_ فارسي العاشق _
( بقلم بسمة البياتي)
_البارت الثلاثون _
فارس يريد ينزل على امه جلبت بي
لافدوة فارس الخاطر ربك كافي فضايح
فارس... هي امي فاضحتنا بسيطة يروحون الخطار ويصير خير
ريتال... العصر اجوي اهلي وياهم جدي وعماتي وازواجهن
التهيت بيهم للمغرب يلا راحوا
قبل العشى جنت متمددة بغرفتي سمعت صوت صياح بالهول كمت من فراشي لبست حجابي وطلعت
لكيت امه وصبا ونسرين وفارس
ام فارس من شافتني تريد تهد عليه
ام فارس... يالمسسسمومه يالحية تريدين توكعين بيني وبين ابني الله بلانة بيج بلوة
الله ياخذج
فارس... ييييييييمه فوك سوايتج انتي وجنتج جاييييييييي تهديييين عليها جدامي
ام فارس... الله اليعلم شوصلتلك حجي وزيدت من عدها خلتك تشيش علينا
فارس... لاتكفرينيييييي ريتال ماحجت شي سيرتي صارت حتى بالسسسسسان الجهال وهما حجولي
شكلتي النفسسسسسج من كعدتي تحجين بهيجي موضوع جدام النسسسسسسوان
هاي مرتييييييي مو صاحبتي ششششششدخلكم بامورنا الخاصة
وانتي اليوم انعل اهلج صرتي تنقلين السوالف التصير هييين الأمي
صبا.. بخوووف ودموع والله مو اني حجيت هاي اختي
فارس... انعل ابوج لابو اختج اني مو كايلج ماتصعدين احد هين من اني مووووووجود
شششوفي ولج اذا بعد شفت وحدة من خواتج معتبة باب المشتمل اطررررررردج وياهم افتهمتييييييي
ام فارس... يول اخجل على روحك تطرد مرتك وبنات عمك علمود هاي الماتستحي
ياحيف ربايتي بيك صاير محبس بيد هالزعطوطة
ريتال... فارس مفرفح خفت عليه لايتخربط
اني واكفة ساكتة محجيت ولا كلمة نسرين بالكوة جرت امها ونزلتها جوة
فارس نام بدون عشى حتى علاج مقبل ياخذ
فارس... ثاني كعدت ويا ابوية وحجيت ويا
يابة رحمه الأهلك خليني اخذ نسواني واطلع كفيلك الله تعبت من المشاكل امي مجاي تفك ياخة مني ومن ريتال
الشيخ... هم ردينا على نفس السيرة
امك اذا مسوية شي كلي اني اتصرف وياها
بس شيل موضوع الطلعة من راسك
فارس.. يابة سوالف امي ماتنحجي وماكو حل يخلصني من هالمشاكل غير ترك البيت
واني ماروح بعيد اخذ بيت قريب منكم
الشيخ.. بقلة حيلة هذا هو التشوفو مناسب سوي
ريتال... فارس من كالي راح يدور بيت حتى نطلع منا يبووووو طرت من الفرح وأخيراً راح يجي الفرج واخلص من امنا الغولة وعصابتها
المغرب واكفين بالمطبخ فاتت هند من يمنا والعيون مورمة وبيدها جنط ملابس
نسرين.. ها يولو هاي شبيج وين رايحه
هند... بعد ما ابقى هين ولا ثانية اخوية بالباب راح ياخذني البيت اهلي
نسرين.. يولي بطلي بجي وفهميني شنو صاير
وسام يدري بيج راح تروحين
هند.. عسى لا درى شسويلة اخوج بعد ميهمني
ريتال... هند اخذت اطفالها وطلعت بقينا وحدة تباوع بوجه الثانية ما نعرف شبيها
من رجعوا من الجامع وسام ضايج بدون ميتعشى صعد فوك
الشيخ متعصب بالكوة قبل ياكل شوية
من صعدنا فوك سالت فارس لأن هو هم ضايج
اكولك شبيكم اليوم اشو الكل ضايجين واعصاب وهند راحت زعلانة الأهلها
فارس... وسام كايللها فارس راح ياخذ نسوانو ويطلع بيت وحدو
ريتال.. لحظة قبل لاتكمل ثاني مرة من تحجي كول ياخذ مرررررررررتة واشرت على نفسي لاتجمع ماشي
فارس... ههه انعل يومج اني بيا حال وهي واكفتلي على الكلمة
ريتال.. اي يلا كمل شبيها هند
فارس... متعاركة ويا وسام اتكلو احنا عدنا كومه جهال ومحبوسين بهل مشتمل وفارس ماعندو ولا طفل ويريد يطلع
كلمة منها وكلمة من وسام ضاربها ورايحة زعلانه
ريتال... ياااااااا عزاااا كل هذا لان نريد نطلع
زين ابوك شنو راية بالموضوع
فارس.. ابوية كعد يلومني يكول من البداية كتلك اذا تطلع وسام هم يطلع بس انت ظليت تلح بالموضوع وهاي نتيجتها
ريتال... بخوف عفية فارس لاتكول بعد ماكو طلعة
فارس... شسوي ما ادري منين طلعتلي هند خربت الأول والتالي
ريتال.. بخيبة امل هو هذا حظي
ورى يومين ام فارس رجعت هند للبيت واحنا اضطرينا نلغي فكرة الطلعة ونكعد ونسكت
بالكلية قبل لاينتهي الدوام بساعة كاعدة ويا البنات
رؤى.. ريتال هذاك مو حازم لو اني مشتبها
ريتال.. انداريت ياااا عزااا اي والنبي هو
هذا شجابة
خرب وين مؤمن رهف اتصلي عليه خلي يجي
حازم شافنا اجه علينا
حازم.. هلا بنات شلونكم
ريتال... هلا
انت شسوي جاي اهنا؟
حازم... عندي شغلة ويا مؤمن جيت اخذو واطلع
ريتال.. بس ترى مؤمن بغير قسم ليش مرحت عليه للقسم مالتة
حازم.. ها مو شفتج وجيت اسلم
ريتال... مرتاحيتلة نظراتة تتنقل ببن رهف و رؤى
ثواني وصار مؤمن فوك راسنا اجة يلهث عبالك جان يركض
مؤمن... حازم شسوي هين
حازم... هاي بدال السلام على العموم جيت اخذك نروح نتغدى
مؤمن.. جان خابرتني اني اطلعلك برى الجامعة ونروح
حازم... ماكو فرق المهم هسه انت جدامي
ريتال... حازم استقرت نظراتة على رؤى وهي حست وصارت تتافاف
حازم... ماجنت ادري اختج اداوم وياج بنفس الجامعة
رؤى...اي وهسه عرفت شنو المطلوب؟
حازم... وشبيج عصببه ماحجبت شي غلط يولو
رؤى... يلا ريتال راح يجي الخط اني رايحة الجو اهنا صار يخنك
سلمت علينا وراحت
حازم عينة ظلت ورى رؤى
مؤمن.. مو تكول عازمني بلا امشي
حازم...شلون يصير نعوف حرمة خالك وحدها
مؤمن... معليك بيها هساع فارس يجي عليها
ريتال.. مؤمن اخذ حازم وراح
ولج رهف شفتي هذا الحقير عينة مشالها من رؤى عزااااا بس لا يخلي عينة عليها
رهف...خلي يولي اشكد ملطلط ولا عبالك هذا ابن الشيخ واخو فارس
ربتال.. ولج والله اخاف على اختي لايسوي ببها مثل ماسوى بيه
رهف... لاتخافين ميكدر يقترب منها اكيد يخاف من فارس والأهم من هذا كله رؤى سباعية تاخذ حقها من حلك السبع مو مثلج جبانة
ريتال... اوووووف موبيدي والله اخاف منه
زين اني اكول الفارس على جيت حازم لولا
رهف... عادي كوليلة لآن اذا سمع من غيرج يسويلج مشكلة
بالطريق
فارس اليوم حازم اجة للجامعة
فارس.. عقدت حواجبي بغضب وانداريت عليها وشعندو جاي
ريتال... اجه على مؤمن حتى يروحون بتغدون ومن شافنة اجة سلم علينا
فارس.. اهاا خوش
باليل اني وفارس كاعدين بالهول نتفرج فلم
متعودين دائماً نسهر هناك ونتفرج افلام
احتاجيت اروح للحمام كمت وعفتة
من رجعت تفاجئت بالمنظر الكدامي
صبا كاعدة بصفة وشابكة زندة وتبوس بكتفة
عطبت من الغيرة ودخان صار يطلع من اذاني
فارس من شافني ارتبك يريد يسحب نفسه منها هي مجلبه بي
جيت كعدت بالطرف الثاني مرحت كعدت يمه
سويت روحي داتفرج بس اني مشعوطة
صبا... ادري شبيج كابلتبنا وكعدتي ترى هو هم زلمتي يعني شلون ما نكدر ناخذ راحتنا
ربتال.. جنت اريدها من الله تحجي حتى اطلع قهري بيها
ننننننعم عيني هاي منو المكابلتكم شنو قابل ميتة على شوفت شكولتج واذا تريدين تاخذين راحتج عندج غرفتج مو هنا
وانتي كولش زين تعرفين اني ويا كاعدين نتفرج على الفلم لاتغشمين نفسج وتسوين روحج غبيه
صبا... احترمي نفسج لا اكوم اطيح حظج هاي منو الغبيه صدك انتي وحدة متستحين شكولتي تسواج
فارس...بسسسسسس لا اكوم اضرب راس براس
بس باقي تكعدن تتكافشششششششن جدامي شنوووووو رجل كرسسسسسسسي كاعد بنصكم
ريتال... فارس عافنة وكام دخل للغرفة وطبك الباب قوي فزينا اني وياها من الصوت
صبا.. الله ياخذج تريدين تكوشين عليه الوحدج بس اني صوجي خليتج تاخذين راحتج ويااا وتنازلتلج عنو بس هينة اني اعلمج
ريتال... عافتني ودخلت الغرفتها عشتوو هسه يلا صار عدها احساس
دخلت للغرفة
فارس متمدد اني عيوني اطلع نار
فارس جاي يكركر مدري شبي
فارس... ههههههههههههههه يولو جان فدمرة كمتي سحلتيها هههههههههههه صايرة تخوفين
ريتال... انت على شنووووووو دتضحك عفتك خمسسسسسس دقائق جت لكيتكم احضان وبوسسسسس هاي من شوكت نازلة الحنية على صبا
فارس.... ههههههههه علمي علمج اني هم انصدمت مثلج صايرة رومانسية ههههههههه
ريتال...كمزت عليه اعض واضرب بي وهو بعده خربان ضحك
بعد من اليوم ماكو سهر بالهول افتهمتتتتتتتت وحتى اذا تريد تشرب اركيلة جيبها اهنا سسسسمعتني لو ارجع اعيد
فارس... هههههههههه سمعا وطاعه تدللين بعد اكو اوامر ثانية
ريتال... اشوووو احسك دتستهزء بكلامي وتنطيني على كد عقلي
فارس... والله حرت وياج عجل شكول يولو
ريتال... رفعتلة حاجبي لاتكول شي شحدك بعد تطلع غير اكلبها عزاا على رؤوسكم
فارس.. شكثر احب غيرتج
ريتال...تمدد بصفة اكولك فارس اشو بعد مصار عندي حمل؟
فارس... كلشي بيد الله بنيتي
ريتال.. من اروح الأهلي اخلي ماما تاخذني للدكتورة اشوف شبيه
فارس... انتي مو جنتي ماتريدين الحمل علمود دراستج؟
ريتال... والله هسه اتمنى يصير عندي طفل اليوم قبل باجر
فارس..ان شاء الله يصير اصبري بنيتي
ريتال... ثاني يوم بعد العشى اجوي اهل صبا يتعللون
جانوا جايين ابوها وامها واخوانها اثنين واختها
اني صعدت الغرفتي لان فارس ميقبل ادخل للربعة واخونها موجودين
بعد ساعة اجتني هالة كالت تعالي رايدج جوة
استغربت خير ياربي شيريدون مني
اكولج هالة متعرفين شيريدون مني واهل صبا بعدهم لو راحوا؟
هالة... بعدهم موجودين انزلي وتعرفين شيريدون
نزلت وياها دخلت للربعة سلمت اباوع الوجوه كلها مكلوبة ومتتفسر
فارس عيونة حمر من العصبية جسمي رجف حسيت بالخوف
الشيخ.. تعالي بنيتي حدري
عندي سالفة وياج
ريتال.. اكو مكان يم هند كعدت يمها
تفضل عمو كول شنو الموضوع
الشيخ... صحيح البارحة انتي متكاونة ويا صبا وحاجية عليها
ريتال... فتحت عيني وتلعثمت هااا اي صار كلام وسوء فهم بينا وفارس جان موجود
قارس... من دخلت للغرفة وعفتج وياها شصار بينكم
ريتال... باوعت على فارس جاوبتة مصار شي
ام صبا... عيني عينك كاعد اجذبين البارحة مو غالطة عليها ومعيرتها بمرضها وكايلتلها الا اخلي فارس يطلكج
ريتال.. انصدمت شششششنو هاي شوكت لا والله محاجية شي
باوعت على صبا هاي شوكت اني كتلج هيجي
صبا... شنو تغشمين نفسج من دخل فارس مو كلتي انتي وحدة مريضة ومخبلة والا اخلي فارس يطلكج وبعد مايباوع بوجهج
ريتال... اختنك اتقي الله
شنو كمية التاليف والكذب هذا
انتي الحجيتي عليه وعفتيني ودخلتي الغرفتج
اني منطقت ولاحرف
صبا... هاي جدامكم سمعوها شلون تحجي
ام فارس... والله فشلانين منكم هاي دوم مسودة وجهنا
الشيخ... ام عاااااادل ما اريد حجي زايد
بنيتي صبا اكبر منج شلون يصير هيجي تجاوزين عليها
مو اني دوم اكول عليج العاقلة والفقيرة
ريتال... عيوني انترست ادموع حسيت نفسي بمحكمة والكل يتهمني ومعندي دليل ادافع بي عن نفسي
جاوبتة بصوت يرجف بداعت اهلي غير الكلام الحجيتة وياها كدام فارس بعد محاجية شي
ابو صبا... اني بنفسي جيت وخطبتج الفارس ونزلتج ضرة على بنتي وهساع جاية تريدنو يطلكها
ام صبا... عجل شعبالك بنات المدارس كلشي يسوون
فارس... لا عاد لهنا وبس اليحجي عليها معناتو جاي يحجي عليه حرمتي كرامتها من كرامتي وما اقبل اي بشر يهينها جدامي
ام عمر.. شدعواك هيجي تعصبت علمودها
من هي تجاوز على بنت عمك وتحجي عليها
اشو ماكلت كرامة صبا من كرامتي
نسرين... صلوا على النبي ياجماعة لاتكبرون السالفة ريتال كومي اعتذري من صبا وحبي على راسها ولأزم تعرفين صبا تبقى حرمة فارس وام بيتو وهي الأصل
ريتال... تخبلت شنو اعتذر شنو هاي المذلة ياربي اباوع الكل ينتظرون مني اروح اعتذر منها
اجت عيني بعين فارس وكعن دموعي توسلت بي بعيوني
فارس... ام مؤمن كلامج على العين والراس بس ريتال ماسوت شي حتى تعتذر عليه
الكل باوعوا على فارس
ابو صبا.. كل هذا وتكول ما سوت عجل شتريدها تسوي بعد
مع الاسف ماجنت متوقعها منك تبيع اهلك وناسك الخاطرها
فارس... عمي شبايع رحمة الأهلك
اني ما سمعت ريتال حجت على صبا شلون تريدون احكم عليها بدون دليل
ام صبا.. ومنين انجيبلك الدليل هنا جانن وحدهن صبا ماتجذب احسن مكاعد تحجي هيجي كوم ضب حرمتك
فارس... عمة هاي ثاني مرة تحجين على حرمتي ليش ريتال شمسوية حتى اضبها ترى كلمتج مومقبولة
واليكول صدك ريتال حاجية شنو دليلو؟
اني ماسمعتها وانتو هم ماسمعتوها عجل باي حق جايين تحكمون عليها
وخلي نفرض ريتال حاجية ترى هاي عركة نسوان
ما تستوجب مسوين كعدة علمودها
ابو صبا... كوووووووومي انتي بعد مالج كعدة هين
زلمتج ماظال عندووو احترام لا الجبير ولا الزغير خلي نطلع بكرامتنا قبل لايطردنا علمودها
الشيخ والولد حاولوا يراضون ابو صبا
مقبل يرضى اخذ بنتة وطلع زعلان
صعدت الغرفتي شمرت نفسي على الجرباية وغصيت بالبجي
فارس كعد يمي رفعت راسي باوعت عليه
فارس وحق كل حرف بالقرآن محجيت وياها شي
معقولة اني الهدرجة ما اخاف الله حتى اعيرها بمرضها
فارس... مسحي دموع واني ماطلبت منج تحلفين وتبررين اني حافظج اكثر من نفسي واعرف بيج محاجية
ريتال... شمرت روحي بحضنة
فارس بس الكل مصدكين ونظرت الاتهام بعيونهم كولي شششلون راح اكدر اتحمل اشوف هاي نظرتهم الي
ريتال... اليصدك يصدك والمايصدك طز بي انعل ابوهم لابو عشيرتهم
دخلي واحد يحجي وياج كلمة وشوفي اليجرالو
ريتال... جنت خايفة انت هم تصدك وتكسرني كدامهم
فارس... معاش اليكسرج يبعد الروح اني سندج وحمايتج لاتتصورين بيوم اصير ضدج
ويكون بعلمج حتى ابوية مصدكج يكول هاي البنية گلبها ابيض مثل لون وجها ادري بيها معدها هالسوالف
يولو هذا ابوية بس لا جان يتغزل بيج واني مامنتبه
ريتال... ههههههههه ضحكت من بين دموعي
فارس... اي اريدج اضحكين لاتخلين موضوع تافه مثل هذا يضوجج
ريتال... صبا ظلت زعلانة يم اهلها وفارس عاند يكول لوتموت ما أروح عليها
بعد عشر ايام ام فارس راحت رجعتها
اني وياها منتحاجة
رحت ويا ماما للدكتورة طلع عندي التهابات بسيطة كالت بالعلاج تروح
بالكلية كاعدين اني رهف دنراجع مادة عدنا امتحان بيها
اجتنا رؤى الوجه احمر والحواجب معقودة
خير هاي شبيج
رؤى... تعاركت ويا العارررررررر اخو رجلج
ريتال.. بفزع شششنو تعاركتي ويا حازم
رؤى... لج دمرني يومية الكي بالكلية مالتي ومن يشوفني يوزع ابتسامات ومرات يجي يسلم جنت ما انطي وجه
بس اليوم مصخها جايني يكولي عندي موضوع وياج تعالي نكعد بمكان هادئ
واني جنت اعصاب من الدراسة خليت قهري بي
رزلتة رزالة من هاي التسوة مسحت الكاع بي جان يتوسل بس يريدني اسكت
التموا الطلاب رادوا يضربوه بعدين اجو امن الكلية اخذوا
ريتال... اني ورهف وحدة تباوع بوجه الثانية انعقد لساني من الخوف اريد احجي ما اكدر
رهف... انتي ليش مجنتي تحجين وتكولين هذا ديجي على كليتج
رؤى... اذا احجي هاي راح تخاف دشوفي وجها شلون صار اصفر
اني قبل كم يوم شفت مؤمن وحجيتلة وهو وعدني كال عوفي عليه اني أتصرف ويا
وصدوك اختفى حازم بعد مشفتة بس اشو اليوم من طلعت من القسم اجاني بكل صلافة يريد يحجي وياي
ريتال... جان لازم من البداية تكوليلي حتى اكول الفارس
حازززم مهوووووس اذا يخلي شي براسة يكوم يتصرف بخبال
رؤى...شحده قابل اني مثلج واخاف منه دخلي بعد يفكر يوصل يمي وشوفي شراح اسوي بي
رهف... عاشووووو كفوووو منج والله سباعيه مو مثل علي الجبانة
ريتال... رجعنا اني وفارس اريد احجيلة بس اخاف يتعارك ويا حازم وتصير مشكلة بسببي
فارس.. يولو وين صافنة مو كاعد احجي وياج
ريتال... هاااا لا مصافنة د اسمعك
فارس... اي عجل شجنت احجي اذا سمعتيني
ريتال... تنهدت فارس حازم يومية ديروح الكلية رؤى
واليوم رايح عليها يريد يحجي وياها وهي متعاركة ويا وجايين امن الحامعة ماخذي
فارس... ششششكاعد تحجين واني ليش مالي علم بهذا الموضووووع
ريتال... والله اني هم ما اعرف اليوم يلا رؤى حجتلي بس مؤمن يعرف
فارس... صرت اضرب بيدي على الستيرن بسسسسسسيطة اني اعلمك حازم الكلب
ريتال... فارس عفيه احجي ويا بهدوء بدون مشاكل فدوة لاتخوفني
فارس.... هذااا واحد سكط ميفيد الحجي ويا اليوم اشرب من دموووووووو
ريتال.. كمت ارجف وابجي فارس من شاف حالتي شوية هدء وسكت
اليوم حازم ما رجع للبيت يغرف بنفسه مسويلة مكسورة
فارس ماطلع كاعد ينتظرة للمغرب حازم ماكو
فارس كم مرة اتصل عليه ميجاوبة
بس مجاوب مؤمن وكايلة اني يم اصدقائي
بعد العشى فارس طلع كعد بالحديقة خلصت غسل المواعين ورحت يمه
وسام ومؤمن جانوا برى من دخلوا اجوي يمنا
وسام... بله انتوا مو مخابيل اكو عاقل يكعد بالحديقة بهل برد
فارس... والله كاعد انتظر اخوك العار شوكت يجي
وسام... صدك وينو اليوم ماشفتو
مؤمن... مادامكم مجموعين اريد احجي وياكم بسالفة
ريتال.. جيت اكوم مؤمن كال عادي ابقي لاتروحين
مؤمن... لازم تلحكون حازم قبل لايضيع
ملتم على شلة تعبانة وبسببهم تعلم على حبوب الكبسلة
وسام... حاززززززززم يكبسل
فارس... هاي من شوووووووكت وليش هسه يلا جاي تكوللنة
مؤمن... اني جديد عرفت حاولت اخلي يتركهن بس بدون فايدة
شوفو حل لان بعدو بالبداية اذا ادمن عليهن بعد صعب يتركهن
وسام... والله جنت شاك بي تصرفاتو مو موزونة اثاري يتعطى حبوب واحنا نايمين ورجلينا بالشمس
فارس... ورب العزة اليوم اقضي عليه
مؤمن.. خالي حازم محتاج مساعدة الضرب مايجيب نتيجة
فارس... عادي اساعدو بس اول شي لازم اكسر راسو
وسام... ابوية اذا عرف يروح بيها
فارس... ريتال روحي صعدي الغرفتج
ريتال... لازمة ايده واتوسل بيه الله عليك لاتتعارك
فارس... لاتخافين بس نحجي ويا يلا روحي
ريتال... كمت من يمهم واني كلبي يدك سريع من الخوف
فارس ووسام عيونهم تجدح نار مبين مراح تعدي هاي الليلة على خير......
يتبع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!