رواية فارسي العاشق الفصل الثامن عشر 18 - بقلم بسمة البياتي

_  فارسي العاشق _
( بقلم بسمة البياتي)
_البارت التاسع عشر _

كاعدة بالكاع دموعي مغركة خدي نار مشتعلة بگلبي
ليش بس اني حظي هيجي وين ما اروح محد يرحمني
اغلى شي عند البنية هو شرفها واني بكل فرصة لازم يجي واحد يطعني ويتهمني

حجيت بصوت متقطع من البجي
ف فارس ابوس ايدك وديني الأهلي

فارس... كاعد جدامها والقهر والندامة تاكل بروحي
يبعد فارس واهلو بس كومي من الكاع

بنيتي نار غيرتي عمتني وخلتني اكول كلام بساعة غضب اني مو قاصدو

ريتال... انت جنت قاصد كل كلمة كلتها لوما شاك بيه مجان كتلي شنو بينج وبين حازم

فارس... خلي نفسج بمكاني اني رجال دمي حامي واشوف بعيني حرمتي شلون يتغير لونها وترجف ايدها من تسمع بطاري زلمة غيري والمصيبة اعرف بهذا الزلمة جان رايدها ونفسو بيها

ريتال... اذا تعرف نفس اخوك بيه ليششششش اخذتني

فارس... يولو اني بالبداية جنت رافض هالزواجة لان اشوفها صعبة ومو راهمه بس بسبب ضغط ابوية عليه وافقت

ريتال... رفعت راسي عليه مصدمة يعني هو انجبر ياخذني

فارس.. لا دحجين عليه هيج هاي الحقيقة

اني صح بحزتها مجنت موافق بس يشهد الله عليه من اول يوم شفتج بيه عشكتج
واحمد الله واشكرو لان خلاج تصيرين من نصيبي

ريتال... فارس هاي الزواجة اكبر غلط وملازم تستمر اترجاك طلكني وخليني ارجع الاهلي

فارس... اشش ديربالج اجيبين سيرت الطلاك على لسانج ماكو شي غير الموت يبعدج عن فارس

ريتال... خليت ايدي على وجهي وغصيت بالبجي 
انت ليش مدتحس بيه كافي انانية اني ما اريد ابقة حرام عليك عوفني

فارس... كومتها من الكاع وكعدتها على الجرباية
لزمت ايدها وبستهن وبست راسها وكصتها حاولت تبعد عني منطيتها مجال لميتها الحضني

ريتال... وخررر ما اريدك عووووووفني

فارس... يبعد الروح اهدي عيونج نمردت من البجي

ريتال... بالكوة سحبت نفسي منه نمت بفراشي وغطيت راسي وظليت جوة البطانية اشهك وابجي
هذا مثل حازم هم مراح يعوفني

فارس... جيت تمددت بسدها واني گلبي موجر نار عليها
صوت شهكتها وبجيها مثل السيوف التكطعني

ظليت بالفراش لا اني اكدر انام ولا هي

ريتال... طول الليل واني دموعي منشفو
ما اعرف بيا طريقة راح اكدر اروح الاهلي

فارس... متحملت اصبر اكثر حضنتها من ورا وصار ظهرها على صدري بعدت شعرها من ركبتها ودفنت راسي بيها وصرت اشمها واتحسر

ريتال... حضني فارس حاولت ادفعة وابتعد عنه بس مكدرت جان مقيدني بجسمه
لزك شفايفة على خدي الضربه

من اذكرت ضربتة بجيت بصوت

فارس... يبعد الروح والله ما اعرف شلون مديت ايدي عليج

ريتال... اني بحياتي محد ماد ايدة عليه وتجي انت بكل بساطة تضربني وهسه تريد تقشمرني بهذا كلامك

فارس...يبعد الروح ساعة شيطان لاتكبرين الموضوع والله تندمت وجاي الوم بنفسي شلون سويتها وضربتج

ريتال... فارس طول الليل يعتذر ويتوسل ويبوس بيه واني قافلة جنت كارهتة ومطايقة اسمع صوتة

فارس اذا متبتعد عني اعوفلك الغرفة واطلع

فارس... بعدت منها ظليت بالفراش مو كادر انام اذن الفجر كمت توضيت وصليت بالغرفة ماكدرت اتركها واروح للجامع

ريتال...  اني هم رحت صليت
بعدها رجعت لفراشي واخذتني النومة

الجو صار حار يمكن طفت الكهرباء فتحت عيني الشمس تارسة الغرفة وما اعرف ساعة بيش
ردت اتحرك مكدرت متقيدة باوعت اني بحضن فارس والمصيبة مو هنا المصيبة اني هم حاضنتة
من امداية اي والله امداية
اني طول الليل ناصبتها مناحة واصيح طلكني ما اريدك وهسه الكي نفسي مجلبة بي

ابتعدت عنه على كيفك قبل لايحس واتفشل

فارس... جريتها رجعتها الحضني واني بعدني مغمض
ابقي هسه يشغلون المولد

ريتال... خرب طلع كاعد
وين ابقة اريد اكوم عوفني اريد اروح العمو الشيخ اخلي هو ياخذني الاهلي

فارس... ههههههههه يولو لعد منو الندحست بحضني وتبوس بيه

ريتال... شهكت مصدومة لا كذب اكيد مو صح

فارس... يعني اني جذاب عجل من كعدتي وين جنتي مو بحضني

ريتال... اي هاي اكيد انت مستغل نومتي ومخليني احضنك

فارس... ههههههه هذا الحجي يفيدج هو ياريت لو بس على البوسة سويتي سوالف متنحجي

ريتال... عزاااا بعيني شمسوية اني حصرتني البجيه

فارس... ادحج عليها بتك عين ومبتسم
اي بعدج تريد تروحين العمج تكوليلو

ريتال...اي اكيد بس اشوفة اخلي هو ياخذني الأهلي

فارس... اي زين واني هم راح احجيلو شلون الصبح من كتيلي فارس احبك واموت عليك ولاتعوفني ما اكدر بدونك

ريتال... ياااااا شبيك تريد تخبلني  اني شوكت هيجي حجيت قابل جنت مكبسلة وما ادري بنفسي

فارس... تدرين ما تدرين مو مشكلتي المهم انتي بنفسج طلبتي مني ما اعوفج

ريتال...بثواني فر الموضوع عليه وخلاني اسد حلكي واسكت

باوعت الساعة راح تصير بال 12 الظهر كمت سبحت لان جسمي دبك كهرباء ماكو ومولد هم ماكو
هما عدهم مولد كبيرة خاصة للجامع وللبيت بس اليوم مادري ليش مشغلوها

طلعت من الحمام فارس هم راح يسبح

جنت بعدني ضايجة وروحي طاكة لوبيدي ولا انزل جوة بس مجبورة

نزلت شافتني هند

هند... هلا والله اليوم متاخرة

ريتال... ماخذتني النومة ومحسيت

هند... البارحة اصواتكم انتي وفارس عاليه خوما تكاونتو

ريتال... هسه شكوللها هاي تعاركنا علمود حازم حتى محلوة بحقي

لاحبي ماكو شي امور عادية بينا

بعدني داحجي وجان تدخل الغضب الساطع ام فارس

ام فارس... بعد وكت عليش كلفتني نفسج وهساع كعدتي حبيبة ترى انتي مو بيت ابوج وتنامين للظهاري هذا الكلام ميصرف عندي

ريتال... هو بس اليوم تاخرت ماكو داعي الهذا الحجي

ام فارس... بعد تكعدين من الصبح حالج حال البقية وحتى مواعين الريوك صارت عليج

ريتال... هاي المرة يمكن عليها جني مال مواعين

فارس... شنو هذا الصياح شبيج يمه

ام فارس... انت هين مو رايح للشغل

فارس... لا مرحت شكو شصاير

ام فارس... برتباك ماكو شي وليدي بس حرمتك ميصير تنام الهيجي وكت لازم تكعد حالها من حالنة

فارس... واذا نامت انگلبت الدنيا
واني من اكون بالبيت محد عليه بيها عسى ما تبقة طول النهار بالغرفة

ام فارس... عليش متعصب هساع اني شحجيت
عافتنا ودخلت جوة

فارس طلع راح للجامع

ظليت كاعدة بالمطبخ يم نسرين مالي مزاج اسوي اي شي روحي واصلة الخشمي

شيماء... عيني على ايدج نقش الحنة كومي غسلي الخظروات

ريتال... تفاجأت من وقاحتها اول مرة تحجي وياي بهاي الطريقة
جاوبتها بعصبيه ثاني مرة من تطلبين شي اطلبي باسلوب احد كايلج اني اشتغل يمج

شيماء... وشبي اسلوبي ترى ماغلطت وياج بشي اشوفينا كلنا نشتغل كومي ساعدينا

نسرين... صلوا على النبي هاي شكو شبيكم

ريتال... اني معاجبني اسوي شي وبكيفي

جنت ادور حجة اريدها بعد تحجي حتى اسويلي مشكلة واعوف هذا البيت المصخم
بس حرامات سكتت

نسرين... بنيتي شبيج ضايجة  ومو على بعضج

ريتال... مابية شي بس راسي يوجع ومالي خلك

نسرين...سلامتج ماتشوفين شر ان شاء الله

الشيخ والولد اجو من الجامع صبينا غدا
رغم اني ممتريكة بس ولا اشتهي اكل بالكوة جابره نفسي وكاعدة وياهم 

اول وحدة اني كمت جنت واكفة على المغسلة اغسل ايدي

اجة فارس يمي اشو هذا طوقني بايدة وحضني

فارس وخر لايروح احد يجي

فارس... خلي يجون هو شمسوي اريد اغسل

ريتال. فزينا اني ويا من سمعنا صوت الشيخ يتحمحم

متت من الفشلة ركضت بسرعة رحت للمطبخ
اسمع الشيخ يكول الفارس

الشيخ... عندك بيت فوك شكبرو
قحط الامكان الا اهنا جدامنا

فارس... ابو عادل مالو داعي هالحجي قابل احنا شمسوين

الشيخ...لا يابوي مومسوي شي الظاهر انت زايح المستحى

فارس... هههههههه صار يابة بعد من اتوازى اخذها واصعد

ريتال... عزاااا بعينك فارس اشكد متستحي

الشيخ... ماتنلام امك من اتكول فارس عقلوا طاير

فارس...الحجية ما وراها سالفة غيري شيخ عگاب شد همتك شوية وجدد شبابك وياها بلكي تتركني بحالي وتلتهي بيك 

الشيخ... امشي من جدامي يا عديم المستحى

فارس... هههههههه بست راسو ورجعت للربعة

ريتال... عزااا شلون راح اكدر احط عيني بعين عمي  والله فشلة

العصر فارس بدل يريد يطلع ويا اصدقائة

ريتال.. فارس اريد موبايلي

فارس... ماكو موبايل انسي

ريتال... شنو ماكو ترى ميصير هيج اريد احجي ويا اهلي اشتاقيتلهم

فارس... جيت كعدت جدامها شوفي بنيتي راح انطيج تلفونج بس وحق من حق الحق وبسط الارض اذا طلبتي منهم يجون ياخذوج  اسويها ادموم

ريتال... خفت من كلامه شنو شتسوي

فارس... الي يفكر يجي ياخذج مني بدون رضاتي ما اخلي يطلع من هين سالم 

ريتال... كمت ابجي من الخوف جاي انصدم بتصرفات فارس

فارس...  عليش تبجين مو تريدين تلفونج هساع اجيبو الج واحجي ويا اهلج بس لازم توعديني متحجيلهم شي من الصار

ريتال.. جنت مجبورة اوافق لان اخاف من المشاكل

صارلي خمس ايام زعلانة من فارس كلامي ويا على كد السؤال والجواب

هو متخبل مبقة شي مسوى حتى يراضيني واني قافلة عليه
حتى بالليل كمت اخلي حاجز بيني وبينة ما اريدة يجي يمي

اليوم جمعة يرجع من وقت من المعمل
بعد صلاة العصر اجة عليه كالي بدلي خلي نطلع

استغربت شعجب فارس يريد يطلعني هو لوبيده يحبسني

حتى على اهلي ميقبل ياخذني يخاف بس اروح بعد ما أرجع

جاوبتة برود ما اريد اطلع وياك

فارس... يولو ترى شليتني لاتعاندين كومي بدلي يلا اعرف بيج ضايجة ومختنكة من كعدت البيت

ريتال... ظل يلح عليه اخير شي وافقت لان صدوك ضايجة

مممممم وكفت كدام الكنتور وبقيت اباوع على ملابسي بسيطة فارس  اذا ما رفعت ضغطك اليوم فلا اني ريتال

طلعت بنطرون كابوي اسود وقميص طويل لونه ابيض واسود

لبستهم لفيت الحجاب وخليت مكياج وشوية طوخت

فارس من دخل للغرفة وشافني عينة رادت تطلع لبرا

فارس.... هاي من كل عقلج تلبسين بنطرون وتطلعين وياي وشنو هذا المكياج يولو

ريتال... وشبي البنطرون ترى هذا لبسي العادي
واعتقد لبسي مستور مبي شي

فارس... ريتال غيري الملابس هاي

ريتال... ما اغير شي واذا ميعجبوك عادي هسه ابدل وبلاها هالطلعة

فارس... غمضت عيني اعرف بيها جاي تسوي عناد

جيت ابدل واني شايل هم شكبرة شلون راح اطلع وياها هيجي

ريتال... كاعدة اباوع عليه وهو يبدل لبس بنطرون اسود وقميص زيتوني فاتح

جنت صافنة عليه حذاءة يلمع لبس الساعة وتعطر واخذ النظارات

ممممم والله حلو وكشاخ خرب ما ادري ليش اليوم حلى بعيني

فارس... وين صافنة يلا امشي

نزلنة جوة

نسرين...هاا بنيتي رايحة الأهلج

ريتال... لا طالعين اني وفارس

اباوع على صبا وشيماء راح ياكلونة بعيونهم

ام فارس... ترى عندك حرمة ثانية عليش مطلعها وياكم لو بس حلال على هاي وحرام على هذيج

فارس... يامثبت العقل والدين اني بكيفي اطلع ويا التعجبني
صبا ممقصرة بالطلعات عود من تكعد بالبيت بعدين احجي

يلا امشششي حسسسسرة اسوي شي لازم الكل يعرضلي

ريتال...يبوووو هذا صار عصبي اني شورطني وهيجي لبست

طلعت صعدت بالسيارة فارس جان يسوق وهو ساكت وينافخ

نص الطريق يلا شوية فك

ريتال.. ردت اشغل مسجل ماكو اي قرص اغاني بالسيارة بس قرآن

فارس.. شدورين

ريتال... يعني معقولة انت متسمع اغاني

فارس... بنتي حرام شسوي بيهن

ريتال... طلعت موبايلي شكلتة على المسجل دورت اغنية اشغلها وجان اشوف اغنية شيرين كلامها ينطبق على وضعي اني وفارس ههههههه خلي ارجع اضوجه

جرح تاني هوا قلبي لسه طاب من الاولاني
اروحله تاني هوا قلبي ينسى جرحه الاولاني

غلط مره وقلت على الرخيص ... غالي
جرحت قلبي وجرح القلوب ... غالي

من النهارده مفيش احزان ... مفيش الوان
من النهارده حب ... مفيش ده كمان

الله يعوض على الايام والليالـــي

فارس وجهة صار احمر بالكوة كاتم ضحكتة
اخير شي متحمل وضحك بصوت عالي

فارس.... هههههههههههه حلوة الاغنية 

ريتال... واشو تضحك شبيك

فارس... سلامتج ههههههه

فارس خلى سيارتة بالكراج
وطلعنا نتمشى شبك ايدي بين ايده
جنت اعرف بي ممرتاح وعيونة تتلفت منا ومنا

اخذني للمول
فارس... شنو اليعجبج اخذي

فرصة متتعوض خلي استغلها دخلت محل مواد تجميل ومكياج
كومة اخذت شغلات جنت محتاجتهم
ومن طلعت شفت جنطة وحذاء عجبوني هم اخذتهم

فارس... شنو بعد محتاجة

ريتال.. لا كافي بعد ممحتاجة شي

فارس... عجل امشي نروح نتعشى

ريتال.. اخذني المطعم اختار مكان بعيد عن الناس يلا قبل نكعد

فارس... شتحبين تاكلين

ريتال.. طلبت صاج وفنگر

وهو طلب قوزي هههههههه بهل ليل ياكل قوزي

فارس... بربج هو هذا هم اكل الي طلبتي

ريتال... لعد خوما اطلب قوزي هههههههه

فارس... اطيب اكل بس انتي ادورين نزاكة

ريتال... ترى اني قبل لا ازوجك ما اتعشى بس من اجيت يمكم انجبرت اكعد وياكم

فارس... يولو لعد شتاكلين شنو ماتجوعين انتي

ريتال... اكل شي خفيف نساتل شبس كيك ويا العصير
بابا جان يومية يجيبلي من الاسواق لان يعرف ما اتعشى

فارس... عجل ليش ماتطلبين مني واني اجيبلج بعدج لهساع تستحين مني

ريتال... ما اعرف شجاوبة سكتت

كملنا العشى وطلعنا اخذني المحل مرطبات اكلنا ايس كريم

وبالطريق وكف يم سوبر ماركت كالي هسه اجي

اجة شايل علاليك كومه

ريتال... هاي شنو

فارس... هاي الج وبعد اي شي تريدي تكوليلي وبطلي سالفة المستحى

وباجر اجيبلج ثلاثة صغيرة خليها بالغرفة

ريتال... ابتسمتلة اعرف بي هوايه حنين بس شغلة الغيرة الزايدة محلوة بي

وصلنا تقريباً ساعة 11 ونص
الحمدلله المطبخ نظيف ممبقين شغل

جانوا الكل بعدهم كاعدين يتعللون ماعدا الشيخ وام فارس

سلمت وصعدت لان تعبانه
فارس جاب الغراض واجة ورايه

فارس راح يسبح لان الجو برا جان حار
ومن خلص اني هم سبحت

تمددت حتى انام اجة فارس تمدد يمي انطيتة ظهري

فارس.. ريتال تعرفين الحرمة التمتنع عن زلمتها شنو عقابها

ريتال..ابتسمت وجاوبتة لا ما اعرف

فارس.. اتظل الملائكة تلعنها للصبح
وبيوم الحساب الها اسفل درجات النار ويا فرعون وابليس

ريتال.. ياااا يعني صبا من من جماعة فرعون

فارس.. وشجاب طاري صبا بالنص

ريتال.. اي مو هي صارلها سنين مانعتك من فراشها

فارس.. اللهم طولج ياروح ربيتلي گلب بصف گلبي

ريتال... هسه اني شمسوية مو انت الحجيت

فارس.. لو ظالة ساكتة احسنلج

ريتال... هههه رجع سكت بس اشوفة يحوص

فارس.... يولو لعد هذا القوزي التعشيت بي شنو فايدتو

ريتال... خرب بالكوة لازمة نفسي حتى ما اضحك
جاوبتة حتى تترس كرشك

فارس... طيح الله حظج على هالسالفة
هذا ياكرش يولو

ريتال... هو انت كلامك غريب اتكول المنو اكلتة غير  جنت جوعان وتعشيت

فارس... تزوهرت مو تعشيت حسي عاد ادري شوكت ترفعين الحصار مونعلتي الخلفوني
راح اموت وانتي السبب

ريتال.. لاتخاف مراح اتموت قبل ماتموتني

فارس...   متصيرلج جارة تبقين حجارة

ريتال... شكلة صار نار من العصبيه هههههه
اشو هذا ذب الغطى يريد يكوم لزمتة من ايدة
وين رايح

فارس... بعصبيه الجهنم

ريتال... لاتروح ابقة

فارس... انتي جاي تلعبين عليه لو شنو ريتال مو فارس الذلو مرة اني غلطت بحقج واعتذرتلج جثير رغم اني ما انزل راسي غير بس للخلقني

ريتال... حضنتة ودفنت راسي بصدرة ما اعرف شنو المتغير بيه هالمرة حضنه يختلف عن كل مره
متحملت كمت ابجي

فارس... عليش تبجين ييعد الروح ما اتقربلج لاضوجين المهم ما اشوف دموعج

ريتال... فارس الله عليك بعد لاتاذيني وتشك بيه اي شي يصير تعال استفسر مني بهدوء واسمعني للاخير لاتحكم عليه بدون متعرف جوابي

فارس.. يجرالج التريدي بس كافي تبجين بنيتي

ريتال... رفعت راسي باوعت عليه بعيون متروسة دموع
اكولك فارس شيماء ليش تباوع عليك بهتمام

فارس.... هههههههههههههه خرب غيرتج هاي وين كمزتي شذكر بيها بهل حزة

ريتال... فارسسسس لاتتهرب من الجواب لاتخليني اسال غيرك

فارس.. اكول يبعد الروح مو جنو الثلج بده يذوب

ريتال... اي وديربالك لا يغركك

فارس... اني غركت من اول يوم شفت بيها هالعيون

ريتال... ممممم هسه جاوبني ياحلو لاعبالك راح  تنسيني

فارس... ههههههههه راح اجاوبج بس مو هساع

ريتال... لعد شوكت

فارس... من ينتهي مفعول القوزي

ريتال.. ههههههههه خرب شجلبت بالقوزي اليوم

فارس... كولو طاقة وما اريد اضيعها بالحجي اشو تعالي مو شعلتي صفحتي

ريتال.. اول مرة احس بهذا اللاحساس اليوم جان شعوري مختلف جانت اجمل ليلة عندي

فارس.. يبعد الروح شنو المتغير بيج صايرة تفأجئيني

ريتال... شلون يعني

فارس...يمكن حب فارس كدر يتسلل ويدخل هالگلب

ريتال.. ياااا ليش اني قبل جنت اكرهك

فارس... لا يولو موتكرهيني بس اعرف ماكو مشاعر الي بگليج

ريتال.. خجلت منه خرب حتى هاي يعرفها
حبيت اغير الموضوع
يلا احجيلي على شيماء

فارس... ههههههه خلي تولي السالفة عليش ادوخين راسج بيها وهو الموضوع مايسوى

ريتال... فارسسسسس كتلج والله اذا متحجي راح اسال غيرك

فارس... انتي تعرفين بوضعي ويا صبا

قبل لا اخطبج امي والشيخ اقترحوا عليه ازوج شيماء

ريتال... ششششنو

فارس... يولو سالفة قديمة عليش جفلتي

ريتال... اي كمل

فارس... صبا من عرفت بالموضوع گلبت الدنيا وراحت زعلت يم اهلها
وصارت مشاكل جثيرة

ريتال... لعد صبا شلون وافقت تزوجني

فارس... من كعدوا وحجوا ويا صبا وكالولها اذا متريدنو يزوج انطي حقو حتى بلكي يصيرلو طفل خوما يبقة طول عمرو هيجي
هي متكدر على هالسالفة كالتلهم خلي يزوج اي وحدة ماعدا شيماء

ريتال... ليش شنو فرق شيماء عن غيرها

فارس... ما اعرف يمكن لان هنا موصلح دائماً يتكاونن

بعدها فترة ابوية طلب مني ازوجج

ريتال... مممممم بس مبين شيماء عينها عليك لان حتى اني تكرهني

فارس... خلي تولي لاديريلها بال

ريتال.. ما اعرف ليش حسيت هاي مو كل الحقيقة واكو كلام ضامة عليه فارس
والنبي ما ارتاح اذا ما اعرف

فارس.. زين هساع اني اسالج الأستاذ الراد يخطبج بعدو يداوم وياج

ريتال... لا هالسنة من داومت مموجود

فارس...انتي عليش وافقتي عليه

ريتال.. تنهدت ردت اخلص من اخوك

فارس... احسن شغلة سواها حازم مخلاج تاخذي وصرتي من نصيبي

ريتال... هههههههه اي انت الربحت

فارس...  ليش وافقتي عليه

ريتال... باوعت بعينه
حتى تحميني من حازم لان جنت اعرف بي مراح يعوفني بحالي واني بعدلي ثلاث سنوات دراسة خفت هم يرجع وياذيني

فارس... شبيت نار غمضت عيني بقهر

لاتخافين بنيتي والله اليرشج بماي ارشو بدم
شحدو اليتقرب منج واني خشمي يشم الهوا

ريتال... حضنتة قوي ربي يحفظك الي وميحرمني منك

ريتال... ثاني يوم العصر رحت على هند كعدت يمها

هند... يولي شبيج تحوصين اكو بحلكج حجاية ومجاي تعرفين شلون تحجيها

ريتال... اريد اسال سؤال بس اتمنى تحجيلي الصراحة ومضمين عليه شي

شنو سالفة شيماء وفارس وصبا

هند... يمعود عليش ادوخين نفسج بهالسيرة

ريتال... الله عليج احجيلي اني اعرف هو راد يخطبها بس صبا مقبلت

هند... عجل اذا تعرفين عليش جاي تساليني

هند... مو اني ما اعرف كل التفاصيل لهذا جيت عليج ما اكدر اسال احد غيرج

هند.... راح احجيلج بس بداعت الاعزاز لاتكولين اني كتلج

ريتال.. لا والنبي ما اكول

هند... يولي فارس قبل لا يزوج صبا جان عندو علاقة بشيماء ويحبها

ريتال... فتحت عيني على وسعهن من الصدمة شششنو.......

يتبع