رواية فارسي العاشق الفصل السابع عشر 17 - بقلم بسمة البياتي

_  فارسي العاشق _
( بقلم بسمة البياتي)
_البارت الثامن عشر _

باجر اخر يوم امتحاناتي

اليوم العصر الكل جانوا متحظرين يروحون الحنة ابن عم فارس

نسرين... بنيتي مغيرتي رايج حتى تجين ويانة

ريتال.. لا والله خالة ام مؤمن ما اكدر لان
امتحان باجر هواية صعب لازم ابقة اقرأ

باجر اذا الله راد على العرس احظر

نسرين... على راحتج
  مؤمن هم راح يظل لان عندو امتحان

الكل راحوا
جنت مكملة شغلي دخلت الغرفتي وبقيت اقرأ ماطلعت منها الحد مارجعوا

ثاني يوم رحنا اني ومؤمن للكلية

من كملت الامتحان طلعنا اني ورهوفة نفتر
مااعرف شلون راح اكدر افاركها

رهف... رتوتة بعدج مصرة تروحين الاهلج

ريتال.. اي اكيد اني جنت منتظرة اخلص الامتحانات واخلي فارس ياخذني الهم واذا مقبل اتصل عليهم اخليهم هما يجون ياخذوني

رهف... حقج والله لو اني بمكانج مجان سكتت من اول لحظة اعوفلة البيت واطلع اكو وحدة عاقلة تشمر نفسها من الدرج
هذا شلون يفكر دخيل الله

ريتال.. هذا الزواج غلط من البداية اني تسرعت بالموافقة بس شسوي هاي قسمتي

اجة مؤمن يمنا

اباوع عليه شلون عيونه تلمع من يباوع الرهف وهي هم نفس الشي
بس مستغربة ليش لهسه كاتم مشاعرة وميظهرها

مؤمن... بما ان اليوم اخير يوم راح اعزمكم على حسابي

رهف... عاش مؤمن يلا شمنتظر اريد لحم بعجين وكص وببسي

مؤمن... بدا الطمع يمكن راح اسحب العزيمة

رهف... عابتلك هسه قابل شطلبت اشكد بخيل

مؤمن.. يولو منو بخيل كضيت السنة كلها اعزمكم وهساع اتكوليلي بخيل

رهف ... لايمعود انت اصل الكرم
بس دروح مو كتلني الجوع

ريتال... كملنا اكل بقينا كاعدين شوية بعدين ودعنا رهف ورجعنا

لكينا بس فارس ونسرين بالبيت البقية كلهم بالعرس

نسرين... يلا بنيتي جهزي نفسج حتى نروح

ريتال.. والله بعد وقت ليش مستعجلين

نسرين..
الزفة تطلع من وكت لان العروسة من غير ناحية وشوية طريق بعيد لازم نروح ونرد  قبل العصر لان مسوين عرس برا وجايبين فرقة

ريتال... شعجب جايبين فرقة

نسرين... عادي عمومتنا كلهم هيجي اعراسهم بس احنا نختلف لان ابوية يستحرم

ريتال.. صعدت سبحت وبدلت لبست فستان رصاصي مال محجبات مستور وحلو خليت مكياج عادي بس شوية طوخت الكحل
والحمرة

نزلت جوة شافتني نسرين

نسرين... يولو والله اخاف عليج من العين شتلبسين وشتخلين يلوكلج

ريتال... فدوة الگلبج هاي عيونج الحلوة

نزل فارس من فوك من شافني عقد حواجبه
اووي هذا شبي

فارس... يلا امشوا تاخرنا

مؤمن... اني اروح بسيارتي حتى اخذ امي وجدة بيها للزفة

فارس... ماشي عجل يلا امشوا

ريتال...طلعنا برا نسرين صعدت ويا مؤمن واني بقيت حايرة اروح وياها لو ويا فارس

فارس... متصعدين شمنتظرة الناس تتفرج على طولج

ريتال...فزيت من صاح بيه بسرعة صعدت يمه

قبل لايحرك السيارة انطاني كلينكس بدون ميحجي شي

باوعت عليه شسوي بي

فارس... رصيت على اسناني
خففي حمرتج وخلي يومج يعدي على خير

ريتال.. اخذت الكلينكس وخففتها واني ساكتة

بيت عمهم موبعيد تقريباً بعد فرعين عنا

وصلنا قريب من بيتهم اباوع الدنيا مگلوبة سيارات كومه وناصبين جادر والشارع ميبين من الشباب شلون راح انزل ما ادري

فارس... هسسساع شششششلون انزلج وانتي لاعبة لعب بخلقتج

ريتال... ضجت منه وحصرتني البجية
ترى ماكو داعي كل شوية تصيح عليه رجعني للبيت وفضها

فارس... اللهم طولج ياروح
نزلت من السيارة وجيت فتحتلها الباب
تمشين وراية واياني واياج اشوفج ترفعين راسج

ريتال... هزيت راسي بالموافقة ونزلت امشي ورا
جان يمشي ومسويلي درع حتى لحد يشوفني

دخلنا للبيت
فارس... يلا بسرعة فوتي جوة وظلي يم النسوان حتى المطبخ ممنوع توصليلو

ريتال... فتت جوة البيت عبالك مدرسة نسوان واطفال حتى ماكو طريق تمشين بي
خوما ما اسولفلكم على الالوان عبالك ترفكلايت احمر اخضر اصفر لبسهم كارثة

والمصيبة الاكبر لازم اسلم على كل هاي النسوان خرب حتى تعبت

اخيراً  شفت رغد وهند رحت كعدت يمهن

رغد... ههههههه يولو شبيج مايعة

ريتال...هو الجو حار واستلموني دك مباوس وتحضن

هند... تغديتي لو لا

ريتال... اكلت بالكلية مو جوعانة

كاعدة داسولف ويا البنات اجتني بنت عمهم

... تكدرين تخليلنة مكياج مثل المخليتو
لان جثير حلو

ريتال... اي دللي بس اهنا هوسه واطفال

بنت عمهم... لا مو هين تعالي للغرفة

ريتال... كمنا اني ورغد وهند رحنا وياها
يبو حتى الغرفة متروسة بنات
واستلمتهن وحدة ورا الثانية
بس شلعن گلبي اضربلهن ويكولن خفيف طوخي يريدن الوان فوك عينهن

بس رغد وهند خليتلهن مثل مكياجي وطلعن يجننن

نسرين... يلا استعجلوا الزفة راح تطلع فارس يكول من يصعدون الزلم بالسيارات يلا اطلعون

بقينا واكفات ننتظرهم
الحد ما صعدو بالسيارات يلا طلعنا

باوعت السيارات كلها مقبطة هند راحت ويا زوجها

سيارة فارس مبيها مكان صبا وامها وخواتها وجهالهم تارسين السيارة
هو هم جان واكف محتار

اكو مرة كالت عليش بعدكم واكفين السيارة الجبيرة بيها مكان تعالوا صعدوا

رغد.. لا خاله مشكورة راح نروح ويا جمال
تعالي ريتال وياي

رحت صعدت بسيارة زوجها صح المكان ضيق بس احسن من الماكو
جان جمال زوج رغد يسوق واخو بصفة واني ورغد واخت جمال واطفالهم ليورا

فارس جان بعدة واكف والشرار يطلع من عينه
درت راسي ولا اريد اشوفة مسوي نفسه يغار وهو حتى مكان ممبقيلي

تحركت السيارات طول الطريق فارس يسوق قريب منه
جمال واخو روحهم حلوة يحبون يشاقون ويضحكون

وصلنا المنطقة اهل العروس وكفن السيارات وصار المدافع بفلس صارت ملحمة يم الباب

رغد.. خلينا نبقة هين بالسيارة عليش ننزل شوفي شلون هوسة جدام الباب

ريتال... اي والله احسن اذا نزلنة راح نشبع دفرات

دنسوالف اني ورغد انفتحت باب السيارة
وصار فارس كدامنا

فارس.. حدري ريتال

رغد... عوفها ويانة انت ماكو مكان بسيارتك

فارس... لا اكو يلا نزلي شمنتظرة

ريتال... نزلت ومشيت بتجاه سيارتة هو من الغضب يريد يهد الكاع بمشيتة

وصلت للسيارة دافتح الباب واصعد

فارس... امشي صعدي ليجدام

ريتال... مو ام صبا تصعد هنا

فارس... جاي تسسسسمعين شكاعد احجي

ريتال... خفت منه رحت بسرعة صعدت

هو هم صعد و اول مسد الباب انفجر بيه

فارس.... انتي اشكد گوية وعييييييينج صلفة تصعدين ويااااا شباب اثنين

ريتال... جنت خايفة وبنفس الوقت مقهورة
واني شسوي وين اولي مكان ماكووو مو زين منهم اخذوني وياهم

فارس... اي زين عليش موزين صاعدا وياشباب وشقة وضحك وطز با فارس وعشيرتو

ريتال... عييييب عليك هيجي تحجي
اختك جانت وياي وزوجها ابن عمك واختهم هم ويانه

فارس... انعل ابوج لابو اختي الظاهر اختلاطج بشباب الكلية مطلع عينج وعادي عندج تسوالفين ويا هذا وهذاك انتي مبين تريدين اكسرج واكعدج بالبيت

ريتال... تخبلت من غلط على بابا واتهمني اختلط بالشباب
بجيت وبقهر وصحت
كااااااافي تغلط مسسسوي نفسك صاحب حق وغيور واني بسببك رحت صعدت وياهم
لو اني اهمك مجان عفتني واكفة محتارة والناس تتفرج عليه
وثاني شي شوكت اني مختلطة بشباب الكلية ابن اختك وياي روح سألة كوله هم شفت ريتال تحجي ويا الشباب

فارس فاتح عيني ومصدوم من ردت فعلي جان شوية ويكفخني

اريد اروووووووح الاهلي بعد ما أبقة يمك ولا لحظة

اني بس كملت كلامي فارس بكل غضب شخط السيارة بطريقة مرعبة صوت التايرات شحطت بالكاع من الخوف عطت بفزع وسديت اذني

اباوع بس الترابة بقت ورانا وكل البشارع بقوا يباعون

جان يسوق بسرعة جنونية
تلفوني وتلفون فارس مسكتن

فارس فدوة لاتسوق سريع راح تنكلب السيارة
جان ولايسمعني كمت ابجي بصوت خليت ايدي على راسي ودنكت

من شافني هيجي شوية قلل من السرعة

فارس.... گلبي شايل جثير على ريتال من يوم موضوع الاسقاط واني غادي نار

ما اكدر اصدك مو هي السوت هيج بنفسها
اكيد جانت متقصدة تنزلو وحاولت تجيت من الدرج وتعثرت و وكعت

عاقبتها وهجرتها صرت ابات بغرفة صبا رغم اني ما احجي ويا صبا

ومجنت ادري بهذا العقاب جاي اعاقب نفسي روحي مفرفحة عليها وغادي نار الموت اهون من شوفتها جدامي واني ما اكدر اتقرب منها

جنت اتمنى تعترف بغلطها وتجي تعتذر بس عنيدة وراسها گوي

اليوم عرس ابن عمي طلعنا نجيب عروستو
باوعت سيارتي مقبطة صبا واهلها كاعدين بيها ظليت محتار لا اكدر احجي ولا اكدر اسكت

والزاد الطين بله من شفتها صعدت بسيارة جمال واخو جان ويا

طول الطريق واني محترك اهل اهلي بس اريد اوصل وانزلها
صعدتها السيارتي وحجيت عليها اعرف هي مابيها صوج بس موبيدي نار الغيرة عاميتني

من كالت تريد تروح الاهلها عقل ماظل براسي  شغلت السيارة وطلعت

كل شوية واحد من اخوتي وولد عموتي يتصل

اتصل وسام جاوبتوا

وسام... عليش مترد هاي شكووو وين رحت وانت تسوق مثل المخابيل

فارس... اني راجع قبلكم ماكو شي لايظل بالك

وسام... خرب شرفك دشوف شسويت بسيارات الناس ترستهن تراب وهما من الصبح يلمعون بيهن

فارس... كوللهم سيارتو بيها خلل راح يسويها وعتذرلي منهم

ريتال... ظليت ابجي رغد وهند هوايه اتصلوا عليه مجاوبتهم

فارس طول الطريق بس يستغفر

رجعني للبيت باوعت عليه بغضب
موكتلك اررررررريد اروح الاهلي

اشو هذا ولاعبرني نزل فتح باب الكراج ودخل السيارة جوة

اني بقيت معاندة منزلت من السيارة

راح طلع مفتاح البيت وفتح باب المطبخ ودخل جوة واني بعدني على نفس وضعي
مليت ونزلت طبكت باب السيارة بكل قوتي

دخلت للمطبخ جان واكف يشرب مي ولا مهتم عبالك اي شي مصاير

كملت طريقي واني احجي اوك لاتاخذني اني اخابرهم هما يجون ياخذوني نعلة عليها التبقة اهنا بعد

صعدت للغرفة هستوني دخلت انفتح الباب بكل غضب

فارس... وين تلفونج

ريتال... انهزمت من كدامه معليك بيه شتريد من موبايلي

فارس... جيت يمها جريت جنطتها طلعت التلفون واخذتو

ريتال.. جيييب موبايلي ما اريد ابقة اهنا خوما كوة

فارس... يولو عشم ابليس بالجنة اخليج تطلعين من هذا البيت

تركتها وطلعت قفلت باب الغرفة واخذت المفتاح جنت خايف المخبلة تسويها وتخابرهم من موبايل واحد من اهل البيت

ريتال... ياااااا هذا يمكن قفل الباب ركضت لزمت يدة الباب اريده افتحة ميفتح
ظليت ادك بالباب
فاررررس فارررررررررررس افتح الباب شششششنو هاي الحركات

فارررررررررررس خرب اوك براحتك قابل انت انت راح تبقة حابسسسسسني العمر كله يجي عمو واكوله عليييييك

فارس... ابتسمت من كلامها حدرت جوة كعدت بالربعة ما أكدر اعوفها وحدها

ريتال... جنت افتر بالغرفة اخير شي تعبت ونعست اني اليوم كاعدة من الفجر مشبعانه نوم
ودوام وانوب عرس وهوسة ولا ارتاحيت

باوعت الغرفة باردة تشجع على النوم طلعتلي دشداشة فانيلة قصيرة وربع ردن لبستها ودخلت للفراش مطولت دقائق وغطيت بنوم عميق ولا عبالك قبل شويه جنت متعاركة وشبعانة بجي

فارس... صعدت اشوف المخبلة شكاعد تسوي لان بعد مدكت الباب ولا صيحت اخاف تروح تسوي بروحها شي

فتحت باب الغرفة ابتسمت من منظرها شلون نايمة
اووووف لومو كرامتي اروح الفها بين ذراعاتي ونام
رجعت قفلت الباب ونزلت

شغلت السيارة ورحت البيت عمي
كل شوية واحد متصل يسال عليه عيب ما اكون ويا ولد عمي بهيجي يوم

ابوية تغدا بيت عمي ورجع للجامع مايحب الغنى والموسيقى وعمامي يعرفون طبعو مايعتبون عليه

ظليت كاعد ويا الولد واني بالي كلو يمها

من صبوا العشى ترخصت منهم وطلعت

ريتال... نمت هواية كعدت دنيا ظلمة ظليت شوية بفراشي وبعدين كمت رحت يم الباب شفتة بعده مقفول هففف هذا شوكت يفتحه

سمعت صوت يمكن رجعوا دكيت الباب اكثر من مرة

هند... ريتال عليش جاي ادكين الباب

ريتال... لج هذا المخبل قافلة عليه

هند... ههههههههه انعل يومك فارس هاي شمسوي بيج

ريتال.. مو اكولج مخبل ماعليه عتب

هند... مكصوفة الرگبة سكتي لايجي ويسمع يمكن يزتج من الشباك

ريتال.. عفية وين عمو كوليلة خلي يحجي ويا فارس يفتحلي الباب

هند.. هساع احدر اشوفو وينو

فارس... رحت جبت عشى من رجعت للبيت لكيتهم راجعين

نسرين... فارس هاي من كل عقلك حابس البنية بغرفتها

فارس... رحمة الابو مؤمن سدي السالفة ولحد يسالني شي الموضوع بيني وبين حرمتي

نسرين.. خوية محد مدخل بينكم بس خطية حابس البنية

فارس... هساع اصعد افتحلها الباب
وهذا تحذير للكل اسمعوني الي ينطيها تلفونو اهجم البيت على راسو

عفتهم وصعدت فتحت الباب جانت متمدده من شافتني عدلت كعدتها خليت الاكل على الميز ورحت اطلعلي ملابس

ريتال... خررب شنو هذا البرود الهو بي
احم فارس اريد موبايلي هسه اهلي يظل بالهم عليه من الصبح ممخابرتهم

فارس... حجيت وياها واني منطيها ظهري
ابوج اتصل عليه وكتلو تلفون ريتال عاطل

ريتال... يااااا عزاااا مو عيب عليك تكذب عليه

فارس... اندريت خزرتها تدرين صاير لسانج طويل ومحتاجلو تقصير

ريتال...خرب يمكن جفصت هاااا لا ترى موقصدي بس اني اريد اروح ما اريد ابقة خوما كوة

اشو هذا اخذ ملابس وعافني وراح للحمام عبالك داحجي ويا نفسي

شميت ريحة كباب وتكة اويلي عصافير بطني كامت تصفر من الجوع بس ما اكدر اكل انوب اطير هيبة الزعلة مالتي

طلع فارس من الحمام اشو هذا هم رجع الغرفتي مراح يم صبا

كمت غسلت ورجعت لفراشي

فارس... تعالي تعشي

ريتال.  ما اريد

فارس... بكيفج اليأكل على ذرسو ينفع نفسو

ريتال... درت وجهي عنه هو كعد ياكل واني انسطرت من ريحة الاكل ومن الجوع

كمل وعاف الباقي على الميز راح غسل ورجع

ريتال... انت شعندك اليوم اهنا

فارس... اني مو كتلج ديربالج تكوليلي يم
منو اروح لو وين ابقة انتي عليش متسمعين الكلام

ريتال... ظليت ساكتة مجاوبته

اجة تمدد بس بعيد عني واني هم رحت الطارف السرير حتى الغطى عفته اله رحت جبت غيرة

اوووف كومة نمت شراح ينيمني اليوم جمالة ميتة جوع من الصبح لهسه على اللفة الأكلتها بالكلية

ظليت اتگلب بالفراش وهو هم حسيتة كاعد ميكدر ينام

فارس... بالكوة لازم نفسي عنها ما اتحمل هذا قربها مني

ريتال...نمت شوية وصار اذن الفجر فارس راح للجامع
كمت توضيت وصليت ورجعت نمت

من كعدت الصبح فارس مموجود

نزلت جوة ردت منهم موبايل محد قبل ينطيني

صبا مدلغمة و كاعدة وكل شويه تحجي

صبا... البارحة فارس صغرني جدام اهلي عافني اني وامي وخواتي بيت العروس متت من الفشلة انجبرنا نصعد بالسيارة الجبيرة ويا الجهال

ام فارس... فارس عقلو طاير وتصرفاتو صايرة مو طبيعية الله لاينطي الغيرو هيجي

صبا... عمة احجي ويا خلي يعتذر، من امي لان جثير زعلت منو

ريتال... ههههههههه راح اطكن من القهر

بس اكو شغلة محيرتني صبا وشيماء ميطيقن بعض  وكل شوية وحدة اذب حجي للثانية ولو ما يخافن من الشيخ يمكن يتكافشن

بالليل من خلصت غسل مواعين العشى
دخلت للربعة حتى اشيل استكاين الشاي داغسلهن

جانوا الكل كاعدين ماعدا الشيخ  نايم بغرفتة

ام فارس جانت تحجي بالتلفون وتبجي عرفتها دتحجي ويا حازم لان هي كلما تخابرة تنصبها مناحة

داشيل الاستكان من الكاع سمعت ام فارس حجت بفرح
ام فارس... صدك يمه مفكر ترجع عجل شمتاني تعال مو راح اموت من قهر فراكك

ريتال... من سمعت بي يمكن يرجع ايدي رجفت والاستكانين انضربن وحدة بالثانية

فارس رفع راسه وباوع عليه بشك

ام فارس اشتغلت الدعاء  الله لايوفق البعدك عني والله لاينطي الصحة والعافيه
والله يهجم بيتا

جنت متاكدة كل كلمة اني مقصودة بيها لان هاي مو اول مرة هيجي تدعي كدامي

شلت الصينية وطلعت بسرعة
بقة فكري مشغول اني شسوي اذا هذا صدوك رجع مجرد من ينذكر اسمة يجيبلي الرعب

فارس... ريتال صعدي فوك

ريتال...لحظة بس اكمل شغلي

فارس... سسسسمعتي شحجيت يلا جدامي

ريتال... غسلت ايدي بسرعة وصعدت واني كلبي يدك سريع عزا هذا شبي
دخلت للغرفة هو دخل وراية وسد الباب

فارس... كوليلي عليش من سمعتي اسمو رجفتي

ريتال... فتحت حلكي هو منو شتحجي انت

فارس... تقربت منها
اخر مرة اعيد كلامي شنو الجان بينج وبين حازم
عليش حازم جان هيجي مجلب بيج اذا مو انتي منطيتو عين

ريتال.. لا يربي لهنا وكافي تعبت من كثر الاتهامات
صرخت بوجع انت شتحجي ما اسمحلك تتهمني هيجي اتهام انت اكيد تخبلت

ريتال...وجان يجيني راشدي اذني صفرت من قوة الضربة كعدت بالكاع

بس من ضربني تهسترت بالزايد

الله يلعنك ويلعن اخوك كااااااافي حرام عليكم دمرتوني ودمرتوا حياتي

فارس... ما ادري شلون ضربتها ظليت واكف ادحج عليها شلون مفرفحة من البجي

ريتال... لك اخوك واحد ناقص وعار شلون تتوقع اني عندي شي ويا انيييي لو اريده جان وافقت عليه من اجه تقدملي

فارس... شنووو حازم شوكت اجه تقدملج

ريتال... تسوي نفسك متعرف ليش مو هو جاب ناس واجه طلبني من اهلي واني رفضتة

اني شلون اقبل بواحد صايع مثلة اخوك مبقة شي مسوى بيه

شوه سمعتي بمنطقتي ومدرستي وحتى كليتي

جنت احجي وابجي بقهر

فارس... احجيلي عدل وبدون بجي شسوى حازم بيج

ريتال... حجيت كل قهر كلبي من اول يوم شفتة الحد يوم الاجيت الاهله

بعد كل هذا وتكولي احبه
حتى من اجيت الابوك كالي مستعد يخلي حازم يرجع ويجي يخطبني تدري شنو جان جوابي
كتلة لو حازم يبقة اخر واحد بالدنيا ما اريده
وروح اسال الجانوا موجودين اذا اني داكذب

حتى انت مثلة انتو كلكم نفس الشي دمرتوني

كولي انت بشنو تفرق عن اخوك هذاك شوه سمعتي وضيع مستقبلي

وانت هم رجعت تهمتني وشكيت بشرفي
اول شي اتكولي انتي سقطتي الجنين
الهدرجة اني مجرمة بنظرك حتى منطيتني فرصة ادافع عن نفسي ولان ماعندي دليل يثبت كلامي تحملت اهانتك
اذا انت مقهور على الطفل اني انقهرت اكثر منك

كمت من مكاني اكو قرآن صغير على الميز شلتة وخليتة على كصتي وراسي

فارس... ابوية رجعي القرآن اني ما طلبت منج تحلفين

ريتال... اياك تقترب مني والله اسوي بروحي شي

هذا القرآن على صحتي وعافيتي ونظر عيني
اذا اني جنت عندي علاقة بحازم

وحق كل حرف بالقرآن وهذا يمين اتحاسب عليه اليوم الدين وان شاءالله تنعمي عيني اذا اني متقصدة اسقط الطفل

خليت القرآن بمكانة ورجعت كعدت بالكاع وانهاريت بالبجي

فارس... اسودت الدنيا بعيني اني شلون شكيت بيها
جنت اعرف حازم رايدها وكاتل روحو عليها ومسويلها مشاكل جثيرة بس مجنت اعرف التفاصيل
اخ لو هو جدامي يمكن ما ابقي عايش
والقهر الاكبر شلون جنت شاك بيها بخصوص الحمل اني الهدرجة الله جان عاميني

جيت تقريت منها اريد اكومها من الكاع

ريتال.. وووووووخر مو كتلك لاتقترب مني
من قهري كمت املخ بروحي  فارس لازم ايدي

فارس... اهدي بنيتي ريت ايدي مكصوصة قبل لا امدها عليج

ريتال... فارس طلكني ما اريدك بعد خليني اروح الاهلي اعتقني الخاطر الله واطلعوا من حياتي......

يتبع