادتي وطُز بكُلشي
اي اني اعترف لو ما ميار چانت بالمواصفات
المطلوبة وبيها الاشياء الاريدها اني
مُستحيل اقبل يتزوج
انانية؟ اي اني انانية مُستحيل اقبل اتشارك گلبه ويا غير شخص
افكار جنونية تراود عقلي بمُجرد افكر
حَـيبوسها ويحضُنها وتنام على صدره
قبضت ايدي منبته اظافري بيها
أحَس حَ انفجر مَن الغيظ والغيرة
گعدت بمكاني اتبع تنظيم العرس ، فجأة
انطفت الاضوية وبقت بَـس الشموع
المشتعلة على طول الممشه مالتهُم واكو مُفرقعات بين كُل شمعة وشمعة مشتعلات
دخلوا ايدها بأيده واشتعلت أُغنية
عبالي حبيبي
عبالي حبيبي
أغمرك ما إتركك
إسرقك ما رجعك
إحبسك ما طلعك
من قلبي ولا يوم
أخطفلك نظراتك
ضحكاتك حركاتك
علقهن بغرفتي
نيمهن عفرشتي
إحلمهن بغفوتي
تيحلى بعيني النوم
عبالي حبيبي
ليلة الإلبسلك الأبيض
وصير ملكك والدني تشهد
وجيب منك إنت
طفلك إنت
مثلك إنت
عبالي حبيبي
على طول كلمات الأُغنية وهُما عيونهُم ما
فارقت بعض
بدت البسبسات تتعالى هذا اليمدح وهذا
اليذم !! تجاهلت وركزت على حركاتهُم
ساعدها كليم تگعد وحاوط خدودها طابع
بوسة حُب على جبينها
بنفس اللحظة انسدت الأُغنية وتعالت التصفيقات
مَن بعيد والاحظ توترهُم هي تفرك بأيديها
وهوَ يمسح جبينه مَن العرق والتوتر وبنفس
الوقت ما اعرف شنو يهمسلها يطمنها ويخفف توترها بيّ
رُغم مَن بدت الحفلة ما چان احد غريب
يرگص غير خواته يهوسله وميار ولمار لان
خالهن عادي
حفلة عرس غير شكل حرفيًا الاجواء چانت
تموت وتبهر العيون
كممت حلگي اضحك مَن شفت بنته ترگص گدامه وهوَ
مغطي عيونه ويضحك واخر شي
نزع سترته واشرلهُم يشغلوله اغنية
وفعلًا فتحوا وحدة تخص الاعراس
نزل وسط خواته يحركها ويرقص وياها
منظرهُم يجنن يفرها وهي تتمايل وتدلع
عليّ مخليته يگزگز عليها
بقت الساحة اله هوَ وياها اخر شي شالها
وشمرها بالهوا ، ضمها لـ صدره وباسها بحُب
ورجع لمكانه يسولف ويا رنيم
تقربت اخذت ريم لان لازم يرقص هوَ وياها
سلو !!
انطفت الاضواء وبقت بَـس على المكان
البيّ هُما ، اشتعلت المُفرقعات مَن حولهُم
وانطفت ويا الاغنية البدت
سمعني نبضك دفيني بنار حضنك
ابيك الليلة وحدك اليا تكون
قرب عليا حس النار اللي فيا
ابي ايديك بايديا نلف الكون
انا وش اقول وانت معايا
وش اقول انسى هوايا
وش اقول انت غلاي
يا فرح عمري معاك الوقت يجري
من شوفك ليه مدري تدوب الروح
انسى اللى فيني من حضنك بين ايديني
يا حبي وكل سنيني فداك الروح
كل شي نسيته معاك عمري بديته
نسيت الكون كله معاك
لو عمر ثاني غيرك ما احب تاني
الك كل لحظة انا اشتاق
وش اقول وانت معايا
وش اقول انسى هوايا
وش اقول انت غلاي
محاوط خصرها وهي محاوطه رقبته
جبينه على جبينها ويتمايلون على كلمات الاغنية
كُل شوي يرفع راسه يطبع بوساته مرة على
خدها مرة على جبينها مرة ياخذ ايدها
ويبوسها
يهمسلها بكلام بَـس هي تسمعه ويكون كفيل
يخليها تصير حمرة مَن الخجل وعلى ابتسامته
اعرف هوَ مستمتع بشكلها الخجلان
انتهت المراسم بين ضحكة ورقصة وسالفة !!
وتبديل الحلقات والصور الاخذتنهن المصورة
وصار لازم يسلمها هُمام لـ زوجها ويوصي عليها
غطيناها زين وساعدتها نطلع ويا دخول
هُمام وكليم
اباوعله عيونه تتأملها بحنية والدمعة بطرف
عينه عليها رُغم هي ما حَـتبتعد عنه وكلنا
عايشين بنفس المكان بَـس مَن حُبه الها
دمعت عيونه
تقرب واخذها بحُضنه وهي لفت ايديها
على خُصره
صح ما اشوفها بَـس متأكدة هلكت نفسها بالبچي
ابتعد هُمام منها يمسح بوجهة
اخذ ايدها وحطها بأيد كليم بلع ريگه
تحمحم يخفي الغصة البصوته وگال..
هُمام- انطيك رَوحـي واني مطمئن راح تحافظ عليها مثلي واكثر لانها تربيتك وتعبك بنتك قبل كلشي بَـس هذا ما يعني لو اجتني بيوم زعلانه ومتعبها ما اخذ حقها لا والله لو مو صاحبها اخذ حقها من عيونك
خليها فرحانه دائمًا لا تزعلها ومتأكد هي راح تحطك بعيونها
كليم- بوسط رَوحـي اضمها لا يبقى بالك
تحاضنوا هوَ وكليم
لان راح يبقون كم يوم بالفندق وعشر ايام بـ اربيل
هُمام- دير بالك عليها وعلى نفسك
كليم- العائلة بـ امانتك خيي
هُمام- بعيوني روح وأنتَ مطمئن
اخذها وطلع منطلقين بسيارتهُم
راد يطلع بسرعة رفعت الفُستان ركضت
لزمته مَن ايده ، باوعلي مَن فوگ ليجوه
عقد حواجبه ونتر
هُمام- شدعوه لازك على جسمچ
- مو كلش
هز ايده ودار يريد يطلع رجعت سحبته
هُمام- شتردين؟
- نروح للبيت الجديد هسه؟
- اي
- احم يعني جاهز وشسمه ما يحتاج تنظيف
هُمام- لا جبنا عُمال وكملنا كلشي
- اي زين لان تعبانين
- خوش بعد عندچ شي؟
- اريد نحجي!
هُمام- ماكو شي ينحجي
تقربت منه محاوطه خدوده
- ما مشتاقلي؟
تأفأف ودار وجهة ، بلعت ريك وتأكدت محد موجود !!
ما اعرف بشنو چنت افكر مَن تجرأت
وخطيت هيچ خطوة
تقربت بايسته چان حجر ما انهزت شعرة منه
ابتعدت الدمعة بعيني واني اباوع بعيونه
صافن بدون ردة فعل نار تاكل بگلبي مَن
استشعر بروده
سندت راسي على صدره وهمست
- مردت گلبي ، برودك حرگني !
تركته مبتعده اجر اذيال خيبتي
طول بقية السهرة چنت بعالم ثاني
لحد ما فرغت القاعة وبقينا بَـس احنه
گومتني مسرة لان جسمي يرجف
كُل ما يعاملني هيچ اتمرض واتعب وينهد حيلي
طلعنا وكل شخص ركب بسيارة اباوعله
مَن بعيد واگف منتظرني اجي
غيرت اتجاهي ورحت ويا البنات بسيارة
قسورة
بهتت مَن فتح الباب بقوة مخنزر عليَّ
هُمام- نزلي!
قسورة- خالي صاير شي؟
هُمام- لا ، نزلي سارة!
- تعبانه هُمام الله يخليك
هُمام- گلت نزلي!
تجنُبًا للمشاكل نزلت بَـس مسطورة واتعثر
بخطواتي تعبانه
سندت راسي على الكُرسي وعيوني تتأمل
الشارع !! مهضومه ومكسورة كُل ما اتذكر
نظراته البارده ينچوي گلبي وتنزل دموعي
اغمض وافتح أحَس نفسي بعالم ثاني
حتى مَن وصلنا
المفروض انبهر واتأمل البناء بَـس چنت
احتاج سرير يلمني ومخده تمتص دموعي
چنت احتاج انام ما چنت اريد اي شي مَن
هذا
چنت محتاجته بَـس هوَ ما موجود رُغم
قُربه
نزلت اترنح بمشيتي ، رفعت راسي اريد اعرف
وين بيتنا لحد ما اجاني صوته وهوَ يأشر
هُمام- هذا
مشيت وتعثرت ، رمشت استوعب واريد
الدنيـا توضح بعيوني
رفعت راسي مَن حاوطني قلقاني بَـس يمثل
اللا مُبالة !! كبريائه كبير لدرجة كسر گلبي
ساعدني ادخل والبنات اختفن ماكو واني
ما عندي طاقة اسأل ، وصلني لغُرفة
بالطابق الجوه وبَـس وصل للباب عافني وصعد للطابق الثاني
مصدومة گعدت قريب الباب مسحت وجهي
ما مستوعبة ولا مهتمة للمكياج
صرت اضحك وابچي متهستره على قساوة
گلبه سواااااااها هوَ بغرفة واني بغرفة
بَـس سمعت صوت خطواته على الدرج
نزل على صوتي !!
دخلت وقفلت الباب انهاريت وحدي
ملخت نفسي بَـس اريد استوعب لأي حد
وصلت علاقتنا
صوته انبح مَن گد الصياح يريد يدخل
بَـس ما يگدر لان الباب كُللللش قوي وما
ينفتح
مزقت الفستان على جسمي كارهه رَوحـي
هُمام- لچ سااااارة فتحي الباب احجي وياچ
زحفت زحوف وصلت وره الباب سندت
راسي عليّ وحجيت
- كرهتني؟ انتهى حُبنا؟ ماكو حلوة المسيح ولا ابو الهَمم اليوگف بظهرها اخ يا وجع گلبي
هُمام- موافق نحجي بَـس فتحي الباب تسمعيني فتحي نحجي بَـس اهدي
تركته ودخلت للحمام سبحت ومسحت المكياج
وهوَ تخبل عباله بيّ شي لان سكتت
مَن كملت رحت قريب الباب وحجيت ببرود
- اريد انام مُمكن تعوفني وحدي؟
هُمام- أنتِ زينه؟ أذيتي نفسچ؟
- ما عاش اليّ يخليني اجرح نفسي علمود مَن هاي اللحظة ومَن تصرفك الاخير أنتَ انتهيت بگلبي هذا چان اخر انهيار اعيشه بسببك
ما سمعت منه جواب واني همات بعد ما
عندي طاقة حطيت راسي ونمت
وقررت مَن هاي اللحظة ابلش صفحة جديدة
واوگف ركض ورا هُمام
هوَ ما قدر تضحيتي علموده ليش حتى اصبر واتوسل علمود يحجي ويايَّ او يرجع يهتم !!
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••
رنيـم•
جسمي يرجف ، عمة نجلاء طلعت بعد ما
وصتني على نفسي وعلى كليم
وحدي بالغُرفة عيوني تدور بغرابة وخوف
بين ثانية وثانية اباوع للباب انتظـر يجي
بَـس تأخر !! شلت فُستاني وگمت على حيلي
مديت ايدي اتلمس الورد الموجود بالغرفة
فزيت على فتحتة الباب ، چان شايل بأيده
اكل يعني تأخر بسبب هذا الشي؟! سد
الباب وفتح ايدي
ضحكت وركضت طافرة بحُضنه وهوَ ما
قصر شالني يفر بيّ ويطبع بوساته على
كتفي ورقبتي ويهمس
كليم- روح كليم بنياته الحلوة اميرتي المُميزة ذات عيون القُطط
قهقهت على كلماته وهوَ نزلني يرتب بشعري
- گلت هسه بدلت عافتني ونامت
- لا خفت چنت انتظرك
- جعل محد غيرچ ينتظرني صغَيرتي تعاي اكيد جوعانه
- كُرشي يطلع اصوت
- هههههههه
ضحك مَن كُل گلبه وحاوطني
ربعت بالبدلة ما مهتمه لا للبرستيج ولا لغيره اهم شي بطني
بَـس ما تعبت نفسي لان هوَ سرفن رداناته
وگعد يوكلني منا لمن شبعت وسرسحت
بمكاني
- تعبت
تقرب مني
- افتح شعرچ ودخلي سبحي وأنتِ ترتاحين
هزيت راسي موافقة وهوَ يفتح الماشات
بتركيز وفتحلي سحاب البدلة
دخلت للحمام وفعلًا بعد ما سبحت وسويت روتيني
راحة مو طبيعية صار عندي نشاط اغني واني بالمنشفة
دك الباب يضحك
كليم- حبيبتي ملابسچ
فتحت الباب اخذتهن مَن عنده ابتسم
يتأملني ، هز راسه ما اعرف بشنو يفكر
كليم- توضي علمود نصلي
- توضيت
كليم- عفية يلـه بدلي وتعاي
بدلت تراك ستن يموت لونه ماروني
وطلعت اشرلي اروحله
وهوَ مجهز المشط ، مشطلي ورفعه بقراصه
لبست أزار الصلاة ووگفت ورا وبلشنا بالصلاة
صدق ودار عليَّ حط ايده على راسي وردد بصوت هادئ مليء بالطمأنينة
كليم "بِسْمِ اللَّهِ ، اللَّهُمَّ جَنِّبْنَا الشَّيْطَانَ ، وَجَنِّبْ الشَّيْطَانَ مَا رَزَقْتَنَا"
اجتني لحظة إدراك لهاي الليلة بقيت اباوع
بعيونه بَـس نزل ايده يحضن خدي طفرت
الم السُجادة وانزع الأزار ، عيوني تفتر حولي
بـ أرتباك ، صارت المراية گدامي وهوَ واگف
يتبع خطواتي بهدوء
تقرب منيّ بخطوات هادئه واني لازگه
بمكاني ما اعرف حتى اتحرك
رفع أيده ومررها على وجهي بدفو وحنان
غمضت عيوني مستمتعة بلمساته السحرية
الچانت تنعش كُل خلية موجودة بجسمي
فتحت عيوني حتى تقابل عيونه المُغرمة
اشر بأيده على راسي وگلبي وبعدين ميل
راسه وحجه بلُطف
كليم- عقلچ وگلبچ قبل جسمچ مستعدات يكونن مُلكي بهاية الليلة ولكُل ليالي العُمر؟
غمضت عيوني وجسمي مستنفر مَن
حركات ايده الراغبة تتلمس كُل جزء مني !!
تذكرت جُملة سارة بغُرفة التعديل الموجوده بالقاعة
"الموضوع وراچ وراچ الى متى الهروب منه امي؟ كوني واثقة بشريك حياتچ كوني واثقة مَن كليم وتركي كُلشي عليّ"
فتحت عيني وهزيت راسي بالموافقة
تسللت ابتسامة الحُب على شفايفه وتقرب
اكثر مقلص المسافات بيناتنا
رفع كف ايدي وصار يطبع بوساته على طول ايدي
لحد ما شهگت راجفة واني أحَس بي
ينثر قُبلاته على رقبتي بهدوء جنني وثارني لدرجة رجلي ما حملتني ابقى واگفه
لزمني بقوة وهمس قريب مَن أذني
كليم- اسندچ لو خانتچ رجليچ ووگعتي صغيرتي
تنهدت برجفة واني أحَس بنفسي اتمدد
على السرير وهوَ يعتليني
خاض حرب الشفاه برُقي ويايَّ جنني وهوَ
دارس كُل حركاته چان يتعمد يطلع كُل رغبة
بداخلي اله
راد كُلشي برغبتي اني ونجح هوَ وحُبه
وخسر جسدي صموده امام هذا الحُب الهادئ
امام هذا الرجُل العاشق
لماني بحُضنه بعد ليلة مَن العُمر
شگد چنت خايفة بَـس چانت كلماته وخوفه وقلقه
حنيته بلمساته وهمساته كفيلة تطير كُل
الرعب العشته مَن هاي اللحظة عدا الخجل
چان مسيطر عليَّ بشكل مو طبيعي !!
ولا چنت اتخيل نفسي بهذا الوضع الجريء
لا ويا كليم !! الشخص العرفته على أنُ هوَ
ابوية وعمي وفكرت ما حَـيتغير مكانه ولا
مكاني بگلوب بعضنا بَـس شاء القدر واتغير
كُلشي حرفيًا كُلشي تغير بشكل جذري
مرر ايده على راسي وهمس
- موجوعه حبيبتي؟
دفنت راسي بصدره
- امم بطني
- ابقي بفراشچ راجع
غمضت عيوني بقوة مَن گام تارك السرير
شددت بقوة على اللحاف واستمع لصوت
حركاته
فتحت عيوني بعَد فترة على لمساته بشعري
كليم- گومي
- بَـس..!
حجيتها بحرج ضحك متفهمني ونزل لفاني بالغطه
شالني بحُضنه بقيت مصدومة وهوَ
دخلني للحمام تارس "البانيو" ماي
- تمددي هنا فد رُبع ساعة وأنتِ ترتاحين وبعدين سبحي وصيحيلي انطيچ ملابس واذا احتاجيتي شي صيحيلي ولا تخجلين سترچ وغطاچ اني بنياتي
نزلت راسي خجلانه احط عيني بعينه
ما ضغط عليَّ
عافني وطلع ، سويت مثل ما گال وفعلًا
بدأ الوجع يختفي واني اتحسن اكثر
كملت سبحي وصحتله ، مديت ايدي واخذت منه الملابس
چانن عبارة عن بدلة نوم لون اوف وايت جوه الرُكب بشوي وفوگاها روب مَن نفس
القماش! بدلت وطلعت افرك بعيوني ميته
مَن النعاس
اخذني مَن ايدي للفراش الچان مبدله هوَ
كليم- بقي المنشفه على راسچ لا تنزعينها وتتمرضين اني مشغل التدفئة
- نعسانه
كليم- ما اطول بابا حبيبتي اسبح واجي امشطلچ
- لا تتأخر فدوة
- تأمرين عيوني أنتِ
تركني وراح بسُرعة سبح وطلع واني اغفي
مشطلي ودفاني بالغطه واخذني بحُضنه
بسُرعة غفيت وسيطر النعاس عليَّ
ما اعرف شگد مر مَن الوقت بعد نومة عميقة
فتحت عيوني على شي يتمرر على وجهي
فركت عيوني وبقيت صافنه بالفراغ اخذلي
لحظة أدراك !! وين اني؟ شدا اسوي هنا؟
حركت راسي وغزت حرارة خدودي بمُجرد
اجت عيني بعيونه المُغرمه ، رفع أيده
بيها ورده حمرة تقرب ساحب شفايفي
بهدوء وبحُب ، ابتعد ومدلي الوردة
كليم- شلون صباح حلو هذا!!
ابتسمت ملتقطة الوردة وعدلت گعدت
تقربت بايسه خده
- تجنن
- مثلچ!
بقيت صافنه بعيونه عاجزة ارد بشي
الخجل محتلني وما دا اعرف اجاوب اي شي
تقرب ماخذني بحُضنه
كليم- طميني رنيمه عندچ وجع؟
- لاا ما دا أحَس بشي
- متأكدة؟ خايف مأذيچ بابا الليل كُله ما عرفت انام وافكر خاف متوجعه وما تحجين
- اصلًا أنتَ تعرف لو متوجعة بسرعة يبين عليَّ ما اگدر اضم عنك بَـس والله ما بيَّ شي لا تبقى قلقان
زفر نفس مرتاح
- الف الحمدُ لله ، گومي يلـه ننزل نتريك
طفرت مَن مكاني متحمسة للطلعة وهوَ
ضحك فرحان بفرحتي ومرتاح لان تأكد
مَن حركتي اني ما دا اتوجع
وهذا الشي خلى ياخذ نفس ويرجع الدم
بوجهة ويتصرف على طبيعته المُعتاده !!
ㅤㅤㅤ
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••
سـارة•
صار اسبوع على عرس رنيـم ومَن هذاك
اليوم لهذا اليوم لا اني شايفه هُمام ولا هوَ
شايفني !!
اعرف مواعيد رجعته ومَن يطلع اتأكد مَن
البنات يلـه اطلع مَن غُرفتي ، شگد يسأل
ويدورني ويريدني بَـس صار حلم يلمح
ظُلي! اكمل الطبخ واوصي مسرة تحطله لو
رجع ملابسه اغسلهن واكويهن مَن هوَ ما
موجود بحيث قايمه بواجبه بَـس بدون ما
اخلي يشوفني
هسه تگولون تبقين طول العُمر هيچ؟ لا اكيد
بَـس هُمام استحق العقاب بسبب اسلوبه
اعرف يحبني ويموت عليَّ وميت على شوفتي واعرف بيّ كُل يوم بالليل يوگف
بـ باب غُرفتي لفترة طويلة يلـه يصعد ينام بَـس هذا ما يشفعله يعاملني بشكل سيء
بالنهاية كُلشي سويته علموده هوَ شنو منفعتي اني؟
غير الوجع
طلعت بعد ما تأكدت هوَ طلع! عقدت حواجبي
مستغربة البنات ما الهن صوت لعد شلون
مسرة دزتلي قبل شوي عمو طلع؟ تمشيت
للمطبخ وجمدت خطواتي مَن شفته گاعد
على الميز وعينه على الباب وبَـس دخلت
ضحك !!!
اخذت نفس اخلي ملامحي طبيعية وهوَ
رفع تلفون مسرة وگال يشرح ويجاوب كُل
سؤال يدور بعقلي
هُمام- تلفوني عطل بالصدفة اكيد واستعاريت تلفون مسرة وها خطية ام قسورة ودت عليهن مشتاقتلهن
بَـس كمل درت وجهي راجعة للغُرفة
واعرف هاي لعبة مَن عنده بَـس حتى اطلع ويشوفني
شهگت جامده مَن حُضن جسمي مَن ورا
- هُمام !!!
- دنيته وكل عالمه
گالها ودفن راسه برقبتي يبوس بيها بجنون
حركت جسمي رافضة اضعف وهوَ شد
ايدي بقوة وجعتني ونتر
هُمام- تگعدين اتفاهم وياچ لو استعمل طريقتي؟
- ما عندي حجي ويـاك
- يعني استعمل طريقتي؟
- ما تخوفني بتهديدك هذا
هُمام- وابو الهَمم مصدر أمانچ وبعمره ما راح يكون خوف
سحبني بقوة داخل المطبخ وگعدني اجباري
ردت اگوم ورجع گعدني بقوة خزرته دافعه
ايده ونترت متوجعة
- عوفني أذيتني
- تسمعيني لو شلون؟
- ما اسمع
هُمام- أنتِ الردتيها
عقدت حواجبي ما فاهمه وقبل لا استوعب
لف الحبل الطلعة عليَّ بالكُرسي ربطني ربط
وايديه شدهن وحدهن وسحب كرسي گدامي
وگعد بدم بارد يباوعلي شلون مصدومة
- مَن كُل عقلك؟
هُمام- مَن عقلي وگلبي همات ، تعبتيني سارة وما عندي غير هذا الحل
- اعيط اذا ما تفتح ايدي
هُمام- تجبريني اربط حلگچ؟
بلعت ريك صافنه بعيونه ، رفع اكتافه وهمس تعبان
- ردتچ ما ردت غيرچ حاربت وما زلت احارب وحدي علمود علاقتنا بَـس أنتِ شنو سويتي؟ هه تخليتي عني بسهولة اششش ولا كلمة اعرف جوابچ علمودي؟ جرحتچ بنظرة بكلمة! حسستچ رايد طفل علمود اعرف السبب مني واعذرچ جاوبي سارة
- لا
هُمام- لعد شلون هلچ گلبچ تنطيني لوحدة ثانية؟ تعرفين شنو ضُره سارة؟ تعرفين شنو العدالة بيناتچن؟ تتحملين غزلي ونومتي وياهااا بَـس جاوبيني شلون تتحملين اني گلبي ما ينطيني اسويها ولا اصبر المس غيرچ
- منو گال متحملة دا اموت
- نطقيها لعد گولي عوفها
بقيت ساكته وعرفت مُراده شنو! مثل ما دگيت رجل وزوجته يريدني اني اطلب منه
يطلگ؟ نزلت راسي رافضة احجي
شهگت مَن لزم كرسيي وقربه منه لدرجة
ما يفصل بيناتنا شي وعيونه حُمر مخنزر عليَّ
تقرب ساحب شفايفي يبوسني بغضب
وايده تتلمس بحُرية كُل جزء مني واني لا
حولة ولا قوة وبلحظة ضُعف بادلته منتعشه
بهذا الشعور اليّ بكُل مرة اعيشه وياه اطير
بَـس ما دام هواية لان بمُجرد تذكرت رفضه اليَّ بالحفلة درت وجهي مبتعده
هُمام- لا تقاومين
- مثل ما قاومتني ورفضتني بالحفلة !!
- چنت ولا زلت معصب منچ بَـس ما اگدر اكمل بتصرفات الزعاطيط هاي بلحظة غضب اتخذت قرار مَن عقلچ الفارغ وصار لازم اصلحه
ابتعد وطلع محرمة مَن جيبه ، حطها على
الطاولة وتفاجأت چانت بيها خصلات شعر
باوعتله منتظره منه تفسير
وواضح هوَ مَن طلعها مقصده يفسرلي سبب
وجود هذا الشعر الكُله دم شيسوي بجيبه؟
هُمام- تعرفين هذا الشعر لمنو؟
هزيت راسي بـ لا رفعه بايسه موگف عقلي
هُمام- الچ
دمعت عيوني وما طولت هواي مَن حسيت
بحرارة دموعي على خدي تچويني
رجعه بجيبه ورفع ايده يمسح دموعي ويهمس
هُمام- بيوم الدخلوا عمامچ للبيت ولگيتچ سابحه بدمچ شفت هاي الخصلات على الارض ومَن يومها ما فارقني استمد قوتي منهن
مرر ايده يبعد غرتي عن وجهي
هُمام- بوقتها انطيت وعد لأمير المؤمنين احافظ عليچ واصونچ وگلت هاي امانتي يا الله رجعها واني عوضها ما بيوم اكسرها ولا اتعبها لا تاخذها مني وتكسر ظهري
برأيچ هُمام يگدر يكسر مدامته ام عيون شهل؟
- لااا
- للموت حلوة المسيح للموت وهذا عهد عليَّ ما اكسرچ فما بالچ بمره تأذيچ بيَّ
- افتح ايدي
فتحهن ورفعهن بايسهن ، رفعت ايدي امسح
على خده وتقربت ابوس بوجهة وهوَ مغمض
هُمام- تستاهلين تتعاقبين
باوعتله ما فاهمه ، هز راسه وگال
- نطقيها اريد اسمعها منچ
- شنو؟
- طلبي اتركها اريدها منچ
درت وجهي رافضه
لزم فكي ورجع وجهي اله مبتسم
هُمام- أذًا تستحقين العقاب وما اكون ابو الهَمم اذا ما خليتچ بنفسچ اطلبين هذا الطلب
رجع باسني بقوة وايدي تفتح الحبال
شالني فاقد
حركاته مجنونة وسريعة واچذب اذا اگول
گدرت اقاوم ما گدرت مشتاقتله ميته عليّ
وعلى قُربه
ابتعد منيّ عيونه تشرح حُبه طُبع بوسة
شغف على خدي وحُضني محاوطني بحنيته ردت احجي بَـس هوَ رفض وحط
اصبعه على شفايفه
هُمام- ماكو داعي انسي كُلشي ركزي بَـس بينا
- احبك لا تعوفني
هُمام- للموت حلوة المسيح للموت ما اعوفچ
- وما تتغير لان ما اتحمل اتعب وأحَس رَوحـي تريد تطلع مَن جسمي لو تغيرت
ابتسم بدون ما يجاوب
- حَـتأذيني مو؟
سند راسه على راسي ، همس وهوَ مغمض عيونه
هُمام- أنتِ تأذين نفسچ بموافقتچ على وجود ضُرة لنفسچ
بهذا جوابه خيط حلگي وما گدرت اجاوب
ابتسم ورجع يبوسني ويحضني بشوق ....
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••
هُمـام•
البس بالساعة وعقلي شارد بالشي الأريد اسوي
حسيت على لمسة ايدها على كتفي تنتشلني
مَن افكاري الصارت تاخذني بعيد عن الواقع
سارة- دا تخوفني منك !! تصرُفاتك غريبة
ابتسمت وتقدمت محاوط وجهة بين ايدي
وطبعت بوسة على جبينها وبعدين سحبتها
لـ صدري حاضنها
مسحت على طول شعرها الاحبه وهمستلها
هُمام- تخافين مني؟
- ما اعرف أحَس تصرُفاتك غريبة كُلش
- كوني متأكدة ابو الهَمم ما يضرچ ولو بمقدار ذرة
عفتها وگعدت البس حذائي وأگدر اشوف
نظراتها تتأملني بضياع
گمت لازم ايدها ونزلنا جوه ودعتها مَن الباب وبلغت ليث يرجع البنات يمها علمود لا تبقى وحدها ويتعبها التفكير
گعدت بالسيارة وبَـس طلعتها مَن الگراج خارج البيت صفيتها واتصلت على كليم كاميرا
تأخر يلـه فتح يضحك وبَـس شافني گال
كليم- مشتاقلك ابو الهَمم
- حبيبي مو بگدي مكانك فارغ وداعة الخوة
كليم- هاليومين راجعين ان شاء الله
- ترجعون بالسلامة
عقد حواجبه وشفته يتحرك مغير مكانه
كليم- شبيك مهموم حبيبي صاير شي؟
- ضايع وتعبان واخذت قرار ما اعرف صح او خطأ واتصلت عليك اريدك ترشدني
- عيوني الك سولف
- رنيم يمك؟
كليم- لا لا نايمه جوه سولف براحتك
فركت وجهي وحجيت
- مَن يوم الخطبت المحروسة بنت اختك والدنيا ضاقت بيّ لك كليم الماي الاشـربه مُر وما أحَس بطعمه
حاولت والله بَـس ما اگدر وحق حيدر الكرار
غير سارة مرة الي ما اشوف ولا اگدر اتقبل
كليم- يعني؟
- اريد افسخ الخطوبة والغي كُلشي
بقيت اباوعله متفشل بَـس فاجأني برده
كليم- ما دام النهر ضيق عبره ولا تتفاجئ ترا اني مَن بداية الموضوع ما قابل بَـس اخ يا عنادكُم ولا واحد چان يفكر بعقله واخذها مني ميار ما تحبك بَـس هذا اعجاب وعناد وتعرف كُلشي ممنوع مرغوب
واگدر اعرف الانسان العاشق مَن المُعجب ومن اگلك افسخ مو بَـس لمصلحتك لا يشهد الله اريد مصلحة زوجتك وبنت اختي لان راح يتضررن
- يعني امشي بالموضوع
كليم- اي ، بَـس سارة تعرف
- لا وما راح تعرف
كليم- تخبلت أنتَ؟ لك ابني اذا عرفت مَن غيرك تصير مشاكل!
- دا اشوفها تموت گدامي مَن الغيرة وتكابر واني اريد موضوع الانفصال يطلع منها وبرغبتها وعندي طريقة بَـس ما اريد احد يعرف غيرنا
كليم- شلون؟
- اني احلها و..
غمزلي وصاح
كليم- صح النوم بابا
اباوعلها گعدت بصفه تفرك بعيونها
- بنيتي الحلوة شلونها
رنيم- حبيبي خالو مشتاقتلك
- يفديچ خالچ خوش؟ ميت على شوفتچ وعيونچ الحلوة
رنيم- أنتَ بالبيت اريد اسلم على البنات
- لا باباتي طالع خابري سارة كلهن موجودات بالبيت وحدهن
عافتنا وراحت
كليم- فكر بعقلك لا تاخذك العصبية والتسرُع
- ان شاء الله ، يلـه في امان الله
سلمنا وغلقته ، طلعت شعرها مَن جيبي
بسته وشميته بقوة وخلص اخذت قراري
حركت السيارة منطلق وعقلي ما سكت
مية فكرة اجت
وما احب اتواجه ويا جُنيد لان هذا الطفل
يثير غضبي حيل واذا شمر كلمة ما اعتقد
اگدر اصبر واتحمل بَـس أتمنى ربي ينطيني صبر ايوب ويا
وگفت السيارة اخذت اغراضي واكيد
سلاحي
بَـس دگيت الباب انفتح وصار بوجهي جُنيد
لا بداية مُبشرة بخير ، عقد حواجبه
جُنيد- يا هلا!
حجة مستغرب لان اني ابد ما واصل مَن
يوم العقد بعد ما اجيت ومن تراسلني ميار
چنت نطيها الف عذر وحجة بَـس علمود لا
اوصل واجي لان كاره فكرة اگعد واسولف ويا بنت غير سارة
- هلا!
جُنيد- تفضل ادخل
ضغطت السبحة بأيدي ودخلت على اعصابي
دخلني للاستقبال وطلع شوي ورجع بيده ماي واخته ورا
شالها شامرته على راسها هيچ كلاوات
دنگت راسي ورديت عليها بعد ما سلمت
ميار- هلاو
- هلا بوية
ساد الصمت لوقت طويل وواضح جُنيد
ما چانت اله نية يطلع واني ما عندي وقت
رفعت راسي وحاجيته ببرود ما طايق شكله
- مُمكن نبقى وحدنا عندي كلمتين ويا اختك وبعدها احجي وياك
جُنيد- ماشي
طلع اباوعلها ما رفعت راسها وتفرك بأيديها
متوترة غمضت عيوني مأنب نفسي على
تركيزي بتفاصيلها ، تجاهلت الموضوع وحجيت
- ركزي ويايَّ يا بنت الناس وسمعي كلامي عدل اني ما جاي اخيرچ لا ابلغچ بَـس مَن حقچ ابرر واعتذر بَـس عن قراري ماكو رجعة
ميار- شنو صاير؟
اباوعلها عيونها دمعت وكأنو عرفت!!
- اني غير سارة مرة اليَّ ما اريد ومُستحيل اتقبل تگولين بيّ شي؟ اگلچ لا كاملة والكمال لله وحده بَـس المُشكلة بگلبي اني ما يتقبل غير سارة
وقسمًا عظمًا ما تعرف جاي هنا ولا تعرف بهذا قراري لان اعرف تعترض واني ما اريد اكمل مَن يوم العقد لهذا يومچ ما متقبل الوضع وما مرتاح بحياتي اعتذر وحقچ على راسي غلطان بحقچ وخجلان بَـس ما اگدر أأذيچ اكثر واكمل بشي مُستحيل يصير
ميار- شنو ذنبي اني؟
- ما بيچ اي ذنب الغلط بيّ اني بيوم الوافقت اتزوج وما مستعد لهذا الشي
نزلت راسها تبچي وتشهك يعز عليَّ اكون سبب ببُكاء اي أُنثى
بَـس تبچي هسه كم ساعة كم يوم افضل مَن
ما تبچي العُمر كُله بسبب تسرُعي واتخاذي
لقرارات خطأ ما رايد اورطها بحياتي المُعقدة
- لا تبچين بَـس فهميني يا عيني ما اگدر والله اظلمچ
ميار- وهيچ ما ظلمتني؟ ضحيت بأخوي ووافقت عليك اهلي زعلانين مني لان وافقت عليك وفوك هذا كُله مَن يوم العقد للان ما تسأل وهاملني وكاسر عيني گدام كُل انسان ضحيت بيّ علمودك وهسه جاي ببساطة تگلي نفسخ!!
- تردين تكملين ويا رجال ما راح يحبچ؟ ويا رجال يعوفچ بكل لحظة ويركض ورا زوجته الاولى بَـس حتى يسعدها تردين تكملين حياتچ ويايَّ وتكونين مركونة على الرف شوكت ما اتذكرچ اسلم وارجع الها وانساچ؟
ميار- تگدر تعدل بيناتنا لا تكسرني ما استاهل والله
- لو اگدر ما اجيت صارلي فترة افكر وهذا القرار افضل النا كُلنا
نزلت راسها تبچي وتشهك
- سامحيني
رفعت راسها تبچي وشهگتها وجعت گلبي
ميار- ما حَ اسامحك بحياتي على هاي الكسرة
خفت مَن گامت حاطه ايدها على گلبها وتشهك خفت يصير الها شي شلون اسامح نفسي واعيش حياتي عادي؟
بَـس طلعت دخل جُنيد يغلي مَن الاعصاب وما الومه حقه اخته بأي ذنب يصير بيها هيج شي
جُنيد- شنو سويتلهااااا؟؟
- اگعد نحجي ما اريد مشاكل وسبق ومخابر خالك ومبلغه اني
گعد يهز برجله وعلى اعصابه بَـس هدأ شوي بوقتها مَن عرف كليم عنده علم رجعت سولفتله كُلشي عن مشاعري وبشنو أحَس وهوَ يستمع معصب ومتنرفز
مَن الموضوع
- هذا افضل حل
جُنيد- خالي شنو گال؟
- كليم مَن البداية رافض
جُنيد- اعرف اعرف مسولف ويايَّ بَـس هسه شنو رأيه؟
- اتصل عليّ واسمع منه افضل
طلع يتصل على كليم وتأخر يلـه رجع هادي ووجهة مرتاح مو مثل قبل شوي متنرفز وينتر بالكلام
جُنيد- يمتى؟
- اليوم نحل الموضوع ونخلص افضل ما نطولها بَـس جُنيد ما اريد سارة تعرف احجي ويا الاهل
هز راسه موافق واني طلعت جبت السيد ورجعت ما تأخرنا هواي بَـس كملنا ودعتهُم وطلعت مرتاح وأحَس حمل ونزاح عن اكتفي والخنگة الچانت مرافقتني طول الفترة المضت ماكو
مثل الطير الحُر حرفيًا أهم شي خلصت مَن هذا الهم
وبقت سارة واني اعرف شلون ارجعها للطريق
..
وتستمر الحكاية.. 🚬♣
قناة التلي zainab_salah0
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!