رواية فارسي العاشق الفصل التاسع عشر 19 - بقلم بسمة البياتي

_  فارسي العاشق _
( بقلم بسمة البياتي)
_البارت العشرون _

شيماء وفارس جانوا يحبون بعض مدا اكدر، استوعب الكلام
طيب ليش كذب عليه ومحجالي على هذا الموضوع معقولة فارس بعده يحبها وموبعيد يكون مرتبط بيها

هي وامها شعدهم يجون من الصبح وميرحون غير لليل وهي شيماء ليش من اطلكت رافضة بعد تزوج
رغم هي حلوة ومناقصها شي

كل هاي الافكار اجت براسي واريد جواب الها

هند... ريتال شبيج كاعد تسمعيني لو لا

ريتال... هند فدوة فهميني كل القصة من البداية اريد اعرف كولشي

هند... يولي والله موضوع قديم ومايسوى تغثين نفسج بسببو هذا الكلام صار بايام مراهقتو حتى قبل لايزوج صبا

ريتال.. عادي لو حتى قديم احجيلي اريد اعرف

هند... من جان عمر فارس يمكن 18 سنة حب شيماء لان هي الله يسلمها من يوم يومها عينها عليه تلبس وتكشخ وتجي تتمايل جدامو
وما اعرف شلون صايرة بينهم قصة حب

بعدها بفترة الشيخ عرف بالموضوع وگلب الدنيا عليه وبحزتها حتى طاردو من البيت

ريتال... زين ليش فارس ما ازوجها هي اقارب ام فارس والشيخ اهم شي عنده اولادة ياخذون اقارب

هند... صح بس مثل متعرفين الشيخ وعقلو يطير من سالفة الحب وهاي الشغلات
يتخبل اذا واحد من ولدو يكولو احب فلانة واريد ازوجها

والأهم من هذا كولو صبا جانت محجوزة الفارس من هي زغيرة

ظل فارس زعلان  ابيت كرايبنا  بعدين ماتحمل رجع اعتذر من الشيخ

والشيخ كالو اذا تريد ارضى عنك اخطبلك صبا

فارس حاول جثير حتى يقنع الشيخ بس ماكو فايدة
اخير شي استسلم للآمر الواقع وقبل يزوج صبا

ومن ازوج حياتو جانت مستقرة وماعندو اي مشاكل

وشيماء بعدو بفترة هم تزوجت وصار عدها ولد
وكثرت مشاكلها ويا زلمتها وتطلكت

ريتال... هه ورجعت تحوم على فارس وموبعيد راجعة علاقتهم ابعض

هند... لا يولو لاتتهمين حظج وبختج فارس يخاف الله مايسويها

ريتال... لعد قبل مو سواها شنو مجان يخاف من الله

هند... بوكتها جان مراهق وطايش لاجيبين هذاك الوكت الهذا عمرو

ريتال... ماشي يصير خير

هند... مو مرتاحتلج يولي شراح تسوين

ريتال... لاتخافين حبيبتي اسمج مراح يجي بالموضوع بس سؤال انتي منين تعرفين هذا الموضوع

هند...من تزوجت وسام جنت اشوف صبا وشيماء مو طايقات بعض سالت وسام وحجالي

ريتال... رجعت الغرفتي واني ما اشوف  من الغضب لوبيدي اكسر شكو شي اشوفة كدامي

متحملت انتظر البعد صلاة العشاء الحد ميرجع فارس وهي هسه حتى صلاة المغرب بعدها مصايرة

اخذت الموبايل جانت ايدي ترجف من العصبيه والقهر اتصلت على فارس

فارس... هلا يابعد الروح

ريتال... انت وين

فارس... كاعد ويا ربعي شبي صوتج يولو

ريتال... تعال للبيت

فارس... ريتال احجي شبيج خوما صاير شي

ريتال... حجيت من بين اسناني فارس تعال للبيت
سديتة بوجهة

ربع ساعة وصار فارس كدامي

فارس... يولو شبيج حتى ما اعرف شلون ترخصت من الولد عبالي بيج شي

ريتال... انت واحد كذاب وغشاش وبعد ولا اصدك اي كلمة تكولها الي

فارس... ريييييتال لاتجازوين وتحجين كلام اكبر من لشتج لاتخليني اتصرف وياج غير تصرف احجي شبيج

ريتال... انهاريت بالبجي تخبلت

بلي انت واحد كذاب ليش البارحة من سالتك على شيماء مكتلي انت تحبها احجي شنو بينك وبينها

فارس... غمضت عيوني هساع هاي شراح يفهمها
بنيتي اهدي وبطلي بجي واني افهمج

ريتال... وخر من يمي ولا طخني يلا احجي شمنتظر انت مزوج شيماء موووو

فارس... شمزوج نعال شبيج تخبلتي يولو الموضوع قديم وهاي اعراض ناس مايجوز اكعد احجي بيها

ريتال... يا اعراض التحجي عنها وهي لهسه عينها منك ولوما انت منطيها مجال متباوع عليك بهاي الطريقة

فارس.... اجيت يمها اريد الزمها اهديها اشو هاي تخبلت

ريتال... صرت اضرب بي وادفعة من قهري زرعت اظافيري بركبتة ملختة

فارس... خرب غيرتج هاي شسويتي شنو مجلوبة
قيدتها بيدي اريدها تبطل خبال

ريتال... انت مزوجها مووووووو احجي الحقيقة

فارس... شششششمزوج كافي خبال تحملتج جثير

هي طول اليوم كبالج واني من اجي للبيت ابقة جدامج لو مزوجها عليش اضم عليج اخليها حالها من حالج وحال صبا اني مخايف من اكبر. واحد

ريتال... لعد ليش كذبتتتتتتتتت عليه ليش مكتلي جنت تحبها

فارس.... خرب عشيرتج انتي غبيه لو شنو اكولج موووووووضوع قديم عليش اذكرو

انتي منو حجالج الموضوع

ريتال... معليييييييك شي ميخصك

فارس... ههههههه كتلج ذوبي الثلج بس ماكتلج تخبلي

ريتال... رحت للفراش كرفصت وحضنت نفسي وظليت اشهك وابجي مجاي اكدر اقتنع بكلامة

فارس... جريتها الحضني وهي تدفعني وتبجي يولو والله ماكو شي بيني وبينها يروحولج فدوة شيماء وعشيرتها

ريتال... باوعت عليه واني بعدها الشهكة مجلبه بيه والدموع تنزل مثل المطر

لعد ليش هي متقبل تزوج وشعدها تجي يمكم

فارس... ماعدهم احد بس هي وامها والبيت جبير وخطارنا جثير يجون يساعدون بالشغل

ريتال...بشششنو يساعدون ماتكولي هنا ليش شيسوون وثاني شي ابوك مو يستحرم وهو عنده ولد شباب شلون يقبل وجودهن بالبيت

فارس...عجل خوما يطردهن ترى واكفة الشغلة وامي متعودة على ام شيماء ماتكدر تفاركها

ريتال... اكرهك درت راسي منه

فارس... ههههههههه اي واضح جثير تكرهيني وهذا خبالج ودموعج تشهد

ريتال... مجاوبتة ظليت ساكتة

فارس... يبعد الروح راح ياذن المغرب مو كادر اطلع وانتي زعلانة وتبجين صدي عليه
يولو العندو الگمر شيسوي بالنجوم وحق من رسم هالوجه الحلو شيماء صارت بحسبة اختي وماكو بينا شي

ريتال... جان يحجي وياي ويبوس بيه صدكتة بس بعدها نار الغيرة بگلبي

فارس... مظل وكت على الصلاة وكفت على المرآيا اعدل دشداشتي باوعت الركبتي لا يا الله هاي شمسوية

ريييييتال خرب غيرتج على هالدكة

ريتال... فزيت هذا شبي عاط بيه رفعت راسي باوعت عليه

فارس... يولو هاي شمسوية برگبتي هساع شلون اكدر انزل جدامهم هيجي

ريتال... باوعت الرگبتة خط طويل من بدايتها  للصدر هههههه احمر ومزلوغ

رجعت راسي على المخدة وبقيت ساكتة

فارس... يولو لادحجين هيجي كومي شوفيلي حل

ريتال... التزمت الصمت

فارس...انعل يومج مو كاعد احجي وياج حتى لو اسد الدكم هم يبين هساع شسوي اني

ريتال... لا جواب

فارس... خوش عجل ظلي ساكتة

ريتال... اشو رجع هذا يم المرآيا ما ادري على شنو يدور گلب المجرات بس صوت الطاق والطيق

باوعت طلع حافظة المقراضات والمقص اخذ مقص صغير واجة عليه

عرفت بشنو يفكر كعدت بسرعة وضميت ايدي وراية

فارس... ظلي ساكتة اني اعرف شنو دواج

ريتال... اجة يمي يريد يسحب ايدي
لا فارسسسسس كولشي ولا اظافيري وخرررر

فارس... هساع يلا طلع حسج يولو هاي اظافرج اليوم متبقة شوفي شسويتي بيه

ريتال... ظليت اترافس ويا اريدة يعوفني ماكو ربطني بيده من حلات روحي عضيتة

فارس... مو اكلج مجلوبة

ريتال...ماااا عووووفني من شافني ابجي عافني

فارس... يولو فهميني شسوي هساع والاثر من الطول للطول الاعمى يشوفو
حتى ماعندي جاهل واكول هو خمشني

ريتال... حل تستاهل لو حاجيلي الحقيقة مجان صار هيجي

فارس...صارت الصلاة صليت بالغرفة

ريتال... اباوع على فارس مفرفح كل شوية يروح يباوع على رگبته ههههه

فارس... يولو باجر شلون اروح للمعمل هذا الجرح منا الباجر يبين اكثر

ريتال... اوووي شجلبت ترى عادي جرح صغير

فارس... امشي جيبلي شي اكلو لو ناوية تعشيني نساتل

ريتال... كسر خاطري نزلت للمطبخ اصبلة عشى شفت شيماء شبت نار الغيرة بگلبي

وكفت اصب الأكل

نسرين...اشو منزلتو تعشيتو ويانة

ريتال... ما ادري منين اجتني هاي الجرائه
جاوبتها شسوي فارس ميقبل ينزل واني هم ميخليني انزل هسه بالكوة كدرت اسحب روحي منه ونزلت اصبلة عشى

شيماء مركزة ويا كلامي تريد تموت

نسرين... الله يحفظكم البعض ويبعد عنكم شر العين

ريتال... امين يارب
صدوك خالة خلي شيومة تغسل المواعين مراح اكدر انزل فارس ميقبل

شيماء فتحت عينها مصدومة هههههههه

عفتها وصعدت والله مد اعرف نفسي اني شلون كدرت هيجي احجي

فارس... نزلتي مبوزة رجعتي وجهج يضحك شنو السالفة

ريتال... يعني شلون تريد ارجع اگلب وجهي

فارس... مو مرتاحلج يولو

ريتال... لا اطمئن ماكو شي

تعرف استاذ فارس اذا اشوفك تحجي وياشيماء  شراح اسوي

فارس... اي اطربيني شراح تسوين

ريتال... لاتخاف ما اتعارك ولا اسوي مشاكل
بس راح اخيرك لو اني لو هي بهذا البيت

فارس... قابل هو بيتي وتخيريني هذا بيت ابوية ومحد الو كلمة بي غيرو

ريتال... والله معليه اني بيتك بيت ابوك العندي حجيتة ولا عبالك راح تكدر تحبسني لو تاخذ مني الموبايل وتهددني لو اعرف انهزم من الشباك

فارس فاتح عينة وخازرني

فارس... تدرين بنفسج صايرة وكحة

ريتال..انتوا الفقيرة متعيش وياكم

فارس...ههههههههه هو اني الجبتها النفسي جنت اريدج تغارين مجنت ادري  راح تتخبلين

ثاني يوم الصبح قبل لايروح فارس للمعمل
واكف اكبال المرآيا متعصب يسب ويغلط

فارس... كومي شوفيلي حل لا ابتلي بيج والله

ريتال... ههههههه كمت من فراشي

كعدتة على الطابورية
مبقبت شي مخليتة الركبتة اساس خافي عيوب بودرة

ههههههههه وهذا شايط من الغضب

فارس... اني تالي عمري اخلي مكياج مثل النسوان

ريتال... ههههههههه شوف راح مبقة اثر وحتى ممبين انت مخلي شي

فارس... متعصب منها مجاوبتها

ريتال.. اوكف لاتنزل حتى ننزل سوى

نزلت ويا صبحنا عليهم وكعد فارس حتى يتريك

اني عيوني تتنقل بينا وبين شيماء امداية معقولة قبل جنت عمية ولا اشوف هاي نظراتها اله

شيماء كامت دتحظر الفارس الريوك
طلعت هي كل يوم تسويلة ريوكة واني مثل الغبيه كولشي ما ادري

ريتال... عوفي من ايدج حبيبتي اني بعد اسويلة ريوكة

شيماء... ماكو فرق هو متعود ياكل البيض والبسطرمة من ايدي

ريتال... يمااااا لو بيدي املخها وامخلة
جاوبتها وشبيها ايدي اني زوجتة واني مسؤولة عن كولشي يخصة

ام شيماء... شبيج حبيبة ترى شيماء مكالت شي انتي دوام وهي متعودة تحظر ريوكو

فارس... فضوني عاد مو تاخرت خيتي تركي من ايدج
حرمتي هي خلي تسوي

ام شيماء عافتنا وراحت يم ام فارس
وشيماء وجها يطلع منه شرار

اكثر وحدة جانت متونسة بهاي الحفلة هي صبا
يمكن جانت مكيفة لان شيماء تفشلت

سويتة وقدمتة اله

فارس... همست باذنها يبعد الروح عيب السويتي هي اكبر منج فشلتيها

ريتال...وانت شكو هيج خايف على مشاعرها

فارس...هههههههههه استغفر الله اتريكي بنيتي مبين راح تشوفيني النجوم بعز الظهر

راح فارس وجان تجيني امنا الغولة

ام فارس... انتي صدك صايرة وحدة بدون مستحى البارحة عايفة شغلج على شيماء

وهسه كاعدة تجاوزين عليها بالحجي شوفي اليجيب طاري شيماء وامها اهججو من البيت بالليلة ظلمة

ريتال... ومنو مجاوز زوجي واني اخدمة الموضوع عادي وميزعل

ام فارس... اهاا ومن تعوفينو وتروحين للدوام عليش مجنتي تفكرين بي هسه صار عزيز

ريتال.... انتي كلتيها جنت دوام يعني موضوع خارج عن ارادتي
ولاتهتمين خالة حتى بعد من يجي الدوام فارس اتكون خدمتة من واجبي واني الكي حل

ام فارس... طالعلج لسان يولو بس مو عليه اكصو  الج واذبو للجلاب
البيت بيتي واليجاوز على اي شخص عايد الي يعني اجاوز عليه وبهذيج الحزة اجي انتف شعرج وارجعج منين ماجيتي

نسرين.. ييييييمه شبيج البنية ماسوت شي شكو اندريتو عليها زلمتها ومن حقها تكون مسؤولة عنو ما اعتقد هذا شي يزعل شيماء

ريتال... متت قهر من كلامها بالكوة حبست دموعي حاولت اخلص شغلي بسرعة حتى اصعد

فارس... جان عدنا شغل جثير بالمعمل وشغلي كولو برة والجو حار كل شوية امسح العرك

تعبت دخلت للمكتب ارتاح اجوي وسام وجمال وقيس ابن عادل كعدو يمي

وسام... الظاهر فارس البارحة داخل حروب طاحنة ومعارك ههههههه

جمال... هههههههه اي ومبين عندو جثير اصابات وخساير

قيس... الحمدلله على سلامتك خالي ههههههه

فارس... يولو شكو شبيكم ستلمتوني
ياخساير ياحروب شكاعد تحجون

وسام... شوفوا اشكد فقير مايعرف شنحجي

فارس... وأخيراً طخت خرب غيرتج ريتال شلون فشلة
ابتسمت وعدلت ياخة قميصي
جنت احدد لحيتي وانجرحت بالموس

جمال... هذا خوش موس مبين حاد ههههههههه

فارس... ليش متنجبون ماصدكتو لكيتولكم سالفة

قيس... ههههههه والله يا ابو الفوارس مصيبتك جبيرة هساع لو شوية الموس نازل ليجوة مو جارة من بداية الرگبة

فارس... شنو اني لاعب دعابل وياك بالشارع يول اني خالك احترم

قيس... خالي تذكر ابداية زواجي شجنت تسوي بيه هساع اجة دوري

فارس... عايفلكم المكتب كولو وطالع

ريتال... خلصت شغلي وصعدت الغرفتي مطايقة اشوف ام فارس وشيماء
حتى على الغدا منزلت تغديت وياهم

من نزلت اغسل مواعين الغدا صبيت اكلت

هند... عليش مانزلتي تتغدين ويانة عمي سال عليج

ريتال... مجنت جوعانة

هند... ادري بيج ضايجة من كلام عمتي يولي طنشي سمعي من هين وطلعي من هين
مرة جبيرة اتحمليها

ريتال... هفففف مجبورة اتحمل معندي غير حل

مؤمن... ست الحسن هاي وينج كاعد ادورلج

ريتال... لابسة طاقية الاخفى ومتبخرة حقك متشوفني

مؤمن... شعتبر هذا استهزاء لو خفة دم

ريتال... اعتبرة ثول منك يعني مو كدامك بالبيت قابل وين اولي

مؤمن... تبقين بومة متصيرلج جارة
باجر النتائج تجين وياي لو لا

ريتال.. من كال نتائج بطني مغصتني
شلون خبر مثل وجهك

مؤمن...شبي وجهي يولو اخبل بس كولي انتي مصخمتها

ريتال... والله خايفة الله يستر

رجع فارس وهم رجع استلمني دك رزايل بسبب الخمش مبين متفشل ههههههههه

العصر اجوي بيت عادل كلهم
ولدهم وبناتهم والبيت صار هوسة

دالاحظ شغلة غريبة شهد من تجي نسرين اطير بيها من الفرح وكل شوية تجي تبوسها
شهودة بعمر رؤى اختي

التهينة بتحظير العشى بس هالمرة خطية زوجات اولاد  عادل وبناتهم وياي ساعدوني بشغلي

امنا الغولة هم زين التهت عني

بعد العشى يتعللون بيت عادل وراحوا

جان اكو كم ماعون على السنك وكفت اغسلهم

باوعت من الشباك مؤمن كاعد بالحديقة على المرجوحة وضاربها صفنة كملت شغلي وطلعت يمه

كعدت بالطرف الثاني من المرجوحة

وين صافن اليشوفك يكول عاشق

مؤمن... تحسرت ومنو يكول اني مو عاشك

ريتال... لعد ليش كاتم بگلبك ومتعترف بحبك

مؤمن... المنو اعترف

ريتال... للبالي وبالك

مؤمن... ههههههه الهدرجة اني مفضوح لو انتي صايرة ذكية يولو

ريتال... لا عيني اني طول عمري ذكية
هسه جاوبني ليش متعترفلها

مؤمن... ما اكدر تعرفين ابوية الشيخ عقلو يطير من هالسالفة وثاني شي اكو موضوع اذا ما احلو ما اكدر اخطي اي خطوة

ريتال... الموضوع يخص شهد مو

مؤمن... عقدت حواجبي يعني هم رجعوا فتحو الموضوع

ريتال.  لا والله محد حاجي ولا اعرف بالموضوع مجرد تخمين

مؤمن... وشنو الخلاج هيجي تخمنين

ريتال... اهتمام امك الزايد بشهد

مؤمن...اوف من امي ولا تبطل هالسالفة

ريتال...انت اذا متريدها ليش متكوللهم ما اريد وينتهي الموضوع

مؤمن... السالفة مو سهلة مثل ممتصورة شهد من يوم الصارت كالو هاي المؤمن

ريتال... شوكت يبطلون هاي الشغلة ترى هذا زواج مو لعب ليش يدمرون حياتكم بهاي العادات المتخلفة
وابسط مثل هالة زوجة حازم خطية دمرو مستقبلها

مؤمن... جدي كلشي بي حلو ماعدا هاي السالفة مو راضي يغيرها ابد

ريتال... وانت شراح تسوي راح توافق وتتنازل عن حبك وترضى بشهد

مؤمن... اكيد لا بس انتظر اتخرج واخليهم امام الامر الواقع لو رهف لو ما اريد

ريتال... زين مفكرت ممكن بهاي الفترة يتقدم احد الرهف واهلها يوافقون

مؤمن... شششششنو انتي شكاعد تحجين غير اگلب الدنيا

ريتال... على شنو تگلبها بصفتك شنو وهي شمعرفها انت تحبها
على الاقل صارحها وحجيلها ضروفك وشوفها راح تكدر توكف وياك وتنتظرك
اني ما اكولك سوي علاقة وحب وغراميات بس على الاقل خلي يكون عدها علم بالموضوع بان انت رايدها

مؤمن... ما ادري منين طلعتيلي بهالسالفة انعل يومج وترتيني

ريتال... ههههههه راح اسمعك صوت الحب واخلي مزاجك يرجع عال العال

طلعت موبايلي اتصلت على رهف

رهف... هلا بالبذاته الخاينة

ريتال... ياااا هاي عليه

رهف... اي نعم عليج كل مرة اني اتصل واسال عليج

ريتال.. لعد هسه منو متصل ابوج مثلاً
والله مشتاقتلج

رهف... اووووووف موبكدي والله

ريتال... احم مؤمن يمي راح افتح مايك يريد يسلم عليج

رهف... هااا ششنو مؤمن

ريتال...ابتسمت المؤمن بمكر  هههههه اي مؤمن شبيج فزيتي

فتحت مايك
مؤمن... شلونج رهف

رهف... هلو مؤمن الحمدلله زينة انت شلونك

مؤمن... هساع صرت زين

ريتال.. خرب ببليسك مؤمن هههههه البنية ظلت تمتمت بس فدوة شلون تلمع عيونة من يحجي وياها

مؤمن... شلونها كركوك

رهف.. حلوة بس تكريت عندي احلى

مؤمن... تكريت من تنوريها تصير حلوة

ريتال.. يااا عزاااا خجلها

دنحجي وياها واجانة فارس

فارس... يولو هاي وينج صارلي ساعة ادور عليج

ريتال.... داحجي ويا صديقتي رهف

اجة فارس كعد بنصنا

رهف... اخذي راحتج حبيبتي بعدين نتخابر

ريتال.. ماشي عمري باي

فارس... اشو فاتحة المايك وهذا الثور كاعد

ريتال... هههههههه عادي هاي صديقتنا اني وياا

مؤمن... رحمه الله والديك خالو سويتني ثور

فارس... طلعت مو هين يول مصادق بنات والله لو ابوية يدري يعلكك من رجلك بالبنكة

ريتال...شنو هذا الكلام ترى والله ازعل رهف انسانة محترمة
وثاني شي واذا حجت ويا مؤمن ترى مبينهم شي غير السلام وكلام عادي

مؤمن... عاشت مرة خالي الله عليج كثري من الزعل

ريتال... لا والله من صدوك ضجت

فارس... هساع اني شحجيت وبوزتي
ونعم منج ومن صديقتج اني لو ما اعرفها خوش بنية ما اخليج تمشين وياها

ريتال... رفعت تك حاجب وباوعت عليه اي وانت منين تعرفها

مؤمن... هههههههه علكت والله خلي اكوم احسن تصبحون على خير

فارس.... يولو شبيج غير اني سال مؤمن عن صديقاتج

ريتال... مممممم ماشي

فارس... وضع مؤمن مو عاجبني احسو عينو من صديقتج

ريتال...  خليت راسي على كتف فارس وشبكت ايدي بايدة  وباوعت على السماء

اكولك فارس شنو اعراض الحب

فارس...زين هذا سؤالج يخص منو وضع مؤمن لو وضعج

ريتال... بصورة عامة مقصدت احد معين

فارس... زين انتي شتحسين اتجاهي

ريتال... باوعت بعينه وظليت مركزة

مممم صايرة اشتاقلك من تطلع ومن ترجع اتظل عيني تراقبك
ومن اشوفك تحجي ويا اي وحدة بالبيت او تشاقة وياها اضوج حتى لو جانت امك اريدك بس الي وحدي

فارس... يا ابوية كل هذا صاير بيج واني ما ادري
شوفي بنتي هو هذا الحب

ريتال...ابتسمت معناها اني واكعة بحبك

فارس... وانتي مالكيتي مكان حتى اتكوليلي احبك غير بالحديقة هساع اني شسوي  ول ياب اريد ابوس هالشفايف النطقت هالكلمة

ريتال... هههههه اي حتى يجينا الشيخ

فارس... هههههههه عجل كومي خلي نصعد

ريتال بهذا اليوم انكسرت كل القيود والحواجز الجانت بيني وبين فارس روحي ارتبطت بروحة......

يتبع