رواية دروب الإِندِثـار الفصل التاسع والثلاثون 39 - بقلم زينب صـلـاح 🤎

بقلمي : زينب صلـاح 🧡

لـ روايـة ﴿ دروب الإندِثار ﴾

في الـ part 35 ♡♡

لا تنسون التصويت + متابعة للحساب + التعليق بين الفقرات ☘️

‏روحِي عَلى روحَك تِنسحِن .

•••••••••••••••••••••••••••♕•

نزلت بخطوات تعبانة حرفيًا بصعوبة شايله نفسي
صفنت على ريم الگاعده بحضن عمة نجلاء وهادئة وبسُرعة نزلت دموعي متذكرة اختي وروحي مَن الدُنيـا !!..

گعدت على اول بايات مَن الدرج سانده أيدي على رجلي وراسي على كف أيدي وصافنة بمُصيبتنا
مر عشر ايام على خطف رنيم وماكو اي خبر
سـارة مَن راحت للمُستشفى بعَد ما رجعت صحتها متدهورة وحسب كلام عمو هُمام رجعت عيونها انعمت وضروري تسوي عملية هاي الايام

عمو كليم ما شفنا وما نعرف خبر عنه والغريب هوَ حتى بنته ما اجه شافها ومحد يقبل يگول شي يخصه بَـس اعتقد عمة نجلاء تعرف

فزيت على دموع وهي تسند راسها على كتفي وشفايفها يرجفن

دموع- اشتاقيت لأيامنا بالملجأ صح نجدي وننهان بَـس چنه سوه وما نفترق

حضنتها وبچيت
دموع- هسه لا سارة ولا رنيم دا أحَس نفسي ضايعة بدونهن

- يرجعن ان شاء الله

- واذا ما رجعن؟

- لا تفاولين دمعة فدوة اني گلبي خلصان ما اتحمل بعَد

- اني اريد سارة حَ أخابر ايهم يجي ياخذنا يمها ما اريد ابقى هنا اريد يمها

- تمام اتصلي اني همات اروح

طلعت رقمه واتصلت وما جاوب
خابت آمالنا !!!
بَـس بسُرعة رجع اتصل هوَ ، اشرتلها
تفتح مُكبر حتى اسمع

دموع- ايهم أنتَ وين؟

ايهم- دمعة؟ شبي صوتچ؟

- اني تعبانة اريد امي

بقى ساكت والواضح ما فهم قصدها اشرتلها وهي رجعت گالت
دموع- امي سارة

ايهم- هـاا !! تردين اجي اخذج؟

- اني ومسرة؟

- تدللـين عيوناي جهزي نفسچ مسافة الطريق واكون يمكم بَـس بلغي امي

- تمام لا تتأخر

- تدللـين

سدت الخط وگالت
- رايحه ابلغ عمة وأنتِ صعدي جهزي نفسچ

صعدت جهزت نفسي بسُرعة وهي لحگتني بعدها بدقائق
دقائق وسمعنا صوت ايهم
نزلنا نركض مشتاقين لسارة
نريد نوصل بأسرع وقت وتلمنا بحضنها

عيونه ضاعت بدموع يتفقدها بقلق !!
ايهم- نروح؟

دموع- اي

طلعنا واني تقصدت اگعد وره علمود تگعد
هي يمه وفعلًا صار هيچ
ساق بهدوء بدون ما يگول شي بَـس اني چانت هواي اسئلة براسي واريدلها اجوبة

- ايهم اگدر اسألك سؤال؟

ايهم- اكيد

- عمو كليم وين ليش مختفي؟ هوَ حتى بنته ما رجع شافها؟

تنهد وگال
- ما اريد الحجية تعرف هذا الكلام؟

- تمام

ايهم- خالي ضربته جلطة رجله وگفت ولسانه صار ثگيل وحالتـه الصحية متدهورة

- شنو؟!!! وهسه شلونه؟

ايهم- على الله

دموع- ورنيم؟

ايهم- مع الاسف ماكو اي خبر جديد بعدنا ندور

رجعت كاعده عدل وعيوني شاردة
بضياع !!
شنو مَن مُصيبة حلت علينا
ماكو أي شخص صاحي وحالته زينة
عمو كليم ورنيم وسارة واحنه كُلنا
ضايعين ..

صف السيارة ونزلنا وياه ماخذنا للغرفة
التبقى بيها سـارة !!..
بالنُص وانصدمت مَن شفت عمو كليم واگف يم عمو هُمام بَـس على عُكازة ومبين وضعة تعبان

بَـس شافنا نزل راسه تحسه خجلان لان ما عرف يحمي رنيم رُغم مو ذنبه

- عمو

رفع راسه وحجه بلسان ثگيل
كليم- هـا بابـا

- الحمد لله على سلامتك

- الله يسلمج بنتي

هُمام- سارة جوه بَـس بدون بچي صحتها تعبانة مو مال نزيدها مفهوم

دموع- تمام عمو

هُمام- بارك الله بيچن تفضلن دخلن

دخلنا بَـس اني ما گدرت اكمل وگفت بمكاني اباوع لـ سارة الچانت عيونهـا تباوع للسقف بضياع ووجهة شاحب وضعفانة
دموع ركضت شامرة نفسها بحضنها مخلية سارة تفز واول كلمة نطقتها چانت

سارة- رنيم؟؟؟؟

دموع- هاي اني امي

ضمتها بقوة وبچت تقربت مررت ايدي على راسها وهم رجعت فزت
- هاي اني مسرة

- تعاي

دنگت سامحة الها تحضني
سارة- منو جابچن؟

دموع- اني اتصلت على ايهم وجابنا لان گلبي طگ عليچ والبيت صار يخنك

- سارة ما دا تشوفين؟

سارة- لا صارلي عشر ايام من فقدت بصري والدكتور يگول ضروري نسوي العملية

دموع- حَـتسوينها؟

سارة- اي هُمام لح اسويها وهوَ همات تعبان ما ردت ازيد همه عليَّ

- عرفتي بعمو كليم؟

رجفت شفايفها وهزت راسها
- اعرف اعرف

دموع- سارة اني خايفة ما دا نرتاح ابد من مُصيبة للثانية وهسه رنيم شنو حالها ما نعرف

نزلت دموعها بسُرعة نزلت مسحتهن
- لا تبچين مو زين عليچ حَـترجع اكيد عمو كليم وهُمام يرجعونها

سارة- وأن رجعت !! ما حَـترجع مثل ما راحت عذاب حَـيكون دمارها اختي ضاعت واحنه الضيعناها چان غلط نتركها وحدها

- سارة صاير شي احنه ما نعرفه؟

سكتت وما جاوبتني وسكوتها أكدلي رنيم صايرلها شي وصل سارة لهاي الحالة وجلط عمو كليم
بقينا يمها يوم كامل وعمليتها تحددت بعَد يومين لذلك عمو هُمام طلب مَن عندنا نرجع وبيوم عمليتها يجيبنا نبقى وياها واحنه ما عارضنا

بطريق الرجعة قسورة اخذنا ودموع رجعتلي خطتي وجبرتني أكعد يمه
وطول الطريق اني گلبي ينبض بحلگي وكُلي ارجف مَن هذا القُرب رغُم هوَ
لا زعجني بنظرة ولا بتصرف ابدًا بَـس
اني ما اعرف شنو بيَّ ؟!

صف السيارة ودموع نزلت بَـس اني ما خلاني لزم أيدي وطلع راسه من الجامة وحاجه دموع
قسورة- بَـس احجي ويا مسرة انتظريها لا تدخلين

هزت راسها ووگفت قريب مَن الباب
هوَ دار يتأملني ، رفع أيدي وطُبع عليها
بوسة خربطت انفاسي !!
مال بجسمه عليَّ وگال ..

قسورة- محتاجج

- شبيك؟ أنتَ تعبان قسورة؟

- حيللللل تعبان رَوحـي تعبانة عليچ مسرات الرّوح

- اني شعليَّ قسورة

- يروح فدوة ونذر الچ قسورة وكُل عشيرته معليچ اكيد بَـس اني محتاجج حيل

- ما دا افهم

وصدُك چنت جاهلة معنى كلامة لان لا عُمري ولا بيئتي تسمحلي افهم هيچ نوع مَن الكلام !!
ابتسم وهز راسه يفهمني

- اني تعبان اريد احضنچ اريد ايديچ تمسح على ظهري والتعب يزول
هاي الامور وغيرها ما اگدر اسويها
وأنتِ مو على ذمتي مسرة بداعة سارة
فكري لا تكسريني محتاجج اني ما اريد اسوي شي بالحرام ويلوحچ اغدي تراب على أذيتچ شلون اسويها بقصد؟

- قسورة احنا بيا حال ونفكر بالزواج؟

- اكيد مو هسه نرجع رنيم بالسلامة اول بَـس هسه اني اريد كلمة منچ تريحني وتشيل حمل عن ظهري

- واذا خذلتني؟

- معناها خذلت نفسي قبل لا اخذلچ ووقعت كتاب موتي بأيدي لان بوقتها اكون خسرتچ ويا خسارتچ تكسر الظهر

- مَن ترجع رنيم

- اي؟

- اي موافقة بَـس..

قاطعني
قسورة- ههههه كلها تنحل عوفي البس

- قسورة وابوية؟

- سهلة سهلة احل موضوعه اهم شي أنتِ وافقتي الباقي سهل

- وسارة؟

- حاجيتها موافقة

- ووووالله؟؟؟؟

- وداعت ضحكتچ التفزز گليبي

نزلت راسي بَـس شنو؟ طايرة مَن الفرح
فتح الباب وگال
قسورة- دخلي للبيت حبيبي اني لازم ارجع للشغل ولا تفكرين خلي الامور كلها عليَّ

ودعته ونزلت ، دخلنا للبيت واني أحَس نفسيتي حيل تعبانة بسبب الأمور الدا تصير بينا
اول شي گعدنا بالصالة ونجاوب ؏ استفسارات عمة وبيبي بخصوص الوضع لحد ما گالت

بيبي- ما شفتن كليم؟

باوعت على دموع ورجع اباوع لـ بيبي وحاولت اجاوبها بكُل هدوء علمود لا تشُك

- لا هوَ وعمو هُمام چانوا طالعين بشغل

بيبي- گلبي ناغزني على وحيدي هوَ حتى بنته ما اجه اطمئن عليها

دموع- اكيد دا يدور على رنيم وما فارغ

نجلاء- الله يسر گلبه وخاطره ويرجعها اله

عفناهن وصعدنا بعَد ما استأذنه
دموع بَـس بدلت اجت حاطه راسها
على رجلي صرت احرك اصابيعي
بـ شعرها
اتذكرت وگلت

- دمعة

- ها؟

- اذا اسألچ تجاوبين بصراحة؟

گامت معدلة گعدتها وعاقدة حواجبها
دموع- اي بَـس شنو صاير؟

- شنو بينچ أنتِ وايهم؟

رفعت اكتافها
- ولا شي

- شلون ولا شي؟ وتصرفات ايهم وياچ؟ ونظراتكُم؟

دموع- هوَ لطيف ويعاملني بطريقة حلوة بَـس ماكو شي بيناتنا يعني

- هوَ گال شي؟

- لا بَـس اني ما چنت افهم تلميحات لـيث وهسه فهمت قصدة يعني احم ايهم يحبني

- اي؟

- بَـس هوَ يگول اني بعدني صغيرة وما يحب تصرفات لـيث ويحذرة علمود لا يفتح عيني على سوالف هيچ

- احسن ركزي بدراستج هسه ايهم تفكيرة ذكي ومعقول

هزت راسها ورجعت حطته على رجلي وغفت بَـس كُل شوي تفز وترجع تنام ابد ما چانت مرتاحة
ㅤㅤㅤ
ㅤㅤㅤ
ㅤㅤㅤ
ㅤㅤㅤ

••••••••••••••••••••••••••••••

لـمار•

عفت ماما وطلعت ضايجة مَن قساوة
اسلوبها صح تتصل بخالو وتتواصل وياه
وابد ما تركته وصح ما عندها اي
مُشكلة ويا عائلتها بَـس تگول حالفة ما
اخطي خطوة ببيت ابوي وما اكسر حلفاني

واحنه كُلش حابين نروح لـ بيت جدو
ونقضي وقت ويا البنات ونكون وياهن
بمثل هيچ وضع
لان خطف رنيم كاسرهن اكيد
بَـس ما دا تقبل وتگول ابقوا وياهن على
تواصل مَن خلال التلفون وهذا الشي مُزعج

ومَن بعَد ما چان عندنا امل بـ جُنيد يقنعها هوَ هم شدد على الرفض
ومَن يوم الرفضته رنيم وهوَ اعصاب وحارمنا مَن بيت جدو ما يقبل نروح ابد

دخلت للغُرفة بضوجة وبدون اي سابق انذار
وبدال الضوجة تشكلت عُقدة بين حواجبي
مَن شفت ميار ارتبكت وغلقت تلفونها
سديت الباب
وتقدمت منها احجي بحذر

- شمسويه مَن مُصيبة؟

ميار- ولا شي

- مياااار تره اعرفچ اكثر مَن نفسي لا تحاولين تكذبين كاشفتچ بَـس لا نفس الموضوع بعده براسچ؟

- لاااا

نترت وگامت عايفتني
وگفت گدام ميز التواليت تسرح شعرها
تقربت متخصرة واني متأكدة اختي مسويه مُصيبة

- احجيلي ميار تعرفين اني اختچ ولا يُمكن اضرج واريد مصلحتچ

دارت تباوعلي وحطت خُصلة ورا أذانها وحجت بشُبه همس
ميار- راسلتـه

ضربت خدودي
- عزا بعينچ ميار ولچ غبية الرجال متزززززوج شلون تسوين هيچ

ميار- حبيته مو بيدي

- شنو عرفتي عنه وحبيتي؟ شلون الچ عين تحجين ويا زوجته طبيعي وعينچ على زوجها

تغيرت نظراتها وعيونها نملت دموع
- مو بيدي لمار حبيته تعرفين مَن اسلم عليّ ويگُلي بابا او يابه شيصير بيّ؟ والله دا أحَس بشعور حلو

- جُنيد يموتچ اذا عرف ومُمكن بسببچ تصير بينه هوَ وزوجته مشاكل

- ما اريد أذيتها اني كُلش احبها بَـس ما دا اسيطر على مشاعري اتجاهة والحُب مو بالكيف

- حَـدمرين عائلة كاملة بسبب طيشچ

اجت تجاوبني واجاها اشعار بسُرعة فزت
عافتني وراحت فتحت التلفون
رحت بصفها اباوعلها دازتله "هلو"
وهوَ راد عليها "منو"؟ وياها سطر كامل مال علامات استفهام

قبل لا تجاوب اتصل اباوعلها ارتبكت
بَـس صدمتني مَن جاوبته خزرتها ولطشت
راسي براسها اسمعه يحجي بنتر وخشونة

- منووو؟

بقت ساكته وأحَس بيها ترجف رجع نتر
- ما عندي وقت لسوالف المزعطه بعَد اذا تكررت الرسائل تكون ردة فعلي اقسى مَن هيچ مفهوم

ميار- اني ميار

- ومنو حضرتچ؟

- بنت اخته لـ كليم

صار هدوء واني صرت الطم بصمت شوي
وجاوب الرجال ومبين انحرج

هُمام- عذريني بابا عبالي غريبة امر خدمة محتاجة شي؟

ابتسمت مَن گاللها "بابا" وجاوبته
ميار- دا اريد اطمئن على رنيم شنو صار عليها

اجيت اغمها شلون عذر خايس
خو تطمئن عليها مَن خلال البنات
ليش هوَ؟

هُمام- ماكو شي جديد اني اترخص عندي شغل واي شي تحتاجينه راسلي حُرمتي او وحدة مَن البنات اني ما متواجد بكثرة

ميار- تمام شُكرًا

غلقه واني كفختها خازرتها
- دا يگُلچ راسلي حُرمتي وتشوفينه ما مُمكن يباوعلچ بغير نظره شبيچ تخبلتي؟؟

جاوبتني جواب چان صدمة عُمري
ميار- بَـس سارة ما حَـتگدر تجيبله طفل اما اني مُمكن انطي الطفل اليّ يحلم بيّ

مَن حرگة گلبي ضربتها راشدي واصرخ بصوت مكتوم اخاف امي تسمعنا
- لچ غبية ما سمعتي مسرة شتگولل؟ ما يريد اطفال يريدها هيَّ

- ومسرة گالت سارة تريد تزوجة لا تسمعين شي وتنسين شي وابقى اني افضل مَن اي وحدة غريبة تجيبها اله وتاخذه مَن عندها اني بَـس اريد اكون قريبة منه وما حَ أبعد سارة عنه

دفعتني وطلعت تاركتني بصدمتي والقهرني رخصت نفسها وبقت تراسله رُغم هوَ الرجال يرد عليها مَن باب الاحترام وبشكل مُختصر واذا لحت يگلها راسلي سارة تفهمچ

طول الايام احنه ما نتحاجه وجُنيد شگد لح يريد يعرف السَبب بَـس گلناله موضوع بنات بيناتنا وسكت رُغم ما مصدك كذبتنا

ㅤㅤㅤ

ㅤㅤㅤ

ㅤㅤㅤ
••••••••••••••••••••••••••••••

سـارة•

فتحت عيني مَن البنج على ظلام وأحَس بروحي تلوب
شهگت فازة على أيده المررها بنعومة على خدي وگال

هُمام- الحمد لله على السلامة شهلائي

- هُمام ما دا اشووف

- اي عيوني أنتِ لافين عيونچ هسه منا لـ تلث ايام ويفتحونها ونشوف النتيجة

- اممم لعبانة نفسي

- شنو اسويلچ حبيبي اصيح الممرضة؟

- اي احتاج الحمام

- اني اخذج

- لاااا هُمام

- اششش

شالني بين أيدي وهوَ ساعدني بكُلشي
رُغم اموت مَن الخجل
بَـس هوَ يتصرف طبيعي
علمود لا يحسسني بشي

رجعني على السرير بعَد ما غسلي وطلبلي
اكل وبلغني البنات رجعن للبيت وبالليل
يروح يجيبهن يبقن يمي
تنهدت بوجع رَوحـي وسألت

- رنيم؟

اسمع بَـس تنهيداته
هُمام- ماكو فص ملح وذاب بَـس والله ما يهدالي بال لحد ما الگاها

- كُل لحظة تمر ورنيم يم عذاب تتعذب اكثر أنتَ شفت بعينك شمسوي بيها

- اراوي اضعاف هذا العذاب بَـس الگاه

اندك الباب وحسيت بيّ گام شوي ورجع
هُمام- وصل الاكل يلـه

- ما اشتهي

- ما اريد اجبرج بَـس غبصًا عليج تاكلين أنتِ مريضة

وفعلًا جبرني اكُل واني اي مشتهه ما عندي
نومني وعلى اثر الهدوء بسُرعة غفيت
وما فزيت إلا على بوسات مسرة ودموع
التنطُبع على خدودي

مسرة- روحي روحي أنتِ خوفتينا عليج

دموع- امي مشتاقتللللچ

- ههه تعالن اني طاك گلبي عليچن

حضنتهن متنهدة واكو فراغ بجانب مني
مكان رنيم فارغ !!
ما اشوف شي بَـس أحَس بيهن مَن گعدن
كُل وحدة على جهة ورجعت مسرة تگول

- مَن ترجعين وين تبقين؟

- نرجع لبيتنا ما مرتاحة ببيت ابو ريم

دموع- عمو هُمام يقبل؟

- اني اقنعه

مسرة- سارة؟

- ها ماما

مسرة- أحَس كلام بيبي السبب يعني هواي أذت رنيم وحسستها هيَّ السبب

- كُلنا تركناها وحدها وجرحنها بطريقة مُختلفة ام كليم چانت تبث افكار سامة بعقلها اني عفتها وحدها تصارع الصار وتحارب افكارها وبقت تكتم وكليم وهُمام تركوها بدون خبر لا يردون على اتصال لا شي وختمها عذاب بالفيديو الدزه الها وأكدلها حياة كليم بخطر وكُلنا نعرف شگد كليم مكانته مُختلفة بگلبها

دموع- راحت زعلانه؟

تنفست بضيق
- راحت مكسورة مَن الكُل راحت وضحت بنفسها حتى تحمينا مَن شر عذاب

مسرة- اعترفتلي بشغلة بيوم الي راح بيّ عمو كليم وصارت كُل هاي الاحداث

- شنو؟

مسرة- رنيم حَبت عمو كليم

دموع- نعرف تحبه

مسرة- لچ ثوله نعرف تحبه حُب ابوي بَـس اقصد تحبه ڪزوج

- هي گالت؟

مسرة- اي

هزيت راسي ساكته حيل تعبانة نفسيًا وفكريًا وجسديًا
وأي طاقة تحمُل ما عندي !! مصبره نفسي لخاطر مسرة ودموع وهُمام هم ما اريد ازيدها عليّ هوَ هم تعبان وبدون نوم باقي بيني وبين الركض وره موضوع رنيم

شوي وسمعت الباب ينفتح ووصلني صوته
هُمام- محتاجين شي اريد اطلع كم ساعة وارجع قسورة باقي بره وشرطه موجودين

- هُمام

- ها عيني

- امي طلعوا شوي

ما حجوا بَـس سمعت سدت الباب
وعرفت طلعوا مَن طُبع بوسة على
جبيني
ولزم ايديه بين أيديّ

- صارلك شگد ما نايم ومرتاح؟

هُمام- اووو نسيت شي اسمه نوم لو تشوفين چان اخترعتي مَن وجهي

- ارتاح هُمام فدوة لا يصيرلك شي

- ارتاح مَن يرجعلچ نظرج وارجع رنيم

- اختنگت مَن المُستشفى

هُمام- صبري كم يوم نشوف نتيجة العملية واطلعچ

- تمام بَـس مَن ترجع خلي البنات يرجعون وأنتَ ابقى يمي

جفلت مَن حسيت بأنفاسه قريبة مَن
وجهي
هُمام- مشتاقتلي؟

- اريد ترتاح

- مشتاقتلي؟

- تنام يمي شوي علمود صحتك

هُمام- مشتاقتلي؟

تنهدت واني حاسه بشفايفه تلامس شفايفي بدون ما يبوسني
- هواي اريد تلمني بحُضنك وترتب افكاري

- يغدي تراب هُمام الچ ولمنطوقچ

باسني مطيرني للسماء بـ أحساس كُل
مرة اشوفه بطريقة مُختلفة عن المرة القبلها
ابتعد وگال

هُمام- بالليل ارجع واخذچ بحُضني ترتبيلي افكاري وارتبلچ افكارچ

- احبك

- ميت بيچ وعليچ ابو الهَمم

باسني وطلع والبنات رجعوا يمي ابد ما سكتوا كُلشي شاغل بالهُم وما يعرفون جوابه يسألون واني اجاوب
مثل ما معودتهُم علمود ما يكذبون ويضمون عني ومسرة حتى حديثها هيَّ وقسورة حجته وبلغتها
اذا شفته أذاها حتى لو ما هيَّ مبلغتني ارفض ويحلمون ينجمعون سوه

لليل تقريبًا راحن اخذهن قسورة يرجعهن
وهُمام دخل همست
- تعال يمي

سويتله مكان وهوَ تمدد وسحبني لحُضنه
الله حرفيًا راحة !!
شميته بقوة وشددت لفت ايدي على خُصره

- شتشمين بويه؟

- ريحتك طيبة

هُمام- غير مخيس تضحكين عليَّ أنتِ؟

- والله طيبة

- الله يهديچ

نترت
- هُماااام

ضحك وسُكت لان يعرف اتنرفز مَن شخص
يگول "الله يهديچ"

ربتت على صدره
- نام

- شلون تغمض عيوني ورنيم بين ايدين واحد ظالم ما يعرف رحمة

انقبض گلبي وجسمي رجف
- دا يعذبها؟

سكوته اكدلي هواي اشياء والعبرة تكسرت بصدري
- رنيم ناعمة ما تتحمل؟

- دا نسوي البيدنا واضعاف والله حتى نرجعها هذا كليم رجال مجلوط لا يگدر يحرك أيد ولا رجل ولا ليلة ليل ولا نهاره نهار يبچي دم عليها

- خايفة عليها

- اچذب اذا اگلچ اني ما خايف لا والله ميت خوف لان اعرف عذاب مَن أي طينة وشنو مُمكن يسوي

- مَن تخاف منه شنو تسوي؟ عند منو تختل؟

شهك وگال
- لچ بابا لا تزيدينها عليَّ

- احضني قوي

حضني بقوة وفترة وحسيت انفاسه انتظمت عرفته نام !!
كُلش ارتاحيت لان تعبان ويحتاج يرتاح واني على الهدوء خذتني الغفوة وهيچ مرت الايام لحد ما اجه اليوم الافتح بيّ عيوني ونشوف النتيجة
ㅤㅤㅤ
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••

مسـرة•

سديت التلفون مَن ميار ولمار وگعدت اصفن
ما چنت اعرف اني وحدة غبية
دا يسحبن مني الكلام حتى يلعبنها
صح

نزلت جوه يم عمة ساعدتها باليّ
اگدر عليّ وصعدت اجهز نفسي وبلغت
دموع لان سارة خابرتنا گالت نجهز نفسنا علمود نرجع للبيت بَـس يشوفون وضع عيونها واحنه گاعدين ؏ نار

بَـس شفت اسمها وقبل لا اسمع صوت الرنين جاوبت بگلب مقبوض

- بشرينيييي

سارة- الحمد لله نجحت دا اشوف مسرة بَـس فرحتي ناقصة وعيوني ما نملن بشوفة رنيم

نزلت راسي بحُزن وكُل فرحة راحت
مستوعبة النقص الاحنه بيّ !!
ختمنا كلامنا واني ودموع نزلنا واخذنا
لـيث للبيت بلشنا انضف ودموعنا تچوي
خدنا
لـيث ما راح گعد بالحديقة ما عافنا وحدنا

اول شي نضفنا غُرفة سارة وعمو والمطبخ اهم شي
وبعدين رجعنا للصالة وغُرفتنا
فترة طويلة وسمعنا صوت السيارة
طلعنا نركض وبَـس دخلت رحنا
مفرفحين حاضنينها
مو سارة رجعت لا دنيتنا ومعنى حياتنا رجعت سارة اكثر مَن ام بالنسبة النا

هُمام- اني راجع للشغل

سارة- ادخل اسبح وارتاح شوي اكل شي وروح بداعة رنيم اذا تعزها

تنهد وهز راسة داخل

لـيث- الحمد لله على السلامة مرة خالي

سارة- الله يسلمك

لـيث- يلـه اني اترخص اخذوا راحتكُم وان شاء الله بالليل نزوركُم

سارة- هلا بيكُم بكُل وقت

طلع واحنه دخلنا اباوعلها عافتنا ودخلت
للغُرفة اباوعلها طلعت فُستان رنيم چانت روحه بيّ
ودائمًا تلبسه شمته بقوة واخذت صورتها تبوس بيها ودموعها كفيلة تشرح حالها مهما شرحت اني اقصر

بلعت ريگ شاهگه
سارة- عساني ميته ولا شايفه حالتچ ذيچ امي عساني ميته

- مو زين عليچ البچي سارة

سارة- لو يرجعنها ابچي دم مو دمع خلي انعمي طول العُمر بَـس هيَّ ترجع لحُضني

راحت دموع حضنتها وهم تبچي
اخذت نفس وطلعت محاولة اقوي نفسي
رحت صبيت الاكل الجاهز الجابه لـيث
وكملت السُفرة علمود عمو هُمام
خطية تعبان
وسارة ما عندها قوة تفكر بكُلشي

نزل باوع محد حك راسه وهمس
هُمام- وين سارة؟

- بغُرفتنا رايحة اصيحلها

چان سابح ولابس بدلته الثانية
رحت صحتلهن ورجعنا مُجرد گاعدين
نصفن حتى الكلام ما بينا نحجي
ربتت سارة على ايده

سارة- أكُل هُمام اسند نفسك علمود ترجعلي اختي لان اذا تمرضت وتعبت ما حَـنستفاد شي

بدون ما يجاوبها أكل خاشوگتين يمكن وهمس صوته تعبان
هُمام- الحمد لله سارة چاي وليرحم والديچ

رادت تگوم
- گُعدي اني اصبلك عمو

هُمام- مشكور بابا

هزيت راسي ورحت صبيتله واني توني
حررته ما يحتاج
حطيت الاستكان گدامه ، شربه بسُرعة وگام يتأكد مَن كُل شغلاته موجودة باس سارة براسها وگال

هُمام- ديري بالچ على نفسچ ودعيلي ربي يسهل امري والگاها

سارة- مَن عيوني

هُمام- البيبان كُلها تنقفل اكو دوريات مستنفرة بالمنطقة واكو حماية ثنين بالباب واي شي يصير اتصلوا وهاي حَ أقيدكُم بَـس عذروني علمود سلامتكُم اكو كاميرات بالبيت ما عدا الحمام وغُرفة البنات

سارة- عاشت ايدك حبيبي

ابتسم بتعب وطلع وهي عيونها تلاحگه لحد ما راح وسد الباب وراه
گامت هي وفعلًا قفلت البيبان كُلها وباوعتلنا

سارة- حجابكم ما يوگع مَن الراس !!

دموع- اكيد بدون ما توصين

سارة- مع ذلك تحذرن بَـس هاي الفترة علمود سلامتنا

- تمام ننتبه

هيج مشت ايامنا كُلها حزن الشي الوحيد
الفرق بحياتي هوَ
تواصلي بـ قسورة كثر بشكل مو
طبيعي ، صار يعرف ادق تفاصيلي
يمتى انام يمتى اگعُد؟
وحتى يمتى اكُل

رُغم انشغالاته ورُغم عدم تواجده
بالبيت الدائم بسبب خطف رنيم
إلا أنُ ما تركني ابدًا وچان دائمًا يصبرني
ويطمني رجوعها قريب
وحَـنفرح برجعتها وهاي الهموم فترة
وتخلص !!
ㅤㅤㅤ
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••

سـارة•

كتبت رقم ٥٥ ووگعت دمعتي وياه
رنيم صارلها ٥٥ يوم مخطوفة وما نعرف عنها شي
حَـيصير ألها شهرين هيَّ ماكو
وبيدين شخص ظالم وطاغي
يعني حياتها بكُل لحظة بعيد عنه بخطر

رفعت تلفوني أثر مسج وصلني
كممت حلگي وبچيت واني اشوف
هُمام دازلي مسج على شكل
صورة !!

چان كليم گاعد والمُغذيات بيدي
الرجال مَن يوم انخطفت وهوَ ما مرتاح
دمر نفسه وصاير جلد على عظم
طلعت واشوفه كاتب

هُمام-" جايين للبيت بسُرعة روحوا لبيته وجهزوا أكل ونظفوا غُرفته"

بدون ما اجاوب نزلت بلغت البنات
لبسنا ركض وطلعنا الحماية وصلتنا
بَـس خوش ولد ابدما يرفعون عينهُم على
وحدة بينا
بَـس فتحت الباب عمة نجلاء بلغناها

خطية طارت لان اول مرة يدخل للبيت مَن خطف رنيم
استحينا نصعد انظف غُرفته لذلك عمة صعدت واني لزمت الطبخ وهي صعدت مطمئنة لان تعرف نفسي طيبة بالطبخ

اندك الباب ومسرة طفرت
- انييي افتح

طلعت وراها بَـس فتحت الباب ما گدرت
امنع دموعي ، هُمام خزرني
واشر عليّ ما يريد نزيدها وهوَ تعبان

- سلامتك ابو ريم

هز راسه وما سلم على اي بشر
مُباشرةً صعد بيّ هُمام لـ غُرفته
وبقوا فوك
امه تبچي وعمة حالها مو احسن منها
وبنته فرفحت تريده

نجلاء- ماما اخذي بنته اله

شلتها وصعدت ، طرقت الباب وبعَد
ما سمح هُمام دخلت ضحك يريد كليم
شوي يغير مَن نفسيته

هُمام- شوف منو اجتك

رفع راسه وبعيون ذبلانه ابتسم
كليم- تعاي باباتي

ركضتله تضحك تبوسه بشفايفه وهوَ
يشم بنحرها بشوغة اخر شي هدأت على
صدره
هُمام- صبوله ياكل

كليم- ما اشتهي

هُمام- ما ماخذ رأيك خيي شنو نرجع رنيم ونرفع جنازتك تريد؟ هوَ هيچ موتت نفسك قابل اني مرتاح محترك حرك وشايل الدنيا على اكتافي احتار بمنو؟ بيك بسارة برنيم الما الها أثر؟

اشرلي
هُمام- صبي بسُرعة

نزلت وهوَ نزل ورايا ما حسيت غير حُضني
من ورا فزيت
- هُمام لا يجي احد

- تعبااااان ومحتاجج

- بَـس شوي فدوة عيب

- امشي نرجع للبيت

- هُمام

ابتعد ونتر
- هاااا

- شبيك؟

- شوي ونرجع للبيت

گالها ورجع صعد بدون ما ينتظر مني اجاوبه؟
اخذ راحته لان عمة وبيبي ام كليم مَن
عرفن بي موجود دخلن بغُرفة بيبي وبعَد
ما طلعن والبنات خانسات بالاستقبال

كملت الغده ورتبته ورمشت عليّ
نزل اخذ الصينية

- راح اخذ البنات ونروح للبيت

هُمام- روحي وحدج خليهُم هنا

- ليش؟

هُمام- سارة سوي الاگول عليّ

- شبيك تحجي ويايَّ مَن ورا خشمك هُمام؟

- مَن التعب حبيبي مو قصدي بَـس سوي الاگلچ عليّ رحمي بحالي تعبان والله

- تمام

تقرب باس راسي وصعد واني رحت
حجيت لـ مسرة ودموع علمود لا يستغربن
مَن يعرفن بيّ ما موجودة !!

رحت للبيت جهزتله الحمام وملابسه
واني سبق وچنت مجهزه الغدا
بَـس حررته ماكو تقريبًا رُبع ساعة ودخل
مُباشرةً حُضني وكُل حسرة يذبها تهد جبال

- حبيبي

هُمام- يا راحته لحبيبچ تعبان سارة

بعدته رافعه راسه بسته بخده
- روح اسبح واني اصبلك غده

هُمام- بلگوة واگف ما عندي طاقة

حجيت بخجل
- اسبحك؟

ابتسم وباس راسي
- خليها غير مرة هسه ما اريد احرجج

نزلت راسي ميته مَن الخجل
حاوط خدودي ورفع راسي

هُمام- مو قصدي اخجلج بَـس بعدچ ما متعودة عليَّ مَن هاي الناحية لذلك خليها لغير مرة وإلا اني اريدج سارة

- اعرف

- صاعد اسبح

عافني وراح واني بديت اجهز السُفرة
تأخر حيل لدرجة رجعت الاكل وحررته مرة ثانية وصعدت خايفة صايرله شي
صح هوَ بعادته يتأخر بالحمام
بَـس مو هيچ؟ دگيت الباب ولا أراديًا
طلع صوتي يرجف

- هُمام بيك شي؟

فتح الباب ينشف براسه
هُمام- ها حبيبي

- تأخرت خفت عليك

ابتسملي بدون ما يحجي ونزل
بقيت ارمش شو هذا نزل بالمنشفه

- هُمام

باوعلي
- ما تبدل؟!!

- لا يبرد الاكل مَن اصعد ابدل

نزلت ما اعرف شبي جسمي يرجف انطيته الخاشوگه
لزم ايدي وگال مستغرب

هُمام- ليش ترجفين؟

بقيت اباوعله وأحَس الدمعة صارت بطرف
عيني خايفة يريد يتمم زواجنا واني
ابد ما مستعدة لهذا الشي وبنفس الوقت
ما اريد ارفضه لان خاف يفكر بغير شي

سحبني
هُمام- شبيچ سارة قلقتيني؟

- لـ ليش ما قبلت نجيب مسرة ودموع؟

ويا نهاية جُملتي وگعت دمعتي الحاربتها علمود لا تنزل وتفشلني گدامه
نزلت راسي خجلانه مَن وضعي السيء گدامه رجع هوَ رفع راسي وحجه بهدوء

- علمود اخذ راحتي وياچ !! سارة اي تفكير بخصوص تتميم زواجنا شيلي مَن راسچ تشوفين عندي طاقة لهيچ موضوع؟ اريدچ اي كُلشي بيَّ يريدچ بَـس مو هسه كافي تعذبين بنفسچ شصاير بحالچ أنتِ؟

- تعبانه افكر برنيم

- وتبچين؟ عيونچ تردين ادمرينهن؟ الدكتور شنو گال؟

- اعرف بَـس مو بيدي هُمام

- گعدي

گعدت وهوَ اشر
- يلـه أكلي اعرف بيچ مسويه اضرب

فعلًا صار هوَ يوكلني ويجبرني لحد
ما شبعنا صعد هوَ واني على السريع نضفت المطبخ وغسلت المواعين
وسمعته يصيح بأسمي مَن فوك

صعدت اركض چنت مخلية دشداشة نوم
بالحمام مُريحة وقصيرة شوي
ركض سبحت وبدلت ملابس ورطبت جسمي وعطرت وكالعادة طلعت بدون ما انشف شعري

بَـس دخلت صاح
هُمام- عفية عفية اني كلامي يدخل مَن أذن ويطلع مَن الثانية

- هسه اشسوره

- بسُرعة

گام طفه السبلت والمروحة وفتح الباب علمود تطلع البرودة شوي
بَـس خلصت شغلتهن وسديت الباب ورحت دخلت جوه الغطى وهوَ اخذني
بحُضنه

رفع راسي ودفن راسه برقبتي
شمني بقوة وباس نفس المكان

هُمام- احبچ

ابتسمت ضامه راسه اليَّ بَـس ما چان جايني نوم
رُغم الجو يساعد بَـس ما اعرف عيوني
ما جايهن نوم ، جذبني تلفونه الصار يرگع بالاشعارات

بعدته وهوَ بسابع نومه مَن التعب
سحبت تلفونه وگلبي لعب ما اعرف ليش
فتحته لان رمزه اعرفه
ايدي رجفت واني ادخل على الاشعارات مال الانستا

- شلونك؟
- هُمام موجود؟
- ردت اطمئن على خالو كليم
- شنو اخبار رنيم؟
- جُنيد يگول خالو متخربط هسه شلونه؟
- ياريت مَن تشوف رسائلي تجاوبني

دخلت على حسابها ومُباشرةً عرفتها
هاي "ميار" لان احنه اصلًا متابعات بعض
واعرف حسابها

لعنت الشيطان ورجع بالمُحادثات وصرت
اقرأ واني مصدومة !!!
واضح وضوح الشمس چانت تتوددله وهوَ
يصدها او يگُللها راسلي سارة بَـس هيَّ ولا
مرة راسلتني بخصوص هاي الاشياء وحتى
اغلب تواصلها ويا مسرة او دموع؟!!

حسيت بحرارة دموعي تغطي وجناتي
شهگت بدون قصد وبسُرعة كممت حلگي
واني اسمعه يگول

هُمام- سارة؟ دا تبچين؟

چنت منطيته ظهري وبسبب عبرتي
ما گدرت اجاوب
ما حسيت غير دارني عليَّ عاقد حواجبه
سحب التلفون مني وبقى جامد وباهت
الملامح على المُحادثة !!

..

وتستمر الحكاية.. 🚬♣

قناة التلي zainab_salah0