رواية دروب الإِندِثـار الفصل الثاني والأربعون 42 - بقلم زينب صـلـاح 🤎

بقلمي : زينب صلـاح 🧡

لـ روايـة ﴿ دروب الإندِثار ﴾

في الـ part 38 ♡♡

لا تنسون التصويت + متابعة للحساب + التعليق بين الفقرات ☘️

‏يَبعِد رموُش عَينيّ وُجفني والعَين
وصبَيها ونَضَرها وذيِچ الأحَلام ..

•••••••••••••••••••••••••••♕•

هُمـام•

شمرت الاوراق وسديت الحاسبة أحَس
قبق راسي طار مَن مكانه ما أحَس بيّ
مَن كمية الشغل وقلة النوم وياريت اكو
فائدة !!

كُل مكان نوصله يطلع مو هوَ وهذا كمين
على كم مرة الله ستر علينا وطلعنا منها
بَـس هذا ما يمنع أنُ نستمر بالبحث عن رنيم

شلت التلفون متصل على سارة
وبنفَس الوقت فتحت كاميرات البيت
مَن تلفوني الثاني
خواتها گاعدات على التلفزيون وهي
تركض بالمطبخ وحدها بدشداشتها
القصيرة الاحبها عليها

اباوعلها صفنت وركضت فوك بسُرعة
حولت الكاميرات على الطابق الثاني وتحديدًا غرفتنا ، رفعت التلفون وابتسمت مجاوبة

سارة- حبيبي

- روح حبيبچ

سارة- شلونك؟ يمتى تجي اشوفك صارلك ايام ما تجي!!

- ههههه خابرتچ ابلغچ اني بالطريق

شهگت واباوعلها وگفت گدام المرايا
تباوع لنفسها
- تخبلين

سارة- هاا؟

- تخبلين بكُل حالاتچ

- دا تشوفني مو؟

- ومستمتع ههههه

- هففف ابو الدكتورات الصلف

- كلها تخطت إلا أنتِ

سارة- هم التقيت بعقيق هُمام؟

- لا بَـس دزيتلها رسالة لطيفة

- هُمام اذبحك

- هههههه وعيونچ لطيفة بحيث طارت لخالها بالخارج ثاني يوم

- شسويت؟

- مَن اجي اسولفلچ وأنتِ بحُضني

ابتسمت وگدرت اعرف خجلانه
وهذا الشي الوحيد اليّ مُمكن اسيطر بيّ
عليها ، وهوَ خجلها مَن تخجل تنكتم بعد
لا ترد ولا تحجي بَـس وجهه يشتعل نااار

ودعتها وبقيت صافن عليها احب اشوف
حالتها من تتوتر وتخجل
ترتبك وما تعرف شنو تتصرف وتطلع كُل
حركاتها عفوية ونابعة مَن الفُطرة !!

مثلًا هسه بَـس سدته مني شمرت التلفون
على السرير وفتحت الكنتور حاطه ايدها
بحلگها تاكل بأظافرها وصافنه
اخر شي وبعَد حيرة سحبت ما اعرف شنو
بَـس چان لوني المُفضل ازرق غامق وراحت تركض للحمام

- احححح لو حاط كاميرا بالحمام فاتتك ابو الهَمم

سديت التلفون حاطه بجيبي
وگمت اخذ احتياجاتي ، مريت على مكتب كليم ومتعود اني حسب الميانة
البيناتنا ما ادك الباب واجفت عليّ

وگفت صافن عليّ
الرجال مَن يوم اخذوا رنيم تعب حيل
ودمعته ما نشفت وحالته تزيد كسرة ظهري !!
سديت الباب وتقدمت ساحب الكرسي
گعدت گدامه وهوَ منزل راسه واكتافه
تهتز

ظفيرتها گدامه وتلفونها وعارض بيّ صورتها
اخذته اباوع لـ صورتها اتذكر هذا اليوم
كلش زين ، چانت ضحكتها الحلوة مرسومة
على شفايفها وهي حاضنة الورد بقوة

كليم- تحب الورد

رفعت راسي عليّ وضحكت بلوعة
- ارجعها واسويلها حديقة ورد والله

- ترجع مو؟ ترجع زينة وتسامحنا لان احنه مو كفو وما گدرنا نحميها؟

- ترجع وتسامح لانها رنيم

- واني شلون اسامح نفسي؟

- من تعوضها

- وابوها؟ رُسن ما يفارك احلامي !! رنيم متأذية اني متأكد لان رُسن بكُل حلم يبچي دم ويهز راسه بخيبة امل واني دائمًا مقيد لا اگدر احجي ولا ابررله

سكتت ما اعرف بشنو اجاوب وبشنو اواسي !!
بلغته رايح للبيت اطمئن عليهُم وارجع
هوَ هم ما گال شي بقى ساكت روحه مو
يمه وقبل لا اطلع شفته يرجع لشغله ظام ظفيرتها وتلفونها بجيبه

طلعت بره ويا دخلت قسورة
- وين مولي؟

قسورة- اهووو خالي بعدك ما متخطي؟

- افرغ الشاجور براسك اذا شفتك جاي لبيتي ومسرة ابتعد عنها

قسورة- عود خوش

- شو ما راضي؟

- شگلت هسه انييي؟

- رايح اني للبيت عينك على خالك واطمئن عليّ خاف يرتفع ضغطه لو يصير بيّ شي واذا صار اي تطور ارجع اتصل بيّ

قسورة- روح واطمئن عيني عليّ

- وشغلك؟ قسورة ما فارغ اني بَـس هذا الشغل تبتعد عنه اني احله

- شغلي هذا مستحيل احوله الك

- خلي افرغ وغصبًا عليك تحوله

- ما احول شي خالي لا تضغط عليَّ فدوة اروحلك

- لك ابني تريد تورط نفسك وعائلتك وهُما دازيلك تهديد اكبر من راسك؟

- ليش أنتَ ما عندك عائلة تورطها لو استلمت الشغل؟ خالي هذا مو منطق
واني هذا شغلي ومن دخلت السلك العسكري كلنا نعرف بشنو ممكن امر لذلك عوفوني اتصرف

- شرط تبقيني على علم بكل التفاصيل

قسورة- خلص كلمة زلم

ربتت على كتفة ، صح ما قابل بَـس ما اگدر اجبره على شي
طلعت بوجهي للبيت بنص الطريق واجاني اتصال مَن كليم عقدت حواجبي وجاوبت مستغرب وفتحت الحاكيه

كليم- ارجععععع هُمام ارجعع بسُرعةة

- شكووو؟؟

كليم- لگيت رنيم ارجع بداعة العزاززز والله لگيتها

بسرعة غيرت طريقي ودرت راجع للمركز
صفيت السيارة واشوف المركز صاير گدامه
ضجة دخلت للمكتب اشوف كم ضابط يمه يشرحلهُم الوضع بسرعة بَـس دخلت ركض طالع واني وراه

عفت سيارتي وصعدت وياه وهوَ انطلق بـ اسرع شي
- شلون صار هذا الشي؟

ضرب السكان وصاح بغضب
كليم- الكلب ال** ابن ال**** خابرني وضربهاااا گدامي الحيوانننن اغتصبهاااا گدام عيونننني

- ش شنو؟

- سهلة خلي اوصل

- شلون عرفت المكان؟

فتح التلفون وشمره عليَّ
اباوع دازيله الموقع وجوا رسالة
"زوجتك هنا الحك عليها واني اسفه لان چنت جبانه وما اتصلت عليك من انطتني رقمك"

- خاف كمين

كليم- گلبي يگول لا گلبي يگلي اليوم رنيم تتوسط ذراعك

سكتت وچان همنا واحد نوصل بـ اسرع وقت اني ما اعرف كليم شنو شاف بَـس الاعرفه عذاب مأذي بحيث صاير عبارة عن بركان وكليم نادرًا ما يكون بهذا الغضب والتهور

بحِيث طريق ساعتين ونص اختصره بساعة !!
وطول الطريق يفور مثل البُركـان مثل
البحر الهائج وارجع اگول كليم نادرًا ما
يكون بهاي الحالات إلا اذا كان الامر جدًا
صعب ويتعلق بشخص عزيز على گلبه
وماكو شخص ينافس معزة رنيم عنده
غير بنته وامه

حسب الخطة والتعليمات كان كُلشي
بهدوء وهوَ ما حاط حراس علمود لا يجذب انتباه على نفسه

- هذا البيت

كليم- اي اي

اشرلهُم كليم يحاوطون البيت وما تطلع
ذبانه بدون أذنهُم والكُل ركض ينفذا
الامر باوعلي مكسور وهمس ينبهني بحذر

كليم- تركيزك تصبه على رنيم وسلامتها هُمام تنسى كُلشي وتركز على رنيم

- أنتَ وين رايح؟

نمشي بحذر ونحجي بالهمس
كليم- اني حصتي عذاب وأنتَ مُهمتك سلامة رنيم

- اريد حصتي بيّ

- تاخذها بَـس الاول اني استفتح بيّ وانفذ كلامي حرف حرف

هزيتله راسي وضفت
- مو تموت

كليم- أنتَ هم لا تموت يا متهور

ابتسمتله ورفست الباب ودخلنا ومثل ما
توقعنا چلابه محاوطهُم داخل البيت
بَـس جذبني مَن رفسة الباب واحتمية بالحايط مَن الرصاص هوَ عذاب

چان لازم بنيه ويضرب بيها وثنين زلم مقيدين واحد؟
رجعنا نركز بخطتنا والنا الافضلية والسيطرة خلال فترة معقولة گدرنا
نسيطر عليهُم اكو ماتوا واكو اصابات

كليم- عذااااب وين؟

- مااا اعرفف خايف يأذيها!!!

گدرنا ندخل وصار البيت تحت سيطرتنا
دقائق ودخل قسورة يسحل بواحد
ويضحك ، شمره جوه رجلين كليم وگال

قسورة- حصتك خالي هذا العار راد يشرد بَـس لزمته

باوعلي
كليم- رنيم؟

- رايح

اخر شي شفته كليم مَن نزل ضرب على
عذاب كسره تكسر وكليم چان گد الوعد
كسر ايدي ثنيناتهن وخسف ضلوعه خسف
شاله ورگعه على الارض
ومحد تجرأ يتدخل ويمنعه يخافون يطبگهُم وياه؟

صرت افتش البيت والساعدني مو چبير
اخر شي وصلتله غُرفة بالطابق الثاني
جمعت كل طاقتي وفتحت الباب ايدي
ترتعش
اختض ما مسيطر على رجفة جسمي ابدًا

وگفت جامد على المنظر الفطر گلبي
چانت نايمه وسط السرير غارگه بدمها
غضيت بصري
لان چانت بدون ملابس والغطى المغطيها
مو كل جسمها بَـس جزء بسيط منها

سرعت بخطواتي اركض الفها بالغطه
واسحبها لـ حُضني
بوست راسها ابچي وارجف ما مهتم لأي
شي عدا هاي الطفلة النايمة بحُضني بدون
روح !!

- رنيم باباتي بنيتي الحلوة فتحي عيونچ اجينا ناخذچ يا روح خالچ

فتحت عيونها الجاحظة بسبب التعذيب
والتعب ومن الوعي واللا وعي نطقت

رنيم- خالو!

- يفديچ خالچ خوش؟ لا لااا رنيم فتحي عيونچ لاااااا

هزيتها اريدها تحجي بَـس ماكو لا نفس ولا حركة ووجهة بهت نجنيت مَن شفت ماكو نبض
- ماتت خسرتها اني مو گد الامانة يا بويه

حجيت اخر كلام بلوعة مَن ذبلت بيدي
لا حس ولا نفس
بنفس الوقد دخل كليم يركض بَـس مَن
شافها وگع على ركبه صافن بصدمة على
حالتها رُغم هوَ شايفها حسب كلامه
بَـس بالواقع چانت صدمته غير صار يزحف
زحوف واخذ ايدها الزينه يبوس بيها

كليم- بنياتي اجيت اجيتچ بابا يله گعدي شنو ما فرحتي بشوفتنا
هُمام بروح العزاز خليها تگعد حاجيها

رُغم وضع رنيم بَـس احنه مَن الصدمة چنه فاصلين وبغير عالم
لذلك دخل قسورة وصار يهز بكليم

قسورة- اذا ما گمت هسه ونقلتها للمستشفى راح تخسرها فعلًا
خالي حبيبي قوي گلبك وگوم زوجتك محتاجتك

وفعلًا بعد كلام قسورة گام لفها زين بحيث ما يطلع شي من جسمها او شعرها
وشالها يركض بيها بره البيت
باوعت على عذاب بعده بنص الصالة
بَـس فاقد وعيه ودمه مغطي واضح كليم مطلع الايام الماضية مَن عيونه
رفسته بقوة ببطنه وما حس؟ عفته وطلعت
الحگ كليم للمستشفى واباوع لـ نفسي
غرگان بدمها اخ يا حيل وعافية خالچ

بَـس وصلنا للمستشفى وشافونا بالزي
ركضوا ياخذون رنيم مَن كليم ويدخلونها
للطوارئ
صفنت باهت مَن الصار ومن الوضع ومن
حالة رنيم التفطر الگلب!

گعدت حيلي مهدود وما عندي طاقة اوگف على رجليَّ !!
حالة رنيم هدت حيلي
رفعت راسي ادور على كليم شفته ماخذله
رُكنْ وصافن بالفراغ بَـس شفايفه تتحرك
عرفته يدعي الها

رجعت انزل راسي دقائق ورفعت راسي
على شخص صاح بـ اسمي
من الصدمة ما اعرف شنو اسوي وبالي
يتراود سؤال واحد
سارة شدتسوي هنا؟

رحت مصدوم مَن وجودها وهي انصدمت
مَن الدم ومن لحت بالسؤال واني اشوفها
بعيني تتلوى مَن الوجع
بدون ما افكر مرتين حتى جاوبتها وما اعرف شلون طلع مني الجواب

- دم رنيم

چانت لحظات ووگعدت مغمى عليها بين ايدي
على صوتنا انتبه كليم واجه يركض چان فاصل
اخذوها للطوارئ وجذبني كليم مَن سأل اخته

كليم- شبيها لبنيه شتسوون هنا؟

نجلاء- تشكي مَن بطنها وتتلوى مَن الوجع جبتها واجيت خوية شنو أنتو لگيتوا رنيم

كليم- اي

نجلاء- شبيها ليش بالمستشفى؟

اختصرلها حالة رنيم وهي بَـس تبچي
مَن خلصوا سألتها

- سارة ماكله شي مأذيها؟

نجلاء- حسب كلامها لا

- ان شاء الله خير

بيا مُصيبة اركز وبشنو احتار كل صفعة
وجعها يختلف وهسه جاي أُختبر بأعز
ثنين على گلبي

نهضت نفسي مجبور.. اي مجبور اسند
نفسي حتى اسندهُم الكُل بحاجتي
تقربت مَن كليم الچان بغير عالم وفاصل
تمامًا عن العالم
وگفت گدامه بدون ما يگول شي حضني
بادلته اربت على ظهره

- تهون

- تهون بَـس..

تنهد وكمل بصوت يرجف
- تهون بَـس تعبها شلون يهون نظرات العتب بعيونها الاحبها شلون تهون وجعها شلون يهون؟ هُمام مكسور على منظرها اني شلون لو شكتلي؟ شلون لو سندت راسها على صدري وبچت من وجعها وغربتها العاشت بيهن طول الشهرين؟ اتحمل؟ لا والله فلا اتحمل اموت

- متأكد وجودك راح يعوضها ويغنيها عن كلشي

ابتعد يمسح بوجهة منطيني ظهره رُغم اعرف كلش زين
دا يمسح دموعه ويداري كسرته عني؟!
ليش اني ما ادري شگد تعب وتأثر عليها؟
رجعت اضرب على كتفه خفيف اهونها عليّ
وگتله بنبرة صادقة

- تعرف مرات اغار منك؟

باوعلي مستغرب وضفت
- حُبها احترامها اهتمامها نظراتها كلها الك صرت احط نفسي گدامك اذا تباوعلك في سبيل اجذب انتباهه
صرت احب مكانتك بعيونها واحاول بكل طاقتي احصل جزء بسيط منها ، اعرف تحبني بَـس هالملعونة الصغيرة تفديك بروحها وحاطتك من اول اولوياتها

ضحك اخيرًا يهز راسه موافق كلامي
كليم- واني احب حُبها اليَّ ذاك الاستثناء التقدمة اليَّ

- ومتأكد اول شخص راح تختار تشوفك من تگعد

- وبيا عين اباوعلها؟

- بعين أنُ أنتَ لگيتها رُغم مرضك

سكت بدون ما يجاوب واني رجعت افتر
گدام باب الطوارئ لحد ما طلعت مُمرضة
وگالت تدور بعيونها
- زوج المريضة سارة **** وين؟

- اني دكتورة زوجتي بيها شي؟

- تفضل شوفها تبچي وتريدك بين ما تطلع التحاليل

مشيت وراها وگلبي ينبض بقوة
اريد اطمئن عليها وبداخلي ادعي تكون
حامل!! اي اريدها حامل
مَن گالت ام قسورة تشكي من بطنها
واني ادعي تكون حامل حتى تنسى موضوع الزواج
لان بديت اتنرفز واختنگ ما رايد غيرها
بدنيتي
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••

سـاࢪة•

فكيت عيوني وبَـس استوعبت فزيت
اريد اطلع اريد رنيم
بَـس المُمرضات منعوني صرت ابچي
وبَـس اسم هُمام بـ لسان ومن شافن وضعي
وحدة گالت

- منو هُمام؟

- زوجي اريد زوجي فدوة

طلعن دقائق ورجعت وحدة وهوَ وراها
منزل راسة ويمشي بَـس شفته بچيت
وعلى أثر صوتي رفع راسه
سرع خطواته وگعد على طرف السرير
سحبني لصدره انهاريت مَن البچي

- دم رنيم هُمام؟ فدوة اختي شبيها سولفلي مو والله گلبي حَـيوگف

بعدني وحاوط خدودي
هُمام- راح تكون احسن وعد

- دمممم منييين هُماااام

- صوتچ حبيبتي اهدي واني اسولفلچ

مسحت دموعي وهزيت راسي
- احجي يلـه

- ضربها احم.. اصبعها ما اعرف يعني بَـس ايدها چانت تنزف ووجهها واعتقد..

دار وجهة قاطع كلامه وبس جسمه يهتز
دليل على بُكائه ، أحَس عقلي فصل لان
وضعه مو طبيعي هزيته وبعيوني اگله كمل
وياريته ما كمل ياريته ما گال الگاله

هُمام- اعتقد مغتصبها لان

- لان لان شنو كمل هُمام

- چانت تنزف ما اعرف شنو بالضبط وچانت عارية من دخلت عليها

بهَتت صافنة لان حاسه بوجعها هذا
وجع ما ينوصف ، وجع ما يحس بيّ بَـس الجربه
اني جربت ومريت بالاسوء
اعرف الشعور وعمق الجرح وكُبر الكسر

- آه لا هُمام گول غيرها

- مو اكيد سارة هذا مُجرد شك

دار عيونه مني وعرفته چذاب وكلامه اكيد
بَـس يمكن مَن شاف وضعي خاف يحجي
وتدهور صحتي بَـس يا صحة بعد العرفته

- اخذني الها

هُمام- ننتظر التحالليل

- يولن

- ننتظر سارة اصلًا رنيم بعدها ما طالعة وين اخذچ؟

سكتت بَـس گلبي جمر اريد ادخلها بوسط
گلبي واضمها مَن العالم كله
اريد احميها مَن الهوى لو مس وجنتها

اخيرًا تقدمت المُمرضة اني ما چنت مهتمة للصراحة
بَـس شفت اللهفة بعيون هُمام وتركيزة
بكلمات المُمرضة!! استغربت وبعدين طخت!!
متت مَن القهر على لهفته لشيء مُستحيل
لعد شگد متلهف على الاطفال وأنُ يــكون
اب؟

- عندچ التهابات بالمجاري البول** تحتاجين بعض العلاجات وان شاء الله تكونين احسن مع الاستمرارية على العلاج

اباوعله خابت اماله وهوَ يتشكر منها وياخذ
وصفة العلاج؟ دار وشاف نظراتي بسُرعة
ابتسم يضيع ملامح العبوس المستوطنة ملامحة

نزلت مَن السرير ما مهتمه لشي وخصوصًا
موضوع الانجاب اني قطعت الامل منه
واتمنى مَن هُمام يقطع الامل مني لان اني
مُستحيل اقدمله طفل !!
اخذ ايدي وگال بصوت ناصي مليان حنية

هُمام- اضمچ بروحي

حضنت ذراعه طريقة اعبر بيها عن حُبي
لان ما عندي طاقة احجي واجاوب كلامه
المعسول
طلعنا بره بَـس هوَ بقى يدور اخر شي رفع
التلفون وگال

هُمام- وينكم؟.. تمام تمام جايين

- ها هُمام

هُمام- امشي طلعوها غرفة وحدها خلي نروح

صرت اركض بگلبي قبل رجلي
وصلنا للمر وشفت مَن بعيد ام قسورة
وكليم
كليم اليّ بَـس شاف هُمام اجه يركض وحضنه
ابتعدت شوي متفاجئة مَن حركته وقبل
لا استنتچ شي سمعته يگول بهمس ولان
قريبة سمعت

كليم- لك خيي العار ما مغتصبها رنيم ما بيها شي هسه الدكتورة گالت

هُمام- گول والله؟

- ورحمة العزاز

هُمام- بَـس شلون أنتَ گلت؟!!

كليم- ما اعرف التصوير ما چان واضح اكيد اني غلطان او هوَ ما لحگ يسويها لان وراها بدقائق سمعت صوت طلقة وركض طفى المكالمة

هُمام- الحمد لله

- خوية!

دار مبتسم وهز راسه بمعنى اسمع
- رنيم گعدت؟

كليم- لا او ما تريد تشوفنا

گال كلماته الاخيرة بخيبة امل
ربت هُمام على كتفه وگال يستفسر

هُمام- ليش هيچ گلت؟

- الدكتورة تگول گاعدة بَـس ما تفتح عيونها
گالت ادخل شوفها بَـس هُمام ما گدرت والله ما گدرت شلون اتواجه وياها بيا عين اباوعلها؟

- امشي كلنا ندخل وخليها على الله لان اول وتالي نشوفها

سمحلنا الدكتور ندخل بَـس ما نضغط عليها
وما نأثر على نفسيتها لان تعبانة ومُمكن
اي تصرف من عندنا يأذيها ويأزم حالتها
طلب مننا نكون حذرين بالتعامل ويــاها
ومهما غلطت بتصرفاتها نقابلها بالـهدوء
والتقبُل

چنت نستمع لتوصياته بحذر رُغم حتى لو
ما وصى احنه ما چنه راح نسوي اي شي
يأذيها او يتعبها
دخلنا للغرفة ، وشگد ما اگول اني وهُمــام
متوترين وقلقانين ما نوصل لذرة مَن رجيف كليم
الرجال چانت ايدي تهتز بطريقة غريبة
وعيونه تنتظر اي سبب حتى تذرف دموعها

وگفت وويا شهگتي كتم صوتي هُمام بيده !!
رَوحـي فرفحت على منظرها اليّ يقطع
نياط القلب ، ضماني لـ صدره وهمس

هُمام- شنو گال الدكتور؟ قوي نفسچ سارة

هزيت راسي وعيوني لا إراديًا راحت تشوف
ردة فعل كليم على منظرها
خشمها مكسور ووجهة عُبارة عن كدمات
حُمر مزرقة ايد وحده مجبرة بالكامل
والثانية بَـس الاصابع ورجلها حاطيله مثل
مشد او هيچ شي بسبب تمزق

تقدم كليم گعد على ركباته يم سريرها
مرر ايده على شعرها القصير ونزل راسه
يطبع بوساته على ايدها بدون ما يلمسها
چان خايف لو لمسها يأذي جرح مَن جروحها

حط راسه قريب شعرها يشمه ما مهتم
لوجودنا
كليم- بنياتي؟ روح كليم وصحته وعافيته تسمعيني حبيبتي؟ حاجيني ارويني صوتچ صارلي اشهر متعذب على فراقچ

ابتعد يباوعلها على امل تفتح عيونها
او تنطي ردة فعل بسيطة على كلامه
بَـس عبث
چانت هادئة او الاصح منطفية من الحياة

كليم- چنت خايف من عتابچ بَـس هسه اريد تعاتبيني فدوة بابا بَـس سمعيني صوتچ گولي أي ش...

رنيم- عفتني !!

فز مصعوق وجاوبها
كليم- لا ورحمة ابوي لا وعيونچ شلون اعوفچ واني رَوحـي بيچ يومي يمر مثل السَم بغيابچ

رنيم- تأخرت

- اسف

فتحت عيونها الچانت جمر وبقت مركزة بالسقف بشرود
لحد ما حركتهن ووگعت عيونها عليّ بقيت ارجف منتظرة حركة تصدر منها
گلبي وگف إلا شوي
ابتسمت !! والله ابتسمت وحركت راسها
تطلب مني اتقدم بدون ما تباوع بأتجاه
كليم

تقدمت ارجف
رنيم- مشتاقتلچ امي احتاجيتچ هواية

شهگت ضامتها لـ صدري وبچت
- رَوحـي أنتِ بنتي وصديقة عُمري ميته عليچ سارة انتهت وراچ

ابتعدت ابوس بوجهة واضحك فرحانة لان استجابت ويايَّ وما زعلانه مني

هُمام- حبيبة خالها

اختفت ابتسامتها وبنفس الجمود باوعتله
وابد ما حجت
بَـس عمة مَن سلمت عليها تجاوبت! واضح
هُمام وكليم وراهُم مشوار طويل وياها
حتى يرضونها ويقنعونها

كليم- لا تسوين هيچ !! أنتِ ما تعرفين اني شلو..

قاطعته مرة ثانية
رنيم- انجلطت؟

بهَت معبس يباوعلها
رنيم- اعرف كُلشي اعرف بَـس هذا ما يعني أنتَ تأخرت
اني اعرف شنو عشت بَـس أنتَ تعرف اني شنو عشت وعذاب كم طريقة تعذب استعمل ويايَّ؟
تعرف بكُل مرة يسكر بيها اني اتعرض للاعتداء شووووف جسمي شوووف أثار قذارته منتشرة عليَّ وبكل مرة انجو بطريق بَـس بالاخيرة وگدام عينك اغت..

سد حلگها يرجف رجيف
كليم- ما بيچ شي حبيبتي ما بيچ شي الدكتورة تأكدت ما سوالچ شي لحگنا عليچ

دفعت ايده
رنيم- هالشي ما يغير هوَ شاف جسمي وعشت شعور مُقرف بلمساته

تنهد وحسيته انقهر كلش
هُمام- ما گعدنا ولا يوم بدون ما ندور عليچ

رنيم- بَـس تأخرتواااا چنت محتاجتكُم بالخصوص أنتو ردتكُم تضموني بحُضنكُم لمن عذاب دخل عليَّ چلب وشوف أثاره بيدي

بعد هُمام ثوب المستشفى وباس الضماد
هُمام- كليم كسر ايدي ورجلي التجرئًا ومدهن عليچ

باوعت لـ كليم ابتسم وهز راسه
- كسرته وبَـس أأمن عليچ ارجع اكسره وعد

بقت تباوعله وعيونها تصب
حسيت يحتاجون يبقون وحدهُم

تقربت مَن هُمام
- خلي نتركهُم وحدهُم

هز راسه وطلعنا احنه وام قسورة
البنات خابرني ومفرفحت يردن يجن
بَـس ما قبلت لان رنيم نخرجها لو
اليوم لو باجر
ㅤㅤㅤ
ㅤㅤㅤ
ㅤㅤㅤ
ㅤㅤㅤ
ㅤㅤㅤ
••••••••••••••••••••••••••••••

رنيـم•

ما اعرف ليش أذيته بكلامي بَـس
اني تعبانة واعرف هوَ راح يتحمل
تقلُباتي وتعبي
لذلك يمكن حجيت واني اعرف ما
يجرحني

الغرفة فرغت وهذا الشي خلاني ادخل
بصمت
رُغم الوجع المحتل جسمي بَـس قُربة گدر
ينسيني كلشي
سند راسه على راسي ولمحت طيف ابتسامة ما لحگت استغرب لان بسُرعة
اجاني الجواب منه

كليم- ما مصدك لگيتچ واخيرًا !! خلصت ليالي عذابي بفراگچ

فتحت عيوني الغمضتهن بسبب لمسات ايده على شعري وخدودي
رغبة تقبيلة طغت على كُلشي نزلت عيوني على شفايفة ورجعتهن بعينة

توسعت ابتسامته كأنو قرأ افكاري المُنحرفة
وهالشي زاد توتري وتمنيت اطم نفسي
تقرب هوَ مقلص المسافة واخذ شفايفي
بجولة شغوفة يعبر بحُب عن مشاعره
وشوقة بادلته بروح ميته شوق

بَـس ابتعد شهگت بچي
- لا تعوفني بعَد كليمي

- روح كليمچ

- محتاجتك كلش هواية

- بعيوني اضمچ

مسح دموعي وباس خدي بوسة ام الصوت
وشمني بقوة بلحظة مليانة مشاعر
لحظة شفايفي عبرت عن حُبي بدون
إرادة مني

- احبك

بضياع صار يباوع وكأنو كلماتي نزلت مثل
الصاعقة عليّ
هزيت راسي أؤكد كلامي

- احبك اكثر من اي شي بهذا الكون وصدگني الشي الصح السويته بحياتي أنتَ چنت افضل اختيار اختاره
حبيتك !! مَن زمان حبيتك بَـس چنت ضايعة
بالماضي عذبتك وعذبة نفسي ويــاك
بَـس هسه اعرف كُل عقبة مرت چانت
اختبار النا ونجحنا بيّ ، شُكرًا لأنك موجود
بحياتي وما عفتني رُغم كلشي سويته
وسامحني لان قوتي ما كفت حتى احافظ على
نفسي وشرفي من عذاب ونزلت راس...

قاطع كلامي وهوَ يبوسني بقوة
ابتعد وما ابتعد لان من حجه شفايفه
لامست شفايفي

كليم- أنتِ اطهر حياة اختارها اطهر حُب خضته واستمر بيّ وراسي مرفوع

ميل راسه وضاف
- تأكدي من هاي اللحظة كلشي راح يكون مُختلف

- شلون؟

- شاهدي واستمتعي بَـس

- كليم

- عُمره الراح والجاي أنتِ ابوية ثقي بيّ

وثقيت وتأكدت للمرة المليون كليم گد الوعد
وگد كلمته
گدر يثبت للمرة الترليون هوَ زوج واب واخ وابن وخال مثالي وفوگ المثالية
ومحد مثله ولا اكو مثله ولا عيوني تشوف
غيره

ملاكي الحارس !!
ㅤㅤㅤ
ㅤㅤㅤ
ㅤㅤㅤ
ㅤㅤㅤ

••••••••••••••••••••••••••••••

مسـرة•

الوب وحدي بالبيت
هسه تگولون ليش وحدچ؟ بكل بساطة
لان دموع مَن عرفت رنيم حالتها مو زينة
لزمت السُجادة والقرآن وگعدت
وبيبي ام كليم بغرفتها هي وريم بنت عمو
كليم والولد كلهُم مو هنا واني مثل الططوة
افتر بالبيت وحدي

توني طلعت للحديقة واشوف الباب انفتح
ودخل قسورة ابتسم مَن شافني وفتح أيدي
ومثل الثولة ركضت شامرة نفسي بحُضنه
شالني من الارض وهوَ حاضني وتمشى بيّ
للحديقة الخلفية

- عااااا قسور رنيمممم رجعت

- ههههه الف الحمد لله

- اريد اشوفها حباااااب اخذني فدوة فدوة

نزلني وطبع بوسات عشوائية على كف أيدي وهوَ يجاوبني
قسورة- خالي ما يقبل يگول باجر تطلع ويشوفونها

- شلون اتحمل لباچر

- تحملي حبيبي

- وين اگدر اتحمل قسورة؟

ضحك وگال بتلاعُب
- تحملي تحملي

ضربت كتفة غاشمة عن تلميحاته
- هففف دا احجي وياك عوف الشقة

قسورة- تردين تورطيني ويا خالي؟ گال ممنوع فهمي ممنوع

- ليش؟

- لان اختچ تعبانه وما نريد نرهقها مَن اول يوم واصلًا بَـس خالي باقي يمها بالغرفة كمُرافق واختچ مثل عنادچ گاعدة ومگعدة هُمام گدام الغرفة بلا فائدة

- اكيد باچر تجي

- والله ما اعرف بَـس خالي گال باچر

تنهدت بضيق
- شلونها؟

- مو زينه بَـس راح تتحسن بوجود الناس اليحبونها

ابتسم وضاف بفرح
قسورة- يلـه جهزي نفسچ

- لشنو؟

قسورة- بَـس يتحسن وضع رنيم اجي اخطبچ

گلبي صار برجلي على أثر كلامه
وزاد الوضع سوء مَن حاوط خصري
بتملُك وسحبني لازگني بيّ !!
رفعت راسي وهوَ نزل طابع بوسه على
خدي وهمس يحرك خشمه على بشرتي

- واخيرًا مسرات الروح واخيرًا راح تكونين مُلكي مُلك قسورة
مسرات الـ عُقاب.

..

وتستمر الحكاية.. 🚬♣

سبب التأخير الخطار وبعدين وانا اكتب الواتباد سوه خروج وحدة ومن دخلت لگيته حاذف البارت واليوم خلص الاشتراك 🙂💔

قناة التلي zainab_salah0