رواية فارسي العاشق الفصل الخامس 5 - بقلم بسمة البياتي

_  فارسي العاشق _
( بقلم بسمة البياتي)
_البارت الخامس  _

سمعت صوت صياح ام ملاك طلعت بسرعة اشوف شكو

جانت ام ملاك بنص المطبخ واكفة ويا ماما

ام ملاك... اليوم اگلب الدنيا على راسكم بنتج تسوي السالفة وتلبسوها براس بنتي

ماما... احجي عدل لاتخليني اتصرف تصرف ميعجبج اني الحد هاي اللحظة محترمتج لان مرة كبيرة

احمدي ربج اني وابو يزن سكتنا ومكبرنا الموضوع لو غيرنا ناس جان سوينا دم على هاي سوايت بنتج

ام ملاك... اشو جذيتي الجذبة وصدكتيها ترى المنطقة كلها تعرف بنتج عدها علاقة وصاحبها ليل ونهار مكابل بابكم
ومن نلزمت بالمدرسة ذبيتوا التهمة براس بنتي اليوم افضحكم فضيحة واخلي الميشتري يتفرج

ماما... الظاهر انتي مو مال احترام لو بيج خير روحي ربي بنتج ولمي قذارتها
وعلى هذا كلامج الا انسويها كعدة عشائر ولوين توصل خلي توصل
وهسه راح اسمعج اعتراف بنتج باذنج

ريتال... اني واكفة يم باب المطبخ ارجف وابجي دخيلك ربي شنو هذا الكابوس المجاي ينتهي

ماما راحت جابت موبايلها وشغلت تسجيل بصوت ملاك وهي تعترف على سوايتها وياي

بقيت مذهولة طلعت ماما مسجلة كلام ملاك

ام ملاك.. من سمعت كلام بنتها كعدت بالكاع تلطم وتتوسل بماما تسد الموضوع وتستر على بنتها

ماما...اني وابو يزن سكتنا الخاطرج والخاطر زوجج بس بعد هذا كلامج لا اعذريني مراح اسكت

وهذا التسجيل اليوم اخلي ابو يزن يسمعة الزوجج وابنج

ام ملاك... دخيلج ام يزن والله اخوها يذيحها استري عليها الله يستر على بنتج
والله هي فهمتني الموضوع غلط كالت لكوا موبايل عد ريتال واليوم لبسو الموضوع براسي وفصلوني

ماما.. كومي ام ملاك بس قسماً بالله بعد الي يجيب طاري بنتي لايلوم الا نفسه احنا مراح نحجي شي
بس يكون بعلمج الطالبات كلهن عرفن بسوايت بنتج فاكيد يجي يوم زوجج يعرف

ام ملاك.. فدوة ام يزن ولو مالي عين اطلب منج شي بس معندي غيرج رجعي ملاك للدوام مبقة شي للامتحانات راح يضيع مستقبلها والله حرام سادس علمي وقبل الامتحانات تنفصل

ام يزن... اسفة الموضوع طلع من ايدي وكتاب فصلها انرفع للتربيه

راحت ام ملاك وهي مدنكة راسها

ريتال... ماما سمعتيها شكالت المنطقة كلهم عبالهم هذا صاحبي

ماما... ابوج بس يشوفة يحجي ويا واذا مفاد الكلام ويا راح انبلغ عليه
ارجعي اهتمي بدراستج بنتي ولاتفكرين بهذا الموضوع

بقة اسبوع وتعطلون لازم تشدين حيلج

ريتال... نزعت القلادة وانطيتها الماما

ماما.. ارجعي البسيها هاي صارت الج

ريتال... بس هاي هدية من جدو

ماما.. ماكو فرق بينا

ريتال...من تروحين للزيارة اجي وياج

ماما.... ان شاء الله هالأيام نروح

بالليل بابا كاعد بالاستقبال وحدة وزعلان منا كلنا
رحت كعدت يمه
بابا حبيبي والنبي ما اكدر اشوفك زعلان مني انت شفت حالتي شلون جانت فاصلة عن الدنيا والله المريت بي مو قليل حتى من ماما جنت خايفة

بابا... العتب مو عليج العتب على امج شلون كدرت اتضم هيجي موضوع عني
بس فهموني شلون تتوقعون اني ائذيج الهدرجة بنظركم اني انسان متخلف ليش بس هي امج الربتج وحدها وتعرف اخلاقج واني ما اعرفج

ريتال.. فدوة العينك حبيبي احنا غلطانين وهاي ايدك وراسك ابوسهم بس لاتبقة زعلان ترى جاي احس بالذنب هاي اول مرة تزعل من ماما بسببي دشوفها خطية حتى عشى متعشت

بابا حضني وباس راسي

بابا... لاتبجين باباتي مزعلان
انتي ليش هلكد دموعج رخيصة بسرعة تنزل

ريتال... موبيدي حتى اني صرت اكره هذا خوفي وضعفي

بابا.. انتي مو ضعيفة بس قلبج طيب زيادة عن اللأزم وحساسة
يلا كومي خلي انشوف سجى خاتون ليش متعشت

بابا تراضى ويا ماما الحمدلله

ثاني يوم داومت بالمدرسة جنت خايفة ومرتبكة
ماما حست بيه

ماما.. بنتي ارفعي راسج ولاتخافين انتي مسويتي شي غلط و اي وحدة تحجي وياج كلمة زيادة روحي كولي الست امنة ديربالج بعد تسكتين عن حقج

وصلنة للمدرسة

يامدرسة تشوفني جانت تجي تبوسني

طالبات صفي هم اجوي بوسوني وبقوا يستفسرون ههههه يموتن على الفضايح

حياتي رجعت طبيعية بابا هواية دور للولد الجان يوكف مقابيل بابنا بس من هذاك اليوم اختفى يمكن عرف بالصار

بدت العطلة النراجع بيها قبل الامتحانات ماما طلبت من بابا ياخذنا للنجف نزور حتى توفي نذرها

رحنا للنجف اني وبابا وماما
رؤى ويزن بقوا يم عمتي

من وصلنة ماما وفت النذر وراحت حافية
الاجواء جانت تجنن اهناك
من دخلت الحضرت الأمام علي عليه السلام وزرتة حسيت بالراحة والطمئنينة دعيت هواية وبجيت  فعلاً حسيت اجددت طاقتي بهاي الزيارة
تمنيت ابقة اكثر من يوم اهناك بس مكدرنا ثاني يوم رجعنا

رجعنا للبيت ولتهيت بالدراسة ليل ونهار اقرأ جنت ما انطي راحة النفسي مرات اغفة فوك الكتب

العصر كاعدة بغرفتي وبيدي كتابي دخلت عليه رؤى وجها ينطي الوان

رؤى... ولج ريتال الحكي

ريتال... بدون ما افهم شنو الموضوع كمزت من مكاني لان صايرة بيه خوفه

عزاااااا شكوو شبيج

رؤى... على كيفج لاتخافين
بس هذا صاحب ملاك ابيتنا هو وزلم اثنين

ريتال.. من كالت صاحب ملاك دخت وكعدت بالكاع لساني صار ثكيل اريد احجي ما اكدر

رؤى... عفيه لاتخوفيني شبيج هاج شربي هذا المي لاتخافين ترى ماكو شي كاعدين عادي وديسولفون

دخلت ماما للغرفة شافتني كاعدة بالكاع ولوني مخطوف

ماما.. لج رؤى هاي سوالفج اكيد خوفتيها
كومي ماما ماكو شي لاتخافين يمكن هذا جاي يخطبج

ريتال. ششششششنو عزااا بعيني والله لو بس هو يظل بالدنيا ما اريدة

ماما...حبيبتي اهدي هو منو الينطيج قابل زايدة علينا وننطيج الهذا السكط

راحت ماما بقينا اني و رؤى

رؤى... اروح اسمع شيحجون الفضول موتني

بقيت كاعدة وحدي
عمة بعينة هذا مصدك نفسه وجاي يخطب

بقوا كاعدين اكثر من ساعة وبعدين طلعوا

رجعوا ماما و رؤى يمي

احجوا شصار

ماما... ابوج حجة ويا وفهمة بسالفة ملاك والظاهر هو اصلاً جان يعرف
ابوج كالة اني معندي بنات للزواج وبعد ديربالك تجي توكف كدام الباب

حازم... ممكن اعرف ليش رافضني

رافد...اني بنتي طالبة وما افكر هسه ازوجها لا منك ولا من غيرك

حازم... عادي هي مجرد خطوبة ومن تكمل دراسة نتزوج

رافد... ابني انت ليش مدتفهم عليه اني بنتي ما انطيها وهي اساسا رافضتك

حازم... رفع راسة بكل ثقة شوف عمي اني رايد بنتك ومراح اتركها وراح ابقة اكرر طلبي الى ان توافقون

ماما... ابوج تعصب عليه وهذولة الويا جاين بالكوة اخذوا وطلعوا

حتى اهلة مجاين ويا جايب اقارب اصدقائة

ريتال... عفيه ماما اشو صرت اخاف من هذا

ماما... لاتخافين ميكدر يسوي شي
اساسا اني وابوج قررنا نبيع البيت وننتقل الغير منطقة بس تخلصون امتحانات

رؤى.. عاااا ليش انشيل شكو تخافون منه

ماما.. تنهدت بتعب احسن بنتي تذكرون مرة من شباب المنطقة شايفي يوكف ومتعاركين ويا طلع كايللهم اني صاحب ريتال وجاي عليها

وابو رائد بوقتها من ابوكم اتصل عليه استحى يكول الرافد هذا الكلام
وحتى ملاك وامها قبل هذيج المشكلة جانوا يابيت يروحوله يكولون صاحب ريتال مكابل بابهم و واكف

احسن شي نترك هاي المنطقة

ريتال... يعني سمعتي صايرة زفت بالمنطقة كمت ابجي

ماما... لا بنتي هسه الناس كلها عرفوا هذا صاحب ملاك الحية

بس احنا نترك المنطقة احسن حتى هذا بعد ميندلنة ونخلص منه

حازم... طلعت من بيت اهل ريتال واني مشتعل نار ريتال الي ومتصير الغيري

اني حازم عمري 23  سنة  احنا اربع اخوة واختين اني اصغر واحد بيهم ساكنين بمنطقة تصير باطراف تكريت
ابوية شخص محترم كلها تحبه وتحترمة
انسان جداً متدين عنده جامع كبير بصف بيتنا واكثر وقتة بالجامع لهذا الناس تسمي الشيخ مرات الناس الميعرفونه عبالهم والدي شيخ عشيرة ميعرفون ان هو شيخ جامع

الناس العندهم مشكلة يجي عليه هو يحلها اليريد يزوج هو يعقدلة اليريد نصيحه ينصحة

عندة مضيف يم الجامع ومسوي للعزائم هوايه ناس تجي من كل مكان شيوخ سادة اصحاب رتب عسكرية حتى الناس الفقرة والمحتاجين المضيف مفتوح الهم
هوايه متكفل عوائل ويساعدهم

اخواني ثلاثتهم نفس طبع ابوية وشخصيتهم نفس شخصيتة بس اني اختلف عنهم
بسبب دلال امي صرت انسان فاشل
لا بدراسة نافع ولا بشغل
احنا حالتنة المادية الحمدلله زينة عدنا هواية اراضي لزراعة القمح
وعدنا اكثر من مصنع للخشب وصناعة الابواب والشبابيك خواني هما لأزمين الشغل

اني جنت اي شي اريده اطلبه من الحجية وهي متقصر وياي  ابوية واخواني تعبوا هلكد ما ينصحوني بس ماكو فايدة

هما كلهم مزوجين ومستقرين بس اني مثل العصفور اتنقل من شجرة الشجرة

ما اكدر أقاوم الجمال اي وحده حلوة  لازم اصيدها وهنا البنات بسرعة ينطني مجال خصوصاً من يشوفن وسامتي و سيارتي وكشختي  بالنسبة للبنات اني كامل المواصفات

بيوم رحت على مؤمن ابن اختي للمعهد الياخذ بي دروس تقوية جنت واكف وطلعوا بنات أثنين
لفتت انتباهي بنية تسحر العين سبحان الله جمال ونزاكة صح مرفعت وجها بس من طولها وجسمها بياضها عجبتني

جانت ثكيلة عكس البنية الوياها كل شويه تباوع عليه وتبتسم

اني بقبت مركز على الغزال الحلوة
هي من شافت سيارة اجتي عليها رفعت راسها صدقة المحمد على هاي العيون

من يومها صرت السايق الخاص المؤمن اودي واجيبة بس علمود اشوفها مرة ثانية  بس ماكو

اجت صديقتها وحدها ذبيتلها رقمي وهي بسرعة اخذتة
  اني جنت اريد عن طريقها اوصل للبنية الجانت وياها

صارت مراسلات بينه وحجي جنت كلما اسالها على صديقتها تغلس

طلبت اروح اشوفها يم المدرسة ومن رحت شفت صديقتها

صرت يومية الحكهم

بس للاسف هي كامت مترجع ويا ملاك

متحملت صارحت ملاك بالحقيقة وطلبت منها تنطي رقمي الريتال

هي بالبداية بجت ولطمت بعدين وافقت لان طمعتها بالفلوس والهدايه

بس الحقيرة وهمتني انو اني داحجي ويا ريتال
اني من جنت اروح المنطقتهم تعرفت على ولد هناك وصار صديقي

ومن صارت المشكلة بالمدرسة هو بلغني لان اختة وياهن وهي حاجيتلهم

مرة  جنت واكف يم بابهم اجوي عليه شباب المنطقة تعاركوا وياي كتلهم اني جاي على صاحبتي
متقصد هيجي كلت لان اخاف احد من شباب المنطقة  يتقدملها وتوافق

قررت اخطبها فاتحت والدي بالموضوع بس رفض لان احنا مناخذ غريبة والمصيبة بنت خالتي من هي صغيرة محجوزة الي

من رفض ابوية كتلة احبها
هو سمع احبها وعندي علاقة بيها لو تخبل يكول الله اليعلم هاي منين متعرف عليها 

وهلمرة حتى امي تخلت عني علمود بنت اختها
اني بقيت متمسك بموقفي  رحت على صديقي اخذت ابو وعمة وياي وجيت اخطبها  بس انصدمت من رفضوني بس هينة ريتال لو اموووت ما اعوفج اني وراج والزمن طويل.....

يتبع....

مساء الورد حبايبي

اعذروني بنات لان صار كم يوم انشر بوقت متاخر بس جداً مشغولة

بنات راح اوقف النشر البعد العاشر من محرم

تحياتي الكم بسمة البياتي