رواية فارسي العاشق الفصل الرابع 4 - بقلم بسمة البياتي

_  فارسي العاشق _
( بقلم بسمة البياتي)
_البارت الرابع _

ماما كعدت وخلت ايدها على راسها وصارت تبجي بقهر

المكان صار هدوء كان السكوت هو سيد الموقف
الشي الوحيد الينسمع بالغرفة هو صوت شهكاتي الي جانت تطلع من اعماق روحي

شهكت وحدة مظلومة وماكو اي دليل على برائتها

المدرسات صافنات عليه ونظرات الشك والاتهام مصوبة اتجاهي وبعيونهم الف سؤال

كسر هذا الصمت صوت النقال يعلن عن وصول رسالة ست امنة المعاونة فتحت المسج  المدرسات جانوا واكفين يمها ويقرون وياها وعلامة الصدمة والذهول بوجهم

اكثر من خمس دقائق وهما يفتشون بالنقال

ست امنة... سجى اقري هاي الرسائل الموجودة

ماما بايد ترجف اخذت الموبايل

صارت تقرأ بالرسائل وتبجي بهستريا
اني ما اعرف شنو مكتوب بس من وضع ماما عرفت اكو شي يخصني

ست امنة... ماما ريتال منو هذا الولد ومنين تعرفي؟

قبل لا اجاوب صرخت ماما بوجه ست امنة

سجى... انتي كل عقلج تسالين هذا السؤال بنتي مستحيل تسوي هيجي شي اني ربيتها واعرفها اكثر من نفسي والله لو هسه اشوفلها صور ويا واحد هم مراح اصدك او اشك بيها

امنة.. سجى اهدي احنا كلنا مصدومين مثلج لان نعرف اخلاق ريتال ومفديوم سمعنة شي موزين  عليها بس انتي شفتي  كلشي بعينج

سجى... كافي ما اريد اسمع اي كلمة امشي ريتال
سحبتني من ايدي وطلعنة من الغرفة دزت طالبة جابت جنطتي ورجعنا للبيت الطريق كلة اني وياها دموعنا مو كفت

دخلت للبيت واني خايفة من ردت فعل ماما

رحت يم ماما وحجيت بصوت بالكوة ينفهم

ماما والله هذا مو موبايلي وما اعرف شي عنه ولا اعرف هذا الولد منو مستعدة اجيب القرآن واحلف عليه

ماما.. روحي الغرفتج وسدي هذا الموضوع

ريتال.. دخلت الغرفتي ومن خوفي قفلت الباب جنت خايفة ماما اتكول البابا
والله اليعلم بابا لو عرف شراح يسوي بيه

شفت موبايلي على ميز التواليت اخذتة واتصلت على عمة داليا هي الوحيدة الممكن تصدكني

حجيت وياها واني ابجي

الوووو عمة فدوة تعالي البيتنا محتاجتج والله

.لاتخافين محد بي شي بس اني عندي مشكلة
بس لاتحجين كدام عمو مصطفى شي 

سديتة من عمة

نص ساعة واندكت باب غرفتي

داليا.. ريتال فتحي الباب

ركضت فتحتة اول مشفتها حضنتها وبجيت بقهر

داليا... كافي بجي اريد افهم الموضوع من البداية سجى كالت لاكين بجنطتج موبايل

دخلت ماما للغرفة جانت عيونها منفوخة من البجي

ريتال... عمة والله مو مالتي ما اعرف شجابة بجنطتي

داليا... زين مشفتي اي وحدة من صديقاتج جانت يم جنطتج

ريتال..هزيت راسي با لا

سجى... داليا الولد اتصل ويكول وينج ريتال

داليا... عزززززا منين يعرفها

سجى... ياريت بس على هاي ولج بي رسائل مينلبس عليها ثوب وكلهن مذكور اسم ريتال بيهن

ومن غير تحويلات الرصيد

ريتال... من سمعت ماما صار عندي غثيان ركضت للحمام شكو بمعدتي ذبيتة عمة داليا اجت غسلت وجهي واخذتني للغرفة

داليا... اخاف هاي ملاك هيجي سوت

ماما.. شنو ليش شبيها ملاك

داليا... ريتال انتي مو كلتي ملاك هددتج كدام كل البنات

ريتال... هزيت راسي اي بس اني وملاك تراضينة

سجى... فهموني شبيها ملاك

عمة داليا حجت الماما كولشي

سجى... عزااا بعيني ليش هيجي ريتال كل هذا يصير واني اخر من يعلم ولج هسه اذا حجينا بعد منو يصدكنا التهمة لابستج ومعندج اي دليل يثبت هاي ملاك السوت بيج هيجي

داليا فدوة ما اريد اي احد يعرف بهذا الموضوع حتى رافد
والله اخاف اذا عرف يتهور ويسوي بيها شي

ريتال...لزمت ايد عمة وبجيت بس اني ممسوية شي والله

ماما... ريتال ابقي بغرفتج وابوج اذا سال راح اكوله مريضة

ماما طلعت وعافتنا كمت ارجف عفيه عمة غطيني بردانة

جابت بطانية غطتني واني بعدني ارجف

داليا... شبيج ترجفين بعدج بردانة

ريتال... حتى اسناني صارت تنضرب وحدة بالاخ من البرد
حجيت بصوت تعبان اي بردانه

راحت جابت بطانية ثانية غطتني بيها

داليا.. اني هسه اروح والعصر ارجع ابات يمج  مراح اعوف وحدج
حبيبتي لاتخافين الله موجود وميرضى بالظلم

واني وامج مصدكيج ونعرف بيج بريئة

باستني وطلعت
غمضت عيني اريد انسى اتمنى يكون هذا حلم واكعد منه والكي كل هذا مصاير بس للاسف هذا مو حلم

صار عندي لعبان نفس كل عشر دقائق اروح اتقيئ معدتي فرغت حسيت معدتي راح تطلع من حلكي هلكد مذبيت من راسي

ماما فوك قهرها حارت بيه كاعدة يمي تبجي وتدعي على السوو بيه هيجي

رجعت نمت بفراشي واني ارجف

ماما بعد غطيني راح اموت برد

غطتني بطانية ثالثة شوية دفيت

سمعت صوت رؤى تبجي وتحجي ويا ماما

رؤى... ماما شنو هذا الكلام السمعتة بنات المدرسة كولهن يكولن لكوا موبايل بجنطة ريتال بنت ست سجى

ماما.. مو موبايلها الله اليعلم منو سوا بيها هيجي

رؤى.. ماكو غير هاي الحقيرة ملاك

ماما.. ما شاءالله طلعتي حتى انتي تعرفين واني نايمة ورجليه بالشمس

رؤى اجتي عليه للغرفة انصدمت من شافت حالتي

رؤى... سودة عليه هاي شصاير بيج

ريتال.. بجيت قوي وحجيت بقهر
رؤى انتي مو دائماً وياي وتعرفين كولشي عني هم شفتيني فديوم حجيت ويا ولد وعندي موبايل محد يعرفة

ماما... بنتي كافي محد طلب منج تبررين اني واثقة منج ومعندي لو ذرة شك بيج

الظهر رجع بابا من الدوام من سمعت صوتة الرجفة زادت عندي غطيت. راسي بالبطانية

جنت افكر اكول بابا اذا يعرف اكيد راح يذبحني

من شفت الوضع هدوء، وماكو صياح طلعت راسي من جوة البطانية

انفتحت الباب دخل بابا من شفتة وجهي انخطف

بابا... رتوو حبيبتي شبيج امج كالت مريضة شنو اليوجع باباتي كومي اخذج للمستشفى

ريتال.. من سمعتة غصب عني دموعي نزلت كدامة

بابا... ليش تبجين
اجة كعد بصفي باس كصتي

هاي شنو وجهج نار
سجى وينج هاي حرارتها مرتفعة

ماما... كومي غسلي واكلي شي حتى انطيج علاج

بابا.. لا خلي ناخذها للمستشفى

ريتال... لا بابا ما اروح مابيه شي

اجت ماما كومتني اخذتني غسلت

رجعت للغرفة ردت اتغطى مقبلوا جابولي اكل بالكوة اكلت شوية

بعده منازل المعدتي رحت ذبيته

رؤى وماما جانوا يسولي كمادات واني من السخونة والراجفة انتهيت

اجت عمة داليا هي هم اشكد حاولت تاخذني للمستشفى مقبلت

اجة الليل واني نفس وضعي حرارتي زادت واي شي اكلة او اشربة اذبة حتى الكمادات مكامت تفيدني

عمة داليا ورؤى بقوا كاعدين وياي للفجر

حتى بابا وماما مناموا كل شوية يجون يشوفوني

جنت من السخونه كلما انام احلم بكوابيس احلم اهلي يموتوني واكعد مفزوعة وابجي

ويا اذن الفجر دخلت ماما للغرفة جانت لابسة ملف الصلاة

ماما... شلون صارت نزلت حرارتها لو لا

داليا... لا والله بعدها وكل شويه تكعد مفزوعة تعيط

ريتال.. جنت اسمعهم بس ما اكدر افتح عيني

سمعت صوت ماما تقرأ القرآن وتبجي
فتحت عيني ماما صدقت ورفعت ايدها تدعي

جانت تدعي بگلب محروك
وجان تنخى الأمام علي عليه السلام

صاحت بصوت عالي يا ابو الحسنين ما فديوم نخيتك ورديتني بجاهك عند الله اريد براءة بنتي
ونذر عليه من تظهر برائتها اجيك حافية

ماما عدها قلادة سيف الامام علي منقوش عليها لافتى الا علي و لا سيف لا ذو الفقار جدي من زمان صاغها وزورها الامام وهداها الماما

ماما نزعتها وخلتها بركبتي
شافتني ابجي حضنتني وتبوس بيه

ريتال.. وخرت راسي من حضنها حجيت بصوت مبحوح اريد مي عطشانه

شربت المي ثواني وركضت للحمام ذبيته
دارجع للغرفة وصلت للباب  وكعت اتخربطت

ركضوا عليه يكوموني اني اريد اكوم مااكدر

اجه بابا شالني واخذوني للمستشفى
صاير عندي هبوط حاد بالضغط شكلولي مغذي وضربوا ابر ما اعرف مال شنو بالمغذي خلص بطل المغذي رجعوا قاسوا ضغطي بعدة نازل
رجعوا شكلولي واحد ثاني من خلص اصريت نرجع للبيت لان شوية ضغطي صار احسن

يومين اني بالفراش عمتي معافتني وماما حتى دوام بعد مداومت

صار ثلاث ايام اني بهذا وضعي جنت نايمة

اجت ماما كعدتني باوعت عليها راجع الدم بوجهة وفرحانه

ماما... كومي ماماتي عندي بشارة الج من تسمعيها راح تكومين تكمزين من الفرح

ريتال.. اريد اسال ماما بس خايفة

داليا...احجي سجى ترى راح اوكع من طولي نذر اذا طلع البالي صح اذبح خروف لوجه الله

سجى تبجي وتحجي عرفنا منو صاحبة الموبايل

ريتال... ماما نطقت الكلام واني انفجرت بالبجي اجتي هي وعمة حضنوني ويبجون وياي

داليا... كافي حبيبتي
يلا سجى احجي منو صاحب هذا الصخام

ماما... مثل متعرفون اني يومين مداومت وحتى تلفوني جنت غالقتة البارحة بالليل فتحتة واتصلت على ست امنة المعاونة ردت أعرف شنو الاخبار وشلونة الوضع بالمدرسة

امنة... بعده الوضع نفسه واحنا اشكد سالنة الطالبات كلها اتكول منعرف شي عن هذا الموبايل

اني علاقتي بامنة قوية حجيتلها عن موضوع ملاك وريتال وعن تهديد ملاك

امنة الله ينطيها العافية اقترحت عليه خطة نسويها بلكي نكدر من خلالها نعرف منو صاحبة الموبايل

اليوم الصبح رحت داومت رحت ويا امنة للمديرة وحجينلها وطلبنة منها تساعدنا
وهي الحمدلله مقصرت

كعدنا بغرفة المديرة اني وامنة والمرشدة التربوية

المديرة دزت على ملاك

من دخلت للغرفة جانت مبينة خايفة ومرتبكة ومن شافتني زاد خوفها

المديرة.. تعالي ملاك كعدي هنا
ست امنة انتي تفضلي احجي وياها

امنة... ملاك بدون لف ودوران كوليلنة ليش خليتي الموبايل بجنطة ريتال

ملاك.. بفزع شنو اني لا ست مو اني هو موبايل ريتال اني شعليه مو ست نورس لكتة بجنطتها

امنة... ملاك كتلج بدون كذب ترى احنا مو غشمى وعدنا مراقبات سريات بكل مكان وهما شافوج وانتي تخلين الموبايل بجنطة ريتال

ملاك.. كامت تبجي لا مو مالتي اني شعليه هاي لان هي بنت المدرسة تريدون تلبسوها براسي

المديرة... بعصبيه ليش احنا شوكت ميزنا بنات المدرسات عنكم كلكم سواسية عدنا

امنة... براحتج لاتحجين احنا راح نرفع الكتاب للتريية وهما يفتحون مجلس تحقيق وراح انجيب البنات الي شافوج تخلين الموبايل الها واندز على اهلج ولاتنسين شي مهم انتي قبل فترة متعاركة ويا ريتال ومهددتها كدام كل الطالبات وكلهم يشهدون بهذا الكلام  وحتى الولد الي اتصل راح انجيبة ونستفسر منه

سجى.. مو بس هيج ابو ريتال راح يجمع عمامة وشيخ العشيرة ويسويها كعدة عشائر لان هاي مسئلة شرف مو لعبة

ملاك... ترجف وتبجي مو اسم بنتج بالموبايل اني ششششعلية

امنة... وشلون عرفتي اسم ريتال بالموبايل بهذا كلامج ثبتي الموبايل الج  ؟

ملاك... راح احجي بس فدوة لاتكولون لاهلي ولاتسوها كعدة عشائر والله اخوية يذبحني

امنة... احجيلنا كلشي من البداية

ملاك... اني وريتال بالعطلة جنا ناخذ دروس تقوية
ريتال من سافرت البيت جدها اني رحت اخذ درس
اكو ولد جان يوكف يم المعهد انطاني رقمة واخذتة

صرت احجي ويا بس هو كل شويه يسالني على البنية الجانت وياي

من بدة الدوام كام يجي يومية يلحكنة
وبيوم خابرني وكالي اني من البداية جنت اريد صديقتج ما اريدج
اني احبها هي واريدج تحجين وياها حتى تاخذ رقمي

اني من سمعته حقدت على ريتال وكلت بيني وبين نفسي اكيد ريتال منطيته عين وبسببها عافني

تعاركت ويا ريتال وقررت لازم احرك گلبها مثل ما حركت گلبي لان اني حبيت حازم

هو بقة يلح عليه حتى يحجي وياها طلبت منه يجيب موبايل وخط حتى انطي الها

وصرت اراسلة بصفتي ريتال وهو صدكني  جنت ناوية اخلي يتعلق بيه وبعدين اكوله اني د اراسلك مو ريتال

من جان يتصل اغير صوتي واحجي ويا اقل من دقيقتين

بس انصدمت من كالي راح اجي اخطبج نار الغيرة حركتني  والهذا السبب خليت الموبايل بجنطتها

سجى... اني والمدرسات بحالة صدمة لسانه انشل
شنو من تفكير عدها شنو من صلافة وجراءة كاعدة كدامنة تحجي بدون خوف وخجل

المديرة.. انتي مو ملاك انتي شيطان

سجى... ماتحملت كمت ضربتها راشدي بكل قوتي ولج يا عار سويتي علاقة باسم بنتي الله ينتقم منج

امنة طلعتني من الغرفة لان تخبلت

المديرة فصلت ملاك ونقصت خمس درجات من سلوكها

وسوت اصطفاف وعلنت قرار فصل ملاك كدام كل البنات وكالتلهم ملاك هي صاحبة الموبايل

ريتال.... عززززززا كمت اضرب على خدي يعني هسه هذا عباله اني احجي ويا

ماما.. اني اليوم احجي ويا ابوج واخلي من يشوف الولد يفهمة بالموضوع حتى لايبقة مكابل بابنا

اجة بابا وماما حجتلة كولشي
بابا تخبل

بابا. كل هذا صاير واني ما ادري لج سجى تخافين على بنتي مني معقوله اني اسويلها شي

سجى...رافد بس هو الله يعلم بحالنة لاتلومني والله عقل مبقة براسي حتى من نفسي جنت خايفة

بابا زعل من ماما وميقبل يحجي وياها

اني صح ظهرت برائتي بس اكو شي بداخلي انكسر
مرات افكر اكول اني لو جنت طالبة عادية مو بنت مدرسة جان اكيد بقيت متهمة وحياتي ادمرت 

الله يساعد الي تنحط بنفس موقفي ومتلكي الي يساعدها بس الحمدلله اكو رب كريم مينسى عباده

رحت توضيت وصليت ركعتين حمد وشكر لوجه الله تعالى ودعيت الله يخلصني من هذا الولد 

من خلصت مديت ايدي على سيف الامام علي وبستة وقررت اروح ازوره ويا ماما

بعدني على السجادة وسمعت صياح ام ملاك بنص بيتنا...

يتبع