رواية فارسي العاشق الفصل الثلاثون 30 - بقلم بسمة البياتي

_  فارسي العاشق _
( بقلم بسمة البياتي)
_البارت الواحد و الثلاثون _

كاعدة بغرفتي وايدي على گلبي كلما اسمع صوت افز

صارت ساعة بالوحدة ونص وفارس بعده جوة مصاعد
النوم طار من عيني اريد انزل بس اخاف فارس يحجي عليه

صار صوت صياح جوة عرفت اجه حازم وصار الجنت خايفة منه

نزلت اركض هند وصبا هم نزلوا وياي

صوت الهوسة بالمطبخ دخلنا كلنا

نباوع فارس ووسام لازمين حازم وديضربوا

مؤمن يريد يخلصة من ايدهم ميكدر نسرين والشيخ دخلوا بنصهم بس يريدون يفكون حازم من ايدهم

ام فارس متربعة بالكاع تلطم وتبجي وتصيح راح يموتون وليدي

فعلآ المنظر جان مرعب بالنسبة اليه

هالة واكفة على طرف تبجي

هند.. يولي هاله خابري على عادل وولده خلي يجون بسرعة

هالة.. وهي تناشغ من البجي خابرتهم راح يجون

اقل من دقيقتين عادل واولاده اجوي لان بيتهم قريب

كدروا يفكون حازم من ايدهم شكل حازم ميبين من الدم

نسرين... يبوووووووو لحكوا ابوية مدري شبي

اندارينا لكينا الشيخ وجها ازرك وشفايفة بيض واكع بالكاع وبالكوة يتنفس

الولد انخبصوا بي شالوا بسرعة اخذوا للسيارة

عادل وفارس و وسام راحوا ويا للمستشفى

حازم فوك صخام وجها وهو بالكوة واكف من الضرب وكل شوية يهد على مؤمن يكوله انت فتنت عليه كدامهم

قيس واخو اخذوا حازم للحمام يغسلولة

ام فارس.. اكيد هاي المشششششكلة من تحت راسج احجي شمسسسسوية

ريتال.. اني شششششعليه كولشششي وذبيتي براسي روحي سالي ابنج ششششوفي شمصخم وضربوا

مؤمن... جددددددده ريتال شششششعليها تريدين تعرفيييين عليش ضربوا ابنج التحفة يكبسل

ام فارس من سمعت رجعت تلطم

اني عفتهم وصعدت عسى ما ناركم تاكل حطبكم  والله يا الله كلشي يصير يبلوني

نص ساعة ورجعت كبت العيطة اريد بس البس حجابي ما اكدر ايدي ترجف خفت لا الشيخ صاير بي شي

نزلت اركض لكيتهم ملتمين يم غرفة حازم

نسرين وهند طلعوا هالة من الغرفة جانت فاحطة من البجي والعياط

نسرين... ريتال تعالي اخذي هالة صعديها يمج فوك

ريتال.. لزمت ايدها وصعدتها  هند جانت ويانة
اشرتلها بعيوني شكو

هند... هذا حازم الخبل كتلها

ريتال...ياااااا وهي شمسويتلة حتى يكتلها

هند... اني ادري الله مخبلوا علينا اليوم

ريتال...اخذتها للحمام غسلت وجها بعدين دخلتها الغرفتي  جانت ساكتة متحجي شي بس تبجي

اكولج هند هم اتصلتي على وسام

هند..اتصلنا محد منهم يرد

ريتال...هاله حبي اخذي راحتج وتمددي
رحت طلعتلها بطانية جديدة وغطيتها

هالة ابد متختلط بيه ام فارس متخليها لهذا معندي علاقة بيها الكلام بينا على كد السؤال والجواب

للفجر ظليت كاعدة انتظرهم
ساعة خمسة صباحاً يلا رجعوا من المستشفى 
خطية الشيخ جان تعبان حتى ميكدر يحجي

اخذوا الغرفتة حتى ينام ويرتاح

عادل تعبان نام بالربعة والبقية كل واحد راح الغرفتة

اكولك فارس ترى هاله نايمة بغرفتنا

فارس..عقدت حواجبي شعجب؟

ريتال... خفت اكوله حازم كتلها اخاف هم ينزل يتعارك ويا

هااا من صارت المشكلة خافت تبقى ويا حازم بنفس الغرفة لان متعصب

فارس... اهااا عجل روحي جيبلي ملابس والسجادة راح اصلي هين مابيه حيل اروح للجامع

ريتال... طلعتلة ملابسة راح سبح وبعدين صلى

اكولك وين راح تنام انت تعبان

فارس.. جيبلي مخدة راح انام هين على القنفة

ريتال... سودة عليه راح تتكسر من هاي النومه

جبتلة بطانية ومخدة تمدد كعدت يمه
اكولك الشيخ شبي؟

فارس... تحسرت گلبو تعبان بس شوية صحتوا تتحسن ناخذوا الأربيل نسويلوا فحوصات كاملة هساع تعبان مايتحمل تعب الطريق

ريتال... اوووف خطية ميستاهل
عنده العافيه ان شاء الله

دنحجي طلعت صبا

صبا.. عليش نايم هين فوت نام بغرفتي نومة القنفة تكسر ظهرك

ريتال... غمضت عيني بقوة جنت لازمة ايد فارس ضغطت عليها قووي

فارس... تعبان ومابيه حيل اكوم راح انام

ريتال... فارس خلى ايده على عينه وغمض صبا شوية وتنفجر عافتنا ودخلت

فارس شال ايده من عينه

فارس... راح اظلين مكابلتني وكاعده شنو ماناوية تنامين اليوم

ريتال...والله يا حبيبي للأمان راح اجي انام على هذيج القنفة زوج اليعوفك وحدك  يروح ينام

فارس... ههههههههه والله تعبان ونعسان مو وكت غيرتج هساع
روحي نامي وطمني ماروح يمها لاتخافين

ريتال... هزيتلة بكتفي بمعنى مااه ما اروح

فارس... خرب عقلج اشكد عنودية سويتلها مجال تعالي نامي

ريتال... يااااا وين انام هي القنفة هلكدوتها

فارس.. شسويلج هو انتي لازكة بيه ما أخلص منج ابد

ريتال.. مممممم ليش انت تريد تخلص مني

فارس... هههههه استغفر الله تعالي وكافي حجي زايد مو انسطرت من النعاس

ريتال.... نمت يما صح المكان ضيق بس احلى نومه اهم شي بحضنه هم زين الكاع مفروشة اخاف اوكع من القنفة مراح اتأذئ هوايه  هههههههههههه

كعدت ساعة سبعة كمت من يما ما اريد صبا تطلع وتشوفنا وتسويلها سالفة وتروح تنقل كلام

دخلت للغرفة لكيت هالة كاعدة

صباح الخير

هالة... صباح النور اكولج الشيخ شلونو اخذتني النومة وما عرفت شنو وضعوا

ريتال... الحمدلله زين الفجر طلعوا من المستشفى

هالة... عجل عمو فارس وينو؟

ريتال.. نايم بالهول

هالة.. خطية اخذت مكانو

ريتال.. لا عادي حبيبتي
ليش كمتي وين رايحة رجعي كملي نومتج

هالة... لا كافي نمت جثير

ريتال.. نزلت هالة رحت كعدت فارس حتى يرجع ينام بالغرفة
جان بالكوة فاتح عينه من النعاس

ثنينا رجعنا نمنا للساعة تسعة يلا كعدنا
وهم رجعنا للهوسة والخطار مابقى احد من العشيرة والمعارف ما اجة يطمئن على الشيخ

بعدها بأيام عادل وقيس اخذو الشيخ الأربيل يسوي فحوصات وسام وفارس مكدروا يروحون ويا لان عدهم شغل

قبل لايروح الشيخ حازم اجة نام على رجلة ويبجي يكوله اني السبب بمرضك اريدك ترضى عني وتسامحني

الشيخ.. اذا تريد تريحني اريدك تصلح حالك وتصير رجال كفو  حالك حال اخوتك اطلع اشتغل وياهم وبطل صياعة

حازم... يجرالك راح اسوي كل التريدو بس المهم تكون بخير

حازم كام يطلع ويا الولد للمعمل

رجعوا الشيخ وعادل من اربيل وللأسف قلب الشيخ جدا تعبان ولأزم ميقوم باي مجهود ويبتعد عن الانفعالات ويلتزم بالعلاج والأكل الصحي

الوضع صار شبه هدوء ماكو شي جديد
التهيت بالدراسة والأمتحانات

اكثر شي جان قالقني ومخوفني هو موضوع الحمل ليش لهسه مصار عندي

هالة طلعت حامل وام فارس طايرة بيها

تخاف عليها من العين مني وبالطالعة والنازلة تسمعني كلمة
جنت انقهر وأسكت مابيدي شي اسوي
فارس يبين كدامي ممهتم الهذا الموضوع بس اني متاكدة هو يتمنى يصيرلة طفل يشيل اسمه

فارس.. يبعد الروح اليوم ولد عمي وجماعتي اتفقوا يروحون سفرة عشر ايام المصر

ريتال... الله وياهم سفرة سعيدة مقدماً بس شسويلهم؟!

فارس... اي مو اني هم اروح وياهم

ريتال... رفعتلة حاجبي نعم شكلت تروح وياهم؟!

فارس... اي احنا متعودين كل فترة نروح نبقى جم يوم ونرجع

ريتال... وهسه المطلوب مني شنو؟

فارس.. ممطلوب شي بس جاي انطيج خبر بالموضوع

ريتال.. هههه حلو والله متفق ومكمل كولشي وهسه دينطيني خبر
فارسسسسس ماكوووو روحة

فارس... شنو ماكو اني انطيتهم كلمة اروح وياهم شنو تريدين تصغريني جدامهم

ريتال... اني معليييييية روحة ماكو شششسوي رايح وحتى الجو بعده بارد

فارس... الجووو حلو مو كلش بارد

واحنا رايحين سياحة ومناك نروح نزور ابن عم ابوية

ريتال... اهاااااا هذا الحجي تريد تروح الابن عم ابوك اي يمكن اشتاقيتلة من شفت صور بناتة ناشرهن بالفيس

فارس.... هههههههه هاي كل عقلج يابنات يولو واني شسويلهن

ريتال... شششوف فارس يا اني يا هاي الروحه وهذا اخر كلام عندي

فارس... بطليييييييي خبال انتي ماتملين من هالسالفة كلما يصير شي وكلتي لو انييييي لو هو عبالج بهاي الطريقة تلوين اذراعي ترى اني من انفذ التريدنو مو ضعف مني بس لان ما احب اشوفج ضايجة
بس هالمرة كتلج انطيييييت كلمة وما اترجع عنها لو على كص ركبتي

ريتال.. اووك براحتك سووووي اليعجبك

فارس... يولو خليني اروح واني مرتاح لاطلعينها من خشمي
جريتها الحضني

ريتال... وخررررررررر  اياك تلمسني آگلب الدنيا عليك والله

فارس... يطبج طوب ظلي بهذا عقلج وانتي الراح تربحين

ريتال.. فارس قفل على السفرة واني تسممت شبعت بجي ايام واني زعلانة منه حاول يراضيني مقلبت قبل السفر بيوم طلبت منه ياخذني البيت اهلي شعندي باقية اهنا عشر ايام وهو ماكو
مكدر يعترض لان هو هم ميرتاح يعوفني وحدي بيت اهلة

اخذني البيت اهلي جنت بعدني ما زعلانة واصلا ناوية من يرجع من السفر ما ارجع وياا

وصلني للباب قبل لا انزل من السيارة

فارس... ريتال رحمه الأهلج لاتبقين مدلغمة ماراح اتهنى بالسفرة بسببج

ريتال.. هه خطية خايف مايتهنى بسفرتة لا لاتخاف اكيد راح تتونس لاتنسى عود سلمي على بيت ابن عم ابوك 

فارس... خرب يومج فلا تصيرلج جارة

ريتال.. نزلت وعفتة سافر فارس وعافني احرك بدمي جنت مشعوطة من نار الغيرة

يومية يتصل عليه ما اجاوبة

االدوام جنت اروح ويا خط رؤى

بابا... اليوم فارس اتصل عليه وسالني عليج باله باقي يمج
بنتي ليش مجاي اجاوبينة؟

ريتال... ميعجبني اجاوبة وما اريد بعد يتصل

بابا.. هههههههه والله النسوان عقلهن بكد الجوزة

ماما... حقها تضوج شنو عايفها ورايح يتونس

بابا... وشكو بيها رايح ويا جماعتة دعوفوا خلوا يتونسلة كم يوم

وانتي لاتظلين توزين تقرين برأس بنتج

ماما... يااااا واني شعليه لا حاجية وياها ولا مدخلة بينهم

ريتال... شوفوا من هسه اكوللكم رجعة ويا فارسسسس بعد ما أرجع وهذا اخر كلام عندي

بابا... ههههههههه الله عليج سجى شوفي بنتج  نفس خبالج

ريتال... اني وماما عقدنا حواجبنا
يااا يعني اني مخبلة

سجى... موبس انتي طلعت امج هم مخبلة

بابا... اووويلي اندارن عليه البنت وامها 

بنتج وارثة غيرتج ويمكن اضرب منج

فارس مقصر لو عازمني ويا
جان رحت تونستلي فد كم يوم

سجى... ياااا شوفي الرجال صاير يدور ونسى الظاهر نسيبك سوالك واهس

بابا.... ههههههههه اي والله

ريتال.. صارلة اسبوع فارس من سافر روووحي طاكة عقلي ليل ونهار يشتغل ويسويلة افلام
هسه هو وين شسوى ويامن حجة وين راح منو شاف وين كعد وباقية على هاي الحالة ليل نهار

ثامن يوم رجعت من الدوام تغديت ونمت فزيت على حركة يمي جنت بعدني مغمضة حسيت احد تمدد بصفي شميت عطر فارس

فتحت عيني اي والله هذا هو
فارس حضني دفعتة وتهسترت
وخرررررررر هسه يلا مذكرني

فارس... ولج نصي صوتج اهلج برى فضحتينا

ريتال.. ما اسكت شششششجابك ليش جاي عبالك تروح تشبع ونسه وتالي من تجي استقبلك بالأحضان لا والله ما حزرت

فارس... كومي نرجع للبيت واهناك احجي براحتج

ريتال.. ههههههه ارجع للبيت اشكد واثق من نفسك
رجعة ما ارجع انسسسسسسى

فارس... اسسسستغفر الله ريتتتتال بطلي خبال وكووووومي وياي

ريتال... وحق الله ما ارجع وشسوي سوي

فارس... يعني هذا اخر كلام عندج؟

ريتال.. اي نعم

فارس... براحتج

ريتال... عافني وطلع كمت ابجي

ماما... بنتي ليش ما رجعتي ويا ترى هو ممسوي شي غلط ليش تكبرين الموضوع

ريتال... بالنسبة الكم ممسوي شي غلط بس بالنسبة الي سوى

كتلة ما أريدك تروح ليششش راح وما اهتم الكلامي

ماما... زين هسه انتي شكو جاي تبجين؟

ريتال.. مسحت دموعي ما ابجي على شنو ابجي هو ليش منو يستاهل

اجتي رؤى يمنا

رؤى... لج ريتال فارس جايبلنا هداية ششششوفي شجايبلي فديت ابو الفوارس اشكد حباب

ريتال.. ما اريد اشوف شي روحي من يمي

رؤى... اووووي كيفج صوجي اني جاي اشوفج

ريتال.. ثاني يوم هم اجه علينا يريد يرجعني واني قفلت جنت كولش مقهورة منه

بابا وماما حجوا عليه حتى ارجع من شافوني زعلت منهم سكتوا

ثالث يوم داومت قبل لاينتهي الدوام طلعنا اني و رؤى ورهف دنمشي صاروا فارس و مؤمن بوجهنا

عقدت حواجبي هذا شجابة

فارس سلم على البنات

فارس... ريتال امشي وياي

ريتال.. وييين ما اروح وياك الأي مكان

فارس... حجيت من بين اسناني وهمست قريب منها وحق الحق اذا مامشيتي جدامي اخذج سحل جدام كل الطلاب

ريتال.. خفت شكلة متعصب ويحجي بجدية

انت شلون تريد تاخذني بدون علم اهلي

فارس... اني رجلج مو صاحبج وعلى العموم اني  اتصلت على ابوج وكتلو راح اخذج

مؤمن... ههههههههه ابو الفوارس مرتب كلشي

ريتال... مشيت ويا واني روحي بخشمي صعدت للسيارة وانفجرت بوجها
انتتتتتت ششششششجاي تسسسسسوي ما اريد ارجع ويااااااااك خومااااا كووووة

فارس... بطلي صياح لا اضربج على حلكج

لا عبالج افوتلج هاي تصرفاتج  يومين اجيج متقبلين تردين عبالج بهاي الطريقة جاي تعاقبيني

ريتال..ما اريد ارجع كيفي وانت اذا ممهتم شكووو جاي عليه وهسه جاي ماخذني من كليتي

فارس... جيت اخذتج حتى تعرفين ماكو شي يعصى على فارس
مو انتي التوكفين بوجهي وتمشين كلامج عليه

ريتال... كمت ابجي اشكد سخيف يعني رجعني حتى يكسر خشمي لان ماقبلت ارجع وياا

وصلنا للبيت نزلت من السيارة صوت البنات بالمطبخ ديشاقون ويضحكون

بس اكثر صوت ركزت عليه صوت صبا جانت منطلقة وتضحك من كل گلبها

مسحت دموعي ودخلت
جانن كاعدات يشربن شاي 
صبا من شافتني غابت ضحكتها وبوزت

صح مشايفتهن صارلي عشر ايام بس مالي خلك ابوس اي وحدة بيهن سلمت من بعيد وكفت انزع حذائي
دخل فارس سلم

صبا... احظرلك الغدى اكيد جوعان

ريتال...اول مرة صبا تسويها شنو الفلم مرتاحيت ابد

صعدت وعفتهن اجه فارس

ذبيت الكتب والجنطة من ايدي وجيت وكفت كدامه

انت صارلك يومين وين تبات؟

فارس... شي ميخصج معليج

ريتال... صكيت على اسناني وحجيت بغضب فارررررس احجي لاتخليني اسويلك مصيبة

فارس جان يتهرب ميخلي عينه بعيني

فارس... وبشنو هامج وين ابات مو انتي المارضيتي ترجعين

ريتال... يعني جنت بايت يم صبا مووو؟

فارس... كتلج معليج

ريتال.. فارس جان ديبدل ويريد يروح للحمام لزمتة من ياختة والنبي اذا مجاوبني انزل كدام الكل اسالها

فارس... اييييي البارحة جنت بايت يمها هساع ارتاحيتي

ريتال... هووو كالي هيجي لو اني تخبلت
ياكذااااااااااب مو كلت لو يصوغوها بالذهب بعد ما اقترب منها
اكرررررررررررهك امششششششي رجعني لأهلي بعد ما اريدك اتكولي احبببببج وانت عادي عندك تروح الغيري

فارس... حطيت ايدي على حلكها اريد اسكتها خررب غيرتها تخبلت

كااااافي البارحة اجتي عليه ورادتني ما اكدرررررر ارفض الله يغضب عليه هي هم بششششر

ريتال... الله ياخذك وياخذها عوووووووفني ما ابقة ولا لحظة يمك ما اريدك

فارس... ماتت من البجي ما اعرف شسويلها لو شلون اسكتها

ريتال...رحت طلعت موبايلي اريد اخابر اهلي اجه اخذة مني

و بكل برود راح تمدد يريد ينام
افتر مثل المخبلة بالغرفة وهو ولامهتم

للعصر واني مفرفحة حتى صوتي طمس 

فارس.. مووووووكافي شنو ماتعبين من البجي لو احد ميتلج هم ماتبجين عليه هالكثر

ريتال.. وديييييني الأهلي ما اريدك تعررررررف شنو يعني ما أريدك اني اشمئز منك انت واحد نذذذذذذذذل وحقييييييير
محسيت غير كفخة قوية على اذني وراسي

فارس... لج بنت الكلب منو هذا النذل والحقير انعل ابووووووج لابو الينطيج وجه بعد صايرة ادبسز ولسانج اطووووول منج لج ليششششش تخليني اجررررررم بيج

ريتال...خفت منه محجيت شي

بدل ملابسة وطلع

ردت اطلع اشوف مؤمن بلكي يخابرلي على اهلي لكيت فارس قافل الباب

والحد صلاة العشاء اني محبوسة حتى مفكر يجي يشوفني شصار بيه ولايفكر يمكن احتاج حمام 

انفتحت باب الغرفة دخل فارس باوع عليه وهو عاقد حواجبة محجة وياي ولاكلمة

اتحركت من مكاني طلعت برى الغرفة رحت للحمام بعدها غسلت ورجعت للغرفة فارس مموجود يمكن نازل جوة باوعت بالمرآية وجهي صاير فلم خشمي احمر  وعيوني منفوخة وحمرة
لبست شالي ونزلت جوة
دخلت للربعة حتى مهتميت اذا جان اكو يمهم خطار او لا

الكل كاعدين الشيخ امه وسام حازم مؤمن جمال صبا نسرين
وفارس هم موجود من شافني باوع عليه باستغراب لان يعرف بيه من ازعل ما انزل ابد
البنات جانوا ديمدون السفرة حتى يصبون

سلمت الكل ردوا السلام
جانوا يباعون عليه بستغراب لان مبين من وجهي باجية

ام فارس... بعد وكت هساع يلا فكرتي تنزلين عليش كلفتي روحج جان ظليتي الباجر

الشيخ... شبيج بنيتي شنو جنتي تبجين

ريتال...من كالي هيجي رجعن دموعي تصبن
رحت يما حجيت ويا واني اناشغ من البجي
عمو عندي طلب

الشيخ... يولو عليش كل هالدموع اهدي وفهميني شبيج ماكاعد افهم شي من كلامج

فارس... رييييتال رجعييييي الغرفتج

الشيخ.. معليك بيها
احجي بنيتي شبيج

ريتال.. عم عموووو اريد اروح الأهلي ما اريد ابقى اهنا

الشيخ... انتي مو جنتي يمهم واليوم رجعتي عليش تريدين تروحين بعد

ريتال... احجي واشهك اني مارجعت برضاتي فارس رجعني بالغصب

الشيخ... بستغراب شلون رجعج بالغصب

فارس... ريتتتتتتال

الشيخ... للمرة الأخيرة اكولك اسكت خلي البنية تحجي

ريتال.. هو اجه للكلية ورجعني بالكوة
فدوة عموو اريد اروح الاهلي

الشيخ... وانتي عليش ماجنتي تريدين ترجعين فارس شمسويلج احجي يولو

فارس... عليش سكتي جاوبي
كل هاي الدراما والمناحة لان رحت سفرة خبصت الأمة عليه

الشيخ... هههههه بنيتي ترى عادي هو رايح ويا جماعتو وولد عمو جمال وقيس هم جانوا ويا الموضوع مايستوجب كل هالزعل

ريتال.. بس هسسسسه اني ما أريد ابقة عمو فارس ضربني

الشيخ... بصدمة شنوو
يول فارس هاي صدك ضاربها تستقوي على حرمة ضعيفة وتمد ايدك عليها والله مع الأسف عليك

فارس... غير من سوالفها طلعتني من هدومي

ريتال.. هاي مو اول مرة يضربني ومو بس هيج كلما يتعصب ياخذ تلفوني ويقفل عليه الباب

الشيخ... وانتي ليش ماجنتي تجين تكوليلي حتى اكسرلج راسو
لك فارسسسس كل هذا يطلع منك 

فارس... لسانها طويل تجبرني اضربها

ام فارس... من اكوللكم وكحة محد يصدكني

الشيخ.. هسسساع انتي منو طلب رايج لو البيج مايخليج تسكتين

وانت ماستحيت على شواربك من تمد ايدك عليها ليش هي رجال وتتحمل ضربة منك

وهي هاي منيلها لسان و ين اكو افقر منها من يوم الانت  اخذتها واليومنا هذا ماسمعتلها صوت

فارس.. الله وكيلك بس جدامكم فقيرة
هاي التكول ماعدها لسان مخلصة گلبي هذا راسي راح يمتلي شيب بسببها

الشيخ.. وحق الحق فارس اذا اسمع بيك بعد ماد ايدك عليها حسابك راح يكون وياي اني

ريتال...بسس عمو اني اريد الاهلي واذا متكدر تاخذوني كوله خلي ينطيني تلفوني اخابرهم هما يجون عليه

الشيخ... وين يجون بهل ليل
انتي تعتبريني مثل ابوج وجدج  لو لا

ريتال... الله يشهد غلاتك من غلاتهم

الشيخ... عجل الخاطري انسي الروحه الهم وبعد فارس اذا ضربج هاي جدام الكل اوعدج اني بيدي ادزج الاهلج واريد زلمة يوكف بوجهي

فارس.. ياااااابة هاي شكاعد تحجي مو راح تفرعنها عليه

الشيخ.. تستاهل اليجرالك
تعال حب على راسها وراضيها

ريتال... اشووو هذا رادها من الله جرني عليه ولزك شفايفة بكصتي ادفع بي اريده يهدني ماكو فايدة

الشيخ... فارسسسسس كتلك بوس راسها ماكتلك
احضنها جدامنا يووووول اثكل

فارس... واني شسويت مو هاي جدامك  كاعد ابوس راسها ماتعوفون الواحد ياخذ راحتو

ريتال... الكل يضحكون واني ميتة من الخجل بس صبا وام فارس مدلغمات

ام فارس...حظوظ حتى الزلمة الجبير صاير محامي الها

الشيخ... يولي انتي بس لا تغارين منها

ام فارس... على شنو اغار منها

الشيخ... لان احلى منج

ام فارس... هاي منو احلى مني اني بشبابي وين اكو وحدة تلحك جمالي مو انت كتلت نفسك عليه

الشيخ... والله لو جنتي بشبابج بجمالها  جان اني ظليت الهساع شاب وماكبرت

فارس... سالميييين شيخ مو جنك كاعد تتغزل بحرمتي جدامي

ام فارس... هذا ابوك الظاهر كام يراهق على الكبر

ريتال.. ظلوا يحجون ويشاقون ردت اكوم الشيخ ماقبل كال لأزم تتعشين ويانة

اكلت شوية وكمت رجعت الغرفتي
صح قبلت ابقى بس روحي طالعة وكارهة فارس ومطايقتة 

فارس... ها يولو اشو بعدج مبوزة ترى اروح اصيح الأبوية اكلو شوفها بعدها زعلانة وماسمعت كلامك

ريتال...ليششش جاي الغرفتي روح يم صبا اليوم وجه صبا منور الظاهر سهرتكم جانت حلوة البارحة

فارس.. حكيت لحيتي اوووف شراح يقنعج ويخليج تسدين هالسيرة

ياسهرة يمعودة نص الليل رجعت نمت هين

ريتال... بسسسسس ما اريد اسمع شي ورررررروح يمها ما أريدك

فارس... حدرت يمها كافي بنيتي مو سليتيني

ريتال... لاتكعد بصفي كوم اكرهك روح الحبيبة  گلبك صباوي

فارس... معندي حبيبة غيرج انتي ابوية وامي وكل عشيرتي

ريتال... وخررررر انت كذااااب نسيت شسوت بيه صبا وشلون جمعت اهلها واهلك وتهمتني كدامهم

فارس... شنو اليرضيج كوليلي بس لاتبقين تبجين

ريتال... بعد ماكو شي يرضيني لان للأسف بعد معندي ثقة بكلامك تكول شي وتسوي شي ثاني

فارس... انطيج كلمة رجال بعد ما أروح يمها واذا تراجعت بيها الج الحق شسوي سوي

راحت عيونج من البجي من الظهر لهسه انتي تبجين

ريتال... فارس اذا ترجعت بكلامك والله ما ابقى يمك

فارس... حضنتها وابوس بيها بالهفة

ريتال... دفعتة اوكف اكو  شي ثاني سفر ويا جماعتك هم بعد ماكو

فارس... هههه ماشي هي السفرة طلعت من خشمي من وراج

ريتال... يلا احجيلي شسويت بمصر ووين رحت ومنو شفت

فارس... راح اجاوبج على كل اسألتج بس مو هسه بعدين

ريتال... لا لا ماكو بعدين هسه احجيلي

فارس... كتلللللج بعدين هسه مشتاگلج واريد اطفي نار شوگي جنت احجي وابوس بيها

ريتال.. سهرت للفجر ويا فارس كعد يحجيلي شسوى هناك بالتفصيل

اكولك شجبتلي وياك

فارس... هذيج الجنطة اليم ميز تواليت كل البيها الج

ريتال... كمت اريد اروح اشوف

فارس... وين رايحة عود الصبح شوفيها

ريتال.. لا هسه اشوف جبت الجنطة خليها على السرير وشغلت الضوا

جان جايب ملابس بيت وطلعة ونوم مكياج عطور ذوووووقة يجنن

واني دأكلب بالملابس شفت شي صدمني
فتحت عيوني على وسعهن بدلة رقص لون ذهبي لامع قطعتين نفس الاشوف الراقصات لابساتها بالافلام المصرية حتى وياها خلخال الخصر

فارسسس عزااااا هاي شنووووو المنو جايب هاي

فارس... شبيج يولو جفلتيني  الج يعني المنو

ريتال.. ياااااا شنو الي ليش احد كايلك اني فيفي عبدو

فارس... تركصين احسن منها لوما جم مرة لزمتج وانتي تركصين وبحنتج مخليتي قصور انتي الحييتي الحفلة

ريتال...يااااا وانت و ين شفتني اركص بالحنة

فارس... شفتج وبيومها حركتي عشيرتي

ريتال... اي وان شاء الله حضرتك تريدني البسها واكعد اركصلك

فارس... اي عجل ليش مشتريها  حتى تضميها بالكنتور

ريتال...المهندسة ريتال تلبس بدلة رقص وتركص طارت الهيبة

بس والله شكلها يجنن هههههههههه

كملت امتحانات واجت العطلة والحمدلله صرت مرحلة رابعة

صبا وضعها تغير صارت تحاول ترجع فارس الها ومن تشوف فارس ممعبرها تخلي قهرها بيه وتسويلها مشكلة وياي اني اطنشها
لان المهم عندي فارس يمي وميروحلها......

يتبع...

اليوم خليتلكم القفلة هادئة
حتى تستعدون البارت باجر الاحداث نار 😁😁