رواية فارسي العاشق الفصل الثامن وثلاثون 38 - بقلم بسمة البياتي

_  فارسي العاشق _
( بقلم بسمة البياتي)
_البارت التاسع و الثلاثون _

مسحت دموعي باوعت على ماما
بابا شعندة يم الشيخ وفارس ليش وياهم؟

ماما.. ابوج اليوم الصبح خابر على الشيخ وطلب منه يروح ويا الشيخ عشيرة فارس

ورافد رجع اتصل على عادل بلغة يجيب فارس ويجي المضيف شيخ عشيرتهم

العصر جدج وابوج وزوج سوسن اخذوا الشيخ وراحوا

ريتال.. بابا عرف فارس هددني لهذا السبب سوى هاي الكعدة مو؟

ماما.. اي اني حجيتلة حتى يخلي فارس عد حده
هذا تهديد بالقتل مو شي سهل

ريتال... وهسه شراح يصير اني خايفة على بابا

ماما... لاتخافين يجي رافد ونفهم منه شسوى

دخل بابا الغرفتي وهو مبتسم بفرح

اجة اخذني الحضنة وباسني من راسي

بابا... انتي اليوم بيضتي وجهي كدام الشيوخ والزلم ومصغرتيني

ريتال...معاش اليصغرك حبيبي اني روحي تفداك

بابا.. اسم الله عليج باباتي
اليوم بالكعدة فارس كل شوية وكال اني اريدها وهي تريدني وابوها واكف بينا وما يقبل يرجعها

خلى الشيوخ والزلم ينظرولي على انو اني  الواكف بطريق سعادتج وظالمج

حجة وياي شيخنا واضطريت اوافق ارجعج اله اذا انتي رايده ترجعيلة

من اتصلت والشيخ حجة وياج وسمعت جوابج ماي بارد نزل على گلبي

ريتال... بابا انت شلون تتوقع اني ارجعلة وهو هددني بيك انت وماما ماكو بشر اغلى منكم عندي بهاي الدنيا

بابا.. ريتال ثقي بالله اني ماظلمتج فارس مايستاهلج

اااخ لو اعرف اني شلون انطيتج اله غلطت عمري هاي

ريتال... لا تلوم نفسك زواجي من فارس الله كاتبة الي ولا اعتراض على مشيئتة

بابا.. ونعم بالله الحمدلله على كل حال
بعد ما اريدج تبقين حابسة نفسج بغرفتج اطلعي يمنا اريد اشبع منج قبل لا تزوجين

ريتال.. دنكت راسي بابا اني خايفة من فارس

بابا... مادام خشمي يشم الهوا ما اريدج تخافين
فارس كان كابوس ونزاح

ريتال.. والله اخاف ينفذ تهديده

بابا... لعد اني ليش سويت هاي الكعدة حتى اوكفة عد حدة
شيخهم واخو من سمعوا بسوايتة لو تشوفين شلون رزلوا

وهو يكوللهم اني ردت اخوفها

اني كتلة احنا العراقيين من نطلع خارج بيوتنا ونروح على  وظائفنا واعمالنا شايلين كفنا بيدنا مانعرف على اي ساعة تجينا طلقة تايهة لو تنفجر علينا مفخخة او ننخطف ونتسلب
انت من هددت متخاف اذا صار عليه او على اهل بيتي شي راح يتهموك بقتلنا

واني هسه كدام الكل اكول اي شي يصير علينا فارس هو المسؤول

عادل وابن عمة ظلوا يتوسلون بيه ويعتذرون مني
وخلوا فارس كدام الكل يتعهد بعد ميقترب منج ومنا

اليوم حفلة الخطوبة
وكالعادة البنات من صباحيات الله هجمن عليه كعدني

كمت وياهن صبحت على ماما وعماتي
شفت الفرحة بوجه الكل عكس يوم خطوبتي وعرسي من فارس جان الحزن والقهر مخيم على وجوهن

زين شبيه لعد بس اني مفرحانة اي والله مفرحانة وهذا الأحساس موبيدي مجرد فكرة الارتباط تخوفني مجرد فكرة اكون حلال شخص ثاني وانكشف عليه دترعبني اوووف هاي خطوبة وهلكد مختنكة بيوم العرس شراح اسوي

سبحت وتربكت اخذوني البنات للصالون اجوي وياي رؤى ونغم وخوات هشام

جنت اقشمر دموعي حتى لاتنزل  واكول هاي خطوبة مو عرس اني بعدني يم اهلي ما رايحة البيتة

لبست بدلة وردية
ويا مكياج وردي
وشعري كان شوية طولان واصل النص ظهري وخلتي ويا اكستشن طولتة الي وبرمت اطرافة
وخليت بي تاج ناعم

كان كولشي بسيط ونازك محبيت الهوسة

خلصنا ورجعنا للبيت

ميادة.. هسه بابا والولد يجون يجيبون الشيخ  يعقدلكم حتى بعدها تروحون تاخذون صور ومناك نروح للقاعة

ريتال...جانوا شيكولولي بس اهز راسي

ماما... حبيبتي تعالي حتى الشيخ يعقدلكم

ريتال... كمت ويا ماما اوووف هم رجعتلي الخنكة ياربي دخيلك عديها على خير اخاف هم اختنك مثل هذاك اليوم

دخلوني للأستقبال لان جان ماكو احد غريب بس هشام واخو حسام وابوهم
بابا وجدي وعمو مصطفى هم كاعدين

جانوا لافيني بالكاب كولشي ممبين مني
و بالكوة اشوف طريقي

كعدت يم بابا وبده الشيخ يعقدلنة
من وصل الموافقتي اخرسيت ما اعرف شلون طلعت مني وكلت نعم

سمعت صوت الهلاهل تعلن اتمام العقد ومن هاي اللحظة صرت على ذمة هشام

مدنكة راسي والعبرة خانكتني بالكوة حابسة دموعي
اجة هشام على بابا وجدي اخذهم  بالاحضان وهما باركولة
شفت رجلين وكفت كدامي

ميادة.. يلا هشام كوم خطيبتك حتى نروح لان مظل وقت

ريتال... هشام انطاني ايده حتى اكوم اريد امدلة ايدي ما اكدر

ميادة.. يلا حبيبتي كومي تاخرنا

ريتال... خليت ايدي بايدة غمضت عيني من القهر
كمت وكفت هشام رفع الكب من وجهي اجت عيني بعينه وهاي اول مرة اشوفة لان هذيج الجية ولا باوعت عليه
نزلت عيني منه اقترب مني وباسني من كصتي

حبست انفاسي
الحفلة مبادية وأريدها تنتهي

اخذني من ايدي وطلعنا وصلنا للسيارة فتحلي الباب صعدني ليكدام الظاهر هاي سيارتة

ارتبكت قبل لا اسد الباب اشرت الرؤى تجي

همستلها تعالي صعدي ويانة
اشو هاي العوبة حجت بصوت عالي

رؤى... ياااا وشعندي اصعد وياكم اني اروح ويا ماما وعماتي

هشام... عادي تعالي صعدي

رؤى... لا مااكدر انتوا اخذوا راحتكم

ريتال.. الحقيرة عافتني وفلتت
سديت الباب هشام شغل السيارة وطلعنا جنت افرك ايد بأيد من التوتر

هشام.. ليش ردتي اختج تصعد ويانة شنو خايفة مني لا اخطفج ههههههههه بس والله حلوة الفكرة شنو رايج هسه ادور السيارة واطلع بيج للبيت وهما خليهم يروحون يحتفلون وحدهم

ريتال... انصدمت من جرائتة رفعت الكاب وباوعت عليه بخوف لزمت يدة الباب
كتلة رجعني البيت اهلي

هشام... هههههههههه يمعودة اشاقة شفتج خايفة حبيت الطف الجو

ريتال... حجبت بگلبي يااااا هذا مخبل اكو واحد يشوف شخص خايف يشاقة ويا بهيجي طريقة

سكتت مجاوبتة وهو بعده يضحك مبين عليه فرحان

وصلنا للأستوديو اجت مصورة تأخذلنة صور

تبارك اخت هشام تريد تنزعني الكاب جلبت بيدها لاعفيه ما اريد

تبارك... ولج مصورة تاخذلكم عادي لاتخجلين وهي بدلتج مو هوايه مكشوفة من شنو مستحيه
نزعتني الكاب البدله ردانها تور شفافة وشوية بيها دلعة من الصدر وهاي اختيار عمة داليا اوووف منها

هشام يريد ياكلني بعيونة كل شوية يهمس باذني ويتغزل

الحد ما خلصنا الصور روحي طلعت

رحنا للقاعة وبدت مراسيم الحفلة

الحفلة مختلطة ظليت لابسة الكب وهذا جان احسن شي بالنسبة الي

لبستي الذهب وقطعنة الكيك ولازم نركص سلو
حاولت اتهرب وتحججت بالكعب كتلهم ماذي رجلي بس ماكو فائدة خواتة بالكوة خلوني ارقص وياا

هشام... بهمس ليش دترجفين شنو بردانة

ريتال.. هاا لا مابيه شي بس شوية خجلانة الناس كلها دتتفرج علينا

هشام... امشي نكعد

ريتال... اوووف ارتاحيت

وأخيراً خلصت الحفلة رجعنا للبيت هشام قبل لايروح راد رقمي

كتلة موبايلي ما اعرف وينه ومحافظة الرقم

رؤى.. الرقم مخزون بفوني سجلة عندك

ريتال... غمضت عيني لو بيدي اكطع رؤى بسناني

راح هشام
دخلت الغرفتي اجتي رؤى عطت بيها

انتي شكووووو تنطي رقميييي قابل هو طلبة منج

رؤى... ياااا هاي شبيج غير زوجج ويريد يحجي وياج

ريتال... واني ما اريد احجي ويا مناقصة دوخت راس

رؤى... اصحييييي وكافي تفكرين بالماضييي هشام صار زوجج لازم تتعودين عليه اذا هسه اتصال متريدين تحجين ويا لعد من تنجمعون ابيت واحد شسوين
كافي ريتال ترى مصختيها وياريت الكاتلة روحج عليه يستاهل
تريدين تعرفين حبيب گلبج شسوى
لعد اسمعي
فارسسسس ازوج

ريتال... هههههه شنو هالكذبة هو اول بارحة كان يريد يرجعني

رؤى... اي بنفس يوم الكعدة ويا الشيوخ من رفضتي اعتبرها اهانة اله
رجع للبيت بنفس اليوم عقد على شيماء

ريتال.. كعدت على السرير مد اصدك كلامها
منو كالج هذا الكلام

رؤى... رهف من يوم الاخذتج تشوفين فارس وهي تخابرني وتتوسل بيه حتى اصالحكم لان فارس جان جابرها تخابرج واطلعح وياها

اني انقهرت عليها وظليت احجي وياها وهي اليوم من جنتي بالصالون طلبت مني ادزلها صورتج

وظلينا نحجي  وسولفتلي على زواج فارس وشيماء

ريتال... همست بصوت مخنوك الله يسعدهم مثل ما اني ازوجت هو هم من حقة يزوج

كتلها طلعيلي ملابس اريد ابدل وتعالي ساعديني انزع البدلة

رؤى.. فتحت الكنتور طلعتها دشداشة جنت اباوع على ريتال بقلق هدوئها خوفني

ريتال... نزعت البدلة ومسحت مكياجي

رؤى.. مراح تسبحين علمود توخرين السبري من شعرج

ريتال... لا مابيه حيل تعبانة ونعسانة من تطلعين طفي الضوا بطريقج
تمددت بفراشي

طلعت رؤى
دقيقة واجتني ماما

ماما.. هاي شنو راح تنامبن كومي تعشي وبعدين نامي انتي حتى غدى هم ممتغدية

ريتال.. انتي مو تعرفين بيه من اتعب ما اشتهي اكل عود اني من اجوع اكوم  هسه اربد انام

ماما ظلت تقنع بيه من شافت ماكو فائدة عافتني وطلعت

غطيت راسي بالبطانية ودفت وجهي بالمخدة واطلقت سراح دموعي بجيت الحد ما تعبت

سمعت صوت فوني يدك طلعت راسي من جوة البطانية
اخذت الفون شفت رقم غريب عرفتة هذا هشام
سويتة صامت وخليتة على الكومدي
وصل مسج مهتميت ولا فتحتة

خلصت الليل كله واني ابجي

ثاني يوم كعدت متاخر
بقيت بفراشي متكسرة مابيه حيل اكوم
سحبت الفون من الكومدي لكيت كومة اتصالات ورسائل من هشام

اخير رسالة دازها ساعة ثمانية الصبح
مصبح عليه

جاوبتة صباح النور
واسفة لان مجاوبتك البارحة تعبانة نمت من وقت

بعدني هستوني رسلتها اتصل عليه

الوووو

هشام... صباح العسل ياعسل

ريتال.. صباح النور

هشام...  مبينة بعدج نعسانة

ريتال... لا منعسانة بس بعدني ممصحصحة

هشام.. ريتال اريد نزوج بسرعة ترى معندي صبر

ريتال.. يااااا شنو بسرعة هو عقد محكمة بعدنا معاقدين

هشام.. عادي خلال هاي اليومين نعقد وبعدها نزوج احسبي حسابج اقل من اسبوعين انتي يمي

ريتال... انت اشدتحجي لا ما اكدر  لاتنسى بدت امتحانات الطلاب رؤى مموجودو

ويزن لازم يركز على دراستة مو مال هوست العرس

هشام.. ماشي من يخلصون امتحان واول يوم بالعطلة نزوج وما اريد اعتراض

ريتال...عود الله كريم هسه يلا اكوم اتريك باي

خرب بالكوة سدبت الخط لو بيده ميسده

صفنت هشام مبين خوش ولد لازم اعود نفسي عليه
فارس ماضي وانتهى  هشام  حاظري وهو الراح اكمل حياتي ويا

صراع بين عقلي وقلبي
عقلي يكول شي وگلبي يكول شي ثاني تعبتتت

كمت اخذت ملابس رحت سبحت وتريكت

العصر تفاجأت بجيت رهف وبيبيتها وجدها

اهلي استقبلوهم
جد رهف اعتذر من اهلي على تصرف رهف

رهف طول الكعدة مبطلت بجي گلبي انكسر عليها
رحت كعدت بصفها وحضنتها
اشو هاي كامت تشهك بصوت قوي

اخذتها ودخلت الغرفتي عفت اهلي كاعدين ويا جدها وبيبيتها

رهف... الله عليج بعدج زعلانة مني

ريتال...لا عمري اني ما اكدر ازعل منج اعرف فارس اشكد متسلط واذا راد شي محد يكدر يكولة لا

رهف... ولج جنت ميتة من القهر والله حتى مؤمن ما احجي ويا لان هو كال الفارس ريتال راح تنخطب

ريتال... انسي الموضوع البارحة تمنيتج لو جنتي وياي بخطوبتي

رهف... اوووف والنبي روحي جانت تلوب عليج
يلا شوفيني صور خطيبج

ريتال... ماكو بفوني ولا صورة خلي اشوفلج بموبايل ماما

رحت جبتة واجيت بي صور من الحفلة شوفتهن الها

رهف... ولج والله حلو ولايكلج حتى احلى من فارس

ريتال... مجاوبتها حجيت بداخلي
شسوي الگلبي اذا يشوف فارس احلى الدنيا كلها

نفضت راسي، من هاي الافكار حتى حرام عليه احجي هيج اني هسه على ذمة غيرة

راحت رهف جنت كاعدة وفون ماما بعدة يمي

باوعت على الصور ركزت على ملامح هشام

فعلاً حلو بشرتة حنطاوية مائلة للبياض
ملامحة حلوة ومرتبة عيونة سود

لحيتة وشواربة خفيفات ومحددات بشكل مرتب
شعره سرح ومصصفة بطريقة حلوة
من جان واكف وياي طوله حلو ولاسمين ولا ضعيف

فارس اطول واضخم منه وملامحة حادة ورجوليه اكثر

خرب شبيه كل شوية اقارن بينا وبين فارس
ضربت راسي بيدي
اطللللللع من راسسسسي الخاطر الله

اني وهشام عقدنا محكمة بيومها من كملنا العقد اهلة عزمونة بيتهم
رحنا اني واهلي تعرفت عليهم ا ناس طيبين ومثقفين جداً
لكن امه بعدها الهاي اللحظة محابتني

هشام يومية يتصل ويحجي وياي تقريباً تعودت على الكلام ويا جنت بالبداية انزعج من يتصل بس هسه لاعادي

اكثر من مرة طلعت ويا حتى نختار الغرفة وبعض الاثاث للشقة

وبدت العطلة

واجة يوم العرس......

يتبع

مسائوو حبايبي

اسفة على التاخير خطار عدنا بالكوة كدرت اكتب

حبايبي ممكن متابعة للأخ المبدع الكاتب علي الفتلاوي

هذا الكاتب مبدع ومتالق وقصصة تجنن اليحبني يكول تم

تابعوا قصة ظلم الزمان اني جديد بديت اقرها بس القصة رووعة
ThVhh1