رواية فارسي العاشق الفصل الثالث والعشرون 23 - بقلم بسمة البياتي

_  فارسي العاشق _
( بقلم بسمة البياتي)
_البارت الرابع والعشرون _

افتر بالغرفة مثل المخبلة ياررررررربي اني شسويت بنفسي لو باقية ساكتة ومتحملة التعب والذل ولا فارس يروح يم صبا

فارس ماكو ماصعد اكيد راح يصلي ظليت انتظره واني محتركة بنار

نص ساعة واجة فارس اول ما شفتة هجمت عليه
لزمتة من دشداشتة انتتتتتتتتت ششششسويت تريد تروووووح يمها موووو
حنيتلها

فارس... يولو اهدي وخلي افهمج الموضوع مو مثل ما متصورة

ريتال... شششششتفهمني انت مو وعدتننننننني وحلفت ليششش تراجعت عن كلامك

فارس... استغفر الله نصي صوتج وخليني احجي لاظلين تهوسين

ريتال... ما اريد افهم ششششششي ماتروح يمها لك والله امووووووت اذا اشوفك وياها

انهاريت كعدت بالكاع ابجي

فارس... كومي يولو بس سمعيني وبعدها شتحجين احجي

ريتال... خلي يخلون كل الشغل علييييييه لو اعرف انظف البيت كله وحدي عندي ارحم من ما أشوفك يمها

فارس.... كعدتها على الجرباية وحضنتها اريد بس تهدء وتبطل بجي

بنيتي سمعيني اعرف الموضوع صعب عليج واني وعدتج بس يولو اني براسي شي واريد انفذو

اني اعرف صبا هذا مو تفكيرها وملعوب بعقلها صدكيني اسبوع واحد مراح تتحمل هذا الوضع
ولج المرض معشش براسها اني معاشرها واعرف طينتها

ريتال... مااااااا ما اكدر فارسسسسس فرضاً عجبها الوضع ورادتك تبقة اني شششسوي مفكرت بيه

فارس... صبا مستحيل تتحمل تبقة بالبيت ومتروح الاهلها
يولو انتي فكري بالموضوع وحده صارلها سنين عايشة بالوهواس والخوف يعني معقولة راح تكدر اتغير تفكيرها بين يوم وليلة

ريتال...والله ما اكدر موبيدي حتى لو بس اسبوع مراح اكدر اتحمل صعببببب عليه هذا الشي

فارس... الخاطري تحملي والله مو هين عليه قهرج وزعلج بس اني اريد انهي هذا الموضوع

هساع ما اكدر احجي شي لساني مكصوص واذا يصير شي وادافعلج الكل يوكف بوجهي ويذكروني بهجري الصبا
هالمرة اذا هي بنفسها رجعت رفضتني لو بعد يصوغوها بالذهب ما اگرب منها

وبعد محد يكدر يفتح حلكو ويلومني اريد اوكف الكل عد حدهم وما اخليهم بعد يدخلون بحياتنا

ريتال... ظليت ساكتة معندي غير الدموع اعرف كلامه صح بس مجاي اكدر اتقبل الموضوع

ظليت بغرفتي الثاني يوم ابد منزلت
فارس طول الليل يحاول يقنع بيه ويهديني
بس هيهات نار قلبي ممكن تهدء

جنت بالكلية كاعدة ويا رهف هي الوحيده اشكيلها همومي وما اضم عليها شي

رهف... رتوتة ترى كلام فارس منطقي وصحيح
اضغطي على نفسج وتحملي هاي الكم يوم

ريتال.. ولج والنبي موبيدي ما اكدر شلون تريدني اتحمل اشوفة كدام عيني يروحلها

رهف... اوووف الله يساعدج
بس المصلحتج لأزم تكونين قوية واني رأيي مثل رأي فارس
صبا من سابع المستحيلات راح تبقة صامده وتعيش حياة زوجية عادية انطيها بس كم يوم وتستسلم ونسرين وعمتج يبقن بسواد وجهن

ريتال... رجعت للبيت صعدت الغرفتي بدلت ونمت حتى اكل ما أريد
الشغل بس خلوا عليه مواعين العشى وياريتهم لو عايفني اشتغل مثل قبل ولا هذا الأحساس الهسه داحسه
فارس اليوم يروح يمها احس گلبي يريد يوكف من الوجع والقهر

نمت وكعدت قبل المغرب فارس نايم وحاضني صفنت عليه
يكولي احبج وما اكدر بدونج وهو عادي عنده يروح يم غيري
بعدتة عني ردت اكوم رجع جرني الحضنه

وخرررر فارس اريد اكوم
اليوم يوم صبا شجابك يمي 

فارس... اهوووووو وتالي وياج كافي يولو خلصتي گلبي

ريتال... وعلى شنو خلصت گلبك ترى محد جابرك تجي هنا

فارس...اكوم اطلع احسنلي

ريتال... طلع فارس وعافني بقهري هذا بعده مرايحلها وهيجي تغير عليه

نزلت جوة دخلت للمطبخ هند وشيماء كاعدات يشربن شاي

هند... هلا والله حدري شربي جاي ويانه

ريتال... اشو البيت هدوء لعد وين البقية

هند... عمتي وام شيماء سيرو على بيت عمي

نسرين وصبا بس تغدو وطلعوا ولهساع بعدهم ما رادين

ريتال.. انخمط گلبي عزااااا هاي بس لا صدوك اخذتها الطبيب نفسي حتى تعالجها

هند... يولي وين صافنة شبيج

ريتال.. هاااا مابيه شي رحت صبيتلي اكل وكعدت اكل بس والله حتى لأكل احس مابي اي طعم

دخلن صبا ونسرين و رغد من برا محملات بالعلاليك

نسرين...اووووف يولو متت رجليه ما احس بيهن من الوجع

ريتال... مبين تعبانات كل وحدة كعدت بمكان ومدت رجلها

سلمت على رغد اشو هاي ردت عليه من ورا خشمها مو اني ناقصة انوب هاية عليه

باوعت على صبا شكلها بي تغيير مبين حافة

نسرين... يولو صبا شوفيهن شعرج شلون طالع حلو

صبا نزعت الحجاب جانت صابغة وميشة رغم سمرة بس الشقار لايكلها
شبت نار الغيرة مبين ديجهزوها اله ويريدوها تحلى بعينه

هند... جثير حلو بالعافيه عليج

نسرين... شوفي الهند ملابسج

صبا طلعت ملابسها تشوفهن الهن
سبحان الله صبا  مثل الالة شيكولها تنفذ

اباوع على الملابس كلهن سيتات نوم وملابس بيت مشلحات

نسرين اشكد حقيرة متقصدة اتخليها اطلعهن كدامي

رغد.. يولو فارس اذا شافهن عليج راح يتخبل هههههه راح يحبسج بالغرفة وميخليج تطلعين

هند... باوعت عليه بقهر
بالعافية حلوات شيليهن لايتوسخن

ريتال... كمت اخذت ماعوني غسلتة وجيت اصعد فوك

هند... هاي وين عليش كمتي

ريتال...عندي دراسة اروح اقرأ
كملت كلامي وطرت الغرفتي اول ما دخلت خليت ايدي على حلكي اكتم شهكاتي

بجيت الحد ما تعبت كمت غسلت ورجعت طلعت الملأزم اريد ادرس بس ابد ولا استوعب شي

بعد صلاة المغرب رجع فارس

فارس... دحجت عليها عيونها حمر كعدت بسدها
بنيتي عيونج راحت مو كافي بجي

ريتال... ومنو كالك باجية كولشي مابيه

فارس... عجل عيونج ليش حمر

ريتال.. متحملت خليت ايدي على  وجهي ورجعت ابجي

فارس... استغفر الله جريتها الحضني
لوما انطيت كلمة جدام ابوية فلا جان رحت يمها

ريتال... فارس راح اموووت كدامي جاي اجهز نفسها الك رايحة للصالون
حتى ملابسها المشتريتهن طلعتهن كدامي
اشوف سيتات النوم بعيني وتريدني ما انقهر

فارس... هههههههههههه وهاي كل عقلج غاثة روحج على هالسالفة

ريتال... وخرت راسي من حضنه لاتضحك انت شكوو عليك اكيد فرحان

فارس... هههههههه والله كاعد اضحك على عقلج
هههههه هي بداية زواجنا ما لبستلي ثياب نوم تريدها هساع تلبس

ريتال... اي اكيد راح تلبس حتى تغريك وتظل يمها

فارس... بنيتي صبا تستحي تغير ثوبها جدامي
مو عادي تلبسلي مشلح

ريتال... اذا خواتك وراها ويشجعوها اكيد تلبس

فارس... لا ماتلبس صبا تخجل من مكان صدرها الشايلينو

ريتال... سكتت واذكرت كلامها من كالت النسرين اني حتى كدام اختي استحي ابدل ثوبي

فارس ممكن طلب

فارس.. امري يبعد الروح

ريتال... اريد منوم

فارس... فتحت عيوني يولو شسوين بي

ريتال... غصيت بالبجي حتى انام وما احس بشي من انت يمها

فارس... شبت نار بگلبي من كلامها
انعل ابو صبا لابو اليروحلها كافي ما اتحرك من هين اني يمج حضنتها قوي لوبيدي ادخلها بين ضلوعي بستها برأسها كافي يبعد فارس واهلو

ريتال.. ظليت ساكتة بحضنة رغم كلامة بس هم ما رتاحيت لان اعرف اذا ميروح اليوم باجر يروح لأن انطى كلمة الأبو

ثاني يوم الصبح من نزلنا اني ويا وجه نسرين وامه مايكصة السيف مدلغمات وكاعدات
وظلن طول اليوم يبسمرن بيه لان فارس مراح الصبا البارحه

باليل قبل لايروحلها اجه يطيب خاطري ويصبر بيه حتى لا اضوج

فارس اي وقت باليل او الفجر وحتى الصبح لاتجي الغرفتي ما اريد اشوفك الحد ما ارجع من الدوام

فارس...ليش يولو مو متعودين نكعد نتريك سوى حتى من وراج تعلمت على الكعدة من صباحيات الله 

ريتال.. ما اريد فارس عود اتريك انت وصبا

فارس... تحسرت ماشي يبعد الروح يجرالج

ريتال. راح فارس وراحت روحي ويا عندي حب مهدء مال حساسية هم يرخي الجسم وهم ينوم لان مرات جسمي يتحسس ويصير احمر اخذ منه

اخذت حبايتين  وفعلاً ساعة واشتغل مفعول الحب ونمت

كعدت الصبح باوعت المكان فارس انعصر گلبي دخيلك ربي شلون راح اكدر اتحمل

كمت غسلت وبدلت ونزلت جوة

كعدنا اني ومؤمن نتريك صح نفسي مسدودة بس مردت اشمت امنا الغولة ونسرين بيه خصوصاً من شفتهن شلون فرحانات

مؤمن... اشو خالي اليوم مانزل يتريك ويانه

ريتال.. ما اعرف

نسرين.. هههههه عوفو شرايد منو بعدين ينزل هو وصبا يتركون سوى

ريتال.. مؤمن يخزر بامة يريدها تسكت وهي رداتها من الله انطلقت بالكلام

نسرين... هساع تلكي خالك  نايم بالعسل اكيد سهران للصبح وياها

مؤمن... بيدي كلاص الجاي طريتو بالصينية بكل قوتي من الضربة صار نصين

ريتال.. فزيت من الصوت مؤمن عيونه تطلع منها شرار

نسرين... اسم الله شجاك شبييييييك تخبلت من الصبح

مؤمن... اكوم اوليييييي للدوام احسنلي
يلا ريتتتتتتتال

ريتال... طلعنا اني ومؤمن طول الطريق هو متعصب و ينافخ
والله هذا اشرف واحد بيهم

استمر هذا الوضع ايام صبا حياتها طبيعيه ومتقبلة الوضع

وفارس من يجي يمي يقشمرني بكلامه اصبري اكيد مراح تتحمل
الأسبوع صار عشر ايام وماكو شي جديد

فارس من يكون يمي حتى ما اقبل يتقربلي وهو ميلح عليه ومقدر وضعي

بقينا على هذا الحال عشرين يوم

اليوم من رجعت من الدوام دخلت للمشتمل سمعت صوت صبا تبجي وهند ونسرين يمها

الفضول أشتغل عندي اريد اعرف هاي شبيها

ظليت انتظر شوكت هند تطلع حتى اسألها

طلعت هند اشرتلها تجي الغرفتي

هند... ههههههه هاي يولي شبيج واكفة تاشرين

ريتال...سحبتها من ايدها وكعدتها كدامي
شبيها صبا

هند... هههههههههه يبووووو على الفضول

ريتال... بطلي ضحك واحجي

هند... شمعرفني شبيها مريضة وناصبتها مناحة العصر اختها تجي تاخذها للطبيب گلبت الدنيا تعاركت ويا نسرين

ريتال.. ليششش

هند... اتكولها كل اليجرالي بسببج ظليتي تقنعين بيه وتكولين الزواج معليه بمرضج وهاي نتيجتها

ريتال... شنو هالعيارة صارلها عشرين يوم هسه يلا اذكرت

هند... ولج والله من اول يوم هي تلوب بس نسرين و عمتي يقرون براسها

هساع جانت اتكول النسرين حتى اهلي انحرمت منهم بسبب فارس وهذا فارس هو يتقصد هيجي يسوي بيه جاي ينتقم مني

ريتال... ياااااا عزاااا هاي من كل عقلها على شنو ينتقم منها

هند... شمعرفني يولو كاعد تخيط وتخربط وما تعرف شتحجي

ريتال... اكولج اخاف هاي حامل

هند... لا نسرين سالتها كالت لا مو حامل

ريتال...تنهدت براحه

هند... اشوفج فرحتي ههههههههه

ريتال...ههههههه لا بس عبالي صارت زينه وتقبلت وضعها

هند... يمعودة طبع الي بالبدن مايغيرو غير الجفن
يلا اكوم اروح عفت جهالي وحدهم

ريتال... ياااااي وأخيراً راح يرجعلي حبيبي تمددت بفراشي واني الأبتسامة شاكة حلكي

من الفرحة مكدرت انام ظليت انتظر فارس اريد اشوفة شراح يسوي

بعدني دافكر سمعت صوت فارس برا عاااا هذا شرجعة من وقت

جان صوتة عالي خرررب يمكن علكت برا
اريد اطلع اشوف شكوو بس اخاف

اني هاي الفترة ليل ونهار اتعارك ويا فارس وهو بالكوة متحملني اخاف بس يشوفني يخلي قهرة بيه

مليت من الأنتظار لا اكدر اطلع ولا اكدر ابقة

فتحت باب غرفتي باوعت بالهول ماكو احد وغرفة صبا هم هدوء

طلعت يم باب المشتمل صوتهم عالي جوة

رجعت الغرفتي
بعد انتظار طويل اجة فارس
من شفتة سويت نفسي داقرأ واني كذب ياقراية يابطيخ ميته من الخوف منه

فارس... جنت بالمعمل اتصلت عليه اخت صبا

ام عمر... الووو شلونك خوية

فارس...هلا بيج خيتي الحمدلله انتو شلونكم

ام عمر.. نحمدو على كل حال فارس عندي عتاب وياك

فارس.. خير خيتي بشنو تريدين تعاتبيني

ام عمر... عليش مانع صبا تجي علينا

فارس.. شنو هالحجي شوكت اني منعتها مو قبل جم يوم جانت بايتة يم اهلج

ام عمر... اي صح بس صايرة تجي كل عشر ايام تبات ليلة وترجع انت ماتقبل اكثر

فارس... والله خيتي ما اعتقد هذا الموضوع  يزعلكم  هذا حگي عليها

ام عمر... فارس صبا مريضة مو حمل قهر ومغثة هي تعودت كل جم يم تجي تبقة يمنا تريح نفسيتها
انت اذا ما تقبل عليش من البداية عودتها على هذا الشي

فارس... هساع المطلوب مني شنو

ام عمر... تخف شوية منها وتخليها على راحتها
واريدها اليوم تجينا حتى اخذها للدكتور لان خابرتني تبجي وتكول مريضة

فارس... يصير خير خيتي من ارجع للبيت ادزها الكم

صارت تشكي مني الاهلها بسيطة
رجعت للبيت دخلت الغرفتها

فارس... صرررررررتي تشكين مني الاهلج مووووو

صبا... مشاكيتلهم بس اني مريضة واريد اروحلهم

فارس... اي ومن شنوووو مريضة مني موو

صبا... هو انت كاعد تنتقم مني لان انجبرت تجي تبات هين  اي شششششي يصير بيه انت المسؤول

فارس... جريتها من ايدها ونزلتها جوة

صحت بعلو صوتي يابببببببببة وينك

التمو الكل على صوتي

شيخ... شبيك صوتك واصل السابع جار

فارس.. من ضيمي موووو هاي الجانت ادور حق وحقوق

رايحة  تشكيني يم اهلها وطلعت اني كاعد انتقم منها ومرضتها

شيخ... شنو هالحجي صبا

صبا.. ساكتة وتبجي

فارس.... الكل يسسسسسمعني من اليوم اليدخل بعد بحياتي وحق الحق لحظة ما ابقالكم بالبيت

سسسمعتيني نسسسسسرين شحجيت

نسرين... ياا واني شعليه  اشو انداريت عليه

فارس... لا عبالج ما اعرف شي كل اليجرى من تحت راسج انتي وامي

الشيخ... كافييييي فارس لااظل تصيح بعد محد عليه بيك انت سويت العليك وزيادة
ماعليك اي تقصير

فارس... عفتهم وصعدت

جيت يم ريتال ها هساع ارتاحيتي يولو

ريتال... باوعت عليه شكله ممبين متعصب شعجب
احم على شنو ارتاحيت مفهمت

فارس... يابة اشكد فقيرة ماتعرف على شنو

ريتال... ومنين اعرف مدتشوفني كاعدة بغرفتي وساكتة

فارس.. احلفي ماتعرفين شي

ريتال... لو حتى اعرف اصلاً بعد ميهمني
اني تعودت على هذا الوضع

فارس... جيد عجل يبقة الحال مثل ما هو وصبا غصباً عليها تتحمل ليلة يمها وليلة يمج

ريتال...عززززززا هذا اشو صدك
ذبيت الكتاب من ايدي لازم حضرت جناببببببك عجبك الوضع وكمت بعد متكدر تفارك حضن صبا

فارس... هههههههههه حرنا وياج عجل مو انتي كلتي بعد ميهمني وتعودت

ريتال... وانت شكوووووو بسرعة تصدك

فارس... جيت تمددت بسدها تعالي بحضني مشتاكلج يا ظالمة صارلج شكثر حارمتني منج

ريتال... وخرررر اكو العوضتك وسدت مكاني

فارس....ريتال يشهد الله الوضع جان صعب عليه اكثر منج گلبي وروحي يمج يولو
ليش مكاعد تفهمين مالي نفس بغيرج انتي معششة هين ويأشر على رأسة

ريتال... معت من كلامة دخلت بحضنه
فارس هم بعد تروحلها

فارس... لا يبعد الروح اني يمج وبس

ريتال... زين اذا رجعوا لعبوا بعقلها وهم رجعت تريدك

فارس... اني حذرتهم اليدخل بعد اخذج واطلع واتركلهم البيت

ريتال.. حياتي استقرت ويا فارس

ومن الشغل هم مرتاحة عليه بس مواعين العشى
رجعت اهتم بنفسي ودراستي

اما نسرين وام فارس معليه بيهم اشكد يحجون ويضوجوني جنت اطنشهم

اليوم كاعدين اني ورهف دنسوالف
اجة طالب من غير قسم وكف يمنا وسلم علينا

امجد.. رهف عندي موضوع وياج ممكن نحجي اني وياج وحدنا

رهف... وجهي صار ينطي الوان عزااا هذا شيريد مني

احم احجي كدام صديقتي ما اكدر اوكف وياك بوحدنا

امجد.. برتباك عادي ترى هنا خمس دقائق ما اخذ من وقتج اكثر وراح نوكف اهنا مو بعيد

ريتال... رهف اني رايحة اوكف اهناك من يخلص كلام تعالي

رهف... لزمت ايدها لا متروحين  اذا يريد يحجي كدامج واذا ميريد براحتة

امجد... هذا هو ابقي اختي
رهف اني امجد مرحلة رابعة هندسة كهرباء

اني من جنتي مرحلة اولى اراقبج هوايه سألت عليج وعرفتج وعرفت اخلاقج
رهف اني معجب بيج وقصدي شريف واذا وافقتي اني مستعد اجي اتقدملج

ريتال... اني ورهف وحدة تباوع بوجه الثانية عزااااا هم زين مؤمن مموجود

رهف...انت مبين انسان محترم واكيد الف بنية تتمناك بس اني هسه ما افكر بالارتباط والزواج أريد اكمل دراستي اعذرني اخي طلبك مرفوض

امجد.. رهف لاتستعجلين بالجواب فكري زين واذا تريدين تكملين يلا ترتبطين اني مستعد انتظرج بس هم شي تنطيني الموافقة

رهف... خررررب هذا لزك
اخي مايحتاج افكر هذا جوابي النهائي ان شاء الله تلكي الأحسن مني

جريت ريتال من ايدها يلا امشي

ريتال... ههههههههه وينك مؤمن تعال شوف حبيبتك اجوها خطابة ههههههه

رهف... انجبي واسكتي
عزااااا ما ادري منين طلعلي هذا

ريتال... معجب ولهان خيه ههههههه

بالطريق دنرجع

ريتال.. موني احزر اليوم شصار

مؤمن... صارت بيها موني الله يستر شصار

ريتال.. اليوم اكو طالب من غير قسم اجه يريد يخطب رهف

مؤمن... شنوووووووووو دست بريك وكفت السيارة بنص الطريق

ريتال... عطت ردت اطلع من الجام من قوة الهزة انضربت على خشمي بحافة السيارة
ااااخ  شششششششبيك انت مخبببببببل

مؤمن... يولو احجي منو هذا وعليش ماكتيلي من جنا بالكليه

ريتال... اني لازمة خشمي وايدي انترست دم وراح اموت من الوجع وهذا بعده حاير بالموضوع.......

يتبع