رواية دروب الإِندِثـار الفصل الثامن والأربعون 48 - بقلم زينب صـلـاح 🤎

بقلمي : زينب صلـاح 🧡

لـ روايـة ﴿ دروب الإندِثار ﴾

في الـ part 44 ♡♡

لا تنسون التصويت + متابعة للحساب + التعليق بين الفقرات ☘️

‏تَرد يمتَى !
حَنين الرُوح يجرحني
أروح أقرة الرسايل ذيچ وأبچيلك !.
وأعاتب طيفك .. مِن يفوت وأحچيلك ..

•••••••••••••••••••••••••••♕•

سـارة•

گمت مَن مكاني على أثر رسائل اجت لتلفون هُمام
بهذا الوقت المتأخر !! بسبب القهر مَن
تصرفاته النوم جافاني وضحكته يمي على السرير
بالتلفون طيرت الباقي مَن عقلي

يا تُرى بدأت اخسر هُمام او متوهمة؟
لعب بعقلي الشيطان وعيني بقت على
شاشة التلفون المضوية ظلمت الغُرفة
گمت بهدوء سحبته وهوَ چان بنوم عميق

افتح واعكر مزاجي لو ابقى على عمى عيوني؟!
فتحته وعقلي يوجعني مَن كمية التفكير
فتحت الواتساب واول اسم صار گدام عيني
"ميـار!!"
بلعت ريك وأحَس حتى النفس انقطع واني افتحها

ميـار
- بعمري ما حَ انسى هذا اليوم وكلامك المميز بقلبي
- دا افرح بجياتك وذكرك اليَّ بـ أدق التفاصيل
- هُمام حبيبي نسيت سبحتك بغرفتي مَن تجي ذكرني انطيك اياها
- ومثل ما وصيتني ما ابلغ سارة بتطور علاقتنا
- احبك

نزلت التلفون باهته !! "ومثل ما وصيتني ما ابلغ سارة بتطور علاقتنا"
يعني شنو؟ علاقتهُم متطورة ويحبون بعض
لذلك هُمام يضحك للهوى الطاير وقبل كم
ساعة مَن چان يضحك وياها؟ يضحك على
عقلي وگلبي وتصرفاتي الطفولة اتجاه موضوع هوَ حاسمه !!

المُحادثة فارغة! يعني مَن يسولف وياها يمسح المحادثة خاف اشوف؟
رجعت التلفون جسمي يرجف اباوعله نايم
بعُمق بدون ما يأنبه ضميره وهوَ يضحك عليَّ

اخذت تلفوني وجسمي يرجف ونيت بوجع
واني اباوع اصابعي تتعوج
طلعت مَن الغُرفة ارجف واني اتصل على
رنيم فترة واجاني صوتها واضح نايمة !!

رنيم- ها سارة صاير شي؟

- حَـتجيني النوبة تعاي فدوة

ما سمعت غير التلفون طفى بوجهي شمرته ومددت على التخم
جسمي ينتفض مَن القهر والوجع مَن ايدي حيل وابو الزايد
سمعت باب المطبخ ينفتح لان رنيم عندها
نسخة
هُمام انطاها الها علمود لا تحس نفسها غريبة
دخلت تركض تريد تصعد فوك

- رنيممم

غيرت طريقها واجتني تركض
رنيم- شبيچ سارة حبيبتي بشنو دا تحسين؟

- بَـس بَـس حطي شي بحلگي اخ ولزمي جسمي

تبچي وهي تنزع شالها وتحطه بحلگي وحضنتني تشهك
شاغت رَوحـي مَن بلشت النوبة حرفيًا
حسيت رَوحـي دا تطلع ورنيم مَن شافت وضعي بقت تصرخ بخوف وحقها لان وضعي
چان يخوف بَـس ما ردت هُمام يعرف

ومع الاسف قبل لا يُغمى عليَّ شفته يركض
نازل مَن فوك مرعوب مَن صوت صريخها

بعد فترة يلـه بلشت افتح عيوني اخ يا يابة
جسمي يوجعني عبالك ساحگتني تريله
نزلت عيوني على ثگل موجود على ايدي

سحبت ايدي وهوَ رفع عيونه حمر دم
خزرته ومن تقرب يبوسني نترت
- وخر

هُمام- لچ تخابرين رنيم تجيج واني يمچ ما تعبين نفسچ وتگعديني؟

حركت نفس وصرخت موجوعة
هُمام- بيّ ولا بيچ يندار بيّ وجعج صبري

گام محتار بيَّ والله ذب عليَّ بچي كُلشي
التم عليَّ
هُمام- متوجعة نروح للمستشفى حبيبتي لا تبچين گليلي شنو اسوي

- أنتَ واحد چذاب ومُنافق

فتح عيونه باهت
- تحبها وتريدها بَـس لو تموت ما اخليك تتهنى وياها ولا تكمل فرحتها خانت الاتفاق اليّ بيناتنا واني حَ اهدم فرحتها

بقى على نفس علامات الاستفهام
- طلگها

رفع حواجبه
هُمام- ميـار؟

- لاااااا تنطق اسمهااااا

- خلص اهدي يجرالچ

بچيت محروك گلبي
- ما توقعت اطعنوني بظهرك لعبت نفسي منك مُقرفين

هُمام- وزني كلامچ حبيبتي بلشت اعصب

- يعني؟ عصبت او لا ما يهمني غير تنفذ الاريده واليوووووم وفورًا لا اتخبل عليك

هُمام- ابقي تأمري هيچ وشوفي شـ...

قاطعته
- لااا تهدد هُمام لاا تهددددد

عفته وگمت بَـس رجلي ما عانني ووگعت انهاريت بالبچي وهوَ گعد يستغفر رفعت عيوني تصُب مقهورة مَن ضُعفي گدامه

هُمام- على شنو البچي فهميني خلي نسولف ونفتهم

- شوف تلفونك

صعد مستغرب ونزل بعد فترة ضام ضحكته اني شفته لو تخبلت وخصوصًا مَن تخصر وگال ببرود
هُمام- المطلوب هسه شنو؟

- تطلگها

حجه بأسف
هُمام- لاه حرام بابا بنات الناس لعبة

چانت يمي مزهرية تلوك لراسه بهاي الساعة
لزمتها وشمرتها عليّ بَـس هو لحك يدنك
راسه ويباوعلي مصدوم وفاتح عيونه
چنه ضفدعة وعاط

هُمام- بنت الـ * مَن **

هوااااي طوط بهاي اللحظة لان طلع شخصيتة
السرسرية ولسانه الفالت عليَّ

- حاب تنذبح گول ليش تحجي هيج كلام اختصرها عليك وعليَّ

هُمام- على هاي سوايتچ لو تموتين ما اطلگها ابقي احترگي بنارچ

- تلوحك واحرگك

- اذا منچ النار يا محلاها

تعبت منه ومَن الكلام ونزلت راسي
رخت اعصابي وبقت دموعي هي تشرح
كمية العجز الاني بيّ ، شلون سويت هيچ
بنفسيّ؟ ما فكرت مُمكن يميل الها وهي ما
ناقصها شي وحتى بالجمال هي احله مني
واكبر مني ومكملة دراسة والاهم تگدر تجيبله اطفال بشنو فكرت وزوجته ميار؟

بَـس ما عاد ينفع الندم !!

قرفص گدامي ورفع راسي يطرف اصابعه
هُمام- أمريني

- تعبت

هُمام- اطلگها؟

هزيت راسي بـ اي
هُمام- نطقيها گولي طلگها هُمام ما اگدر اشاركك ويا اي مرة على وجه الارض

- طلگها أنتَ مالتي وبَـس واي وحدة تتقرب منك اموتها

- تم بَـس مسحي عيونچ

تقربت منه اباوع بعيونه
- والله تسويها؟

هُمام- كلشي مُباح لـ حلوتي ام عيون شهل وطلباتها اوامر عندي ما تبات ليلة اذا ما تتنفذ

ㅤㅤ
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••

مسـرة•

حاطه أيدي على خدي وگاعده منتظره المسعد مالتي
صارله نص ساعة مَن خابرني وگال جايبلچ
شغلة طلعي انتظريني بالحديقة الخلفية
تأفأفت ضايجة وهمست

- شدعي عليك قسور !!

قسورة- لچ زماله ينطيچ گلبچ تدعين عليَّ

ضحكت مَن شفته مسافة عني وبيده كارتون
حطه يم رجلي وربع مبتسم وهوَ يدفعه ناحيتي

- شنو هذا عزااااااااا

صرخت مَن حسيت اكو شي بداخله يتحرك
قسورة- وقز القرط گرصيها العايقة

- شنو جوه حية من حياتك البتلفون؟

- جبتها تلدغ لسـانچ وتريحني منه

- قسوووورة اغلط والله اغلط

قسورة- خوش تربية العايقة الادبسز اشك حلگج ومُحمد اذا تغلطين

- ما تستاهل گاعده وانتظرك

قسورة- دنطمي وفتحي شوفي شنو بيّ

- اعيط والله اذا شي يخوف

- دفتحي فتحي

سميت وبلشت افتحه وحاطه گلبي بأيدي
هنـاك وفتحت عيوني وعطت مَن الفَرررح
عزااا جايبلي بزونه
ذاك اليوم سولفتله شگد احبهن وهوَ ما
خلاها بنفسي وجابها اليَّ

شلتها اوي شگد لطيفة !! تحرك راسها برقبتي
وتطلع اصوات تموت گزگزت عليهاااااا

- قسور حَـموت مَن الفررررح

- هههه اسم الله حبيبة الرَوح

حضنته مَن الجهة الثانية وحجيت متحمسة
- هاي بنتنا قسوووور شنو نسميها

قسورة- طاح حظچ هههههههه

- يلـه نسميهااااا فدوة فدوة

هز راسه ونطق عينه بعيني
- سميها

حطيتها على صدري احرك ايدي عليها بحُب
- عيونها زرك !! نسميها زرقاء؟

عكمش وجهة وغمني
قسورة- طاح حظچ على هيچ اسم

- لعد؟

قسورة- بما أنُ لونه ابيض وهذا الحلو ذكر مو أُنثى شنو رأيچ بـ "أقمَر"؟

- يموتتت اوي اقمري الحلو

قسورة- لااااا صار بيها تملُك جيبي ارجعه

- حبيبي لا حبيته والله تعال ابوسك

تقرب بسته بخده
- احبـك لان ما بقيته بنفسيّ

- فداچ

بقيت اداعبها والعب وياها وبعدين شلناها متوجهين لـ بيت عمو كليم اليّ بَـس شافها
ضحك وتقدم اخذها مني

كليم- لك لك منو هالحلوة

- هذا أقمَر وهوَ ذكر عمو

كليم- فدوة شنو من جمال سبحان الخالق

رنيم- عزااااااا اخااااف طلعوهاااااا

دموع- يمه تمووووت انطينياها عمو

اخذتها دموع ورنيم تطفر خايفة
رنيم- اخاففف كليم خلي يطلعونها

سحبها تحت ذراعه وگال
كليم- لچ بابا ما تأذيچ وين اكو الطف من هالكائن؟

- معليَّ اخاف

- ترا أقمَر ابني ما اقبل تطردينه

كليم- يتربه بعزك ابو أقمَر

قسورة- حبيبي خالي يوم الالك

دموع- هههههه بعدك ما شايف شي خلال سنة نشوف الشيب طاخ براسك مَن ورا هاي المسودنه

اخذت أقمَر مَن أيدها ومديت لساني
- موتي قهر ما انطي الچ

عفت رنيم تطفر يم عمو كليم خايفة وقسورة طلع ودموع تركض ورايَّ علمود تشيل ابني
بَـس لو تموت وتطلع نخلة براسها ما انطي

صارلهُم يومين عمو هُمام وسارة مختفين
بعد ما تخربطت سارة شفناها وبعد انقطعت
اخبارها لا هي ولا عمو يطلعون مَن البيت
تلفونها مقفول وعمو كليم مَن يخابر على عمو
هُمام يجاوبه ويگله تلفونها عطل وهُما ما
بيهُم شي ومرتاحين ودا يقضون وقت حلو سوا

ما اقتنعنه بَـس ما باليد حيلة تركناهُم يحلون امورهُم بيناتهُم

الفجر طلع عمو كليم يلتحق ورنيم نطت مَن البچي وهوَ خطية احتار بيها حاضنها
ويلوب شلون يروح وهي فحطانه هيچ

نجلاء- صلي على محمد وآل محمد ماما هوَ اسبوع ويرجع

رنيم- ما ما كليم بداعتي رجع شغلك مثل قبل

كليم- وداعتچ احاول بَـس كافي مو وقالع باب خيبر مردتي گلبي

بعدها عنه يمسح دموعها ويبوس براسها هنا بَـس شفنه باب بيت سارة ينفتح ويطلع
منه عمو هُمام متقدم وسارة بعده بكم خطوة وفعلًا شكلها ما بيّ شي يدل هي مو زينة !!

سحب رنيم بحُضنه
هُمام- كافي بنيتي مو زين عليّ هذا البچي لا تفاولينه

رنيم- ما اريده يروح خالو حتى أنتَ بعد لا تروح

سحب ايدها گدامنا كُلنا يبوسها ويجاوب
كليم- شغل بَـس والله لعيونچ احاول احله وارجع شغلنا طبيعي مثل قبل

هُمام- اشش بابا كافي ودعي وادعيله يروح ويرجع بالسلامة

رجعت حاضنته بطلت تبچي بَـس دموعها
تلالي بعيونها ، ودعنا كُلنا واخر شي تقرب
مَن امه وباس ايديها

كليم- امانتي يمچ بنتي ورنيم حجية حطيهن بعيونچ ولا تزعلوهن

ام كليم- روح وگلبك بارد بعيوني احطهن

باس راسها وراح تحاضنوا هوَ وعمو هُمام
طلع بَـس ماكو ثواني وانفجرت رنيم تبچي
حضنها عمو هُمام واخذها ويا للبيت هوَ
وسارة واحنه دخلنا للبيت وقسورة راد يدخل
ولزمتله عمة نجلاء الباب

نجلاء- وين؟

قسورة- جوه!

نجلاء- امشي ولي انطمر ببيتك ممنوع تبات هنا ومسرة موجودة وبعدكُم ما مسوين عرس

قسورة- صدك تحجين امي؟

بدون ما تجاوبه طبگت الباب بوجهة وطردته ودخلتنا جوه نكمل نومتنا

ㅤㅤ
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••

سـارة•

سانده جسمي على الباب ومكتفه ايدي لصدري
اباوعلي يمسح على راس رنيم ويقرأ آيات
بصوت هادئ لحد ما فعلًا غفت والشهگة
بعدها بيها وعيونها منفخة ومبينه اصلًا هي
ما نايمة وگاعده تنحب الليل كله

ابتعدت مَن طلع وسد الباب باوعتله مَـن
فوك لـ جوه ودرت وجهي اريد ارجع
مخنوگه منه لان سولفلي وعرفته طول الوقت
ناصب عليَّ ومأذيني ومتونس على أذيتي
في سبيل ياخذ اليّ يريده ونجح

لـيث خابرته ومَن عصبيتي دست ويا بالكلام
لان عرفته هوَ الداز الرسائل بطلب مَن هُمام
ورُغم هذا الشي اجه وحاول يحجي ويعتذر
بَـس رفضت وبقيت بالغرفة فوك

حسيت بيّ يقبض على أيدي ويسحبني
فوك !!

- اترك ايدي ولا تلمسني

هُمام- لا بالله مخبلة ومو بعقلچ ما مليتي أنتِ

- ضحكت عليَّ!

هُمام- الكلام وياچ عقيم واني نعسان

- اطلع نام جوه

استغفر ومسح على راسه ، صفن هز راسه
گام ووگف عقلي مَن اتصل على الشغل

هُمام- حبيبي بخير ، والله رايدك بخدمة... حبيبي خادم ربك بَـس تعرف علاقتي بـ كليم واريد التحاقنا سوه ورجعتنا سوه هههههه اي والله ما اگدر افارگه
اي اريد اصعد اليوم ويا نزل اي واحد مَن الشباب دبرها فدوة لعيناك ورجعلي خبر ، الله وياك حبيبي

سد التلفون وگام سحب جنطته يخلي اغراضه بيها
حَـيرجع يلتحق وهوَ بعدها اجازته !!

- وين هُمام؟

كملها وگام بدل بدون لا يجاوب شوي واجاه اتصال
هُمام- ممنون ارجعها الك بالافراح حبيبي

سده وتأكد مَن كُلشي يخصه واني واگفه
دار يباوعلي
تقدم حاوط وجهي ونزل بايسني غمضت
عيوني مَن الشعور الحلو الحسيته بداخلي
ابتعد ومسح على خدودي بـ ابهامه

هُمام- تعبت اني سارة وصدگيني اذا ابقى اكثر وأنتِ بهذا اسلوبچ اكسر گلبچ الافضل اصعد للشغل وتاخذيلچ اسبوع تفكرين وتتخذين قرارچ يا نرجع مثل قبل وننسى يا..

ذب حسرة وكمل
- يا ننفصل لان انتهت طاقتي واني وحدي دا احاول اصلح علاقتنا

فتح الكنتور وطلع فلوس يحسبهن وتقدم حطهن بأيدي
- روحي ويا اختچ للسوك وجهزيها وهاي فلوس خاف ينقصچن شي لا تضغطن على قسورة ترا ما عنده ذب فلوسه على البناء والزواج كلشي تحتاجينه خابريني

- هُمام

هُمام- مدامتي الحلوة

رفعت جسمي على اطراف اصابعي وحضنته دافنه راسي برقبته
ضحك وبادلني وهذا چان افضل قرار نتخذه علمود نفكر واحنه بعيدين عن بعض

نزل جوه ودخل باس رنيم مَن راسها وهي
فزت مخترعة وبَـس شافته بالزي العسكري
بچت وتعلگت بملابسه وهوَ يمسح على راسها

هُمام- افضل نروح سوه ونرجع سوه ترا مو بَـس أنتِ تغارين على كليم اني هم اغار لا يصادق غيري هناك

ضحكت تمسح عيونها
رنيم- اي روح ويا لا يخونه

ضحك وكرص خدها
هُمام- الملعونه يفديچ خالچ خوش؟

رنيم- هههه خوش

ودعنا وطلع ويا بداية شروق الشمس
ما ضجت لان چنت احتاج ابقى وحدي وافكر
من يومها بلشنا نجهز لـ مسرة وهي بعد رَوحـي
طايرة مَن الفرح وما سايعتها الارض وحتى
قسورة چان سعيد وضحكته دوم على وجهة

ما بقى غير يومين على رجعتهُم وهذا الاسبوع نسوي العرس بوجودهُم
بَـس ما چان عرس مُبالغ بيّ بالعكس
فاجأنا مَن رادها بَـس زفة لـ احتياطات
تخص شغله !! سكتت لان مسرة قابله
ما گدرت اعترض

بنزولهُم كليم وهُمام الكُل وگف يستقبلهُم
اباوع كليم حاط بنته مَن جهة ورنيم مَن
جهة وتقرب باس راس امه
وعمة نجلاء سلمت عليّ وهوَ يحترمها ويحبها
نزل راسه باس راسها وايدها وما يصيحلها
غير "الغالية"

نزل هُمام مَن السيارة وضحك مَن شاف رنيم
تعوف كليم وتركضله
حضنها شايلها ويباوع على كليم بشماته

هُمام- باعوك

كليم- لو تموت ما اضوج أنتَ غيرتك كاتلتك

ضحك ودار عيونه لحد ما صارت عليَّ
بقى يباوعلي وحسيته منتظر مُبادره مني
تخلي يعرف قراري
ابتسمت وتقدمت لازمه ايده لان ما اگدر
احضنه گدام الكُل

- الله يساعدك

هُمام- ويساعدچ

ضغط على أيدي وابتسم
هُمام- كليم باچر غداكُم عندنا تعرف ما عزمناكُم بسبب الظروف فباچر ان شاء الله ننتظركُم

كليم- ما بيناتنا خيي لا تكلف نفسك

هُمام- تجي ورجلك فوك راسك

كليم- صار هههه

دخلوا لبيتهُم وطبعًا البنات لحد الان شايلات على هُمام
تقرب مد ايده اليَّ وبدون كلمة زايدة لزمتها
وصرنا نتمشى للبيت وهو ساكت وهادئ
بشكل نوعًا ما غريب لان عادتًا ما يكون هيچ

قطع افكاري صوته
هُمام- نحجي؟

- اي

غير طريقه للحديقة الخلفية ، قسورة حط
بيها كراسي لان مرات يطلعون ام كليم هناك
وعمة وياها وحتى لا تبقى واگفه حطوهن
وهمات علمودنا خاف نحب نگعُد هنـاك

گعد وسحب كرسي مقربه عليَّ وگعد قريب
منيّ !! اخذ ايدي وملامحة كُلش طبيعية
وما بيها أي ردة فعل تدل على أنُ هو متوتر
او عصبي ومزعوج مَن الموضوع الحَ نخوضه

هُمام- تتذكرين اخر كلام اليَّ وياچ مو؟

- اي

هُمام- وكوني متأكدة مَن ما اتصلت طول الفترة المضت فهوَ علمود تاخذين قرار سليم لحياتچ بدون ضغط منيّ

- اعرف

هُمام- واكيد تعرفين اني چنت اعني كلامي بالحرف الواحد! بخصوص قرارچ هسه اذا گلتيلي ما اتحمل وما اريد مَن هالعين قبل هالعين اهم شي راحتچ بَـس يا سارة موضوع زواجي مَن غيرچ شيلي لا مَن أنتِ على ذمتي ولا بعد انفصالنا لان هذا "اشر على گلبه" خلص انختم الچ وما يتقبل غيرچ فيا بنت الناس اني ما عندي طاقة والله الصار تعبني واريد راحتي منچ انطيني كلمة وعلى هالشارب تتنفذ والله

- مهما كان قراري تنفذه؟

هُمام- الزلم افعال مو بَـس كلام جربي وتأكدي انفذ او لا

گمت فتحت ايده وگعدت على رجله
- ورجال اليَّ غيرك ما يصير

ابتسامة تعب تسللت لـ شفايفه
هُمام- يعني؟

- اريدك اني ما اشوف حياتي بدونك صح مُمكن انانية منيّ احرمك مَن شي تگدر تحققه بَـس ما اتحمل هُمام چنت اموت بَـس اعاند اما هسه مُستحيل اخاطر بيك مرة ثانية

- رجالچ ما يصير لغيرچ

دنگت بايسه شواربه اويلي نُقطة ضعفي!
ابتسم وحاوط جسمي مقربني منه وحاط
راسه على صدري ويذب حسرات
سوده عليَّ مبين تعبان وهاد حيله الشغل
والتفكير بموضوعنا مستهلك طاقته كُلها

- محضرتلك شلون غدا تموت عليَّ

هُمام- سمچ شوي

- ههههه ايييي اعرف تحبه ومَن ايدي

اخذ ايدي باسها
هُمام- عاشت ايدچ شهلائي

- يلـه حبيبي گوم اسبح جهزتلك الحمام

اخذته مَن ايده للبيت ردت ابقى بالمطبخ
بَـس فاجأني مَن تقرب محاوط خدودي وگال

هُمام- تتذكرين مرة گلتيلي اساعدك تسبح ورفضت لان بعدنا ببداية زواجنا؟

جمرت خدودي بخجل واني اهز راسي
هُمام- لعد اليوم اريدچ تساعديني

بدون ما ينتظر منيّ جواب سحبني فوك ودخلنا للحمام
غمضت عيوني حاضنه نفسي مَن شفته بلش
ينزع گدامي عادي عنده؟!!!! بلعت ريك مَن
حسيت بيّ قريب

هُمام- نبلش؟

- هاا شنبلش هُمام شبيك؟

ابتسم بخُبث
هُمام- وين راح بالچ حبيبي ترى قصدي شريف شوفي حتى الشورت ما نزعته

- ها اي يلـه

هُمام- بَـس لا تغتصبيني يلـه شنو؟

- عزاااا تأدب

هُمام- أثاري تمهيد الموضوع ما يفيد شو تعاي

سحبني وبدت سوالفه السرسريه
وعود اخسر گدامه؟ لا والله سوه اليَّ يريده
وفوگه حبة مسّـك
يلـه عود خلاني اطلع مصخنة مَن الخجل
وهوَ بعدي بفترة طلع لاف المنشفة على
خصره ويضحك متونس على خجلي ويغمز المستهتر
خزرته ودرت وجهي

هُمام- بَـس لاما عجبج أدائي مع الاسف عليچ

ما جاوبته رجع گال
هُمام- بَـس بشرفچ شلون قُدرات عندي

- تأدب هُمام

هُمام- اليشوفچ هسه يصدك خجلانه ولا كأنوا قبل دقائق مسنحه بحضني

- شيخلصني مَن لسانك بعد اطلع احسن

اخذت ملابسي وطلعت بدلت بالغرفة الثانية ونزلت احط السفرة علمود ناكُل
شوي ونزل
باس خدي وگعد ينتظر اكمل السُفرة وهوَ
يستفسر على تجهيز مسرة واني اجاوبه شنو سوينه بغيابه

گعدت وهوَ بلش ياكل مستلذ بالطعم
هُمام- عاشت ايدچ حبيبي الطعم خيالي

- الف عافية عُمري

وبَـس خلصنا هوَ صبله چاي واني عزلت المطبخ وصعدنا
ننام قيلولة الظهر وهمات هوَ تعبان چان ونعسان نام ما حاس على نفسه

گعدت بوقت متأخر اباوعله حبيبي ذاب
نفسه وغاط بالنوم مَن التعب
گمت مَن مكاني غسلت وغيرت منامتي بشي بيتي اكثر راحة ومستور خاف يدخل علينا شخص مَن بيت كليم

سويت عشاء نواشف شلون ما كان
وكل تفكيري بـ عزيمة باچر! قررت اسوي
دولمة ودجاج شوي واسويله حشوة بطريقتي
شفت شنو احتاج وسجلته علمود يروح
هُمام يجيبهن اليَّ وابلش مَن هسه على
الاقل الف الدولمة واخلصها

كملت كُلشي وتوني اريد ادور اروح اگعد
هُمام ، بَـس شهگت مَن حسيت بيّ يحضني
مَن ورا دافن راسه برقبتي ويبوسني بحُب

هُمام- حلوتي ، حلوة المسيح ، لعابتي ام عيون شهل

- هُمامي توي اجيت اگعدك

ما جاوبني وبقى حاضني ويتحسر فجأة
دارني عليّ وباسني بقسوة !! دفعته متلمسه
شفايفي واباوعله مستغربه

- شبيك حبيبي؟

هُمام- ما مصدك خلصنا مَن الهم وبقينا سوه چنت خايف اخسرچ

سحبني حاضني وضاف
هُمام- عليچ الله بعد لا تذكرين موضوع الطفل لا تعبيني خلينا نعيش سوه مرتاحين واحنه لا اول ولا اخر الناس نعيش ونكمل حياتنا بدون اطفال

- اطمئن مُستحيل اكرر خطأي

- احبچ وأنتِ فاهمتني وهادئة

- اموت عليك

بقينا على وضعنا شوي وبلشنا بالعشاء
وبلغته بطلباتي وبَـس خلص راح يجيب
شنو محتاجة
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••

مسـرة•

دخلنا لـ بيت عمو هُمام وخطية سارة طايرة
مَن الفرح وهي تستقبلنا وحستها متغيرة
نفسيتها ومرتاحة حيل غير عن قبل ايام
وهالشي واضح للكُل
گعدوا بالاستقبال واحنه البنات بقينا يمها

سارة- دموع ومسرة بعد ماكو روحه تبقن هنا

دموع- مااا ابقى

- ولا اني

سارة- تمام ما اضغط عليچن بَـس ياريت تتفضلن حالچن حال الضيوف تگعدن وعلى هذا الاساس نتعامل وبما أنُ أنتن زعلانات مَن زوجي يعني زعلانات مني

انطتنا ظهرها تشتغل
رنيم- متصالحين مو؟

دارت تباوعلنا وتقربت مبتسمة وبلشت تشرح النا الصار واحنه مصدومين عزا طلع مخطط لكُلشي علمود يصلح الامور
تنهدت وهي تلزم ايدينا وتگول بحسرة

سارة- الطفل حَـيبقى حسرة بگلبي واتمنى العُمر كُله
بَـس اني ما اگدر اشارك هُمام ولا اتخيل اشوفه ويا غيري اموت والله واتمنى مثل ما اني سامحته وتغاضيت تسوون نفسيّ ونبلش صفحة جديدة ولا عبالچن ما شفت شلون تختلتن بالهوسة علمود لا تسلمن

دموع- كُلشي سوينا علمودچ

سارة- وهُمام سوا كُلشي علمود نرجع لبعض مو لغرض أذيتي

رنيم- الصار خلاچ توعين على خطأچ وتعرفين قيمة خالو وهوَ بالتالي اثبت الچ أنُ رايدچ وما رايد غيرچ رُغم يگدر يستغل الوضع ويتزوج بحجة الاطفال

ضحكت سارة وگرصت خد رنيم
سارة- فدوة للصايره تحجي مثل زوجها

ضحكت رنيم خجلانه
- اني عن نفسيّ نسيت لان سوا كُلشي علمود مصلحتچ وخجلانه على كلامي ويا عزا سارة شلون اباوع بعيونه

نشتغل ونسولف
سارة- هُمام يموت عليچن وامس بالعشاء يصفن ويتحسر ومن سألته يگول مفتقدهن لا تكسرن خاطره ورجعن

دموع- اني هواي احبه بَـس مَن زعلچ كرهته

سارة- لخاطري

دموع- رجعت احبه

سارة- ههههه عفية امي

بقينا نسولف ونشتغل ، هناك ودخل عمو هُمام
خطية ضحك وتقرب باس راسي وراس
دموع وهوَ يگول

هُمام- وحشة البيت بدونچن والله ما ناويات ترجعن شنو كافي تسخت ببيت كليم

دموع- عمو ارجع بَـس بشرط؟

هُمام- ههههه اعتبري تم

دموع- ما تگومنا مَن المسلسلات وتخلينا نتابع براحتنا

صفگت ايدي بأيدها
- اتفق ويا تكي عمو هذا شرطنا

هُمام- ولا اكو استغلال ابد

دموع- ها عمو موافق لو لا؟

هُمام- امري لـ الله بَـس ها مَن تبلش المدرسة يكون اكو وقت مُحدد!

- تمام موافقين

ضحك وطلع
وها صح سارة ورنيم حَـيكملن خارجي ثالث بَـس اني ودمعة نكمل مدرسة متوسطة واعدادية وكذا وهذا چان اقتراح
عمو كليم واكيد نوافق واحنه مغمضين لان هوَ يعرف مصلحتنا

گعدنا على السُفرة وكالعادة الاكل ولا الذ
والمدح والاطراء الاخذته سارة خلاها تصير
حمرة مَن الخجل وخصوصًا عمو هُمام
مدحها وباس راسها گدامنا وكُلنا فرحنة
لان علاقتهُم رجعت مثل قبل واحسن
سارة تستاهل تكون سعيدة بحياتها مَن بعد التعب

مَن خلصنا الغدا وعزلنا المطبخ گعدنا كُلنا
نشرب چاي وقسورة فتح موضوعنا
قسورة- اي حبيبي خالي شنو گلت بعد يومين

كليم- اذا مكملين وما عندكُم شي نتوكل ان شاء الله

بلعت ريك خجلانه مَن وجه عمو هُمام سؤاله اليَّ
هُمام- كملتي تجهيز مو بابا؟

- اي عمو كملت

هُمام- موافقة بعد يومين؟

- هاا براحتكُم

ضحك قسورة وجاوب
- موافقة حبيبي اني اخذت رأيها قبل لا افتح الموضوع وياكُم

كليم- نتوكل ان شاء الله ومُبارك مَن هسه

تشكرنا منه وبين سالفة وسالفة خلص اليوم بـ اجمل ما يكون ومَن ثاني يوم
رحنا حجزنا الصالون والبدلة واكيد شلعت
گلب البنات وعمة بـ اختياري
ما عجبني شي بَـس اخر شي وگعت على وحدة
اويلي مَن جمالها صرت بَـس اضحك فرحانة

ثاني يوم طلعنا للصالون اختاريت مكياج
فخم بنفس الوقت بسيط وشعري عفته
مفتوح ما حبيت ارفعه حسيت هيچ احله عليَّ
واهم شي يلائم بدلتي ومكياجي بالبساطة

قسورة چان ويايَّ لحظة بلحظة غزله ووعوده چانت كفيلة تخليني اطير واكون فراشة بهذا اليوم المُميز

خواتي كلهُم چانوا ويايَّ وحدة تساعدني
البس البدلة
ووحدة الطرحة والتاج ووحدة تتأكد مَن
مكياجي خاف يخرب بدون ما ننتبه

فرحانه حيل فرحانه ومرتاحة!
سارة- كليم وهُمام حَـيسلمونچ لـ قسورة

عضيت شفتي ودمعتي بعيني
لعد وين ابويه؟ تمنيت هوَ يرفع راسي
بهذا اليوم ويسلمني لزوجي وحبيبي
بَـس كسر خاطري وگلبي وخلاني وحدي

بـ باب الصالون طلعنا وابتسمت مَن تقدم
عمو كليم باس راسي وتبعه عمو هُمام
واگدر اشوف قسورة واگف گدامي وبيده
المسكه مالتي

هُمام- اكسر ظهرك اذا بچيتها والله قسورة لا يجي بالك ولو للحظة وحدة مسرة ما عندها ظهر اني ظهرها وتستند عليَّ واذا شكتلي منك اموتك

كليم- خالك اني واعرف شنو ربيت ومن طلبت مسرة وگفت بظهرك وسعيتلك لا تخذلني وتأذيها لان بوقتها اخليها حلم تتمنى وما تنوله

قسورة- ما تمسها أذية منيّ كونوا متأكدين احطها بعيني

رفع ايدي عمو هُمام وحطها بأيد قسورة
هُمام- الله يوفقكُم ويسعدكُم

كليم- مُبارك عليكُم بابا شايفين الخير

لـيث- عمي ما صارت توصيه فضوووووها اريد ارگص

كليم- لا يا ملعون فضحنا

هُمام- امشي اخذ عروستك قبل لا ننفضح بسبب اخوك الدلالة

ووگعنا ويا لـيث هوَ اليّ يزفنه وكل شوي
تارك السيارة ونازل يرگص
وزوجي خفيف يموت على هاي السوالف
بحيث نزل وعافني يردحون بنص الطريق
بَـس عمو كليم منعهُم منعًا باتًا مَن اطلاق النار

والحمد لله مَن سمعوا الكلمة
صعد يمي فحطان ، رفعت الكبوس خازرته

- صاير خفيف ايع

قسورة- بَـس نوصل إلا افرك حلگچ

- عزاااا لعد وين توصيات عمو كليم وعمو هُمام؟؟؟؟؟

قسورة- افركه بطريقتي

لويت حلگي
- عشتو

يريد يحجي ودخل لـيث شغل السيارة وهوَ
يهز چتف عبالك واحد لازمته كهرباء

لـيث- شلونج زوجة اخوي حزام ظهري

- رگصك يفشل

لـيث- عوذه شوف اللسان

قسورة- عوفها وسوق لا اموتك

لـيث- مَن هسه غيرتي علينا مع الاسف عليكُم

- نشوفك مَن تتزوج

لـيث- انسى اهلي ليش اهلي منو؟

قسورة- لا يااا عار بسيطة اذا ما اسولف لخالي

صف السيارة يباوع على قسورة
لـيث- لا بشرفك إلا خالي

قسورة- اسولفله وحير بنفسك

لـيث- خاب دا طير غير انساكُم وانسى الدنيا وما انسى خالي روحي من الدنيا

ابتسم قسورة وعافه لان مبين ضاج وهوَ
يسوق ساكت مو مثل اول
ربت قسورة على كتفه بحنان وگال بهدوء

قسورة- ما اگله ترا اشاقة وياك

لـيث- بشرفك؟

قسورة- عوف شرفي بَـس والله ما اسولفله اشاقة وياك

دزاله بوسه بالهوى
لـيث- ضلعي أنتَ

ضحك ورجع گاعد يمي ولازم ايدي
ولـيث شوي ورجع طبيعي
قسورة- قسورة يموت على مسرات روحه

- احبك

باس ايدي مبتسم ولـيث وصلنا علمود ناخذ
صور وفعلًا اخذنا لقطات حلوة واخير وحدة متت بيها
چانت أنُ قسورة ياخذ ايدي يبوسها ويباوع
بعيوني واني اباوع بعيونه ونظراتنه چانت
حقيقية بالصورة متت بيها

طلعنا وقسورة كالعادة ربطني تربط خاف
طالع مني شي
ومنا اتجهنا للفندق الحجزه النا عمو هُمام
تلث ايام هدية زواجنا

بقا قسورة يم اخوته واصدقائه يزفونه
واني صعدت لغرفتنا وياعمة نجلاء وسارة
البقن ويايَّ يفهمني ويطمنني

نجلاء- قسورة حنين لا تخافين

هزيت راسي بدون ما انطق وبعد مُدة مَن
النصائح والكلام المُطمئن طلعن
وقبلها سارة حضنتني بقوة وهمستلي

سارة- قسورة يحبچ وهذا اهم مَن كُلشي بهاي الليلة وتأكدي الانسان المُحب مُستحيل يأذي محبوبته

باست خدي وتركتي وحدي
ويا سدة الباب بدأ الخوف يتسلل لـ گلبي
مَن هاي الليلة !! الدموع بعيوني اباوع داير
ما دايري بغرابة واقرص بـ أيدي بخوف

فترة مرت ودخل قسورة قفل الباب ورا
وباوعلي ابتسم بخُبث وهو يفرك ايدي
ببعض

قسورة- اليوم عشاي دسم

هوَ گال هيچ لو حسيته ملك الموت وجاي
يقبض روحي
انفجرت ابچي واشهك مغطية وجهي بأيدي
حاول يبعد ايدي ويهديني بَـس اني چنت
اريد حجة تخليني ابچي

قسورة- شبييييچ باوعيلي مسراتي

- خايفة منك

قسورة- لچ اشاقة وياچ باوعيلي

بعدت ايدي واني اشهك
- الله يخليك ما ارييييد عوفني

قسورة- وداعتچ ما اريد منچ شي بَـس لا تبچين

حضني يهدأ بيّ ، گال وهوَ يضحك
- جبت شلون فلم يخبل هسه نطلعه هوَ وحبشكلات تحبينهن ونگعد نتابع

رفعت راسي
- والله؟

قسورة- لعد شلون؟ بَـس اول شي لازم نصلي وقبلها تگومين تسبحين بماي دافي وتسترخين

- وشعري؟!

قسورة- اساعدچ؟

هزيت راسي بـ اي وهوَ گعد بظهري يفتح
ويسولف ويايَّ على هذا اليوم وشنو صار
ومن خلص طُبع بوسة على كتفي وهمس

قسورة- اخذي راحتچ مسراتي

رجف جسمي مَن نغزتني شواربه وگمت للحمام
بدون ما اباوعله ، ذبيت نفس عميق اباوع
لـ نفسي بالمرايا

- اهدي مسرات ولا تنسين هذا قسورة حبيبچ

نزعت الفستان ومسحت المكياج واخذتلي حمام
دافي رخه اعصابي
توضيت ورطبت جسمي
وحطيت شي بسيط بوجهي ولبست سيت النوم

چان ابيض واطرافه ريش
طلعت وأحَس مَن الخجل وجهي ولع نار
بَـس ما زادها عليَّ هوَ وتفهمني ، قـرص
خدي وتعداني داخل للحمام تاركني وحدي

َفرشت سُجادتي وسُجادته
وعطرت الغُرفة ولبست أزار الصلاة
گعدت بمكاني انتظره وهوَ ما تأخر هواي
بَـس طلع ابتسملي وتقدم باس راسي
بلشنا نصلي
اني خلصت بَـس هوَ تأخر يقرأ دُعاء ما اعرف شنو !!

خلص وگال
قسورة- حضري العشه واني اسوي التلفزيون

وفعلًا چانت ليلة تجنن تابعنا فلم وتونسنا
هوايـة وابد ما ضايقني ولا حسسني بشي
وبنهايتها اخذني بحُضنه ونمنا بعُمق

ثاني يوم فزيت بسبب ضوء ضارب على
عيوني
تمغطت براحة ، قسورة ما چان موجود
گمت ادوره وما حصلته ركضت للتلفون
اريد اتصل عليّ واتأكد هوَ وين راح مَن الصُبح !!

على اخر لحظة فزيت مَن انفتح الباب ودخل
ضحك مَن شافني وسد الباب برجله وهوَ
شايل صينية بيها ريوك يجنن ويفتح النفس

قسورة- يا صباح الحُب على وجهك الحلو

حط الصينية على الطاولة وفتحلي ايدي
ركضت داخله حُضنه بوسني وشم شعري

- صباح النور حبيبي

- يفداچ حبيبچ هوَ وعشيرته

ضحكت وهوَ سحب الكُرسي طالب منيّ
اگعد چان دا يتعامل طبيعي وخلاني انسى كُل الموضوع بخصوص علاقتنا الزوجية وهذا الشي ما چنت متوقعته مَن قسورة للصراحة

خلصنا اليوم الثاني بالغرفة نطلع العاب وافلام ونتونس بدون ما نتطرق لـ أي شي وهوَ ما تقرب وباسني فقط على خدي وكتفي لو يگعدني بحُضنه مَن نتابع فلم !! َ

باوعت للساعة بـ ١:١٢
- نعست

باوعلي بحيرة وابتسم
قسورة- يلـه ننام

گمت متوجهة للحمام غسلت وسويت عنايتي لبست منامتي وطلعت ، فتحلي ايدي ركضت داخله حُضنه بوسني وشم شعري ونزل ملتقط شفايفي يبس جسمي مَن حركاته الجريئة

بَـس ابتعد دفنت راسي برقبته اتنفس بسُرعة وتوتر حرك ايده بخفة ريشة على كتفي وظهري ورجع رفع راسي مَن فكي واخذ شفايفي
يتفنن بيهن بحركات بطيئة للحظات تصير قاسية ويرجع بعدها يعاملهن برقة بهاي اللحظات الدوخني بيها چانت ايدي تجردني مَن كُلشي

همست مَن ابتعد عني يلتقط انفاسه
- طفي الضوا الله يخليك

بدون ما يجاوب سوا الاريده ورجع ضايع بيَّ ومضيعني بيّ
چانت ليلة تخوف ومُخجله جدًا بَـس لان هوَ الانسان الصح گدر يسحب مني الخوف
ويتحكم بردات فعلي ويحتويني

ثاني يوم من گعدت اخذتلي لحظة إدراك
للصار اباوعله حاضني ونايم براحة
عضت شفايفي وابتعدت والحمد لله ما فز
لبست ملابسي وركضت للحمام رُغم الوجع
الدا أحَس بيّ

الشي الوحيد الغلط بيّ قسورة بليلتنا
هوَ تقربلي اكثر مَن مرة وهسه اكو اوجع
بَـس ماكو نزيف !! لان سارة گالت اذا توجعت طبيعي
واذا صار نزيف لازم ابلغ قسورة واروح للدكتورة
لذلك سكتت متحملة

سبحت وبدلت وطلعت لگيته گاعد ابتسملي
وأشرلي اروحله ما ترددت لحظة
صح چنت خجلانه بل دا اموت خجل
حضني وباس راسي

قسورة- متوجعة؟

- شوي

- تحتاجين دكتورة!

- لا

ضحك مرتاح وسحبني يبوس بخدودي
بَـس ابتعد مَن همست
- قسور اني مليت خلي نرجع للبيت

قسورة- هسه؟

- اي

- خليها لليل

مَن صار الليل اتصل على البيت يبلغهُم برجعتنا
وطلب مَن عمو كليم يدزلنا سيارة حماية
وفعلًا دزولنا وحدة
نزل گاعد يم رجلي يربط حذائي الشلع گلبي
مَن گمنا اخذ ايدي وطلعنا طلب مني انتظره
على جهة وهوَ راح يحجي ويا الريسبشن

اخذ ايدي وطلعنا متوجهين للسيارة بَـس
قلقني مَن صار يتفحص السيارة مَن برا ومَن
جوا ، تأكد يلـه طلب مني اصعد وساق

- على شنو چنت تدور؟

قسورة- ولا شي مسراتي

- قسورة بطل تعاملني مثل الاطفال !! اني افهم اكو شي خطر

مسح على جبينه وجاوب
- حياتي بخطر اكو تهديدات دا توصلي وخفت عليچ لذلك تشوفيني حريص لان أنتِ ويايَّ و...

قطع كلامه وبقى يباوع مَن المرايا
- شبيك؟

قسورة- السيارة؟ سيارة الحماية ماكو اختفت !!

بلع ريك ووجهة صار اصفر وهوَ يدور بخبال
على شي ومَن ما لگا تخبل صار يضرب
على لستيرن

- شبييييك؟

قسورة- سلاحي! لا ياربي سلاحي ماكوووو مسراتي اتصلي على خالي بسرعة

صار يسوق بسرعة ووترني ويا
اتصلت على عمو كليم وايدي ترجف واشهك
بدون دموع مَن الخوف دموعي جمدت بعيني

بَـس جاوب عطت برعب
- عمووو تعال فدوة تعال

كليم- اسم الله بابا شبيچ

اخذه قسورة وعاط
- خالي اكو كمين اكو لعبة ومسرة ويايَّ لا يصيرلها شي فدوة اروحلك

كليم- دز الموقع

شمره عليَّ
- دزيله الموقع بسرعة

سويت الگال عليّ وجسمي يرجف ودموعي
تصب ، شوي وصرنا نشوف سيارات قاطعه
الطريق ومَن راد يرجع شفنه مجموعة سيارات ورانا

قسورة- مسراتي اياچ تطلعين حبيبتي مهما يصير لا تطلعين ابوس ايدچ ابقي هنا واتصلي على خالي لو اموت لا تطلعين

باوعلي عيونه مدمعة تشرح كمية الرعب
العايشه هوَ ومو على نفسه عليَّ

قسورة- لا تطلعين

- خايفة گلبي قسور گلبي

وگف السيارة جسمه متشنچ وشرايينه ناطه
بلع ريك عيونه گدام على الواگف ومنتچي
علي السيارة ويمه مجموعة واگفين
بَـس المتوسطهُم نفسه الحجه ويايَّ بالمدينة

- هذا!!!!

قسورة- اشش خابري خالي ولا تطلعين قفلي السيارة

لزمته ارجف
- بداعتي لا تنزل وتعوفني خايفة

زمخ بوجهي
- ابقييييي هناااا

نتر ايدي وطلع واني اتصلت على عمو كليم بلغته
ورجعت اتابعهُم يسولفون ويستفزون بيّ
بَـس هوَ ساكت ويحجي بهدوء واعرف
علمودي !!

شهگت وقبل لا اعيط رن صوت الحديدة اليّ انضربت براسه بـ إذني !!
شهگت موت فلتت مني ونسيت كل وصية
طلعت منه اليّ ونزلت مَن السيارة اركض

واحد لزمني مانعني واليّ شفته بالمدينة
ضحك بصوت وعينه عليَّ يباوعلي بنظرات
قذرة

كل ذرة بعقلي تصرخ مستحيل يكون الشي الگدامي واقع بس عيوني الشافت الي صار شنو اگوللها وشلون اقنعها؟
شهگة موت فلتت من شفايفي خلت لعيون كلها تتجه عليّ بس ولا نظره هزتني گد نظرت العجز الي بعيونه وهو نايم ؏ الارض وغارگ بدمه..

ما عرفت شنو سبب حالته هاي وليش بَـس عيونه تتحرك وجسمه عبارة عن جثة !!

گمت ما احس بـ أي شي حولي رفرفت روحي مثل الطير واني اشوف واحد من الانذال حط رجله ؏ راسـه ورفع السلاح يريد يرمي..

لساني نعقد اريد اصرخ اريد اگله موتني قبل لا تلمسه لان ما اتحمل والله ما اتحمل..

جان واحد منهم واگف بعيد بخطوات منتچي ؏ السيارة ويدخن صاح..

- لااا تقتله

باوعوله بـ استغراب بينما اني طارت روحي فرح ، اي اي راح يعوفونا واتصل ؏ البيت والاسعاف وانقذا ما راح يصيرلنا شي..

ضحك بصوته المُستفز وگال بفحيح..
- اريد اسوي بي الاسوء من الموت اريده يعيش عمره متمني الموت على الـراح اخلي يشوفه اريد اكسر عنتگته وشوفت نفسه .. بيها!!

رفعت عيني بعينـه ما اعرف شنو قصده بس هي لحظات وگال الجملة الي موتتني الف موته..

- اغتصبوها گدامه ، كلكم!

الي جان لازمني شمرني ؏ الارض اباوع بدون روح درت وصرت زحف اتجاها واخيرًا طلع صوتي..

- لااا لااا فدوة لحد يلمسنيييي بعرضكم بستر خواتككم لحد يلمسنيييييي الله يلعنكممممم عوفونننننني لاااااااا

انسحبت من رجلي وجانت لحضات والفستان صارر وصل وكل وصله بجهة وكل جزء بجسمي انتهك بطرقة اقرف من المُقرفة من سبعة وحوش..

كل صرخة مني جان ثمنها غالي كل اعتراض من ايدي ورجلي جان ثمنه كسر بحيث اسمع صوت عظامي وهي تنكسر وروحي تشوغ لسابع سمه !!

جنت استحي اباوعله واشوف نظراته واني بهيج وضع بس من انتهى كلشي واخذوا شرفي وكسروا عظامي وما بقى بيه شي صاحي ادافع بي عن نفسي ومن تأكدت انُ احنا حَـنموت هنا وهاي النهاية!!

التفتت براسي الاحس بي ينزف بغزارة جانت عيونه عبارة عن قطعة دممم ودموعه ينزلن بهدوء ، جان هذا اخر منظر بعيوني واتعس منظر..

وين اكو اصعب من زلمه يشاهد اغتصاب مرته ؟؟

..

وتستمر الحكاية.. 🚬♣

قناة التلي zainab_salah0