رواية دروب الإِندِثـار الفصل السابع والثلاثون 37 - بقلم زينب صـلـاح 🤎

بقلمي : زينب صلـاح 🧡

لـ روايـة ﴿ دروب الإندِثار ﴾

في الـ part 33 ♡♡

لا تنسون التصويت + متابعة للحساب + التعليق بين الفقرات ☘️

‏بوس الموادع حرام
وبيـه اذيه عله النفس

انت من كتلي انتهينـا
ماكلتلي شجنت احس .؟

•••••••••••••••••••••••••••♕•

مسـرة•

بيت عزاء حرفيًا مَن يوم خطف ريم والبيت تحول بيت عزاء
ما ينسمع بيّ غير الونين والبُكاء وما تعرف بمنو تفكر وعلى منو ينكسر خاطرك
كُل واحد بالبيت مُصيبته تختلف واعظم

مر اسبوع مَن زواج سارة وخطف ريم
ومر اسبوع مَن شفنا عمو كليم وعمو هُمام
وحتى قسورة وايهم بالصدف نشوفهم
وجياتهُم تُقتصر علمود فَد معلومة او
كاميرات الشارع والـبيت

سارة حالتها حالة ومحد يعرف السَبب
مصدومة وماخذتلها رُكن وگاعده ما تقبل تحجي ويا أي شخص
حتى رنيم حالتها بالويل وما تقبل تحجي وياها والاعرفه عن حنية سارة مُستحيل تترك
رنيم بهيچ وضع !!

رتبت صينية أكل ودخلت عمة
نجلاء- هاي المن؟

- لـ رنيم عمة خايفة عليها لا يصير بيها شي

نجلاء- الله كريم روحي حاولي وياها بلكي الله يهديها وتاكللها شي حَتموت نفسها

شلت الصينية وصعدت چانت صغيرة وبيها اكل على گدها
فتحت الباب ووگفت صافنه على حالها
مَن يوم الصار وهي ساكنة غرفة عمو كليم
وحاطه قميصة بحضنه ، الهالات نازلات لخدودها و خلال اسبوع نزل وزنها بشكل كارثي !! وصارت جلد على عظم وبسبب سوء التغذية جسمها يرجف

رنيم- ما أريـــد مسرة ر روحـي

مسرة- احلفچ بمعزة عمو كليم تاكلين شوي حَتموتين نفسچ

بچت مغطيه وجهة بقميصة وتهز راسها برفض !!
- خايفة خايفةة يحملني ذنب الصار خايفة يباوعلي بنظرة تكسر گلبي
مسرة اني خايفة عذاب يسوي شي البنته ما حَ أگدر اسامح نفَسي

گعدت قريب منها وحطيت الاكل گدامها
- عمو اكبر مَن أنُ يحملچ ذنب الصار وكُلنا نعرف أنتِ بريئة

رنيم- لعد ليش ما دا يجاوب اتصالاتي؟

- حتى عمو هُمام ما دا يجاوب وقسورة ما دا يجاوب امه يعني برأيچ هذول همات محملينا مسؤولية الصار؟ بَـس أكيد ما عندهُم وقت ودا يحاولون يرجعون ريم بأسرع وقت

- ان شاء الله ترجع گلبي حَيوگف مَن الوجع عليها

- ان شاء الله ترجع بَـس هسه فدوة اكلي شوي واني حلفتچ بعزيزچ وأنتِ بعَد بكيفچ

تقربت واكلت ودموعها على خدها تزيد ما تنقص
فرحت بهذا الشي حتى لو اكلت شوي وجبرتها تنزل ويايَّ بَـس ياريت ما مخليتها تنزل لان صار شي لا على البال ولا على الخاطر وخاف رنيم شوي قنعت بكلامي حالتها رجعت تدهور

بَـس نزلنا وشافتها بيبي تخبلت عليها بحيث نزلت سب وغلط عليها وحتى على ابوها الله يرحمه

بيبي- مَن يوم الدخلتي بيّ بيتي واحنه ماااا مرتااااحين خربتي بين الاخوان خسرت ابني وزوجي بسببببببچ أنتِ فگر وكل بيت تدخلينه تفگرينه كسحتي امچ وابوچ ولفيتي البيتي اخذتي زوجي وابني وهسسسسسه بَـس رجعتي حَتموتين بنته ولچ طلعي مَن حياة ابني طلعي مَن يوم الدخلتها وهوَ بخراب

گعدت رنيم ساده أذاناتها وتهز براسها بطريقة هستيرية وعمة تحاول تسكت بيبي المو قابله تسكت وتزيد بالكلام
الوضع زاد عن حده واني وحدي احاول اسيطر على رنيم الدخلت بحالة هستيرية

ما تعجبت غير على سكوت سارة وكأنو
مادا يصير شي گدامها وخصوصًا رنيم عزيزة روحها
بَـس سكوتها ما دام هواي لان بيبي شمرت عكازتها على رنيم واجت برجلها
وخلتها تفرفح

سارة- ساكته واگول ام ومقهورة على بنت ابنها بَـس لهنا وحدچ اذا استمر الوضع ما تنهز شعرة مَن راسي اخذهن واهج وروحوا حيروا بنفسكم وطُز ما اهتم ببشر صدگيني ام كليم بَـس خواتي خط احمر اي واحد يفكر يتخطى يلگاني بوجهة

تقربت واشرتلي
سارة- صعديها

- ما تقبل ما دا اسيطر عليها

بنفَس الوقت دخل قسورة ومَن شاف وضع رنيم ركض عليها

قسورة- شبيچ رنيمه شو باوعيلي

رنيم- اني فكر اني نحس حَموتكُم كلكُم

باوعلنا مذهول
- بيبي هيچ تگُلها

بدون ما يجاوب وبحركة سريعة شالها وصعد بيها لغرفة عمو واحنه وراها وهي على فد جُملة ولوعة تبچي وتصرخ
اباوعله وگف بالباب يتصل
رحت قريب منه وصوت تلفونه چان عالي اسمع صوت عمو كليم يگُله بصوت قلق

كليم- شنو هذا الصوت؟ صوت رنيم؟

قسورة- خالي ضروري تجي الحجية مخبلتها ما اعرف شنو گايلتلها بَـس ما دا تسكت

كليم- جاي

غلقه يباوع لحالتها بأسف !! اباوع لـ سارة ولاول مرة مَن فترة تاخذها لحضنها
قسورة سحبني وسَد الباب تقرب وباس راسي

- شلونچ؟

- ما اعرف ، خواتي تعبوا قسورة

تحسر
- كلنا تعبنا كلنا

- ما لگيتو ريم؟

- ماكو شي خالي حَيموت عليها

گعد على الكرويته الموجودة بالصالة حاط راسه بين ايدي
والتعب واضح عليّ ، باوعلي وابتسم وعيونه غائره بتعب

قسورة- مشتاقلچ مسراتي

عضيت شفتي وجسمي قشعر ، لزم أيدي
وسحبني عليّ مقبل كفوف أيديه ويطلق
حسرات كفيلة تهز قلَـبي

- قسورة؟

- راحته ابوية أنتِ

- شبيك؟

- هلكان تعب بَـس ما اگدر اعوف خالي وحتى لو اجيت انام عيوني ما تاخذ نوم وريم بيد واحد سافل مُغتصب ما بگلبه اي رحمة

- عمو كليم بحاجتنا كُلنا الله يصبر گلبه شلون متحمل وبعده واگف على حيله

- ارجعها ان شاء الله وضع خالي كاسر ظهري اول مرة اشوفه هيچ منهار ودموعه سهلة تنزل

ابتسمت وربتت على أيده
- ان شاء الله ترجع ورب العالمين يقر عينكم بشوفتها

- وأنتِ؟

- اني شنو؟

- مسرة شلعتي گلبي ولچ اوف منچ !!

ردت اگوم واسحب أيدي بَـس هوَ رفض وگال يشدد بضغط أيده على أيدي
قسورة- گتلج احبچ وما عندي اي نية سوء اتجاهچ بَـس أريد خطوبة حتى ناخذ راحتنا وما نبقى نتختل هيچ

- لا قسورة

- غير تنطيني سبب مُقنع

وقبل لا انطق بشي سمعنا صوت عمو كليم يصيح بصوت جهوري وروحه رايحه
بسُرعة نزلنا نركض وانصدمت بشكله؟ حيل متغير والتعب البوجهه يكسر الظهر والخاطر وفراق بنته مرسوم على ملامح وجهة

كليم- حسي بيّ يمه ابوس ايدچ حسي بيّ تعبتيني ورحمة ابووووي يعني اني مَن وين اتلگاها؟ مَن الغريب لو مَن القريب بَـس لا والله طعنات الغريب اهون منكم والله اهون

صرخنا مَن شال طبله گزاز ورگعها بالحايط يرجف ويحجي
- مكسور ظهري على بنتي تردين تكملينها عليَّ وتكسريني بيهااا لچ يمه رحمي بحالي تعرفيني اذا صارلها شي ما اعيـش

تقرب يمها يهمس برجيف
- شنو ذنبها؟ بشنو تعيرينها؟ ليش منو جاب عذاب منو وصلنا لهاي المواصل مو ابنچ
لو ما بايعها العار ابنچ چان عرفنا واحد اسمه عذاب چان انخطفت بنتي؟ كااافي كاااافي رحمة للكائنات لحد يأذيها لحد يبچيهاااااااا رحمي بحالي أنتِ ما تأذينها أنتِ تموتيني بأذيتها تعرفين شسوه بيّ صوت صريخها ولوعتها

دار وجهة وبَـس اكتافه تهتز ، بنفَس الوقت نزلت رنيم مَن فوك تركض وشعرها يرفرف وراها
قسورة بسُرعة دار وجهة عنها
وهي عبالك ما تشوف غيره
دخلت لحضنه وهوَ لماها لصدره دافن راسه برقبتها ويبچي خلانه كُلنا نبچي على حاله

قسورة گعد على بايات الدرج وبهيچ صار ما يگدر يشوف رنيم وعمو
گعد على الكرويته وهي بحضنه تشم بيّ شم اخر شي حاوطت خدوده وباست جبينه بقوة

- حَتموت بسببي

بهت يباوعلها ضايع وبعدين باوعلنا وهي كملت
- كليمي اني نحَس؟

كليم- أنتِ خيري وبركتي شدا تحجين؟

مدت ايدها ترجف وصارت تعدله بضياع وكل شوي حاطه خصله مَن شعرها وره أذنها وترجع تعد..

- اني بَـس نولدت توفت ماما واخويه وبعدين بابا وشوف بَـس ربيتني أنتَ مات اخوك وابوك

كممت حلگها تشهك
- وهسه مَن رجعت حَتموت بنتك وأنتَ همات تموت

سحب راسها لصَدره وعيونه جاحضه على حالتها المو طبيعية يباوع لـ بيبي ويگول
كليم- خبلتيها؟ شسويتي يمه شسويتي؟

بيبي دارت وجهة تبچي ورنيم رجعت تبتعد عنه وتحاوط خدوده وتحجي مثل الفاصلة وبغَير عالم !!

رنيم- ما عندي غيرك لا تعوفني كليم حتى سارة تغيرت وما تحبني اني ليش محد يحبني شنو ذنبي؟ تدري حتى خالو مثلك ما يجاوب اتصالاتي اعرف اني السبب بخطف بنتك بَـس...

سد حلگها
كليم- اني احبچ رَوحـي مَن الدنيا أنتِ ووعد بعَد مَن اول رنة اجاوبچ اني اسف لان حسستچ هيچ

- يعني أنتَ ما ضايج مني لان عذاب خطف بنتك؟

- وأنتِ شنو ذنبچ بنياتي؟ لا تفكرين هيچ افديچ بروحي تعبتيني شصاير بحالچ

سندت راسها على كتفه
رنيم- بابا اجاني بالحلم تعرف مَن يوم الاختفيت بيّ أنتَ هوَ دائمًا يجيني

كليم- ما عايفچ اني بنياتي

- كليم بابا يگول حَ أخذچ يمي

صارت لحظة صمت وهي مبتسمه ضافت
- حَ أروح وياه مشتاقتله

لف أيدي عليها وشهگ روحه رايحه عليها
كليم- واني واني تعوفيني لا بابا لا بنياتي خليچ قوية بعَد اكو ايام حلوة حَ اعيشچ اياها

- وبابا؟

- نروح نزوره بَـس صبريلي الله يخليچ لا تكسريني مو حمل بعَد ما اتحمل اموت اذا صارلچ شي

سكتت عيونها تباوع بضياع
وهوَ صار يحجي وياها بهمس
ما نسمع شنو يگول
وهي بَـس تهز راسها موافقة اخر شي صفن وايده لزمت رجلها يباوع مستغرب

كليم- هاي شبيها رجلچ؟ منو مأذيچ؟

رنيم- ما اعرف

رجلها چانت مورمة مَن ضربة بيبي
بَـس ما اعرف هي فعلًا ما تتذكر لو ما تريد تبلغه وتصير مشاكل !! عقد حواجبه بوجه متألم

كليم- لچ بابا شنو ما تحسين بألآم أنتِ؟ وينك قسورة بابا

قسورة- ها بويه

- تعال حبيبي شوفلي صيدلية مفتحة وجيبلي عصارة تخفف الورم

قسورة- تم نص ساعة عندك

طلع قسورة بدون ما يرفع راسه وعمو
يرتب بشعرها ويباوعلها شلون ضايعه
وتعبانه
رفع راسه علينا

كليم- تاكل لو لا؟ جسمها يرجف !!

سارة- لا اليوم يلـه شوي اكلت وقبل لا تجي بدقائق استفرغته

هز راسه متحسف
كليم- ميخالف جهزولي صينية ورتبولي الاكل وعصرولها عصير طبيعي ما دامني موجود خلي اوكلها
مو بنياتي؟ تاكلين مَن ايدي؟

رنيم- تاكُل ويايَّ؟

- صار لعيونچ اهم شي تتغذين

هزت راسها موافقة ودفنت راسها برقبته وجسمها سكن بحضنه
اعتقد نامت !!
تعبان بَـس كُل هذا ما منعه حتى يعتني بيها ، صار يمرر أيده على شعرها وهي مَن بعَد فترة طويلة نامت مأمنه ومرتاحة

شوي ودخل قسورة صاحلي اخذت العصارة مَن عنده وهوَ صعد لغرفته
صار يحط عمو على الورم وهي نايمة بعدين لف رجلها بشاش ، وسارة جهزت الاكل
گعدها يحجي وياها مثل الاطفال ويقنع بيها ويتجاوب وياها وكُلشي تسأل عنه ما يتردد لحظة ويجاوبها

لحد ما فعلًا وكلها كُل الصحن وشبعها وهوَ ما حط بحلگه غير لگمتين او تلاثه هاي مَن هي تستفقده ما دا ياكُل وحتى يقنعها ياكُل
ويلهيها عنه حتى ما تضغط عليّ لان مبين ما دا يشتهي ياكُل

كليم- عفية بنياتي حبيبي يلـه گومي سبحي وجددي نشاطچ

- تروح؟؟؟

- لا رنيمه انتظرچ امشطلچ

- ما اتأخر لا تروح انتظرني

- مَن عيوني

راحت صعدت تركض وهوَ حط راسه بين ايدي تعبان ربتت عمه على كتفه
نجلاء- گوم خوية اسبح وغير ملابسك

كليم- بلا امر عليچ خوية جيبيلي بدلتي الثانية مَن فوك وجهزيلي الحمام

- مَن عيوني

راحت عمه وهوَ باوع لـ بيبي وگال
كليم- امانتچ رنيم يمه بروح العزاز لا تغثينها وتأذينها والله مَن اشوفها تعبانه هموم الكون كلها تتكتل على اكتافي

بيبي- خلص يمه اطمئن بعَد ما احاجيها بشي يضوجها

گام باس ايدها
كليم- عذريني على صوتي العالي ودعيلي الگه بنتي وينجبر خاطري

رفعت أيديها ونشغت
- روح يا كليم يا ابن بطني ربي يجبر خاطرك ويقر عينك بشوفت بنيتك وترجعلك سالمة غانمه

بوس ايديها وراسها وراح للحمام بعَد ما بلغته عمة الحمام جاهز
يمكن رُبع ساعة مرت واحنه گاعدين بَـس فزينا على وگعت الاغراض مَن ايدين رنيم والابتسامة اختفت

رنيم- راح !!

- لا لا بالحمام تعاي گعدي هسه يطلع

سحبتها يمي وگمت اجمع اغراضها
اشرتلي على العصارة والشاش
- جيبيهن لازم يحطلي لان سبحت وراح

- اي حبيبتي هاج

اخذتهن يمها وشعرها يقطر ماي ، عمة شگد
لحت عليها تنشف شعرها بَـس ما تقبل
ومنتظره عمو كليم وهوَ مَن طلع بسُرعة
صاح ضايج

كليم- ليش بابا شعرچ هيچ هسه تتمرضين وأنتِ مناعتچ صفر

- انتظرك

- تعاي تعاي

راحت گعدت بين رجلي وتذكرت مَن مرة گاعدين واجته ريم يمشطلها قبل لا يخطب رنيم
دمعت عيوني شگد مشتاقتلها وخايفة عليها لعد الله يساعد گلب ابوها شلون متحمل؟

نشف شعرها ومشطه الها وظفره الها نفس ظفيرة ريم الفرنسية ومَن خلص طبع بوسة على طرف شعرها
بعدين عدل گعدته يسد بـ أزرار القميص وهي مدتله العصارة رغم عنه ابتسم واشر على رجله

كليم- رفعي رجلج هنا بنياتي

حطت رجلها على رجله وهوَ كملها ولفاها وگام غسل ورجع يلبس بحذائه
كليم- بابا استكانة چاي مَن ايديناتچ

رنيم- تمام

ركضت تسويله وهوَ رفع راسه لـ بيبي يعدل البيرية على راسه
كليم- لخاطري يمه فدوة اروحلچ ديري بالچ عليها

بيبي- روح يمه دور على بنيتك ولا تخاف وحق شهيد كربلاء فلا ازعلها واذا زعلتها يحقلك تسوي التريده

رجعت بيدها استكان الچاي بَـس ايديها
ترجف هوَ مَن شافها هيچ ركض اخذه منها
ورفع ايدها وطُبع عليها بوسة
كليم- سُلمت يداكِ صغيرتي

رنيم- حَـتروح؟

- اي بابا

- ومَن اتصل عليك؟

كليم- وداعة معزتچ أنتِ وريم اذا يمي التلفون مَن اول رنة تلگيني مجاوبچ

رنيم- اريد احجي ويا خالو

كليم- صار بَـس اروح ابلغه وعذرينا احنه لان مشغولين ما نفرغ نشوف التلفون ولا نگدر نجاوب

رنيم- بَـس لا تطول أنتَ وياه جاوبوني باوع كليم اني ما عندي غيركُم أنتَ وخالو

اباوع لـ سارة الندم ماكلها اكل لان رنيم
واصلة مرحلة كُلش خطرة
باوعلها وابتسم
كليم- جيبيلي ماي بابا

بَـس راحت باوعلنا وگال بتحذير وصوت ناصي
كليم- عيونكم عليها خاف تأذي نفسها واي شي يصير اتصلوا بيّ

سارة- لا تخاف عيني عليها

كليم- خوية عيني أنتِ بَـس خففي عليها هاي الفترة تره ما تتحمل ورجعي احتويها هي هم مو ذنبها طفلة وبقت بقرار صعب بينچ وبين خالها

سارة- هاي هيَّ بعيوني احطها لا توصي حريص

رجعت تضحك
رنيم- جبتلك ماي كُلش بارد وهذا بطل طلعته مَن الفريز اخذه وياك بالسيارة

باس راسها
- عاشت ايدچ الحَبيبة

ودعنا واكيد ودع رنيم بشكل خاص لان اخذها وياه للحديقة
واني مَن الفضول ما گدرت ابقى بدون ما اشوف ركضت للمطبخ واباوع مَن الشُباك
حاضنها وشايلها شيل اخر شي نزلها وصار
يطبع بوساته على خدودها وايديها ويحجي
أكيد دا يوصي بيها على نفسها اخر شي اشرلها على الباب وراحت هي فتحته اله وهوَ طلع السيارة لوحلها وراح وهي سدت الباب ورجعت منتعشه بَـس اخذت اغراضها وصعدت الغُرفته بدون ما تنطق بشي ويا أي وحدة بينا حتى ما باوعتلنا

صعدت فوك وقسورة طلع يركض مَن غرفته
اعتقد يريد يلحگ عمو كليم
شو هذا وگف باوع وشاف المكان امان
دنگ وباس خدي بقوة وگال وهوَ يرتب
ملابسه

- فكري مسرات الرَوح انتظر جوابچ

عافني ونزل واني بعدني ايدي على خدي الباسني بيّ واضرب صفنات ما فزيت على أيد سارة تهز بيَّ
سارة- شكو؟

- ولا شي صافنه بوضعنا احم وين رايحة؟

- اشوف دموع مالها صوت قالقتنا بهدوئها هذا بوقت المشاكل

- ورنيم؟

سارة- رنيم وضعها شوي احسن بعَد ما حجت ويا كليم بَـس اطمئن على دموع واروح ابقى يمها خايفة تسوي بنفسها شي
مسرة اريدچ اربعة وعشرين ساعة عيونچ عليها

- بدون ما توصيني اصلًا

هزت راسها وراحة تشوف دموع واني رحت لـ رنيم
چانت گاعده بوسط السرير وكالعادة قميص عمو بحضنها بَـس شافتني ورجعت تهز بجسمها ومرة تبوسه ومرة تشمه للقميص

رنيم- تعاي

سديت الباب ودخلت يمها ، مسحت دموعها وهمست بصوت ناصي تريدني بَـس اني اسمع رُغم محد موجود !!

- مسرة

- ها حبيبتي

ضحكت مكممة حلگها
- اكتشفت شغلة

- شنو؟

نزلت عيونها ونطقت بصوت يرجف
- أنُ اني احب كليم

فتحت عيوني وهي ضحك تهز براسها
- حيل احبه مَن يكون قريب مني گلبي يصير يدگ بقوة وعيوني ما تشوف غيره بالمكان اذا هوَ موجود وأحَس اريد ابقى قريبة منه دائمًا
هوَ صح چان يمي بَـس هسه مَن راح رجعت اشتاقيتله

- گلتيله؟

- لا خجلت هسه شيگول بنتي مخطوفة وهاي البطرانه تعترف بحُبها

- بالعكس لو گايلتله هذا الشي حَيفرحه وينطي طاقة لان هوَ يحبچ

- أنتِ هيچ تگولين؟

- اي اكيد

مسدت على ظفيرتها
رنيم- اريد اتصل عليّ واشوفه يجاوب او لا بَـس خاف يضوج من ملحتي

- لا هوَ گلچ اتصلي

- يعني اتصل؟

- اي

سحبت تلفونها تتصل وفتحت مُكبر صَوت وبنفَس الوقت سارة دخلت
تباوعلنا عاقده حواجبها ، بَـس رجعت تباوع
طبيعي بعَد ما اجانه صوت كليم

كليم- ها بنياتي

رنيم- دا اجرب ترد او لا

ضحك بصوت تعبان ومبين مُجاملة
- وشنو طلع وياچ؟

- گد كلامك ورديت

- الحمدُ لله

- كليم وصلت؟

- اي بابا

- خالو يمك؟ أريده

- لا طالع بَـس مَن يرجع اني ابلغه يتصل عليچ و...

قطع كلامه وصار كلام يمه ونسمعه يعيط بصوت اخر شي گال..

كليم- لازم اروح بعدين نحچي ابويه لا يبقى بالچ يلـه في امان الله

غلقه قبل حتى لا ترد بسُرعة تنهدت ساكته
سحبتها سارة لـ صدرها تبوس براسها

سارة- شلون صرتي امي

باوعتلها عيونها مدمعة
رنيم- الله شگد مشتاقه تگُليلي هيچ "امي"

سارة- ما اعوفچ بعَد امي أنتِ

رنيم- اشتاقيتلچ

سارة- يمچ اني يلـه نامي وارتاحي شوي

بَـس غمضت عيونها غفت
اباوعلها جوه عيونها الهالات
نازله لـخدودها والتعب واضح
بعيونها !!

عفتهن وطلعت للغرفة گعدت على المكتبة اقلب بصفحات الكتاب الاخذته مَن مكتب قسورة
ومرتني ذُكرى يوم عرس سارة وعمو هُمام

تنهدت اتذكر تفاصيل هذاك اليوم ولا أراديًا انرسمت ابتسامة على شفايفي

....

اخذت نفَـس وصرت ادور حَول نفسي گدام المراية مُعجبة بـ اطلالتي
فُستان لونه بنسجي غامق وبيّ لمعة خفيفة حيل مخصر على طول جسمي وحَده جوه الرُكبه بشوي
وسوتلي لمار شعري كيرلي وهوَ اصلًا مو كُلش طويل وقصر بالزايد وضافلي جمال

وگف الزمن بيَّ وتعثرت مَن شفته واگف مچتف ايدي ومايل بجسمه على الحايط يتأملني چان لابس قاط رسمي لونه حالك الـسَواد

صرخات ساحبة العباية اريد البسها بَـس چان اسرع مني
ركض سحبها وشمرها بعَيد وأيده حاوطت خصري وجذبني اله ضربت صَدره ونترت

- اتركني قسورة

- قشمر اليترك هذا الجمال

- حَرااااام غُض بصَرك

- قريبًا يكون حلال مو فَد مُشكلة

الدمعة صارت بطرف عيني وهوَ مَن شاف وضعي ما حب يلح اكثر
تركني وانطاني ظهره يحجي بهدوء

قسورة- لبسي دا احجي وياچ مسَرات الروح

سحبت العباية والشال البس وجسمي يرجف وأحَس بحرارة تطلع مَن وجهي على كمية الخجل الأحَس بيها
حمحمت مَن كملت وهوَ دار يباوعلي تقدم خطوة واني رجعت عشرة بتوتر قهقة يمسح على شواربه

قسورة- حقچ حقچ بَـس ثبتي دا احجي وياچ ما اسوي شي

خزرته
- شتريد؟

- ما خلص عقابي؟

- تفضل اطلع بره ما عندي أي كلام وياك واذا حجيت وياك قبل فهذا علمود دراستي وماكو غيرها

- غلطت وغلط لا يُغتفر مَن تقربتلچ وأذيتچ بَـس اعتذرت وتغيرت

- وتغيرك بشنو يفيدني؟ حَينسيني؟

- انسيچ وحق الزرع حُبچ بگلبي بَـس اريد فُرصة

بهَتت على كلامه وهوَ تقرب مستغل صدمتي وحاوط أيدي
قسورة- احبچ وتبت مَن كُلشي باليوم الأكتشفت بيّ أنتِ ساكنه هنا وهنا
"اشر على راسه وعلى صدرة مَن جهة گلبه"

وبعدين استرسل
- فكري ورجعيلي خبر مسراتي أريد اخطبچ مَن خالي هُمام بَـس تهمني موافقتچ واريد اسعى الها وما يتم أي شي إلا وأنتِ راضية أتم الرضى وبخصوص سارة لا تهتمين على هذا الشارب اني احجي وياها

دفعته واشرت على الباب
- تفضل اطلع بره لا تجيبلي حجاية ما ناقصني اني

قسورة- مسرة دا اتعالج لا ترجعيني لنُقطة الصفر

- تتعالج؟

فرك وجهة وانطاني ظهره وگال كلام خلاني جامدة بمكاني
قسورة- اني مُدمن خلصت حياتي بالملاهي ويا النسوان والشرب وهسه دا اعالج وابتعد علمودچ اذا صديتيني حَرجع للاسوء ما اريد شفقتچ اريد حُبچ واحتوائچ

دار عيونه حُمر حاوط خدودي واسترسل
- قسورة يحب مسراته ومسرات قسورة تحبه
مستعَد اسوي كُلشي في سبيل تكونين اليّ وارضيچ أنتِ وگلبچ واخليچ تسامحيني

ما حجيت وهوَ تلفونه احترك بالمُكالمات اخذ ايدي باسها وطلع تاركني بدوامة مَن الافكار ...
ㅤㅤㅤ
ㅤㅤㅤ
ㅤㅤㅤ
ㅤㅤㅤ
فزيت على فتحتة الباب وسارة اشرتلي بهدوء علمود لا تفزز دموع النايمة
سارة- نازله احجي ويا هُمام روحي يم رنيم وديري بالچ عليها

- ميخالف بَـس رنيم تريد خالها شنو ما تگعدينها

سارة- هسه اشوف الوضع

عافتني ونزلت واني رحت لغرفة عمو كليم نمت بصفها حضنة كف أيدها وهي بَـس حست عليَّ ضغطت على أيدي بدون ما تفتح عيونها
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••

سـاࢪة•

نزلت بخطوات هادئة عكس النار اليّ بگلبي
اول كلام يجمعنا بعَد العن خبر سمعته
وحتى قبل لا اعيش حدادي على نفسي
انصعقنا بكارثة ثانية !!
مع الأسف ما گدرت اعيش أزمتي

وگفت عند الباب وعصرت بطني بقوة والدمعة الحاربتها علمود لا تنزل خانتني ونزلت ، أيدَي ترجف !!
رفعتهن ومسحت على كامل وجهي اخفي
أثار خيباتي وحزني والأهم اخفي أثار
كسري كالعادة ما احب اي شخص يشوفني بحالة ضُعف مهما كان يكون حتى وأن كان الشخص الاحبه وزوجي

طلعت للحديقة بعَد ما ثبتت بصلابة
چان يروح ويجي وواضح هوَ متوتر اكثر
مني وبَـس لمح طيفي جمد
عيونه تباوعلي مشتاقه فصلني بهدوء وشفايف ترجف

تقدم اخذ أيدي بهدوء وسحبني للحديقة الخلفية محد يگدر يشوفنا
ومَن شاف ما عندي اعتراض لأي شي
نزل محاوط خدودي وباسني بطرف شفتي بحركات رقيقة يخاف يأذيني

هُمام- مشتاق شهلائي

رفعت أيدي وحاوط وجهة ورجعت هاي المرة اني المبادرة وبايسته
ابتعدت وهوَ سند راسه على راسي همستله بحزن

- مهما كان حُزني منك وعتابي كبير بَـس اني هم مشتاقتلك هُمامي

- يغديلچ تراب هُمامچ حلوة المسَيح

ابتعدت اعدل بنفَسي وهوَ بَـس يتنهد
هُمام- سارة؟ لا تعلمليني هيچ لان اعرف دا تسلكين للموضوع وتكتمين اني ما أريد هيچ !!
ضربيني سبيني كسري عاتبي سوي اي شي بَـس لا تعامليني مُعاملة الكافر هاي

- ويرجع الوضع تمام؟ حَ أگدر اكون أُم اذا سويت هيچ؟

- لاااا بَـس ما تبقى بگلبچ وتتأذين

- خليها هُمام خليها بالگلب وهي تهون

حاوط خدودي رافع راسي اله
هُمام- كرهتيني؟

- لا ، ليش حتى اكرهك أنتَ؟

- لان ضميت عنچ بَـس والله علمودچ

- زعلانه منك مو معناها اكرهك ضايجة والموضوع حارگ رَوحـي وگلبي بَـس مو ذنبك أنتَ حتى اكرهك

- كليم يگول ما تحجي ويا رنيم ووضعها مو زين علمود الموضوع

مسحت وجهي كارهة تصرفي
- چنت مصدومة واعتقد بدون قصد جرحت رنيم وعاقبتها على شي مو ذنبها لان ضمت عليَّ

- اني جبرتها ردت نتزوج وبعدين اشرحلچ

- اعرف

- نحچي اكثر بالموضوع بَـس تهدأ الاوضاع بَـس هسه رَوحـي صيحي رنيم كليم قلقني عليها

هزيت راسي ومشت بَـس والله هي خطوتين وجسمي رجف ويا صوت صرخة رجت اركان البيت ركضت وصرت اوگع واگوم بَـس أريد اوصل الها

- يمههه هُماااام يممهه اختيييي

توني وصلت للباب واندفعت بقوة وهي طلعت تركض بدون شال تريد تطلع مَن البيت بَـس
الحمد لله هُمام موجود
بحَيث هوَ بقوته وصلابته حاوطها وحضنها مَن وره يريد يسيطر عليها ماكو

صارت تصارعه ، تعجبت على قوتها
هُمام- لچ بابا افديچ بَـس اهدي اهديييي

شعثت شعرها وصرخت بلوعة
رنيم- كليييييييييم ماااااااات احترككك مااااااات

فتحت عيوني وهوَ بهَت ورخة ايده دارها عليّ وحاوط وجهة
هُمام- اني چنت يمه ما بيّ شي

هزت راسها بهستيرية ودفعته تريد تطلع وهو بالگوة مثبتها لاخر شي صرخت وأحَس بلاعيمها طگت

رنيم- فجروااااااا سياااارته كلييييم چان جوه واحتركككك اني شفتتتتتته بالتلفووون كليييييييييم مااااات مثل بابا وانيييي السببببببب

بنفَس اللحظة انفجعت ورَوحي صعدت للسماء مَن طگ خشمها دم وعيونها صارت بيض صرخت وهُمام مات خوف عليها
وأحَس حط سچين بنُص گلبي مَن گال بصوت يرجف

هُمام- ضربتها جلطة !!

..

وتستمر الحكاية.. 🚬♣

الرواية تتوقف لـ تـاريخ 11/20 بسبب ظروف شخصية + بداية امتحانات ما بقالها غير سبع ايام واريد ادرس وان شاء الله بعَد الامتحانات اعوضكم 💙

قناة التي zainab_salah0