بقلمي : زينب صلـاح 🧡
لـ روايـة ﴿ دروب الإندِثار ﴾
في الـ part 39 ♡♡
لا تنسون التصويت + متابعة للحساب + التعليق بين الفقرات ☘️
لا يهَمك حَچي العالم
رَكز بيه بَس وَحدي
مَحد مثلي بيك يموت
لا قَبلي ولا بَعدي
أَواجه كُل شي اني وَياك
لَو كُل البشر ضَدي .
•••••••••••••••••••••••••••♕•
نزلت مَن السيارة گدام باب بيت خالو
رجف جسمي وعيوني تعلگت بـ كليم
الكُل چان منتظر ادخل
رجلي التأذيني نوعًا ما اگدر اضغط عليها
بَـس ما اگدر اطول تبقى تأذيني
خالو واگف بالباب وفاتحة يريدني ادخل
بَـس اني عصيت بمكاني وبدال ما اتقدم
داخل البيت رحت لـ كليم
- اريد يمك
رفع عيونه بلمحة بسيطة ورجعهن يباوعلي
تقدم وحاوط خدودي
كليم- اني هم اريدچ يمي بَـس هُمام راح يضوج؟ واني ابقى يمچ ما اعوفچ
- ما اخذني يمك اخااااف
هُمام- اني موجود رنيم !!
- اريد كليم اخذني ويـاك أنتَ مو گلت ما حَـتعوفني؟!
احتار بين ياخذني وبين مشاعر خالو
اني ما چنت مهتمة لشي غير شعور الامان
الاريده بقُربه
تقربت اكثر ولزمت بأطراف قميصة بقوة
- أنتَ تريدني مو؟
- اكيد
- لعد أُخذني
بدون كلام زايد گال خالو
هُمام- اخذها كليم
- خالو لا تزعل
تقرب باس راسي وضمني لصدره
هُمام- يفديچ خالچ خوش؟ اهم شي راحتچ عندي وكليم مو غريب واعرف يحافظ عليچ مثلي واكثر لذلك مأمن روحي ارتاحي وبالليل اجي اشوفچ
بست خده ومديت ايدي المكسورة بيها اصبعين بَـس لـ كليم
اخذ ايدي بأيده والثانية حاوط بيها جسمي
يعبرني الشارع وورنا عمة واولادها تلاثتهُم
دخلني وقابلتني بيبي بچت واشرتلي
اروحلها بَـس ما تحركت رفضت اروح
وأحَس شي بداخلي طاب منها واخـر
موقف ما انسى
دمرتني شعور الذنب دمرني بسببها
ولولا زنها چنت شاركت كليم بأحساسي
على جيت عذاب بَـس بسببها اني قررت
اضحي بنفسي وهاي نهايتي مكسورة
- اريد ارتاح كليم
بهَتت ملامحة يباوعلي ما عرفت افسر
نظراته غير أنُ هوَ مستغرب مَن تصرُفاتي
الجدًا غريبة
لو رنيم قبل چان نست كُلشي وراحت
حضنتها وسلمت بَـس الجديدة هوَ مستغربها
كليم- صار
اخذني لحد الدرج وگال
- ما تگدرين تصعدين حبيبي
نزل حط ايد جوه ظهري وايد جوه رجلي
وشالني بسهولة
توسعت ابتسامته وهوَ يصعد ويهز براسه
- شبيك؟
كليم- خفيفة رنيمه
- والله؟
- اممم بَـس صُبريلي كم اسبوع وارجعچ بوزن مثالي
سندت راسي على كتفه وغمضت عيوني مرتاحة وايدي حول رقبته
- ما عندي شك
نومني على السرير وباس راسي
كليم- ولا راح يكون جوهرتي
عبست مَن لا سبب ونترت
- اريددد انام
كليم- صار
عدلي المخاديد وغطاني زين وتأكد مرتاحة بنومتي
كليم- مرتاحة؟ محتاجة شي ثاني؟
- لا
كليم- الحمدُ لله ارتاحي اني نازل شوي واصعد
- الضوه خلي اخاف
- صار
نزل ومتأكدة راح يحاجي بيبي ويطيب
خاطرها بسبب تصرفي بَـس مو مُهم
اني ما اريد اتعامل ويا الاشخاص الأذوني
بحُسن نية بعَد وبيبي هواي أذتني وسامحتها
بَـس خلص فاض صبري منهُم اني مَن حقي اعيش لان تعذبت بما فيه الكفاية بسبب أبنهُم
صار ياخذني على گد عقلي مَن يرتفع صوتي او انتر بوجهة واخزرة واطلب منه الشي بصيغة امر
يحاول يسوي كلشي اريده بدون لا يبين
هوَ متضايق مَن تصرُفاتي بَـس اني اعرف
هواي مزعوج من بدأ كلامه يقل وحسراته من يباوعلي لو تصرفت تصرُف مُسيء
مرة گاعدين ناكُل كلنا سوه بالصالة وهوَ
طلب مني ولح ينزلني مَن باب تتعدل نفسيتي
نزلت على اعصاب اكُل مَن ايده وأحَس
جسمي يرجف لان مَن يگعدون على السُفرة
ما يحجون
تحت قاعدة ثابتة علمنياها كليم
"أداب المائدة"
قرب الخاشوگه حتى اكُل بَـس رَوحـي
طلعت ضربت ايده موگعه الاكل وصرخت
ساده أذاناتي
- راسيييييي كلييييم
صرت اصرخ وابچي منتهية
حاوطني بحُضنه بَـس هذا الشي ما فاد
اختنگت وصرت اسحب النفس بالقوة
حاوط خدودي
كليم- بنياتي
- هوووى ماكوووو
شالني وطلعني للحديقة وعاط بيهُم
كليم- ابتعدوااا خلي تتنفس
صار يغسل بوجهي وايدي ويفرك صدري
لحد ما بديت اتحسن خزرته ضايجة
عطت بوجهة اضرب على صدرة والدموع
عشرة عشرة
- كلللله بسببك گتلك مااا اريد انزل بَـس أنتَ جبرتني ولحيت ردت اموت بسبببك
- اسف
- كلشي صار بيه بسببك أنتَ
- اعرف واني اسف
عطت بوجهة وصوتي ارتفع اكثر
- لااااااا تاخذني على گد عقللللي انيي مووو مخبللللة
كليم- شنو تردين بابا
- اكرهك
هُمام- رنيم !!
- اخذني خالو ما اريد ابقى يمه هملني بسببه ردت اموت ما دا يعرف يعتني بيّ
كليم- رنيمه
- ما اريد احجي وياك اريد اروح
كليم- اخذها هُمام
تقرب خالو يريد يشيلني لو تخبلت ما چنت
اعرف شنو شعوري وليش اتصرف بهذا
الشكل بَـس كُل الاعرفه رَوحـي بين الاعراف
وما دا اعرف شنو اريد
ومن حسيته تخلى عني صرت مثل الطير
المذبوح ارافس
رجع حضني ، صرت اناشغ معلگه بياخت قميصه
- اني اگلك عوفني أنتِ لييييش تعوفني كليم لا تعوفني اخاف
كليم- وين عايفچ بنيتي بَـس تهمني راحتچ واذا راحتچ ببُعدچ عني اني قابل وأنْ كانت بيها أذية اليَّ
- بَـس اني ما أحَس بالامان غير يمك
- بعيني ووسط گلبي احطچ تأمريني
شالني بين ايدي بدون ما يضيف شي
وبدون حتى ما يباوع لأي شخص بيهُم
ويحجي !!
اخذني للغرفة مددني على السرير بَـس
هدوئه خوفني او الاصح قلقني لا يتغير
عليَّ بسبب تصرُفاتي المو حلوة اتجاهة
- كليم !
وگفت على ركباتي واني بالسرير وهوَ
واگف گدامي ، حاوطت وجهة وميلت
راسي
- تعبت مني؟
- اتعب؟ ومنچ؟ لا بابا گولي غيرها
- ليش دا أحَس هيچ؟ أنتَ هادئ على غير العادة بشكل مُريب!
ابتسم ابتسامته الحلوة
كليم- خايف عليچ افكر بيچ وقلقان على نفسيتچ تدمر بسبب الضغوطات بَـس اتعب مَن اشوفچ تعبانه
- احبك هواية اني وما دا اعرف اتصرف وأذيتك بَـس مو بيدي
ضحك وحضني مغطني بدفو حنانه
يا الله يا حُضنه والدفو وكمية الحُنية
اموت واحيى هنا
مسح على خصلات شعري القصيره وگال بحنان
كليم- جوعانه؟
- شويه
- شنو مشتهيه اطلبلچ؟
- بكيفك
عافني وراح ماخذ تلفونه
طلب هواية اشياء وراح گعد على مكتبة
كُلش هادئ !! يشتغل بدون ما يحجي وظهره
اليَّ
- طلبت هواية؟
كليم- اكلي والباقي ينضم مو مشكلة
- تاكُل ويايَّ؟
كليم- تدللين
- كليم شبيك؟
واخيرًا ترك البيده ودار يباوعلي مستغرب
كليم- شبيَّ؟
- دا تسلكلي
- لا متوهمة
ورجع دار يشتغل عرفته دا يعاقبني بطريقته
ويحسسني بسوء تصرُفاتي وياه !!
مددت مكاني وحطيت ايدي جوه خدي
اباوعله يشتغل واتأمل هدوئه لحد ما
تمكن النوم مني وغفيت بدون أرادتي
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••
سـارة•
- وشلون تبقى هيچ؟ رنيم تحتاچ دكتور!
گام بعد ما ربط حذائه حاوط خدودي وهز
راسه موافقني الرأي
هُمام- اعرف حجينا بالموضوع اني وكليم وان شاء الله نلگه حل
راح للميز يلبس ساعته واكيد اهم شي
يمشط شواربه بمشطه الصغيروني
وترس نفسه عطر بحيث ضليت اگح وهوَ
يضحك متونس ، قرص خدي وباس اصابعه
- هُمام
- ها الحبيبة أمريني
- بخصوص موضوعنا!!
- يا موضوع؟
- زواجك
خزرني وبقى مركز بيّ وخازرني
نزلت راسي خايفة مَن نظراته الحارقة
حسيت شوي ويكفخني راشدي ينسيني
تاريخ حياتي الملعون كُله
هُمام- ينسد واذا فتحتي اعرف شلون اتصرف
- مو بكيفك
- لعد مدام بكيف منو؟ وزني كلامچ سارة وعرفي شلون تحجين لا تخليني اتخذ غير اجراء
- اتخذ
تقرب بسُرعة رجعت خايفة مَن ردة فعله
رفع اصبعه بوجهي
هُمام- لا تتحديني سارة تتندمين
- اني اريد اقدملك حياة كامل تستاهلها ليش دا تعاند ومشخصن الموضوع هُمام افهمني
- الغي فكرتچ سارة زواج ما اتزوج واذا عاندتي أنتِ التخسرين صدگيني وگلتها قبل وارجع اعيدها اذا خطيتي خطوة بدون موافقتي ومن ورا ظهري انساچ وما اشوفچ لو تگعدين بوسط عيني
طلع وطبگ الباب بقوة ، اخذت نفَـس وزفرته
طلعت نازلة جوه
رحت لغرفة البنات اباوعلهن لاهيات بالمُسلسلات التركية
عفتهن ورحت للمطبخ حابة اسوي
بسبوسه وبالليل نروح ببيت كليم
اطمئن على رنيم
وهذا الصار ، هُمام رجع طبيعي وحسيت
دا ينطيني فرصة اتراجع بَـس چنت مُصرة
انطي الحياة اليّ ما گدرت اني اقدمها اله
بدلنا ورحنا البيت كليم
الكل چان موجود عداها هي وكليم فوك
اباوع هُمام بقى يفوراي اعرفه ما قابل
على بقائها بَـس جابر نفسه علمود رنيم
وحالتها النفسية
شوي ونزلت لازمة بيده وضامه نفسها ورا
وبَـس شافتنا تركته وركضت تحضنه
حسيتها شوي متغيرة نفسيتها عن اخر مرة
- شلونچ؟
رنيم- زينه
- ليش ما تجين ويانا؟
- لااا
نترت بوجهي وتركتي وراحت دحست نفسها بجانب كليم
دار عليها مدنك وما اعرف شنو يسولف
وياها وهي تكتفي بهزت راسها بـ اي او لا
اخر شي ضحكت مكممة حلگها وهوَ ابتسم
رافع حواجبه بمُشاكسه خلتها تضرب كتفه وتطلق ضحكه صفنت الكُل
هُمام- ضحكنا كليم
دار يضحك وهوَ يعرف هُمام راح يموت مَن غيرته
كليم- شي خاص خيي
هُمام- گتلي خاص !!
كليم- اممم
ورجع يسولف وياها مخلي هُمام يفور مَن
الاعصاب ، يغـار هواية حتى على خواتي
مسرة ودموع !! بحيث طيح حظ قسورة
مَن عرف يحجي ويا مسرة
يگول بَـس دموع مطمئن مَن عندها أنتن
شلعتن گلبي بسوالفچن كل يوم وحدة
بنُص الهوسة حمحم قسورة جاذب الانتباه
قسورة- احم احم ما دام الكل موجود اريد افاتحكم بموضوع
باوعت على مسرة وتأكدت يخصها لان
العوبة وردت مَن الخجل
كليم- خير ان شاء الله !!
قسورة- خير خير
هُمام- واضح
قسورة- شبيك خالي حبيبي
هُمام- احجي قسورة احجي عوف الأدب ما انغش بيك مثل البعض
يحجي ويباوع لـ قسورة ومسرة بطرف عينه
ابتسم قسورة وگال بهدوء مركز بردة فعل الكُل وعيونه واضح بيهُم الحُب الخلاني
اطمئن
قسورة تغير هواية مَن بعد ما چان اسوء
انسان تعرفت عليّ بهاي العائلة
قسورة- بما أنُ قربنا ننتقل للبيت الجديد قررت اجهز غرفة عرسي فد مرة لان اريد اتزوج
نجلام- يوم المُنى اشوفك أنتَ وعروستك
گام باس أيد امه وگعد على اليده مال الكرسي الگاعده عليها عمة
قسورة- ها خالي؟
كليم- اشر واختار مَن باچر اخطبلك ابني
قسورة- عروستي موجودة
كليم- منو؟ نعرفها؟
بنفس اللحظة گامت مسرة طالعة من الصالة ترجف
وبهذا الكل عرف لان عيون قسورة لحگتها
ومبتسم وعيونه تلمع لهفة وسعادة
ضحكو فرحانين وبالأخص عمة نجلاء چانت
اكثر وحدة طايرة بهذا العرس وبـ مسرة
قسورة- بَـس ابوها
هُمام- خليها عليَّ اني اربي
كليم- ما نريد تربي نريد يحضر ويوافق على عقد بنته هُمام
هُمام- اي اربي قبل لا يچفص
كليم- ترا ابوها مهما كان مو لائق نمد ايدنا عليَّ ومو من مقامنا نأذي الكبار
هُمام- خوش أنتَ تصرف
كليم- اي طبعًا اني اتصرف لان اذا ابقى عليك اخسر الاكو والماكو
هُمام- خوش
كليم- وهوش شبيك مغندب
لـيث- سارة مزاعلته
هُمام- اگوم اشگ حلگك لويث
لـيث- الك الله ليث المُضطهد قابل چذبت شبيك خالي
ايهم- صدك شبيك خالي
هُمام- ولكُم عارات درتوا عليَّ
لـيث- خالي صاير حساس
هُمام- هسه اسوي بيك حساسية دائمية لويث لا تتحارش كافيني البيَّ
قسورة- ليش شبيك؟
خزرهُم وسكت عينه تزرزر على كليم وقسورة بضوجة وغيره
اخر شي اشر بيده لـ رنيم وگال
هُمام- تعاي گعدي يم خالچ حبيبتي
بهدوء گامت رنيم وگعدت بصفة
حاوطها يبوس بخدودها وراسها ويسولف
وياها اخر شي بقى يحرك بكليم يمها
هُمام- يولي ما يحبچ
رنيم- منو؟
هُمام- كليم ما يحبچ اني احبچ اكثر
- ثنينكُم نفس الشي
- رجعي يمي شنو ما مشتاقتلنا؟
- احب يم كليم
كليم- ههههه لا تحاول أنتَ الخسران
هُمام- شنو ساحرها
كليم- سحر الحُب هذا
عض شفته ما يگدر يحجي بسبب وجودنا
وبالاكثر وجود عمة نجلاء
ابتسم وگال بأبتسام بيها معنى سرسري
هُمام- بعدين اجاوبك حبيبي
كليم- انتظرك
رنيم- خالو خلي البنات يبقون يمي
هُمام- هي بَـس هاي ناقصة يا بعَد خالچ شنو ما تردين اني هم ابقى؟
رنيم- الله؟ يصير كليم؟
كليم- ههههه يصير ابقى هُمام
هُمام- ما يصير حبيبتي وحتى أنتِ گعدتچ ما مقبولة المفروض تتزوجون وابقي براحتچ
رنيم- بَـس احنه متزوجين !!
عمة ترخصت وطلعت تشوف بيبي خاف تحتاج شي وهوَشوياخذ راحته
هُمام- لبستي البدلة البيضه؟ عقدتوا محكمة؟
رنيم- لا !!
هُمام- لعد بعدكُم بنيتي والناس تحجي اذا تبقين هنا بدون هاي الاشياء الرسمية
صارت تباوع لـ كليم وهُمام اخر شي صفنت وهزت راسها موافقة ترجع
هذا الشي خله هُمام يرتاح هواية بَـس ما طولت مَن گالت بتردد وخجل
رنيم- كليم خلي نتزوج بسُرعة علمود ارجع يمك
ابتسم وگام مغير مكانه يگعد يمها بحيث صارت بنصهُم
كليم- مَن باچر ابلش بالاجراءات ها هُمام نخليها نهاية الشهر
هُمام- ولا مفلفل على الزواج شبيك حبيبي؟ شو طالعة عينك!!
كليم- بنت اختك تريد يمي شبيك ضايج؟
هُمام- ذبها براسها
رنيم- خالو أنتَ ما موافق؟
هُمام- لا حبيبتي خلص نهاية الشهر ما دامچ مرتاحة شريد غير راحتچ!
قسورة- چنكُم متجاهليني؟
لـيث- اي والله يا خوية حتى أنتَ صرت مُضطهد
ايهم- خالي نساك ورايح يجهز لعرسه أنتَ بيش الكيلو؟
دموع- الله حَـيصير عندنا عرسين !!
هُمام- الناس بالناس والگرعه تهلس بالراس رجعي نامي بنيتي
دموع- شبيك ويايَّ عمو؟
هُمام- اسف حبيبتي بَـس منو گال اني موافق انطي مسرة لقسورة؟
لـيث- ليش بلـه؟ وشبي اخوية؟
قسورة- اي مثل ما گال لـيث شبيَّ اني
هُمام- واحد ساق* شايف وعايف
كليم- ينعل ابليسك البنات گاعدات
هُمام- كليم لا تخليني اغردلك بالگوة لازم نفسي عنك
هز ايده وجاوب
كليم- ارتفع ضغطك من الغيرة
هُمام- خوش
رنيم- الله احب مَن تگول هيچ
عصر وجهة وباس خدها بوسة ام الصوت وصاح بحُب
هُمام- يفديچ خالچ خوش؟
رنيم- خوش هههه حبيبي خالو
حضنها مگزگز عليها وهي تدلع عليّ
صح بعدها تعبانة بَـس ارتاحيت مَن شفت
وضعها احسن عن اول ما لگيناها
شفت بعيون كليم حُب وسعادة وهوَ يشوفها
تتجاوب ويا هُمام وتسولف وتطلق قهقهات سعادة
قسورة- ارجع واگول ليش متجاهلينيييي
دخلت عمة شايله ريم وضافت
نجلاء- ها خوية ليش ساكت بَـس لا ما مقتنع؟
كليم- وين نلگه احسن من مسرة؟
هُمام- اذا انطيتها عود
نجلاء- يااا خوية وشبي ابني وما قابل عليَّ ما حبيتها منك
قسورة- اي امي احجي دا يعنفون مشاعري الرقيقة
حك راسه هُمام منحرج
هُمام- اشاقة خوية هلا بيكم بأي وقت
صاروا يضحكون ويبسمرون بيّ مَن جوه ليجوه وهوَ بَـس يهز راسه الهُم
لان ما يگدر يرد بسبب وجـود عمة نجلاء
وهوَ كُلش يحترمها وما يطلع سوالفه يمها احترامًا الها والعمرها والاهم أنها اخت كليم وهوَ رُغم
مُشاكسته وياه إلا عنده كليم لا يصعد ولا ينزل
والأصح أكول اني وكليم ورنيم نتنافس على المرتبة
الاولى بـ قلبه
كليم- الخميس ان شاء الله نزوركُم بخصوص مسرة وأنتو فاتحوها بالموضوع سمعوا رأيها وشروطها علمود تنطونا الموافقة بنفس اليوم ونحدد المهر
لـيث- اححح اليوم الايهم حتى اتزوج اني هم
كليم- خلص جامعتك لك
لـيث- غير السنة اتخرج وتخطبلي بشرفك خالي اريد اتزوج
كليم- بَـس لا بالك وحدة؟
لـيث- لا وين يا حظي صافية دافية اريدك أنتَ تختارلي مرتي المستقبلية اثق بذوقك حبيبي
كليم- تخرج واشتغل وشيل نفسك ومن عيوني شعندي غيركُم ولدي
هُمام- يله نروح ها بابا رنيم تجين؟
رنيم- اي
كليم- باچر اجي اخذها الصُبح علمود نروح نعقد
- وايدها؟
جاوبني وهوَ يتفحص ايدها المكسورة
كليم- ما عليها شي خوية
رنيم- ما عندي فستان اميرات كليم
ابتسم
- باچر اجيبه الچ
رنيم- ناخذ ريم ويانا؟
كليم- تردين ناخذها؟
رنيم- اي
كليم- صار ناخذها وبعد العقد نروح نتغدا بمطعم ها خيي
هُمام- اي هاهيه لازم نحتفل بعقدكُم
رنيم- تجون ويانا؟
هُمام- انا وسارة شهود
شهگت فرحانة وبلا تردد شمرت نفسها
بحُضن كليم مخلية الرجال يصير احمر مَن
الخجل بسبب وجود الكُل بينما هي ابتعدت
وزادت الطين بلـه مَن باست خده وگالت
ما منتبهة لوجودنا او الاصح ما مهتمه النا
رنيم- جيبلي الفستان علمود نصور كليم هاي ذكرى حلوة
كليم- احلى فستان يكون عندچ الصبح
هُمام- اذا خلصتوا نروح لو شنو تگولين بابا؟
رنيم- خلصت نروح
گامت طالعة تاركه هُمام باهت
- ترا ما دا تنتبه لا تضوج
هُمام- سكتي سارة سكتي تحرگني بسوالفها
- ترا زوجها
- واذا؟
نتهامس واحنه طالعين
ودعنا الكُل ورحنا للبيت ومسرة ما طلعلها
صوت لحد ما گال هُمام قبل لا يصعد للغرفة
هُمام- سمعتي وافتهمتي بنيتي فكري براحتچ للخميس واي شرط تحطينه اني بظهرچ فكري للمستقبل وحطي نفسچ بالاولوية وأنتِ تفكرين بعقل مو عاطفة واحبه ويحبني هواية حبوا بعض بَـس النهاية چانت طلاق وهدمان بيوت ومهما كان قرارچ اني بظهرچ بصفتي ابوچ اخوچ عمچ اي شي يعجبچ ههه يلـه تصبحون على خير
دموع ، مسرة ، رنيم- وأنتَ بخير
صعد واني لحگته ، دخل للحمام واني حتى
ما اضيع وقت نزلت بالحمام الجوه
سبحت على السريع بدلت وصعدت
لگيته طالع ومركز بتمشيط شواربه
حس على وجودي ترك المشط وفتح ايدي
ركضت داخله بحُضنه بوسني وايدي
يمررهن على زنودي يدفيني بسبب برودة
الجو !! ابتعدت حتى احجي بَـس قطع
كلامي بنزوله وتقبيلة اليَّ
دفعني على السرير واعتلاني هامس بينما
يمرر ايده على شعري وخدودي
هُمام- مشتاقلچ
بقيت صافنة بوجهة ، جفلت مَن حط ايده
على زري يرفع بدلة النوم شوي شوي وهوَ
يكمل بذات الابتسامة
هُمام- احبچ ام عيون الشهل
- اموت عليك
- تسمحيلي؟
- كُلي الك
اتسعت ابتسامته الحلوة ونزل يبوسني
بشغف ماخذني لغير عالم ، عالمنا الخاص
متناسين كُلشي
حاطه راسي على صدره وهوَ رايح بسابع
نومة !!
تسحبت البس مقررة اسبح واروح اطمئن
على البنات وبالاخص رنيم لان حسب كلام كليم دائمًا تفز وتتحلم هواية وتدخل بنوبة هلع
دخلت سبحت بسُرعة وسحبت المنشفة توني اريد انشف وانهز البيت بصوت صريخها
تصرخ عبالك واحد دا يعذب بيها صوتها يقشعر
تخبلت سحبت البرنص لبسته ونزلت اركض
كم مرة ردت اوگع على وجهي واسيطر
دخلت لگيت هُمام لامها لحُضنه ويردد بأذنها
هُمام- أنتِ بأمان رنيمه أنتِ ببيت خالچ وكليم موجود احنه يمچ كُلنا اهدي حبيبتي اهدي
گعدت على الجهة الثانية امسح على شعرها
وهُمام استمر بنفس الكلام لحد ما فعلًا بدت تهدأ بَـس لزمت بيّ ما تقبل اعوفها
وحتى البنات گعدن مخترعات وبعدهن مرعوبات مَن صوت صريخها
- حَ ابقى يمهن هُمام
هُمام- ابقى حبيبتي
تركنا وطلع بعد ما باس راس رنيم
بصعوبة رجعت نامت لان تريد كليم
ووين يلـه گدرت اقنعها باچر الصُبح
حَـتگدر تشوفه
وتقضي وياه وقت مُمتع يلـه نامت
فزيت الصُبح على ضربات قوية على الباب
ركضت افتحة واني افرك بعيوني مَن النوم
صار بوجهي هُمام اباوعله ابتسم وتچه نفسه
على الحايط
- شبيك؟
هُمام- اويلي
- ياااا
ضحك عاض شفته نزلت عيني وشهگت
الم بنفسي ، البرنص مفتوح ومطلع جسمي
كله
هُمام- هههه حبيت
- لا تصير سخيف هُمام
غمزلي وگال
هُمام- مو وقته صح لان مستعجلين من نرجع نعوض
نزل باس خدودي وكمل
- يلـه كليم اتصل علمود نروح لا نتأخر وهاچ هاي
اخذت كيسين منه مستغربة بَـس هوَ ما انتظر اسأل وجاوبني
هُمام- كليم وداهن لـ رنيم
- اهااا ملابس لعقد المحكمة
- اي
راح واني رجعت گعدتهن ورنيم بَـس عرفت كليم موديلها فُستان فزت طايرة مَن الفرح
كل وحدة راحت تجهز نفسها علمود نطلع
وما نتأخر !! هُمام خلص وطلع برا يم كليم
بالباب واگفين ينتظرون واحنه بَـس خلصنا طلعنا
ㅤㅤㅤ
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••
مسـرة•
طلعنا ولمحت عمو كليم وهُمام داخلين بنقاش حادّ ومن انتبهوا علينا سكتوا
وعمو كليم ابتسم النا واخذ رنيم على جهة يحجي وياها تقدمت شوي واسمعه يگلها
كليم- ليش ما خابرتيني اجي؟
رنيم- مو سارة گالت باچر تشوفينه
كليم- وأنْ؟ أنتِ مو ردتيني المفروض تتصلين واجي
- بعد اتصل عليك
كليم- بأي وقت اتصلي واني اجي رنيمه لا تتعبيني وتقلقيني عليچ بابا
رنيم- اسفه بعد اتصل
كليم- عفية
مَن شفتهُم تحركوا درت اسوي نفسي ما
منبهة رُغم اني چنت مركزة وياهُم بكُل حواسي
كليم- اخذ البنات وياك واني ورنيم نجي بسيارتنا
هُمام- ماشي
دار ضايج يشغل بجگارته ، راح عمو كليم
باس كتفة واعتذر منه وعمو هُمام قابلة بهزت
راس بسيطة وركب بالسيارة
- عمو خلي اجي وياكُم !!
كليم- تعاي بابا هُمام مسرة ويايَّ
هز راسه وشغل السيارة وراح واني ركضت
اصعد بالكرسي الورا ورنيم بالصدر يمه
وتفاجأن مَن شفت مگعده بحُضنها ريم يعني ﺟان مخليها بالسيارة
شغل مولد وخله الصوت هادئ وراد يسحب
جگارته يدخن
رنيم- لا تدخن كليم تصير ريحة مو حلوة
كليم- صار
رنيم- شبيك أنتَ وخالو؟
كليم- ما بيناتنا شي ليش تسألين؟
رنيم- لان اني شفتكُم زعلانين من بعض وخالو مو مثل كل مرة يحجي وياك
- اختلفنا بالشغل بَـس انحلت
- يعني ما متزاعلين
كليم- لا بابا شنو اطفال ونتزاعل !!
كمل الطريق بعد ما قنعها بَـس اني ما صدگت
لان وضعه مو مال هذا الكلام وواضح
صاير زعل بيناتهُم !! نزلنا گدام المحكمة
وچانوا موجودين ينتظرونا وتفاجأت قسورة موجود
كليم- خير؟
قسورة- هههه ما يصير اجي؟
كليم- يصير يصير امشي گدامي
هُمام- تعاي هنا مسرة وأنتَ عيونك سيطر عليهن لا اقلعهن بعدنا ما موافقين لا تبقى تمسلت وتخليني ارفضك
قسورة- شبيك شادها ويايَّ ابو الهَمم
- لأنك ساق*
كليم- يمعوووود البنات منا
ما جاوب وتأكدت فعلًا عمو هُمام زعلان
لان بالعادة مَن يگول هيچ عمو كليم يجاوبه
بكلمة "خوش"
دخلنا وبعد الاجراءات الهواية دخلوا عمو كليم ورنيم ورافقهُم عمو هُمام وسارة ڪ شهود
واحنه بقينا برا
قسورة- مسرات رَوحـي
ابتسم اباوعله وهوَ عيونه تلمع
- ليش اجيت؟
قسورة- اشوفچ
- همزين لان اشتاقيتلك
قسورة- اويلي الله مسرات لا تشلعين گلبي ورجعي الموافقة بسرعة علمود ما نتأخر
- بَـس أنتَ گتلي نبقى خطوبة ليش غيرت رأيك؟
قسورة- ما اريد تبقين بعيدة عني اكثر ومقرر اطفال ما نسوي منا لمن تخلصين دراستچ ووعد اقدملچ كل الاجواء الترديها للدراسة وما اقصر وياچ بشي
- اخاف ما اوافق بين الدراسة والزواج والمسؤولية؟
- يا مسؤولية حبيبتي؟ تنظيف اني اساعدچ بيّ طبخ اجيبلچ جاهز
واني هم اشيل نفسي ما اتعبچ ويايَّ واراعي تعبچ بدراستچ وادرسچ بنفسي
- ما اعرف خاف تغير رأيك بعدين
- كلمة رجال اخذيها من هالشارب
- تمام
- مرتاحة؟
- اي
- هاهيه اهم شي راحتچ عندي و...
قطع كلامنا ويا طلوعهُم من الغرفة صرنا نباركلهُم فرحانين على فرح رنيم
چانت طايره ومعلگه بكف ايد عمو كليم وتضحك للهوى
ومثل ما گال اخذنا للمطعم نتغدا بُمناسبة عقدهُم
شوي واخذ عمو هُمام وطلعوا برا
سارة- متزاعلين لو يتخيلي؟
رنيم- حاجيت كليم يگول لا !!
- بلي متزاعلين ما تشوفين واحد ما يباوع بوجه الثاني
سارة- قسورة شصاير
قسورة- علمي علمچ ومن سألتهُم گالوا بخصوص شغل
رنيم- حتى اني كليم گال علمود شغل
- نادرًا ما يزعلون مَن بعض اكيد صاير شي چبير
سارة- ما اعرف من نرجع اشوف هُمام شنو يگول
دموع- اشش اجوا
نباوعلهُم رجعوا يضحكون ويسولفون
يعني حلوا مشكلتهُم
وهذا الشي خله كل العلى الطاولة يذبون
نفس مرتاحين مو مهم المشكلة شنو المهم
نحلت وتصالحوا
يوم الخميس ..
طرقت الباب وبعد ما اجاني صوت عمو هُمام يسمحلي ادخل دخلت
ايدي البيهن الصينية يرجفن ونص الگهوة
تبدت يا يمه الفشلة ، اني من غير شي ارجف
ومتوترة وكملها قسورة من وصلته وگال
- ابوس ايديچ التعبت وسوت الگهوة
خزرته ، حطيت الصينية ورحت گعدت يم سارة وعمو هُمام
ما چان اكو داعي للخطبة المُعتادة اكتفينا بأعطاء الموافقة وحددوا المهَر ويوم العقد الصادف يوم ثلاثاء يعني بعد اربع ايام
كليم- نقرأ الفاتحة
قرينا وباركولنا واني أحَس صخنت من
الخجل وخصوصًا من عمو كليم وهُمام
حيل اخجل
طفر لـيث على ظهر قسورة حاضنه من ورا
لـيث- مبرووك عضيدي
قسورة- انزل لك
لـيث- ما عوفني متونس
قسورة- خرب روحك لـيث انزل فلشت ظهري
هُمام- العريس تعبان ما يفيد لازم نفكر مَن جديد
قسورة- شسالفة ابو الهَمم تريدلك حجة ولككك انزل من اشتعلوااا لـيث انزل
كليم- انزل ابني
لـيث- صار بوية ، ولي نمونه هو ظهر وبعدين اني خفيف
قسورة- كسرت ظهري يا خفيف چنك ثور
عدل ملابسة وتقدملي بَـس صار بوجهة عمو هُمام
- خير وين؟
قسورة- ابارك لـ عروستي
هُمام- من تعقدون باركلها يلـه وريني عرض اكتافك
قسورة- شگد صاير نحس
هُمام- أنتَ مررررفوض امشي برا
قسورة- بشرفك؟
هُمام- گلت مرفوض
كليم- هههه ولك هُمام هبطته كافي عوفهم تعال عندي موضوع وياك
سحبه عمو كليم وابتعدوا وهيچ سنحت الفرصة المُناسبة حتى يباركلي
باس راسي بدون ما يلمسني ابد ، ابتسـم
بحنان وعيونه تشرح حُبه اليَّ وگال
- مبروك مسرات الروح
- الله يبارك بيك
قسورة- مقتنعة حبيبي؟ المهر؟ يوم العقد؟ اي شي ما مرتاحتله وعندج اعتراض اني مستعد ارتب كُلشي حسب رغبتچ
- مقتنعة
- الحمدُ لله
ميل راسه وهمس
- احبچ
حسيت خدودي شوي وينفجرن مَن الحرارة
خجل مو طبيعي بحيث جسمي كُله يرجف
نزلت راسي بدون جواب وهوَ صاحوله
راح ويا اهله للبيت وبهيچ بلشنا نجهز ليوم العقد
رحت للسوق ويا سارة اخذنا لـيث وابد
ما ضايقنا خلانا براحتنا ناخذ احتياجاتنا
وعمو كليم قبل العقد بيوم اخذ رنيم ودموع وريم يشترن ملابس للعقد
يوم العقد ...
رفعت عيوني على سارة الچانت مثل اللعابة تركض لابسه فُستان چويتي وهي
من بياضها تضوي والشعر مسرحته يخبل
تقربت علمود تسمعني لان صوت الدي جي
عالي
سارة- ها امي؟
- اريد ماي
هزت راسها وراحت شوي ورجعت بيدها
بطل ماي شربتني وحطته قريب مني خاف
احتاج او اعطش! شوي وصاحوا علمود نعقد
ساعدني رنيم وسارة اگعد ورا الباب علمود نعقد وسوينا كل الطقوس
طلبوا موافقتي بَـس اريد تطلع مني
ماكو علگت الكلمة ببلعومي
همستلي سارة
- تنفسي وجاوبي بهدوء حبيبتي
هزيت راسي واخذت نفس عميق وزفرته
وويا كلماتي طلعت
- "نعـم وأنتَ وكيلي"
بعدين طلبوا وموافقته وفشلنا قبل لا يكمل السيد انطى موافقته متت مَن الضحك
رجع السيد يحجي وقسورة الحمد لله
انطى موافقته بدون استعجال
هلهلت عمة مخليه النسوان كلها تهلهل
تشاركها فرحتها وفرحتنا
ما چان اكو غريب كلها قرايبهُم وعُرف إلا
ما اكو كم وحدة من جيرانهُم وكبار بالعُمر
طلب قسورة يدخل
وياريته ما دخل فشلني وغطيت بملابسي
مَن دخل ينزع سترته ويرگص وعمة دخلت
ويا بالجو تهوسله وتركص ضحك وباس راسها ، باوعلي وصاح
قسورة- مسرات رَوحـي عروستي الحلوة
تقرب وباس ايدي وبعدين طبع بوسة على
جبيني
- واخيرًا صرتي مُلكي
- حبيبي
سحبني حاضني ضعت بحُضنه ونسيت
الدنيا كُلها
نجلاء- ولك يمه فشلتنا اگعد
قسورة- عوفيني ما مصدك لازم حلمي بين ايدي
لمار- ما حَـتطير
قسورة- ام نص اللسان لا تدخلين
مدتله لسانها تضحك
ولد عمة نجلاء هواية يحبون لمار وبيناتهُم
ميانة بَـس ميار باعده نفسها عنهُم وبَـس على گد السلام ما اعرف هي هادئة لو خوينسه ومن جوه ليجوه
گعدنا لبسني الحلقة ورفع ايدي طُبع عليها
بوسة ، رقت نظراته يتأملني
خلاني ارتبك واني البسه الحلقة وايدي
ترجف هوَ ساعدني ولبسها
شوي وطلع بعد ما طلبوا واكيد شبعني
طن بوسات شفطني شفط يلـه طلع
اخذتني رنيم حتى البس فستاني الثاني
وهذا چان ذوق قسورة
چان لونه وردي وبيّ لؤلؤ مَن يم الصدر
والاكمام شيفون شفاف ووياها تاج بسيط
بما أنُ اني تركت شعري مفتوخ بَـس سويته كيرلي طلعت اخبببببل خرب حظك قسورة اني مرتك وين صايرلك
لبستني الكبوس تضحك
رنيم- بَـس يشوفچ يتخبل عليچ
- ثور الله بأرض الله
عافتني وگعدت مسنكرنه مَن الضحك
رنيم- عزاااا لو يعرررف ههههههههه
- اذا أنتِ ما حجيتي شلون يعرف؟
- إلا اگله
- اموتچ رنيم لا تصيرين حاروگه خلينا عايشين بالعسل لان بَـس يعرف يعيشني بجهنم مَن نوع اخر
فطست مَن الضحك ومو وقتها
- ابقي ضحكي اني طالعة
عفتها وطلعت اعرف اعرف لا تگولون اني احجي بالنيابة عنكُم
وحصرًا بصوت قسـورتي "مسرة المستهترة"
گعدت على الكوشة انتظر الافندي يشرف
ونروح نلتقط صور الحُب يااا متحمسة على
الحركات الفاسقة الحَ نصورها طبعًا فاسقة
لا تنصدمون !! ليش شنو يطلع من قسورة
غير الفسوق والسرسرة
بيني وبينكُم اموووووت عليهن
سارة- يلـه گومي حبيبتي
- تعاي ويايَّ فدوة
سارة- والناس؟ فشلة امي شلون اعوفهُم روحي واخذي رنيم وياچ ومن تجين نصور هنا سوه
وفعلًا ما لحيت هواية عليها وطلعت ويا
رنيم
عمو كليم حَـياخذنا لذلك گعدت رنيم يمه
وقسورة صعد وره يمي
كليم- مبروك بابا شايفين الخير
قسورة- حبيبي خالي
- شُكرًا عمو
كليم- دير بالك عليها قسورة ترا مسرة حالها من حال ريم لا عبالك ابني وربيتك اصف وياك والله اذا شفتها يوم زعلانه اخذها وما ارجعها الك
قسورة- اطمئن خالي احطها بعيوني واذا أذيتها بنفسي اجيبها الك
كليم- عفية ابني وصية الرسول هذن لا تفشلنا
قسورة- بعيوني
رجع گعد ومال عليَّ شوي وهمس
قسورة- طالعة تشگين شگ
- قسور !!
- خلي اختلي بيچ إلا اشگچ
- عزاا توك تگول لـ عمو احطها بعيوني؟
- هذا ما يمنع اشگچ على هذا الجمال
- وخر عني لا اعيط
- نچبي خليني مستمتع
- قسور غزلك مُعوق أنتَ مرفوض يلـه طلگني
رفع صوته
قسورة- خالي مسرة تريدني ابوسها بَـس خجلانة منكُم
عمو كليم ورنيم انفجروا مَن الضحك واني
تمنيت اشمر نفسي مَن السيارة على هذا
الموقف السخيف ، جاوبه عمو وتفاجأت منه
طلع اوبن مايند هذا المُتدين عود !!
كليم- بوس بوس بَـس لا تشمر بلاك عليها
قسورة- رحم الله والديك خالي تعاي حبيبي ما اخليها بنفسچ
سحب وجهي وشفط خدي ببوسة
ما أحَس غير رفعت ايدي وضربته راشدي
صفن لازم خدة وعمو كليم فطس مَن الضحك
لان شكل وصدمة قسورة خلاني حتى اني اضحك
كليم- عاشت ايدچ عمو
قسورة- بسيطة اني الچ
سكتت خانسة لان هوَ هم خنس بعد الصار
واخيرًا وصلنا ساعدتي انزل والطريق كُله
يتحلف بيَّ ابن نجلاء سوه عندي هبوط مَن
الخوف
ومثل ما گلتلكُم شكو لقطة طايح حظها وتخجل الما عنده خجل اختارها
حتى المصورة
مَن الخجل صارت حمرة وهوَ ما مهتم
طلع واجت تعدل مكياجي وبدلتي
المصورة- الله يساعدچ عليّ
- ههههه
- تضحك الفطيرة هسه بَـس تشوفين اللقطات المختارها تلطمين كُردي
- محضرة نفسي للصدمة لان اعرفه واعرف سوالفه
- ربي يحفضكُم البعض
- حبيبتي تسلمين
راحت صاحتله دخل يحرك حواجبه بخُبث
المصورة- اذا جاهزين نبلش؟
- تمام
- اوگف وراها وأنتِ رفعي راسچ ودوري شوي باوعوا بعيون بعض
سويت الگالته بَـس وين اصبر وما اضحك واني عين بعين ويا ضحكت وهوَ ضحك على ضحكتي
المصورة- طلعت اللقطة احلى من الاختاريناها
قسورة- لان مسرات رَوحـي موجودة ماكو شي تكون بداخلة وما يكون حلو
من بعد عناء طويل خلصنا وهو شاف كل اللقطات واختار بعناية المُميزات يله طلعنا
- وينهُم؟
- ما اعرف
طلع تلفونه وهواية اتصل وماكو بلشت علامات القلق تبين على ملامحه واشوفه يدور بجيوبه عرفت سلاحه ماكو !!
لزم ايدي وقربني عليّ تصرفه زرع خوف بگلبي وخلاني ارجف لا إراديًا
قسورة- ماكو شي حبيبي اشش لا ترجفين اني موجود
رجع يتصل وهالمرة جاوب
- وينك خالي؟.. شصاير؟ استغفرالله شلون تعوفونا هنا وترحون بدون خبر ماكو محد بلغني هسه اتأكد
سداه وگال
- السيارة موجودة والمفاتيح عند الموظف تعاي
تبهذلت حرفيًا منا الفُستان ومنا قسورة شلع گلبي يسحب بالكبوس وكل شوي متنرفز لو طلع مني شي
اخذ المفتاح وطلعنا للسيارة ساعدني اصعد وهوَ اول ما صعد تفقد الجگمچه وفعلًا لگه سلاح هناك وهذا الشي خله يتنفس براحة
- شبيك قسورة؟
قسورة- ماكو شي
مسح على خدودي ورفع ايدي طُبع عليها بوسة وساق للبيت
ما چنت اعرف الثمن اني وحياتي ومستقبلي كُله راح للهلاك بسبب هاي
التهديدات
وزواجي مَن قسورة خلاني بوجه المدفع
..
وتستمر الحكاية.. 🚬♣
📍بنات هذا اخر بارت ينزل راح نتوقف بسبب امتحاناتي ومن اخلص نرجع نكمل وان شاء الله بعطلة 15 يوم نختمها اذا الله راد .
قناة التلي zainab_salah0
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!