رواية فارسي العاشق الفصل الثالث 3 - بقلم بسمة البياتي

_  فارسي العاشق _
( بقلم بسمة البياتي)
_البارت الثالث _

ريتال.. شعوري بهاي اللحظة مينوصف بقيت مصدمة  اريد استوعب كلام ملاك مجاي اكدر شنو بكت حبيبها

شششنو انتي اشتدتحجين مستحيل اني اسوي هيجي شي

ملاك... لج كافي كذب انتي انكشفتي وظهرتي على حقيقتج بس يا ريتال اذا مدفعتج الثمن غالي فلا اتسمى ملاك ويجي يوم راح تذكرين هذا كلامي

ريتال... واكفة ارجف نفس كل مرة مكدرت اسوي شي ولا ادافع عن نفسي معندي سلاح غير الدموع
ملاك عافتني وراحت اكو بنات لحكوها يستفسرون منها على الموضوع واكو بقوا يسالوني واني ما أعرف شجاوبهم

رفعت راسي شفت البنات مسويات دائرة ومخلين ملاك بنصهن ويستفسرن منها
تمنيت الكاع تنشك وتبلعني  ولا هذا الموقف الاني بي

اجت مدرسة الكيمياء حتى تمتحنة اني بعدني نفس وضعي دموعي تنزل مثل الشلال

ست وصال.. ماما ريتال شبيج تبجين

ريتال... باوعت عليها وما اعرف شجاوبها بقيت ساكتة وزدت بالبجي

ست وصال... احجي بنتي تريدين ادز على امج تجي تشوف شبيج

ست وصال... مسحت دموعي لا ست مابيه شي بطني شوية توجعني

ست وصال... اطلعي ارتاحي واني غير يوم امتحنج انتي اشطر طالبة عندي ما اريد درجتج تنزل

ريتال... لا ست صرت احسن عادي راح امتحن

هذا اليوم كان اصعب يوم بحياتي احس الوقت مديمشي والدروس طولت

ماما بالفرصة اجت عليه هم سالتني شبيه خفت اكوللها على كلام ملاك اضطريت اكوللها نفس الكلام الكلتة الست وصال
وهاي جانت خطوة غبيه مني لان محجيتلها الصار

من هذا اليوم انتهت صداقتي بملاك

ملاك بدت تبث سمها عليه طالبات المدرسة كلهن عبالهن اني فعلاً عندي علاقة بحبيب ملاك  واحنا لان بنات منطقة وحدة البنات صاروا حتى لاهلهم يحجون ويكولون ريتال بنت ابو يزن مصاحبة

بهاي الفترة مرتين اجوي عليه خطابة جانوا يجون مرة وبعد ميرجعون واهلي مهتموا الهذا الموضوع لان هما أساساً مينطوني اذا ما اكمل دراسة

اليوم العصر متحظرين دنروح البيت عمتي داليا
بابا جان راكن سيارتة كدام الباب جيت داصعد لفت انتباهي سيارة واكفة بالركن كدام بيتنا

عزاا هذا صاحب ملاك هو جان نازل من السيارة مرتكي على البنيد وديباوع علينا ويبتسم
انداريت على رؤى شفتها هي هم تباوع عليه ومصدومة
صعدنا بالسيارة بالطريق رؤى حجت وياي بصوت ناصي

رؤى... اكولج ريتال هذا مو هو نفسة الجان يلحكنه

ريتال.. اي هو

رؤى.. عزاا هذا شعنده واكف مقابيل بيتنا

ريتال.. بهمس ولج ما اعرف اني هم مثلج انصدمت
هسه سكتي من نرجع راح احجيلج كولشي

رؤى... لازم صايرة احداث اني ما ادري بيها

ريتال.. بحسرة اوووف كولي مصايب مو احداث

رؤى... خرررب هسه اني شراح يصبرني الحد منرجع

وصلنا البيت عمتي اني اليوم ابد مو على طبيعتي حتى عمة داليا انتبهت عليه

خو رؤى موتتني تحوم وراية الفضول كتلها بس تريد تعرف شصاير

رحنا للمطبخ اني و رؤى نساعد عمة بتحظير العشى
رؤى كعدت تسوي زلاطة واني وكفت اكلي كبة

داليا... رتوو شبيج احسج شايلة هموم الدنيا على گلبج

ريتال.. من سمعنها هيجي حجت دموعي نزلت
عمتي جانت بيدها دجاجة دتبلها حتى تشويها من شافتني بجيت بسرعة نشفت ايدها واجتي عليه 

داليا...هاي شبيج ليش هاي الدموع

رؤى.. عمة يمكن صايرة مصيبة اني هم كاعدة على نار دانتظر تحجيلي

داليا... يا ساتر مصيبتيش ريتال احجي ترى قطرة دم مبقة بيه من الخوف

ريتال... هسه ما اكدر احجي شي اخاف ماما تجي وتسمعنة من يصير مجال احجيلكم

صبينا عشى وتعشينا بعد العشى اني و رؤى رحنا نغسل المواعين واهلي بقوا يتعللون ويا عمو مصطفى وعمة داليا

بابا.. يلا بنات تحظروا حتى نرجع تاخر الوقت

مصطفى.. ابو يزن بعد وكت ليش متباتون اهنا

بابا.. بيت العامر ان شاء الله بس والله تعبان وباجر جمعة اريد اشبع نوم

داليا.. فدوة عوفوا البنات يمي  وباجر احنا نرجعهن

بابا... بكيفهن اذا حابات يبقن عادي خلي يبقن

اهلي ترخصوا وراحوا 

بالليل كاعدين اني وعمة ورؤى

داليا... اي ريتال هاتي ما عندج احجيلنة شنو الديصير وياج

ريتال... حجيتلهم كولشي عن علاقة هذا الولد بملاك وشلون اجتي كدام الطالبات تهمتني اني اخذتة منها وعندي علاقة بي

عمة داليا صارت اعصاب اول مرة بحياتي اشوف عمة هلكد عصبيه

داليا.. لج انتي مخبلة لو شنو ليش تسكتين على هيجي موضوع حساس
هذا البراسج عقل لو فراغ

ريتال... والله خفت احجي والموضوع يوصل للادارة وماما خطية تنحط بموقف محرج كدام   المدرسات

داليا... ولج يا امي سكوتج اكبر غلط وانتي بهذا تصرفج ثبتي التهمة عليج هسه البنات اكيد صدكوها وبقوا يحجون عليج اهنا وهناك

رؤى..زين ليش محجيتلي اني ليششششش  خلي توكفلي اذا مطيحت حظها واخليها تصيرة عبرة الكل البنات

داليا.. رؤى ترى الشغلة متنحل بالعركة والضرب ريتال امج لأزم تعرف وتحجي ويا ملاك وتوكفها عد حدها

ريتال.. بس هي هالأيام ساكتة مدتسوي شي

داليا... بعد اذا تحجي اي كلمة تروحين تكولين الاهلج مفهوم

ريتال... زين عمة هذا صاحبها اليوم واكف كدام بيتنا واني خايفة منه

داليا... اذا بعد شفتي واكف اتصلي عليه وبلغيني واني اتصرف

ثاني يوم رجعنا للبيت
جنت خايفة من رؤى لاتسوي مشكلة لان تكوم وتكعد تتوعد الملاك

الاحد داومنا من كملنا الدرس الثاني وصارت الفرصة
مثل متوقعت اجتي رؤى ومبينة ناوية على عركة راحت وكفت كدام ملاك

رؤى... ولج ياحقيرة جاية اتشمرين زبالتج على اختي منو هاي البايكة حبيبج العار

ملاك.... هيوووو احترمي نفسج ولاتغلطين شبيج جاية حامية عليه

رؤى.. ولج عبالج اني ريتال واسكتلج اليوم امسح بيج الكاع
شنو نسيتي سوالفج من جان يومية يلحكج وانتي تتمضحكين ومكيفة ومن مل منج وعافج جيتي تتهمين اختي

اليوم اخلي بابا يجي على اخوج وابوج وعود احجي هذا الكلام كدامهم

ملاك.. وجها صار الوان من الخوف رؤى عيني اني صح اتسرعت وغلطت ويا ريتال واعرف بنفسي اني غلطانة حتى اليوم جنت ناوية اجي اعتذر منها واراضيها كدام البنات كلهم

ريتال... بقيت فاكة حلكي مثل الهبلة خرررب شبسرعة غيرت كلامها سبحان مغير الاحوال

رؤى... وربي اذا بعد جبتي طاري ريتال على لسانج اكصة الج

عافت ملاك جامدة بمكانها وراحت

اروح فدوة الاختي شلون رفعت راسي ودافعتلي ربي لايحرمني منها

ملاك اجت باستني وعتذرت مني بس اني بقيت اجنبها وعلاقتي بيها محدودة مو مثل قبل

مرت عشر ايام الوضع هدوء
اليوم المغرب كاعدين دخل علينا بابا متعصب وضايج

ماما... شبيك رافد اشو مو على بعضك

بابا... جنت كاعد بالاسواق يم مصطفى اجة ابو رائد يتسوك ومن شافني كال

ابو رائد... اكو ولد صارلة فترة يوكف سيارتة بالركن كدام بيتك اليوم شباب المنطقة راحوا تعاركوا ويا

ابو يزن... زين معرفت شعنده يوكف يمعود اخاف يطلع ارهابي وديراقب بيتي 

ابو رائد... والله ما اعرف من ارجع اسال ابني لان جان ويا الشباب

ماما... عزاااا روح  اسال الشباب عليه

بابا... اتصلت على ابو رائد كال خلي يولي هذا واحد سرسري ابو بنات

ريتال.. من سمعت كلام بابا صار مغص بطني من الخوف

رؤى... بابا ترى هذا نفسه الجان يلحكنة

بابا... شششششنو وانتي شعرفج وليش مكتيلي

رؤى... هذاك اليوم من رحنا البيت عمة اني وريتال شفنا واكف بس محجينا

بابا... اذا بعد وكف ابلغ الشرطة عليه واخليهم يسحلوا من اذاناتة هذا السكط

ثاني يوم كاعدة بالدرس والصف هدوء كلنا منتبهين على شرح المدرسة فجأة صار صوت نقال بالصف والمصيبة الصوت اجة من جنطتي المدرسة والبنات كلهم باوعوا عليه

اني ايدي انشلت اريد امدها على الجنطة ما اكدر

ست نورس... اجت وكفت يمي شنو هذا الصوت ريتال انتي مو تعرفين ممنوع اي طالبة تجيب وياها موبايل واذا عدها شغلة ضرورية تجيبة تخلي بالادارة ليش مخليتي يم امج

ريتال... عيوني انترست دموع جاوبتها بصوت مخنوك والله مجايبة موبايل ما اعرف شنو هذا

ست نورس عقدت حواجبها سحبت مني الجنطة وطلعت موبايل نوكيا صرصر من الجنطة

ريتال.. وكفت مفزوعة وخايفة

ست نورس... رفعتة بوجهي وحجت لعد هذا شنو؟؟؟

ريتال...اشهك وابجي ست والله مو مالتي ما اعرف شجابة بجنطتي

ست نورس اخذت الموبايل وكالت امشي وياي للادراة

اخذتني الغرفة المعاونة
جانت بالغرفة المعاونة ومدرسة ثانية من شافوا هذا وضعي استغربوا
ست نورس دزت على ماما هم اجتي

ست نورس.. سجى هذا النقال دك بجنطة ريتال وهي اتكول مو مالتي

سجى.. ششششنو يا موبايل انتي اشدتحجين نورس
ريتال احجي شنو الموضوع

ريتال... ماما وغلاتج مو مالتي وما اعرف شي عنة والله والله مو مالتي انهاريت بالبجي

رجع رن الموبايل المعاونة اخذتة وفتحت الخط وشغلت  المايك

الوووو
الووووو حبي ريتال ليش ساكتة

الكل فتحوا عينهم من كال ريتال

اباوع على ماما داخت ورادت توكع ست نورس سندتها
بهاي اللحظة حسيت بيني وبين الموت شعرة......

يتبع..

مساء الخير حبايبي
اعتذر لان البارت اليوم قصير لان مشغوله
انشاءالله اعوضكم بالبارت القادم
عندي موضوع وياكم اذا تحبون انشر يوميه اني البارت الي انزله بحدود 2000حرف
اما اذا تريدون البارت يكون اطول راح اضطر انشر بين يوم ويوم الاختيار الكم حبايبي انطوني خياركم بالتعليقات
احبكم بسمه البياتي